Церковный календарь
Новости


2017-06-28 / russportal
Манифестъ о милостяхъ по случаю бракосоч. Имп. Николая Александровича (1894)
2017-06-28 / russportal
Манифестъ о бракосоч. Имп. Николая II съ Вел. Кн. Александрой Ѳеодоровной (1894)
2017-06-28 / russportal
Прав. Іоаннъ Кронштадтскій. «Новыя грозныя слова». Слово 22-е (1908)
2017-06-28 / russportal
Прав. Іоаннъ Кронштадтскій. «Новыя грозныя слова». Слово 21-е (1908)
2017-06-27 / russportal
П. Н. Красновъ. "Павлоны". Часть 1-я. Глава 12-я (1943)
2017-06-27 / russportal
П. Н. Красновъ. "Павлоны". Часть 1-я. Глава 11-я (1943)
2017-06-27 / russportal
"Книга Русской Скорби". Выпускъ 1-й: Вел. Кн. Сергій Александровичъ (1908)
2017-06-27 / russportal
"Книга Русской Скорби". Выпускъ 1-й: Государь Имп. Александръ II (1908)
2017-06-27 / russportal
Высочайшій Манифестъ о введеніи всеобщей воинской повинности (1874)
2017-06-27 / russportal
Высочайшій Манифестъ о прекращеніи Восточной (Крымской) войны (1856)
2017-06-27 / russportal
Преп. Ефремъ Сиринъ. На слова: "вонми себѣ", 12 главъ (1895)
2017-06-27 / russportal
Преп. Ефремъ Сиринъ. О добродѣтели, 10 главъ (1895)
2017-06-26 / russportal
Осн. Положенія о порядкѣ изд. законовъ, относ. до Имперіи со вкл. Вел. Кн. Финляндскаго (1899)
2017-06-26 / russportal
Манифестъ о порядкѣ изд. законовъ, относ. до Имперіи со вкл. Вел. Кн. Финляндскаго (1899)
2017-06-26 / russportal
Н. Д. Тальбергъ. "Исторія Русской Церкви". Сост. религ. образованія народа (1959)
2017-06-26 / russportal
Н. Д. Тальбергъ. "Исторія Русской Церкви". Императ. Палестинское общество (1959)
Новости въ видѣ
RSS-канала: .
Сегодня - четвергъ, 29 iюня 2017 г. Сейчасъ на порталѣ посѣтителей - 25.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ НЕДѢЛЮ ШЕСТУЮ ПО ПАСЦѢ, О СЛѢПОМЪ.

Недѣ́ля шеста́я по Па́сцѣ, о слѣпо́мъ.

ВЪ СУББОТУ ВЕЧЕРА, НА МАЛѢЙ ВЕЧЕРНИ,

На Го́споди воззва́хъ... стихи́ры воскре́сны, гла́съ 5:

Честны́мъ Твои́мъ Кресто́мъ, Христе́... Воскресе́ніе дая́й ро́ду человѣ́ческому... Ве́ліе чу́до, неви́димыхъ Содѣ́тель... Вече́рнее поклоне́ніе прино́симъ Тебѣ́... Сла́ва, гла́съ 5: Го́споди, мимоходя́ путе́мъ... [вся́ сія́ зри́ на вели́цѣй вече́рни.]

И ны́нѣ, богоро́диченъ настоя́щій, догма́тикъ, гла́съ 5:

Боголѣ́пную и Пречестну́ю Отрокови́цу почти́мъ, Честнѣ́йшую херуви́мовъ: Содѣ́тель бо всѣ́хъ вочеловѣ́читися восхотѣ́вый, въ Ню́ всели́ся несказа́нно. О, стра́нныхъ веще́й и пресла́вныхъ та́инствъ! Кто́ бы не удиви́лся, сіе́ слы́шавъ, я́ко Бо́гъ Человѣ́къ быва́етъ, и премѣне́нія въ Не́мъ не бы́сть? И дѣ́вства врата́ отве́рзлъ, умале́нія въ Не́й не оста́вися, я́коже проро́къ глаго́летъ: человѣ́къ сія́ не про́йдетъ когда́, то́кмо еди́нъ Госпо́дь Бо́гъ Изра́илевъ, Имѣ́яй ве́лію ми́лость.

На стихо́внѣ воскре́сна стихи́ра.

Та́же настоя́щія стихи́ры подо́бны Пресвяты́я Богоро́дицы, гла́съ 5. Подо́бенъ: Ра́дуйся по́стникомъ.

Сти́хъ: Помяну́ и́мя Твое́ во вся́комъ ро́дѣ и ро́дѣ.

Ра́дуйся проро́ковъ печа́те, богоглаго́ливыхъ апо́столовъ проповѣ́даніе: Бо́га бо вои́стинну су́щаго, воплоще́нна на́мъ па́че ума́ и сло́ва, родила́ еси́. Имже дре́внее воспріи́мше благоро́діе и ра́йскія сла́дости улучи́вше, Тебе́, Вино́вницу сицевы́я свѣ́тлости пѣ́сньми почита́емъ, и Моли́твенницею благопрія́тною Тобо́ю, Всесвята́я, богатя́щеся, присносу́щнаго получе́нія жи́зни Сы́на Твоего́, подаю́щаго бога́тно ве́лію ми́лость.

Сти́хъ: Слы́ши, Дщи́, и ви́ждь, и приклони́ у́хо Твое́.

Ра́дуйся слове́сное не́бо, въ не́мже Бо́гъ воплоти́вся, всели́ся, ру́чко Боже́ственныя Ма́нны, свѣ́щниче Со́лнца, Бо́жія горо́ пріосѣне́нная, черто́же боговмѣсти́тельный, живопода́тельная трапе́зо, златы́й свѣти́льниче, свѣтоно́сный раю́, купино́ неопали́мая, ковче́же святы́ни, лѣ́ствице небе́сная, о́блаче одушевле́нный, же́зле отъ ко́рене, Дѣ́во, Іессе́ова возра́стшая. Христа́ моли́, душа́мъ на́шимъ да́тися ве́ліей ми́лости.

Сти́хъ: Лицу́ Твоему́ помо́лятся бога́тіи лю́дстіи.

Ра́дуйся, Сы́на Бо́жія несказа́нно заче́ншая, Всенепоро́чная, и Сего́ ро́ждшая, пло́ть по на́мъ вои́стинну отъ крове́й Твои́хъ пріи́мшаго, ду́шу у́мную же и самовла́стную иму́щаго, неоску́дно же во Ада́ма обле́кшагося, ми́лости ра́ди и бла́гости неизрече́нныя, отону́дуже во двою́ естеству́ на́мъ возвѣща́ется, обои́хъ показу́я въ Себѣ́ дѣ́йство, Христо́съ. Его́же моли́, пою́щимъ Тя́ да́ти ве́лію ми́лость.

Сла́ва, гла́съ 8:

Пра́вды Со́лнце мы́сленное, Христе́ Бо́же, изъ утро́бы свѣ́та лише́ннаго, Твои́мъ пречи́стымъ прикоснове́ніемъ просвѣти́вшее обою́ду, и на́ша о́чи душе́вныя озари́вшее, сы́ны дне́ покажи́, да вѣ́рою вопіе́мъ Ти́: мно́гое Твое́ и неизрече́нное е́же на на́съ благоутро́біе, Человѣколю́бче, сла́ва Тебѣ́!

И ны́нѣ, гла́съ 5:

Хра́мъ и Две́рь еси́, Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ.

И про́чее обы́чно.




НА ВЕЛИЦЕЙ ВЕЧЕРНИ,

Поста́вимъ стихо́въ 10 и пое́мъ стихи́ры воскре́сны 3, восто́чны [анато́ліевы4, и два́ самогла́сна о слѣпцѣ́, повторя́юще еди́нъ.

Стихи́ры воскре́сны, гла́съ 5:

Честны́мъ Твои́мъ Кресто́мъ, Христе́, діа́вола посрами́лъ еси́, и Воскресе́ніемъ Твои́мъ жа́ло грѣхо́вное притупи́лъ еси́, и спа́слъ еси́ ны́ отъ вра́тъ сме́ртныхъ. Сла́вимъ Тя́, Единоро́дне!

