Церковный календарь
Новости


2017-09-14 / russportal
Прот. Константинъ Зноско. "Истор. очеркъ церк. уніи". Часть 2-я. Глава 2-я (1993)
2017-09-14 / russportal
Прот. Константинъ Зноско. "Истор. очеркъ церк. уніи". Часть 2-я. Глава 1-я (1993)
2017-09-14 / russportal
Свт. Игнатій (Брянчаниновъ). Понятіе о ереси и расколѣ (1996)
2017-09-14 / russportal
Свт. Игнатій (Брянчаниновъ). Жизнь схимонаха Ѳеодора (1996)
2017-09-13 / russportal
Прот. Константинъ Зноско. Краткій обзоръ причинъ, пород. Литовскую церк. унію (1993)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 10-я (1987)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 9-я (1987)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 8-я (1987)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 7-я (1987)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 6-я (1987)
2017-09-12 / russportal
Іером. Серафимъ (Роузъ). "Душа послѣ смерти". Глава 9-я (1991)
2017-09-12 / russportal
Іером. Серафимъ (Роузъ). "Душа послѣ смерти". Глава 8-я (1991)
2017-09-12 / russportal
Прот. Григорій Дьяченко. Поуч. (2-е) на пер. мощей св. бл. кн. Александра Невскаго (1900)
2017-09-12 / russportal
Прот. Григорій Дьяченко. Поуч. (1-е) на пер. мощей св. бл. кн. Александра Невскаго (1900)
2017-09-11 / russportal
Прот. Григорій Дьяченко. Поученіе "Безмолвный обличитель убійцы" (1900)
2017-09-11 / russportal
Прот. Григорій Дьяченко. Поученіе "Возмездіе за грѣхъ" (1900)
Новости въ видѣ
RSS-канала: .
Сегодня - среда, 20 сентября 2017 г. Сейчасъ на порталѣ посѣтителей - 20.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ НЕДѢЛЮ СЕДМУЮ ПО ПАСЦѢ, СВЯТЫХЪ ОТЕЦЪ, ИЖЕ ВЪ НИКЕИ.

Недѣ́ля седма́я, святы́хъ 318 богоно́сныхъ оте́цъ, и́же въ Нике́и.

ВЪ СУББОТУ ВЕЧЕРА, НА МАЛѢЙ ВЕЧЕРНИ,

На Го́споди воззва́хъ... поста́вимъ стихи́ 4 и пое́мъ стихи́ры воскре́сны, гла́съ 6:

Побѣ́ду имѣ́яй, Христе́... Дне́сь Христо́съ... Тебе́, Го́споди.., повторя́юще 1-ю. Сла́ва, гла́съ то́йже: Та́йныя дне́сь... [ищи́ сія́ вся́ на вели́цѣй вече́рни.]

И ны́нѣ, богоро́диченъ:

Досто́йно е́сть, я́ко вои́стинну блажи́ти Тя́, Богоро́дицу: въ Твое́ бо пречи́стое вше́дъ чре́во всѣ́хъ Содѣ́тель, пло́ть бы́сть, не преложи́вся естество́мъ, ниже́ мечта́вся о смотре́ніи, но воспрія́тѣй изъ Тебе́ слове́сно одушевле́ннѣй пло́ти соедини́вся по ѵпоста́си. Отону́дуже благоче́стно во обои́хъ естества́хъ явля́ющихся ра́знство твори́мъ. Того́ моли́, Честна́я Пресвята́я, низпосла́ти на́мъ ми́ръ и ве́лію ми́лость.

На стихо́внѣ воскре́сная стихи́ра.

Та́же, настоя́щія стихи́ры подо́бны Пресвяты́я Богоро́дицы, гла́съ 6. Подо́бенъ: Все́ отло́жше.

Сти́хъ: Помяну́ и́мя Твое́ во вся́комъ ро́дѣ и ро́дѣ.

Кля́твою, я́ко обѣща́ Твоему́ пра́отцу дре́вле Бо́гъ Прелѣ́тный, въ послѣ́дняя времена́ соверши́, произше́дъ, Пречи́стая, отъ чре́ва Твоего́ боже́ственнаго. Ибо вои́стинну возсія́ отъ Тебе́ Госпо́дь, дла́нію содержа́й концы́. Его́же и мнѣ́ благоувѣ́тлива сотвори́ въ ча́съ су́дный, Дѣ́во Блаже́нная, Того́ Ца́рствія мя́ получи́ти добродѣ́телей возвыше́ніемъ и страсте́й умерщвле́ніемъ.

Сти́хъ: Слы́ши, Дщи́, и ви́ждь, и приклони́ у́хо Твое́.

Ума́ чистото́ю Иса́ія, Дѣ́во, издале́ча прорече́, роди́ти иму́щую Созда́теля всея́ тва́ри Тя́, Честна́я Пречи́стая: Ты́ бо яви́лася еси́ еди́на во вѣ́ки Всенепоро́чная. Тѣ́мже Тя́ молю́: оскверне́ную очи́сти ду́шу мою́, и свѣ́тлости Боже́ственныя о́бщника мя́ покажи́, и Боже́ственнаго Твоего́ Сы́на стоя́нія десна́го, егда́ ся́детъ, я́коже пи́сано е́сть, суди́ти мíру всему́.

Сти́хъ: Лицу́ Твоему́ помо́лятся [бога́тіи лю́дстіи].

Сме́рти разруше́ніе Рождество́мъ Твои́мъ яви́ся: Ты́ бо еси́, Отрокови́це, Живота́ Нетлѣ́ннаго пребыва́лище. Тѣ́мже Тя́ молю́: въ мѣ́стѣхъ а́довыхъ страсте́й мои́хъ лежа́ща, Ты́ возста́ви и къ весе́лію мя́ оживи́, Дѣ́во; руково́дствуй ко блаже́нному возда́нію, и вѣ́чныя и Боже́ственныя сподо́би ра́дости, идѣ́же сла́дость присносу́щная, идѣ́же свѣ́тъ невече́рній.

Сла́ва, гла́съ 4: Моле́бную па́мять... И ны́нѣ, пра́здника: Го́споди, та́инство... [зри́ на вели́цѣй вече́рни, на стихо́внѣ, сла́вникъ.] Тропа́рь воскре́сенъ. Сла́ва, и ны́нѣ, пра́здника. Ектеніи́ и отпу́стъ.



НА ВЕЛИЦѢЙ ВЕЧЕРНИ,

Блаже́нъ му́жъ... На Го́споди воззва́хъ... поста́вимъ стихо́въ де́сять и пое́мъ воскре́сны 3, и Вознесе́нію 3, и отце́мъ 4.

Стихи́ры воскре́сны, гла́съ 6:

Побѣ́ду имѣ́яй, Христе́, ю́же на а́да, на Кре́стъ возше́лъ еси́, да во тмѣ́ сме́рти сѣдя́щія воскреси́ши съ Собо́ю, Иже въ ме́ртвыхъ Свобо́дь, Источа́яй живо́тъ отъ Своего́ свѣ́та, Всеси́льне Спа́се, поми́луй на́съ.

Дне́сь Христо́съ, сме́рть попра́въ, я́коже рече́, воскре́се, и ра́дованіе мíру дарова́, да вси́ взыва́юще пѣ́снь, та́ко рце́мъ: Исто́чниче жи́зни, Непристу́пный Свѣ́те, Всеси́льне Спа́се, поми́луй на́съ.

Тебе́, Го́споди, Су́щаго по все́й тва́ри, грѣ́шніи ка́мо бѣжи́мъ? На небеси́ Са́мъ живе́ши, во а́дѣ попра́лъ еси́ сме́рть. Во глубины́ морскíя? — Та́мо рука́ Твоя́ Влады́ко. Къ Тебѣ́ прибѣга́емъ, Тебѣ́ припа́дающе, мо́лимся: Воскресы́й изъ ме́ртвыхъ, поми́луй на́съ.

Ины самогла́сны, Вознесе́нія, гла́съ то́йже:

Госпо́дь вознесе́ся на небеса́, да по́слетъ Утѣ́шителя мíру: небеса́ угото́ваша престо́лъ Его́, о́блацы — восхожде́ніе Его́. Ангели дивя́тся, Человѣ́ка зря́ще превы́ше себе́. Отецъ жде́тъ, Его́же въ нѣ́драхъ и́мать Соприсносу́щна; Ду́хъ же Святы́й вели́тъ всѣ́мъ а́нгеломъ Его́: возми́те врата́, кня́зи, ва́ша, вси́ язы́цы, восплещи́те рука́ми, я́ко взы́де Христо́съ, идѣ́же бѣ́ пе́рвѣе.

Го́споди, Твоему́ Вознесе́нію удиви́шася херуви́ми, зря́ще Тебе́, Бо́га, на о́блацѣхъ восходя́ща, на ни́хъ сѣдя́щаго; и сла́вимъ Тя́, я́ко бла́га ми́лость Твоя́: сла́ва Тебѣ́!

На гора́хъ святы́хъ зря́ще Твое́ Вознесе́ніе, Христе́, Сія́ніе сла́вы Отчи, воспѣва́емъ Тво́й свѣтообра́зный лица́ зра́къ, кла́няемся Страсте́мъ Твои́мъ, почита́емъ Воскресе́ніе, сла́вное Вознесе́ніе сла́вяще: поми́луй на́съ.

Ины стихи́ры святы́мъ отце́мъ, гла́съ 6. Подо́бенъ: Отча́янная.

Изъ чре́ва роди́лся еси́ пре́жде денни́цы, отъ Отца́ безма́теренъ пре́жде вѣкъ; а́ще и Арій тва́рь Тя́, а не Бо́га сла́витъ, де́рзостію смѣша́я Тя́, Зижди́теля, тва́ремъ безу́мно, вещество́ огня́ вѣ́чнаго себе́ сокро́вищствуяй. Но Собо́ръ, и́же въ Нике́и, Сы́на Бо́жія Тя́ проповѣ́да, Го́споди, Отцу́ и Ду́ху Сопресто́льна.

Кто́ Твою́, Спа́се, ри́зу раздра́? — Арій, Ты́ ре́клъ еси́, и́же Тро́ицы пресѣче́ Единоче́стное Нача́ло въ раздѣле́нія; се́й отве́рже Тя́ бы́ти Еди́наго отъ Тро́ицы, се́й и Несто́рія учи́тъ Богоро́дицу не глаго́лати. Но Собо́ръ, и́же въ Нике́и, Сы́на Бо́жія Тя́ проповѣ́да, Го́споди, Отцу́ и Ду́ху Сопресто́льна.

