Церковный календарь
Новости


2017-08-19 / russportal
"Проповѣдн. хрестоматія". Поученіе (6-е) на Преображеніе Господне (1965)
2017-08-19 / russportal
"Проповѣдн. хрестоматія". Поученіе (5-е) на Преображеніе Господне (1965)
2017-08-19 / russportal
Митр. Анастасій (Грибановскій). Плачъ Русскаго народа (1924)
2017-08-19 / russportal
Митр. Анастасій. Похв. слово новымъ священномученикамъ Русской Церкви (1973)
2017-08-19 / russportal
Прот. Григорій Дьяченко. Поученіе (3-е) въ день Преображенія Господня (1900)
2017-08-19 / russportal
Прот. Григорій Дьяченко. Поученіе (2-е) въ день Преображенія Господня (1900)
2017-08-19 / russportal
Прот. Григорій Дьяченко. Поученіе (1-е) въ день Преображенія Господня (1900)
2017-08-18 / russportal
Митр. Арсеній (Москвинъ). Слово (3-е) въ день Преображенія Господня (1874)
2017-08-18 / russportal
П. Н. Красновъ. "Павлоны". Часть 2-я. Глава 14-я (1943)
2017-08-18 / russportal
П. Н. Красновъ. "Павлоны". Часть 2-я. Глава 13-я (1943)
2017-08-18 / russportal
Мон. Варвара (Суханова). О чудотв. созданіи церкви въ Кіево-Печерской обители (1963)
2017-08-18 / russportal
Архим. Серафимъ (Вербинъ). Ко дню 90-лѣтняго юбилея митр. Анастасія (1963)
2017-08-18 / russportal
"Проповѣдн. хрестоматія". Поученіе (4-е) на Преображеніе Господне (1965)
2017-08-18 / russportal
"Проповѣдн. хрестоматія". Поученіе (3-е) на Преображеніе Господне (1965)
2017-08-18 / russportal
Свщмч. Кипріанъ. Письмо (56-е) къ клиру и народу испанскому (1879)
2017-08-18 / russportal
Свщмч. Кипріанъ. Письмо (55-е) къ Стефану о Макріанѣ Арелатскомъ (1879)
Новости въ видѣ
RSS-канала: .
Сегодня - суббота, 19 августа 2017 г. Сейчасъ на порталѣ посѣтителей - 22.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ПОНЕДѢЛЬНИКЪ ПЯТЫЯ СЕДМИЦЫ ПО ПАСЦѢ.

ВЪ НЕДѢЛЮ САМАРЯНЫНИ ВЕЧЕРА,

На Го́споди воззва́хъ... поста́вимъ стихо́въ 6 и пое́мъ стихи́ры преполове́нію 3, гла́съ 5. Подо́бенъ: Ра́дуйся, по́стникомъ.

Яви́ся свѣтоявле́нное и кра́сное Спа́сова Воскресе́нія дне́сь преполове́ніе всесвято́е, я́ко полу́дне свѣ́тлое, уясня́ющее мíръ Боже́ственными благода́тьми Христо́ва Воста́нія, осіява́ющее чудеса́ нетлѣ́нія, облистава́етъ зна́менія и показу́етъ на высоту́ Вознесе́ніе, явля́етъ многорачи́тельное Ду́ха прише́ствіе — Пятьдеся́тницы всечестны́я свѣтлѣ́йшее торжество́. Тѣ́мже и подае́тъ душа́мъ на́шимъ ми́ръ и ве́лію ми́лость.

Яко Боже́ственныя сла́вы рѣка́, пра́зднику ны́нѣ преполови́вшуся, Госпо́дь струи́ благоутро́бія всѣ́мъ подава́яй, вопіе́тъ: жа́ждай да гряде́тъ ко Мнѣ́ и піе́тъ те́плѣ. Исто́чникъ бо сострада́нія и ми́лости Пучи́на Са́мъ сы́й, источа́етъ мíрови оставле́ніе, омыва́етъ прегрѣше́нія и очища́етъ неду́ги, спаса́етъ Воскресе́ніе Его́ пра́зднующихъ, покрыва́етъ любо́вію почита́ющихъ е́же со сла́вою Вознесе́ніе Его́ и подае́тъ душа́мъ на́шимъ ми́ръ и ве́лію ми́лость.

Посредѣ́ святи́лища ста́въ, Неопи́санный Бо́гъ же и Госпо́дь: Бо́гъ бо бя́ше естество́мъ, а́ще и на́съ ра́ди вочеловѣ́чився, опи́санъ яви́ся тѣ́ломъ, всѣ́мъ источа́ше живото́чныя глаго́лы, всѣ́мъ глаго́ля: ду́ши очи́стите и зно́я страсте́й охлади́те, да не ка́ко лиша́тся питія́ человѣ́цы; Боже́ственную бо благода́ть да́рую, безсме́ртнаго, и лу́чшаго, и вы́шняго Ца́рствія, сопричасти́тися Мнѣ́, Созда́телю, и просла́витися.

