Церковный календарь
Новости


2017-07-24 / russportal
Cвт. Іоаннъ Шанхайскій. Слово при открытіи общества "Правосл. Дѣло" (1994)
2017-07-24 / russportal
Еп. Григорій (Граббе). Догматика о. Архимандрита Іустина (Поповича) (1964)
2017-07-23 / russportal
Свщмч. Кипріанъ Карѳагенскій. Письмо (48-е), увѣщаніе къ мученичеству (1879)
2017-07-23 / russportal
Свщмч. Кипріанъ Карѳагенскій. Письмо (47-е), противъ еретиковъ (1879)
2017-07-23 / russportal
Слова преп. Симеона Новаго Богослова. Слово 28-е (1882)
2017-07-23 / russportal
Слова преп. Симеона Новаго Богослова. Слово 27-е (1882)
2017-07-22 / russportal
А. И. Купринъ. «Разсказы для дѣтей». Фіалки (1921)
2017-07-22 / russportal
А. И. Купринъ. «Разсказы для дѣтей». Скворцы (1921)
2017-07-22 / russportal
А. С. Пушкинъ. "Повѣсти Бѣлкина". Барышня-крестьянка (1921)
2017-07-22 / russportal
А. С. Пушкинъ. "Повѣсти Бѣлкина". Станціонный смотритель (1921)
2017-07-22 / russportal
Преп. Епифаній Премудрый. Житіе преп. Сергія Радонежскаго. Глава 5-я (1903)
2017-07-22 / russportal
Преп. Епифаній Премудрый. Житіе преп. Сергія Радонежскаго. Глава 4-я (1903)
2017-07-21 / russportal
Повѣсть о явленіи образа Пресв. Богородицы въ Казани, и о чудесахъ, бывшихъ отъ него (1912)
2017-07-21 / russportal
"Проповѣдн. хрестоматія". Поученіе въ день Казанской иконы Божіей Матери (1965)
2017-07-20 / russportal
"Русскія дѣтскія сказки". Василиса Прекрасная (1921)
2017-07-20 / russportal
"Русскія дѣтскія сказки". Морозко (1921)
Новости въ видѣ
RSS-канала: .
Сегодня - вторникъ, 25 iюля 2017 г. Сейчасъ на порталѣ посѣтителей - 4.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ СРЕДУ ШЕСТЫЯ СЕДМИЦЫ. ОТДАНІЕ ПРАЗДНИКА ПАСХИ.

ВО ВТОРНИКЪ ВЕЧЕРА,

По 9-мъ часѣ́ твори́тъ свяще́нникъ нача́ло съ кади́ломъ и со свѣще́ю, ца́рскимъ две́ремъ отве́рзеннымъ, и пое́тъ: Христо́съ воскре́се.., со стихи́. И по стисѣ́хъ псало́мъ: Благослови́, душе́ моя́, Го́спода. И ектенія́. Та́же каѳи́сма обы́чная.

На Го́споди воззва́хъ... пое́мъ стихи́ры самогла́сны слѣпа́го на 6, гла́съ 2:

Слѣпы́й роди́выйся, въ свое́мъ по́мыслѣ глаго́лаше: еда́ а́зъ грѣ́хъ ра́ди роди́тельныхъ роди́хся безъ о́чію? еда́ а́зъ за невѣ́ріе язы́ковъ роди́хся во обличе́ніе? Не домышля́юся вопроша́ти: когда́ но́щь, когда́ де́нь? Не терпи́та ми́ но́зѣ ка́меннаго претыка́нія, не ви́дѣхъ бо со́лнца сія́юща, ниже́ во о́бразѣ мене́ Созда́вшаго. Но молю́тися, Христе́ Бо́же, при́зри на мя́ и поми́луй мя́!

