Церковный календарь
Новости


2017-06-28 / russportal
Манифестъ о милостяхъ по случаю бракосоч. Имп. Николая Александровича (1894)
2017-06-28 / russportal
Манифестъ о бракосоч. Имп. Николая II съ Вел. Кн. Александрой Ѳеодоровной (1894)
2017-06-28 / russportal
Прав. Іоаннъ Кронштадтскій. «Новыя грозныя слова». Слово 22-е (1908)
2017-06-28 / russportal
Прав. Іоаннъ Кронштадтскій. «Новыя грозныя слова». Слово 21-е (1908)
2017-06-27 / russportal
П. Н. Красновъ. "Павлоны". Часть 1-я. Глава 12-я (1943)
2017-06-27 / russportal
П. Н. Красновъ. "Павлоны". Часть 1-я. Глава 11-я (1943)
2017-06-27 / russportal
"Книга Русской Скорби". Выпускъ 1-й: Вел. Кн. Сергій Александровичъ (1908)
2017-06-27 / russportal
"Книга Русской Скорби". Выпускъ 1-й: Государь Имп. Александръ II (1908)
2017-06-27 / russportal
Высочайшій Манифестъ о введеніи всеобщей воинской повинности (1874)
2017-06-27 / russportal
Высочайшій Манифестъ о прекращеніи Восточной (Крымской) войны (1856)
2017-06-27 / russportal
Преп. Ефремъ Сиринъ. На слова: "вонми себѣ", 12 главъ (1895)
2017-06-27 / russportal
Преп. Ефремъ Сиринъ. О добродѣтели, 10 главъ (1895)
2017-06-26 / russportal
Осн. Положенія о порядкѣ изд. законовъ, относ. до Имперіи со вкл. Вел. Кн. Финляндскаго (1899)
2017-06-26 / russportal
Манифестъ о порядкѣ изд. законовъ, относ. до Имперіи со вкл. Вел. Кн. Финляндскаго (1899)
2017-06-26 / russportal
Н. Д. Тальбергъ. "Исторія Русской Церкви". Сост. религ. образованія народа (1959)
2017-06-26 / russportal
Н. Д. Тальбергъ. "Исторія Русской Церкви". Императ. Палестинское общество (1959)
Новости въ видѣ
RSS-канала: .
Сегодня - четвергъ, 29 iюня 2017 г. Сейчасъ на порталѣ посѣтителей - 25.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ЧЕТВЕРТОКЪ ПЯТЫЯ СЕДМИЦЫ ПО ПАСЦѢ.

ВЪ СРЕДУ 5-Я СЕДМИЦЫ ПО ПАСЦѢ ВЕЧЕРА,

На Го́споди воззва́хъ... поста́вимъ стихо́въ 6 и пое́мъ стихи́ры о самаряны́нѣ, гла́съ 4. Подо́бенъ: Зва́нный свы́ше.

На кла́дязѣ Христо́съ самаряны́ню обрѣ́тъ, проси́ во́ду пи́ти отъ нея́, Жа́ждай сея́ исправле́нія и спасе́нія, е́же и уразумѣ́ся дѣ́лы исполня́емое. Сію́ бо, влеку́щую питіе́, питія́ Са́мъ извлека́етъ, и питія́ исполня́етъ живу́щаго, согражда́номъ возвѣща́ющую: се́ дре́вле въ зако́нѣ рече́нный Мессíя-Христо́съ яви́ся, я́ко Человѣ́къ, мы́слей сокрове́нныхъ открыва́я неизрече́нная.

Се́ Мессíя-Христо́съ, — су́щимъ во гра́дѣ, — на земли́ яви́ся, — самаряны́ня глаго́летъ, — напи́санный пріити́, Иже содѣ́янная мно́ю сказа́, и я́же во глубинѣ́ се́рдца моего́ сокрове́нная, вся́ мнѣ́ рече́, я́ко соверши́хъ. — Тѣ́мже гра́дъ сте́кшійся, ви́дитъ словеса́ ея́, по всему́ и́стинствующая, и ве́щи удивля́ется и увѣря́ется видѣ́нію.

