Церковный календарь
Новости


2017-07-23 / russportal
Слова преп. Симеона Новаго Богослова. Слово 28-е (1882)
2017-07-23 / russportal
Слова преп. Симеона Новаго Богослова. Слово 27-е (1882)
2017-07-22 / russportal
А. И. Купринъ. «Разсказы для дѣтей». Фіалки (1921)
2017-07-22 / russportal
А. И. Купринъ. «Разсказы для дѣтей». Скворцы (1921)
2017-07-22 / russportal
А. С. Пушкинъ. "Повѣсти Бѣлкина". Барышня-крестьянка (1921)
2017-07-22 / russportal
А. С. Пушкинъ. "Повѣсти Бѣлкина". Станціонный смотритель (1921)
2017-07-22 / russportal
Преп. Епифаній Премудрый. Житіе преп. Сергія Радонежскаго. Глава 5-я (1903)
2017-07-22 / russportal
Преп. Епифаній Премудрый. Житіе преп. Сергія Радонежскаго. Глава 4-я (1903)
2017-07-21 / russportal
Повѣсть о явленіи образа Пресв. Богородицы въ Казани, и о чудесахъ, бывшихъ отъ него (1912)
2017-07-21 / russportal
"Проповѣдн. хрестоматія". Поученіе въ день Казанской иконы Божіей Матери (1965)
2017-07-20 / russportal
"Русскія дѣтскія сказки". Василиса Прекрасная (1921)
2017-07-20 / russportal
"Русскія дѣтскія сказки". Морозко (1921)
2017-07-20 / russportal
А. С. Пушкинъ. "Повѣсти Бѣлкина". Гробовщикъ (1921)
2017-07-20 / russportal
А. С. Пушкинъ. "Повѣсти Бѣлкина". Отъ издателя (1921)
2017-07-20 / russportal
К. П. Побѣдоносцевъ. "Московскій Сборникъ". Знаніе и дѣло (1896)
2017-07-20 / russportal
К. П. Побѣдоносцевъ. "Моск. Сборникъ". Болѣзни нашего времени (1896)
Новости въ видѣ
RSS-канала: .
Сегодня - воскресенiе, 23 iюля 2017 г. Сейчасъ на порталѣ посѣтителей - 12.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ СУББОТУ ЧЕТВЕРТЫЯ СЕДМИЦЫ ПО ПАСЦѢ.

ВЪ ПЯТОКЪ 4-Я СЕДМИЦЫ ПО ПАСЦѢ ВЕЧЕРА,

Обы́чная каѳи́сма. На Го́споди воззва́хъ... стихи́ры пра́здника 3, гла́съ 1. Подо́бенъ: Небе́сныхъ чино́въ.

Творе́цъ всѣ́хъ и жи́зни Пода́тель, Отцу́ Боже́ственному Соприсносу́щное Сло́во, во́лею отъ Дѣ́вы пло́ть пріи́мъ, бы́въ Человѣ́къ, неизрече́нныя прему́дрости, я́ко Бла́гъ, всѣ́мъ источи́ уче́нія.

Пра́зднику преполови́вшуся іуде́йскому, Христе́, во святи́лищи предста́лъ еси́, зако́ну Влады́ка, уча́ вла́стію и кни́жники облича́я, я́коже пи́сано е́сть, и устраша́я прему́дростію слове́съ Твои́хъ и чуде́съ показа́ньми.

Пода́тель прему́дрости и до́брыхъ Излія́тель, Излива́яй Боже́ственныя струи́ отъ Исто́чника Приснотеку́щаго, — пріиди́те ко Мнѣ́, — зове́тъ, — во́ду жи́зни жа́ждущіи почерпи́те, и рѣ́ки изъ чре́ва ва́шего, — глаго́летъ, — дарова́ній Боже́ственныхъ потеку́тъ.

И мине́и 3. Сла́ва, гла́съ 1. Іоа́нна мона́ха:

Пятдеся́тницы наста́ дне́й преполове́ніе, въ не́мже Христо́съ, обнажи́въ малови́дно Боже́ственную си́лу, разсла́бленнаго стягну́ сло́вомъ, того́ отъ одра́ возста́вивъ, и боголѣ́пно чудотворя́ въ зда́нномъ тѣ́лѣ, человѣ́комъ дарова́ вѣ́чный живо́тъ и ве́лію ми́лость.

И ны́нѣ, богоро́диченъ, гла́съ 3:

Ка́ко не диви́мся Богому́жному Рождеству́ Твоему́, Пречестна́я? Искуше́нія бо му́жескаго не пріе́мши, Всенепоро́чная, родила́ еси́ безъ отца́ Сы́на пло́тію, пре́жде вѣ́къ отъ Отца́ рожде́ннаго безъ ма́тере, ника́коже претерпѣ́вшаго измѣне́нія, или́ смѣше́нія, или́ раздѣле́нія, но обою́ существу́ сво́йство цѣ́ло сохра́ншаго. Тѣ́мже, Ма́ти Дѣ́во Влады́чице, Того́ моли́ спасти́ся душа́мъ, правосла́вно Богоро́дицу исповѣ́дающихъ Тя́.

