Церковный календарь
Новости


2017-08-19 / russportal
"Проповѣдн. хрестоматія". Поученіе (6-е) на Преображеніе Господне (1965)
2017-08-19 / russportal
"Проповѣдн. хрестоматія". Поученіе (5-е) на Преображеніе Господне (1965)
2017-08-19 / russportal
Митр. Анастасій (Грибановскій). Плачъ Русскаго народа (1924)
2017-08-19 / russportal
Митр. Анастасій. Похв. слово новымъ священномученикамъ Русской Церкви (1973)
2017-08-19 / russportal
Прот. Григорій Дьяченко. Поученіе (3-е) въ день Преображенія Господня (1900)
2017-08-19 / russportal
Прот. Григорій Дьяченко. Поученіе (2-е) въ день Преображенія Господня (1900)
2017-08-19 / russportal
Прот. Григорій Дьяченко. Поученіе (1-е) въ день Преображенія Господня (1900)
2017-08-18 / russportal
Митр. Арсеній (Москвинъ). Слово (3-е) въ день Преображенія Господня (1874)
2017-08-18 / russportal
П. Н. Красновъ. "Павлоны". Часть 2-я. Глава 14-я (1943)
2017-08-18 / russportal
П. Н. Красновъ. "Павлоны". Часть 2-я. Глава 13-я (1943)
2017-08-18 / russportal
Мон. Варвара (Суханова). О чудотв. созданіи церкви въ Кіево-Печерской обители (1963)
2017-08-18 / russportal
Архим. Серафимъ (Вербинъ). Ко дню 90-лѣтняго юбилея митр. Анастасія (1963)
2017-08-18 / russportal
"Проповѣдн. хрестоматія". Поученіе (4-е) на Преображеніе Господне (1965)
2017-08-18 / russportal
"Проповѣдн. хрестоматія". Поученіе (3-е) на Преображеніе Господне (1965)
2017-08-18 / russportal
Свщмч. Кипріанъ. Письмо (56-е) къ клиру и народу испанскому (1879)
2017-08-18 / russportal
Свщмч. Кипріанъ. Письмо (55-е) къ Стефану о Макріанѣ Арелатскомъ (1879)
Новости въ видѣ
RSS-канала: .
Сегодня - суббота, 19 августа 2017 г. Сейчасъ на порталѣ посѣтителей - 19.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ НЕДѢЛЮ ТРЕТІЮ ПО ПАСЦѢ (СВЯТЫХЪ ЖЕНЪ МѴРОНОСИЦЪ).

Недѣ́ля тре́тія по Па́сцѣ, святы́хъ же́нъ мѵроно́сицъ и Іо́сифа пра́веднаго.

ВЪ СУББОТУ ВЕЧЕРА, НА МАЛѢЙ ВЕЧЕРНИ,

Стихи́ры воскре́сны 3, гла́съ 2: Пре́жде вѣ́къ отъ Отца́ ро́ждшемуся... Христо́съ, Спа́съ на́шъ, е́же на ны́... Со арха́нгелы воспои́мъ Христо́во Воскресе́ніе... И восто́ченъ [анато́ліевъ1, гла́съ то́йже: Тебе́ распе́ншагося и погребе́ннаго... Сла́ва: Почто́ мѵ́ра со слеза́ми, о учени́цы... [Вся́ сія́ стихи́ры ищи́ на вели́цѣй вече́рни.]

И ны́нѣ, догма́тикъ, гла́съ 2:

О, преве́лія та́инства! Зря́ чудеса́, проповѣ́дую Божество́: Емману́илъ бо естества́ у́бо врата́ отве́рзе, я́ко Человѣколю́бецъ, дѣ́вства же заключе́нія не разруши́, я́ко Бо́гъ, но си́це отъ утро́бы про́йде, я́коже слу́хомъ вни́де; та́ко воплоти́ся, я́коже зача́тся. Безстра́стно вни́де, несказа́нно изы́де, по проро́ку глаго́лющему: сія́ врата́ заключе́на бу́дутъ, никто́же про́йдетъ и́ми, то́кмо еди́нъ Госпо́дь Бо́гъ Изра́илевъ, имѣ́яй ве́лію ми́лость.

Свѣ́те Ти́хій... Проки́менъ: Госпо́дь воцари́ся...

На стихо́внѣ стихи́ра воскре́сна, и Богоро́дицы, гла́съ 2. Подо́бенъ: Егда́ отъ дре́ва.

Сти́хъ: Помяну́ и́мя Твое́ во вся́комъ ро́дѣ и ро́дѣ.

Всѣ́хъ скорбя́щихъ ра́досте, и оби́димыхъ предста́тельнице, и убо́гихъ пита́тельнице, стра́нныхъ же утѣше́ніе, и же́зле слѣпы́хъ, немощны́хъ посѣще́ніе, тружда́ющихся покро́ве и засту́пнице, и си́рыхъ помо́щнице, Ма́ти Бо́га Вы́шняго — Ты́ еси́, Пречи́стая; потщи́ся, мо́лимся, спасти́ся рабо́мъ Твои́мъ.

Сти́хъ: Слы́ши, Дщи́, и ви́ждь, и приклони́ у́хо Твое́.

Вся́кое беззако́ніе неща́дно, вся́кій грѣ́хъ невозде́ржно окая́нный содѣ́лахъ, вся́каго осужде́нія досто́инъ е́смь. Вины́ покая́нія мнѣ́ пода́ждь, Дѣ́во, я́ко да не осужде́нъ та́мо явлю́ся. Тя́ бо напису́ю моли́твенницу, Тя́ призыва́ю предста́тельницу, да мя́ не посрами́ши, Богоневѣ́стная.

Сти́хъ: Лицу́ Твоему́ помо́лятся бога́тіи лю́дстіи.

Ино́го прибѣ́жища, Чи́стая, къ Творцу́ и Влады́цѣ мы́ не и́мамы ра́звѣ Тебе́, Богоневѣ́сто, да не отри́неши на́съ те́плымъ Твои́мъ предста́тельствомъ, ниже́ посрами́ши любо́вію притека́ющихъ подъ кро́въ Тво́й, Ма́ти Бо́га на́шего, потщи́ся, и Твою́ по́мощь да́ждь, и ны́нѣшняго гнѣ́ва на́съ спаси́.

Сла́ва, и ны́нѣ, гла́съ 2: Мѵроно́сицы ра́но бы́вшія... [Ищи́ на вели́цѣй вече́рни.]

По Трисвято́мъ тропа́рь: Благообра́зный Іо́сифъ... И отпу́стъ.




НА ВЕЛИЦѢЙ ВЕЧЕРНИ.
Христо́съ воскре́се.., я́ко обы́чно. Та́же псало́мъ предначина́тельный: Благослови́, душе́ моя́, Го́спода... И каѳи́сма 1-я псалти́ра.

На Го́споди воззва́хъ... поста́вимъ стихо́въ 10 и пое́мъ стихи́ры воскре́сны 3, гла́съ 2:

Сти́хъ: Изведи́ изъ темни́цы ду́шу мою́, исповѣ́датися и́мени Твоему́.

Пре́жде вѣ́къ отъ Отца́ ро́ждшемуся Бо́жію Сло́ву, вопло́щшемуся отъ Дѣ́вы Марíи, пріиди́те, поклони́мся: крестъ бо претерпѣ́въ, погребе́нію предаде́ся, я́ко Са́мъ восхотѣ́, и воскре́съ изъ ме́ртвыхъ, спасе́ мя заблужда́ющаго человѣ́ка.

Сти́хъ: Мене́ жду́тъ пра́ведницы, до́ндеже возда́си мнѣ́.

Христо́съ Спа́съ на́шъ, е́же на ны́ рукописа́ніе, пригвозди́въ на крестѣ́, загла́ди, и сме́рную держа́ву упраздни́; покланя́емся Его́ тридне́вному Воскресе́нію.

Сти́хъ: Изъ глубины́ воззва́хъ къ Тебѣ́, Го́споди, Го́споди, услы́ши гла́съ мо́й.

Со арха́нгелы воспои́мъ Христо́во Воскресе́ніе: То́й бо е́сть Изба́витель и Спа́съ ду́шъ на́шихъ, и въ сла́вѣ стра́шной и крѣ́пцѣй си́лѣ па́ки гряде́тъ суди́ти мíру, его́же созда́.

И восто́чны [анато́ліевы] 4, гла́съ то́йже:

Сти́хъ: Да бу́дутъ у́ши Твои́ вне́млющѣ гла́су моле́нія моего́.

Тебе́, Распе́ншагося и Погребе́ннаго, а́нгелъ проповѣ́да Влады́ку, и глаго́лаше жена́мъ: пріиди́те, ви́дите, идѣ́же лежа́ше Госпо́дь; воскре́се бо, я́коже рече́, я́ко Всеси́ленъ. Тѣ́мже Тебѣ́ покланя́емся, Еди́ному Безсме́ртному: Жизнода́вче Христе́, поми́луй на́съ.

Сти́хъ: Аще беззако́нія на́зриши, Го́споди, Го́споди, кто́ постои́тъ? Яко у Тебе́ очище́ніе е́сть.

Кресто́мъ Твои́мъ упраздни́лъ еси́, ю́же отъ дре́ва кля́тву, погребе́ніемъ Твои́мъ умертви́лъ еси́ сме́рти держа́ву, воста́ніемъ же Твои́мъ просвѣти́лъ еси́ ро́дъ человѣ́ческій. Сего́ ра́ди вопіе́мъ Ти́: Благодѣ́телю Христе́ Бо́же на́шъ, сла́ва Тебѣ́.

Сти́хъ: Имене ра́ди Твоего́ потерпѣ́хъ Тя́, Го́споди, потерпѣ́ душа́ моя́ въ сло́во Твое́, упова́ душа́ моя́ на Го́спода.

