Церковный календарь
Новости


2017-11-17 / russportal
Ген. П. Н. Красновъ. "Старая Академія". Глава 6-я (1932)
2017-11-17 / russportal
Ген. П. Н. Красновъ. "Старая Академія". Глава 5-я (1932)
2017-11-17 / russportal
Ген. П. Н. Красновъ. №100 (Къ юбилею "Часового") (1933)
2017-11-17 / russportal
Генералъ П. Н. Красновъ. Подъ какимъ лозунгомъ? (1933)
2017-11-17 / russportal
Слова преп. Симеона Новаго Богослова. Слово 36-е (1882)
2017-11-17 / russportal
Слова преп. Симеона Новаго Богослова. Слово 35-е (1882)
2017-11-16 / russportal
П. Н. Красновъ. Казаки. (Изъ стараго разсказа) (1933)
2017-11-15 / russportal
Основатель и Верх. Руководитель Добров. Арміи Ген. М. В. Алексѣевъ (1919)
2017-11-15 / russportal
П. Н. Красновъ. "Старая Академія". Глава 4-я (1932)
2017-11-15 / russportal
П. Н. Красновъ. "Старая Академія". Глава 3-я (1932)
2017-11-15 / russportal
Приказъ №900 Верх. Главнокоманд. генерала Корнилова (29 августа 1917 года)
2017-11-15 / russportal
Приказъ №897 Верх. Главнокоманд. генерала Корнилова (28 августа 1917 года)
2017-11-15 / russportal
Воззваніе генерала Корнилова къ казакамъ (28 августа 1917 года)
2017-11-15 / russportal
Обращеніе генерала Корнилова къ народу (28 августа 1917 года)
2017-11-14 / russportal
Преп. Епифаній Премудрый. Житіе преп. Сергія Радонежскаго. Глава 11-я (1903)
2017-11-14 / russportal
Преп. Епифаній Премудрый. Житіе преп. Сергія Радонежскаго. Глава 10-я (1903)
Новости въ видѣ
RSS-канала: .
Сегодня - пятница, 17 ноября 2017 г. Сейчасъ на порталѣ посѣтителей - 13.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ПОНЕДѢЛЬНИКЪ ВТОРЫЯ СЕДМИЦЫ ПО ПАСЦѢ.

ВЪ НЕДѢЛЮ АНТИПАСХИ ВЕЧЕРА.

Благослови́вшу іере́ю, глаго́лемъ: Христо́съ воскре́се.., три́жды. Та́же: Трисвято́е, [и] по Отче на́шъ... Го́споди поми́луй, 12. Сла́ва, и ны́нѣ. Пріиди́те поклони́мся.., три́жды. И глаго́лемъ 9-й ча́съ обы́чный трипса́лмный. Тропа́рь и конда́къ пра́здника. Та́же пое́мъ вече́рню безъ каѳи́смы. Го́споди воззва́хъ... пое́мъ во гла́съ 1.Стихи́ры на 6.

Пра́здника 3, гла́съ 1. Подо́бенъ: Прехва́льніи му́ченицы...

По е́же изъ гро́ба Твое́мъ стра́шномъ, Жизнода́вче, воста́ніи, я́коже печа́тей не разруши́лъ еси́, Христе́, гро́бныхъ, та́ко заключе́ннымъ две́ремъ вше́лъ еси́ къ пресла́внымъ апо́столомъ Твои́мъ, радостотворя́ и́хъ, и пра́вый Тво́й Ду́хъ подая́ и́мъ, за безмѣ́рную Твою́ ми́лость.

Ѳома́, и́же и Близне́цъ, не бѣ́ прише́лъ, егда́ Ты́ ученико́мъ яви́лся еси́, Го́споди. Тѣ́мже не вѣ́рова Твоему́ Воскресе́нію и ви́дѣвшимъ Тя́ вопія́ше: а́ще не вложу́ пе́рста въ ре́бра Его́ и гвозде́й я́звы, не вѣ́рую, я́ко воста́лъ е́сть.

Якоже хо́щеши, осяжи́, — Христо́съ Ѳомѣ́ вопія́ше, — вложи́ ру́ку и позна́й Мя, ко́сти иму́ща и земно́е тѣ́ло, и не бу́ди невѣ́ренъ, ра́вно же со инѣ́ми увѣ́рися. Онъ же возопи́: Бо́гъ мо́й и Госпо́дь Ты́ еси́, сла́ва воста́нію Твоему́!