Воскресе́ніе дая́й ро́ду человѣ́ческому, я́ко овча́ на заколе́ніе веде́ся; устраши́шася сего́ кня́зи а́дстіи и взя́шася врата́ плаче́вная. Вни́де бо Ца́рь сла́вы Христо́съ, глаго́ля су́щимъ во у́захъ: изыди́те; и су́щимъ во тмѣ́: откры́йтеся.

Ве́ліе чу́до! Неви́димыхъ Содѣ́тель, за человѣколю́біе пло́тію пострада́въ, воскре́се Безсме́ртный. Пріиди́те, оте́чествія язы́къ, Тому́ поклони́мся: благоутро́біемъ бо Его́ отъ пре́лести изба́вльшеся, въ Тріе́хъ Ѵпоста́сѣхъ Еди́наго Бо́га пѣ́ти навыко́хомъ.

Ины стихи́ры анато́ліевы, гла́съ то́йже:

Вече́рнее поклоне́ніе прино́симъ Тебѣ́, Невече́рнему Свѣ́ту, на коне́цъ вѣко́въ, я́ко въ зерца́лѣ пло́тію возсія́вшему мíрови, и да́же до а́да низше́дшему, и та́мо су́щую тму́ разруши́вшему, и свѣ́тъ Воскресе́нія язы́комъ показа́вшему. Свѣтода́вче Го́споди, сла́ва Тебѣ́!

Нача́льника спасе́нія на́шего, Христа́, славосло́вимъ: Тому́ бо изъ ме́ртвыхъ воскре́сшу, мíръ отъ пре́лести спасе́нъ бы́сть. Ра́дуется ли́къ а́нгельскій, бѣ́гаетъ де́моновъ пре́лесть, Ада́мъ пады́й воста́, діа́волъ упраздни́ся.

Иже отъ кустодíи науче́ни быва́ху отъ беззако́нникъ: покры́йте Христо́во Воста́ніе, и пріими́те сре́бреники, и рцы́те: я́ко на́мъ спя́щимъ, изъ гро́ба укра́денъ бы́сть Ме́ртвый. — Кто ви́дѣ, кто́ слы́ша, мертвеца́ укра́дена когда́, па́че же пома́зана и на́га, оста́вльша и во гро́бѣ погреба́льная Своя́? Не прельща́йтеся, іуде́е, навы́кните рече́ніемъ проро́ческимъ и уразумѣ́йте, я́ко То́й е́сть вои́стинну Изба́витель мíра и Всеси́льный.

Го́споди, а́да плѣни́вый и сме́рть попра́вый, Спа́се на́шъ, просвѣти́вый мíръ Кресто́мъ Честны́мъ, поми́луй на́съ!

Ины стихи́ры самогла́сны, о слѣпо́мъ, гла́съ 2:

Слѣпы́й роди́выйся, въ свое́мъ по́мыслѣ глаго́лаше: еда́ а́зъ грѣ́хъ ра́ди роди́тельныхъ роди́хся безъ о́чію? еда́ а́зъ за невѣ́ріе язы́ковъ роди́хся во обличе́ніе? Не домышля́юся вопроша́ти: когда́ но́щь, когда́ де́нь? Не терпи́та ми́ но́зѣ ка́меннаго претыка́нія, не ви́дѣхъ бо со́лнца сія́юща, ниже́ во о́бразѣ мене́ Созда́вшаго. Но молю́тися, Христе́ Бо́же, при́зри на мя́ и поми́луй мя́! [Два́жды.]

Мимоходя́ Іису́съ отъ святи́лища, обрѣ́те человѣ́ка слѣ́па отъ рожде́нія, и умилосе́рдився, положи́ бре́ніе на о́чію его́ и рече́ къ нему́: иди́, умы́йся въ Силоа́мѣ. И умы́вся, прозрѣ́, сла́ву возсыла́я Бо́гу. Сосѣ́ди же его́ глаго́лаху ему́: кто́ твои́ зѣ́ницы отве́рзе, и́хже никто́же отъ зря́щихъ исцѣли́ти возмо́же? Онъ же возопи́въ, рече́: Человѣ́къ, Іису́съ глаго́лемый, Онъ ми́ рече́, — умы́йся въ Силоа́мѣ, — и прозрѣ́хъ. То́й е́сть вои́стинну, Его́же рече́ Моисе́й въ зако́нѣ, Христа́-Мессíю, То́й е́сть Спа́съ ду́шъ на́шихъ!

Сла́ва, гла́съ 5:

Го́споди, мимоходя́ путе́мъ, обрѣ́лъ еси́ человѣ́ка слѣ́па отъ рожде́нія, и удивле́ни бы́вше ученицы́, вопроша́ху Тя́, глаго́люще: Учи́телю, кто́ согрѣши́? се́й ли, или́ роди́тели его́, да слѣ́пъ роди́ся? Ты́ же, Спа́се мо́й, возопи́лъ еси́ къ ни́мъ: ни се́й согрѣши́, ни роди́тели его́, но да явя́тся дѣла́ Бо́жія на не́мъ. Мнѣ́ подоба́етъ дѣ́лати дѣла́ Посла́вшаго Мя́, я́же никто́же мо́жетъ дѣ́лати. И сія́ ре́къ, плю́нувъ до́лу и бре́ніе сотво́рь, пома́залъ еси́ о́чи его́, ре́къ къ нему́: иди́, умы́йся въ Силоа́мстѣй купѣ́ли. Онъ же умы́вся, здра́въ бы́сть и вопія́ше къ Тебѣ́, — вѣ́рую, Го́споди! — и поклони́ся Тебѣ́. Тѣ́мже вопіе́мъ и мы́: поми́луй на́съ!

И ны́нѣ, богоро́диченъ:

Въ Чермнѣ́мъ мо́ри Неискусобра́чныя Невѣ́сты о́бразъ написа́ся иногда́: та́мо Моисе́й, раздѣли́тель воды́, здѣ́ же Гавріи́лъ, служи́тель чудесе́; тогда́ глубину́ ше́ствова немо́кренно Изра́иль, ны́нѣ же Христа́ роди́ безсѣ́менно Дѣ́ва; мо́ре по проше́ствіи Изра́илевѣ пребы́сть непрохо́дно, Непоро́чная по рождествѣ́ Емману́илевѣ пребы́сть нетлѣ́нна. Сы́й и пре́жде Сы́й, явле́йся я́ко Человѣ́къ, Бо́же, поми́луй на́съ.

Вхо́дъ. Проки́менъ дне́.

На литíи стихи́ра хра́ма. Сла́ва, гла́съ 4:

Все́ житіе́ слѣпы́й но́щь помышля́я, возопи́ къ Тебѣ́: Го́споди, отве́рзи ми́ зѣ́ницы, Сы́не Дави́довъ, Спа́се на́шъ, да со всѣ́ми и а́зъ воспою́ Твою́ си́лу.

И ны́нѣ, богоро́диченъ, гла́съ то́йже:

При́зри на моле́нія Твои́хъ ра́бъ, Всенепоро́чная, утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи, потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ.

На стихо́внѣ стихи́ра воскре́сна, гла́съ 5:

Тебе́, Воплоще́ннаго Спа́са Христа́ и небе́съ Неразлучи́вшася, во гла́сѣхъ пѣ́ній велича́емъ, я́ко Кре́стъ и сме́рть прія́лъ еси́ за ро́дъ на́шъ, я́ко Человѣколю́бецъ Госпо́дь, испрове́ргій а́дова врата́, тридне́вно воскре́слъ еси́, спаса́я ду́ши на́ша.

Та́же стихи́ры Па́сцѣ, съ припѣ́вы и́хъ [ищи́ въ недѣ́лю Па́схи на у́трени].

Сла́ва: гла́съ 8:

Пра́вды Со́лнце мы́сленное, Христе́ Бо́же, изъ утро́бы свѣ́та лише́ннаго, Твои́мъ пречи́стымъ прикоснове́ніемъ просвѣти́вшее обою́ду, и на́ши о́чи душе́вныя озари́вшее, сы́ны дне́ покажи́, да вѣ́рою вопіе́мъ Ти́: мно́гое Твое́ и неизрече́нное е́же на на́съ благоутро́біе, Человѣколю́бче, сла́ва Тебѣ́!

