Церковный календарь
Новости


2017-10-20 / russportal
П. Н. Красновъ. "На рубежѣ Китая". Глава 18-я (1939)
2017-10-20 / russportal
П. Н. Красновъ. "На рубежѣ Китая". Глава 17-я (1939)
2017-10-20 / russportal
"Кіево-Печерскій Патерикъ". Житіе преподобнаго Нифонта (1967)
2017-10-20 / russportal
"Кіево-Печерскій Патерикъ". Житіе преп. Тита пресвитера (1967)
2017-10-20 / russportal
Архіеп. Аверкій (Таушевъ). "Боже, милостивъ буди намъ, грѣшнымъ" (1975)
2017-10-20 / russportal
Архіеп. Аверкій (Таушевъ). Слова и рѣчи. Томъ II. (1961-1968). Вступленіе (1975)
2017-10-19 / russportal
Іером. Серафимъ (Роузъ). "Православіе и религія будущаго". Глава 4-я (1991)
2017-10-19 / russportal
Іером. Серафимъ (Роузъ). "Православіе и религія будущаго". Глава 3-я (1991)
2017-10-19 / russportal
"Кіево-Печерскій Патерикъ". Житіе преп. Эразма Печерскаго (1967)
2017-10-19 / russportal
"Кіево-Печерскій Патерикъ". Житіе преп. Ареѳы Печерскаго (1967)
2017-10-18 / russportal
П. Н. Красновъ. "На рубежѣ Китая". Глава 16-я (1939)
2017-10-18 / russportal
П. Н. Красновъ. "На рубежѣ Китая". Глава 15-я (1939)
2017-10-18 / russportal
Іером. Серафимъ (Роузъ). "Православіе и религія будущаго". Глава 2-я (1991)
2017-10-18 / russportal
Іером. Серафимъ (Роузъ). "Православіе и религія будущаго". Глава 1-я (1991)
2017-10-18 / russportal
"Печерскій Патерикъ". Житіе преп. Николая Святоши, кн. Черниговскаго (1967)
2017-10-18 / russportal
"Печерскій Патерикъ". Житіе препод. Аѳанасія, затворника Печерскаго (1967)
Новости въ видѣ
RSS-канала: .
Сегодня - суббота, 21 октября 2017 г. Сейчасъ на порталѣ посѣтителей - 17.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ НЕДѢЛЮ ЧЕТВЕРТУЮ ПО ПАСЦѢ, РАЗСЛАБЛЕННАГО.

Недѣ́ля четве́ртая по Па́сцѣ, разсла́бленнаго.

ВЪ СУББОТУ ВЕЧЕРА, НА МАЛѢЙ ВЕЧЕРНИ,

На Го́споди воззва́хъ: стихи́ры воскре́сны 4, гла́съ 3: Твои́мъ Кресто́мъ, Христе́ Спа́се... Просвѣти́шася вся́ческая... Сла́влю Отца́ и Сы́на си́лу... Кресту́ Твоему́ Честно́му... Сла́ва, гла́съ 5: Взы́де Іису́съ во Іерусали́мъ... [Вся́ сія́ стихи́ры ищи́ на вели́цѣй вече́рни.]

И ны́нѣ, богоро́диченъ догма́тикъ, гла́съ 3:

Преве́ліе чу́до: Дѣ́ва ро́ждшая, и рожде́нное Бо́гъ, пре́жде вѣ́къ предъявле́нное рожде́ніе и соверше́нное па́че естества́. О, та́инства стра́шнаго! Еже и мы́слимое неизрече́нно пребыва́етъ, и зри́мое не пое́млется! Блаже́нна Ты́ еси́, Пречи́стая Отрокови́це, Ада́ма земноро́днаго Дщи́, и Бо́га Вы́шняго я́вльшаяся Ма́ти. Того́ моли́ спасти́ся душа́мъ на́шимъ.

На стихо́внѣ стихи́ра воскре́сна: Стра́стію Твое́ю...

Та́же: Богоро́дицы, гла́съ 3. Подо́бенъ: Ве́лія Креста́.

Сти́хъ: Слы́ши, Дщи́, и ви́ждь, [и приклони́ у́хо Твое́].

Вели́кое Тобо́ю благодѣя́ніе, Пречи́стая, получи́вше, со а́нгелы Рожде́ніе Твое́ сла́вимъ, сподо́бльшееся изъ утро́бы Твоея́ роди́тися кра́йняго ра́ди благоутро́бія, и возсозда́вшаго человѣ́ческій ро́дъ.

Сти́хъ: Помяну́ и́мя Твое́ во вся́комъ ро́дѣ и ро́дѣ.

Тя́ вси́ прибѣ́жище и боже́ственный покро́въ, Чи́стая, грѣ́шніи, въ житіи́ стяжа́хомъ, Дѣ́во. Мо́лимъ у́бо вси́ Твое́ благоутро́біе, не отступи́ отъ на́съ, мо́лимся, но поми́луй и спаси́.

Сти́хъ: Лицу́ Твоему́ помо́лятся [бога́тіи лю́дстіи].

Еже ра́дуйся, Богоро́дице Ма́ти Приснодѣ́во, пе́рстніи Твои́ раби́ прино́симъ досто́йно съ Гавріи́ломъ, боже́ственнымъ чинонача́льникомъ, и́бо ра́дости хода́таица и ра́дованіе Ты́ была́ еси́ мíрови.

Сла́ва, и ны́нѣ, гла́съ 8: Въ притво́рѣ Соломо́новѣ...
[Ищи́ на вели́цѣй вече́рни, на стихо́внѣ, Сла́ва.] Тропа́рь гла́са. И отпу́стъ.




НА ВЕЛИЦѢЙ ВЕЧЕРНИ,
На Го́споди воззва́хъ... поста́вимъ стихо́въ 10 и пое́мъ стихи́ры воскре́сны 3 и восто́чны [анато́ліевычеты́ри и о разла́бленномъ самогла́сны 2, повторя́юще пе́рвую.
Стихи́ры воскре́сны, гла́съ 3:

Твои́мъ Кресто́мъ, Христе́ Спа́се, сме́рти держа́ва разруши́ся, и діа́воля пре́лесть упраздни́ся, ро́дъ же человѣ́ческій, вѣ́рою спаса́емый, пѣ́снь Тебѣ́ всегда́ прино́ситъ.

Просвѣти́шася вся́ческая Воскресе́ніемъ Твои́мъ, Го́споди, и ра́й па́ки отве́рзеся, вся́ же тва́рь, восхваля́ющи Тя́, пѣ́снь Тебѣ́ всегда́ прино́ситъ.

Сла́влю Отца́ и Сы́на си́лу, и Ду́ха Свята́го пою́ вла́сть, нераздѣ́льное, несозда́нное Божество́, Тро́ицу Единосу́щную, ца́рствующую въ вѣ́къ вѣ́ка.

Ины стихи́ры, анато́ліевы:

Кресту́ Твоему́ честно́му покланя́емся, Христе́, и Воскресе́ніе Твое́ пое́мъ и сла́вимъ: ра́ною бо Твое́ю мы́ вси́ исцѣлѣ́хомъ.

Пое́мъ Спа́са, отъ Дѣ́вы вопло́щшагося: на́съ бо ра́ди распя́тся и въ тре́тій де́нь воскре́се, да́руяй на́мъ ве́лію ми́лость.

Су́щимъ во а́дѣ соше́дъ, Христо́съ благовѣсти́: дерза́йте, — глаго́ля, — ны́нѣ побѣди́хъ, Азъ е́смь Воскресе́ніе, Азъ вы́ возведу́, разруши́въ сме́ртная врата́.

