Церковный календарь
Новости


2017-11-24 / russportal
Слова преп. Симеона Новаго Богослова. Слово 40-е (1882)
2017-11-24 / russportal
Слова преп. Симеона Новаго Богослова. Слово 39-е (1882)
2017-11-24 / russportal
Ген. П. Н. Красновъ. Кубанцы въ Великой войнѣ (1930)
2017-11-24 / russportal
Ген. П. Н. Красновъ. Привѣтъ Россійской Военной Академіи (1932)
2017-11-23 / russportal
П. Н. Красновъ. "Старая Академія". Глава 14-я (1932)
2017-11-23 / russportal
П. Н. Красновъ. "Старая Академія". Глава 13-я (1932)
2017-11-23 / russportal
Архіеп. Аверкій. Существо Православія и соврем. борьба противъ него (1975)
2017-11-23 / russportal
Архіеп. Аверкій. Въ чемъ истинное Православіе и хранимъ ли мы его? (1975)
2017-11-23 / russportal
П. Н. Красновъ. "Старая Академія". Глава 12-я (1932)
2017-11-23 / russportal
П. Н. Красновъ. "Старая Академія". Глава 11-я (1932)
2017-11-23 / russportal
Слова преп. Симеона Новаго Богослова. Слово 38-е (1882)
2017-11-23 / russportal
Слова преп. Симеона Новаго Богослова. Слово 37-е (1882)
2017-11-22 / russportal
Ген. П. Н. Красновъ. "Старая Академія". Глава 10-я (1932)
2017-11-22 / russportal
Ген. П. Н. Красновъ. "Старая Академія". Главы 8-9 (1932)
2017-11-22 / russportal
Воззваніе Союза Русскаго Народа "Да здравствуетъ Самодержавіе!" (1907)
2017-11-22 / russportal
Воззваніе Союза Русскаго Народа "Къ честнымъ сынамъ Россіи" (1907)
Новости въ видѣ
RSS-канала: .
Сегодня - пятница, 24 ноября 2017 г. Сейчасъ на порталѣ посѣтителей - 15.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ СРЕДУ ТРЕТІЯ СЕДМИЦЫ ПО ПАСЦѢ.

ВО ВТОРНИКЪ ТРЕТІЯ СЕДМИЦЫ ВЕЧЕРА,
На Го́споди воззва́хъ... стихи́ры пра́здника 3, гла́съ 2. Подо́бенъ: Егда́ отъ Дре́ва.

Ра́дуются учени́цы Христо́вы, отъ а́нгела глаго́лы слы́шавша, отону́дуже Воскресе́ніе на́съ ра́ди въ ме́ртвыхъ Вмѣни́вшагося навыка́ютъ. Аще и пре́жде мѵроно́сицы гро́бу предста́ша, и рыда́юще о Христѣ́, ка́мень узрѣ́вше внеза́пу отвале́нъ, его́же недоумѣва́хуся преложе́нію.

Непрестаю́щую и боже́ственную ра́дость подаю́ща, боже́ственнымъ и свяще́ннымъ ученико́мъ яви́шася, учени́цы мѵроно́сицы Христо́вы, испо́лнивша повелѣ́ніе боже́ственнаго а́нгела. Его́же ужасо́шася бѣлоно́сныя оде́жды, глаго́люща: плѣне́нъ бы́сть а́дъ всеспаси́тельнымъ Воскресе́ніемъ на́съ ра́ди уме́ршаго Царя́.

Струи́ отъ сле́знаго исто́чника, рыда́ніе испусти́вша, боже́ственныя Христо́вы учени́цы глаго́лы ра́достныя приноша́ютъ ны́нѣ самови́дцемъ благода́ти, возвѣща́юще си́мъ Сло́ва воста́ніе и я́же изъ гро́ба ра́дость. Тѣ́мже вмѣ́сто печа́ли слы́шаху гла́съ пресла́вно, си́мъ е́же — ра́дуйтеся! — повелѣва́ющь.

И мине́и 3. Сла́ва, и ны́нѣ, гла́съ 6:

Мѵроно́сицы жены́, гро́ба Твоего́ дости́гша, и печа́ти гро́бныя ви́дѣвша, не обрѣ́тша же Пречи́стаго Тѣ́ла Твоего́, рыда́юща со тща́ніемъ пріидо́ша, глаго́люща: кто́ укра́де на́шу наде́жду? кто́ взя́тъ ме́ртва на́га сми́рною пома́зана, Ма́тери еди́но утѣше́ніе? О, ка́ко ме́ртвыя оживи́вый умертви́ся? а́дъ плѣни́вый, ка́ко погребе́ся? Но воскресни́, Спа́се, самовла́стно, я́коже ре́клъ еси́, тридне́венъ, спаса́яй ду́ши на́ша.

Та́же: Свѣ́те Ти́хій...

На стихо́внѣ стихи́ры воскре́сны, гла́съ 2:

Спаси́ мя́, Христе́ Спа́се, си́лою Кре́стною, спасы́й Петра́ въ мо́ри, и поми́луй мя́, Бо́же.

