Церковный календарь
Новости


2018-06-24 / russportal
Ген. П. Н. Красновъ. Романъ "Амазонка пустыни". Глава 39-я (1922)
2018-06-24 / russportal
Ген. П. Н. Красновъ. Романъ "Амазонка пустыни". Глава 38-я (1922)
2018-06-24 / russportal
Ген. П. Н. Красновъ. Романъ "Амазонка пустыни". Глава 37-я (1922)
2018-06-24 / russportal
Ген. П. Н. Красновъ. Романъ "Амазонка пустыни". Глава 36-я (1922)
2018-06-24 / russportal
Блаж. Августинъ Иппонійскій. "Исповѣдь". Книга 10-я (1914)
2018-06-24 / russportal
Блаж. Августинъ Иппонійскій. "Исповѣдь". Книга 9-я (1914)
2018-06-23 / russportal
Архіеп. Аверкій (Таушевъ). Истинный постъ есть "злыхъ отчуждечіе" (1975)
2018-06-23 / russportal
Архіеп. Аверкій (Таушевъ). Будемъ ли мы готовиться къ Вел. посту? (1975)
2018-06-23 / russportal
И. А. Ильинъ. "О сопротивленіи злу силою". Глава 17-я (1925)
2018-06-23 / russportal
И. А. Ильинъ. "О сопротивленіи злу силою". Глава 16-я (1925)
2018-06-23 / russportal
Ген. П. Н. Красновъ. Романъ "Амазонка пустыни". Глава 35-я (1922)
2018-06-23 / russportal
Ген. П. Н. Красновъ. Романъ "Амазонка пустыни". Глава 34-я (1922)
2018-06-23 / russportal
Н. А. Соколовъ. "Убійство Царской Семьи". Глава 12-я (1925)
2018-06-23 / russportal
Н. А. Соколовъ. "Убійство Царской Семьи". Глава 11-я (1925)
2018-06-22 / russportal
Ген. П. Н. Красновъ. Романъ "Амазонка пустыни". Глава 33-я (1922)
2018-06-22 / russportal
Ген. П. Н. Красновъ. Романъ "Амазонка пустыни". Глава 32-я (1922)
Новости въ видѣ
RSS-канала: .
Сегодня - понедѣльникъ, 25 iюня 2018 г. Сейчасъ на порталѣ посѣтителей - 3.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ],
Съ Бо́гомъ Святы́мъ, обдержа́шая подоба́ющее е́й послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ПОНЕДѢЛЬНИКЪ СВѢТЛЫЯ СЕДМИЦЫ.

ВО СВЯТУЮ И ВЕЛИКУЮ НЕДѢЛЮ ПАСХИ ВЕЧЕРА.

По 9-мъ часѣ́, во свѣти́льничномъ, облачи́тся настоя́тель во всю́ свяще́нную оде́жду и, ста́въ предъ свято́ю трапе́зою съ кади́льницею, зна́менуетъ крестови́дно, и возглаша́етъ, глаго́ля:

Благослове́нъ Бо́гъ на́шъ, всегда́, ны́нѣ и при́сно, и во вѣ́ки вѣко́въ.
И на́мъ отвѣща́ющимъ: Ами́нь.

И то́й начина́етъ: Христо́съ воскре́се изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ, три́жды. И мы́ то́йжде отвѣща́емъ, три́жды. И глаго́летъ настоя́тель преждерече́нныя стихи́: 1-й: Да воскре́снетъ Бо́гъ... 2-й: Яко исчеза́етъ ды́мъ... 3-й: Та́ко да поги́бнутъ грѣ́шницы... 4-й: Се́й де́нь, его́же сотвори́ Госпо́дь... Мы́ же на кíйждо сти́хъ пое́мъ: Христо́съ воскре́се.., по еди́ножды. Сла́ва. Мы же: Христо́съ воскре́се... И ны́нѣ. Мы же: Христо́съ воскре́се И па́ки настоя́тель: Христо́съ воскре́се изъ ме́ртвыхъ, сме́ртію сме́рть попра́въ. И мы́ коне́цъ: И су́щимъ во гробѣ́хъ живо́тъ дарова́въ.

Та́же ектенія́ вели́кая отъ діа́кона: Ми́ромъ Го́споду помо́лимся...

[Зри́:] Подоба́етъ вѣ́дати, я́ко по внегда́ нача́ти іере́ю, кади́тъ святу́ю трапе́зу по обы́чаю и ве́сь олта́рь, ве́черъ на Го́споди воззва́хъ... На у́трени, въ нача́лѣ кано́на исхо́дитъ и кади́тъ хра́мъ, и ли́ки, и бра́тію, по обыкнове́нному чи́ну.

