Церковный календарь
Новости


2017-12-18 / russportal
П. Н. Красновъ. Очеркъ "Борьба съ Китаемъ". Глава 10-я (1901)
2017-12-18 / russportal
П. Н. Красновъ. Очеркъ "Борьба съ Китаемъ". Глава 9-я (1901)
2017-12-18 / russportal
"Лугъ духовный" блаж. Іоанна Мосха. Введеніе (1967)
2017-12-18 / russportal
"Лугъ духовный" блаж. Іоанна Мосха. Благочестивому читателю (1967)
2017-12-17 / russportal
П. Н. Красновъ. Очеркъ "Борьба съ Китаемъ". Глава 8-я (1901)
2017-12-17 / russportal
П. Н. Красновъ. Очеркъ "Борьба съ Китаемъ". Глава 7-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 6-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 5-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 4-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 3-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 2-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 1-я (1901)
2017-12-16 / russportal
Указъ Архіер. Сѵнода РПЦЗ отъ 30 авг. 1938 г. о положеніи Правосл. Церкви въ Польшѣ
2017-12-16 / russportal
К. Н. Николаевъ. Къ положенію Православной Церкви въ Польшѣ (1938)
2017-12-15 / russportal
П. Н. Красновъ. Рождественскій разсказъ "Письма матери" (1899)
2017-12-15 / russportal
П. Н. Красновъ. Повѣсть "Въ манчжурской глуши". Глава 23-я (1904)
Новости въ видѣ
RSS-канала: .
Сегодня - понедѣльникъ, 18 декабря 2017 г. Сейчасъ на порталѣ посѣтителей - 9.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ЧЕТВЕРТОКЪ ЧЕТВЕРТЫЯ СЕДМИЦЫ ПО ПАСЦѢ.

ВЪ СРЕДУ ПРЕПОЛОВЕНІЯ ВЕЧЕРА,
Обы́чная каѳи́сма. На Го́споди воззва́хъ... стихи́ры пра́здника 3, гла́съ 4. Подо́бенъ: Зва́нный свы́ше.

Предразори́вый держа́ву сме́рти, Христе́, сме́ртію Твое́ю, жи́знь по́далъ еси́ человѣ́комъ въ сла́вномъ Воста́ніи Твое́мъ, совоздви́гнувый ро́дъ человѣ́ческій снизхожде́ніемъ Твои́мъ. Тѣ́мже благода́рственную хвалу́ Тебѣ́ пое́мъ, пра́здникъ пра́зднующе тридне́внаго и свѣтоно́снаго Твоего́ Воскресе́нія, въ о́ньже преполове́ніе всечестны́хъ ны́нѣ днíй на́мъ всѣ́мъ просія́, Іису́се Жизнода́вче, Благодѣ́телю ду́шъ на́шихъ.

Пре́жде честна́го Креста́ Твоего́ и Стра́сти, чуде́съ пресла́вная соверша́яй въ лю́дехъ, я́коже пи́сано е́сть, посредѣ́ пра́здника зако́ннаго ста́лъ еси́, Христе́ Всеси́льне, и всѣ́мъ возопи́лъ еси́: а́ще кто́ жа́ждетъ, ко Мнѣ́ самохо́тнѣ да прихо́дитъ, и воды́ Боже́ственныя пи́во да почерпе́тъ, и жи́зненныя во́ды. Жи́зни бо во́ду и си́лы прему́дрости Азъ всѣ́мъ подаю́, я́ко хотя́ человѣ́комъ уподо́бихся, я́ко Человѣколю́бецъ.

Яко на одрѣ́ мя́ лежа́ща болѣ́зни, Христе́ Многоми́лостиве, согрѣше́ній мои́хъ, и разсла́блена удесы́, я́ко за вели́кую человѣколю́бія пучи́ну, Человѣ́къ во́лею бы́въ, ны́нѣ неви́димо мя́, я́коже разсла́бленнаго, воздви́гни, и стезя́ми Боже́ственныхъ за́повѣдей Твои́хъ тещи́ благопоспѣши́. Иже пре́жде Стра́сти лю́демъ, Спа́се, евре́йскимъ, чуде́съ мно́жествы предстоя́, я́ко Бо́гъ сы́й, во́лею стра́ждеши пло́тію.

И мине́и 3. Сла́ва: свята́го, а́ще е́сть. Аще ли ни́: Сла́ва, и ны́нѣ, пра́здника, гла́съ 2:

Егда́ прише́лъ еси́ во святи́лище, Христе́ Бо́же, преполови́вшуся пра́зднику, тогда́ лю́ди учи́лъ еси́, вопія́: вѣ́руяй въ Мя́, а́ще и у́мретъ, жи́въ бу́детъ. Іуде́е же распыха́хуся съ фарисе́и, и саддуке́и, и кни́жники, глаго́люще: кто́ е́сть Се́й, Иже глаго́летъ хулы́? Не помышля́юще, я́ко Ты́ еси́ пре́жде всѣ́хъ вѣ́къ, со Отце́мъ и Ду́хомъ сла́вимый, Бо́же на́шъ, сла́ва Тебѣ́!

