Церковный календарь
Новости


2017-05-28 / russportal
"Тріодь Цвѣтная". Служба въ недѣлю 8-ю. День Святой Троицы. Пятидесятница (1864)
2017-05-28 / russportal
"Тріодь Цвѣтная". Служба въ субботу 7-й седмицы. Троицкая поминальная суббота (1864)
2017-05-28 / russportal
Прав. Іоаннъ Кронштадтскій. Слово (4-е) въ недѣлю свв. отцевъ Никейскаго Собора (1894)
2017-05-28 / russportal
Прав. Іоаннъ Кронштадтскій. Слово (3-е) въ недѣлю свв. отцевъ Никейскаго Собора (1894)
2017-05-28 / russportal
Прав. Іоаннъ Кронштадтскій. Слово (2-е) въ недѣлю свв. отцевъ Никейскаго Собора (1894)
2017-05-28 / russportal
Прав. Іоаннъ Кронштадтскій. Слово (1-е) въ недѣлю свв. отцевъ Никейскаго Собора (1894)
2017-05-27 / russportal
Архіеп. Аверкій (Таушевъ). Рождественское привѣтствіе (1975)
2017-05-27 / russportal
Архіеп. Аверкій (Таушевъ). Духовный большевизмъ (1975)
2017-05-27 / russportal
И. А. Ильинъ. О признаніи революціи (1925)
2017-05-27 / russportal
И. А. Ильинъ. Отрицателямъ меча (1925)
2017-05-26 / russportal
Архіеп. Аверкій (Таушевъ). Миръ и непримиримость (1975)
2017-05-26 / russportal
Архіеп. Аверкій (Таушевъ). Къ 40-лѣтію паденія русскаго народа (1975)
2017-05-26 / russportal
И. А. Ильинъ. Подвигъ патріотическаго единенія (1925)
2017-05-26 / russportal
И. А. Ильинъ. Самообладаніе и самообузданіе (1925)
2017-05-25 / russportal
И. А. Ильинъ. Идея Корнилова (1925)
2017-05-25 / russportal
И. А. Ильинъ. Кто мы? (1925)
Новости въ видѣ
RSS-канала: .
Сегодня - воскресенiе, 28 мая 2017 г. Сейчасъ на порталѣ посѣтителей - 20.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВО ВТОРНИКЪ ЧЕТВЕРТЫЯ СЕДМИЦЫ ПО ПАСЦѢ.

ВЪ ПОНЕДѢЛЬНИКЪ ВЕЧЕРА,
На Го́споди воззва́хъ... поста́вимъ стихо́въ 6 и пое́мъ настоя́щія два́ самогла́сна, повторя́юще 1-й, и мине́и 3.

Гла́съ 1:

Дла́нію пречи́стою Созда́вый человѣ́ка, прише́лъ еси́, Благоутро́бне, неду́гующія исцѣли́ти, Христе́: разсла́бленнаго во Овчей купѣ́ли сло́вомъ Твои́мъ возста́вилъ еси́, кровоточи́вой же болѣ́знь исцѣли́лъ еси́, ханане́и отрокови́цу стужа́емую поми́ловалъ еси́ и проше́нія со́тника не презрѣ́лъ еси́. Сего́ ра́ди зове́мъ: Всеси́льне Го́споди, сла́ва Тебѣ́! [Два́жды.]

Непогребе́нъ мертве́цъ сы́й, разсла́бленный ви́дѣвъ Тя́, возопи́: поми́луй мя́, Го́споди, я́ко о́дръ мо́й гро́бъ мнѣ́ бы́сть! Что́ ми́ приобрѣ́теніе живота́? Не тре́бую Овчія купѣ́ли, не и́мамъ бо никого́же влага́юща мя́, возмуща́ющимся вода́мъ; но Тебѣ́ Исто́чнику прихожду́ исцѣле́ній, да и а́зъ со всѣ́ми зову́: Всеси́льне Го́споди, сла́ва Тебѣ́!

Сла́ва, и ны́нѣ, гла́съ 5:

Взы́де Іису́съ во Іерусали́мъ на Овчую купѣ́ль, глаго́лемую іуде́йски Виѳесда́, пя́ть притво́ровъ иму́щую: въ тѣ́хъ бо слежа́ше мно́жество немощству́ющихъ. Ангелъ бо Бо́жій, по вся́ лѣ́та сходя́, возмуща́ше ю́ и здра́віе подава́ше приступа́ющимъ вѣ́рою. И ви́дѣвъ Госпо́дь многовре́менна человѣ́ка, глаго́летъ къ нему́: хо́щеши ли здра́въ бы́ти? Немощству́яй отвѣщава́ше: Го́споди, человѣ́ка не и́мамъ, да егда́ возмути́тся вода́, вве́ржетъ мя́ въ купѣ́ль; враче́мъ изда́хъ все́ имѣ́ніе мое́, и ми́лости улучи́ти не сподо́бихся. Но Вра́чь ду́шъ и тѣле́съ глаго́летъ къ нему́: возми́ тво́й о́дръ и ходи́, проповѣ́дуя Мою́ си́лу и ве́лію ми́лость въ концѣ́хъ.