Въ бре́гъ па́даетъ грѣха́ Арій, возненави́дѣвый свѣ́та ви́дѣти, и боже́ственною растерза́ется у́дицею вну́треннихъ, все́ изда́ти существо́ и ду́шу ну́ждно, другíй Іу́да бы́въ нра́вомъ и о́бразомъ. Но Собо́ръ, и́же въ Нике́и, Сы́на Бо́жія Тя́ проповѣ́да, Го́споди, Отцу́ и Ду́ху Сопресто́льна.

Арій безу́мный Пресвяты́я Тро́ицы пресѣче́ единонача́ліе въ три́ беззако́нная же и несра́сленная существа́. Тѣ́мже отцы́ богоно́сніи, соше́дшеся усе́рдно, ре́вностію разжиза́еми, я́коже Ѳесви́тянинъ Илія́, духо́внымъ посѣка́ютъ мече́мъ студу́ научи́вшаго ху́льника, я́коже Ду́хъ вѣща́ше.

Сла́ва, гла́съ 6:

Та́йныя дне́сь Ду́ха трубы́, богоно́сныя отцы́ восхва́лимъ, пѣснопѣ́вшія посредѣ́ Це́ркве пѣ́снь сли́чную богосло́вія: Тро́ицу Еди́ну непремѣ́нную, Существо́ же и Божество́, низложи́тели Аріевы и правосла́вныхъ побо́рники, моля́щіяся всегда́ Го́споду поми́ловатися душа́мъ на́шимъ.

И ны́нѣ, богоро́диченъ:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Вхо́дъ. Проки́менъ дне́ и чте́нія:

Бытія́ чте́ніе. [Глава́ 14.]

Слы́шавъ Авра́мъ, я́ко плѣне́нъ бы́сть Ло́тъ, брата́ничь его́, сочте́ своя́ домоча́дцы, три́ста и осмьна́десять, и погна́ во слѣ́дъ и́хъ да́же до Да́на. И нападе́ на ня́ но́щію са́мъ и о́троцы его́ съ ни́мъ; и порази́ и́хъ, и гони́ и́хъ до Хова́ла, е́же е́сть ошу́юю Дама́ска. И возврати́ вся́каго коня́ содо́мскаго, и Ло́та, брата́нича своего́, возврати́, и вся имѣ́нія его́, и жены́, и лю́ди. Изы́де же ца́рь Содо́мскій во срѣ́теніе ему́, повнегда́ возврати́тися ему́ отъ сѣ́ча Ходоллогомо́рскаго, и съ царьми́, и́же съ ни́мъ, во удо́ль Са́винъ; сіе́ же бя́ше по́ле царе́во. И Мелхиседе́къ, ца́рь Сали́мскій, изнесе́ хлѣ́бы и вино́, бя́ше же свяще́нникъ Бо́га Вы́шняго. И благослови́ Авра́ма, и рече́: благослове́нъ Авра́мъ Бо́гомъ Вы́шнимъ, Иже созда́ не́бо и зе́млю; и благослове́нъ Бо́гъ Вы́шній, Иже предаде́ враги́ твоя́ подъ ру́ки тебѣ́.

Втора́го зако́на чте́ніе. [Глава́ 1.]

Во дне́хъ о́нѣхъ, рече́ Моисе́й къ сыно́мъ Изра́илевымъ: ви́дите, преда́хъ предъ лице́мъ ва́шимъ зе́млю, вше́дше, наслѣ́дуйте зе́млю, е́юже кля́тся Госпо́дь отце́мъ ва́шимъ — Авраа́му, Исаа́ку и Іа́кову — да́ти и́мъ и сѣ́мени и́хъ по ни́хъ. И реко́хъ къ ва́мъ во вре́мя о́но, глаго́ля: не возмогу́ еди́нъ води́ти ва́съ. Госпо́дь Бо́гъ на́шъ умно́жилъ вы́ е́сть, и се́, есте́ дне́сь, я́ко звѣ́зды небе́сныя, мно́жествомъ. Госпо́дь Бо́гъ оте́цъ на́шихъ да приложи́тъ ва́мъ, я́ко да бу́дете ты́сящами сугу́бо, и да благослови́тъ ва́съ, я́коже глаго́ла ва́мъ. И взя́хъ отъ ва́съ му́жы му́дры, и свѣ́домы, и смы́сленны и поста́вихъ и́хъ владѣ́ти надъ ва́ми: тысященача́льники, и стонача́льники, и пятдесятонача́льники, и десятонача́льники, и писмовводи́тели судія́мъ ва́шимъ. И заповѣ́дахъ судія́мъ ва́шимъ во вре́мя о́но, глаго́ля: разслу́шайте посредѣ́ бра́тій ва́шихъ и суди́те пра́ведно посредѣ́ му́жа, и посредѣ́ бра́та его́, и посредѣ́ прише́льца его́. Да не позна́ете лица́ въ судѣ́, ма́лому и вели́кому су́диши, и не устыди́шися лица́ человѣ́ческа, я́ко су́дъ Бо́жій е́сть.

Втора́го зако́на чте́ніе. [Глава́ 10.]

Во дне́хъ о́нѣхъ рече́ Моисе́й къ сыно́мъ Изра́илевымъ: се́ Го́спода Бо́га твоего́ не́бо, и не́бо небесе́, земля́ и вся́, ели́ка су́ть на не́й. Оба́че отцы́ ва́ша произво́ли Госпо́дь люби́ти я́ и избра́ сѣ́мя и́хъ по ни́хъ, ва́съ, па́че всѣ́хъ язы́къ, въ де́нь се́й. И обрѣ́жите жестосе́рдіе ва́ше и вы́и ва́шея не ожесточи́те ктому́. Ибо Госпо́дь Бо́гъ на́шъ, Се́й Бо́гъ бого́въ и Госпо́дь господе́й; Бо́гъ Вели́кій, Крѣ́пкій и Стра́шный, Иже не диви́тся лицу́, ниже́ взе́млетъ да́ръ. Творя́й су́дъ прише́льцу, и сиротѣ́, и вдовѣ́, и лю́битъ прише́льца, да́ти ему́ хлѣ́бъ и ри́зу. И возлюби́те прише́льца, прише́льцы бо бѣ́сте въ земли́ Еги́петстѣй. Го́спода Бо́га твоего́ да убои́шися, и Тому́ еди́ному послу́жиши, и къ Нему́ прилѣпи́шися, и и́менемъ Его́ клене́шися. То́й хвала́ твоя́, и То́й Бо́гъ тво́й, Иже сотвори́ тебѣ́ вели́кая и сла́вная сія́, я́же ви́дѣста о́чи твои́.

На литíи стихи́ры пра́здника, гла́съ 1:

Возше́дъ на небеса́, отону́дуже и соше́лъ еси́, не оста́ви на́съ си́рыхъ, Го́споди: да пріи́детъ Тво́й Ду́хъ, нося́ ми́ръ мíрови, покажи́ сыно́мъ человѣ́ческимъ дѣла́ си́лы Твоея́, Го́споди Человѣколю́бче.

Сла́ва, отце́мъ, гла́съ 3:

Апо́стольскихъ преда́ній извѣ́стніи храни́теліе бы́сте, святíи отцы́: Святы́я бо Тро́ицы Единосу́щное, правосла́вно научи́вше, Аріево хуле́ніе собо́рнѣ низложи́сте, съ ни́мже и Македо́нія духобо́рца обличи́вше, осуди́сте Несто́рія, Евти́хія и Діоско́ра, Саве́ллія же и Севи́ра безгла́внаго. Ихже пре́лести испроси́те изба́витися на́мъ, нескве́рну на́шему житію́ въ вѣ́рѣ сохрани́тися, мо́лимся.

И ны́нѣ, пра́зднику, гла́съ 6:

Го́споди, смотре́нія соверши́въ та́инство, пои́мъ Твоя́ ученики́ на го́ру Елео́нскую, возноси́лся еси́, и се́ тве́рдь небе́сную проше́лъ еси́, мене́ ра́ди Обнища́вый по мнѣ́; и возше́дъ, отону́дуже не разлучи́лся еси́, Всесвята́го Твоего́ Ду́ха низпосли́, просвѣща́юща ду́ши на́ша.

На стихо́внѣ стихи́ры, гла́съ 6:

Воскресе́ніе Твое́, Христе́ Спа́се, а́нгели пою́тъ на небесѣ́хъ, и на́съ на земли́ сподо́би чи́стымъ се́рдцемъ Тя́ сла́вити.

Ины стихи́ры по алфави́ту:

Сти́хъ: Госпо́дь воцари́ся, въ лѣ́поту облече́ся.

Врата́ сокруши́въ мѣ́дная и вереи́ а́довы сотры́й, я́ко Бо́гъ Всеси́ленъ, ро́дъ человѣ́ческій па́дшій воскреси́лъ еси́. Сего́ ра́ди и мы́ согла́сно вопіе́мъ: Воскресы́й изъ ме́ртвыхъ, Го́споди, сла́ва Тебѣ́!

Сти́хъ: Ибо утверди́ вселе́нную, я́же не подви́жится.

Тлѣ́нія на́съ дре́вняго Христо́съ испра́вити хотя́, на Крестѣ́ пригвожда́ется и во гро́бѣ полага́ется, Его́же мѵроно́сицы жены́ со слеза́ми иска́ху, рыда́юще, глаго́лаху: увы́ на́мъ, Спа́се всѣ́хъ, ка́ко изво́лилъ еси́ во гро́бъ всели́тися? Всели́выйжеся хотя́й, ка́ко укра́денъ бы́лъ еси́? Ка́ко преложе́нъ бы́лъ еси́? Ко́е же мѣ́сто Твое́ Живоно́сное сокры́ Тѣ́ло? Но, Влады́ко, я́коже обѣща́лся еси́, на́мъ яви́ся, и утоли отъ на́съ рыда́ніе сле́зъ. Пла́чущимся же и́мъ, а́нгелъ къ ни́мъ возопи́: отъ пла́ча преста́вше, апо́столомъ рцы́те, я́ко воскре́се Госпо́дь, мíрови да́руяй очище́ніе и ве́лію ми́лость!

Сти́хъ: До́му Твоему́ подоба́етъ [святы́ня, Го́споди, въ долготу́ днíй].

Распны́йся, я́ко восхотѣ́лъ еси́, Христе́, и сме́рть погребе́ніемъ Твои́мъ плѣни́вый, тридне́венъ воскре́слъ еси́, я́ко Бо́гъ, со сла́вою, мíрови да́руяй безконе́чную жи́знь и ве́лію ми́лость.

