Церковный календарь
Новости


2017-09-14 / russportal
Прот. Константинъ Зноско. "Истор. очеркъ церк. уніи". Часть 2-я. Глава 2-я (1993)
2017-09-14 / russportal
Прот. Константинъ Зноско. "Истор. очеркъ церк. уніи". Часть 2-я. Глава 1-я (1993)
2017-09-14 / russportal
Свт. Игнатій (Брянчаниновъ). Понятіе о ереси и расколѣ (1996)
2017-09-14 / russportal
Свт. Игнатій (Брянчаниновъ). Жизнь схимонаха Ѳеодора (1996)
2017-09-13 / russportal
Прот. Константинъ Зноско. Краткій обзоръ причинъ, пород. Литовскую церк. унію (1993)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 10-я (1987)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 9-я (1987)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 8-я (1987)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 7-я (1987)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 6-я (1987)
2017-09-12 / russportal
Іером. Серафимъ (Роузъ). "Душа послѣ смерти". Глава 9-я (1991)
2017-09-12 / russportal
Іером. Серафимъ (Роузъ). "Душа послѣ смерти". Глава 8-я (1991)
2017-09-12 / russportal
Прот. Григорій Дьяченко. Поуч. (2-е) на пер. мощей св. бл. кн. Александра Невскаго (1900)
2017-09-12 / russportal
Прот. Григорій Дьяченко. Поуч. (1-е) на пер. мощей св. бл. кн. Александра Невскаго (1900)
2017-09-11 / russportal
Прот. Григорій Дьяченко. Поученіе "Безмолвный обличитель убійцы" (1900)
2017-09-11 / russportal
Прот. Григорій Дьяченко. Поученіе "Возмездіе за грѣхъ" (1900)
Новости въ видѣ
RSS-канала: .
Сегодня - среда, 20 сентября 2017 г. Сейчасъ на порталѣ посѣтителей - 20.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВО ВТОРНИКЪ СЕДМЫЯ СЕДМИЦЫ ПО ПАСЦѢ.

ВЪ ПОНЕДѢЛЬНИКЪ ВЕЧЕРА,

На Го́споди воззва́хъ... стихи́ры пра́здника 3 и мине́и 3.

[Стихи́ры] Вознесе́нія, гла́съ 4. Подо́бенъ: Да́лъ еси́ зна́меніе.

Пострада́лъ еси́, я́ко Человѣ́къ, Безстра́стный Божество́мъ, и воскре́слъ еси́ тридне́венъ, Плѣни́вый сме́рть и Совоскреси́вый вся́ истлѣ́вшія, и Возне́слся еси́, Христе́, ко Отцу́, обѣща́въ посла́ти Утѣ́шителя свяще́ннымъ апо́столомъ Твои́мъ, Іису́се Всеси́льне, Спа́се ду́шъ на́шихъ.

Вы́ что́ стоите́, зря́ще на не́бо? — ви́диміи а́нгели, я́ко человѣ́цы, глаго́лаху Сло́ва таи́нникомъ. — Се́й, Его́же зрите́, о́блакомъ свѣ́тлымъ Вознося́щася, То́йже пріи́детъ, и́мже о́бразомъ ви́дѣсте Его́, суди́ти мíру, я́коже рече́. Ше́дше у́бо, вся́ рече́нная сотвори́те.

По е́же отъ гро́ба Твоего́ па́че постиже́нія Воста́ніи, Всеси́льне Го́споди, пріи́мъ, и́хже возлюби́лъ еси́, да́же до Виѳа́ніи изве́лъ еси́, Сло́ве, и къ горѣ́ бы́въ Елео́нстѣй, си́хъ благослови́въ, и та́ко Возне́слся еси́, повину́ющимся а́нгеломъ Тебѣ́, Іису́се Всеси́льне, Спа́се ду́шъ на́шихъ.

Сла́ва, и ны́нѣ, гла́съ 4:

Егда́ прише́лъ еси́ на го́ру, Христе́, Елео́нскую, Отчее соверши́ти благоволе́ніе, ужасо́шася небе́сніи а́нгели и устраши́шася преиспо́дніи. Предста́ша же ученицы́ съ ра́достію тре́петни, я́ко глаго́лалъ еси́ и́мъ, я́ко престо́лъ же готовля́шеся проти́въ о́блакъ жду́щій; врата́ же не́бо отве́рзшее добро́ту явля́ше, и земля́ сокро́вища открыва́етъ, Ада́мову схожде́нію я́ко позна́тися и па́ки восхожде́нію. Но стопы́ у́бо возвыша́хуся, я́коже ру́цѣ, уста́ же вельми́ благословля́ху, я́коже слы́шашеся, о́блакъ подъе́мляше, и не́бо вну́трь Тебе́ прія́тъ. Дѣ́ло сіе́, Го́споди, содѣ́лалъ еси́ вели́кое и пресла́вное, во спасе́ніе ду́шъ на́шихъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Испо́лнивый, Бла́же, Оте́ческое благоволе́ніе, соедини́вый же го́рняя до́льнимъ, возне́слся еси́ во сла́вѣ къ пе́рвѣйшимъ.

