Церковный календарь
Новости


2017-11-24 / russportal
Слова преп. Симеона Новаго Богослова. Слово 40-е (1882)
2017-11-24 / russportal
Слова преп. Симеона Новаго Богослова. Слово 39-е (1882)
2017-11-24 / russportal
Ген. П. Н. Красновъ. Кубанцы въ Великой войнѣ (1930)
2017-11-24 / russportal
Ген. П. Н. Красновъ. Привѣтъ Россійской Военной Академіи (1932)
2017-11-23 / russportal
П. Н. Красновъ. "Старая Академія". Глава 14-я (1932)
2017-11-23 / russportal
П. Н. Красновъ. "Старая Академія". Глава 13-я (1932)
2017-11-23 / russportal
Архіеп. Аверкій. Существо Православія и соврем. борьба противъ него (1975)
2017-11-23 / russportal
Архіеп. Аверкій. Въ чемъ истинное Православіе и хранимъ ли мы его? (1975)
2017-11-23 / russportal
П. Н. Красновъ. "Старая Академія". Глава 12-я (1932)
2017-11-23 / russportal
П. Н. Красновъ. "Старая Академія". Глава 11-я (1932)
2017-11-23 / russportal
Слова преп. Симеона Новаго Богослова. Слово 38-е (1882)
2017-11-23 / russportal
Слова преп. Симеона Новаго Богослова. Слово 37-е (1882)
2017-11-22 / russportal
Ген. П. Н. Красновъ. "Старая Академія". Глава 10-я (1932)
2017-11-22 / russportal
Ген. П. Н. Красновъ. "Старая Академія". Главы 8-9 (1932)
2017-11-22 / russportal
Воззваніе Союза Русскаго Народа "Да здравствуетъ Самодержавіе!" (1907)
2017-11-22 / russportal
Воззваніе Союза Русскаго Народа "Къ честнымъ сынамъ Россіи" (1907)
Новости въ видѣ
RSS-канала: .
Сегодня - пятница, 24 ноября 2017 г. Сейчасъ на порталѣ посѣтителей - 15.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВО ВТОРНИКЪ ПЯТЫЯ СЕДМИЦЫ ПО ПАСЦѢ.

ВЪ ПОНЕДѢЛЬНИКЪ ВЕЧЕРА,

На Го́споди воззва́хъ... стихи́ры подо́бны, гла́съ 1. Подо́бенъ: Небе́сныхъ чино́въ.

Творе́цъ всѣ́хъ и жи́зни Пода́тель, Отцу́ Боже́ственному Соприсносу́щное Сло́во, во́лею отъ Дѣ́вы пло́ть пріи́мъ, бы́въ Человѣ́къ, неизрече́нныя прему́дрости, я́ко Бла́гъ, всѣ́мъ источи́ уче́нія.

Пра́зднику преполови́вшуся іуде́йскому, Христе́, во святи́лищи предста́лъ еси́, зако́ну Влады́ка, уча́ вла́стію и кни́жники облича́я, я́коже пи́сано е́сть, и устраша́я прему́дростію слове́съ Твои́хъ и чуде́съ показа́ньми.

Пода́тель прему́дрости и до́брыхъ Излія́тель, Излива́яй Боже́ственныя струи́ отъ Исто́чника Приснотеку́щаго, — пріиди́те ко Мнѣ́, — зове́тъ, — во́ду жи́зни жа́ждущіи почерпи́те, и рѣ́ки изъ чре́ва ва́шего, — глаго́летъ, — дарова́ній Боже́ственныхъ потеку́тъ.

Сла́ва, и ны́нѣ, гла́съ 2:

Егда́ прише́лъ еси́ во святи́лище, Христе́ Бо́же, преполови́вшуся пра́зднику, тогда́ лю́ди учи́лъ еси́, вопія́: вѣ́руяй въ Мя́, а́ще и у́мретъ, жи́въ бу́детъ. Іуде́е же распыха́хуся съ фарисе́и, и саддуке́и, и кни́жники, глаго́люще: кто́ е́сть Се́й, Иже глаго́летъ хулы́? Не помышля́юще, я́ко Ты́ еси́ пре́жде всѣ́хъ вѣ́къ, со Отце́мъ и Ду́хомъ сла́вимый, Бо́же на́шъ, сла́ва Тебѣ́!

На стихо́внѣ стихи́ры осмогла́сника, гла́съ 4:

Дре́ва преслуша́нія запреще́ніе разрѣши́лъ еси́, Спа́се, на Дре́вѣ Кре́стнѣмъ во́лею пригвозди́вся и, во а́дъ соше́дъ, Си́льне, сме́ртныя у́зы, я́ко Бо́гъ, растерза́лъ еси́. Тѣ́мже кла́няемся, е́же изъ ме́ртвыхъ, Твоему́ Воскресе́нію, ра́достію вопію́ще: Всеси́льне Го́споди, сла́ва Тебѣ́!