Сла́ва, отце́мъ, гла́съ 4:

Моле́бную па́мять дне́сь богоно́сныхъ отце́въ, отъ всея́ вселе́нныя собра́вшихся во свѣ́тлѣмъ гра́дѣ Нике́йстѣмъ, правосла́вныхъ собра́нія, благоче́ствующе, вѣ́рно пра́зднуемъ: сíи бо лю́таго Арія безбо́жное велѣ́ніе благочестному́дреннѣ низложи́ша, и отъ Каѳоли́ческія Це́ркве собо́рнѣ того́ изгна́ша, и я́сно Сы́на Бо́жія единосу́щна и соприсносу́щна, пре́жде вѣ́къ Су́ща, всѣ́хъ научи́ша исповѣ́дати во изображе́ніи вѣ́ры, извѣ́стно и благоче́стно сіе́ изложи́вше. Тѣ́мже и мы́, боже́ственнымъ и́хъ повелѣ́ніемъ послѣ́дствующе, извѣ́стно вѣ́рующе, слу́жимъ, со Отце́мъ Сы́ну и Ду́ху Всесвято́му, во еди́номъ Божествѣ́, Тро́ицѣ Единосу́щнѣй.

И ны́нѣ, пра́зднику, гла́съ то́йже:

Го́споди, та́инство, е́же отъ вѣко́въ сокрове́нное и отъ родо́въ, испо́лнивъ я́ко Бла́гъ, прише́лъ еси́ со ученики́ Твои́ми на го́ру Елео́нскую, имѣ́я Ро́ждшую Тя́, Творца́ и всѣ́хъ Содѣ́теля: То́й бо, въ стра́сти Твое́й ма́терски па́че всѣ́хъ болѣ́зновавшей, подоба́ше и сла́вою пло́ти Твоея́ премно́гія наслади́тися ра́дости. Ея́же и мы́ причаща́ющеся, е́же на небеса́ восхо́домъ Твои́мъ, Влады́ко, вели́кую Твою́ ми́лость на на́съ бы́вшую сла́вимъ.

Та́же, Ны́нѣ отпуща́еши... Трисвято́е, и по Отче на́шъ... Тропа́рь отце́въ, гла́съ 8: Препросла́вленъ еси́.., два́жды. И пра́здника, еди́ножды [пи́саны на у́трени.] И благослове́ніе хлѣ́бовъ, и чте́ніе Дѣя́ній святы́хъ апо́столъ.

[Зри́:] Аще ли нѣ́сть бдѣ́нія: Тропа́рь воскре́сенъ: Ангельскія си́лы... Сла́ва, отце́въ. И ны́нѣ, Вознесе́нія. На повече́ріи: Конда́къ отце́въ. Сла́ва, и ны́нѣ, Вознесе́нія. На полу́нощницѣ пое́мъ кано́нъ Тро́ичный окто́иха гла́са, и про́чее, я́ко обы́чно, и отпу́стъ.



НА УТРЕНИ,

На Бо́гъ Госпо́дь... Тропа́рь воскре́сенъ, гла́съ 6:

Ангельскія си́лы на гро́бѣ Твое́мъ, и стрегу́щіи омертвѣ́ша; и стоя́ше Марíя во гро́бѣ, и́щущи Пречи́стаго Тѣ́ла Твоего́. Плѣни́лъ еси́ а́дъ, не искуси́вся отъ него́; срѣ́тилъ еси́ Дѣ́ву, да́руяй живо́тъ. Воскресы́й изъ ме́ртвыхъ, Го́споди, сла́ва Тебѣ́! [Два́жды.]

Сла́ва, отце́въ, гла́съ 8:

Препросла́вленъ еси́, Христе́ Бо́же на́шъ, свѣти́ла на земли́ отцы́ на́ши основа́вый, и тѣ́ми ко и́стиннѣй вѣ́рѣ вся́ ны́ наста́вивый, Многоблагоутро́бне, сла́ва Тебѣ́.

И ны́нѣ, тропа́рь Вознесе́нія, [гла́съ 4]:

Возне́слся еси́ во сла́вѣ, Христе́ Бо́же на́шъ, ра́дость сотвори́вый ученико́мъ обѣтова́ніемъ Свята́го Ду́ха, извѣще́ннымъ и́мъ бы́вшимъ благослове́ніемъ, я́ко Ты́ еси́ Сы́нъ Бо́жій, Изба́витель мíра.

По 1-мъ стихосло́віи сѣда́ленъ, гла́съ 6:

Гро́бу отве́рсту, а́ду пла́чущуся, Марíя вопія́ше ко скры́вшимся апо́столомъ: изыди́те, виногра́да дѣ́лателіе, проповѣ́дите воскресе́нія сло́во: воскре́се Госпо́дь, подая́й мíрови ве́лію ми́лость.

Сти́хъ: Воскресни́, Го́споди Бо́же мой, [да вознесе́тся рука́ Твоя́, не забу́ди убо́гихъ Твои́хъ до конца́].

Го́споди, предстоя́ше гро́бу Твоему́ Марíя Магдали́на и пла́каше, вопію́щи, вертогра́даря Тя́ мня́щи, глаго́лаше: гдѣ́ положи́лъ еси́ Вѣ́чный Живо́тъ? гдѣ́ скры́лъ еси́ Сѣдя́щаго на престо́лѣ херуви́мстѣмъ? Стрегу́щіи бо Сего́ отъ стра́ха омертвѣ́ша. Или́ Го́спода моего́ дади́те ми́, или́ со мно́ю возопíйте: въ ме́ртвыхъ бы́въ и ме́ртвыя воскреси́вый, сла́ва Тебѣ́!

Сла́ва, и ны́нѣ, богоро́диченъ:

Благослове́нную Нарекíй Твою́ Ма́терь, прише́лъ еси́ на Стра́сть во́льнымъ хотѣ́ніемъ, возсія́въ на Крестѣ́, взыска́ти хотя́ Ада́ма, глаго́ля а́нгеломъ: сра́дуйтеся Мнѣ́, я́ко обрѣ́теся поги́бшая дра́хма. Вся́ му́дрѣ устро́ивый, Бо́же на́шъ, сла́ва Тебѣ́.

По 2-мъ стихосло́віи сѣда́ленъ, гла́съ то́йже:

Живо́тъ во гро́бѣ возлежа́ше, и печа́ть на ка́мени надлежа́ше, я́ко Царя́ спя́ща, во́ини стрежа́ху Христа́; и враги́ Своя́ неви́димо порази́вый, воскре́се Госпо́дь.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, [повѣ́мъ вся́ чудеса́ Твоя́].

Во́льною сме́ртію живо́тъ безсме́ртный обрѣто́хомъ, Всеси́льне и еди́не всѣ́хъ Спа́се: Ты́ бо въ честно́мъ Твое́мъ Воста́ніи вся́ воззва́лъ еси́, разруши́вый а́дову побѣ́ду и сме́рти жа́ло.

Сла́ва, и ны́нѣ, богоро́диченъ:

Богоро́дице Дѣ́во, моли́ Сы́на Твоего́, во́лею пригвозди́вшагося на Крестѣ́ и воскре́сшаго изъ ме́ртвыхъ, Христа́ Бо́га на́шего, спасти́ся душа́мъ на́шимъ.

По Непоро́чнахъ... Благослове́нъ еси́, Го́споди... Ангельскій собо́ръ...

И а́біе ипакои́, гла́съ 6:

Во́льною и животворя́щею Твое́ю сме́ртію, Христе́, врата́ а́дова сокруши́въ, я́ко Бо́гъ, отве́рзлъ еси́ на́мъ дре́вній ра́й, и воскре́съ изъ ме́ртвыхъ, изба́вилъ еси́ отъ истлѣ́нія живо́тъ на́шъ.

Степе́нна, гла́съ 6:

Антифо́нъ 1:

На не́бо о́чи мои́ возвожу́ къ Тебѣ́, Сло́ве: уще́дри мя́, да живу́ Тебѣ́.

Поми́луй на́съ, уничиже́нныхъ, устроя́я благопотре́бныя Твоя́ сосу́ды, Сло́ве.

Сла́ва: Свято́му Ду́ху вся́кая всеспаси́тельная вина́: а́ще ко́ему Се́й по достоя́нію дхне́тъ, ско́ро взе́млетъ отъ земны́хъ, восперя́етъ, возраща́етъ, устроя́етъ горѣ́.

И ны́нѣ, то́йже.

Антифо́нъ 2:

Аще не Госпо́дь бы бы́лъ въ на́съ, никто́же отъ на́съ проти́ву возмо́глъ бы вра́жіимъ бра́немъ одолѣ́ти: побѣжда́ющіи бо отъ здѣ́ возно́сятся.

Зубы́ и́хъ да не я́та бу́детъ душа́ моя́, я́ко птене́цъ, Сло́ве. Увы́ мнѣ́! ка́ко и́мамъ отъ врага́ избы́ти, грѣхолюби́въ сы́й?

Сла́ва: Святы́мъ Ду́хомъ обоже́ніе всѣ́мъ, благоволе́ніе, ра́зумъ, ми́ръ и благослове́ніе: Равнодѣ́тельный бо е́сть Отцу́ и Сло́ву.

И ны́нѣ, то́йже.

Антифо́нъ 3:

Надѣ́ющіися на Го́спода враго́мъ стра́шни и всѣ́мъ ди́вни: горѣ́ бо зря́тъ.

Въ беззако́нія ру́къ свои́хъ пра́ведныхъ жре́бій, помо́щника Тя́ имѣ́я, Спа́се, не простира́етъ.

Сла́ва: Свята́го Ду́ха держа́ва на всѣ́хъ, Ему́же вы́шняя во́инства покланя́ются со вся́кимъ дыха́ніемъ до́льнимъ.

И ны́нѣ, то́йже.

Проки́менъ, гла́съ 6: Го́споди, воздви́гни си́лу Твою́* и пріиди́, во е́же спасти́ на́съ. Сти́хъ: Пасы́й Изра́иля, вонми́, наставля́яй, я́ко овча́, Іо́сифа. Вся́кое дыха́ніе... Ева́нгеліе воскре́сно 10-е, Іоа́нна, зача́ло 66: Яви́ся Іису́съ ученико́мъ Свои́мъ, воста́въ отъ ме́ртвыхъ... Та́же, Воскресе́ніе Христо́во... Псало́мъ 50-й. И про́чее, обы́чно.

Кано́нъ воскре́сенъ, со ирмосо́мъ, на 4, и Вознесе́нія на 4, и святы́хъ оте́цъ на 6.

Кано́нъ воскре́сенъ, гла́съ 6:
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Распросте́ртыма дла́нма на Крестѣ́, Оте́ческаго испо́лнилъ еси́ благоволе́нія, Благíй Іису́се, вся́ческая, тѣ́мже побѣ́дную пѣ́снь Тебѣ́ вси́ пое́мъ.

Стра́хомъ къ Тебѣ́, я́ко рабы́ня, сме́рть повелѣ́вшися приступи́ Влады́цѣ живота́, то́ю подава́ющему на́мъ безконе́чный живо́тъ и воскресе́ніе.

