Церковный календарь
Новости


2017-06-28 / russportal
Манифестъ о милостяхъ по случаю бракосоч. Имп. Николая Александровича (1894)
2017-06-28 / russportal
Манифестъ о бракосоч. Имп. Николая II съ Вел. Кн. Александрой Ѳеодоровной (1894)
2017-06-28 / russportal
Прав. Іоаннъ Кронштадтскій. «Новыя грозныя слова». Слово 22-е (1908)
2017-06-28 / russportal
Прав. Іоаннъ Кронштадтскій. «Новыя грозныя слова». Слово 21-е (1908)
2017-06-27 / russportal
П. Н. Красновъ. "Павлоны". Часть 1-я. Глава 12-я (1943)
2017-06-27 / russportal
П. Н. Красновъ. "Павлоны". Часть 1-я. Глава 11-я (1943)
2017-06-27 / russportal
"Книга Русской Скорби". Выпускъ 1-й: Вел. Кн. Сергій Александровичъ (1908)
2017-06-27 / russportal
"Книга Русской Скорби". Выпускъ 1-й: Государь Имп. Александръ II (1908)
2017-06-27 / russportal
Высочайшій Манифестъ о введеніи всеобщей воинской повинности (1874)
2017-06-27 / russportal
Высочайшій Манифестъ о прекращеніи Восточной (Крымской) войны (1856)
2017-06-27 / russportal
Преп. Ефремъ Сиринъ. На слова: "вонми себѣ", 12 главъ (1895)
2017-06-27 / russportal
Преп. Ефремъ Сиринъ. О добродѣтели, 10 главъ (1895)
2017-06-26 / russportal
Осн. Положенія о порядкѣ изд. законовъ, относ. до Имперіи со вкл. Вел. Кн. Финляндскаго (1899)
2017-06-26 / russportal
Манифестъ о порядкѣ изд. законовъ, относ. до Имперіи со вкл. Вел. Кн. Финляндскаго (1899)
2017-06-26 / russportal
Н. Д. Тальбергъ. "Исторія Русской Церкви". Сост. религ. образованія народа (1959)
2017-06-26 / russportal
Н. Д. Тальбергъ. "Исторія Русской Церкви". Императ. Палестинское общество (1959)
Новости въ видѣ
RSS-канала: .
Сегодня - четвергъ, 29 iюня 2017 г. Сейчасъ на порталѣ посѣтителей - 25.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ПОНЕДѢЛЬНИКЪ ЧЕТВЕРТЫЯ СЕДМИЦЫ ПО ПАСЦѢ.

ВЪ ТУЮЖДЕ НЕДѢЛЮ ВЕЧЕРА,
На Го́споди воззва́хъ: стихи́ры пра́здника 3 и мине́и 3.

Стихи́ры пра́здника, гла́съ 8. Подо́бенъ: О, пресла́внаго чудесе́!

О, пресла́внаго чудесе́! Творе́цъ всѣ́хъ Плотоно́сецъ бы́въ, въ на́ше обнища́ естество́, хотя́, я́ко Благоутро́бенъ и съ человѣ́ки пожи́въ, чуде́съ мно́жество евре́омъ показа́. Тѣ́мже исцѣли́ иногда́ разсла́бленнаго, ре́къ ему́, — возми́ о́дръ тво́й! — въ Виѳесду́ прише́дъ.

Спа́се, Бо́же мо́й и Го́споди, па́дшія человѣ́ки воскреси́ти хотя́, на земли́, я́ко Человѣ́къ, обхожда́лъ еси́, исцѣля́я всѣ́хъ неду́ги мно́гаго ра́ди благоутро́бія. Тѣ́мже, прише́дъ ко Овчей купѣ́ли, цѣ́ла воздви́глъ еси́ иногда́ разсла́бленнаго сло́вомъ Твои́мъ, три́десять о́смь лѣ́тъ лежа́ща.

За́вистію евре́и снеда́еми, благодѣя́ніемъ Твои́мъ, Преблагíй Го́споди, вину́ творя́ще, и неи́стовства разжже́ніемъ, беззако́ннующе са́ми въ зако́нѣ при́сно, Тебе́ иска́ху уби́ти, вои́стинну Жи́знь, суббо́ты ра́ди, егда́ всего́ человѣ́ка показа́лъ еси́ Ты́ здра́ва, пре́жде разсла́бленна су́ща.

Сла́ва, и ны́нѣ, гла́съ 5:

При Овчей купѣ́ли человѣ́къ лежа́ше въ не́мощи и ви́дѣвъ Тя́, Го́споди, вопія́ше: человѣ́ка не и́мамъ, да егда́ возмути́тся вода́, вве́ржетъ мя́ въ ню́. Егда́ же прихожду́, и́нъ предваря́етъ мя́ и пріе́млетъ исцѣле́ніе; а́зъ же немощству́яй лежу́. И а́біе, умилосе́рдився, Спа́съ глаго́летъ къ нему́: тебе́ ра́ди Человѣ́къ бы́хъ, тебе́ ра́ди въ пло́ть облеко́хся, и глаго́леши: человѣ́ка не и́мамъ. Возми́ о́дръ тво́й и ходи́! — Вся́ Тебѣ́ возмо́жна, вся́ послу́шаютъ, вся́ повину́ются. Всѣ́хъ на́съ помяни́ и поми́луй, Святы́й, я́ко Человѣколю́бецъ.

