Церковный календарь
Новости


2017-05-22 / russportal
"Тріодь Цвѣтная". Служба въ пятокъ 7-й седмицы. Отданіе Вознесенія (1864)
2017-05-22 / russportal
"Тріодь Цвѣтная". Служба въ четвертокъ 7-й седмицы по Пасхѣ (1864)
2017-05-22 / russportal
«Проповѣдн. хрестоматія». Поученіе (2-е) на память свт. Николая Чудотворца (1965)
2017-05-22 / russportal
«Проповѣдн. хрестоматія». Поученіе (1-е) на память свт. Николая Чудотворца (1965)
2017-05-22 / russportal
«Проповѣдн. хрестоматія». Поученіе на память св. пророка Исаіи. (1965)
2017-05-22 / russportal
Еп. Григорій (Граббе). Догматъ о Церкви въ современномъ мірѣ (1975)
2017-05-21 / russportal
"Тріодь Цвѣтная". Служба въ среду 7-й седмицы по Пасхѣ (1864)
2017-05-21 / russportal
"Тріодь Цвѣтная". Служба во вторникъ 7-й седмицы по Пасхѣ (1864)
2017-05-21 / russportal
Прот. Григорій Дьяченко. Три поученія на перенес. мощей свт. Николая Чудотворца (1900)
2017-05-21 / russportal
Прот. Григорій Дьяченко. Поученіе въ день св. ап. и еванг. Іоанна Богослова (1900)
2017-05-20 / russportal
"Тріодь Цвѣтная". Служба въ понедѣльникъ 7-й седмицы по Пасхѣ (1864)
2017-05-20 / russportal
"Тріодь Цвѣтная". Служба въ недѣлю 7-ю по Пасхѣ (свв. отецъ, иже въ Никеи) (1864)
2017-05-19 / russportal
Архіеп. Аверкій (Таушевъ). Высокопр. Іосифъ, митр. Скоплянскій (1975)
2017-05-19 / russportal
Архіеп. Аверкій (Таушевъ). Хранимъ ли мы завѣты св. кн. Владиміра? (1975)
2017-05-18 / russportal
Архіеп. Аверкій (Таушевъ). Обращеніе къ русской молодежи (1975)
2017-05-18 / russportal
Архіеп. Аверкій (Таушевъ). Оцерковленіе жизни (практ. указанія) (1975)
Новости въ видѣ
RSS-канала: .
Сегодня - вторникъ, 23 мая 2017 г. Сейчасъ на порталѣ посѣтителей - 13.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ПЯТОКЪ ВТОРЫЯ СЕДМИЦЫ ПО ПАСЦѢ.

ВЪ ЧЕТВЕРТОКЪ ВТОРЫЯ СЕДМИЦЫ ВЕЧЕРА,
На Го́споди воззва́хъ... поста́вимъ стихо́въ 6 и пое́мъ стихи́ры подо́бны, гла́съ 1. Подо́бенъ: Небе́сныхъ чино́въ.

Пра́вды оде́ждею обложе́ни бѣ́лою па́че снѣ́га, въ настоя́щій Па́схи де́нь возвесели́мся, въ о́ньже Христо́съ, я́ко Пра́вды Со́лнце, отъ ме́ртвыхъ возсія́въ, всѣ́хъ на́съ нетлѣ́ніемъ уясни́.

Ца́рь и госпо́дь, пра́здниковъ пра́здникъ ны́нѣшній е́сть де́нь, его́же вои́стинну сотвори́ Госпо́дь, въ о́нь, я́коже пое́тъ Дави́дъ, та́инственно возвесели́мся, лю́діе, две́ремъ бо заключе́ннымъ ученико́мъ ми́ръ дарова́.

Ѳомино́ невѣ́ріе міроспаси́тельное Богочеловѣ́ка Сло́ва е́же отъ а́довы темни́цы Воста́ніе увѣря́етъ, я́звы ру́къ и но́гъ де́рзостнѣе осяза́вшее ко увѣре́нію мірско́му десни́цею любопы́тною.

И мине́и 3. Сла́ва, и ны́нѣ, гла́съ 2:

Две́ремъ заключе́ннымъ, предста́въ Іису́съ ученико́мъ, безстра́шіе и ми́ръ дая́ше, та́же глаго́летъ Ѳомѣ́: почто́ Ми́ не вѣ́руеши, я́ко воскресо́хъ изъ ме́ртвыхъ? Принеси́ сѣ́мо ру́ку твою́ и вложи́ въ ре́бра Моя́, и ви́ждь. Тебѣ́ бо невѣ́рующу, вси навыко́ша Стра́сти и Воскресе́ніе Мое́ зва́ти съ тобо́ю: Госпо́дь мо́й и Бо́гъ мо́й, сла́ва Тебѣ́!

