Церковный календарь
Новости


2017-05-24 / russportal
«Проповѣдн. хрестоматія». Поученіе въ день свт. Германа Константинопольского (1965)
2017-05-24 / russportal
Прот. Григорій Дьяченко. Слово (3-е) въ день свв. равноапп. Кирилла и Меѳодія (1900)
2017-05-24 / russportal
Прот. Григорій Дьяченко. Слово (2-е) въ день свв. равноапп. Кирилла и Меѳодія (1900)
2017-05-24 / russportal
Прот. Григорій Дьяченко. Слово (1-е) въ день свв. равноапп. Кирилла и Меѳодія (1900)
2017-05-24 / russportal
И. А. Ильинъ. «О сопротивленіи злу силою». Глава 7-я (1925)
2017-05-24 / russportal
И. А. Ильинъ. «О сопротивленіи злу силою». Глава 6-я (1925)
2017-05-23 / russportal
«Проповѣдн. хрестоматія». Два слова на память свв. равноапп. Кирилла и Меѳодія (1965)
2017-05-23 / russportal
«Проповѣдн. хрестоматія». Поученіе на память св. ап. Симона Зилота (1965)
2017-05-23 / russportal
Архіеп. Аверкій (Таушевъ). Что есть истина? (1975)
2017-05-23 / russportal
Архіеп. Аверкій (Таушевъ). Въ чемъ значеніе Русской Зарубежной Церкви? (1975)
2017-05-22 / russportal
"Тріодь Цвѣтная". Служба въ пятокъ 7-й седмицы. Отданіе Вознесенія (1864)
2017-05-22 / russportal
"Тріодь Цвѣтная". Служба въ четвертокъ 7-й седмицы по Пасхѣ (1864)
2017-05-22 / russportal
«Проповѣдн. хрестоматія». Поученіе (2-е) на память свт. Николая Чудотворца (1965)
2017-05-22 / russportal
«Проповѣдн. хрестоматія». Поученіе (1-е) на память свт. Николая Чудотворца (1965)
2017-05-22 / russportal
«Проповѣдн. хрестоматія». Поученіе на память св. пророка Исаіи. (1965)
2017-05-22 / russportal
Еп. Григорій (Граббе). Догматъ о Церкви въ современномъ мірѣ (1975)
Новости въ видѣ
RSS-канала: .
Сегодня - четвергъ, 25 мая 2017 г. Сейчасъ на порталѣ посѣтителей - 17.
Церковно-богослужебныя книги

НАЧАЛО СЪ БОГОМЪ СВЯТЫМЪ ПЕНТИКОСТАРІЯ, СИРѢЧЬ ПЯТДИСЯТНИЦЫ,
Начина́емыя отъ святы́я и вели́кія недѣ́ли Па́схи утра́ и конча́емыя да́же до недѣ́ли всѣ́хъ святы́хъ, обдержа́щія неоску́дно на вся́кій де́нь все́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВО СВЯТУЮ И ВЕЛИКУЮ НЕДѢЛЮ ПАСХИ.

Объ часѣ́ у́треннѣмъ, параекклисіа́рхъ, взе́мъ благослове́ніе у настоя́теля, исхо́дитъ и ударя́етъ въ вели́кое, и кле́плетъ дово́льно. И вше́дъ во хра́мъ, вжига́етъ свѣщи́ вся́ и канди́ла, устроя́етъ же сосу́ды два́ со у́гліемъ горя́щимъ и влага́етъ въ ни́хъ ѳиміа́ма мно́го благово́ннаго, и поставля́етъ еди́нъ сосу́дъ среди́ це́ркве, другíй же во свято́мъ олтарѣ́, я́ко да испо́лнится це́рковь вся благово́нія. Та́же настоя́тель, вше́дъ во святы́й олта́рь, со іере́и и діа́коны облача́тся въ ве́сь свѣтлѣ́йшій са́нъ. И раздае́тъ свѣщи́ бра́тіи, и взе́млетъ честны́й крестъ, кади́ло же взе́млетъ діа́конъ, іере́й же свято́е Ева́нгеліе, и́нъ іере́й о́бразъ Воскресе́нія Христо́ва, и ста́вятся лице́мъ на за́падъ, и затворя́тъ врата́ церко́вная, я́же къ за́паду. Исхо́дитъ настоя́тель со іере́и въ притво́ръ, сѣ́верными две́рьми, предъиду́щимъ предъ ни́мъ діа́кономъ со двѣма́ свѣща́ми, и о́ба ли́ки, пою́ще стихи́ру,

Гла́съ 6:

Воскресе́ніе Твое́, Христе́ Спа́се,* а́нгели пою́тъ на небесѣ́хъ,* и на́съ на земли́ сподо́би* чи́стымъ се́рдцемъ Тебе́ сла́вити.

Та́же ударя́ютъ во вся кампа́ны и тя́жкая, и кле́плютъ дово́льно. И вше́дше въ притво́ръ, и ста́нутъ со Ева́нгеліемъ и со о́бразомъ, лице́мъ на за́падъ, я́коже указа́ся пре́жде. Та́же настоя́тель взе́млетъ у діа́кона кади́ло въ пра́вую ру́ку, кре́стъ же въ лѣ́вую, и кади́тъ о́бразы, и кли́росы, и бра́тію, по обы́чаю. Діа́кону же преднося́щу предъ ни́мъ свѣщу́ горя́щу. Бра́тія же вси́ стоя́тъ держа́ще свѣщи́ своя́, со внима́ніемъ моля́щеся въ себѣ́, и благодаря́ще на́съ ра́ди Пострада́вшаго и Воскре́сшаго Христа́, Бо́га на́шего.

По сконча́ніи же кажде́нія, прихо́дитъ настоя́тель предъ вели́кія врата́ це́ркве, и покади́тъ діа́кона предстоя́щаго ему́ со свѣще́ю. Тогда́ вземъ кади́ло діа́конъ отъ руку́ настоя́теля, и покади́тъ самого́ настоя́теля. И па́ки воспріи́мъ настоя́тель кади́ло, ставъ предъ церко́вными две́рьми, зря́ на восто́къ, и назна́менуетъ вели́кія врата́ це́ркве, [затворе́нная су́ща,] кади́ломъ крестообра́зно, три́жды, держа́ въ лѣ́вой руцѣ́ честны́й кре́стъ. И свѣти́льникомъ стоя́щимъ со обою́ страну́.

И велегла́сно возгласи́тъ:

Сла́ва Святѣ́й, и Единосу́щнѣй, и Животворя́щей, и Нераздѣ́льнѣй Тро́ицѣ, всегда́, ны́нѣ и при́сно и во вѣ́ки вѣко́въ.

И на́мъ отвѣща́ющимъ: Ами́нь.

Начина́етъ настоя́тель съ про́чими служи́тели велегла́сно настоя́щій тропа́рь, во гла́съ 5:

Христо́съ воскре́се изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ.

И мы́ то́йже пое́мъ подо́бнѣ, со сладкопѣ́ніемъ.
Пое́тся же се́й тропа́рь три́жды отъ настоя́теля и три́жды отъ на́съ.

Та́же настоя́тель глаго́летъ стихи́:

Пе́рвый [сти́хъ]: Да воскре́снетъ Бо́гъ и расточа́тся врази́ Его́, и да бѣжа́тъ отъ лица́ Его́ ненави́дящіи Его́.

И на кíйждо сти́хъ мы́ пое́мъ тропа́рь: Христо́съ воскре́се... ве́сь, по еди́ножды.

Вторы́й сти́хъ: Яко исчеза́етъ ды́мъ, да исче́знутъ, я́ко та́етъ во́скъ отъ лица́ огня́.

Христо́съ воскре́се.., еди́ножды.

Тре́тій сти́хъ: Та́ко да поги́бнутъ грѣ́шницы отъ лица́ Бо́жія, а пра́ведницы да возвеселя́тся.

Христо́съ воскре́се.., еди́ножды.

[Четве́ртый сти́хъ:] Се́й де́нь, его́же сотвори́ Госпо́дь, возра́дуемся и возвесели́мся въ о́нь.

Христо́съ воскре́се.., еди́ножды.
Сла́ва: Христо́съ воскре́се.., еди́ножды. И ны́нѣ: Христо́съ воскре́се.., еди́ножды.
Та́же настоя́тель пое́тъ вы́шшимъ гла́сомъ: Христо́съ воскре́се изъ ме́ртвыхъ, сме́ртію сме́рть попра́въ.

И отверза́етъ врата́. Вхо́дитъ настоя́тель съ честны́мъ кресто́мъ, предъиду́щимъ ему́ со двѣма́ лампа́дами, и бра́тіямъ пою́щимъ:

И су́щимъ во гробѣ́хъ живо́тъ дарова́въ.

Та́же ударя́ютъ во вся́ кампа́ны, и кле́плютъ дово́льно, три́ зво́ны.

Вше́дъ же настоя́тель со іере́и во святы́й олта́рь, и діа́конъ глаго́летъ ектенію́ вели́кую: Ми́ромъ, Го́споду помо́лимся... Возгла́съ: Яко подоба́етъ Тебѣ́ вся́кая сла́ва...

И начина́етъ предстоя́тель кано́нъ, творе́ніе господи́на Іоа́нна Дамаскина́, гла́съ 1. Ирмо́съ: Воскресе́нія де́нь... Ирмосы́ на 4 и тропари́ на 12, съ припѣ́вы: Христо́съ воскре́се изъ ме́ртвыхъ. И па́ки послѣди́ кíйждо ли́къ ирмо́съ. Послѣди́ же на схо́дѣ катава́сія, ирмо́съ то́йже: Воскресе́нія де́нь... И по не́мъ: Xристо́съ воскре́се... ве́сь, три́жды.

Твори́тъ же нача́ло кано́на на ку́юждо пѣ́снь всегда́ предстоя́тель, десно́й или́ лѣ́вой странѣ́ случи́вшейся нача́ти. И кади́тъ въ нача́лѣ кано́на святы́я ико́ны, и о́ба ли́ки, и бра́тію, по чи́ну. И по ко́ейждо пѣ́сни быва́етъ ектенія́ ма́лая внѣ́ олтаря́, я́коже рѣ́хомъ, во святы́й се́й де́нь. Возгла́съ вну́трь олтаря́ отъ іере́я. По 1-й пѣ́сни пое́тъ десна́я страна́. По 3-й же пое́тъ лѣ́вая. Си́це пое́мъ и по про́чихъ пѣ́снехъ.

Кано́нъ, гла́съ 1:

Пѣ́снь 1.

