Церковный календарь
Новости


2017-07-24 / russportal
Cвт. Іоаннъ Шанхайскій. Слово при открытіи общества "Правосл. Дѣло" (1994)
2017-07-24 / russportal
Еп. Григорій (Граббе). Догматика о. Архимандрита Іустина (Поповича) (1964)
2017-07-23 / russportal
Свщмч. Кипріанъ Карѳагенскій. Письмо (48-е), увѣщаніе къ мученичеству (1879)
2017-07-23 / russportal
Свщмч. Кипріанъ Карѳагенскій. Письмо (47-е), противъ еретиковъ (1879)
2017-07-23 / russportal
Слова преп. Симеона Новаго Богослова. Слово 28-е (1882)
2017-07-23 / russportal
Слова преп. Симеона Новаго Богослова. Слово 27-е (1882)
2017-07-22 / russportal
А. И. Купринъ. «Разсказы для дѣтей». Фіалки (1921)
2017-07-22 / russportal
А. И. Купринъ. «Разсказы для дѣтей». Скворцы (1921)
2017-07-22 / russportal
А. С. Пушкинъ. "Повѣсти Бѣлкина". Барышня-крестьянка (1921)
2017-07-22 / russportal
А. С. Пушкинъ. "Повѣсти Бѣлкина". Станціонный смотритель (1921)
2017-07-22 / russportal
Преп. Епифаній Премудрый. Житіе преп. Сергія Радонежскаго. Глава 5-я (1903)
2017-07-22 / russportal
Преп. Епифаній Премудрый. Житіе преп. Сергія Радонежскаго. Глава 4-я (1903)
2017-07-21 / russportal
Повѣсть о явленіи образа Пресв. Богородицы въ Казани, и о чудесахъ, бывшихъ отъ него (1912)
2017-07-21 / russportal
"Проповѣдн. хрестоматія". Поученіе въ день Казанской иконы Божіей Матери (1965)
2017-07-20 / russportal
"Русскія дѣтскія сказки". Василиса Прекрасная (1921)
2017-07-20 / russportal
"Русскія дѣтскія сказки". Морозко (1921)
Новости въ видѣ
RSS-канала: .
Сегодня - вторникъ, 25 iюля 2017 г. Сейчасъ на порталѣ посѣтителей - 4.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ЧЕТВЕРТОКЪ ШЕСТЫЯ СЕДМИЦЫ ПО ПАСЦѢ.
ВОЗНЕСЕНІЕ ГОСПОДНЕ.

Въ сре́ду ве́чера 6-я седми́цы по Па́сцѣ, пра́зднуемъ Вознесе́ніе Го́спода Бо́га и Спа́са на́шего Іису́са Христа́.

Часъ 9-й трипса́лмный. По нача́лѣ, глаго́летъ чте́цъ трисвято́е, и до недѣ́ли 8-я во вся́комъ церко́вномъ пѣ́ніи.

НА МАЛѢЙ ВЕЧЕРНИ,

На Го́споди воззва́хъ... поста́вимъ стихи́ры 4, гла́съ 6:

Госпо́дь вознесе́ся на небеса́... Го́споди, Твоему́ вознесе́нію... На гора́хъ святы́хъ... Го́споди, смотре́нія соверши́въ... [зри́ ни́же на вели́цѣй вече́рни.] Сла́ва, и ны́нѣ, гла́съ то́йже: Го́споди, апо́столи я́ко ви́дѣша Тя́...

Проки́менъ дне́.

На стихо́внѣ стихи́ры, гла́съ 1:

Возше́дъ на небеса́... Сти́хъ: Вси́ язы́цы, восплещи́те рука́ми... Возше́лъ еси́, Христе́, къ Безнача́льному Отцу́... Сти́хъ: Взы́де Бо́гъ въ воскликнове́ніи... Ангели Твои́, Го́споди... Сла́ва, и ны́нѣ, гла́съ 2: Роди́лся еси́, я́ко Са́мъ восхотѣ́лъ еси́... [зри́ на вели́цѣй вече́рни.]

Ны́нѣ отпуща́еши... Трисвято́е, [и] по Отче на́шъ...

Отпусти́тельный тропа́рь, гла́съ 4:

Возне́слся еси́ во сла́вѣ, Христе́ Бо́же на́шъ, ра́дость сотвори́вый ученико́мъ обѣтова́ніемъ Свята́го Ду́ха, извѣще́ннымъ и́мъ бы́вшимъ благослове́ніемъ, я́ко Ты́ еси́ Сы́нъ Бо́жій, Изба́витель мíра.

Та́же ектенія́ ма́лая. И отпу́стъ.




НА ВЕЛИЦѢЙ ВЕЧЕРНИ.

По предначина́тельномъ псалмѣ́ каѳи́смы не глаго́лемъ.

На Го́споди воззва́хъ... поста́вимъ стихо́въ 10 и пое́мъ стихи́ры самогла́сны 5, повторя́юще я́. Гла́съ 6:

Госпо́дь вознесе́ся на небеса́, да по́слетъ Утѣ́шителя мíру: небеса́ угото́ваша престо́лъ Его́, о́блацы — восхожде́ніе Его́. Ангели дивя́тся, Человѣ́ка зря́ще превы́ше себе́. Отецъ жде́тъ, Его́же въ нѣ́драхъ и́мать Соприсносу́щна; Ду́хъ же Святы́й вели́тъ всѣ́мъ а́нгеломъ Его́: возми́те врата́, кня́зи, ва́ша, вси́ язы́цы, восплещи́те рука́ми, я́ко взы́де Христо́съ, идѣ́же бѣ́ пе́рвѣе. [Два́жды.]

Го́споди, Твоему́ Вознесе́нію удиви́шася херуви́ми, зря́ще Тебе́, Бо́га, на о́блацѣхъ восходя́ща, на ни́хъ сѣдя́щаго; и сла́вимъ Тя́, я́ко бла́га ми́лость Твоя́: сла́ва Тебѣ́! [Два́жды.]

На гора́хъ святы́хъ зря́ще Твое́ Вознесе́ніе, Христе́, Сія́ніе сла́вы Отчи, воспѣва́емъ Тво́й свѣтообра́зный лица́ зра́къ, кла́няемся Страсте́мъ Твои́мъ, почита́емъ Воскресе́ніе, сла́вное Вознесе́ніе сла́вяще: поми́луй на́съ. [Два́жды.]

Го́споди, апо́столи я́ко ви́дѣша Тя́, на о́блацѣхъ возноси́ма, рыда́ніемъ сле́зъ, Жизнода́вче Христе́, ско́рби исполня́еми, рыда́юще, глаго́лаху: Влады́ко, не оста́ви на́съ си́рыхъ, и́хже за милосе́рдіе возлюби́лъ еси́ рабы́ Твоя́, я́ко Благоутро́бенъ, но посли́, я́коже обѣща́лъ еси́ на́мъ, Пресвята́го Твоего́ Ду́ха, просвѣща́юща ду́ши на́ша. [Два́жды.]

Го́споди, смотре́нія соверши́въ та́инство, пои́мъ Твоя́ ученики́ на го́ру Елео́нскую, возноси́лся еси́, и се́ тве́рдь небе́сную проше́лъ еси́, мене́ ра́ди Обнища́вый по мнѣ́; и возше́дъ, отону́дуже не разлучи́лся еси́, Всесвята́го Твоего́ Ду́ха низпосли́, просвѣща́юща ду́ши на́ша. [Два́жды.]

Сла́ва, и ны́нѣ, гла́съ то́йже:

Нѣ́дръ Оте́ческихъ не разлу́чся, Сладча́йшій Іису́се, и съ земны́ми, я́ко Человѣ́къ, пожи́въ, дне́сь отъ горы́ Елео́нскія возне́слся еси́ во сла́вѣ и па́дшее естество́ на́ше ми́лостивно возне́съ, Отцу́ спосади́лъ еси́. Тѣ́мже небе́сніи безпло́тныхъ чи́нове, чудеси́ удивля́ющеся, ужаса́хуся у́жасомъ, и тре́петомъ содержи́ми, Твое́ человѣколю́біе велича́ху. Съ ни́миже и мы́, земнíи, е́же къ на́мъ Твое́ снисхожде́ніе и е́же отъ на́съ вознесе́ніе славосло́вяще, мо́лимся, глаго́люще: ученики́ и Ро́ждшую Тя́ Богоро́дицу ра́дости безчи́сленныя Испо́лнивый во Твое́ Вознесе́ніе, и на́съ сподо́би избра́нныхъ Твои́хъ ра́дости, моли́твами и́хъ, вели́кія ра́ди Твоея́ ми́лости.

