Церковный календарь
Новости


2017-09-25 / russportal
"Книга Правилъ". Канон. посланіе св. Василія Великаго къ Григорію пресвитеру (1974)
2017-09-25 / russportal
"Книга Правилъ". Канон. посланіе св. Василія Великаго къ Діодору, еп. Тарскому (1974)
2017-09-25 / russportal
Прот. Константинъ Зноско. "Истор. очеркъ церк. уніи". Часть 2-я. Глава 6-я (1993)
2017-09-25 / russportal
Прот. Константинъ Зноско. "Истор. очеркъ церк. уніи". Часть 2-я. Глава 5-я (1993)
2017-09-25 / russportal
Еп. Григорій (Граббе). "Правда о Русской Церкви..." Глава 4-я (1961)
2017-09-25 / russportal
Еп. Григорій (Граббе). "Правда о Русской Церкви..." Глава 3-я (1961)
2017-09-25 / russportal
Еп. Григорій (Граббе). "Правда о Русской Церкви..." Глава 2-я (1961)
2017-09-25 / russportal
Еп. Григорій (Граббе). "Правда о Русской Церкви..." Глава 1-я (1961)
2017-09-24 / russportal
Іером. Серафимъ (Роузъ). "Душа послѣ смерти". Разсказъ блаж. Ѳеодоры о мытарствахъ (1991)
2017-09-24 / russportal
Свт. Тихонъ, патр. Всероссійскій. Рѣчь къ новорукоположенному іерею (1986)
2017-09-24 / russportal
Свт. Тихонъ, патр. Всероссійскій. Рѣчь въ день празднованія 50-лѣтія шт. Калифорнія (1986)
2017-09-24 / russportal
Свт. Тихонъ, патр. Всероссійскій. Рѣчь, сказан. въ каѳедр. соборѣ въ Санъ-Франциско (1986)
2017-09-24 / russportal
Свт. Тихонъ, патр. Всероссійскій. Поученіе къ новопоставленному іерею (1986)
2017-09-24 / russportal
Свт. Тихонъ, патр. Всероссійскій. Предложеніе Аляскинскому духовному правленію (1986)
2017-09-24 / russportal
Свт. Тихонъ, патр. Всероссійскій. Отвѣтъ ген. агенту по народн. образованію (1986)
2017-09-24 / russportal
Свт. Тихонъ, патр. Всероссійскій. Слово въ недѣлю 17-ю по Пятьдесятницѣ (1986)
Новости въ видѣ
RSS-канала: .
Сегодня - понедѣльникъ, 25 сентября 2017 г. Сейчасъ на порталѣ посѣтителей - 23.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ НЕДѢЛЮ ПЯТУЮ ПО ПАСЦѢ, САМАРЯНЫНИ.

Недѣ́ля пя́тая по Па́сцѣ, самаряны́ни.

ВЪ СУББОТУ ВЕЧЕРА, НА МАЛѢЙ ВЕЧЕРНИ,

На Го́споди воззва́хъ... стихи́ры воскре́ны 4, гла́съ 4: Животворя́щему Твоему́ Кресту́... Дре́ва преслуша́нія... Врата́ а́дова сокруши́лъ еси́, Го́споди... Пріиди́те воспои́мъ, лю́діе... Сла́ва, гла́съ 6: При студенцѣ́ Іа́ковли... [все́ ищи́ напреди́ на вели́цѣй вече́рни.]

И ны́нѣ, богоро́диченъ догма́тикъ, гла́съ 4:

Безсѣ́менно зачала́ еси́ и родила́ еси́ неизрече́нно Низложи́вшаго си́льныя отъ престо́лъ, и Возне́сшаго смире́нныя, и Воздви́гшаго ро́гъ пома́занныхъ Свои́хъ, сла́вящихъ Христо́въ Кре́стъ, и погребе́ніе, и сла́вное Воскресе́ніе. Тѣ́мже Тя́, Богоро́дице, Хода́таицу толи́кихъ бла́гъ немо́лчными пѣ́сньми ублажа́емъ, я́ко моля́щуюся при́сно спасти́ся душа́мъ на́шимъ.

На стихо́внѣ стихи́ра воскре́сна: Го́споди, возше́дъ на Кре́стъ... [ищи́ на вели́цѣй вече́рни.]

Та́же настоя́щія стихи́ры подо́бны Пресвяты́я Богоро́дицы, гла́съ 4. Подо́бенъ: Зва́нный свы́ше...

Сти́хъ: Помяну́ и́мя Твое́ во вся́комъ ро́дѣ и ро́дѣ.

Изъ Безнача́льна Отца́ Сы́нъ безлѣ́тно, снизхожде́нія ра́ди и спасе́нія человѣ́ковъ, Бо́гъ человѣ́къ бы́сть, да пода́стъ первозда́нному ны́нѣ ра́й, тогда́ и все́ естество́ изба́вится отъ пре́лести змíевы, и о́бразъ па́дшій спасе́тъ я́ко Благопремѣни́тель. Отону́дуже Ма́терь содѣ́ла Невѣсторо́дицу чи́сту, я́ко нескве́рну, Юже, я́ко анки́ру вси́ и приста́нище, ублажа́емъ.

Сти́хъ: Слы́ши, Дщи́, и ви́ждь, [и приклони́ у́хо Твое́].

Воплоще́нна Созда́теля всѣ́хъ имѣ́ла еси́ во утро́бѣ Твое́й, Богоблаже́нная, вообрази́вшаго человѣ́ка, пре́жде па́дшаго преступле́ніемъ зміи́нымъ, Бо́га бо родила́ еси́ Сего́ несказа́нно на́мъ и тлѣ́нія свободи́ла еси́ естество́ все́ обветша́вшее Рождество́мъ Твои́мъ. Тѣ́мже пое́мъ и сла́вимъ Твою́ благода́ть, Дѣ́во Безневѣ́стная, моли́тися не преста́й спасти́ся душа́мъ на́шимъ.

Сти́хъ: Лицу́ Твоему́ помо́лятся [бога́тіи лю́дстіи].

Да Твоея́ всѣ́мъ мно́жество ми́лости и бла́гости откры́еши на́мъ неопредѣли́мую пучи́ну, грѣхи́ рабо́въ Твои́хъ вся́ загла́ди, и́маши бо, Всенепоро́чная, я́ко Ма́ти су́щи Бо́жія, вла́сть созда́нія и во́диши вся́, я́ко хо́щеши, си́лою Твое́ю, и́бо благода́ть Ду́ха Свята́го, я́вѣ все́льшаяся въ Тя́, содѣ́йствуетъ Ти́ во все́мъ при́сно, Всеблаже́ннѣйшая.

Сла́ва, гла́съ 8: Егда́ яви́лся еси́ во пло́ти...

И ны́нѣ, гла́съ то́йже:

Преполови́вшуся пра́зднику, уча́щу Ти́, Спа́се, глаго́лаху іуде́е: ка́ко Се́й вѣ́сть пи́смена, не учи́вся? Не разумѣ́юще, я́ко Ты́ еси́ Прему́дрость, устро́ившая мíръ, сла́ва Тебѣ́.

Отпусти́тельный тропа́рь, гла́съ 4: Свѣ́тлую Воскресе́нія про́повѣдь... [ищи́ на у́трени.]
Сла́ва, и ны́нѣ: Преполови́вшуся пра́зднику... И отпу́стъ.




НА ВЕЛИЦѢЙ ВЕЧЕРНИ,

Поста́вимъ стихо́въ 10 и пое́мъ стихи́ры воскре́сны 3, и восто́чну [анато́ліеву] 1, и преполове́нію подо́бны 3, и самаряны́ни самогла́сны 3.

Стихи́ры воскре́сны, гла́съ 4:

Животворя́щему Твоему́ Кресту́ непреста́нно кла́няющеся, Христе́ Бо́же, тридне́вное Воскресе́ніе Твое́ сла́вимъ: тѣ́мъ бо обнови́лъ еси́ истлѣ́вшее человѣ́ческое естество́, Всеси́льне, и и́же на небеса́ восхо́дъ обнови́лъ еси́ на́мъ, я́ко еди́нъ Бла́гъ и Человѣколю́бецъ.

Дре́ва преслуша́нія запреще́ніе разрѣши́лъ еси́, Спа́се, на Дре́вѣ Кре́стнѣмъ во́лею пригвозди́вся и, во а́дъ соше́дъ, Си́льне, сме́ртныя у́зы, я́ко Бо́гъ, растерза́лъ еси́. Тѣ́мже кла́няемся е́же изъ ме́ртвыхъ Твоему́ Воскресе́нію, ра́достію вопію́ще: Всеси́льне Го́споди, сла́ва Тебѣ́!

Врата́ а́дова сокруши́лъ еси́, Го́споди, и Твое́ю сме́ртію сме́ртное ца́рство разруши́лъ еси́, ро́дъ же человѣ́ческій отъ тлѣ́нія свободи́лъ еси́, живо́тъ и нетлѣ́ніе мíру дарова́въ и ве́лію ми́лость.

Ина́я стихи́ра восто́чна [анато́ліева]:

Пріиди́те воспои́мъ, лю́діе, Спа́сово тридне́вное воста́ніе, и́мже изба́вихомся а́довыхъ нерѣши́мыхъ у́зъ, и нетлѣ́ніе и жи́знь вси́ воспрія́хомъ, зову́ще: Распны́йся, и Погребы́йся, и Воскресы́й, спаси́ ны́ Воскресе́ніемъ Твои́мъ, еди́не Человѣколю́бче.

И стихи́ры преполове́нію 3, гла́съ то́йже. Подо́бенъ: Го́споди, возше́дъ на Кре́стъ.

Наста́ преполове́ніе дне́й... Слы́ша и возвесели́ся... Прибли́жися Боже́ственнаго... [ищи́ ли́стъ 86.]

