Церковный календарь
Новости


2017-07-26 / russportal
Свт. Кириллъ, архіеп. Іерусалимскій. Огласительное слово 13-е (1855)
2017-07-26 / russportal
Свт. Кириллъ, архіеп. Іерусалимскій. Огласительное слово 12-е (1855)
2017-07-25 / russportal
"Добротолюбіе". Объясненіе нѣкоторыхъ изреченій св. Антонія Великаго (1963)
2017-07-25 / russportal
"Добротолюбіе". Изреченія св. Антонія Великаго и сказанія о немъ (1963)
2017-07-24 / russportal
Cвт. Іоаннъ Шанхайскій. Слово при открытіи общества "Правосл. Дѣло" (1994)
2017-07-24 / russportal
Еп. Григорій (Граббе). Догматика о. Архимандрита Іустина (Поповича) (1964)
2017-07-23 / russportal
Свщмч. Кипріанъ Карѳагенскій. Письмо (48-е), увѣщаніе къ мученичеству (1879)
2017-07-23 / russportal
Свщмч. Кипріанъ Карѳагенскій. Письмо (47-е), противъ еретиковъ (1879)
2017-07-23 / russportal
Слова преп. Симеона Новаго Богослова. Слово 28-е (1882)
2017-07-23 / russportal
Слова преп. Симеона Новаго Богослова. Слово 27-е (1882)
2017-07-22 / russportal
А. И. Купринъ. «Разсказы для дѣтей». Фіалки (1921)
2017-07-22 / russportal
А. И. Купринъ. «Разсказы для дѣтей». Скворцы (1921)
2017-07-22 / russportal
А. С. Пушкинъ. "Повѣсти Бѣлкина". Барышня-крестьянка (1921)
2017-07-22 / russportal
А. С. Пушкинъ. "Повѣсти Бѣлкина". Станціонный смотритель (1921)
2017-07-22 / russportal
Преп. Епифаній Премудрый. Житіе преп. Сергія Радонежскаго. Глава 5-я (1903)
2017-07-22 / russportal
Преп. Епифаній Премудрый. Житіе преп. Сергія Радонежскаго. Глава 4-я (1903)
Новости въ видѣ
RSS-канала: .
Сегодня - четвергъ, 27 iюля 2017 г. Сейчасъ на порталѣ посѣтителей - 19.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ СРЕДУ ЧЕТВЕРТЫЯ СЕДМИЦЫ ПО ПАСЦѢ.
(ПРЕПОЛОВЕНІЕ ПЯТДЕСЯТНИЦЫ).

ВО ВТОРНИКЪ 4-Я СЕДМИЦЫ ПО ПАСЦѢ ВЕЧЕРА,
Нача́ло по обы́чаю, и каѳи́сма рядова́я. На Го́споди воззва́хъ... поста́вимъ стихо́въ 6 и пое́мъ стихи́ры настоя́щія 3, повторя́юще я́.

Гла́съ 4. Подо́бенъ: Го́споди, возше́дъ на Кре́стъ.

Наста́ преполове́ніе дне́й отъ спаси́тельнаго начина́емыхъ Воста́нія, Пятдеся́тницею же Боже́ственною печа́таемое, и свѣ́тится, свѣ́тлости обою́ду иму́щее, и соединя́ющее обоя́, и пріити́ сла́вѣ предъявля́ющее, Влады́чняго Вознесе́нія предпочита́етъ.

Слы́ша и возвесели́ся Сіо́нъ, благовѣсти́вшуся Христо́ву Воскресе́нію; вѣ́рніи же его́ сы́нове возра́довашася, сего́ ви́дѣвше, и омыва́юща Ду́хомъ скве́рну христоубíйства; гото́вится торжеству́ющи обои́хъ весе́лое преполове́ніе.

Прибли́жися Боже́ственнаго изоби́льное изли́тіе на всѣ́хъ, я́коже написа́ся, Ду́ха: предузаконе́ніе проповѣ́дуетъ преполови́вшееся по Христо́вѣ сме́рти и погребе́ніи и Воскресе́ніи, отъ Него́ да́нну су́щу ученико́мъ нело́жному обѣща́нію, Утѣ́шителево показу́ющу явле́ніе.

Сла́ва, и ны́нѣ, гла́съ 6:

Пра́зднику преполовля́ющуся Твоего́, Христе́, Воскресе́нія и Боже́ственнаго прише́ствія Свята́го Твоего́ Ду́ха, соше́дшеся, чуде́съ Твои́хъ воспѣва́емъ та́инства, въ о́ньже низпосли́ на́мъ ве́лію ми́лость.

Вхо́дъ. Проки́менъ дне́. Чте́нія три́:

Проро́чества Михе́ина чте́ніе. [Глава́ 4.]

Та́ко глаго́летъ Госпо́дь: отъ Сіо́на изы́детъ зако́нъ и сло́во Госпо́дне изъ Іерусали́ма, и су́дитъ посреди́ люде́й мно́гихъ и обличи́тъ язы́ки крѣ́пкія да́же на до́лзѣ. Яко вси́ лю́діе по́йдутъ кíйждо свои́мъ путе́мъ, мы́ же по́йдемъ и́менемъ Го́спода Бо́га на́шего въ вѣ́къ. Та́ко глаго́летъ Госпо́дь Вседержи́тель: услы́шите, хо́лми, су́дъ Госпо́день, и де́бри, основа́нія земли́, я́ко су́дъ Го́сподеви къ лю́демъ Его́, и со Изра́илемъ сопри́тся, глаго́ля: лю́діе Мои́, что́ сотвори́хъ ва́мъ? Или́ чи́мъ опеча́лихъ ва́съ? Отвѣщайте Ми. Зане́ возведо́хъ вы́ отъ земли́ Еги́петскія, и изъ до́му рабо́ты изба́вихъ ва́съ, и посла́хъ предъ лице́мъ ва́шимъ Моисе́я и Ааро́на и Маріа́мъ. Лю́діе Мои́, (помяни́те у́бо,) что́ совѣща́ша на ва́съ сопроти́вніи? Кто́ возвѣсти́ тебѣ́? Возвѣсти́хъ бо тебѣ́, человѣ́че, что́ добро́, или́ что́ Госпо́дь и́щетъ отъ тебе́, ра́звѣ твори́ти су́дъ, и люби́ти ми́лость, и гото́ву бы́ти е́же ходи́ти съ Го́сподемъ Бо́гомъ твои́мъ. Зане́ въ крѣ́пости возвели́чится Госпо́дь, и упасе́тъ ста́до Свое́ въ ми́рѣ да́же до коне́цъ земли́.

Проро́чества Иса́іина чте́ніе. [Глава́ 55.]

