Церковный календарь
Новости


2017-11-24 / russportal
Слова преп. Симеона Новаго Богослова. Слово 40-е (1882)
2017-11-24 / russportal
Слова преп. Симеона Новаго Богослова. Слово 39-е (1882)
2017-11-24 / russportal
Ген. П. Н. Красновъ. Кубанцы въ Великой войнѣ (1930)
2017-11-24 / russportal
Ген. П. Н. Красновъ. Привѣтъ Россійской Военной Академіи (1932)
2017-11-23 / russportal
П. Н. Красновъ. "Старая Академія". Глава 14-я (1932)
2017-11-23 / russportal
П. Н. Красновъ. "Старая Академія". Глава 13-я (1932)
2017-11-23 / russportal
Архіеп. Аверкій. Существо Православія и соврем. борьба противъ него (1975)
2017-11-23 / russportal
Архіеп. Аверкій. Въ чемъ истинное Православіе и хранимъ ли мы его? (1975)
2017-11-23 / russportal
П. Н. Красновъ. "Старая Академія". Глава 12-я (1932)
2017-11-23 / russportal
П. Н. Красновъ. "Старая Академія". Глава 11-я (1932)
2017-11-23 / russportal
Слова преп. Симеона Новаго Богослова. Слово 38-е (1882)
2017-11-23 / russportal
Слова преп. Симеона Новаго Богослова. Слово 37-е (1882)
2017-11-22 / russportal
Ген. П. Н. Красновъ. "Старая Академія". Глава 10-я (1932)
2017-11-22 / russportal
Ген. П. Н. Красновъ. "Старая Академія". Главы 8-9 (1932)
2017-11-22 / russportal
Воззваніе Союза Русскаго Народа "Да здравствуетъ Самодержавіе!" (1907)
2017-11-22 / russportal
Воззваніе Союза Русскаго Народа "Къ честнымъ сынамъ Россіи" (1907)
Новости въ видѣ
RSS-канала: .
Сегодня - пятница, 24 ноября 2017 г. Сейчасъ на порталѣ посѣтителей - 15.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ПЯТОКЪ ЧЕТВЕРТЫЯ СЕДМИЦЫ ПО ПАСЦѢ.

ВЪ ЧЕТВЕРТОКЪ ВЕЧЕРА,

На Го́споди воззва́хъ: стихи́ры подо́бны пра́здника 3 и мине́и 3.

[Стихи́ры] пра́здника, гла́съ 5. Подо́бенъ: Ра́дуйся.

Яви́ся свѣтоявле́нное и кра́сное Спа́сова Воскресе́нія дне́сь преполове́ніе всесвято́е, я́ко полу́дне свѣ́тлое, уясня́ющее мíръ Боже́ственными благода́тьми Христо́ва Воста́нія, осіява́ющее чудеса́ нетлѣ́нія, облистава́етъ зна́менія и показу́етъ на высоту́ Вознесе́ніе, явля́етъ многорачи́тельное Ду́ха прише́ствіе — Пятьдеся́тницы всечестны́я свѣтлѣ́йшее торжество́. Тѣ́мже и подае́тъ душа́мъ на́шимъ ми́ръ и ве́лію ми́лость.

Яко Боже́ственныя сла́вы рѣка́, пра́зднику ны́нѣ преполови́вшуся, Госпо́дь струи́ благоутро́бія всѣ́мъ подава́я, вопіе́тъ: жа́ждай да гряде́тъ ко Мнѣ́ и піе́тъ те́плѣ. Исто́чникъ бо сострада́нія и ми́лости Пучи́на Са́мъ сы́й, источа́етъ мíрови оставле́ніе, омыва́етъ прегрѣше́нія и очища́етъ неду́ги, спаса́етъ Воскресе́ніе Его́ пра́зднующихъ, покрыва́етъ любо́вію почита́ющихъ е́же со сла́вою Вознесе́ніе Его́ и подае́тъ душа́мъ на́шимъ ми́ръ и ве́лію ми́лость.

Посредѣ́ святи́лища ста́въ, Неопи́санный Бо́гъ же и Госпо́дь: Бо́гъ бо бя́ше естество́мъ, а́ще и на́съ ра́ди вочеловѣ́чився, опи́санъ яви́ся тѣ́ломъ, всѣ́мъ источа́ше живото́чныя глаго́лы, всѣ́мъ глаго́ля: ду́ши очи́стите и зно́я страсте́й охлади́те, да не ка́ко лиша́тся питія́ человѣ́цы; Боже́ственную бо благода́ть да́рую, безсме́ртнаго, и лу́чшаго, и вы́шняго Ца́рствія, сопричасти́тися Мнѣ́, Созда́телю, и просла́витися.

