Церковный календарь
Новости


2017-11-20 / russportal
Архіеп. Аверкій (Таушевъ). Будемъ ли мы, наконецъ, каяться? (1975)
2017-11-20 / russportal
Архіеп. Аверкій (Таушевъ). Готовимся ли мы къ Великому посту? (1975)
2017-11-20 / russportal
Генералъ П. Н. Красновъ. Мысли о конницѣ (1933)
2017-11-20 / russportal
Генералъ П. Н. Красновъ. Сибирскіе казаки (1934)
2017-11-20 / russportal
"Пропов. хрестоматія". Поученіе (2-е) на соборъ св. Архистратига Михаила (1965)
2017-11-20 / russportal
"Пропов. хрестоматія". Поученіе (1-е) на соборъ св. Архистратига Михаила (1965)
2017-11-18 / russportal
Ген. П. Н. Красновъ. "Старая Академія". Глава 8-я (1932)
2017-11-18 / russportal
Ген. П. Н. Красновъ. "Старая Академія". Глава 7-я (1932)
2017-11-18 / russportal
Л. Д. Перепелкина. Юліанскій календарь - 1000-лѣтняя икона времени на Руси (1989)
2017-11-18 / russportal
Проф. П. В. Верховской. Патріархъ Тихонъ (1919)
2017-11-17 / russportal
Ген. П. Н. Красновъ. "Старая Академія". Глава 6-я (1932)
2017-11-17 / russportal
Ген. П. Н. Красновъ. "Старая Академія". Глава 5-я (1932)
2017-11-17 / russportal
Ген. П. Н. Красновъ. №100 (Къ юбилею "Часового") (1933)
2017-11-17 / russportal
Генералъ П. Н. Красновъ. Подъ какимъ лозунгомъ? (1933)
2017-11-17 / russportal
Слова преп. Симеона Новаго Богослова. Слово 36-е (1882)
2017-11-17 / russportal
Слова преп. Симеона Новаго Богослова. Слово 35-е (1882)
Новости въ видѣ
RSS-канала: .
Сегодня - вторникъ, 21 ноября 2017 г. Сейчасъ на порталѣ посѣтителей - 24.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ СУББОТУ СЕДМЫЯ СЕДМИЦЫ ПО ПАСЦѢ.
(ТРОИЦКАЯ РОДИТЕЛЬСКАЯ СУББОТА.)

ВЪ ПЯТОКЪ ВЕЧЕРА ПЯТДЕСЯТНИЦЫ,
Па́мять соверша́емъ всѣ́хъ отъ вѣ́ка усо́пшихъ благочести́выхъ христіа́нъ, оте́цъ и бра́тій на́шихъ.

На Го́споди воззва́хъ, поста́вимъ стихо́въ 6 [и пое́мъ] стихи́ры му́ченичны осмогла́сника три́, гла́съ 6:

Му́ченицы Твои́, Го́споди, не отверго́шася Тебе́, ни отступи́ша отъ за́повѣдей Твои́хъ, тѣ́хъ моли́твами поми́луй на́съ.

Му́чившіися Тебе́ ра́ди, Христе́, мно́гія му́ки претерпѣ́ша, моли́твами, Го́споди, и моле́ніемъ и́хъ, всѣ́хъ на́съ сохрани́.

Страстоте́рпцы му́ченицы и небе́сные гра́ждане, на земли́ пострада́вшіи, мно́гія му́ки претерпѣ́ша и соверше́нный прія́ша вѣне́цъ на небесѣ́хъ, да мо́лятся о душа́хъ на́шихъ.

И усо́пшихъ три́, гла́съ 8. Подо́бенъ: Иже во Еде́мѣ.

Отъ вѣ́ка ме́ртвыхъ дне́сь всѣ́хъ по и́мени, съ вѣ́рою пожи́вшихъ благоче́стно, па́мять сотворя́юще, вѣ́рніи, Спа́са и Го́спода воспои́мъ, прося́ще прилѣ́жно си́мъ въ ча́съ суда́ отвѣ́тъ благíй да́ти, Тому́ Самому́ Бо́гу на́шему, все́й судя́щему земли́, десна́го Его́ предстоя́нія получи́ти въ ра́дости, въ ча́сти пра́ведныхъ и во святы́хъ жре́біи свѣ́тлѣмъ, и досто́йнымъ бы́ти небе́снаго Ца́рствія Его́.

Свое́ю кро́вію человѣ́ки, Спа́се, искупи́вый, и сме́ртію Твое́ю отъ сме́рти го́рькія изба́вивый на́съ, и жи́знь вѣ́чную подая́й на́мъ Воскресе́ніемъ Твои́мъ, вся́ упоко́й, Го́споди, усо́пшія благоче́стно, или́ въ пусты́няхъ, или́ во градѣ́хъ, или́ въ мо́ри, или́ на земли́, или́ на вся́комъ мѣ́стѣ: цари́ же, свяще́нники, архіере́и, мона́хи и бѣльцы́ въ во́зрастѣ вся́комъ всеро́дномъ, и сподо́би я́ небе́снаго Ца́рствія Твоего́.

Изъ ме́ртвыхъ Воста́ніемъ Твои́мъ, Христе́, не ктому́ сме́рть облада́етъ уме́ршими благоче́стно. Тѣ́мже мо́лимся прилѣ́жно: рабы́ Твоя́ упоко́й во дво́рѣхъ Твои́хъ и въ нѣ́дрѣхъ Авраа́ма, отъ Ада́ма да́же до дне́сь послужи́вшія Тебѣ́ чи́сто: отцы́ и бра́тію на́шу, дру́ги вку́пѣ и сро́дники, вся́каго человѣ́ка, въ житіи́ послужи́вша вѣ́рно и къ Тебѣ́ преста́вльшася многови́дно и многообра́зно, Бо́же, и сподо́би я́ небе́снаго Ца́рствія Твоего́.

Сла́ва, гла́съ 8:

Пла́чу и рыда́ю, егда́ помышля́ю сме́рть и ви́жду во гробѣ́хъ лежа́щую по о́бразу Бо́жію созда́нную на́шу красоту́, безобра́зну, безсла́вну, не иму́щую ви́да. О, чудесе́! Что е́же о на́съ сіе́ бы́сть та́инство? Ка́ко преда́хомся тлѣ́нію? Ка́ко сопряго́хомся сме́рти? Вои́стинну, Бо́га повеле́ніемъ, я́коже е́сть пи́сано, подаю́щаго преста́вленнымъ поко́й.