Посе́мъ, Го́споди воззвахъ.., пое́мъ во гла́съ 2.
Поста́вимъ стихо́въ 6 и пое́мъ стихи́ры воскре́сны 3, гла́съ 2:

Пре́жде вѣ́къ отъ Отца́ ро́ждшемуся Бо́жію Сло́ву, вопло́щшемуся отъ Дѣ́вы Марíи, пріиди́те, поклони́мся: крестъ бо претерпѣ́въ, погребе́нію предаде́ся, я́ко Са́мъ восхотѣ́, и воскре́съ изъ ме́ртвыхъ, спасе́ мя заблужда́ющаго человѣ́ка.

Христо́съ, Спа́съ на́шъ, е́же на ны́ рукописа́ніе, пригвозди́въ на крестѣ́, загла́ди, и сме́рную держа́ву упраздни́. Покланя́емся Его́ тридне́вному Воскресе́нію.

Со арха́нгелы воспои́мъ Христо́во Воскресе́ніе: То́й бо е́сть Изба́витель и Спа́съ ду́шъ на́шихъ, и въ сла́вѣ стра́шной и крѣ́пцѣй си́лѣ, па́ки гряде́тъ суди́ти мíру, его́же созда́.

И восто́чны [анато́ліевы] три́:

Тебе́, Распе́ншагося и Погребе́ннаго, а́нгелъ проповѣ́да Влады́ку, и глаго́лаше жена́мъ: пріиди́те, ви́дите, идѣ́же лежа́ше Госпо́дь; воскре́се бо, я́коже рече́, я́ко Всеси́ленъ. Тѣ́мже Тебѣ́ покланя́емся, Еди́ному Безсме́ртному: Жизнода́вче Христе́, поми́луй на́съ.

Кресто́мъ Твои́мъ упраздни́лъ еси́, ю́же отъ дре́ва кля́тву, погребе́ніемъ Твои́мъ умертви́лъ еси́ сме́рти держа́ву, воста́ніемъ же Твои́мъ просвѣти́лъ еси́ ро́дъ человѣ́ческій. Сего́ ра́ди вопіе́мъ Ти́: Благодѣ́телю Христе́ Бо́же на́шъ, сла́ва Тебѣ́.

Отверзо́шася Тебѣ́, Го́споди, стра́хомъ врата́ сме́ртная, вра́тницы же а́довы, ви́дѣвше Тя́, убоя́шася; врата́ бо мѣ́дная сокруши́лъ еси́, и вереи́ желѣ́зныя сте́рлъ еси́, и изве́лъ еси́ на́съ отъ тмы́ и се́ни сме́ртныя, и у́зы на́ша растерза́лъ еси́.

Сла́ва:

Спаси́тельную пѣ́снь пою́ще, отъ у́стъ возсле́мъ: пріиди́те вси́, въ дому́ Госпо́днемъ припаде́мъ, глаго́люще: на дре́вѣ Распны́йся, и изъ ме́ртвыхъ Воскресы́й, и Сы́й въ нѣ́дрѣхъ Отчихъ, очи́сти грѣхи́ на́ша.

И ны́нѣ, богоро́диченъ:

Пре́йде сѣ́нь зако́нная, благода́ти прише́дши: я́коже бо купина́ не сгара́ше, опаля́ема, та́ко Дѣ́ва родила́ еси́ и Дѣ́ва пребыла́ еси́. Вмѣ́сто столпа́ о́гненнаго пра́ведное возсія́ Со́лнце, вмѣ́сто Моисе́я — Христо́съ, спасе́ніе ду́шъ на́шихъ.

Вхо́дъ со Ева́нгеліемъ. Свѣ́те ти́хій...

Та́же, проки́менъ вели́кій, гла́съ 7: Кто́ Бо́гъ ве́лій, я́ко Бо́гъ на́шъ? Ты́ еси́ Бо́гъ творя́й чудеса́. Сти́хъ 1: Сказа́лъ еси́ въ лю́дехъ си́лу Твою́. Сти́хъ 2: И рѣ́хъ: ны́нѣ нача́хъ, сія́ измѣ́на десни́цы Вы́шняго. Сти́хъ 3: Помяну́хъ дѣла́ Госпо́дня, я́ко помяну́ отъ нача́ла чудеса́ Твоя́. И па́ки: Кто́ Бо́гъ ве́лій...