Отверзо́шася Тебѣ́, Го́споди, стра́хомъ врата́ сме́ртная, вра́тницы же а́довы, ви́дѣвше Тя́, убоя́шася; врата́ бо мѣ́дная сокруши́лъ еси́, и вереи́ желѣ́зныя сте́рлъ еси́, и изве́лъ еси́ на́съ отъ тмы́ и се́ни сме́ртныя, и у́зы на́ша растерза́лъ еси́.

Сти́хъ: Отъ стра́жи у́треннія до но́щи, отъ стра́жи у́треннія, да упова́етъ Изра́иль на Го́спода.

Спаси́тельную пѣ́снь пою́ще, отъ у́стъ возсле́мъ: пріиди́те вси́, въ дому́ Госпо́днемъ припаде́мъ, глаго́люще: на Дре́вѣ Распны́йся, и изъ ме́ртвыхъ Воскресы́й, и Сы́й въ нѣ́драхъ Отчихъ, очи́сти грѣхи́ на́ша.

Та́же стихи́ры мѵроно́сицамъ самогла́сны 3, гла́съ 2. Анато́лія.

Сти́хъ: Яко у Го́спода ми́лость и мно́гое у Него́ избавле́ніе, и То́й изба́витъ Изра́иля отъ всѣ́хъ беззако́ній его́.

Мѵроно́сицы жены́, у́тру глубоку́, арома́ты взе́мша, Госпо́дня гро́ба достиго́ша, я́же не надѣ́яхуся обрѣ́тша, помышля́ху благоговѣ́юще ка́менному отвале́нію, и друга́ ко друзѣ́й глаго́лаху: гдѣ́ су́ть печа́ти гро́ба? гдѣ́ е́сть Пила́това кустодíя и опа́сное утверже́ніе? Бы́сть же возвѣсти́тель неразумѣва́ющимъ жена́мъ, блиста́яйся а́нгелъ, и глаго́ляй къ ни́мъ: что́ съ рыда́ніемъ и́щете Жива́го и Оживотвори́вшаго ро́дъ человѣ́ческій? Воста́ Христо́съ Бо́гъ на́шъ изъ ме́ртвыхъ, я́ко Всеси́ленъ, подая́й всѣ́мъ на́мъ нетлѣ́ніе и жи́знь, просвѣще́ніе и ве́лію ми́лость.

Сти́хъ: Хвали́те Го́спода вси́ язы́цы, похвали́те Его́ вси́ лю́діе.

Почто́ мѵ́ра со слеза́ми, о учени́цы, растворя́ете? Ка́мень отвали́ся, гро́бъ истощи́ся; ви́дите тлю́ Живото́мъ попра́нную, печа́ти свидѣ́тельствующа я́вственно, спя́щія лю́тѣ стра́жники непокори́выхъ, сме́ртное спасе́ся пло́тію Бо́жіею, а́дъ рыда́етъ. Те́кша ра́достію рцы́те апо́столомъ: умертви́вый сме́рть Христо́съ перворожде́нъ изъ ме́ртвыхъ, ва́съ предваря́етъ въ Галиле́и.

Сти́хъ: Яко утверди́ся ми́лость Его́ на на́съ и и́стина Госпо́дня пребыва́етъ во вѣ́къ.

Мѵроно́сицы ра́но бы́вша, и гро́бъ Тво́й со тща́ніемъ дости́гша, иска́ху Тебе́, Христе́, во е́же пома́зати Пречи́стое Тѣ́ло Твое́. И а́нгеловыми глаго́лы огласи́вшеся, радостотво́рныя о́бразы апо́столомъ проповѣ́даху, я́ко воскре́се Нача́льникъ спасе́нія на́шего, плѣни́вый сме́рть, мíрови же да́руяй живо́тъ вѣ́чный и ве́лію ми́лость.

Сла́ва, гла́съ 6. Космы́ мона́ха:

Мѵроно́сицы жены́, гро́ба Твоего́ дости́гша, и печа́ти гро́бныя ви́дѣвша, не обрѣ́тша же Пречи́стаго Тѣ́ла Твоего́, рыда́юща со тща́ніемъ пріидо́ша, глаго́люща: кто́ укра́де на́ше упова́ніе? кто́ взя́тъ ме́ртва на́га сми́рною пома́зана, Ма́тери еди́но утѣше́ніе? О, ка́ко ме́ртвыя оживи́вый умертви́ся? а́дъ плѣни́вый, ка́ко погребе́ся? Но воскресни́, Спа́се, самовла́стно, я́коже ре́клъ еси́, тридне́венъ, спаса́яй ду́ши на́ша.

И ны́нѣ, богоро́диченъ, гла́съ 2:

Пре́йде сѣ́нь зако́нная, благода́ти прише́дшей: я́коже бо купина́ не сгара́ше, опаля́ема, та́ко Дѣ́ва родила́ еси́ и Дѣ́ва пребыла́ еси́. Вмѣ́сто столпа́ о́гненнаго пра́ведное возсія́ Со́лнце, вмѣ́сто Моисе́я — Христо́съ, спасе́ніе ду́шъ на́шихъ.

Вхо́дъ. Свѣ́те Ти́хій... Проки́менъ: Госпо́дь воцари́ся...

На литíи стихи́ры самогла́сны, гла́съ 1:

Мѵроно́сицы жены́, ко гро́бу что́ пріидо́сте? Что́ и́щете Жива́го въ ме́ртвыхъ? Воскре́се Госпо́дь, дерза́йте, — вопіе́тъ а́нгелъ.

Со стра́хомъ пріидо́ша жены́ на гро́бъ, арома́ты тѣ́ло Твое́ пома́зати тща́щіяся, и, сіе́ не обрѣ́тше, недоумѣва́хуся друга́ ко друзѣ́й, не вѣ́дуще Воскресе́нія. Но предста́ и́мъ а́нгелъ и рече́: воскре́се Христо́съ, да́руяй на́мъ ве́лію ми́лость.

Пріидо́ша на гро́бъ Магдали́на и друга́я Марíя, и́щуще Го́спода, и а́нгела ви́дѣша, я́ко мо́лнію, сѣдя́ща на ка́мени и глаго́люща и́мъ: что́ и́щете Жива́го съ ме́ртвыми? Воскре́се, я́коже рече́. Въ Галиле́и Его́ обря́щете. Къ Нему́ же возопіи́мъ: воскресы́й изъ ме́ртвыхъ, Го́споди, сла́ва Тебѣ́.

Сла́ва, гла́съ 6:

Проси́ Іо́сифъ тѣ́ло Іису́сово, и положи́ е́ въ но́вомъ свое́мъ гро́бѣ: подоба́ше бо Ему́ изъ гро́ба, я́ко отъ черто́га проити́. Сокруши́вый держа́ву сме́рти, и отве́рзый врата́ ра́йская человѣ́комъ, Го́споди, сла́ва Тебѣ́.

И ны́нѣ, богоро́диченъ, гла́съ то́йже:

Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.

На стихо́внѣ стихи́ра воскре́сна, гла́съ 2:

Воскресе́ніе Твое́, Христе́ Спа́се, всю́ просвѣти́ вселе́нную, и призва́лъ еси́ Твое́ созда́ніе, Всеси́льне Го́споди, сла́ва Тебѣ́.

Та́же стихи́ры Па́схи, съ припѣ́вы и́хъ. (Ли́стъ 6).

Сла́ва, гла́съ 5:

Тебе́, одѣ́ющагося свѣ́томъ, я́ко ри́зою, сне́мъ Іо́сифъ съ Дре́ва съ Никоди́момъ и, ви́дѣвъ ме́ртва, на́га, непогребе́на, благосе́рдный пла́чь воспріи́мъ, рыда́я, глаго́лаше: увы́ мнѣ́, Сладча́йшій Іису́се! Его́же вма́лѣ со́лнце на Крестѣ́ ви́сима узрѣ́вшее мра́комъ облага́шеся, и земля́ стра́хомъ колеба́шеся, и раздира́шеся церко́вная завѣ́са, но се́ ны́нѣ ви́жду Тя́, мене́ ра́ди во́лею подъе́мша сме́рть. Ка́ко погребу́ Тя́, Бо́же мо́й, или́ ка́кою плащани́цею обвію́? Ко́има ли рука́ма прикосну́ся нетлѣ́нному Твоему́ Тѣ́лу? Или́ кíя пѣ́сни воспою́ Твоему́ исхо́ду, Ще́дре? Велича́ю Стра́сти Твоя́, пѣсносло́влю и погребе́ніе Твое́ со Воскресе́ніемъ, зовы́й: Го́споди, сла́ва Тебѣ́!

И ны́нѣ: Воскресе́нія де́нь... и Христо́съ воскре́се.., еди́ножды.

Та́же: Ны́нѣ отпуща́еши... На благослове́ніи хлѣ́бовъ: Тропа́рь Богоро́дице Дѣ́во.., три́жды. И обы́чное чте́ніе Дѣя́ній.

[Зри́:] Аще ли случи́тся не бы́ти бдѣ́нію: пою́тся на Го́споди воззва́хъ... стихи́ры воскре́сны 4 и мѵроно́сицъ, съ литíйными, на 6. Вхо́дъ. Проки́менъ. На стихо́внѣ стихи́ры Па́схи. Сла́ва, и ны́нѣ, гла́съ 5: Тебе́ одѣ́ющагося свѣ́томъ... На полу́нощницѣ кано́нъ Тро́иченъ пое́тся по обы́чаю.

Вѣ́домо же бу́ди: Яко отъ недѣ́ли свята́го Ѳомы́ не быва́етъ хлѣболомле́ніе по благослове́ніи хлѣ́бовъ, за кра́ткость но́щи.



ВЪ НЕДѢЛЮ 3-Ю ПО ПАСЦѢ, СВЯТЫХЪ МѴРОНОСИЦЪ, НА УТРЕНИ,
На Бо́гъ Госпо́дь: Тропа́рь, гла́съ 2:

Егда́ снизше́лъ еси́ къ сме́рти, Животе́ Безсме́ртный, тогда́ а́дъ умертви́лъ еси́ блиста́ніемъ Божества́; егда́ же и уме́ршія отъ преиспо́днихъ воскреси́лъ еси́, вся́ си́лы небе́сныя взыва́ху: Жизнода́вче, Христе́ Бо́же на́шъ, сла́ва Тебѣ́. [Два́жды.]