И ны́нѣ, богоро́диченъ, гла́съ 6:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Свѣ́те Ти́хій... Вмѣ́сто же проки́мна пое́мъ Аллилуія.., на гла́съ 8. Сти́хъ: Блаже́ни, я́же избра́лъ и прія́лъ еси́, Го́споди. Сти́хъ: И па́мять и́хъ въ ро́дъ и ро́дъ. Сподо́би, Го́споди...

На стихо́внѣ стихи́ры, гла́съ 6:

Кре́стъ Тво́й, Го́споди, му́ченикомъ бы́сть ору́жіе непобѣди́мое: ви́дяху бо предлежа́щую сме́рть и предзря́ще бу́дущую жи́знь, наде́ждею въ Тя́ укрѣпля́хуся. Тѣ́хъ моли́твами поми́луй на́съ.

Ме́ртвымъ:

Сти́хъ: Ду́ши и́хъ во благи́хъ водворя́тся.

Ты́ мя́ почти́лъ еси́ о́бразомъ Твои́мъ, руку́ Твое́ю, Спа́се, созда́ніе, живописа́вый въ веще́ственномъ зра́цѣ у́мнаго существа́ подо́біе, его́же о́бщника мя́ поста́вилъ еси́, положи́вый су́щими на земли́ облада́ти мнѣ́ самовла́стіемъ сло́ва. Тѣ́мже, Спа́се, рабы́ Твоя́ во странѣ́ живу́щихъ, въ селе́ніихъ пра́ведныхъ упоко́й.

Сти́хъ: Блаже́ни, я́же избра́лъ и прія́лъ еси́, Го́споди.

Да мнѣ́ достоя́ніе про́чихъ живота́ разсу́дится, вертогра́дъ во Еде́мѣ вся́кими укра́шенъ сады́, печа́ли и попече́нія свобо́дна мя́, прича́стника боже́ственныя жи́зни, равноа́нгельна на земли́, смѣше́на учини́вый. Тѣ́мже, Спа́се, рабы́ Твоя́ во странѣ́ живы́хъ, въ селе́ніихъ пра́ведныхъ упоко́й.

Сла́ва, гла́съ 6:

Нача́токъ ми́ и соста́въ зижди́тельное Твое́ бы́сть повелѣ́ніе: восхотѣ́въ бо отъ неви́димаго же и ви́димаго жи́ва мя́ соста́вити естества́, отъ земли́ у́бо тѣ́ло созда́лъ еси́, да́лъ же ми́ еси́ ду́шу Боже́ственнымъ Твои́мъ и животворя́щимъ вдохнове́ніемъ. Тѣ́мже, Спа́се, рабы́ Твоя́ во странѣ́ живу́щихъ и въ селе́ніихъ пра́ведныхъ упоко́й.

И ны́нѣ, богоро́диченъ:

Моли́твами Ро́ждшія Тя́, Христе́, и му́ченикъ Твои́хъ, апо́столъ, проро́къ, іера́рховъ, преподо́бныхъ, и пра́ведныхъ, и всѣ́хъ святы́хъ, усо́пшія рабы́ Твоя́ упоко́й.

Отпусти́тельный тропа́рь, гла́съ 8:

Глубино́ю му́дрости человѣколю́бно вся́ стро́яй, и поле́зное всѣ́мъ подава́яй, еди́не Содѣ́телю, упоко́й, Го́споди, ду́ши ра́бъ Твои́хъ: на Тя́ бо упова́ніе возложи́ша, Творца́ и Зижди́теля и Бо́га на́шего.

Сла́ва, и ны́нѣ, богоро́диченъ:

Тебе́ и стѣ́ну, и приста́нище и́мамы, и моли́твенницу благопрія́тну къ Бо́гу, Его́же родила́ еси́, Богоро́дице безневѣ́стная, вѣ́рныхъ спасе́ніе.

И быва́етъ отпу́стъ.




[ПОСЛѢДОВАНІЕ ПАННИХИДЫ.]

Та́же свяще́нникъ твори́тъ: Благослове́нъ Бо́гъ на́шъ... И глаго́лемъ псало́мъ [90-й]: Живы́й въ по́мощи вы́шняго... Аллилу́ія.., три́жды. Сти́хъ: Блаже́ни, я́же избра́лъ и прія́лъ еси́, Го́споди... Та́же тропа́рь: Глубино́ю му́дрости... И богоро́диченъ: Тебе́ и стѣ́ну... Та́же ме́ртвенніи тропари́: Благослове́нъ еси́, Го́споди... И помина́етъ свяще́нникъ всѣ́хъ преждепочи́вшихъ оте́цъ и бра́тій на́шихъ... И моли́тву. По возгла́сѣ же, псало́мъ 50-й.

И а́біе пое́мъ настоя́щій ме́ртвенный кано́нъ во усыпа́льницѣ, его́же краестро́чіе: Шесту́ю припѣва́ю отше́дшимъ пѣ́снь. Гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль [по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше].

Въ небе́сныхъ черто́зѣхъ всегда́ до́бліи му́ченицы мо́лятъ Тя́, Христе́: я́же отъ земли́ преста́вилъ еси́ вѣ́рныя, вѣ́чныхъ бла́гъ получи́ти сподо́би.

Украше́й вся́ческая, живо́тное смѣше́ніе посредѣ́ мя́ человѣ́ка смире́нія вку́пѣ и вели́чества созда́лъ еси́. Тѣ́мже ра́бъ Твои́хъ ду́ши, Спа́се, упоко́й.

Сла́ва: Рая́ жи́теля и земледѣ́лателя въ нача́лѣ мя́ учини́лъ еси́, престу́пльша же Твою́ за́повѣдь, изгна́лъ еси́. Тѣ́мже ра́бъ Твои́хъ ду́ши, Спа́се, упоко́й.

И ны́нѣ, богоро́диченъ: Иже отъ ребра́ Созда́вый Еву пре́жде, на́шу прама́терь, изъ пречи́стаго Твоего́ чре́ва въ пло́ть одѣва́ется, е́юже сме́рти крѣ́пость, Чи́стая, разруши́.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, [вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́].