Богоро́диченъ: Своего́ пріи́мши Содѣ́теля, я́ко Са́мъ восхотѣ́, изъ безсѣ́менна чре́ва Твоего́, па́че ума́ воплоща́ема, Чи́стая, тва́рей вои́стинну яви́лася еси́, Влады́чица.

Кано́нъ Вознесе́нію, гла́съ 5. Ирмо́съ: Спаси́телю Бо́гу...

Воспои́мъ, вси́ лю́діе, на ра́мѣхъ херуви́мскихъ возне́сшуся со сла́вою Христу́ и спосади́вшему на́съ одесну́ю Отца́, пѣснь побѣ́дную, я́ко просла́вися.

Хода́тая Бо́гу и человѣ́комъ, Христа́, ли́цы а́нгельстіи ви́дѣвше съ пло́тію въ вы́шнихъ, удивля́хуся, согла́сно же воспѣва́ху пѣ́снь побѣ́дную, я́ко просла́вися.

Явльшемуся Бо́гу на горѣ́ Сина́йстѣй и зако́нъ да́вшему богови́дцу Моисе́ю, отъ горы́ Елео́нскія возне́сшемуся пло́тію, Тому́ вси́ воспои́мъ, я́ко просла́вися.

Богоро́диченъ: Пречи́стая Ма́ти Бо́жія, Воплоще́ннаго отъ Тебе́ и отъ нѣ́дръ Роди́теля не отсту́пльшаго Бо́га, непреста́нно моли́ отъ вся́каго обстоя́нія спасти́, я́же созда́.

Кано́нъ святы́мъ отце́мъ, его́же краестро́чіе: Пе́рвое воспою́ сосло́віе па́стырей. Гла́съ 6.
Пѣ́снь 1. Ирмо́съ: Яко по су́ху пѣшеше́ствовавъ Изра́иль...

Святы́хъ оте́цъ восхваля́я всесвяты́й Собо́ръ, всесвято́е того́ во мнѣ́ прорица́ніе, вопія́, молю́ Тя́, Христе́, сохрани́тися мнѣ́. [Два́жды.]

Богоно́сніи отцы́, я́ко мо́лнія, соше́дшеся дне́сь, Тебе́, Христе́, Единоро́дна, Отцу́ Собезнача́льна Сы́на исповѣ́даша я́сно и единосу́щна. [Два́жды.]

Сла́ва: Невѣ́сты Твоея́ Це́ркве, благосла́вніи невѣстокраси́теліе, Влады́ко, вѣ́ры я́вѣ опредѣле́ніе изложи́вше злато́е, я́ко у́тварію боголѣ́пною сію́ украси́ша.

И ны́нѣ, богоро́диченъ: Преукраше́нна сла́вою боже́ственною Честна́я Цари́ца Сы́ну Своему́ и Бо́гу предстои́тъ, на́мъ спасе́ніе душе́вное прося́щи.

Катава́сія: Боже́ственнымъ покрове́нъ [медленоязы́чный мра́комъ, извитíйствова богопи́санный зако́нъ: ти́ну бо отря́съ очесе́ у́мнаго, ви́дитъ Су́щаго и науча́ется Ду́ха ра́зуму, хваля́ боже́ственными пѣ́сньми].

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Бо́га распина́ема пло́тію зря́щи, тва́рь распада́шеся стра́хомъ, но содержа́щею дла́нію на́съ ра́ди Распя́таго, крѣ́пко содержа́шеся.

Сме́ртію сме́рть разори́вшися, лежи́тъ окая́нная бездыха́нна: Живота́ бо не терпя́щи Боже́ственнаго приложе́нія, мертва́ быва́етъ крѣ́пкая, и да́руется всѣ́мъ воскресе́ніе.

Богоро́диченъ: Боже́ственнаго Рождества́ Твоего́, Чи́стая, вся́кій естества́ чи́нъ превосхо́дитъ чу́до: Бо́га бо преесте́ственно зачала́ еси́ во чре́вѣ, и ро́ждши, пребыва́еши при́сно Дѣ́ва.

Инъ. Ирмо́съ: Си́лою Креста́ Твоего́, Христе́...

Возше́лъ еси́, Жизнода́вче Христе́, ко Отцу́ и возне́слъ еси́ ро́дъ на́шъ, Человѣколю́бче, неизрече́ннымъ благоутро́біемъ Твои́мъ.

Чи́ни а́нгельстіи, Спа́се, человѣ́ческое естество́ ви́дѣвше совосходя́щее Тебѣ́, непреста́нно удивля́еми, воспѣва́ху Тя́.

Ужаса́хуся а́нгельстіи ли́цы, Христе́, зря́ще Тя́ съ тѣлесе́мъ возне́сшася, и воспѣва́ху свято́е Твое́ Вознесе́ніе.

Богоро́диченъ: Моли́ непреста́нно, Чи́стая, Произше́дшаго отъ боку́ Твое́ю изба́витися пре́лести діа́воли пою́щимъ Тя́, Ма́терь Бо́жію.

Инъ. Ирмо́съ: Нѣ́сть свя́тъ, я́коже Ты́, Го́споди...

То́къ, и стра́сть, и сѣче́ніе Арій безу́мный рождеству́ Боже́ственному злоче́стно нечести́вый прилага́я, сѣчи́тельнымъ оте́ческимъ мече́мъ отсѣка́ется. [Два́жды.]

Якоже дре́вле боже́ственный Авраа́мъ, вво́инившеся вси́ всечестнíи богоглаго́ливіи, враги́ Твоя́, Бла́же, неи́стовныя Твое́ю си́лою крѣ́пко погуби́ша. [Два́жды.]

Сла́ва: Пе́рвое собра́ніе собра́вшееся Твои́хъ свяще́нныхъ, Единосу́щна Тя́, Спа́се, Безнача́льному Отцу́ и Творца́ всѣ́хъ Ро́ждшагося благоче́стно проповѣ́даша.

И ны́нѣ, богоро́диченъ: Не мо́жетъ сло́во земны́хъ, ниже́ язы́къ, Дѣ́во, восхвали́ти Тя́ досто́йно: изъ Тебе́ бо безъ сѣ́мене Жизнода́вецъ Христо́съ воплоти́тися, Пречи́стая, благоволи́.

Катава́сія: Разве́рзе утро́бы [неча́дствовавшія у́зы, доса́ду же неудоботерпи́му благоча́дствующія, еди́на моли́тва проро́чицы дре́вле Анны, нося́щія ду́хъ сокруше́нъ, къ Си́льному и Бо́гу ра́зумовъ].

Конда́къ Вознесе́нію, гла́съ 6: Еже о на́съ испо́лнивъ... И и́косъ. [1]

Та́же, сѣда́ленъ отце́мъ, гла́съ 4. Подо́бенъ: Ско́ро предвари́.

Свѣти́льницы пресвѣ́тліи и́стины Христо́вы мíру яви́стеся на земли́ вои́стинну, блаже́ннѣйшіи отцы́ боговѣща́нніи, изсуши́вше е́реси ху́льныхъ языковре́дій и угаси́вше пламенови́дная злосла́вныхъ смуще́нія, тѣ́мже, я́ко святи́теліе Христо́вы, моли́теся спасти́ся на́мъ.

Сла́ва, другíй, гла́съ то́йже. Подо́бенъ: Вознесы́йся.

Нике́йскій свѣ́тлый гра́дъ дне́сь отъ всея́ земли́ къ себѣ́ призва́ три́ста и осмьна́десять священнонача́льниковъ на глаго́лавшаго хулу́ Арія и умаля́ющаго Еди́наго отъ Тро́ицы, Сы́на и Сло́ва су́щаго Бо́жія; его́же, Арія, низло́жше, вѣ́ру утверди́ша.

И ны́нѣ, Вознесе́нія. Подо́бенъ:

Возше́дъ на небеса́ со сла́вою и сосѣды́й Отцу́ одесну́ю, ника́коже разлучи́лся еси́, Человѣколю́бче Христе́. Ду́ха же Свята́го прему́дрымъ ученико́мъ Твои́мъ посла́ти обѣща́вый и на́ша озари́вый мы́сли, да́ждь просвѣще́ніе, я́ко да непреста́нно пое́мъ Тя́, Влады́ко.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Дре́во процвѣте́, Христе́, и́стинныя жи́зни: Кре́стъ бо водрузи́ся и, напои́вся кро́вію и водо́ю отъ нетлѣ́нныхъ Твои́хъ ре́бръ, живо́тъ на́мъ прозябе́.

Не ктому́ мнѣ́ змíй ло́жно обоже́ніе подлага́етъ: Христо́съ бо, Богодѣ́тель человѣ́ча естества́, ны́нѣ невозбра́нно стезю́ мнѣ́ жи́зни устро́и.

Богоро́диченъ: Яко вои́стинну неизглаго́ланна и непости́жна су́ть Твоего́, Богоро́дице, боголѣ́пнаго Рождества́, су́щимъ на земли́ и на небеси́, Приснодѣ́во, та́инства.

Инъ. Ирмо́съ: Услы́шахъ слу́хъ си́лы Креста́...

Возне́слся еси́ во сла́вѣ, а́нгеловъ Царю́, Утѣ́шителя на́мъ отъ Отца́ посла́въ. Тѣ́мже вопіе́мъ: сла́ва, Христе́ Вознесе́нію Твоему́!

Яко взы́де Спа́съ ко Отцу́ съ пло́тію, удиви́шася Ему́ а́нгельская во́инства и возопи́ша: сла́ва, Христе́, Вознесе́нію Твоему́!

Го́рнія си́лы го́рнѣйшимъ вопія́ху: врата́ возми́те Христу́ на́шему Царю́, Его́же воспѣва́емъ вку́пѣ со Отце́мъ и Ду́хомъ.

Богоро́диченъ: Дѣ́ва роди́ и ма́тернихъ не позна́, но Ма́ти у́бо е́сть, Дѣ́вою же пребы́сть, Юже воспѣва́юще, — ра́дуйся, Богоро́дице! — взыва́емъ.

Инъ. Ирмо́съ: Христо́съ моя́ си́ла...

Прелюбодѣ́йствовавый Арій умо́мъ неразу́мнымъ правосла́вную вѣ́ру, оте́ческими суды́ изгна́нъ бы́сть отъ Це́ркве, я́коже у́дъ гнилы́й, злоимени́тый. [Два́жды.]

О Тебѣ́, Влады́ко, подвиза́вся ли́къ оте́цъ, Твоя́ враги́ зѣло́ побѣди́ и Соесте́ственна Тя́ Отцу́ и Ду́ху просла́ви. [Два́жды.]

