Церковный календарь
Новости


2017-09-21 / russportal
Прот. Константинъ Зноско. "Истор. очеркъ церк. уніи". Часть 2-я. Глава 4-я (1993)
2017-09-21 / russportal
Прот. Константинъ Зноско. "Истор. очеркъ церк. уніи". Часть 2-я. Глава 3-я (1993)
2017-09-21 / russportal
Іером. Серафимъ (Роузъ). "Душа послѣ смерти". Приложеніе 3-е (1991)
2017-09-21 / russportal
Іером. Серафимъ (Роузъ). "Душа послѣ смерти". Приложеніе 2-е (1991)
2017-09-21 / russportal
Іером. Серафимъ (Роузъ). "Душа послѣ смерти". Приложеніе 1-е (1991)
2017-09-21 / russportal
Іером. Серафимъ (Роузъ). "Душа послѣ смерти". Глава 10-я (1991)
2017-09-21 / russportal
"Проповѣдн. хрестоматія". Поученіе на праздникъ Почаевской иконы Божіей Матери (1965)
2017-09-21 / russportal
"Проповѣдн. хрестоматія". Поученіе на Рождество Пресвятой Богородицы (1965)
2017-09-14 / russportal
Прот. Константинъ Зноско. "Истор. очеркъ церк. уніи". Часть 2-я. Глава 2-я (1993)
2017-09-14 / russportal
Прот. Константинъ Зноско. "Истор. очеркъ церк. уніи". Часть 2-я. Глава 1-я (1993)
2017-09-14 / russportal
Свт. Игнатій (Брянчаниновъ). Понятіе о ереси и расколѣ (1996)
2017-09-14 / russportal
Свт. Игнатій (Брянчаниновъ). Жизнь схимонаха Ѳеодора (1996)
2017-09-13 / russportal
Прот. Константинъ Зноско. Краткій обзоръ причинъ, пород. Литовскую церк. унію (1993)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 10-я (1987)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 9-я (1987)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 8-я (1987)
Новости въ видѣ
RSS-канала: .
Сегодня - пятница, 22 сентября 2017 г. Сейчасъ на порталѣ посѣтителей - 11.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ],
Съ Бо́гомъ Святы́мъ, обдержа́шая подоба́ющее е́й послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ЧЕТВЕРТОКЪ СВѢТЛЫЯ СЕДМИЦЫ.

ВЪ СРЕДУ СВѢТЛЫЯ СЕДМИЦЫ ВЕЧЕРА,
Во свѣти́льничномъ, по Христо́съ воскре́се... и ектеніи́, пое́мъ стихи́ры воскре́сны три́, гла́съ 5:

Честны́мъ Твои́мъ Кресто́мъ, Христе́, діа́вола посрами́лъ еси́, и Воскресе́ніемъ Твои́мъ жа́ло грѣхо́вное притупи́лъ еси́, и спа́слъ еси́ ны́ отъ вра́тъ сме́ртныхъ. Сла́вимъ Тя́, Единоро́дне!

Воскресе́ніе дая́й ро́ду человѣ́ческому, я́ко овча́ на заколе́ніе веде́ся; устраши́шася сего́ кня́зи а́дстіи и взя́шася врата́ плаче́вная. Вни́де бо Ца́рь сла́вы Христо́съ, глаго́ля су́щимъ во у́захъ: изыди́те; и су́щимъ во тмѣ́: откры́йтеся.

Ве́ліе чу́до! Неви́димыхъ Содѣ́тель, за человѣколю́біе пло́тію пострада́въ, воскре́се Безсме́ртный. Пріиди́те, оте́чествія язы́къ, Тому́ поклони́мся: благоутро́біемъ бо Его́ отъ пре́лести изба́вльшеся, въ Тріе́хъ Ѵпоста́сѣхъ Еди́наго Бо́га пѣ́ти навыко́хомъ.

