Церковный календарь
Новости


2017-04-23 / russportal
«Слѣдованная Псалтирь». Каѳисма 6-я (1874)
2017-04-23 / russportal
«Слѣдованная Псалтирь». Каѳисма 5-я (1874)
2017-04-23 / russportal
Прав. Іоаннъ Кронштадтскій. Пять поученій въ недѣлю Ѳомину (1894)
2017-04-23 / russportal
Прот. Григорій Дьяченко. Восемь поученій въ недѣлю Антипасхи (1900)
2017-04-22 / russportal
Прот. Григорій Дьяченко. «Праздн. отдыхъ». Недѣля св. Пасхи (Сл. 16-е)
2017-04-22 / russportal
Прот. Григорій Дьяченко. «Праздн. отдыхъ». Недѣля св. Пасхи (Сл. 15-е)
2017-04-22 / russportal
Прот. Григорій Дьяченко. «Праздн. отдыхъ». Недѣля св. Пасхи (Сл. 14-е)
2017-04-22 / russportal
Прот. Григорій Дьяченко. «Праздн. отдыхъ». Недѣля св. Пасхи (Сл. 13-е)
2017-04-22 / russportal
Книга «Златоустъ». Слово 69-е, въ недѣлю 3-ю по Пасхѣ (1910)
2017-04-22 / russportal
Книга «Златоустъ». Слово 68-е, въ недѣлю новую Антипасхи (1910)
2017-04-21 / russportal
"Тріодь Цвѣтная". Служба въ субботу 2-й седмицы по Пасхѣ (1864)
2017-04-21 / russportal
"Тріодь Цвѣтная". Служба въ пятокъ 2-й седмицы по Пасхѣ (1864)
2017-04-20 / russportal
Прот. Григорій Дьяченко. «Праздн. отдыхъ». Недѣля св. Пасхи (Сл. 12-е)
2017-04-20 / russportal
Прот. Григорій Дьяченко. «Праздн. отдыхъ». Недѣля св. Пасхи (Сл. 11-е)
2017-04-20 / russportal
"Тріодь Цвѣтная". Служба въ четвертокъ 2-й седмицы по Пасхѣ (1864)
2017-04-20 / russportal
"Тріодь Цвѣтная". Служба въ среду 2-й седмицы по Пасхѣ (1864)
Новости въ видѣ
RSS-канала: .
Сегодня - понедѣльникъ, 24 апрѣля 2017 г. Сейчасъ на порталѣ посѣтителей - 15.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ],
Съ Бо́гомъ Святы́мъ, обдержа́шая подоба́ющее е́й послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ПЯТОКЪ СВѢТЛЫЯ СЕДМИЦЫ.

ВЪ ЧЕТВЕРТОКЪ СВѢТЛЫЯ СЕДМИЦЫ ВЕЧЕРА,
Пое́мъ настоя́щее послѣ́дованіе, бы́вшее отъ господи́на Ники́фора Ка́ллиста Ксанѳопу́ла, на Пресвяту́ю Госпожу́ Влады́чицу Богоро́дицу, Живопріе́мный Исто́чникъ. Не бо́ обрѣто́хомъ въ ти́пицѣ сицева́го послѣ́дованія, но положи́ся любве́ ра́ди Пресвяты́я Богоро́дицы.

На Го́споди воззва́хъ.., поста́вимъ стихо́въ 10, и пое́мъ стихи́ры воскре́сны осмогла́сника 6, гла́съ 6:

Побѣ́ду имѣ́яй, Христе́, ю́же на а́да, на Кре́стъ возше́лъ еси́, да во тмѣ́ сме́рти сѣдя́щія воскреси́ши съ собо́ю, Иже въ ме́ртвыхъ Свобо́дь, Источа́яй живо́тъ отъ Своего́ свѣ́та, Всеси́льне Спа́се, поми́луй на́съ.

Дне́сь Христо́съ, сме́рть попра́въ, я́коже рече́, воскре́се, и ра́дованіе мíру дарова́, да вси́ взыва́юще пѣ́снь, та́ко рце́мъ: Исто́чниче жи́зни, Непристу́пный Свѣ́те, Всеси́льне Спа́се, поми́луй на́съ.

Тебе́, Го́споди, Су́щаго по все́й тва́ри, грѣ́шніи ка́мо бѣжи́мъ? На небеси́ Са́мъ живе́ши, во а́дѣ попра́лъ еси́ сме́рть. Во глубины́ морскíя? — Та́мо рука́ Твоя́ Влады́ко. Къ Тебѣ́ прибѣга́емъ, Тебѣ́ припа́дающе, мо́лимся: Воскресы́й изъ ме́ртвыхъ, поми́луй на́съ.

Ины́я стихи́ры восто́чны [анато́ліевы], гла́съ то́йже.

Кресто́мъ Твои́мъ, Христе́, хва́лимся, и Воскресе́ніе Твое́ пое́мъ и сла́вимъ: Ты́ бо еси Бо́гъ на́шъ, ра́звѣ Тебе́ ино́го не вѣ́мы.

