Церковный календарь
Новости


2017-05-28 / russportal
"Тріодь Цвѣтная". Служба въ недѣлю 8-ю. День Святой Троицы. Пятидесятница (1864)
2017-05-28 / russportal
"Тріодь Цвѣтная". Служба въ субботу 7-й седмицы. Троицкая поминальная суббота (1864)
2017-05-28 / russportal
Прав. Іоаннъ Кронштадтскій. Слово (4-е) въ недѣлю свв. отцевъ Никейскаго Собора (1894)
2017-05-28 / russportal
Прав. Іоаннъ Кронштадтскій. Слово (3-е) въ недѣлю свв. отцевъ Никейскаго Собора (1894)
2017-05-28 / russportal
Прав. Іоаннъ Кронштадтскій. Слово (2-е) въ недѣлю свв. отцевъ Никейскаго Собора (1894)
2017-05-28 / russportal
Прав. Іоаннъ Кронштадтскій. Слово (1-е) въ недѣлю свв. отцевъ Никейскаго Собора (1894)
2017-05-27 / russportal
Архіеп. Аверкій (Таушевъ). Рождественское привѣтствіе (1975)
2017-05-27 / russportal
Архіеп. Аверкій (Таушевъ). Духовный большевизмъ (1975)
2017-05-27 / russportal
И. А. Ильинъ. О признаніи революціи (1925)
2017-05-27 / russportal
И. А. Ильинъ. Отрицателямъ меча (1925)
2017-05-26 / russportal
Архіеп. Аверкій (Таушевъ). Миръ и непримиримость (1975)
2017-05-26 / russportal
Архіеп. Аверкій (Таушевъ). Къ 40-лѣтію паденія русскаго народа (1975)
2017-05-26 / russportal
И. А. Ильинъ. Подвигъ патріотическаго единенія (1925)
2017-05-26 / russportal
И. А. Ильинъ. Самообладаніе и самообузданіе (1925)
2017-05-25 / russportal
И. А. Ильинъ. Идея Корнилова (1925)
2017-05-25 / russportal
И. А. Ильинъ. Кто мы? (1925)
Новости въ видѣ
RSS-канала: .
Сегодня - воскресенiе, 28 мая 2017 г. Сейчасъ на порталѣ посѣтителей - 18.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВО ВТОРНИКЪ ТРЕТІЯ СЕДМИЦЫ ПО ПАСЦѢ.

ВЪ ПОНЕДѢЛЬНИКЪ ВЕЧЕРА,
На Го́споди воззва́хъ... поста́вимъ стихо́въ 6 и пое́мъ настоя́щія стихи́ры пра́здника 3, гла́съ 2. По́добенъ: Егда́ отъ Дре́ва.

Егда́ мѵроно́сицы Тя́, Христе́, зѣло́ ра́но взыска́ху всѣ́хъ Живота́, мѵ́ры и арома́ты иму́щія идя́ху, и любо́вію пла́чущія, слы́шаху отъ гро́ба ю́ношу глаго́люща: преста́ните пла́чуще, оба́че ва́шему спасе́нію ра́дующеся, возопíйте всѣ́мъ: я́ко воста́ Госпо́дь!

Вѣ́мы, о благообра́зный Іо́сифе, тебе́, я́ко херуви́мскую колесни́цу Царя́ Христа́ на ра́му свое́ю поне́сша, и со Креста́ сне́мша, ублажа́емъ ру́цѣ твои́ и о́чи боже́ственніи, почита́емъ дла́ни твоя́, и́миже Со́лнца Сло́ва и Бо́га на гро́бъ нося́, положи́лъ еси́, тѣ́мже и па́мять твою́ любо́вію почита́емъ.

Яви́ся торжество́ на́мъ боголѣ́пныхъ мѵроно́сицъ и Іо́сифа честна́го, я́коже другíй ра́й, исто́чникъ подая́й жи́зни: благода́тныя во́ды источа́яй мíрови, излива́етъ воста́нія Христо́ва струи́ те́плѣ. Мно́жества вѣ́рныхъ пра́зднуютъ и взыва́ютъ: сла́ва да́вшему Свое́ Воскресе́ніе конце́мъ!

И мине́и 3. Сла́ва, и ны́нѣ, гла́съ 2:

Мѵроно́сицы ра́но бы́вша, и гро́бъ Тво́й со тща́ніемъ дости́гша, иска́ху Тебе́, Христе́, во е́же пома́зати Пречи́стое Тѣ́ло Твое́. И а́нгеловыми глаго́лы огласи́вшеся, радостотво́рныя о́бразы апо́столомъ проповѣ́даху, я́ко воскре́се Нача́льникъ спасе́нія на́шего, плѣни́вый сме́рть, мíрови же да́руяй живо́тъ вѣ́чный и ве́лію ми́лость.

Та́же: Свѣ́те Ти́хій...