И восто́чны [анато́ліевы] три́, гла́съ то́йже:

Вече́рнее поклоне́ніе прино́симъ Тебѣ́, Невече́рнему Свѣ́ту, на коне́цъ вѣко́въ, я́ко въ зерца́лѣ пло́тію возсія́вшему мíрови, и да́же до а́да низше́дшему, и та́мо су́щую тму́ разруши́вшему, и свѣ́тъ Воскресе́нія язы́комъ показа́вшему. Свѣтода́вче Го́споди, сла́ва Тебѣ́!

Нача́льника спасе́нія на́шего, Христа́, славосло́вимъ: Тому́ бо изъ ме́ртвыхъ воскре́сшу, мíръ отъ пре́лести спасе́нъ бы́сть. Ра́дуется ли́къ а́нгельскій, бѣ́гаетъ де́моновъ пре́лесть, Ада́мъ пады́й воста́, діа́волъ упраздни́ся.

Иже отъ кустодíи науче́ни быва́ху отъ беззако́нникъ: покры́йте Христо́во Воста́ніе, и пріими́те сре́бреники, и рцы́те: я́ко на́мъ спя́щимъ, изъ гро́ба укра́денъ бы́сть Ме́ртвый. — Кто ви́дѣ, кто́ слы́ша, мертвеца́ укра́дена когда́, па́че же пома́зана и на́га, оста́вльша и во гро́бѣ погреба́льная Своя́? Не прельща́йтеся, іуде́е, навы́кните рече́ніемъ проро́ческимъ и уразумѣ́йте, я́ко То́й е́сть вои́стинну Изба́витель мíра и Всеси́льный.

Сла́ва:

Го́споди, а́дъ плѣни́вый и сме́рть попра́вый, Спа́се на́шъ, просвѣти́вый мíръ Кресто́мъ Честны́мъ, поми́луй на́съ.

И ны́нѣ, богоро́диченъ:

Въ Чермнѣ́мъ мо́ри Неискусобра́чныя Невѣ́сты о́бразъ написа́ся иногда́: та́мо Моисе́й, раздѣли́тель воды́, здѣ́ же Гавріи́лъ, служи́тель чудесе́; тогда́ глубину́ ше́ствова немо́кренно Изра́иль, ны́нѣ же Христа́ роди́ безсѣ́менно Дѣ́ва; мо́ре по проше́ствіи Изра́илевѣ пребы́сть непрохо́дно, Непоро́чная по рождествѣ́ Емману́илевѣ пребы́сть нетлѣ́нна. Сы́й и пре́жде Сы́й, явле́йся я́ко Человѣ́къ, Бо́же, поми́луй на́съ.

Вхо́дъ съ кади́ломъ. Свѣ́те ти́хій...

И проки́менъ, гла́съ 7: Внуши́, Бо́же, моли́тву мою́* и не пре́зри моле́нія моего́. Сти́хъ: Вонми́ ми́ и услы́ши мя́. Сти́хъ: Яко уклони́ша на мя́ беззако́ніе. Сти́хъ: Азъ къ Бо́гу воззва́хъ, и Госпо́дь услы́ша мя́, ве́черъ, и зау́тра, и пол́удне. Та́же: Внуши́, Бо́же, моли́тву мою́. [И мы́:] И не пре́зри моле́нія моего́.

Ектенія́ и Сподо́би, Го́споди, въ ве́черъ се́й... И про́чая вся́, я́же предъяви́ся.

На стихо́внѣ стихи́ра воскре́сна, гла́съ 5:

Тебе́, Воплоще́ннаго Спа́са Христа́ и небе́съ Неразлучи́вшася, во гла́сѣхъ пѣ́ній велича́емъ, я́ко Кре́стъ и сме́рть прія́лъ еси́ за ро́дъ на́шъ, я́ко Человѣколю́бецъ Госпо́дь, испрове́ргій а́дова врата́, тридне́вно воскре́слъ еси́, спаса́я ду́ши на́ша.