И самаряны́ни самогла́сны 3, гла́съ 1:

На исто́чникъ прише́лъ еси́, Исто́чниче чуде́съ, въ шесты́й ча́съ, Евинъ улови́ти пло́дъ: Ева бо въ то́й изы́де изъ рая́ пре́лестію зміе́вою. Прибли́жибося самаряны́ня почерпсти́ во́ду, ю́же ви́дѣвъ, рече́ Спа́съ: да́ждь Ми́ во́ду пи́ти, и Азъ воды́ теку́щія насыщу́ тя́. И во гра́дъ те́кши цѣлому́дренная, наро́домъ возвести́ а́біе: пріиди́те, ви́дите Христа́ Го́спода, Спа́са ду́шъ на́шихъ.

Гла́съ 2:

На студене́цъ я́ко пріи́де Госпо́дь, самаряны́ня моля́ше Благоутро́бнаго: пода́ждь ми́ во́ду вѣ́ры, и пріиму́ купѣ́льныя во́ды — ра́дованіе и избавле́ніе. Животода́вче Го́споди, сла́ва Тебѣ́!

Собезнача́льный и Соприсносу́щный Сы́нъ и Сло́во Отчее на исто́чникъ пріи́де, Исто́чникъ исцѣле́ній, и жена́ отъ Самарíи пріи́де почерпсти́ во́ду, ю́же ви́дѣвъ, рече́ Спа́съ: да́ждь Ми́ во́ду пи́ти, и ше́дши пригласи́ твоего́ му́жа. Она́ же, я́ко человѣ́ку глаго́лющи, а не Бо́гу, утаи́ти тща́шеся, глаго́лаше: не и́мамъ му́жа. И Учи́тель къ не́й: и́стину рекла́ еси́, не и́мамъ му́жа: пя́ть бо имѣ́ла еси́, и ны́нѣ, его́же и́маши, нѣ́сть тво́й му́жъ. Она́ же о глаго́лѣ удиви́вшися и во гра́дъ те́кши, наро́домъ вопія́ше, глаго́лющи: пріиди́те, ви́дите Христа́, Иже да́руетъ мíрови ве́лію ми́лость.

Сла́ва, гла́съ 6:

При студенцѣ́ Іа́ковли обрѣ́тъ Іису́съ самаряны́ню, про́ситъ во́ду отъ нея́, облака́ми Покрыва́яй зе́млю. О, чудесе́! Иже херуви́мы Носи́мый, блудни́цѣ женѣ́ бесѣ́доваше; воды́ прося́, Иже на вода́хъ зе́млю Повѣ́сивый; воды́ искíй, Иже исто́чники и езе́ра во́дъ Излива́яй, хотя́ привлещи́ сію́ вои́стинну, уловля́ему отъ сопоста́та врага́, и напои́ти ю́ водо́ю живо́ю, пали́мую въ безмѣ́стіихъ лю́тѣ, я́ко еди́нъ Благоутро́бный и Человѣколю́бецъ.

И ны́нѣ, богоро́диченъ, гла́съ 4:

Иже Тебе́ ра́ди богооте́цъ проро́къ Дави́дъ пѣ́сненно о Тебѣ́ провозгласи́, вели́чія тебѣ́ Сотво́ршему: предста́ Цари́ца одесну́ю Тебе́. Тя́ бо Ма́терь, Хода́таицу живота́ показа́, безъ отца́ изъ Тебе́ вочеловѣ́читися благоволи́вый Бо́гъ, да Сво́й па́ки обнови́тъ о́бразъ, истлѣ́вшій страстьми́, и заблу́ждшее горохи́щное обрѣ́тъ овча́, на ра́мо воспріи́мъ, къ Отцу́ принесе́тъ, и Своему́ хотѣ́нію, съ небе́сными совокупи́тъ си́лами, и спасе́тъ, Богоро́дице, мíръ, Христо́съ имѣ́яй ве́лію и бога́тую ми́лость.

Вхо́дъ. Проки́менъ дне́.

На литíи стихи́ра хра́ма. Сла́ва, и ны́нѣ, гла́съ 3:

Да ра́дуется дне́сь свѣ́тло не́бо и земля́, зане́ Христо́съ яви́ся воплоща́емь, я́ко Человѣ́къ, да Ада́ма и́зметъ отъ кля́твы всеро́дныя, и удивля́ется чудесы́ въ Самарíю прише́дъ, женѣ́ же предста́, во́ду прося́, о́блаки вода́ми Одѣва́яй. Тѣ́мже вси́ вѣ́рніи покланя́емся на́съ ра́ди во́лею Обнища́вшему благоутро́бнымъ Совѣ́томъ.

На стихо́внѣ стихи́ра воскре́сна, гла́съ 4:

Го́споди, восше́дъ на Кре́стъ, пра́дѣднюю на́шу кля́тву потреби́лъ еси́ и, соше́дъ во а́дъ, я́же отъ вѣ́ка у́зники свободи́лъ еси́, нетлѣ́ніе да́руя человѣ́ческому ро́ду. Сего́ ра́ди пою́ще, сла́вимъ животворя́щее и спаси́тельное Твое́ Воста́ніе.

И про́чія стихи́ры Па́сцѣ, съ припѣ́вы и́хъ, [ищи́ въ недѣ́лю Па́схи на у́трени, ли́стъ 6.]

Сла́ва: гла́съ 8:

Егда́ яви́лся еси́ во пло́ти, Христе́ Бо́же, за неизрече́нное смотре́ніе, слы́шавши самаряны́ня сло́во Тебе́, Человѣколю́бца, оста́ви почерпа́ло у студенца́ и тече́, глаго́лющи су́щимъ во гра́дѣ: пріиди́те, ви́дите Сердцевѣ́дца, еда́ Се́й е́сть ча́емый Христо́съ, имѣ́яй ве́лію ми́лость?

И ны́нѣ: Воскресе́нія де́нь... И про́чая вся́, я́ко предписа́ся въ про́чіихъ недѣ́ляхъ.

Отпусти́тельный тропа́рь, гла́съ 4: Свѣ́тлую Воскресе́нія...

Сла́ва, и ны́нѣ, пра́здника, гла́съ 8:

Преполови́вшуся пра́зднику, жа́ждущую ду́шу мою́ благоче́стія напо́й вода́ми, я́ко всѣ́мъ, Спа́се, возопи́лъ еси́: жа́ждай да гряде́тъ ко Мнѣ́ и да піе́тъ. Исто́чниче жи́зни на́шея, Христе́ Бо́же, сла́ва Тебѣ́!

[Зри́:] Аще нѣ́сть бдѣ́нія, на полу́нощницѣ кано́нъ Святѣ́й и Живонача́льнѣй Тро́ицѣ во окто́ихѣ, гла́са 4-го. Та́же: Досто́йно е́сть... и про́чая.



НА УТРЕНИ,

На Бо́гъ Госпо́дь: Тропа́рь воскре́сенъ, два́жды, гла́съ 4:

Свѣ́тлую Воскресе́нія про́повѣдь отъ а́нгела увѣ́дѣвше Госпо́дни учени́цы, и пра́дѣднее осужде́ніе отве́ргше, апо́столомъ хва́лящеся, глаго́лаху: испрове́ржеся сме́рть, воскре́се Христо́съ Бо́гъ, да́руяй мíрови ве́лію ми́лость!

И пра́здника: Преполови́вшуся пра́зднику.., еди́нощи. Та́же обы́чное стихосло́віе.

По 1-мъ стихосло́віи сѣда́ленъ, гла́съ 4:

Воззрѣ́вше на гро́бный вхо́дъ, и пла́мене а́нгельскаго не терпя́ще мѵроно́сицы, съ тре́петомъ дивля́хуся, глаго́люще: еда́ укра́деся Отве́рзый разбо́йнику ра́й? еда́ ли воста́ Иже и пре́жде стра́сти Проповѣ́давый воста́ніе? Вои́стинну воскре́се Христо́съ, сущи́мъ во а́дѣ подая́ живо́тъ и воскресе́ніе!

Сти́хъ: Воскресни́, Го́споди Бо́же мой, [да вознесе́тся рука́ Твоя́, не забу́ди убо́гихъ Твои́хъ до конца́].

Подобенъ: Скоро предвари.

Воскре́слъ еси́, я́ко Безсме́ртный, отъ гро́ба, Спа́се, совоздви́глъ еси́ мíръ Тво́й си́лою Твое́ю, Христе́ Бо́же на́шъ, сокруши́лъ еси́ въ крѣ́пости сме́рти держа́ву, показа́лъ еси́, Ми́лостиве, воскресе́ніе всѣ́мъ. Тѣ́мже Тя́ и сла́вимъ, еди́не Человѣколю́бче.

Сла́ва, и ны́нѣ, богоро́диченъ:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся Бо́гъ, въ несли́тномъ соедине́ніи воплоща́емь, и Кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.

По 2-мъ стихосло́віи сѣда́ленъ, гла́съ 4. Подо́бенъ: Удиви́ся Іо́сифъ.

Съ го́рнихъ высо́тъ сше́дъ Гавріи́лъ и къ ка́меню присту́пль, идѣ́же Ка́мень жи́зни, бѣлонося́й взыва́ше къ пла́чущимъ: преста́ните вы́ отъ рыда́нія во́пля, имѣ́ющія и ны́нѣ ми́лостивное. Его́же бо и́щете, пла́чуще, дерза́йте, я́ко вои́стинну воста́лъ е́сть. Тѣ́мже возопíйте апо́столомъ, я́ко воскре́се Госпо́дь!

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, [повѣ́мъ вся́ чудеса́ Твоя́].