И свята́го мине́и подо́бны 3. Сла́ва: свята́го. Аще ли ни́:
Сла́ва, и ны́нѣ: пра́здника, гла́съ 1:

Две́ремъ заключе́ннымъ, ученико́мъ собра́ннымъ, вше́лъ еси́ внеза́пу, всеси́льне Іису́се, Бо́же на́шъ, и, ста́въ посредѣ́ и́хъ, ми́ръ да́въ, испо́лнилъ еси́ Свята́го Ду́ха; жда́ти же повелѣ́лъ еси́ и ника́коже разлуча́тися отъ Іерусали́ма, до́ндеже облеку́тся е́же съ высоты́ си́лою. Тѣ́мже вопіе́мъ Ти́: просвѣще́ніе, и воскресе́ніе, и ми́ре на́шъ, сла́ва Тебѣ́!

Вхо́дъ. Свѣ́те Ти́хій...

Проки́менъ вели́кій, гла́съ 7: Кто́ Бо́гъ ве́лій, я́ко Бо́гъ на́шъ? Ты́ еси́ Бо́гъ творя́й чудеса́. Сти́хъ: Сказа́лъ еси́ въ лю́дехъ си́лу Твою́. Сти́хъ: И рѣ́хъ: ны́нѣ нача́хъ, сія́ измѣ́на десни́цы Вы́шняго. Сти́хъ: Помяну́хъ дѣла́ Госпо́дня, [я́ко помяну́ отъ нача́ла чудеса́ Твоя́]. И па́ки: Кто́ Бо́гъ ве́лій, я́ко Бо́гъ на́шъ? [И мы́:] Ты́ еси́ Бо́гъ творя́й чудеса́.

Та́же ектенія́: Рце́мъ вси́... И Сподо́би Го́споди въ ве́черъ се́й... И ектенія́: Испо́лнимъ вече́рнюю моли́тву на́шу Го́сподеви.

На стихо́внѣ стихи́ра воскре́сна осмогла́сника, гла́съ 1:

Вече́рняя на́ша моли́твы пріими́, Святы́й Го́споди, и пода́ждь на́мъ оставле́ніе грѣхо́въ, я́ко Еди́нъ еси́, явле́й въ мíрѣ Воскресе́ніе.

Сти́хъ: Къ Тебѣ́ возведо́хъ о́чи мо́и, [Живу́щему на небеси́. Се́ я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́].

Умили́тельный: Яко пучи́на ве́лія прегрѣше́ній мои́хъ, Спа́се, и лю́тѣ погружа́юся согрѣше́ньми мои́ми, да́ждь ми́ ру́ку, я́ко Петро́ви, спаси́ мя́, Бо́же, и поми́луй мя́.

Сти́хъ: Поми́луй на́съ, Го́споди, поми́луй на́съ, [я́ко по мно́гу испо́лнихомся уничиже́нія, наипа́че напо́лнися душа́ на́ша поноше́нія гобзу́ющихъ и уничиже́нія го́рдыхъ].

Му́чениченъ: Моли́твами, Го́споди, всѣ́хъ святы́хъ и Богоро́дицы, Тво́й ми́ръ да́ждь на́мъ, и поми́луй на́съ, я́ко еди́нъ Ще́дръ.

Сла́ва, и ны́нѣ, гла́съ 1:

По дне́хъ осми́хъ воста́нія Твоего́, Го́споди, яви́лся еси́ ученико́мъ Твои́мъ на мѣ́стѣ, идѣ́же бя́ху со́брани, и, возгласи́въ и́мъ, — ми́ръ ва́мъ! — невѣ́рующему ученику́ ру́цѣ показа́лъ еси́ и пречи́стое ребро́. Онъ же, вѣ́ровавъ, вопія́ше Тебѣ́: Госпо́дь мо́й и Бо́гъ мо́й, сла́ва Тебѣ́!

По Трисвято́мъ тропа́рь пра́здника. Аще ли тропа́рь свята́го, рцы́ его́ пре́жде. Пото́мъ Сла́ва, и ны́нѣ, пра́зднику: Запеча́тану гро́бу... И отпу́стъ. Си́це у́бо быва́етъ вослѣ́дованіе вече́рнямъ во вся́ недѣ́ли святы́я Пентико́стіи.

