Церковный календарь
Новости


2018-11-16 / russportal
Ген. П. Н. Красновъ. "За чертополохомъ". Часть 2-я. Глава 42-я (1922)
2018-11-16 / russportal
Прот. Михаилъ Помазанскій. Наше церковное правосознаніе (1976)
2018-11-16 / russportal
Прот. Михаилъ Помазанскій. Мысли о Православіи (1976)
2018-11-15 / russportal
Ген. П. Н. Красновъ. "За чертополохомъ". Часть 2-я. Глава 41-я (1922)
2018-11-15 / russportal
Ген. П. Н. Красновъ. "За чертополохомъ". Часть 2-я. Глава 40-я (1922)
2018-11-15 / russportal
Архіеп. Филаретъ (Гумилевскій). Слово (2-е) въ Великій пятокъ (1883)
2018-11-15 / russportal
Архіеп. Филаретъ (Гумилевскій). Слово (1-е) въ Великій пятокъ (1883)
2018-11-15 / russportal
Архіеп. Никонъ (Рклицкій). Православная Русь въ Канадѣ (1975)
2018-11-15 / russportal
Архіеп. Никонъ (Рклицкій). Тайна креста (1975)
2018-11-15 / russportal
Свт. Василій, еп. Кинешемскій. Бесѣда 6-я на Евангеліе отъ Марка (1996)
2018-11-15 / russportal
Свт. Василій, еп. Кинешемскій. Бесѣда 5-я на Евангеліе отъ Марка (1996)
2018-11-15 / russportal
Еп. Григорій (Граббе). Еще объ одной статьѣ (1996)
2018-11-15 / russportal
Еп. Григорій (Граббе). Отвѣтъ (2-й) архіеп. Іоанну Шаховскому (1996)
2018-11-14 / russportal
Ген. П. Н. Красновъ. "За чертополохомъ". Часть 2-я. Глава 39-я (1922)
2018-11-14 / russportal
Ген. П. Н. Красновъ. "За чертополохомъ". Часть 2-я. Глава 38-я (1922)
2018-11-14 / russportal
Архіеп. Филаретъ (Гумилевскій). Бесѣда (2-я) въ день Срѣтенія Господня (1883)
Новости въ видѣ
RSS-канала: .
Сегодня - пятница, 16 ноября 2018 г. Сейчасъ на порталѣ посѣтителей - 8.
Службы съ акаѳистомъ

СЛУЖБА СЪ АКАѲИСТОМЪ БОЖЕСТВЕННЫМЪ СТРАСТЕМЪ ХРИСТОВЫМЪ.

Іере́й: Благослове́нъ Бо́гъ на́шъ...
Чте́цъ: Сла́ва Тебѣ́, Бо́же на́шъ, сла́ва Тебѣ́! Царю́ Небе́сный... Трисвято́е, [и] по Отче на́шъ...

Тропари́ сія́, гла́съ 6:

Поми́луй на́съ, Го́споди, поми́луй на́съ; вся́каго бо отвѣ́та недоумѣ́юще, сію́ Ти́ моли́тву я́ко Влады́цѣ грѣ́шніи прино́симъ: поми́луй на́съ.

Сла́ва: Го́споди, поми́луй на́съ, на Тя́ бо упова́хомъ; не прогнѣ́вайся на ны́ зѣло́, ниже́ помяни́ беззако́ній на́шихъ, но при́зри и ны́нѣ я́ко благоутро́бенъ, и изба́ви ны́ отъ вра́гъ на́шихъ; Ты́ бо еси́ Бо́гъ на́шъ, и мы́ лю́діе Твои́, вси́ дѣла́ руку́ Твое́ю, и и́мя Твое́ призыва́емъ.

И ны́нѣ: Милоcе́рдія две́ри отве́рзи на́мъ, благослове́нная Богоро́дице, надѣ́ющіися на Тя́ да не поги́бнемъ, но да изба́вимся Тобо́ю отъ бѣ́дъ: Ты́ бо еси́ спасе́іе ро́да христіа́нскаго.

Вѣ́рую во Еди́наго Бо́га...

Стихи́ры, гла́съ 6. Подо́бенъ: Все́ отло́жше.

Все́ истощи́лъ еси́ бога́тство щедро́тъ Твои́хъ, живы́й въ мíрѣ любо́вію, и́стинная Любы́, Іису́се, егда́ Себе́ Самаго́ ученико́мъ Твои́мъ да́лъ еси́ въ снѣ́дь на Ве́чери; гряды́й же на Стра́сть во́льную, напослѣ́докъ до́брое соблю́лъ еси́ вино́, Животворя́щую Кро́вь Твою́, и пре́жде Твоея́ сме́рти погре́блся еси́ въ сердца́хъ друго́въ Твои́хъ Пречи́стыми Та́йнами. Погреби́ у́бо моя́ стра́сти, Влады́ко, да Тебе́ любо́вію велича́ю, Твою́ ду́шу за мя́ поло́жшаго! [Два́жды.]

Все́ сокро́вище на́ше взя́лъ еси́, Іу́до беззако́нный, человѣкоубíйцамъ іуде́омъ въ ру́цѣ преда́въ Іису́са. О, несмы́сленный преда́телю! Апо́столъ нарече́нный, и́же ины́хъ спасе́нія иска́ти имѣ́вый, себе́ погуби́лъ еси́; ни́щимъ кра́дый ми́лостыню, ми́лостиваго Бо́га отъ тебе́ удали́лъ еси́. Сему́ любо́вію покланя́емся, въ Не́мже есмы́, живе́мъ и дви́жемся.

Вся́ соверши́лъ еси́ за́повѣди, въ живо́тъ вѣ́чный веду́щія: препоя́сався ле́нтіемъ, но́ги умыва́еши ученико́мъ — ко́ль красны́ но́ги благовѣству́ющихъ! да покоря́тъ вся́ подъ но́зѣ Твоя́ апо́столы, Са́мъ Ся́ ны́нѣ полага́еши ни́зу; свяще́нникомъ небе́сная му́дрствовати хо́щеши, пра́хъ отъ но́гъ и́хъ отряса́я. И мене́ у́бо, Іису́се мо́й, всего́ скве́рнаго очи́сти, да чи́стѣ Чи́стому во вѣ́ки порабо́таю.

Сла́ва:

Приско́рбную ду́шу до сме́рти хлѣ́бомъ живо́тнымъ моли́твы укрѣпи́въ и вино́мъ ду́ха возвесели́въ, дерзнове́нно къ сме́рти прибли́жился еси́. О, гла́са любвеоби́льнаго: Отче, ми́мо отъ Мене́ неси́ ча́шу сію́, да не пію́ ея́ отъ Изра́иля, его́же водо́ю напои́хъ въ пусты́нѣ; а́ще же во́ля Твоя́, да пію́, Пло́ть и Кро́вь Мою́ въ вѣ́чную и́мъ пода́мъ жи́знь.

И ны́нѣ:

Что́ та́ко ско́рое соверша́еши тече́ніе на во́льную Стра́сть, Сы́не Мо́й? — Дѣ́ва глаго́лаше. Ты́ же отвѣща́лъ еси́: Отца́ Моего́ во́лю сотвори́ти до́лженъ е́смь; ду́шу Мою́ вла́сть и́мамъ положи́ти и вла́сть и́мамъ па́ки прія́ти ю́; но на умерщвле́ніе во́льное гряду́, да умерщвле́ннаго человѣ́ка воздви́гну.

На стихо́внѣ стихи́ры, гла́съ 1:

Прише́лъ еси́, Истинное Со́лнце, на за́падъ, къ нога́мъ Іу́ды приклони́вся. О, смире́нія Твоего́! Пе́рвѣе безсту́дному но́ги умыва́еши, за безче́стіе че́сть подава́я. Омы́й у́бо и мене́ слеза́ми мои́ми, Іису́се, да очище́нъ творю́ во́лю Твою́.

Сти́хъ: Поскрежета́ша на мя́ зубы́ свои́ми.

Вои́стинну наро́дъ се́й не вѣ́сть зако́на, Законода́вца бо уби́ти хо́щетъ пребеззако́нный. Грѣхи́ на́ша очи́сти, грѣха́ не имы́й, Го́споди, да не съ востаю́щими на Тя́ осу́димся.

Сти́хъ: Смотря́хъ одесну́ю и возгля́дахъ, и не бѣ́ зна́яй Мене́.

Не вѣ́мъ Человѣ́ка, глаго́леши, Пе́тре, Его́же и Бо́га исповѣ́далъ еси́: Се́й е́сть Человѣ́къ и Бо́гъ, къ Его́же нога́мъ припа́дая ре́клъ еси́: изы́ди отъ мене́, Го́споди, я́ко му́жъ грѣ́шенъ е́смь; Се́й е́сть Человѣ́къ и Бо́гъ, въ вода́хъ утопа́ющу тебѣ́ пода́вый ру́ку; Се́й е́сть Человѣ́къ, Иже те́щу твою́, огне́мъ жего́му, исцѣли́; Се́й е́сть Человѣ́къ, съ Ни́мже добро́ бы́ти ре́клъ еси́. При́зри на мя́, Іису́се, я́коже воззрѣ́лъ еси́ на Петра́, и не рцы́ мнѣ́ въ де́нь испыта́нія: не вѣ́мъ тя́!