Свѣ́те Ти́хій...

На стихо́внѣ стихи́ры, гла́съ 1:

Кре́стная: Неразруши́мая стѣна́ на́мъ е́сть честны́й Кре́стъ Спа́совъ: на́нь бо надѣ́ющеся, спаса́емся вси́.

Сти́хъ: Къ Тебѣ́ возведо́хъ о́чи мо́и, [Живу́щему на небеси́. Се́ я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́].

Воскре́сна: Вече́рняя на́ша моли́твы пріими́, Святы́й Го́споди, и пода́ждь на́мъ оставле́ніе грѣхо́въ, я́ко Еди́нъ еси́, явле́й въ мíрѣ Воскресе́ніе.

Сти́хъ: Поми́луй на́съ, Го́споди, поми́луй на́съ, [я́ко по мно́гу испо́лнихомся уничиже́нія, наипа́че напо́лнися душа́ на́ша поноше́нія гобзу́ющихъ и уничиже́нія го́рдыхъ].

Му́чениченъ: Моли́твами, Го́споди, всѣ́хъ святы́хъ и Богоро́дицы, Тво́й ми́ръ да́ждь на́мъ, и поми́луй на́съ, я́ко еди́нъ Ще́дръ.

Сла́ва, и ны́нѣ, гла́съ 8:

Прикосни́ся, Ѳомо́, ребру́ руко́ю, — глаго́летъ Христо́съ, — и о́бразы гвозде́й, пріиди́ осяжи́, вѣ́рою испыта́й и бу́ди Ми́ вѣ́ренъ, и не бу́ди невѣ́ренъ! Ѳома́ же, пе́рстомъ я́ко прикосну́ся Влады́цѣ, вельми́ возопи́: Ты́ — Бо́гъ мо́й и Госпо́дь, Благоутро́бне, сла́ва Тебѣ́!

Та́же: Ны́нѣ отпуща́еши... И про́чее обы́чно, я́коже предуказа́ся.




ВЪ ПЯТОКЪ ВТОРЫЯ СЕДМИЦЫ, НА УТРЕНИ,
На Бо́гъ Госпо́дь: Тропа́рь пра́здника, три́жды.

По 1-мъ стихосло́віи сѣда́ленъ, гла́съ 1. Подо́бенъ: Ка́мени запеча́тану.

Креста́ Твоего́ дре́ву покланя́емся, Человѣколю́бче, я́ко на не́мъ пригвозди́лся еси́, Животе́ всѣ́хъ. Ра́й отве́рзлъ еси́, Спа́се, вѣ́рою прише́дшему къ Тебѣ́ разбо́йнику, и сла́дости сподо́бися, исповѣ́дая Тя́: помяни́ мя́, Го́споди! Пріими́ я́коже о́наго и на́съ зову́щихъ: согрѣши́хомъ вси́, благоутро́біемъ Твои́мъ не пре́зри на́съ!

Сти́хъ: Возноси́те Го́спода Бо́га на́шего и покланя́йтеся подно́жію но́гу Его́, я́ко свя́то е́сть.

Воскре́сна: Гро́бъ Тво́й, Спа́се, во́ини стрегу́щіи, ме́ртви отъ облиста́нія я́вльшагося а́нгела бы́ша, проповѣ́дающаго жена́мъ Воскресе́ніе. Тебе́ сла́вимъ, тли́ Потреби́теля, Тебѣ́ припа́даемъ, Воскре́сшему изъ гро́ба и Еди́ному Бо́гу на́шему.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Му́чениченъ: Страда́нія похвало́ю и вѣне́чною по́честію сла́вніи страстоте́рпцы одѣ́яшася Тобо́ю, Го́споди. Терпѣ́ніемъ бо ра́нъ беззако́нныхъ побѣди́ша, си́лою же Бо́жіею отъ небе́съ побѣ́ду прія́ша. Тѣ́хъ моли́твами, Христе́ Бо́же, да́руй на́мъ ве́лію Твою́ ми́лость.

Сла́ва, и ны́нѣ, крестобогоро́диченъ. Подо́бенъ: Гро́бъ Тво́й.

Нескве́рная Агница, Агнца и Па́стыря ви́сима ме́ртва на дре́вѣ ви́дящи, рыда́ющи вѣща́ше, Ма́терски крича́щи: ка́ко претерплю́ Твое́, е́же па́че сло́ва, Сы́не Мо́й, снизхожде́ніе и во́льная страда́нія, Бо́же Преблагíй?

По 2-мъ стихосло́віи сѣда́ленъ, гла́съ 1. Подо́бенъ: Гро́бъ Тво́й, Спа́се.