Сти́хъ: Къ Тебѣ́ возведо́хъ о́чи мо́и, [Живу́щему на небеси́. Се́ я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́].

Со арха́нгелы воспои́мъ Христо́во Воскресе́ніе: То́й бо е́сть Изба́витель и Спа́съ ду́шъ на́шихъ, и въ сла́вѣ стра́шной и крѣ́пкой си́лѣ, па́ки гряде́тъ суди́ти мíру, его́же созда́.

Сти́хъ: Поми́луй на́съ, Го́споди, поми́луй на́съ, [я́ко по мно́гу испо́лнихомся уничиже́нія, наипа́че напо́лнися душа́ на́ша поноше́нія гобзу́ющихъ и уничиже́нія го́рдыхъ].

Му́чениченъ: Ли́цы му́ченичестіи сопроти́вишася мучи́телемъ, глаго́люще: мы́ во́инствуемъ Царю́ си́лъ, а́ще и огню́ и му́камъ преда́сте на́съ, не отмета́емся Тро́ическія си́лы.

Сла́ва, и ны́нѣ, гла́съ 6:

Проси́ Іо́сифъ тѣ́ло Іису́сово, положи́ е́ въ но́вомъ свое́мъ гро́бѣ: подоба́ше бо Ему́ изъ гро́ба, я́ко отъ черто́га проити́. Сокруши́вый держа́ву сме́рти, и отве́рзый врата́ ра́йская человѣ́комъ, [Го́споди,] сла́ва Тебѣ́!

Та́же: Ны́нѣ отпуща́еши... Тропари́ обы́чныя и отпу́стъ.




ВЪ СРЕДУ ТРЕТІЯ НЕДѢЛИ ПО ПАСЦѢ, НА УТРЕНИ,
На Бо́гъ Госпо́дь: Тропа́рь пра́здника.

По 1-мъ стихосло́віи сѣда́ленъ, гла́съ 2:

Спасе́ніе содѣ́лалъ еси́ посредѣ́ земли́, Христе́ Бо́же, на Крестѣ́ пречи́стѣи ру́цѣ Твои́ просте́рлъ еси́, собира́я вся язы́ки, зову́щія: Го́споди, сла́ва Тебѣ́!

Сти́хъ: Воскресни́, Го́споди, Бо́же мо́й, [да вознесе́тся рука́ Твоя́, не забу́ди убо́гихъ Твои́хъ до конца́].

Воскре́съ изъ гро́ба и у́зы растерза́лъ еси́ а́да, разруши́лъ еси́ осужде́ніе сме́рти, Го́споди, вся́ отъ сѣте́й врага́ изба́вивый; яви́вый же Себе́ апо́столомъ Твои́мъ, посла́лъ еси́ я́ на про́повѣдь, и тѣ́ми ми́ръ Тво́й по́далъ еси́ все́й вселе́ннѣй, еди́не Многоми́лостиве.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Му́чениченъ: Страстоте́рпцы Госпо́дни, блаже́нна земля́, напи́вшаяся кровьми́ ва́шими, и свята́ селе́нія, пріе́мшая тѣлеса́ ва́ша: въ по́двизѣ бо врага́ побѣди́сте и Христа́ со дерзнове́ніемъ проповѣ́дасте. Того́, я́ко Бла́га, моли́те спасти́ся, мо́лимся, душа́мъ на́шимъ.

Сла́ва и ны́нѣ, крестобогоро́диченъ:

Предстоя́щи Кресту́ Твоему́ безсѣ́менно Ро́ждшая Тя́, и не терпя́щи ви́дѣти непра́ведно Стра́ждуща, рыда́ше съ пла́чемъ и вопія́ше Тебѣ́: ка́ко стра́ждеши естество́мъ безстра́стный, сладча́йшій Сы́не? Воспѣва́ю Твою́ кра́йнюю благосты́ню.

По 2-мъ стихосло́віи сѣда́ленъ, гла́съ 2. Подо́бенъ: Благоутро́бія.

Ко гро́бу Твоему́, Спа́се, честны́я мѵроно́сицы прише́дша, Влады́ку пома́завшія мѵ́ры, я́ко Человѣ́ка Тя́ мня́ху, а́нгелъ же и́мъ ра́дость возвѣсти́: воскре́се Госпо́дь! тѣ́мъ и проповѣ́дите апо́столомъ изъ гро́ба вои́стинну стра́шное Его́ Воскресе́ніе.

Сла́ва, и ны́нѣ, то́йже:

Воскресе́ніе Христо́во... И псало́мъ 50-й. Кано́нъ пра́здника [недѣ́ли мѵроно́сицъ], со ирмосы́, на 8 и мине́и на 4. Конда́къ и ексапостила́рій пра́здника.