Та́ко глаго́летъ Госпо́дь: жа́ждущіи, иди́те на во́ду, и, ели́цы не и́мате сребра́, ше́дше, купи́те, и яди́те и пíйте безъ сребра́ и цѣны́ вино́ и ту́къ. Яко та́ко глаго́летъ Госпо́дь Вседержи́тель ва́мъ: лю́діе Мои́, почерпи́те во́ду съ весе́ліемъ отъ исто́чникъ спасе́нія. И рече́ши въ де́нь о́ный: воспо́йте Го́сподеви, призови́те и́мя Его́, возвѣсти́те во язы́цѣхъ сла́вная Его́, помяни́те, я́ко вознесе́ся и́мя Его́. Лю́діе Мои́, услы́шите Мене́, и снѣ́сте блага́я и наслади́тся во благи́хъ душа́ ва́ша. Внуши́те уши́ма ва́шима и послѣ́дуйте путе́мъ Мои́мъ. Услы́шите Мене́, и жива́ бу́детъ во благи́хъ душа́ ва́ша, и завѣща́ю ва́мъ завѣ́тъ вѣ́чный, и призови́те. Внегда́ же а́ще прибли́житеся Мнѣ́, да оста́витъ нечести́вый пути́ своя́ и му́жъ беззако́нный совѣ́ты своя́. И обрати́теся ко Мнѣ́, и поми́лую ва́съ и оста́влю грѣхи́ ва́ша. Не су́ть бо совѣ́ти Мои́, я́коже совѣ́ти ва́ши, ни я́коже путіе́ ва́ши, путіе́ Мои́, — глаго́летъ Госпо́дь. — Но я́коже отстои́тъ не́бо отъ земли́, та́ко отстои́тъ пу́ть Мо́й отъ путе́й ва́шихъ, и умышле́нія ва́ша отъ умышле́нія Моего́. Якоже бо а́ще сни́детъ до́ждь или́ снѣ́гъ съ небесе́ и не возврати́тся отту́ду, до́ндеже упои́тъ зе́млю, и израсти́тъ, и прозя́бнетъ, и да́стъ сѣ́мя сѣ́ющему и хлѣ́бъ въ сне́дь, си́це бу́детъ глаго́лъ Мо́й, и́же а́ще изы́детъ изъ у́стъ Мои́хъ, не возврати́тся ко Мнѣ́ то́щь, до́ндеже сконча́етъ вся́, ели́ка восхотѣ́хъ, и испра́влю пути́ твоя́ и за́повѣди Моя́. Съ весе́ліемъ бо изы́дете и съ ра́достію научите́ся, го́ры бо и хо́лми ско́чатъ, ча́юще ва́съ въ ра́дости, и вся́ древа́ се́льная воспле́щутъ вѣ́твьми. И вмѣ́сто дра́чія взы́детъ кипари́съ, вмѣ́сто же кропи́вы взы́детъ мирси́на. И бу́детъ Госпо́дь во и́мя и въ зна́меніе вѣ́чное и не оскудѣ́етъ, — глаго́летъ Госпо́дь Бо́гъ Святы́й Изра́илевъ.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго, поро́чна сотвори́тъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

Та́же ектенія́: Рце́мъ вси́... и возгла́съ. Та́же: Сподо́би, Го́споди... Посе́мъ: Испо́лнимъ вече́рнюю...

На стихо́внѣ стихи́ры самогла́сны, гла́съ 1. Іоа́нна мона́ха:

Пятдеся́тницы наста́ дне́й преполове́ніе, въ не́мже Христо́съ, обнажи́въ малови́дно Боже́ственную си́лу, разсла́бленнаго стягну́ сло́вомъ, того́ отъ одра́ возста́вивъ, и боголѣ́пно чудотворя́й въ зда́нномъ тѣ́лѣ, человѣ́комъ дарова́ вѣ́чный живо́тъ и ве́лію ми́лость.

Сти́хъ: Помяни́ со́нмъ Тво́й, его́же стяжа́лъ еси́ испе́рва.

Во святи́лище прише́лъ еси́, Прему́дросте Бо́жія, преполовля́ющуся пра́зднику, уча́ и облича́я непокори́выя іуде́и, фарисе́и и кни́жники, и вопія́ со дерзнове́ніемъ къ ни́мъ: жа́ждай да гряде́тъ ко Мнѣ́ и піе́тъ во́ду живо́тную, и не вжа́ждетъ во вѣ́къ; вѣ́руяй Мое́й бла́гости, рѣ́ки потеку́тъ изъ чре́ва его́ жи́зни вѣ́чныя. О, бла́гости и благоутро́бія Твоего́, Христе́ Бо́же на́шъ, сла́ва Тебѣ́!

Гла́съ 2:

Сти́хъ: Бо́гъ же, Ца́рь на́шъ, пре́жде вѣ́ка, содѣ́ла спасе́ніе [посредѣ́ земли́].

Егда́ преполове́ніе пра́здника наста́, взы́де Іису́съ во святи́лище, и уча́ше непокори́выя іуде́и, глаго́ля: жа́ждай да гряде́тъ ко Мнѣ́ и піе́тъ во́ду живо́тную, вѣ́чную, и не вжа́ждется во вѣ́къ; вѣ́руяй въ Мя́, рѣ́ки потеку́тъ изъ чре́ва его́, и имѣ́ти бу́детъ свѣ́тъ живо́тный.

Сла́ва, и ны́нѣ, гла́съ 8:

Преполови́вшуся пра́зднику, уча́щу Ти́, Спа́се, глаго́лаху іуде́е: ка́ко Се́й вѣ́сть пи́смена, не учи́вся? Не разумѣ́юще, я́ко Ты́ еси́ Прему́дрость, устро́ившая мíръ, сла́ва Тебѣ́.

По Ны́нѣ отпуща́еши... и по Отче на́шъ...

Тропа́рь, гла́съ 8:

Преполови́вшуся пра́зднику, жа́ждущую ду́шу мою́ благоче́стія напо́й вода́ми, я́ко всѣ́мъ, Спа́се, возопи́лъ еси́: жа́ждай да гряде́тъ ко Мнѣ́ и да піе́тъ. Исто́чниче жи́зни на́шея, Христе́ Бо́же, сла́ва Тебѣ́!

Та́же іере́й: Прему́дрость... И отпу́стъ по обы́чаю.

[Зри́:] На повече́ріи: свята́го рядова́го пое́мъ стихи́ры и кано́нъ. Конда́къ пра́здника. На полу́нощницѣ: по 1-мъ трисвято́мъ — тропа́рь пра́здника. По 2-мъ трисвято́мъ — конда́къ пра́здника. Та́же: Го́споди, поми́луй, 12. И отпу́стъ. Моли́твы заупоко́йныя: Помяни́, Го́споди, въ наде́жди... не глаго́лемъ.



ВЪ СРЕДУ ПРЕПОЛОВЕНІЯ, НА УТРЕНИ,
На Бо́гъ Госпо́дь: Тропа́рь пра́здника, три́жды.

По 1-мъ стихосло́віи сѣда́ленъ, гла́съ 4. Подо́бенъ: Ско́ро предвари́.

Всѣ́хъ серде́цъ помышле́нія Вѣ́дый, посредѣ́ святи́лища ста́въ, взыва́ше лжи́вымъ, глаго́ля и́стину: что́ и́щете уби́ти Мя́, Животода́вца, пра́зднику преполовля́ющуся, вопія́ де́рзостно? Не на ли́ца зря́ще, су́дъ суди́те, законопресту́пницы.

Сла́ва, и ны́нѣ, то́йже. И чте́ніе въ толкова́ніи Ева́нгелія Іоа́нна.

По 2-мъ стихосло́віи сѣда́ленъ, гла́съ 5. Подо́бенъ: Собезнача́льное Сло́во.