Сла́ва, и ны́нѣ:

Область те́мная вои́стинну Тебе́, Непристу́пнаго Свѣ́та, въ нощи́ безче́стіемъ, ра́нами и руга́ніемъ неи́стово срѣта́етъ: сія́ Тебѣ́, Христе́, воздаде́ ро́дъ беззако́нный, я́ко въ нощи́ изве́лъ еси́ и́хъ руко́ю крѣ́пкою и мы́шцею высо́кою отъ руки́ фарао́ни; сія́ Тебѣ́ воздаде́, благодѣ́телю Іису́се, ро́дъ неблагода́рный, я́ко препита́лъ еси́ и́хъ ма́нною въ пусты́ни и напои́лъ еси́ водо́ю изъ ка́мене. Да постыдя́тся у́бо врази́ Твои́, покажи́ си́лу Твоего́ Божества́, я́ко Сы́нъ еси́ и Бо́гъ мо́й! — Дѣ́ва слезя́щи, вѣща́ше.

Та́же: Го́споди, поми́луй, 12. Сла́ва, и ны́нѣ.

Пріиди́те, поклони́мся.., три́жды. Псало́мъ 142-й: Го́споди, услы́ши моли́тву мою́... Сла́ва, и ны́нѣ. Аллилу́ія.., три́жды. Бо́гъ Госпо́дь, и яви́ся на́мъ...

Тропа́рь, гла́съ 8:

Егда́ сла́вніи ученицы́ на умове́ніи Ве́чери просвѣща́хуся, тогда́ Іу́да злочести́вый сребролю́біемъ неду́говавъ, омрача́шеся, и беззако́ннымъ судія́мъ Тебе́, Пра́веднаго Судію́, предае́тъ. Ви́ждь, имѣ́ній рачи́телю, си́хъ ра́ди удавле́ніе употреби́вша! Бѣжи́ несы́тыя души́, Учи́телю такова́я дерзну́вшія. Иже о всѣ́хъ Благíй, Го́споди, сла́ва Тебѣ́!

Сла́ва, гла́съ 2:

Спасе́ніе содѣ́лалъ еси́ посредѣ́ земли́, Христе́ Бо́же, на Крестѣ́ пречи́стѣи ру́цѣ Твои́ просте́рлъ еси́, собира́я вся язы́ки, зову́щія: Го́споди, сла́ва Тебѣ́!

И ны́нѣ, гла́съ то́йже:

Благообра́зный Іо́сифъ, съ дре́ва сне́мъ пречи́стое тѣ́ло Твое́, плащани́цею чи́стою обви́въ, и воня́ми во гро́бѣ но́ве покры́въ положи́.

Го́споди, поми́луй, три́жды. Сла́ва, и ны́нѣ. Псало́мъ 50-й: Поми́луй мя́, Бо́же...

Кано́нъ, гла́съ 6.

Пѣ́снь 1.

Ирмо́съ: Волно́ю морско́ю скры́вшаго дре́вле, гони́теля мучи́теля — подъ земле́ю скры́ша спасе́нныхъ о́троцы; но мы́ я́ко отрокови́цы, Го́сподеви пои́мъ, сла́вно бо просла́вися.

Припѣ́въ: Сла́ва Страсте́мъ Твои́мъ, Го́споди.

Преклони́лъ еси́ колѣ́нѣ моля́ся, Ему́же покланя́ется вся́кое колѣ́но небе́сныхъ, земны́хъ и преиспо́днихъ. Приклони́ся къ моле́нію моему́ и услы́ши мя́, я́коже Оте́цъ моля́щася Тя́ услы́ша.

Отче, въ моле́ніи глаго́лалъ еси́, да Тебе́ и́стиннаго Сы́на пока́жеши, на ра́ны гото́въ е́смь, а́ще и еди́наго зла́ не сотвори́хъ. Мене́, Іису́се мо́й, мно́га зла́ сотво́рша, мно́гихъ изба́ви муче́ній.

Сла́ва: Въ по́тѣ лица́ твоего́ хлѣ́бъ тво́й снѣ́си, ре́клъ еси́ па́дшему человѣ́ку; тѣ́мже, я́ко вторы́й Ада́мъ, егда́ моли́лся еси́, по́тъ кро́ве излива́шеся изъ пречи́стого тѣ́ла Твоего́: бра́шно бо Твое́ — во́лю Отчю твори́ти. Ни еди́ну у́бо за́повѣдь Твою́ сотво́ршаго, Іису́се Христе́, по́томъ Кро́ве Твоея́ ка́плющимъ омы́й мя́.

И ны́нѣ: Не ктому́ земля́ проклята́ е́сть, Кро́вію бо Сы́на Твоего́ благословля́ется. Земле́ благослове́нная, Пречи́стая Дѣ́во, воздви́гни мя́, пра́хъ и пе́пелъ, на славосло́віе Христа́, Бо́га на́шего.

Пѣ́снь 3.

Ирмо́съ: Тебе́, на вода́хъ повѣ́сившаго всю́ зе́млю неодержи́мо, тва́рь, ви́дѣвши на Ло́бнѣмъ ви́сима, у́жасомъ мно́гимъ содрога́шеся, нѣ́сть свя́тъ, ра́звѣ Тебе́, Го́споди, взыва́ющи.

Отягче́ни бы́ша сно́мъ апо́столи, егда́ отше́лъ еси́ отъ о́чію и́хъ на моли́тву въ вертогра́дѣ Геѳсима́нстѣмъ. Лѣни́ваго мя́ и уны́лаго на Твое́ поклоне́ніе воздви́гни.

Яко и́стинный Па́стырь, ви́дѣвъ во́лка, Іу́ду, гряду́ща, — Азъ е́смь дру́же, — глаго́лалъ еси́ ученику́ лука́вому, къ покая́нію наставля́я па́дшаго. Мене́, всегда́ согрѣша́юща и николи́же въ чу́вство приходя́щаго, напра́ви, Го́споди мо́й, на пу́ть пра́вый и отъ че́люстей мы́сленнаго во́лка си́лою Твое́ю изба́ви.

Сла́ва: Со ору́жіемъ и дреко́льми, я́ко на разбо́йника, прихо́дятъ, Его́же, я́ко Же́ртву нескве́рну, въ Це́ркви иска́ти подоба́ше. О мои́хъ грѣсѣ́хъ же́ртву приноси́мую Тебѣ́, Го́споди, не пре́зри.

И ны́нѣ: Косну́вся у́ха усѣче́ннаго, исцѣли́ раба́ архіере́ева Сы́нъ Тво́й, Вра́чь ду́шъ и тѣле́съ. Вся́ моя́ душе́вныя и тѣле́сныя, Дѣ́во, исцѣли́ болѣ́зни, Цѣли́теля ро́ждшая.

Сѣда́ленъ, гла́съ 6:

Не отвѣща́лъ еси́ ничто́же вла́сть на Тебѣ́ мнѣ́вшему имѣ́ти, го́рдымъ противля́яйся, но мно́гою лже́ю безсту́дныхъ утружде́нъ, молчи́ши, да мя́ многоглаго́ланія изба́виши и вся́ терпѣ́ти научи́ши.

Сла́ва, и ны́нѣ, богоро́диченъ:

Премѣни́ ско́рбь мою́ на ра́дость, Дѣ́во Богоро́дице, Яже мно́ги ско́рби претерпѣ́ла еси́, зря́щи многостра́ждуща Сы́на Твоего́, мене́ ра́ди осужде́ннаго.

Пѣ́снь 4.

Ирмо́съ: На Крестѣ́ Твое́ Боже́ственное истоща́ніе прови́дя, Авваку́мъ, ужа́сся, вопія́ше: Ты́ си́льныхъ пресѣ́клъ еси́ держа́ву, Бла́же, пріобща́яся су́щимъ во а́дѣ, я́ко Всеси́ленъ.

Не отвѣща́лъ еси́ словесе́ безсту́дному Иродови, сы́нови поги́бели, усѣ́кнувшему уже́ Іоа́нна, Предте́чу и гла́съ Тво́й. До́браго отвѣ́та при кончи́нѣ мое́й сподо́би мя́, Христе́.

Зна́меніе иска́ше Иродъ чуде́снаго, не разумѣ́я ве́лія чу́да, я́ко Бо́гъ тва́ри предстои́тъ. Зна́менай мя́ свѣ́томъ лица́ Твоего́, Христе́ мо́й, и да́ждь весе́ліе се́рдцу моему́ болѣ́зненному.

Сла́ва: Закрыва́ху лице́ Твое́ бію́ще, На́нь же херуви́ми зрѣ́ти не мо́гутъ, крила́ми закрыва́ющеся. Покры́й мя́ Твои́мъ заступле́ніемъ!

И ны́нѣ: Измѣни́ся лице́ Твое́, Дѣ́во, егда́ узрѣ́ла еси́ Сы́на Твоего́, я́ко злодѣ́я ведо́ма отъ іуде́евъ. — Мно́гое вои́стинну долготерпѣ́ніе Твое́, Сы́не и Бо́же мо́й! — съ воздыха́ніемъ рекла́ еси́.