Сла́ва: Благообра́зный Іо́сифъ съ дре́ва сне́мъ Пречи́стое Твое́ Тѣ́ло, плащани́цею чи́стою обви́въ, и благоуха́ньми во гро́бѣ но́вѣ закры́въ положи́; но тридне́венъ воскре́слъ еси́, Го́споди, подая́й мíрови ве́лію ми́лость.

И ны́нѣ: Мѵроно́сицамъ жена́мъ при гро́бѣ предста́въ а́нгелъ, вопія́ше: мѵ́ра ме́ртвымъ су́ть прили́чна, Христо́съ же истлѣ́нія яви́ся чу́ждь. Но возопíйте: воскре́се Госпо́дь, подая́й мíрови ве́лію ми́лость.

По 1-мъ стихосло́віи сѣда́льны, гла́съ 2:

Ка́мень гро́бный запеча́тати не возбрани́въ, ка́мень вѣ́ры воскресы́й по́далъ еси́ всѣ́мъ, Го́споди, сла́ва Тебѣ́.

Сти́хъ: Воскресни́, Го́споди Бо́же мо́й, да вознесе́тся рука́ Твоя́, [не забу́ди убо́гихъ Твои́хъ до конца́].

Нѣ́дро пречи́стое въ вы́шнихъ не истощи́вый, погребе́ніе и Воскресе́ніе о всѣ́хъ прія́лъ еси́, Го́споди, сла́ва Тебѣ́.

Сла́ва, и ны́нѣ, богоро́диченъ:

Вся́, па́че смы́сла, вся́ пресла́вная Твоя́, Богоро́дице, та́инства, чистотѣ́ запеча́таннѣй и дѣ́вству храни́му, Ма́ти позна́лася еси́ нело́жна, Бо́га ро́ждши Истиннаго. Того́ моли́ спасти́ся душа́мъ на́шимъ.

По второ́мъ стихосло́віи сѣда́льны, гла́съ 2:

Мѵроно́сицы у́тро прише́дшія и гро́бъ то́щь ви́дѣвшія, апо́столомъ глаго́лаху: тлѣ́ніе низложи́ Держа́вный и су́щія во а́дѣ исхити́ у́зъ; проповѣ́дите дерзнове́ніемъ, я́ко воскре́се Христо́съ Бо́гъ, да́руяй мíрови ве́лію ми́лость.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, [повѣ́мъ вся́ чудеса́ Твоя́].

Мѵ́ры погребе́нія Твоего́ жены́ нося́ща, та́й ко гро́бу пріидо́ша ура́нше, іуде́йскія боя́щеся де́рзости и во́иновъ предзря́ще утвержде́ніе. Но естество́ немощно́е му́жество побѣди́, я́ко намѣ́реніе ми́лостивное Бо́гу угоди́. Прили́чно у́бо взыва́ху: воскресни́, Го́споди, помози́ на́мъ и изба́ви на́съ сла́вы ра́ди и́мене Твоего́.

Сла́ва, и ны́нѣ, богоро́диченъ:

Препросла́вленна еси́, Богоро́дице Дѣ́во, пое́мъ Тя́: Кресто́мъ бо Сы́на Твоего́ низложи́ся а́дъ, сме́рть умертви́ся, умерщвле́нніи воста́хомъ и живота́ сподо́бихомся, ра́й воспрія́хомъ, дре́внее наслажде́ніе. Тѣ́мъ, благодаря́ще славосло́вимъ, я́ко держа́внаго Христа́ Бо́га на́шего и еди́наго Многоми́лостиваго.

И чте́ніе во Ева́нгеліи Толково́мъ, по чи́ну своему́. По Непоро́чнахъ тропари́: Ангельскій собо́ръ...

И а́біе ипакои́, гла́съ 2:

По стра́сти ше́дша во гро́бъ жены́, во е́же пома́зати тѣ́ло Твое́, Христе́ Бо́же, ви́дѣша а́нгелы во гро́бѣ и ужасо́шася: гла́съ бо слы́шаху отъ ни́хъ, я́ко воскре́се Госпо́дь, да́руя мíрови ве́лію ми́лость.

И чте́ніе.

И а́біе степе́нны, гла́съ 2, по два́жды.
Антифо́нъ 1:

На не́бо о́чи пуща́ю моего́ се́рдца къ Тебѣ́, Спа́се, спаси́ мя́ Твои́мъ осія́ніемъ.

Поми́луй на́съ согрѣша́ющихъ Тебѣ́ мно́го на вся́кій ча́съ, о Христе́ мо́й, и да́ждь о́бразъ пре́жде конца́ пока́ятися Тебѣ́.

Сла́ва: Свято́му Ду́ху, Еже ца́рствовати подоба́етъ, освяща́ти, подвиза́ти тва́рь: Бо́гъ бо е́сть, Единосу́щенъ Отцу́ и Сло́ву.

И ны́нѣ, то́йже.

Антифо́нъ 2:

Аще не Госпо́дь бы бы́лъ въ на́съ, кто́ дово́ленъ цѣ́лъ сохране́нъ бы́ти отъ врага́, ку́пно и человѣкоуби́йцы?

Зубо́мъ и́хъ не преда́ждь, Спа́се, Твоего́ раба́, и́бо льво́вымъ о́бразомъ на мя́ подвиза́ются врази́ мои́.

Сла́ва: Свято́му Ду́ху живонача́ліе и че́сть: вся́ бо созда́нная, я́ко Бо́гъ Сы́й, си́лою соблюда́етъ во Отцѣ́, Сы́номъ же.

И ны́нѣ, то́йже.

Антифо́нъ 3:

Надѣ́ющіися на Го́спода, уподо́бишася горе́ святѣ́й, и́же ника́коже дви́жутся прило́ги вра́жіими.

Въ беззако́ніи ру́къ свои́хъ да не про́струтъ боже́ственнѣ живу́щіи: не оставля́етъ бо Христо́съ жезла́ на жре́біи Свое́мъ.

Сла́ва: Святы́мъ Ду́хомъ то́чится вся́ка прему́дрость: отсю́ду благода́ть апо́столомъ, и страда́льчествы вѣнча́ются му́ченицы, и проро́цы зря́тъ.

И ны́нѣ, то́йже.

Проки́менъ, гла́съ 2: Воста́ни, Го́споди, Бо́же мо́й, повеле́ніемъ, и́мже заповѣ́далъ еси́,* и со́нмъ люде́й обы́детъ Тя́. Сти́хъ: Го́споди Бо́же мо́й, на Тя́ упова́хъ, спаси́ мя́. Вся́кое дыха́ніе... Ева́нгеліе у́треннее воскре́сное 3, отъ Ма́рка, зача́ло 71: Воскре́съ Іису́съ зау́тра въ пе́рвую суббо́ту... Та́же: Воскресе́ніе Христо́во ви́дѣвше, поклони́мся.., три́жды. Псало́мъ 50-й, и про́чее.

Кано́нъ Па́схи, со ирмосо́мъ и съ богоро́дичны его́, на 6. Та́же настоя́щія недѣ́ли, тріо́ди кано́нъ на 8, гла́съ 2: Творе́ніе господи́на Андре́я Кри́тскаго. Катава́сія: Воскресе́нія де́нь...

Кано́нъ Па́схи, гла́съ 1. Ирмо́съ: Воскресе́нія де́нь...

Очи́стимъ чу́вствія... Небеса́ у́бо досто́йно да веселя́тся...

Иный кано́нъ Богоро́диченъ, подо́бенъ, его́же краестро́чіе на пе́рвыхъ тропарѣ́хъ: Ѳеофа́нусъ. Гла́съ то́йже.

Умерщвле́нія предѣ́лъ сломи́ла еси́, вѣ́чную Жи́знь ро́ждшая — Христа́, изъ гро́ба возсія́вшаго дне́сь, Дѣ́во Всенепоро́чная, и мíръ просвѣти́вшаго.

Воскре́сшаго ви́дѣвши Сы́на Твоего́ и Бо́га, ра́дуйся со апо́столы, Богоблагода́тная Чи́стая, и е́же ра́дуйся пе́рвѣе, я́ко всѣ́хъ ра́дости вина́, воспрія́ла еси́, Богома́ти Всенепоро́чная.

Иный кано́нъ мѵроно́сицъ, въ не́мже поста́вимъ стихо́въ 8.
Пѣ́снь 1. Гла́съ 2.

Ирмо́съ: Моисе́йскую пѣ́снь воспріи́мши, возопíй, душе́: Помо́щникъ и Покрови́тель бы́сть мнѣ́ во спасе́ніе, се́й мо́й Богъ, и просла́влю Его́.

Распя́лся еси́ пло́тію, Безстра́стный естество́мъ Отчимъ; прободе́нъ бы́лъ еси́ въ ре́бра, Источи́вый мíрови кро́вь и во́ду; Ты́ Бо́гъ на́шъ, и прославля́емъ Тя́.

Кре́стъ Тво́й почита́ю и погребе́ніе сла́влю, Бла́же, и пою́, и покланя́юся воста́нію Твоему́, и взыва́ю: Ты́ Бо́гъ на́шъ, и прославля́емъ Тя́.

Аще и вкуси́лъ еси́ же́лчи, Сла́досте Церко́вная, но источи́лъ еси́ на́мъ нетлѣ́ніе отъ ре́бръ Твои́хъ; Ты́ Бо́гъ на́шъ, и прославля́емъ Тя́.

Вмѣни́лся еси́, Спа́се, съ ме́ртвыми, ме́ртвыя воздви́гнувый; вкуси́лъ еси́ тли́, истлѣ́нія бо вся́ко не позна́лъ еси́; Ты́ Бо́гъ на́шъ, и прославля́емъ Тя́.