Мимоходя́ Іису́съ отъ святи́лища, обрѣ́те человѣ́ка слѣ́па отъ рожде́нія, и умилосе́рдився, положи́ бре́ніе на о́чію его́ и рече́ къ нему́: иди́, умы́йся въ Силоа́мѣ. И умы́вся, прозрѣ́, сла́ву возсыла́я Бо́гу. Сосѣ́ди же его́ глаго́лаху ему́: кто́ твои́ зѣ́ницы отве́рзе, и́хже никто́же отъ зря́щихъ исцѣли́ти возмо́же? Онъ же возопи́въ, рече́: Человѣ́къ, Іису́съ глаго́лемый, Онъ ми́ рече́, — умы́йся въ Силоа́мѣ, — и прозрѣ́хъ. То́й е́сть вои́стинну, Его́же рече́ Моисе́й въ зако́нѣ, Христа́-Мессíю, То́й е́сть Спа́съ ду́шамъ на́шимъ!

Гла́съ 4:

Все́ житіе́ слѣпы́й но́щь помышля́я, возопи́ къ Тебѣ́: Го́споди, отве́рзи ми́ зѣ́ницы, Сы́не Дави́довъ, Спа́се на́шъ, да со всѣ́ми и а́зъ воспою́ Твою́ си́лу.

Гла́съ 5:

Го́споди, мимоходя́ путе́мъ, обрѣ́лъ еси́ человѣ́ка слѣ́па отъ рожде́нія, и удивле́ни бы́вше ученицы́, вопроша́ху Тя́, глаго́люще: Учи́телю, кто́ согрѣши́? се́й ли, или́ роди́тели его́, да слѣ́пъ роди́ся? Ты́ же, Спа́се мо́й, возопи́лъ еси́ къ ни́мъ: ни се́й согрѣши́, ни роди́тели его́, но да явя́тся дѣла́ Бо́жія на не́мъ. Мнѣ́ подоба́етъ дѣ́лати дѣла́ Посла́вшаго Мя́, я́же никто́же мо́жетъ дѣ́лати. И сія́ ре́къ, плю́нувъ до́лу и бре́ніе сотво́рь, пома́залъ еси́ о́чи его́, ре́къ къ нему́: иди́, умы́йся въ Силоа́мстѣй купѣ́ли. Онъ же умы́вся, здра́въ бы́сть и вопія́ше къ Тебѣ́, — вѣ́рую, Го́споди! — и поклони́ся Тебѣ́. Тѣ́мже вопіе́мъ и мы́: поми́луй на́съ!

Гла́съ 8:

Пра́вды Со́лнце мы́сленное, Христе́ Бо́же, изъ утро́бы свѣ́та лише́ннаго, Твои́мъ пречи́стымъ прикоснове́ніемъ просвѣти́вшее обою́ду, и на́ши о́чи душе́вныя озари́вшее, сы́ны дне́ покажи́, да вѣ́рою вопіе́мъ Ти́: мно́гое Твое́ и неизрече́нное е́же на на́съ благоутро́біе, Человѣколю́бче, сла́ва Тебѣ́!

За милосе́рдіе ми́лости воплоти́выйся, Христе́ Бо́же, свѣ́та лише́ннаго отъ утро́бы, милосе́рдіемъ неизрече́нныхъ щедро́тъ, сія́нія Боже́ственнаго сподо́билъ еси́, сего́ зѣ́ницамъ пе́рстію созда́тельными пе́рсты Твои́ми прикосну́выйся. Са́мъ и ны́нѣ, Свѣтода́телю, и на́ша озари́ душе́вная чу́вства, я́ко еди́нъ Независтнода́тель.

Сла́ва, и ны́нѣ, гла́съ 8:

Кто́ возглаго́летъ си́лы Твоя́, Христе́? или́ кто́ изочте́тъ чуде́съ Твои́хъ мно́жества? Сугу́бъ бо, я́ко ви́дѣнъ, бы́лъ еси́ на земли́ за бла́гость, сугу́бы и цѣльбы́ неду́гующимъ подава́лъ еси́: не то́чію бо тѣле́сныя о́чи отве́рзлъ еси́, и́же отъ утро́бы слѣпо́му, но и душе́вныя. Тѣ́мже Бо́га Тя́ исповѣ́даше тая́щагося и всѣ́мъ подаю́ща ве́лію ми́лость.