На стихо́внѣ стихи́ры, гла́съ 3:

Твои́мъ Кресто́мъ, Христе́ Спа́се, сме́рти держа́ва разруши́ся, и діа́воля пре́лесть упраздни́ся, ро́дъ же человѣ́ческій, вѣ́рою спаса́емый, пѣ́снь Тебѣ́ всегда́ прино́ситъ.

Сти́хъ: Къ Тебѣ́ возведо́хъ о́чи мо́и, [Живу́щему на небеси́. Се́ я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́].

Вече́рнюю пѣ́снь прино́симъ Ти́, Христе́, съ кади́ломъ и пѣ́сньми духо́вными: поми́луй, Спа́се, ду́ши на́ша!

Сти́хъ: Поми́луй на́съ, Го́споди, поми́луй на́съ, [я́ко по мно́гу испо́лнихомся уничиже́нія, наипа́че напо́лнися душа́ на́ша поноше́нія гобзу́ющихъ и уничиже́нія го́рдыхъ].

Му́чениченъ: Ве́лія Креста́ Твоего́, Го́споди, си́ла: водрузи́бося на мѣ́стѣ и дѣ́йствуетъ въ мíрѣ, и показа́ отъ ры́барей апо́столы и отъ язы́къ му́ченики, да мо́лятся о душа́хъ на́шихъ.

Сла́ва, и ны́нѣ, гла́съ 1:

Дла́нію пречи́стою Созда́вый человѣ́ка, прише́лъ еси́, Благоутро́бне, неду́гующія исцѣли́ти, Христе́: разсла́бленнаго во Овчей купѣ́ли сло́вомъ Твои́мъ возста́вилъ еси́, кровоточи́вой же болѣ́знь исцѣли́лъ еси́, ханане́и отрокови́цу стужа́емую поми́ловалъ еси́ и проше́нія со́тника не презрѣ́лъ еси́. Сего́ ра́ди зове́мъ: Всеси́льне Го́споди, сла́ва Тебѣ́!

Та́же тропа́рь воскре́сенъ. И отпу́стъ.




НА УТРЕНИ,

На Бо́гъ Госпо́дь: Тропа́рь воскре́сенъ, два́жды. Сла́ва: свята́го, а́ще и́мать. И ны́нѣ: богоро́диченъ 1-й, во гла́съ тропаря́ свята́го. Аще ли ни́: Сла́ва, и ны́нѣ, богоро́диченъ 1-й гла́са.

По 1-мъ стихосло́віи сѣда́ленъ, гла́съ 3:

Христо́съ отъ ме́ртвыхъ воста́, Нача́токъ усо́пшихъ, Перворожде́нъ тва́ри и Содѣ́тель всѣ́хъ бы́вшихъ, истлѣ́вшее естество́ ро́да на́шего въ Себѣ́ Само́мъ обнови́. Не ктому́, сме́рте, облада́еши, и́бо всѣ́хъ Влады́ка держа́ву твою́ разруши́.

Сти́хъ: Го́споди, да не я́ростію Твое́ю обличи́ши мене́, [ниже́ гнѣ́вомъ Твои́мъ нака́жеши мене́].

Живу́щи на земли́, душе́ моя́, пока́йся: пе́рсть во гро́бѣ не пое́тъ, согрѣше́ній не избавля́етъ. Возопíй Христу́ Бо́гу: Сердцевѣ́дче, согрѣши́хъ, пре́жде да́же не осу́диши мя́, поми́луй мя́!

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Му́чениченъ: Благоду́шіе терпѣ́нія ва́шего побѣди́ ко́зни злонача́льнаго врага́, страстоте́рпцы блаже́нніи, сего́ ра́ди вѣ́чнаго сподо́бистеся блаже́нства. Но моли́теся Го́сподеви христолюби́выхъ люде́й спасти́ ста́до, му́ченицы су́ще истины.

Сла́ва, и ны́нѣ:

Красотѣ́ дѣ́вства Твоего́, и пресвѣ́тлой чистотѣ́ Твое́й, Гавріи́лъ удиви́вся, вопія́ше Ти́, Богоро́дице: ку́ю Ти́ похвалу́ принесу́ досто́йную? Что́ же возимену́ю Тя́? Недоумѣва́ю и ужаса́юся. Тѣ́мже, я́ко повелѣ́нъ бы́хъ, вопію́ Ти́: ра́дуйся, Благода́тная!

По 2-мъ стихосло́віи сѣда́ленъ, гла́съ 3. Подо́бенъ: Красотѣ́ дѣ́вства.

Разслабле́ніе обрѣто́ша всетѣле́сное разсла́бленніи, за́вистію стягне́ни, въ суббо́ту разсла́бленнаго стягну́тіе помышля́юще, глаго́люще: не досто́итъ цѣли́ти въ суббо́ты, разоря́ти же оте́ческое суббо́ты поко́ище, — зако́на Тебе́ не вѣ́дуще Влады́ку и Цѣли́теля ду́шъ на́шихъ.