Сла́ва: Хода́тай бы́лъ еси́, Бо́же и Человѣ́че, Бо́гу и человѣ́комъ, Христе́, тѣ́мже, во двою́ Тя́ естеству́ Еди́наго зна́юще Сы́на, богому́дріи проповѣ́даша.

И ны́нѣ, богоро́диченъ: Ме́ртва мя́ показа́ са́да вкуше́ніе, Жи́знь же Дре́во, изъ Тебе́ я́вльшееся, Всечи́стая, воскреси́ и ра́йскія сла́дости наслѣ́дника мя́ показа́.

Катава́сія: Царю́ царе́й, [Яковы́й отъ Якова́го, еди́нъ, Сло́ве, произше́дый отъ Отца́ безвино́внаго, равномо́щнаго Твоего́ Ду́ха апо́столомъ и́стинно посла́лъ еси́, я́ко Благодѣ́теля, пою́щимъ: сла́ва держа́вѣ Твое́й, Го́споди].

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Уступа́ютъ ми́ херуви́ми ны́нѣ и пла́менное ору́жіе, Влады́ко, плещи́ мнѣ́ дае́тъ, Тя́ ви́дѣвше, Сло́ве Бо́жій, и́стиннаго Бо́га, разбо́йнику пу́ть сотво́ршаго въ ра́й.

Не ктому́ бою́ся е́же въ зе́млю, Влады́ко Христе́, возвраще́нія: Ты́ бо отъ земли́ возве́лъ мя́ еси́ забве́на, благоутро́бія ра́ди мно́гаго, къ высотѣ́ нетлѣ́нія Воскресе́ніемъ Твои́мъ.

Богоро́диченъ: Богоро́дицу Тя́ отъ души́, Влады́чице мíру Блага́я, исповѣ́дающихъ спаса́й: Тя́ бо Предста́тельницу непобѣди́мую и́мамы, и́стинную Богороди́тельницу.

Инъ. Ирмо́съ: Утреннююще, вопіе́мъ Ти́: Го́споди...

Испо́лнивъ весе́лія вся́ческая, Ми́лостиве, къ го́рнимъ си́ламъ съ пло́тію прише́лъ еси́.

Ангельскія си́лы взе́млема Тебе́ ви́дѣвше, — врата́, — взыва́ху, — Царю́ на́шему, возми́те!

Апо́столи ви́дѣвше возвыша́ема Спа́са, съ тре́петомъ взыва́ху Царю́ на́шему: сла́ва Тебѣ́!

Богоро́диченъ: Дѣ́ву по рождествѣ́ пое́мъ Тя́, Богоро́дице, Ты́ бо Бо́га Сло́ва пло́тію мíрови родила́ еси́.

Инъ. Ирмо́съ: Бо́жіимъ свѣ́томъ Твои́мъ...

Кра́сны но́ги, я́ко вои́стинну, ны́нѣ проповѣ́дающихъ Тя́ — Ми́ръ, вся́къ у́мъ преиму́щій всѣ́хъ а́нгеловъ и человѣ́ковъ, Христе́, и мно́жествомъ ми́ра мíръ совокупля́ющій. [Два́жды.]

Прему́дрость, Си́лу, Отчее Сло́во ѵпоста́сное, Христе́, Тебе́ соше́дшеся, проповѣ́даша, всесвята́го свяще́нства че́стно зако́номъ печа́тавше, боже́ственніи учи́теліе. [Два́жды.]

Сла́ва: Во́дъ струя́ми чи́стыми уче́нія Правосла́вную Це́рковь напои́вшіи, на вода́хъ поко́я ны́нѣ наслажда́етеся, вѣ́чно ра́дующеся.

[И ны́нѣ,] богоро́диченъ: Свѣ́щникъ, Пречи́стая, свѣ́тлый, всѣ́мъ озаря́ющій Христа́ — Пра́вды Со́лнце, Тебе́ вѣ́дуще, еди́на Богороди́тельнице Чи́стая, Твое́ ны́нѣ заступле́ніе призыва́емъ.

Катава́сія: Рѣши́тельное очище́ніе [грѣхо́въ, огнедухнове́нную пріими́те Ду́ха ро́су, о ча́да свѣтообра́зная церко́вная! Ны́нѣ отъ Сіо́на бо изы́де зако́нъ — языкоогнеобра́зная Ду́ха благода́ть].

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Распина́емь, Влады́ко, гвоздьми́ у́бо кля́тву, ю́же на на́съ, очи́стилъ еси́, копіе́мъ же пробода́емь въ ре́бра, Ада́мово рукописа́ніе раздра́въ, мíръ свободи́лъ еси́.

Ада́мъ низведе́нъ бы́сть, ле́стію запе́нся, ко а́довѣ про́пасти, но естество́мъ Бо́гъ же и Ми́лостивъ, соше́лъ еси́ ко иска́нію, и на ра́му поне́съ, совоскреси́лъ еси́.

Богоро́диченъ: Пречи́стая Влады́чице, ро́ждшая человѣ́комъ Ко́рмчію Го́спода, страсте́й мои́хъ непостоя́нное и лю́тое разжени́ смуще́ніе и тишину́ пода́ждь се́рдцу моему́.

Инъ. Ирмо́съ: Обы́де мя́ бе́здна...

Взыгра́шася апо́столи, зря́ще на высоту́ дне́сь Зижди́теля взе́млема, упова́ніемъ Ду́ха, и стра́хомъ зовя́ху: сла́ва восхо́ду Твоему́!

Предста́ша а́нгели, вопію́ще, Христе́, ученико́мъ Твои́мъ: и́мже о́бразомъ ви́дѣсте Христа́ восходя́ща съ пло́тію, па́ки пріи́детъ Пра́ведный всѣ́хъ Судія́.

Яко ви́дѣша Тя́, Спа́се на́шъ, небе́сныя си́лы, на высоту́ взе́млема съ тѣ́ломъ, взыва́ху, глаго́люще: вели́ко, Влады́ко, человѣколю́біе Твое́!

Богоро́диченъ: Купину́ Тя́ неопали́мую, и го́ру, и лѣ́ствицу одушевле́нную, и две́рь небе́сную досто́йно сла́вимъ, Марíе сла́вная, правосла́вныхъ Похвало́.

Инъ. Ирмо́съ: Жите́йское мо́ре...

Утаи́тися не возмо́же пле́веловъ сѣ́ятель про́мысла неизрече́ннаго, неи́стовству тезоимени́тъ нарече́нный: Іу́дѣ бо поревнова́въ, я́коже о́нъ, разсѣ́деся вселука́вый. [Два́жды.]

Боже́ственное собра́ніе оте́цъ честно́е Единоро́дное Озаре́ніе, отъ существа́ возсія́вшее Отча, проповѣ́дуетъ Тя́, Влады́ко, и пре́жде всѣ́хъ вѣ́къ рожде́нна Сы́на. [Два́жды.]

Сла́ва: Чре́во растерза́ется, по словеси́, исто́чникъ му́тный и непи́тный ересе́й источи́вшій злочести́выхъ, ра́ломъ моли́твы свяще́нникъ боже́ственныхъ промы́сленнѣе.

И ны́нѣ, богоро́диченъ: Вели́кій преднаписа́ во проро́цѣхъ Моисе́й Тебе́ Ковче́гъ, и Трапе́зу, и Свѣ́щникъ, и Ру́чку, обра́зно зна́менуя воплоще́ніе Вы́шняго изъ Тебе́, Ма́ти Дѣ́во.

Катава́сія: Очище́ніе на́мъ, [Христе́ и спасе́ніе, Влады́ко, возсія́лъ еси́ отъ Дѣ́вы, да, я́ко проро́ка отъ звѣ́ря морска́го пе́рсей Іо́ну, отъ тли́ исхити́ши всего́ Ада́ма всеро́дна па́дшаго].

Конда́къ отце́мъ, гла́съ 8. Подо́бенъ: Яко нача́тки.

Апо́столъ проповѣ́даніе и оте́цъ догма́ты Це́ркви еди́ну вѣ́ру запечатлѣ́ша, я́же и ри́зу нося́щи и́стины, истка́нну отъ е́же свы́ше богосло́вія, исправля́етъ и сла́витъ благоче́стія вели́кое та́инство.

Икосъ:

Высо́кимъ проповѣ́даніемъ Бо́жію Це́рковь услы́шимъ, вопію́щу: жа́ждай, да гряде́тъ ко мнѣ́ и піе́тъ ча́шу, ю́же держу́, ча́ша е́сть прему́дрости. Сіе́ питіе́ и́стины сло́вомъ почерпо́хъ, во́ду пролива́ющую не прекосло́вія, но исповѣ́данія, ю́же пія́, ны́нѣшній Изра́иль Бо́га зри́тъ, вѣща́юща: ви́дите, ви́дите, я́ко Са́мъ Азъ е́смь и не премѣня́юся: Азъ Бо́гъ пе́рвый, Азъ же и по си́хъ, и ра́звѣ Мене́, нѣ́сть ино́го отню́дъ. Отсю́ду причаща́ющіися насы́тятся и восхва́лятъ благоче́стія вели́кое та́инство.

Синакса́рій въ недѣ́лю святы́хъ 318 богоно́сныхъ оте́цъ, и́же въ Нике́и.

Сти́хъ: Свѣти́лъ собра́ніе избра́нное,
                  Лучеви́дны просвѣти́те мнѣ́ мы́сли.

Сти́хъ: Стра́нна Сы́на Отча Существа́, глаго́ля
                  Арій си́це, Бо́жія сла́вы стра́ненъ.

Въ то́йже де́нь, въ недѣ́лю седму́ю по Па́сцѣ, и́же въ Нике́и Пе́рвый Собо́ръ пра́зднуемъ три́ста и осмина́десяти богоно́сныхъ оте́цъ, вины́ ра́ди сицевы́я:

Поне́же бо Госпо́дь на́шъ Іису́съ Христо́съ, въ пло́ть оболкíйся, ю́же по на́мъ смотре́ніе все́ неизрече́нно дѣ́йствова, и ко Оте́ческому па́ки взы́де престо́лу, хотя́ще показа́ти святíи, я́ко вои́стинну Сы́нъ Бо́жій бы́сть Человѣ́къ, и соверше́нный Человѣ́къ вознесе́ся Бо́гъ, и сѣ́де одесну́ю вели́чествія на высо́кихъ, Собо́ръ се́й святы́хъ оте́цъ та́ко Его́ проповѣ́да, и исповѣ́да Единосу́щна и Единоче́стна Отцу́. Си́мъ сло́вомъ по сла́вномъ Вознесе́ніи настоя́щій уста́виша пра́здникъ, а́ки собра́ніе толи́кихъ оте́цъ предъизводя́ще, Сего́ во пло́ти возне́сшася Бо́га и́стинна и во пло́ти Человѣ́ка соверше́нна проповѣ́дающе.