Проки́менъ дне́.

На стихо́внѣ стихи́ра, гла́съ 5:

Тебе́, воплоще́ннаго Спа́са Христа́ и небе́съ не разлучи́вшася, во гла́сѣхъ пѣ́ній велича́емъ, я́ко Кре́стъ и сме́рть прія́лъ еси́ за ро́дъ на́шъ, я́ко Человѣколю́бецъ Госпо́дь, испрове́ргій а́дова врата́, тридне́вно воскре́слъ еси́, спаса́я ду́ши на́ша.

Та́же: Да воскре́снетъ Бо́гъ и расточа́тся врази́ Его́... И пое́мъ стихи́ры Па́схи съ припѣ́вы и́хъ: Па́сха свяще́нная на́мъ дне́сь показа́ся... и про́чая. Сла́ва, и ны́нѣ: Воскресе́нія де́нь... И пото́мъ: Христо́съ воскре́се.., съ пѣ́ніемъ, еди́ножды. Та́же: Ны́нѣ отпуща́еши... Трисвято́е, и по Отче на́шъ... Тропа́рь воскре́снъ, гла́съ 5: Собезнача́льное Сло́во... Сла́ва, и ны́нѣ, богоро́диченъ его́. И ектенія́: Поми́луй на́съ, Бо́же... И обы́чный отпу́стъ глаго́летъ іере́й безъ креста́: Воскресы́й изъ ме́ртвыхъ... И свята́го дне́ помина́етъ. И многолѣ́тны.

[Зри́:] На повече́ріи, по Досто́йнѣ... и по трисвято́мъ, конда́къ слѣпа́го. Сла́ва, и ны́нѣ, Па́схи: Аще и во гро́бъ...

[Зри́:] Полу́нощницу же пое́мъ по обы́чаю, съ каѳи́смою. По 1-мъ трисвято́мъ, вмѣ́сто: Се́ Жени́хъ гряде́тъ.., глаго́лемъ тропа́рь воскре́сенъ: Собезнача́льное Сло́во... Сла́ва, и ны́нѣ: богоро́диченъ его́. По 2-мъ трисвято́мъ, вмѣ́сто: Помяни́, Го́споди, я́ко Бла́гъ.., глаго́лемъ конда́къ Па́схи: Аще и во гро́бъ... Посемъ: Господи, помилуй, 12. И отпустъ. Молитвы же: Помяни́, Го́споди, въ наде́жди.., не глаго́лемъ.



ВЪ СРЕДУ 6-Я СЕДМИЦЫ ПО ПАСЦѢ, НА УТРЕНИ,

Нача́ло твори́тъ свяще́нникъ: Сла́ва Святѣ́й, и Единосу́щнѣй.., по обы́чаю, съ кади́ломъ и со стихи́, я́ко изобрази́ся ве́чера. И по стисѣ́хъ глаго́летъ настоя́тель или́ чте́цъ: Сла́ва въ вы́шнихъ Бо́гу... И шестопса́лміе по обы́чаю. На Бо́гъ Госпо́дь: Тропа́рь воскре́сенъ, гла́съ 5: Собезнача́льное Сло́во.., два́жды. Сла́ва, и ны́нѣ, богоро́диченъ его́. По 1-мъ стихосло́віи сѣда́ленъ воскре́сенъ. Сла́ва, и ны́нѣ, богоро́диченъ [пи́саны въ недѣ́лю слѣпа́го]. И чте́ніе Іоа́нна.

По 2-мъ стихосло́віи сѣда́ленъ, гла́съ 5:

Отцу́ и Ду́хови Собезнача́льный, Иже свѣ́томъ, я́ко ри́зою, одѣва́яйся, человѣколю́бно въ на́ше естество́ облече́ся, и неду́ги человѣ́ческія отгоня́я я́ко Бо́гъ, просвѣти́ и зѣ́ницы отъ ложе́снъ ма́тернихъ лише́ннаго свѣ́та. [Два́жды.]