Блаже́нъ еси́ ты́, я́звы осяза́вый лу́чшаго ребра́: сіе́ велича́йшее чу́до, Ада́ма исцѣли́вшее, и на́мъ вѣ́ровавшимъ неги́блемое блаже́нство исхода́таившее, самѣ́ми рече́нми честны́хъ апо́столовъ, Его́ Воскресе́ніе.

Сла́ва, и ны́нѣ, то́йже.

Та́же: Воскресе́ніе Христо́во ви́дѣвше... Псало́мъ 50-й. Кано́нъ пра́здника [недѣ́ли Антипа́схи], со ирмосы́, на 8 и мине́и на 4. По 3-й пѣ́сни: сѣда́ленъ мине́и. [По 6-й и 9-й:] конда́къ и ексапостила́рій пра́здника.

На хвали́техъ стихи́ры на 4, гла́съ 1.

Кре́стная: Кресто́мъ Твои́мъ, Христе́, еди́но ста́до бы́сть а́нгелъ и человѣ́къ, и еди́на Це́рковь, не́бо и земля́ весели́тся, Го́споди сла́ва Тебѣ́! [Два́жды.]

Воскре́сна: Пое́мъ Твою́, Христе́, спаси́тельную Стра́сть и сла́вимъ Твое́ Воскресе́ніе.

Му́чениченъ: Страстоте́рпцы Христо́вы, пріиди́те, лю́діе, вси́ почти́мъ пѣ́сньми и пѣ́ніи духо́вными, свѣти́ла мíра и проповѣ́дники вѣ́ры, исто́чникъ приснотеку́щій, изъ него́же истека́ютъ вѣ́рнымъ исцѣле́нія. Тѣ́хъ моли́твами, Христе́ Бо́же на́шъ, ми́ръ да́руй мíрови и душа́мъ на́шимъ ве́лію ми́лость.

Сла́ва, и ны́нѣ, гла́съ 8. Анато́лія:

Две́ремъ заключе́ннымъ, ученико́мъ со́браннымъ, предста́ Спа́съ, идѣ́же бя́ху со́брани, и, ста́въ посредѣ́ и́хъ, глаго́летъ Ѳомѣ́: пріиди́, осяжи́ и ви́ждь о́бразы гвозде́й, простри́ ру́ку твою́ и косни́ся ребру́ Моему́, и не бу́ди невѣ́ренъ, но вѣ́рою проповѣ́ждь, е́же изъ ме́ртвыхъ Мое́ Воскресе́ніе.

На стихо́внѣ стихи́ры пра́здника, гла́съ 4. Подо́бенъ: Яко до́бля.

Распе́нся, ра́й человѣ́комъ отве́рзлъ еси́ и ме́ртвыя совоздви́глъ еси́, Животе́ на́шъ, и воскре́слъ еси́, и сме́рть плѣни́въ си́лою Твое́ю, и совокупи́въ небе́снымъ вои́стинну земна́я, испо́лнилъ еси́ весе́лія безчи́сленнаго, Бо́жій Сло́ве, ли́къ апо́стольскій, си́мъ ми́ръ вѣща́вый.

Сти́хъ: Во всю́ зе́млю изы́де вѣща́ніе и́хъ и въ концы́ вселе́нныя глаго́лы и́хъ.

Тлѣ́ніе испрове́ржеся, нетлѣ́ніе процвѣте́, сою́зъ вре́менный разрѣши́ся. Небеса́ да веселя́тся, земля́ и подзе́мная: воскре́се бо Христо́съ, плѣни́ся сме́рть, весе́лый яви́ся де́нь, заключе́ннымъ две́ремъ вну́трь вше́лъ еси́, Жизнода́вче и Го́споди.

Сти́хъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь.

Въ де́нь, его́же сотвори́ Госпо́дь дне́сь, возра́дуемся веселя́щеся: Жизнода́вецъ воста́лъ е́сть, а́дъ плѣне́нъ бы́сть. Апо́стольскій ли́къ ра́дость слы́шитъ: осяза́лъ е́сть ре́бра Влады́чня невѣ́ровавый Ѳома́, и осяза́въ, сугу́бое существо́ проповѣ́да.

Сла́ва, и ны́нѣ, гла́съ 8:

Прикосни́ся, Ѳомо́, ребру́ руко́ю, — глаго́летъ Христо́съ, — и о́бразы гвозде́й, пріиди́ осяжи́, вѣ́рою испыта́й и бу́ди Ми́ вѣ́ренъ, и не бу́ди невѣ́ренъ! Ѳома́ же, пе́рстомъ я́ко прикосну́ся Влады́цѣ, вельми́ возопи́: Ты́ — Бо́гъ мо́й и Госпо́дь, Благоутро́бне, сла́ва Тебѣ́!

Та́же: Бла́го е́сть исповѣ́датися Го́сподеви... Ча́съ 1-й. И отпу́стъ.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 42 – 44.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.