Влады́ка всѣ́хъ во хра́мѣ стоя́, пра́зднику преполови́вшуся Пятдеся́тницы честны́я, евре́емъ бесѣ́дуя, облича́ше я́вѣ въ дерзнове́ніи мно́зѣ, я́ко Ца́рь сы́й и Бо́гъ, мучи́тельство тѣ́хъ де́рзостное; на́мъ же всѣ́мъ да́руетъ за благоутро́біе ве́лію ми́лость.

Сла́ва, и ны́нѣ, то́йже. Та́же: Воскресе́ніе Христо́во... И псало́мъ 50-й.

Кано́на пра́здника два́, со ирмосы́, на 14: пе́рвый, со ирмосы́, на 8, вторы́й на 6. Послѣди́ же катава́сія — ирмо́съ втора́го кано́на, о́ба ли́ка вку́пѣ.

Кано́нъ господи́на Ѳеофа́на, его́же краестро́чіе сіе́: Преполове́ніе пра́здниковъ превели́кихъ похвалю́. Гла́съ 4:
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Ве́лія, я́же па́че ума́, Влады́ко, Боже́ственнаго Твоего́ воплоще́нія благодѣя́нія сія́ютъ на́мъ: да́рове же и благода́ти, и боже́ственныя свѣ́тлости, благода́тно истека́ющія.

Прише́лъ еси́, Христе́, свѣ́тлости Божества́ испуща́я, пра́здника посредѣ́ явле́нно: пра́здникъ бо ра́достный спаса́емыхъ еси́ и спасе́нія на́шего хода́тай.

Прему́дрость, Пра́вда, Го́споди, и Избавле́ніе у Бо́га Ты́ бы́лъ еси́ на́мъ, отъ земли́ къ небе́сной преводя́ высотѣ́, и Ду́хъ Боже́ственный да́руя.

Пло́ть Твоя́ истлѣ́нія во гро́бѣ не ви́дѣ, Влады́ко, но, я́ко соста́вися кромѣ́ сѣ́мене, тлѣ́нія не прія́тъ, послѣ́дованію естества́ пресу́щественно не рабо́тавшая.

Другíй кано́нъ, творе́ніе господи́на Андре́я Кри́тскаго, гла́съ 8.
Пѣ́снь 1. Ирмо́съ: Мо́ре огусти́лъ еси́...

Язы́цы, восплещи́те; евре́и, воспла́чите: Животода́вецъ бо Христо́съ, у́зы а́довы расто́рже, и ме́ртвыя воскреси́, и неду́ги исцѣли́ сло́вомъ. Се́й е́сть Бо́гъ на́шъ, да́вый жи́знь вѣ́рующимъ во и́мя Его́.

Чу́до показа́лъ еси́ — во́ду въ вино́ преше́дшую, во Еги́птѣ рѣ́ки преложи́вый, Влады́ко, въ кро́вь; и ме́ртвыя воскреси́лъ еси́, зна́меніе сіе́ второ́е сконча́въ. Сла́ва, Спа́се, несказа́нному Твоему́ совѣ́ту; сла́ва истоща́нію Твоему́, и́мже обнови́лъ еси́ на́съ.

Струя́ приснотеку́щая сы́й, Го́споди, жи́зни и́стинныя, Ты́ еси́ Воскресе́ніе на́ше; хотя́ труди́лся еси́, Спа́се мо́й, и во́лею вжажда́лся еси́, зако́номъ естества́ повину́яся, и въ Сиха́рь ше́дъ пло́тію, воды́ проси́лъ еси́ у самаряны́ни пи́ти.

Хлѣ́бы благослови́лъ еси́, ры́бы умно́жилъ еси́, непостижи́мый Бо́же, и лю́ди насы́тилъ еси́ незави́стно, и исто́чникъ приснотеку́щій — прему́дрость, жа́ждущимъ обѣща́лъ еси́. Ты́ еси́ Спа́съ, Бо́гъ на́шъ, да́вый живо́тъ вѣ́рующимъ во и́мя Твое́.

Сла́ва, тро́иченъ: Три́ Собезнача́льны сла́влю и Сопресто́льны: Отца́ безнача́льна Бо́га, и Сы́на собезнача́льна, и Ду́ха соприсносу́щна Сы́ну, Еди́но Тріѵпоста́сное Существо́: еди́но Нача́ло пребезнача́льное пою́ безнача́льнаго Божества́ и Существа́ чту́.

И ны́нѣ, богоро́диченъ: Еди́на вмѣсти́ла еси́ Зижди́теля Твоего́, Богороди́тельнице, во чре́вѣ, и пло́тію родила́ еси́ неизрече́нно, и Дѣ́ва пребыла́ еси́, ничто́же дѣ́вству оскверни́вшуся. Сего́, Чи́стая, я́ко Сы́на Твоего́ и Бо́га непреста́нно моли́ о ста́дѣ Твое́мъ при́сно.

Катава́сія: Мо́ре огусти́лъ еси́, погрузи́вый со ору́жіемъ го́рдаго фарао́на, и лю́ди спа́слъ еси́ немо́кренно, Го́споди, и вве́лъ еси́ я́ въ го́ру святы́ни, вопію́щія: пои́мъ Тебѣ́, Бо́гу на́шему, пѣ́снь побѣ́дную, я́ко просла́вися.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Во́дъ животво́рныхъ Це́ркви исто́чники отве́рзлъ еси́, — а́ще кто́ жа́ждетъ, усе́рдно да прихо́дитъ и піе́тъ, — вопія́, Бла́же.

Отъ земли́ у́бо на не́бо вознести́ся проявле́нно глаго́лалъ еси́, съ небесе́ же Ду́ха посла́ти обѣща́лъ еси́ Свята́го.

Естество́мъ животворя́й и отъ Дѣ́вы роди́выйся Госпо́дь, всѣ́мъ вѣ́рнымъ дарова́ безсме́ртіе, я́ко Благоутро́бенъ.

Инъ. Ирмо́съ: Утверди́ся се́рдце мое́ во Го́сподѣ...

Не и́же на лице́ су́дъ суди́те, іуде́е! — уча́ глаго́лаше Влады́ка, егда́ пріи́де во святи́лище, я́коже пи́сано е́сть, преполови́вшуся зако́нному пра́зднику.

Не и́же на лице́ су́дъ суди́те, іуде́е: Христо́съ бо пріи́де, Его́же нарица́ху проро́цы, отъ Сіо́на гряду́ща и мíръ взыва́юща.

Аще и словесе́мъ не вѣ́руете, іуде́е, дѣло́мъ вѣ́руйте Влады́ки. Что́ прельща́етеся, отмета́ющеся Свята́го, Его́же написа́ въ зако́нѣ Моисе́й?

Аще Мессíи вся́ко подоба́етъ пріити́, іуде́е, Христо́съ же пріи́де ны́нѣ Мессíя. Что́ прельща́етеся, отмета́ющеся Пра́веднаго, Его́же написа́ въ зако́нѣ Моисе́й?

Сла́ва, тро́иченъ: Тебѣ́ покланя́емся, Отче, Безнача́льный Существо́мъ, пое́мъ Безнача́льнаго Сы́на Твоего́, и Ду́ха благоче́стно Всесвята́го, я́ко Еди́наго Три́, естество́мъ Бо́га.

И ны́нѣ, богоро́диченъ: Еди́нъ отъ Тро́ицы Сы́й бы́въ, пло́ть ви́дѣлся еси́, не прело́жъ, Го́споди, существа́, ниже́ опали́въ Ро́ждшія нетлѣ́нное чре́во, Бо́гъ сы́й ве́сь и Огнь.