Тебе́ въ шесты́й ча́съ, я́ко Влады́ку, иногда́ въ раи́ ходя́ща Бо́га, прама́терняя ви́дѣ дщи́ па́ки, въ ча́съ шесты́й та́ко сѣдя́ща, идѣ́же исто́чникъ воды́ и кладене́цъ ископа́ся, и отъ нея́ прося́ща пи́ти, я́ко да водо́ю сію́ напои́ши жи́зни нетлѣ́нія, е́же и содѣ́яся: Твоея́ бо живоно́сныя воды́ она́ изоби́льно напи́вшися, и во гра́дѣ проповѣ́да водно́е бога́тство.

И мине́и 3.

Сла́ва, и ны́нѣ, гла́съ 1:

На исто́чникъ прише́лъ еси́, Исто́чниче чуде́съ, въ шесты́й ча́съ, Евинъ улови́ти пло́дъ: Ева бо въ то́й изы́де изъ рая́ пре́лестію змíевою. Прибли́жибося самаряны́ня почерпсти́ во́ду, ю́же ви́дѣвъ, рече́ Спа́съ: да́ждь Ми́ во́ду пи́ти, и Азъ воды́ теку́щія насы́щу тя́. И во гра́дъ те́кши цѣлому́дренная, наро́домъ возвести́ а́біе: пріиди́те, ви́дите Христа́ Го́спода, Спа́са ду́шъ на́шихъ.

На стихо́внѣ стихи́ры осмогла́сника, гла́съ 4:

Врата́ а́дова сокруши́лъ еси́, Го́споди, и Твое́ю сме́ртію сме́ртное ца́рство разруши́лъ еси́, ро́дъ же человѣ́ческій отъ тлѣ́нія свободи́лъ еси́, живо́тъ и нетлѣ́ніе мíру дарова́въ и ве́лію ми́лость.

Сти́хъ: Къ Тебѣ́ возведо́хъ о́чи мо́и, [Живу́щему на небеси́. Се́ я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́].

Апо́стольскій ли́къ Ду́хомъ Святы́мъ просвѣти́лъ еси́, Христе́, и на́шу скве́рну грѣхо́вную тѣ́ми отмы́й, Бо́же, и поми́луй на́съ.

Сти́хъ: Поми́луй на́съ, Го́споди, поми́луй на́съ, [я́ко по мно́гу испо́лнихомся уничиже́нія, наипа́че напо́лнися душа́ на́ша поноше́нія гобзу́ющихъ и уничиже́нія го́рдыхъ].

Му́чениченъ: Иму́ще дерзнове́ніе ко Спа́су, святíи, моли́теся непреста́нно за ны́ грѣ́шныя, оставле́ніе прегрѣше́ній прося́ще и душа́мъ на́шимъ ве́лію ми́лость.

Сла́ва, и ны́нѣ, гла́съ 2:

На студене́цъ я́ко пріи́де Госпо́дь, самаряны́ня моля́ше Благоутро́бнаго: пода́ждь ми́ во́ду вѣ́ры, и пріиму́ купѣ́льныя во́ды — ра́дованіе и избавле́ніе. Животода́вче Го́споди, сла́ва Тебѣ́!

Тропа́рь: Свѣ́тлую Воскресе́нія...




ВЪ ЧЕТВЕРТОКЪ ПЯТЫЯ СЕДМИЦЫ ПО ПАСЦѢ, НА УТРЕНИ,

По 1-мъ стихосло́віи сѣда́ленъ, гла́съ 4. Подо́бенъ: Вознесы́йся на Кре́стъ.