И ны́нѣ: Воскресе́нія де́нь... и про́чее, я́коже предписа́ся въ мимоше́дшія недѣ́ли.

Та́же отпусти́тельный тропа́рь, гла́съ 5:

Собезнача́льное Сло́во Отцу́ и Ду́хови, отъ Дѣ́вы ро́ждшееся на спасе́ніе на́ше, воспои́мъ, вѣ́рніи, и поклони́мся, я́ко благоволи́ пло́тію взы́ти на Кре́стъ, и сме́рть претерпѣ́ти, и воскреси́ти уме́ршія сла́внымъ Воскресе́ніемъ Свои́мъ.

[Сла́ва, и ны́нѣ,] богоро́диченъ:

Ра́дуйся, две́ре Госпо́дня непроходи́мая; ра́дуйся, стѣно́ и покро́ве притека́ющихъ къ Тебѣ́; ра́дуйся, необурева́емое приста́нище и неискусобра́чная, ро́ждшая пло́тію Творца́ Твоего́ и Бо́га, моля́щи не оскудѣва́й о воспѣва́ющихъ и кла́няющихся Рождеству́ Твоему́.



ВЪ НЕДѢЛЮ НА ПОЛУНОЩНИЦѢ

Пое́мъ кано́нъ Тро́иченъ во окто́ихѣ гла́са. Та́же: Досто́йно е́сть... и про́чее, я́ко обы́чай, и отпу́стъ.




НА УТРЕНИ,

По 1-мъ стихосло́віи сѣда́льны воскре́сны, гла́съ 5:

Кре́стъ Госпо́день похва́лимъ, погребе́ніе свято́е пѣ́сньми почти́мъ, и Воскресе́ніе Его́ препросла́вимъ, я́ко совозста́ви ме́ртвыя отъ гро́бъ, я́ко Бо́гъ, плѣни́въ сме́рти держа́ву и крѣ́пость діа́волю, и су́щимъ во а́дѣ Свѣ́тъ возсія́.

Сти́хъ: Воскресни́, Го́споди Бо́же мой, да вознесе́тся рука́ Твоя́, [не забу́ди убо́гихъ Твои́хъ до конца́].

Го́споди, ме́ртвъ наре́клся еси́, Умертви́вый сме́рть; во гро́бѣ положи́лся еси́, Истощи́вый гро́бы; горѣ́ во́ини гро́бъ стрежа́ху, до́лѣ отъ вѣ́ка ме́ртвыя воскреси́лъ еси́. Всеси́льне и Непостижи́ме Го́споди, сла́ва Тебѣ́!

Сла́ва, и ны́нѣ, богоро́диченъ:

Ра́дуйся, свята́я горо́ и богопрохо́дная, ра́дуйся, одушевле́нная купино́ и неопали́мая, ра́дуйся, еди́на къ Бо́гу мíрови мо́сте, преводя́й ме́ртвыя къ вѣ́чному животу́; ра́дуйся, нетлѣ́нная Отрокови́це, неискусому́жно ро́ждшая Спасе́ніе ду́шъ на́шихъ.

По 2-мъ стихосло́віи сѣда́ленъ, гла́съ 5:

Го́споди, посредѣ́ Тя́ осужде́нныхъ пригвозди́ша беззако́нніи, и копіе́мъ ребро́ Твое́ прободо́ша, о Ми́лостиве! Погребе́ніе бо прія́лъ еси́, Разруши́вый а́дова врата́, и воскре́слъ еси́ тридне́вно. Притеко́ша жены́ ви́дѣти Тя́, и возвѣсти́ша апо́столомъ воста́ніе. Превозноси́мый Спа́се, Его́же пою́тъ а́нгели, Благослове́нный Го́споди, сла́ва Тебѣ́!

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, [повѣ́мъ вся́ чудеса́ Твоя́].

Стра́нное Твое́, Спа́се мо́й, та́инство, мíрови спасе́ніе бы́сть: воскре́съ бо отъ гро́ба боголѣ́пно, истлѣ́вшихъ совоздви́глъ еси́, я́ко Бо́гъ, всѣ́хъ Животе́. Го́споди, сла́ва Тебѣ́!

Сла́ва, и ны́нѣ, богоро́диченъ:

Неискусобра́чная Ма́ти, Богороди́тельнице Чи́стая, Евину печа́ль обра́довавшая, воспѣва́емъ вѣ́рніи и покланя́емся Тебѣ́, я́ко возвела́ еси́ на́съ отъ дре́внія кля́твы. И ны́нѣ моли́ непреста́нно, Всепѣ́тая Пресвята́я, во е́же спасти́ся на́мъ.

И чте́ніе въ толкова́ніи Ева́нгелія, е́же отъ Іоа́нна, сло́во 56-е, 57-е, и 58-е. По Непоро́чнахъ... тропари́: Ангельскій собо́ръ... и про́чее, я́ко обы́чно.

И а́біе ипакои́, гла́съ 5:

Ангельскимъ зра́комъ у́мъ смуща́юща, и Боже́ственнымъ Воста́ніемъ душе́ю просвѣща́емыя, мѵроно́сицы апо́столомъ благовѣствова́ху: возвѣсти́те во язы́цѣхъ Воскресе́ніе, Го́споду содѣ́йствующу чудесы́, подаю́щему на́мъ ве́лію ми́лость.

Степе́нна, гла́съ 5:

Антифо́нъ 1:

Внегда́ скорбѣ́ти мнѣ́, Дави́дски пою́ Тебѣ́, Спа́се мо́й: изба́ви ду́шу мою́ отъ язы́ка льсти́ваго.

Пусты́ннымъ живо́тъ блаже́нъ е́сть, Боже́ственнымъ раче́ніемъ воскрыля́ющимся.

Сла́ва: Святы́мъ Ду́хомъ одержа́тся вся́, ви́димая же съ неви́димыми: Самодержа́венъ бо сы́й, Тро́ицы Еди́нъ е́сть нело́жно.

И ны́нѣ, то́йже.

Антифо́нъ 2:

На го́ры, душе́, воздви́гнемся, гряди́ та́мо, отню́дуже по́мощь и́детъ.

Десна́я Твоя́ рука́ и мене́, Христе́, каса́ющися, отъ ле́сти вся́кія да сохрани́тъ.

Сла́ва: Свято́му Ду́ху богосло́вяще, рце́мъ: Ты́ еси́ Бо́гъ, Живо́тъ, Раче́ніе, Свѣ́тъ, Умъ, Ты́ — Благосты́ня, Ты́ ца́рствуеши во вѣ́ки.

И ны́нѣ, то́йже.

Антифо́нъ 3:

О ре́кшихъ мнѣ́, — во дворы́ вни́демъ Госпо́дня, — ра́дости мно́гія испо́лненъ бы́въ, моли́твы возсыла́ю.

Въ дому́ Дави́довѣ стра́шная соверша́ются: Огнь бо та́мо, паля́ вся́къ сра́мный у́мъ.

Сла́ва: Свято́му Ду́ху живонача́льное досто́инство, отъ Него́же вся́кое живо́тно одушевля́ется, я́ко во Отцѣ́, ку́пно же и Сло́вѣ.

И ны́нѣ, то́йже.

Проки́менъ, гла́съ 5: Воскресни́, Го́споди Бо́же мо́й, да вознесе́тся рука́ Твоя́,* я́ко Ты́ ца́рствуеши во вѣ́ки. Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, [повѣ́мъ вся́ чудеса́ Твоя́]. Ева́нгеліе воскре́сно у́треннее 8-е, отъ Іоа́нна, зача́ло 64: Во вре́мя о́но, Марíя стоя́ше у гро́ба... Та́же: Воскресе́ніе Христо́во.., три́жды. Псало́мъ 50-й.

Кано́нъ Па́сцѣ, со ирмосы́ [пи́санъ въ недѣ́лю Па́схи] и съ богоро́дичнами [пи́саны въ недѣ́лю святы́хъ мѵроно́сицъ], на 8 и слѣпа́го на 6.