Во́льнымъ Твои́мъ Совѣ́томъ Кре́стъ претерпѣ́лъ еси́, Спа́се, и во гро́бѣ но́вѣ положи́ша Тя́ человѣ́цы сме́ртніи, сло́вомъ концы́ Соста́вльшаго. Тѣ́мже свя́занъ бы́сть чу́ждій, сме́рть лю́то плѣня́шеся, и су́щіи во а́дѣ вси́ взыва́ху живоно́сному воста́нію Твоему́: Христо́съ воскре́се, Жизнода́вецъ, Пребыва́яй во вѣ́ки.

Сла́ва, и ны́нѣ, богоро́диченъ, самогла́сенъ:

Удиви́ся Іо́сифъ, е́же па́че естества́ зря́ и внима́ше мы́слію, и́же на руно́ до́ждь, въ безсѣ́менномъ зача́тіи Твое́мъ, Богоро́дице, купину́, огне́мъ неопали́мую, же́злъ Ааро́новъ прозя́бшій, и, свидѣ́тельствуя, обру́чникъ Тво́й и храни́тель свяще́нникомъ взыва́ше: Дѣ́ва ражда́етъ и по Рождествѣ́ па́ки Дѣ́ва пребыва́етъ.

Та́же чте́ніе въ толкова́ніи Ева́нгелія Іоа́нна: сло́во 31-е, 32-е, 33-е и 34-е. По Блаже́ни непоро́чніи... глаго́лемъ тропари́ воскре́сны: Благослове́нъ еси́, Го́споди.., во гла́съ 5. Ангельскій собо́ръ... и про́чее.

И а́біе ипакои́, гла́съ 4:

Яже Твоего́ пресла́внаго воста́нія, предте́кшія мѵроно́сицы, апо́столомъ проповѣ́даху, Христе́, я́ко воскре́слъ еси́, я́ко Бо́гъ, подая́й мíрови ве́лію ми́лость.

И а́біе степе́нны, гла́съ 4:

Антифо́нъ 1:

Отъ ю́ности моея́ мно́зи бо́рютъ мя́ стра́сти, но Са́мъ мя́ заступи́ и спаси́, Спа́се мо́й.

Ненави́дящіи Сіо́на, посрами́теся отъ Го́спода, я́ко трава́ бо огне́мъ, бу́дете изсо́хше.

Сла́ва: Святы́мъ Ду́хомъ вся́ка душа́ живи́тся и чистото́ю возвыша́ется, свѣтлѣ́ется Тро́ическимъ Еди́нствомъ священнота́йнѣ.

И ны́нѣ, то́йже.

Антифо́нъ 2:

Воззва́хъ Тебѣ́, Го́споди, те́плѣ изъ глубины́ души́ моея́, и мнѣ́ да бу́дутъ на послуша́ніе Боже́ственная Твоя́ ушеса́.

На Го́спода наде́жду вся́къ кто́ стяжа́въ, вы́шшій е́сть всѣ́хъ скорбя́щихъ.

Сла́ва: Святы́мъ Ду́хомъ то́чатся благода́тныя струи́, напая́юще вся́ку тва́рь ко оживле́нію.

И ны́нѣ, то́йже.

Антифо́нъ 3:

Се́рдце мое́ къ Тебѣ́, Сло́ве, да возвы́сится, и да ничто́же услади́тъ мя́ отъ мірски́хъ красо́тъ на сла́бость.

Къ ма́тери свое́й я́коже и́мать кто́ любо́вь, ко Го́споду те́пльше любле́ніемъ до́лжни есмы́.

Сла́ва: Святы́мъ Ду́хомъ — боговѣ́денія бога́тство, зрѣ́нія и прему́дрости: вся́ бо въ Се́мъ Оте́ческая велѣ́нія Сло́во открыва́етъ.

И ны́нѣ, то́йже.

Проки́менъ, гла́съ 4: Воскресни́, Го́споди, помози́ на́мъ,* и изба́ви на́съ и́мене Твоего́ ра́ди. Сти́хъ: Бо́же, уши́ма на́шима услы́шахомъ, [и отцы́ на́ша возвѣсти́ша на́мъ]. Та́же: Вся́кое дыха́ніе да хва́литъ Го́спода. Сти́хъ: Хвали́те Бо́га во святы́хъ Его́... Ева́нгеліе отъ Іоа́нна, у́треннее 7-е, зача́ло 63: Во еди́ну отъ суббо́тъ... Воскресе́ніе Христо́во.., три́жды. Псало́мъ 50-й. И про́чее.

Та́же кано́ны: Па́сцѣ, со ирмосы́ [пи́санъ въ недѣ́лю Па́схи] и съ богоро́дичны [пи́саны въ недѣ́лю святы́хъ мѵроно́сицъ], на 6, преполове́нію на 4 и самаряны́ни на 4. Катава́сія: Воскресе́нія де́нь...

Кано́нъ Па́сцѣ, гла́съ 1. Пѣ́снь 1. Ирмо́съ: Воскресе́нія де́нь...

Другíй кано́нъ Преполове́нію, гла́съ 8. Творе́ніе Андре́я Кри́тскаго:
Пѣ́снь 1. Ирмо́съ: Мо́ре огусти́лъ еси́...

Язы́цы, восплещи́те; евре́и, воспла́чите: Животода́вецъ бо Христо́съ, у́зы а́довы расто́рже, и ме́ртвыя воскреси́, и неду́ги исцѣли́ сло́вомъ. Се́й е́сть Бо́гъ на́шъ, да́вый жи́знь вѣ́рующимъ во и́мя Его́.

Чу́до показа́лъ еси́ — во́ду въ вино́ преше́дшую, во Еги́птѣ рѣ́ки преложи́вый, Влады́ко, въ кро́вь; и ме́ртвыя воскреси́лъ еси́, зна́меніе сіе́ второ́е сконча́въ. Сла́ва, Спа́се, несказа́нному Твоему́ совѣ́ту; сла́ва истоща́нію Твоему́, и́мже обнови́лъ еси́ на́съ.

Струя́ приснотеку́щая сы́й, Го́споди, жи́зни и́стинныя, Ты́ еси́ Воскресе́ніе на́ше; хотя́ труди́лся еси́, Спа́се мо́й, и во́лею вжажда́лся еси́, зако́номъ естества́ повину́яся, и въ Сиха́рь ше́дъ пло́тію, воды́ проси́лъ еси́ у самаряны́ни пи́ти.

Богоро́диченъ: Еди́на вмѣсти́ла еси́ Зижди́теля Твоего́, Богороди́тельнице, во чре́вѣ, и пло́тію родила́ еси́ неизрече́нно, и Дѣ́ва пребыла́ еси́, ничто́же дѣ́вству оскверни́вшуся. Сего́, Чи́стая, я́ко Сы́на Твоего́ и Бо́га непреста́нно моли́ о ста́дѣ Твое́мъ при́сно.

Инъ, кано́нъ самаряны́ни. Творе́ніе Іо́сифово. Гла́съ 4.
Пѣ́снь 1.

Ирмо́съ: Порази́вый Еги́пта и фарао́на мучи́теля погрузи́вый въ мо́ри, лю́ди спа́слъ еси́ изъ рабо́ты, Моисе́йски пою́щія пѣ́снь побѣ́дную: я́ко просла́вися.

Погребе́нный воста́, Собо́ю воздви́же ро́дъ человѣ́ческій: да ра́дуется тва́рь вся́, и мы́сленніи дне́сь о́блацы да кропя́тъ пра́вду я́вѣ.

Кре́стъ во́льный пло́тію пріи́мъ, тридне́венъ воскре́слъ еси́ отъ ме́ртвыхъ, а́дова сокро́вища, Живонача́льниче Го́споди, истощи́въ, и изве́дъ окова́нныя ду́ши.

Зра́комъ блиста́ющася мѵроно́сицы ви́дѣвше а́нгела, стра́хомъ бѣжа́ша отъ гро́ба; Христо́во же воста́ніе увѣ́дѣвше, и возвѣсти́ти тща́тся ученико́мъ.

Покрыва́яй вода́ми превы́спренняя, Го́споди, Вода́ Жи́зни сы́й, самаряны́ни, прося́щей Твоея́ честны́я воды́, по́далъ еси́, разумѣ́вшей благоутро́біе Твое́.

Сла́ва, тро́иченъ: О, Тро́ице, вѣ́рою Тя́ чи́стою сла́вящихъ, Отче, Сы́не и Ду́ше, я́ко Творе́цъ всѣ́хъ спаса́й, и очище́ніе да́руй на́мъ грѣхо́въ, я́ко Преблагíй.

И ны́нѣ, богоро́диченъ: Ра́дуйся, престо́ле о́гненный; ра́дуйся, свѣ́щниче всезлаты́й; ра́дуйся, Свѣ́та облаче; ра́дуйся, пала́то Сло́ва, и у́мная трапе́зо, Хлѣ́бъ Жи́зни досто́йно Христа́ носи́вшая.

Пѣ́снь 3. Ирмо́съ: Утверди́ся се́рдце мое́...

Не и́же на лице́ су́дъ суди́те, іуде́е! — уча́ глаго́лаше Влады́ка, егда́ пріи́де во святи́лище, я́коже пи́сано е́сть, преполови́вшуся зако́нному пра́зднику.

Не и́же на лице́ су́дъ суди́те, іуде́е: Христо́съ бо пріи́де, Его́же нарица́ху проро́цы, отъ Сіо́на гряду́ща и мíръ взыва́юща.

Аще и словесе́мъ не вѣ́руете, іуде́е, дѣло́мъ вѣ́руйте Влады́ки. Что́ прельща́етеся, отмета́ющеся Свята́го, Его́же написа́ въ зако́нѣ Моисе́й?

