Церковный календарь
Новости


2017-05-28 / russportal
"Тріодь Цвѣтная". Служба въ недѣлю 8-ю. День Святой Троицы. Пятидесятница (1864)
2017-05-28 / russportal
"Тріодь Цвѣтная". Служба въ субботу 7-й седмицы. Троицкая поминальная суббота (1864)
2017-05-28 / russportal
Прав. Іоаннъ Кронштадтскій. Слово (4-е) въ недѣлю свв. отцевъ Никейскаго Собора (1894)
2017-05-28 / russportal
Прав. Іоаннъ Кронштадтскій. Слово (3-е) въ недѣлю свв. отцевъ Никейскаго Собора (1894)
2017-05-28 / russportal
Прав. Іоаннъ Кронштадтскій. Слово (2-е) въ недѣлю свв. отцевъ Никейскаго Собора (1894)
2017-05-28 / russportal
Прав. Іоаннъ Кронштадтскій. Слово (1-е) въ недѣлю свв. отцевъ Никейскаго Собора (1894)
2017-05-27 / russportal
Архіеп. Аверкій (Таушевъ). Рождественское привѣтствіе (1975)
2017-05-27 / russportal
Архіеп. Аверкій (Таушевъ). Духовный большевизмъ (1975)
2017-05-27 / russportal
И. А. Ильинъ. О признаніи революціи (1925)
2017-05-27 / russportal
И. А. Ильинъ. Отрицателямъ меча (1925)
2017-05-26 / russportal
Архіеп. Аверкій (Таушевъ). Миръ и непримиримость (1975)
2017-05-26 / russportal
Архіеп. Аверкій (Таушевъ). Къ 40-лѣтію паденія русскаго народа (1975)
2017-05-26 / russportal
И. А. Ильинъ. Подвигъ патріотическаго единенія (1925)
2017-05-26 / russportal
И. А. Ильинъ. Самообладаніе и самообузданіе (1925)
2017-05-25 / russportal
И. А. Ильинъ. Идея Корнилова (1925)
2017-05-25 / russportal
И. А. Ильинъ. Кто мы? (1925)
Новости въ видѣ
RSS-канала: .
Сегодня - воскресенiе, 28 мая 2017 г. Сейчасъ на порталѣ посѣтителей - 16.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВО ВТОРНИКЪ ШЕСТЫЯ СЕДМИЦЫ ПО ПАСЦѢ.

ВЪ ПОНЕДѢЛЬНИКЪ ВЕЧЕРА,

На Го́споди воззва́хъ... поста́вимъ стихо́въ 6 и пое́мъ стихи́ры пра́здника 3 и мине́и 3.

Стихи́ры пра́здника, гла́съ 5. Подо́бенъ: Ра́дуйся, по́стниковъ.

Усты́, и душе́ю, и умо́мъ, отъ пе́рсти Зижди́тельски и плюнове́нія оче́съ зѣ́ницы Да́вшаго, и о́бщее просвѣще́ніе, и́же пре́жде слѣпы́й исповѣ́даше тва́ремъ всемíрнаго Смотри́теля и Строи́теля, за милосе́рдіе то́кмо созда́нія вочеловѣ́чившагося, и проповѣ́даше, я́ко Бо́га Всеси́льнаго. Его́же кни́жницы за́вистію, и е́же къ ни́мъ бесѣ́дованіе отню́дъ не могу́ще зрѣ́ти, слѣпотству́юще мно́жае, изгна́на отъ собо́рища су́дятъ, иногда́ зѣ́ницы Да́вшаго слѣпо́му душе́вныя и тѣле́сныя.

Побѣ́ду до́бльствія слѣпы́й на ви́дящихъ до конца́ взя́тъ, и́бо Содѣ́теля сего́ и Созда́теля всѣ́хъ и слѣпы́й сы́й узрѣ́, ви́дѣвъ воочевле́ніе, созда́вшееся отъ плюнове́нія, и си́мъ еди́нѣмъ позна́вый Просвѣти́вшаго, и Сы́на Бо́жія, и Влады́ку всемíрнаго. Его́же ви́дяще, за́висти зло́бою ослѣпля́еми весьма́ не ви́дѣша. И та́ко сія́ многосугу́бо ви́дяще, отъ сего́ чуде́съ дѣ́йствія пресла́вная еди́нѣми глаго́лы.