Кано́нъ [слѣпа́го], гла́съ 5:
Пѣ́снь 1.

Ирмо́съ: Зе́млю, на ню́же не возсія́, ни ви́дѣ со́лнце когда́, бе́здну, ю́же не ви́дѣ на́гу широта́ небе́сная, Изра́иль про́йде невла́жно, Го́споди, и вве́лъ еси́ его́ въ го́ру святы́ни Твоея́, хва́ляща и пою́ща побѣ́дную пѣ́снь.

Распя́тіе во́льное воспріи́мъ, Спа́се, пло́тію, источи́лъ еси́ благослове́ніе и жи́знь мíрови, Влады́ко, еди́не Всеблагослове́нне и всѣ́хъ Содѣ́телю. Тѣ́мже благослови́мъ Тя́, пое́мъ и сла́вимъ, пою́ще, воспѣва́юще побѣ́дную пѣ́снь.

Въ ро́вѣ Тя́ преиспо́днѣйшемъ ме́ртва бы́вша, Христе́, положи́ благообра́зный Іо́сифъ и привали́ къ две́ремъ гро́ба ка́мень, Долготерпѣли́ве. Но воскре́слъ еси́, Сла́вне, и мíръ совозста́вилъ еси́ пою́щій, воспѣва́ющій побѣ́дную пѣ́снь.

Мѵ́ра что́ прино́сите со слеза́ми вы́? — глаго́лаше честны́мъ жена́мъ а́нгелъ явле́йся, — Христо́съ воста́! те́кше, рцы́те богови́дцемъ ученико́мъ, рыда́ющимъ и пла́чущимъ, я́ко да взыгра́ютъ и ликовству́ютъ свѣ́тло.

Чудеса́ пресла́вная сотворя́я, Изба́витель исцѣли́ и слѣ́па отъ рожде́нія, бре́ніемъ пома́завъ, и ре́къ: иди́ и умы́йся въ Силоа́мѣ, я́ко да позна́еши Мя́ Бо́га, по земли́ ше́ствующа, пло́ть нося́ща за милосе́рдіе щедро́тъ.

Сла́ва, тро́иченъ: Еди́но Тріѵпоста́сное Существо́ почита́юще, вѣ́рніи, просла́вимъ Отца́, и Сы́на, и Ду́ха Пра́ваго, Творца́, и Го́спода, и Изба́вителя всѣ́хъ, еди́наго Несозда́ннаго Бо́га, со безпло́тными взыва́юще: Свя́тъ, Свя́тъ, Свя́тъ еси́, Царю́.

И ны́нѣ, богоро́диченъ: Во утро́бу неискусобра́чную Твою́ всели́ся, Чи́стая, Госпо́дь за милосе́рдіе щедро́тъ, спасти́ хотя́ человѣ́ка, истлѣ́вшаго козньми́ вра́жіими. Того́ у́бо моли́, гра́дъ се́й спасти́ отъ вся́каго плѣне́нія и враго́въ наше́ствія.

Катава́сія: Спаси́телю Бо́гу, въ мо́ри лю́ди немо́крыми нога́ми наста́вльшему и фарао́на со всево́инствомъ пото́пльшему, Тому́ еди́ному пои́мъ, я́ко просла́вися.

Пѣ́снь 3.

Ирмо́съ: Дви́жимое се́рдце мое́, Го́споди, волна́ми жите́йскими, утверди́ во приста́нище ти́хое, наставля́я я́ко Бо́гъ.

Коле́блющихся сердца́ утверди́лъ еси́, зе́млю всю́ поколеба́въ, Долготерпѣли́ве, честны́мъ распя́тіемъ Твои́мъ, е́же претерпѣ́лъ еси́ пло́тію.

Въ но́вѣмъ гро́бѣ Тебе́ положи́, Ще́дре, Іо́сифъ благообра́зный; воскре́слъ же еси́ изъ ме́ртвыхъ тридне́венъ Новосотвори́вый на́съ.

Что́, я́ко ме́ртва, и́щете Го́спода? Воскре́се, я́коже рече́! — а́нгелъ жена́мъ вѣща́ше, блиста́яйся боже́ственнымъ зра́комъ.

Слѣ́па иногда́ отъ рожде́нія, присту́пльша къ Тебѣ́, исцѣли́лъ еси́, Всеще́дре, сла́вяща смотре́ніе Твое́ и чудеса́.

Сла́ва, тро́иченъ: Бо́гу Отцу́ покланя́емся Пребезнача́льному, и Сы́ну, и Боже́ственному Ду́ху, Тринесозда́нному Естеству́, Тріѵпоста́сному, Еди́ному Бо́гу всѣ́хъ.

И ны́нѣ, богоро́диченъ: Изъ чре́ва дѣви́ческа родила́ еси́ Бо́га воплоще́нна, Ему́же моли́ся, Всесвята́я Влады́чице, уще́дрити на́съ.

Катава́сія: Си́лою Креста́ Твоего́, Христе́, утверди́ мое́ помышле́ніе, во е́же пѣ́ти и сла́вити спаси́тельное Твое́ вознесе́ніе.

Конда́къ и и́косъ Па́сцѣ.

Та́же сѣда́ленъ, гла́съ 8. Подо́бенъ: Прему́дрости.

Всѣ́хъ Влады́ка и Творе́цъ преходя́, обрѣ́те на пути́ слѣ́па сѣдя́ща, пла́чуща и глаго́люща: не ви́дѣхъ въ житіи́ со́лнца сія́юща, ниже́ луны́ свѣ́та озаря́ющаго. Тѣ́мже вопію́ Ти́: Рожде́йся отъ Дѣ́вы, Просвѣще́й вся́ческая, просвѣти́ мя́, я́ко Благоутро́бенъ, да зову́, припа́дая, Тебѣ́, Влады́ко Христе́ Бо́же: прегрѣше́ній оставле́ніе да́руй, за мно́жество ми́лости на́мъ, Человѣколю́бче.

Сла́ва, и ны́нѣ, то́йже. И чте́ніе.

Пѣ́снь 4.

Ирмо́съ: Услы́шахъ, Го́споди, слу́хъ Тво́й и убоя́хся, разумѣ́хъ смотре́ніе Твое́ и просла́вихъ Тя́, еди́не Человѣколю́бче.

Уме́рша мя́ дре́вомъ, пожре́нъ бы́въ, Спа́се мо́й, Жи́знь сы́й, оживи́лъ еси́, за вели́кую ми́лость, сего́ ра́ди, Сло́ве, сла́влю Тя́.

Ученико́мъ, Го́споди, соводворя́яся пресла́вно, си́мъ глаго́лалъ еси́: иди́те, проповѣ́дите всю́ду Мое́ Воскресе́ніе.

Увѣря́я, Го́споди, Воста́ніе Твое́, е́же изъ гро́ба, лю́бящимъ Тя́, Христе́, во дни́ мно́ги соводвори́лся еси́, ра́дость творя́ и́мъ.

Воочи́лъ еси́, Го́споди, слѣ́па изъ утро́бы рожде́нна, ре́клъ: иди́, умы́йся и прозри́, Мое́ сла́вя Божество́.

Сла́ва, тро́иченъ: Единоче́стная, Безнача́льная Тро́ице, нераздѣ́льная Существо́мъ, раздѣ́льна Ѵпоста́сьми, спаса́й вся́ вѣ́рно Тя́ стра́хомъ сла́вящія.

И ны́нѣ, богоро́диченъ: Рождество́ Твое́, Чи́стая, е́же па́че естества́ славосло́вимъ, блажа́ще вѣ́рно Тебе́, Пренепоро́чная, я́ко Бо́га всѣ́хъ Роди́тельницу.

Катава́сія: Услы́шахъ слу́хъ си́лы Креста́, я́ко ра́й отве́рзеся и́мъ, и возопи́хъ: сла́ва си́лѣ Твое́й, Го́споди.

Пѣ́снь 5.

Ирмо́съ: Окая́нную ду́шу мою́, нощеборю́щуюся со тмо́ю страсте́й, предвари́въ, уще́дри и возсія́й мы́сленное со́лнце днесвѣ́тлыя звѣзды́ во мнѣ́, во е́же раздѣли́ти но́щь отъ свѣ́та.