Ирмо́съ: Воскресе́нія де́нь, просвѣти́мся, лю́діе. Па́сха, Госпо́дня Па́сха: отъ сме́рти бо къ жи́зни, и отъ земли́ къ небеси́, Христо́съ Бо́гъ на́съ преведе́, побѣ́дную пою́щія.

Припѣ́въ: Христо́съ воскре́се изъ ме́ртвыхъ.

Очи́стимъ чу́вствія, и у́зримъ непристу́пнымъ свѣ́томъ воскресе́нія, Христа́ блиста́ющася, и — ра́дуйтеся — реку́ща, я́сно да услы́шимъ, побѣ́дную пою́ще.

Небеса́ у́бо досто́йно да веселя́тся, земля́ же да ра́дуется, да пра́зднуетъ же мíръ, ви́димый же ве́сь и неви́димый: Христо́съ бо воста́, весе́ліе вѣ́чное.

Та́же ектенія́, и возгла́съ:

Яко Твоя́ держава́ и Твое́ е́сть Ца́рство, и си́ла, и сла́ва, Отца́ и Сы́на и Свята́го Ду́ха, ны́нѣ и при́сно, и во вѣ́ки вѣко́въ.

Пѣ́снь 3.

Ирмо́съ: Пріиди́те, пи́во піе́мъ но́вое, не отъ ка́мене непло́дна чудодѣ́емое, но нетлѣ́нія исто́чникъ, изъ гро́ба одожди́вша Христа́, въ Не́мже утвержда́емся.

Ны́нѣ вся́ испо́лнишася свѣ́та, не́бо же и земля́, и преиспо́дняя: да пра́зднуетъ у́бо вся́ тва́рь воста́ніе Христо́во, въ не́мже утвержда́ется.

Вчера́ спогребо́хся Тебѣ́, Христе́, совостаю́ дне́сь воскре́сшу Тебѣ́, сраспина́хся Тебѣ́ вчера́, Са́мъ мя́ спросла́ви, Спа́се, во Ца́рствіи Твое́мъ.

Та́же ектенія́, и возгла́съ:

Яко Ты́ еси́ Бо́гъ на́шъ, и Тебѣ́ сла́ву возсыла́емъ, Отцу́ и Сы́ну и Свято́му Ду́ху, ны́нѣ и при́сно, и во вѣ́ки вѣко́въ.

Ипакои́, гла́съ 4:

Предвари́вшія у́тро я́же о Марíи, и обрѣ́тшія ка́мень отвале́нъ отъ гро́ба, слы́шаху отъ а́нгела: во свѣ́тѣ присносу́щнѣмъ Су́щаго, съ ме́ртвыми что и́щете, я́ко человѣ́ка? Ви́дите гро́бныя пелены́, тецы́те и мíру проповѣ́дите, я́ко воста́ Госпо́дь, умертви́вый сме́рть, я́ко е́сть Сы́нъ Бо́га, спаса́ющаго ро́дъ человѣ́ческій.

И чте́ніе въ Григо́ріи Богосло́вѣ, его́же нача́ло: На стра́жи мое́й ста́ну... По чте́ніи же, па́ки вжига́ютъ свѣщи́ бра́тія.

Пѣ́снь 4.

Ирмо́съ: На Боже́ственнѣй стра́жи богоглаго́ливый Авваку́мъ да ста́нетъ съ на́ми, и пока́жетъ свѣтоно́сна а́нгела, я́сно глаго́люща: дне́сь спасе́ніе мíру, я́ко воскре́се Христо́съ, я́ко всеси́ленъ.

Му́жескій у́бо по́лъ, я́ко разве́рзый дѣ́вственную утро́бу, яви́ся Христо́съ, я́ко человѣ́къ же, Агнецъ нарече́ся. Непоро́ченъ же, я́ко невку́сенъ скве́рны, на́ша Па́сха, и я́ко Бо́гъ и́стиненъ соверше́нъ рече́ся.

Яко единолѣ́тный а́гнецъ, благослове́нный на́мъ вѣне́цъ — Христо́съ, во́лею за всѣ́хъ закла́нъ бы́сть, Пасха́ чисти́тельная, и па́ки изъ гро́ба кра́сное пра́вды на́мъ возсія́ Со́лнце.

Богооте́цъ у́бо Дави́дъ предъ сѣ́ннымъ ковче́гомъ скака́ше игра́я, лю́діе же Бо́жіи святíи, образо́въ сбытіе́ зря́ще, весели́мся боже́ственнѣ, я́ко воскре́се Христо́съ, я́ко всеси́ленъ.

Ектенія́ и возгла́съ:

Яко Бла́гъ и Человѣколю́бецъ Бо́гъ еси́, и Тебѣ́ сла́ву возсыла́емъ, Отцу́ и Сы́ну и Свято́му Ду́ху, ны́нѣ и при́сно и во вѣ́ки вѣко́въ.

Пѣ́снь 5.

Ирмо́съ: Утренюемъ у́треннюю глубоку́, и вмѣ́сто мíра пѣ́снь принесе́мъ Влады́цѣ, и Христа́ у́зримъ, пра́вды Со́лнце, всѣ́мъ жи́знь возсія́юща.

Безмѣ́рное Твое́ благоутро́біе, а́довыми у́зами содержи́міи зря́ще, къ свѣ́ту идя́ху, Христе́, весе́лыми нога́ми, Па́сху хва́ляще вѣ́чную.

Присту́пимъ, свѣщено́сніи, исходя́щу Христу́ изъ гро́ба, я́ко Жениху́, и спра́зднуемъ любопра́зднственными чи́нми, Па́сху Бо́жію спаси́тельную.

Ектенія́ и возгла́съ:

Яко святи́ся и просла́вися пречестно́е и великолѣ́пое и́мя Твое́, Отца́ и Сы́на и Свята́го Ду́ха, ны́нѣ и при́сно, и во вѣ́ки вѣко́въ.

Пѣ́снь 6.

Ирмо́съ: Снизше́лъ еси́ въ преиспо́дняя земли́ и сокруши́лъ еси́ вереи́ вѣ́чныя, содержа́щія свя́занныя, Христе́, и тридне́венъ, я́ко отъ ки́та Іо́на, воскре́слъ еси́ отъ гро́ба.

Сохрани́въ цѣ́ла зна́менія, Христе́, воскре́слъ еси́ отъ гро́ба, ключи́ Дѣ́вы не вреди́вый въ рождествѣ́ Твое́мъ, и отве́рзлъ еси́ на́мъ ра́йскія две́ри.

Спа́се мо́й, живо́е же и неже́ртвенное заколе́ніе, я́ко Бо́гъ Са́мъ Себе́ во́лею приве́дъ Отцу́, совоскреси́лъ еси́ всеро́днаго Ада́ма, воскре́съ отъ гро́ба.

Ектенія́ и возгла́съ:

Ты́ бо еси́ Ца́рь ми́ра и Спа́съ ду́шъ на́шихъ, и Тебѣ́ сла́ву возсыла́емъ, Отцу́ и Сы́ну и Свято́му Ду́ху, ны́нѣ и при́сно, и во вѣ́ки вѣко́въ.

Та́же, конда́къ, гла́съ 8:

Аще и во гро́бъ снизше́лъ еси́, Безсме́ртне, но а́дову разруши́лъ еси́ си́лу, и воскре́слъ еси́, я́ко побѣди́тель, Христе́ Бо́же, жена́мъ мѵроно́сицамъ вѣща́вый, — ра́дуйтеся! — и Твои́мъ апо́столомъ ми́ръ да́руяй, па́дшимъ подая́й воскресе́ніе.

Икосъ:

Еже пре́жде со́лнца Со́лнце заше́дшее иногда́ во гро́бъ, предвари́ша ко у́тру, и́щущія я́ко дне́ мѵроно́сицы дѣ́вы, и друга́ ко друзѣ́й вопія́ху: О, други́ни! пріиди́те, воня́ми пома́жемъ тѣ́ло живоно́сное и погребе́ное, пло́ть Воскреси́вшаго па́дшаго Ада́ма, лежа́щую во гро́бѣ. Идемъ, потщи́мся, я́коже волсви́, и поклони́мся, и принесе́мъ мѵ́ра я́ко да́ры, не въ пелена́хъ, но въ плащани́цѣ Обви́тому, и пла́чимъ, и возопіи́мъ: о, Влады́ко! воста́ни, па́дшимъ подая́й воскресе́ніе.

Синакса́рь во святу́ю и вели́кую недѣ́лю Па́схи.

Стихи́: Христо́съ сше́дъ къ борьбѣ́ а́довѣ Еди́нъ,
                  Мно́гія взе́мъ побѣ́ды коры́сти, взы́де.

Во святу́ю и Вели́кую недѣ́лю Па́схи са́мое живоно́сное Воскресе́ніе пра́зднуемъ Го́спода Бо́га и Спа́са на́шего Іису́са Христа́, е́же у́бо и Па́сху имену́емъ, я́же евре́йскою бесѣ́дою «преведѣ́ніе» толку́ется.

То́й бо е́сть де́нь, въ о́ньже Бо́гъ въ нача́лѣ мíръ отъ небытія́ приведе́. Въ то́й де́нь изра́ильтескія лю́ди сквозѣ́ Чермно́е мо́ре прове́дъ, отъ фарао́новыхъ исхища́етъ ру́къ. Въ то́й па́ки, съ небесе́ соше́дъ, во утро́бу Дѣ́вы всели́ся, и ны́нѣ изъ а́довыхъ сокро́вищъ человѣ́ческое естество́ все́ исхити́въ, на небеса́ возведе́ и къ дре́внему достоя́нію приведе́ нетлѣ́нія. Оба́че, соше́дъ во а́дъ, не всѣ́хъ воскреси́, но ели́цы вѣ́ровати Ему́ изво́лиша; ду́ши же я́же отъ вѣ́ка святы́хъ, ну́ждею держи́мыя, отъ а́да свободи́ и всѣ́мъ даде́ на небеса́ взы́ти.

Сего́ ра́ди, ра́дующеся, преесте́ственнѣ со свѣ́тлостію Воскресе́ніе пра́зднуемъ, ра́дость образу́юще, е́юже естество́ на́ше милосе́рдія ра́ди ми́лости Бо́жія обогати́ся. Та́кожде и вражды́ разруше́ніе и е́же съ Бо́гомъ соедине́ніе и съ самѣ́ми а́нгелы показу́юще, обы́чное содѣва́емъ цѣлова́ніе.