Сла́ва си́лѣ Твое́й, Го́споди, я́ко упраздни́лъ еси́ держа́ву иму́щаго сме́рти, обнови́лъ еси́ ны́ кресто́мъ Твои́мъ, да́руяй на́мъ жи́знь и нетлѣ́ніе.

Вы́ну благословя́ще Го́спода, пое́мъ Воскресе́ніе Его́: кре́стъ бо претерпѣ́въ, сме́ртію сме́рть погуби́.

Та́же, стихи́ры Живопріе́мнаго Исто́чника, гла́съ то́йже. Подо́бенъ: Все́ возло́жше.

Стра́нная и пресла́вная небе́съ Влады́ка на Тебѣ́ соверша́ше изнача́ла, Всенепоро́чная: и́бо свы́ше я́вственно ука́ну, я́коже до́ждь, во утро́бѣ Твое́й, Богоневѣ́сто, исто́чникъ Тя́ показу́я, все́ благо́е врѣ́ющій, оби́ліе же исцѣле́ній, благодѣя́нія источа́ющій всѣ́мъ незави́стно, тре́бующимъ крѣ́пости ду́шъ, и здра́віе тѣлесе́, водо́ю благода́ти.

Ма́нну Тя́ небе́сную, и рая́, Дѣ́во, исто́чникъ боже́ственный, имену́ю, Влады́чице, пріи́скреннѣе: земли́ бо тече́ то́къ, и благода́ть исто́чника Твоего́, четвероча́стіе ея́ покрыва́ющая стра́нными чудесы́ всегда́, и всѣ́мъ проси́мая быва́етъ вода́ піе́мая. Тѣ́мже, веселя́щеся, христоимени́тіи, притека́емъ вѣ́рно, святы́ню че́рплюще всегда́ сладкото́чную.

Струи́ исцѣле́ній источа́еши, Дѣ́во, вѣ́рно притека́ющимъ исто́чнику Твоему́ всегда́, Богоневѣ́сто. Ту́не бо излива́еши оби́льно и бога́тно неду́гующимъ исцѣле́нія: слѣпы́я ви́дящія явля́еши я́сно, приступа́ющія къ Тебѣ́; хро́мыя мно́гія испра́вила еси́, и разсла́бленныя стягну́ла еси́, умерщвле́на же оживи́ла еси́ возлія́ніемъ трегу́бымъ, неводне́нныхъ и злоды́шущихъ стра́сти исцѣли́ла еси́.

Повторя́емъ 1-ю стихи́ру.

Сла́ва, гла́съ 6:

Кто́ возглаго́летъ си́лы Твоя́, Исто́чниче, и́же неистоща́емыми чудесы́ изоби́луяй, мно́гая и па́че естества́ содѣва́еши исцѣле́ньми? Оле вели́чій, я́же всѣ́мъ излива́еши! Не то́кмо бо болѣ́зни неудо́бныя отгна́ла еси́ притека́ющихъ съ любо́вію, но и душе́вныя стра́сти измыва́еши очища́ющи, Всенескве́рная, всѣ́мъ подаю́щи ве́лію ми́лость.

И ны́нѣ, [гла́съ то́йже]:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Вхо́дъ съ кади́ломъ. Свѣ́те ти́хій...

Проки́менъ, гла́съ 7: Возлюблю́ Тя, Го́споди, Крѣ́посте моя́,* Госпо́дь утвержде́ніе мое́. Сти́хъ: Бо́гъ мо́й, Помо́щникъ мо́й, и упова́ю на Него́. Сти́хъ: Хваля́, призову́ Го́спода, и отъ вра́гъ мои́хъ спасу́ся. Сти́хъ: Услы́ша отъ хра́ма свята́го Своего́ гла́съ мо́й. Та́же: Возлюблю́ Тя, Го́споди, Крѣ́посте моя́. [И мы́:] Госпо́дь утвержде́ніе мое́.

Рце́мъ вси́... Сподо́би, Го́споди, въ ве́черъ се́й... и про́чая.

На стихо́внѣ стихи́ра воскре́сна, гла́съ 6, осмогла́сника:

Воскресе́ніе Твое́, Христе́ Спа́се, а́нгели пою́тъ на небесѣ́хъ, и на́съ на земли́ сподо́би чи́стымъ се́рдцемъ Тя́ сла́вити.

Та́же, настоя́щія стихи́ры Богоро́дицы, гла́съ 5. Подо́бенъ.

Ра́дуйся, Живоно́сный Исто́чниче, по моря́мъ разлива́яй чудеса́ на всю́ вселе́нную; Океа́не у́мный, Ни́ловы струи́ превосходя́й излива́ніемъ благода́ти; Силоа́ме вторы́й, во́ду источа́яй, а́ки отъ ка́мене пресла́вную, Іорда́ново же пріе́мый дѣ́йство; Ма́нно спаси́тельная же, я́сно быва́емая ко и́щущаго тре́бованію, бога́тая вои́стинну и незави́стная, Христо́ва Ма́ти Отрокови́це, излива́ющая мíрови ве́лію ми́лость.

Сти́хъ: Освяти́лъ е́сть селе́ніе Свое́ Вы́шній.