Пѣ́снь 5.

Ирмо́съ: Къ Тебѣ́ у́тренюю, милосе́рдія ра́ди Себе́ истощи́вшему непрело́жно и до страсте́й безстра́стно прекло́ншемуся, Сло́ве Бо́жій: ми́ръ пода́ждь ми́, па́дшему, Человѣколю́бче.

Земля́, подно́жіе но́гъ Твои́хъ, израсти́ на главу́ Твою́ те́рніе, Іису́се мо́й. Изыди́те, дще́ри Іерусали́мстіи, и зри́те Царя́ сла́вы въ вѣнцѣ́ терно́вомъ, и́мже вѣнча́ Его́ неблагода́рный ро́дъ евре́йскій.

Лжи́вы сы́нове человѣ́честіи въ мѣ́рилѣхъ: Тебе́, всѣ́мъ вся́ Су́щаго, три́десятію сре́брениковъ оцѣни́ша и Село́ Кро́ве купи́ша, кро́вь Твою́ излія́вше. Еюже испери́ ри́зы моя́, я́же по креще́ніи и обѣща́ніи покая́нія оскверни́хъ.

Сла́ва: Повину́тися подоба́ше Бо́гу, а не іуде́омъ, судіе́ безу́мный, и не осужда́ти на сме́рть Влады́ку и Судію́ вся́ческихъ. Мене́, повину́вшася скве́рнымъ страсте́мъ, къ покая́нію наста́ви, Го́споди, да не въ сме́рть осужде́нъ бу́ду.

И ны́нѣ: Заклина́ете Бо́гомъ живы́мъ Бо́га жива́го, пребезу́мніи, но не́бо и земля́ отвѣща́ютъ, я́ко Бо́гъ е́сть, сія́ Пострада́вый, и Сы́нъ Мо́й, — Дѣ́ва ма́терски вѣща́ше.

Пѣ́снь 6.

Ирмо́съ: Ятъ бы́сть, но не удержа́нъ въ пе́рсехъ ки́товыхъ Іо́на: Тво́й бо о́бразъ нося́, Страда́вшаго, и погребе́нію да́вшагося, я́ко отъ черто́га отъ звѣ́ря изы́де. Приглаша́ше же кустодíи: храня́щіи су́етная и ло́жная, ми́лость сію́ оста́вили есте́.

Изше́лъ еси́, Іису́се, нося́ Кре́стъ Тво́й, да я́коже Авель отъ Ка́ина, отъ іуде́евъ постра́ждеши. Изы́ди и ны́нѣ, и взыщи́ мене́ заблу́дшаго!

Гряде́ши, я́коже Исаа́къ и́стинный, на ра́мо Твое́ Кре́стъ воспріе́мъ, да на Не́мъ же́ртву о мои́хъ грѣсѣ́хъ принесе́ши Отцу́ въ воню́ благоуха́нія.

Сла́ва: Ви́дѣ Іа́ковъ лѣ́ствицу утвержде́нну до небе́съ: се́ е́сть Кре́стъ Тво́й. Имже возведи́ у́мъ мо́й отъ ни́жнихъ къ го́рнимъ оби́телемъ.

И ны́нѣ: Не пла́читеся Мене́ непови́нна, дще́ри Іерусали́мскія, не пла́чи Мене́, Марíе, Ма́ти Моя́, вско́рѣ бо возра́дуешися, егда́ воста́ну и просла́влюся.


Конда́къ 1.

Возбра́нный Воево́до и Го́споди небесе́ и земли́, Тебе́, Царя́ Безсме́ртнаго, зря́щи на Крестѣ́ ви́сяща, вся́ тва́рь измѣни́ся, не́бо ужасе́ся, основа́нія земли́ восколеба́шася. Мы́ же, недосто́йніи, благода́рственное поклоне́ніе Твоему́ на́съ ра́ди Страда́нію принося́ще, съ разбо́йникомъ вопіе́мъ Ти́:

Іису́се, Сы́не Бо́жій, помяни́ на́съ, егда́ пріи́деши во Ца́рствіи Твое́мъ.

Икосъ 1.

Ангеловъ ликостоя́нія восполня́я, не отъ а́нгелъ воспрія́лъ еси́, но мене́ ра́ди, Бо́гъ сы́й, Человѣ́къ бы́въ, человѣ́ка, уме́рша грѣхми́, Животворя́щимъ Тѣ́ломъ и Кро́вію Твое́ю оживи́лъ еси́. Тѣ́мже, толи́цѣй любви́ Твое́й благода́рни су́ще, вопіе́мъ Ти́:

Іису́се Бо́же, Любы́ предвѣ́чная, та́ко о на́съ земноро́дныхъ возблаговоли́вый. Іису́се, Ми́лосте безмѣ́рная, къ человѣ́комъ па́дшимъ до́лу низше́дый. Іису́се, въ пло́ть на́шу оболкíйся и сме́ртію Свое́ю сме́рти держа́ву разруши́вый. Іису́се, Боже́ственными Твои́ми Та́йнами на́съ обожи́вый. Іису́се, Страда́ньми и Кресто́мъ Твои́мъ ве́сь мíръ искупи́вый.

Іису́се, Сы́не Бо́жій, помяни́ на́съ, егда́ пріи́деши во Ца́рствіи Твое́мъ.

Конда́къ 2.

Ви́дѣвъ Тя́ а́нгелъ въ вертогра́дѣ Геѳсима́нстѣмъ до по́та крова́ва въ моли́твѣ подвиза́ющася, предста́въ, укрѣпля́ше Тя́, егда́, я́ко бре́мя тя́жкое, грѣси́ на́ши отяготѣ́ша на Тебѣ́. Ты́ бо, Ада́ма поги́бшаго на ра́мо воспріи́мъ, Отцу́ предста́вилъ еси́, прекло́нь колѣ́на моля́ся. О се́мъ у́бо съ вѣ́рою и любо́вію пою́ Тебѣ́: Аллилу́ія.

Икосъ 2.

Ра́зума неуразумѣ́нна во́льнаго Твоего́ страда́нія не уразумѣ́ша іуде́е, сего́ ра́ди егда́ въ нощи́ со свѣти́льники и́щущимъ Тя́ ре́клъ еси́: «Азъ е́смь», а́ще и падо́ша на земли́, но по се́мъ связа́вше Тя́, ведо́ша на суди́ще. Мы́ же на се́мъ пути́, припа́дающе къ Тебѣ́, съ любо́вію зове́мъ:

Іису́се, Свѣ́те мíра, отъ мíра лука́ваго возненави́дѣнный. Іису́се, Живы́й во свѣ́тѣ непристу́пнѣмъ, отъ о́бласти те́мныя я́тый. Іису́се, Сы́не Бо́жій безсме́ртный, отъ сы́на поги́бели на сме́рть указа́нный. Іису́се, въ Не́мже льсти́ нѣ́сть, отъ преда́теля ле́стію лобза́нный. Іису́се, ту́не Себе́ всѣ́мъ подава́яй, за сре́бренники прода́нный.

Іису́се, Сы́не Бо́жій, помяни́ на́съ, егда́ пріи́деши во Ца́рствіи Твое́мъ.

Конда́къ 3.

Си́лою Божества́ Твоего́ проре́клъ еси́ трикра́тное отверже́ніе ученику́. Онъ же посе́мъ, а́ще и отрече́ся Тя́ съ кля́твою, оба́че, егда́ узрѣ́ Тя́ во дворѣ́ архіере́йстѣмъ, Го́спода своего́ и Учи́теля, умили́вся се́рдцемъ, изше́дъ во́нъ, пла́кася го́рько. При́зри у́бо и на мя́, Го́споди, и порази́ жесто́кое се́рдце мое́, да слеза́ми мои́ми омы́ю грѣхи́ моя́, поя́ Тебѣ́: Аллилу́ія.

Икосъ 3.

Имѣ́яй вои́стинну вла́сть по чи́ну Мелхиседе́кову, я́ко Архіере́й во вѣ́ки, ста́лъ еси́ предъ беззако́ннымъ первосвяще́нникомъ Каіа́ѳою, Влады́ка и Госпо́дь всѣ́хъ. Отъ Твои́хъ у́бо рабо́въ прія́вый муче́ніе, пріими́ отъ на́съ сицева́я:

Іису́се Безцѣ́нный, цѣно́ю ку́пленный, стяжи́ мя́ въ Твое́ вѣ́чное наслѣ́діе. Іису́се, Жела́ніе всѣ́хъ, отъ Петра́ стра́ха ра́ди отве́рженный, не отве́ржи мя́, грѣ́шнаго. Іису́се, Агнче незло́биве, отъ лю́тыхъ ве́прей терза́емый, изми́ мя́ отъ вра́гъ мои́хъ. Іису́се, Архіере́ю, Свое́ю Кро́вію вше́дый во Свята́я святы́хъ, очи́сти мя́ отъ скве́рнъ плотски́хъ. Іису́се свя́занный, имѣ́яй вла́сть вяза́ти и рѣши́ти, разрѣши́ моя́ тя́жкая прегрѣше́нія.

