Церковный календарь
Новости


2017-11-18 / russportal
Ген. П. Н. Красновъ. "Старая Академія". Глава 8-я (1932)
2017-11-18 / russportal
Ген. П. Н. Красновъ. "Старая Академія". Глава 7-я (1932)
2017-11-18 / russportal
Л. Д. Перепелкина. Юліанскій календарь - 1000-лѣтняя икона времени на Руси (1989)
2017-11-18 / russportal
Проф. П. В. Верховской. Патріархъ Тихонъ (1919)
2017-11-17 / russportal
Ген. П. Н. Красновъ. "Старая Академія". Глава 6-я (1932)
2017-11-17 / russportal
Ген. П. Н. Красновъ. "Старая Академія". Глава 5-я (1932)
2017-11-17 / russportal
Ген. П. Н. Красновъ. №100 (Къ юбилею "Часового") (1933)
2017-11-17 / russportal
Генералъ П. Н. Красновъ. Подъ какимъ лозунгомъ? (1933)
2017-11-17 / russportal
Слова преп. Симеона Новаго Богослова. Слово 36-е (1882)
2017-11-17 / russportal
Слова преп. Симеона Новаго Богослова. Слово 35-е (1882)
2017-11-16 / russportal
П. Н. Красновъ. Казаки. (Изъ стараго разсказа) (1933)
2017-11-15 / russportal
Основатель и Верх. Руководитель Добров. Арміи Ген. М. В. Алексѣевъ (1919)
2017-11-15 / russportal
П. Н. Красновъ. "Старая Академія". Глава 4-я (1932)
2017-11-15 / russportal
П. Н. Красновъ. "Старая Академія". Глава 3-я (1932)
2017-11-15 / russportal
Приказъ №900 Верх. Главнокоманд. генерала Корнилова (29 августа 1917 года)
2017-11-15 / russportal
Приказъ №897 Верх. Главнокоманд. генерала Корнилова (28 августа 1917 года)
Новости въ видѣ
RSS-канала: .
Сегодня - воскресенiе, 19 ноября 2017 г. Сейчасъ на порталѣ посѣтителей - 16.
Церковно-богослужебныя книги

ПСАЛТИРЬ СЪ ВОЗСЛѢДОВАНІЕМЪ (СЛѢДОВАННАЯ ПСАЛТИРЬ).
[Изданіе 31-е. М., 1874].

ДАВИДА ПРОРОКА И ЦАРЯ ПѢСНЬ.

КАѲИСМА ШЕСТАЯ.

Псало́мъ Дави́ду, въ воспомина́ніе о суббо́тѣ, 37.