Проки́менъ дне́.

На стихо́внѣ стихи́ра воскре́сна, гла́съ 3:

Стра́стію Твое́ю, Христе́, омрачи́вый со́лнце и свѣ́томъ Твоего́ Воскресе́нія просвѣти́вый вся́ческая, пріими́ на́шу вече́рнюю пѣ́снь, Человѣколю́бче.

Сти́хъ: Къ Тебѣ́ возведо́хъ о́чи мо́и, [Живу́щему на небеси́. Се́ я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́].

Стихи́ра апо́стольская: Во всю́ зе́млю изы́де вѣща́ніе ва́ше, святíи апо́столи: и́дольскую пре́лесть разори́сте, богоразу́міе проповѣ́давше. Се́й до́брый по́двигъ ва́шъ е́сть, блаже́нніи, тѣ́мже пое́мъ и славосло́вимъ ва́ша па́мяти.

Сти́хъ: Поми́луй на́съ, Го́споди, поми́луй на́съ, [я́ко по мно́гу испо́лнихомся уничиже́нія, наипа́че напо́лнися душа́ на́ша поноше́нія гобзу́ющихъ и уничиже́нія го́рдыхъ].

Му́чениченъ: Му́ченицы Твои́, Го́споди, вѣ́рою утве́рждшеся, наде́ждею укрѣпи́вшеся, любо́вію Креста́ Твоего́ душе́вно соедини́вшеся, вра́жіе мучи́тельство разруши́ша и улучи́вше вѣнцы́, со безпло́тными мо́лятся о душа́хъ на́шихъ.

Сла́ва, и ны́нѣ, гла́съ 3. Ге́рмана:

Преполови́вшуся пра́зднику, сла́вимъ посредѣ́ земли́ спасе́ніе Содѣ́лавшаго. Посредѣ́ у́бо двою́ разбо́йнику Живо́тъ на Дре́вѣ ви́сяше, и ху́лящему у́бо молча́ше, вѣ́рующему же вопія́ше: дне́сь со Мно́ю бу́деши въ раи́! Сни́де во гро́бъ, плѣни́ а́да и воскре́се тридне́венъ, Спаса́яй ду́ши на́ша.

Тропа́рь свята́го, а́ще е́сть. Аще ли ни́, то́чію пра́здника. Ектенія́ и отпу́стъ.




ВЪ ЧЕТВЕРТОКЪ ЧЕТВЕРТЫЯ СЕДМИЦЫ ПО ПАСЦѢ, НА УТРЕНИ,
На Бо́гъ Госпо́дь: Тропа́рь пра́здника, три́жды.

По 1-мъ стихосло́віи сѣда́ленъ, гла́съ 3. Подо́бенъ: Красотѣ́ дѣ́вства.

Вся́ человѣ́ческая воспріи́мъ, вся́ на́ша присво́ивъ, на Крестѣ́ пригвозди́тися благоволи́лъ еси́, Тво́рче мо́й, сме́рть изво́ливый претерпѣ́ти, я́ко Человѣ́къ, да человѣ́чество отъ сме́рти изба́виши, я́ко Бо́гъ. Тѣ́мже, я́ко Жизнода́вцу, вопіе́мъ Ти́: сла́ва, Христе́, Воскресе́нію Твоему́!

Сти́хъ: Во всю́ зе́млю изы́де вѣща́ніе и́хъ [и въ концы́ вселе́нныя глаго́лы и́хъ].

Апо́столъ Твои́хъ па́мять, Го́споди, уясни́лъ еси́, я́ко Всеси́ленъ, зане́ укрѣпи́лъ еси́ и́хъ Стра́сти Твоя́ подража́ти: побѣди́ша му́жески веліа́рову си́лу, тѣ́мже и прія́ша исцѣле́ній дарова́нія. Тѣ́хъ моли́твами, Человѣколю́бче, ми́ръ пода́ждь лю́демъ Твои́мъ.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Му́чениченъ: Обле́кшеся во всеору́жіе Христо́во и одѣ́явшеся во ору́жіе вѣ́ры, ополче́нія вра́жія му́жески низложи́сте. Усе́рдно бо наде́ждею жи́зни претерпѣ́сте вся́ мучи́телей преще́нія же и ра́ны, тѣ́мже и вѣнцы́ прія́сте, му́ченицы Христо́вы, терпѣливоду́шніи.

Сла́ва, и ны́нѣ, богоро́диченъ:

Проро́цы проповѣ́даша, апо́столи научи́ша, му́ченицы исповѣ́даша, и мы́ вѣ́ровахомъ Богоро́дицу Тя́ вои́стинну Святу́ю. Тѣ́мже и велича́емъ Рождество́ Твое́ несказа́нное.

По 2-мъ стихосло́віи сѣда́ленъ, гла́съ 8. Подо́бенъ: Прему́дрости Сло́ва.