Госпо́дне же Воскресе́ніе бы́сть си́це: Во́иномъ стрегу́щимъ гро́бъ, о полу́нощи тру́съ быва́етъ: соше́дъ бо а́нгелъ, ка́мень отваля́етъ отъ две́рей гро́ба. Стра́жіе же, ужаса́ющеся, бѣ́гаютъ. И прихожде́ніе здѣ́ жена́мъ быва́етъ въ суббо́ту по́здѣ, я́коже отъ полсуббо́тныя но́щи. И пе́рвѣе у́бо Воскресе́ніе Бо́жіи Ма́тери познава́емо быва́етъ, пря́мо сѣдя́щей гро́ба съ Магдали́ною, я́коже глаго́летъ Матѳе́й. Но да несомни́лобыся Воскресе́ніе, за е́же къ Ма́тери присвое́нія, евангели́сти глаго́лютъ: «пе́рвѣе явля́ется Магдали́ни Марíи». Она́ же и на ка́мени а́нгела ви́дѣ. И прини́кши, па́ки су́щія вну́трь зри́тъ, и́же у́бо и Госпо́дне Воскресе́ніе возвѣща́ютъ: «воста́ бо», глаго́лютъ, «нѣ́сть здѣ́; се́ мѣ́сто, идѣ́же положи́ша Его́». Тече́тъ у́бо сія́ слы́шавши и къ теплѣ́йшимъ отъ учени́къ прихо́дитъ — къ Петру́ и Іоа́нну, и Воскресе́ніе си́мъ благовѣству́етъ. Возвраща́ющися же е́й съ друго́ю Марíею, срѣ́те я́ Христо́съ, глаго́ля: «ра́дуйтеся!» Подоба́ше бо пе́рвѣе слы́шавшему ро́ду: «въ печа́лехъ роди́ши ча́да», — тому́ пре́жде и ра́дость внуши́ти. Сія́ же, любо́вію побѣжда́емыя, приступа́ютъ и пречи́стыма нога́ма Его́ каса́ются, опа́снѣйше разумѣ́ти хотя́ще. Апо́стола же ко гро́бу притеко́ста, Іоа́ннъ у́бо прини́къ то́чію во гро́бъ, оты́де. Пе́тръ же вну́трь вхо́дитъ и испы́тнѣйше зри́тъ, плащани́цѣ же каса́ется и сударе́ви.

Па́ки же Магдали́на прихо́дитъ ко гро́бу о у́трени со други́ми жена́ми, ви́дѣнная увѣ́рити хотя́щи опа́снѣ. У внѣ́шнихъ же стоя́щи, рыда́ше, вну́трь же гро́ба прини́кши, зри́тъ два́ а́нгела, блиста́ющася свѣ́тлостію, и а́ки претя́ща е́й и глаго́люща: «же́но, что́ пла́чеши и кого́ и́щеши? Іису́са и́щете Назаряни́на распя́таго? Воста́, нѣ́сть здѣ́». И а́біе воста́ша пристра́шни, ви́дѣвше Го́спода. Тѣ́мже она́, обра́щшися вспя́ть, ви́дитъ Христа́ стоя́ща, вертогра́даря же Его́ бы́ти мня́щи (зане́ въ вертогра́дѣ гро́бъ бы́сть), глаго́летъ: «го́споди, а́ще ты́ еси́ взя́лъ Его́, рцы́ ми́, гдѣ́ еси́ положи́лъ Его́? И а́зъ возму́ Его́». Па́ки же Спа́съ, ко а́нгеломъ помаа́въ, глаго́летъ къ Магдали́ни: «Марíе!» Она́ же сла́дкій и обы́чный Христо́въ ощути́вши гла́съ, прикосну́тися Ему́ хотя́ше. Онъ же глаго́летъ: «не прикаса́йся Мнѣ́, не у́бо взыдо́хъ ко Отцу́ Моему́, я́коже ты́ помышля́еши, еще́ человѣ́ка Мя́ бы́ти непщу́ющи, иди́ же къ бра́тіи Мое́й и рцы́ и́мъ, ели́ка же ви́дѣла еси́ и слы́шала». И сіе́ у́бо Магдали́на дѣ́лаетъ. Свита́ющу же дню́, па́ки у гро́ба съ про́чими быва́етъ.

Су́щіи же со Іоа́нною и Сало́міею, возсія́вшу со́лнцу пріидо́ша. И про́сто рещи́, разли́чно е́же на гро́бъ же́нъ прихожде́ніе бы́сть, въ ни́хже бѣ́ и Богоро́дица. Та́ бо е́сть, ю́же Іосíеву глаго́летъ Марíю Ева́нгеліе. Іо́сифовъ же бѣ́ сы́нъ се́й Іосíй.

Въ неизвѣ́стномъ у́бо е́сть, въ кíй ча́съ воскре́се Госпо́дь: нѣ́цыи у́бо — въ пе́рвое куроглаше́ніе глаго́лютъ, друзíи же — егда́ тру́съ бы́сть, и разли́чно — друзíи.

Си́мъ же та́ко бы́вшимъ, се́ нѣ́ціи отъ кустодíи доше́дше, возвѣсти́ша архіере́емъ содѣ́явшаяся. Они́ же сре́брениками и́хъ умзди́вше, повину́ютъ рещи́: «я́ко ученицы́ Его́, прише́дше но́щію, украдо́ша Его́».

Въ ве́черъ настоя́щаго дне́, ученико́мъ во еди́но собра́нымъ, стра́ха ра́ди іуде́йскаго, и две́ремъ тве́рдо заключе́ннымъ, вхо́дитъ къ ни́мъ Іису́съ, я́ко въ нетлѣ́ннѣмъ тѣлеси́ бѣ́, и — ми́ръ — обы́чно си́мъ благовѣству́етъ. Они́ же, Сего́ ви́дѣвше, премно́го возра́довашася. И дунове́ніемъ соверше́ннѣйшее Всесвята́го Ду́ха дѣ́йство пріе́млютъ.

Ка́ко же тридне́вное Воскресе́ніе Госпо́дне? Вѣ́ждь си́це: ве́черъ четвертка́ и де́нь пятка́, — та́ко бо нощеде́нство евре́и исчита́ютъ — де́нь еди́нъ. Пятка́ па́ки но́щь и суббо́та вся́, — друго́е нощеде́нство — се́ де́нь вторы́й. Па́ки, суббо́тная но́щь и недѣ́ли де́нь, отъ ча́сти бо нача́ла все́ пріе́млется, — тре́тіе нощеде́нство — се́ де́нь тре́тій. Или́ си́це: Въ тре́тій ча́съ пятка́ ра́спятъ бы́сть Христо́съ. Та́же отъ шеста́го часа́ до девя́таго тма́ бы́сть, сіе́ но́щь ми́ разумѣ́й; се́ отъ тре́тіяго да́же до девя́таго — еди́но нощеде́нство. Та́же па́ки по тмѣ́ де́нь и но́щь пятка́ — се́ два́ нощеде́нства. Де́нь суббо́ты и но́щь ея́ па́ки — се́ три́ нощеде́нства, по евангели́сту, глаго́лющему: «свита́ющу во еди́ну отъ суббо́тъ». Аще ли въ тре́тій обѣща́въ облагодѣ́тельствова на́съ Спа́съ, скорѣ́йше содѣ́ла благодѣ́йство.

И та́ко благода́ть и сла́ва Ему́ во вѣ́ки вѣко́въ. Ами́нь.

Та́же глаго́лемъ:

Воскресе́ніе Христо́во ви́дѣвше, [поклони́мся Свято́му Го́споду Іису́су, еди́ному Безгрѣ́шному. Кресту́ Твоему́ покланя́емся, Христе́, и свято́е Воскресе́ніе Твое́ пое́мъ и сла́вимъ: Ты́ бо еси́ Бо́гъ на́шъ, ра́звѣ Тебе́ ино́го не зна́емъ, и́мя Твое́ имену́емъ. Пріиди́те, вси́ вѣ́рніи, поклони́мся Свято́му Христо́ву Воскресе́нію: се́ бо пріи́де Кресто́мъ ра́дость всему́ мíру. Всегда́ благословя́ще Го́спода, пое́мъ Воскресе́ніе Его́: распя́тіе бо претерпѣ́въ, сме́ртію сме́рть разруши́]. [Три́жды.]

И: Воскре́съ Іису́съ отъ гро́ба, я́коже прорече́, даде́ на́мъ живо́тъ вѣ́чный и ве́лію ми́лость. [Три́жды.]

Пѣ́снь 7.

Ирмо́съ: Отроки отъ пе́щи Изба́вивый, бы́въ Человѣ́къ, стра́ждетъ я́ко сме́ртенъ, и стра́стію сме́ртное въ нетлѣ́нія облачи́тъ благолѣ́піе, Еди́нъ благослове́нъ отце́въ Бо́гъ и препросла́вленъ.

Жены́ съ мѵ́ры богому́дрыя въ слѣ́дъ Тебе́ теча́ху: Его́же, я́ко ме́ртва, со слеза́ми иска́ху, поклони́шася, ра́дующіяся, Живо́му Бо́гу, и Па́сху та́йную Твои́мъ, Христе́, ученико́мъ благовѣсти́ша.

Сме́рти пра́зднуемъ умерщвле́ніе, а́дово разруше́ніе, ино́го житія́ вѣ́чнаго нача́ло и, игра́юще, пое́мъ Вино́внаго, Еди́наго благослове́ннаго отце́въ Бо́га, и препросла́вленнаго.

Яко вои́стинну свяще́нная, и всепра́зднственная сія́ спаси́тельная но́щь, и свѣтоза́рная, свѣтоно́снаго дне́, воста́нія су́щи провозвѣ́стница: въ не́йже безлѣ́тный Свѣ́тъ изъ гро́ба пло́тски всѣ́мъ возсія́.

Ектенія́ и возгла́съ:

Бу́ди держа́ва Ца́рствія Твоего́ благослове́нна и препросла́вленна, Отца́ и Сы́на и Свята́го Ду́ха, ны́нѣ и при́сно, и во вѣ́ки вѣко́въ.

Пѣ́снь 8.

Ирмо́съ: Се́й нарече́нный и святы́й де́нь — еди́нъ суббо́тъ ца́рь и госпо́дь, пра́здниковъ пра́здникъ и торжество́ е́сть торже́ствъ, въ о́ньже благослови́мъ Христа́ во вѣ́ки.

Пріиди́те, но́ваго виногра́да рожде́нія, Боже́ственнаго весе́лія, въ наро́читомъ дни́ Воскресе́нія, Ца́рствія Христо́ва пріобщи́мся, пою́ще Его́, я́ко Бо́га, во вѣ́ки.

Возведи́ о́крестъ о́чи твои́, Сіо́не, и ви́ждь: се́ бо пріидо́ша къ тебѣ́, я́ко богосвѣ́тлая свѣти́ла, отъ за́пада, и сѣ́вера, и мо́ря, и восто́ка ча́да твоя́, въ тебѣ́ благословя́щая Христа́ во вѣ́ки.