Пѣ́сньми чу́дными, вѣ́рніи, небе́сный Облакъ воспои́мъ, Ка́плю небе́сную — Живода́вца Христа́, на зе́млю нетлѣ́нно одожди́вшую, жи́ву ска́чущую, и источа́ющую безсме́ртная; Во́ду боже́ственную, амвросíю не́ктара, никогда́же по питіи́ истлѣва́юща, жа́жду же, та́ющую ду́ши, отгоня́юща. Отъ Него́же пію́щимъ разу́мно, то́ки боже́ственныя предлага́ются отъ у́мнаго Чре́ва, точа́ща всѣ́мъ благода́ть незави́стную.

Сти́хъ: Рѣ́чная устремле́нія веселя́тъ гра́дъ Бо́жій.

Ра́дуйся, Живопріе́мный Исто́чниче, вѣ́чно источа́я благода́ти; лія́ніе исцѣле́ній, вся́кую неду́говъ крѣ́пость, немощну́ю и злу́ю, отгоня́ющее; слѣпы́хъ воззрѣ́ніе, и прокаже́нныхъ боже́ственное очище́ніе, точа́щее неду́говъ вся́кое врачевство́, всѣ́мъ притека́ющимъ вѣ́рно къ хра́му Твоему́; вели́кая о́бщая цѣльба́, безме́здная вои́стинну и гото́вая, Ма́ти Христа́ Сло́ва, источа́ющаго мíрови ве́лію ми́лость.

Сла́ва, гла́съ 5:

Востру́бимъ, празднолю́бцы, въ пѣ́снехъ, воспле́щемъ въ вода́хъ и возлику́имъ, ра́дующеся, вѣ́чными то́ками Живоно́снаго Исто́чника. Ца́ріе и кня́зи да стека́ются и исто́чника благода́ти да че́рплютъ незави́стно: цари́ бо спасе́, на одрѣ́ же содержи́мыя прикоснове́ніемъ возста́ви. Па́стыріе же и вси́ дождено́сный о́блакъ, спаси́тельную во́ду, сше́дшеся, почерпе́мъ: и́же въ неду́зѣхъ — свобожде́ніе; и́же въ бѣда́хъ — крѣ́пость; прохлажде́ніе — и́же въ жа́ждѣ; слѣпíи — о́чи, глусíи — благослы́шаніе, злостра́ждущіи — исцѣле́ніе; и́же въ сме́ртехъ — живоно́сную; вси́ повсю́ду вѣ́рнымъ источа́ющую во́ды спасе́нія, воспле́щуще, си́це воззове́мъ: присноживы́я то́ки излива́ющая отъ исто́чника, Чи́стая, не преста́й, Дѣ́во, всегда́ моля́щися о рабѣ́хъ Твои́хъ.

И ны́нѣ, гла́съ то́йже: Воскресе́нія де́нь... Христо́съ воскре́се.., три́жды. И отпу́стъ.




НА УТРЕНИ,
Кано́нъ Па́сцѣ, со ирмосы́ на 8 и Богоро́дицы на 6.

Кано́нъ Па́сцѣ:
Воскресе́нія де́нь... Очи́стимъ чу́вствія... Небеса́ у́бо досто́йно да веселя́тся...

И Богоро́дицы, его́же краестро́чіе: Νικηφόρου Καλλίστου τοῦ Ξανθοπούλου.

[Припѣ́въ: Пресвята́я Богоро́дице, спаси́ на́съ.]

[Ν] Ны́нѣ источи́ ми, Дѣ́во Богоро́дице, исто́чниче, благода́ть даю́щи сло́ва, я́ко да воспою́ Тя Исто́чникъ, врѣ́ющій живо́тъ и благода́ть вѣ́рнымъ: Ты́ бо ѵпоста́сное Сло́во источи́ла еси́.

[Ι] Врачевство́ па́че естества́ хра́мъ Тво́й, Честна́я, явля́ется всѣ́мъ, Отрокови́це: отъ сме́рти бо я́вныя притека́ющія вѣ́рныя я́вѣ возставля́етъ, и всѣ́мъ незави́стную то́читъ сла́дость.

[Κ] Излива́еши съ небесе́ неистощи́мо благода́ти вои́стинну Еди́на: слѣпѣ́юща бо твори́ши взира́ти къ свѣ́ту бла́томъ но́вымъ, возгласи́вши свы́ше па́че смы́сла Лео́нови.

[Η] Общее любоче́стіе человѣ́чества, Честна́я, ра́дуйся, Марíе, ра́дуйся: всѣ́хъ бо Творе́цъ на Тя́, я́коже ка́пля, сни́де я́вственно, Исто́чникъ Тя́ безсме́ртенъ показа́въ, Богоневѣ́стная.

Пѣ́снь 3.
Пріиди́те, пи́во піе́мъ... Ны́нѣ вся́ испо́лнишася... Вчера́ спогребо́хся Тебѣ́...

Богоро́дицы подо́бны:

[Φ] Свѣ́тлый Тя́ святы́й Хра́мъ Влады́ки всѣ́хъ, Отрокови́це, вѣ́мъ, и нетлѣ́нія Исто́чникъ, во́ду излива́ющъ — Христа́, отъ Него́же напая́емся.