Собо́ръ же се́й бы́сть при Константи́нѣ Вели́цѣмъ царѣ́, въ двадеся́томъ лѣ́тѣ ца́рства его́, гоне́нію преста́вшу. Се́й въ Ри́мѣ пре́жде облада́ше, пото́мъ же и всесла́вный Константи́нь гра́дъ себѣ́ тезоимени́тъ созда́въ.

Въ лѣ́то отъ созда́нія мíра пя́ть ты́сящь о́смьсотъ три́десять осмо́е, я́же на Арія нача́ша глаго́лати. Иже Арій бя́ше у́бо отъ Ливíи, во Александрíю же прише́дъ, и діа́конъ отъ священному́ченика Петра́ Александрíйскаго поста́вленъ бы́въ, поне́же ху́лити нача́тъ на Сы́на Бо́жія, тва́рь Сего́ проповѣ́дая, отъ не су́щихъ же бы́ти, и дале́че су́ща отъ Боже́ственнаго достоя́нія злоупотреби́тельно же Прему́дрости и Сло́ву Бо́жію глаго́латися, я́ко уподо́бльшася Саве́ллію злочести́вому, единоли́чно и единоѵпоста́сно глаго́лющу Божество́. И овогда́ у́бо Отцу́ быва́ти, овогда́ же Сы́ну, овогда́ же Ду́ху Свято́му.

Сія́ у́бо Арія ху́ляща, вели́кій Пе́тръ отъ свяще́нства его́ отлуча́етъ, Христа́, я́ко Младе́нца, на святѣ́мъ же́ртвенницѣ ви́дѣвъ, въ раздра́нну облече́нна ри́зу, и глаго́люща, я́ко Арій раздра́ ю́.

Ахи́лла же, по Петрѣ́ патріа́рхію пріи́мый Александрíйскаго гра́да, на обѣща́ніихъ па́ки разрѣша́етъ Арія, къ си́мъ же поставля́етъ его́ и пресви́тера, и во Александрíи учи́теля предпоставля́етъ. Ахи́ллѣ же сконча́вшуся, Алекса́ндръ быва́етъ патріа́рхъ, и́же Арія та́яжде и го́ршая ху́ляща обрѣ́тъ, отъ Це́ркве изри́нувъ, Собо́ромъ того́ низложи́въ, я́коже глаго́летъ Ѳеодори́тъ, я́ко и прело́жна естества́ Христа́ глаго́лаше, и безу́мную и безду́шную воспрія́ти пло́ть Го́споду, пе́рвый се́й отры́гну. Арій у́бо мно́гихъ своему́ злоче́стію подве́дъ, пи́шетъ и усвоя́етъ Никомидíйскаго Евсе́вія, Ти́рскаго Павли́на, Евсе́вія же Кесарíйскаго и и́ныхъ, и на Алекса́ндра вмѣща́ется. Алекса́ндръ же вездѣ́ по вселе́ннѣй хулы́ о́наго и низложе́ніе посла́въ, мно́гихъ на ме́сть воздви́же.

Це́ркви у́бо смуща́емѣй, и мно́гимъ хотя́щимъ христіа́нская пріима́ти, возбраня́емымъ же любопре́ніемъ уче́нія, вели́кій Константи́нъ вездѣ́ по вселе́ннѣй людски́ми колесни́цами и носи́лы су́щія отцы́ въ Нике́ю собра́въ, та́мо и са́мъ прихо́дитъ. И отце́мъ у́бо всѣ́мъ сѣ́дшимъ, повелѣ́нъ и са́мъ сѣ́де не на ца́рстѣмъ престо́лѣ, но на ума́леннѣмъ достоя́нія сѣда́лищи. И я́же на Арія глаго́ланнымъ бы́вшимъ, ана́ѳемѣ у́бо о́нъ и о́ному сму́дрствующіи вси́ подлага́ются. Сло́во же Бо́жіе отъ святы́хъ оте́цъ, Единосу́щное, и Единоче́стное, и Собезнача́льное проповѣ́дается Отцу́. Излага́ютъ же сíи вѣ́ры святы́й Сѵмво́лъ, приве́дше то́й да́же и до е́же: «И въ Ду́ха Свята́го, Го́спода...», е́же посе́мъ Вторы́й испо́лни Собо́ръ. Затверди́ же къ си́мъ Пе́рвый Собо́ръ и Па́схи пра́здникъ, когда́ и ка́ко подоба́етъ на́мъ то́й соверша́ти, и не со іуде́и, я́коже бя́ше пе́рвѣе обы́чно. Излага́етъ же и пра́вилъ о церко́вномъ исправле́ніи два́десять. Святы́й же вѣ́ры Сѵмво́лъ, вели́кій и равноапо́стольный Константи́нъ по́слѣжде всѣ́хъ червле́ными затверди́ пи́смены.

Бя́ху же архіере́й у́бо святы́хъ си́хъ оте́цъ двѣ́стѣ три́десять и два́; свяще́нниковъ же и діа́коновъ, къ си́мъ же и мона́ховъ — о́смьдесять и ше́сть; всѣ́хъ же — три́ста и осмьна́десять. Знамени́тіи же сíи: Сильве́стръ, Ри́мскій архіере́й, Митрофа́нъ — Константи́на гра́да, бо́ленъ сы́й [сíи у́бо бы́ша ту́ чрезъ своя́ мѣстоблюсти́тели]. Алекса́ндръ Александрíйскій, со Аѳана́сіемъ Вели́кимъ, архидіа́кономъ тогда́ су́щимъ, и Евста́ѳій Антіохíйскій, и Мака́рій Іерусали́мскій, Оссíй, Кудру́вскій епи́скопъ, Пафну́тій исповѣ́дникъ, мѵроточи́вый Никола́й и Спиридо́нъ Тримиѳу́нтскій, и́же та́мо филосо́фа низложи́въ, крести́, трисо́лнечное ему́ показа́въ. Посредѣ́ же Собо́ра двѣма́ къ Бо́гу преста́вльшемася отце́ма архіере́ома, вели́кій Константи́нъ въ ковче́ги и́хъ предѣ́лъ свята́го Собо́ра вложи́въ, и тве́рдо заключи́въ, обрѣ́те и отъ о́нѣхъ запеча́танъ же и подпи́санъ неизрече́нными словесы́ Бо́жіими.

Соверши́вшуся же Собо́ру, поне́же и Ца́рьградъ уже́ созида́емый соверши́ся, призыва́етъ Константи́нъ Вели́кій святы́я о́ныя вся́ му́жи, и́же и обше́дше ве́сь гра́дъ, и моли́твовавше и́ дово́льно, ца́рствующій бы́ти градово́мъ уставля́ютъ и Ма́тери Сло́ва того́ возложи́ша, царю́ повелѣ́вшу. И та́ко святíи кíйждо отыдо́ша въ до́мы.

Но еще́ къ Бо́гу не отше́дшу вели́кому Константи́ну, съ сы́номъ свои́мъ Конста́нтіемъ ски́птры соблюда́ющу, Арій къ царю́ прихо́дитъ, глаго́ля: «оставля́ю вся́ и Це́ркви Бо́жіей соедини́тися хощу́». Написа́въ у́бо своя́ хулы́, обѣ́си на вы́и и, а́ки бы Собо́ру повину́яся, во о́но руко́ю ударя́я, си́мъ глаго́лаше повинова́тися. И у́бо ца́рь во обще́ніе прія́ти Арія патріа́рху Конста́нтина гра́да повелѣва́етъ. Бя́ше же тогда́ по Митрофа́нѣ Алекса́ндръ, и́же злонра́віе вѣ́дый му́жа, не вѣ́руяй бя́ше и моля́шеся Бо́гу яви́ти ему́, а́ще по во́ли Его́ Арій пріобщи́тся. Елма́ же вре́мя пріи́де, въ не́же подоба́ше сослужи́ти ему́, теплѣ́йшій быва́етъ въ моли́твѣ. Арій же, къ це́ркви гряды́й, и нѣ́гдѣ бли́зъ столпа́ торго́внаго, расто́ргшуся его́ чре́ву, въ наро́дное подтро́ніе вхо́дитъ, и та́мо разсѣ́деся, все́ вну́треннее зда́ніе изрыга́етъ до́лу, Іу́дино разсѣда́ніе подъе́мъ о ра́внѣмъ преда́тельствѣ Сло́ва, и Бо́жіяго Сы́на Отча Существа́ оттерза́я, растерза́ется са́мъ и ме́ртвъ обрѣ́тенъ бы́въ. И та́ко Бо́жія Це́рковь отъ о́наго па́губы измѣни́ся.

Святы́хъ тре́хъ со́тъ и осмина́десяти богоно́сныхъ оте́цъ моли́твами, Христе́ Бо́же на́шъ, поми́луй на́съ. Ами́нь.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ!

Рыда́ющее во Стра́сти Твое́й со́лнце, во мра́къ облече́ся, и во дни́ по все́й, Влады́ко, земли́ свѣ́тъ поме́рче, вопія́: благослове́нъ еси́, Бо́же оте́цъ на́шихъ!

Облеко́шася, Христе́, схожде́ніемъ Твои́мъ во свѣ́тъ преиспо́дняя, пра́отецъ же весе́лія испо́лненъ яви́вся, ликовству́я взыгра́ше, вопія́: благослове́нъ еси́, Бо́же оте́цъ на́шихъ!

Тро́иченъ: Ца́рствующее и всѣ́ми владя́щее Естество́ Тріѵпоста́сное, бла́гости и безмѣ́рныя пучи́ны Свѣ́тъ пою́ще, возопіи́мъ, вѣ́рніи: благослове́нъ еси́, Бо́же оте́цъ на́шихъ!

Иный. Ирмо́съ: Въ пещи́ о́гненнѣй...

На о́блацѣхъ свѣ́та Вознесы́йся и Спасы́й мíръ, благослове́нъ Бо́гъ оте́цъ на́шихъ.

На ра́му, Христе́, заблу́ждшее взе́мъ естество́, возне́сся, Бо́гу и Отцу́ приве́лъ еси́.

Возше́дый въ пло́ти къ Безпло́тному Отцу́, благослове́нъ Бо́гъ оте́цъ на́шихъ.

Умерщвле́ное на́ше грѣхо́мъ естество́ взе́мъ, Твоему́ Сво́йственному Отцу́, Спа́се, приве́лъ еси́.

Иный. Ирмо́съ: Росода́тельну...

Побѣди́сте неи́стовству тезоимени́таго Арія, неи́стовствовавшаго лю́тѣ и глаго́лавшаго на высоту́ непра́ведная: Бо́жію бо Сы́ну отрече́ся вопи́ти: благослове́нъ еси́, Бо́же оте́цъ на́шихъ! [Два́жды.]