На стихо́внѣ стихи́ры осмогла́сника, гла́съ 3:

Твои́мъ Кресто́мъ, Христе́ Спа́се, сме́рти держа́ва разруши́ся, и діа́воля пре́лесть упраздни́ся, ро́дъ же человѣ́ческій, вѣ́рою спаса́емый, пѣ́снь Тебѣ́ всегда́ прино́ситъ.

Сти́хъ: Госпо́дь воцари́ся, въ лѣ́поту облече́ся.

Просвѣти́шася вся́ческая Воскресе́ніемъ Твои́мъ, Го́споди, и ра́й па́ки отве́рзеся, вся́ же тва́рь, восхваля́ющи Тя́, пѣ́снь Тебѣ́ всегда́ прино́ситъ.

Сти́хъ: Ибо утверди́ вселе́нную, [я́же не подви́жится].

Сла́влю Отца́ и Сы́на си́лу, и Свята́го Ду́ха пою́ вла́сть, нераздѣ́льное, несозда́нное Божество́, Тро́ицу Единосу́щную, ца́рствующую въ вѣ́къ вѣ́ка.

Сти́хъ: До́му Твоему́ подоба́етъ святы́ня, [Го́споди, въ долготу́ днíй].

Стра́стію Твое́ю, Христе́, омрачи́вый со́лнце и свѣ́томъ Твоего́ Воскресе́нія просвѣти́вый вся́ческая, пріими́ на́шу вече́рнюю пѣ́снь, Человѣколю́бче.

Сла́ва, и ны́нѣ, гла́съ 1:

Во святи́лище прише́лъ еси́, Прему́дросте Бо́жія, преполовля́ющуся пра́зднику, уча́ и облича́я непокори́выя іуде́и, фарисе́и и кни́жники, и вопія́ со дерзнове́ніемъ къ ни́мъ: жа́ждай да гряде́тъ ко Мнѣ́ и піе́тъ во́ду живо́тную, и не вжа́ждетъ во вѣ́къ; вѣ́руяй Мое́й бла́гости, рѣ́ки потеку́тъ изъ чре́ва его́ жи́зни вѣ́чныя. О, бла́гости и благоутро́бія Твоего́, Христе́ Бо́же на́шъ, сла́ва Тебѣ́!

Тропа́рь пра́здника. И отпу́стъ.




ВЪ СУББОТУ 4-Я СЕДМИЦЫ ПО ПАСЦѢ, НА УТРЕНИ.

По 1-мъ стихосло́віи сѣда́льны воскре́сны, гла́съ 3:

Христо́съ отъ ме́ртвыхъ воста́, Нача́токъ усо́пшихъ, Перворожде́нъ тва́ри и Содѣ́тель всѣ́хъ бы́вшихъ, истлѣ́вшее естество́ ро́да на́шего въ Себѣ́ Само́мъ обнови́. Не ктому́, сме́рте, облада́еши, и́бо всѣ́хъ Влады́ка держа́ву твою́ разруши́.

Сти́хъ: Воскресни́, Го́споди Бо́же мой, [да вознесе́тся рука́ Твоя́, не забу́ди убо́гихъ Твои́хъ до конца́].

Пло́тію сме́рть вкуси́вый, Го́споди, го́ресть сме́рти пресѣ́клъ еси́ воста́ніемъ Твои́мъ, и человѣ́ка на ню́ укрѣпи́вый, пе́рвыя кля́твы одолѣ́ніе призыва́я. Защи́тниче жи́зни на́шея, Го́споди, сла́ва Тебѣ́!

Сла́ва, и ны́нѣ, богоро́диченъ:

Тя́, хода́тайствовавшую спасе́ніе ро́да на́шего, воспѣва́емъ, Богоро́дице Дѣ́во: пло́тію бо, отъ Тебе́ воспрія́тою, Сы́нъ Тво́й и Бо́гъ на́шъ, Кресто́мъ воспріи́мъ Стра́сть, изба́ви на́съ отъ тли́, я́ко Человѣколю́бецъ.

По 2-мъ стихосло́віи сѣда́ленъ, гла́съ 8. Подо́бенъ: Прему́дрости.

Пра́зднику преполови́вшуся зако́нному, бы́лъ еси́ уча́, Спа́се мо́й, во святи́лищи, и облича́я безу́міе невѣ́рныхъ евре́евъ, и вопія́ къ наро́домъ Боже́ственнымъ гла́сомъ, я́ко Человѣколю́бецъ: жа́ждай, — взыва́лъ еси́, — да гряде́тъ ко Мнѣ́ и піе́тъ. Тѣ́мже обѣща́лъ еси́ вѣ́рующимъ пода́ти весе́лія во́ды отъ Исто́чника Нетлѣ́ннаго. Сего́ ра́ди вопіе́мъ Ти́: низпосли́, Христе́ Бо́же, Ду́ха Твоего́ Свята́го и спаси́ на́съ, я́ко еди́нъ еси́ Многоми́лостивый! [Два́жды.]