Сомни́теленъ кни́жникомъ слѣпы́мъ, воочи́выйся пре́жде слѣпы́й сы́й яви́ся, я́ко не́гли ника́коже ви́дя, но ло́жно е́же зрѣ́ти Спа́са ра́ди притворя́яйся, ослѣпля́тися хотя́щимъ помраче́ньми пи́смене, въ ни́хже сія́етъ сла́дкое вои́стинну Со́лнце, субботодѣ́йствіе обновля́яй, содѣ́лавый мнѣ́, и́же сѣно́вное сего́ свѣтодѣ́яй, и покрове́ніе взе́мляй, и свѣ́тъ и́же въ си́хъ пре́жде слѣпы́мъ подаде́, и ны́нѣ зря́ще, Свѣтопода́теля мíрови проповѣ́дуетъ.

Сла́ва, и ны́нѣ, гла́съ 8:

Пра́вды Со́лнце мы́сленное, Христе́ Бо́же, изъ утро́бы свѣ́та лише́ннаго, Твои́мъ пречи́стымъ прикоснове́ніемъ просвѣти́вшее обою́ду, и на́ша о́чи душе́вныя озари́вшее, сы́ны дне́ покажи́, да вѣ́рою вопіе́мъ Ти́: мно́гое Твое́ и неизрече́нное е́же на на́съ благоутро́біе, Человѣколю́бче, сла́ва Тебѣ́!

На стихо́внѣ стихи́ры, гла́съ 5:

Воскресе́ніе дая́й ро́ду человѣ́ческому, я́ко овча́ на заколе́ніе веде́ся; устраши́шася сего́ кня́зи а́дстіи и взя́шася врата́ плаче́вная. Вни́де бо Ца́рь сла́вы Христо́съ, глаго́ля су́щимъ во у́захъ: изыди́те; и су́щимъ во тмѣ́: откры́йтеся.

Сти́хъ: Къ Тебѣ́ возведо́хъ о́чи мо́и, [Живу́щему на небеси́. Се́ я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́].

Го́споди, и стра́ха Твоего́ бою́ся, и лука́вое твори́ти не престаю́. Кто́ на суди́щи судіи́ не бои́тся? Или́ кто́ исцѣли́тися хотя́, врача́ прогнѣ́ваетъ, я́коже а́зъ? Долготерпѣли́ве Го́споди, на не́мощь мою́ умилосе́рдися и поми́луй мя́.

Сти́хъ: Поми́луй на́съ, Го́споди, поми́луй на́съ, [я́ко по мно́гу испо́лнихомся уничиже́нія, наипа́че напо́лнися душа́ на́ша поноше́нія гобзу́ющихъ и уничиже́нія го́рдыхъ].

Му́чениченъ: Щито́мъ вѣ́ры обо́лкшеся и о́бразомъ кре́стнымъ себе́ укрѣпи́вше, къ му́камъ му́жески вда́шася, и діа́волю ле́сть и де́рзость упраздни́ша, святíи Твои́, Го́споди. Тѣ́хъ мольба́ми, я́ко Всеси́льный Бо́гъ, мíрови ми́ръ низпосли́ и душа́мъ на́шимъ ве́лію ми́лость.

Сла́ва, и ны́нѣ, гла́съ 8:

За милосе́рдіе ми́лости воплоти́выйся, Христе́ Бо́же, свѣ́та лише́ннаго отъ утро́бы, милосе́рдіемъ неизрече́нныхъ щедро́тъ, сія́нія Боже́ственнаго сподо́билъ еси́, сего́ зѣ́ницамъ пе́рстію созда́тельными пе́рсты Твои́ми прикосну́выйся. Са́мъ и ны́нѣ, Свѣтода́телю, и на́ша озари́ душе́вная чу́вства, я́ко еди́нъ Независтнода́тель.