2 Го́споди, да не я́ростію Твое́ю обличи́ши мене́, ниже́ гнѣ́вомъ Твои́мъ нака́жеши мене́. 3 Яко стрѣ́лы Твоя́ унзо́ша во мнѣ́ и утверди́лъ еси́ на мнѣ́ ру́ку Твою́. 4 Нѣ́сть исцѣле́нія въ пло́ти мое́й отъ лица́ гнѣ́ва Твоего́, нѣ́сть ми́ра въ косте́хъ мои́хъ отъ лица́ грѣ́хъ мои́хъ. 5 Яко беззако́нія моя́ превзыдо́ша главу́ мою́, я́ко бре́мя тя́жкое отяготѣ́ша на мнѣ́. 6 Возсмердѣ́ша и согни́ша ра́ны моя́ отъ лица́ безу́мія моего́. 7 Пострада́хъ и сляко́хся до конца́, ве́сь де́нь сѣ́туя хожда́хъ. 8 Яко ля́двія моя́ напо́лнишася поруга́ній, и нѣ́сть исцѣле́нія въ пло́ти мое́й. 9 Озло́бленъ бы́хъ и смири́хся до зѣла́, рыка́хъ отъ воздыха́нія се́рдца моего́. 10 Го́споди, предъ Тобо́ю все́ жела́ніе мое́ и воздыха́ніе мое́ отъ Тебе́ не утаи́ся. 11 Се́рдце мое́ смяте́ся, оста́ви мя́ си́ла моя́, и свѣ́тъ о́чію мое́ю, и то́й нѣ́сть со мно́ю. 12 Дру́зи мои́ и и́скренніи мои́ пря́мо мнѣ́ прибли́жишася и ста́ша, 13 И бли́жніи мои́ отдале́че мене́ ста́ша, и нужда́хуся и́щущіи ду́шу мою́, и и́щущіи зла́я мнѣ́ глаго́лаху су́етная, и льсти́внымъ ве́сь де́нь поуча́хуся. 14 Азъ же, я́ко глу́хъ, не слы́шахъ, и, я́ко нѣ́мъ, не отверза́яй у́стъ свои́хъ. 15 И бы́хъ, я́ко человѣ́къ, не слы́шай и не имы́й во устѣ́хъ свои́хъ обличе́нія. 16 Яко на Тя́, Го́споди, упова́хъ, Ты́ услы́шиши, Го́споди Бо́же мо́й. 17 Яко рѣ́хъ: да не когда́ пора́дуютмися врази́ мои́, и внегда́ подвижа́тися нога́мъ мои́мъ, на мя́ велерѣ́чеваша. 18 Яко а́зъ на ра́ны гото́въ и болѣ́знь моя́ предо мно́ю е́сть вы́ну. 19 Яко беззако́ніе мое́ а́зъ возвѣщу́ и попеку́ся о грѣсѣ́ мое́мъ. 20 Врази́ же мои́ живу́тъ и укрѣпи́шася па́че мене́, и умно́жишася ненави́дящіи мя́ безъ пра́вды. 21 Воздаю́щіи ми́ зла́я возъ блага́я оболга́ху мя́, зане́ гоня́хъ благосты́ню. 22 Не оста́ви мене́, Го́споди Бо́же мо́й, не отступи́ отъ мене́. 23 Вонми́ въ по́мощь мою́, Го́споди спасе́нія моего́.

Въ коне́цъ, Идиѳу́му, пѣ́снь Дави́ду, 38.

2 Рѣ́хъ: сохраню́ пути́ моя́, е́же не согрѣша́ти ми́ язы́комъ мои́мъ. Положи́хъ усто́мъ мои́мъ храни́ло, внегда́ воста́ти грѣ́шному предо мно́ю. 3 Онѣмѣ́хъ, и смири́хся, и умолча́хъ отъ бла́гъ, и болѣ́знь моя́ обнови́ся. 4 Согрѣ́яся се́рдце мое́ во мнѣ́ и въ поуче́ніи мое́мъ разгори́тся о́гнь. Глаго́лахъ язы́комъ мои́мъ: 5 Скажи́ ми, Го́споди, кончи́ну мою́ и число́ днíй мои́хъ, ко́е е́сть? да разумѣ́ю, что́ лиша́юся а́зъ. 6 Се́ пя́ди положи́лъ еси́ дни́ моя́ и соста́въ мо́й я́ко ничто́же предъ Тобо́ю. Оба́че, вся́ческая суета́, вся́къ человѣ́къ живы́й. 7 Убо о́бразомъ хо́дитъ человѣ́къ, оба́че всу́е мяте́тся, сокро́вищствуетъ, и не вѣ́сть, кому́ собере́тъ я́. 8 И ны́нѣ, кто́ терпѣ́ніе мое́? не Госпо́дь ли? и соста́въ мо́й отъ Тебе́ е́сть. 9 Отъ всѣ́хъ беззако́ній мои́хъ изба́ви мя́, поноше́ніе безу́мному да́лъ мя́ еси́. 10 Онѣмѣ́хъ и не отверзо́хъ у́стъ мои́хъ, я́ко Ты́ сотвори́лъ еси́. 11 Отста́ви отъ мене́ ра́ны Твоя́, отъ крѣ́пости бо руки́ Твоея́ а́зъ изчезо́хъ. 12 Во обличе́ніихъ о беззако́ніи наказа́лъ еси́ человѣ́ка и иста́ялъ еси́, я́ко паучи́ну, ду́шу его́: оба́че всу́е вся́къ человѣ́къ. 13 Услы́ши моли́тву мою́, Го́споди, и моле́ніе мое́ внуши́, сле́зъ мои́хъ не премолчи́, я́ко пресе́лникъ а́зъ е́смь у Тебе́ и пришле́цъ, я́коже вси́ отцы́ мои́. 14 Осла́би ми́, да почíю, пре́жде да́же не отъиду́, и ктому́ не бу́ду.