Да весели́тся Сіо́нъ, да ра́дуется и не́бо: воскре́се Христо́съ, ме́ртвыя воздви́гнувый, пѣсносло́вящія: Ты́ Бо́гъ на́шъ, и прославля́емъ Тя́.

Плащани́цами обви́въ Іо́сифъ Тѣ́ло Твое́, Христе́, во гро́бѣ но́вѣ положи́ Тя́, Спасе́ніе: [Ты́ же] ме́ртвыя, я́ко Бо́гъ, воскреси́лъ еси́.

Предвари́вшія у́тро жены́ ви́дѣша Христа́, и боже́ственнымъ вопія́ху ученико́мъ: вои́стинну Христо́съ воскре́се, пріиди́те съ на́ми воспо́йте Его́.

Сла́ва: Всесвята́я Тро́ице, еди́но Божество́, безнача́льная Еди́нице, Отче и Сы́не и Боже́ственный Ду́ше, спаса́й мíръ: Ты́ Бо́гъ на́шъ, и прославля́емъ Тя́.

И ны́нѣ, [богоро́диченъ]: Дре́внюю кля́тву разрѣши́вши, Чи́стая, во утро́бѣ Твое́й возрасти́ла еси́ на́мъ благослове́ніе, Младе́нца роди́вши: Се́й бо Бо́гъ, а́ще и пло́ть но́ситъ.

Пѣ́снь 3. Ирмо́съ: Пріиди́те, пи́во піе́мъ но́вое...

Ны́нѣ вся́ испо́лнишася свѣ́та... Вчера́ спогребо́хся Тебѣ́, Христе́...

Богоро́диченъ:

На нетлѣ́нную жи́знь прихожду́ дне́сь бла́гостію Ро́ждшагося изъ Тебе́, Чи́стая, и всѣ́мъ конце́мъ свѣ́тъ Облиста́вшаго.

Бо́га, Его́же родила́ еси́ пло́тію, изъ ме́ртвыхъ, я́коже рече́, воста́вша, ви́дѣвши, Чи́стая, лику́й, и Сего́, я́ко Бо́га, Пречи́стая, возвелича́й.

Инъ.

Ирмо́съ: Непло́дствовашій мо́й у́мъ плодоно́сенъ, Бо́же, покажи́ ми, Дѣ́лателю до́брыхъ, Насади́телю благи́хъ, благоутро́біемъ Твои́мъ.

Дла́ни на Крестѣ́ просте́рлъ еси́, Іису́се, язы́ки вся́ отъ пре́лести собра́въ, къ позна́нію Твоему́ созва́лъ еси́, Спа́се.

Іуде́йстіи лю́діе Пила́ту вопію́тъ: отпусти́ на́мъ злодѣ́йственнаго разбо́йника; возми́, возми́ распни́ Безгрѣ́шнаго!

Распе́ншуся Тебѣ́, Христе́, помрачи́ся свѣ́тъ, земля́ потрясе́ся, и изъ гробо́въ ме́ртвіи воста́ша мно́зи стра́хомъ держа́вы Твоея́.

Предстоя́щи Кресту́ Агница Твоя́, Іису́се, пла́чемъ вопія́ше: ка́мо и́деши, Сы́не? ка́мо гряде́ши, Агнче, за всѣ́хъ закла́выйся?

Покланя́юся Твоему́ Кресту́, воспѣва́ю и погребе́ніе, почита́ю стра́сти, и гво́здія руку́, и копіе́, Іису́се, и Воскресе́ніе Твое́.

Воскре́слъ еси́, Іису́се, плѣне́нъ бы́сть вра́гъ, Ада́мъ изба́вися и Ева́ съ ни́мъ отъ у́зъ и тли́ Воскресе́ніемъ Твои́мъ.

Воскре́сшу Тебѣ́, Христе́, сокруши́шася вереи́ и врата́ а́дова, и сме́ртныя у́зы разруши́шася а́біе стра́хомъ держа́вы Твоея́.

Богопріе́мче Іо́сифе, гряди́, ста́ни съ на́ми: воскре́се — зовы́й — Іису́съ Изба́витель, воздви́гнувый Ада́ма благоутро́біемъ Свои́мъ.

Да ра́дуется съ на́ми ученико́въ двоенадеся́тица съ мѵроно́сицами жена́ми и Іо́сифомъ, и со други́ми ученики́ и учени́цами Христо́выми.

Сла́ва: Со Отце́мъ и Сы́ну и Ду́ху Пра́вому, еди́ному Естеству́ покланя́юся и воспѣва́ю, Ли́цы раздѣля́я и Существо́мъ соединя́я.

И ны́нѣ, богоро́диченъ: Блаже́нна еси́, Чи́стая, изъ ко́рене Іессе́ова су́щая, изъ него́же же́злъ и цвѣ́тъ — Христа́ по пло́ти на́съ ра́ди возрасти́вшая.

Конда́къ, гла́съ 8: Аще и во гро́бъ снизше́лъ еси́... И и́косъ.

И сѣда́ленъ гла́съ 2. Подо́бенъ: Вы́шнихъ ища́...

Мѵ́ра те́плѣ гро́бу прино́сятъ жены́, Спа́се, а́нгела свѣ́тлостію ду́ши веселя́ху, и Бо́га Тя́ всѣ́хъ проповѣ́даху, и ученико́мъ вопія́ху: вои́стинну воскре́се изъ гро́ба всѣ́хъ Жи́знь.

Сла́ва, и ны́нѣ, гла́съ то́йже:

Ученико́въ Твои́хъ ли́къ съ мѵроно́сицами жена́ми ра́дуется согла́сно: о́бщій бо пра́здникъ съ ни́ми пра́зднуютъ въ сла́ву и че́сть Твоего́ Воскресе́нія. И тѣ́ми вопіе́мъ Ти́, Человѣколю́бче Го́споди: лю́демъ Твои́мъ пода́ждь ве́лію ми́лость.

Пѣ́снь 4. Ирмо́съ: На Боже́ственнѣй стра́жи...

Му́жескій у́бо по́лъ, я́ко разве́рзый... Яко единолѣ́тный а́гнецъ... Богооте́цъ у́бо Дави́дъ...

Богоро́диченъ, то́йже:

Созда́вый Ада́ма, Твоего́ пра́отца, Чи́стая, зи́ждется отъ Тебе́, и сме́ртное жили́ще разори́ Свое́ю сме́ртію дне́сь, и озари́ вся́ Боже́ственными блиста́ньми Воскресе́нія.

Его́же родила́ еси́, Христа́, прекра́сно изъ ме́ртвыхъ возсія́вша, Чи́стая, зря́щи, До́брая и Непоро́чная въ жена́хъ и Кра́сная, дне́сь во спасе́ніе всѣ́хъ, со апо́столы ра́дующися, Того́ прославля́й.

Инъ.

Ирмо́съ: Еже отъ Дѣ́вы Твое́ рождество́ проро́къ предзря́, возпроповѣ́даше, вопія́: слу́хъ Твой услы́шахъ и убоя́хся, я́ко отъ ю́га и изъ горы́ святы́я приосѣне́нныя прише́лъ еси́, Христе́.

Кресто́мъ плѣни́лъ еси́ а́дово чре́во, и совоздви́глъ еси́ ме́ртвыя, и сме́рти разруши́лъ еси́ мучи́тельство: тѣ́мже и́же отъ Ада́ма покланя́ющіися, пое́мъ погребе́ніе Твое́ и воста́ніе, Христе́.

Благоволи́вый, Спа́се на́шъ, за благоутро́біе ми́лости пригвозди́тися на Крестѣ́ и отъ пра́отчія изба́вити ны́ кля́твы, разрѣши́ у́зы мно́гихъ мои́хъ согрѣше́ній: мо́жеши бо, ели́ка хо́щеши, твори́ти.

На Крестѣ́ пригвозди́вый мою́ дре́внюю кля́тву и источи́вый мнѣ́, Спа́се, благослове́ніе кро́вію отъ ре́бръ Твои́хъ, разрѣши́ у́зы мно́гихъ мои́хъ согрѣше́ній: мо́жеши бо, ели́ка хо́щеши, твори́ти.

Адъ, Спа́се, срѣ́тъ Тя́ въ преиспо́днихъ, огорчи́ся, помышля́я, я́ко я́же дре́вле пожре́ти возмогíй, ны́нѣ нево́лею отда́въ, истязу́ется въ до́льнихъ, и плѣня́емь и обнажа́емь быва́етъ ме́ртвыхъ.

Аще и ка́мень запеча́тася съ кустодíею, о беззако́нніи врази́, но воскре́се Госпо́дь, я́коже прорече́, разрѣша́я у́зы мно́гихъ мои́хъ согрѣше́ній: мо́жетъ бо, ели́ка хо́щетъ, твори́ти.

Воскресы́й изъ гро́ба, и плѣни́вый а́да, и оживи́вый ме́ртвыя, и нетлѣ́ніе источи́вый мнѣ́ Твои́мъ воста́ніемъ, разрѣши́ у́зы мно́гихъ мои́хъ согрѣше́ній: мо́жеши бо, ели́ка хо́щеши, твори́ти.

Вои́стинну постыди́теся, беззако́нніи: Христо́съ бо воскре́се и совоздви́же ме́ртвыя, зовы́й: дерза́йте, Азъ побѣди́хъ мíръ! Вѣ́руйте у́бо Ему́ или́ умолчи́те, лестцы́, отмета́ющіися Воскресе́нія Его́.

Мѵроно́сицамъ е́же «ра́дуйтеся, — воскресы́й отъ гро́ба, возгласи́въ, Бла́же, — и апо́столомъ проповѣ́дайте воста́ніе Мое́», разрѣши́ у́зы мно́гихъ мои́хъ согрѣше́ній: мо́жеши бо, ели́ка хо́щеши, твори́ти.

Іо́сифа благообра́знаго, ревни́теля благоче́стія, совѣ́тника и ученика́, съ мѵроно́сицами почти́мъ и апо́столами, зову́ще съ ни́ми и вѣ́рно воспѣва́юще Спа́сово Воскресе́ніе свѣ́тло.