Зако́нно пострада́ша Твои́ му́ченицы, Жизнода́вче, и вѣнце́мъ побѣ́ды украси́вшеся, отъ Тебе́ преста́вльшимся вѣ́рнымъ вѣ́чное избавле́ніе подаю́тъ.

Наказа́въ пе́рвѣе мно́гими чудесы́ и зна́менми мене́, заблу́ждшаго, напослѣ́докъ Самаго́ Себе́ истощи́лъ еси́, я́ко Сострада́тель, и, поиска́въ, обрѣ́лъ и спа́слъ еси́.

Сла́ва: Отъ теку́щихъ непостоя́тельныя тли́ къ Тебѣ́ преше́дшія въ селе́ніихъ вѣ́чныхъ жи́ти ра́достно сподо́би, Бла́же, оправда́въ вѣ́рою же и благода́тію.

И ны́нѣ, богоро́диченъ: Нѣ́сть непоро́чны, я́коже Ты́, Пречи́стая Богома́ти: еди́на отъ вѣ́ка Бо́га и́стиннаго зачала́ еси́ во чре́вѣ, сме́рти разруши́вшаго си́лу.

Та́же, ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Та́же ектенія́.

И сѣда́ленъ, гла́съ 6:

Вои́стинну суета́ вся́ческая, житіе́ же — сѣ́нь и со́ніе, и́бо всу́е мяте́тся вся́къ земноро́дный, я́коже рече́ писа́ніе: егда́ мíръ пріобря́щемъ, тогда́ во гро́бъ всели́мся, идѣ́же вку́пѣ ца́ріе и ни́щіи. Тѣ́мже, Христе́ Бо́же, преста́вльшіяся упоко́й, я́ко Человѣколю́бецъ.

Сла́ва, и ны́нѣ, богоро́диченъ:

Всесвята́я Богоро́дице, во вре́мя живота́ моего́ не оста́ви мене́, человѣ́ческому предста́тельству не ввѣ́ри мя́, но Сама́ заступи́ и поми́луй мя́.

Пѣ́снь 4.

Ирмо́съ: Христо́съ моя́ си́ла, [Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи].

Прему́дрости бо́льшее явля́я позна́ніе и е́же о дарѣ́хъ многосоверше́нныя, Влады́ко, благосты́ни, му́ченическія ли́ки а́нгеломъ сочета́лъ еси́.

Неизрече́нныя сла́вы Твоея́ получи́ти сподо́би къ Тебѣ́ преста́вльшіяся, идѣ́же, Христе́, веселя́щихся е́сть жили́ще и гла́съ чи́стаго ра́дованія.

Сла́ва: Пою́щихъ пріими́ Боже́ственную держа́ву Твою́, и́хже отъ земли́ прія́лъ еси́, ча́да Свѣ́та тѣ́хъ содѣ́ловая, грѣхо́вную мглу́ очища́я, Многоми́лостиве.

И ны́нѣ, [богоро́диченъ]: Прія́телище пречи́стое, хра́мъ всенепоро́чный, ковче́гъ пресвяты́й, дѣ́вственное мѣ́сто свяще́нія, Тебе́, добро́ту Іа́ковлю, Влады́ка избра́лъ е́сть.

Пѣ́снь 5.

Ирмо́съ: Бо́жіимъ свѣ́томъ [Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща].

Яко всепло́діе свяще́нное и я́ко нача́токъ человѣ́ческаго, му́ченицы, естества́, Просла́вленному прине́сшеся Бо́гу, на́мъ спасе́ніе при́сно хода́тайствуютъ.

Небе́снаго пребыва́нія, раздая́нія дарова́ній сподо́би, Го́споди, пре́жде усо́пшія вѣ́рныя рабы́ Твоя́, подая́ прегрѣше́ній избавле́ніе.

Сла́ва: Иже еди́нъ естество́мъ Животво́рецъ, Иже бла́гости вои́стинну Неизслѣ́димая Пучи́на, сконча́вшіяся Ца́рствія Твоего́ сподо́би, Ще́дре, еди́не Безсме́ртне.

И ны́нѣ, богоро́диченъ: Крѣ́пость и Пѣ́ніе, Иже изъ Тебе́, Влады́чице, мíру Рожде́йся, и спасе́ніе бы́вый поги́бшимъ, и́же отъ а́довыхъ вра́тъ избавля́я, вѣ́рою Тебе́ блажа́щія.

Пѣ́снь 6.

Ирмо́съ: Жите́йское мо́ре, [воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве].

На Крестѣ́ Пригвожда́емь, му́ченическія ли́ки къ Себѣ́ собра́лъ еси́, подража́ющія Стра́сть Твою́, Бла́же. Тѣ́мже мо́лимтися: къ Тебѣ́ преста́вленныя ны́нѣ упоко́й.

Неизрече́нною сла́вою Твое́ю, егда́ пріи́деши стра́шный суди́ти мíру всему́, на о́блацѣхъ благоволи́ свѣ́тло срѣ́сти Тебе́, Изба́вителю, я́же отъ земли́ прія́лъ еси́ вѣ́рныя рабы́ Твоя́.

Сла́ва: Исто́чникъ жи́зни Сы́й, му́жествомъ Боже́ственнымъ окова́нныя, Влады́ко, изводя́й рабы́ Твоя́, я́же къ Тебѣ́ вѣ́рно отше́дшія, въ сла́дости ра́йстѣй всели́.

И ны́нѣ, [богоро́диченъ]: Въ зе́млю возврати́хомся, престу́пльше Бо́жію за́повѣдь Боже́ственную; Тобо́ю же, Дѣ́во, на не́бо отъ земли́ вознесо́хомся, тлю́ сме́ртную оттря́сше.

Посе́мъ ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Та́же ектенія́.

Конда́къ: Со святы́ми упоко́й... И и́косъ. [Ли́стъ 187.]

Пѣ́снь 7.

Ирмо́съ: Росода́тельну у́бо [пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ!]

Изба́вльшіися Твое́ю кро́вію му́ченицы пе́рваго преступле́нія, окропи́вшеся же свое́ю кро́вію, прообразу́ютъ я́вѣ Твое́ заколе́ніе, благослове́нъ еси́, Бо́же оте́цъ на́шихъ!