Недосто́йно стоя́ще въ пречи́стомъ дому́ Твое́мъ, вече́рнюю пѣ́снь возсыла́емъ, изъ глубины́ взыва́юще, Христе́ Бо́же: просвѣти́вый мíръ тридне́внымъ Воскресе́ніемъ Твои́мъ, изми́ лю́ди Твоя́ отъ руки́ враго́въ Твои́хъ, Человѣколю́бче.

Ины стихи́ры самогла́сны, о разсла́бленномъ, гла́съ 1:

Дла́нію пречи́стою Созда́вый человѣ́ка, прише́лъ еси́, Благоутро́бне, неду́гующія исцѣли́ти, Христе́: разсла́бленнаго во Овчей купѣ́ли сло́вомъ Твои́мъ возста́вилъ еси́, кровоточи́вой же болѣ́знь исцѣли́лъ еси́, ханане́и отрокови́цу стужа́емую поми́ловалъ еси́ и проше́нія со́тника не презрѣ́лъ еси́. Сего́ ра́ди зове́мъ: Всеси́льне Го́споди, сла́ва Тебѣ́! [Два́жды.]

Непогребе́нъ мертве́цъ сы́й, разсла́бленный ви́дѣвъ Тя́, возопи́: поми́луй мя́, Го́споди, я́ко о́дръ мо́й гро́бъ мнѣ́ бы́сть! Что́ ми́ приобрѣ́теніе животу́? Не тре́бую Овчія купѣ́ли, не и́мамъ бо никого́же влага́юща мя́, возмуща́ющимся вода́мъ; но Тебѣ́ Исто́чнику прихожду́ исцѣле́ній, да и а́зъ со всѣ́ми зову́: Всеси́льне Го́споди, сла́ва Тебѣ́!

Сла́ва, гла́съ 5:

Взы́де Іису́съ во Іерусали́мъ на Овчую купѣ́ль, глаго́лемую іуде́йски Виѳесда́, пя́ть притво́ровъ иму́щую: въ тѣ́хъ бо слежа́ше мно́жество немощству́ющихъ. Ангелъ бо Бо́жій, по вся́ лѣ́та сходя́, возмуща́ше ю́ и здра́віе подава́ше приступа́ющимъ вѣ́рою. И ви́дѣвъ Госпо́дь многовре́менна человѣ́ка, глаго́летъ къ нему́: хо́щеши ли здра́въ бы́ти? Немощству́яй отвѣщава́ше: Го́споди, человѣ́ка не и́мамъ, да егда́ возмути́тся вода́, вве́ржетъ мя́ въ купѣ́ль; враче́мъ изда́хъ все́ имѣ́ніе мое́, и ми́лости улучи́ти не сподо́бихся. Но Вра́чь ду́шъ и тѣле́съ глаго́летъ къ нему́: возми́ тво́й о́дръ и ходи́, проповѣ́дуя Мою́ си́лу и ве́лію ми́лость въ концѣ́хъ.

И ны́нѣ, богоро́диченъ, гла́съ 3:

Ка́ко не диви́мся Богому́жному Рождеству́ Твоему́, Пречестна́я? Искуше́нія бо му́жеска не пріе́мши, Всенепоро́чная, родила́ еси́ безъ отца́ Сы́на пло́тію, пре́жде вѣ́къ отъ Отца́ рожде́ннаго безъ ма́тере, ника́коже претерпѣ́вшаго измѣне́нія, или́ смѣше́нія, или́ раздѣле́нія, но обою́ существу́ сво́йство цѣ́ло сохра́ншаго. Тѣ́мже, Ма́ти Дѣ́во Влады́чице, Того́ моли́ спасти́ся душа́мъ, правосла́вно Богоро́дицу исповѣ́дающихъ Тя́.

Вхо́дъ. Свѣ́те Ти́хій... Проки́менъ: Госпо́дь воцари́ся.., со стихи́ его́.

На литíи стихи́ра хра́ма. Сла́ва, гла́съ 5:

При Овчей купѣ́ли человѣ́къ лежа́ше въ не́мощи и ви́дѣвъ Тя́, Го́споди, вопія́ше: человѣ́ка не и́мамъ, да егда́ возмути́тся вода́, вве́ржетъ мя́ въ ню́. Егда́ же прихожду́, и́нъ предваря́етъ мя́ и пріе́млетъ исцѣле́ніе; а́зъ же немощству́яй лежу́. И а́біе, умилосе́рдився, Спа́съ глаго́летъ къ нему́: тебе́ ра́ди Человѣ́къ бы́хъ, тебе́ ра́ди въ пло́ть облеко́хся, и глаго́леши: человѣ́ка не и́мамъ. Возми́ о́дръ тво́й и ходи́! — Вся́ Тебѣ́ возмо́жна, вся́ послу́шаютъ, вся́ повину́ются. Всѣ́хъ на́съ помяни́ и поми́луй, Святы́й, я́ко Человѣколю́бецъ.

И ны́нѣ, богоро́диченъ, гла́съ то́йже:

Хра́мъ и Две́рь еси́, Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ.

На стихо́внѣ стихи́ра воскре́сна, гла́съ 3:

Стра́стію Твое́ю, Христе́, омрачи́вый со́лнце и свѣ́томъ Твоего́ Воскресе́нія просвѣти́вый вся́ческая, пріими́ на́шу вече́рнюю пѣ́снь, Человѣколю́бче.

И стихи́ры Па́сцѣ, съ припѣ́вы и́хъ. [Ищи́ въ недѣ́лю Па́схи на у́трени, ли́стъ 6].

Сла́ва: гла́съ 8:

Въ притво́рѣ Соломо́новѣ, та́мо слежа́ше мно́жество немощству́ющихъ, и преполови́вшуся пра́зднику, обрѣ́те Христо́съ три́десять о́смь лѣ́тъ разсла́блена лежа́ща, Влады́чнимъ гла́сомъ глаго́летъ къ нему́: хо́щеши ли здра́въ бы́ти? Немощству́яй отвѣщава́ше: Го́споди, человѣ́ка не и́мамъ, да егда́ возмути́тся вода́, вве́ржетъ мя́ въ купѣ́ль. Онъ же глаго́летъ къ нему́: возми́ о́дръ тво́й и ходи́; се́ здра́въ бы́лъ еси́, ктому́ не согрѣша́й! Богоро́дицы моли́твами низпосли́ на́мъ ве́лію ми́лость!

И ны́нѣ: Воскресе́нія де́нь... Христо́съ воскре́се.., еди́ножды.
И про́чее, я́ко предписа́ся въ мимоше́дшую недѣ́лю.

Отпусти́тельный тропа́рь, гла́съ 3:

Да веселя́тся небе́сная, да ра́дуются земна́я, я́ко сотвори́ держа́ву мы́шцею Свое́ю Госпо́дь, попра́ сме́ртію сме́рть, Пе́рвенецъ ме́ртвыхъ бы́сть, изъ чре́ва а́дова изба́ви на́съ и подаде́ мíрови ве́лію ми́лость.

Сла́ва, и ны́нѣ, богоро́диченъ:

Тя́, хода́тайствовавшую спасе́ніе ро́да на́шего, воспѣва́емъ, Богоро́дице Дѣ́во: пло́тію бо, отъ Тебе́ воспрія́тою, Сы́нъ Тво́й и Бо́гъ на́шъ, Кресто́мъ воспріи́мъ Стра́сть, изба́ви на́съ отъ тли́, я́ко Человѣколю́бецъ.