Распны́йся на́съ ра́ди во́лею, и вмѣне́нъ бы́въ въ ме́ртвыхъ, Животода́вче, и воскре́съ тридне́вно, Христе́ Бо́же на́шъ, сокруши́лъ еси́ си́лою Твое́ю сме́рти держа́ву, всѣ́хъ воста́ніемъ Твои́мъ су́щихъ во а́дѣ оживи́вый. И воспѣва́юще, чте́мъ Твое́ воста́ніе вси́, Безсме́ртне Го́споди.

Сти́хъ: Во всю́ зе́млю изы́де вѣща́ніе и́хъ [и въ концы́ вселе́нныя глаго́лы и́хъ].

Подобенъ: Скоро предвари.

Свѣти́ла въ концѣ́хъ, ученики́ Твоя́, Спа́се, показа́лъ еси́, сія́юща Твои́мъ проповѣ́даніемъ, просвѣща́ющія ду́ши на́ша: пре́лесть и́дольскую тѣ́ми омрачи́въ, уче́ньми благоче́стія просвѣти́вый мíръ. Тѣ́хъ моли́твами спаси́ ду́ши на́ша.

Сти́хъ: Ди́венъ Бо́гъ во святы́хъ Свои́хъ, [Бо́гъ Изра́илевъ].

Му́чениченъ: Кресто́мъ вооружи́вшеся страстоте́рпцы Твои́, побѣди́ша ко́зни злонача́льнаго врага́, Христе́ Бо́же на́шъ: возсія́ша, я́ко свѣти́ла, человѣ́ки наставля́юще, подаю́тъ исцѣле́нія вѣ́рою прося́щимъ. Тѣ́хъ моли́твами спаси́ ду́ши на́ша.

Сла́ва, и ны́нѣ, крестобогоро́диченъ:

Дѣ́во Пренепоро́чная, Преблага́го Бо́га ро́ждшая, со апо́столы Того́ непреста́нно моли́ оставле́ніе прегрѣше́ній и исправле́ніе житія́ пода́ти на́мъ пре́жде конца́, вѣ́рою и любо́вію воспѣва́ющимъ Тя́ по до́лгу, еди́на Всепѣ́тая.

По 2-мъ стихосло́віи сѣда́ленъ, гла́съ 6. Подо́бенъ: Упова́ніе мíру.

Яко вѣ́рнѣй самаряны́нѣ, Го́споди, Божества́ Твоего́ исто́чникъ отве́рзлъ еси́ и излія́лъ еси́ богоразу́міе на ню́, напоя́я питіе́мъ богопрія́тнымъ. И ны́нѣ всѣ́мъ на́мъ низпосли́ прегрѣше́ній очище́ніе, Преблагíй. [Два́жды.]

Воскресе́ніе Христо́во... Псало́мъ 50-й. Кано́нъ самаряны́ни, со ирмосы́, на 8 и мине́и на 4. Конда́къ и и́косъ самаряны́ни, и ексапостила́рій, два́жды.

На хвали́техъ поста́вимъ стихи́ 4 и пое́мъ стихи́ры осмогла́сника, гла́съ 4:

Оте́ческихъ Твои́хъ нѣ́дръ не разлучи́вся, Единоро́дне Сло́ве Бо́жій, прише́лъ еси́ на зе́млю за человѣколю́біе, Человѣ́къ бы́въ непрело́женъ, и Кре́стъ, и сме́рть претерпѣ́лъ еси́ пло́тію, безстра́стный Божество́мъ. Воскре́съ же изъ ме́ртвыхъ, безсме́ртіе по́далъ еси́ ро́ду человѣ́ческому, я́ко еди́нъ Всеси́ленъ. [Два́жды.]

Некни́жныя ученики́ Ду́хъ Тво́й Святы́й наказа́тели яви́, Христе́ Бо́же, и многовѣща́ннымъ сли́чіемъ язы́ковъ пре́лесть упраздни́, я́ко Всеси́ленъ.