По проки́мнѣ же возглаша́етъ діа́конъ:

И о сподо́битися на́мъ слы́шанію свята́го Ева́нгелія, Го́спода Бо́га мо́лимъ. Посе́мъ чте́тъ Ева́нгеліе настоя́тель во олтари́, Іоа́нна, зача́ло 65: Су́щу по́здѣ въ де́нь то́й... Конецъ: Не иму́ вѣ́ры. Посе́мъ ектенія́: Рце́мъ вси́... и Сподо́би, Го́споди, въ ве́черъ се́й... Та́же: Испо́лнимъ вече́рнюю моли́тву...

И по возгла́сѣ пое́мъ стихи́ру воскре́сну, гла́съ 2:

Воскресе́ніе Твое́, Христе́ Спа́се, всю́ просвѣти́ вселе́нную, и призва́лъ еси́ Твое́ созда́ніе, Всеси́льне Го́споди, сла́ва Тебѣ́.

Та́же стихи́ры Па́схи, гла́съ 5: Па́сха свяще́нная.., съ припѣ́вы и́хъ. Сла́ва, и ны́нѣ: Воскресе́нія де́нь... Христо́съ воскре́се.., три́жды, кромѣ́ конца́ стихи́ры.

Та́же, діа́конъ: Прему́дрость. Мы́ же: Благослови́. Настоя́тель: Сы́й благослове́нъ Христо́съ, Бо́гъ на́шъ... И мы́: Утверди́ Бо́же... Та́же, настоя́тель, вмѣ́сто: Сла́ва Тебѣ́, Христе́ Бо́же... Христо́съ воскре́се изъ ме́ртвыхъ, сме́ртію сме́рть попра́въ. И мы́: И су́щимъ во гробѣ́хъ живо́тъ дарова́въ. И а́біе глаго́летъ отпу́стъ со кресто́мъ: Христо́съ, воскресы́й изъ ме́ртвыхъ... И про́чее, я́коже указа́ся въ коне́цъ у́трени. И цѣлу́емъ святы́я ико́ны.

[Зри́:] И вхо́димъ въ трапе́зу, и глаго́лемъ: Христо́съ воскре́се.., три́жды. Сла́ва, и ны́нѣ. Настоя́тель: Христе́ Бо́же благослови́... По воста́ніи же отъ трапе́зы, глаго́лемъ: Христо́съ воскре́се.., три́жды. Сла́ва, и ны́нѣ. Настоя́тель: Съ на́ми Бо́гъ Свое́ю благода́тію... И та́ко твори́мъ во всю́ седми́цу Свѣ́тлую вече́рни послѣ́дованіе.



ВЪ ПОНЕДѢЛЬНИКЪ СВѢТЛЫЯ СЕДМИЦЫ, НА УТРЕНИ.

Пре́жде нача́ла, вжига́етъ канди́ла и свѣщи́ параекклисіа́рхъ. Та́же кле́плетъ въ вели́кій кампа́нъ, и въ про́чія. И собра́вшимся на́мъ во хра́мъ, іере́й полага́етъ обы́чный покло́нъ настоя́телю, и отхо́дитъ во святы́й олта́рь и, взе́мъ кади́льницу, стои́тъ предъ свято́ю трапе́зою, кромѣ́ у́бо свяще́нническія оде́жды, епитрахи́лій то́чію возло́жь све́рхъ ма́нтіи, кади́тъ крестообра́зно, глаго́ля: Сла́ва Святѣ́й, и Единосу́щнѣй... И начина́етъ тропа́рь: Христо́съ воскре́се.., три́жды. И на́мъ то́жде отвѣща́ющимъ. И пое́мъ: Христо́съ воскре́се.., со стихи́ его́, я́коже изъяви́ся въ недѣ́лю у́тра и ве́чера. Въ мірски́хъ же хра́мѣхъ облачи́тся іере́й въ ри́зы. Та́же ектенія́ вели́кая. И по возгла́сѣ, а́біе пое́мъ кано́нъ, ирмо́съ: Воскресе́нія де́нь.., по два́жды, тропари́ же на 10, съ припѣ́вы: Христо́съ воскре́се... Въ Сла́ву же, И ны́нѣ, глаго́лемъ богоро́дичны господи́на Ѳеофа́на и господи́на Іо́сифа, пи́саны въ недѣ́лю о Мѵроно́сицахъ. Катава́сія, о́ба ли́ка вку́пѣ: Воскресе́нія де́нь... И послѣди́: Христо́съ воскре́се.., три́жды. И глаго́лемъ сіе́ во всю́ седми́цу вку́пѣ съ ирмосы́ на 14. По 3-й пѣ́сни, ипакои́: Предвари́вшія у́тро... И чте́ніе на 1-ю́ кни́гу: Въ нача́лѣ бѣ́ Сло́во... отъ Іоанна, толкова́ніе Златоу́стаго. [Отъ сего́ бо дне́ начина́емъ сію́ кни́гу и да́же до всѣ́хъ святы́хъ соверша́емъ.] По 6-й пѣ́сни, конда́къ: Аще и во гро́бъ... и икосъ. И чте́ніе. И по не́мъ: Воскресе́ніе Христо́во.., три́жды. И Воскре́съ Іису́съ отъ гро́ба.., три́жды. И а́біе про́чія пѣ́сни. 9-ю пѣ́снь пое́мъ съ припѣ́вы. Та́же ексапостила́рій: Пло́тію усну́въ.., три́жды.