Въ коне́цъ, псало́мъ Дави́ду, 39.

2 Терпя́ потерпѣ́хъ Го́спода, и вня́тъ ми́ и услы́ша моли́тву мою́, 3 И возведе́ мя отъ ро́ва страсте́й и отъ бре́нія ти́ны, и поста́ви на ка́мени но́зѣ мои́ и испра́ви стопы́ моя́, 4 И вложи́ во уста́ моя́ пѣ́снь но́ву, пѣ́ніе Бо́гу на́шему. Узрятъ мно́зи и убоя́тся, и упова́ютъ на Го́спода. 5 Блаже́нъ му́жъ, ему́же е́сть и́мя Госпо́дне упова́ніе его́, и не призрѣ́ въ суеты́ и неистовле́нія ло́жная. 6 Мно́га сотвори́лъ еси́ Ты́, Го́споди, Бо́же мо́й, чудеса́ Твоя́ и помышле́ніемъ Твои́мъ нѣ́сть кто́ уподо́бится Тебѣ́; возвѣсти́хъ и глаго́лахъ, умно́жишася па́че числа́. 7 Же́ртвы и приноше́нія не восхотѣ́лъ еси́, тѣ́ло же сверши́лъ ми́ еси́, всесожже́ній и о грѣсѣ́ не взыска́лъ еси́. 8 Тогда́ рѣ́хъ: се́, пріиду́, въ глави́знѣ кни́жнѣ пи́сано е́сть о Мнѣ́. 9 Еже сотвори́ти во́лю Твою́, Бо́же мо́й, восхотѣ́хъ, и зако́нъ Тво́й посредѣ́ чре́ва Моего́. 10 Благовѣсти́хъ пра́вду въ це́ркви вели́цѣй; се́, устна́мъ мои́мъ не возбраню́. Го́споди, Ты́ разумѣ́лъ еси́. 11 Пра́вду Твою́ не скры́хъ въ се́рдцѣ мое́мъ, и́стину Твою́ и спасе́ніе Твое́ рѣ́хъ, не скры́хъ ми́лость твою́ и и́стину твою́ отъ со́нма мно́га. 12 Ты́ же, Го́споди, не удали́ щедро́тъ Твои́хъ отъ мене́: ми́лость Твоя́ и и́стина Твоя́ вы́ну да засту́питѣ мя́. 13 Яко одержа́ша мя́ зла́я, и́мже нѣ́сть числа́, постиго́ша мя́ беззако́нія моя́, и не возмого́хъ зрѣ́ти, умно́жишася па́че вла́съ главы́ моея́, и се́рдце мое́ оста́ви мя́. 14 Благоволи́, Го́споди, изба́вити мя́, Го́споди, во е́же помощи́ ми, вонми́. 15 Да постыдя́тся и посра́мятся вку́пѣ и́щущіи ду́шу мою́, изъя́ти ю́, да возвратя́тся вспя́ть и постыдя́тся хотя́щіи ми́ зла́я. 16 Да пріи́мутъ а́біе сту́дъ сво́й глаго́лющіи ми́: бла́гоже, бла́гоже! 17 Да возра́дуются и возвеселя́тся о Тебѣ́ вси́ и́щущіи Тебе́, Го́споди, и да реку́тъ вы́ну, — да возвели́чится Госпо́дь! — лю́бящіи спасе́ніе Твое́. 18 Азъ же ни́щъ е́смь и убо́гъ, Госпо́дь попече́тся о мнѣ́. Помо́щникъ мо́й и Защи́титель мо́й еси́ Ты́, Бо́же мо́й, не закосни́.