ВО ВТОРНИКЪ СЛѢПАГО, НА УТРЕНИ,

По 1-мъ стихосло́віи сѣда́ленъ, гла́съ 5. Подо́бенъ: Собезнача́льное Сло́во.

Го́споди, ме́ртвъ наре́клся еси́, Умертви́вый сме́рть; во гро́бѣ положи́лся еси́, Истощи́вый гро́бы; горѣ́ во́ини гро́бъ стрежа́ху, до́лѣ отъ вѣ́ка ме́ртвыя воскреси́лъ еси́. Всеси́льне и Непостижи́ме Го́споди, сла́ва Тебѣ́!

Сти́хъ: Го́споди, да не я́ростію Твое́ю обличи́ши мене́, [ниже́ гнѣ́вомъ Твои́мъ нака́жеши мене́].

Судіи́ сѣдя́щу и а́нгеломъ предстоя́щимъ, трубѣ́ глася́щей и пла́мени горя́щу, что́ сотвори́ши, душе́ моя́, ведо́ма на су́дъ? Тогда́ бо лю́тая твоя́ предста́нутъ и та́йная твоя́ облича́тся согрѣше́нія. Тѣ́мже пре́жде конца́ возопíй къ Судіи́: Бо́же, очи́сти мя́ и спаси́ мя́!

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Му́чениченъ: Сія́етъ дне́сь па́мять страстоте́рпцевъ, и́мать бо отъ небе́съ озаре́ніе: ли́къ а́нгельскій торжеству́етъ и человѣ́ческій ро́дъ спра́зднуетъ. Тѣ́мже мо́лятся Го́сподеви поми́ловатися душа́мъ на́шимъ.

Сла́ва, и ны́нѣ, богоро́диченъ:

Ма́ти Бо́жія Пресвята́я, Стѣно́ христіа́нъ, изба́ви лю́ди Твоя́ обы́чно, зову́щія къ Тебѣ́ прилѣ́жно, сопроти́въ ста́ни враго́въ и возвыша́ющихся мы́слей, да вопіе́мъ ти́: ра́дуйся, Благода́тная.

По 2-мъ стихосло́віи сѣда́ленъ, гла́съ 5. Подо́бенъ: Собезнача́льное Сло́во.

Прозрѣ́вый ви́дится слѣпы́й плюнове́ніемъ, человѣ́ческое составле́ніе пре́жде Созда́вшаго, не ви́дяй отъ рожде́нія вели́кое со́лнце. Тѣ́мже и благодаре́ніе Бо́гу возсыла́етъ отъ души́, сего́ зря́ о́бразъ, по подо́бію созда́нный, о́бразъ Созда́вшаго.

Сла́ва, и ны́нѣ, то́йже.

Пое́мъ кано́нъ пра́здника [недѣ́ли слѣпа́го], со ирмосы́, на 8 и мине́и на 4. Конда́къ и ексапостила́рій пра́здника.

На хвали́техъ стихи́ры осмогла́сника, гла́съ 5:

Го́споди, вереи́ вѣ́чныя сокруши́вый и у́зы растерза́вый, отъ гро́ба воскре́слъ еси́, оста́вль Твоя́ погреба́льная во свидѣ́тельство и́стиннаго тридне́внаго Твоего́ погребе́нія, и предвари́лъ еси́ въ Галиле́и, въ пеще́рѣ Стрего́мый. Ве́ликая Твоя́ ми́лость, Непостижи́ме Спа́се, поми́луй и спаси́ на́съ! [Два́жды.]

Мно́жества прегрѣше́ній мои́хъ пре́зри, Го́споди, отъ Дѣ́вы Рожде́йся, и вся́ очи́сти беззако́нія моя́, по́мыслъ мнѣ́ подая́й обраще́нія, я́ко еди́нъ Человѣколю́бецъ, молю́ся, и поми́луй мя́.

Му́чениченъ: Страстоте́рпцы Твои́, Го́споди, чи́ны а́нгельскія подража́вше, я́ко безпло́тніи, му́ки претерпѣ́ша, единомы́сленное упова́ніе иму́ще обѣща́нныхъ бла́гъ наслажде́ніе. Тѣ́хъ моли́твами, Христе́ Бо́же на́шъ, ми́ръ да́руй мíру Твоему́ и душа́мъ на́шимъ ве́лію ми́лость.