Катава́сія: Утверди́ся се́рдце мое́ во Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Сѣда́ленъ, гла́съ 8. Подо́бенъ: Прему́дрости Сло́ва.

Стоя́ посредѣ́ святи́лища, преполовля́ющуся боже́ственно пра́зднику, — жа́ждай, — взыва́лъ еси́, — да гряде́тъ ко Мнѣ́ и піе́тъ; пія́й бо отъ сея́ Боже́ственныя Моея́ воды́, рѣ́ки изъ чре́ва источи́тъ велѣ́ній Мои́хъ; а и́же вѣ́руетъ въ Мя́, По́сланнаго отъ Боже́ственнаго Роди́теля, со Мно́ю просла́вится. — Сего́ ра́ди вопіе́мъ Ти́: сла́ва Тебѣ́, Христе́ Бо́же, я́ко бога́тно излія́лъ еси́ во́ды Твоего́ человѣколю́бія рабо́мъ Твои́мъ.

Сла́ва, и ны́нѣ. Подо́бенъ:

Прему́дрости во́ду и жи́зни, источа́я мíрови, всѣ́хъ, Спа́се, призыва́еши почерпсти́ спасе́нія во́ды: Боже́ственный бо зако́нъ Тво́й пріи́мъ человѣ́къ, въ себѣ́ угаша́етъ пре́лести у́гліе, отону́дуже во вѣ́ки не вжа́ждетъ, ни преста́нетъ насыще́нія Твоего́, Влады́ко Царю́ Пренебе́сный. Сего́ ра́ди сла́вимъ держа́ву Твою́, Христе́ Бо́же, прегрѣше́ній оставле́ніе прося́ще низпосла́ти бога́тно рабо́мъ Твои́мъ.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Растерза́въ сме́рти врата́ си́лою Твое́ю, пути́ жи́зни сказа́лъ еси́, безсме́ртія же две́ри отве́рзлъ еси́, вѣ́рою зову́щимъ: сла́ва си́лѣ Твое́й, Го́споди.

Преполове́ніе всѣ́хъ и коне́цъ Имѣ́яй и нача́ла, я́ко Безнача́ленъ, Обдержа́й, ста́лъ еси́ посредѣ́, вопія́: Боже́ственныхъ, богому́дріи, пріиди́те даро́въ наслади́теся.

Яко Бо́гъ и всѣ́хъ Имѣ́яй вла́сть, я́ко Си́ленъ, держа́ву низложи́въ сме́рти, посла́ти обѣща́лся еси́, Христе́, Ду́ха Свята́го, отъ Отца́ происходя́щаго.

Богоро́диченъ: Дае́ши бога́тно благода́ть Тебе́ пою́щимъ и изъ Тебе́ ро́ждшагося превѣ́чнаго Сло́ва, Ма́ти неискусобра́чная, прегрѣше́ній оставле́ніе си́мъ прося́щи, Пречи́стая.

Инъ. Ирмо́съ: Проро́къ Авваку́мъ...

Аще Мессíи подоба́етъ пріити́, Мессíя же Христо́съ е́сть, беззако́нніи, что́ не вѣ́руете Ему́? Се́ пріи́де, и свидѣ́тельствуетъ, я́же То́й твори́тъ: во́ду вино́ сотвори́, разсла́бленнаго сло́вомъ стягну́.

Не разумѣ́юще Писа́ній, прельща́етеся вси́ вы́, евре́и беззако́нніи: вои́стинну бо пріи́де Христо́съ, и всѣ́хъ просвѣти́, и въ ва́съ показа́ мно́гая зна́менія и чудеса́, и всу́е отрица́етеся Истиннаго Живота́.

Еди́но дѣ́ло показа́хъ ва́мъ, и вси́ уже́ дивите́ся, — взыва́ше іуде́емъ Христо́съ. — Вы́ обрѣ́зуете и въ суббо́ту человѣ́ка, — рече́, — Мене́ же что́ оклевета́ете про́чее, воздви́гшаго сло́вомъ разсла́бленнаго?

Дѣла́ сотвори́хъ мно́гая, и ко́его ра́ди дѣ́ла ка́меніемъ біете́ Мя́? — Іуде́емъ Христо́съ, облича́я, взыва́ше. — Еда́ зане́ человѣ́ка здра́ва всего́ сло́вомъ сотвори́хъ? Не суди́те на лице́, человѣ́цы!

Во апо́столѣхъ дѣ́йствуяй и во проро́цѣхъ Са́мъ почива́яй съ Ду́хомъ, безнача́льное Рожде́ніе Оте́ческаго естества́, Христе́, язы́ки къ позна́нію возве́лъ еси́ зна́менми Твои́ми.

Сла́ва, тро́иченъ: Тро́ице Нераздѣ́льная Еди́нице, Безнача́льне Отче, Сы́не и Ду́ше Святы́й, во Еди́ницѣ Тро́ица Равноче́стная, Сопресто́льная, Животворя́щая, Несозда́нный Бо́же, спаса́й воспѣва́ющія Тя́ и изба́ви отъ бѣ́дъ и скорбе́й.

И ны́нѣ, богоро́диченъ: Во чре́вѣ Твое́мъ Бо́га неопи́санно вмѣсти́вшая, Богоневѣ́сто, Дѣ́во Ма́ти Чи́стая, не преста́й моля́щи о на́съ, я́ко да Тобо́ю изба́вимся отъ обстоя́ній, къ Тебѣ́ бо при́сно прибѣга́емъ.

Катава́сія: Проро́къ Авваку́мъ у́мныма очи́ма прови́дѣ, Го́споди, прише́ствіе Твое́, тѣ́мъ и вопія́ше: отъ ю́га пріи́детъ Бо́гъ. Сла́ва си́лѣ Твое́й, сла́ва снизхожде́нію Твоему́!

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Боже́ственныхъ пра́здниковъ преполове́нія дости́гше, соверше́нною боже́ственною добродѣ́телію обучи́тися потщи́мся, богому́дріи.

Яко вои́стинну свяще́нное настоя́щее торжество́, преполове́ніе: превели́кихъ бо пра́здниковъ ко́рень, и свѣ́тится обою́ду.

Богоро́диченъ: Умъ арха́нгельскій не мо́жетъ разумѣ́ти Твое́ неизрече́нное изъ Дѣ́вы и пречи́стое рождество́, Спа́се Многоми́лостиве.

Инъ. Ирмо́съ: Го́споди Бо́же на́шъ, ми́ръ да́ждь на́мъ...

Чудесы́ украси́лъ еси́ апо́столы Твоя́, дивесы́ возвели́чилъ еси́ ученики́, во все́мъ мíрѣ просла́вивъ, Спа́се на́шъ, и да́въ и́мъ Ца́рствіе Твое́.

Вся́ просвѣти́ша земли́ концы́ ученицы́: чудесы́, и уче́нми, и разли́чными о́бразы сло́во проповѣ́давше, Христе́ Спа́се, Ца́рствія Твоего́.

Хвалу́ возсыла́емъ Ца́рствію Твоему́, пѣ́ніе же Тебѣ́ прино́симъ, на́съ ра́ди на земли́ Яви́вшемуся, и мíръ Просвѣти́вшему, и Ада́ма Воззва́вшему.