И а́біе: Свѣ́те Ти́хій... Проки́менъ дне́.

На стихо́внѣ стихи́ры осмогла́сника, гла́съ 3:

Просвѣти́шася вся́ческая Воскресе́ніемъ Твои́мъ, Го́споди, и ра́й па́ки отве́рзеся, вся́ же тва́рь, восхваля́ющи Тя́, пѣ́снь Тебѣ́ всегда́ прино́ситъ.

Сти́хъ: Къ Тебѣ́ возведо́хъ о́чи мо́и, [Живу́щему на небеси́. Се́ я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́].

Спаси́ мя́, Го́споди Бо́же мо́й, Ты́ бо всѣ́хъ еси́ спасе́ніе! Бу́ря мя́ страсте́й смуща́етъ и бре́мя беззако́ній погружа́етъ, да́ждь ми́ ру́ку по́мощи и къ свѣ́ту возведи́ мя́ умиле́нія, я́ко еди́нъ Благоутро́бенъ и Человѣколю́бецъ.

Сти́хъ: Поми́луй на́съ, Го́споди, поми́луй на́съ, [я́ко по мно́гу испо́лнихомся уничиже́нія, наипа́че напо́лнися душа́ на́ша поноше́нія гобзу́ющихъ и уничиже́нія го́рдыхъ].

Му́чениченъ: Ве́лія му́ченикъ Твои́хъ, Христе́, си́ла: во гробѣ́хъ бо лежа́тъ, и ду́хи прогоня́ютъ, и упраздни́ша вра́жію вла́сть, вѣ́рою Тро́ическою подви́гшеся по благоче́стіи.

Сла́ва, и ны́нѣ, гла́съ 8:

Въ притво́рѣ Соломо́новѣ, та́мо слежа́ше мно́жество немощству́ющихъ, и преполови́вшуся пра́зднику, обрѣ́те Христо́съ три́десять о́смь лѣ́тъ разсла́блена лежа́ща, Влады́чнимъ гла́сомъ глаго́летъ къ нему́: хо́щеши ли здра́въ бы́ти? Немощству́яй отвѣщава́ше: Го́споди, человѣ́ка не и́мамъ, да егда́ возмути́тся вода́, вве́ржетъ мя́ въ купѣ́ль. Онъ же глаго́летъ къ нему́: возми́ о́дръ тво́й и ходи́; се́ здра́въ бы́лъ еси́, ктому́ не согрѣша́й! Богоро́дицы моли́твами низпосли́ на́мъ ве́лію ми́лость!

Та́же: Ны́нѣ отпуща́еши... По Отче на́шъ... тропа́рь и отпу́стъ.




ВО ВТОРНИКЪ ЧЕТВЕРТЫЯ СЕДМИЦЫ, НА УТРЕНИ,
На Бо́гъ Госпо́дь: Тропа́рь воскре́сный, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 3:

Пло́тію сме́рть вкуси́вый, Го́споди, го́ресть сме́рти пресѣ́клъ еси́ воста́ніемъ Твои́мъ, и человѣ́ка на ню́ укрѣпи́вый, пе́рвыя кля́твы одолѣ́ніе призыва́я. Защи́тниче жи́зни на́шея, Го́споди, сла́ва Тебѣ́!

Сти́хъ: Го́споди, да не я́ростію Твое́ю обличи́ши мене́, [ниже́ гнѣ́вомъ Твои́мъ нака́жеши мене́].

Доко́лѣ, душе́ моя́, пребыва́еши во грѣсѣ́хъ? Доко́лѣ пріе́млеши покая́нія преложе́ніе? Пріими́ во умѣ́ су́дъ бу́дущій, возопíй Го́сподеви: согрѣши́хъ, Безгрѣ́шне, поми́луй мя́!

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Му́чениченъ: Сія́ете вѣ́рою, пресвѣ́тлая свѣти́ла, святíи, благоче́стія рачи́теліе, страстоте́рпцы прехва́льніи: мучи́телей бо не убоя́вшеся ра́нъ, и́дольскую пре́лесть низложи́сте, побѣ́ду иму́ще непобѣди́мую — Кре́стъ и́стинный.

Сла́ва, и ны́нѣ, богоро́диченъ:

Прибѣ́жище и си́ло, Богоро́дице, держа́вная по́моще мíра, моли́твами Твои́ми спаса́й рабы́ Твоя́ отъ вся́кія ну́жды, еди́на Благослове́нная.

По 2-мъ стихосло́віи сѣда́ленъ, гла́съ 3. Подо́бенъ: Красотѣ́ дѣ́вства.