Тро́иченъ: Отче Вседержи́телю, и Сло́ве, и Ду́ше, треми́ соединя́емое во Ѵпоста́сехъ Естество́, Пресу́щественне и Пребоже́ственне! Въ Тя́ крести́хомся и Тя́ благослови́мъ во вся́ вѣ́ки.

Та́же ектенія́, и возгла́съ:

Яко благослови́ся и́мя Твое́, и просла́вися Ца́рство Твое́, Отца́ и Сы́на и Свята́го Ду́ха, ны́нѣ и при́сно, и во вѣ́ки вѣко́въ.

Припѣ́вы на 9-й пѣ́сни:

Вели́читъ душа́ моя́ воскре́сшаго тридне́вно отъ гро́ба Христа́ Жизнода́вца.

И ирмо́съ: Свѣти́ся...

И вторы́й ли́къ пое́тъ то́йже припѣ́въ и ирмо́съ.

Та́же пе́рвый ли́къ пое́тъ вторы́й припѣ́въ:

Вели́читъ душа́ моя́ во́лею страда́вша, и погребе́на, и воскре́сшаго тридне́вно отъ гро́ба.

И ирмо́съ: Свѣти́ся...

И вторы́й ли́къ пое́тъ то́йже припѣ́въ и ирмо́съ.

Та́же пе́рвый ли́къ пое́тъ тре́тій припѣ́въ:

Христо́съ — но́вая Па́сха, Же́ртва жива́я, Агнецъ Бо́жій, взе́мляй грѣхи́ мíра. И сти́хъ.

И вторы́й ли́къ пое́тъ то́йже припѣ́въ и сти́хъ.

Та́же пе́рвый ли́къ пое́тъ четве́ртый припѣ́въ:

Ангелъ вопія́ше Благода́тнѣй: Чи́стая Дѣ́во, ра́дуйся! И па́ки реку́: ра́дуйся! Тво́й Сы́нъ воскре́се тридне́венъ отъ гро́ба и ме́ртвыя воздви́гнувый, лю́діе, весели́теся. И сти́хъ.

И вторы́й ли́къ пое́тъ то́йже припѣ́въ и сти́хъ.

И про́чихъ о́смь припѣ́вовъ припѣва́ютъ, по еди́ножды, ко стихо́мъ:

Возбуди́лъ еси́, усну́въ, ме́ртвыя отъ вѣ́ка, ца́рски рыка́вый я́ко отъ Іу́ды ле́въ.

Магдали́на Марíя притече́ ко гро́бу, и Христа́ ви́дѣвши, я́ко вертогра́даря вопроша́ше.

Ангелъ облиста́яй жена́мъ вопія́ше: преста́ните отъ сле́зъ, я́ко Христо́съ воскре́се.

Христо́съ воскре́се, сме́рть попра́вый, и ме́ртвыя воздви́гнувый, лю́діе, весели́теся.

Дне́сь вся́ка тва́рь весели́тся и ра́дуется, я́ко Христо́съ воскре́се и а́дъ плѣни́ся.

Дне́сь Влады́ка плѣни́ а́да, воздви́гнувый ю́зники, я́же отъ вѣ́ка имя́ше лю́тѣ одержи́мыя.

Вели́читъ душа́ моя́ Тріѵпоста́снаго и Нераздѣ́льнаго Божества́ держа́ву.

Ра́дуйся, Дѣ́во, ра́дуйся, ра́дуйся, Благослове́нная, ра́дуйся, Препросла́вленная! Тво́й бо Сы́нъ воскре́се тридне́венъ отъ гро́ба.

Послѣди́ же пе́рвый ли́къ пое́тъ па́ки пе́рвый припѣ́въ и ирмо́съ. Та́же о́ба ли́ка, соше́дшеся вку́пѣ, пою́тъ ирмо́съ и тропа́рь: Христо́съ воскре́се.., три́жды.

Пѣ́снь 9.

Ирмо́съ: Свѣти́ся, свѣти́ся, но́вый Іерусали́ме, сла́ва бо Госпо́дня на тебѣ́ возсія́. Лику́й ны́нѣ и весели́ся, Сіо́не. Ты́ же, Чи́стая, красу́йся, Богоро́дице, о воста́ніи Рождества́ Твоего́.

О, Боже́ственнаго, о любе́знаго, о сладча́йшаго Твоего́ гла́са! Съ на́ми бо нело́жно обѣща́лся еси́ бы́ти, до сконча́нія вѣ́ка, Христе́. Его́же, вѣ́рніи, утвержде́ніе наде́жди иму́ще, ра́дуемся.

О, Па́сха ве́лія и свяще́ннѣйшая, Христе́! О, му́дросте, и Сло́ве Бо́жій, и си́ло! Подава́й на́мъ и́стѣе Тебе́ причаща́тися въ невече́рнемъ дни́ Ца́рствія Твоего́.

Ектенія́ и возгла́съ:

Яко Тя́ хва́лятъ вся́ си́лы небе́сныя, Отца́ и Сы́на и Свята́го Ду́ха, и Тебѣ́ сла́ву возсыла́ютъ, ны́нѣ и при́сно, и во вѣ́ки вѣко́въ.

Ексапостила́рій. Самогла́сенъ:

Пло́тію усну́въ, я́ко ме́ртвъ, Царю́ и Го́споди, тридне́венъ воскре́слъ еси́, Ада́ма воздви́гъ отъ тли́, и упраздни́въ сме́рть: Па́сха нетлѣ́нія, мíра спасе́ніе. [Три́жды.]

На хвали́техъ: Вся́кое дыха́ніе.., на гла́съ 1. Поста́вимъ стихи́ 4, и пое́мъ стихи́ры воскре́сны, гла́съ 1:

Сти́хъ: Хвали́те Его́ на си́лахъ Его́, хвали́те Его́ по мно́жеству вели́чествія Его́.

Пое́мъ Твою́, Христе́, спаси́тельную стра́сть и сла́вимъ Твое́ Воскресе́ніе.

Сти́хъ: Хвали́те Его́ во гла́сѣ тру́бнѣмъ, хвали́те Его́ во псалти́ри и гу́слехъ.

Кре́стъ претерпѣ́вый, и сме́рть упраздни́вый, и воскресы́й изъ ме́ртвыхъ, умири́ на́шу жи́знь, Го́споди, я́ко Еди́нъ Всеси́ленъ.

Сти́хъ: Хвали́те Его́ въ тимпа́нѣ и ли́цѣ, хвали́те Его́ во стру́нахъ и орга́нѣ.

Ада плѣни́вый и человѣ́ка воскреси́вый Воскресе́ніемъ Твои́мъ, Христе́, сподо́би ны́ чи́стымъ се́рдцемъ, Тебе́ пѣ́ти и сла́вити.

Сти́хъ: Хвали́те Его́ въ кимва́лѣхъ доброгла́сныхъ, хвали́те Его́ въ кимва́лѣхъ восклица́нія. Вся́кое дыха́ніе да хва́литъ Го́спода.

Боголѣ́пное Твое́ снизхожде́ніе сла́вяще, пое́мъ Тя́, Христе́: роди́лся еси́ отъ Дѣ́вы и неразлу́ченъ бы́лъ еси́ отъ Отца́; пострада́лъ еси́, я́ко человѣ́къ, и во́лею претерпѣ́лъ еси́ кре́стъ; воскре́слъ еси́ отъ гро́ба, я́ко отъ черто́га произше́дъ, да спасе́ши мíръ, Го́споди, сла́ва Тебѣ́.

Та́же, совоку́пльшеся о́ба ли́ка, пою́тъ стихи́ры Па́схи, гла́съ 5:

Сти́хъ: Да воскре́снетъ Бо́гъ, и расточа́тся врази́ Его́.

Па́сха свяще́нная на́мъ дне́сь показа́ся; Па́сха но́ва свята́я; Па́сха та́инственная; Па́сха всечестна́я; Па́сха — Христо́съ Изба́витель; Па́сха непоро́чная; Па́сха вели́кая; Па́сха вѣ́рныхъ; Па́сха, две́ри ра́йскія на́мъ отверза́ющая; Па́сха, всѣ́хъ освяща́ющая вѣ́рныхъ.

Сти́хъ: Яко исчеза́етъ ды́мъ, да исче́знутъ.

Пріиди́те отъ видѣ́нія, жены́ благовѣ́стницы, и Сіо́ну рцы́те: пріими́ отъ на́съ ра́дости благовѣ́щенія Воскресе́нія Христо́ва! Красу́йся, лику́й и ра́дуйся, Іерусали́ме, Царя́ Христа́ узрѣ́въ изъ гро́ба, я́ко жениха́ происходя́ща.

Сти́хъ: Та́ко да поги́бнутъ грѣ́шницы отъ лица́ Бо́жія, а пра́ведницы да возвеселя́тся.

Мѵроно́сицы жены́, у́тру глубоку́, предста́вша гро́бу Живода́вца, обрѣто́ша а́нгела на ка́мени сѣдя́ща, и то́й, провѣща́въ и́мъ, си́це глаго́лаше: что́ и́щете Жива́го съ ме́ртвыми? что́ пла́чете Нетлѣ́ннаго во тли́? Ше́дше, проповѣ́дите ученико́мъ Его́.

Сти́хъ: Се́й де́нь, его́же сотвори́ Госпо́дь, возра́дуемся и возвесели́мся въ о́нь.

Па́сха кра́сная, Па́сха, Госпо́дня Па́сха! Па́сха всечестна́я на́мъ возсія́. Па́сха, ра́достію дру́гъ дру́га объи́мемъ. О, Па́сха! Избавле́ніе ско́рби, и́бо изъ гро́ба дне́сь, я́ко отъ черто́га возсія́въ Христо́съ, жены́ ра́дости испо́лни, глаго́ля: проповѣ́дите апо́столомъ.

Сла́ва, и ны́нѣ, гла́съ 5:

Воскресе́нія де́нь, и просвѣти́мся торжество́мъ, и дру́гъ дру́га объи́мемъ. Рце́мъ — бра́тіе! — и ненави́дящимъ на́съ, прости́мъ вся́ Воскресе́ніемъ, и та́ко возопіи́мъ: Христо́съ воскре́се изъ ме́ртвыхъ, сме́ртію сме́рть попра́въ, и су́щимъ во гробѣ́хъ живо́тъ дарова́въ.

Та́же: Христо́съ воскре́се.., три́жды.
И пое́мъ сіе́ мно́гажды, до́ндеже цѣлу́ютъ бра́тія дру́гъ дру́га.