Вхо́дъ. Проки́менъ дне́. И чте́нія:

Проро́чества Иса́іина чте́ніе. [Глава́ 2.]

Та́ко глаго́летъ Госпо́дь: бу́детъ въ послѣ́дняя дни́ явле́нна гора́ Госпо́дня и до́мъ Бо́жій на версѣ́хъ го́ръ, и вознесе́тся превы́ше холмо́въ, и пріи́дутъ на ню́ вси́ язы́цы. И по́йдутъ лю́діе мно́зи и реку́тъ: пріиди́те, взы́демъ на го́ру Госпо́дню и въ до́мъ Бо́га Іа́ковля, и возвѣсти́тъ на́мъ пу́ть Сво́й, и по́йдемъ по нему́.

Проро́чества Иса́іина чте́ніе. [Глава́ 62.]

Та́ко глаго́летъ Госпо́дь: поиди́те и вни́дите враты́ Мои́ми, угото́вите пу́ть Мо́й, и пу́ть твори́те лю́демъ Мои́мъ, и ка́менія отъ пути́ размещи́те, вознеси́те зна́меніе на язы́ки. Се́ бо Госпо́дь сотвори́ слы́шано да́же до послѣ́днихъ земли́: рцы́те дще́ри Сіо́нове: се́ Спаси́тель тво́й прихо́дитъ, имѣ́я съ Собо́ю мзду́, и дѣ́ло Его́ предъ лице́мъ Его́. И прозове́тъ я́ лю́ди свя́ты, изба́влены отъ Го́спода, ты́ же нарече́шися взыска́нный гра́дъ и неоста́вленный. Кто́ Се́й прише́дый изъ Едо́ма, оброще́ніе ри́зъ Его́ отъ Восо́ра? Се́й красе́нъ во оде́жди Свое́й, вопіе́тъ съ крѣ́постію ве́ліею: Азъ глаго́лю пра́вду и су́дъ спасе́нія. — Почто́ Ти́ оброще́ны ри́зы и оде́жды Твоя́ я́ко отъ истопта́нія точи́ла испо́лнены истопта́нія? — Точи́ло истопта́хъ Еди́нъ, и отъ язы́къ нѣ́сть му́жъ со Мно́ю. Ми́лость Госпо́дню помяну́хъ, добродѣ́тели Госпо́дни во всѣ́хъ, и́миже на́мъ воздава́етъ. Госпо́дь — Судія́ благíй до́му Изра́илеву, нано́ситъ на́мъ по ми́лости Свое́й и по мно́жеству пра́вды Своея́. И рече́: не лю́діе ли Мои́? ча́да, не отве́ргутлися? И бы́сть и́мъ во спасе́ніе отъ вся́кія ско́рби и́хъ. Не хода́тай, ниже́ а́нгелъ, но Са́мъ Госпо́дь спасе́ и́хъ, за е́же люби́ти и́хъ и щадѣ́ти и́хъ; Са́мъ изба́ви и́хъ и воспрія́тъ и́хъ, и вознесе́ и́хъ во вся́ дни́ вѣ́ка.

Проро́чества Заха́ріина чте́ніе. [Глава́ 14.]

Та́ко глаго́летъ Госпо́дь: се́ де́нь гряде́тъ Госпо́день, и ста́нутъ но́зѣ Его́ въ де́нь о́ный на горѣ́ Елео́нстѣй, пря́мо Іерусали́ма, отъ восто́къ со́лнца. И въ де́нь о́ный изы́детъ вода́ жива́ изъ Іерусали́ма: по́лъ ея́ въ мо́ре пе́рвое, и по́лъ ея́ въ мо́ре послѣ́днее — въ жа́тву и въ ве́сну бу́детъ та́ко. И бу́детъ Госпо́дь Ца́рь по все́й земли́, въ де́нь о́ный бу́детъ Госпо́дь еди́нъ [и] и́мя Его́ еди́но, окружа́ющее всю́ зе́млю и пусты́ню, отъ Гавы́ да́же до Реммо́на, проти́ву хребту́ Іерусали́млю, и вознесе́тся, и на мѣ́стѣ пребу́детъ отъ вра́тъ Веніами́новыхъ, да́же до мѣ́ста двере́й пе́рвыхъ, да́же до вратъ уго́льныхъ, и да́же до столпа́ Анамеи́лева, да́же до подточи́лій царе́выхъ, обита́ютъ въ не́мъ; и ана́ѳема не бу́детъ ктому́, и всели́тся Іерусали́мъ надѣ́яйся.

На литíи стихи́ры пра́здника самогла́сны, гла́съ 1:

Возше́дъ на небеса́, отону́дуже и соше́лъ еси́, не оста́ви на́съ си́рыхъ, Го́споди: да пріи́детъ Тво́й Ду́хъ, нося́ ми́ръ мíрови, покажи́ сыно́мъ человѣ́ческимъ дѣла́ си́лы Твоея́, Го́споди Человѣколю́бче.

Возше́лъ еси́, Христе́, къ Безнача́льному Отцу́ Твоему́, неопи́санныхъ Его́ нѣ́дръ не разлучи́выйся, и прило́гъ си́лы хвале́нія трисвята́го не прія́ша, но еди́наго Сы́на и по вочеловѣ́ченіи позна́ша Тя́, Го́споди, единоро́дна Отцу́. Во мно́жествѣ щедро́тъ Твои́хъ поми́луй на́съ!

Ангели Твои́, Го́споди, апо́столомъ глаго́лаху: му́жіе галиле́йстіи, что́ стоите́, зря́ще на не́бо? Се́й е́сть Христо́съ Бо́гъ, вознесы́йся отъ ва́съ на не́бо, То́й пріи́детъ па́ки, и́мже о́бразомъ ви́дѣсте Его́ иду́ща на не́бо; послужи́те Ему́ въ преподо́біи и пра́вдѣ.

Гла́съ 4:

Егда́ прише́лъ еси́ на го́ру, Христе́, Елео́нскую, Отчее соверши́ти благоволе́ніе, ужасо́шася небе́сніи а́нгели и устраши́шася преиспо́дніи. Предста́ша же ученицы́ съ ра́достію тре́петни, я́ко глаго́лалъ еси́ и́мъ, я́ко престо́лъ же готовля́шеся проти́въ о́блакъ жду́щій; врата́ же не́бо отве́рзшее добро́ту явля́ше, и земля́ сокро́вища открыва́етъ, Ада́мову схожде́нію я́ко позна́тися и па́ки восхожде́нію. Но стопы́ у́бо возвыша́хуся, я́коже ру́цѣ, уста́ же вельми́ благословля́ху, я́коже слы́шашеся, о́блакъ подъе́мляше, и не́бо вну́трь Тебе́ прія́тъ. Дѣ́ло сіе́, Го́споди, содѣ́лалъ еси́ вели́кое и пресла́вное, во спасе́ніе ду́шъ на́шихъ.

Низше́дшее естество́ Ада́мово въ до́льнѣйшія страны́ земли́, Бо́же, новосотвори́вый Собо́ю превы́ше вся́каго нача́ла и вла́сти, возве́лъ еси́ дне́сь: я́ко бо возлюби́въ, спосади́лъ еси́, я́коже поми́ловавъ, соедини́лъ еси́ Себѣ́, я́ко соедини́вый, спострада́лъ еси́, я́ко безстра́стенъ пострада́въ, и спросла́вилъ еси́. Но безпло́тніи, — кто́ е́сть Се́й, — глаго́лаху, — кра́сный Му́жъ? Но не человѣ́къ то́чію: Бо́гъ же и Человѣ́къ совокупле́нно и явля́емо. Тѣ́мже удивле́ни а́нгели, во оде́ждахъ лета́юще о́крестъ ученико́въ, друзíи же стоя́ще, вопія́ху: му́жіе галиле́йстіи, Иже отъ ва́съ оты́де, Се́й е́сть Іису́съ Человѣ́къ Бо́гъ. Бо́гъ Человѣ́къ па́ки пріи́детъ, Судія́ живы́хъ и ме́ртвыхъ, вѣ́рнымъ же да́руяй грѣхо́въ проще́ніе и ве́лію ми́лость.