Іису́се, Сы́не Бо́жій, помяни́ на́съ, егда́ пріи́деши во Ца́рствіи Твое́мъ.

Конда́къ 4.

Бу́рею христоубíйства ды́шуще іуде́е, послу́шавше гла́са отца́ лжи́ и человѣкоубíйцы искони́, діа́вола, отверго́ша Тебе́, пра́вый Пу́ть, Истину и Живо́тъ. Мы́ же Тя́, Христа́, Бо́жію Си́лу, въ Не́мже вся́ сокро́вища прему́дрости и ра́зума сокрове́на су́ть, исповѣ́дуя, вопіе́мъ: Аллилу́ія.

Икосъ 4.

Слы́ша Пила́тъ кро́ткія Твоя́ глаго́лы, а́ки досто́йнаго сме́рти предаде́ Тя́ на пропя́тіе, а́ще и са́мъ свидѣ́тельствоваше, я́ко ни еди́ныя вины́ обрѣ́те въ Тебѣ́: ру́цѣ у́бо свои́ умы́, но се́рдце оскверни́. Мы́ же, чудя́щеся та́йнѣ во́льнаго Страда́нія Твоего́, со умиле́ніемъ зове́мъ:

Іису́се, Сы́не Бо́жій и Сы́не Дѣ́вы, отъ сыно́въ беззако́нія уму́ченный. Іису́се, пору́ганный и обнаже́нный, дая́й лѣ́поту кри́номъ се́льнымъ и одѣва́яй не́бо о́блаки. Іису́се, насыще́нный ра́нами, пятію́ хлѣ́бы пя́ть ты́сящъ насы́тивый. Іису́се, Царю́ всѣ́хъ, вмѣ́сто да́ни любве́ и благодаре́нія жесто́кія му́ки пріе́мый. Іису́се, на́съ ра́ди ве́сь де́нь я́звленный, уврачу́й я́звы ду́шъ на́шихъ.

Іису́се, Сы́не Бо́жій, помяни́ на́съ, егда́ пріи́деши во Ца́рствіи Твое́мъ.

Конда́къ 5.

Богото́чною Кро́вію Твое́ю ве́сь обле́клся еси́, Одѣя́йся свѣ́томъ, я́ко ри́зою. Вѣ́мъ, вои́стинну вѣ́мъ со проро́комъ, почто́ червле́ны ри́зы Твоя́: а́зъ, Го́споди, а́зъ грѣха́ми мои́ми уязви́хъ Тя́. Тебѣ́ у́бо, мене́ ра́ди Уя́звленному, благода́рственно зову́: Аллилу́ія.

Икосъ 5.

Прови́дѣвъ Тя́ въ ду́сѣ богоглаго́ливый Иса́ія, безче́стіемъ и ра́нами испо́лненна, ужа́сся вопія́ше: «ви́дѣхомъ Его́, и не имѣ́яше ви́да, ни добро́ты». Мы́ же, зря́ще Тя́ на Крестѣ́, съ вѣ́рою и удивле́ніемъ зове́мъ:

Іису́се, безче́стіе терпя́й, человѣ́ка сла́вою и че́стію вѣнча́вый. Іису́се, на Него́же а́нгели зрѣ́ти не мо́гутъ, по лани́тома зауше́нный. Іису́се, по главѣ́ тро́стію ударе́нный, преклони́ во смире́ніе главу́ мою́. Іису́се, свѣ́тлая Твоя́ очеса́ кро́вію омраче́нная имѣ́вый, отврати́ о́чи моя́, е́же не ви́дѣти суеты́. Іису́се, отъ но́гъ до главы́ не имѣ́вый цѣ́лости, всего́ цѣ́ла и здра́ва сотвори́ мя́.

Іису́се, Сы́не Бо́жій, помяни́ на́съ, егда́ пріи́деши во Ца́рствіи Твое́мъ.

Конда́къ 6.

Проповѣ́дникъ Твоего́ незло́бія я́влься Пила́тъ, показа́ наро́ду ничто́же бы́ти въ Тебѣ́ досто́йно сме́рти; но іуде́е, я́ко звѣ́ри ди́віи, кро́вь узрѣ́вше, скрежета́ху на Тя́ зубы́ свои́ми, «распни́, распни́ Его́», вопію́ще. Мы́ же, лобыза́юще Пречи́стыя Язвы Твоя́, зове́мъ: Аллилу́ія.

Икосъ 6.

Возсія́лъ еси́ въ позо́ръ и удивле́ніе а́нгеломъ и человѣ́комъ, глаго́лющу о Тебѣ́ Пила́ту: «се́ Человѣ́къ». Приди́те у́бо, пору́ганному на́съ ра́ди Іису́су поклони́мся, вопію́ще:

Іису́се, Тво́рче и Судіе́ всѣ́хъ, отъ тва́ри Своея́ суди́мый и му́чимый. Іису́се, прему́дрости Пода́телю, отвѣ́та безу́мнымъ не да́вый. Іису́се, Врачу́ уя́звленныхъ грѣха́ми, да́ждь ми́ врачевство́ покая́нія. Іису́се, Па́стырю пораже́нный, порази́ бѣсо́въ, искуша́ющихъ мя́. Іису́се, пло́ть имы́й сокруше́нну, сокруши́ се́рдце мое́ стра́хомъ Твои́мъ.

Іису́се, Сы́не Бо́жій, помяни́ на́съ, егда́ пріи́деши во Ца́рствіи Твое́мъ.

Конда́къ 7.

Хотя́й человѣ́ка отъ рабо́ты вра́жія изба́вити, смири́лъ еси́ Себе́ предъ враги́ Твои́ми, Іису́се, и я́ко Агнецъ безгла́сенъ на заколе́ніе веде́нъ бы́лъ еси́, вездѣ́ я́звы терпя́й, да всего́ исцѣли́ши человѣ́ка, зову́ща: Аллилу́ія.

Икосъ 7.

Ди́вное показа́лъ еси́ долготерпѣ́ніе, егда́ во́ини, руга́ющеся Тебѣ́, по глаго́лу непра́веднаго судіи́, лютѣ́йшими ра́нами уязвля́ху Пречи́стое Тѣ́ло Твое́, я́ко обагри́тися ему́ отъ но́гъ до главы́ Кро́вію. Сего́ ра́ди со слеза́ми вопіе́мъ Ти́:

Іису́се Человѣколюби́вый, отъ человѣ́къ те́рніемъ увѣнча́нный. Іису́се, Божество́мъ безстра́стный, Стра́сти терпя́й, да на́съ отъ страсте́й свободи́ши. Іису́се, Спа́се мо́й, спаси́ мя́, пови́ннаго всѣ́мъ му́камъ. Іису́се, всѣ́ми оста́вленный, Утвержде́ніе мое́, утверди́ мя́. Іису́се, отъ всѣ́хъ оскорбле́нный, Ра́досте моя́, возвесели́ мя́.

Іису́се, Сы́не Бо́жій, помяни́ на́съ, егда́ пріи́деши во Ца́рствіи Твое́мъ.

Конда́къ 8.

Ди́вно и стра́нно яви́шася Тебѣ́ Моисе́й и Илія́ на Ѳаво́рѣ, глаго́люще о исхо́дѣ Твое́мъ, его́же ны́нѣ скончава́еши во Іерусали́мѣ. Та́мо у́бо ви́дѣвше сла́ву Твою́, здѣ́ же спасе́ніе на́ше узрѣ́вше, зову́тъ: Аллилу́ія.

Икосъ 8.

Вездѣ́ отъ іуде́й гони́мый, мно́гія, ра́ди мно́жества грѣхо́въ мои́хъ, претерпѣ́лъ еси́ поноше́нія и му́ки: еди́ни бо Тя́ проти́вна бы́ти ке́сарю глаго́лютъ, друзíи я́ко злодѣ́я осужда́ютъ, инíи же: «возми́, возми́ и распни́», вопію́тъ. Отъ всѣ́хъ у́бо осужде́нному, и на пропя́тіе ведо́мому, Тебѣ́, Го́споду, изъ глубины́ души́ глаго́лемъ:

Іису́се, непра́ведно осужде́нный, Судіе́ на́шъ, не осуди́ на́съ по дѣло́мъ на́шимъ. Іису́се, изнемога́яй на пути́ подъ Кресто́мъ, Си́ло моя́, въ ча́съ ско́рби и озлобле́нія моего́ не оста́ви мене́. Іису́се, взыва́яй о по́мощи къ Отцу́, Подвигополо́жниче мо́й, въ не́мощи мое́й укрѣпи́ мя́. Іису́се, безче́стіе пріе́мый, Сла́во моя́, отъ сла́вы Твоея́ не отри́ни мене́. Іисусе, Образе Пресвѣ́тлыя Ѵпоста́си Отчія, преобрази́ мое́ нечи́стое и мра́чное житіе́.

Іису́се, Сы́не Бо́жій, помяни́ на́съ, егда́ пріи́деши во Ца́рствіи Твое́мъ.

Конда́къ 9.

