Церковный календарь
Новости


2017-07-20 / russportal
"Русскія дѣтскія сказки". Василиса Прекрасная (1921)
2017-07-20 / russportal
"Русскія дѣтскія сказки". Морозко (1921)
2017-07-20 / russportal
А. С. Пушкинъ. "Повѣсти Бѣлкина". Гробовщикъ (1921)
2017-07-20 / russportal
А. С. Пушкинъ. "Повѣсти Бѣлкина". Отъ издателя (1921)
2017-07-20 / russportal
К. П. Побѣдоносцевъ. "Московскій Сборникъ". Знаніе и дѣло (1896)
2017-07-20 / russportal
К. П. Побѣдоносцевъ. "Моск. Сборникъ". Болѣзни нашего времени (1896)
2017-07-19 / russportal
Cвт. Іоаннъ Шанхайскій. Общественное служеніе христіанъ (1994)
2017-07-19 / russportal
Еп. Григорій (Граббе). Англикане и Православная Церковь (1964)
2017-07-19 / russportal
"Русскія дѣтскія сказки". Золотая рыбка (1921)
2017-07-19 / russportal
"Русскія дѣтскія сказки". Журавль и цапля (1921)
2017-07-19 / russportal
Н. В. Гоголь. Письмо къ Аркадію Осиповичу Россети (1921)
2017-07-19 / russportal
Н. В. Гоголь. Майская ночь, или утопленница (1921)
2017-07-18 / russportal
Преп. Епифаній Премудрый. Житіе преп. Сергія Радонежскаго. Глава 3-я (1903)
2017-07-18 / russportal
Преп. Епифаній Премудрый. Житіе преп. Сергія Радонежскаго. Глава 2-я (1903)
2017-07-18 / russportal
Архіеп. Никонъ (Рождественскій). «Житіе преп. Сергія». Глава 12-я (1904)
2017-07-18 / russportal
Архіеп. Никонъ (Рождественскій). «Житіе преп. Сергія». Глава 11-я (1904)
Новости въ видѣ
RSS-канала: .
Сегодня - четвергъ, 20 iюля 2017 г. Сейчасъ на порталѣ посѣтителей - 22.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ СУББОТУ ВТОРЫЯ СЕДМИЦЫ ПО ПАСЦѢ.

ВЪ ПЯТОКЪ ВТОРЫЯ СЕДМИЦЫ ПО ПАСЦѢ ВЕЧЕРА,
Обы́чная каѳи́сма. На Го́споди воззва́хъ: стихи́ры самогла́сны, гла́съ 1:

Две́ремъ заключе́ннымъ, ученико́мъ собра́ннымъ, вше́лъ еси́ внеза́пу, всеси́льне Іису́се, Бо́же на́шъ, и, ста́въ посредѣ́ и́хъ, ми́ръ да́въ, испо́лнилъ еси́ Свята́го Ду́ха; жда́ти же повелѣ́лъ еси́ и ника́коже разлуча́тися отъ Іерусали́ма, до́ндеже облеку́тся е́же съ высоты́ си́лою. Тѣ́мже вопіе́мъ Ти́: просвѣще́ніе, и воскресе́ніе, и ми́ре на́шъ, сла́ва Тебѣ́!

По дне́хъ осми́хъ воста́нія Твоего́, Го́споди, яви́лся еси́ ученико́мъ Твои́мъ на мѣ́стѣ, идѣ́же бя́ху со́брани, и, возгласи́въ и́мъ, — ми́ръ ва́мъ! — невѣ́рующему ученику́ ру́цѣ показа́лъ еси́ и пречи́стое ребро́. Онъ же, вѣ́ровавъ, вопія́ше Тебѣ́: Госпо́дь мо́й и Бо́гъ мо́й, сла́ва Тебѣ́!

Ѳома́, глаго́лемый Близне́цъ, не бѣ́ съ ни́ми, егда́ вше́лъ еси́, Христе́, заключе́ннымъ две́ремъ. Тѣ́мже и не вѣ́роваше рече́ннымъ ему́, отъ невѣ́рія въ вѣ́ру извѣству́я. Не несподо́билъ же еси́, Бла́же, показа́ти ему́ пречи́стое ребро́ Твое́, и руку́ и ногу́ я́звы. Онъ же, осяза́въ и ви́дѣвъ, исповѣ́да Тебе́ бы́ти Бо́га не на́га, и Человѣ́ка не про́ста, и вопія́ше: Госпо́дь мо́й и Бо́гъ мо́й, сла́ва Тебѣ́!