Сла́ва:

Въ коне́цъ, псало́мъ Дави́ду, 40.

2 Блаже́нъ разумѣва́яй на ни́ща и убо́га, въ де́нь лю́тъ изба́витъ его́ Госпо́дь. 3 Госпо́дь да сохрани́тъ его́ и живи́тъ его́, и да ублажи́тъ его́ на земли́ и да не преда́стъ его́ въ ру́ки враго́въ его́. 4 Госпо́дь да помо́жетъ ему́ на одрѣ́ болѣ́зни его́: все́ ло́же его́ обрати́лъ еси́ въ болѣ́зни его́. 5 Азъ рѣ́хъ: Го́споди, поми́луй мя́, исцѣли́ ду́шу мою́, я́ко согрѣши́хъ Ти́. 6 Врази́ мои́ рѣ́ша мнѣ́ зла́я: когда́ у́мретъ и поги́бнетъ и́мя его́? 7 И вхожда́ше ви́дѣти, всу́е глаго́лаше се́рдце его́, собра́ беззако́ніе себѣ́, исхожда́ше во́нъ и глаго́лаше вку́пѣ. 8 На мя́ шепта́ху вси́ врази́ мои́, на мя́ помышля́ху зла́я мнѣ́. 9 Сло́во законопресту́пное возложи́ша на мя́: еда́ спя́й не приложи́тъ воскресну́ти? 10 Ибо человѣ́къ ми́ра моего́, на него́же упова́хъ, яды́й хлѣ́бы моя́, возвели́чи на мя́ запина́ніе. 11 Ты́ же, Го́споди, поми́луй мя́ и возста́ви мя́, и возда́мъ и́мъ. 12 Въ се́мъ позна́хъ, я́ко восхотѣ́лъ мя́ еси́, я́ко не возра́дуется вра́гъ мо́й о мнѣ́. 13 Мене́ же за незло́біе прія́лъ и утверди́лъ мя́ еси́ предъ Тобо́ю въ вѣ́къ. 14 Благослове́нъ Госпо́дь Бо́гъ Изра́илевъ отъ вѣ́ка и до вѣ́ка. Бу́ди, бу́ди.

Въ коне́цъ, въ ра́зумъ сыно́въ Коре́овыхъ, псало́мъ Дави́ду, не надпи́санъ у евре́й, 41.

2 Имже о́бразомъ жела́етъ еле́нь на исто́чники водны́я, си́це жела́етъ душа́ моя́ къ Тебѣ́, Бо́же. 3 Возжада́ душа́ моя́ къ Бо́гу Крѣ́пкому, Живо́му: когда́ пріиду́ и явлю́ся лицу́ Бо́жію? 4 Бы́ша сле́зы моя́ мнѣ́ хлѣ́бъ де́нь и но́щь, внегда́ глаго́латися мнѣ́ на вся́къ де́нь: гдѣ́ е́сть Бо́гъ тво́й? 5 Сія́ помяну́хъ и излія́хъ на мя́ ду́шу мою́, я́ко пройду́ въ мѣ́сто селе́нія ди́вна, да́же до до́му Бо́жія, во гла́сѣ ра́дованія и исповѣ́данія, шу́ма пра́зднующаго. 6 Вску́ю приско́рбна еси́, душе́ моя́? и вску́ю смуща́еши мя́? Упова́й на Бо́га, я́ко исповѣ́мся Ему́, спасе́ніе лица́ моего́ и Бо́гъ мо́й. 7 Ко мнѣ́ самому́ душа́ моя́ смяте́ся, сего́ ра́ди помяну́хъ тя́ отъ земли́ Іорда́нски и Ермоніи́мски, отъ горы́ Ма́лыя. 8 Бе́здна бе́здну призыва́етъ во гла́сѣ хля́бій Твои́хъ: вся́ высоты́ Твоя́ и во́лны Твоя́ на мнѣ́ преидо́ша. 9 Въ де́нь заповѣ́сть Госпо́дь ми́лость Свою́, и но́щію пѣ́снь Его́ отъ мене́ [1], моли́тва Бо́гу живота́ моего́. 10 Реку́ Бо́гу: Засту́пникъ мо́й еси́, почто́ мя́ забы́лъ еси́? и вску́ю сѣ́туя хожду́, внегда́ оскорбля́етъ вра́гъ? 11 Внегда́ сокруша́тися косте́мъ мои́мъ, поноша́ху ми́ врази́ мои́, внегда́ глаго́лати и́мъ мнѣ́ на вся́къ де́нь: гдѣ́ е́сть Бо́гъ тво́й? 12 Вску́ю приско́рбна еси́, душе́ моя́? и вску́ю смуща́еши мя́? Упова́й на Бо́га, я́ко исповѣ́мся Ему́, спасе́ніе лица́ моего́ и Бо́гъ мо́й.