Сы́на гро́мова подража́юще, чу́дніи, Сло́ва Отцу́ Собезнача́льна и Единопресто́льна, огнезра́чными усты́ ва́шими всѣ́хъ научи́сте вопи́ти: благослове́нъ еси́, Бо́же оте́цъ на́шихъ! [Два́жды.]

Сла́ва: Яко крила́тіи, Сло́ву помо́гшіи, пріидо́сте, богоблаже́нніи, отъ коне́цъ бо вселе́нныя собра́ ва́съ Ду́хъ Святы́й вопи́ти: благослове́нъ еси́, Бо́же оте́цъ на́шихъ!

И ны́нѣ, богоро́диченъ: Юноши три́ пе́щь не опали́, Рождество́ прообразу́ющія Твое́: Боже́ственный бо Огнь, Тебе́ не опали́въ, всели́ся въ Тя́ и всѣ́хъ просвѣти́ вопи́ти: благослове́нна еси́, Бо́га пло́тію Поро́ждшая!

Катава́сія: Согла́сная возшумѣ́ орга́нская [пѣ́снь почита́ти златосотворе́нный безду́шный истука́нъ; Утѣ́шителева же свѣтоно́сная благода́ть почеству́етъ, е́же вопи́ти: Тро́ице Еди́ная, Равноси́льная, Безнача́льная, благослове́на еси́].

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Іуде́йскія дре́вле пророкоубíйцы лю́ди богоубíйцы за́висть ны́нѣ содѣ́ла, Тебе́ на Кре́стъ возне́сшія, Сло́ве Бо́жій. Его́же превозно́симъ во вся́ вѣ́ки.

Небе́сныхъ кру́гъ не оста́вилъ еси́, и во а́дъ соше́дъ, всего́ совоздви́глъ еси́, Христе́, лежа́щаго во гно́и человѣ́ка. Тѣ́мже Тя́ пое́мъ во вся́ вѣ́ки.

Богоро́диченъ: Отъ Свѣ́та Свѣтода́вца Сло́ва зачала́ еси́, и ро́ждши несказа́нно Пресу́щественнаго: Ду́хъ бо въ Тя́, Дѣ́во Боже́ственный всели́ся. Тѣ́мже Тя́ пое́мъ во вся́ вѣ́ки.

Инъ. Ирмо́съ: Изъ Отца́ пре́жде вѣ́къ...

Во двою́ существу́ возлетѣ́вшаго Жизнода́вца Христа́ на небеса́ со сла́вою и Отцу́ сосѣдя́щаго, свяще́нницы, по́йте, лю́діе, превозноси́те во вся́ вѣ́ки.

Отъ рабо́ты и́дольскія тва́рь Изба́вившаго и Предста́вившаго ту́ свобо́дну Своему́ Отцу́, Тебе́, Спа́се, пое́мъ и Тебе́ превозно́симъ во вся́ вѣ́ки.

Свои́мъ схожде́ніемъ Низложи́вшаго супоста́та и Свои́мъ возше́ствіемъ Возне́сшаго человѣ́ки, свяще́нницы, по́йте, лю́діе, превозноси́те во вся́ вѣ́ки.

Богоро́диченъ: Херуви́мовъ превы́шшая яви́лася еси́, Богоро́дице Чи́стая, во чре́вѣ Твое́мъ си́ми Носи́маго носи́вшая. Его́же со безпло́тными, человѣ́цы, славосло́вимъ во вся́ вѣ́ки.

Инъ. Ирмо́съ: Изъ пла́мене преподо́бнымъ...

Просвѣти́вшеся луча́ми Твоего́ Божества́, блазíи Твои́ па́стыріе Тебе́ исповѣ́даша бытію́ Содѣ́теля всѣ́хъ и Го́спода. Его́же превозно́симъ во вся́ вѣ́ки. [Два́жды.]

Ли́къ па́стырей приснопа́мятный собра́вся, богому́дренно Тро́ицу Несозда́нную ны́нѣ богосло́вя, всѣ́хъ учи́тъ вопи́ти: Тя́ превозно́симъ во вся́ вѣ́ки. [Два́жды.]

Благослови́мъ Отца́, и Сы́на, и Свята́го Ду́ха, Го́спода.

Священнонача́льницы, па́стыріе достосла́вніи Христо́ву Це́рковь просвѣща́ютъ, ины́й и́нуду сію́ освѣща́юще и превознося́ще во вся́ вѣ́ки.

[И ны́нѣ,] богоро́диченъ: Та́йно во о́бразѣхъ предви́дѣша Тебе́ проро́цы вси́, Сло́во ро́ждшую: пло́ть бо изъ Тебе́ Взе́мый, Се́й про́йде сугу́бъ, Его́же превозно́симъ во вся́ вѣ́ки.

Та́же: Хва́лимъ, благослови́мъ, покланя́емся [Го́сподеви, пою́ще и превознося́ще во вся́ вѣ́ки].

Катава́сія: Разрѣша́етъ у́зы [и ороша́етъ пла́мень Трисвѣ́тлый Богонача́лія о́бразъ, пою́тъ о́троцы, благослови́тъ же Еди́наго Спа́са и Вседѣ́теля, я́ко Благодѣ́теля, сотворе́нная вся́ческая тва́рь].

Пое́мъ Честнѣ́йшую...

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Страсте́мъ неприча́стенъ Ты́ пребы́лъ еси́, Сло́ве Бо́жій, пло́тію пріобщи́вся Страсте́мъ, но рѣши́ши отъ страсте́й человѣ́ка, страсте́мъ бы́въ Стра́сть, Спа́се на́шъ: еди́нъ бо еси́ Безстра́стенъ и Всеси́ленъ.

Тлю́ сме́ртную пріе́мъ, и тлѣ́нія соблю́лъ еси́ тѣ́ло Твое́ невку́сно. Твоя́ же животворя́щая и Боже́ственная, Влады́ко, душа́ во а́дѣ не оста́влена бы́сть, но, я́коже отъ сна́, воскре́съ, на́съ совоздви́глъ еси́.

Тро́иченъ: Бо́га Отца́, Сы́на Собезнача́льна вси́ человѣ́цы устна́ми у́бо чи́стыми сла́вимъ, неизрече́нную же и пресла́вную Ду́ха Всесвята́го си́лу почита́емъ: Еди́на бо е́сть Всеси́льная Тро́ица Неразлу́чная.

Инъ. Ирмо́съ: Тя́ па́че ума́ и словесе́ Ма́терь Бо́жію...

Тебе́, Изба́вителя мíра Христа́ Бо́га, апо́столи ви́дяще Боже́ственно возвыша́ема, со стра́хомъ, игра́юще, велича́ху.

Твою́ обожи́вшуюся пло́ть зря́ще, Христе́, на высотѣ́ а́нгели, дру́гъ ко дру́гу глаго́лаху: вои́стинну Се́й е́сть Бо́гъ на́шъ!

Тебе́ безпло́тныхъ чи́нове, Христе́ Бо́же, на о́блацѣхъ взе́млема ви́дяще, взыва́ху: сла́вы Царю́ врата́ возми́те!

Богоро́диченъ: Ра́дуйся, Богоро́дице, Ма́ти Христа́ Бо́га, Его́же родила́ еси́, дне́сь отъ земли́ возноси́ма со апо́столы зря́щи, возвелича́ла еси́.

Инъ. Ирмо́съ: Бо́га человѣ́комъ...

Обрѣ́тъ вы́ спобо́рники, собра́, держа́вною си́лою вооружи́въ Ду́ха, Отцу́ Собезнача́льное и Сопресто́льное Сло́во, пре́жде вѣ́къ Су́щее, Его́же ны́нѣ, всесвяще́нніи, съ небе́сными во́инствы при́сно сла́вите. [Два́жды.]

Па́жить Аріеву лю́тыя е́реси, я́ко вра́чеве душа́мъ же и тѣлесе́мъ, уста́висте, свяще́нный вѣ́ры Сѵмво́лъ всѣ́мъ изложи́вше, и́же ны́нѣ держа́ще, па́мять ва́шу, священнодѣ́теліе, при́сно сла́вимъ. [Два́жды.]

Сла́ва: Яко Свѣ́тъ сы́й, Христе́, Пречи́стый, отъ страсте́й мглы́ ду́шу мою́ очи́сти, моли́твами, Влады́ко, Твои́хъ служи́телей, ны́нѣ Тебе́ проповѣ́давшихъ Безнача́льна, Несозда́нна, Зижди́теля же всѣ́хъ и Бо́га, и Отцу́ Собезнача́льна.

И ны́нѣ, богоро́диченъ: Ме́ртвымъ воскресе́ніе ны́нѣ дарова́ся Твои́мъ неизрече́ннымъ и неизглаго́ланнымъ Рождество́мъ, Богоро́дице Влады́чице: Жи́знь бо изъ Тебе́, пло́тію обложе́на, всѣ́мъ возсія́, и сме́рти неускла́бное я́вѣ разруши́.

Катава́сія: Ра́дуйся, Цари́це, [матеродѣ́вственная Сла́во, вся́ка бо удобообраща́тельная благоглаго́ливая уста́ витíйствовати не мо́гутъ, Тебе́ пѣ́ти досто́йно, изумѣва́етъ же у́мъ вся́къ Твое́ Рождество́ разумѣ́ти. Тѣ́мже Тя́ согла́сно сла́вимъ].

Свя́тъ Госпо́дь Бо́гъ на́шъ... [Три́жды.]

Ексапостила́рій воскре́сенъ:

Тиверіа́дское мо́ре съ дѣтьми́ Зеведе́овыми, Наѳана́ила съ Петро́мъ же, и съ други́ма двѣма́ дре́вле, и Ѳому́ имя́ше на ло́вѣ, и́же Христо́вымъ повелѣ́ніемъ одесну́ю вве́ргше, мно́жество извлеко́ша ры́бъ. Его́же Пе́тръ позна́въ, къ Нему́ бродя́ше, и́мже тре́тіе явле́йся, и хлѣ́бъ показа́ и ры́бу на у́глехъ.

Сла́ва, отце́въ. Подо́бенъ: Жены́, услы́шите.

Оте́цъ боже́ственныхъ дне́сь па́мять пра́зднующе, моле́ньми тѣ́хъ мо́лимъ, Всеще́дре: вся́каго вре́да ересе́й изба́ви лю́ди Твоя́, Го́споди, и вся́ сподо́би Отца́, Сло́ва сла́вити и Всесвята́го Ду́ха.

И ны́нѣ, Вознесе́нія:

Ученико́мъ зря́щимъ Тя́, Возне́слся еси́, Христе́, ко Отцу́ сосѣдя́; а́нгели предтеку́ще, зовя́ху: возми́те врата́, возми́те, Ца́рь бо взы́де къ нача́льному Свѣ́ту сла́вы.