Возне́слся еси́ на Дре́во, Ще́дре, и совозне́слъ еси́ вся́ человѣ́ки, и бори́теля змíя умертви́лъ еси́, и оживи́лъ еси́ созда́ніе ру́къ Твои́хъ, я́ко еди́нъ Бо́гъ всѣ́хъ.

Положи́лся еси́ во гро́бѣ во́лею, Царю́ Безсме́ртне, и ца́рствія а́дова вся́ истощи́лъ еси́, ме́ртвыя Воскресе́ніемъ Твои́мъ воздви́гнувъ.

Чудеса́ ве́лія содѣ́ловающаго, Сло́ве, на земли́, лю́діе уби́ша Тя́ беззако́нніи, но Са́мъ, Го́споди, еди́нъ Всеси́ленъ сы́й, я́коже предре́клъ еси́, изъ ме́ртвыхъ воскре́слъ еси́, Христе́.

Очи отве́рзлъ неви́дѣвшаго свѣ́тъ чу́вственный, души́ просвѣти́лъ еси́ зѣ́ницы, и сла́вити сотвори́лъ еси́ сего́, позна́вша Тя́, Творца́, за благоутро́біе яви́вшася Человѣ́ка.

Сла́ва, тро́иченъ: Тро́ицу во Еди́ницѣ и въ Тро́ицѣ Еди́ницу, вѣ́рніи, славосло́вимъ вси́: Отца́, и Сы́на, и Ду́ха Пра́ваго, Еди́наго Бо́га, Содѣ́теля всѣ́хъ вои́стинну.

И ны́нѣ, богоро́диченъ: Ка́ко родила́ еси́ Богоблагода́тная Дѣ́во, Ма́ти Чи́стая, не позна́вши иску́са му́жеска? Ка́ко пита́еши Пита́ющаго всю́ тва́рь? Якоже еди́нъ вѣ́сть Са́мъ, всѣ́хъ Творе́цъ и Бо́гъ.

Катава́сія: Утреннююще, вопіе́мъ Ти́: Го́споди, спаси́ ны́. Ты́ бо еси́ Бо́гъ на́шъ, ра́звѣ бо Тебе́ ино́го не зна́емъ.

Пѣ́снь 6.

Ирмо́съ: Якоже проро́ка отъ звѣ́ря изба́вилъ еси́, Го́споди, и мене́ изъ глубины́ несодержи́мыхъ страсте́й возведи́, молю́ся, да приложу́ призрѣ́ти ми́ ко хра́му свято́му Твоему́.

Распны́йся съ разбо́йники, Влады́ко, изба́вилъ еси́ отъ разбо́йникъ лука́выхъ — душетлѣ́нныхъ страсте́й, Человѣколю́бче Го́споди, вся́ пою́щія Твое́ распя́тіе и воста́ніе согла́сно.

Положи́ша безъ дыха́нія Тебе́ ме́ртва, Христе́, во гро́бѣ, всѣ́мъ ме́ртвымъ вдыха́юща жи́знь; воскре́слъ же еси́, Го́споди, вся́ истощи́вый, Сло́ве, гро́бы, Боже́ственною Твое́ю си́лою.

По воста́ніи, Христе́, друго́мъ глаго́лалъ еси́: сѣди́те у́бо во Іерусали́мѣ, до́ндеже облече́теся Си́лою свы́ше непобѣди́мою и извѣ́стною По́мощію.

Бре́ніе сотво́рь, о́чи слѣпа́го отъ рожде́нія пома́залъ еси́, и дарова́лъ еси́ ему́ прозрѣ́ти, пою́щу Твою́, Сло́ве, неизрече́нную си́лу, е́юже спа́слъ еси́ мíръ.

Сла́ва, тро́иченъ: Тріѵпоста́сная Еди́нице: Отче Нерожде́нне, Сы́не Рожде́нне и Ду́ше Исхо́дне, Трисвяты́й Го́споди, еди́но Существо́ и Си́ла, спаса́й вся́ лю́ди Твоя́.

И ны́нѣ, богоро́диченъ: Вели́чія Твоя́, Чи́стая, кто́ исповѣ́сть? Бо́га бо пло́тію родила́ еси́ преесте́ственно, мíръ Тобо́ю избавля́ющаго, Дѣ́во Всенепоро́чная, отъ вся́каго грѣха́.

Катава́сія: Обы́де мя́ бе́здна, гро́бъ мнѣ́ ки́тъ бы́сть, а́зъ же возопи́хъ къ Тебѣ́, Человѣколю́бцу, и спасе́ мя десни́ца Твоя́, Го́споди.

Конда́къ, гла́съ 4. Подо́бенъ: Яви́лся еси́ дне́сь.

Душе́вныма очи́ма ослѣпле́нъ, къ Тебѣ́, Христе́, прихожду́, я́коже слѣпы́й отъ рожде́нія, покая́ніемъ зову́ Ти́: Ты́ су́щихъ во тмѣ́ Свѣ́тъ Пресвѣ́тлый.

Икосъ:

Струю́ ми́ да́руй, Христе́, прему́дрости неизрече́нныя и ра́зума го́рняго, Свѣ́те су́щихъ во тмѣ́ и прельща́емыхъ Наста́вниче, да возмогу́ чудеса́ Твоя́ повѣ́дати окая́нный, я́же Боже́ственная кни́га научи́ Ева́нгелія ми́ра, сíесть, слѣпа́го чудотворе́ніе: я́ко отъ рожде́нія слѣ́пъ сы́й, о́чи чу́вственныя пріе́млетъ и душе́вныя, вѣ́рою взыва́я: Ты́ су́щихъ во тмѣ́ Свѣ́тъ Пресвѣ́тлый.

Синакса́рь мине́и. Та́же настоя́щій.

Стихи́: Свѣ́та Пода́тель, отъ Свѣ́та сы́й Свѣ́тъ,
                  Отъ рожде́нія вооча́еши слѣпа́го, Сло́ве.

Въ то́йже де́нь, въ недѣ́лю шесту́ю по Па́сцѣ, и́же отъ рожде́нія слѣпа́го, пра́зднуемъ Го́спода Бо́га и Спа́са на́шего Іису́са Христа́ чу́до, е́же у́бо и то́ отъ воды́ содѣ́яся, я́коже и е́же о самаряны́ни, и о разсла́бленномъ. Бы́сть же си́це:

Христу́ бесѣ́дующу іуде́омъ, и Себе́ ра́вна показу́юща Отцу́, и пре́жде Авраа́ма бы́ти, — «Азъ е́смь», — глаго́лющу, они́ ка́меніе на Него́ ме́щутъ. Онъ же, отходя́ отту́ду, обрѣта́етъ слѣпа́го претыка́ющася: бя́ше же та́ко роди́вся, о́бразъ то́кмо еди́нъ и долины́ имѣ́я о́чію. Обрѣ́тъ у́бо его́ Спа́съ си́це иму́ща, вопроша́емь быва́етъ отъ учени́къ слы́шавшихъ во е́же о разсла́бленномъ: се́ здра́въ бы́лъ еси́, ктому́ не согрѣша́й, и: я́ко грѣ́хъ роди́тельскій на ча́дѣхъ: — «Учи́телю, кто́ согрѣши́, се́й ли, или́ роди́тели его́, да слѣ́пъ роди́ся?» Инако же, и мнѣ́ніе нѣ́кое епику́рское содержа́ше, душа́мъ предбыва́ти, и согрѣши́вшимъ невеще́ственно своди́тися въ тѣлеса́. Яже вся́ отъе́мля, Христо́съ рече́: «не си́хъ ра́ди, но да явя́тся дѣла́ Бо́га, си́рѣчь Мене́». Ни бо́ о Отцѣ́ сло́во. А е́же «да́», изрѣче́нія е́сть, а не вины́.