Та́же мине́и 3. Сла́ва, гла́съ 6:

Две́ремъ заключе́ннымъ прише́лъ еси́, Христе́, ко ученико́мъ. Тогда́ Ѳома́ смотри́тельно не обрѣ́теся съ ни́ми. Глаго́лаше бо: не иму́ вѣ́ры, а́ще не уви́жду и а́зъ Влады́ки; уви́жду ребро́, отону́дуже изы́де кровь, вода́, креще́ніе; уви́жду я́зву, отъ нея́же исцѣлѣ́ вели́кій стру́пъ человѣ́ческій; уви́жду, ка́ко не бѣ́, я́коже ду́хъ, но пло́ть и ко́сти. Сме́рть попра́вый и Ѳому́ увѣ́ривый, Го́споди, сла́ва Тебѣ́!

И ны́нѣ, богоро́диченъ, гла́съ 1:

Всемíрную сла́ву, отъ человѣ́къ прозя́бшую и Влады́ку ро́ждшую, небе́сную две́рь воспои́мъ, Марíю Дѣ́ву, безпло́тныхъ пѣ́снь и вѣ́рныхъ удобре́ніе: Сія́ бо яви́ся не́бо и хра́мъ Божества́, Сія́, прегражде́ніе вражды́ разруши́вши, ми́ръ введе́ и Ца́рствіе отве́рзе; Сію́ у́бо иму́ще вѣ́ры утвержде́ніе, Побо́рника и́мамы, изъ Нея́ ро́ждшагося Го́спода. Дерза́йте у́бо, дерза́йте, лю́діе Бо́жіи, и́бо То́й побѣди́тъ враги́, я́ко Всеси́ленъ.

Свѣ́те Ти́хій... Проки́менъ дне́.

На стихо́внѣ стихи́ры воскре́сныя, гла́съ 1:

Вече́рняя на́ша моли́твы пріими́, Святы́й Го́споди, и пода́ждь на́мъ оставле́ніе грѣхо́въ, я́ко Еди́нъ еси́, явле́й въ мíрѣ Воскресе́ніе.

Сти́хъ: Госпо́дь воцари́ся, въ лѣ́поту облече́ся.

Обыди́те, лю́діе, Сіо́нъ и обыми́те его́, и дади́те сла́ву въ не́мъ Воскре́сшему изъ ме́ртвыхъ, я́ко То́й е́сть Бо́гъ на́шъ, избавле́й на́съ отъ беззако́ній на́шихъ.

Сти́хъ: Ибо утверди́ вселе́нную, я́же не подви́жится.

Пріиди́те, лю́діе, воспои́мъ и поклони́мся Христу́, сла́вяще Его́ е́же изъ ме́ртвыхъ Воскресе́ніе, я́ко То́й е́сть Бо́гъ на́шъ, отъ пре́лести вра́жія мíръ избавле́й.

Сти́хъ: До́му Твоему́ подоба́етъ святы́ня, Го́споди, въ долготу́ днíй.

Стра́стію Твое́ю, Христе́, отъ страсте́й свободи́хомся, и Воскресе́ніемъ Твои́мъ изъ истлѣ́нія изба́вихомся, Го́споди, сла́ва Тебѣ́!

Сла́ва и ны́нѣ, гла́съ 5:

Человѣколю́бче, ве́ліе и безприкла́дное мно́жество щедро́тъ Твои́хъ: я́ко долготерпѣ́лъ еси́, отъ іуде́й зауша́емь, отъ апо́стола осяза́емь, и отъ отмета́ющихся Тебе́ многоиспыту́емь — ка́ко воплоти́лся еси́? ка́ко распя́лся еси́, Безгрѣ́шне? Но вразуми́ на́съ, я́ко Ѳому́, вопи́ти Тебѣ́: Госпо́дь мо́й и Бо́гъ мо́й, сла́ва Тебѣ́!

Та́же: Ны́нѣ отпуща́еши... Тропа́рь: Запеча́тану гро́бу... Ектенія́ и отпу́стъ.

[Зри́:] Извѣ́стно же бу́ди, я́ко кано́ны о усо́пшихъ окто́иха настоя́щаго гла́са, по вся́ суббо́ты въ пятдеся́тницѣ до́лжни су́ть пѣ́тися въ пятка́хъ ве́чера на повече́ріяхъ.