И стихи́ры Па́схи съ припѣ́вы и́хъ, я́коже предписа́ся. Христо́съ воскре́се.., три́жды. И отпу́стъ.




ВЪ ЧЕТВЕРТОКЪ СВѢТЛЫЯ СЕДМИЦЫ НА УТРЕНИ,
Быва́етъ вослѣ́дованіе все́, я́коже предъяви́ся.

На хвали́техъ, Вся́кое дыха́ніе.., поста́вимъ стихи́ 4 и пое́мъ стихи́ры воскре́сны, гла́съ 5:

Го́споди, запеча́тану гро́бу отъ беззако́нниковъ, проше́лъ еси́ изъ гро́ба, я́коже роди́лся еси́ отъ Богоро́дицы: не уразумѣ́ша, ка́ко воплоти́лся еси́, безпло́тніи Твои́ а́нгели; не чу́вствоваша, когда́ воскре́слъ еси́, стрегу́щіи Тя́ во́ини. Обоя́ бо запечатлѣ́шася испыту́ющимъ, яви́шася же чудеса́ кла́няющимся вѣ́рою та́инству, е́же воспѣва́ющимъ, возда́ждь на́мъ ра́дость и ве́лію ми́лость.

Го́споди, вереи́ вѣ́чныя сокруши́вый и у́зы растерза́вый, отъ гро́ба воскре́слъ еси́, оста́вль Твоя́ погреба́льная во свидѣ́тельство и́стиннаго тридне́внаго Твоего́ погребе́нія, и предвари́лъ еси́ въ Галиле́и, въ пеще́рѣ Стрего́мый. Ве́ликая Твоя́ ми́лость, Непостижи́ме Спа́се, поми́луй и спаси́ на́съ!

Го́споди, жены́ теко́ша на гробъ ви́дѣти Тя́, Христа́, на́съ ра́ди пострада́вшаго, и прише́дше, обрѣто́ша а́нгела на ка́мени сѣдя́ща, стра́хомъ отва́льшемся, и къ ни́мъ возопи́, глаго́ля: воскре́се Госпо́дь, рцы́те ученико́мъ, я́ко воскре́се отъ ме́ртвыхъ Спаса́яй ду́ши на́ша.

Го́споди, я́коже изше́лъ еси́ отъ запеча́таннаго гро́ба, та́ко вше́лъ еси́ и две́ремъ заключе́нымъ ко ученико́мъ Твои́мъ, показу́я и́мъ тѣле́сная страда́нія, я́же подъя́лъ еси́, Спа́се Долготерпѣли́вый: я́ко отъ сѣ́мене Дави́дова, я́звы претерпѣ́лъ еси́; я́ко Сы́нъ же Бо́жій, мíръ свободи́лъ еси́. Ве́лія Твоя́ ми́лость, Непостижи́ме Спа́се, поми́луй и спаси́ на́съ!

Та́же стихи́ры Па́схи съ припѣ́вы и́хъ. Христо́съ воскре́се.., три́жды. И отпу́стъ. Часы́ Па́схи.




НА ЛИТУРГІИ,

Антифо́ны Па́схи. Проки́менъ, гла́съ 3: По́йте Бо́гу на́шему, по́йте,* по́йте Царе́вы на́шему, по́йте. Сти́хъ: Вси́ язы́цы, восплещи́те рука́ми, воскли́кните Бо́гу гла́сомъ ра́дованія. Апо́столъ въ Дѣя́ніихъ, зача́ло 6: Рече́ Пе́тръ... Аллилу́ія, гла́съ 4: Наляцы́, и успѣва́й, и ца́рствуй, и́стины ра́ди, и кро́тости, и пра́вды. Сти́хъ: Возлюби́лъ еси́ пра́вду и возненави́дѣлъ еси́ беззако́ніе. Ева́нгеліе отъ Іоа́нна, зача́ло 8: Человѣ́къ нѣ́кій... Прича́стенъ: Тѣ́ло Христо́во пріими́те...

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 17 об. – 19.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.