Богоро́диченъ: Еди́нъ отъ Тро́ицы Сы́й бы́въ, пло́ть ви́дѣлся еси́, не прело́жъ, Го́споди, существа́, ниже́ опали́въ Ро́ждшія нетлѣ́нное чре́во, Бо́гъ сы́й ве́сь и Огнь.

Инъ.

Ирмо́съ: Утверди́ся се́рдце мое́ въ Го́сподѣ, даю́щемъ моли́тву моля́щемуся, я́ко лу́къ си́льныхъ изнемо́же и немощству́ющіи препоя́сашася си́лою.

Во́лею на Дре́во возне́слся еси́, Сло́ве, и зря́щее распада́хуся ка́меніе, и тва́рь преклоня́шеся вся́, и ме́ртвіи изъ гробо́въ, я́коже отъ сна́, воста́ху.

Съ душе́ю Тя́ прише́дша ко а́ду, Сло́ве, ви́дѣвше вся́ ду́ши пра́ведныхъ, отъ вѣ́чныхъ у́зъ отрѣша́хуся, пѣсносло́вяще, я́же па́че ума́, си́лу Твою́.

Что́ чудите́ся? что́ во гро́бѣ вы́ и́щете съ мѵ́ромъ, жены́, Влады́ку? Воста́ и мíръ совоздви́же! — а́нгелъ блиста́яйся мѵроно́сицамъ вѣща́ше.

Жи́знь сы́й, Го́споди, и Исто́чникъ безсме́ртія, сѣ́лъ еси́ при исто́чницѣ, Ще́дре, и Твои́хъ прему́дрыхъ во́дъ испо́лнилъ еси́ самаряны́ню, прося́щую и пою́щую Тя́.

Сла́ва, тро́иченъ: Еди́нъ надъ всѣ́ми въ Тро́ицѣ Бо́гъ пое́тся: Оте́цъ и Сы́нъ и Боже́ственный Ду́хъ, Его́же стра́хомъ сла́вятъ небе́сніи чи́нове, я́сно вопію́ще: Свя́тъ, Свя́тъ, Свя́тъ еси́, Го́споди!

И ны́нѣ, богоро́диченъ: Несказа́нно заче́нши во утро́бѣ Твое́й всѣ́хъ Бо́га, Дѣ́во Ма́ти, па́че мы́сли и сло́ва родила́ еси́, пребы́вши Дѣ́ва, я́ко пре́жде рождества́, Богоневѣ́сто.

Конда́къ преполове́нію и и́косъ [ли́стъ 91 на оборо́тѣ].

Сѣда́ленъ самаряны́ни, гла́съ 4. Подо́бенъ: Вознесы́йся.

Да ра́дуется не́бо, да ликовству́ютъ земна́я, я́ко Христо́съ отъ Дѣ́вы яви́вся, я́ко Человѣ́къ, изба́ви изъ истлѣ́нія все́ человѣ́чество Свое́ю сме́ртію. Чудесы́ же Возсія́вый, женѣ́ самаряны́нѣ, воды́ прося́щей, подае́тъ исто́чникъ исцѣле́ній, я́ко еди́нъ Безсме́ртенъ.

Сла́ва, и ны́нѣ, гла́съ 4. Подо́бенъ:

Прему́дрости Пода́телю и Влады́ко, пра́зднику зако́нному предста́лъ еси́, во святи́лищи сѣ́дъ учи́лъ еси́, глаго́ля си́це всѣ́мъ: гряди́те, жа́ждущіи, пíйте во́ду, ю́же Азъ ны́нѣ подаю́, е́юже жи́зни отъ Бо́га и пи́щи наслади́теся вси́ человѣ́цы.

Пѣ́снь 4. Ирмо́съ: Проро́къ Авваку́мъ...

Аще Мессíи подоба́етъ пріити́, Мессíя же Христо́съ е́сть, беззако́нніи, что́ не вѣ́руете Ему́? Се́ пріи́де, и свидѣ́тельствуетъ, я́же То́й твори́тъ: во́ду вино́ сотвори́, разсла́бленнаго сло́вомъ стягну́.

Не разумѣ́юще Писа́ній, прельща́етеся вси́ вы́, евре́и беззако́нніи: вои́стинну бо пріи́де Христо́съ, и всѣ́хъ просвѣти́, и въ ва́съ показа́ мно́гая зна́менія и чудеса́, и всу́е отрица́етеся Истиннаго Живота́.

Еди́но дѣ́ло показа́хъ ва́мъ, и вси́ уже́ дивите́ся, — взыва́ше іуде́емъ Христо́съ. — Вы́ обрѣ́зуете и въ суббо́ту человѣ́ка, — рече́, — Мене́ же что́ оклевета́ете про́чее, воздви́гшаго сло́вомъ разсла́бленнаго?

Дѣла́ сотвори́хъ мно́гая, и ко́его ра́ди дѣ́ла ка́меніемъ біете́ Мя́? — Іуде́емъ Христо́съ, облича́я, взыва́ше. — Еда́ зане́ человѣ́ка здра́ва всего́ сло́вомъ сотвори́хъ? Не суди́те на лице́, человѣ́цы!

Инъ.

Ирмо́съ: Услы́шахъ, Бо́же, слу́хъ Тво́й и убоя́хся, разумѣ́хъ дѣла́ Твоя́ и ужасо́хся, Го́споди, я́ко Твоего́ хвале́нія испо́лнь земля́.

Небеса́ да веселя́тся, да пра́зднуетъ тва́рь вся́: воста́ Госпо́дь и яви́ся всѣ́мъ прему́дрымъ апо́столомъ Свои́мъ.

Поже́рта бы́сть, сме́рте, твоя́ си́ла: Христу́ уме́ршу, ме́ртвіи, я́ко отъ черто́говъ, воста́ніемъ Сего́ отъ гробо́въ изыдо́ша.

Что́ рыда́ете, о жены́? что́ съ мѵ́ры и́щете Безсме́ртнаго? Воста́, я́коже рече́! — мѵроно́сицамъ глаго́ла а́нгелъ.

Самаряны́ни, Го́споди, проси́вшей пода́лъ еси́ во́ду — вѣ́дѣніе держа́вы Твоея́, тѣ́мже во вѣ́ки не вжа́ждетъ, воспѣва́ющи Тя́.

Сла́ва, тро́иченъ: О, Тро́ице Пресу́щная, Отче, и Сло́ве, и Боже́ственный Ду́ше, Единоси́льне, Собезнача́льне! Спаси́ на́съ всѣ́хъ, вѣ́рою воспѣва́ющихъ Тя́.

И ны́нѣ, богоро́диченъ: Неопали́мую Купину́ Тя́ законоположи́тель зря́ше дре́вле; Даніи́лъ же го́ру святу́ю смотря́ше, еди́на Дѣ́во Ма́ти Влады́чице.

Пѣ́снь 5. Ирмо́съ: Го́споди Бо́же на́шъ, ми́ръ...

Чудесы́ украси́лъ еси́ апо́столы Твоя́, дивесы́ возвели́чилъ еси́ ученики́, во все́мъ мíрѣ просла́вивъ, Спа́се на́шъ, и да́въ и́мъ Ца́рствіе Твое́.

Вся́ просвѣти́ша земли́ концы́ ученицы́: чудесы́, и уче́ньми, и разли́чными о́бразы сло́во проповѣ́давше, Христе́ Спа́се, Ца́рствія Твоего́.

Хвалу́ возсыла́емъ Ца́рствію Твоему́, пѣ́ніе же Тебѣ́ прино́симъ, на́съ ра́ди на земли́ Яви́вшемуся, и мíръ Просвѣти́вшему, и Ада́ма Воззва́вшему.

Богоро́диченъ: Бы́сть чре́во Твое́ свята́я трапе́за, иму́щая Небе́сный Хлѣ́бъ, отъ Него́же вся́къ яды́й не умира́етъ, я́коже рече́ всѣ́хъ, Богороди́тельнице, Пита́тель.

Инъ.

Ирмо́съ: Возсія́й ми́, Го́споди, свѣ́тъ повелѣ́ній Твои́хъ, я́ко къ Тебѣ́ ду́хъ мо́й у́тренюетъ и пое́тъ Тя́: Ты́ бо еси́ Бо́гъ на́шъ, и къ Тебѣ́ прибѣга́ю, Царю́ ми́ра.

Гро́бъ Тво́й святы́й дости́гше ура́нше мѵроно́сицы, блиста́ющася ви́дѣша ю́ношу и ужасо́шася, Твоему́ научи́вшеся воста́нію, Христе́.

Сме́рть умертви́ся, а́дъ плѣни́ся, су́щіи во у́захъ свободи́шася Христо́вымъ Воскресе́ніемъ: возра́дуимся и рука́ми воспле́щимъ, пра́зднующе свѣ́тло.

Апо́столи, взыгра́йте, и а́нгели, лику́йте, земноро́дніи вси́, возра́дуйтеся: Госпо́дь воскре́се, тля́ испрове́ржеся, и печа́ль преста́, и ликовству́етъ Ада́мъ.

Исто́чникъ сы́й, Го́споди, жи́зни, во́ду оставле́нія и разумѣ́нія дарова́лъ еси́ женѣ́, проси́вшей дре́вле, самаряны́нѣ. Тѣ́мже воспѣва́емъ неизрече́нныя щедро́ты Твоя́.

Сла́ва, тро́иченъ: Еди́ницу Тріѵпоста́сную, Тро́ицу Единосу́щную, Отца́, Сло́ва, и Ду́ха Свята́го, нераздѣ́льна Естество́мъ Бо́га Еди́наго почита́емъ, Творца́ и Го́спода и Влады́ку всѣ́хъ.