[Ο] Отъ Твоея́ благода́ти, Влады́чице, Исто́чниче, самоде́ржцу дае́ши исхо́довъ происхожде́ніе содержи́мо лю́тѣ, ка́мене подстоя́ніе стра́шное, водо́ю разрѣши́вшееся.

[Ρ] Тече́тъ благода́ть незави́стная отъ Тебе́, Богоро́дице Дѣ́во, оби́льно точа́щая: хро́міи ска́чутъ о Тебѣ́, прокаже́нныхъ очища́ется мно́жество, и де́мони угнѣта́ются.

[Ο] Всѣ́мъ дае́ши исцѣле́ніе вѣ́рнымъ: царе́мъ, простце́мъ, ни́щимъ, князе́мъ, убо́гимъ, бога́тымъ о́бще, во́ду излива́яй Исто́чниче — разли́чное исцѣле́ніе.

Конда́къ Па́сцѣ: Аще и во гро́бъ снизше́лъ еси́...

Сѣда́ленъ, гла́съ 8. Подо́бенъ: Прему́дрости сло́ва.

Приснотеку́щій Исто́чникъ и живо́тный, источа́яй струя́ боже́ственный то́къ согла́сно восхва́лимъ, благода́ти прося́ще: на кíйждо бо де́нь источа́етъ исцѣле́нія, я́ко рѣ́къ тече́нія показу́яй малѣ́йшая. Тѣ́мже, по до́лгу приступа́юще съ любо́вію, вѣ́рно почерпе́мъ отъ исто́чника неисчерпа́емое здра́віе, вои́стинну безсме́ртное, ороша́ющее вѣ́рно благочести́выхъ сердца́, устна́ми возопіи́мъ: Ты́ еси́ вѣ́рныхъ Утѣше́ніе.

Пѣ́снь 4.
На Боже́ственнѣй стра́жи... Му́жескій у́бо по́лъ... Яко единолѣ́тный а́гнецъ... Богооте́цъ у́бо Дави́дъ...

Богоро́дицы подо́бны:

[Υ] Па́че песка́ вои́стинну и ка́плій дожде́вныхъ бы́ша, Богоро́дице, мно́жества исто́чника дѣ́лъ Твои́хъ, непреста́нно теку́щая на всю́ зе́млю бога́тно, и вся́каго боля́ща лю́тѣ ско́ро исцѣля́ющая.

[Κ] На стѣсне́нный жены́ отъ карки́на сосе́цъ вода́ возлива́ется, Дѣ́во, исто́чника Твоего́, Влады́чице, и а́біе преста́ша стра́сти смертоно́сныя струе́ю, и карки́нъ про́сто изы́ти позна́.

[Α] Недомы́слимое въ Тебѣ́ и па́че естества́ содѣ́янное е́сть я́вственно, Богоро́дице: вода́ бо быва́етъ исто́чника Твоего́ исцѣле́ніе, неду́гомъ смертоно́снымъ проти́вное, его́же естество́ я́вѣ никогда́же вѣ́дяше.

[Λ] При́сно умерщвля́етъ мя́ вра́гъ сла́стными прило́ги, Влады́чице Исто́чниче Богоро́дице; не пре́зри, предвари́, ско́рая По́моще, сего́ же сѣ́тей мя́ изба́ви, да воспою́ Тя при́сно многопѣ́тую.

Пѣ́снь 5.
Утренюемъ у́треннюю... Безмѣ́рное Твое́ благоутро́біе... Присту́пимъ, свѣщено́сніи...

Богоро́дицы подо́бны:

[Λ] Глаго́ланная, Дѣ́во Отрокови́це, исто́чника Твоего́ вои́стинну чудеса́ ужаса́ютъ человѣ́ковъ помышле́ніе: па́че бо естества́ су́ть, вся́ вѣ́рныя освяща́ющая.

[Ι] Повѣствова́ руно́, ма́нна, и Силоа́мъ, и ка́мень точа́щь, Соломо́новъ притво́ръ, благода́ть Твою́, Іорда́нскія во́ды, и исто́чникъ Самаряны́ни.

[Σ] Ка́пли Твоя́, Отрокови́це Дѣ́во, я́же исто́чника, и ме́ртваго оживи́ша — па́че сло́ва содѣ́янное и смы́сла: вся́ бо Твоя́, Всечи́стая, сло́во побѣжда́ютъ человѣ́ческое.

[Τ] Стра́сти моя́, Отрокови́це, исцѣли́, кровотече́нія исто́чникъ изсуша́ющи, и лю́тое пла́мене возжже́ніе, и здра́вія преложе́ніе, исхо́довъ сою́зъ, и чревотече́ніе.

Пѣ́снь 6.
Снизше́лъ еси́ въ преиспо́дняя... Сохрани́въ цѣ́ла зна́менія... Спа́се мо́й, живо́е же и неже́ртвенное...