Свирѣ́пѣющую сме́рть умертви́лъ еси́, Сло́ве Живонача́льнѣйшее, въ вѣ́рѣ же усо́пшія пріими́ ны́нѣ, воспѣва́ющія и глаго́лющія, Христе́: благослове́нъ еси́, Бо́же оте́цъ на́шихъ!

[Сла́ва:] Воодуши́вый мя́, человѣ́ка, вдохнове́ніемъ Боже́ственнымъ, Богонача́льнѣйшій Влады́ко, преста́вленныя Ца́рствія Твоего́ сподо́би пѣ́ти Тебѣ́, Спа́се: благослове́нъ еси́, Бо́же оте́цъ на́шихъ!

[И ны́нѣ,] богоро́диченъ: Превы́шши вся́кія тва́ри, Пренепоро́чная, была́ еси́, заче́нши Бо́га, сокруши́вшаго сме́ртная врата́ и вереи́ сте́ршаго, тѣ́мже Тя́, Чи́стая, пѣсносло́вимъ вѣ́рніи, я́ко Богома́терь.

Пѣ́снь 8.

Ирмо́съ: Изъ пла́мене преподо́бнымъ [ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки].

Крѣ́пко по́двиги показу́юще и побѣ́ды вѣнце́мъ украси́вшеся, му́ченицы Христо́вы страстоте́рпцы, зову́ще: Тя́ превозно́симъ, Христе́, во вѣ́ки!

Свяще́ннѣ житіе́ оста́вльшія вѣ́рныя и къ Тебѣ́, Влады́цѣ, преше́дшія, пріими́ кро́тцѣ, упокоева́я, я́ко Благоутро́бенъ, Тя́ превознося́щія во вся́ вѣ́ки.

[Сла́ва:] Ны́нѣ въ земли́ кро́ткихъ вся́ водворя́тися пре́жде усо́пшія, Спа́се, благоизво́ли, вѣ́рою, я́же въ Тя́, оправда́въ и благода́тію, Тя́ превознося́щія во вся́ вѣ́ки.

[И ны́нѣ,] богоро́диченъ: Вси́ Тя́ блажи́мъ, Всеблаже́нная, Ро́ждшую Сло́ва, вои́стинну, су́щаго Блаже́ннаго, пло́ть на́съ ра́ди бы́вшаго, Его́же превозно́симъ во вся́ вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно [ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ].

Наде́жда му́чениковъ ли́ки укрѣпи́ и къ Твое́й любви́ распале́ннѣй впери́, бу́дущихъ си́мъ предвообрази́вши непоколеби́мый, вои́стинну, поко́й, его́же преста́вленныя, Бла́же, вѣ́рныя сподо́би получи́ти.

Свѣ́тлаго и Боже́ственнаго получи́ти сія́нія Твоего́, Христе́, вѣ́рою преста́вльшимся благоволи́, въ нѣ́дрѣхъ Авраа́мовыхъ упокое́нія, я́ко еди́нъ Ми́лостивъ, тѣ́мъ да́руя и вѣ́чнаго сподобля́я блаже́нства.

[Сла́ва:] Иже сы́й естество́мъ Бла́гъ, и Благоутро́бенъ, и Воли́тель ми́лости, и благоутро́бія Бе́здна, я́же отъ мѣ́ста сего́ озлобле́нія и сѣ́ни сме́ртныя, Спа́се, преста́вилъ еси́, идѣ́же сія́етъ Тво́й свѣ́тъ, ты́я учини́.

[И ны́нѣ,] богоро́диченъ: Сѣ́нь святу́ю, Чи́стая, разумѣ́емъ, и ковче́гъ, и скрижа́ль Тя́ зако́на и благода́ти: Тобо́ю бо оставле́ніе дарова́ся, оправда́ннымъ же Кро́вію Воплоще́ннаго изъ Твоего́ чре́ва, Всенепоро́чная.

Трисвято́е. Пресвята́я Тро́ице... по Отче на́шъ... Тропа́рь: Глубино́ю му́дрости... И богоро́диченъ: Тебе́ и стѣ́ну... И помина́етъ свяще́нникъ обы́чно. И отпу́стъ.



ВЪ СУББОТУ НА УТРЕНИ,

По шестопса́лміи: Аллилу́ія.., на гла́съ 8, со стихи́ его́.

Тропа́рь:

Глубино́ю му́дрости человѣколю́бно вся́ стро́яй, и поле́зное всѣ́мъ подава́яй, еди́не Содѣ́телю, упоко́й, Го́споди, ду́ши ра́бъ Твои́хъ: на Тя́ бо упова́ніе возложи́ша, Творца́ и Зижди́теля и Бо́га на́шего.

Сла́ва, и ны́нѣ, богоро́диченъ, гла́съ то́йже:

Тебе́ и стѣ́ну, и приста́нище и́мамы, и моли́твенницу благопрія́тну къ Бо́гу, Его́же родила́ еси́, Богоро́дице безневѣ́стная, вѣ́рныхъ спасе́ніе.

Та́же обы́чное стихосло́віе: Рече́ Госпо́дь Го́сподеви моему́: сѣди́ одесну́ю Мене́... На всѣ́хъ же ектеніа́хъ стихосло́вія и кано́на помина́ются вси́ преждеотше́дшіи отцы́ и бра́тія на́ша.

По 1-мъ стихосло́віи глаго́лемъ сѣда́льны ме́ртвенны и му́ченичны, гла́съ 6:

Страда́льческая противле́нія въ по́двизѣ, мучи́тельныя ра́ны на му́ченики, и стоя́ху ли́цы безпло́тныхъ, по́чести держа́ще побѣ́ды: удиви́ша прему́дріи мучи́телей и царе́й, низложи́ша веліа́ра исповѣ́даніемъ Христо́вымъ. Укрѣпи́вый и́хъ, Го́споди, сла́ва Тебѣ́!

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Страда́льческій по́двигъ претерпѣ́вше святíи и, по́чести побѣ́ды отъ Тебе́ пріи́мше, упраздни́ша кова́рства беззако́нныхъ, прія́ша вѣнцы́ нетлѣ́нія. Тѣ́ми, Бо́же, спаси́ ду́ши на́ша.