[Зри́:] Аще же не бу́детъ бдѣ́нія, на полу́нощницѣ пое́мъ кано́нъ Тро́иченъ во окто́ихѣ, гла́са 3-го. И Досто́йно е́сть.., и про́чее, я́ко обы́чно. И отпу́стъ.



НА УТРЕНИ,
На Бо́гъ Госпо́дь: Тропа́рь воскре́сенъ, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 3:

Христо́съ отъ ме́ртвыхъ воста́, Нача́токъ усо́пшихъ, Перворожде́нъ тва́ри и Содѣ́тель всѣ́хъ бы́вшихъ, истлѣ́вшее естество́ ро́да на́шего въ Себѣ́ Само́мъ обнови́. Не ктому́, сме́рте, облада́еши, и́бо всѣ́хъ Влады́ка держа́ву твою́ разруши́.

Сти́хъ: Воскресни́, Го́споди Бо́же мой, [да вознесе́тся рука́ Твоя́, не забу́ди убо́гихъ Твои́хъ до конца́].

Пло́тію сме́рти вкуси́вый, Го́споди, го́ресть сме́рти пресѣ́клъ еси́ воста́ніемъ Твои́мъ, и человѣ́ка на ню́ укрѣпи́вый, пе́рвыя кля́твы одолѣ́ніе призыва́я. Защи́тниче жи́зни на́шея, Го́споди, сла́ва Тебѣ́!

Сла́ва, и ны́нѣ:

Красотѣ́ дѣ́вства Твоего́, и пресвѣ́тлой чистотѣ́ Твое́й, Гавріи́лъ удиви́вся, вопія́ше Ти́, Богоро́дице: ку́ю Ти́ похвалу́ принесу́ досто́йную? Что́ же возимену́ю Тя́? Недоумѣва́ю и ужаса́юся. Тѣ́мже, я́ко повелѣ́нъ бы́хъ, вопію́ Ти́: ра́дуйся, Благода́тная!

По 2-мъ стихосло́віи сѣда́ленъ, гла́съ 3. Подо́бенъ: Красотѣ́ дѣ́вства.

Вся́ человѣ́ческая воспріи́мъ, вся́ на́ша присво́ивъ, на Крестѣ́ пригвозди́тися благоволи́лъ еси́, Тво́рче мо́й, сме́рть пріи́мъ претерпѣ́ти, я́ко Человѣ́къ, да человѣ́ческое отъ сме́рти изба́виши, я́ко Бо́гъ. Тѣ́мже, я́ко Жизнода́вцу, вопіе́мъ Ти́: сла́ва, Христе́, благоутро́бію Твоему́!

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, [повѣ́мъ вся́ чудеса́ Твоя́].

Непостижи́мое распя́тія и несказа́нное воста́нія богосло́вствуемъ, вѣ́рніи, та́инство неизрече́нное: дне́сь бо сме́рть и а́дъ плѣни́ся, ро́дъ же человѣ́ческій въ нетлѣ́ніе облече́ся. Тѣ́мъ благодаря́ще вопіе́мъ Ти́: сла́ва, Христе́, воста́нію Твоему́!

Сла́ва, и ны́нѣ, богоро́диченъ:

Небе́сная любо́вію веселя́хуся и земна́я тре́петомъ ужаса́хуся, егда́ пречи́стый гла́съ на́йде на Тя́, Богоро́дице: еди́но бо торжество́ обои́мъ возсія́, егда́ первозда́ннаго отъ сме́рти изба́ви. Тѣ́мже со а́нгеломъ вопіе́мъ Ти́: ра́дуйся, Чи́стая, Дѣ́во Ма́ти.

По непоро́чнахъ: Благослове́нъ еси́, Го́споди...

Та́же ипакои́, гла́съ 3:

Удивля́я видѣ́ніемъ, ороша́я глаго́ланіи, блиста́яйся а́нгелъ мѵроно́сицамъ глаго́лаше: что́ Жива́го и́щете во гро́бѣ? Воста́ Истощи́вый гро́бы! Тли́ премѣни́теля разумѣ́йте Непремѣ́ннаго, рцы́те Бо́гу: ко́ль стра́шна дѣла́ Твоя́, я́ко ро́дъ спа́слъ еси́ человѣ́ческій!

Степе́нна, гла́съ 3:

Антифо́нъ 1:

Плѣ́нъ Сіо́нь Ты́ изъя́лъ еси́ отъ Вавило́на, и мене́ отъ страсте́й къ животу́ привлецы́, Сло́ве.

Въ ю́гъ сѣ́ющіи слеза́ми боже́ственными, жну́тъ кла́сы ра́достію присноживо́тія.

Сла́ва: Свято́му Ду́ху вся́кое благода́ріе, я́коже Отцу́ и Сы́ну сооблиста́етъ, въ Не́мже вся́ живу́тъ и дви́жутся.

И ны́нѣ, то́йже.

Антифо́нъ 2:

Аще не Госпо́дь сози́ждетъ до́мъ добродѣ́телей, всу́е тружда́емся; ду́шу же покрыва́ющу, никто́же на́шъ разори́тъ гра́дъ.

Плода́ чре́вна Ду́хомъ, сынотворе́ное Тебѣ́, Христу́, я́коже и Отцу́, святíи всегда́ су́ть.

Сла́ва: Святы́мъ Ду́хомъ прозри́тся вся́кая святы́ня, прему́дрость, осуществу́етъ бо вся́кую тва́рь: Тому́ послу́жимъ, Бо́гъ бо, я́ко Отцу́ же и Сло́ву.

И ны́нѣ, то́йже.

Антифо́нъ 3:

Боя́щіися Го́спода блаже́ни, въ пути́ ходя́ще за́повѣдей, снѣдя́тъ бо живо́тное всепло́діе.

Окрестъ трапе́зы Твоея́ возвесели́ся, зря́ Твоя́, Пастыренача́льниче, исча́дія, нося́ща вѣ́тви благодѣ́ланія.

Сла́ва: Святы́мъ Ду́хомъ вся́кое бога́тство сла́вы, отъ Него́же благода́ть и живо́тъ вся́кой тва́ри: со Отце́мъ бо воспѣва́емь е́сть и съ Сло́вомъ.

И ны́нѣ, то́йже.

Та́же проки́менъ, гла́съ 3: Рцы́те во язы́цѣхъ, я́ко Госпо́дь воцари́ся, и́бо испра́ви вселе́нную, я́же не подви́жится. Сти́хъ: Воспо́йте Го́сподеви пѣ́снь но́ву, воспо́йте Го́сподеви вся́ земля́. Вся́кое дыха́ніе... Ева́нгеліе отъ Луки́, 4-е воскре́сное, зача́ло 112. Та́же: Воскресе́ніе Христо́во... По 50-мъ псалмѣ́, по обы́чаю.

Та́же кано́нъ Па́схи [пи́санъ въ недѣ́лю Па́схи], со ирмосы́ и съ богоро́дичнами его́, на 8 [пи́саны въ недѣ́лю святы́хъ мѵроно́сицъ]. И о разсла́бленномъ на 6. Катава́сія: Воскресе́нія де́нь.., о́ба ли́ка вку́пѣ.

Кано́нъ, гла́съ 3:
Пѣ́снь 1.

Ирмо́съ: Ди́вно, сла́вно творя́й чудеса́ Ты́ еси́, Бо́же, бе́здну оземлени́вый, и колесни́цы потопи́вый, и лю́ди спасы́й, пою́щія Тебѣ́, я́ко Царю́ на́шему и Бо́гу.