ВЪ СУББОТУ 2-Я СЕДМИЦЫ ПО ПАСЦѢ, НА УТРЕНИ.
На Бо́гъ Госпо́дь: Тропа́рь пра́здника, три́жды.

По 1-мъ стихосло́віи сѣда́ленъ, гла́съ 1:

Гро́бъ Тво́й, Спа́се, во́ини стрегу́щіи, ме́ртви отъ облиста́нія я́вльшагося а́нгела бы́ша, проповѣ́дающаго жена́мъ Воскресе́ніе. Тебе́ сла́вимъ, тли́ Потреби́теля, Тебѣ́ припа́даемъ, Воскре́сшему изъ гро́ба и Еди́ному Бо́гу на́шему.

Гла́съ то́йже. Подо́бенъ: Ка́мени запеча́тану.

Жены́ ко гро́бу пріидо́ша ура́ншія, и а́нгельское явле́ніе ви́дѣвшія, трепета́ху: гро́бъ облиста́ Жи́знь, чу́до удивля́ше я́. Сего́ ра́ди ше́дшія, ученико́мъ проповѣ́даху воста́ніе: а́дъ плѣни́ Христо́съ, я́ко еди́нъ Крѣ́покъ и Си́ленъ, и истлѣ́вшія совоздви́же вся́, осужде́нія стра́хъ разруши́въ си́лою Креста́.

Сла́ва, и ны́нѣ, богоро́диченъ:

Гавріи́лу вѣща́вшу Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ.

По 2-мъ стихосло́віи сѣда́ленъ, гла́съ 1. Подо́бенъ: Ка́мени запеча́тану.

Стра́ха ра́ди іуде́йска, сокрове́ннымъ ученико́мъ и въ Сіо́нѣ со́браннымъ, вше́лъ еси́ къ ни́мъ, Бла́же, и ста́лъ еси́ посредѣ́ и́хъ две́ремъ заключе́ннымъ радостотворя́й, и показа́лъ еси́ и́мъ ру́цѣ и пречи́стыхъ Твои́хъ ре́бръ я́звы, глаго́ля невѣ́рующему ученику́: принеси́ ру́ку твою́ и испыта́й, я́ко Са́мъ Азъ е́смь, тебе́ ра́ди пострада́вый.

[Сла́ва, и ны́нѣ, то́йже.] И чте́ніе.

Та́же: Воскресе́ніе Христо́во ви́дѣвше... Псало́мъ 50-й. Кано́нъ пра́здника [недѣ́ли Антипа́схи], со ирмосы́, на 6 и свята́го, его́же е́сть хра́мъ, на 4 и мине́и на 4. По 3-й пѣ́сни: конда́къ и сѣда́ленъ мине́и. Сла́ва, и ны́нѣ, пра́здника. По 6-й пѣ́сни: конда́къ пра́зднику и и́косъ. По 9-й пѣ́сни: ексапостила́рій пра́зднику.

На хвали́техъ стихи́ры воскре́сны на 4, гла́съ 1:

Пое́мъ Твою́, Христе́, спаси́тельную Стра́сть и сла́вимъ Твое́ Воскресе́ніе.

Кре́стъ претерпѣ́вый, и сме́рть упраздни́вый, и воскресы́й изъ ме́ртвыхъ, умири́ на́шу жи́знь, Го́споди, я́ко еди́нъ Всеси́ленъ.

Ада плѣни́вый и человѣ́ка воскреси́вый, Воскресе́ніемъ Твои́мъ, Христе́, сподо́би ны́ чи́стымъ се́рдцемъ Тебе́ пѣ́ти и сла́вити.

Боголѣ́пное Твое́ снизхожде́ніе сла́вяще, пое́мъ Тя́, Христе́: роди́лся еси́ отъ Дѣ́вы и неразлу́ченъ бы́лъ еси́ отъ Отца́; пострада́лъ еси́, я́ко человѣ́къ, и во́лею претерпѣ́лъ еси́ кре́стъ; воскре́слъ еси́ отъ гро́ба, я́ко отъ черто́га произше́дъ, да спасе́ши мíръ, Го́споди, сла́ва Тебѣ́.