Му́чениченъ: Ка́ко ва́шимъ подвиго́мъ не удиви́мся, святíи му́ченицы, я́ко тѣ́ломъ ме́ртвеннымъ обложе́ни, безпло́тныя враги́ побѣди́сте? Не устраши́ша ва́съ мучи́тельская преще́нія, ни ужаси́ша ва́съ му́къ приложе́нія, вои́стинну досто́йно отъ Христа́ просла́вистеся. Непреста́нно моли́теся спасти́ся душа́мъ на́шимъ.

Сла́ва, и ны́нѣ, гла́съ 2:

Собезнача́льный и Соприсносу́щный Сы́нъ и Сло́во Отчее на исто́чникъ пріи́де, Исто́чникъ исцѣле́ній, и жена́ отъ Самарíи пріи́де почерпсти́ во́ду, ю́же ви́дѣвъ, рече́ Спа́съ: да́ждь Ми́ во́ду пи́ти, и ше́дши пригласи́ твоего́ му́жа. Она́ же, я́ко человѣ́ку глаго́лющи, а не Бо́гу, утаи́ти тща́щися, глаго́лаше: не и́мамъ му́жа. И Учи́тель къ не́й: и́стину рекла́ еси́, не и́мамъ му́жа: пя́ть бо имѣ́ла еси́, и ны́нѣ, его́же и́маши, нѣ́сть тво́й му́жъ. Она́ же о глаго́лѣ удиви́вшися и во гра́дъ те́кши, наро́домъ вопія́ше, глаго́лющи: пріиди́те, ви́дите Христа́, Иже да́руетъ мíрови ве́лію ми́лость.

На стихо́внѣ самаряны́ни, гла́съ 4. Подо́бенъ: Яко до́бля.

Ты́ Исто́чникъ бла́гости сы́й и Пучи́на, жи́зни же Храни́тель, еди́не Благоутро́бне, ка́ко женѣ́ самаряны́нѣ, бесѣ́дуя, возгласи́лъ еси́: да́ждь Ми́ во́ду пи́ти, я́ко да пріи́меши оставле́ніе?! Воспѣва́емъ Твое́ мно́гое благоутро́біе, и́мже спаса́еши человѣ́ческій ве́сь ро́дъ за мно́гую бла́гость.

Сти́хъ: Наляцы́, и успѣва́й, и ца́рствуй, и́стины ра́ди, и кро́тости, и пра́вды.

Пріиди́те, ви́дите Человѣ́ка, Иже рече́ ми́ дне́сь, на исто́чницѣ сѣдя́й, что́ сотвори́хъ: Проро́къ бо и́стиннѣйшій е́сть и превели́кій, сокрове́нная и явле́нная вѣ́дый вся́. Но да́руй во́ду жи́ву, ю́же подае́ши жа́ждущимъ, да не вжа́жду па́ки во вѣ́ки, Человѣколю́бче.

Сти́хъ: Возлюби́лъ еси́ пра́вду и возненави́дѣлъ еси́ беззако́ніе.

Исто́чникъ приснотеку́щій, Животе́ безсме́ртный, Струя́ неистоща́емая же и нетлѣ́нная, путеше́ствовавъ, сѣдя́ше бли́зъ кла́дязя, Своя́ ученики́ посла́въ по бра́шно, бесѣ́доваше женѣ́ че́рплющей, сію́ хотя́ улови́ти и просвѣти́ти души́ ея́ о́чи.

Сла́ва, и ны́нѣ, гла́съ 3:

Да ра́дуется дне́сь свѣ́тло не́бо и земля́, зане́ Христо́съ яви́ся воплоща́емь, я́ко Человѣ́къ, да Ада́ма изме́тъ отъ кля́твы всеро́дныя, и удивля́ется чудесы́ въ Самарíю прише́дъ, женѣ́ же предста́, воды́ прося́, Иже о́блаки вода́ми Одѣва́яй. Тѣ́мже вси́ вѣ́рніи поклони́мся на́съ ра́ди во́лею Обнища́вшему благоутро́бнымъ Совѣ́томъ.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 119 – 121 об.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.