Сла́ва, тро́иченъ: Сла́ва Тебѣ́, Отче Святы́й, Бо́же Нерожде́нне; сла́ва Тебѣ́, Сло́ве Безлѣ́тне Единоро́дне; сла́ва Тебѣ́, Ду́ше Боже́ственне, и Сопресто́льне, и Единосу́щне Отцу́ и Сы́ну.

И ны́нѣ, богоро́диченъ: Бы́сть чре́во Твое́ свята́я трапе́за, иму́щая Небе́сный Хлѣ́бъ, отъ Него́же вся́къ яды́й не умира́етъ, я́коже рече́ всѣ́хъ, Богороди́тельнице, Пита́тель.

Катава́сія: Го́споди Бо́же на́шъ, ми́ръ да́ждь на́мъ, Го́споди Бо́же на́шъ, стяжи́ ны, Го́споди, ра́звѣ Тебе́, ино́го не вѣ́мы, и́мя Твое́ имену́емъ.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Преполове́ніе Пятдеся́тницы наста́ дне́сь: отсю́ду Боже́ственныя у́бо Па́схи, Боже́ственнѣйшею свѣ́тлостію озари́вшееся, отону́дуже Утѣ́шителевою благода́тію сія́ющее.

Глаго́лалъ еси́ въ хра́мѣ, Христе́, предстоя́ іуде́йскимъ собо́ромъ, Свою́ сла́ву открыва́я, и предъявля́я сро́дство къ Роди́телю.

Богоро́диченъ: Бу́ди ми́ Предста́тельница и Стѣна́ Неруши́мая, отъ мірски́хъ мя́ собла́зновъ избавля́ющая, еди́на Богороди́тельнице, и Боже́ственнымъ свѣтоли́тіемъ освѣща́ющая.

Инъ. Ирмо́съ: Яко во́ды морскíя...

Вся́ содержа́й концы́, возше́лъ еси́, Іису́се, и учи́лъ еси́ во святи́лищи наро́ды сло́ву и́стины, пра́зднику преполовля́ющуся, я́коже Іоа́ннъ вопіе́тъ.

Отве́рзлъ еси́ устнѣ́ Твои́, Влады́ко, проповѣ́далъ еси́ мíрови Безлѣ́тнаго Отца́, и Всесвята́го Ду́ха, сро́дное Обои́хъ храня́ и по воплоще́ніи.

Дѣ́ло Отчее соверши́лъ еси́, дѣ́лы увѣ́рилъ еси́ словеса́ Твоя́, исцѣле́нія соверша́я, Спа́се, и зна́менія: разсла́бленнаго исправля́я, прокаже́нныя очища́я и ме́ртвыя воскреша́я.

Безнача́льный Сы́нъ нача́ло бы́сть, пріе́мъ е́же по на́мъ, вочеловѣ́чися, и посредѣ́ пра́здника уча́ше, глаго́ля: притецы́те ко Исто́чнику Приснотеку́щему, Жи́знь почерпи́те.

Сла́ва, тро́иченъ: Еди́но въ Тро́ицѣ Божество́, Существо́ Тріѵпоста́сное, Несозда́нное, Нераздѣ́льное вси́ сла́вимъ: Отца́, и Сы́на, и Свята́го Ду́ха, я́ко Три́ су́щее и Еди́но.

И ны́нѣ, богоро́диченъ: Дѣ́ву по рождествѣ́ пое́мъ Тя́, Дѣ́ву и Ма́терь сла́вимъ Тебе́ еди́ну, Чи́стая Богоневѣ́сто Отрокови́це: изъ Тебе́ бо вои́стинну Бо́гъ воплоти́ся, обнови́въ на́съ.

Катава́сія: Яко во́ды морскíя, Человѣколю́бче, волна́ми жите́йскими обурева́юся. Тѣ́мже, я́ко Іо́на, та́ко вопію́ Ти: возведи́ отъ тли́ живо́тъ мо́й, Благоутро́бне Го́споди.

Конда́къ, гла́съ 4. Подо́бенъ: Вознесы́йся.

Пра́зднику зако́нному преполовля́ющуся, всѣ́хъ Тво́рче и Влады́ко, къ предстоя́щимъ глаго́лалъ еси́, Христе́ Бо́же: пріиди́те и почерпи́те во́ду безсме́ртія. Тѣ́мже Тебѣ́ припа́даемъ и вѣ́рно вопіе́мъ: щедро́ты Твоя́ да́руй на́мъ, Ты́ бо еси́ Исто́чникъ жи́зни на́шея.

Икосъ:

Оляденѣ́вшую мою́ ду́шу прегрѣше́ній беззако́нми, тече́нми Твои́хъ крове́й напо́й и покажи́ плодоно́сну добродѣ́тельми: Ты́ бо ре́клъ еси́ всѣ́мъ, е́же приходи́ти къ Тебѣ́, Сло́ве Бо́жій Всесвяты́й, и во́ду нетлѣ́нія почерпа́ти, живу́ю же и очища́ющую грѣхи́, пою́щихъ сла́вное и Боже́ственное Твое́ воста́ніе, подая́, Благíй, съ высоты́ сше́дшую вои́стинну ученико́мъ Твои́мъ Ду́ха крѣ́пость, Тебе́ Бо́га вѣ́дущимъ: Ты́ бо еси́ Исто́чникъ жи́зни на́шея.

Синакса́рій мине́и. Та́же настоя́щій синакса́рій:

Стихи́: Ста́въ, науча́етъ посредѣ́ пра́здника
                  Христо́съ-Мессíя средѣ́ учи́телей.

Въ сре́ду разсла́бленнаго пра́здникъ преполове́нія Пятдеся́тницы пра́зднуемъ, по́чести ра́ди вели́кою двою́ дни пра́зднику: Па́схи, глаго́лю, и Пятдеся́тницы, я́ко обою́ соединя́ющъ и совокупля́ющъ.