Сла́ва, и ны́нѣ, то́йже.

Та́же: Воскресе́ніе Христо́во... Псало́мъ 50-й. Та́же кано́ны пра́здника [недѣ́ли разсла́бленнаго], со ирмосы́, на 8 и мине́и на 4. Конда́къ и ексапостила́рій пра́здника.

На хвали́техъ поста́вимъ стихи́ 4 и пое́мъ настоя́щія стихи́ры осмогла́сника, гла́съ 3:

Пріиди́те, вси́ язы́цы, уразумѣ́йте стра́шныя та́йны си́лу: Христо́съ бо, Спа́съ на́шъ, Еже въ нача́лѣ Сло́во, распя́тся на́съ ра́ди, и во́лею погребе́ся, и воскре́се изъ ме́ртвыхъ, е́же спасти́ вся́ческая. Тому́ поклони́мся! [Два́жды.]

Мно́жицею пѣснопѣ́ніе соверша́я, обрѣто́хся грѣ́хъ исполня́я: язы́комъ у́бо пѣ́ніе вѣща́я, душе́ю же безмѣ́стная помышля́ю. Но обоя́ испра́ви, Христе́ Бо́же, покая́ніемъ и поми́луй мя́.

Му́чениченъ: Святы́хъ страстоте́рпецъ па́мять, пріиди́те, лю́діе вси́, почти́мъ, я́ко позо́ръ бы́вше а́нгеломъ и человѣ́комъ, побѣ́ды вѣне́цъ отъ Христа́ прія́ша и мо́лятся о душа́хъ на́шихъ.

Сла́ва, и ны́нѣ, гла́съ 1:

Непогребе́нъ мертве́цъ сы́й, разсла́бленный ви́дѣвъ Тя́, возопи́: поми́луй мя́, Го́споди, я́ко о́дръ мо́й гро́бъ мнѣ́ бы́сть! Что́ ми́ приобрѣ́теніе живота́? Не тре́бую Овчія купѣ́ли: не и́мамъ бо никого́же влага́юща мя́, возмуща́ющимся вода́мъ; но Тебѣ́ Исто́чнику прихожду́ исцѣле́ній, да и а́зъ со всѣ́ми зову́: Всеси́льне Го́споди, сла́ва Тебѣ́!

На стихо́внѣ стихи́ры, гла́съ 3. Подо́бенъ: Ве́лія Креста́.

Зна́меній и чуде́съ ви́дяще си́лу, за́вистію разсла́бленніи и си́льніи зло́бою не вѣ́роваху, я́ко Ты́ еси́ Сы́нъ Бо́жій и Строи́тель всѣ́хъ, и разсла́бленнаго здра́ва показа́вый сло́вомъ.

Сти́хъ: Ми́лости Твоя́, Го́споди, во вѣ́къ воспою́.

Ви́дѣвше суббо́тъ храни́теліе разсла́бленнаго стя́гнута въ суббо́ту, и душе́ю омрача́хуся, — и не подоба́етъ въ суббо́ту цѣли́ти и скверни́ти суббо́ту, — не́гли, я́ко зако́нніи кни́жницы, вопія́ху.

Сти́хъ: Яко́ ре́клъ еси́: въ вѣ́къ ми́лость сози́ждется.

Суббо́тъ Самодѣ́теля не вѣ́дуще Тя́ и Го́спода, суббо́ты храня́щіи о разсла́бленнаго стягну́тіи ропта́ху, въ суббо́ту бы́вшемъ, — я́ко не добро́, — глаго́люще, — взя́ти о́дръ въ де́нь суббо́тный.

Сла́ва, и ны́нѣ, гла́съ 5:

Взы́де Іису́съ во Іерусали́мъ на Овчую купѣ́ль, глаго́лемую іуде́йски Виѳесда́, пя́ть притво́ровъ иму́щую: въ тѣ́хъ бо слежа́ше мно́жество немощству́ющихъ. Ангелъ бо Бо́жій, по вся́ лѣ́та сходя́, возмуща́ше ю́ и здра́віе подава́ше приступа́ющимъ вѣ́рою. И ви́дѣвъ Госпо́дь многовре́менна человѣ́ка, глаго́летъ къ нему́: хо́щеши ли здра́въ бы́ти? Немощству́яй отвѣщава́ше: Го́споди, человѣ́ка не и́мамъ, да егда́ возмути́тся вода́, вве́ржетъ мя́ въ купѣ́ль; враче́мъ изда́хъ все́ имѣ́ніе мое́, и ми́лости улучи́ти не сподо́бихся. Но Вра́чь ду́шъ и тѣле́съ глаго́летъ къ нему́: возми́ тво́й о́дръ и ходи́, проповѣ́дуя Мою́ си́лу и ве́лію ми́лость въ концѣ́хъ.

Та́же: Бла́го е́сть исповѣ́датися... Ча́съ 1-й. И отпу́стъ.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 82 – 84.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.