На хвали́техъ: Вся́кое дыха́ніе... И пое́мъ стихи́ры воскре́сны, гла́съ 2:

Вся́кое дыха́ніе и вся́ тва́рь Тя́ сла́витъ, Го́споди, я́ко Кресто́мъ смерть упраздни́лъ еси́, да пока́жеши лю́демъ е́же изъ ме́ртвыхъ Твое́ Воскресе́ніе, я́ко еди́нъ Человѣколю́бецъ.

Да реку́тъ іуде́и, ка́ко во́ини погуби́ша стрегу́щіи Царя́? Почто́ бо ка́мень не сохрани́ Ка́мене жи́зни? Или́ Погребе́ннаго да дадя́тъ, или́ Воскре́сшему да покло́нятся, глаго́люще съ на́ми: сла́ва мно́жеству щедро́тъ Твои́хъ, Спа́се на́шъ, сла́ва Тебѣ́!

Ра́дуйтеся, лю́діе, и весели́теся, а́нгелъ сѣдя́й на ка́мени гро́бномъ, то́й на́мъ благовѣсти́, ре́къ: Христо́съ воскре́се изъ ме́ртвыхъ, Спа́съ мíра, и испо́лни вся́ческая благоуха́нія. Ра́дуйтеся, лю́діе, и весели́теся!

Ангелъ у́бо е́же — ра́дуйся! — пре́жде Твоего́ зача́тія, Го́споди, Благода́тнѣй принесе́; а́нгелъ же ка́мень сла́внаго Твоего́ гро́ба въ Твое́ Воскресе́ніе отвали́. Овъ у́бо въ печа́ли мѣ́сто весе́лія о́бразы возвѣща́я; се́й же въ сме́рти мѣ́сто Влады́ку Жизнода́вца проповѣ́дуя на́мъ. Тѣ́мже вопіе́мъ Ти́: Благодѣ́телю всѣ́хъ, Го́споди, сла́ва Тебѣ́!

И стихи́ры Па́схи съ припѣ́вы и́хъ, я́коже предписа́ся во у́трени недѣ́ли. И ектеніи́ и отпу́стъ. И ча́съ пе́рвый. Си́це же быва́етъ слу́жба у́трени во всю́ седми́цу Свѣ́тлую. Твори́мъ же и литíю внѣ́ оби́тели.

[Зри́:] Подоба́етъ вѣ́дати, я́ко твори́мъ исхожде́ніе дне́сь внѣ́ монастыря́, преднося́ще хору́гви. Въ рука́хъ же держа́ще свято́е Ева́нгеліе, честны́й Кре́стъ, и ико́ны Воскресе́нія Христо́ва, Пречи́стыя Богоро́дицы. Пое́мъ кано́нъ Па́схи съ богоро́дичны на 8. И катава́сія: ирмо́съ то́йже. По 6-й пѣ́сни, послѣди́ Ева́нгелія глаго́лемъ: Воскресе́ніе Христо́во ви́дѣвше.., три́жды. Та́же стихи́ра: Воскре́съ Іису́съ отъ гро́ба.., три́жды. Та́же 7-я, 8-я и 9-я пѣ́сни. И про́чее моле́бна, листъ 9.



НА ЛИТУРГІИ,

Антифо́ны Па́схи непремѣ́нно, я́коже указа́ся въ недѣ́лю Па́схи. Проки́менъ Апо́стола, гла́съ 8: Во всю́ зе́млю изы́де вѣща́ніе и́хъ* и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь. Апо́столъ, Дѣя́ній, зача́ло 2: Возврати́шася апо́столи... Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, [и́бо и́стину Твою́ въ це́ркви святы́хъ.] Сти́хъ: Бо́гъ прославля́емь въ совѣ́тѣ святы́хъ. Ева́нгеліе отъ Іоа́нна, зача́ло 2: Бо́га никто́же ви́дѣ нигдѣ́же... Прича́стенъ: Тѣ́ло Христо́во... На трапе́зѣ быва́етъ утѣше́ніе вели́кое бра́тіи.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 12 об. – 14 об.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.