Сла́ва, и ны́нѣ, гла́съ 8:

Кто́ возглаго́летъ си́лы Твоя́, Христе́? или́ кто́ изочте́тъ чуде́съ Твои́хъ мно́жества? Сугу́бъ бо, я́ко ви́дѣнъ, бы́лъ еси́ на земли́ за бла́гость, сугу́бы и цѣльбы́ неду́гующимъ подава́лъ еси́: не то́чію бо тѣле́сныя о́чи отве́рзлъ еси́, и́же отъ утро́бы слѣпо́му, но и душе́вныя. Тѣ́мже Бо́га Тя́ исповѣ́даше тая́щагося и всѣ́мъ подаю́ща ве́лію ми́лость.

На стихо́внѣ стихи́ры подо́бны, гла́съ 5. Подо́бенъ: Преподо́бне о́тче.

Сія́ніе свѣтоно́сное просія́вшее зря́ще, проявле́нно въ суббо́ту, свѣтоно́снаго слѣпца́, зако́нми Моисе́я смуща́еміи, нра́вомъ ослѣпля́ющеся зря́ще сѣ́нь, осѣне́нія не разумѣ́юще покрыва́юща зако́ны, изъ него́же не ви́дѣша Свѣтодѣ́теля и сло́вомъ суббо́ты Содѣ́теля, воочи́вшаго слѣпа́го измове́ніемъ и плюнове́нія но́вымъ бренотворе́ніемъ. Съ ни́мже смѣша́еми, Бо́га того́ у́зримъ, ослѣпле́ніе фарисе́йское облича́юще зрѣ́ніемъ, е́же отъ лу́чшаго.

Сти́хъ: При́зри на мя́ и поми́луй мя́.

Утро возсія́ во тмѣ́ пребыва́ющему но́щи невидѣ́нія, многоболѣ́зненному слѣпо́му, во струя́хъ купѣ́ли Силоа́мстѣй измове́нному, свѣ́тъ очесе́мъ Боже́ственнымъ повелѣ́ніемъ. Тѣ́мже свѣтоно́сный новѣ́йшій ви́дится, мра́къ тмы́ нощетво́рныхъ зако́нныхъ изоблича́я кни́жниковъ, и помраче́нное си́хъ невидѣ́ніе возсія́ньми просвѣща́яй свѣтоно́сными, изъ ни́хже ослѣпле́ніе пре́жде сѣно́вныхъ пи́сменъ вооча́ется, отъ Сло́ва на́мъ подае́мыми свѣ́тлыми сія́ньми.

Сти́хъ: Стопы́ моя́ напра́ви по словеси́ Твоему́.

На высоту́ взы́де свѣтоно́снаго восхожде́нія, свѣ́томъ богоразу́мія просвѣ́щся слѣпы́й, терпя́ тѣле́сное и у́мное омраче́ніе, е́же отъ Сло́ва но́выми свѣтоли́тіи просвѣ́щся ве́сь, а́ще и пе́рвѣе ослѣпи́ся во обои́хъ: и Свѣтода́вца познава́етъ, и Свѣтодѣ́теля, возсія́вшаго изъ гро́ба тридне́вно, и зе́млю уясни́вшаго Свои́мъ воскресе́ніемъ, изъ него́же возсія́ свѣ́тъ возсозда́нія во тмѣ́ держи́мымъ человѣ́комъ, за благоутро́біе и ве́лію ми́лость.

Сла́ва, и ны́нѣ, гла́съ 8:

Пра́вды Со́лнце мы́сленное, Христе́ Бо́же, изъ утро́бы свѣ́та лише́ннаго, Твои́мъ пречи́стымъ прикоснове́ніемъ просвѣти́вшее обою́ду, и на́ша о́чи душе́вныя озари́вшее, сы́ны дне́ покажи́, да вѣ́рою вопіе́мъ Ти́: мно́гое Твое́ и неизрече́нное е́же на на́съ благоутро́біе, Человѣколю́бче, сла́ва Тебѣ́!

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 138 об. – 141.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.