Сла́ва, и ны́нѣ, гла́съ 6:

Пра́зднику преполовля́ющуся Твоего́, Христе́, Воскресе́нія и Боже́ственнаго прише́ствія Свята́го Твоего́ Ду́ха, соше́дшеся, чуде́съ Твои́хъ воспѣва́емъ та́инства, въ о́ньже низпосли́ на́мъ ве́лію ми́лость.

На стихо́внѣ стихи́ры осмогла́сника, гла́съ 3:

Дре́во преслуша́нія мíрови сме́рть возрасти́, дре́во же Креста́ — живо́тъ и нетлѣ́ніе. Тѣ́мже Тебѣ́ покланя́емся, Распе́ншемуся Го́споду, да зна́менается на на́съ свѣ́тъ Лица́ Твоего́, Го́споди.

Сти́хъ: Къ Тебѣ́ возведо́хъ о́чи мо́и, [Живу́щему на небеси́. Се́ я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́].

Твои́мъ Кресто́мъ, Христе́ Спа́се, сме́рти держа́ва разруши́ся, и діа́воля пре́лесть упраздни́ся, ро́дъ же человѣ́ческій, вѣ́рою спаса́емый, пѣ́снь Тебѣ́ всегда́ прино́ситъ.

Сти́хъ: Поми́луй на́съ, Го́споди, поми́луй на́съ, [я́ко по мно́гу испо́лнихомся уничиже́нія, наипа́че напо́лнися душа́ на́ша поноше́нія гобзу́ющихъ и уничиже́нія го́рдыхъ].

Му́чениченъ: Ве́лія Креста́ Твоего́, Го́споди, си́ла: водрузи́бося на мѣ́стѣ и дѣ́йствуетъ въ мíрѣ, и показа́ отъ ры́барей апо́столы и отъ язы́къ му́ченики, да мо́лятся о душа́хъ на́шихъ.

Сла́ва, и ны́нѣ, гла́съ 8. Іоа́нна мона́ха:

Преполови́вшуся пра́зднику, пре́жде Стра́сти и сла́внаго Воскресе́нія Твоего́, Го́споди, бы́лъ еси́ уча́, Бла́же, во святи́лищи непокори́выя іуде́и, и фарисе́и, и кни́жники, и вопія́ къ ни́мъ: жа́ждай да гряде́тъ ко Мнѣ́ и піе́тъ; вѣ́руяй въ Мя́, воды́ жи́зни Ду́ха Боже́ственнаго рѣ́ки потеку́тъ отъ чре́ва его́. О, неизрече́нныя прему́дрости Твоего́ хвале́нія! Иже вся́ исполня́яй, Бо́же на́шъ, сла́ва Тебѣ́!



ВЪ ПЯТОКЪ ПРЕПОЛОВЕНІЯ, НА УТРЕНИ,

По 1-мъ стихосло́віи глаго́лемъ настоя́щія сѣда́льны, гла́съ 3. Подо́бенъ: Красотѣ́ дѣ́вства.

Кре́стъ и сме́рть пострада́ти Изво́ливый, среди́ тва́ри се́й водрузи́лъ еси́; егда́ благоволи́лъ еси́, Спа́се, Тѣ́ло Твое́ пригвозди́ти, тогда́ и со́лнце лучи́ скры́. Сія́ и разбо́йникъ зря́, на крестѣ́ Тя́ воспѣ́: помяни́ мя́, — вопія́, — Спа́се! И вѣ́ровавъ, прія́тъ ра́й.

Сти́хъ: Возноси́те Го́спода Бо́га на́шего [и покланя́йтеся подно́жію но́гу Его́, я́ко свя́то е́сть].

Непостижи́мое распя́тія и несказа́нное воста́нія богосло́вствуемъ, вѣ́рніи, та́инство неизрече́нное: дне́сь бо сме́рть и а́дъ упраздни́ся, ро́дъ же человѣ́ческій въ нетлѣ́ніе облече́ся. Тѣ́мже благодаря́ще вопіе́мъ Ти́: сла́ва, Христе́, воста́нію Твоему́!

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Му́чениченъ: Благоду́шіе терпѣ́нія ва́шего побѣди́ ко́зни злонача́льнаго врага́, страстоте́рпцы блаже́нніи, сего́ ра́ди вѣ́чнаго сподо́бистеся блаже́нства. Но моли́теся Го́сподеви христолюби́выхъ люде́й спасти́ ста́до, му́ченицы су́ще истины.

Сла́ва, и ны́нѣ, крестобогоро́диченъ:

Же́злъ си́лы стяжа́вшіи — Кре́стъ Сы́на Твоего́, Богоро́дице, тѣ́мъ низлага́емъ враго́въ шата́нія, любо́вію Тя́ непреста́нно велича́юще.