Воскресе́ніе Христо́во... Псало́мъ 50-й. Кано́ны пра́здника [1-й Преполове́нія], со ирмосы́, на 6 и свята́го оби́тели на 4 и мине́и на 4. Конда́къ и ексапостила́рій пра́здника.

На хвали́техъ поста́вимъ стихи́ 4 и пое́мъ стихи́ры воскре́сны, гла́съ 3:

Пріиди́те, вси́ язы́цы, уразумѣ́йте стра́шныя та́йны си́лу: Христо́съ бо, Спа́съ на́шъ, Еже въ нача́лѣ Сло́во, распя́тся на́съ ра́ди, и во́лею погребе́ся, и воскре́се изъ ме́ртвыхъ, е́же спасти́ вся́ческая. Тому́ поклони́мся!

Повѣ́даша вся́ чудеса́ стра́жіе Твои́, Го́споди; но собо́ръ суеты́ испо́лни мздо́ю десни́цу и́хъ, скры́ти мня́ше воскресе́ніе Твое́, е́же мíръ сла́витъ. Поми́луй на́съ!

Ра́дости вся́ испо́лнишася, воскресе́нія иску́съ пріи́мша. Марíя бо Магдали́на ко гро́бу пріи́де, обрѣ́те а́нгела на ка́мени сѣдя́ща, ри́зами блиста́ющася и глаго́люща: Что́ и́щете Жива́го съ ме́ртвыми? Нѣ́сть здѣ́, но воста́, я́коже рече́, предваря́я вы́ въ Галиле́и!

Во свѣ́тѣ Твое́мъ, Влады́ко, у́зримъ свѣ́тъ, Человѣколю́бче: воскре́слъ бо еси́ изъ ме́ртвыхъ, спасе́ніе ро́ду человѣ́ческому да́руяй, да Тя́ вся́ тва́рь славосло́витъ, еди́наго Безгрѣ́шнаго, поми́луй на́съ!

Сла́ва, и ны́нѣ, гла́съ 4. Анато́лія:

Просвѣти́вшеся, бра́тіе, Воскресе́ніемъ Спа́са Христа́ и дости́гше преполове́нія пра́здника Влады́чня, пріи́скренно сохрани́мъ за́повѣди Бо́жія, да досто́йни бу́демъ и Вознесе́ніе пра́здновати и прише́ствіе получи́ти Свята́го Ду́ха.

На стихо́внѣ стихи́ры подо́бны, гла́съ 2. Подо́бенъ: До́ме Евфра́ѳовъ.

Теку́щій исто́чникъ Твоея́ Прему́дрости во́ду духо́вную источа́етъ, ю́же пію́ще, догма́тъ Боже́ственныхъ исполня́емся.

Сти́хъ: Помяни́ со́нмъ Тво́й, [его́же стяжа́лъ еси́ испе́рва].

Уязвля́шеся лю́тый евре́йскій ро́дъ вои́стинну, слы́ша Тя́, Сло́ве, науча́юща наро́ды спаси́тельнымъ уче́ніемъ.

Сти́хъ: Бо́гъ же Ца́рь на́шъ пре́жде вѣ́ка [содѣ́ла спасе́ніе посредѣ́ земли́].

Прише́лъ еси́, Содѣ́телю, на Сіо́нъ, и ста́лъ еси́ посредѣ́ люде́й Твои́хъ, и лю́демъ да́лъ еси́ благода́ть спаси́тельную.

Сла́ва, и ны́нѣ, гла́съ 4:

Го́споди, пре́жде честна́го Твоего́ Креста́, пра́зднику преполови́вшуся, во святи́лище вше́лъ еси́, іуде́и со дерзнове́ніемъ уча́ Моисе́емъ и въ зако́нѣ Тобо́ю законоположе́ннымъ. Ужаса́ющеся же, Христе́, Твоея́ прему́дрости неизрече́нному та́инству, е́же на Тя́ ропта́нію въ себѣ́ за́вистію поуча́хуся: ка́ко Се́й вѣ́сть пи́смена, не учи́вся? Не вѣ́дяще Тебе́, Спа́са ду́шъ на́шихъ.



НА ЛИТУРГІИ,

Блаже́нна, пѣ́снь 5-я. И проки́менъ пра́здника. Апо́столъ Дѣя́ній, зача́ло 29: Возложи́ Иродъ ца́рь ру́цѣ... Аллилу́ія, пра́здника. Ева́нгеліе Іоа́нна, зача́ло 31: Рече́ Госпо́дь къ вѣ́ровавшимъ къ Нему́ іуде́омъ... Прича́стный пра́здника.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 100 – 102.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.