Богоро́дицы подо́бны:

[Ο] Словеса́ Сло́ва, я́ко вои́стинну Исто́чника, воспѣва́емъ Тя́, Чи́стая: прему́дрости бо Глубину́ я́ко па́че сло́ва ражда́еши, Повѣ́сивша на возду́сѣ тече́нія и зе́млю на водѣ́.

[Υ] Подшла́ еси́ лѣ́ствицъ несе́ніе, отъе́млющее сокруше́ніе и́же та́мо живопи́сцевъ, о Всесвяты́й Исто́чниче, спаса́яй лю́ди отъ тру́са до́му па́дшія.

[Τ] Утро́бы неродя́щія непло́дствомъ пре́жде, разрѣша́еши я́вѣ исто́чника Твоего́ струя́ми, и́бо, я́ко роди́вшая Влады́ку всѣ́хъ, и рожде́нія подае́ши.

[Ο] Ни сло́во, ни у́мъ, ниже́ язы́къ Твое́ возмо́гутъ, Чи́стая, рождество́ похвали́ти, но немощству́ютъ въ Тебѣ́, и облича́ется филосо́фовъ че́стность и ри́торовъ красота́.

Конда́къ, гла́съ 8. Подо́бенъ: Взбра́нной.

Отъ неистощи́мыя Ты́, исто́чниче Богоблагода́тный, подае́ши ми́, точа́щи во́ды Твоея́ благода́ти, приснотеку́щій па́че сло́ва, я́ко бо Сло́во ро́ждшая па́че смы́сла, молю́ Ти ся, ороси́ мя благода́тію, да зову́ ти: ра́дуйся, Водо́ спаси́тельная.

Икосъ:

Нескве́рная Богоро́дице, ро́ждшая Сло́во Отчее, пре́жде вѣ́къ нетлѣ́нно ро́ждшееся, разшири́ моя́ уста́, Чи́стая, спривнося́щи мя́ къ Твоему́ похвале́нію, я́ко да восхвалю́ Тя́, зовы́й исто́чнику Твоему́ сія́: Ра́дуйся, исто́чниче ра́дости непрестае́мыя; ра́дуйся, то́че добро́ты неизрече́нныя. Ра́дуйся, неду́говъ разли́чныхъ разрѣше́ніе; ра́дуйся, страсте́й вся́кихъ потопле́ніе. Ра́дуйся, струе́ свѣтови́днѣйшая, здра́вы творя́щая вѣ́рныя; ра́дуйся, водо́ благода́тнѣйшая неду́гующимъ многоразли́чно. Ра́дуйся, ча́ше ма́нны живото́чныя; ра́дуйся, ба́не и не́ктарю богоизлія́нный. Ра́дуйся, водо́ прему́дрости, невѣ́дѣніе отъе́млющая; ра́дуйся, растворе́ніе се́рдца, пи́щу боже́ственную излива́ющее. Ра́дуйся, приста́нище неможе́нія источа́ющая; ра́дуйся, пла́мень неду́гованія угаша́ющая. Ра́дуйся, Водо́ спаси́тельная.

Синакса́рь на Пресвяту́ю Госпожу́ Влады́чицу Богоро́дицу, Живопріе́мный Исто́чникъ.