И се́ ре́клъ Христо́съ, плю́нувъ на зе́млю, бре́ніе сотвори́ и пома́за ему́ о́чію мѣста́, и къ Силоа́мскому исто́чнику ити́ и умы́тися повелѣва́етъ, да пока́жетъ, я́ко То́й е́сть въ нача́лѣ пе́рсть пріе́мый отъ земли́ и созда́вый человѣ́ка. И поне́же всѣ́мъ о́ко госпо́дьственнѣйшее въ тѣлеси́, сіе́ создава́етъ не су́щее, показу́я, я́ко и душе́вной си́лѣ движе́ніе То́й е́сть подава́яй. Не пома́за же водо́ю, но плюнове́ніемъ, и да вѣ́домо бу́детъ, я́ко благода́ть вся́кая отъ плюнове́нія у́стъ бя́ше, и я́ко къ Силоа́му посла́ти того́ хотя́ше. Умы́тися же тому́ повелѣва́етъ, да не кто́ та́мошнею земле́ю и бре́ніемъ да́стъ [возмни́тъ] цѣльбу́. Посыла́етъ его́ къ Силоа́му, да мно́ги и́мать исцѣле́нія по́слухи, мно́ги бо срѣ́те иды́й пома́заны бре́ніемъ имѣ́я о́чи. Глаго́лютъ же нѣ́цыи, я́ко умы́выйся не отложи́, е́же бѣ́ отъ плюнове́нія бре́ніе, но то́е бре́ніе приложе́ніемъ мо́краго, ко о́чію зда́нія преобразова́шеся.

«Силоа́мъ» же — «по́сланъ», толку́ется: купѣ́ль бо та́я внѣ́ гра́да Іерусали́ма бя́ше. При Іезекíи же, ра́тникомъ обсѣ́дшимъ гра́дъ и Силоа́мъ объе́мшимъ, воспяти́ся вода́ отону́ду, пре́днія же кла́дязи и рвы́ ископа́ша вну́трь, на приня́тіе воды́. И а́ще кто́ повелѣ́ніемъ проро́ка Иса́іи та́мо посыла́емь бя́ше, вода́ па́ки исхожда́ше и почерпа́шеся. Аще ли же кто́ отъ ра́тникъ хотя́ше почерпсти́, удержава́хуся воды́ исто́чницы и изъ о́наго та́ко быва́ше. Да у́бо пока́жетъ и Христо́съ, я́ко отъ Бо́га и Са́мъ, сего́ ра́ди слѣпа́го посыла́етъ та́мо, и свѣ́тъ а́біе послѣ́дуетъ. Нѣ́цыи у́бо возмнѣ́ша, «по́сланъ», Силоа́мъ толкова́тися, и настоя́щаго ра́ди слѣпца́, по́сланна отъ Христа́.

Вооча́ется у́бо слѣпы́й, умы́вся, неизглаго́ланною нѣ́коею си́лою, ниже́ самому́ пострада́вшему та́инство увѣ́дѣвшу. Сосѣ́ди же ему́ и и́нако зна́еміи, ви́дѣвше его́ до́брѣ прозрѣ́вша, сумня́щеся бя́ху. Онъ же у́бо исповѣ́даше себе́ пре́жде бы́ти слѣ́па, и о вино́внаго прозрѣ́ніи вопроша́емь, Цѣли́теля стра́сти Христа́ проповѣ́даше. Фарисе́емъ у́бо, пресла́вное слы́шащимъ зна́меніе, па́ки Спа́съ ху́лимь быва́етъ, я́ко суббо́ту неблюды́й. Въ суббо́ту бо, я́коже обы́че, и е́же на слѣпо́мъ содѣ́яся. Ра́спря у́бо быва́етъ посреди́ си́хъ: о́вѣмъ у́бо глаго́лющимъ отъ Бо́га бы́ти Іису́су, быва́емыхъ ра́ди чуде́съ, о́вѣмъ же не отъ Бо́га, я́ко суббо́ты не храни́тъ. Благо́е у́бо мнѣ́ніе о Не́мъ иму́щіи, слѣпа́го вопроша́ютъ: «ты́ что́ глаго́леши о Не́мъ?» Онъ же проро́ка Его́ проповѣ́даетъ, е́же у́бо о́нѣхъ бя́ше честнѣ́йше. Они́ же па́ки не вѣ́руютъ, я́ко слѣ́пу су́щу Христо́съ цѣльбу́ дарова́, у́бо и роди́телей его́ призыва́ютъ, сосѣ́домъ не вѣ́рующе, я́ко и па́че то́ покры́ти хотя́ще. Но и вя́щше творя́тъ явле́нно, роди́телемъ вся́ исповѣ́дающимъ, а́ще и отъ со́нмища отлуче́на бы́ти боя́щяся, на о́наго во́зрастъ дѣя́нія возво́дятъ. Но и па́ки къ слѣпо́му глаго́лютъ: «да́ждь сла́ву Бо́гу, я́ко отъ Него́ исцѣле́ніе, а не отъ Христа́; грѣ́шенъ бо е́сть, я́ко разоря́етъ суббо́ту». Се́й же, дѣ́лы показа́ти хотя́, я́ко Бо́гъ е́сть: «не вѣ́мъ», глаго́летъ, «еди́но вѣ́мъ, я́ко слѣ́пъ сы́й, Тѣ́мъ ви́жду». Па́ки у́бо ему́ реко́ша: «ка́ко отве́рзе твои́ о́чи?» Онъ же, стужа́емь, не пото́нку глаго́летъ, но составля́етъ: «я́ко а́ще не бы́ отъ Бо́га бы́лъ, не бы́ сицево́е зна́меніе сотвори́лъ». И пе́рвѣе у́бо досажда́емь быва́етъ отъ ни́хъ, я́ко исповѣ́давый и учени́къ бы́ти Онаго, и зане́ рече́: «никто́же отве́рзлъ е́сть о́чи слѣпа́го рожде́ннаго». Слѣпы́я бо и друзíи просвѣти́ша, рожде́ну же слѣ́пу ниже́ еди́нъ. Поруга́вшеся у́бо ему́, дале́че отъ со́нмища изгна́ша.

По си́хъ же обрѣта́етъ его́ Іису́съ и глаго́летъ ему́: «ты́ вѣ́руеши ли въ Сы́на Бо́жія?» Онъ же, увѣ́дѣвъ Кто́ е́сть, Иже съ ни́мъ глаго́ляй, и ви́дѣнъ быва́яй Тѣ́мъ, не бо вѣ́дяше Его́ пре́жде, я́ко слѣпы́й сы́й, поклони́ся Ему́ и учени́къ Его́ бы́сть, благодѣя́ніе проповѣ́дуяй.

Рекло́ся бы сіе́ и возводи́тельно. Слѣпы́й у́бо и су́щіи отъ язы́къ лю́діе, и́хже, преходя́, вмѣ́сто е́же на земли́ пожи́тія, а не на небеси́, обрѣ́те Христо́съ, или́ и я́ко евре́йскихъ ра́ди пріи́де люде́й. Преходя́ же, пріи́де и во язы́ки, и плю́нувъ на зе́млю, и бре́ніе сотвори́въ, пома́за: вмѣ́сто е́же научи́ я́ пре́жде, зане́ я́ко ка́пля сни́де на зе́млю, и воплоти́ся отъ Святы́я Дѣ́вы. Та́же и Боже́ственное креще́ніе предаде́, е́же е́сть Силоа́мъ. Посе́мъ отъ язы́къ христіа́нстіи лю́діе за Христа́ на вся́ дерза́ютъ, и гони́ми быва́ютъ, и свидѣ́тельствуютъ, и по́слѣжде отъ Него́ проповѣ́дуются и прославля́ются. Неисче́тною ми́лостію Твое́ю, Свѣтода́вче Христе́ Бо́же на́шъ, поми́луй и спаси́ на́съ. Ами́нь.

Пѣ́снь 7.

Ирмо́съ: Огня́ гаси́лище — отроко́въ моли́тва, ороша́ющая пе́щь, проповѣ́дница чудесе́, не опаля́ющи, ниже́ сожига́ющи пѣсносло́вцы Бо́га оте́цъ на́шихъ.

Воздви́жену Тебѣ́ на Дре́во, Спа́се, погасе́ со́лнце, земля́ волну́яшеся, колеба́шеся тва́рь вся́, и отъ гро́бъ ме́ртвіи востая́ху.