Стоя́ посредѣ́ святи́лища, преполовля́ющуся боже́ственно пра́зднику, — жа́ждай, — взыва́лъ еси́, — да гряде́тъ ко Мнѣ́ и піе́тъ; пія́й бо отъ сея́ Боже́ственныя Моея́ воды́, рѣ́ки изъ чре́ва источи́тъ велѣ́ній Мои́хъ; а и́же вѣ́руетъ въ Мя́, По́сланнаго отъ Боже́ственнаго Роди́теля, со Мно́ю просла́вится. — Сего́ ра́ди вопіе́мъ Ти́: сла́ва Тебѣ́, Христе́ Бо́же, я́ко бога́тно излія́лъ еси́ во́ды Твоего́ человѣколю́бія рабо́мъ Твои́мъ. [Два́жды.]

Воскресе́ніе Христо́во... Псало́мъ 50-й. Кано́нъ пра́здника [1-й Преполове́нія], со ирмосы́, на 8 и мине́и на 4. Конда́къ и ексапостила́рій пра́здника.

На хвали́техъ стихи́ры осмогла́сника, гла́съ 3:

Во свѣ́тѣ Твое́мъ, Влады́ко, у́зримъ свѣ́тъ, Человѣколю́бче: воскре́слъ бо еси́ изъ ме́ртвыхъ, спасе́ніе ро́ду человѣ́ческому да́руяй, да Тя́ тва́рь вся́ славосло́витъ, еди́наго Безгрѣ́шнаго, поми́луй на́съ! [Два́жды.]

Христо́вы за́повѣди непоро́чно сохра́ншіи, святíи апо́столи, ту́не прія́сте, ту́не подава́ете, исцѣля́юще стра́сти ду́шъ и тѣле́съ на́шихъ. Тѣ́мже иму́ще дерзнове́ніе, Того́ моли́те поми́ловатися душа́мъ на́шимъ.

Яко свѣти́ла въ мíрѣ сія́ете и по сме́рти, святíи му́ченицы, по́двигомъ до́брымъ подвиза́вшеся. Тѣ́мже иму́ще дерзнове́ніе, Христа́ моли́те поми́ловатися душа́мъ на́шимъ.

Сла́ва, и ны́нѣ, гла́съ 4:

Го́споди, пре́жде честна́го Твоего́ Креста́, пра́зднику преполови́вшуся, во святи́лище вше́лъ еси́, іуде́и со дерзнове́ніемъ уча́ Моисе́емъ и въ зако́нѣ Тобо́ю законоположе́ннымъ. Ужаса́ющеся же, Христе́, Твоея́ прему́дрости неизрече́нному та́инству, е́же на Тя́ ропта́нію въ себѣ́ за́вистію поуча́хуся: ка́ко Се́й вѣ́сть пи́смена, не учи́вся? Не вѣ́дяще Тебе́, Спа́са ду́шъ на́шихъ.

На стихо́внѣ стихи́ры, и́хже краегране́сіе: Средопятдеся́тницы. Гла́съ 2. Подо́бенъ: До́ме Евфра́ѳовъ.

Ве́лій еси́, Царю́, и ве́лія Твоя́ держа́ва: вельми́ бо обнища́въ, вели́кихъ дарова́ній вселе́нную испо́лнилъ еси́.

Сти́хъ: Помяни́ со́нмъ Тво́й, его́же стяжа́лъ еси́ испе́рва.

Ста́лъ еси́ въ хра́мѣ, источа́я Твоя́ струи́, пра́зднику преполови́вшуся, и напая́я жа́ждущія Боже́ственною благода́тію, Благоутро́бне.

Сти́хъ: Бо́гъ же Ца́рь на́шъ пре́жде вѣ́ка [содѣ́ла спасе́ніе посредѣ́ земли́].

Спасти́ мя́ восхотѣ́въ, воплоти́лся еси́ пресла́вно отъ Дѣ́вы Неискусобра́чныя, и посредѣ́ хра́ма Твоего́ благода́ть мнѣ́ источи́лъ еси́.

Сла́ва, и ны́нѣ, гла́съ 8. Іоа́нна мона́ха:

Преполови́вшуся пра́зднику, пре́жде Стра́сти и сла́внаго Воскресе́нія Твоего́, Го́споди, бы́лъ еси́ уча́, Бла́же, во святи́лищи непокори́выя іуде́и, и фарисе́и, и кни́жники, и вопія́ къ ни́мъ: жа́ждай да гряде́тъ ко Мнѣ́ и піе́тъ; вѣ́руяй въ Мя́, воды́ жи́зни Ду́ха Боже́ственнаго рѣ́ки потеку́тъ отъ чре́ва его́. О, неизрече́нныя прему́дрости Твоего́ хвале́нія! Иже вся́ исполня́яй, Бо́же на́шъ, сла́ва Тебѣ́!

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 95 об. – 97 об.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.