Егда́ возне́слся еси́ во сла́вѣ, Христе́ Бо́же, ученико́мъ зря́щимъ, о́блацы подыма́ху Тя́ съ пло́тію, врата́ взя́шася небе́сная, ли́къ а́нгельскій ра́довашеся съ весе́ліемъ, го́рнѣйшія си́лы зовя́ху, глаго́люще: возми́те врата́, кня́зи, ва́ша, и вни́детъ Ца́рь Сла́вы. Ученицы́ же дивя́щеся, глаго́лаху: не разлучи́ся на́съ, Па́стырю До́брый, но посли́ на́мъ Ду́ха Твоего́ Пресвята́го, наставля́юща, и утвержда́юща, и просвѣща́юща, и освяща́юща ду́ши на́ша.

Сла́ва, и ны́нѣ, гла́съ то́йже:

Го́споди, та́инство, е́же отъ вѣко́въ сокрове́нное и отъ родо́въ, испо́лнивъ я́ко Бла́гъ, прише́лъ еси́ со ученики́ Твои́ми на го́ру Елео́нскую, имѣ́я Ро́ждшую Тя́, Творца́ и всѣ́хъ Содѣ́теля: То́й бо, въ стра́сти Твое́й ма́терски па́че всѣ́хъ болѣ́зновавшей, подоба́ше и сла́вою пло́ти Твоея́ премно́гія наслади́тися ра́дости. Ея́же и мы́ причаща́ющеся, е́же на небеса́ восхо́домъ Твои́мъ, Влады́ко, вели́кую Твою́ ми́лость на на́съ бы́вшую сла́вимъ.

На стихо́внѣ стихи́ры самогла́сны, гла́съ 2:

Роди́лся еси́, я́ко Са́мъ восхотѣ́лъ еси́; яви́лся еси́, я́ко Са́мъ изво́лилъ еси́; пострада́лъ еси́ пло́тію, Бо́же на́шъ; изъ ме́ртвыхъ воскре́слъ еси́, попра́въ сме́рть; возне́слся еси́ во сла́вѣ, вся́ческая исполня́яй, и посла́лъ еси́ на́мъ Ду́ха Боже́ственнаго, е́же воспѣва́ти и сла́вити Твое́ Божество́.

Сти́хъ: Вси́ язы́цы, восплещи́те рука́ми, [воскли́кните Бо́гу гла́сомъ ра́дованія].

Воспріе́млему Тебѣ́, Христе́, отъ горы́ Ма́сличныя, си́лы зря́ще, дру́гъ дру́гу вопія́ху: Кто́ е́сть Се́й? — И глаго́летъ къ ни́мъ: Се́й е́сть Держа́вный и Си́льный, Се́й е́сть Си́льный въ бра́ни, Се́й е́сть вои́стинну Ца́рь Сла́вы. И почто́ Ему́ червле́ны ри́зы? — Изъ Восо́ра прихо́дитъ, е́же е́сть пло́ти. Ты́ же Са́мъ, я́ко Богъ одесну́ю сѣ́дъ вели́чествія, посла́лъ еси́ на́мъ Ду́ха Свята́го, да наста́витъ и спасе́тъ ду́ши на́ша.

Сти́хъ: Взы́де Бо́гъ въ воскликнове́ніи, [Госпо́дь во гла́сѣ тру́бнѣ].

Возне́слся еси́ во сла́вѣ на горѣ́ Ма́сличнѣй, Христе́ Бо́же, предъ Твои́ми ученики́, и сѣ́лъ еси́ одесну́ю Отца́, вся́ческая исполня́яй Божество́мъ, и посла́лъ еси́ и́мъ Ду́ха Свята́го, просвѣща́юща, и утвержда́юща, и освяща́юща ду́ши на́ша.

Сла́ва, и ны́нѣ, гла́съ 6:

Взы́де Богъ въ воскликнове́ніи, Госпо́дь во гла́сѣ тру́бнѣ, е́же вознести́ па́дшій о́бразъ Ада́мовъ и посла́ти Ду́ха Утѣ́шителя, е́же освяти́ти ду́ши на́ша.

Та́же: Ны́не отпуща́еши... И трисвято́е. На благослове́ніи хлѣ́бовъ, тропа́рь пра́здника, гла́съ 4: Возне́слся еси́ во сла́вѣ.., три́жды. И чте́ніе вели́кое въ Дѣя́ніихъ святы́хъ Апо́столъ.

[Зри́:] А идѣ́же нѣ́сть всено́щнаго, по Ны́нѣ отпуща́еши... тропа́рь пра́здника, еди́ножды. На повече́ріи, по Досто́йнѣ... конда́къ пра́здника. Полу́нощницу пое́мъ по обы́чаю, съ каѳи́смою. По 1-мъ трисвято́мъ, вмѣ́сто: Се Жени́хъ.., глаго́лемъ тропа́рь пра́здника. По 2-мъ трисвято́мъ, вмѣ́сто: Помяни́, Го́споди, я́ко Благъ.., глаго́лемъ конда́къ пра́здника. Та́же: Го́споди, поми́луй, 12. И отпу́стъ. Моли́твы: Помяни́, Го́споди, въ наде́жди.., не глаго́лемъ. Утрени нача́ло по обы́чаю. И а́біе чте́цъ глаго́летъ: Пріиди́те, поклони́мся.., три́жды. И обы́чныя два́ псалма́, 19-й и 20-й. И шестопса́лміе.



ВЪ ЧЕТВЕРТОКЪ НА УТРЕНИ,

На Бо́гъ Госпо́дь... тропа́рь пра́здника: Возне́слся еси́ во сла́вѣ.., три́жды.

По 1-мъ стихосло́віи сѣда́ленъ, гла́съ 1. Подо́бенъ: Ка́мени запеча́тану.

Ангеломъ дивя́щимся восхо́да стра́нному и ученико́мъ ужаса́ющимся стра́шному взы́тія, возше́лъ еси́ со сла́вою, я́ко Богъ, и врата́ Тебѣ́ взя́шася, Спа́се. Сего́ ра́ди си́лы небе́сныя дивля́хуся, вопію́ще: сла́ва снизхожде́нію Твоему́, Спа́се, сла́ва Ца́рствію Твоему́, сла́ва Вознесе́нію Твоему́, еди́не Человѣколю́бче! [Два́жды.]

По 2-мъ стихосло́віи сѣда́ленъ, гла́съ 3: Подо́бенъ: Красотѣ́ дѣ́вства.

Превѣ́чный Бо́гъ и Безнача́льный, е́же воспрія́тъ естество́ человѣ́ческое, обоготвори́въ та́йно, дне́сь вознесе́. Ангели предтеку́ще, апо́столомъ пока́зоваху Сего́ иду́ща на небеса́ со сла́вою мно́гою, Тому́же поклони́вшеся, глаго́лаху: сла́ва Бо́гу возне́сшемуся! [Два́жды.]

[Велича́ніе:

Велича́емъ Тя́, Живода́вче Христе́, и почита́емъ е́же на небеса́ съ пречи́стою Твое́ю Пло́тію Боже́ственное Вознесе́ніе. Псало́мъ избра́нный: Вси язы́цы, восплещи́те рука́ми...]

По поліеле́и сѣда́ленъ, гла́съ 5. Подо́бенъ: Собезнача́льное Сло́во.

Соше́дый съ небесе́ на земна́я, и до́лу лежа́щій во а́довѣ стра́жи совоскреси́вый, я́ко Бо́гъ, Ада́мовъ зра́къ, Вознесе́ніемъ Твои́мъ, Христе́, на небеса́ возве́дъ, престо́лу Оте́ческому Твоему́ сосѣди́теля содѣ́лалъ еси́, я́ко Ми́лостивъ и Человѣколю́бецъ. [Два́жды.]

И чте́ніе пра́зднику: похва́льная словеса́, творе́ніе ки́ръ Андре́я или́ про́чихъ.