Сла́ва: Пресу́щнаго Божества́ нераздѣ́льную сла́ву кто́ возмо́жетъ изрещи́? Еди́но бо Естество́мъ су́щи, Тро́ица пое́тся Безнача́льная, сра́сленная я́ко Еди́ница, въ Тро́ицѣ пѣва́емая Ѵпоста́сьми просты́ми.

И ны́нѣ, богоро́диченъ: Во чре́во Твое́ Все́льшагося безму́жно ро́ждшая, Ма́ти Дѣ́во Чи́стая, непреста́нно моли́, я́ко Богоро́дица, разрѣши́ти у́зы мно́гихъ мои́хъ согрѣше́ній: мо́жеши бо, ели́ка хо́щеши, помощи́.

Пѣ́снь 5. Ирмо́съ: Утренюемъ у́треннюю глубоку́...

Безмѣ́рное Твое́ благоутро́біе... Присту́пимъ свѣщено́сніи...

Богоро́диченъ:

Просвѣща́ется Боже́ственными луча́ми и живоно́сными Воскресе́нія Сы́на Твоего́, Богома́ти Пречи́стая, и ра́дости исполня́ется благочести́выхъ собра́ніе.

Не разве́рзлъ еси́ врата́ дѣ́вства въ воплоще́ніи, гро́ба не разруши́лъ еси́ печа́тей, Царю́ созда́нія, отону́дуже Воскре́сшаго Тя́ зря́щи Ма́ти, ра́довашеся.

Инъ.

Ирмо́съ: Мглу́ души́ моея́, Спа́се мо́й, разгна́въ свѣ́томъ за́повѣдей Твои́хъ, озари́ мя, я́ко еди́нъ Ца́рь ми́ра.

Ты́ пе́рвую оде́жду мою́, ю́же ми́ истка́, — увы́ мнѣ́! — сѣ́ятель грѣха́, совле́клъ еси́, Спа́се мо́й, обле́кся въ мя́.

Ли́ствіе смоко́вное сши́ мнѣ́ грѣ́хъ мо́й, — увы́ мнѣ́! — не сохра́ншему, Спа́се мо́й, пречи́стую за́повѣдь Твою́ зміи́нымъ совѣ́томъ.

Уязви́вшуюся ду́шу мою́ разбо́йническими помышле́ньми мои́ми, предста́вый Иже отъ Марíи, и еле́й возлія́въ, исцѣли́ Христо́съ.

У Креста́ предстоя́щи, Пречи́стая Богоро́дица ма́терски взыва́ше: оста́вилъ Мя́ еси́ еди́ну, о Сы́не Мо́й и Бо́же!

Ты́ злонача́льнаго змíя ору́жіемъ Креста́ Твоего́ низложи́въ, Твои́мъ воста́ніемъ сокруши́лъ еси́ жа́ло сме́рти, Іису́се.

Гдѣ́ твое́, сме́рте, жа́ло? Гдѣ́ твоя́, а́де, побѣ́да? Ада́мъ да свопіе́тъ: сокруши́лся еси́ оживле́ніемъ Воздви́гшаго ме́ртвыя.

Мѵроно́сицы жены́ гро́ба Твоего́ дости́гшія, Оживи́вшаго до́льныхъ, гла́съ слы́шаху глаго́лющій: воскре́се Христо́съ!

Благочести́выхъ мѵроно́сицъ па́мять соверша́юще и всѣ́хъ учени́къ Твои́хъ, въ свѣ́тломъ Твое́мъ воста́ніи воспѣва́емъ Тя́, Христе́.

Благообра́знаго вси́ почти́мъ досто́йно, и́же Тѣ́ло Госпо́дне отъ Дре́ва сня́ и погребе́ вѣ́рно.

Сла́ва: Тебѣ́ Бо́гу и Отцу́, и Сы́ну, и Ду́ху покланя́юся, тре́мъ Ѵпоста́семъ, и Еди́но Три́ вѣ́рую, Существо́мъ еди́нѣмъ.

И ны́нѣ, [богоро́диченъ]: Тя́, безсѣ́меннымъ Рождество́мъ роди́вшую па́че естества́ Обнови́вшаго естество́, Христа́ еди́наго Влады́ку, воспѣва́емъ вѣ́рніи.

Пѣ́снь 6. Ирмо́съ: Снизше́лъ еси́ въ преиспо́дняя земли́...

Сохрани́въ цѣ́ла зна́менія, Христе́... Спа́се мо́й, живо́е же...

Богоро́диченъ:

Возведе́ся дре́вле держи́мое сме́ртію и тлѣ́ніемъ, Воплоти́вшимся отъ Твоего́ пречи́стаго чре́ва, къ нетлѣ́ннѣй и присносу́щнѣй жи́зни, Богоро́дице Дѣ́во.

Сни́де въ преиспо́дняя земли́, въ ложесна́ Твоя́, Чи́стая, Сше́дый, и Всели́выйся и Воплоти́выйся па́че ума́, и воздви́же съ Собо́ю Ада́ма, воскре́съ отъ гро́ба.

Инъ.

Ирмо́съ: Во глубинѣ́ грѣхо́внѣй содержи́мь е́смь, Спа́се, и въ пучи́нѣ жите́йстѣй обурева́емь, но, я́коже Іо́ну отъ звѣ́ря, и мене́ отъ страсте́й возведи́ и спаси́ мя.

Ме́ртвъ е́сть а́дъ, дерза́йте, земноро́дніи! Христо́съ бо, на Дре́вѣ ви́сяй, ве́рже ору́жіе на́нь, и лежи́тъ ме́ртвъ: я́же бо имя́ше, плѣни́ся обнажи́вся.

Плѣни́ся а́дъ, дерза́йте, ме́ртвіи, и гро́би отверзо́шася, воста́ните отъ а́да! — вопіе́тъ ва́мъ Христо́съ, вся́ прише́дый изба́вити отъ сме́рти и тли́.

Ме́ртвыя, я́коже возмо́гъ поже́рлъ еси́ иногда́, ны́нѣ истязу́емь, а́де, отда́ждь Ми́! — вопіе́тъ тебѣ́ Жизнода́вецъ и Бо́гъ, вся́ прише́дый изба́вити отъ несы́таго твоего́ чре́ва.

Жены́ мѵроно́сицы, что́ тщите́ся про́чее? что́ же Живо́му мѵ́ра прино́сите? Воскре́се Христо́съ, я́коже предрече́. Да преста́нутъ ва́ша сле́зы, преше́дшія на ра́дость.

Плащани́цею Тя́, Христе́, обви́въ Іо́сифъ благообра́зный, во гро́бѣ положи́; мѵропома́завъ же разоре́ный Твоего́ Тѣлесе́ хра́мъ, привали́ ка́мень вели́кій ко гро́бу.

Госпо́дь воскре́се, плѣни́вый врага́ и у́зники исто́ргнувъ, возведе́ вся́ и первозда́ннаго Ада́ма, того́ возставля́я, я́ко Благоутро́бенъ и Человѣколю́бецъ Бо́гъ.

Сла́ва: Тро́ицу во Еди́нствѣ воспои́мъ, вѣ́рніи, съ Сы́номъ Отца́ сла́вяще, и Ду́ха, единосу́щна Сы́ну и су́ща во Отцѣ́: Собезнача́льнаго и Присносу́щнаго Бо́га.

И ны́нѣ, богоро́диченъ: Во чре́вѣ невоздѣ́ланно зачала́ еси́, Чи́стая, нетлѣ́нія Гро́здъ, я́ко лоза́: изъ нея́же безсме́ртія то́ки, я́коже вино́, на́мъ источа́ютъ вѣ́чную жи́знь.

Конда́къ, гла́съ 2:

Ра́доватися мѵроно́сицамъ повелѣ́лъ еси́, пла́чь прама́тере Евы утоли́лъ еси́ Воскресе́ніемъ Твои́мъ, Христе́ Бо́же, апо́столомъ же Твои́мъ проповѣ́дати повелѣ́лъ еси́: Спа́съ воскре́се отъ гро́ба.

Икосъ:

На гро́бъ Тво́й, Спа́се, мѵроно́сицы иду́щія, къ себѣ́ недоумѣва́хуся умо́мъ и вѣща́ху: кто́ на́мъ ка́мень отвали́тъ гро́бный? И воззрѣ́вша ви́дятъ, я́ко ка́мень отвале́нъ бѣ́, зра́ку же а́нгелову со одѣя́ніемъ дивля́хуся; содержи́ми же бя́ху тре́петомъ и бѣжа́ти помышля́ху. И къ ни́мъ ю́ноша возопи́: не бо́йтеся вы́, Его́же и́щете — воста́; пріиди́те, ви́дите мѣ́сто, идѣ́же лежа́ше Тѣ́ло Іису́сово, и ско́ро ше́дшія возвѣсти́те ученико́мъ: Спа́съ воскре́се отъ гро́ба.

Синакса́рь мине́и. Та́же настоя́щій.

Стихи́: Христу́ но́сятъ учени́цы мѵ́ра,
                  Азъ же си́мъ пѣ́снь, я́ко мѵ́ра ношу́.

Въ сíй де́нь, недѣ́лю тре́тію по Па́сцѣ, святы́хъ же́нъ мѵроно́сицъ пра́здникъ пра́зднуемъ. Еще́ же и па́мять твори́мъ и́же отъ Аримаѳе́я Іо́сифу, и́же бѣ́ учени́къ сокрове́нъ отъ седми́десятихъ еди́нъ сы́й. Къ си́мъ же и нощна́го ученика́ Никоди́ма, и́же отъ князе́й ко Христу́ приступи́. Зане́ жены́ у́бо ты́я су́ть свидѣ́теліе нело́жныя и пе́рвыя Воскресе́нія, Іо́сифъ же и Никоди́мъ — погребе́нія: я́же у́бо и и́стиннѣйшая су́ть и содержи́тельнѣйшая, е́же по на́мъ догма́та.