Въ пято́къ Свѣ́тлыя седми́цы пра́зднуемъ Обновле́ніе хра́ма Пресвяты́я и Госпожи́ на́шея Богоро́дицы, имену́емаго Живоно́снаго Исто́чника. Еще́ же па́мять твори́мъ изря́дныхъ и па́че естества́ чуде́съ, бы́вшихъ во о́номъ хра́мѣ отъ Богома́тере. Се́й у́бо хра́мъ пе́рвѣе основа́ся отъ царя́ Льва́ Вели́каго, и́же и Маке́лъ именова́ся. Се́й, поне́же бя́ше бла́гъ и смире́нъ человѣ́къ, за до́брое свое́ намѣ́реніе и ми́лостивное, е́же имя́ше, пре́жде не́же бы́ти [ему́] царю́, обрѣта́яйся во о́номъ мѣ́стѣ, обрѣ́те еди́наго человѣ́ка слѣпа́го, не ви́дяща, ка́мо ити́, и, взе́мъ его́ за ру́ку, ведя́ше. Дости́гшима же обои́ма та́мо бли́зъ, идѣ́же бя́ше се́й исто́чникъ, возжада́ слѣпы́й, и моля́ше Льва́, да ороси́тъ его́, и́же, идя́ во вну́треннее о́ное лѣ́са, идѣ́же бя́ше древе́съ и насажде́ній разли́чныхъ испо́лнено, иска́ше воды́, и не обрѣта́яй исто́чника, обраща́шеся а́ки отягча́емь. И слы́шитъ гла́съ, свы́ше глаго́лющь: о Льве́! не уныва́й, зане́ вода́, ея́же и́щеши, бли́зъ тебе́ е́сть, и обрати́ся обрѣсти́ ю́. И Ле́въ у́бо обраща́яйся, и ища́й мно́го, не обрѣ́те ея́. И па́ки слы́шитъ ра́вный пе́рвый гла́съ, и глаго́летъ ему́: царю́ Льве́! вни́ди во вну́треннюю ча́сть загуще́наго сего́ лѣ́са, и возми́ свои́ма рука́ма отъ сея́ му́тныя воды́, и исцѣли́ жа́жду слѣпа́го, и пома́жи и помраче́нныя его́ о́чи, и а́біе позна́еши, ка́я е́смь, и отъ мно́гаго вре́мене живу́ на се́мъ мѣ́стѣ. Ле́въ у́бо сотвори́, я́коже гла́съ повелѣ́ ему́, и а́біе воззрѣ́ слѣпы́й. И по Богома́тере прорече́нію, по ма́лѣ вре́мени бы́сть ца́рь Ле́въ, и созда́ та́мо у исто́чника хра́мъ пе́рвый, бога́тою руко́ю, я́коже зри́тся дне́сь. И, поне́же быва́ху чудеса́ множа́йшая на вся́кій де́нь, по мно́гихъ лѣ́тѣхъ Іустиніа́нъ Вели́кій, самоде́ржецъ Гре́ческій, поне́же пострада́ зѣло́ отъ не́мощи водотру́дія, и обрѣ́те та́мо исцѣле́ніе свое́, хотя́ да́ти воздая́ніе Ма́тери Бо́жіей, па́ки созда́ о́ный пе́рвый хра́мъ, и сотвори́ и́ велича́йшій и краснѣ́йшій, и́же отъ мно́гихъ тру́совъ внегда́ разсѣ́деся. Послѣди́ ца́рь Васи́лій Македо́нскій, и сы́нъ его́, Ле́въ Му́дрый, па́ки созда́ша и испра́виша и́. Во вре́мя и́хъ се́й исто́чникъ мно́га чудеса́ дѣ́йствова: и во́дъ задержа́нія, и пти́сы, и ины́я тмочи́сленныя стра́сти исцѣли́: карки́нскія стра́сти, и кровотече́нія мно́гихъ родо́въ, и́миже стражда́ху царе́вны и ины́я жены́, и разли́чныя огне́вицы, и ины́я болѣ́зни, и я́звы неисцѣ́льныя, и непло́дныя разрѣши́. Яко и цари́ца Зои́, непло́ды су́щи, прія́тъ да́ръ отъ сего́ исто́чника — сы́на Константи́на Порфироге́нита. Воскреси́ же и ме́ртваго, и́же бѣ́ отъ Ѳессалíи и, приходя́ ко свято́му исто́чнику, у́мре на пути́. Егда́ же хотя́ше умре́ти, заповѣ́да кора́бленикомъ взя́ти его́ та́мо во хра́мъ исто́чника, и возлія́ти на него́ три́ ка́ди отъ о́ныя воды́, и тогда́ погребсти́ его́. Еже творя́ще кора́бленицы, и возлива́юще на него́ во́ду, а́біе воскре́се ме́ртвый. По мно́гомъ же вре́мени, хотя́ па́сти вели́кій хра́мъ о́ный, яви́ся Богоро́дица и держа́ше его́, до́ндеже изы́де во́нъ все́ мно́жество люде́й и никто́же вреди́ся. Та́яжде свята́я вода́ пива́ема, мно́гія бѣсну́емыя исцѣли́ и отъ темни́цы человѣ́ки свя́занныя разрѣши́. Исцѣли́ же и царя́ Льва́ отъ каменозая́тія, и жены́ его́ Ѳеофа́ны угаси́ зѣ́льнѣйшую огне́вицу, и бра́та его́ Стефа́на разрѣши́ отъ пти́сныя не́мощи. Дарова́ же и слу́хъ Іоа́нну, патріа́рху Іерусали́мскому. Исцѣли́ еще́ и си́льную огне́вицу патри́кія Тара́сія и ма́тере его́ Магистри́ссы, и сы́на Стиліа́нова исцѣли́ отъ водозадержа́нія. И нѣ́кую жену́, и́менемъ Схи́зину, свободи́ отъ чревоболѣ́нія. И царя́ Рома́на исцѣли́ отъ разрѣше́нія и связа́нія чре́ва та́яжде вода́, подо́бнѣ и жену́ его́. Призва́ніемъ же то́кмо исцѣли́ Всесвята́я мона́ха Пе́перинъ, и ученика́ его́ въ Халде́и. Подо́бнѣ и мона́ха Матфѳе́я и Меле́тія, и́хже оболга́ша царю́, свободи́ отъ гнѣ́ва. Патри́кія же и протоспаѳа́рія, и ины́я тмочи́сленныя кто́ исповѣ́дати мо́жетъ? Нѣ́сть же пра́ведно не воспомина́ти и исцѣле́нія Исхíова. Ниже́ кíй язы́къ мо́жетъ повѣ́дати, ели́ка чудеса́ та́яжде вода́ дѣ́йствова и да́же до дне́сь дѣ́йствуетъ? Па́че ка́плей дожде́вныхъ, и па́че звѣ́здъ небе́сныхъ и листо́въ мно́жества, я́же въ на́ша времена́ ви́дѣхомъ. Еще́ исцѣли́ и ины́я смертоно́сныя болѣ́зни, прока́зы, свербо́ты па́че естества́, и опухле́нія же́нская, и душе́вныя стра́сти мно́гія исцѣли́ и разли́чныя очны́я болѣ́зни. Еще́ же исцѣли́ вара́гга Іоа́нна отъ воднотрудова́нія, и друга́го вара́гга исцѣли́ отъ злы́хъ я́звъ, и священномона́ха Ма́рка отъ о́спы, и каменозая́тія мона́ха Заха́рію. И ина́я множа́йшая чудеса́, я́же не возмо́жно е́сть исчи́слити, я́же дѣ́йствова и дѣ́йствуетъ непреста́нно.