Степе́нна, 1-й антифо́нъ 4-го гла́са. Проки́менъ, гла́съ 4: Взы́де Бо́гъ въ воскликнове́ніи,* Госпо́дь во гла́сѣ тру́бнѣ. Сти́хъ: Вси́ язы́цы, восплещи́те рука́ми, [воскли́кните Бо́гу гла́сомъ ра́дованія]. Вся́кое дыха́ніе... Ева́нгеліе отъ Ма́рка, зача́ло 71: Воскре́съ Іису́съ зау́тра въ пе́рвую суббо́ту... Воскресе́ніе Христо́во.., еди́ножды. Псало́мъ 50-й. Сла́ва, гла́съ 2: Моли́твами апо́столовъ... И ны́нѣ: Моли́твами Богоро́дицы... Та́же сти́хъ: Поми́луй мя́, Бо́же, по вели́цѣй ми́лости Твое́й...

И пое́мъ настоя́щій самогла́сенъ, гла́съ 6:

Дне́сь на небесѣ́хъ го́рнія си́лы на́ше естество́ зря́ще, дивя́щеся стра́ннаго о́браза восхо́ду, недоумѣва́хуся дру́гъ ко дру́гу, глаго́люще: кто́ Сей прише́дый? Ви́дяще же своего́ Влады́ку, небе́сная врата́ взя́ти повелѣва́ху. Съ ни́миже непреста́нно воспои́мъ съ пло́тію отону́ду па́ки Гряду́щаго, я́ко Судію́ всѣ́хъ и Бо́га Всеси́льна.

Кано́ны: гла́съ пя́тый, со ирмосы́, на 8, и четве́ртый на 6.

[Кано́нъ пе́рвый], творе́ніе Іоа́нна мона́ха, гла́съ 5.
Пѣ́снь 1.

Ирмо́съ: Спаси́телю Бо́гу, въ мо́ри лю́ди немо́крыми нога́ми наста́вльшему и фарао́на со всево́инствомъ пото́пльшему, Тому́ еди́ному пои́мъ, я́ко просла́вися.

Воспои́мъ, вси́ лю́діе, на ра́мѣхъ херуви́мскихъ возне́сшуся со сла́вою Христу́ и спосади́вшему на́съ одесну́ю Отца́, пѣснь побѣ́дную, я́ко просла́вися.

Хода́тая Бо́гу и человѣ́комъ, Христа́, ли́цы а́нгельстіи ви́дѣвше съ пло́тію въ вы́шнихъ, удивля́хуся, согла́сно же воспѣва́ху пѣ́снь побѣ́дную, я́ко просла́вися.

Явльшемуся Бо́гу на горѣ́ Сина́йстѣй и зако́нъ да́вшему богови́дцу Моисе́ю, отъ горы́ Елео́нскія возне́сшемуся пло́тію, Тому́ вси́ воспои́мъ, я́ко просла́вися.

Богоро́диченъ: Пречи́стая Ма́ти Бо́жія, Воплоще́ннаго отъ Тебе́ и отъ нѣ́дръ Роди́теля не отсту́пльшаго Бо́га, непреста́нно моли́ отъ вся́каго обстоя́нія спасти́, я́же созда́.

Другíй кано́нъ господи́на Іо́сифа, его́же краестро́чіе по алфави́ту. Во осмо́й же и девя́той пѣ́сни: Оди́ Іоси́фъ, е́же е́сть: Пѣ́снь Іо́сифова, гла́съ 4.
Пѣ́снь 1.

Ирмо́съ: Отве́рзу уста́ моя́, [и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́].

Воскре́слъ еси́ тридне́венъ, по естеству́ Безсме́ртный, и яви́лся еси́ единона́десятимъ и всѣ́мъ ученико́мъ, и восте́клъ еси́, Христе́, ко Отцу́, о́блакомъ носи́мь, всѣ́хъ Тво́рче.

Вопіе́тъ я́вственно, поя́ Дави́дъ богодохнове́нный: взы́де Госпо́дь къ небе́снымъ въ воскликнове́ніи и трубы́ шу́мѣ, и къ Началосвѣ́тному Отцу́ доспѣ́.

Сла́ва: Состарѣ́вшійся, Го́споди, міръ мно́гими грѣхми́, обнови́въ Стра́стію Твое́ю и Воста́ніемъ Твои́мъ, возше́лъ еси́, носи́мь о́блакомъ къ пренебе́снымъ. Сла́ва сла́вѣ Твое́й!

И ны́нѣ, богоро́диченъ: Влады́ку родила́ еси́ всѣ́хъ, Всенепоро́чная Влады́чице, Страсть во́льную пріи́мшаго и возше́дша къ Своему́ Отцу́, Его́же не оста́ви, а́ще и пло́ть взя́тъ.

Катава́сія: Боже́ственнымъ покрове́нъ медленоязы́чный мра́комъ, извитíйствова Богопи́санный зако́нъ: ти́ну бо оттря́съ очесе́ у́мнаго, ви́дитъ Су́щаго и науча́ется Ду́ха ра́зуму, хваля́ боже́ственными пѣ́сньми.

Пѣ́снь 3.

Ирмо́съ: Си́лою Креста́ Твоего́, Христе́, утверди́ мое́ помышле́ніе, во е́же пѣ́ти и сла́вити спаси́тельное Твое́ Вознесе́ніе.

Возше́лъ еси́, Жизнода́вче Христе́, ко Отцу́ и возне́слъ еси́ ро́дъ на́шъ, Человѣколю́бче, неизрече́ннымъ благоутро́біемъ Твои́мъ.

Чи́ни а́нгельстіи, Спа́се, человѣ́ческое естество́ ви́дѣвше совосходя́щее Тебѣ́, непреста́нно удивля́еми, воспѣва́ху Тя́.

Ужаса́хуся а́нгельстіи ли́цы, Христе́, зря́ще Тя́ съ тѣлесе́мъ возне́сшася, и воспѣва́ху свято́е Твое́ Вознесе́ніе.

Естество́ человѣ́ческое, Христе́, тлѣ́ніемъ па́дшее возста́вилъ еси́, и восхо́домъ Твои́мъ возне́слъ еси́, и съ Собо́ю на́съ просла́вилъ еси́.

Богоро́диченъ: Моли́ непреста́нно, Чи́стая, Произше́дшаго отъ ложе́снъ Твои́хъ изба́витися пре́лести діа́воли пою́щимъ Тя́, Ма́терь Бо́жію.

Иный.

Ирмо́съ: Твоя́ пѣсносло́вцы, Богоро́дице, [живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би].

Возми́те врата́ небе́сная, се́ пріи́де Христо́съ, Ца́рь тва́ри, въ тѣ́ло обо́лкся земно́е, — го́рнѣйшимъ глаго́лаху си́ламъ до́льнѣйшія.

Взыска́въ, Христе́, прельще́ннаго пре́лестію змíевою Ада́ма, я́ко въ сего́ оболкíйся, возше́лъ еси́ и сѣ́лъ еси́ одесну́ю, я́ко сопресто́ленъ Отцу́, пою́щимъ а́нгеломъ Тебе́.

Сла́ва: Земля́ пра́зднуетъ и лику́етъ, ра́дуется и не́бо Вознесе́ніемъ дне́сь Творца́ тва́ри, предъявле́нно соедини́вшаго разстоя́щаяся хотѣ́ніемъ.

И ны́нѣ, богоро́диченъ: Сме́рти роди́вши Разруши́теля, Еди́наго Безсме́ртнаго Бо́га, Дѣ́во Ма́ти Всечи́стая, Того́ при́сно умоли́ умерщвля́ющія моя́ стра́сти умори́ти и спасти́ мя́.

Катава́сія: Разве́рзе утро́бы неча́дствовавшія у́зы, доса́ду же неудоботерпи́му благоча́дствующія, еди́на моли́тва проро́чицы дре́вле Анны, нося́щія ду́хъ сокруше́нъ, къ Си́льному и Бо́гу ра́зумовъ.

Сѣда́ленъ, гла́съ 8. Подо́бенъ: Прему́дрости.

Всѣ́дъ на о́блаки небе́сныя, оста́вивъ ми́ръ су́щимъ на земли́, возше́лъ и сѣ́лъ еси́ одесну́ю Отца́, я́ко Единосу́щенъ Сему́ сы́й и Ду́ху. Аще бо и во пло́ти яви́лся еси́, но непрело́женъ пребы́лъ еси́, тѣ́мже ча́еши соверше́нія коне́цъ, суди́ти Гряды́й на зе́млю мíру всему́. Правосу́де Го́споди, пощади́ ду́ши на́ша, прегрѣше́ній оставле́ніе да́руя, я́ко Бо́гъ ми́лостивъ, рабо́мъ Твои́мъ.