Абіе бо Никоди́мъ у́бо отъ со́нмища изгна́нъ бы́сть, не изволя́я іуде́емъ сму́дрствовати. Іо́сифъ же, по е́же погребсти́ Госпо́дне Тѣ́ло, въ ро́въ отъ іуде́й вмета́емь быва́етъ, и Боже́ственною си́лою отону́ду восхища́ется и во Аримаѳе́й, во свое́ оте́чество, отхо́дитъ. И воскре́съ Христо́съ, ему́ явля́ется, у́зами содержи́му, и увѣря́етъ ему́ вя́щше Воскресе́нія та́инство. Мно́га же и отъ іуде́й стражда́, молча́нію та́инственная дая́ти не стерпѣ́, но со дерзнове́ніемъ вся́ бы́вшимъ уча́ше. Глаго́лется у́бо, я́ко и Никоди́мъ се́й пото́нку я́же о Стра́сти Христо́вѣ и о Воскресе́ніи сочине́ніемъ уясни́ пе́рвый всѣ́хъ, я́ко со́нмища сы́й, и извѣ́стнѣе и совѣ́ты іуде́й и словеса́, и про́ста вся́ вѣ́дый.

И сея́ ра́ди вины́, я́коже реко́хомъ, я́ко нело́жніи погребе́нія свидѣ́теліе, съ ви́дѣвшими жена́ми Воскресе́ніе учини́шася. И по пе́рвомъ Ѳоминѣ́ увѣре́ніи, о́ному предучинено́ бы́сть, я́ко по дне́хъ осми́хъ, глаго́летъ, пріи́де благовѣ́стіе. Жены́ у́бо сія́ пе́рвыя Воскресе́ніе ви́дѣша и ученико́мъ сіе́ благовѣсти́ша. Подоба́ше бо пе́рвѣе па́дшему пле́мени подъ грѣ́хъ и кля́тву наслѣ́дствовавшему, тому́ пе́рвѣе и Воскресе́ніе ви́дѣти и ра́дость внуши́ти, пе́рвѣе слы́шавшему: въ печа́лѣхъ роди́ши ча́да.

Мѵроно́сицы же нарече́ны бы́ша, зане́ Па́схи настоя́щей пятка́ [уготовле́нія] ра́ди, я́ко вели́къ де́нь бя́ше суббо́ты о́ныя, елма́ тща́хуся и погребсти́ тѣ́ло Госпо́дне Іо́сифъ и Никоди́мъ, и́же по іуде́йскому обы́чаю мѵ́ры Сего́ пома́заша, но не я́коже досто́яше: ало́й бо и сми́рну вя́щше вложи́вше, и плащани́цею обви́вше, гро́бу преда́ша. Сего́ ра́ди сія́, любо́вь те́плѣ ко Христу́ иму́щія я́ко учени́цы, мѵ́ра многоцѣ́нныя купи́вшія, но́щію пріидо́ша. Ку́пно у́бо и іуде́йскаго ра́ди стра́ха, ку́пно же я́ко и обы́чай бѣ́ ра́нѣе опла́кати и пома́зати то́, и оску́дное за ско́рость вре́мене тогда́ наверши́ти. Егда́ прише́дшія разли́чная явле́нія ви́дѣша: блиста́ющася же два́ а́нгела вну́трь гро́ба, и на ка́мени сѣдя́ща друга́го; по си́хъ же Христа́ ви́дятъ и покланя́ются; Магдали́на же, и я́ко огра́дника мня́щи, Того́ о Само́мъ вопроша́ше.

Мно́ги у́бо бы́ша мѵроно́сицы, но евангели́сти о наро́читыхъ то́чію сотво́рше помина́ніе, другíя оста́виша. Бя́ху же сія́: пе́рвая всѣ́хъ — Магдали́на Марíя, изъ нея́же и де́моновъ се́дмь Христо́съ изгна́, я́же и по Христо́вѣ вознесе́ніи въ Ри́мъ прише́дши, я́ко сло́вомъ но́вымъ, сме́рти Пила́та и архіере́я предае́тъ, я́же о Спа́сѣ Христѣ́ Тиве́рію ке́сарю возвѣсти́вши; послѣди́ же во Ефе́сѣ умира́етъ и отъ Богосло́ва Іоа́нна погреба́ется, отъ Прему́драго же Льва́ въ Константи́нь гра́дъ прино́сится. Втора́я же — Сало́ми, я́же е́сть Обру́чника Іо́сифа дщи́, си́це бо и обои́хъ именова́ху, я́же дщи́ его́, Зеведе́я имя́ше му́жа, отъ нея́же евангели́стъ Іоа́ннъ и Іа́ковъ роди́стася. Четы́ри бо сы́ны му́жеска по́лу роди́ Іо́сифъ: Іа́кова, глаго́лемаго Ма́лаго, и Іосíю, Си́мона и Іу́ду, и дще́ри три́: Есѳи́рь, Ѳама́рь и Сало́ми Зеведе́ову. Якоже егда́ слы́шиши во Ева́нгеліи Марíю, Іа́кова Ма́лаго и Іосíеву Ма́терь, Богоро́дицу непщу́й бы́ти, я́ко Ма́терь Іо́сифовыхъ ча́дъ Богоро́дица вмѣня́шеся. Якоже приключи́тися отсю́ду, сестри́чищу бы́ти Христо́ву евангели́сту Іоа́нну, я́ко бра́тню сы́ну. Тре́тія же мѵроно́сицъ е́сть Іоа́нна, жена́ Хуза́ня, и́же бя́ше назира́тель и строи́тель до́му царя́ Ирода. Четве́ртая же и пя́тая — Марíя и Ма́рѳа, сестрѣ́ Ла́заревѣ. Шеста́я — Марíя Клео́пина. Седма́я — Соса́нна, и ины́я мно́жайшія бя́ху, я́коже Лука́ боже́ственный повѣству́етъ: я́же бя́ху, глаго́летъ, служа́щія Христу́ и ученико́мъ Его́ отъ имѣ́ній свои́хъ. Яко у́бо ты́я Воскресе́ніе проповѣ́даша и мно́гія по на́мъ догма́ты сказа́ша, во увѣре́ніе и извѣще́ніе и́стинное Воскресе́нія Христо́ва. По Ѳомѣ́ и си́мъ прія́тъ пра́здновати Христо́ва Це́рковь, я́ко ви́дѣвшимъ пе́рвымъ Христа́ отъ ме́ртвыхъ воскре́сша и всѣ́мъ извѣсти́вшимъ спаси́тельное проповѣ́даніе, и е́же по Христѣ́ жи́тельство проше́дшимъ изря́дно, и я́коже досто́яше жена́мъ, науче́ннымъ отъ Христа́.

Святы́хъ мѵроно́сицъ моли́твами, Бо́же, поми́луй на́съ.

Пѣ́снь 7. Ирмо́съ: Отроки отъ пе́щи...

Жены́ съ мѵ́ры... Сме́рти пра́зднуимъ... Яко вои́стинну свяще́нная...

Богоро́диченъ:

Умертви́въ Сы́нъ Тво́й сме́рть, Всенепоро́чная, дне́сь всѣ́мъ сме́ртнымъ пребыва́ющій живо́тъ во вѣ́ки вѣко́въ дарова́, еди́нъ Благослове́нный, отце́въ Бо́гъ и Препросла́вленный.

Всѣ́мъ ца́рствуяй созда́ніемъ, бы́въ человѣ́къ, всели́ся въ Твою́, Богоблагода́тная, утро́бу, и распя́тіе претерпѣ́въ и сме́рть, воскре́се боголѣ́пно, совозста́вивъ на́съ, я́ко Всеси́ленъ.

Инъ.

Ирмо́съ: Херуви́мы подража́юще, о́троцы въ пещи́ ликовствова́ху, вопію́ще: благослове́нъ еси́, Бо́же, я́ко и́стиною и судо́мъ наве́лъ еси́ сія́ вся́ грѣ́хъ ра́ди на́шихъ, препѣ́тый, и препросла́вленный во вся́ вѣ́ки.

Ты́, я́ко Человѣколю́бецъ, хотя́й вся́ спасти́ отъ пре́лести, я́же созда́лъ еси́, претерпѣ́лъ еси́ пригвозди́тися на Крестѣ́, да погребе́нный о́бразъ страстьми́, се́й пло́тію Твое́ю обнови́ши, Спа́се, и а́дъ низложи́въ, воскреси́лъ еси́ и уме́ршія съ Собо́ю.

На Крестѣ́ возвыша́емь, вся́ призва́лъ еси́ къ Себѣ́, Ще́дре, я́коже обѣща́лъ еси́, Бла́же, я́ко вои́стинну вся́ сія́ грѣхо́въ ра́ди на́шихъ пострада́ти благоволи́лъ еси́. Тѣ́мже и разбо́йнику ра́йская врата́ отве́рзлъ еси́, Спа́се.

Ты́ хра́мъ тѣле́сный воздви́глъ еси́ разоре́нный, тридне́вно изъ гро́ба, я́коже обѣща́лъ еси́, Бла́же, да вои́стинну ска́жеши сла́ву Твою́, ю́же на́мъ источа́еши вѣ́рою, у́зы разрѣши́въ, и́хже держа́ше дре́вле а́дъ свя́занныхъ.

О, іуде́йское безу́міе! О, неи́стовство беззако́нныхъ! Что́ невѣ́рное ви́дѣвше, не вѣ́ровасте Христу́? Яко немощны́я не сло́вомъ ли воздви́же? или́ я́ко ве́сь мíръ То́й не спасе́ ли? Да увѣря́ютъ ва́съ поне́ во́ини или́ воскре́сшіе изъ ме́ртвыхъ.

Омертвѣ́вшіи стра́жіе ны́нѣ да глаго́лютъ, ка́ко укра́денъ бы́сть, Его́же не ви́дѣша неразу́мніи всегда́? Аще бо Воскре́сша не ви́дѣша, ни ощути́ша, ка́ко укра́дена Сего́ разумѣ́ти можа́ху когда́? Да увѣ́ритъ вы́ поне́ ка́мень се́й и погреба́льная Христо́ва.