Псало́мъ Дави́ду, не надпи́санъ у евре́й, 42.

1 Суди́ ми, Бо́же, и разсуди́ прю́ мою́; отъ язы́ка не преподо́бна, отъ человѣ́ка непра́ведна и льсти́ва изба́ви мя́. 2 Зане́ Ты́ еси́, Бо́же, крѣ́пость моя́. Вску́ю отри́нулъ мя́ еси́? и вску́ю сѣ́туя хожду́, внегда́ оскорбля́етъ вра́гъ? 3 Посли́ свѣ́тъ Тво́й и и́стину твою́: та́ мя́ наста́виста и введо́ста мя́ въ го́ру святу́ю Твою́ и въ селе́нія Твоя́. 4 И вни́ду къ же́ртвеннику Бо́жію, къ Бо́гу веселя́щему ю́ность мою́. Исповѣ́мся Тебѣ́ въ гу́слехъ, Бо́же, Бо́же мо́й! 5 Вску́ю приско́рбна еси́, душе́ моя́? и вску́ю смуща́еши мя́? Упова́й на Бо́га, я́ко исповѣ́мся Ему́, спасе́ніе лица́ моего́ и Бо́гъ мо́й.

Сла́ва:

Въ коне́цъ, сыно́въ Коре́овыхъ, въ ра́зумъ, 43.