Дѣ́йствуяй зна́менія, творя́й чудеса́, еди́не Царю́, распя́тіе во́лею претерпѣ́лъ еси́, я́ко Ще́дръ, и сме́рть сме́ртію умертви́въ, оживотвори́лъ еси́ на́съ.

Во Христо́вѣ воста́ніи, лю́діе, дне́сь лику́имъ вѣ́рно: плѣне́нъ бы́сть а́дъ, ю́зники, я́же содержа́ше, отдаде́ со тща́ніемъ, пою́щія вели́чія Бо́жія.

Си́лою Боже́ственною иногда́ разсла́бленнаго сло́вомъ Твои́мъ, Христе́, стягну́вый, и повелѣ́вый ему́ о́дръ взя́ти, мно́гимъ вре́менемъ немощству́ющую лю́тѣ ду́шу мою́ исцѣли́.

Въ купѣ́ль иногда́ Овчую а́нгелъ схожда́ше и еди́наго исцѣлева́ше на вся́кое лѣ́то: креще́ніемъ же Боже́ственнымъ ны́нѣ очища́етъ безчи́сленная мно́жества Христо́съ.

Арха́нгелу Михаи́лу: Нача́льниче а́нгеловъ, Архистрати́же вы́шнихъ служи́телей, собра́вшіяся въ честнѣ́мъ хра́мѣ твое́мъ и Бо́га воспѣва́ющія, покрыва́й и сохраня́й отъ вся́кихъ искуше́ній.

Сла́ва, тро́иченъ: Въ тріе́хъ Ли́цѣхъ, еди́номъ же Естествѣ́ Безнача́льнаго Бо́га пои́мъ непреста́нно со безпло́тными: Отца́, Сло́ва и Ду́ха, ца́рство и держа́ву иму́ща нераздѣ́льную.

И ны́нѣ, богоро́диченъ: Чту́щій се́й, Чи́стая, гра́дъ Тво́й всегда́ вѣ́рно спаса́й отъ бѣ́дъ, плѣне́нія ва́рварскаго, междоусо́бныя бра́ни, и меча́, и вся́каго ино́го преще́нія.

Пѣ́снь 3.

Ирмо́съ: Непло́дная душе́ и безча́дная, стяжи́ пло́дъ благосла́вный, веселя́щися, возопíй: утверди́хся Тобо́ю, Бо́же, нѣ́сть свя́тъ, нѣ́сть пра́веденъ, па́че Тебе́, Го́споди.

Зря́ Тебе́ иногда́ со́лнце на Дре́вѣ ви́сяща, Сло́ве, свѣ́тъ скры́, и тряса́шеся земля́ вся́; ме́ртвіи воста́ша, ме́ртву бы́вшу Тебѣ́, Всеси́льне.

Съ душе́ю прише́дшу Тебѣ́ во утро́бу земли́, ду́ши, я́же стяжа́, а́дъ издава́ше со тща́ніемъ, вопію́щія держа́вѣ Твое́й пѣ́снь благода́рную, еди́не Го́споди.

Въ лѣ́техъ мно́гихъ немощству́ющую лю́тѣ ду́шу мою́, Преблагíй, исцѣли́, я́коже разсла́бленнаго пре́жде, я́ко да послѣ́дую Твои́мъ стезя́мъ, я́же показа́лъ еси́ лю́бящимъ Тя́.

Арха́нгелу Михаи́лу: Съ вы́шними чи́нми, Бо́жій арха́нгеле, мольбу́ сотвори́ о вѣ́рою пою́щихъ тя́, соблюда́я и храня́ на́съ, жите́йскими страстьми́ напада́емыхъ.

Сла́ва, тро́иченъ: Сла́ва Отцу, — возопіи́мъ, — Сы́ну и Ду́ху: Еди́нъ бо е́сть Естество́мъ Бо́гъ, Его́же си́лы вся́ небе́сныя со стра́хомъ сла́вятъ, — Свя́тъ, Свя́тъ, Свя́тъ еси́, — зову́ще.

И ны́нѣ, богоро́диченъ: Безсѣ́менное имѣ́ла еси́ зача́тіе и па́че ума́ Рождество́, Дѣ́во Ма́ти Чи́стая: дѣ́ло стра́шное, чу́до преве́ліе, а́нгелы почита́емое и человѣ́ки сла́вимое, Отрокови́це Влады́чице.

Конда́къ Па́сцѣ и и́косъ. И сѣда́ленъ, гла́съ 3:

Глаго́лъ разсла́бленнаго то́кмо стягну́, я́ко всемíрное Сло́во еди́но, на́съ ра́ди на земли́ Явльшагося за благоутро́біе. Тѣ́мже и о́дръ нося́ мимохожда́ше, а́ще и кни́жницы зрѣ́ти содѣ́янное не терпя́ху, зло́бы содержи́ми за́вистію, ду́ши разслабля́ющею.

Сла́ва, и ны́нѣ, богоро́диченъ:

Красотѣ́ дѣ́вства Твоего́, и пресвѣ́тлой чистотѣ́ Твое́й, Гавріи́лъ удиви́вся, вопія́ше Ти́, Богоро́дице: ку́ю Ти́ похвалу́ принесу́ досто́йную? Что́ же возимену́ю Тя́? Недоумѣва́ю и ужаса́юся. Тѣ́мже, я́ко повелѣ́нъ бы́хъ, вопію́ Ти́: ра́дуйся, Благода́тная!

Пѣ́снь 4.

Ирмо́съ: Приосѣне́нную го́ру Авваку́мъ прозря́ше, пречи́стую Твою́ утро́бу, Чи́стая. Тѣ́мъ взыва́ше: отъ ю́га пріи́детъ Бо́гъ и Святы́й отъ горы́ приосѣне́нныя ча́щи.

Евре́йскій собо́ръ, за́вистію растаява́емь, на Дре́вѣ распя́тъ Тя́, Го́споди; и разори́въ осужде́ніе сме́рти, я́ко Си́ленъ воста́лъ еси́, мíръ съ Собо́ю совоздви́гнувъ.

Съ мѵ́ры, жены́, что́ неистощи́мое Мѵ́ро и́щете? Воста́лъ е́сть, — мѵроно́сицамъ рече́ сѣдя́й въ бѣ́лыхъ ри́захъ, — поднебе́сную испо́лнивъ мы́сленнаго благоуха́нія.

Ра́бій нося́ о́бразъ, за мно́гое благоутро́біе ходя́й прише́лъ еси́, и здра́ва показа́лъ еси́ во мно́гихъ лѣ́тѣхъ лежа́щаго, Сло́ве, повелѣ́въ и о́дръ взя́ти.

Ангелъ у́бо Госпо́день, на вся́кое лѣ́то схожда́я, во́ду въ купѣ́ли возмуща́ше, соверша́я здра́ва еди́наго то́чію: Христо́съ же мно́жество безчи́сленное боже́ственнымъ креще́ніемъ спаса́етъ.

Арха́нгелу Михаи́лу: Нача́льниче а́нгеловъ и наста́вниче заблужда́ющихъ, Госпо́день нача́льный воево́до, въ ча́съ се́й посредѣ́ на́съ пріиди́ и моли́твы всѣ́хъ принеси́ еди́ному Творцу́ и Влады́цѣ.

Сла́ва, тро́иченъ: Соединя́емая Естество́мъ и раздѣля́емая Ли́цы е́сть Свята́я Тро́ица: Оте́цъ Пресу́щный, Соприсносу́щный же Сы́нъ, и Святы́й и еди́ный Всеси́льный Ду́хъ.