На стихо́внѣ стихи́ры, гла́съ 2:

Воскре́сна: Христо́съ, Спа́съ на́шъ, е́же на ны́ рукописа́ніе, пригвозди́въ на крестѣ́, загла́ди, и сме́рную держа́ву упраздни́. Покланя́емся Его́ тридне́вному Воскресе́нію.

Сти́хъ: Къ Тебѣ́ возведо́хъ о́чи мо́и, [Живу́щему на небеси́. Се́ я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́].

Умили́теленъ: Вопію́ Ти́, Христе́ Спа́се, мытаре́вымъ гла́сомъ: очи́сти мя́, я́коже о́наго и поми́луй мя́, Бо́же.

Сти́хъ: Поми́луй на́съ, [Го́споди, поми́луй на́съ, я́ко по мно́гу испо́лнихомся уничиже́нія, наипа́че напо́лнися душа́ на́ша поноше́нія гобзу́ющихъ и уничиже́нія го́рдыхъ].

Му́чениченъ: Святы́мъ му́ченикомъ, моля́щимся о на́съ и Христа́ пою́щимъ, вся́ка пре́лесть преста́ и человѣ́ческій ро́дъ вѣ́рою спаса́ется.

Сла́ва, и ны́нѣ:

Почто́ мѵ́ра со слеза́ми, о учени́цы, растворя́ете? Ка́мень отвали́ся, гро́бъ истощи́ся; ви́дите тлю́ Живото́мъ попра́нную, печа́ти свидѣ́тельствующа я́вственнѣ, спя́щія лю́тѣ стра́жники непокори́выхъ, сме́ртное спасе́ся пло́тію Бо́жіею, а́дъ рыда́етъ. Те́кша ра́достію рцы́те апо́столомъ: умертви́вый Христо́съ сме́рть перворожде́нъ изъ ме́ртвыхъ, ва́съ предваря́етъ въ Галиле́и.

Та́же: Ны́нѣ отпуща́еши... Трисвято́е. Тропари́ обы́чно. И отпу́стъ.




ВО ВТОРНИКЪ 3-Я СЕДМИЦЫ ПО ПАСЦѢ, НА УТРЕНИ,
Тропари́ пра́здника, по обы́чаю.

По 1-мъ стихосло́віи сѣда́льны, гла́съ 2:

Нѣ́дро пречи́стое въ вы́шнихъ не истощи́вый, погребе́ніе и Воскресе́ніе о всѣ́хъ прія́лъ еси́, Го́споди, сла́ва Тебѣ́!

Сти́хъ: Го́споди, да не я́ростію Твое́ю обличи́ши мене́, [ниже́ гнѣ́вомъ Твои́мъ нака́жеши мене́].

Азъ е́смь дре́во непло́дное, Го́споди, умиле́нія плода́ не нося́ отню́дъ, и посѣче́нія бою́ся, и огня́ о́наго устраша́юся неугаси́маго. Тѣ́мже Тя́ молю́: пре́жде о́ныя ну́жды обрати́ и спаси́ мя́.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Му́чениченъ: Просвѣти́вый святы́я Твоя́ па́че зла́та, и просла́вивый преподо́бныя Твоя́, я́ко Бла́гъ, тѣ́ми умоле́нъ быва́я, Христе́ Бо́же, жи́знь на́шу умири́, я́ко Человѣколю́бецъ, и моли́тву испра́ви, я́ко кади́ло, Еди́не во святы́хъ почива́яй.

Сла́ва, и ны́нѣ, богоро́диченъ:

Зако́новъ утаи́вшися естества́, Боже́ственному рождеству́ дѣ́вство совокупи́ла еси́: еди́на бо родила́ еси́ пре́жде Тебе́ Ро́ждшагося безлѣ́тно. Тѣ́мже Тя́, Богоро́дице, велича́емъ.

По 2-мъ стихосло́віи сѣда́ленъ пра́здника, гла́съ 2. Подо́бенъ: Вы́шнихъ ища́.

Мѵроно́сицы у́тро прише́дшія и гро́бъ то́щь ви́дѣвшія, апо́столомъ глаго́лаху: тлѣ́ніе низложи́ Держа́вный и су́щія во а́дѣ исхити́ у́зъ; проповѣ́дите дерзнове́ніемъ, я́ко воскре́се Христо́съ Бо́гъ, да́руяй мíрови ве́лію ми́лость.

Сла́ва, и ны́нѣ, то́йже.

Воскресе́ніе Христо́во... И псало́мъ 50-й. Кано́нъ пра́здника [недѣ́ли мѵроно́сицъ], со ирмосы́, на 8 и мине́и на 4. Конда́къ и ексапостила́рій пра́здника.