Воста́вшу Ти́ изъ ме́ртвыхъ, Царю́, ду́ши совозста́ша та́мо спя́щія, сла́вящія си́лу Твою́, е́юже сме́ртныя у́зы разрѣши́шася.

Ра́но мѵропома́зати Тя́ же́нскій пріи́де ли́къ, увѣ́дѣвше же, Го́споди, воста́вша Тя́, ра́довахуся со свяще́нными ученики́, и́миже пода́ждь на́мъ очище́ніе зо́лъ.

Бре́ніемъ пома́залъ еси́ о́чи слѣпа́го и сему́ повелѣ́лъ еси́ къ Силоа́му ити́; омы́вся же, прозрѣ́, пѣсносло́вя Тя́, Христе́, Царю́ всѣ́хъ.

Сла́ва, тро́иченъ: Отца́ Безнача́льна, Собезнача́льна же Сы́на и Ду́ха Пресвята́го пѣсносло́вимъ: Свя́тъ, Свя́тъ, Свя́тъ еси́ Бо́же, Царю́ всѣ́хъ.

И ны́нѣ, богоро́диченъ: По рождествѣ́ Дѣ́ва яви́лася еси́, Чи́стая: Бо́га бо родила́ еси́, Обнови́вшаго естества́, Пречи́стая, си́лою Свое́ю, Его́же моли́ спасти́ся всѣ́мъ на́мъ.

Катава́сія: Въ пещи́ о́гненнѣй пѣсносло́вцы спасы́й о́троки: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Ангеловъ со́нмъ, человѣ́ковъ собо́ръ, Царя́ и Зижди́теля всѣ́хъ, свяще́нницы, по́йте, благослови́те, леви́ти, лю́діе, превозноси́те во вся́ вѣ́ки.

Ангельстіи чи́нове на Крестѣ́ Тя́ ви́дѣвше ви́сима, Христе́ Всецарю́, и тва́рь всю́ измѣня́юща стра́хомъ, ужасо́шася, пою́ще Твое́ человѣколю́біе.

Адъ, до́лѣ Тебе́ ви́дѣвъ, стеня́ше и подава́ше ско́ро ме́ртвыя, отъ вѣка та́мо храни́мыя, Христе́, пѣсносло́вящія Твое́ человѣколю́біе.

Сотворя́я чудеса́, Христе́, изря́дная, во́лею воздви́женъ бы́лъ еси́ на Кре́стъ, и съ ме́ртвыми совокупи́лся еси́, Умертви́вый а́да, и вся́ му́жествомъ отрѣши́лъ еси́ у́зники.

Слѣпа́го воочи́лъ еси́, къ Тебѣ́ приступи́вша, Христе́, сему́ повелѣ́вый въ Силоа́мову купѣ́ль ити́, омы́тися и прозрѣ́ти, и Бо́га Тя́ проповѣ́дати, пло́тію яви́вшагося во спасе́ніе мíра.

Благослови́мъ Отца́, и Сы́на, и Свята́го Ду́ха, Го́спода.

Тро́иченъ: Тро́ице Нераздѣ́льная, Еди́нице Неслія́нная, Бо́же вся́ческихъ и Зижди́телю всѣ́хъ, пѣсносло́вящія и вѣ́рно покланя́ющіяся держа́вѣ Твое́й отъ вся́кихъ искуше́ній спаса́й.

И ны́нѣ, богоро́диченъ: Дѣ́во Пречи́стая, Богоблагода́тная, Твоего́ моли́ Сы́на всегда́, да не посрами́тъ мя́ въ де́нь осужде́нія, но сочте́тъ избра́ннымъ овца́мъ.

Хва́лимъ, благослови́мъ, [покланя́емся Го́сподеви, пою́ще и превознося́ще во вся́ вѣ́ки].

Катава́сія: Изъ Отца́ пре́жде вѣ́къ рожде́ннаго Сы́на и Бо́га, и въ послѣ́дняя лѣ́та воплоще́ннаго отъ Дѣ́вы Ма́тере, свяще́нницы, по́йте, лю́діе, превозноси́те во вся́ вѣ́ки.

Честнѣ́йшую... не пое́мъ.

Пѣ́снь 9.

Ирмо́съ: Яко сотвори́ Тебѣ́ вели́чія Си́льный, Дѣ́ву я́вль Тя́ чи́сту по рождествѣ́, я́ко ро́ждшую безъ сѣ́мене Своего́ Творца́, тѣ́мъ Тя́, Богоро́дице, велича́емъ.

На Дре́вѣ Кре́стнѣмъ пригвозди́лся еси́, Христе́ Бо́же, и вся́ побѣди́лъ еси́ вра́жія сопроти́вная нача́ла, и пе́рвую кля́тву потреби́лъ еси́, Спа́се, тѣ́мже Тя́ по до́лгу велича́емъ.

Яко ви́дѣ Тя́, Сло́ве, а́дъ до́лѣ съ душе́ю, воздохну́, и вся́ ме́ртвыя стра́хомъ отрѣши́, позна́вшія держа́ву вла́сти Твоея́, тѣ́мже Тя́ по до́лгу велича́емъ.

Зна́менія сотворя́юща и чудеса́ стра́шная, собо́ръ евре́йскій зря́, за́вистію уби́ Плѣни́вшаго а́дъ Воскресе́ніемъ Свои́мъ, и всѣ́хъ, я́ко Си́ленъ, Возставля́ющаго.

Воста́лъ еси́, я́коже ре́клъ еси́, Животода́вче, изъ ме́ртвыхъ, и яви́лся еси́ святы́мъ ученико́мъ по воста́ніи, зна́менія сотвори́вый и воочи́вый слѣпы́я, съ ни́ми же Тя́ во вѣ́ки велича́емъ.

Сла́ва, тро́иченъ: Свѣ́тъ Отца́ чту́, Свѣ́тъ сла́влю и Сы́на, Свѣ́тъ воспѣва́ю Ду́ха Пра́ваго — Еди́нъ Свѣ́тъ Нераздѣ́льный, въ Тріе́хъ Ли́цѣхъ разумѣва́емый, Бо́га Царя́ всея́ тва́ри.

И ны́нѣ, богоро́диченъ: Яви́вшися простра́ннѣйшая небе́съ, Дѣ́во Чи́стая, вмѣсти́ла еси́ пло́тію Бо́га Неопи́саннаго, и родила́ еси́ всѣ́хъ Избавле́ніе, вѣ́рою несумне́нною воспѣва́ющихъ Тя́.

Катава́сія: Тя́ па́че ума́ и словесе́ Ма́терь Бо́жію, въ лѣ́то Безлѣ́тнаго неизрече́нно ро́ждшую, вѣ́рніи единому́дренно велича́емъ.

Ексапостила́рій пра́здника: Пло́тію усну́въ...

Сла́ва, слѣпа́го. Подо́бенъ:

Умныя мои́ о́чи, ослѣпле́нныя, Го́споди, отъ мра́чнаго грѣха́, Ты́ просвѣти́, вложи́въ, Ще́дре, смире́ніе, и покая́нія омы́й слеза́ми.

И ны́нѣ, подо́бенъ: Жены́ услы́шите.

Мимоиды́й Спа́съ на́шъ, обрѣ́те слѣ́па безъ о́чію, плю́нувъ на зе́млю и сотвори́въ бре́ніе, пома́за его́, къ Силоа́му посла́ ити́ и умы́тися. Онъ же, умы́вся, пріи́де, ви́дя свѣ́тъ Тво́й, Христе́ мо́й.

На хвали́техъ поста́вимъ стихо́въ 8 и пое́мъ стихи́ры воскре́сны, гла́съ 5:

Го́споди, запеча́тану гро́бу отъ беззако́нниковъ, проше́лъ еси́ изъ гро́ба, я́коже роди́лся еси́ отъ Богоро́дицы: не уразумѣ́ша, ка́ко воплоти́лся еси́, безпло́тніи Твои́ а́нгели; не чу́вствоваша, когда́ воскре́слъ еси́, стрегу́щіи Тя́ во́ини. Обоя́ бо запечатлѣ́шася испыту́ющимъ, яви́шася же чудеса́ кла́няющимся вѣ́рою та́инству, е́же воспѣва́ющимъ, возда́ждь на́мъ ра́дость и ве́лію ми́лость.