Сла́ва, и ны́нѣ, то́йже. И чте́ніе пра́здника.

Пѣ́снь 4.

Ирмо́съ: Услы́шахъ слу́хъ си́лы Креста́, я́ко ра́й отве́рзеся и́мъ, и возопи́хъ: сла́ва си́лѣ Твое́й, Го́споди.

Возне́слся еси́ во сла́вѣ, а́нгеловъ Царю́, Утѣ́шителя на́мъ отъ Отца́ посла́въ. Тѣ́мже вопіе́мъ: сла́ва, Христе́ Вознесе́нію Твоему́!

Яко взы́де Спа́съ ко Отцу́ съ пло́тію, удиви́шася Ему́ а́нгельская во́инства и возопи́ша: сла́ва, Христе́, Вознесе́нію Твоему́!

Ангельскія си́лы го́рнѣйшимъ вопія́ху: врата́ возми́те Христу́ на́шему Царю́, Его́же воспѣва́емъ вку́пѣ со Отце́мъ и Ду́хомъ.

Богоро́диченъ: Дѣ́ва роди́ и ма́терняя не позна́, но Ма́ти у́бо е́сть, Дѣ́вою же пребы́сть, Юже воспѣва́юще, — ра́дуйся, Богоро́дице! — взыва́емъ.

Инъ.

Ирмо́съ: Сѣдя́й въ сла́вѣ [на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й].

Іису́съ Жизнода́вецъ пріи́мъ, и́хже возлюби́, на Елео́нскую го́ру восхо́дитъ, и сихъ благослови́, и о́блакомъ носи́мь, Отчая нѣ́дра доспѣ́, я́же ника́коже оста́вилъ.

Міръ ве́сь пра́зднуетъ ви́димый и неви́димый: въ ра́дости а́нгели лику́ютъ и человѣ́цы, славосло́вяще непреста́нно Вознесе́ніе пло́тію Соедини́вшагося на́мъ бла́гостію.

Сла́ва: Разруши́вый держа́ву сме́рти, я́ко Безсме́ртный, Го́споди, безсме́ртіе всѣ́мъ дарова́лъ еси́, Человѣколю́бче, и возне́слся еси́ во сла́вѣ, зря́щимъ Тя́ честны́мъ ученико́мъ, Іису́се Всеси́льне.

И ны́нѣ, богоро́диченъ: Блаже́нно чре́во Твое́, Всенепоро́чная, бы́сть: чре́во бо а́дово пресла́вно Истощи́вшаго несказа́нно вмѣсти́ти сподо́билася еси́, Его́же моли́ спасти́ на́съ, пою́щихъ Тя́.

Катава́сія: Царю́ царе́й, Яковы́й отъ Якова́го, Еди́нъ, Сло́ве, произше́дый, отъ Отца́ Безвино́внаго, Равномо́щнаго Твоего́ Ду́ха апо́столомъ и́стинно посла́лъ еси́, я́ко Благодѣ́теля, пою́щимъ: сла́ва держа́вѣ Твое́й, Го́споди.

Пѣ́снь 5.

Ирмо́съ: Утреннююще, вопіе́мъ Ти́: Го́споди, спаси́ ны́. Ты́ бо еси́ Бо́гъ на́шъ, ра́звѣ бо Тебе́ ино́го не зна́емъ.

Испо́лнивъ весе́лія вся́ческая, Ми́лостиве, къ го́рнимъ си́ламъ съ пло́тію прише́лъ еси́.

Ангельскія си́лы взе́млема Тебе́ ви́дѣвше, — врата́, — взыва́ху, — Царю́ на́шему, возми́те!

Апо́столи ви́дѣвше возвыша́ема Спа́са, съ тре́петомъ взыва́ху Царю́ на́шему: сла́ва Тебѣ́!

Богоро́диченъ: Дѣ́ву по рождествѣ́ пое́мъ Тя́, Богоро́дице, Ты́ бо Бо́га Сло́ва пло́тію мíрови родила́ еси́.

Инъ.

Ирмо́съ: Ужасо́шася вся́ческая [о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая].

Умертви́въ сме́рть Твое́ю сме́ртію, Го́споди, взе́мъ и́хже возлюби́лъ еси́, возше́лъ еси́ на Ма́сличную го́ру святу́ю и отту́ду восте́клъ еси́, Христе́, къ Твоему́ Роди́телю, о́блакомъ носи́мь.

Стра́нно Твое́ Рождество́, стра́нно Твое́ Воскресе́ніе, стра́нно и стра́шно Твое́, Жизнода́вче, е́же отъ горы́ Боже́ственное Вознесе́ніе, е́же изобразу́я, Илія́ четвероко́нный восхожда́ше, воспѣва́я Тя́, Человѣколю́бче.

Сла́ва: Зря́щимъ апо́столомъ вѣща́ху а́нгели: му́жіе галиле́йстіи, что́ чудите́ся Вознесе́нію Жизнода́вца Христа́? Се́й пріи́детъ па́ки на зе́млю суди́ти мíру всему́, я́ко Судія́ Пра́веднѣйшій.

И ны́нѣ, богоро́диченъ: Дѣ́ву сохрани́въ Тя́ по рождествѣ́ нетлѣ́нну, восхо́дитъ Христо́съ ко Отцу́, Богороди́тельнице, Его́же не оста́ви, а́ще и пло́ть прія́тъ изъ Тебе́, мы́сленную же и одушевле́нную, за ми́лость неизрече́нную.

Катава́сія: Рѣши́тельное очище́ніе грѣхо́въ, огнедохнове́нную пріими́те Ду́ха ро́су, о ча́да свѣтообра́зная церко́вная! Ны́нѣ отъ Сіо́на бо изы́де Зако́нъ, языкоогнеобра́зная Ду́ха благода́ть.

Пѣ́снь 6.

Ирмо́съ: Обы́де мя́ бе́здна, гро́бъ мнѣ́ ки́тъ бы́сть, а́зъ же возопи́хъ къ Тебѣ́, Человѣколю́бцу, и спасе́ мя десни́ца Твоя́, Го́споди.

Взыгра́шася апо́столи, зря́ще на высоту́ дне́сь Зижди́теля взе́млема, упова́ніемъ Ду́ха, и стра́хомъ зовя́ху: сла́ва восхо́ду Твоему́!

Предста́ша а́нгели, вопію́ще, Христе́, ученико́мъ Твои́мъ: и́мже о́бразомъ ви́дѣсте Христа́ восходя́ща съ пло́тію, па́ки пріи́детъ Пра́ведный всѣ́хъ Судія́.

Яко ви́дѣша Тя́, Спа́се на́шъ, небе́сныя си́лы, на высоту́ взе́млема съ тѣ́ломъ, взыва́ху, глаго́люще: вели́ко, Влады́ко, человѣколю́біе Твое́!

Богоро́диченъ: Купину́ Тя́ неопали́мую, и го́ру, и лѣ́ствицу одушевле́нную, и две́рь небе́сную досто́йно сла́вимъ, Марíе сла́вная, правосла́вныхъ Похвало́.

Инъ.

Ирмо́съ: Боже́ственное сіе́ и всечестно́е [соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ].

Да ка́плютъ на́мъ свы́ше о́блацы весе́ліе вѣ́чное, Христо́съ о́блакомъ бо, я́ко херуви́мы носи́мый, къ Своему́ Отцу́ восхо́дитъ дне́сь.

Пло́ти яви́вся подо́біемъ, пре́жде разстоя́щаяся собра́лъ еси́ во еди́но, Человѣколю́бче, и возне́слся еси́, Ще́дре, въ небе́сная, зря́щимъ Тя́ ученико́мъ Твои́мъ.

Сла́ва: Что червле́ны ри́зы пло́ти Соедини́вшагося дебельству́? — святíи а́нгели, Христа́ зря́ще, вѣща́ху, Стра́сти честны́я Боже́ственныя нося́ща о́бразы.

И ны́нѣ, богоро́диченъ: Пое́мъ, Отрокови́це, зача́тіе, пое́мъ Твое́ неизрече́нное рождество́, и́мже изба́вихомся, Чи́стая, тли́, и озлобле́нія, и мра́чнаго а́дова затворе́нія.