Цѣлова́ніе же настоя́теля съ про́чими іере́и и діа́коны во свято́мъ олтари́ быва́етъ си́це: Глаго́летъ приходя́й: Христо́съ воскре́се! Оному же отвѣща́вшу: Вои́стину воскре́се! Посе́мъ взе́мъ настоя́тель честны́й кре́стъ и ста́нетъ внѣ́ предъ святы́ми ца́рскими две́рьми. Та́кожде и вси́ свяще́нницы, ели́ко и́хъ е́сть, и діа́кони, взе́мше кíйждо и́хъ свято́е Ева́нгеліе и честны́я ико́ны, по чи́ну своему́, и ста́нутъ вси́ ря́домъ, отъ десны́я страны́ настоя́теля. И прихо́дятъ пре́жде честнѣ́йшіи церко́вницы и ста́рцы, еди́нъ по еди́ному, и ма́ло преклоня́ются предъ настоя́телемъ, и цѣлу́ютъ кíйждо и́хъ честны́й кре́стъ и свято́е Ева́нгеліе, его́же держи́тъ іере́й, и про́чіи о́бразы. Та́же и самаго́ настоя́теля во уста́ цѣлу́ютъ, глаго́люще: Христо́съ воскре́се! Оному же отвѣща́вшу: Вои́стину воскре́се! По тому́же о́бразу и іере́евъ цѣлу́ютъ, и са́ми между́ собо́ю по чи́ну своему́. И ста́вятся отъ іере́евъ по десно́й странѣ́ ря́домъ. Та́же по ни́хъ и міря́не та́кожде цѣлова́ніе творя́тъ. Рабо́тницы же монасты́рстіи въ то́мже чину́ да ста́нутъ, и дру́гъ дру́га цѣлу́юще. Быва́етъ же посреди́ во всѣ́хъ ве́ліе молча́ніе.

По цѣлова́ніи же чте́тся Огласи́тельное сло́во Златоу́стаго отъ настоя́теля или́ екклисіа́рха. Не сѣди́мъ же на сицево́мъ чте́ніи, но стоя́ще слу́шаемъ вси́.

Иже во святы́хъ отца́ на́шего Іоа́нна, архіепи́скопа Константинопо́льскаго, Златоу́стаго, Сло́во огласи́тельное во святы́й и свѣтоно́сный де́нь пресла́внаго и спаси́тельнаго Христа́ Бо́га на́шего Воскресе́нія.

Аще кто́ благочести́въ и боголюби́въ, да наслади́тся сего́ до́браго и свѣ́тлаго торжества́. Аще кто́ ра́бъ благоразу́мный, да вни́детъ, ра́дуяся, въ ра́дость Го́спода своего́. Аще кто́ потруди́ся постя́ся, да воспріи́метъ ны́нѣ дина́рій. Аще кто́ отъ пе́рваго часа́ дѣ́лалъ е́сть, да пріи́метъ дне́сь пра́ведный до́лгъ. Аще кто́ по тре́тіемъ часѣ́ пріи́де, благодаря́ да пра́зднуетъ. Аще кто́ по шесто́мъ часѣ́ дости́же, ничто́же да сумни́тся: и́бо ничи́мже отщетѣва́ется. Аще кто́ лиши́ся и девя́таго часа́, да присту́питъ, ничто́же сумня́ся, ничто́же боя́ся. Аще кто́ то́чію дости́же и во единонадеся́тый ча́съ, да не устраши́тся замедле́нія. Любочести́въ бо Сы́й Влады́ка: пріе́млетъ послѣ́дняго, я́коже и пе́рваго, — упокоева́етъ въ единонадеся́тый ча́съ прише́дшаго, я́коже дѣ́лавшаго отъ пе́рваго часа́. И послѣ́дняго ми́луетъ, и пе́рвому угожда́етъ, — и о́ному дае́тъ, и сему́ да́рствуетъ, — и дѣла́ пріе́млетъ, и намѣ́реніе цѣлу́етъ; и дѣя́ніе почита́етъ, и предложе́ніе хва́литъ. Тѣ́мже у́бо, вни́дите вси́ въ ра́дость Го́спода своего́! И пе́рвіи и вторíи, мзду́ пріими́те! Бога́тіи и убо́зіи, дру́гъ со дру́гомъ лику́йте! Возде́ржницы и лѣни́віи, де́нь почти́те! Пости́вшіися и непости́вшіися, возвесели́теся дне́сь! Трапе́за испо́лнена: наслади́теся вси́! Теле́цъ упита́нный: никто́же да изы́детъ а́лчай. Вси́ наслади́теся пи́ра вѣ́ры! Вси́ воспріими́те бога́тство бла́гости! Никто́же да рыда́етъ убо́жества: яви́ся бо о́бщее Ца́рство. Никто́же да пла́четъ прегрѣше́ній: проще́ніе бо отъ гро́ба возсія́. Никто́же да убои́тся сме́рти: свободи́ бо на́съ Спа́сова сме́рть. Угаси́ ю́, Иже отъ нея́ Держи́мый; плѣни́ а́да, Соше́дый во а́дъ. Огорчи́ его́, вкуси́вша пло́ти Его́. И сіе́ предпріе́мый, Иса́ія, возопи́: а́дъ, глаго́летъ, огорчи́ся, срѣ́тъ Тя́ до́лѣ. Огорчи́ся, и́бо упраздни́ся; огорчи́ся, и́бо пору́ганъ бы́сть; огорчи́ся, и́бо умертви́ся; огорчи́ся, и́бо низложи́ся; огорчи́ся, и́бо связа́ся. Прія́тъ тѣ́ло, и Бо́гу прирази́ся; прія́тъ зе́млю, и срѣ́те Не́бо; прія́тъ, е́же ви́дяше, и впаде́ во е́же не ви́дяше. Гдѣ́ твое́, сме́рте, жа́ло? Гдѣ́ твоя́, а́де, побѣ́да? Воскре́се Христо́съ, и ты́ низве́рглся еси́. Воскре́се Христо́съ, и падо́ша де́мони. Воскре́се Христо́съ, и ра́дуются а́нгели. Воскре́се Христо́съ, и жи́знь жи́тельствуетъ. Воскре́се Христо́съ, и ме́ртвый ни еди́нъ во гро́бѣ. Христо́съ бо, воста́въ отъ ме́ртвыхъ, Нача́токъ усо́пшихъ бы́сть. Тому́ сла́ва и держа́ва, во вѣ́ки вѣко́въ. Ами́нь.

Та́же глаго́лется тропа́рь свята́го, гла́съ 8:

Устъ твои́хъ, я́коже свѣ́тлость огня́ возсія́вши, благода́ть вселе́нную просвѣти́: не сребролю́бія мíрови сокро́вища сниска́, высоту́ на́мъ смиренному́дрія показа́, но, твои́ми словесы́ наказу́я, о́тче Іоа́нне Златоу́сте, моли́ Сло́ва Христа́ Бо́га спасти́ся душа́мъ на́шимъ.

Посе́мъ діа́конъ глаго́летъ ектеніи́: Поми́луй на́съ, Бо́же... и Испо́лнимъ у́треннюю моли́тву на́шу Го́сподеви. И по возгла́сѣ, діа́конъ: Прему́дрость. Мы́ же: Благослови́. Настоя́тель: Сы́й благослове́нъ Христо́съ, Бо́гъ на́шъ, всегда́, ны́нѣ и при́сно, и во вѣ́ки вѣко́въ. И мы́: Ами́нь. Утверди́ Бо́же... Посе́мъ настоя́тель, держа́ кре́стъ, вмѣ́сто: Сла́ва Тебѣ́, Христе́ Бо́же.., пое́тъ: Христо́съ воскре́се изъ ме́ртвыхъ, сме́ртію сме́рть попра́въ. И мы́ пое́мъ: И су́щимъ во гробѣ́хъ живо́тъ дарова́въ.

И а́біе настоя́тель глаго́летъ отпу́стъ:

Христо́съ, воскресы́й изъ ме́ртвыхъ, сме́ртію сме́рть попра́вый и су́щимъ во гробѣ́хъ живо́тъ дарова́вый, и́стинный Бо́гъ на́шъ, моли́твами Пречи́стыя Своея́ Ма́тере и всѣ́хъ святы́хъ, поми́луетъ и спасе́тъ на́съ, я́ко Бла́гъ и Человѣколю́бецъ.

Та́же, кре́стъ возвыша́я, глаго́летъ: Христо́съ воскре́се! [Три́жды.] Мы́ же отвѣща́емъ: Вои́стинну воскре́се! [Три́жды.] Та́же пое́мъ коне́чное: Христо́съ воскре́се.., три́жды, ве́сь тропа́рь. И по не́мъ пѣ́ніемъ ко́нчимъ: И на́мъ дарова́ живо́тъ вѣ́чный, покланя́емся Его́ тридне́вному Воскресе́нію. Посе́мъ многолѣ́тны, и цѣлу́емъ честны́й кре́стъ, держи́мый въ руку́ настоя́теля. И ча́съ пе́рвый. Глаго́лемъ: Христо́съ воскре́се.., три́жды. И про́чее, я́коже ни́же ука́зъ е́сть о часѣ́хъ Свѣ́тлыя седми́цы. Литíя же въ сíй де́нь не быва́етъ.



О ЧАСѢХЪ СВЯТЫЯ ПАСХИ И ВСЕЯ СВѢТЛЫЯ СЕДМИЦЫ.

Подоба́етъ вѣ́дати: Яко отъ сего́ дне́ святы́я и вели́кія недѣ́ли Па́схи да́же до суббо́ты, часы́ и повече́ріе си́це пое́тся:

Наче́ншу іере́ю: Благослове́нъ Бо́гъ на́шъ...
Христо́съ воскре́се изъ ме́ртвыхъ.., три́жды, ве́сь тропа́рь.
Та́же, глаго́лемъ три́жды:

Воскресе́ніе Христо́во ви́дѣвше, поклони́мся Свято́му Го́споду Іису́су, еди́ному Безгрѣ́шному. Кресту́ Твоему́ покланя́емся, Христе́, и свято́е Воскресе́ніе Твое́ пое́мъ и сла́вимъ: Ты́ бо еси́ Бо́гъ на́шъ, ра́звѣ Тебе́ ино́го не зна́емъ, и́мя Твое́ имену́емъ. Пріиди́те, вси́ вѣ́рніи, поклони́мся Свято́му Христо́ву Воскресе́нію: се́ бо пріи́де Кресто́мъ ра́дость всему́ мíру. Всегда́ благословя́ще Го́спода, пое́мъ Воскресе́ніе Его́: распя́тіе бо претерпѣ́въ, сме́ртію сме́рть разруши́.