Что́, я́ко ме́ртва, блюде́те? что́ печа́ти на ка́мени положи́сте, евре́е, стра́хомъ боя́щеся краде́нія? Се́ вои́стинну гро́бъ запечатлѣ́ся: ка́ко у́бо воскре́се, а́ще не бы́ Бо́гъ бы́лъ Христо́съ? Да увѣря́ютъ вы́ воскре́сшіи и ви́дѣни бы́вшіи мно́гими.

Сла́ва: Со Отце́мъ сла́вимъ Сы́на и Ду́ха Свята́го, вопію́ще непреста́ннымъ гла́сомъ: Тро́ице еди́нственное Существо́, поми́луй, спаси́ вся́, въ Тріе́хъ Ли́цѣхъ Еди́нице, уще́дри ны́, Препросла́вленный Бо́же, во вѣ́ки.

И ны́нѣ, богоро́диченъ: Во чре́вѣ Твое́мъ, Пречи́стая, ка́ко вмѣсти́ла еси́ Младе́нца, Его́же трепе́щутъ си́лы а́нгельскія, я́ко Бо́га? Ра́звѣ я́коже восхотѣ́, я́коже вѣ́сть, всели́ся, вся́ спасти́ хотя́й отъ Ада́ма земноро́дныя, Разрѣши́вый Ада́ма кля́твы о́ныя снѣ́дію го́рькою.

Пѣ́снь 8. Ирмо́съ: Се́й нарече́нный...

Пріиди́те но́ваго... Возведи́ о́крестъ о́чи твои́... Отче Вседержи́телю...

Богоро́диченъ:

Пріи́де Тобо́ю въ мíръ Госпо́дь, Дѣ́во Богоро́дице, и чре́во а́дово расто́ргъ, сме́ртнымъ на́мъ воскресе́ніе дарова́, тѣ́мже благослови́мъ Его́ во вѣ́ки.

Всю́ низложи́въ сме́рти держа́ву Сы́нъ Тво́й, Дѣ́во, Свои́мъ Воскресе́ніемъ, я́ко Бо́гъ Крѣ́пкій совознесе́ на́съ и обожи́, тѣ́мже воспѣва́емъ Его́ во вѣ́ки.

Инъ.

Ирмо́съ: Въ купинѣ́ Моисе́ю Дѣ́вы чу́до на Сина́йстѣй горѣ́ Прообрази́вшаго иногда́, по́йте, благослови́те и превозноси́те во вся́ вѣ́ки.

Со́лнечныя зари́ спря́тахуся стра́хомъ Христо́выхъ страда́ній, и востая́ху ме́ртвіи, и го́ры прекланя́хуся, и колеба́шеся земля́, и а́дъ обнажа́шеся.

Въ пещи́ су́щіи иногда́ треблаже́нніи о́троцы возвыша́юще ру́ки, прообража́ху, Бла́же, пречестны́й Кре́стъ Тво́й, и́мже низложи́лъ еси́, Христе́, вра́жію си́лу.

О, іуде́е, слѣпíи преле́стницы и престу́пницы, Христо́ву Воскресе́нію невѣ́рующіи, я́ко ло́жному! Что́ невѣ́рное ви́дите, я́ко воскре́се Христо́съ, ме́ртвыя воздви́гій?

О, іуде́е врази́! Аще и на́мъ не вѣ́руете, ва́ша во́ины вы́ вопроси́те, что́ пострада́ша они́? Кто́ отвали́вый рука́ми ка́мень отъ гро́ба?

Кто́ изсуши́вый смоко́вницу? Кто́ же суху́ю исцѣли́вый ру́ку? Кто́ насы́тивый иногда́ мно́жества въ пусты́ни, а́ще не Христо́съ Бо́гъ, ме́ртвыя воздви́гнувый?

Кто́ просвѣти́вый слѣпцы́, и прокаже́нныя очи́стивый, и хромы́я испра́вивый, и пѣшеше́ствовавый мо́ре немо́кренно, я́ко су́шу, а́ще не Христо́съ Бо́гъ, ме́ртвыя воздви́гнувый?

Кто́ воздви́гнувый ме́ртва четверодне́вна изъ гро́ба, и вдови́ча сы́на? Кто́ стягну́вый, я́ко Бо́гъ, разсла́блена на одрѣ́, а́ще не Христо́съ Бо́гъ, ме́ртвыя воздви́гнувый?

Зове́тъ ка́мень са́мый, печа́ти вопію́тъ, я́же вы́ положи́вше, поста́висте стра́жу, храня́щую гро́бъ: вои́стинну воскре́се Христо́съ и живе́тъ во вѣ́ки.

Вои́стинну воскре́се Христо́съ, плѣне́нъ бы́сть а́дъ, умертви́ся змíй, изба́вися Ада́мъ, потрясо́шася до́льніи: что́ не вѣ́руете про́чее, врази́ и престу́пницы?

Благослови́мъ Отца́, и Сы́на, и Свята́го Ду́ха, Го́спода.

Со Отце́мъ Сы́на и Ду́ха Свята́го, Святу́ю Тро́ицу въ Божествѣ́ еди́номъ прославля́емъ, вопію́ще: Свя́тъ, Свя́тъ, Свя́тъ еси́ во вѣ́ки.

И ны́нѣ, богоро́диченъ: Во чре́вѣ Твое́мъ, Чи́стая, присноживо́тный Хлѣ́бъ, смѣше́ный несмѣ́сно смѣше́ніемъ на́шимъ, родила́ еси́ непрело́жно еди́наго Христа́ Бо́га во двою́ существу́.

Та́же: Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].
Катава́сія: Се́й нарече́нный и святы́й де́нь...
Честнѣ́йшую... не пое́мъ до отда́нія Па́схи во вся́ недѣ́ли.

Пѣ́снь 9. Ирмо́съ: Свѣти́ся, свѣти́ся, но́вый Іерусали́ме...

О, Боже́ственнаго, о любе́знаго... О, Па́сха ве́лія и свяще́ннѣйшая...

Богоро́диченъ:

Согла́сно, Дѣ́во, Тебе́ блажи́мъ вѣ́рніи: ра́дуйся, Две́ре Госпо́дня; ра́дуйся, Гра́де одушевле́нный; ра́дуйся, Ея́же ра́ди на́мъ ны́нѣ возсія́ свѣ́тъ, изъ Тебе́ Рожде́ннаго изъ ме́ртвыхъ Воскресе́нія.

Весели́ся и ра́дуйся, Боже́ственная Две́ре Свѣ́та: заше́дый бо Іису́съ во гро́бъ возсія́, просія́въ со́лнца свѣтлѣ́е и вѣ́рныя вся́ озари́въ, Богора́дованная Влады́чице.

Инъ.

Ирмо́съ: Преесте́ственно пло́тію заче́ншую во чре́вѣ, отъ Отца́ безлѣ́тно предвозсія́вшее Сло́во, въ пѣ́снехъ немо́лчныхъ велича́емъ, вѣ́рніи.

Иже на Крестѣ́ разбо́йника, позна́вша Тя́ Бо́га, наслѣ́дника содѣ́лалъ еси́ мы́сленному раю́, е́же — помяни́ мя́, — вопію́ща, — Всеси́льне Спа́се!

Зауше́нъ на́съ ра́ди и оплева́нъ бы́лъ еси́, Іису́се, отъ беззако́нниковъ, скрижа́ли зако́на начерта́вый въ Сина́и уго́днику Моисе́ю.

О́цта и же́лчи, Спа́се, напое́нъ бы́лъ еси́ на́съ ра́ди, да́вый на́мъ Тѣ́ло и Честну́ю Кро́вь въ снѣ́дь же и питіе́ вѣ́чныя Твоея́ жи́зни.

Въ животво́рная ре́бра копіе́мъ прободе́нъ бы́въ, Христе́, Пречи́стую Твою́ Кро́вь, и Честну́ю Во́ду источи́лъ еси́ мíрови, я́ко присноживо́тный Исто́чникъ.

Вмѣни́лся еси́ въ ме́ртвыхъ, Оживле́й ме́ртвыя; во гро́бѣ положе́нъ еси́, Истощи́вый гро́бы; плѣни́лъ еси́ а́дъ, воскреси́въ Ада́ма.

Воскре́слъ еси́, Іису́се: свя́занъ бы́сть вра́гъ, плѣни́ся а́дъ, испраздни́шася гро́би, воста́ша до́льніи, покланя́ющеся Тебѣ́, Христе́.

Кто́ укра́дый ме́ртваго, па́че же и на́га? что́ льстите́ся, евре́е? Христо́съ воскре́се, и разруша́ются а́довы у́зы и вереи́.

Сла́ва Тебѣ́, Христе́ Спа́се, источи́вый жи́знь, и свѣ́тъ возсія́вый су́щимъ во тмѣ́ невѣ́дѣнія, и всю́ зе́млю просвѣти́вый воста́ніемъ Твои́мъ.

Благообра́зный совѣ́тникъ Іо́сифъ да пое́тся съ мѵроно́сицами и боже́ственными ученики́, я́ко проповѣ́дникъ сы́й и се́й воста́нія Христо́ва.

Іо́сифа чу́днаго да восхва́лимъ, вѣ́рніи, ку́пно съ Никоди́момъ и мѵроно́сицами вѣ́рными, вопію́щія: Госпо́дь воскре́се вои́стинну!

Сла́ва: Безнача́ленъ еси́ Отче, несозда́ненъ еси́ Сы́не, сопресто́ленъ и Ду́ше Святы́й, еди́но (Сія́ Три́) Естество́мъ, и Три́ Ли́цы, еди́не Бо́же Истинный.

И ны́нѣ, богоро́диченъ: Да весели́тся Іессе́й, да ликовству́етъ и Дави́дъ: се́ бо Дѣ́ва — богора́сленный Же́злъ — прозябе́ Цвѣ́тъ присноживо́тный — Христа́.