И ны́нѣ, богоро́диченъ: Чи́стая, ка́ко дои́ши? ка́ко же родила́ еси́ Младе́нца, Ада́ма дре́внѣйшаго? ка́ко на руку́ но́сиши Сы́на, су́щаго на ра́му херуви́мску? — Яко зна́етъ, я́коже вѣ́сть, вся́ Осуществова́вый.

Пѣ́снь 5.

Ирмо́съ: Свѣ́томъ Твои́мъ невече́рнимъ, Христе́, озари́, Бо́же, смире́нную мою́ ду́шу и наста́ви на стра́хъ Тво́й, зане́ свѣ́тъ — повелѣ́нія Твоя́.

Вознесы́йся на Дре́вѣ кре́стнѣмъ, и совознесы́й мíръ ве́сь, и бы́въ въ ме́ртвыхъ, Бо́же, отъ вѣ́ка ме́ртвыя воздвиза́еши.

Воскре́се, я́коже рече́, Христо́съ, истощи́вый вся́ а́дова ца́рствія, и явля́ется апо́столомъ, ра́дость подава́я вѣ́чнующую.

Бѣлообра́зенъ ви́денъ бы́сть жена́мъ блиста́яйся а́нгелъ: не ктому́ пла́чите; Жи́знь ва́ша воста́, су́щія во гробѣ́хъ ме́ртвыя оживи́вшая.

Разсла́бленнаго я́ко воздви́глъ еси́, Христе́, разсла́бленную мою́ ду́шу преступле́ньми оздра́ви, и ше́ствовати мнѣ́ Твоя́ пра́выя стези́ споспѣшеству́й.

Арха́нгелу Михаи́лу: Ангеловъ наста́вниче, Михаи́ле, собира́ющіяся въ хра́мѣ твое́мъ лю́ди дне́сь и проповѣ́дающія Бо́жія вели́чія, спаса́й.

Сла́ва, тро́иченъ: Равноче́стная Тричи́сленная Еди́нице, раздѣля́емая у́бо вѣ́рно Ѵпоста́сьми, соединя́емая же Естество́мъ е́сть: Оте́цъ, Сы́нъ и Боже́ственный Ду́хъ.

И ны́нѣ, богоро́диченъ: Безсѣ́менное Рождество́ Твое́, Чи́стая, непостижи́мое пое́мъ рожде́ніе, блажа́ще Тя́, я́ко Ма́терь Творца́ всѣ́хъ и Влады́ки.

Пѣ́снь 6.

Ирмо́съ: Глубина́ страсте́й воста́ на мя́ и бу́ря проти́вныхъ вѣ́тровъ, но́, предвари́въ, мя Ты́ спаси́, Спа́се, и изба́ви отъ тли́, я́ко спа́слъ еси́ отъ звѣ́ря проро́ка.

Вознесы́йся во́лею на Дре́во, положи́лся еси́ я́ко ме́ртвъ во гро́бѣ, и су́щія во а́дѣ ме́ртвыя вся́ вку́пѣ оживи́въ, Христе́, воскреси́лъ еси́ Боже́ственною си́лою.

Адъ срѣ́тъ Тя́, Ще́дре, до́лѣ, огорчи́ся, свя́занныя отдава́я со тща́ніемъ, Твое́ стра́шное пою́щія, Спа́се, Воскресе́ніе, во гла́сѣхъ немо́лчныхъ.

Боже́ственніи ученицы́, ви́дѣвше Жи́знь всѣ́хъ — изъ гро́ба воста́вша Христа́, любо́вію мно́гою, и нра́вомъ пра́вымъ, и весе́ліемъ душе́внымъ покланя́хуся.

Дре́вле на одрѣ́ болѣ́зненномъ въ лѣ́тѣхъ мно́зѣхъ слежа́й, Твои́мъ, Христе́, повелѣ́ніемъ исцѣлѣ́въ, сла́витъ воспѣва́я благоутро́біе Твое́, Жизнода́телю.

Арха́нгелу Михаи́лу: Ангеловъ наста́вниче, Михаи́ле, предстоя́й престо́лу Влады́чню, пріиди́ посредѣ́ на́съ, наставля́я къ стезя́мъ жи́зни, тебе́ предста́теля те́пла стяжа́вшихъ.

Сла́ва, тро́иченъ: Тро́ицу Ли́цы Тя́ чту́, Еди́ницу же Существо́мъ проповѣ́даю, Безнача́льне Отче, Сы́не, Ду́ше Пра́вый, Бо́же всѣ́хъ, съ вы́шними стра́шными во́инствы.

И ны́нѣ, богоро́диченъ: Вся́ Боже́ственнымъ манове́ніемъ Нося́й, держи́мь е́сть, Богоро́дице Дѣ́во, во объя́тіяхъ Твои́хъ, всѣ́хъ на́съ восхища́я отъ руки́ рабо́ты лука́ваго, я́ко Ще́дръ.

Конда́къ, гла́съ 3. Подо́бенъ: Дѣ́ва дне́сь.

Ду́шу мою́, Го́споди, во грѣсѣ́хъ вся́ческихъ, и безмѣ́стными дѣя́ньми лю́тѣ разсла́блену, воздви́гни Боже́ственнымъ Твои́мъ предста́тельствомъ, я́коже и разсла́бленнаго воздви́глъ еси́ дре́вле, да зову́ Ти́ спаса́емь: Ще́дрый, сла́ва, Христе́, держа́вѣ Твое́й!

Икосъ:

Руки́ Твоея́ го́рстію содержа́й концы́, Іису́се Бо́же, Отцу́ Собезнача́льный и Ду́ху Свято́му Совлады́чествуяй всѣ́ми, пло́тію яви́лся еси́, неду́ги исцѣля́я, и стра́сти отгна́лъ еси́: слѣпцы́ просвѣти́лъ еси́, и разсла́бленнаго сло́вомъ Боже́ственнымъ Ты́ возста́вилъ еси́, сему́ напра́сно ходи́ти повелѣ́въ, и сего́ носи́вшій о́дръ на ра́му взя́ти. Тѣ́мже вси́ съ ни́мъ воспѣва́емъ и возопіи́мъ: Ще́дрый, сла́ва, Христе́, держа́вѣ Твое́й!

Синакса́рь въ недѣ́лю четве́ртую по Па́сцѣ, о разсла́бленномъ.

Стихи́: Глаго́лъ Христо́въ, стягне́ніе разсла́бленному.
                  Си́це исцѣле́ніе се́й глаго́лъ и то́кмо.

Въ то́йже де́нь, въ недѣ́лю четве́ртую по Па́сцѣ, разсла́бленнаго па́мять твори́мъ, и я́коже подоба́етъ, сицево́е Го́спода Бо́га и Спа́са на́шего Іису́са Христа́ пра́зднуемъ чу́до. Положи́ся у́бо и сіе́ здѣ́, я́ко во вре́мя у евре́й Пятдеся́тницы Христо́съ содѣ́я сіе́. Вше́дъ бо во Іерусали́мъ на пра́здникъ, и въ пятопритво́рнѣй купѣ́ли бы́въ, ю́же Соломо́нъ созда́, я́же и Овчая нарече́на бы́сть, я́ко во святи́лищи на же́ртву закала́емыхъ ове́цъ та́мо вну́тренняя измыва́ху. Или́ за е́же, пе́рвѣе та́мо входя́щу, внегда́ отъ а́нгела еди́ницею въ лѣ́то вода́ возмуща́ема бѣ́, здра́ву явля́тися.