И ны́нѣ, богоро́диченъ: Тя́, две́рь непроходи́мую, и село́ невоздѣ́ланное, и ковче́гъ, Ма́нну нося́щій, и ру́чку, и свѣ́щникъ, и кади́льницу Невеще́ственнаго Угля, имену́емъ, Чи́стая.

Пѣ́снь 6. Ирмо́съ: Яко во́ды морскíя...

Вся́ содержа́й концы́, возше́лъ еси́, Іису́се, и учи́лъ еси́ во святи́лищи наро́ды сло́ву и́стины, пра́зднику преполовля́ющуся, я́коже Іоа́ннъ вопіе́тъ.

Дѣ́ло Отчее соверши́лъ еси́, дѣ́лы увѣ́рилъ еси́ словеса́ Твоя́, исцѣле́нія соверша́я, Спа́се, и зна́менія: разсла́бленнаго исправля́я, прокаже́нныя очища́я и ме́ртвыя воскреша́я.

Безнача́льный Сы́нъ нача́ло бы́сть, пріе́мъ е́же по на́мъ, вочеловѣ́чися, и посредѣ́ пра́здника уча́ше, глаго́ля: притецы́те ко Исто́чнику Приснотеку́щему, Жи́знь почерпи́те.

Богоро́диченъ: Дѣ́ву по рождествѣ́ пое́мъ Тя́, Дѣ́ву и Ма́терь сла́вимъ Тебе́ еди́ну, Чи́стая Богоневѣ́сто Отрокови́це: изъ Тебе́ бо вои́стинну Бо́гъ воплоти́ся, обнови́въ на́съ.

Инъ.

Ирмо́съ: Да не погрузи́тъ мене́ бу́ря водна́я, ниже́ пожре́тъ мене́ глубина́, отве́рженъ бо е́смь во глубины́ се́рдца морска́го зо́лъ мои́хъ. Тѣ́мъ зову́, я́ко Іо́на: да взы́детъ отъ тли́ зо́лъ живо́тъ мо́й къ Тебѣ́, Бо́же.

На Крестѣ́ Тя́ беззако́нніи пригвозди́ша и копіе́мъ прободо́ша, Христе́, и Іо́сифъ благообра́зный Тя́ погребе́ въ но́вомъ гро́бѣ, изъ него́же со сла́вою воскре́съ, совоскреси́лъ еси́, Спа́се, всю́ тва́рь, пою́щую держа́ву Твою́.

Вереи́ и врата́, Влады́ко, си́льно сокруши́лъ еси́ а́довы, и воскре́слъ еси́, я́ко Бо́гъ, и срѣ́тъ, — ра́дуйтеся! — ре́клъ еси́ жена́мъ, и си́хъ рещи́ посла́лъ еси́ ученико́мъ: воста́ Живо́тъ, и ви́дѣнъ бы́сть, Просвѣща́яй концы́.

Что́ пла́чете? что́ но́сите, я́ко сме́ртному, жены́, мѵ́ра? Воста́ Христо́съ! — вопія́ше дре́вле блиста́яйся вельми́, явле́йся ю́ноша, — тщи́ плащани́цы оста́вивъ, ше́дше возвѣсти́те друго́мъ Его́ воста́ніе.

Струя́ сы́й, Го́споди, жи́зни незави́стная, и бе́здна ми́лости, Бла́же, путеше́ствовавъ, сѣди́ши бли́зъ кла́дязя кля́твеннаго, и самаряны́ни вопія́лъ еси́: да́ждь Ми́ во́ду пи́ти, я́ко да пріи́меши оставле́нія во́ды!

Сла́ва, тро́иченъ: Пою́ Отца́ Безнача́льна, и Сы́на Сопресто́льна, и Ду́ха Единосу́щна вѣ́рно, еди́но Существо́, и Естество́, и сла́ву, и еди́но Ца́рство Бо́га всѣ́хъ и Творца́, Содержи́теля всего́, со безпло́тными си́лами.

И ны́нѣ, богоро́диченъ: Дѣ́ву еди́ну ро́ждшую, и утро́бу нетлѣ́нну соблю́дшу, пое́мъ Тя́, Чи́стая, престо́лъ Госпо́день, и две́рь, и го́ру, и мы́сленный свѣ́щникъ, черто́гъ всесвѣ́тлый Бо́жій, и сѣ́нь сла́вы я́вѣ, ковче́гъ же, и ру́чку, и трапе́зу.

Конда́къ, гла́съ 8. Подо́бенъ: Яко нача́тки.

Вѣ́рою прише́дшая на кла́дязь самаряны́ня, ви́дѣ Тя́, Прему́дрости Во́ду, е́юже напои́вшися оби́льно, Ца́рствіе вы́шнее наслѣ́дова вѣ́чно, я́ко присносла́вная.

Икосъ:

Чи́стая та́инства услы́шимъ, Іоа́нну на́съ уча́щу, въ Самарíи бы́вшая: ка́ко женѣ́ бесѣ́доваше Госпо́дь, во́ду проси́въ, Иже во́ды въ со́нмища и́хъ Собра́вый, Иже Отцу́ и Ду́ху Сопресто́льный: пріи́де бо, ища́й о́бразъ Сво́й, вѣ́чно я́ко Присносла́вный.

Синакса́рь мине́и. Та́же настоя́щій.

Стихи́: Во́ду прія́ти прише́дши тлѣ́нную, же́но,
                  Живу́ю почерпа́еши, е́юже скве́рны душе́вныя омыва́еши.

Въ то́йже де́нь, въ недѣ́лю пя́тую по Па́сцѣ, самаряны́ни пра́здникъ пра́зднуемъ, поне́же въ то́й Христо́съ Мессíю Себе́ я́вѣ исповѣ́доваше, е́же е́сть Христо́съ или́ Пома́занъ [«ме́са» бо у евре́й — еле́й], сего́ бо ра́ди мню́ и въ средопентико́стную седми́цу учине́нъ бы́сть. И я́ко въ пре́жде тоя́ у́бо недѣ́ли въ купѣ́ли чудодѣ́йствуетъ, въ се́й же надъ Іа́ковлимъ студенце́мъ, къ женѣ́ бесѣ́дуя Христо́съ, и́же студене́цъ са́мъ Іа́ковъ ископа́ и дарова́ Іо́сифу, сы́ну своему́: изря́дно бо бѣ́ мѣ́сто сіе́, идѣ́же и бли́зъ су́щу горы́ Сомо́ры, самаря́не населя́ху гра́ды мно́ги.

Въ Сиха́рь же прихо́дитъ Христо́съ, идѣ́же обита́вшу дре́вле Іа́кову съ Ди́ною, дще́рію свое́ю, и съ сы́нми. Сихе́мъ, сы́нъ Емо́ровъ, хорре́й, возжелѣ́ ея́, и наси́ливъ, бы́сть съ не́ю. И отту́ду бра́тія тоя́, раздражи́вшеся на ре́вность зѣло́, внеза́пу вше́дше въ гра́дъ, вку́пѣ вся́ убива́ютъ, и того́ Сихе́ма, и отца́ его́ Емо́ра. Обита́етъ у́бо та́мо Іа́ковъ, и настоя́щій студене́цъ ископа́.

Не самари́тяне же пре́жде обита́ху у тоя́ горы́, но исра́ильтяне, Бо́гу прирази́вшеся, Факе́ю ца́рствующу, пе́рвымъ плѣ́номъ и вторы́мъ, ассирíомъ прише́дшимъ подъ да́нь си́хъ подложи́ша. И пома́лѣ, Осíю ца́рствующу, прилага́ются къ еѳіо́пляномъ, е́же увѣ́дѣвъ Ассирíйскій ца́рь преселя́етъ я́ въ Вавило́нъ. На о́номъ же мѣ́стѣ разли́чнымъ язы́комъ жи́ти повелѣ́, но Бо́гъ львы́ на иноплеме́нники о́ныя пуща́етъ. Ца́рь же Ассирíйскій, па́ки увѣ́дѣвъ сіе́, свяще́нники отъ іуде́й тѣ́мъ посыла́етъ, (еще́ бо та́мо бя́ху плѣне́нніи,) я́ко да и Бо́жія зако́ны пріи́мутъ. И отъ и́долъ у́бо ско́ро отскочи́ша. Еди́ны же пя́теры кни́ги Моисе́овы прія́ша, отмета́ющеся Проро́къ и про́чаго Писа́нія. Сíи и самаря́не зово́ми бя́ху, я́ко отъ горы́ Сомо́ры, и ненави́дими бя́ху евре́йми, отъ плѣне́нія возвраща́ющимися, зане́ и́сполу іуде́йствоваху, и не ядя́ху съ ни́ми, ме́рзостны я́ непщу́юще. Тѣ́мже и Христа́ самаряни́на мно́гажды нарица́ху, я́ко нѣ́кая отъ зако́нныхъ у́бо презира́юща и разруша́юща, я́коже они́.