Сти́хъ: Вси́ язы́цы, восплещи́те рука́ми, [воскли́кните Бо́гу гла́сомъ ра́дованія].

Возне́слся еси́ къ Твоему́ Роди́телю, Ще́дре, отону́дуже не разлучи́лся еси́, и возне́слъ еси́ до́лу лежа́щее естество́, Влады́ко.

Сти́хъ: Взы́де Бо́гъ въ воскликнове́ніи, [Госпо́дь во гла́сѣ тру́бнѣ].

Облакъ Тя́ свѣ́та воспрія́тъ на высоту́, и а́нгели со стра́хомъ и тре́петомъ служа́ху Боже́ственному Твоему́ Вознесе́нію.

Сла́ва, и ны́нѣ, гла́съ 4:

Низше́дшее естество́ Ада́мово въ до́льнѣйшія страны́ земли́, Бо́же, новосотвори́вый Собо́ю превы́ше вся́каго нача́ла и вла́сти, возве́лъ еси́ дне́сь: я́ко бо возлюби́въ, спосади́лъ еси́, я́коже поми́ловавъ, соедини́лъ еси́ Себѣ́, я́ко соедини́вый, спострада́лъ еси́, я́ко безстра́стенъ пострада́въ, и спросла́вилъ еси́. Но безпло́тніи, — кто́ е́сть Се́й, — глаго́лаху, — кра́сный Му́жъ? Но не человѣ́къ то́чію: Бо́гъ же и Человѣ́къ совокупле́нно и явля́емо. Тѣ́мже удивле́ни а́нгели, во оде́ждахъ лета́юще о́крестъ ученико́въ, друзíи же стоя́ще, вопія́ху: му́жіе галиле́йстіи, Иже отъ ва́съ оты́де, Се́й е́сть Іису́съ Человѣ́къ Бо́гъ. Бо́гъ Человѣ́къ па́ки пріи́детъ, Судія́ живы́хъ и ме́ртвыхъ, вѣ́рнымъ же да́руяй грѣхо́въ проще́ніе и ве́лію ми́лость.



ВО ВТОРНИКЪ НА УТРЕНИ,

По 1-мъ стихосло́віи сѣда́ленъ, гла́съ 2. Подо́бенъ: Вы́шнихъ ища́.

Свы́ше на зе́млю, Христе́, соше́лъ еси́ и па́ки отъ земли́ на высоту́ восте́клъ еси́ къ Твоему́ Роди́телю, ученико́мъ зря́щимъ Твое́ восхожде́ніе. Съ ни́ми у́бо пра́зднующе, пое́мъ Твое́, Спа́се, Вознесе́ніе. [Два́жды.]

По 2-мъ стихосло́віи сѣда́ленъ, гла́съ 3. Подо́бенъ: Красотѣ́ дѣ́вства.

Превѣ́чное Сло́во и Безнача́льное, е́же у́бо взя́тъ естество́ человѣ́ческое, обоготвори́въ та́йно, дне́сь вознесе́. Ангели предтеку́ще, апо́столомъ пока́зоваху Сего́, иду́ща на небеса́ со сла́вою мно́гою. Ему́же поклони́вшеся, глаго́лаху: сла́ва Бо́гу Возне́сшемуся! [Два́жды.]

Псало́мъ 50-й. Кано́нъ пра́здника [1-й], со ирмосы́, на 8 и мине́и на 4. Конда́къ и ексапостила́рій пра́здника.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Не оста́влю си́рыхъ, я́же Азъ собра́хъ, — Госпо́дь друго́мъ глаго́лаше, — но послю́ ва́мъ Ду́ха Свята́го.

Сти́хъ: Вси́ язы́цы, восплещи́те рука́ми, [воскли́кните Бо́гу гла́сомъ ра́дованія].

Ангели прему́дрымъ вопія́ху апо́столомъ: о му́жіе галиле́йстіи, и́мже о́бразомъ зрите́, То́й па́ки пріи́детъ!

Сти́хъ: Взы́де Бо́гъ въ воскликнове́ніи, [Госпо́дь во гла́сѣ тру́бнѣ].

Снидо́ша съ ра́достію отъ Елео́нскія горы́ ученицы́ Твои́, Сло́ве, сла́вяще и пою́ще Боже́ственное Твое́ Вознесе́ніе.

Сла́ва, и ны́нѣ, гла́съ 4:

Егда́ возне́слся еси́ во сла́вѣ, Христе́ Бо́же, ученико́мъ зря́щимъ, о́блацы подыма́ху Тя́ съ пло́тію, врата́ взя́шася небе́сная, ли́къ а́нгельскій ра́довашеся съ весе́ліемъ, го́рнѣйшія си́лы зовя́ху, глаго́люще: возми́те врата́, кня́зи, ва́ша, и вни́детъ Ца́рь Сла́вы. Ученицы́ же дивя́щеся, глаго́лаху: не разлучи́ся на́съ, Па́стырю До́брый, но посли́ на́мъ Ду́ха Твоего́ Пресвята́го, наставля́юща, и утвержда́юща, и просвѣща́юща, и освяща́юща ду́ши на́ша.



НА ЛИТУРГІИ,

Блаже́нна отъ кано́на, пѣ́снь 6-я, на 6.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 172 об. – 174.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.