Таже ипакои́, единощи:

Предвари́вшія у́тро я́же о Марíи, и обрѣ́тшія ка́мень отвале́нъ отъ гро́ба, слы́шаху отъ а́нгела: во свѣ́тѣ присносу́щнѣмъ Су́щаго, съ ме́ртвыми что и́щете, я́ко человѣ́ка? Ви́дите гро́бныя пелены́, тецы́те и мíру проповѣ́дите, я́ко воста́ Госпо́дь, умертви́вый сме́рть, я́ко е́сть Сы́нъ Бо́га, спаса́ющаго ро́дъ человѣ́ческій.

Таже конда́къ, единощи:

Аще и во гро́бъ снизше́лъ еси́, Безсме́ртне, но а́дову разруши́лъ еси́ си́лу, и воскре́слъ еси́, я́ко побѣди́тель, Христе́ Бо́же, жена́мъ мѵроно́сицамъ вѣща́вый, — ра́дуйтеся! — и Твои́мъ апо́столомъ ми́ръ да́руяй, па́дшимъ подая́й воскресе́ніе.

Та́же и се́й тропа́рь, еди́нощи:

Во гро́бѣ пло́тски, во а́дѣ же съ душе́ю, я́ко Бо́гъ, въ раи́ же съ разбо́йникомъ, и на престо́лѣ бы́лъ еси́, Христе́, со Отце́мъ и Ду́хомъ, вся́ исполня́яй, Неопи́санный.

Сла́ва: Яко Живоно́сецъ, я́ко рая́ краснѣ́йшій, вои́стинну и черто́га вся́каго ца́рскаго показа́ся свѣтлѣ́йшій, Христе́, гро́бъ Тво́й, исто́чникъ на́шего воскресе́нія.

И ны́нѣ, богоро́диченъ: Вы́шняго освяще́нное Боже́ственное селе́ніе, ра́дуйся! Тобо́ю бо даде́ся ра́дость, Богоро́дице, зову́щимъ: благослове́нна Ты́ въ жена́хъ еси́, Всенепоро́чная Влады́чице.

Та́же: Го́споди, поми́луй, 40. Сла́ва, и ны́нѣ. Честнѣ́йшую херуви́мъ... Именемъ Госпо́днимъ благослови́, о́тче. Іере́й, сти́хъ: Моли́твами святы́хъ оте́цъ на́шихъ... Мы́ же рече́мъ: Ами́нь. И па́ки глаго́лемъ подо́бнѣ: Христо́съ воскре́се.., три́жды. Сла́ва, и ны́нѣ. Го́споди, поми́луй, три́жды. Благослови́. И отпу́стъ пе́рваго часа́.

Си́мъ же о́бразомъ пое́тся за тре́тій, за шесты́й, предъ литургíею. Та́кожде и предъ вече́рнею, за девя́тый ча́съ, и за повече́ріе еди́ножды. Та́кожде и за полу́нощницу.

[Зри́:] Аще ли не бу́детъ когда́ по ну́ждѣ литургíи, вмѣ́сто изобрази́тельныхъ, глаго́лемъ си́це:

Христо́съ воскре́се.., три́жды. Воскресе́ніе Христо́во.., еди́ножды. Посе́мъ: Предвари́вшія у́тро... Сла́ва, конда́къ: Аще и во гро́бъ... И ны́нѣ: Единоро́дный Сы́не... Посе́мъ блаже́нна отъ кано́на, пѣ́снь 3-я и 6-я. Іере́й: Прему́дрость. Чте́цъ: надписа́ніе Апо́стола и са́мое чте́ніе. Посе́мъ іере́й Ева́нгеліе. Та́же: Помяни́ на́съ, Го́споди... Ли́къ небе́сный... И посе́мъ: Вѣ́рую во Еди́наго Бо́га... Осла́би, оста́ви.., и по Отче на́шъ... Конда́къ: Аще и во гро́бъ... Сла́ва, и ны́нѣ, богоро́диченъ: Вы́шняго освяще́нное... Го́споди поми́луй, 40. Та́же: Еди́нъ Свя́тъ, еди́нъ Госпо́дь Іису́съ Христо́съ, во сла́ву Бо́га Отца́. Ами́нь. И посе́мъ вмѣ́сто: Бу́ди и́мя Госпо́дне..: Христо́съ воскре́се.., три́жды. Та́же: Псало́мъ 33: Благословлю́ Го́спода на вся́кое вре́мя... Коне́цъ: не лиша́тся вся́каго бла́га. И посе́мъ отпу́стъ. И исхо́димъ въ трапе́зу.



ПОДОБАЕТЪ ВѢДАТИ, КАКО ПОЕТСЯ МОЛЕБЕНЪ НА СВЯТУЮ ПАСХУ.

Іере́й глаго́летъ: Благослове́нъ Бо́гъ на́шъ... И мы́: Ами́нь. Та́же іере́й: Христо́съ воскре́се.., три́жды. Та́же: Христо́съ воскре́се.., три́жды, на ли́ки, я́коже предъизъяви́ся въ нача́лѣ у́трени. По Сла́ва. И ны́нѣ. Іере́й глаго́летъ: Христо́съ воскре́се изъ ме́ртвыхъ, сме́ртію сме́рть попра́въ. Мы́ же: И су́щимъ во гробѣ́хъ живо́тъ дарова́въ. Та́же: Сла́ва, и ны́нѣ: Ипакои́: Предвари́вшія у́тро... Аще ли хо́щеши приложи́ти кано́нъ ко́его свята́го, и глаго́ли пре́жде тропа́рь свята́го, еди́ножды. Сла́ва, и ны́нѣ: Предвари́вшія у́тро... Посе́мъ кано́нъ Па́схи, со ирмосо́мъ на 6. Припѣ́въ: Христо́съ воскре́се [изъ ме́ртвыхъ]. И свята́го, а́ще бу́детъ, на 4. Катава́сія по 3-й и 6-й пѣ́сни: Спаси́ отъ бѣ́дъ... По 6-й пѣ́сни: Конда́къ и и́косъ Па́схи. Та́же проки́менъ, гла́съ 8: Се́й де́нь, его́же сотвори́ Госпо́дь, возра́дуемся и возвесели́мся въ о́нь. Сти́хъ: Исповѣ́дайтеся Го́сподеви, я́ко бла́гъ, я́ко въ вѣ́къ ми́лость Его́. Та́же свята́го проки́менъ. Ева́нгеліе Луки́, зача́ло 114. Пото́мъ свята́го. По 9-й пѣ́сни, за Досто́йно е́сть.., ирмо́съ: Свѣти́ся, свѣти́ся... Та́же: Христо́съ воскре́се.., три́жды. Посе́мъ ипакои́: Предвари́вшія у́тро... Сла́ва: тропа́рь свята́го. И ны́нѣ: конда́къ: Аще и во гро́бъ... Та́же ектенія́: Поми́луй на́съ, Бо́же... Посе́мъ іере́й глаго́летъ: Прему́дрость. Мы́ же: Христо́съ воскре́се.., три́жды. Та́же іере́й, вмѣ́сто, Сла́ва Тебѣ́, Христе́ Бо́же..: Христо́съ воскре́се изъ ме́ртвыхъ, сме́ртію сме́рть попра́въ. И мы́: И су́щимъ во гробѣ́хъ живо́тъ дарова́въ. И отпу́стъ со кресто́мъ, глаго́летъ си́це: Христо́съ, воскресы́й изъ ме́ртвыхъ.., и про́чая, я́ко предписа́ся въ концѣ́ у́трени. Посе́мъ возглаша́етъ: Христо́съ воскре́се! [Три́жды.] Мы же отвѣща́емъ: Вои́стинну воскре́се! [Три́жды.] И па́ки пое́мъ: Христо́съ воскре́се.., три́жды. Та́же: Го́споди поми́луй, три́жды, съ пѣ́ніемъ.



ПОСЛѢДОВАНІЕ ЛИТУРГІИ БЫВАЕТЪ ПОРАНУ.

Наче́ншу діа́кону: Благослови́ влады́ко. Настоя́телю же возгласи́вшу: Благослове́но Ца́рство Отца́, и Сы́на, и Свята́го Ду́ха, ны́нѣ и при́сно, и во вѣ́ки вѣко́въ. И мы́: Ами́нь.

Настоя́тель пое́тъ съ про́чими служи́тели во свято́мъ олтари́:

Христо́съ воскре́се изъ ме́ртвыхъ, сме́ртію сме́рть попра́въ, и су́щимъ во гробѣ́хъ живо́тъ дарова́въ. [Трижды.]

И ли́ки то́йжде, три́жды. Настоя́тель глаго́летъ припѣ́вы:

1-й: Да воскре́снетъ Бо́гъ... Ли́къ: Христо́съ воскре́се... [Еди́ножды.]

2-й: Яко исчеза́етъ ды́мъ... [Ли́къ:] Христо́съ воскре́се... [Еди́ножды.]

3-й: Та́ко да поги́бнутъ грѣ́шницы... [Ли́къ:] Христо́съ воскре́се... [Еди́ножды.]

4-й: Се́й де́нь... [Ли́къ:] Христо́съ воскре́се... [Еди́ножды.]

Сла́ва. [Ли́къ:] Христо́съ воскре́се... [Еди́ножды.]

И ны́нѣ. [Ли́къ:] Христо́съ воскре́се... [Еди́ножды.]

Та́же настоя́тель пое́тъ вы́шшимъ гла́сомъ: Христо́съ воскре́се изъ ме́ртвыхъ, сме́ртію сме́рть попра́въ.

Мы́ же: И су́щимъ во гробѣ́хъ живо́тъ дарова́въ.

Посе́мъ глаго́летъ діа́конъ ектенію́ вели́кую.

По ектеніи́ же и по возгла́сѣ антифо́нъ 1, псало́мъ 65, гла́съ 2:

Сти́хъ 1: Воскли́кните Го́сподеви вся́ земля́. Припѣ́въ: Моли́твами Богоро́дицы, Спа́се, спаси́ на́съ.

И другíй ли́къ то́йжде сти́хъ: Воскли́кните Го́сподеви вся́ земля́, по́йте же и́мени Его́, дади́те сла́ву хвалѣ́ Его́. [Припѣ́въ:] Моли́твами Богоро́дицы, Спа́се, спаси́ на́съ.

Сти́хъ 2: Рцы́те Бо́гу: ко́ль стра́шна дѣла́ Твоя́, во мно́жествѣ си́лы Твоея́ со́лжутъ Тебѣ́ врази́ Твои́. [Припѣ́въ:] Моли́твами Богоро́дицы, Спа́се, спаси́ на́съ.

Сти́хъ 3: Вся́ земля́ да покло́нится Тебѣ́ и пое́тъ Тебѣ́, да пое́тъ же и́мени Твоему́, Вы́шній. [Припѣ́въ:] Моли́твами Богоро́дицы, Спа́се, спаси́ на́съ.