Бы́сть же сíй та́ко: По е́же содѣ́лати Христу́ на разсла́бленномъ чу́до преесте́ственное, іуде́и у́бо о разсла́бленномъ соблажня́ющеся, и́бо въ суббо́ту содѣ́яся, иска́ху Его́ уби́ти. Бѣжи́тъ у́бо въ Галиле́ю, и въ та́мошнихъ гора́хъ пребыва́я, пятію́ хлѣ́бы и двою́ ры́бу чудодѣ́йствуетъ, пя́ть ты́сящь муже́й прекорми́, ра́звѣ же́нъ и дѣте́й. Пото́мъ же, ку́щь потче́нію наста́вшу (вели́къ же и то́й пра́здникъ у іуде́й), во Іерусали́мъ восхо́дитъ и обхожда́ше сокрове́нно. Въ преполове́ніи же пра́здника сего́, во святи́лище входя́, уча́ше (святи́лище же е́сть Еди́ному Бо́гу оби́телище, идѣ́же любо́вь и ми́ръ, идѣ́же вѣ́ра и цѣлому́дріе водворя́ется. Сего́ ра́ди и святи́телю Бо́жію служа́щу Бо́гови, ми́рну подоба́етъ бы́ти и кро́тку, не крадли́ву, не льсти́ву, не сребролюби́ву; да пре́жде Бо́га въ свою́ ду́шу всели́тъ, пото́мъ же и лю́ди по о́бразу и по пути́ своему́ счета́етъ. Мо́жется же нарещи́ и коего́ждо вѣ́рнаго душа́, святи́лище преочище́нно бы́вши: идѣ́же бо вселю́ся въ вы́ и похожду́, — глаго́летъ Госпо́дь). И вси́ Его́ уче́нію дивля́хуся, зави́дяще Ему́ глаго́лаху: ка́ко Се́й вѣ́сть, писа́ніемъ не научи́вся? Но́вый бо Ада́мъ сы́й, вѣ́дяше, я́коже и пе́рвый о́нъ, вся́кія прему́дрости бя́ше преиспо́лненъ, и я́коже Бо́гъ. Па́ки, ропта́ху у́бо вси́ и къ Его́ убíйству бѣ́ша вси́ устремля́ющеся. Христо́съ же, обличе́нія на ня́ употребля́я, я́ко о суббо́тѣ у́бо сваря́щіяся, глаго́лаше: что́ Мя́ и́щете уби́ти? Они́ же глаго́лаху: бѣ́са ли и́маши, кто́ Тя́ хо́щетъ уби́ти? Онъ же па́ки къ пре́днимъ простира́ется: а́ще о зако́нѣ сварите́ся, глаго́ля, что́ на Мя́ ярите́ся, зане́ всего́ человѣ́ка въ суббо́ту здра́ва сотвори́хъ? Моисе́ю и сія́ законополага́ющу разруша́ти ю́, внегда́ обрѣ́занія ра́ди глаго́летъ. Мно́га у́бо и́мъ о се́мъ бесѣ́довавъ, и показа́въ Себе́ Да́теля зако́ну и Отцу́ ра́вна. И па́че въ послѣ́дній де́нь вели́кій пра́здника, ка́меніемъ быва́етъ мета́емь отъ ни́хъ, но ка́мень Тому́ отню́дъ не косну́ся. Егда́ и мимоходя́ оттуду, обрѣта́етъ человѣ́ка, отъ рожде́нія слѣ́па, и очеса́ ему́ да́руетъ.

Вѣ́домо же, я́ко три́ бя́ху у іуде́й преве́ліи пра́здницы. Пе́рвый — Па́сха, и́же у́бо соверша́ется въ пе́рвомъ мѣ́сяцѣ, воспомина́ніе имѣ́я е́же въ Чермно́мъ мо́ри прехожде́нія. Вторы́й же — Пятдеся́тница, е́же въ пусты́ни пребыва́ніе, по преше́ствіи Чермна́го мо́ря помина́яй: пятдеся́тъ бо днíй пребыва́ху въ пусты́ни, до́ндеже зако́нъ Моисе́овъ пріи́мутъ. Еще же и за по́честь числа́ седми́чнаго, че́стну у ни́хъ су́щу. Тре́тій же тѣ́мъ пра́здникъ — тру́бъ и сѣ́ницъ Потче́нія, помина́ніе творя́ще ски́ніи, ю́же во о́блацѣ горы́ ви́дѣвъ Моисе́й, пе́рвымъ древодѣ́лемъ Веселеи́ломъ водрузи́въ, поста́ви. Яже и въ седмію́ сотворя́ема бя́ше днíй, сноше́нію плодо́въ па́мять иму́щи и упокое́нія пусты́ннаго.

Егда́ же твори́му тому́ пра́зднику, ста́въ Іису́съ, вели́кимъ гла́сомъ воззва́: а́ще кто́ жа́ждетъ, да гряде́тъ ко Мнѣ́ и піе́тъ! Елма́ у́бо во учи́тельствѣ то́мъ Христо́съ Мессíю Себе́ показа́, Хода́тай и Примири́тель на́шъ бы́въ, и Вѣ́чнаго Отца́ Своего́. Тоя́ ра́ди вины́ настоя́щій пра́здникъ пра́зднующе и средопятдеся́тницу имену́юще, Мессíю воспѣва́емъ Христа́ и честно́е е́же отъ обою́ двою́ вели́кою пра́зднику представля́юще. Сего́ же ра́ди, мню́, и самаряны́ни по не́мъ пра́зднику пра́зднуется, зане́ и та́мо о Мессіи́-Христѣ́ мно́гая сказа́шася, и о водѣ́, и о жа́жди, я́коже здѣ́ во евангели́стѣ Іоа́ннѣ, слѣпа́го па́че самаряны́ни предлежи́тъ.

Неизче́тною ми́лостію Твое́ю, Христе́ Бо́же на́шъ, поми́луй на́съ. Ами́нь.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Крѣ́постію, Спа́се, сме́ртную разо́рь си́лу, стезю́ жи́зни показа́лъ еси́ человѣ́комъ, благода́рно Тебѣ́ зову́щимъ: благослове́нъ еси́ въ хра́мѣ сла́вы Твоея́, Го́споди.

Пло́ть нося́ща ви́дяще, не разумѣ́ша собо́ри евре́йстіи, Сло́ве Тя́ Бо́жій, но мы́ Тебе́ воспѣва́емъ: благослове́нъ еси́ въ хра́мѣ сла́вы Твоея́, Го́споди.

Богоро́диченъ: Вы́шняго освяще́нное Боже́ственное Селе́ніе, — ра́дуйся! — Тобо́ю бо даде́ся ра́дость, Богоро́дице, вопію́щимъ: благослове́нна Ты́ въ жена́хъ еси́, Пренепоро́чная Влады́чице.

Инъ. Ирмо́съ: Халде́йская пе́щь...

Пло́тски потруди́лся еси́, Упокое́ніе всѣ́хъ, во́лею вжада́лся еси́, Исто́чниче чуде́съ, воды́ проси́лъ еси́, во́ду жи́зни, Іису́се, возвѣща́яй.

Самаряны́ни, Го́споди, женѣ́ бесѣ́довалъ еси́, облича́я безу́міе беззако́нныхъ евре́евъ: она́ у́бо вѣ́рова Сы́на Тя́ бы́ти Бо́жія, сíи же отверго́шася.

Во́ду живу́ю, истека́ющую, во́ду безсме́ртія, исто́чникъ присноживу́щій пода́ти обѣща́лъ еси́ вѣ́рою Ду́хъ Тво́й пріе́млющимъ, Спа́се, отъ Отца́ происходя́щій.

Пятьми́ хлѣ́бы препита́лъ еси́ ты́сящи а́лчущихъ, и насыще́нія оста́нки въ другíя ты́сящи, Спа́се, умно́жилъ еси́, показу́я сла́ву Твою́ свяще́ннымъ ученико́мъ.

Яды́й Тѣ́ло Твое́, жи́въ бу́детъ во вѣ́ки, и пія́й Кро́вь Твою́, въ Тебѣ́ пребу́детъ, Спа́се мо́й, и Ты́ въ не́мъ пребыва́еши, и воскреси́ши его́ въ послѣ́днее мгнове́ніе.

Удиви́лъ еси́, Влады́ко, Твое́ смотре́ніе, увѣ́ривъ чудесы́ Боже́ственную вла́сть: неду́ги изгна́лъ еси́, ме́ртвыя воскреси́лъ еси́ и слѣпы́я просвѣти́лъ еси́, я́ко Бо́гъ.