Сла́ва, и ны́нѣ, гла́съ 6:

По дне́хъ осми́хъ воста́нія Твоего́, Іису́се Царю́, Единоро́дный Сло́ве Отчій, яви́лся еси́ ученико́мъ Твои́мъ заключе́ннымъ две́ремъ, ми́ръ Тво́й подая́. И невѣ́рующему ученику́ зна́менія показа́лъ еси́: пріиди́, и осяжи́ ру́цѣ и но́зѣ, и нетлѣ́нная Моя́ ре́бра. Онъ же, вѣ́ровавъ, вопія́ше Тебѣ́: Госпо́дь мо́й и Бо́гъ мо́й, сла́ва Тебѣ́!

На стихо́внѣ стихи́ры пра́зднику, гла́съ 1. Подо́бенъ: Всехва́льніи му́ченицы.

По е́же изъ гро́ба Твое́мъ стра́шномъ, Жизнода́вче, воста́ніи, я́коже печа́тей не разруши́лъ еси́, Христе́, гро́бныхъ, та́ко заключе́ннымъ две́ремъ вше́лъ еси́ къ пресла́внымъ апо́столомъ Твои́мъ, радостотворя́ и́мъ, и пра́вый Тво́й Ду́хъ подая́ и́мъ за безмѣ́рную Твою́ ми́лость.

Сти́хъ: Во всю́ зе́млю изы́де вѣща́ніе и́хъ и въ концы́ вселе́нныя глаго́лы и́хъ.

Ѳома́, и́же и Близне́цъ, не бѣ́ прише́лъ, егда́ Ты́ ученико́мъ яви́лся еси́, Го́споди. Тѣ́мже не вѣ́рова Твоему́ Воскресе́нію и ви́дѣвшимъ Тя́ вопія́ше: а́ще не вложу́ пе́рста въ ре́бра Его́ и гвозде́й я́звы, не вѣ́рую, я́ко воста́лъ е́сть.

Сти́хъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь.

Якоже хо́щеши, осяжи́, — Христо́съ Ѳомѣ́ вопія́ше, — вложи́ ру́ку и позна́й Мя, ко́сти иму́ща и земно́е тѣ́ло, и не бу́ди невѣ́ренъ, ра́вно же со инѣ́ми увѣ́рися. Онъ же возопи́: Бо́гъ мо́й и Госпо́дь Ты́ еси́, сла́ва воста́нію Твоему́!

Сла́ва, и ны́нѣ, гла́съ то́йже:

Ученико́мъ сомня́щимся, во осмы́й де́нь предста́ Спа́съ, идѣ́же бя́ху со́брани, и, ми́ръ да́въ, Ѳомѣ́ возопи́: пріиди́, апо́столе, осяжи́ дла́ни, въ ни́хже гво́здія вонзо́ша. О, до́брое невѣ́ріе Ѳомино́! Вѣ́рныхъ сердца́ въ позна́ніе приведе́, и со стра́хомъ возопи́: Госпо́дь мо́й и Бо́гъ мо́й, сла́ва Тебѣ́!

И про́чее у́трени. Тропа́рь: Запеча́тану гро́бу... Ектенія́, и ча́съ пе́рвый, и отпу́стъ, и обы́чная литíя въ притво́рѣ.




НА ЛИТУРГІИ,

Изобрази́тельная и отъ кано́на пра́здника, пѣ́снь 9-я, на 6. Проки́менъ, гла́съ 3: Ве́лій Госпо́дь на́шъ, и ве́лія крѣ́пость Его́,* и ра́зума Его́ нѣ́сть числа́. Сти́хъ: Хвали́те Го́спода, я́ко бла́гъ [псало́мъ, Бо́гови на́шему да услади́тся хвале́ніе]. Апо́столъ Дѣя́ній, зача́ло 15: Слы́шавше апо́столи... Аллилу́ія, гла́съ 8: Пріиди́те, возра́дуемся Го́сподеви, [воскли́кнемъ Бо́гу, Спаси́телю на́шему]. Сти́хъ: Похвали́, Іерусали́ме, Го́спода, [хвали́ Бо́га твоего́, Сіо́не]. Ева́нгеліе Іоа́нна, зача́ло 19: Ви́дѣвше человѣ́цы зна́меніе... Прича́стный: Похвали́, Іерусали́ме, Го́спода, [хвали́ Бо́га твоего́, Сіо́не]. По сему́ же воображе́нію пое́мъ по вся́ суббо́ты до Вознесе́нія Христо́ва.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 44 – 46.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.