Воскресе́ніе Христо́во... Псало́мъ 50-й.

Кано́ны три́: Па́сцѣ, со ирмосы́, на 6, и слѣпа́го на 4, и предпра́зднству Вознесе́нія на 4.

Кано́нъ предпра́зднству Вознесе́нія, его́же краестро́чіе по алфави́ту, гла́съ 5:

Пѣ́снь 1. Ирмо́съ: Коня́ и вса́дника...

Горѣ́ ко Отцу́ Христо́съ восхо́дитъ, и прино́ситъ пло́ть, ю́же отъ на́съ воспрія́тъ. Того́ воспои́мъ въ похвале́ніи дне́сь, побѣ́дную пѣ́снь пою́ще. [Два́жды.]

[Сла́ва:] Кни́ги писа́ній Боже́ственныхъ и про́повѣди прему́дрыхъ богоглаго́льникъ коне́цъ я́вѣ прія́ша: по воста́ніи бо Влады́ка восхо́дитъ со сла́вою въ небе́сная.

[И ны́нѣ:] Земля́ та́йно лику́етъ, и небе́сная весе́лія исполня́ются о вознесе́ніи Христа́, дре́вле разстоя́щаяся соедини́вшаго благода́тію и Евино прегражде́ніе разори́вшаго.

Катава́сія: Спаси́телю Бо́гу, [въ мо́ри лю́ди немо́крыми нога́ми наста́вльшему и фарао́на со всево́инствомъ пото́пльшему, Тому́ еди́ному пои́мъ, я́ко просла́вися].

Пѣ́снь 3. Ирмо́съ: Водрузи́вый на ничесо́мже зе́млю...

Связа́въ Свое́ю сме́ртію, Сло́ве, сме́рть, изъ ме́ртвыхъ воскре́слъ еси́ я́вѣ тридне́венъ, и къ небе́снымъ, Спа́се, возше́лъ еси́ со сла́вою, пѣсносло́вящимъ безпло́тнымъ Твое́ смотре́ніе неизрече́нное. [Два́жды.]

[Сла́ва:] Прише́лъ еси́ къ земны́мъ, Христе́, кромѣ́ тѣ́ла, и обле́кся въ пло́ть, Кре́стъ претерпѣ́лъ еси́, и воскре́съ изъ ме́ртвыхъ, возше́лъ еси́ со сла́вою къ началосвѣ́тному Отцу́ Твоему́, умиротвори́вый вся́ческая.

[И ны́нѣ:] Поиска́въ, Христе́, на земли́ заблу́ждшее овча́, незаблу́днымъ, Сло́ве, сіе́ счини́лъ еси́, и возне́сся къ небесе́мъ, сѣ́лъ еси́ во сла́вѣ одесну́ю Твоего́ Роди́теля. Сла́ва мно́гому благоутро́бію Твоему́!

Катава́сія: Си́лою Креста́ Твоего́, Христе́, [утверди́ мое́ помышле́ніе, во е́же пѣ́ти и сла́вити спаси́тельное Твое́ Вознесе́ніе].

Конда́къ слѣпа́го, гла́съ 4: Душе́вныма очи́ма... И и́косъ.

Та́же сѣда́ленъ, гла́съ 1. Подо́бенъ: Гро́бъ Тво́й, Спа́се.

Воочи́лъ еси́, Христе́, отъ утро́бы рожде́ннаго безъ оче́съ, показа́вый іуде́емъ, Спа́се мой, сла́ву Твою́ неизрече́нную и я́ко Свѣ́тъ всѣ́хъ еси́; но за́вистію Тя́ ослѣпле́нніи умо́мъ навѣ́тующе, живота́ Пода́теля умертви́ти поуща́хуся.

Сла́ва, и ны́нѣ, подо́бенъ:

Роди́лся еси́, я́ко Ты́, Спа́се мо́й, восхотѣ́вый, яви́лся же па́ки еси́, я́ко Ты восхотѣ́лъ еси́, и пострада́лъ еси́, я́ко Человѣ́къ, я́ко Бо́гъ же воскре́слъ еси́. На небеса́ со сла́вою возше́лъ еси́, и возве́лъ еси́ человѣ́ческое существо́, и сла́вою удобри́лъ еси́.