Разслабле́ніе обрѣто́ша всетѣле́сное разсла́бленніи, за́вистію стягне́нніи, въ суббо́ту разсла́бленнаго стягну́тіе помышля́юще, глаго́люще: не досто́итъ цѣли́ти въ суббо́ты, разоря́ти же оте́ческое суббо́ты поко́ище, — зако́на Тебе́ не вѣ́дуще Влады́ку и Цѣли́теля ду́шъ на́шихъ.

Сла́ва, и ны́нѣ, то́йже.

Воскресе́ніе Христо́во... Псало́мъ 50-й. Кано́ны пра́здника [недѣ́ли разсла́бленнаго], со ирмосо́мъ, на 8 и мине́и на 4. Конда́къ и ексапостила́рій пра́здника.

На хвали́техъ поста́вимъ стихи́ 4, повторя́юще пе́рвый, гласъ 3:

Повѣ́даша вся́ чудеса́ стра́жіе Твои́, Го́споди; но собо́ръ суеты́ испо́лни мздо́ю десни́цу и́хъ, скры́ти мня́ше воскресе́ніе Твое́, е́же мíръ сла́витъ. Поми́луй на́съ! [Два́жды.]

Разсѣ́янный мо́й у́мъ собери́, Го́споди, и оляденѣ́вшее се́рдце мое́ очи́сти, я́ко Петру́ дая́й мнѣ́ покая́ніе, я́ко мытарю́ — воздыха́ніе, и я́ко блудни́цѣ — сле́зы, да ве́ліимъ гла́сомъ взыва́ю Ти́: Бо́же, спаси́ мя́, я́ко еди́нъ Благоутро́бенъ и Человѣколю́бецъ!

Му́чениченъ: Царе́й и мучи́телей стра́хъ отри́нуша Христо́вы во́ини, и благодерзнове́нно и му́жески Того́ исповѣ́даша, всѣ́хъ Го́спода Бо́га и Царя́ на́шего, и мо́лятся непреста́нно о душа́хъ на́шихъ.

Сла́ва, и ны́нѣ, гла́съ 8:

Го́споди, разсла́бленнаго не купѣ́ль исцѣли́, но Твое́ сло́во обнови́, и ниже́ многолѣ́тный запя́тъ ему́ неду́гъ: я́ко гла́са Твоего́ скорѣ́йшее дѣ́йство показа́ся, и неудобоноси́мую тя́жесть отве́рже, и бре́мя одра́ понесе́, во свидѣ́тельство мно́жества щедро́тъ Твои́хъ. Сла́ва Тебѣ́!

На стихо́внѣ стихи́ры, гла́съ 3. Подо́бенъ: Ве́лія Креста́.

Яви́ся разсла́бленнымъ удесе́мъ сло́во Твое́, я́коже связа́ніе живоно́сное, Животво́рче мо́й Сло́ве, его́же свидѣ́тельство, па́че наде́жди одра́ взя́тіе, его́же повелѣ́нъ, ноша́ше, слежа́въ на не́мъ на мно́зѣ.

Сти́хъ: Ми́лости Твоя́, Го́споди, во вѣ́къ воспою́.

Ра́дуяся исполня́етъ повелѣ́ніе разсла́бленный Твоея́ всеси́льныя Влады́чнія крѣ́пости, и о́дръ сво́й нося́ хожда́ше, и свидѣ́тельствуя взыва́ше: Исцѣли́вый сіе́ мнѣ́ твори́ти повелѣва́етъ!

Сти́хъ: Яко ре́клъ еси́: въ вѣ́къ ми́лость сози́ждется.

Въ лѣ́тѣхъ мно́гихъ и временѣ́хъ слежа́й, — поми́луй мя́, — зове́тъ разсла́бленный удесы́, — Свободи́телю Христе́, свя́зана недоуме́ніемъ! — И Спа́съ о́дръ взя́ти повелѣва́ше, стягну́въ у́ды.

Сла́ва, и ны́нѣ гла́съ 5:

При Овчей купѣ́ли человѣ́къ лежа́ше въ не́мощи и ви́дѣвъ Тя́, Го́споди, вопія́ше: человѣ́ка не и́мамъ, да егда́ возмути́тся вода́, вве́ржетъ мя́ въ ню́. Егда́ же прихожду́, и́нъ предваря́етъ мя́ и пріе́млетъ исцѣле́ніе; а́зъ же немощству́яй лежу́. И а́біе, умилосе́рдився, Спа́съ глаго́летъ къ нему́: тебе́ ра́ди Человѣ́къ бы́хъ, тебе́ ра́ди въ пло́ть облеко́хся, и глаго́леши: человѣ́ка не и́мамъ. Возми́ о́дръ тво́й и ходи́! — Вся́ Тебѣ́ возмо́жна, вся́ послу́шаютъ, вся́ повину́ются. Всѣ́хъ на́съ помяни́ и поми́луй, Святы́й, я́ко Человѣколю́бецъ.

Та́же: Бла́го е́сть исповѣ́датися Го́сподеви... Тропа́рь воскре́сенъ и богоро́диченъ его́. И отпу́стъ.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 84 – 86.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.