Сла́ва. И ны́нѣ. Ку́пно о́ба ли́ка вы́шшимъ гла́сомъ: Моли́твами Богоро́дицы, Спа́се, спаси́ на́съ.

Та́же, ектенія́ ма́лая.

Антифо́нъ вторы́й, псало́мъ 66, гла́съ то́йже:

Сти́хъ 1: Бо́же уще́дри ны́ и благослови́ ны́. Припѣ́въ: Спаси́ ны́, Сы́не Бо́жій, воскресы́й изъ ме́ртвыхъ, пою́щія Ти́: Аллилу́ія. [Еди́ножды.]

Друга́я страна́, то́йже сти́хъ: Бо́же, уще́дри ны́ и благослови́ ны́, просвѣти́ лице́ Твое́ на ны́ и поми́луй ны́. [Припѣ́въ:] Спаси́ ны́, Сы́не Бо́жій...

Сти́хъ 2: Да позна́емъ на земли́ пу́ть Тво́й, во всѣ́хъ язы́цѣхъ спасе́ніе Твое́. [Припѣ́въ:] Спаси́ ны́, Сы́не Бо́жій...

Сти́хъ 3: Да исповѣ́дятся Тебѣ́ лю́діе, Бо́же, да исповѣ́дятся Тебѣ́ лю́діе вси́. [Припѣ́въ:] Спаси́ ны́, Сы́не Бо́жій...

Сла́ва, и ны́нѣ. Вку́пѣ два́ ли́ка: Единоро́дный Сы́не...

Та́же, ектенія́.

Антифо́нъ 3-й, псало́мъ 67, гла́съ 5:

Сти́хъ 1: Да воскре́снетъ Бо́гъ и расточа́тся врази́ Его́. Тропа́рь: Христо́съ воскре́се изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ.

Друга́я страна́, то́йже сти́хъ: Да воскре́снетъ Бо́гъ и расточа́тся врази́ Его́, и да бѣжа́тъ отъ лица́ Его́ ненави́дящіи Его́. [Тропа́рь:] Христо́съ воскре́се...

Сти́хъ 2: Яко исчеза́етъ ды́мъ, да исче́знутъ, я́ко та́етъ во́скъ отъ лица́ огня́. [Тропа́рь:] Христо́съ воскре́се...

Сти́хъ 3: Та́ко да поги́бнутъ грѣ́шницы отъ лица́ Бо́жія, а пра́ведницы да возвеселя́тся, да возра́дуются предъ Бо́гомъ. [Тропа́рь:] Христо́съ воскре́се...

И быва́етъ вхо́дъ. И возглаша́етъ діа́конъ, а́ще е́сть, а́ще же ни́, іере́й: Прему́дрость, про́сти.

Мы́ же входно́е: Въ це́рквахъ благослови́те Бо́га, Го́спода отъ исто́чникъ Изра́илевыхъ.

И пое́мъ тропа́рь: Христо́съ воскре́се... Ипакои́: Предвари́вшія у́тро... Сла́ва, и ны́нѣ. Конда́къ: Аще и во гро́бъ снизше́лъ еси́...

Вмѣ́сто же Трисвята́го: Ели́цы во Христа́ крести́стеся, во Христа́ облеко́стеся: аллилу́ія.

[Зри́:] Подоба́етъ вѣ́дати, я́ко сіе́ нача́ло литургíи, и антифо́ны, и Ели́цы во Христа́ крести́стеся.., пое́мъ во всю́ седми́цу Свѣ́тлую, да́же до недѣ́ли но́выя, та́кожде и прича́стный.

Проки́менъ, гла́съ 8: Се́й де́нь, его́же сотвори́ Госпо́дь,* возра́дуемся и возвесели́мся въ о́нь. Сти́хъ: Исповѣ́дайтеся Го́сподеви, я́ко Бла́гъ, я́ко въ вѣ́къ ми́лость Его́. Апо́столъ, Дѣя́ній чте́ніе, зача́ло 1: Пе́рвое у́бо сло́во сотвори́хъ... Аллилу́ія, гла́съ 4: Ты́ воскре́съ уще́дриши Сіо́на. Сти́хъ: Госпо́дь съ небесе́ на зе́млю призрѣ́. Ева́нгеліе отъ Іоа́нна, зача́ло 1.

Вре́мени же приспѣ́вшу чте́нія свята́го Ева́нгелія, нача́льный діа́конъ, хотя́й Ева́нгеліе чести́, глаго́летъ: Благослови́, влады́ко, благовѣсти́теля... Та́же настоя́тель глаго́летъ: Бо́гъ моли́твами свята́го сла́внаго.., и про́чая, я́коже указа́ся въ литургіа́ріи. И исхо́дитъ діа́конъ и на обы́чномъ мѣ́стѣ пря́мо ца́рскихъ вра́тъ, на восто́къ лице́мъ ста́нетъ, настоя́телю пре́жде возгласи́вшу предъ престо́ломъ: Прему́дрость, про́сти, услы́шимъ свята́го Ева́нгелія. То́жде и вси́ іере́и, ели́цы су́ть служа́щіи, по си́хъ же и діа́кони глаго́лютъ, на разли́чныхъ мѣ́стѣхъ ста́вше, отъ свята́го престо́ла и до за́падныхъ вра́тъ церко́вныхъ, еди́нъ по еди́ному. Посрѣди́ же всѣ́хъ стои́тъ архидіа́конъ, и чту́тъ вси́ по настоя́тели, еди́нъ по еди́ному, по статія́мъ, я́коже настоя́тель расположи́тъ. И предначина́етъ настоя́тель: Отъ Іоа́нна свята́го Ева́нгелія чте́ніе. Про́чіи то́жде. Настоя́тель: Во́нмемъ. Про́чіи то́жде. Настоя́тель, стоя́ предъ престо́ломъ на восто́къ лице́мъ, чте́тъ: Въ нача́лѣ бѣ́ Сло́во.., и про́чая. Про́чіи то́жде. И на вся́комъ возгла́сѣ, или́ статіи́ Ева́нгелія, ударя́ютъ въ це́ркви по еди́нощи въ кандію́. Параекклисіа́рхъ же, внѣ́ це́ркве, въ вели́кое би́ло и въ вели́кій кампа́нъ. На послѣ́днемъ же возгла́сѣ ударя́ютъ во вся́ кампа́ны и въ вели́кое би́ло, и быва́етъ по чи́ну Боже́ственная Литургíя Златоу́стаго.

Вмѣ́сто же Досто́йно... пое́мъ: Ангелъ вопія́ше Благода́тнѣй: Чи́стая Дѣ́во, ра́дуйся! И па́ки реку́: ра́дуйся! Тво́й Сы́нъ воскре́се тридне́венъ отъ гро́ба и ме́ртвыя воздви́гнувый, лю́діе, весели́теся.

Та́же ирмо́съ: Свѣти́ся, свѣти́ся, но́вый Іерусали́ме, [сла́ва бо Госпо́дня на тебѣ́ возсія́. Лику́й ны́нѣ и весели́ся, Сіо́не. Ты́ же, Чи́стая, красу́йся, Богоро́дице, о воста́ніи Рождества́ Твоего́].

Прича́стный: Тѣ́ло Христо́во пріими́те, исто́чника безсме́ртнаго вкуси́те, аллилу́ія [три́жды].

Егда́ же настоя́тель глаго́летъ: Со стра́хомъ Бо́жіимъ и вѣ́рою приступи́те. Мы́, вмѣ́сто: Благослове́нъ гряды́й во и́мя Госпо́дне.., пое́мъ: Христо́съ воскре́се.., еди́ножды. Настоя́тель глаго́летъ: Спаси́, Бо́же, лю́ди Твоя́... И мы́: Христо́съ воскре́се.., еди́ножды. Егда́ же изглаго́летъ іере́й: Всегда́, ны́нѣ и при́сно... И мы́: Христо́съ воскре́се.., еди́ножды. Посе́мъ ектенія́. Вмѣ́сто же: Бу́ди и́мя Госпо́дне... и вмѣ́сто псалма́: Благословлю́ Го́спода... пое́мъ: Христо́съ воскре́се.., двана́десять, и мно́жае, до́ндеже анафо́ра отъ игу́мена разда́стся. Та́же настоя́тель: Благослове́ніе Госпо́дне на ва́съ... Ли́къ: Ами́нь. Посе́мъ настоя́тель вмѣ́сто: Сла́ва Тебѣ́, Христе́ Бо́же.., пое́тъ: Христо́съ воскре́се изъ ме́ртвыхъ, сме́ртію сме́рть попра́въ. И ли́къ: И су́щимъ во гробѣ́хъ живо́тъ дарова́въ. Посе́мъ настоя́тель глаго́летъ отпу́стъ со Кресто́мъ, по обы́чаю, я́коже указа́ся на у́трени.

[Зри́:] Да бу́детъ же вѣ́стно и се́, я́ко вра́тъ ца́рскихъ олтаря́, вели́кихъ же и отъ стра́нъ ма́лыхъ, по всѣ́мъ це́рквамъ во всю́ Свѣ́тлую седми́цу не затворя́емъ и во вре́мя причаще́нія.



[МОЛИТВЫ ВО ЕЖЕ БЛАГОСЛОВИТИ БРАШНА МЯСА, СЫРЪ И ЯИЦА.]

[Зри́:] Вѣ́домо же бу́ди и се́, я́ко мя́съ правосла́вніи христіа́не къ це́ркви не прино́сятъ, но въ до́мъ ко іере́ю.

Моли́тва во е́же благослови́ти бра́шна мяса́, во святу́ю и вели́кую недѣ́лю Па́схи:

Твори́тъ іере́й: Благослове́нъ Бо́гъ на́шъ... Христо́съ воскре́се.., три́жды. Та́же: Го́споду помо́лимся. Го́споди поми́луй.

При́зри, Го́споди Іису́се Христе́, Бо́же на́шъ, на бра́шна мя́съ, и освяти́ я́, я́коже освяти́лъ еси́ овна́, его́же Тебѣ́ приведе́ вѣ́рный Авраа́мъ, и а́гнца, его́же Тебѣ́ А́вель во всепло́діе принесе́, подо́бнѣ и тельца́ упита́ннаго, его́же жре́ти повелѣ́лъ еси́ сы́нови Твоему́ заблу́ждшему и па́ки къ Тебѣ́ возвра́щшемуся, да, я́коже то́й сподо́бися Твоея́ бла́гости наслади́тися, си́це и освяще́нныхъ отъ Тебе́ и благослове́нныхъ наслади́мся въ пи́щу всѣ́хъ на́съ. Ты́ бо еси́ и́стинная пи́ща и пода́тель благи́хъ, и Тебѣ́ сла́ву возсыла́емъ со Безнача́льнымъ Твои́мъ Отце́мъ, и Пресвяты́мъ и Благи́мъ и Животворя́щимъ Твои́мъ Ду́хомъ, ны́нѣ и при́сно, и во вѣ́ки вѣко́въ. Ами́нь.