Прокаже́нныя очи́стилъ еси́, хромы́я испра́вилъ еси́, разсла́бленныя стягну́лъ еси́, кровоточи́вую Исцѣли́вый; ше́ствовалъ еси́ по пучи́нѣ, показа́въ сла́ву Твою́ свяще́ннымъ ученико́мъ.

Сла́ва, тро́иченъ: Покланя́емся Твоему́, Го́споди, Пречи́стому Отцу́ и благода́ти Ду́ха, ю́же Твои́мъ апо́столомъ, Бо́гъ сы́й, разда́вый́, посыла́я и́хъ на про́повѣдь.

И ны́нѣ, богоро́диченъ: Во чре́вѣ Твое́мъ вмѣсти́ла еси́ Невмѣсти́маго Сло́ва, отъ Твои́хъ сосе́цъ дои́ла еси́ мíру Пита́теля, на объя́тіи носи́ла еси́ Содержи́теля на́шего, Богороди́тельнице Чи́стая.

Катава́сія: Халде́йская пе́щь, огне́мъ распала́емая, ороша́шеся Ду́хомъ, Бо́жіимъ предстоя́ніемъ, о́троцы поя́ху: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Ру́цѣ распросте́ръ Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Красе́нъ изъ гро́ба воста́въ, Божества́ сла́вою укра́шенъ, апо́столомъ Твои́мъ, Го́споди, яви́лся еси́, и Ду́ха обѣща́яся тѣ́мъ посла́ти дѣ́йство, вопію́щимъ: благослови́те, вся́ дѣла́ Госпо́дня, Го́спода.

Умертви́въ а́да, я́ко Бо́гъ Живонача́льнѣйшій, всѣ́мъ источи́лъ еси́ живо́тъ вѣ́чный, его́же ны́нѣ вообража́ютъ я́вственнѣе свѣтоно́сныхъ дне́й си́хъ ра́дости, вопію́щимъ: благослови́те, вся́ дѣла́ Госпо́дня, Го́спода.

Лучи́, я́ко Со́лнце, Христе́, Пра́вды яви́вся, мíру посла́лъ еси́ апо́столы Твоя́, нося́щія Тебе́ — Свѣ́тъ Непостижи́мый, и невѣ́денія мглу́ очища́ющія, и вопію́щія: благослови́те, вся́ дѣла́ Госпо́дня, Го́спода.

Богоро́диченъ: Се́ ны́нѣ оскудѣ́ я́вѣ отъ Іу́дина пле́мене кня́зь и во́ждь: Ты́ бо, Всенепоро́чная, родила́ еси́ пре́жде обѣща́нное Ча́яніе язы́ковъ — Христа́ Бо́га, Ему́же пое́мъ: благослови́те, вся́ дѣла́ Госпо́дня, Го́спода.

Инъ. Ирмо́съ: Ангели и небеса́, на Престо́лѣ сла́вы...

Пріиди́те, ви́дите, лю́діе, на Престо́лѣ сла́вы Воспѣва́емаго, отъ люде́й беззако́нныхъ Ху́лимаго, и, ви́дяще, по́йте въ проро́цѣхъ Мессíю Предрече́ннаго.

Ты́ еси́ вои́стинну Христо́съ, въ мíръ се́й прише́дый, изъ Него́же спасе́ніе и оставле́ніе оте́ческихъ согрѣше́ній: Ты́ еси́ вои́стинну Живо́тъ въ Тя́ вѣ́ровавшимъ.

Прему́дрость Бо́жія, преполови́вшуся пра́зднику, я́коже пи́сано е́сть, во святи́лищи предста́ и уча́ше, я́ко вои́стинну Се́й бя́ше Мессíя-Христо́съ, Имже спасе́ніе.

Въ суббо́тахъ Христо́съ и по вся́ дни́ пока́зоваше зна́меній дѣла́, исцѣля́я су́щія въ неду́зѣхъ разли́чныхъ; но прельще́нніи лю́діе я́ростію распыха́хуся.

Разсла́бленнаго, глаго́летъ, въ лѣ́тѣхъ же мно́зѣхъ лежа́щаго, въ суббо́ту Се́й исцѣли́ и преступи́ зако́нъ, іуде́и Христа́ го́рько укоря́ху.

Не Моисе́й ли ва́мъ, зако́нъ да́вый, повелѣва́етъ обрѣ́затися, и въ суббо́ту му́жа обрѣ́зуете, да не ка́ко зако́нъ оте́ческій разори́тся? — Христо́съ іуде́емъ глаго́лаше.

Неблагода́рни всегда́ въ пусты́ни жи́вшіи, Благодѣ́теля за́вистію прогнѣ́ваху, ху́ляще, дви́жуще непра́ведныя язы́ки, тще́тнымъ поуча́ющеся.

Благослови́мъ Отца́, и Сы́на, и Свята́го Ду́ха, Го́спода.

Тро́иченъ: Еди́нъ Бо́гъ у́бо Тро́ица: Отцу́ не преступи́вшу въ сыновство́, ниже́ Сы́ну прело́жшуся во исхожде́ніе, но сво́йственная и обоя́ — Свѣ́тъ; Бо́га, Три́ прославля́ю во вѣ́къ.

Богоро́диченъ: Ка́ко родила́ еси́, рцы́, отъ Отца́ безлѣ́тно просія́вшаго и со Святы́мъ Ду́хомъ воспѣва́емаго? Или́ я́ко вѣ́сть еди́нъ Благоволи́вый изъ Тебе́ роди́тися, Богоро́дице.

Хва́лимъ, благослови́мъ, [покланя́емся Го́сподеви, пою́ще и превознося́ще во вся́ вѣ́ки].

Катава́сія: Ангели и небеса́, на Престо́лѣ сла́вы сѣдя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во вѣ́ки.

Честнѣ́йшую... не стихосло́вится.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Но́вому и чи́стому жи́тельству отъ Христа́ научи́вшеся, сіе́ да́же до конца́ сохрани́ти поле́зно вси́ потщи́мся, я́ко да Свята́го Ду́ха прише́ствіе воспріи́мемъ.

Ты́ мое́ сме́ртное, Жизнода́вче, обложе́ніемъ безсме́ртія и нетлѣ́нія благода́тію обле́къ, Спа́се, совоскреси́лъ еси́ и Отцу́ приве́лъ еси́, вре́менную мою́ разруши́въ бра́нь.

Въ небе́сное па́ки житіе́ зва́ни бы́вше, хода́тайства си́лою Истощи́вшагося да́же и до ра́бія о́браза, и на́съ Возне́сшаго, Сего́ досто́йно возвели́чимъ.

Богоро́диченъ: Яко ко́рень, исто́чникъ и вину́ нетлѣ́нія, Тебе́, Дѣ́во, вси́ вѣ́рніи увѣ́дѣвше, похвала́ми почита́емъ: Ты́ бо ѵпоста́сное Безсме́ртіе на́мъ источи́ла еси́.

Инъ. Ирмо́съ: Чу́жде ма́теремъ дѣ́вство...

Пра́зднику преполовля́ющуся іуде́йскому, возше́лъ еси́, Спа́се мо́й, во святи́лище Твое́ и науча́лъ еси́ всѣ́хъ; чудя́хуся же іуде́е, — и отку́ду Се́й вѣ́сть пи́смена не научи́вся? — глаго́лаху.