2 Бо́же, уши́ма на́шима услы́шахомъ и отцы́ на́ши возвѣсти́ша на́мъ дѣ́ло, е́же содѣ́лалъ еси́ во дне́хъ и́хъ, во дне́хъ дре́внихъ. 3 Рука́ Твоя́ язы́ки потреби́, и насади́лъ я́ еси́; озло́билъ еси́ лю́ди и изгна́лъ еси́ я́. 4 Не бо мече́мъ свои́мъ наслѣ́диша зе́млю и мы́шца и́хъ не спасе́ и́хъ, но десни́ца Твоя́ и мы́шца Твоя́, и просвѣще́ніе лица́ Твоего́, я́ко благоволи́лъ еси́ въ ни́хъ. 5 Ты́ еси́ Са́мъ Ца́рь мо́й и Бо́гъ мо́й, заповѣ́даяй спасе́нія Іа́ковля. 6 О Тебѣ́ враги́ на́ша избоде́мъ ро́ги, и о и́мени Твое́мъ уничижи́мъ востаю́щія на ны́. 7 Не на лу́къ бо мо́й упова́ю, и ме́чь мо́й не спасе́тъ мене́. 8 Спа́слъ бо еси́ на́съ отъ стужа́ющихъ на́мъ и ненави́дящихъ на́съ посрами́лъ еси́. 9 О Бо́зѣ похва́лимся ве́сь де́нь и о и́мени Твое́мъ исповѣ́мыся во вѣ́къ. 10 Ны́нѣ же отри́нулъ еси́ и посрами́лъ еси́ на́съ, и не изы́деши, Бо́же, въ си́лахъ на́шихъ. 11 Возврати́лъ еси́ на́съ вспя́ть при вразѣ́хъ на́шихъ, и ненави́дящіи на́съ расхища́ху себѣ́. 12 Да́лъ еси́ на́съ, я́ко о́вцы, снѣ́ди и во язы́цѣхъ разсѣ́ялъ ны́ еси́. 13 Отда́лъ еси́ лю́ди Твоя́ безъ цѣны́ и не бѣ́ мно́жество въ восклица́ніихъ на́шихъ. 14 Положи́лъ еси́ на́съ поноше́ніе сосѣ́домъ на́шимъ, подражне́ніе и поруга́ніе су́щимъ о́крестъ на́съ. 15 Положи́лъ еси́ на́съ въ при́тчу во язы́цѣхъ, покива́нію главы́ въ лю́дехъ. 16 Ве́сь де́нь сра́мъ мо́й предо мно́ю е́сть, и сту́дъ лица́ моего́ покры́ мя, 17 Отъ гла́са поноша́ющаго и оклевета́ющаго, отъ лица́ вра́жія и изгоня́щаго. 18 Сія́ вся́ пріидо́ша на ны́, и не забы́хомъ Тебе́ и не непра́вдовахомъ въ завѣ́тѣ Твое́мъ, 19 И не отступи́ вспя́ть се́рдце на́ше, и уклони́лъ еси́ стези́ на́ша отъ пути́ Твоего́. 20 Яко смири́лъ еси́ на́съ на мѣ́стѣ озлобле́нія, и прикры́ ны сѣ́нь сме́ртная. 21 Аще забы́хомъ и́мя Бо́га на́шего, и а́ще воздѣ́хомъ ру́ки на́ша къ бо́гу чужде́му, 22 Не Бо́гъ ли взы́щетъ си́хъ? То́й бо вѣ́сть та́йная се́рдца. 23 Зане́ Тебе́ ра́ди умерщвля́емся ве́сь де́нь, вмѣни́хомся я́ко о́вцы заколе́нія. 24 Воста́ни, вску́ю спи́ши, Го́споди? воскре́сни́, и не отри́ни до конца́. 25 Вску́ю лице́ Твое́ отвраща́еши? забыва́еши нищету́ на́шу и ско́рбь на́шу? 26 Яко смири́ся въ пе́рсть душа́ на́ша, прильпе́ земли́ утро́ба на́ша. 27 Воскре́сни́, Го́споди, помози́ на́мъ и изба́ви на́съ и́мене ра́ди Твоего́.

Въ коне́цъ, о измѣня́емыхъ сыно́мъ Коре́овымъ въ ра́зумъ, пѣ́снь о Возлю́бленнѣмъ, 44.