Моли́тва во е́же благослови́ти сы́ръ и я́ица.

[Зри́:] Яица же и сы́ръ принесе́нныя поставля́ются въ притво́рѣ, въ це́рковь же отню́дъ не подоба́етъ вноси́ти.

Свяще́нникъ же, изше́дъ глаго́летъ: Го́споду помо́лимся.

Влады́ко Го́споди Бо́же на́шъ, Зижди́телю и Содѣ́телю всѣ́хъ, благослови́ млеко́ огустѣ́вшее, съ ни́мже и я́ица, и на́съ соблюди́ во бла́гости Твое́й, я́ко да причаща́ющеся и́хъ, Твои́хъ незави́стно пода́тельныхъ даро́въ испо́лнимся, и неизглаго́ланныя Твоея́ бла́гости. Яко Твоя́ держа́ва, и Твое́ е́сть Ца́рство, и си́ла, и сла́ва, Отца́, и Сы́на, и Свята́го Ду́ха, ны́нѣ и при́сно, и во вѣ́ки вѣко́въ. Ами́нь.

[Зри́:] Вѣ́стно же бу́ди: Яко сицевы́й, мя́съ и набѣ́лу, прино́съ, нѣ́сть Па́сха, ниже́ Агнецъ, я́коже нѣ́ціи глаго́лютъ, и пріе́млютъ, и ему́ со вся́кимъ говѣ́ніемъ, я́коже нѣ́коей святы́ни, причаща́ются, но просто́е приноше́ніе. Не а́ки бо сіе́ въ же́ртву Бо́гу приноси́тися и́мать, но то́кмо да начина́ющимъ по постѣ́ мя́со и сы́ръ я́сти, отъ іере́я предложе́нными моли́твами въ снѣ́дь благослове́но бу́детъ. Па́сха бо Са́мъ Христо́съ е́сть и Агнецъ, взе́мляй грѣхи́ мíра, на олтари́ въ Безкро́вной Же́ртвѣ, въ Пречи́стыхъ Та́йнахъ Честна́го Тѣ́ла и Животворя́щія Кро́ве Своея́, отъ іере́я Бо́гу и Отцу́ приноси́мый. И Тому́ досто́йно причаща́ющіися, и́стинную ядя́тъ Па́сху. И сего́ ра́ди о́ныя прино́сы, я́ко не су́ть Па́сха, во олта́рь или́ въ це́рковь не досто́итъ вноси́ти, но внѣ́ це́ркве, или́ въ притво́рѣ, моли́твою благослови́ти, по тре́тіему пра́вилу святы́хъ апо́столъ, глаго́лющихъ: Аще кто́, епи́скопъ, или́ пресви́теръ, кромѣ́ вчине́нія Госпо́дня о же́ртвѣ, ина́я нѣ́кая ко олтарю́ принесе́тъ, ме́дъ или́ млеко́, или́ вмѣ́сто вина́ сике́ру, сíесть олови́ну, или́ медови́ну, или́ пти́цы, или́ ка́я живо́тная, или́ со́чива, ра́звѣ гро́здія въ лѣ́тѣ, и еле́я на свѣ́щники, и ѳиміа́ма во вре́мя литургíи: да изве́ржется. И по шесто́му Собо́ру, и́же въ Тру́ллѣ, въ пра́вилѣ 99-мъ, глаго́лющу: И сему́ во Арме́нстѣй странѣ́ быва́ти увѣ́дѣхомъ, я́ко нѣ́ціи вну́трь во святы́хъ олтарѣ́хъ у́ды мя́съ варя́ще, ча́сти принося́тъ свяще́нникомъ, жидо́вски раздѣля́юще. Тѣ́мже Це́рковь непоро́чну храня́ще, узако́нихомъ, я́ко не подоба́етъ ниеди́ному же свяще́ннику разли́чныхъ мя́съ часте́й отъ принося́щихъ пріима́ти, но тѣ́ми дово́льни да бу́дутъ, я́же принося́щему возмня́тся. Сицево́му приноше́нію быва́ему внѣ́ це́ркве. Аще же кто́ сего́ не сотвори́тъ: да отлучи́тся.



ПОСЛѢДОВАНІЕ АРТОСА ВЪ ДЕНЬ СВЯТЫЯ ПАСХИ.

По отпу́стѣ Боже́ственныя Литургíи, взе́мшу іере́ю о́бразъ Воскресе́нія Христо́ва, діа́кону же пріи́мшу отъ и́наго а́ртосъ ца́рскими враты́, а́ще во олтарѣ́ бу́детъ. [Зри́:] [Въ нѣ́кихъ же оби́телехъ на анало́гіи, во хра́мѣ на сіе́ устро́енномъ, ку́пно со о́бразомъ Воскресе́нія Госпо́дня поставля́ется, и, ко анафо́рѣ иду́ще, цѣлу́ютъ пе́рвѣе пра́здникъ, та́же а́ртосъ.] И діа́конъ взе́млетъ его́ изъ мѣ́ста, съ панагіа́ромъ, и въ рука́хъ несе́тъ, предъиду́щей лампа́дѣ, или́ двѣма́. Настоя́тель же и бра́тія вся́ по чи́ну своему́ исхо́дятъ со а́ртосомъ, [сíесть хлѣ́бомъ, просфоро́ю всецѣ́лою на се́ со Кресто́мъ на не́й изображе́ннымъ угото́ванною] изъ це́ркве въ трапе́зу. Вмѣ́сто псалма́: Вознесу́ Тя́, Бо́же мо́й... Христо́съ воскре́се.., пою́ще. Параекклисіа́рху же, и про́чей бра́тіи во вся́ зво́ны ударя́ющимъ. И вше́дше въ трапе́зу поставля́ютъ пра́здникъ и а́ртосъ на мѣ́стѣхъ и́хъ. И глаго́летъ настоя́тель: Христо́съ воскре́се.., три́жды. И Отче на́шъ... Сла́ва, и ны́нѣ. Го́споди поми́луй, три́жды. Благослови́. Настоя́тель: Христе́ Бо́же, благослови́ я́стіе... И про́чее. Мы́ же: Ами́нь. Сѣда́емъ кíйждо на мѣ́стѣ свое́мъ, со вся́кимъ безмо́лвіемъ и благоговѣ́инствомъ. И быва́етъ утѣше́ніе ве́ліе на вся́. И чте́ніе по обы́чаю. По обы́чной трапе́зѣ востаю́ще бра́тія, поставля́ютъ а́ртосъ на трапе́зѣ, пою́ще: Христо́съ воскре́се.., три́жды. И Го́споди поми́луй, три́жды. Благослови́. Та́же кела́рь, пріе́мъ обы́чное проще́ніе отъ настоя́теля и бра́тіи: Благослови́те мя́, отцы́ святíи, и прости́те мя́, грѣ́шнаго. Мы́ же рече́мъ: Бо́гъ да прости́тъ и благослови́тъ. Та́же, сне́мъ камила́вхій, возгласи́тъ вмѣ́сто: Вели́ко и́мя Святы́я Тро́ицы... Христо́съ воскре́се, еди́ножды. На́мъ же отвѣща́ющимъ: Вои́стинну воскре́се. То́йжде назна́менавъ крестообра́зно а́ртосомъ, глаго́летъ: Покланя́емся Его́ тридне́вному Воскресе́нію. Полага́етъ и́ на панагіа́рѣ. Пото́мъ прино́ситъ кела́рь а́ртосъ съ панагіа́ромъ къ настоя́телю, и цѣлу́етъ а́ртосъ, и вся́ по не́мъ бра́тія, пою́ще пѣ́снь 9-ю. Ирмо́съ: Свѣти́ся, свѣти́ся... И про́чая, о́ба тропаря́ тоя́ пѣ́сни. И па́ки ирмо́съ: Свѣти́ся, свѣти́ся... По цѣлова́ніи же просфоры́ отъ всѣ́хъ, возврати́вся кела́рь, поставля́етъ ю́ предъ настоя́телемъ и рече́тъ сти́хъ: Моли́твами святы́хъ оте́цъ на́шихъ, Го́споди Іису́се Христе́, Бо́же на́шъ, поми́луй на́съ. И мы́: Ами́нь. И пое́мъ: Христо́съ воскре́се.., три́жды. Сла́ва. Ипакои́ глаго́лемъ: Предвари́вшія у́тро... И ны́нѣ. Конда́къ: Аще и во гро́бъ... Го́споди поми́луй, три́жды. Благослови́. Настоя́тель: Благослове́нъ Бо́гъ, ми́луяй и пита́яй на́съ отъ Свои́хъ бога́тыхъ даро́въ Свое́ю благода́тію и человѣколю́біемъ, всегда́, ны́нѣ и при́сно, и во вѣ́ки вѣко́въ. И мы́: Ами́нь. Та́же настоя́тель: Бо́гъ да прости́тъ и поми́луетъ послужи́вшихъ на́мъ. И а́біе исхо́дитъ изъ трапе́зы въ це́рковь, и бра́тія вся́ по чи́ну своему́, предъиду́щу іере́ю со ико́ною Воскресе́нія Христо́ва и діа́кону со а́ртосомъ, и кли́рикомъ пою́щимъ: Христо́съ воскре́се... Тогда́ параекклисіа́рхъ и про́чая бра́тія ударя́ютъ во вся́ зво́ны. Вше́дшу же настоя́телю и бра́тіи въ це́рковь, іере́й и діа́конъ поставля́ютъ на свои́хъ и́мъ мѣ́стѣхъ ико́ну и а́ртосъ, мы́ же пое́мъ: И на́мъ дарова́ живо́тъ вѣ́чный... И и́демъ въ ке́лліи своя́. Си́це же возслѣ́дуется цѣлова́ніе о просфорѣ́, я́же е́сть а́ртосъ, чрезъ всю́ седми́цу святы́я Свѣ́тлыя недѣ́ли, да́же до суббо́ты.



[Зри́:] Подоба́етъ вѣ́дати, я́ко а́ще случи́тся бра́ту ко́ему отъити́ ко Го́споду въ сію́ святу́ю седми́цу Па́схи. И о се́мъ зри́ всего́ послѣ́дованія си́хъ дне́й о усо́пшихъ въ Тре́бникѣ.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 1 – 12.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.