Прихо́дитъ у́бо въ Сиха́рь Госпо́дь, и труди́вся отъ путеше́ствія, сѣ́де о часѣ́ шесто́мъ дне́. Жена́ же нѣ́кая отъ гра́да пріи́де почерпсти́ воды́, ученико́мъ отше́дшимъ на ку́плю пи́щи. Про́ситъ у́бо воды́ Іису́съ. Она́ же не прикаса́тися предлага́етъ: позна́ бо Его́ и отъ гла́са, и отъ оде́жды. Онъ же возво́дитъ ю́, духо́вную во́ду принося́ на среду́, ю́же неоску́дную и чисти́тельную показу́етъ: Ду́хъ бо водѣ́ и огню́ при́сно уподобля́ется. Жена́ же неотсту́пно прилѣжа́щи, не имѣ́ти Оному во́ду такову́ю, за е́же почерпа́ла не носи́ти, и студенцу́ бы́ти глубоку́ приглаго́летъ. Та́же и на пра́отца Іа́кова возно́ситъ сло́во, я́ко са́мъ студене́цъ ископа́, и о́нъ, и о́вцы его́ отъ него́ пія́ху, бога́тое отсю́ду исто́чнику представля́ющи, и е́же и́нако благопотре́бну и студену́. Христо́съ у́бо не бо́льша Себе́ глаго́летъ Іа́кова, да не жену́ устраши́тъ, но о водѣ́ глаго́летъ, представля́я отсю́ду тоя́ предо́брое: «пія́й отъ воды́ о́ноя ника́коже вжа́ждетъ». Про́ситъ же воды́ жена́, Онъ же глаго́летъ своего́ е́й му́жа пригласи́ти, я́ко твердѣ́йшихъ слове́съ тре́бующи разумѣ́нія. Она́ же отри́чется не имѣ́ти му́жа. Вѣ́дый же вся́, глаго́летъ: «до́брѣ рекла́ еси́: пя́ть бо имѣ́ла еси́, я́коже зако́нъ повелѣва́етъ, и его́же ны́нѣ и́маши шеста́го, я́ко беззако́нно о́ному сбыва́ющая, нѣ́сть ти́ му́жъ».

Нѣ́цыи у́бо пя́ть муже́й — пя́ть кни́гъ Моисе́овыхъ непщева́ша бы́ти, я́же самаря́не пріе́мляху, шеста́го же — та́ словеса́ Христо́ва, я́же не бы́ша еще́ о́ная, и́бо не у́ благода́ть излія́на бѣ́. Друзíи же — да́нныя пя́ть зако́ны отъ Бо́га: и́же въ раи́, и по изгна́ніи, и́же при Но́и, и́же при Авраа́мѣ, и́же при Моисе́и. Шесты́й же — Ева́нгеліе, е́же и еще́ не имя́ше. Су́ть же и́же и пя́ть чу́вствій глаго́лютъ.

Отвѣщава́етъ Ему́ жена́, проро́ка Его́ имену́ющи. Та́же вопроша́етъ Его́ и о горѣ́, гдѣ́ подоба́етъ кла́нятися — въ Сомо́рѣ ли, или́ во Іерусали́мѣ? Не мня́ху бо самаря́не, я́ко соверше́нно вездѣ́ Бо́гу бы́ти, но та́мо пребыва́ти то́чію Бо́гу, идѣ́же и покланя́хуся, въ Гари́зѣ я́вѣ горѣ́, за е́же та́мо да́тися благослове́нію отъ Бо́га. Или́ зане́ та́мо пе́рвый Авраа́мъ же́ртвенникъ водрузи́ Бо́гу, я́коже іуде́и па́ки глаго́лаху: «во Іерусали́мѣ подоба́етъ покланя́тися еди́ному Бо́гу»; тѣ́мже и́же и отвсю́ду въ пра́здникъ та́мо собира́хуся. Христо́съ же отвѣщава́етъ, — «отъ іуде́й, — глаго́ля, — спасе́ніе мíрови». Оба́че рече́: «Бо́гъ невеще́ственный е́сть, и покланя́тися сподо́бльшіися, не въ же́ртвахъ уже́ покло́нятся, но въ ду́сѣ и и́стинѣ». Или́ и си́це Бо́га позна́ютъ, не еди́наго, но въ Ду́сѣ Свято́мъ и Сы́нѣ — То́й бо Истина. Жена́ па́ки глаго́летъ: «слы́шимъ отъ Писа́ній, я́ко Мессíя гряде́тъ, е́же е́сть Христо́съ». Іису́съ же глаго́летъ: «Азъ е́смь», благонра́віе жены́ разумѣ́въ. Вѣ́даша же самаря́не и о Мессíи отъ Моисе́йскихъ кни́гъ, изря́днее же отъ сего́: «е́же Проро́ка ва́мъ возста́витъ Госпо́дь Бо́гъ», и отъ ины́хъ мно́гихъ.

Сконча́вшейся же бесѣ́дѣ, и ученицы́ прихо́дятъ, и кра́йнему удивля́ются схожде́нію, ка́ко съ жено́ю глаго́лаше? Оба́че же моля́ху Его́ я́сти, ку́пно у́бо за е́же потруди́тися, и за вре́мене зно́йное. Онъ же о вѣ́чной пи́щи тѣ́мъ глаго́летъ, человѣ́ческаго я́вѣ спасе́нія, и я́ко подоба́етъ и́мъ проро́ческія труды́ пожа́ти.

Но женѣ́ во гра́дъ дости́гшей, и я́же о себѣ́ сказа́вшей, вси́ воздви́гшеся и ко Христу́ прихо́дятъ, вѣ́ровавше: я́ко не бы́ жена́ себе́ порекла́, а́ще не бы́ вели́ко что́ разумѣ́ла. И мольбу́ излія́вше, Тому́ пребы́ти у ни́хъ во дню́ двою́, умоля́ютъ Его́. И пребы́въ, мно́жайша содѣ́я чудеса́, я́же у́бо отъ мно́жества во Ева́нгеліи не писа́шася.

Сія́ же е́сть самаряны́ня, послѣди́ отъ Христа́ Фоти́нія именова́нная, я́же и муче́нія венце́мъ увязе́ся при Неро́нѣ ке́сарѣ, и съ седмію́ свои́ми сы́ны, по мно́зѣ озлобле́ніи, и строга́ніи, и сосцу́ отрѣ́заніи, сокруше́ніи ру́къ, и тросте́й то́нкихъ подъ но́гти влага́ніи, и о́лова напое́ніи, и ины́хъ безчи́сленныхъ му́къ истяза́ніи, наконе́цъ отъ двою́ фи́нику привяза́ніи и расто́ргнутіи.

Вѣ́домо же бу́ди, я́ко студенца́ о́наго го́рлище, си́рѣчь у́стіе, ца́рь Іустиніа́нъ че́стнѣ отту́ду прине́съ, въ Бо́жія Сло́ва вели́комъ хра́мѣ святы́я Софíи положи́, но и ка́мень, на не́мже Христо́съ сѣдя́, самаряны́ни бесѣ́доваше. И досе́лѣ обоя́ пребыва́ютъ предъ па́пертомъ отъ восто́ка, въ хра́мъ входя́щимъ на лѣ́вой странѣ́, вся́къ неду́гъ исцѣля́юща, па́че же отъ огне́вицъ страда́ти приключа́ющимся и тряса́вицею боля́щимъ, очища́ютъ же и отго́нятъ и чарова́нія быва́емая.

Твоея́ му́ченицы Фоти́ніи моли́твами, Христе́ Бо́же, поми́луй на́съ. Ами́нь.

Пѣ́снь 7. Ирмо́съ: Халде́йская пе́щь...

Пло́тски потруди́лся еси́, Упокое́ніе всѣ́хъ, во́лею вжада́лся еси́, Исто́чниче чуде́съ, воды́ проси́лъ еси́, во́ду жи́зни, Іису́се, возвѣща́яй.

Самаряны́ни, Го́споди, женѣ́ бесѣ́довалъ еси́, облича́я безу́міе беззако́нныхъ евре́евъ: она́ у́бо вѣ́рова Сы́на Тя́ бы́ти Бо́жія, сíи же отверго́шася.

Хлѣ́бъ яду́ще Пло́ти Госпо́дни, и Кро́вь пріе́млюще ребра́ Влады́чня, обновле́ніемъ Ду́ха да жи́тельствуимъ, живу́ще благода́тію.

Богоро́диченъ: Во чре́вѣ Твое́мъ вмѣсти́ла еси́ Невмѣсти́мое Сло́во, отъ Твои́хъ сосе́цъ дои́ла еси́ мíру Пита́теля, на объя́тіи носи́ла еси́ Творца́ на́шего, Богороди́тельнице Чи́стая.

Инъ.

Ирмо́съ: Не преда́ждь на́съ до конца́ и́мене Твоего́ ра́ди, и не разори́ завѣ́та Твоего́, и не отста́ви ми́лости Твоея́ отъ на́съ, Го́споди Бо́же оте́цъ на́шихъ, Препѣ́тый во вѣ́ки.

Со беззако́нными, Христе́ Ще́дре, во́лею вмѣни́лся еси́ во вре́мя боже́ственныя Стра́сти, и сія́ ви́дящи, колеба́шеся земля́, и ка́меніе вседѣ́тельнымъ манове́ніемъ распада́шеся, Непостижи́ме, и воста́ша ме́ртвіи, и́же отъ вѣ́ка.

Съ душе́ю сше́дъ во страны́ преиспо́днія а́да, возве́лъ еси́ му́жествомъ свя́занныя вся́, я́же отъ вѣ́ка сме́рть прія́тъ, го́рькій мучи́тель, вопію́щія Тебѣ́: Іису́се Бо́же, сла́ва Твоему́ стра́шному смотре́нію!

Съ ме́ртвыми что́ вы́ и́щете Живу́щаго во вѣ́ки? Воста́, я́коже рече́; се́, я́коже ви́дите, пра́здны плащани́цы, истоще́нъ гро́бъ, — явле́йся глаго́лаше мѵроно́сицамъ ю́ноша, — ско́ро ше́дше, рцы́те апо́столомъ.

Вода́ еси́ жи́зни, — вопія́ше Христу́ самаряны́ня, — напо́й мя́ у́бо, Сло́ве, жа́ждущую всегда́ Твоея́ Боже́ственныя благода́ти, я́ко да не ктому́, Іису́се Го́споди, невѣ́дѣнія содержу́ся зно́емъ, но проповѣ́дую Твоя́ вели́чія.