Все́ естество́ смяте́ся, зря́ Тебе́ на Крестѣ́ повѣ́шена: на небеси́ со́лнце лучи́ своя́ скры́, земля́ потрясе́ся, завѣ́са хра́ма раздра́ся, ка́меніе распаде́ся, а́дъ уме́ршихъ изве́рже. Мы́ же покланя́емся на мѣстѣ, идѣ́же стоя́стѣ пречи́стѣи но́зѣ Твои́, пою́ще: Аллилу́ія.

Икосъ 9.

Вѣтíя многовѣща́нныя, а́ще и мно́го глаго́лютъ, но не мо́гутъ досто́йнаго благодаре́нія возда́ти Боже́ственнымъ Страсте́мъ Твои́мъ, Человѣколю́бче. На́ша же душа́ и тѣ́ло, се́рдце и вся́ соста́вы, со умиле́ніемъ къ Тебѣ́ взыва́ютъ:

Іису́се, пригвожде́йся на Крестѣ́, пригвозди́ и упраздни́ рукописа́ніе грѣхо́въ на́шихъ. Іису́се, ру́цѣ со Креста́ простира́яй ко всѣ́мъ, привлеки́ и мя́, заблу́дшаго. Іису́се, Две́ре овца́мъ, въ ре́бра прободе́нный, введи́ мя́ я́звами Твои́ми въ черто́гъ Тво́й. Іису́се, пло́тію распя́тый, распни́ пло́ть мою́ со страстьми́ и похотьми́. Іису́се, скончава́яся въ му́кахъ, да́ждь ми́, да се́рдце мое́ не су́дитъ и́но что́ вѣ́дѣти, то́чію Тебе́ ра́спята.

Іису́се, Сы́не Бо́жій, помяни́ на́съ, егда́ пріи́деши во Ца́рствіи Твое́мъ.

Конда́къ 10.

Спасти́ хотя́й мíръ, слѣпы́хъ, хромы́хъ, прокаже́нныхъ, нѣмы́хъ и глухи́хъ исцѣли́лъ еси́, духо́въ лука́выхъ отгна́лъ еси́. Неразу́мніи же іуде́и, зло́бою ды́шуще и за́вистію му́чими, пригвозди́ша Тя́ ко Кресту́, не вѣ́дуще пѣ́ти: Аллилу́ія.

Икосъ 10.

Царю́ Превѣ́чный, Іису́се, ве́сь стра́ждеши за мое́ невоздержа́ніе, да всего́ мя́ чи́ста сотвори́ши, во все́мъ о́бразъ на́мъ подая́й, да послѣ́дуемъ стопа́мъ Твои́мъ, зову́ще:

Іису́се, Любы́ неизслѣ́димая, распе́ншимъ Тя́ грѣха́ не поста́вивый. Іису́се, съ во́племъ крѣ́пкимъ и со слеза́ми въ вертогра́дѣ моля́йся, научи́ и на́съ моли́тися. Іису́се, вся́ проро́чествія о Тебѣ́ испо́лнивый, испо́лни во благи́хъ жела́нія се́рдца на́шего. Іису́се, ду́ха Твоего́ въ ру́цѣ Отцу́ преда́вый, въ ча́съ исхо́да моего́ пріими́ ду́хъ мо́й. Іису́се, ри́зы Твоя́ раздѣли́ти не возбрани́вый, кро́тко ду́шу мою́ отъ тѣ́ла отдѣли́.

Іису́се, Сы́не Бо́жій, помяни́ на́съ, егда́ пріи́деши во Ца́рствіи Твое́мъ.

Конда́къ 11.

Пѣ́ніе всеумиле́нное приноша́ше Тебѣ́ Всенепоро́чная Ма́терь Твоя́, глаго́лющи: «а́ще и стра́ждеши на Крестѣ́, но вѣ́мъ Тя́ изъ чре́ва пре́жде денни́цы отъ Отца́ рожде́нна, ви́жду бо, я́ко тва́рь вся́ состра́ждетъ Тебѣ́. Предае́ши ду́хъ Тво́й Отцу́, и Мо́й ду́хъ пріими́ и не оста́ви Мене́, зову́щую: Аллилу́ія».

Икосъ 11.

Яко свѣтопріе́мная Свѣща́, у Креста́ Твоего́ горя́ше любо́вію къ Тебѣ́, и ма́тернею Дѣ́ва Пренепоро́чная обдержа́шеся болѣ́знію, заходя́щу Тебѣ́ во гро́бъ, и́стинному Со́лнцу Пра́вды. Съ Не́юже и се́рдца на́шего моли́твы пріими́ сицевы́я:

Іису́се, вознесы́йся на Дре́во, да на́съ, па́дшихъ, совознесе́ши ко Отцу́ Своему́. Іису́се, дѣ́вственнику Приснодѣ́ву въ Ма́терь дарова́вый, да на́съ дѣ́вству и чистотѣ́ научи́ши. Іису́се, Тебе́, Бо́га Сло́ва ро́ждшей, ученика́ Богосло́ва вручи́вый, вручи́ и на́съ всѣ́хъ Ея́ Ма́тернему заступле́нію. Іису́се, мíра и а́да Побѣди́телю, побѣди́ невѣ́ріе, го́рдость жите́йскую и по́хоть оче́съ, въ на́съ живу́щія. Іису́се, сме́рти держа́вы Разруши́телю, вѣ́чныя сме́рти изба́ви мя́.

Іису́се, Сы́не Бо́жій, помяни́ на́съ, егда́ пріи́деши во Ца́рствіи Твое́мъ.

Конда́къ 12.

Благода́ть Твою́ пода́ждь мнѣ́, Іису́се, Бо́же мо́й, пріими́ мя́, я́коже прія́лъ еси́ Іо́сифа съ Никоди́момъ, да я́ко чи́стую плащани́цу, ду́шу мою́ принесу́ Тебѣ́ и воня́ми добродѣ́телей пома́жу Пречи́стое Тѣ́ло Твое́, и яко во гро́бѣ, въ се́рдцѣ мое́мъ имѣ́ю Тя́, зовы́й: Аллилу́ія.

Икосъ 12.

Пою́ще Твое́ во́льное распя́тіе, покланя́емся Страсте́мъ Твои́мъ, Христе́, вѣ́руемъ съ со́тникомъ, я́ко вои́стинну Бо́жій Сы́нъ еси́, пріити́ имѣ́яй на о́блацѣ съ си́лою и сла́вою мно́гою. Тогда́ у́бо не посрами́ на́съ, Кро́вію Твое́ю искупле́нныхъ и та́ко вопію́щихъ:

Іису́се Многострада́льный, рыда́ніемъ Дѣ́вы Ма́тере Твоея́ вѣ́чнаго пла́ча исхити́ ны́. Іису́се, отъ всѣ́хъ оста́вленный, не оста́ви мя́ еди́наго въ ча́съ сме́рти моея́. Іису́се, съ Магдали́ною нога́мъ Твои́мъ каса́ющася, пріими́ мя́. Іису́се, съ преда́телемъ и распе́ншими Тя́ не осуди́ мене́. Іису́се, съ разбо́йникомъ благоразу́мнымъ въ ра́й введи́ мя́.

Іису́се, Сы́не Бо́жій, помяни́ на́съ, егда́ пріи́деши во Ца́рствіи Твое́мъ.

Конда́къ 13.

О, Іису́се Христе́, Агнче Бо́жій, взе́мляй грѣхи́ мíра, пріими́ ма́лое сіе́ отъ всея́ души́ на́шея приноси́мое Тебѣ́ благодаре́ніе и исцѣли́ ны́ спаси́тельными Твои́ми Страда́ньми отъ вся́кія болѣ́зни душе́вныя и тѣле́сныя, огради́ ны́ Кресто́мъ Твои́мъ отъ вра́гъ ви́димыхъ и неви́димыхъ, и при кончи́нѣ живота́ на́шего не оста́ви на́съ, да сме́ртію Твое́ю изба́вльшеся вѣ́чныя сме́рти, вы́ну зове́мъ Тебѣ́: Аллилу́ія.

Три́жды.
Та́же и́косъ 1-й и конда́къ 1-й.


Пѣ́снь 7.

Ирмо́съ: Неизрече́нное чу́до: въ пещи́ Изба́вивый преподо́бныя о́троки изъ пла́мене, во гро́бѣ ме́ртвъ бездыха́ненъ полага́ется, во спасе́ніе на́съ пою́щихъ: Изба́вителю Бо́же, благослове́нъ еси́.

Истинный Ты́ еси́ Дави́дъ: воспрія́въ бо Кре́стъ, я́ко псалти́рь красе́нъ, на го́ру Голго́ѳскую возше́лъ еси́, да гнѣ́ва Бо́га Отца́ на́съ свободи́ши пою́щихъ: благослове́нъ еси́, Агнче Бо́жій, во вѣ́ки, сотвори́вый вѣ́чное мíрови избавле́ніе!

Яко до́брый до́му Отца́ Твоего́ Строи́тель, Христе́ Бо́же, свѣ́щникъ, Кре́стъ Тво́й, взе́мъ, на Не́мъ Са́мъ, я́ко Свѣти́ло, возсія́лъ еси́ мíрови, да пое́мъ Тебѣ́: благослове́нъ еси́, Агнче Бо́жій, во вѣ́ки, сотвори́вый вѣ́чное мíру избавле́ніе!