На хвали́техъ: Вся́кое дыха́ніе... поста́вимъ стихо́въ 8 и пое́мъ стихи́ры воскре́сны 4 и святы́мъ отце́мъ 4.

Стихи́ры воскре́сны, гла́съ 6:

Кре́стъ Тво́й, Го́споди, жи́знь и воскресе́ніе лю́демъ Твои́мъ е́сть; и на́нь надѣ́ющеся, Тебе́, воскре́сшаго Бо́га на́шего пое́мъ, поми́луй на́съ!

Погребе́ніе Твое́, Влады́ко, ра́й отве́рзе человѣ́ческому ро́ду; и отъ тли́ изба́вльшеся, Тебе́, воскре́сшаго Бо́га на́шего пое́мъ, поми́луй на́съ!

Со Отце́мъ и Ду́хомъ Христа́ воспои́мъ, воскре́сшаго изъ ме́ртвыхъ, и къ Нему́ возопіи́мъ: Ты́ еси́ Жи́знь на́ша и Воскресе́ніе, поми́луй на́съ!

Тридне́венъ воскре́слъ еси́, Христе́, изъ гро́ба, я́коже е́сть пи́сано, совоздви́гнувый пра́отца на́шего. Тѣ́мже Тя́ и сла́витъ ро́дъ человѣ́ческій, и пое́тъ Твое́ воскресе́ніе.

Ины стихи́ры святы́хъ оте́цъ, гла́съ 6: Подо́бенъ: Все́ отло́жше.

Все́ собра́вше душе́вное худо́жество и Боже́ственнымъ Ду́хомъ разсмотри́вше небе́сный и честны́й Сѵмво́лъ вѣ́ры, честнíи отцы́ богопи́саннѣ начерта́ша; въ не́мже я́вственнѣйше Ро́ждшему Собезнача́льнаго Сло́ва науча́ютъ и всеи́стинно Единосу́щнаго, апо́стольскимъ послѣ́дующе проявле́нно уче́ніемъ, благосла́вніи и пребога́тіи и́стинно и богому́дріи.

Все́ пріе́мше у́мное сія́ніе Свята́го Ду́ха, преесте́ственнѣйшее благосло́віе кра́ткими глаго́лы и мно́гимъ ра́зумомъ богодохнове́нно провѣща́ша, я́ко Христо́вы проповѣ́дницы, ева́нгельскихъ предста́теліе уче́ній, блаже́нніи, и благочести́выхъ преда́ній, свы́ше пріе́мше си́хъ открове́ніе я́вѣ, и просвѣ́щшеся, изложи́ша вѣ́ру Богонауче́нную.

Сти́хъ: Благослове́нъ еси́, Го́споди, Бо́же оте́цъ на́шихъ, [и хва́льно, и просла́влено и́мя Твое́ во вѣ́ки].

Все́ собра́вше па́стырское иску́сство и я́рость дви́гше ны́нѣ пра́веднѣйшую, отмсти́тельнѣ тя́жкія отгна́ша и па́губныя во́лки, пра́щею Ду́ха изве́ргше отъ церко́внаго исполне́нія па́дшія я́ко къ сме́рти, и я́ко неисцѣ́льно неду́говавшія, боже́ственніи па́стыріе, я́ко раби́ и́стиннѣйшіи Христо́вы и Боже́ственнаго проповѣ́данія таи́нницы свяще́ннѣйшіи.

Сти́хъ: Собери́те Ему́ преподо́бныя Его́, [завѣща́ющія завѣ́тъ Его́ о же́ртвахъ].

И па́ки 1-ю стихи́ру: Все собра́вше душе́вное...

Сла́ва, гла́съ 8:

Святы́хъ отце́въ ли́къ, отъ коне́цъ вселе́нныя сте́кшійся, Отца́ и Сы́на и Ду́ха Свята́го, Еди́но Существо́ научи́ша и Естество́, и та́йну богосло́вія я́сно преда́ша Це́ркви; и́хже, похваля́юще вѣ́рою, ублажи́мъ, глаго́люще: О, боже́ственный по́лче! богоглаго́ливіи ору́жницы ополче́нія Госпо́дня, звѣ́зды многосвѣ́тлыя мы́сленныя тве́рди, та́инственнаго Сіо́на необори́міи столпи́, мѵродохнове́нніи цвѣ́ти ра́йстіи, всезлата́я уста́ Сло́ва, Нике́йская похвало́, вселе́нныя украше́ніе, прилѣ́жно моли́теся о душа́хъ на́шихъ.

И ны́нѣ:

Преблагослове́нна еси́, Богоро́дице Дѣ́во, [Вопло́щшимъ бо ся изъ Тебе́ а́дъ плѣни́ся, Ада́мъ воззва́ся, кля́тва потреби́ся, Ева свободи́ся, сме́рть умертви́ся, и мы́ ожи́хомъ. Тѣ́мъ, воспѣва́юще, вопіе́мъ: благослове́нъ Христо́съ Бо́гъ, благоволи́вый та́ко, сла́ва Тебѣ́.]

Славосло́віе вели́кое. Тропа́рь воскре́сенъ то́чію. Ектеніи́ и отпу́стъ. И исхожде́ніе въ притво́ръ.

Сла́ва, и ны́нѣ, стихи́ра ева́нгельская, гла́съ 6:

По е́же во а́дъ соше́ствіи и е́же изъ ме́ртвыхъ воскресе́ніи, скорбя́ще, я́коже досто́яше, о разлуче́ніи Твое́мъ, Христе́, ученицы́ на дѣ́ланіе обрати́шася, и па́ки корабля́ и мре́жи, и ло́ва нигдѣ́же. Но Ты́, Спа́се, яви́вся я́ко Влады́ка всѣ́хъ, одесну́ю мре́жи повелѣва́еши воврещи́, и бы́сть сло́во дѣ́ло вско́рѣ, и мно́жество ры́бъ мно́гое, и ве́черя стра́нная гото́ва на земли́. Ея́же причасти́вшимся тогда́ Твои́мъ ученико́мъ, и на́съ ны́нѣ мы́сленно сподо́би наслади́тися, Человѣколю́бче Го́споди.

И поуче́ніе Студи́тово, и ча́съ пе́рвый. На 1-мъ часѣ́ тропа́рь воскре́сенъ. Сла́ва, пра́здника. И ны́нѣ, богоро́диченъ часо́въ. По трисвято́мъ конда́къ пра́здника. На 3-мъ часѣ́ тропа́рь воскре́сенъ. Сла́ва, отце́въ. И ны́нѣ, богоро́диченъ часо́въ. По трисвято́мъ конда́къ отце́въ. Та́же и на про́чихъ часѣ́хъ, тропа́рь и конда́къ пра́здника и отце́въ глаго́лемъ премѣня́юще.



НА ЛИТУРГІИ,

Блаже́нна гла́са, гла́съ 6:

Помяни́ мя́, Бо́же, Спа́се мо́й, егда́ пріи́деши во Ца́рствіи Твое́мъ, и спаси́ мя́, я́ко еди́нъ Человѣколю́бецъ.

Дре́вомъ Ада́ма прельсти́вшагося, Дре́вомъ Кре́стнымъ па́ки спа́слъ еси́, и разбо́йника, вопію́ща: помяни́ мя́, Го́споди, во Ца́рствіи Твое́мъ!

Адова врата́ и вереи́ сокруши́вый, Жизнода́вче, воскреси́лъ еси́ вся́, Спа́се, вопію́щія: сла́ва Воста́нію Твоему́!

Помяни́ мя́, Иже сме́рть Плѣни́вый погребе́ніемъ Твои́мъ, и Воскресе́ніемъ Твои́мъ ра́дости вся́ испо́лнивый, я́ко Благоутро́бенъ.

И пра́здника, пѣ́снь 4-я, на 4 и отце́въ, пѣ́снь 6-я, на 4. По вхо́дѣ глаго́лемъ тропа́рь воскре́сенъ, та́же Вознесе́нія и отце́въ. Сла́ва, конда́къ отце́въ. И ны́нѣ, Вознесе́нія. Вмѣ́сто проки́мна, пѣ́снь отце́въ, гла́съ 4: Благослове́нъ еси́, Го́споди, Бо́же оте́цъ на́шихъ, и хва́льно и просла́влено и́мя Твое́ во вѣ́ки. Сти́хъ: Яко пра́веденъ еси́ о всѣ́хъ, я́же сотвори́лъ еси́ на́мъ. Апо́столъ въ Дѣя́ніихъ, зача́ло 44: Суди́ Па́велъ ми́мо ити́ Ефе́съ... Аллилу́ія, гла́съ 1: Бо́гъ бого́въ, Госпо́дь глаго́ла и призва́ зе́млю отъ восто́къ со́лнца до за́падъ. Сти́хъ: Собери́те Ему́ преподо́бныя Его́, завѣща́ющія завѣ́тъ Его́ о же́ртвахъ. Ева́нгеліе отъ Іоа́нна, зача́ло 56: Возве́дъ Іису́съ о́чи Свои́ на не́бо... Прича́стный: Хвали́те Го́спода съ небе́съ, [хвали́те Его́ въ вы́шнихъ]. Другíй: Ра́дуйтеся [пра́ведніи о Го́сподѣ, пра́вымъ подоба́етъ похвала́.] Аллилу́ія, три́жды.

Примѣчаніе:
[1] Конда́къ Вознесе́нію, гла́съ 6: Еже о на́съ испо́лнивъ смотре́ніе и я́же на земли́ соедини́въ небе́снымъ, возне́слся еси́ во сла́вѣ, Христе́ Бо́же на́шъ, ника́коже отлуча́яся, но пребыва́я неотсту́пный, и вопія́ лю́бящимъ Тя́: Азъ е́смь съ ва́ми и никто́же на вы́.
     Икосъ: Яже земли́, на земли́ оста́вившіи, я́же пе́пельная пе́рсти уступа́ющіи, пріиди́те, воспря́немъ и на высоту́ возведе́мъ о́чи и мы́сли, впери́мъ ви́ды, вку́пѣ и чу́вства на небе́сная врата́, сме́ртніи, непщу́имъ бы́ти въ Ма́сличной горѣ́ и взира́ти на Избавля́ющаго на о́блацѣхъ носи́ма. Отону́ду бо Госпо́дь на небеса́ востече́, и та́мо даролюбе́зны да́ры раздая́ апо́столомъ Свои́мъ, утѣ́шивъ я́, я́ко Оте́цъ, и утверди́въ я́, наста́вивъ, я́ко сыно́въ, и рече́ къ ни́мъ: не разлуча́юся ва́съ, Азъ е́смь съ ва́ми и никто́же на вы́.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 157 об. – 171.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.