2 Отры́гну се́рдце мое́ сло́во бла́го, глаго́лю а́зъ дѣла́ моя́ Царе́ви: язы́къ мо́й — тро́сть кни́жника скоропи́сца. 3 Красе́нъ добро́тою па́че сыно́въ человѣ́ческихъ, излія́ся благода́ть во устна́хъ Твои́хъ, сего́ ра́ди благослови́ Тя Бо́гъ во вѣ́къ. 4 Препоя́ши ме́чь Тво́й по бедрѣ́ Твое́й, Си́льне, 5 Красото́ю Твое́ю и добро́тою Твое́ю, и наляцы́, и успѣва́й, и ца́рствуй и́стины ра́ди и кро́тости и пра́вды, и наста́витъ Тя́ ди́вно десни́ца Твоя́. 6 Стрѣ́лы Твоя́ изощре́ны, Си́льне, лю́діе подъ Тобо́ю паду́тъ въ се́рдцѣ вра́гъ Царе́выхъ. 7 Престо́лъ тво́й, Бо́же, въ вѣ́къ вѣ́ка, же́злъ пра́вости — же́злъ ца́рствія Твоего́. 8 Возлюби́лъ еси́ пра́вду и возненави́дѣлъ еси́ беззако́ніе, сего́ ра́ди пома́за Тя́, Бо́же, Бо́гъ Тво́й еле́емъ ра́дости, па́че прича́стникъ Твои́хъ. 9 Сми́рна и ста́кти и касíя отъ ри́зъ Твои́хъ, отъ тя́жестей слоно́выхъ [2], изъ ни́хже возвесели́ша Тя́. 10 Дще́ри царе́й въ че́сти Твое́й, предста́ Цари́ца одесну́ю Тебе́, въ ри́захъ позлаще́нныхъ, одѣ́яна преиспещре́на. 11 Слы́ши, Дщи́, и ви́ждь, и приклони́ у́хо Твое́, и забу́ди лю́ди Твоя́ и до́мъ отца́ Твоего́, 12 И возжела́етъ Ца́рь добро́ты Твоея́, зане́ То́й е́сть Госпо́дь Тво́й, и поклони́шися Ему́. 13 И дщи́ Ти́рова съ да́ры, лицу́ Твоему́ помо́лятся бога́тіи лю́дстіи. 14 Вся́ сла́ва Дще́ре Царе́вы вну́трь; ря́сны златы́ми одѣ́яна и преиспещре́на. 15 Приведу́тся Царю́ дѣ́вы вслѣ́дъ Ея́, и́скреннія Ея́ приведу́тся Тебѣ́. 16 Приведу́тся въ весе́ліи и ра́дованіи, введу́тся въ хра́мъ Царе́въ. 17 Вмѣ́сто оте́цъ Твои́хъ, бы́ша сы́нове Твои́: поста́виши я́ кня́зи по все́й земли́. 18 Помяну́ и́мя Твое́ во вся́комъ ро́дѣ и ро́дѣ, сего́ ра́ди лю́діе исповѣ́дятся Тебѣ́ въ вѣ́къ и во вѣ́къ вѣ́ка.

Въ коне́цъ, о сынѣ́хъ Коре́овыхъ, о та́йныхъ, псало́мъ 45.

2 Бо́гъ на́мъ Прибѣ́жище и Си́ла, Помо́щникъ въ ско́рбехъ, обрѣ́тшихъ ны́ зѣло́. 3 Сего́ ра́ди не убои́мся, внегда́ смуща́ется земля́ и прелага́ются го́ры въ сердца́ морска́я. 4 Возшумѣ́ша и смято́шася во́ды и́хъ, смято́шася го́ры крѣ́постію Его́. 5 Рѣ́чная устремле́нія веселя́тъ гра́дъ Бо́жій: освяти́лъ е́сть селе́ніе Свое́ Вы́шній. 6 Бо́гъ посредѣ́ его́, и не подви́жится: помо́жетъ ему́ Бо́гъ у́тро зау́тра. 7 Смято́шася язы́цы, уклони́шася ца́рствія: даде́ гла́съ сво́й Вы́шній, подви́жеся земля́. 8 Госпо́дь си́лъ съ на́ми, Засту́пникъ на́шъ Бо́гъ Іа́ковль. 9 Пріиди́те и ви́дите дѣла́ Бо́жія, я́же положи́ чудеса́ на земли́: 10 Отъе́мля бра́ни до коне́цъ земли́, лу́къ сокруши́тъ и сло́митъ ору́жіе, и щиты́ сожже́тъ огне́мъ. 11 Упраздни́теся и разумѣ́йте, я́ко Азъ е́смь Бо́гъ: вознесу́ся во язы́цѣхъ, вознесу́ся на земли́. 12 Госпо́дь си́лъ съ на́ми, Засту́пникъ на́шъ Бо́гъ Іа́ковль.

Сла́ва:

Примѣчанія:
[1] У мене́.
[2] Отъ хра́мовъ слоно́выхъ.

Источникъ: Псалти́рь [съ взслѣ́дованіемъ]. — Тисне́ніе 31-е. — М.: въ Сѵнода́льной тѵпогра́фіи, 1874. — Л. 15 об. – 19. [2-я паг.].

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.