И мине́и 3.

Сла́ва, и ны́нѣ, гла́съ 8:

Преполови́вшуся пра́зднику, пре́жде Стра́сти и сла́внаго Воскресе́нія Твоего́, Го́споди, бы́лъ еси́ уча́, Бла́же, во святи́лищи непокори́выя іуде́и, и фарисе́и, и кни́жники, и вопія́ къ ни́мъ: жа́ждай да гряде́тъ ко Мнѣ́ и піе́тъ; вѣ́руяй въ Мя́, воды́ жи́зни Ду́ха Боже́ственнаго рѣ́ки потеку́тъ отъ чре́ва его́. О, неизрече́нныя прему́дрости Твоего́ хвале́нія! Иже вся́ исполня́яй, Бо́же на́шъ, сла́ва Тебѣ́!

На стихо́внѣ стихи́ры осмогла́сника, гла́съ 4:

Животворя́щему Твоему́ Кресту́ непреста́нно кла́няющеся, Христе́ Бо́же, тридне́вное Воскресе́ніе Твое́ сла́вимъ: тѣ́мъ бо обнови́лъ еси́ истлѣ́вшее человѣ́ческое естество́, Всеси́льне, и и́же на небеса́ восхо́дъ обнови́лъ еси́ на́мъ, я́ко еди́нъ Бла́гъ и Человѣколю́бецъ.

Сти́хъ: Къ Тебѣ́ возведо́хъ о́чи мо́и, [Живу́щему на небеси́. Се́ я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́].

Хотѣ́хъ слеза́ми омы́ти мои́хъ грѣхо́въ, Го́споди, рукописа́ніе, и про́чее живота́ моего́ покая́ніемъ благоугоди́ти Тебѣ́, но вра́гъ льсти́тъ мя́ и бо́ретъ ду́шу мою́. Го́споди, пре́жде да́же до конца́ не поги́бну, спаси́ мя́!

Сти́хъ: Поми́луй на́съ, Го́споди, поми́луй на́съ, [я́ко по мно́гу испо́лнихомся уничиже́нія, наипа́че напо́лнися душа́ на́ша поноше́нія гобзу́ющихъ и уничиже́нія го́рдыхъ].

Му́чениченъ: Прославля́яйся въ па́мятехъ святы́хъ Твои́хъ, Христе́ Бо́же, отъ ни́хъ умоле́нъ быва́я, низпосли́ на́мъ ве́лію ми́лость.

Сла́ва, и ны́нѣ, гла́съ 6:

Пра́зднику преполови́вшуся Твоего́, Христе́, Воскресе́нія и Боже́ственнаго прише́ствія Свята́го Твоего́ Ду́ха, соше́дшеся, чуде́съ Твои́хъ воспѣва́емъ та́инства, въ о́ньже низпосли́ на́мъ ве́лію ми́лость.

Тропа́рь пра́здника: Преполови́вшуся пра́зднику... И отпу́стъ.




ВЪ ПОНЕДѢЛЬНИКЪ 5-Я СЕДМИЦЫ ПО ПАСЦѢ, НА УТРЕНИ,

На Бо́гъ Госпо́дь: Тропа́рь пра́здника преполове́нія.

По 1-мъ стихосло́віи сѣда́ленъ, гла́съ 4:

Воззрѣ́вше на гро́бный вхо́дъ, и пла́мене а́нгельскаго не терпя́ще мѵроно́сицы, съ тре́петомъ дивля́хуся, глаго́люще: еда́ укра́деся Отве́рзый разбо́йнику ра́й? еда́ ли воста́ Иже и пре́жде стра́сти Проповѣ́давый воста́ніе? Вои́стинну воскре́се Христо́съ, сущи́мъ во а́дѣ подая́ живо́тъ и воскресе́ніе!

Сти́хъ: Го́споди, да не я́ростію Твое́ю обличи́ши мене́, [ниже́ гнѣ́вомъ Твои́мъ нака́жеши мене́].

Смире́нную ду́шу мою́ посѣти́, Го́споди, во грѣсѣ́хъ житіе́ все́ ижди́вшую и, я́коже блудни́цу, пріими́ мя́, Спа́се, и спаси́ мя́.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Му́чениченъ: Дне́сь а́нгельская во́инства въ па́мять страстоте́рпцевъ пріидо́ша, вѣ́рныхъ мы́сли просвѣти́ти и вселе́нную благода́тію уясни́ти, тѣ́ми, Бо́же, умоле́нъ быва́я, да́руй на́мъ ве́лію ми́лость.