Сти́хъ: Воззва́ша пра́ведніи, и Госпо́дь услы́ша и́хъ.

Святы́хъ Твои́хъ па́мять, Го́споди, показа́ся, я́коже ра́й, и́же во Еде́мѣ, въ не́й бо ра́дуется вся́ тва́рь; и пода́ждь на́мъ тѣ́хъ моли́твами ми́ръ и ве́лію ми́лость.

Сла́ва, поко́инъ:

Въ селе́ніихъ избра́нныхъ и во странѣ́ живу́щихъ, я́же прія́лъ еси́, Іису́се, благоче́стно усо́пшія учини́, я́ко благоувѣ́тливый Бо́гъ, и испо́лни невече́рняго свѣ́та, и небе́сныя Твоея́ ра́дости сподо́би.

И ны́нѣ, богоро́диченъ:

Благослове́нную нарекíй Твою́ Ма́терь, прише́лъ еси́ на Стра́сть во́льнымъ хотѣ́ніемъ, возсія́въ на Крестѣ́, взыска́ти хотя́ Ада́ма, глаго́ля а́нгеломъ: сра́дуйтеся Мнѣ́, я́ко обрѣ́теся поги́бшая дра́хма. Вся́ му́дрѣ устро́ивый, Бо́же на́шъ, сла́ва Тебѣ́!

Та́же: Блаже́ни непоро́чніи... на двѣ́ статіи́.

Тропари́ ме́ртвенніи, гла́съ 5:

Благослове́нъ еси́, Го́споди, научи́ мя оправда́ніемъ Твои́мъ.

Святы́хъ ли́къ обрѣ́те исто́чникъ жи́зни и две́рь ра́йскую, да обря́щу и а́зъ пу́ть покая́ніемъ: поги́бшее овча́ а́зъ е́смь, воззови́ мя, Спа́се, и спаси́ мя.

Благослове́нъ еси́, Го́споди, научи́ мя оправда́ніемъ Твои́мъ.

Агнца Бо́жія проповѣ́давше, и закла́ни бы́вше я́коже а́гнцы, и къ жи́зни нестарѣ́емѣй, святíи, и присносу́щнѣй преста́вльшеся. Того́ прилѣ́жно, му́ченицы, моли́те, долго́въ разрѣше́ніе на́мъ дарова́ти.

Благослове́нъ еси́, Го́споди, научи́ мя оправда́ніемъ Твои́мъ.

Въ пу́ть у́зкій хо́ждшіи приско́рбный, вси́ въ житіи́ кре́стъ, я́ко яре́мъ, взе́мшіи, и Мнѣ́ послѣ́довавшіи вѣ́рою, пріиди́те наслади́теся, и́хже угото́вахъ ва́мъ по́честей и вѣнцо́въ небе́сныхъ.

Благослове́нъ еси́, Го́споди, научи́ мя оправда́ніемъ Твои́мъ.

Образъ е́смь неизрече́нныя Твоея́ сла́вы, а́ще и я́звы ношу́ прегрѣше́ній, уще́дри Твое́ созда́ніе, Влады́ко, и очи́сти Твои́мъ благоутро́біемъ, и возжелѣ́нное оте́чество пода́ждь ми́, рая́ па́ки жи́теля мя́ сотворя́я.

Благослове́нъ еси́, Го́споди, научи́ мя оправда́ніемъ Твои́мъ.

Дре́вле у́бо отъ не су́щихъ созда́вый мя́, и о́бразомъ Твои́мъ Боже́ственнымъ почты́й, преступле́ніемъ же за́повѣди па́ки мя́ возврати́вый въ зе́млю, отъ нея́же взя́тъ бы́хъ, на е́же по подо́бію возведи́ дре́внею добро́тою возобрази́тися.

Благослове́нъ еси́, Го́споди, научи́ мя оправда́ніемъ Твои́мъ.

Упоко́й, Бо́же, рабы́ Твоя́, и учини́ я́ въ раи́, идѣ́же ли́цы святы́хъ, Го́споди, и пра́ведницы сія́ютъ я́ко свѣти́ла, усо́пшія рабы́ Твоя́ упоко́й, презира́я и́хъ вся́ согрѣше́нія.

Сла́ва:

Трисія́тельное еди́наго Божества́, благоче́стно пое́мъ, вопію́ще: Свя́тъ еси́, Отче Безнача́льный, Собезнача́льный Сы́не, и Боже́ственный Ду́ше, просвѣти́ на́съ, вѣ́рою Тебѣ́ служа́щихъ, и вѣ́чнаго огня́ исхити́.

И ны́нѣ, богоро́диченъ:

Ра́дуйся Чи́стая, Бо́га пло́тію ро́ждшая во спасе́ніе всѣ́хъ, Еюже ро́дъ человѣ́ческій обрѣ́те спасе́ніе: Тобо́ю да обря́щемъ ра́й, Богоро́дице Чи́стая благослове́нная.

Аллилу́ія, аллилу́ія, аллилу́ія, сла́ва Тебѣ́, Бо́же. [Три́жды.]

Посе́мъ ектенія́ о усо́пшихъ преждерече́нная: Па́ки и па́ки... Мы́ же: Го́споди, поми́луй, 40. Іере́й моли́тву: Бо́же духо́въ...

И по возгла́сѣ сѣда́ленъ, гла́съ 5, за упоко́й:

Поко́й, Спа́се на́шъ, съ пра́ведными рабы́ Твоя́, и сія́ всели́ во дворы́ Твоя́, я́коже е́сть пи́сано: презира́я, я́ко бла́гъ, прегрѣше́нія и́хъ во́льная и нево́льная, и вся́ я́же въ вѣ́дѣніи и не въ вѣ́дѣніи, Человѣколю́бче.

Сла́ва, и ны́нѣ, богоро́диченъ:

Отъ Дѣ́вы возсія́вый мíру, Христе́ Бо́же, сы́ны свѣ́та То́ю показа́вый, поми́луй на́съ.

Псало́мъ 50-й.

Кано́нъ свята́го оби́тели, со ирмосо́мъ, на 6 и настоя́щій на 8.