Сла́ва: Яко кади́ло въ воню́ благоуха́нія, отъ растерза́нія пло́ти Твоея́, Кро́вь Бо́гу Отцу́ прине́слъ еси́, да приведе́ши мене́ къ Нему́ пою́ща: благослове́нъ еси́, Агнче Бо́жій, во вѣ́ки, сотвори́вый мíрови вѣ́чное избавле́ніе!

И ны́нѣ: Егда́ узрѣ́ла еси́ на Крестѣ́ Христа́, Сы́на Твоего́, Его́же безсѣ́менно родила́ еси́, Чи́стая, удиви́лася еси́ неизрече́нному Его́ долготерпѣ́нію. Тѣ́мже Тя́ съ Ни́мъ прославля́емъ.

Пѣ́снь 8.

Ирмо́съ: Ужасни́ся, боя́йся, не́бо, и да подви́жатся основа́нія земли́: се́ бо въ мертвецѣ́хъ вмѣня́ется въ вы́шнихъ Живы́й, и во гро́бъ ма́лъ страннопріе́млется. Его́же о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Се́ е́сть Сы́нъ Тво́й возлю́бленный, Бо́же Отче, Его́же креща́ема отъ Іоа́нна, и преобразу́ющася на Ѳаво́рѣ, — послу́шайте, — ре́клъ еси́. Послу́шай ны́нѣ Его́, жа́ждуща моего́ спасе́нія, Ему́же, мене́ ра́ди уме́ршему, пою́: иску́пленніи Кро́вію Его́ вси́ язы́цы и вся́ племена́, Го́спода по́йте и превозноси́те Его́ во вѣ́ки.

Се́ е́сть Сы́нъ Тво́й, Бо́же Отче, Его́же по́слана уничижи́ша, я́ко зе́млю жела́нную, не я́ша вѣ́ры словесе́мъ Его́, досажде́ніемъ и му́кою испыта́ша. Азъ же зову́: ро́ды родо́въ, иску́пленніи Кро́вію Его́, Го́спода по́йте и превозноси́те Его́ во вѣ́ки!

Сла́ва: Се́ е́сть Сы́нъ Тво́й, Бо́же Отче, Иже рожде́нный не имѣ́ мѣ́ста въ оби́тели; живу́щь на земли́, дру́гъ мытаре́мъ и грѣ́шникомъ, и ху́льникъ нарече́ся; на сме́рть поно́сную осуди́ся, да мене́, грѣхо́вною тягото́ю обремене́нна, въ небе́сныхъ селе́ніихъ упоко́итъ пою́ща: вся́ вну́тренняя моя́, Го́спода по́йте и превозноси́те Его́ во вѣ́ки!

И ны́нѣ: Се́ е́сть Соломо́нъ на Свое́мъ престо́лѣ, Се́ Архіере́й на Свое́мъ олтарѣ́, Се́ е́сть Во́ждь, дая́й ору́жіе непобѣди́мое, Се́ е́сть Сы́нъ Тво́й, Дѣ́во, и Сы́нъ Бо́жій, Его́же Оте́цъ мене́ ра́ди не пощадѣ́, но на сме́рть предаде́, да Ему́ покланя́яся пою́: вси́ отъ вѣ́ка пра́вѣдніи и грѣ́шніи, иску́пленніи Кро́вію Его́, Го́спода по́йте и превозноси́те Его́ во вѣ́ки!

Пѣ́снь 9.

Ирмо́съ: Не рыда́й Мене́, Ма́ти, зря́щи во гро́бѣ, Его́же во чре́вѣ безъ сѣ́мене зачала́ еси́ Сы́на: воста́ну бо, и просла́влюся, и вознесу́ со сла́вою, непреста́нно я́ко Бо́гъ, вѣ́рою и любо́вію Тя́ велича́ющія.

Вѣ́мъ, кто́ вино́венъ Стра́сти Твоея́ на Голго́ѳѣ — а́зъ, Го́споди, а́зъ невоздержа́ніемъ распя́хъ Тя́. Но не поста́ви мнѣ́ грѣха́ сего́, ка́ющемуся!

Не ктому́ херуви́мъ храни́тъ вра́тъ Еде́мскихъ: се́ бо на Дре́вѣ Живо́тъ мо́й, Ты́, повѣ́шенъ еси́, Христе́. О, любве́ Твоея́ неизглаго́ланныя! Научи́ мя́ досто́йно благодари́ти Тя́.

Сла́ва: Имаши надписа́ніе, Христе́ мо́й: Іису́съ Назаряни́нъ, Ца́рь Іуде́йскій! Свидѣ́тельство сіе́ е́сть ко Отцу́, я́ко до́брѣ во́лю Его́ сотвори́лъ еси́. Въ кни́ги живо́тныя напиши́ мя́, молю́тися.

И ны́нѣ: Не оста́ви Мене́ еди́ну, печа́ли испо́лнену, но вско́рѣ утѣ́ши Мя́, Утѣше́ніе Мое́! — Дѣ́ва рече́. Азъ же что́ возда́мъ Тебѣ́, Іису́се мо́й? Вни́ди въ се́рдце мое́, да не ктому́ а́зъ, но Ты́ во мнѣ́ живе́ши и а́зъ въ Тебѣ́.

Свѣти́ленъ.

Черто́гъ Твой ви́жду, Спа́се мо́й, украше́нный, и оде́жды не и́мамъ, да вни́ду въ о́нь. Просвѣти́ одѣя́ніе души́ моея́, Свѣтода́вче, и спаси́ мя́!

Сла́ва: Разбо́йника благоразу́мнаго во еди́номъ часѣ́ ра́еви сподо́билъ еси́, Го́споди, и мене́ Дре́вомъ Кре́стнымъ просвѣти́ и спаси́ мя́!

И ны́нѣ: Черто́же одушевле́нный, Дѣ́во, нѣ́смь досто́инъ черто́га небе́снаго, грѣхо́вныя ра́ди вины́, но молю́ Тя́ прилѣ́жно: ра́ди обнаже́ннаго на Крестѣ́ Сладча́йшаго Твоего́ Сы́на и Блага́го моего́ Го́спода, покры́й сту́дъ лица́ моего́ и спаси́ мя́!

На хвали́техъ стихи́ры, гла́съ 3:

Два́ и лука́вная сотвори́, перворожде́нный сы́нъ Мо́й, Изра́иль: Мене́ оста́ви, Исто́чника воды́ живо́тныя, и ископа́ себѣ́ кла́денецъ сокруше́нный; Мене́ на Дре́вѣ распя́тъ, Вара́вву же испроси́ и отпусти́. Ужасе́ся не́бо о се́мъ, со́лнце лучи́ скры́, ты́ же, Изра́илю, не усрами́лся еси́, но сме́рти Мя́ преда́лъ еси́. Оста́ви и́мъ, Отче Святы́й, не вѣ́дятъ бо, что́ сотвори́ша! [Два́жды.]

Кíйждо чле́нъ святы́я Твоея́ пло́ти безче́стіе, на́съ ра́ди, претерпѣ́: глава́ — те́рніе; лице́ — оплева́нія; че́люсти — зауше́нія; уста́ — во о́цтѣ растворе́нную же́лчь; ушеса́ — хуле́нія злочести́вая; плещи́ — біе́нія; и рука́ — тро́сть; все́ тѣ́ло — протяже́ніе на Крестѣ́; ру́цѣ и но́зе — гво́здіе; и ре́бра — копіе́. Пострада́вый за ны́ и отъ страсте́й свободи́вый, снизше́дый къ на́мъ человѣколю́біемъ и вознесы́й на́съ, Всеси́льне Спа́се, поми́луй на́съ!

Распе́ншуся Тебѣ́, Христе́, вся́ тва́рь, ви́дящи, трепета́ше, основа́нія земли́ позыба́шася стра́хомъ держа́вы Твоея́. Тебѣ́ бо возне́сшуся дне́сь, церко́вная завѣ́са раздра́ся на дво́е, и ме́ртвіи отъ гробо́въ воскресо́ша; со́тникъ, ви́дѣвъ чу́до, ужасе́ся. Предстоя́щи же Ма́ти Твоя́, вопія́ше: ка́ко не возрыда́ю, зря́щи Тя́ на́га, я́ко осужде́нна, на Дре́вѣ ви́сяща? Распны́йся, и погребы́йся, и воскресы́й изъ ме́ртвыхъ, Го́споди, сла́ва Тебѣ́!

Сла́ва, и ны́нѣ, гла́съ 5:

Тебе́, Одѣ́ющагося свѣ́томъ, я́ко ри́зою, сне́мъ Іо́сифъ съ Дре́ва съ Никоди́момъ и, ви́дѣвъ ме́ртва, на́га, непогребе́на, благосе́рдный пла́чь воспріи́мь, рыда́я, глаго́лаше: увы́ мнѣ́, Сладча́йшій Іису́се! Его́же вма́лѣ со́лнце, на Крестѣ́ ви́сима узрѣ́въ, мра́комъ облага́шеся, и земля́ стра́хомъ колеба́шеся, и раздира́шеся церко́вная завѣ́са, но се́ ны́нѣ ви́жду Тя́, мене́ ра́ди во́лею подъе́мша сме́рть. Ка́ко погребу́ Тя́, Бо́же мо́й, или́ ка́кою плащани́цею обвію́? Ко́има ли рука́ма прикосну́ся нетлѣ́нному Твоему́ Тѣ́лу? Или́ кíя пѣ́сни воспою́ Твоему́ исхо́ду, Ще́дре? Велича́ю Стра́сти Твоя́, пѣсносло́влю и погребе́ніе Твое́ со Воскресе́ніемъ, зовы́й: Го́споди, сла́ва Тебѣ́!