Сла́ва и ны́нѣ, богоро́диченъ:

Стѣна́ непобори́мая на́мъ, христіа́номъ, еси́, Богоро́дице Дѣ́во: къ Тебѣ́ бо прибѣга́юще, невреди́ми пребыва́емъ и, па́ки согрѣша́юще, и́мамы Тя́ моли́твенницу. Тѣ́мъ, благодаря́ще, вопіе́мъ Ти́: ра́дуйся, Благода́тная, Госпо́дь съ Тобо́ю!

По 2-мъ стихосло́віи сѣда́ленъ, гла́съ 8. Подо́бенъ:

Прему́дрость, Сло́во Отчее, Иже и да́вый апо́столомъ глаго́лъ Бо́жій, проповѣ́дати конце́мъ е́же на зе́млю Его́ прише́ствіе, отъ преле́стниковъ евре́евъ неи́стовствомъ досажда́емь быва́ше, бѣсну́яйся и преле́стникъ гро́зно уничижа́емь, Иже незло́биво къ ни́мъ вопія́ше: не суди́те на Мя́ су́дъ, Несуди́маго, беззако́нніи. Къ Нему́ у́бо возопіи́мъ: Человѣколю́бче, Христе́ Бо́же, прегрѣше́ній оставле́ніе низпосли́ воспѣва́ющимъ вѣ́рою безприкла́дную сла́ву Твою́! [Два́жды.]

Воскресе́ніе Христо́во... Псало́мъ 50-й. Кано́нъ пра́здника [1-й Преполове́нія], со ирмосы́, на 8 и мине́и на 4. Конда́къ и свѣти́ленъ пра́здника.

На хвали́техъ поста́вимъ сти́хи 4 и пое́мъ стихи́ру воскре́сну, гла́съ 4:

Кре́стъ претерпѣ́вый и сме́рть, и воскресы́й изъ ме́ртвыхъ, Всеси́льне Го́споди, сла́вимъ Твое́ Воскресе́ніе. [Два́жды.]

Овча́ е́смь слове́снаго Твоего́ ста́да, и къ Тебѣ́ прибѣга́ю, Па́стырю До́брому: взыщи́ мене́ заблу́ждшаго, Бо́же, и поми́луй мя́.

Му́чениченъ: Кто́ не ужаса́ется зря́, святíи му́ченицы, по́двигъ до́брый, и́мже подвиза́стеся? Ка́ко въ тѣ́лѣ су́ще, безпло́тнаго врага́ побѣди́сте, Христа́ исповѣ́давше, и Кресто́мъ вооружи́вшеся? Тѣ́мже досто́йно яви́стеся бѣсо́мъ прогони́теліе и ва́рваромъ побѣди́теліе, непреста́нно моли́теся спасти́ся душа́мъ на́шимъ.

Сла́ва, и ны́нѣ, гла́съ 8:

Преполови́вшуся пра́зднику Па́схи, въ хра́мъ вше́лъ еси́ святи́лищный, Спа́се на́шъ, и ста́въ посредѣ́ наро́да, учи́лъ еси́ тѣ́хъ со дерзнове́ніемъ и глаго́лалъ еси́: Азъ е́смь Свѣ́тъ мíра; въ слѣ́дъ Мене́ иды́й не и́мать ходи́ти во тмѣ́, но имѣ́ти бу́детъ свѣ́тъ безсме́ртныя жи́зни.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Прекло́нь небеса́, сше́лъ еси́, Спа́се мо́й, и пло́ть отъ Дѣ́вы, кромѣ́ преложе́нія, прія́лъ еси́, источа́я мнѣ́ оставле́ніе.

Сти́хъ: Бо́гъ же Ца́рь на́шъ пре́жде вѣ́ка [содѣ́ла спасе́ніе посредѣ́ земли́].

Ве́сь въ Бо́зѣ, Сло́ве, Ты́ еси́, погиба́юща мя́ хотя́ изъя́ти отъ прегрѣше́ній, соединя́ешися мнѣ́, Человѣколю́бче.

Сти́хъ: Помяни́ со́нмъ Тво́й, его́же стяжа́лъ еси́ испе́рва.

Ты́ прише́лъ еси́, Царю́, Прему́дросте вели́кая, Имже Оте́цъ мíръ сотвори́ прему́дро, со Святы́мъ Ду́хомъ.

Сла́ва, и ны́нѣ, гла́съ 8:

Очи́стимъ помышле́ній сокро́вища, и душе́вная сія́нія просвѣти́мъ, и Жи́знь у́зримъ — Христа́, во святи́лище прише́дша премно́жествомъ бла́гости, да врага́ побѣди́тъ и спасе́тъ ро́дъ на́шъ Стра́стію Креста́ и Воскресе́нія. Къ Нему́же возопіи́мъ: Непостижи́ме Го́споди, сла́ва Тебѣ́!

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 114 – 116.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.