Обрѣта́етъ у́бо та́мо человѣ́ка, три́десять и о́смь лѣ́тъ иму́ща и въ недоумѣ́ніи су́ща, кто́ бы вве́рглъ въ во́ду его́ лежа́щаго. Отъ него́же и наказу́емся, коли́ко благо́е жда́ніе и терпѣ́ніе. И я́ко поне́же креще́ніе да́тися имя́ше чисти́тельное грѣха́ вся́каго, усмотри́ Бо́гъ въ ве́тхомъ водо́ю содѣва́тися чудесе́мъ, да егда́ о́ное бу́детъ, удо́бно пріи́мется.

Надъ сего́ у́бо разсла́бленнаго, Іа́ра си́це нѣ́како имену́ема, прихо́дитъ Іису́съ и вопроша́етъ его́. Онъ же неимѣ́ніе споспѣшеству́ющаго ему́ предлага́етъ. И Христо́съ, е́же о толи́цѣ иста́ятися сему́ не́мощію вѣ́дый, глаго́летъ: возми́ о́дръ тво́й и ходи́! И а́біе здра́въ явля́ется, и о́дръ на ра́мо взе́мъ, да не привидѣ́ніе дѣ́ло мни́тся, неся́ше въ до́мъ сво́й.

Суббо́тѣ же су́щей, возбраня́емь бя́ше отъ іуде́й ходи́ти. Онъ же Исцѣли́вшаго и́ предла́гаше, я́ко ре́кша въ суббо́ту ходи́ти, не вѣ́дый ка́ковъ е́сть: Іису́съ бо, глаго́летъ, наро́ду та́мо собра́вшуся, уклони́ся, укры́вся. По си́хъ же обрѣ́те его́ Іису́съ во святи́лищи и глаго́летъ ему́: се́ здра́въ бы́лъ еси́, ктому́ не согрѣша́й, да не го́ршее что́ тебѣ́ бу́детъ!

Сіе́ же реко́ша не́цыи, рещи́ Христу́, непра́во глаго́люще, поне́же то́й имя́ше да́ти Іису́су ударе́ніе по́слѣжде, егда́ архіере́ю Каіа́фѣ предстоя́ше, и го́ршее разслабле́нія искуше́ніе отту́ду наслѣ́дити вѣ́чнымъ огне́мъ, не три́десять и о́смь лѣ́тъ то́кмо, но при́сно му́читися.

Па́че же показа́ Христо́съ отъ грѣ́хъ ему́ разслабле́нія приключи́тися не́мощи. Не у́бо же вся́кая болѣ́знь отъ грѣ́хъ, но и отъ есте́ственна неду́га, и отъ объяде́нія, и неполе́знства, и ины́хъ мно́гихъ нахо́дитъ. Разумѣ́въ у́бо разсла́бленный, я́ко Іису́съ е́сть сотвори́вый его́ здра́ва, Сего́ іуде́емъ устроя́етъ вѣ́дома. Они́ же на гнѣ́въ поостри́вшеся, иска́ху уби́ти Христа́, я́ко у́бо суббо́ту разруша́ше. Онъ же тѣ́мъ мно́гая глаго́лаше, составля́я, я́ко пра́ведно и въ суббо́ту благодѣ́йствовати, и я́ко То́й Са́мъ е́сть, Иже суббо́ту рекíй блюсти́, я́ко ра́венъ е́сть Отцу́, и я́коже Онъ еще́ дѣ́лаетъ, та́ко и Се́й.

Вѣ́домо же, я́ко и́нъ се́й разсла́бленный, о́наго и́же въ Матѳе́и разсла́бленнаго: о́но у́бо въ хра́минѣ содѣ́яся, и служа́щимъ о́ному человѣ́комъ, и — оставля́ются тебѣ́ грѣси́! — слы́шавшу. Сіе́ же въ притво́рѣ содѣ́яся, и человѣ́ка не имѣ́яше, я́коже глаго́летъ свяще́нное Ева́нгеліе, и я́ко о́дръ взя́тъ, я́коже и о́ный.

Пра́зднуется же ны́нѣ, за е́же въ Пятдеся́тницѣ и сему́ содѣ́ятися, я́коже и е́же о самаряны́нѣ и о слѣпо́мъ. Ѳому́ бо и мѵроно́сицы, во увѣре́ніе е́же изъ ме́ртвыхъ Воскресе́нія Христо́ва пра́зднуемъ, про́чая же — до Вознесе́нія, зане́ сія́ во вре́мя Пятдеся́тницы и́же отъ евре́й разли́чно дѣ́йствова, и я́ко о си́хъ Іоа́ннъ вкра́тцѣ та́ко помяну́.

Неизрече́нною ми́лостію Твое́ю, Христе́ Бо́же на́шъ, поми́луй на́съ. Ами́нь.

Пѣ́снь 7.

Ирмо́съ: Пла́мень ороси́вый пе́щный и о́троки неопали́мы спасы́й, благослове́нъ еси́ во вѣ́ки, Го́споди, Бо́же оте́цъ на́шихъ.

Просте́рта Тя́ на Дре́вѣ я́ко зря́ше, свѣ́тъ скры́ со́лнце, не могу́щее мíрови свѣти́ти, Тебѣ́ во́лею заше́дшу, Всецарю́, на просвѣще́ніе всѣ́хъ язы́ковъ.

Воскре́слъ еси́, Истощи́вый гро́бы и Плѣни́вый а́дъ си́лою всеси́льною, тѣ́мже пое́мъ честно́е Твое́, Христе́, и Боже́ственное воста́ніе.

Яко ме́ртва, что́ Жива́го и́щете? Воста́, нѣ́сть во гро́бѣ! — мѵроно́сицамъ вопія́ше дре́вле, блиста́яйся зра́комъ, боже́ственный а́нгелъ.

Слежа́ща въ лѣ́тѣхъ мно́зѣхъ разсла́бленнаго сло́вомъ Исцѣли́вый, вопія́лъ еси́: возми́ о́дръ тво́й и ходи́, поя́ вели́чія Бо́жія!

Арха́нгелу Михаи́лу: Михаи́ле, нача́льный воево́до Госпо́день, вѣ́рно въ Боже́ственнѣмъ твое́мъ хра́мѣ собира́ющихся, во хвале́ніе Бо́жіе наставля́й, покрыва́й отъ вся́ческихъ зо́лъ хода́тайствомъ твои́мъ.

Сла́ва, [тро́иченъ]: О, Тро́ице, вѣ́рою пою́щія Тя́, я́ко Бо́га всѣ́хъ и Влады́ку, отъ вся́кихъ бѣ́дъ спаса́й и Твои́хъ бла́гъ прича́стники сотвори́.

И ны́нѣ, богоро́диченъ: Дѣ́вствуеши, ро́ждши па́че сло́ва пре́жде всѣ́хъ вѣ́къ Роди́вшагося отъ Безнача́льна Отца́ нетлѣ́нно, сего́ ра́ди, Чи́стая, Тебе́ ублажа́емъ.

Пѣ́снь 8.

Ирмо́съ: Ангельми немо́лчно въ вы́шнихъ сла́вимаго Бо́га, небеса́ небе́съ, земля́, и го́ры, и хо́лми, и глубина́, и ве́сь ро́дъ человѣ́ческій, пѣ́сньми Того́, я́ко Созда́теля и Изба́вителя, благослови́те и превозноси́те во вся́ вѣ́ки.

Завѣ́са раздра́ся, распе́ншуся Тебѣ́, Спа́се на́шъ, и отдава́ше ме́ртвыя, я́же пожре́ сме́рть, и а́дъ обнажи́ся, Тебе́ зря́ въ преиспо́днихъ земли́ бы́вша.