Вмѣ́сто Досто́йно... ирмо́съ, катава́сія: Свѣти́ся, свѣти́ся...

Та́же: Свя́тъ Госпо́дь Бо́гъ на́шъ.., на гла́съ 2.

Ексапостила́рій Па́сцѣ: Пло́тію усну́въ.., еди́ножды (ищи́ ли́стъ 6).

Сла́ва, мѵроно́сицамъ:

Жены́, услы́шите гла́съ ра́дованія: мучи́теля а́да Попра́вый отъ тли́ мíръ воздви́же; тецы́те, друго́мъ рцы́те Мои́мъ благовѣ́стія: хощу́ бо созда́ніе Свое́ ра́достію озари́ти, отону́дуже пріи́де печа́ль.

И ны́нѣ, то́йже.

На хвали́техъ: Вся́кое дыха́ніе.., поста́вимъ стихо́въ 8 и пое́мъ стихи́ры воскре́сны 4, гла́съ 2:

Сти́хъ: Сотвори́ти въ ни́хъ су́дъ напи́санъ, сла́ва сія́ бу́детъ всѣ́мъ преподо́бнымъ Его́.

Вся́кое дыха́ніе и вся́ тва́рь Тя́ сла́витъ, Го́споди, я́ко Кресто́мъ смерть упраздни́лъ еси́, да пока́жеши лю́демъ е́же изъ ме́ртвыхъ Твое́ Воскресе́ніе, я́ко еди́нъ Человѣколю́бецъ.

Сти́хъ: Хвали́те Бо́га во святы́хъ Его́, [хвали́те Его́ во утвержде́ніи си́лы Его́].

Да реку́тъ іуде́и, ка́ко во́ини погуби́ша стрегу́щіи Царя́? Почто́ бо ка́мень не сохрани́ Ка́мене жи́зни? Или́ Погребе́ннаго да дадя́тъ, или́ Воскре́сшему да покло́нятся, глаго́люще съ на́ми: сла́ва мно́жеству щедро́тъ Твои́хъ, Спа́се на́шъ, сла́ва Тебѣ́!

Сти́хъ: Хвали́те Его́ на си́лахъ Его́, [хвали́те Его́ по мно́жеству вели́чествія Его́].

Ра́дуйтеся, лю́діе, и весели́теся, а́нгелъ сѣдя́й на ка́мени гро́бнѣмъ, то́й на́мъ благовѣсти́, ре́къ: Христо́съ воскре́се изъ ме́ртвыхъ, Спа́съ мíра, и испо́лни вся́ческая благоуха́нія. Ра́дуйтеся, лю́діе, и весели́теся!

Сти́хъ: Хвали́те Его́ во гла́сѣ тру́бнѣмъ, [хвали́те Его́ во псалти́ри и гу́слехъ].

Ангелъ у́бо е́же — ра́дуйся! — пре́жде Твоего́ зача́тія, Го́споди, Благода́тнѣй принесе́; а́нгелъ же ка́мень сла́внаго Твоего́ гро́ба въ Твое́мъ Воскресе́ніи отвали́. Овъ у́бо въ печа́ли мѣ́сто весе́лія о́бразы возвѣща́я; се́й же вмѣ́сто сме́рти Влады́ку Жизнода́вца проповѣ́дуя на́мъ. Тѣ́мже вопіе́мъ Ти́: Благодѣ́телю всѣ́хъ, Го́споди, сла́ва Тебѣ́!

Сти́хъ: Хвали́те Его́ въ тимпа́нѣ и ли́цѣ, [хвали́те Его́ во стру́нахъ и орга́нѣ].

И восто́чны [анато́ліевы4:

Возлія́ша мѵ́ра со слеза́ми на гро́бъ Тво́й жены́, и испо́лнишася ра́дости уста́ и́хъ, внегда́ глаго́лати: воскре́се Госпо́дь!

Сти́хъ: Хвали́те Его́ въ кимва́лѣхъ доброгла́сныхъ, [хвали́те Его́ въ кимва́лѣхъ восклица́нія. Вся́кое дыха́ніе да хва́литъ Го́спода].

Да похва́лятъ язы́цы и лю́діе Христа́ Бо́га на́шего, во́лею на́съ ра́ди Кре́стъ претерпѣ́вшаго и во а́дѣ тридне́вновавшаго, и да покло́нятся Его́ изъ ме́ртвыхъ Воскресе́нію, и́мже просвѣти́шася всего́ мíра концы́.

Сти́хъ: Воскресни́, Го́споди Бо́же мой, да вознесе́тся рука́ Твоя́, [не забу́ди убо́гихъ Твои́хъ до конца́].

Ра́спятъ и погребе́нъ бы́лъ еси́, Христе́, я́коже изво́лилъ еси́, испрове́рглъ еси́ сме́рть и воскре́слъ еси́ во сла́вѣ, я́ко Бо́гъ и Влады́ка, да́руя мíрови жи́знь вѣ́чную и ве́лію ми́лость.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, [повѣ́мъ вся́ чудеса́ Твоя́].

(Сія́ же запѣ́вы по вся́ воскресе́нія.)

О, вои́стинну беззако́нніи печа́тавшіи ка́мень, бо́льшихъ на́съ чуде́съ сподо́бисте! Имутъ ра́зумъ стра́жіе, дне́сь про́йде изъ гро́ба, и глаго́лаху: рцы́те, я́ко на́мъ спя́щимъ пріидо́ша ученицы́ и украдо́ша Его́. И кто́ кра́детъ мертвеца́, па́че же и на́га? Са́мъ воскре́се самовла́стно, я́ко Бо́гъ, оста́вль во гро́бѣ и погреба́тельная Своя́. Пріиди́те, ви́дите, іуде́е, ка́ко не расто́рже печа́ти сме́рть Попра́вый и ро́ду человѣ́ческому безконе́чную жи́знь Да́руяй и ве́лію ми́лость.

Сла́ва, гла́съ 2. Стихи́ра ева́нгельская:

Съ мѵ́ры прише́дшимъ я́же съ Марíею жена́мъ и недоумѣва́ющимся, ка́ко бу́детъ и́мъ улучи́ти жела́ніе, яви́ся ка́мень взя́тый и боже́ственный ю́ноша, утоля́яй мяте́жъ ду́шъ и́хъ: воста́ бо, глаго́летъ, Іису́съ Госпо́дь! Тѣ́мже проповѣ́дите проповѣ́дникомъ Его́ ученико́мъ въ Галиле́ю тещи́ и ви́дѣти Его́ воскре́сша изъ ме́ртвыхъ, я́ко Жизнода́вца и Го́спода.

И ны́нѣ: Преблагослове́нна еси́, Богоро́дице Дѣ́во...

Славосло́віе вели́кое. Тропа́рь воскре́сенъ. Ектеніи́ и отпу́стъ. И обы́чное исхожде́ніе въ притво́ръ. И поуче́ніе Студи́тово. И ча́съ 1-й. И соверше́нный отпу́стъ. На часѣ́хъ тропа́рь воскре́сенъ. Сла́ва: Благообра́зный Іо́сифъ... И ны́нѣ: богоро́диченъ часо́въ. По трисвято́мъ конда́къ: Ра́доватися мѵроно́сицамъ... Та́кожде быва́етъ и на про́чихъ часѣ́хъ.



НА ЛИТУРГІИ,
Блаже́нна гла́са, на 4, гла́съ 2:

Помяни́, Благоутро́бне, и на́съ, я́коже помяну́лъ еси́ разбо́йника во Ца́рствіи небе́снѣмъ.

Дре́во изгна́ Ада́ма, Кре́стъ введе́ разбо́йника въ Ца́рство небе́сное.

Гро́бъ подъя́тъ Тя́, Спа́се, гро́бы истощи́вшаго и ме́ртвымъ живо́тъ дарова́вшаго, я́ко Бо́га.

Апо́столи сла́вніи Христо́вы, Того́ моли́те прилѣ́жно, да отъ бѣ́дъ спасе́тъ ны́.

И отъ кано́на дне́, пѣ́снь 6, на 4. По вхо́дѣ тропа́рь: Егда́ снизше́лъ еси́ къ сме́рти... и Благообра́зный Іо́сифъ... Сла́ва: Конда́къ Тріо́ди. И ны́нѣ: Па́схи: Аще и во гро́бъ... Проки́менъ, гла́съ 6: Спаси́, Го́споди, лю́ди Твоя́* и благослови́ достоя́ніе Твое́. Сти́хъ: Къ Тебѣ́, Го́споди, воззову́, Бо́же мо́й, да не премолчи́ши отъ мене́. Апо́столъ Дѣя́ній, зача́ло 16: Умно́жившимся ученико́мъ... Аллилу́ія, гла́съ 8: Благоволи́лъ еси́, Го́споди, зе́млю Твою́, возврати́лъ еси́ плѣ́нъ Іа́ковль. Сти́хъ: Ми́лость и и́стина срѣто́стѣся, пра́вда и ми́ръ облобыза́стася. Ева́нгеліе отъ Ма́рка, зача́ло 69: Пріи́де Іо́сифъ... Прича́стный: Тѣ́ло Христо́во пріими́те... Другíй: Хвали́те Го́спода съ небе́съ...

[Зри́:] Аще хра́мъ святы́хъ же́нъ мѵроно́сицъ: на ма́лѣй и вели́цѣй вече́рни, и на у́трени, и на литургíи, пое́мъ во все́мъ подо́бнѣ, я́коже великому́ченику Гео́ргію. То́чію на вече́рни паремíи чте́мъ [пи́саны въ недѣ́лю всѣ́хъ святы́хъ].

На у́трени по поліеле́и велича́ніе пое́мъ си́це:

Велича́емъ ва́съ, святы́я мѵроно́сицы, и чте́мъ святу́ю па́мять ва́шу, вы́ бо мо́лите о на́съ Христа́ Бо́га на́шего. Псало́мъ: Блаже́нъ му́жъ, боя́йся Го́спода... и про́чая.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 46 об. – 59.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.