Катава́сія: Очище́ніе на́мъ, Христе́, и спасе́ніе, Влады́ко, возсія́лъ еси́ отъ Дѣ́вы, да, я́ко проро́ка отъ звѣ́ря морска́го пе́рсей Іо́ну, отъ тли́ исхити́ши всего́ Ада́ма всеро́дна па́дшаго.

Конда́къ самогла́сенъ, гла́съ 6:

Еже о на́съ испо́лнивъ смотре́ніе и я́же на земли́ соедини́въ небе́снымъ, возне́слся еси́ во сла́вѣ, Христе́ Бо́же на́шъ, ника́коже отлуча́яся, но пребыва́я неотсту́пный, и вопія́ лю́бящимъ Тя́: Азъ е́смь съ ва́ми и никто́же на вы́.

Икосъ:

Яже земли́, на земли́ оста́вившіи, я́же пе́пельная пе́рсти уступа́ющіи, пріиди́те, воспря́немъ и на высоту́ возведе́мъ о́чи и мы́сли, впери́мъ ви́ды, вку́пѣ и чу́вства на небе́сная врата́, сме́ртніи, непщу́имъ бы́ти въ Ма́сличной горѣ́ и взира́ти на Избавля́ющаго на о́блацѣхъ носи́ма. Отону́ду бо Госпо́дь на небеса́ востече́, и та́мо даролюбе́зны да́ры раздая́ апо́столомъ Свои́мъ, утѣ́шивъ я́, я́ко Оте́цъ, и утверди́въ я́, наста́вивъ, я́ко сыно́въ, и рече́ къ ни́мъ: не разлуча́юся ва́съ, Азъ е́смь съ ва́ми и никто́же на вы́.

Синакса́рь на Вознесе́ніе Го́спода Бо́га и Спа́са на́шего Іису́са Христа́.

Стихи́: Одесну́ю сѣ́лъ еси́ Отца́, Сло́ве,
                  Вѣ́ру ученико́мъ извѣ́стншую показа́вый.

Въ то́йже де́нь, въ четверто́къ шесты́я недѣ́ли по Па́сцѣ, Вознесе́ніе пра́зднуемъ Го́спода Бо́га и Спа́са на́шего Іису́са Христа́. Поне́же бо со ученики́ пре́жде Стра́сти пребыва́я, Всесвята́го Ду́ха обѣща́ прише́ствіе, ре́къ: «поле́зно е́сть, да Азъ иду́. Аще бо не иду́, Утѣ́шитель не пріи́детъ». И па́ки: «егда́ же пріи́детъ Онъ, научи́тъ ва́съ на всю́ и́стину». По Воскресе́ніи же изъ ме́ртвыхъ, во дне́хъ четы́редесятихъ явля́яся и́мъ, не вку́пѣ, но особопребыва́ніемъ, яды́й съ ни́ми и пія́, извѣ́стнѣйшее Воскресе́ніе представля́я. Коне́чнѣе мно́га о Ца́рствіи Бо́жіи обѣтова́въ, заповѣ́даше си́мъ отъ Іерусали́ма не отлуча́тися, но та́мо пребыва́ти, Пресвята́го Ду́ха прише́ствія жда́ти, и Тѣ́мъ креща́емымъ: водо́ю бо бя́ше и еди́ною пре́жде креще́ніе отъ Іоа́нна, а́ще и по́слѣжде Епифа́ній Ки́прскій повѣствова́: «я́ко Богосло́въ у́бо Іоа́ннъ Богоро́дицу крести́, Пе́тръ же и то́й — и про́чія апо́столы».

Заповѣ́да же и́мъ пребыва́ти во Іерусали́мѣ, да та́мо пре́жде про́повѣдь Ева́нгелія извѣсти́тся, да не ка́ко въ чужда́я отше́дше мѣста́, удо́бно обо́лгани бу́дутъ, и я́ко до́лжно бя́ше, я́ко во́иномъ нѣ́кіимъ отсю́ду угото́витися ору́жіемъ Ду́ха, и та́ко на бра́нь поити́ вра́гъ Христо́выхъ. Но поне́же вре́мя наста́ Вознесе́нія, возво́дитъ у́бо и́хъ на го́ру Елео́нскую (нарица́ется же си́це, зане́ мно́жайшими ма́слинами насажде́на бѣ́), и глаго́лавъ и́мъ о е́же въ концѣ́ сего́ проповѣ́данія, еще́ же и о непостижи́момъ Свое́мъ Ца́рствіи въ бу́дущемъ, поне́же и о́нѣхъ не искуша́ти Его́ хотя́щихъ зря́ше, су́щей та́мо и Пречи́стѣй Его́ Ма́тери, приставля́етъ а́нгелы и́мъ, на небеса́ восхожде́ніе показу́ющія.

И зря́щимъ у́бо, взя́тся отъ среды́ и́хъ, о́блаку Онаго подъи́мшу, и та́ко отъ а́нгелъ предсыла́емь, повелѣва́ющихъ дру́гъ дру́гу небе́сныхъ двере́й взя́тіе и дивя́щихся е́же отъ крове́й пло́ти Его́ червле́нному, взы́де и сѣ́де одесну́ю Отца́, обожи́въ пло́ть и, дерзну́ глаго́лати, сотвори́въ сію́ ку́пно боже́ственную, е́юже мы́ примири́хомся, дре́внѣй враждѣ́ разруши́вшейся.

Апостоломъ у́бо а́нгели въ ви́дѣ муже́й предста́ша, глаго́люще: «му́жіе галиле́йстіи, что́ стоите́, дивя́щеся и на не́бо взира́юще? Се́й, Его́же ви́дите съ пло́тію Бо́га Іису́са, Се́й пріи́детъ па́ки съ пло́тію я́вѣ, оба́че не я́коже пе́рвѣе, убо́зѣ же и молчали́внѣ, но со сла́вою вели́кою, я́коже ны́нѣ зрите́ отъ а́нгелъ провожда́ема». Тогда́ апо́столи, е́же взира́ти оста́вльше, возврати́шася отъ горы́ Елео́нъ; бли́зъ же сія́ е́сть отъ Іерусали́ма, двѣ́ ты́сящи и четы́редесять ножны́хъ сто́пъ разстоя́щи е́й — се́ бо е́сть суббо́тѣ пу́ть.

Си́це же узако́нено бы́сть Моисе́емъ на толи́ко сто́пъ въ суббо́ту ходи́ти, зане́же и сѣ́нь свидѣ́нія толи́цѣми стопа́ми но́гу бя́ше отстоя́щи отъ іуде́йскаго полка́. Возмо́жно бо бѣ́ нѣ́кимъ та́мо въ суббо́ту ходи́ти поклони́тися, и не вя́щшее ше́ствіе протяза́ти, сего́ ра́ди нарече́ся и суббо́тѣ пу́ть. Мни́тся же нѣ́кимъ отсю́ду, я́ко и Христо́во Вознесе́ніе въ суббо́ту бы́сть, оба́че погрѣши́ша. Возвра́щшеся же апо́столи, внидо́ша въ го́рницу, въ не́йже бѣ́ша соше́дшеся съ мѵроно́сицами жена́ми и Ма́терію Сло́ва, посто́мъ, и моли́твами, и моле́ніемъ упражня́ющеся, и наше́ствія Всесвята́го Ду́ха ожида́юще, я́коже бѣ́ обѣща́ніе.

Вознесы́йся во сла́вѣ, Христе́ Бо́же, поми́луй на́съ. Ами́нь.

Пѣ́снь 7.

Ирмо́съ: Въ пещи́ о́гненнѣй пѣсносло́вцы спасы́й о́троки, благослове́нъ Бо́гъ оте́цъ на́шихъ.

На о́блацѣхъ свѣ́та Вознесы́йся и Спасы́й мíръ, благослове́нъ Бо́гъ оте́цъ на́шихъ.

На ра́му, Спа́се, заблу́ждшее взе́мъ естество́, возне́сся, Бо́гу и Отцу́ приве́лъ еси́.

Возше́дый во пло́ти къ Безпло́тному Отцу́, благослове́нъ Бо́гъ оте́цъ на́шихъ.

Умерщвле́ное на́ше грѣхо́мъ естество́ взе́мъ, Твоему́ Сво́йственному Отцу́, Спа́се, приве́лъ еси́.

Богоро́диченъ: Отъ Дѣ́вы ро́ждься, Юже Богоро́дицу содѣ́лалъ еси́, благослове́нъ Бо́гъ оте́цъ на́шихъ.