Твоея́ Ма́тере моли́твами, Христе́ Бо́же на́шъ, поми́луй на́съ. Ами́нь.

Воскресе́ніе Христо́во ви́дѣвше.., три́жды. И: Воскре́съ Іису́съ...

Пѣ́снь 7.
Отроки отъ пе́щи Изба́вивый... Жены́ съ мѵ́ры богому́дрыя... Сме́рти пра́зднуемъ умерщвле́ніе... Яко вои́стинну свяще́нная...

Богоро́дицы подо́бны:

[Υ] Почерпи́те, неду́гующіи, исцѣле́нія: Всечи́стая бо то́читъ отъ боже́ственнаго исто́чника сла́дость и́стинную, пото́къ сла́дости вои́стинну врѣ́ющій. Тѣ́мже и вѣ́рою то́ки незави́стныя почерпе́мъ вси́.

[Ξ] Удивля́ютъ слы́шащія, Влады́чице, стра́нная Твоя́ чудеса́ вся́ вѣ́рныя: нѣмы́я бо и глухíя, я́ко благоглаго́ливыя, показу́етъ вода́ Твоя́, стра́ждущія же лю́тѣ врачу́етъ, и исцѣле́ніе да́руетъ.

[Α] Возво́диши отъ пе́щи скорбе́й, ороша́ющи вода́ми отъ стра́ннаго исто́чника приступа́ющія къ Тебѣ́, Чи́стая: карки́нскія бо ра́ны свобожда́ется человѣ́къ, прокаже́нна же исцѣля́еши, и распале́ніе угаси́ла еси́.

[Ν] Юноши и отрокови́цы Влады́чицу, и вси́ человѣ́цы вѣ́рою отъ души́ восхва́лимъ свѣ́тло: сокруше́нія бо гное́вицъ, и вре́ды лука́выхъ, и ото́ки, и разсла́бленнаго исцѣли́.

Пѣ́снь 8.
Се́й нарече́нный и святы́й де́нь... Пріиди́те, но́ваго виногра́да... Возведи́ о́крестъ о́чи твои́... Отче Вседержи́телю...

Богоро́дицы подо́бны:

[Θ] Боже́ственную исто́чникъ и честну́ю во́ду излива́етъ Тво́й, Дѣ́во: водны́хъ бо тече́ніе вспяща́етъ зѣло́, призыва́ніемъ боже́ственнымъ благода́ти. Тѣ́мже Тя́ почита́емъ, Исто́чниче, во вѣ́ки.

[Ο] Вси́ честну́ю живото́чную Во́ду воспои́мъ му́дреннѣ: злодыха́нія бо то́къ по страна́мъ уставля́етъ и свобо́дное твори́тъ происхожде́ніе. Оле, Твои́хъ чуде́съ, Чи́стая Богороди́тельнице!

[Π] Ка́я, Всепѣ́тая, восхва́лятъ уста́ Рождества́ Твоего́ стра́нное? Но и у́мъ кíй бы чуде́съ исто́чникъ изслѣ́довалъ и сло́во изглаго́лало? Нѣ́сть естеству́ крѣ́пость Твои́мъ чуди́тися.

[Ο] Вся́ о Тебѣ́ сме́рти держа́ва разори́ся внеза́пу, о Цари́це и Госпоже́! Ибо Царя́ Безсме́ртнаго, Живо́тъ Ты́ источи́ла еси́, Во́ду, Ма́нну, Христа́ во вѣ́ки.

Пѣ́снь 9.
Свѣти́ся, свѣти́ся... О, Боже́ственнаго, о любе́знаго... О, Па́сха ве́лія и свяще́ннѣйшая...

Богоро́дицы подо́бны:

[Υ] Во́ды вся́ превосхо́дитъ, Отрокови́це Чи́стая, исто́чника Твоего́ вода́, я́вѣ да́рующая свобожде́ніе неду́говъ лю́тыхъ, и душа́мъ вся́кое здра́віе, я́ко па́че естества́ излива́емая.

[Λ] Рѣши́тель неду́говъ но́вый се́, Силоа́мъ исто́чника Твоего́, Дѣ́во, зри́мъ вси́: о́чи бо пріе́млетъ огня́, вси́ же здра́віе при́сно къ животу́ пріе́млемъ.

[Ο] Здра́вія и́щущіи, притецы́те ко исто́чнику: Отрокови́ца бо Дѣ́ва жи́тельствуетъ при водѣ́. Лику́й и весели́ся, вѣ́рныхъ мно́жество, си́це, я́коже подоба́етъ: пріи́детъ къ хра́му и воздая́ніе проше́ній пріе́млетъ.