Сла́ва, тро́иченъ: Отца́, и Сы́на, и Боже́ственнаго воспѣва́емъ Ду́ха, Нераздѣ́льную Тро́ицу Естество́мъ су́щую, раздѣле́нну Ли́цы, еди́но Существо́, сра́сленное, безнача́льное, Творца́ всѣ́хъ и Бо́га, Его́же вси́ небе́сніи пою́тъ чи́нове.

И ны́нѣ, богоро́диченъ: По рождествѣ́ стра́шнѣмъ Дѣ́ва чиста́ сохрани́лася еси́, Свята́я Богоро́дице, тѣ́мже Тя́ вси́ а́нгельстіи ли́цы и человѣ́честіи ро́ди вси́, немо́лчными воспѣва́ютъ гла́сы, вмѣсти́лище чи́стое Невмѣсти́маго.

Пѣ́снь 8. Ирмо́съ: Ангели и небеса́, на Престо́лѣ...

Пріиди́те, ви́дите, лю́діе, на Престо́лѣ сла́вы Воспѣва́емаго, отъ люде́й беззако́нныхъ Ху́лимаго, и, ви́дяще, по́йте въ проро́цѣхъ Мессíю Предрече́ннаго.

Ты́ еси́ вои́стинну Христо́съ, въ мíръ се́й прише́дый, изъ Него́же спасе́ніе и оставле́ніе оте́ческихъ согрѣше́ній, Ты́ еси́ вои́стинну Живо́тъ въ Тя́ вѣ́ровавшимъ.

Прему́дрость Бо́жія, преполови́вшуся пра́зднику, я́коже пи́сано е́сть, во святи́лищи предста́ и уча́ше, я́ко вои́стинну Се́й бя́ше Мессíя-Христо́съ, Имже спасе́ніе.

Богоро́диченъ: Ка́ко родила́ еси́, рцы́, отъ Отца́ безлѣ́тно просія́вшаго и со Святы́мъ Ду́хомъ воспѣва́емаго? Или́ я́ко вѣ́сть еди́нъ Благоволи́вый изъ Тебе́ роди́тися, Богоро́дице.

Инъ.

Ирмо́съ: Вся́ческая, Влады́ко, прему́дростію Твое́ю соста́вилъ еси́, земли́ же па́ки утверди́лъ еси́, я́коже вѣ́си, дно́, основа́ніемъ водрузи́вый на вода́хъ безмѣ́рныхъ. Тѣ́мъ вси́ вопіе́мъ, воспѣва́юще: благослови́те, дѣла́ Госпо́дня, непреста́нно Го́спода.

Сме́рть претерпѣ́лъ еси́, еди́не Безсме́ртне, во́лею, а́да плѣни́лъ еси́, врата́ ме́дная сте́рлъ еси́, Царю́ Небе́сный, и отъя́лъ еси́ у́зники отъ вѣ́ка та́мо су́щія, воспѣва́ющія держа́ву непреста́нно Твоея́ бла́гости.

Возне́слся еси́, Долготерпѣли́ве, во́лею на Дре́во, и ка́меніе распаде́ся, и со́лнце угасе́, и завѣ́са церко́вная раздра́ся, и земля́ поколеба́ся, и потрепета́ всепосмѣя́нный а́дъ, и вся́ у́зники разрѣши́.

Яви́лся еси́, Го́споди, во тмѣ́ сѣдя́щимъ, Свѣ́тъ сы́й Незаходи́мый и Живо́тъ всѣ́хъ. Тѣ́мже Тя́ я́ко ви́дѣ пра́ведныхъ со́нмъ, взыгра́ся, Сло́ве, и возопи́: прише́лъ еси́ вся́ отъ у́зъ разрѣши́ти, пою́щія держа́ву Твою́.

Бли́зъ сѣ́лъ еси́ исто́чника въ ча́съ, Спа́се, шесты́й, и самаряны́ни во́ду живу́ю по́далъ еси́, и ра́зума воды́ за мно́гое благоутро́біе. Съ не́юже вси́ вопіе́мъ, воспѣва́юще: благослови́те, дѣла́ Госпо́дня, непреста́нно Го́спода.

Благослови́мъ Отца́, и Сы́на, и Свята́го Ду́ха, Го́спода.

Тро́иченъ: Отца́ Безнача́льна, Сы́на Собезнача́льна пое́мъ, и Ду́ха Свята́го, Бо́га Еди́наго Тро́е, неслія́нна, непресѣко́ма, Содѣ́теля всѣ́хъ, единоси́льную держа́ву, самовла́стную, и вопіе́мъ: благослови́те, дѣла́ Госпо́дня, непреста́нно Го́спода.

И ны́нѣ, богоро́диченъ: Углемъ очища́ется Иса́ія, предпроповѣ́дуя мы́сленнаго Угля, воплоща́ема, Дѣ́во, изъ Тебе́ па́че мы́сли, опаля́юща человѣ́ковъ вся́ ве́щныя грѣхи́, и обожа́юща за милосе́рдіе естество́ на́ше, Всенепоро́чная.

Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].
И катава́сія. Честнѣ́йшую... не стихосло́вится.

Пѣ́снь 9. Ирмо́съ: Чу́жде ма́теремъ...

Пра́зднику преполовля́ющуся іуде́йскому, возше́лъ еси́, Спа́се мо́й, во святи́лище Твое́ и науча́лъ еси́ всѣ́хъ; чудя́хуся же іуде́е, — и отку́ду Се́й вѣ́сть пи́смена не научи́вся? — глаго́лаху.

Исцѣле́нія дарова́ній Изба́витель мо́й источа́я, сотворя́ше чудеса́ и зна́менія, прогоня́ неду́ги, цѣля́ немощству́ющія; но іуде́и неи́стовствовахуся мно́жествомъ чуде́съ Его́.

Пло́тскій іуде́й по пло́ти разумѣва́яй, помышля́яй пи́саная, Пи́саніемъ претыка́ется, проти́ву па́даетъ же па́ки Ду́хомъ и́стины; мы́ же, сіе́ отри́нувше, му́дрствуимъ ду́ховная.

Богоро́диченъ: Вмѣсти́ла еси́ во чре́вѣ Твое́мъ, Дѣ́во Ма́ти, Еди́наго отъ Тро́ицы Христа́ Жизнода́вца, Его́же пое́тъ вся́ тва́рь и трепе́щутъ го́рніи престо́ли. Того́ моли́, Всеблаже́нная, спасти́ ду́ши на́ша.

Инъ.

Ирмо́съ: Сотвори́ держа́ву мы́шцею Свое́ю, низложи́ бо си́льныя со престо́лъ и вознесе́ смире́нныя Бо́гъ Изра́илевъ, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Се́ ви́дѣнъ бы́сть Живо́тъ всѣ́хъ — Христо́съ, повѣ́шенъ во́лею на Дре́вѣ; и сія́ ви́дящи, земля́ потрясе́ся, и мно́га святы́хъ воста́ша я́вѣ тѣлеса́ усо́пшихъ, и узохрани́льница а́дова поколеба́ся.

Красе́нъ изъ гро́ба, я́ко Жени́хъ отъ черто́га, изше́лъ еси́, сме́рти разори́вый мучи́тельство, Христе́, и а́довы вереи́ сокруши́вый си́лою Боже́ственною, и воста́нія Твоего́ свѣ́томъ у́мнымъ просвѣти́вый мíръ.

Поста́вимъ вси́ ны́нѣ ли́ки духо́вныя и да зове́мъ: Госпо́дь воскре́се! Да ра́дуется земля́, да весели́тся не́бо, о́блацы да кропя́тъ на́мъ пра́вды ту́чи, пра́зднующимъ свѣ́тло и Христа́ пою́щимъ.

Жи́знь живу́щихъ, Исто́чникъ благи́хъ — Госпо́дь, бога́тно источа́яй во́ду уче́ній, вопіе́тъ женѣ́: пода́ждь Ми́ во́ду пи́ти, я́ко да пода́мъ ти́ во́ду, грѣхо́въ твои́хъ исто́чники изсуша́ющую.

Сла́ва, тро́иченъ: Свѣ́тъ еди́нъ нераздѣ́льно, Трисо́лнечная Еди́ница, Безнача́льный Оте́цъ, Сы́нъ, и Ду́хъ, Божество́ еди́но, Жи́знь и всѣ́хъ Творе́цъ. Того́ воспои́мъ, вѣ́рніи, со безпло́тными, трисвяты́ми пѣ́сньми священносло́вяще.

И ны́нѣ, богоро́диченъ: Свѣ́ту бы́вши жили́ще, Чи́стая, озари́ зѣ́ницы души́ моея́, омраче́нныя мно́гими ко́зньми врага́, и ви́дѣти сподо́би я́сно отъ Тебе́ возсія́вшій Свѣ́тъ па́че мы́сли, чи́стымъ се́рдцемъ.

Ексапостила́рій воскре́сный: Пло́тію усну́въ...

Сла́ва, самаряны́ни. Подо́бенъ: Жены́.

Въ Самарíю прише́лъ еси́, Спа́се мо́й Всеси́льне, и женѣ́ бесѣ́довавъ, проси́лъ еси́ воды́ пи́ти, евре́емъ во́ды Источи́вый изъ ка́мене несѣко́маго, ю́же къ вѣ́рѣ совоспрія́лъ еси́, и ны́нѣ жи́зни наслажда́ется на небесѣ́хъ вѣ́чно.

И ны́нѣ, преполове́нію. Подо́бенъ:

Преполови́вшуся прише́лъ еси́ пра́зднику, Человеколю́бче, во святи́лище, и глаго́лалъ еси́: жа́жды испо́лненніи, ко Мнѣ́ пріиди́те и почерпи́те во́ду живу́ю и пита́ющую: еюже пи́щи и благода́ти, жи́зни же безсме́ртныя наслади́теся вси́.