Инъ.

Ирмо́съ: Не послужи́ша тва́ри [богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́].

Свѣ́тлый Тя́ Свѣ́тъ су́ща, подъя́тъ о́блакъ, Го́споди, отъ земли́ па́че ума́ воспріе́млема и небе́сніи собо́ри восхвали́ша со апо́столы, глаго́люще: Бо́же, благослове́нъ еси́.

Рука́ма вси, ра́дующеся, воспле́щимъ, Вознесе́ніемъ Христо́вымъ, и воскли́кнемъ: взы́де Бо́гъ во гла́сѣ тру́бнѣ и сѣ́де одесну́ю, я́ко Сопресто́ленъ Отцу́ во вѣ́ки.

Сла́ва: Поя́ дре́вле Моисе́й вели́кій, взыва́ше: да покло́нятся восходя́щу Христу́ небе́сніи а́нгели, я́ко всѣ́хъ Царю́. Ему́же зове́мъ: отце́въ Го́споди и Бо́же, благослове́нъ еси́.

И ны́нѣ, богоро́диченъ: О, чуде́съ пресла́вныхъ! Ка́ко вмѣсти́ла еси́ Бо́га Невмѣсти́маго, Богора́дованная, пло́тію Обнища́вшаго, и со сла́вою мно́гою въ небе́сная Возне́сшагося дне́сь, и Оживи́вшаго человѣ́ки?

Катава́сія: Согла́сная возшумѣ́ орга́нская пѣ́снь почита́ти златосотворе́нный безду́шный истука́нъ: Утѣ́шителева же Свѣтоно́сная Благода́ть почеству́етъ, е́же вопи́ти: Тро́ице Еди́ная, Равноси́льная, Безнача́льная, благослове́на еси́.

Пѣ́снь 8.

Ирмо́съ: Изъ Отца́ пре́жде вѣ́къ рожде́ннаго Сы́на и Бо́га, и въ послѣ́дняя лѣ́та воплоще́ннаго отъ Дѣ́вы Ма́тере, свяще́нницы, по́йте, лю́діе, превозноси́те во вся́ вѣ́ки.

Во двою́ существу́ возлетѣ́вшаго Жизнода́вца Христа́ на небеса́ со сла́вою и Отцу́ сосѣдя́щаго, свяще́нницы, по́йте, лю́діе, превозноси́те во вся́ вѣ́ки.

Отъ рабо́ты и́дольскія тва́рь Изба́вившаго и Предста́вившаго ту́ свобо́дну Твоему́ Отцу́, Тебе́, Спа́се, пое́мъ и Тебе́ превозно́симъ во вся́ вѣ́ки.

Свои́мъ схожде́ніемъ Низложи́вшаго супоста́та и Свои́мъ возше́ствіемъ Возне́сшаго человѣ́ки, свяще́нницы, по́йте, лю́діе, превозноси́те во вся́ вѣ́ки.

Богоро́диченъ: Херуви́мовъ превы́шшая яви́лася еси́, Богоро́дице Чи́стая, во чре́вѣ Твое́мъ си́ми Носи́маго носи́вшая. Его́же со безпло́тными, человѣ́цы, славосло́вимъ во вся́ вѣ́ки.

Инъ.

Ирмо́съ: Отроки благочести́выя [въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки].

Яви́шася у́мове апо́столомъ въ Вознесе́ніи и вѣща́ху: что́, взира́юще, стоите́ дивя́щеся? Се́й, Восходя́й въ небе́сная, пріи́детъ и па́ки суди́ти и́же на земли́ человѣ́комъ, Судія́ сы́й Еди́нъ.

Дади́мъ Бо́гу вели́чіе, хвалы́ согла́сіе воскли́кнемъ, воспои́мъ, лику́имъ, рука́ми же воспле́щимъ: взы́де Бо́гъ на́шъ на небеса́ отъ земли́, а́нгеломъ, арха́нгеломъ пою́щимъ Сего́, я́ко Влады́ку и Творца́ всѣ́хъ.

Благослови́мъ Отца́, и Сы́на, и Свята́го Ду́ха, Го́спода.

Взя́тся превы́ше а́нгелъ естество́ на́ше, дре́вле отпа́дшее, и на Престо́лѣ посажде́но бы́сть Боже́ственнѣ па́че смы́сла. Пріиди́те, торжеству́имъ и воззове́мъ: Го́спода по́йте, дѣла́, и превозноси́те во вся́ вѣ́ки.

И ны́нѣ, [богоро́диченъ]: Се́ Сы́нъ Тво́й, Богоро́дице, плѣни́въ Кресто́мъ Свои́мъ сме́рть, воскре́се тридне́венъ, и ученико́мъ Свои́мъ я́влься, востече́ къ небе́снымъ; съ ни́миже Тебѣ́ покланя́ющеся, пое́мъ и славосло́вимъ во вся́ вѣ́ки.

Та́же: Хва́лимъ, благослови́мъ, покланя́емся [Го́сподеви, пою́ще и превознося́ще во вся́ вѣ́ки].

Катава́сія: Разрѣша́етъ у́зы и ороша́етъ пла́мень Трисвѣ́тлый Богонача́лія о́бразъ, пою́тъ о́троцы, благослови́тъ же еди́наго Спа́са и Вседѣ́теля, я́ко Благодѣ́теля сотворе́нная вся́ческая тва́рь.

Честнѣ́йшую... не пое́мъ, но пое́мъ припѣ́въ:

Велича́й, душе́ моя́, Возне́сшагося отъ земли́ на не́бо Христа́ Жизнода́вца.

Пѣ́снь 9.

Ирмо́съ: Тя́ па́че ума́ и словесе́ Ма́терь Бо́жію, въ лѣ́то Безлѣ́тнаго неизрече́нно ро́ждшую, вѣ́рніи единому́дренно велича́емъ.

Тебе́, Изба́вителя мíра Христа́ Бо́га, апо́столи ви́дяще Боже́ственно возвыша́ема, со стра́хомъ, игра́юще, велича́ху.

Твою́ обожи́вшуюся пло́ть зря́ще, Христе́, на высотѣ́ а́нгели, дру́гъ ко дру́гу глаго́лаху: вои́стинну Се́й е́сть Бо́гъ на́шъ!

Тебе́ безпло́тныхъ чи́нове, Христе́ Бо́же, на о́блацѣхъ взе́млема ви́дяще, взыва́ху: сла́вы Царю́ врата́ возми́те!

Тебе́, Соше́дшаго да́же до послѣ́днихъ земли́, и человѣ́ка Спа́сшаго, и восхожде́ніемъ Твои́мъ Возвы́сившаго, Сего́ велича́емъ.

Богоро́диченъ: Ра́дуйся, Богоро́дице, Ма́ти Христа́ Бо́га, Его́же родила́ еси́, дне́сь отъ земли́ возноси́ма со апо́столы зря́щи, возвелича́ла еси́.

Вторы́й припѣ́въ:

Ангели восхожде́ніе Влады́ки зря́ще, ужаса́хуся, ка́ко со сла́вою взя́тся отъ земли́ на го́рняя.

Инъ.

Ирмо́съ: Вся́къ земноро́дный [да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во].

О, даро́въ, па́че постиже́нія! О, та́инства стра́шнаго! Всѣ́ми бо Влады́чествуяй, отъ земли́ отходя́ къ небе́снымъ, ученико́мъ посла́ Ду́ха Свята́го, просвѣти́вшаго си́хъ смы́слъ и о́гненны сотвори́вшаго благода́тію.

Полцы́ учени́честіи, — Госпо́дь рече́, — вы́ сѣди́те во Іерусали́мѣ, и Азъ низпослю́ ва́мъ Утѣ́шителя Друга́го, Отцу́ Сопресто́льна и Мнѣ́ Равноче́стна, Его́же ви́дите взима́ема и о́блакомъ свѣ́тлымъ носи́ма.

[Сла́ва:] Взя́тся я́вѣ великолѣ́піе вы́ше небе́съ, пло́тію Обнища́вшаго, и сосѣдѣ́ніемъ Отца́ почте́ся естество́ на́ше отпа́дшее: торжеству́имъ, и согла́сно вси́ воскли́кнемъ, и воспле́щимъ рука́ми, ра́дующеся.