На хвали́техъ поста́вимъ стихи́ 4 и пое́мъ настоя́щія стихи́ры, гла́съ 2:

Во́лею обнища́въ нището́ю Ада́млею, Христе́ Бо́же, прише́лъ еси́ на зе́млю отъ Дѣ́вы вопло́щся и Кре́стъ воспрія́лъ еси́, да на́съ свободи́ши отъ рабо́ты вра́жія. Го́споди, сла́ва Тебѣ́! [Два́жды.]

Ра́дуйтеся, лю́діе, и весели́теся, а́нгелъ сѣ́де на ка́мени гро́бнѣмъ, то́й на́мъ благовѣсти́, ре́къ: Христо́съ воскре́се изъ ме́ртвыхъ, Спа́съ мíра, и испо́лни вся́ческая благоуха́нія. Ра́дуйтеся, лю́діе, и весели́теся!

Му́чениченъ: Святы́хъ Твои́хъ мно́жества мо́лятъ Тя́, Христе́: поми́луй на́съ, я́ко Человѣколю́бецъ.

Сла́ва, и ны́нѣ, гла́съ 1:

Со стра́хомъ пріидо́ша жены́ на гро́бъ, арома́ты тѣ́ло Твое́ пома́зати тща́щеся, и, сіе́ не обрѣ́тше, недоумѣва́хуся друга́ ко друзѣ́й, не вѣ́дуще Воскресе́нія. Но предста́ и́мъ а́нгелъ и рече́: воскре́се Христо́съ, да́руяй на́мъ ве́лію ми́лость.

На стихо́внѣ стихи́ры, гла́съ 2. Подо́бенъ: Егда́ отъ Дре́ва.

Убо въ ме́ртвыхъ ли Изба́витель? — рыда́ньми мѵроно́сицы вопія́ху, Христо́вы учени́цы. — Со́лнце же Преве́ліе да́же и до дне́сь подъ земле́ю ли, или́ воскре́се, я́коже рече́? — И си́це пла́чущимъ, отъ гро́ба а́нгелъ боже́ственную, вои́стинну, ра́дость рече́: Христо́съ воскре́се! тецы́те, проповѣ́дите всѣ́мъ Его́ изъ гро́ба Боже́ственное Воскресе́ніе.

Сти́хъ: Благоволи́лъ еси́, Го́споди, зе́млю Твою́, [возврати́лъ еси́ плѣ́нъ Іа́ковль].

Мѵ́ра угото́ваша честна́я, еще́ тмѣ́ су́щей во еди́ну отъ суббо́тъ, пріидо́ша на гро́бъ Тво́й мѵроно́сицы, Христе́, е́же пома́зати Пречи́стое и Боже́ственное Твое́ Тѣ́ло. Тѣ́мже Воскресе́ніе увѣ́дѣвша Твое́, потща́хуся возвѣсти́ти и таи́нникомъ, и́хже предсрѣ́тъ изъ гро́ба, — ра́дуйтеся! — возопи́лъ еси́ человѣколю́бнѣйше.

Сти́хъ: Ми́лость и и́стина срѣто́стѣся, [пра́вда и ми́ръ облобыза́стася].

Вы́шняго Бо́га на земли́ погребе́на, я́ко ме́ртва пома́зати тща́тся Его́ учени́цы арома́ты честны́ми, и во гро́бѣ сѣдя́ща но́ва ю́ношу ви́дѣвша, ужасо́шася, въ блиста́ющемъ зра́цѣ. Тѣ́мже Сло́ва изъ гро́ба воста́ніе тридне́вное увѣ́дѣвша, и апо́столомъ возвѣща́ху.

Сла́ва, и ны́нѣ, гла́съ 5:

Тебе́, одѣ́ющагося свѣ́томъ, я́ко ри́зою, сне́мъ Іо́сифъ съ Дре́ва съ Никоди́момъ и, ви́дѣвъ ме́ртва, на́га, непогребе́на, благосе́рдный пла́чь воспріи́мъ, рыда́я, глаго́лаше: увы́ мнѣ́, Сладча́йшій Іису́се! Его́же вма́лѣ со́лнце на Крестѣ́ ви́сима узрѣ́вшее мра́комъ облага́шеся, и земля́ стра́хомъ колеба́шеся, и раздира́шеся церко́вная завѣ́са, но се́ ны́нѣ ви́жду Тя́, мене́ ра́ди во́лею подъе́мша сме́рть. Ка́ко погребу́ Тя́, Бо́же мо́й, или́ ка́кою плащани́цею обвію́? Ко́има ли рука́ма прикосну́ся нетлѣ́нному Твоему́ Тѣ́лу? Или́ кíя пѣ́сни воспою́ Твоему́ исхо́ду, Ще́дре? Велича́ю Стра́сти Твоя́, пѣсносло́влю и погребе́ніе Твое́ со Воскресе́ніемъ, зовы́й: Го́споди, сла́ва Тебѣ́!

Та́же тропари́ пра́здника. Ча́съ 1-й и отпу́стъ.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 63 об. – 65 об.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.