Пѣ́снь 4. Ирмо́съ: Боже́ственное Твое́ разумѣ́въ...

Пре́жде грѣхо́мъ осужде́нное естество́ на́ше, Всецарю́, Твои́мъ прія́тіемъ поми́ловася, пѣсносло́вящее Твое́ со стра́хомъ Воста́ніе и Боже́ственное Вознесе́ніе.

Дивя́тся безпло́тныхъ чи́ни, смотря́юще Тя́, Христе́, нося́ща тѣ́ло земно́е, и возше́дша на о́блакъ, и къ небе́снымъ восходя́ща.

Сла́ва: Ви́дѣвше очервле́ны ри́зы Твоя́, Христе́ Всецарю́, Твои́мъ восхо́домъ ужасо́шася а́нгельскія си́лы, и стра́хомъ, и ра́достію поклони́шася.

И ны́нѣ: Воспле́щимъ рука́ма: Госпо́дь, воста́въ изъ ме́ртвыхъ, на небеса́ взы́де, повину́вшимся Ему́ а́нгеломъ, я́ко Творцу́ и Бо́гу на́шему.

Катава́сія: Услы́шахъ слу́хъ си́лы Креста́, [я́ко ра́й отве́рзеся и́мъ, и возопи́хъ: сла́ва си́лѣ Твое́й, Го́споди].

Пѣ́снь 5. Ирмо́съ: Одѣя́йся свѣ́томъ...

Разрѣши́въ осужде́ніе человѣ́чества, Христо́съ воскре́се и вознесе́ся къ небе́снымъ, Отчимъ сосѣдѣ́ніемъ поче́тъ, и́хже возлюби́. [Два́жды.]

Сла́ва: По воскресе́ніи радостнотвори́вый, Христе́, ученики́ Твоя́, возше́лъ еси́ горѣ́ къ Твоему́ Роди́телю, Его́же не разлучи́лся еси́, а́ще и человѣ́комъ бесѣ́довалъ еси́.

И ны́нѣ: Зако́ну предсѣ́нія и проповѣ́данія богоглаго́ливыхъ испо́лнивъ, Христе́, возше́лъ еси́, о́блаку Тя́ подъе́мшу, Спа́се, къ небе́снымъ.

Катава́сія: Утренююще, вопіе́мъ Ти́: [Го́споди, спаси́ ны, Ты́ бо еси́ Бо́гъ на́шъ, ра́звѣ бо Тебе́ ино́го не зна́емъ].

Пѣ́снь 6. Ирмо́съ: Неи́стовствующееся бу́рею...

Стра́нное видѣ́ніе яви́лся еси́ а́нгеломъ, человѣ́чь зра́къ нося́, восхо́домъ Твои́мъ стра́шнымъ, Человѣколю́бче, тѣ́мже со стра́хомъ воспѣва́емъ Тя́. [Два́жды.]

Сла́ва: Всѣ́хъ Госпо́дь со сла́вою восхо́дитъ свѣ́тло къ Своему́ Безнача́льному Роди́телю, вся́ тва́рь ны́нѣ пра́зднуетъ, лику́ющи.

И ны́нѣ: Вся́къ язы́къ дне́сь да вопіе́тъ: въ воскликнове́ніи Христо́съ взы́де и въ трубы́ Боже́ственномъ гла́сѣ къ небесе́мъ, и́хже не оста́ви.

Катава́сія: Обы́де мя́ бе́здна, [гро́бъ мнѣ́ ки́тъ бы́сть, а́зъ же возопи́хъ къ Тебѣ́, Человѣколю́бцу, и спасе́ мя десни́ца Твоя́, Го́споди].

Конда́къ Па́сцѣ: Аще и во гро́бъ... И и́косъ. Синакса́рь мине́и.

Пѣ́снь 7. Ирмо́съ: Превозноси́мый отце́въ...