Гдѣ́ твое́ жа́ло е́сть, сме́рте? Гдѣ́ твоя́, а́де, ны́нѣ побѣ́да? Воскре́сшу Царю́, умертви́лся еси́ и поги́блъ; не ктому́ ца́рствуеши: Крѣ́пкій бо взя́тъ, я́же имѣ́лъ еси́ свя́занныя.

Тецы́те ско́ро, возвѣсти́те апо́столомъ Воскресе́ніе, — мѵроно́сицамъ явле́йся ю́ноша вѣща́ше, — воскре́се Влады́ка, и съ Ни́мъ и́же отъ вѣ́ка ме́ртвіи пресла́вно.

Лѣ́ты мно́гими слежа́й разсла́бленный взыва́ше: поми́луй мя́, Изба́вителю, недоумѣ́ніемъ содержи́ма! Се́й же повелѣва́етъ ему́ взя́ти тща́тельно о́дръ и пра́во ступа́ти.

Арха́нгелу [Михаи́лу]: Яко невеще́ственныхъ предводи́тель, Архистрати́же, си́лъ, съ на́ми проси́ на́мъ прегрѣше́ній избавле́ніе, исправле́ніе же житія́, и та́мошнихъ наслажде́ніе бла́гъ вѣ́чныхъ.

Благослови́мъ Отца́, и Сы́на, и Свята́го Ду́ха, Го́спода.

[Тро́иченъ:] Несозда́нное, непресѣко́мое Существо́, Тріѵпоста́сное Божество́: Отца́ Безнача́льна Бо́га, и Сы́на, и Ду́ха Свята́го воспои́мъ согла́сно, серафи́мскую зову́ще стра́шную пѣ́снь.

И ны́нѣ, богоро́диченъ: Сви́токъ Тя́ дре́вле зря́ше Иса́ія, Приснодѣ́во, въ не́мже пе́рстомъ Отчимъ, Сло́во безлѣ́тное написа́ся, отъ вся́каго безслове́сія спаса́ющее на́съ, словесы́ Тя́ свяще́нными воспѣва́ющихъ.

Хва́лимъ, благослови́мъ, [покланя́емся Го́сподеви, пою́ще и превознося́ще во вся́ вѣ́ки].
И катава́сія. [Честнѣ́йшую... не пое́мъ.]

Пѣ́снь 9.

Ирмо́съ: На Сина́йстѣй горѣ́, ви́дѣ Тя́ въ купинѣ́ Моисе́й, неопа́льно Огнь Божества́ заче́ншую во чре́вѣ; Даніи́лъ же Тя́ ви́дѣ го́ру несѣко́мую; же́злъ прозя́бшій, Иса́ія взыва́ше, отъ ко́рене Дави́дова.

Іису́се, на Дре́вѣ возвыша́емь, совозне́слъ еси́ на́съ, и положи́вся во́лею во гро́бѣ, изъ гробо́въ ме́ртвыя воскреси́лъ еси́ вся́, пою́щія держа́ву Твою́ непостижи́мую и си́лу Твою́ непобѣди́мую.

Краснѣ́йшій отъ гро́ба возсія́лъ еси́, я́ко жени́хъ отъ черто́га, краснѣ́йшій Сло́ве, и разруши́лъ еси́ а́да мра́чное, и ю́зники изве́лъ еси́, согла́сно зову́щія: сла́ва сла́вѣ Твое́й, сла́ва, Іису́се Бо́же, воста́нію Твоему́!

Воздыха́нія же и сле́зы нося́ща, съ мѵ́ры во тща́ніи всесвяты́й гро́бъ достиго́ша жены́, и Христо́ву учи́ми бя́ху вѣ́рою сла́вному воста́нію, е́же пра́зднуемъ въ ра́дости душе́вной, веселя́щеся.

Послѣ́доваше здра́віе тѣ́ла повелѣ́нію Твоему́, Христе́, и ви́димь бя́ше пре́жде разсла́бленный, текíй со тща́ніемъ и о́дръ нося́й, на не́мже возлежа́ше лѣ́ты мно́гими, пѣсносло́вя мно́гую си́лу Твою́.

Арха́нгелу Михаи́лу: Просвѣще́ніе на́мъ испроси́, вели́кій Архистрати́же, при́сно Свѣ́ту Вели́кому предстоя́й, и умири́ на́шу жи́знь, напа́стьми всегда́ зміе́выми и обстоя́ньми житія́ зы́блемую при́сно, достохва́льне.

Сла́ва, [тро́иченъ]: Свѣ́тъ и Свѣ́тове, Жи́знь же и Жи́зни, сла́влю Тя́ всеблагоче́стно, Отче, Сло́ве и Ду́ше Святы́й, Тріѵпоста́сная Еди́нице, нераздѣли́мая Держа́во, Божество́ несли́тное, Свя́тъ, Свя́тъ, Свя́тъ, вопія́ съ вы́шними си́лами.

И ны́нѣ, [богоро́диченъ]: Отъ свѣтоно́сныхъ про́йде ложе́снъ Твои́хъ Вели́кое Со́лнце — Христо́съ, и мíръ просвѣти́, Пречи́стая, осія́ньми свѣ́тлыми, и тму́ отъя́тъ преступле́нія: тѣ́мже пое́мъ Тя́, я́ко вину́ всѣ́хъ до́брыхъ, Богоневѣ́сто.

Та́же: Свя́тъ Госпо́дь, Бо́гъ на́шъ.., три́жды, на гла́съ 3.

Ексапостила́рій: Пло́тію усну́въ.., еди́ножды.

Другíй. Подо́бенъ: Жены́, услы́шите.

Сла́ва: Предста́ Человеколю́бецъ и Всеще́дрый Госпо́дь Овчей купѣ́ли, е́же исцѣли́ти неду́ги; обрѣ́те же человѣ́ка слежа́ща мно́гими лѣ́ты, и къ нему́ возопи́: возми́ о́дръ и иди́ на пути́ пра́выя!

И ны́нѣ: то́йже.

На хвали́техъ поста́вимъ стихо́въ 8 и пое́мъ стихи́ры воскре́сны, гла́съ 3:

Пріиди́те, вси́ язы́цы, уразумѣ́йте стра́шныя та́йны си́лу: Христо́съ бо, Спа́съ на́шъ, Еже въ нача́лѣ Сло́во, распя́тся на́съ ра́ди, и во́лею погребе́ся, и воскре́се изъ ме́ртвыхъ, е́же спасти́ вся́ческая. Тому́ поклони́мся!

Повѣ́даша вся́ чудеса́ стра́жіе Твои́, Го́споди; но собо́ръ суеты́ испо́лни мздо́ю десни́цу и́хъ, скры́ти мня́ше воскресе́ніе Твое́, е́же мíръ сла́витъ. Поми́луй на́съ!

Ра́дости вся́ испо́лнишася, воскресе́нія иску́съ пріи́мша. Марíя бо Магдали́на ко гро́бу пріи́де, обрѣ́те а́нгела на ка́мени сѣдя́ща, ри́зами блиста́ющася и глаго́люща: Что́ и́щете Жива́го съ ме́ртвыми? Нѣ́сть здѣ́, но воста́, я́коже рече́, предваря́я вы́ въ Галиле́и!

Во свѣ́тѣ Твое́мъ, Влады́ко, у́зримъ свѣ́тъ, Человѣколю́бче: воскре́слъ бо еси́ изъ ме́ртвыхъ, спасе́ніе ро́ду человѣ́ческому да́руяй, да Тя́ вся́ тва́рь славосло́витъ еди́наго Безгрѣ́шнаго. Поми́луй на́съ.