На хвали́техъ: Вся́кое дыха́ніе... поста́вимъ стихо́въ 8 и пое́мъ настоя́щія стихи́ры воскре́сны, гла́съ 4:

Кре́стъ претерпѣ́вый и сме́рть, и воскресы́й изъ ме́ртвыхъ, Всеси́льне Го́споди, сла́вимъ Твое́ Воскресе́ніе.

Кресто́мъ Твои́мъ, Христе́, отъ дре́внія кля́твы свободи́лъ еси́ на́съ, и сме́ртію Твое́ю естество́ на́ше му́чащаго діа́вола упраздни́лъ еси́, воста́ніемъ же Твои́мъ ра́дости вся́ испо́лнилъ еси́. Тѣ́мже вопіе́мъ Ти́: воскресы́й изъ ме́ртвыхъ, Го́споди, сла́ва Тебѣ́!

Твои́мъ Кресто́мъ, Христе́ Спа́се, наста́ви на́съ на и́стину Твою́ и изба́ви на́съ отъ сѣ́тей вра́жіихъ, Воскресы́й изъ ме́ртвыхъ, возста́ви ны́, па́дшіяся грѣхо́мъ, просте́ръ ру́ку Твою́, Человѣколю́бче Го́споди, моли́твами святы́хъ Твои́хъ.

Оте́ческихъ Твои́хъ нѣ́дръ не разлучи́вся, Единоро́дный Сло́ве Бо́жій, прише́лъ еси́ на зе́млю за человѣколю́біе, Человѣ́къ бы́въ непрело́женъ, и Кре́стъ, и сме́рть претерпѣ́лъ еси́ пло́тію, безстра́стный Божество́мъ; воскре́съ же изъ ме́ртвыхъ, безсме́ртіе по́далъ еси́ ро́ду человѣ́ческому, я́ко еди́нъ Всеси́ленъ.

Ины стихи́ры анато́ліевы, гла́съ то́йже:

Сме́рть прія́лъ еси́ пло́тію, на́мъ безсме́ртіе хода́тайствуя, Спа́се, и во гро́бъ всели́лся еси́, да на́съ отъ а́да свободи́ши, воскреси́въ съ Собо́ю: пострада́ у́бо, я́ко Человѣ́къ, но воскре́съ, я́ко Бо́гъ. Сего́ ра́ди вопіе́мъ: сла́ва Тебѣ́, Жизнода́вче Го́споди, еди́не Человѣколю́бче!

Ка́меніе распаде́ся, Спа́се, егда́ на Ло́бнѣмъ Кре́стъ Тво́й водрузи́ся, устраши́шася а́довы вра́таріе, егда́ во гро́бѣ, я́ко ме́ртвъ, положе́нъ бы́лъ еси́: и́бо сме́рти упраздни́вый крѣ́пость, ме́ртвымъ всѣ́мъ безсме́ртіе по́далъ еси́ Воскресе́ніемъ Твои́мъ, Спа́се. Жизнода́вче Го́споди, сла́ва Тебѣ́!

Ины самогла́сны самаряны́ни, гла́съ 3:

Сти́хъ: Наляцы́, и успѣва́й, и ца́рствуй, и́стины ра́ди, и кро́тости, и пра́вды.

Да ра́дуется дне́сь свѣ́тло не́бо и земля́, я́ко Христо́съ яви́ся воплоща́емь, я́ко Человѣ́къ, да Ада́ма и́зметъ отъ кля́твы всеро́дна, и удивля́ется чудесы́ въ Самарíю прише́дъ, женѣ́ же бесѣ́доваше, воды́ прося́, Иже о́блаки вода́ми Одѣва́яй. Тѣ́мже, вси́ вѣ́рніи, поклони́мся, на́съ ра́ди во́лею Обнища́вшему благоутро́бнымъ Совѣ́томъ.

Гла́съ 6:

Сти́хъ: Возлюби́лъ еси́ пра́вду и возненави́дѣлъ еси́ беззако́ніе.

Та́ко глаго́летъ Госпо́дь самаряны́ни: а́ще бы еси́ вѣ́дала да́ръ Бо́жій, и Кто́ е́сть глаго́ляй тебѣ́, да́ждь Ми́ воды́ пи́ти, ты́ бы проси́ла у Него́, и да́лъ бы ти́ пи́ти, да не вжа́ждешися во вѣ́ки, — глаго́летъ Госпо́дь.

Сла́ва, гла́съ то́йже:

Исто́чникъ живонача́лія — Іису́съ Спа́съ на́шъ, ко исто́чнику прише́дъ патріа́рха Іа́кова, пи́ти проша́ше воды́ отъ жены́ самаряны́ни. Се́й же непріобщи́тельное іуде́омъ прире́кшей, му́дрый Зижди́тель приво́дитъ ю́ сла́дкими глаго́лы, па́че къ проше́нію присносу́щныя воды́, ю́же и пріи́мши, всѣ́мъ проповѣ́да, реку́щи: пріиди́те, ви́дите сокрове́нныхъ Ви́дца и Бо́га, прише́дшаго пло́тію, за е́же спасти́ человѣ́ка.

И ны́нѣ: Преблагослове́нна еси́... Славосло́віе вели́кое. И отпу́стъ.

Сла́ва, и ны́нѣ, стихи́ра ева́нгельская, гла́съ 7:

Се́ тма́ и ра́но, и что́ у гро́ба, Марíе, стои́ши, мно́гую тму́ имѣ́ющи въ ра́зумѣ, въ не́йже, — гдѣ́ положе́нъ бы́сть, — вопроша́еши, — Іису́съ? — Но ви́ждь сри́щущася ученики́, ка́ко плащани́цами и сударе́мъ Воскресе́ніе обрѣто́ша, и помяну́ша я́же о си́хъ Писа́нія. Съ ни́миже и и́миже и мы́, вѣ́ровавше, воспѣва́емъ Тя́, Жизнода́вца Христа́.

И поуче́ніе Студи́тово, и ча́съ 1-й. И коне́чный отпу́стъ.




НА ЛИТУРГІИ,
Изобрази́тельна. Блаже́нна гла́са, гла́съ 4:

Дре́вомъ Ада́мъ рая́ бы́сть изселе́нъ, дре́вомъ же Кре́стнымъ разбо́йникъ въ ра́й всели́ся: овъ у́бо вку́шъ, за́повѣдь отве́рже Сотво́ршаго; о́въ же сраспина́емь, Бо́га исповѣ́да тая́щагося, — помяни́ мя́, — вопія́, — во Ца́рствіи Твое́мъ!

Распны́йся и воскресы́й, я́ко Си́ленъ, изъ гро́ба тридне́венъ, и первозда́ннаго Ада́ма воскреси́вый, еди́не Безсме́ртне, и мене́ на покая́ніе обрати́тися, Го́споди, сподо́би отъ всего́ се́рдца моего́ и те́плою вѣ́рою при́сно взыва́ти Ти́: помяни́ мя́, Спа́се, во Ца́рствіи Твое́мъ!

Вои́стинну воскре́се Христо́съ, и свидѣ́тельствуетъ гро́бъ, къ ва́мъ, законопресту́пницы, и́бо гро́бная Своя́ оста́вль, воскре́се тридне́вно. Ка́мень запеча́тася, и предъ гро́бомъ стра́жіе предстоя́ху, а́дъ плѣни́ся, сме́рть умертви́ся, не укра́денъ бы́сть Христо́съ. Вѣ́руйте съ на́ми Воскресе́нію!

Воскре́сшаго изъ ме́ртвыхъ, и а́дову держа́ву Плѣни́вшаго, и Ви́дима жена́ми мѵроно́сицами, — ра́дуйтеся! — Глаго́лющаго, вѣ́рніи, умо́лимъ отъ истлѣ́нія изба́вити ду́ши на́ша, зову́ще всегда́ разбо́йника благоразу́мнаго гла́сомъ къ Нему́: помяни́ и на́съ во Ца́рствіи Твое́мъ!

И отъ кано́на самаряны́ни пѣ́снь 3-я и пра́здника [преполове́нія] пѣ́снь 6-я. По вхо́дѣ: Тропа́рь воскре́сенъ и пра́здника преполове́нія. Сла́ва: конда́къ самаряны́ни. И ны́нѣ: преполове́нія. Проки́менъ, гла́съ 3: По́йте Бо́гу на́шему, по́йте,* по́йте Царе́ви на́шему, по́йте. Сти́хъ: Вси́ язы́цы, восплещи́те рука́ми, воскли́кните Бо́гу гла́сомъ ра́дованія. Апо́столъ въ Дѣя́ніихъ, зача́ло 28: Разсѣ́явшіися апо́столи... Аллилу́ія, гла́съ 4: Наляцы́, и успѣва́й, и ца́рствуй, и́стины ра́ди и кро́тости, и пра́вды. Сти́хъ: Возлюби́лъ еси́ пра́вду и возненави́дѣлъ еси́ беззако́ніе. Ева́нгеліе отъ Іоа́нна, зача́ло 12: Пріи́де Іису́съ во гра́дъ Самарíйскій... Вмѣ́сто Досто́йно.., пое́мъ ирмо́съ: Свѣти́ся, свѣти́ся... Прича́стенъ: Тѣ́ло Христо́во... Другíй: Хвали́те Го́спода съ небе́съ... Слу́жба свята́го мине́и пое́тся на повече́ріи.

[Зри́:] Подоба́етъ вѣ́дати, я́ко слу́жба самаряны́ни пое́тся 4 дни́: въ недѣ́лю, въ четверто́къ, въ пято́къ и въ суббо́ту. Въ понедѣ́льникъ у́бо и во вто́рникъ пое́тся слу́жба преполове́нію и въ сре́ду отдае́тся [пое́мъ я́коже и на са́мый пра́здникъ, кромѣ́ вхо́да и чте́ній].

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 102 – 114.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.