[И ны́нѣ,] богоро́диченъ: Свѣтъ отъ Свѣ́та возсія́вый, Всенепоро́чная, изъ Тебе́ возсія́, и че́рность безбо́жія всю́ разруши́, и въ нощи́ спя́щихъ просвѣти́. Сего́ ра́ди вси́ по до́лгу Тя́ во вѣ́ки при́сно ублажа́емъ.

Катава́сія: Ра́дуйся, Цари́це, матеродѣ́вственная Сла́во, вся́ка бо удобообраща́тельная благоглаго́ливая уста́ витíйствовати не мо́гутъ, Тебе́ пѣ́ти досто́йно, изумѣва́етъ же у́мъ вся́къ Твое́ Рождество́ разумѣ́ти. Тѣ́мже Тя́ согла́сно сла́вимъ.

Ексапостила́рій самогла́сенъ:

Ученико́мъ зря́щимъ Тя́, Возне́слся еси́, Христе́, ко Отцу́ сосѣдя́; а́нгели предтеку́ще, зовя́ху: возми́те врата́, возми́те, Ца́рь бо взы́де къ нача́льному Свѣ́ту сла́вы. [Три́жды.]

На хвали́техъ: Вся́кое дыха́ніе... поста́вимъ стихи́ 4 и пое́мъ стихи́ры, гла́съ 1. Подо́бенъ: Небе́сныхъ чино́въ.

Ангельски и́же въ мíрѣ торжеству́имъ, на престо́лѣ сла́вы Бо́гу носи́мому, взыва́юще пѣ́ніе: Свя́тъ еси́, Отче Небе́сный, Соприсносу́щный Сло́ве, Свя́тъ еси́ и Ду́ше Всесвяты́й.

Нача́льницы а́нгеловъ смотря́юще, Спа́се, восхожде́нія стра́нное, недоумѣва́хуся дру́гъ ко дру́гу: что́ видѣ́ніе сіе́? Человѣ́къ у́бо зра́комъ ви́димый, я́коже Бо́гъ, превы́ше небе́съ съ пло́тію восхо́дитъ.

Галиле́ане, зря́ще Тя́ вознесе́нна отъ Ма́сличныя горы́ съ тѣ́ломъ, Сло́ве, слы́шаху а́нгеловъ, вопію́щимъ и́мъ: что́ стоите́ зря́ще? Се́й пріи́детъ па́ки съ пло́тію, и́мже о́бразомъ ви́дѣсте.

Повторя́юще пе́рвую.

Сла́ва, и ны́нѣ, гла́съ 2:

Роди́лся еси́, я́ко Са́мъ восхотѣ́лъ еси́; яви́лся еси́, я́ко Са́мъ изво́лилъ еси́; пострада́лъ еси́ пло́тію, Бо́же на́шъ, изъ ме́ртвыхъ воскре́слъ еси́, попра́въ сме́рть. Возне́слся еси́ во сла́вѣ, вся́ческая Исполня́яй, и посла́лъ еси́ на́мъ Ду́ха Боже́ственнаго, е́же воспѣва́ти и сла́вити Твое́ Божество́.

Славосло́віе вели́кое. Дае́тся и святы́й еле́й бра́тіи. И поуче́ніе Студи́тово. И ча́съ пе́рвый въ притво́рѣ. И соверше́нный отпу́стъ.




НА ЛИТУРГІИ,

Пое́мъ настоя́щія антифо́ны, псало́мъ 46, гла́съ 2:

Сти́хъ 1: Вси язы́цы, восплещи́те рука́ми, воскли́кните Бо́гу гла́сомъ ра́дованія. [Припѣ́въ:] Моли́твами Богоро́дицы, Спа́се, спаси́ на́съ.

Сти́хъ 2: Яко Госпо́дь Вы́шній стра́шенъ, Ца́рь Ве́лій по все́й земли́. [Припѣ́въ:] Моли́твами Богоро́дицы, [Спа́се, спаси́ на́съ].

Сти́хъ 3: Покори́ лю́ди на́мъ и язы́ки подъ но́ги на́ша. [Припѣ́въ:] Моли́твами Богоро́дицы, [Спа́се, спаси́ на́съ].

Сти́хъ 4: Взы́де Бо́гъ въ воскликнове́ніи, Госпо́дь во гла́сѣ тру́бнѣ. [Припѣ́въ:] Моли́твами Богоро́дицы, Спа́се, спаси́ на́съ.

Сла́ва, и ны́нѣ: Моли́твами Богоро́дицы, Спа́се, спаси́ на́съ.

Антифо́нъ 2, псало́мъ 47, гла́съ 2:

Сти́хъ 1: Ве́лій Госпо́дь и хва́ленъ зѣло́, во гра́дѣ Бо́га на́шего, въ горѣ́ святѣ́й Его́. [Припѣ́въ:] Спаси́ на́съ, Сы́не Бо́жій, вознесы́йся во сла́вѣ, пою́щія Ти́: Аллилу́ія.

Сти́хъ 2: Го́ры Сіо́нскія, ре́бра сѣ́верова, гра́дъ Царя́ Вели́каго. [Припѣ́въ:] Спаси́ на́съ, Сы́не Бо́жій, [вознесы́йся во сла́вѣ, пою́щія Ти́: Аллилу́ія].

Сти́хъ 3: Бо́гъ въ тя́жестѣхъ Его́ зна́емь е́сть, егда́ заступа́етъ и́. [Припѣ́въ:] Спаси́ на́съ, Сы́не Бо́жій, вознесы́йся [во сла́вѣ, пою́щія Ти́: Аллилу́ія].

Сти́хъ 4: Яко се́ ца́ріе зе́мстіи собра́шася, снидо́шася вку́пѣ. [Припѣ́въ:] Спаси́ на́съ, Сы́не Бо́жій, вознесы́йся [во сла́вѣ, пою́щія Ти́: Аллилу́ія].

Сла́ва, и ны́нѣ: Единоро́дный Сы́не...

Антифо́нъ 3, псало́мъ 48, гла́съ 4:

Сти́хъ 1: Услы́шите сія́, вси́ язы́цы, внуши́те, вси живу́щіи по вселе́ннѣй. Тропа́рь, гла́съ 4: Возне́слся еси́ во сла́вѣ, Христе́ Бо́же на́шъ...

Сти́хъ 2: Земноро́дніи же и сы́нове челове́честіи, вку́пѣ бога́тъ и убо́гъ. Тропа́рь, гла́съ 4: Возне́слся еси́ во сла́вѣ...

Сти́хъ 3: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ. Тропа́рь, гла́съ 4: Возне́слся еси́ во сла́вѣ...

Сти́хъ 4: Приклоню́ въ при́тчу у́хо мое́, отве́рзу во псалти́ри гана́ніе мое́. Тропа́рь, гла́съ 4: Возне́слся еси́...

Вхо́дный: Взы́де Бо́гъ въ воскликнове́ніи, Госпо́дь во гла́сѣ тру́бнѣ.

Тропа́рь: Возне́слся еси́... Сла́ва, и ны́нѣ, конда́къ: Еже о на́съ испо́лнивъ...

Та́же трисвято́е. Проки́менъ, гла́съ 7: Вознеси́ся на небеса́, Бо́же,* и по все́й земли́ сла́ва Твоя́. Сти́хъ: Гото́во се́рдце мое́, Бо́же, гото́во се́рдце мое́, воспою́ и пою́ во сла́вѣ мое́й. Апо́столъ въ Дѣя́ніихъ, зача́ло 1: Пе́рвое у́бо сло́во сотвори́хъ... Аллилу́ія, гла́съ 2: Взы́де Бо́гъ въ воскликнове́ніи, Госпо́дь во гла́сѣ тру́бнѣ. Сти́хъ: Вси́ язы́цы, восплещи́те рука́ми, воскли́кните Бо́гу гла́сомъ ра́дованія. Ева́нгеліе отъ Луки́, зача́ло 114: Воскре́съ Іису́съ отъ ме́ртвыхъ и ста́ посредѣ́ учени́къ Свои́хъ... За Досто́йно.., пое́мъ и до отда́нія ирмо́съ: Тя́, па́че ума́... Прича́стный: Взы́де Бо́гъ въ воскликнове́ніи, Госпо́дь во гла́сѣ тру́бнѣ. Аллилу́ія, три́жды. На трапе́зѣ ве́ліе утѣше́ніе бра́тіи.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 144 об. – 154 об.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.