И восто́чны [анато́ліевы], гла́съ то́йже:

Пѣ́снь у́треннюю мѵроно́сицы жены́ со слеза́ми приноша́ху Тебѣ́, Го́споди, благоуха́нія бо арома́ты иму́ща, гро́ба Твоего́ достиго́ша, Пречи́стое Тѣ́ло Твое́ пома́зати тща́щася. Ангелъ, сѣ́дяй на ка́мени, тѣ́мъ благовѣсти́: что́ и́щете Жива́го съ ме́ртвыми? Сме́рть бо попра́вый, воскре́се я́ко Бо́гъ, подая́й всѣ́мъ ве́лію ми́лость.

Блиста́яся а́нгелъ на гро́бѣ Твое́мъ животво́рномъ, мѵроно́сицамъ глаго́лаше: истощи́вый гро́бы Изба́витель плѣни́ а́да, и воскре́се тридне́венъ, я́ко еди́нъ Бо́гъ и Всеси́ленъ.

Во гро́бѣ Тя́ иска́ше, прише́дши во еди́ну отъ суббо́тъ, Марíя Магдали́на, не обрѣ́тши же рыда́ше, съ пла́чемъ вопію́щи: увы́ мнѣ́, Спа́се мо́й, укра́денъ бы́лъ еси́, всѣ́хъ Царю́! Супру́гъ же живоно́сныхъ а́нгелъ вну́трь гро́ба вопія́ше: что́ пла́чеши, о же́но? — Пла́чу, — глаго́летъ, — я́ко взя́ша Го́спода моего́ отъ гро́ба, и не вѣ́мъ, гдѣ́ положи́ша Его́. Сія́ же обрати́вшися вспя́ть, я́ко ви́дѣ Тя́, а́біе возопи́: Госпо́дь мо́й и Бо́гъ мо́й, сла́ва Тебѣ́!

Евре́и затвори́ша во гро́бѣ Живо́тъ, разбо́йникъ же отве́рзе язы́комъ наслажде́ніе, зовы́й и глаго́ля: со мно́ю мене́ ра́ди Распны́йся сообѣ́сися ми́ на Дре́вѣ, и яви́ся мнѣ́ на престо́лѣ со Отце́мъ сѣдя́; То́й бо е́сть Христо́съ Бо́гъ на́шъ, имѣ́яй ве́лію ми́лость.

Сла́ва, гла́съ 8:

Го́споди, разсла́бленнаго не купѣ́ль исцѣли́, но Твое́ сло́во обнови́, и ниже́ многолѣ́тный запя́тъ ему́ неду́гъ: я́ко гла́са Твоего́ скорѣ́йшее дѣ́йство показа́ся, и неудобоноси́мую тя́жесть отве́рже, и бре́мя одра́ понесе́, во свидѣ́тельство мно́жества щедро́тъ Твои́хъ. Сла́ва Тебѣ́!

И ны́нѣ: Преблагослове́нна еси́...

Славосло́віе вели́кое. Тропа́рь воскре́сенъ, ектеніи́, и отпу́стъ, и исхожде́ніе въ притво́ръ.

Сла́ва, и ны́нѣ. Стихи́ра ева́нгельская, гла́съ 3:

Магдали́нѣ Марíи, Спа́сово благовѣству́ющей изъ ме́ртвыхъ Воскресе́ніе и явле́ніе, не вѣ́рующе же ученицы́ поноси́ми бы́ша о жестосе́рдіи, но зна́менми вооружи́вшеся и чудесы́, ко проповѣ́данію посыла́хуся. И Ты́ у́бо, Го́споди, къ Нача́льному Свѣ́ту возне́слся еси́, Отцу́; они́ же проповѣ́даша всю́ду сло́во, чудесы́ увѣря́юще. Тѣ́мже просвѣти́вшеся тѣ́ми, сла́вимъ Твое́ е́же изъ ме́ртвыхъ Воскресе́ніе, Человѣколю́бче Го́споди!

И поуче́ніе Студи́тово. И коне́чный отпу́стъ. Ча́съ 1-й. На часѣ́хъ тропа́рь воскре́сенъ. По трисвято́мъ конда́къ тріо́ди: Ду́шу мою́, Го́споди...



НА ЛИТУРГІИ,
Блаже́нна гла́са, гла́съ 3, на 4:

Отве́ргшаго, Христе́, за́повѣдь Твою́ пра́отца Ада́ма изъ рая́ изгна́лъ еси́; разбо́йника же, Ще́дре, исповѣ́давша Тя́ на крестѣ́, въ о́нь всели́лъ еси́, зову́ща: помяни́ мя́, Спа́се, во Ца́рствіи Твое́мъ!

Воскре́съ изъ ме́ртвыхъ, совоскреси́лъ еси́ на́съ отъ страсте́й Воскресе́ніемъ Твои́мъ, Го́споди; сме́ртную же всю́ си́лу погуби́лъ еси́, Спа́се. Сего́ ра́ди вѣ́рою Ти́ зове́мъ: помяни́ и на́съ во Ца́рствіи Твое́мъ!

Тридне́внымъ Твои́мъ погребе́ніемъ, я́же во а́дѣ умерщвле́нныя, я́ко Бо́гъ оживотвори́вый, совоздви́глъ еси́, и нетлѣ́ніе всѣ́мъ, я́ко Бла́гъ, источи́лъ еси́ на́мъ, вѣ́рою зову́щимъ всегда́: помяни́ и на́съ во Ца́рствіи Твое́мъ!

Согрѣ́шшихъ на́съ сме́ртною осуди́лъ еси́ кля́твою, Жизнода́вче и Го́споди, тѣ́ломъ же Твои́мъ безгрѣ́шне, Влады́ко, пострада́въ, сме́ртныя оживи́лъ еси́, зову́щія: помяни́ и на́съ во Ца́рствіи Твое́мъ!

И отъ кано́на, пѣ́снь 6-я, на 4. По вхо́дѣ: Тропа́рь воскре́сенъ. Сла́ва: конда́къ тріо́ди. И ны́нѣ: Па́схи: Аще и во гро́бъ... [Хра́ма же Христо́ва, и Богоро́дицы и святы́хъ, тропаря́ и кондака́ не глаго́лемъ]. Проки́менъ, гла́съ 1: Бу́ди, Го́споди, ми́лость Твоя́ на на́съ,* я́коже упова́хомъ на Тя́. Сти́хъ: Ра́дуйтеся, пра́ведніи, о Го́сподѣ, пра́вымъ подоба́етъ похвала́. Апо́столъ Дѣя́ній, зача́ло 23: Бы́сть Петру́, посѣща́ющу всѣ́хъ... Аллилу́ія, гла́съ 5: Ми́лости Твоя́, Го́споди, во вѣ́къ воспою́, [въ ро́дъ и ро́дъ возвѣщу́ и́стину усты́ мои́ми]. Сти́хъ: Зане́ ре́клъ еси́: въ вѣ́къ ми́лость сози́ждется, [на небесѣ́хъ угото́вится и́стина Твоя́]. Ева́нгеліе Іоа́нна, зача́ло 14: Взы́де Іису́съ во Іерусали́мъ... Прича́стный: Тѣ́ло Христо́во... Другíй: Хвали́те Го́спода съ небе́съ...

[Зри́:] Подоба́етъ вѣ́дати, я́ко вослѣ́дованіе разсла́бленнаго пое́тся въ недѣ́лю [и] въ понедѣ́льникъ, во вто́рникъ же отдае́тся.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 72 об. – 81 об.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.