Кано́нъ, Студи́та творе́ніе, въ тро́ичныхъ и богоро́дичныхъ тропарѣ́хъ краестро́чіе: Недосто́йнаго Ѳео́дора [Τοῦ ἀναξίου Θεοδώρου]. Гла́съ 8.
Пѣ́снь 1.

Ирмо́съ: Пѣ́снь возсле́мъ, лю́діе, чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, еди́ному Влады́цѣ.

Вси́ помо́лимся Христу́, творя́ще па́мять дне́сь отъ вѣ́ка ме́ртвыхъ, да вѣ́чнаго огня́ изба́витъ я́, въ вѣ́рѣ усо́пшія и наде́ждѣ жи́зни вѣ́чныя.

Глубино́ю суде́бъ Твои́хъ, Христе́, всепрему́дрѣ Ты́ предопредѣли́лъ еси́ коего́ждо кончи́ну жи́зни, предѣ́лъ и о́бразъ. Тѣ́мже я́же покры́ гро́бъ во вся́кой странѣ́, на судѣ́ спаси́, Всеще́дрый.

Предѣ́лы жи́зни на́шея да́вый, тѣ́мже усо́пшія отъ жите́йскія но́щи, дне́ невече́рняго сы́ны покажи́, Го́споди, свяще́нники правосла́вныя, цари́ же и вся́ лю́ди Твоя́.

Яже покры́ вода́, и бра́нь пожа́тъ, тру́съ же я́же объя́тъ, и убíйцы уби́ша, и о́гнь я́же попали́, вѣ́рныя, Ми́лостиве, въ ча́сти учини́ пра́ведныхъ.

Вся́ презира́яй плотскíя до́лги на́ша, Спа́се на́шъ, во вся́комъ во́зрастѣ всего́ ро́да человѣ́ча, предъ суди́щемъ Твои́мъ поста́ви неосужде́ны, Тебѣ́, Созда́телю, отвѣща́ющія.

[Τ] Сла́ва, тро́иченъ: Тріеди́наго Естества́ пою́ Ли́ца Самоѵпоста́сная: Нерожде́нна Отца́, Сы́на Ро́ждшагося, и Ду́ха Свята́го, — безнача́льное Ца́рство, вла́сть, Божество́ еди́но.

[Ο] И ны́нѣ, богоро́диченъ: Вои́стинну Ты́ яви́лася еси́ не́бо на земли́, бо́льшее вы́шняго небесе́, Безневѣ́стная Дѣ́во: изъ Тебе́ бо возсія́ Со́лнце въ мíрѣ, влады́чествуяй пра́вдою.

Катава́сія: Пѣ́снь возсле́мъ...

Пѣ́снь 2.

Ирмо́съ: Ви́дите, ви́дите, я́ко Азъ е́смь Бо́гъ ва́шъ, пре́жде вѣ́къ рожде́нный отъ Отца́, и отъ Дѣ́вы въ послѣ́дняя безъ му́жа заче́ншійся, и разруши́вый грѣ́хъ пра́отца Ада́ма, я́ко Человѣколю́бецъ.

Ви́дите, ви́дите, я́ко Азъ е́смь Бо́гъ ва́шъ, пра́веднымъ судо́мъ водрузи́вый предѣ́лы жи́зни, въ нетлѣ́ніе отъ тли́ пріе́мляй вся́ усо́пшія въ наде́жди вѣ́чнаго воскре́снія.

Отъ четы́рехъ коне́цъ, Го́споди, пріе́мляй вѣ́рно усо́пшія въ мо́ри, или́ на земли́, или́ въ рѣка́хъ, исто́чницѣхъ, или́ езе́рѣхъ, или́ въ рове́нницѣхъ, снѣ́дь звѣре́мъ бы́вшія, и пти́цамъ, и гадо́мъ, вся́ упоко́й.

Въ Твое́й дла́ни вся́ческая, Го́споди, предразсуди́лъ еси́, разрѣ́шшіяся въ соста́вы четы́ри: въ прише́ствіи Твое́мъ собра́въ воскреси́, вся я́же въ невѣ́дѣніи, и ра́зумѣ, проща́я тѣ́хъ прегрѣше́нія.

О, стра́шнаго Твоего́ втора́го, Го́споди, прише́ствія! Зане́ я́ко въ ви́дѣ мо́лніи на зе́млю прише́дъ, воздви́гнеши все́ созда́ніе Твое́ суди́тися, въ вѣ́рѣ Тебѣ́ тогда́ пожи́вшихъ, срѣ́тшихъ Тя́, съ Тобо́ю бы́ти сподо́би.

[Υ] Сла́ва, тро́иченъ: Пресоверше́нная Еди́нице, Пребоже́ственная, Тріѵпоста́сная: Нерожде́нне Отче, и Сы́не Единоро́дне, Ду́ше отъ Отца́ исходя́й, Сы́номъ же явля́яйся, — Существо́ еди́но и Естество́, Госпо́дьство, Ца́рство, спаси́ всѣ́хъ на́съ.

[Α] И ны́нѣ, богоро́диченъ: Неизглаго́ланное чу́до Твоего́ Рождества́, Ма́ти Дѣ́во: ка́ко бо и ражда́еши, и чиста́ еси́ въ то́мже? Ка́ко Отроча́ ражда́еши, и не вѣ́си иску́са му́жеска отню́дъ? — Якоже вѣ́сть па́че естества́ отъ Мене́ новолѣ́пно Сло́во Бо́жіе ро́ждшееся.

Катава́сія: Ви́дите ви́дите...

Пѣ́снь 3.

Ирмо́съ: Утвержде́й руко́ю Твое́ю, Сло́ве Бо́жій, небеса́, просвеще́ніемъ Твоего́ и́стиннаго позна́нія, утверди́ и на́съ, на Тя́ надѣ́ющихся, сердца́.

Преше́дшія житія́ тече́ніе въ сла́вѣ благоче́стной пра́веднымъ одѣ́ятися вѣнце́мъ сподо́би, Бо́же, и вѣ́чныхъ бла́гъ наслади́тися.

Напра́сно восхище́нныя, попаля́емыя отъ мо́лній, и изме́рзшія мра́зомъ, и вся́кою ра́ною, упоко́й, Бо́же, егда́ огне́мъ вся́ иску́сиши.