[Υ] Возвы́сися исто́чника Твоего́ вода́ вы́ше небе́съ, и земли́ бе́здны то́ки претече́: сія́ е́сть пи́ща души́, питіе́ вѣ́рныхъ, ме́дъ изъ ка́мене, и ма́нны раздая́ніе.

[Ε] Весели́ши, Дѣ́во, царя́ преесте́ственнѣ, источа́ющи благода́ть отъ исто́чника присносу́щную, сему́ подава́ющи на враги́ крѣ́пость, побѣ́ды при́сно, здра́віе и ми́ръ, и проше́ній исполне́ніе.

Ексапостила́рій пра́зднику: Пло́тію усну́въ... И Исто́чнику, подо́бенъ:

Исто́чникъ еси́ вои́стинну воды́ живы́я, Влады́чице: измыва́еши у́бо неду́ги ду́шъ и тѣле́съ лю́тыя, прикоснове́ніемъ Твои́мъ еди́нымъ то́кмо, Во́ду спасе́нія — Христа́ излива́ющи.

На хвали́техъ: Вся́кое дыха́ніе.., поста́вимъ стихо́въ 8, и пое́мъ стихи́ры осмогла́сника 4, гла́съ 6:

Кре́стъ Тво́й, Го́споди, жи́знь и воскресе́ніе лю́демъ Твои́мъ е́сть; и на́нь надѣ́ющеся, Тебе́, воскре́сшаго Бо́га на́шего пое́мъ, поми́луй на́съ!

Погребе́ніе Твое́, Влады́ко, ра́й отве́рзе человѣ́ческому ро́ду; и отъ тли́ изба́вльшеся, Тебе́, воскре́сшаго Бо́га на́шего пое́мъ, поми́луй на́съ!

Со Отце́мъ и Ду́хомъ Христа́ воспои́мъ, воскре́сшаго изъ ме́ртвыхъ, и къ Нему́ возопіи́мъ: Ты́ еси́ Жи́знь на́ша и Воскресе́ніе, поми́луй на́съ!

Тридне́венъ воскре́слъ еси́, Христе́, изъ гро́ба, я́коже е́сть пи́сано, совоздви́гнувый пра́отца на́шего. Тѣ́мже Тя́ и сла́витъ ро́дъ человѣ́ческій, и пое́тъ Твое́ воскресе́ніе.

И Богоро́дицы стихи́ры, гла́съ 2. Подо́бенъ: До́ме Евфра́ѳовъ.

Вода́ исто́чника спаси́тельная е́сть всѣ́мъ немощству́ющимъ: присту́пимъ вѣ́рою, благода́ть почерпе́мъ.

Кла́дязь живото́чный Исто́чника безсме́ртнаго приступа́ющимъ любо́вію исцѣле́ній подае́тъ излія́ніе неисчерпа́емое.

[Сти́хъ: Освяти́лъ е́сть селе́ніе Свое́ Вы́шній.]

Укрѣпля́етъ ду́ши вода́ Дѣ́выя: и́же въ скве́рнахъ страсте́й, притеце́мъ ко Отрокови́цѣ, и сія́ измы́емъ.

[Сти́хъ: Рѣ́чная устремле́нія веселя́тъ гра́дъ Бо́жій.]

Ру́чка свяще́нная, и Ма́нна незави́стная изъ пречи́стыя утро́бы излива́етъ Влады́ку: потре́бу вся́ческую почерпе́мъ.

И стихи́ры Па́схи, по обы́чаю и́хъ. Ектеніи́ и отпу́стъ. И ча́съ пе́рвый. Часы́ Па́схи.




НА ЛИТУРГІИ,

Антифо́ны Па́схи. Проки́менъ дне́, гла́съ 8: Во всю́ зе́млю изы́де вѣща́ніе и́хъ, и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь. И Богоро́дицы, [гла́съ 3, пѣ́снь Богоро́дицы]: Вели́читъ душа́ Моя́ Го́спода, [и возра́довася ду́хъ Мо́й о Бо́зѣ, Спа́сѣ Мое́мъ]. Апостолъ Дѣяній, зачало 7: Вку́пѣ Пе́тръ и Іоа́ннъ... И Богоро́дицы, къ Филипписíемъ, зача́ло 240. Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, [и́бо и́стину Твою́ въ це́ркви святы́хъ]. Сти́хъ: Бо́гъ прославля́емь въ совѣ́тѣ святы́хъ. [И Богоро́дицы, гла́съ 8:] Слы́ши Дщи́ и ви́ждь, и приклони́ у́хо Твое́. Ева́нгеліе дне [отъ Іоа́нна, зача́ло 7.] И Богороди́цы, отъ Луки́, зача́ло 54. Прича́стный: Тѣ́ло Христо́во пріими́те, [исто́чника безсме́ртнаго вкуси́те]. И Богоро́дицѣ: [Ча́шу спасе́нія пріиму́, и и́мя Госпо́дне призову́].

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 19 – 25.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.