Растерза́въ средостѣ́ніе вражды́, Го́споди, Кресто́мъ и Стра́стію Твое́ю, о́блакомъ носи́мь, возше́лъ еси́ со сла́вою къ Безнача́льному Отцу́.

Тре́петни взыва́ху си́лы: возьми́те врата́, пріи́де Христо́съ, тѣ́ло земно́е нося́ и Боже́ственною Стра́стію веліа́ра умертви́въ.

Сла́ва: Что́ Твоя́ ри́зы червле́ны, Человѣколю́бче? — си́ламъ боже́ственнымъ вопроша́ющимъ. — Точи́ло ны́нѣ изгнето́хъ, — Христо́съ восходя́, вопія́ше.

И ны́нѣ: Пѣ́сньми Твое́ распя́тіе, Христе́, и Воста́ніе согла́сно сла́вимъ, свѣ́тло пра́зднующе о Вознесе́ніи честнѣ́мъ Твое́мъ во вѣ́ки.

Катава́сія: Въ пещи́ о́гненнѣй [пѣсносло́вцы спасы́й о́троки, благослове́нъ Бо́гъ, оте́цъ на́шихъ].

Пѣ́снь 8. Ирмо́съ: Тебѣ́, Вседѣ́телю...

Свѣ́тъ Тя́ отъ Свѣ́та су́щій, о́блакъ свѣ́телъ подъя́тъ отъ горы́ Ма́сличныя, всѣ́мъ зря́щимъ боже́ственнымъ ученико́мъ Твои́мъ и Тебе́ воспѣва́ющимъ во вся́ вѣ́ки.

Рука́ми псало́мски воспле́щимъ: воскре́се Христо́съ Бо́гъ на́шъ, и взы́де, отону́дуже сни́де къ на́мъ человѣколю́бно, умиротвори́вый дре́вле разстоя́щаяся.

Благослови́мъ Отца́, и Сы́на, и Свята́го Ду́ха, Го́спода.

Поя́, Дави́дъ вопіе́тъ: Христо́съ взы́де на херуви́мѣхъ Свои́хъ и возлетѣ́ я́вѣ на крилу́ у́мныхъ чино́въ. Его́же превозно́симъ во вся́ вѣ́ки.

И ны́нѣ: Яви́лся еси́ ученико́мъ, воскре́съ отъ гро́ба, и си́хъ возве́лъ еси́ на го́ру Ма́сличную, отону́дуже о́блакъ свѣ́телъ подъе́мъ, взятъ къ го́рнимъ, Христе́, Тебе́ со сла́вою.

[Хва́лимъ, благослови́мъ, покланя́емся Го́сподеви, пою́ще и превознося́ще во вся́ вѣ́ки].

Катава́сія: Изъ Отца́ пре́жде вѣ́къ [рожде́ннаго Сы́на и Бо́га и въ послѣ́дняя лѣ́та воплоще́ннаго отъ Дѣ́вы Ма́тере, свяще́нницы, по́йте, лю́діе, превозноси́те во вся́ вѣ́ки].

Честнѣ́йшую... не пое́мъ, но пое́мъ припѣ́вы Па́схи.

Пѣ́снь 9. Ирмо́съ: Иса́іе, лику́й...

Свяще́нное торжество́ вся́ тварь прино́ситъ я́вѣ Вознесе́нію Твоему́, Сло́ве Бо́жій, и́мже прине́слъ еси́ Отцу́ Твоему́, е́же отъ на́съ естество́ воспрія́лъ еси́ па́че сло́ва, Неизмѣ́нне.

Яко Бо́гъ сте́рлъ еси́ врата́ а́дова, Спа́се, и вереи́, и воскре́съ изъ ме́ртвыхъ, къ небе́снымъ восте́клъ еси́ чино́мъ а́нгельскимъ, — врата́ возми́те! — вопію́щимъ со удивле́ніемъ.

Твоему́ Боже́ственному восхо́ду дивя́щимся боже́ственнымъ ученико́мъ, предста́ша я́вственно а́нгели, тѣ́мъ вопію́ще: Его́же ви́дите восходя́ща на небеса́, Се́й пріи́детъ со сла́вою суди́ти всѣ́мъ.