Присному́тное житія́ мо́ре преплы́вшія, Христе́, въ нетлѣ́нное Твоего́ житія́ сподо́би приста́нище притещи́, правосла́внымъ житіе́мъ окормле́нныя.

Иже вся́кое естество́ морски́хъ и пти́цъ небе́сныхъ, прія́тъ снѣде́ніе, Христе́, Твои́ми судьба́ми воскреси́, Бо́же, въ послѣ́дній де́нь со сла́вою.

[Ν] Сла́ва, тро́иченъ: Умно Боже́ственную Еди́ницу, въ Три́ Ли́ца про́сто, ку́пно е́же пресѣщи́, совокупля́ю несѣко́мая: я́коже бо ско́рость мо́лніи, трисія́ющая ви́дится во еди́нствѣ.

[Α] И ны́нѣ, богоро́диченъ: Недоумѣ́нное Твое́ чу́до: безъ му́жа бо ражда́еши и дѣ́вство Твое́, Чи́стая, соблюда́еши ро́ждши. Тѣ́мже а́нгелъ мно́жество и человѣ́ческій ро́дъ пое́тъ Тя́ во вѣ́ки.

Катава́сія: Утвержде́й руко́ю Твое́ю, Сло́ве Бо́жій, небеса́...

Сѣда́ленъ, гла́съ 5. Подо́бенъ: Собезнача́льное Сло́во.

На́съ ра́ди претерпѣ́вый кре́стъ и сме́рть, и умертви́вый а́да, и совоскреси́вый ме́ртвыя, преста́вльшіяся отъ на́съ, Спа́се, упоко́й, я́ко Человѣколю́бецъ Бо́гъ, и въ тре́петное и стра́шное прише́ствіе Твое́, Жизнода́вче, я́ко имѣ́яй мно́жество ми́лости, Ца́рствія Твоего́ сподо́би.

Сла́ва, то́йже. И ны́нѣ, богоро́диченъ:

Ско́рый Тво́й покро́въ, и по́мощь, и ми́лость покажи́ на рабѣ́хъ Твои́хъ, и во́лны, Чи́стая, укроти́ су́етныхъ помышле́ній, и па́дшую ду́шу мою́ возста́ви, Богоро́дице: вѣ́мъ бо, вѣ́мъ Дѣ́во, я́ко мо́жеши, ели́ка и хо́щеши.

Пѣ́снь 4.

Ирмо́съ: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися богови́дно усмотри́ и со стра́хомъ славосло́вяше си́лу Твою́.

Отцы́ и пра́отцы, дѣ́ды и пра́дѣды, отъ пе́рвыхъ и да́же до послѣ́днихъ, во благозако́ніи уме́ршія и благовѣ́ріи, вся́ помяни́, Спа́се на́шъ.

Въ горѣ́, на пути́, на мѣ́стѣхъ пусты́хъ житіе́ оста́вльшія въ вѣ́рѣ, мона́хи же и бѣльцы́, ю́ноши и ста́рцы, со святы́ми, Христе́, всели́.

Отъ печа́ли и ра́дости преше́дшія ненаде́жно, вѣ́рою а́біе премѣни́вшія житіе́, въ благоде́нствіи пострада́вшія, или́ злоде́нствіи, вся́ упоко́й, Спа́се на́шъ.

Яже уби́ ме́чь, и ко́нь совосхи́ти, гра́дъ, снѣ́гъ и ту́ча умно́женная, я́же удави́ пли́нѳа, или́ пе́рсть посы́па, Христе́ Спа́се на́шъ, упоко́й.

[Ξ] Сла́ва, тро́иченъ: Стра́нно я́ко Еди́но, и Три́, Божество́ все по Еди́ному Лицу́ нераздѣ́льно: Оте́цъ бо, Сынъ, и Ду́хъ Святы́й е́сть покланя́ема я́ко Единъ Богъ.

[Ι] И ны́нѣ, богоро́диченъ: Напра́ви насъ, Дѣ́во, моли́твами Твои́ми, окормля́ющи обурева́емыя волно́ю грѣха́, во спаси́тельная приста́нища, Господороди́тельнице, избавля́ющи отъ вся́кихъ лю́тыхъ.

[Катава́сія: Изъ горы́ приосѣне́нныя, Сло́ве, проро́къ...]

Пѣ́снь 5.

Ирмо́съ: Утренюетъ ду́хъ мо́й къ Тебѣ́, Бо́же, зане́ свѣ́тъ повелѣ́нія прише́ствія Твоего́, и́миже у́бо озари́ у́мъ на́шъ, Влады́ко, и наста́ви на стезю́ жи́зни.

Коего́ждо па́мять уме́ршихъ благоче́стно отъ вѣ́ка дне́сь творя́ще, Го́споди, прилѣ́жно Ти́ вопіе́мъ: вся́ упоко́й со святы́ми Твои́ми.

Отъ вся́каго, я́же прія́лъ еси́, ро́да и ро́да въ царѣ́хъ, въ князѣ́хъ, или́ мона́шествующихъ правосла́вно, Ще́дре, вѣ́чнаго изба́ви муче́нія.

Всѣ́хъ, я́же созда́лъ еси́ поле́зная вѣ́дый, и́мже попусти́лъ еси́, Го́споди, внеза́пными паде́жами ненаде́жно умре́ти, изба́ви му́ки вся́кія, Бо́же на́шъ.

Огня́ приснопаля́щаго, и отъ тмы́ несвѣти́мыя, скре́жета зубна́го, и че́рвія безконе́чно му́чащаго, и вся́каго муче́нія изба́ви, Спа́се на́шъ, вся́ вѣ́рно уме́ршія.

[Ο] Сла́ва, тро́иченъ: Единопресто́льная, Безнача́льная, Тріѵпоста́сная Еди́нице, раздѣле́ніемъ Еди́нство, и вопроти́въ Ли́цы Естество́ иму́щая, во еди́но на́съ совокупи́ хотѣ́ніе Твои́хъ за́повѣдей.

[Υ] И ны́нѣ, богоро́диченъ: Па́че огнезра́чныхъ серафи́мовъ яви́лася еси́, Чи́стая, честнѣ́йшая, поро́ждши си́мъ непристу́пнаго Іису́са Спа́са, воплоще́ніемъ обожи́вшаго земноро́дныхъ смѣше́ніе.