На хвали́техъ, поста́вимъ стихи́ 4 и пое́мъ настоя́щія стихи́ры осмогла́сника, гла́съ 2:

Да реку́тъ іуде́и, ка́ко во́ини погуби́ша стрегу́щіи Царя́? Почто́ бо ка́мень не сохрани́ Ка́меня жи́зни? Или́ Погребе́ннаго да дадя́тъ, или́ Воскре́сшему да покло́нятся, глаго́люще съ на́ми: сла́ва мно́жеству щедро́тъ Твои́хъ, Спа́се на́шъ, сла́ва Тебѣ́! [Два́жды.]

Беззако́нія моя́ пре́зри, Го́споди, отъ Дѣ́вы рожде́йся, и се́рдце мое́ очи́сти, хра́мъ то́ творя́ Свята́го Твоего́ Ду́ха, да мя́ не уничижи́ши отъ Твоего́ Лица́, безмѣ́рную имѣ́яй ми́лость.

Му́чениченъ: Кре́стъ Христо́въ воспріе́мше, святíи му́ченицы, ору́жіе непобѣди́мое, всю́ діа́волю крѣ́пость упраздни́ша и, пріи́мше вѣнцы́ небе́сныя, стѣна́ на́мъ бы́ша, о на́съ моля́щеся.

Сла́ва, и ны́нѣ, гла́съ 2:

Мѵроно́сицы жены́, у́тру глубоку́, арома́ты взе́мша, Госпо́дня гро́ба достиго́ша, я́же не надѣ́яхуся обрѣ́тша, помышля́ху благоговѣ́юще ка́менному отвале́нію, и друга́ ко друзѣ́й глаго́лаху: гдѣ́ су́ть печа́ти гро́ба? гдѣ́ е́сть Пила́това кустодíя и опа́сное утверже́ніе? Бы́сть же возвѣсти́тель не вѣ́дущимъ жена́мъ, блиста́яйся а́нгелъ, и глаго́ляй къ ни́мъ: что́ съ рыда́ніемъ и́щете Жива́го и Оживотвори́вшаго ро́дъ человѣ́ческій? Воста́ Христо́съ Бо́гъ на́шъ изъ ме́ртвыхъ, я́ко Всеси́ленъ, подая́й всѣ́мъ на́мъ нетлѣ́ніе и жи́знь, просвѣще́ніе и ве́лію ми́лость.

На стихо́внѣ стихи́ры пра́здника, гла́съ 2. Подо́бенъ: Егда́ отъ Дре́ва.

Свѣ́тъ Трисо́лнечный на земли́ дне́сь я́сно блиста́етъ и мра́къ взе́млетъ страсте́й: явля́ется Воскресе́ніе Христо́во, соблюда́ющее вѣ́рныя. Апо́стольстіи лику́ютъ чи́ни любо́вію, Іо́сифъ весели́тся, и мѵроно́сицъ честны́хъ па́мять свѣ́тлая вѣнча́етъ, вѣ́рно тѣ́хъ восхваля́ющія и Боже́ственное воста́ніе сла́вящія.

Сти́хъ: Благоволи́лъ еси́, Го́споди, зе́млю Твою́, возврати́лъ еси́ плѣ́нъ Іа́ковль.

Взе́мъ на ра́мо, Іо́сифе, въ десни́цѣ Отчей Сы́на сѣдя́щаго; Мѵ́ро Неистощи́мое съ мѵ́ры погре́блъ еси́; мíрови Воскресе́ніе предложи́лъ еси́ гро́бу; Одѣва́ющагося свѣ́томъ, я́ко ри́зою, ка́меніемъ спокрыва́еши неизрече́нно. Тѣ́мже Его́ пое́мъ пѣ́сньми свѣтоно́сная Страда́нія и Воскресе́ніе.

Сти́хъ: Ми́лость и и́стина срѣто́стѣся, пра́вда и ми́ръ облобыза́стася.

Удивля́ется а́нгеловъ мно́жество, и тебе́, Іо́сифе, зря́ще Христа́ погреба́юща, мíръ ублажа́етъ тя́, вѣ́рніи чуди́мся, честно́е же Воскресе́ніе чту́ще боже́ственно, и съ мѵроно́сицами тя́ те́плѣ почита́емъ. Тѣ́мже и вопіе́мъ непреста́нно: моли́ся съ ни́ми спасти́ся и на́мъ бѣ́дъ же и скорбе́й.

Сла́ва, и ны́нѣ, гла́съ 1:

Со стра́хомъ пріидо́ша жены́ на гро́бъ, арома́ты тѣ́ло Твое́ пома́зати тща́щіяся, и, сіе́ не обрѣ́тше, недоумѣва́хуся друга́ ко друзѣ́й, не вѣ́дуще Воскресе́нія. Но предста́ и́мъ а́нгелъ и рече́: воскре́се Христо́съ, да́руяй на́мъ ве́лію ми́лость.

Та́же ча́съ пе́рвый. И отпу́стъ.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 61 об. – 63 об.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.