Исцѣле́нія дарова́ній Изба́витель мо́й источа́я, сотворя́ше чудеса́ и зна́менія, прогоня́ неду́ги, цѣля́ немощству́ющія; но іуде́и неи́стовствовахуся мно́жествомъ чуде́съ Его́.

Непокори́выя іуде́и Изба́витель мо́й облича́я, вопія́ше: не суди́те на лице́, но пра́веденъ су́дъ суди́те: и́бо зако́нъ и въ суббо́ту обрѣ́зоватися повелѣва́етъ вся́кому человѣ́ку.

Бо́льшая чуде́съ ученико́мъ Твои́мъ, Спа́се, я́коже обѣща́въ, по́далъ еси́, посла́въ въ язы́ки проповѣ́дати сла́ву Твою́; они́ же мíрови проповѣ́даху Твое́ Воскресе́ніе, благода́ть и воплоще́ніе.

Аще человѣ́ка обрѣ́зуете въ суббо́ту, да не ка́ко разори́тся зако́нъ, ны́нѣ на Мя́ что́ гнѣ́ваетеся, я́ко человѣ́ка всего́ здра́ва сотвори́хъ сло́вомъ? По пло́ти вы́ су́дите, — глаго́летъ іуде́емъ Христо́съ.

Суху́ю исцѣли́вый ру́ку сло́вомъ, изсо́хшую дре́вле зе́млю моего́ се́рдца исцѣли́въ, Сло́ве, покажи́ мя́ плодоно́сна, да содѣ́лаю и а́зъ, Спа́се, плоды́ въ покая́ніи те́плѣ.

Прокаже́нное мое́ се́рдце очи́стивъ и души́ моея́, Сло́ве, о́чи просвѣти́вый, на одрѣ́ болѣ́зни мя́ лежа́ща испра́ви, я́коже разсла́бленнаго возста́вилъ еси́ на одрѣ́ лежа́щаго.

Сла́ва, тро́иченъ: Чу́жде е́сть беззако́ннымъ сла́вити Безнача́льную Тро́ицу: Отца́, и Сы́на же, и Свята́го Ду́ха, Несозда́нное Вседержа́ніе, Имже ве́сь мíръ созда́ся держа́вою крѣ́пости Ея́.

И ны́нѣ, богоро́диченъ: Вмѣсти́ла еси́ во чре́вѣ Твое́мъ, Дѣ́во Ма́ти, Еди́наго отъ Тро́ицы Христа́ Жизнода́вца, Его́же пое́тъ вся́ тва́рь и трепе́щутъ го́рніи престо́ли. Того́ моли́, Всеблаже́нная, спасти́ ду́ши на́ша.

Катава́сія: Чу́жде ма́теремъ дѣ́вство, и стра́нно дѣ́вамъ дѣторожде́ніе, на Тебѣ́, Богоро́дице, обоя́ устро́ишася. Тѣ́мъ Тя́, вся́ племена́ земна́я, непреста́нно велича́емъ.

Ексапостила́рій. Подо́бенъ: Не́бо звѣзда́ми.

Ча́шу имѣ́яй неистощи́мыхъ даро́въ, да́ждь ми́ почерпсти́ во́ду во оставле́ніе грѣхо́въ, я́ко содержи́мь е́смь жа́ждею, Благоутро́бне еди́не Ще́дре. [Три́жды.]

На хвали́техъ: Вся́кое дыха́ніе... поста́вимъ стихи́ 4 и пое́мъ подо́бны пра́здника 3, повторя́юще 1, гла́съ 4. Подо́бенъ: Яко до́бля.

Прему́дрость, и Си́ла, Отчее Сія́ніе, Сло́во Присносу́щное и Сы́нъ Бо́жій, во святи́лище пріи́де пло́тію и уча́ше іуде́йскія лю́ди, жесто́кія и неблагода́рныя, и удивля́хуся прему́дрости бога́тству, вопію́ще: отку́ду вѣ́сть Пи́смена, ни отъ кого́же учи́вся? [Два́жды.]

Кни́жникомъ затыка́ше уста́, іуде́и облича́ше Мессíя Госпо́дь, вопія́ къ ни́мъ: не на лице́, законопресту́пницы, я́ко непра́ведніи, суди́те, въ суббо́ту бо Азъ разсла́бленнаго воздви́гнухъ. Тѣ́мже Госпо́дь суббо́ты е́смь и зако́на, что́ и́щете Мене́ уби́ти, уме́ршія Воздви́гшаго?

Навуѳе́я ка́меніемъ поби́ша, лю́тіи и законопресту́пніи, іуде́йское собра́ніе неблагода́рное, Иса́ію же пило́ю древя́ною растро́ша, въ ка́лъ му́драго Іеремíю вверго́ша, Го́спода же на Кре́стъ возне́сше, взыва́ху: хра́мъ Разоря́яй, спаси́ Себе́, и увѣ́руемъ.

Сла́ва, и ны́нѣ, гла́съ 4. Анато́лія:

Просвѣти́вшеся, бра́тіе, Воскресе́ніемъ Спа́са Христа́ и дости́гше преполове́нія пра́здника Влады́чня, пріи́скренно сохрани́мъ за́повѣди Бо́жія, да досто́йни бу́демъ и Вознесе́ніе пра́здновати и прише́ствіе получи́ти Свята́го Ду́ха.

Славосло́віе вели́кое. По трисвято́мъ тропа́рь пра́здника. Ектеніи́ и отпу́стъ. И ча́съ 1-й.




НА ЛИТУРГІИ,

Блаже́нна отъ кано́на пра́здника 4-го гла́са, пѣ́снь 3-я, на 4, и 8-го гла́са, пѣ́снь 6-я, на 4. По вхо́дѣ: Тропа́рь пра́здника. Сла́ва, и ны́нѣ: конда́къ. Проки́менъ, гла́съ 3. Ве́лій Госпо́дь на́шъ, и вѣ́лія крѣ́пость Его́,* и ра́зума Его́ нѣ́сть числа́. [И до отда́нія.] Сти́хъ: Хвали́те Го́спода, я́ко бла́гъ псало́мъ, Бо́гови на́шему да услади́тся хвале́ніе. Апо́столъ Дѣя́ній, зача́ло 34: Па́велъ и Варна́ва прибѣго́ста во гра́ды Ликао́нскія... Аллилу́ія, гла́съ 1: Помяни́ со́нмъ Тво́й, его́же стяжа́лъ еси́ испе́рва. Сти́хъ: Бо́гъ же, Ца́рь на́шъ, пре́жде вѣ́ка содѣ́ла спасе́ніе посредѣ́ земли́. Ева́нгеліе Іоа́нна, зача́ло 26: Въ преполове́ніе Пятдеся́тницы... На Литургíи пое́мъ и на отда́ніе Преполове́нія, вмѣ́сто Досто́йна.., ирмо́съ: Чу́жде ма́теремъ дѣ́вство... [Въ про́чія же дни́ пое́мъ: Свѣти́ся.., и до отда́нія.] Прича́стенъ: Яды́й Мою́ Пло́ть и пія́й Мою́ Кро́вь, во Мнѣ́ пребыва́етъ и Азъ въ не́мъ, рече́ Госпо́дь. Аллилу́ія, три́жды. На трапе́зѣ утѣше́ніе бра́тіи. Пра́зднуется же се́й пра́здникъ дне́й 8.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 86 – 95 об.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.