Го́споди, вереи́ вѣ́чныя сокруши́вый и у́зы растерза́вый, отъ гро́ба воскре́слъ еси́, оста́вль Твоя́ погреба́льная во свидѣ́тельство и́стиннаго тридне́внаго Твоего́ погребе́нія, и предвари́лъ еси́ въ Галиле́и, въ пеще́рѣ Стрего́мый. Ве́ликая Твоя́ ми́лость, Непостижи́ме Спа́се, поми́луй и спаси́ на́съ!

Го́споди, жены́ теко́ша на гробъ ви́дѣти Тя́, Христа́, на́съ ра́ди пострада́вшаго, и прише́дше, обрѣто́ша а́нгела на ка́мени сѣдя́ща, стра́хомъ отва́льшемся, и къ ни́мъ возопи́, глаго́ля: воскре́се Госпо́дь, рцы́те ученико́мъ, я́ко воскре́се отъ ме́ртвыхъ Спаса́яй ду́ши на́ша.

Го́споди, я́коже изше́лъ еси́ отъ запеча́таннаго гро́ба, та́ко вше́лъ еси́ и две́ремъ заключе́нымъ ко ученико́мъ Твои́мъ, показу́я и́мъ тѣле́сная страда́нія, я́же подъя́лъ еси́, Спа́се Долготерпѣли́вый: я́ко отъ сѣ́мене Дави́дова, я́звы претерпѣ́лъ еси́; я́ко Сы́нъ же Бо́жій, мíръ свободи́лъ еси́. Вели́кая Твоя́ ми́лость, Непостижи́ме Спа́се, поми́луй и спаси́ на́съ!

Ины стихи́ры, анато́ліевы:

Го́споди, Царю́ вѣко́въ и Тво́рче всѣ́хъ, на́съ ра́ди распя́тіе и погребе́ніе пло́тію пріе́мый, да на́съ отъ а́да свободи́ши всѣ́хъ. Ты́ еси́ Бо́гъ на́шъ, ра́звѣ Тебѣ́ ино́го не вѣ́мы.

Го́споди, пресія́ющая Твоя́ чудеса́ кто́ исповѣ́сть? Или́ кто́ возвѣсти́тъ стра́шная Твоя́ та́инства? Вочеловѣ́чивыйся бо на́съ ра́ди, я́ко Са́мъ восхотѣ́лъ еси́, держа́ву яви́лъ еси́ си́лы Твоея́. Кресто́мъ бо Твои́мъ разбо́йнику ра́й отве́рзлъ еси́, и погребе́ніемъ Твои́мъ вереи́ а́довы сокруши́лъ еси́, Воскресе́ніемъ же Твои́мъ вся́ческая обогати́лъ еси́. Благоутро́бне Го́споди, сла́ва Тебѣ́!

[Сти́хъ: Воскресни́, Го́споди Бо́же мой, да вознесе́тся рука́ Твоя́, не забу́ди убо́гихъ Твои́хъ до конца́.]

Мѵроно́сицы жены́ гро́ба Твоего́ дости́гша, зѣло́ ра́но иска́ху Тебе́ мѵ́ры пома́зати, Безсме́ртнаго Сло́ва и Бо́га, и а́нгела глаго́лы огласи́вшася, возвраща́хуся ра́достію, апо́столомъ возвѣсти́ти я́вѣ, я́ко воскре́слъ еси́, Животе́ всѣ́хъ, и по́далъ еси́ мíрови очище́ніе и ве́лію ми́лость.

Сти́хъ: При́зри на мя́ и поми́луй мя́.

Самогла́сенъ слѣпа́го, гла́съ 8:

За милосе́рдіе ми́лости воплоти́выйся, Христе́ Бо́же, свѣ́та лише́ннаго отъ утро́бы, милосе́рдіемъ неизрече́нныхъ щедро́тъ, сія́нія Боже́ственнаго сподо́билъ еси́, сего́ зѣ́ницамъ пе́рстію созда́тельными пе́рсты Твои́ми прикосну́выйся. Са́мъ и ны́нѣ, Свѣтода́телю, и на́ша озари́ душе́вная чу́вства, я́ко еди́нъ Независтнода́тель.

Сла́ва, гла́съ 8:

Кто́ возглаго́летъ си́лы Твоя́, Христе́? или́ кто́ изочте́тъ чуде́съ Твои́хъ мно́жества? Сугу́бъ бо, я́ко ви́дѣнъ, бы́лъ еси́ на земли́ за бла́гость, сугу́бы и цѣльбы́ неду́гующимъ подава́лъ еси́: не то́чію бо тѣле́сныя о́чи отве́рзлъ еси́, и́же отъ утро́бы слѣпо́му, но и душе́вныя. Тѣ́мже Бо́га Тя́ исповѣ́даше тая́щагося и всѣ́мъ подаю́ща ве́лію ми́лость.

И ны́нѣ: Преблагослове́нна еси́... Славосло́віе вели́кое и отпу́стъ.

Стихи́ра у́тренняя, гла́съ 8:

Марíины сле́зы не всу́е пролива́ются те́плѣ: се́ бо сподо́бися и уча́щихъ а́нгеловъ, и видѣ́нія Самаго́ Іису́са. Но еще́ земна́я му́дрствуетъ, я́ко жена́ немощна́я, тѣ́мже и отсыла́ется не прикаса́тися Христу́, но оба́че проповѣ́дница посыла́ется Твои́мъ ученико́мъ, и́мже благовѣствова́ніе нося́щи, е́же ко Оте́ческому жре́бію восхо́дъ возвѣща́ющи. Съ не́юже сподо́би и на́съ явле́нія Твоего́, Влады́ко Го́споди.



НА ЛИТУРГІИ,

Блаже́нна гла́са 5-го:

Разбо́йникъ на Крестѣ́ Бо́га Тя́ бы́ти вѣ́ровавъ, Христе́, исповѣ́да Тя́ чи́стѣ отъ се́рдца, — помяни́ мя́, Го́споди, — вопія́, — во Ца́рствіи Твое́мъ!

Иже на Дре́вѣ Кре́стнѣмъ Жи́знь Процвѣ́тшаго ро́ду на́шему, и Изсуши́вша ю́же отъ дре́ва кля́тву, я́ко Спа́са и Содѣ́теля согла́сно воспои́мъ.

Распе́ншемуся Тебѣ́, Христе́, посредѣ́ двою́ осужде́нною разбо́йнику, еди́нъ у́бо ху́ля Тя́, осужде́нъ бы́сть пра́веднѣ, другíй же, исповѣ́дая Тя́, въ ра́й всели́ся.

Ко апо́столомъ ли́ку прише́дша жены́ честны́я, возопи́ша: Христо́съ воскре́се! Яко Влады́цѣ и Содѣ́телю Тому́ поклони́мся.

И отъ кано́на слѣпа́го, пѣ́снь 6. По вхо́дѣ тропа́рь воскре́сенъ. Сла́ва, конда́къ: Душе́вныма очи́ма ослѣпле́нъ... И ны́нѣ, Па́схи: Аще и во гро́бъ... Проки́менъ, гла́съ 8: Помоли́теся и воздади́те Го́сподеви Бо́гу на́шему. Сти́хъ: Вѣ́домъ во Іуде́и Бо́гъ, во Изра́или ве́ліе и́мя Его́. Апо́столъ Дѣя́ній, зача́ло 38: Бы́сть иду́щимъ апо́столомъ на моли́тву... Аллилу́ія, гла́съ 8: При́зри на мя́ и поми́луй мя́. Сти́хъ: Стопы́ моя́ напра́ви по словеси́ Твоему́. Ева́нгеліе Іоа́нна, зача́ло 34: Мимоиды́й Іису́съ, ви́дѣ человѣка, слѣ́па отъ рождества́... Прича́стный: Тѣ́ло Христо́во... Другíй: Хвали́те Го́спода съ небе́съ...

[Зри́:] Слу́жбу свята́го, случи́вшагося въ недѣ́лю сію́, пое́мъ на повече́ріи.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 126 – 136.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.