[Зри́:] Отъ дне́сь глаго́лемъ повече́ріе ма́лое. И пое́мъ кано́нъ моле́бный Пресвяты́я Богоро́дицы во окто́ихѣ. И трипѣ́снцы тріо́ди дне́, творе́ніе господи́на Іо́сифа. Идѣ́же глаго́лемъ трипѣ́сно, Богоро́дицы пѣ́снь кано́на оставля́ется. По Досто́йнѣ... и по Отче на́шъ... глаго́лемъ конда́къ пра́здника во всю́ Пятдеся́тницу. Въ литургíяхъ же пое́тся на блаже́ннахъ, отъ кано́на пра́здника недѣ́ли, пѣ́снь рядова́я на кíйждо де́нь со ирмосо́мъ на 6, си́це: въ понедѣ́льникъ — 1-я, во вто́рникъ — 4-я, въ сре́ду — 5-я, въ четверто́къ — 7-я, въ пято́къ — 8-я, въ суббо́ту — 9-я.



ВЪ ПОНЕДѢЛЬНИКЪ 2-Я СЕДМИЦЫ АНТИПАСХИ НА УТРЕНИ.

Повнегда́ сотвори́ти іере́ю нача́ло: Сла́ва Святѣ́й.., глаго́лемъ: Христо́съ воскре́се.., три́жды, ти́химъ гла́сомъ. Сіе́ бо глаго́лемъ нача́ло: Христо́съ воскре́се.., въ часѣ́хъ, и вече́рняхъ и повече́ріяхъ, отъ сея́ у́трени недѣ́ли Антипа́схи, да́же и до Вознесе́нія Госпо́дня. [Ка́ко у́бо не извѣсти́ся о полу́нощницѣ, я́вѣ, я́ко въ ке́лліяхъ, мню́, се́й бы́ти пѣва́емѣй, поне́же у́бо и та́мо си́це нача́ло быва́етъ.] И а́біе по Христо́съ воскре́се... Сла́ва въ вы́шнихъ Бо́гу, и на земли́ ми́ръ... И обы́чное шестопса́лміе. Ектенія́ вели́кая. Та́же: Бо́гъ Госпо́дь.., во гла́съ 7. Тропа́рь пра́зднику: Запеча́тану гро́бу.., три́жды. [Зри́:] Се́й тропа́рь глаго́лется чрезъ всю́ седми́цу. И стихосло́вимъ каѳи́смы двѣ́, а тре́тія рядова́я на вече́рни. И та́ко пое́мъ псалти́рь до 21 септе́мврія.

По 1-мъ стихосло́віи сѣда́ленъ воскре́сенъ, гла́съ 1:

Гро́бъ Тво́й, Спа́се, во́ини стрегу́щіи, ме́ртви отъ облиста́нія я́вльшагося а́нгела бы́ша, проповѣ́дающа жена́мъ Воскресе́ніе. Тебе́ сла́вимъ, тли́ Потреби́теля, Тебѣ́ припа́даемъ, Воскре́сшему изъ гро́ба и Еди́ному Бо́гу на́шему.

Сти́хъ: Го́споди, да не я́ростію Твое́ю обличи́ши мене́, ниже́ гнѣ́вомъ Твои́мъ нака́жеши мене́.

Умили́тельный: Въ беззако́ніихъ зача́тъ е́смь а́зъ блу́дный, не смѣ́ю воззрѣ́ти на высоту́ небе́сную, но дерза́я на человѣколю́біе Твое́, зову́: Бо́же, очи́сти мя́ грѣ́шнаго и спаси́ мя́.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Му́чениченъ: Страда́нія похвало́ю и вѣнце́въ досто́инствомъ сла́вніи страстоте́рпцы одѣ́яшася Тобо́ю, Го́споди: терпѣ́ніемъ бо ра́нъ беззако́нныя побѣди́ша и си́лою Боже́ственною съ небесе́ побѣ́ду прія́ша. Тѣ́хъ моли́твами свободи́ отъ неви́димаго врага́, Спа́се, и спаси́ мя́.

Сла́ва, и ны́нѣ, богоро́диченъ:

Чу́до чуде́съ, Благода́тная, въ Тебѣ́ зря́щи, тва́рь ра́дуется: зачала́ бо еси́ безсѣ́менно и родила́ еси́ неизрече́нно, Его́же чинонача́лія а́нгеловъ ви́дѣти не мо́гутъ. Того́, я́ко Бо́га, моли́ о душа́хъ на́шихъ.