Сти́хъ: Къ Тебѣ́ возведо́хъ о́чи мо́и, [Живу́щему на небеси́. Се́ я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́].

Кто́ обурева́емый, и притека́яй ко приста́нищу сему́, не спаса́ется? Или́ кто́ болѣ́знуяй, и припа́даяй къ враче́бницѣ се́й, не исцѣлева́ется? Содѣ́телю всѣ́хъ и Врачу́ неду́гующихъ, Го́споди, пре́жде да́же до конца́ не поги́бну, спаси́ мя́.

Сти́хъ: Поми́луй на́съ, Го́споди, поми́луй на́съ, [я́ко по мно́гу испо́лнихомся уничиже́нія, наипа́че напо́лнися душа́ на́ша поноше́нія гобзу́ющихъ и уничиже́нія го́рдыхъ].

Святы́хъ му́ченикъ пріе́мый терпѣ́ніе, и отъ на́съ пріими́ пѣ́ніе, Человѣколю́бче, да́руяй на́мъ тѣ́хъ моли́твами ве́лію ми́лость.

Сла́ва, и ны́нѣ, гла́съ 3. Ге́рмана:

Преполови́вшуся пра́зднику, сла́вимъ посредѣ́ земли́ спасе́ніе Содѣ́лавша. Посредѣ́ бо двою́ разбо́йнику Живо́тъ на Дре́вѣ повѣ́шенъ бѣ́, и ху́лящему у́бо умолча́лъ, вѣ́рующему же возопи́лъ: дне́сь со Мно́ю бу́деши въ раи́! Сше́лъ еси́ во гро́бъ, плѣни́лъ еси́ а́дъ и воскре́слъ еси́ тридне́вно, спаса́я ду́ши на́ша.



ВО ВТОРНИКЪ НА УТРЕНИ,

По 1-мъ стихосло́віи сѣда́ленъ, гла́съ 4. Подо́бенъ: Удиви́ся Іо́сифъ.

Во́льною Твое́ю во́лею Кре́стъ претерпѣ́лъ еси́, Спа́се, и во гро́бѣ но́вѣ положи́ша Тя́ человѣ́цы сме́ртніи, сло́вомъ концы́ Соста́вльшаго. Тѣ́мже свя́занъ бы́сть чу́ждій, сме́рть лю́то плѣня́шеся, и су́щіи во а́дѣ вси́ взыва́ху живоно́сному воста́нію Твоему́: Христо́съ воскре́се, Жизнода́вецъ, Пребыва́яй во вѣ́ки.

Сти́хъ: Го́споди, да не я́ростію Твое́ю обличи́ши мене́, [ниже́ гнѣ́вомъ Твои́мъ нака́жеши мене́].

Помышля́й, душе́, ка́ко предста́немъ Судіи́? Поста́вятся престо́ли стра́шніи, и коего́ждо дѣя́нія облича́тся. Тогда́ Судія́ неумоли́мый, та́мо о́гнь лю́то предста́нетъ, я́коже свирѣ́пое мо́ре содержа́ и покрыва́яй концы́. Со всѣ́ми си́ми ви́ждь, душе́ моя́, стени́ пре́жде конца́.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Му́чениченъ: Иже во все́мъ мíрѣ му́ченикъ Твои́хъ, я́ко багряни́цею и ви́ссомъ, кровьми́ Це́рковь Твоя́ украси́вшися, тѣ́ми вопіе́тъ Ти́, Христе́ Бо́же: лю́демъ Твои́мъ щедро́ты Твоя́ низпосли́, ми́ръ жи́тельству Твоему́ да́руй, и душа́мъ на́шимъ ве́лію ми́лость.

Сла́ва, и ны́нѣ, богоро́диченъ:

Стра́шное та́инство и чу́до пресла́вное: ка́ко Дѣ́ва Тебе́, Зижди́теля всѣ́хъ, понесе́, и по рождествѣ́ па́ки цѣла́ и Дѣ́ва пребы́сть? Рожде́йся изъ Нея́, вѣ́ру утверди́, язы́ки укроти́ и мíръ умири́, я́ко Человѣколю́бецъ.

По 2-мъ стихосло́віи сѣда́ленъ, гла́съ 8. Подо́бенъ: Прему́дрости Сло́ва.