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Кро́вію Твое́ю, Агнче незло́биве, рукописа́ніе грѣхо́въ человѣ́ческихъ изгла́дилъ еси́ и сѣ́мя тли́ разруши́лъ еси́, тѣ́мже Тя́, низходя́ща во а́дъ, ме́ртвіи срѣта́ютъ, я́ко своего́ Искупи́теля.

Сти́хъ: Поражу́ Па́стыря и разы́дутся о́вцы.

Ны́нѣ су́дъ мíрови е́сть, ны́нѣ кня́зь мíра изгна́нъ во́нъ: тре́петенъ стои́тъ предъ Влады́кою, пе́рвую свѣ́тлость погуби́въ. Ты́ же Побѣди́тель грѣха́ и сме́рти и а́да яви́лся еси́.

Сти́хъ: На хребтѣ́ Мое́мъ дѣ́лаша грѣ́шницы, продолжи́ша беззако́ніе свое́.

Аще и всегда́ распина́ю Тя́ грѣха́ми мои́ми, Ты́ же, умира́я, не отвраща́ешися отъ мене́, но прекло́нь главу́, проща́еши мя́, къ Себѣ́ призыва́я.

Сла́ва, и ны́нѣ, гла́съ 5:

Пріиди́те, ублажи́мъ Іо́сифа приснопа́мятнаго, въ нощи́ къ Пила́ту прише́дшаго и Живота́ всѣ́хъ испроси́вшаго. Да́ждь ми́ Сего́ стра́ннаго, Иже не имѣ́етъ гдѣ́ главы́ подклони́ти; да́ждь ми́ Сего́ стра́ннаго, Его́же учени́къ лука́вый на сме́рть предаде́; да́ждь ми́ Сего́ стра́ннаго, Его́же Ма́ти зря́щи на Крестѣ́ ви́сяща, рыда́ющи вопія́ше, и ма́терски восклица́ше: увы́ Мнѣ́, Ча́до Мое́! увы́ Мнѣ́, Свѣ́те Мо́й, и утро́ба Моя́ возлю́бленная! Симео́номъ бо предрече́нное въ це́ркви дне́сь собы́сться: Мое́ се́рдце ору́жіе про́йде, но въ ра́дость Воскресе́нія Твоего́ пла́чь преложи́. Покланя́емся Страсте́мъ Твои́мъ, Христе́; покланя́емся Страсте́мъ Твои́мъ, Христе́; покланя́емся Страсте́мъ Твои́мъ, Христе́, и Свято́му Воскресе́нію!

Моли́тва ко Го́споду Іису́су Распя́тому:

На Крестѣ́ пригвожде́нный за ны́, Іису́се Христе́, Единоро́дный Бо́га Отца́ Сы́не, ми́лости, любве́ и щедро́тъ неизчерпа́емая бе́здно! Вѣ́мъ, я́ко грѣхо́въ ра́ди мои́хъ, отъ неизрече́ннаго человѣколю́бія Кро́вь Твою́ пролія́ти на Крестѣ́ изво́лилъ еси́, ю́же а́зъ, окая́нный и неблагода́рный, досе́лѣ скве́рными мои́ми дѣ́лы попира́хъ и нивочто́же вмѣня́хъ. Тѣ́мъ у́бо изъ глубины́ беззако́нія и нечистоты́ мое́й у́мныма очи́ма на Распя́таго Тя́ на Крестѣ́ Искупи́теля моего́ воззрѣ́въ, со смире́ніемъ и вѣ́рою во глубину́ я́звъ, Твоего́ милосе́рдія испо́лненныхъ, себе́ поверга́ю, грѣхо́въ проще́нія и скве́рнаго житія́ моего́ исправле́нія прося́. Ми́лостивъ бу́ди мнѣ́, Влады́ко и Судіе́ мо́й, не отри́ни мя́ отъ лица́ Твоего́, но всеси́льною Твое́ю руко́ю Са́мъ мя́ къ Тебѣ́ обрати́ и на пу́ть и́стиннаго покая́нія наста́ви, да отъ ны́нѣ положу́ спасе́нія моего́ нача́ло. Боже́ственными Страда́ньми Твои́ми укроти́ моя́ плотскíя стра́сти; излія́нною Твое́ю Кро́вію очи́сти моя́ душе́вныя скве́рны; распя́тіемъ Твои́мъ распни́ мя́ мíру съ собла́знами его́ и похотьми́; Кресто́мъ Твои́мъ огради́ мя́ отъ неви́димыхъ вра́гъ, ловя́щихъ ду́шу мою́; прободе́нными нога́ми Твои́ми отъ вся́каго пути́ лука́ваго возбрани́ нога́мъ мои́мъ; прободе́нными рука́ми Твои́ми ру́цѣ мои́ отъ вся́каго неуго́днаго Тебѣ́ дѣ́ла воздержи́. Пригвожде́нный пло́тію, пригвозди́ стра́ху Твоему́ пло́ть мою́, да уклони́вся отъ зла́, творю́ бла́го предъ Тобо́ю. Преклони́вый главу́ Твою́ на Крестѣ́, къ земли́ смире́нія приклони́ вознесе́нную мою́ горды́ню; вѣнце́мъ Твои́мъ терно́вымъ огради́ моя́ ушеса́, во е́же не слы́шати неполе́знаго; же́лчь уста́ми вкуси́вый, положи́ хране́ніе нечи́стымъ усто́мъ мои́мъ; отве́рстое копіе́мъ имѣ́яй се́рдце, се́рдце чи́сто во мнѣ́ сози́жди; всѣ́ми Твои́ми я́звами, всего́ мя́ сла́дцѣ въ любо́вь Твою́ уязви́, да Тебе́, Го́спода моего́, возлюблю́ все́ю душе́ю, всѣ́мъ се́рдцемъ, все́ю крѣ́постію и всѣ́мъ помышле́ніемъ. Да́ждь ми́ Себе́ стра́нна и не иму́ща, гдѣ́ главы́ подклони́ти; да́ждь ми́ Себе́ Всеблага́го, избавля́ющаго ду́шу мою́ отъ сме́рти; да́ждь мнѣ́ Себе́ Всесла́дкаго, услажда́ющаго мя́ въ ско́рбехъ и напа́стехъ Свое́ю любо́вію, да Его́же пе́рвѣе ненави́дѣхъ, прогнѣвля́хъ, отъ себе́ изгоня́хъ и ко Кресту́ пригвожда́хъ, сего́ ны́нѣ возлюблю́, ра́дуяся пріиму́ и сла́дцѣ Кре́стъ Его́ до конца́ жи́зни мое́й понесу́. Не да́ждь отсе́лѣ, о Всеблагíй Искупи́телю мо́й, ни еди́ной мое́й во́лѣ соверша́тися, поне́же зла́ е́сть и непотре́бна, да не па́ки впаду́ въ тя́жкую рабо́ту ца́рствовавшаго во мнѣ́ грѣха́; но Твоя́ во́ля блага́я, спасти́ мя́ хотя́щая, да соверша́ется во мнѣ́ всегда́, е́йже мя́ вруча́я, Тебе́, Распя́таго Го́спода моего́, у́мнымъ очесе́мъ моего́ се́рдца представля́ю и молю́ изъ глубины́ души́, да и въ разлуче́ніи мое́мъ отъ бре́ннаго моего́ тѣ́ла, Тебе́ Еди́наго на Крестѣ́ Твое́мъ узрю́, въ ру́цѣ мя́ защище́нія Своего́ пріе́млюща, и отъ возду́шныхъ духо́въ зло́бы храня́ща, вселя́юща же со грѣ́шники, покая́ніемъ Тебѣ́ благоугоди́вшими. Ами́нь.