Та́же чте́ніе въ толкова́ніи Іоа́нна Ева́нгелія.

По 2-мъ стихосло́віи сѣда́ленъ, гла́съ 1. Подо́бенъ: Гро́бъ Тво́й.

Прикосну́выйся руко́ю ре́бромъ нестерпи́мымъ Близне́цъ Ѳома́, не опали́ся прикоснове́ніемъ, но пребы́сть, я́звы осяза́я извѣ́стнѣе и вѣща́я на́съ ра́ди Прободе́нному: Ты́ мо́й Госпо́дь и Бо́гъ мо́й еси́, а́ще и Стра́сть претерпѣ́лъ еси́.

Сла́ва, и ны́нѣ: то́йже. И чте́ніе.
Та́же: Воскресе́ніе Христо́во ви́дѣвше.., еди́ножды. И псало́мъ 50-й.

[Зри́:] Си́це бо твори́мъ до Вознесе́нія Госпо́дня. [Ниже́ Го́сподеви пое́мъ... глаго́лемъ, но глаго́лемъ, я́коже написа́ся во ирмоло́гіяхъ.] Нача́ло же твори́мъ отъ ирмосо́въ, и́хже и повторя́емъ, пою́ще и тропари́ на 6. И свята́го мине́и на 4. По 3-й пѣ́сни: конда́къ и сѣда́ленъ свята́го. Сла́ва, и ны́нѣ: Сѣда́ленъ пра́зднику. По 6-й пѣ́сни: Конда́къ пра́зднику и и́косъ. И стихосло́вимъ Честнѣ́йшую... По 9-й пѣ́сни: Ексапостила́рій пра́зднику, два́жды. Сла́ва: свята́го, а́ще е́сть. И ны́нѣ: пра́здника, другíй свѣти́ленъ.

На хвали́техъ поста́вимъ стихи́ры 3 осмогла́сника, на 4, гла́съ 1:

Пое́мъ Твою́, Христе́, спаси́тельную Стра́сть и сла́вимъ Твое́ Воскресе́ніе. [Два́жды.]

Умили́тельный: Ины́й тебе́ мíръ, душе́, ожида́етъ и Судія́ хо́щетъ твоя́ обличи́ти та́йная и лю́тая. Не пребу́ди у́бо въ здѣ́шнихъ, но предвари́, вопію́щи Судіи́: Бо́же, очи́сти мя́ и спаси́ мя́.

Му́чениченъ: Страстоте́рпцы Христо́вы, пріиди́те, лю́діе, вси́ почти́мъ пѣ́сньми и пѣ́ніи духо́вными, свѣти́ла мíра и проповѣ́дники вѣ́ры, исто́чникъ приснотеку́щій, изъ него́же истека́ютъ вѣ́рнымъ исцѣле́нія. Тѣ́хъ моли́твами, Христе́ Бо́же на́шъ, ми́ръ да́руй мíрови и душа́мъ на́шимъ ве́лію ми́лость.

Сла́ва, и ны́нѣ, гла́съ 1:

Ѳома́, глаго́лемый Близне́цъ, не бѣ́ съ ни́ми, егда́ вше́лъ еси́, Христе́, заключе́ннымъ две́ремъ. Тѣ́мже и не вѣ́роваше рече́ннымъ ему́, отъ невѣ́рія въ вѣ́ру извѣству́я. Не несподо́билъ же еси́, Бла́же, показа́ти ему́ пречи́стое ребро́ Твое́, и руку́ и ногу́ я́звы. Онъ же, осяза́въ и ви́дѣвъ, исповѣ́да Тя́ бы́ти Бо́га не на́га, и Человѣ́ка не про́ста, и вопія́ше: Госпо́дь мо́й и Бо́гъ мо́й, сла́ва Тебѣ́!

Та́же: Сла́ва Тебѣ́, показа́вшему на́мъ свѣ́тъ... И ектенія́: Испо́лнимъ у́треннюю моли́тву на́шу...

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Устна́ми чи́стыми по́йте со а́нгелы, человѣ́цы, Воскре́сшаго тридне́вно изъ гро́ба и мíръ совоздви́гшаго.

Сти́хъ: Похвали́, Іерусали́ме, Го́спода, хвали́ Бо́га твоего́, Сіо́не.

Яви́лся еси́ свяще́ннымъ Твои́мъ, Спа́се, апо́столомъ, две́ремъ заключе́ннымъ, тѣ́ми обновля́я на́мъ Боже́ственный Тво́й Ду́хъ.