Прему́дрости во́ду и жи́зни, источа́я мíрови, всѣ́хъ, Спа́се, призыва́еши почерпсти́ спасе́нія во́ды: Боже́ственный бо зако́нъ Тво́й пріи́мъ человѣ́къ, въ себѣ́ угаша́етъ преле́стное у́гліе, отону́дуже во вѣ́ки не вжа́ждетъ, ни преста́нетъ насыще́нія Твоего́, Влады́ко Царю́ Пренебе́сный. Сего́ ра́ди сла́вимъ держа́ву Твою́, Христе́ Бо́же, прегрѣше́ній оставле́ніе прося́ще посла́ти бога́тно рабо́мъ Твои́мъ. [Два́жды.]

Воскресе́ніе Христо́во... Псало́мъ 50-й. Кано́нъ пра́здника [2-й Преполове́нія], со ирмосы́, на 8 и мине́и на 4. Конда́къ, и и́косъ, и ексапостила́рій пра́здника.

На хвали́техъ поста́вимъ стихи́ 4 и пое́мъ стихи́ры осмогла́сника, гла́съ 4:

Кресто́мъ Твои́мъ, Христе́, отъ дре́внія кля́твы свободи́лъ еси́ на́съ, и сме́ртію Твое́ю естество́ на́ше му́чащаго діа́вола упраздни́лъ еси́, воста́ніемъ же Твои́мъ ра́дости вся́ испо́лнилъ еси́. Тѣ́мже вопіе́мъ Ти́: воскресы́й изъ ме́ртвыхъ, Го́споди, сла́ва Тебѣ́! [Два́жды.]

Омы́й мя́ слеза́ми мои́ми, Спа́се, я́ко оскверни́хся во мно́гихъ грѣсѣхъ. Тѣ́мже и припа́даю Ти́, Ми́лостиве: согрѣши́хъ, поми́луй мя́, Бо́же.

Му́чениченъ: Ангеломъ соприча́стницы бы́сте, святíи му́ченицы, въ по́двизѣ Христа́ му́жески проповѣ́давше: вся́ бо, я́же въ мíрѣ, оста́висте кра́сная, я́ко не су́щая, вѣ́ру же, я́ко анки́ру, тве́рдую удержа́сте. Тѣ́мже и ле́сть отгна́вше, источа́ете вѣ́рнымъ исцѣле́ній дарова́нія, непреста́нно моля́щеся спасти́ся душа́мъ на́шимъ.

Сла́ва, и ны́нѣ, гла́съ 4:

Го́споди, пре́жде честна́го Твоего́ Креста́, пра́зднику преполови́вшуся, во святи́лище вше́лъ еси́, іуде́и со дерзнове́ніемъ уча́ Моисе́омъ и въ зако́нѣ Тобо́ю законоположе́ннымъ. Ужаса́ющеся же, Христе́, Твоея́ прему́дрости неизрече́нному та́инству, е́же на Тя́ ропта́нію въ себѣ́ за́вистію поуча́хуся: ка́ко Се́й вѣ́сть пи́смена, не учи́вся? Не вѣ́дуще Тебе́, Спа́са ду́шъ на́шихъ.

На стихо́внѣ стихи́ры подо́бны, гла́съ 2. Подо́бенъ: До́ме Евфра́ѳовъ.

Коне́цъ сы́й и нача́ло, преполове́ніе же, посредѣ́ пра́здника предста́лъ еси́ во святи́лищи, Христе́ мо́й, источа́я ми́ оставле́ніе.

Сти́хъ: Помяни́ со́нмъ Тво́й, его́же стяжа́лъ еси́ испе́рва.

Слы́ша Сіо́нъ Воскресе́нія Твоего́ Боже́ственную держа́ву, Сло́ве, и ра́дуется съ ча́ды, воспѣва́я Тя́, Благоутро́бнаго.

Сти́хъ: Бо́гъ же Ца́рь на́шъ пре́жде вѣ́ка [содѣ́ла спасе́ніе посредѣ́ земли́].

Свѣ́тъ отъ Отца́, возсія́въ Сло́во, но напослѣди́ лѣ́тъ яви́лся еси́, я́ко Человѣ́къ, подая́ мнѣ́ прегрѣше́ній оставле́ніе.

Сла́ва, и ны́нѣ, гла́съ 8:

Преполови́вшуся пра́зднику Па́схи, въ хра́мъ вше́лъ еси́ святи́лищный, Спа́се на́шъ, и ста́въ посредѣ́ наро́да, учи́лъ еси́ тѣ́хъ со дерзнове́ніемъ и глаго́лалъ еси́: Азъ е́смь Свѣ́тъ мíра; въ слѣ́дъ Мене́ иды́й не и́мать ходи́ти во тмѣ́, но имѣ́ти бу́детъ свѣ́тъ безсме́ртныя жи́зни.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 116 – 118.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.