Моли́тва ина́я ко Го́споду Іису́су Распя́тому:

Го́споди Іису́се Христе́, Сы́не Бо́га Жива́го, Тво́рче не́ба и земли́, Спаси́телю мíра, се́ а́зъ, недосто́йный и па́че всѣ́хъ грѣшнѣ́йшій, смире́нно колѣ́на се́рдца моего́ предъ сла́вою вели́чества Твоего́ преклони́въ, воспѣва́ю Кре́стъ и Страда́нія Твоя́, и благодаре́ніе Тебѣ́, Царю́ всѣ́хъ и Бо́гу, приношу́, я́ко благоизво́лилъ еси́ вся́ труды́ и вся́кія бѣды́, напа́сти и муче́нія, я́ко Человѣ́къ, понести́, да всѣ́мъ на́мъ во вся́кихъ печа́лехъ, ну́ждахъ и озлобле́ніихъ состра́ждущій Помо́щникъ и Спаси́тель бу́деши. Вѣ́мъ, всеси́льне Влады́ко, я́ко вся́ сія́ Тебѣ́ у́бо не бы́ша потре́бна, но человѣ́ческаго ра́ди спасе́нія, да всѣ́хъ на́съ иску́пиши отъ лю́тыя рабо́ты вра́жія, Кре́стъ и Страда́нія претерпѣ́лъ еси́. Что́ у́бо возда́мъ Тебѣ́, Человѣколю́бче, о всѣ́хъ, я́же пострада́лъ еси́ мене́ ра́ди грѣ́шнаго? Не вѣ́мъ: душа́ бо и тѣ́ло, и вся́ блага́я отъ Тебе́ су́ть, и вся́ моя́ Твоя́ су́ть, и а́зъ Тво́й е́смь. То́чію на безчи́сленное Твое́, благоутро́бне Го́споди, милосе́рдіе надѣ́яся, пою́ Твое́ неизрече́нное долготерпѣ́ніе, велича́ю неисповѣди́мое истоща́ніе, сла́влю Твою́ безмѣ́рную ми́лость, покланя́юся пречи́стымъ Страсте́мъ Твои́мъ и, вселюбе́зно лобыза́я я́звы Твоя́, вопію́: поми́луй мя́ грѣ́шнаго и сотвори́, да не безпло́денъ бу́детъ во мнѣ́ Кре́стъ Тво́й святы́й, да причаща́яся здѣ́ съ вѣ́рою Страда́ніямъ Твои́мъ, сподо́блюся ви́дѣти и сла́ву Ца́рствія Твоего́ на небеси́! Ами́нь.

Та́же: Досто́йно е́сть... Трисвято́е, [и] по Отче на́шъ... Тропа́рь: Егда́ сла́вніи ученицы́... Сла́ва: Спасе́ніе содѣ́лалъ еси́... И ны́нѣ: Благообра́зный Іо́сифъ... Го́споди, поми́луй 40. И отпу́стъ.


Во сла́ву Святы́я, Единосу́щныя, Животворя́щія и Нераздѣли́мыя Тро́ицы, Отца́ и Сы́на и Свята́го Ду́ха. При держа́вѣ Благочести́вѣйшаго, Самодержа́внѣйшаго, Вели́каго Госуда́ря на́шего, ИМПЕРАТОРА НИКОЛАЯ АЛЕКСАНДРОВИЧА всея́ Россíи; при Супру́гѣ ЕГО, Благочести́вѣйшей Госуда́рынѣ, ИМПЕРАТРИЦѢ АЛЕКСАНДРѢ ѲЕОДОРОВНѢ; при Ма́тери ЕГО, Благочести́вѣйшей Госуда́рынѣ, ИМПЕРАТРИЦѢ МАРІИ ѲЕОДОРОВНѢ; при Наслѣ́дникѣ ЕГО, Благовѣ́рномъ Госуда́рѣ, Цесаре́вичѣ и Вели́комъ Кня́зѣ ГЕОРГІИ АЛЕКСАНДРОВИЧѢ; при Благовѣ́рномъ Госуда́рѣ и Вели́комъ Кня́зѣ МИХАИЛѢ АЛЕКСАНДРОВИЧѢ; при Благовѣ́рномъ Госуда́рѣ, Вели́комъ Кня́зѣ ВЛАДИМІРѢ АЛЕКСАНДРОВИЧѢ, и при Супру́гѣ Его́, Госуда́рынѣ, Вели́кой Княги́нѣ МАРІИ ПАВЛОВНѢ; при Благовѣ́рныхъ Госуда́рѣхъ, Вели́кихъ Князѣ́хъ: КИРИЛЛѢ, БОРИСѢ и АНДРЕИ ВЛАДИМІРОВИЧАХЪ; при Благовѣ́рномъ Госуда́рѣ, Вели́комъ Кня́зѣ АЛЕКСІИ АЛЕКСАНДРОВИЧѢ; при Благовѣ́рномъ Госуда́рѣ, Вели́комъ Кня́зѣ СЕРГІИ АЛЕКСАНДРОВИЧѢ, и при Супру́гѣ Его́, Благовѣ́рной Госуда́рынѣ, Вели́кой Княги́нѣ ЕЛИСАВЕТѢ ѲЕОДОРОВНѢ; при Благовѣ́рномъ Госуда́рѣ, Вели́комъ Кня́зѣ ПАВЛѢ АЛЕКСАНДРОВИЧѢ; при Благовѣ́рномъ Госуда́рѣ, Вели́комъ Кня́зѣ ДИМИТРІИ ПАВЛОВИЧѢ; при Благовѣ́рномъ Госуда́рѣ, Вели́комъ Кня́зѣ НИКОЛАѢ КОНСТАНТИНОВИЧѢ; при Благовѣ́рномъ Госуда́рѣ, Вели́комъ Кня́зѣ КОНСТАНТИНѢ КОНСТАНТИНОВИЧѢ, и при Супру́гѣ Его́, Госуда́рынѣ, Вели́кой Княги́нѣ ЕЛИСАВЕТѢ МАВРИКІЕВНѢ; при Благовѣ́рномъ Госуда́рѣ, Вели́комъ Кня́зѣ ДИМИТРІИ КОНСТАНТИНОВИЧѢ; при Благовѣ́рномъ Госуда́рѣ, Вели́комъ Кня́зѣ НИКОЛАѢ НИКОЛАЕВИЧѢ; при Благовѣ́рномъ Госуда́рѣ, Вели́комъ Кня́зѣ ПЕТРѢ НИКОЛАЕВИЧѢ, и при Супру́гѣ Его́, Благовѣ́рной Госуда́рынѣ, Вели́кой Княги́нѣ МИЛИЦѢ НИКОЛАЕВНѢ; при Благовѣ́рномъ Госуда́рѣ, Вели́комъ Кня́зѣ МИХАИЛѢ НИКОЛАЕВИЧѢ; при Благовѣ́рныхъ Госуда́рѣхъ, Вели́кихъ Князѣ́хъ: НИКОЛАѢ, МИХАИЛѢ и ГЕОРГІИ МИХАИЛОВИЧАХЪ; при Благовѣ́рномъ Госуда́рѣ, Вели́комъ Кня́зѣ АЛЕКСАНДРѢ МИХАИЛОВИЧѢ, и при Супру́гѣ Его́, Благовѣ́рной Госуда́рынѣ, Вели́кой Княги́нѣ КСЕНІИ АЛЕКСАНДРОВНѢ; при Благовѣ́рномъ Госуда́рѣ, Вели́комъ Кня́зѣ СЕРГІИ МИХАИЛОВИЧѢ; при Благовѣ́рныхъ Госуда́рыняхъ, Вели́кихъ Княжна́хъ: ОЛЬГѢ и ТАТІАНѢ НИКОЛАЕВНАХЪ; при Благовѣ́рной Госуда́рынѣ, Вели́кой Княжнѣ́ ОЛЬГѢ АЛЕКСАНДРОВНѢ; при Благовѣ́рной Госуда́рынѣ, Вели́кой Княжнѣ́ ЕЛЕНѢ ВЛАДИМІРОВНѢ; при Благовѣ́рной Госуда́рынѣ, Вели́кой Княжнѣ́ МАРІИ ПАВЛОВНѢ; при Благовѣ́рныхъ Госуда́рыняхъ: Вели́кой Княги́нѣ МАРІИ АЛЕКСАНДРОВНѢ, и при Супру́гѣ Ея́; при Короле́вѣ Еллиновъ ОЛЬГѢ КОНСТАНТИНОВНѢ, и при Супру́гѣ Ея́; при Благовѣ́рной Госуда́рынѣ, Вели́кой Княги́нѣ АЛЕКСАНДРѢ ІОСИФОВНѢ; при Вели́кой Княги́нѣ АЛЕКСАНДРѢ ПЕТРОВНѢ; при Вели́кой Княги́нѣ ВѢРѢ КОНСТАНТИНОВНѢ; при Вели́кой Княги́нѣ АНАСТАСІИ МИХАИЛОВНѢ. Благослове́ніемъ Святѣ́йшаго Прави́тельствующаго Всероссíйскаго Сѵно́да, и Преосвяще́ннаго ІОАННИКІЯ, Митрополи́та Кíевскаго и Га́лицкаго, и Свяще́нно-Архимандри́та Кіево-Пече́рскія ЛАѴРЫ, напеча́тася кни́га сія́, СЛУЖБА СЪ АКАѲИСТОМЪ БОЖЕСТВЕННЫМЪ СТРАСТЕМЪ ХРИСТОВЫМЪ, въ то́йже свято́й Кіево-Пече́рской Ла́ѵрѣ, въ лѣ́то отъ сотворе́нія мíра, 7407, отъ Рождества́ же по пло́ти Бо́га Сло́ва, 1899, Инди́кта 12, Мѣ́сяца Іу́нія.

Источникъ: Слу́жба съ Ака́ѳистомъ Боже́ственнымъ Страсте́мъ Христо́вымъ. — Кíевъ: Въ тѵпогра́фіи Кíево-Пече́рскія Ла́вры, 1899. — 35 л.

/ Къ оглавленію раздѣла /


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.