Сти́хъ: Яко укрѣпи́ вереи́ вра́тъ твои́хъ, и благослови́ сы́ны твоя́ въ тебѣ́.

Ны́нѣ Тя́, Всецарю́, ви́дѣвше не очи́ма, но серде́чною любо́вію, Бо́га вѣ́ровавше, въ пѣ́ніихъ велича́емъ.

Сла́ва: свята́го, а́ще е́сть. И ны́нѣ, гла́съ 1:

Ученико́мъ сомня́щимся, во осмы́й де́нь предста́ Спа́съ, идѣ́же бя́ху со́брани, и, ми́ръ да́въ, Ѳомѣ́ возопи́: пріиди́, апо́столе, осяжи́ дла́ни, въ ни́хже гво́здія вонзо́ша. О, до́брое невѣ́ріе Ѳомино́! Вѣ́рныхъ сердца́ въ позна́ніе приведе́, и со стра́хомъ возопи́: Госпо́дь мо́й и Бо́гъ мо́й, сла́ва Тебѣ́!

Тропа́рь пра́здника: Запеча́тану гро́бу... Та́же ектенія́: Поми́луй на́съ, Бо́же... Посе́мъ іере́й: Сы́й благослове́нъ Христо́съ, Бо́гъ на́шъ... Ли́къ: Утверди́, Бо́же... И а́біе совокупля́емъ ча́съ пе́рвый, трипса́лмный, по обы́чаю. Тропа́рь и конда́къ пра́здника и свята́го. Аще же свята́го на 4: конда́къ глаго́лется пра́здника непремѣ́нно, а свята́го конда́къ не глаго́лется. И быва́етъ соверше́нный отпу́стъ. И обы́чная литíя въ притво́рѣ.

[Зри́:] Начина́емъ же отъ дне́сь и междоча́сія часо́въ, по послѣ́довавшему уста́ву. Подоба́етъ же вѣ́дати, я́коже написа́ся здѣ́ вослѣ́дованіе въ недѣ́лю ве́чера во свѣти́льничномъ и въ понедѣ́льникъ во у́трени, си́це да быва́етъ во всѣ́хъ седми́цахъ до Вознесе́нія Госпо́дня, измѣня́емымъ стихи́рамъ осмогла́сника и сѣда́льномъ, по обы́чаю.



НА ЛИТУРГІИ,

Блаже́нна тріо́ди, пѣ́снь 1-я пра́здника, на 6. И отъ сего́ дне́ во всю́ Пятдеся́тницу. По вхо́дѣ: тропа́рь пра́здника: Запеча́тану гро́бу.., и хра́ма Богоро́дицы, и хра́ма свята́го. Посе́мъ настоя́щаго свята́го, а́ще е́сть. Та́же конда́къ хра́ма свята́го. Сла́ва: свята́го. И ны́нѣ: пра́здника: Любопы́тною десни́цею... Хра́ма же Христо́ва и Богоро́дицы конда́къ во всю́ Пятдеся́тницу не глаго́лемъ. Проки́менъ Апо́стола, гла́съ 3: Ве́лій Госпо́дь на́шъ, и ве́лія крѣ́пость Его́,* и ра́зума Его́ нѣ́сть числа́. Сти́хъ: Хвали́те Го́спода, я́ко бла́гъ [псало́мъ, Бо́гови на́шему да услади́тся хвале́ніе]. Апо́столъ Дѣя́ній, зача́ло 9: Рече́ Пе́тръ къ лю́демъ: пока́йтеся... Аллилу́ія, гла́съ 8: Пріиди́те, возра́дуемся Го́сподеви, [воскли́кнемъ Бо́гу Спаси́телю на́шему]. Сти́хъ: Яко Бо́гъ, ве́лій Госпо́дь, и Ца́рь ве́лій по все́й земли́. Ева́нгеліе Іоа́нна, зача́ло 6: Бра́къ бы́сть въ Ка́нѣ Галиле́йстѣй... Прича́стенъ: Похвали́, Іерусали́ме, Го́спода, [хвали́ Бо́га твоего́, Сіо́не]. И во всю́ седми́цу та́ко твори́мъ и во всю́ 50-цу во вся́ недѣ́ли. И про́чее послѣ́дованіе литургíи. И отпу́стъ.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 33 об. – 36.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.