По 2-мъ стихосло́віи сѣда́ленъ, гла́съ 8. Подо́бенъ: Прему́дрости Сло́ва.

Прему́дрости во́ду и жи́зни, источа́я мíрови, всѣ́хъ, Спа́се, призыва́еши почерпсти́ спасе́нія во́ды: Боже́ственный бо зако́нъ Тво́й пріи́мъ человѣ́къ, въ себѣ́ угаша́етъ пре́лести у́гліе, отону́дуже во вѣ́ки не вжа́ждетъ, ни преста́нетъ насыще́нія Твоего́, Влады́ко Царю́ Пренебе́сный. Сего́ ра́ди сла́вимъ держа́ву Твою́, Христе́ Бо́же, прегрѣше́ній оставле́ніе прося́ще посла́ти бога́тно рабо́мъ Твои́мъ. [Два́жды.]

Воскресе́ніе Христо́во... Псало́мъ 50-й. Кано́нъ пра́здника [2-й Преполове́нія], со ирмосы́, на 8 и мине́и на 4. Конда́къ и ексапостила́рій пра́здника.

На хвали́техъ стихи́ры осмогла́сника, повторя́юще 1-ю, гла́съ 3:

За́вистію сла́дости изгна́нъ бы́хъ, паде́ніемъ пады́й лю́тымъ, но не презрѣ́лъ еси́, Влады́ко, воспріи́мъ мене́ ра́ди е́же по мнѣ́ распя́тіе, и спаса́еши мя́, въ сла́ву вво́диши мя́. Изба́вителю мо́й, сла́ва Тебѣ́!

Пріиди́те вси́ язы́цы, уразумѣ́йте стра́шныя та́йны си́лу: Христо́съ бо, Спа́съ на́шъ, Еже въ нача́лѣ Сло́во, распя́тся на́съ ра́ди, и во́лею погребе́ся, и воскре́се изъ ме́ртвыхъ, е́же спасти́ вся́ческая. Тому́ поклони́мся!

Му́чениченъ: Святы́хъ страстоте́рпецъ па́мять, пріиди́те, лю́діе вси́, почти́мъ, я́ко позо́ръ бы́вше а́нгеломъ и человѣ́комъ, побѣ́ды вѣне́цъ отъ Христа́ прія́ша и мо́лятся о душа́хъ на́шихъ.

Сла́ва, и ны́нѣ, гла́съ 8:

Преполови́вшуся пра́зднику Па́схи, въ хра́мъ вше́лъ еси́ святи́лищный, Спа́се на́шъ, и ста́въ посредѣ́ наро́да, учи́лъ еси́ тѣ́хъ со дерзнове́ніемъ и глаго́лалъ еси́: Азъ е́смь Свѣ́тъ мíра; въ слѣ́дъ Мене́ иды́й не и́мать ходи́ти во тмѣ́, но имѣ́ти бу́детъ свѣ́тъ безсме́ртныя жи́зни.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Ве́сь съ Бо́гомъ, Сло́ве, Ты́ сы́й, погиба́юща мя́ хотя́ изъя́ти прегрѣше́ній, соединя́ешися мнѣ́, Человѣколю́бче.

Сти́хъ: Помяни́ со́нмъ Тво́й, [его́же стяжа́лъ еси́ испе́рва].

Преста́ сѣ́нь: се́ бо Мессíя посредѣ́ пра́здника; благода́ть, я́коже другу́ю денни́цу, облиста́.

Сти́хъ: Бо́гъ же Ца́рь на́шъ пре́жде вѣ́ка [содѣ́ла спасе́ніе посредѣ́ земли́].

Пріиди́те благопокори́во, живо́тныя воды́ пи́ти возжелѣ́вшіи, — вопія́ше Спа́съ мо́й, — и пíйте благода́ть, боже́ственно веселя́щеся.

Сла́ва, и ны́нѣ, гла́съ 6: [1]

Очи́стимъ помышле́ній сокро́вища, и душе́вная сія́нія уясни́мъ, и Жи́знь у́зримъ — Христа́, во святи́лище прише́дша премно́жествомъ бла́гости, да врага́ побѣди́тъ и спасе́тъ ро́дъ на́шъ Стра́стію Креста́ и Воскресе́нія. Къ Нему́же возопіи́мъ: Непостижи́ме Го́споди, сла́ва Тебѣ́!

Примѣчаніе:
[1] Въ греч. «ἦχος πλ. δ'.», т. е. гласъ 8-й. См. эту же стихиру въ понедѣльникъ 5-й седмицы по Пасхѣ, на стиховнѣ утрени, «Слава, и нынѣ».

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 98 – 99 об.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.