Сла́ва: Еже, Христе́, дарова́лъ еси́ ми́ръ ученико́мъ, къ го́рнимъ дре́вле восходя́, то́й и на́мъ бога́тно низпосли́, въ любви́ всѣ́хъ содержа́я, я́ко да согла́сно Тебе́, Спа́са, велича́емъ.

И ны́нѣ: Свѣтоно́сная колесни́ца Со́лнца мы́сленнаго Ты́ была́ еси́ вои́стинну, Нескве́рная Чи́стая, Имже сѣдя́щіи во тмѣ́ ви́дѣша свѣ́тъ позна́нія, по до́лгу Тя́ сла́вяще.

Катава́сія: Тя́ па́че ума́ [и словесе́ Ма́терь Бо́жію, въ лѣ́то Безлѣ́тнаго неизрече́нно ро́ждшую, вѣ́рніи, единому́дренно велича́емъ].

Ексапостила́рій: Пло́тію усну́въ.., два́жды. И слѣпа́го: Умныя мои́ о́чи...

На хвали́техъ поста́вимъ стихо́въ 8 и пое́мъ стихи́ры самогла́сны, слѣпа́го 4, гла́съ 2:

Слѣпы́й роди́выйся... Мимоходя́ Іису́съ отъ святи́лища... Та́же, гла́съ 4: Все́ житіе́ слѣпы́й... Гла́съ 5: Го́споди, мимоходя́щу Ти́... [пи́саны во вто́рникъ ве́чера]. Та́же стихи́ры Па́схи, съ припѣ́вы и́хъ. Сла́ва, и ны́нѣ, гла́съ 5: Воскресе́нія де́нь... Та́же: Христо́съ воскре́се.., я́коже указа́ся ве́черъ.

И славосло́віе вели́кое. Тропа́рь, гла́съ 5: Собезнача́льное Сло́во... Сла́ва, и ны́нѣ, богоро́диченъ его́. Ектенія́ и отпу́стъ безъ креста́. И свята́го на отпу́стѣ помина́етъ, его́же бу́детъ де́нь.

И ча́съ 1-й въ притво́рѣ. На 1-мъ часѣ́ глаго́лемъ псалмы́ обы́чныя. На Сла́вѣ, тропа́рь: Собезнача́льное Сло́во.. И ны́нѣ, богоро́диченъ: Что́ Тя́ нарече́мъ... По трисвято́мъ конда́къ: Душе́вныма очи́ма... И коне́чный отпу́стъ по обы́чаю, и про́чія часы́ предъ литургíею глаго́лемъ трипса́лмніи.



[НА ЛИТУРГІИ,]

Нача́ло литургíи, я́коже на са́мую Па́сху. На литургíи изобрази́тельная, и отъ кано́на пѣ́снь 3-я и 6-я. По вхо́дѣ: Тропа́рь: Собезнача́льное Сло́во... Сла́ва. Конда́къ слѣпа́го. И ны́нѣ. Па́схи: Аще и во гро́бъ... И про́чая. Проки́менъ Па́схи: Се́й де́нь, его́же сотвори́ Госпо́дь... Аллилу́ія Па́схи. Апо́столъ и Ева́нгеліе дне́. И про́чая слу́жба воскре́сна вся́. Прича́стенъ: Тѣ́ло Христо́во... Глаго́лемъ же и псало́мъ 33-й: Благословлю́ Го́спода... Та́же іере́й твори́тъ отпу́стъ Па́схи со кресто́мъ, и про́чее все́ пое́мъ коне́цъ литургíи, я́коже указа́ся на са́мую Па́сху. И та́ко отдае́тся пра́здникъ свята́го и живоно́снаго Христо́ва Воскресе́нія.

На трапе́зѣ быва́етъ бра́тіи утѣше́ніе вели́кое, си́рѣчь еле́емъ, ры́бою и вино́мъ.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 141 – 144 об.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.