[Катава́сія: Утренюетъ ду́хъ мо́й къ Тебѣ́, Бо́же...]

Пѣ́снь 6.

Ирмо́съ: Содержи́ма мя́, пріими́, Человѣколю́бче, грѣхи́ мно́гими и припа́дающа щедро́тамъ Твои́мъ, я́ко проро́ка, Го́споди, и спаси́ мя.

Сме́рти разрѣши́въ болѣ́зни, пострада́въ, Нача́льниче жи́зни, Бо́же на́шъ, усо́пшія отъ вѣ́ка рабы́ Твоя́ упоко́й.

Неизглаго́ланными Твои́ми судьба́ми, я́же уби́ша чаро́вная напое́нія, отра́вы, ко́стная удавле́нія, со святы́ми, Го́споди, упоко́й.

Егда́ суди́ти бу́деши вся́ческимъ, стоя́щимъ наги́мъ и открове́нымъ предъ лице́мъ Твои́мъ, тогда́, Ще́дре, пощади́ послужи́вшія Ти́ вѣ́рно, Бо́же.

Послѣ́днею у́бо трубо́ю воструби́вшу Твоему́ арха́нгелу, въ воскресе́нія жи́зни всѣ́хъ, тогда́, Христе́, рабы́ Твоя́ упоко́й.

Отъ вѣ́ка я́же прія́лъ еси́ вѣ́рныя, Бо́же, ро́дъ вся́кій человѣ́ческій, сподо́би во вѣ́ки со служа́щими Ти́, сла́вити Тя́.

[Θ] Сла́ва, тро́иченъ: Богонача́ліе Трисвято́е, Единопресто́льное, Отче, Сы́не со Святы́мъ Ду́хомъ, Ты́ еси́ Бо́гъ мо́й, вседержи́тельствомъ Твои́мъ содержа́й все́.

[Ε] И ны́нѣ, богоро́диченъ: Отъ ко́рене твоего́ возсія́ Цвѣ́тъ жи́зни, Іессе́е пра́отче, взыгра́й, спаса́яй міръ — отъ Чи́стыя Отрокови́цы Христо́съ Богъ.

[Катава́сія: Содержи́ма мя́, пріими́, Человѣколю́бче...]

Конда́къ, гла́съ 8:

Со святы́ми упоко́й, Христе́, ду́ши ра́бъ Твои́хъ, идѣ́же нѣ́сть болѣ́знь, ни печа́ль, ни воздыха́ніе, но жи́знь безконе́чная.

Икосъ:

Са́мъ Еди́нъ еси́ Безсме́ртный, сотвори́вый и созда́вый человѣ́ка: земнíи у́бо отъ земли́ созда́хомся и въ зе́млю ту́южде по́йдемъ, я́коже повелѣ́лъ еси́, созда́вый мя́, и рекíй ми́: я́ко земля́ еси́ и въ зе́млю оты́деши, а́може вси́ человѣ́цы по́йдемъ, надгро́бное рыда́ніе творя́ще пѣ́снь: Аллилу́ія.

Пѣ́снь 7.

Ирмо́съ: Въ нача́лѣ зе́млю основа́вый и небеса́ сло́вомъ утверди́вый, благослове́нъ еси́ во вѣ́ки, Го́споди, Бо́же оте́цъ на́шихъ.

Благоче́стно отъ вѣ́ка преста́вльшихся па́мять творя́ще, вопіе́мъ: благослове́нъ еси́ во вѣ́ки, Го́споди, Бо́же оте́цъ на́шихъ.

Внеза́пу благоче́стно уме́ршія, и отъ стремни́ны вся́кія па́дшія, дре́ва, желѣ́за, вся́каго ка́мене, упоко́й, Бо́же, усо́пшія вѣ́рныя.

Въ стра́шное Твое́ прише́ствіе, Ще́дре, одесну́ю ове́цъ Твои́хъ поста́ви, правосла́вно Ти́ въ жи́зни послужи́вшія, Христе́, и преста́вльшіяся къ Тебѣ́.

Въ ли́цѣ, Христе́, избра́нныхъ Твои́хъ вчини́ Твоя́ рабы́, вопи́ти Тебѣ́: благослове́нъ еси́ во вѣ́ки, Го́споди, Бо́же оте́цъ на́шихъ.

Отъ земли́ пе́рсть содѣ́тельствовавый, пло́ть Ду́хомъ оживотвори́вый, Спа́се Ще́дрый, я́же прія́лъ еси́, упоко́й, Бо́же, въ нестарѣ́ющемъ животѣ́.

[Ο] Сла́ва, тро́иченъ: Якоже треми́ со́лнцы Божество́, еди́нымъ свѣ́та срастворе́ніемъ, да воспое́тся Оте́цъ и Сынъ и Боже́ственный Ду́хъ, Еди́нъ естество́мъ, но Три́ ѵпоста́сьми.

[Δ] И ны́нѣ, богоро́диченъ: Дави́дское согла́сно воспѣва́емъ Ти́ пѣ́ніе, го́ру Тя́ Бо́жію нарица́юще, Дѣ́во, въ не́йже всели́вся пло́тію Сло́во, обоготвори́ на́съ духо́вно въ Себѣ́.

[Катава́сія: Въ нача́лѣ зе́млю основа́вый...]

Пѣ́снь 8.

Ирмо́съ: На горѣ́ святѣ́й просла́вльшася и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Сокруши́вый пе́рвѣе сѣ́нь сме́ртную, возсія́въ, я́ко со́лнце, изъ гро́ба, сы́ны Воскресе́нія Твоего́ сотвори́, Го́споди сла́вы, вся́ уме́ршія въ вѣ́рѣ, во вѣ́ки.

Безвѣ́стныхъ и сокрове́нныхъ Свѣ́дѣтелю, егда́ и́маши откры́ти дѣла́ тмы́ и совѣ́ты серде́цъ на́шихъ, тогда́ не истяжи́ сло́ва со всѣ́ми вѣ́рою усо́пшими.

Егда́ и́маши сѣ́сти на престо́лѣ, и повели́ши на су́дъ предста́ти, собра́ннымъ трубо́ю отъ коне́цъ земли́, тогда́ пощади́ всѣ́хъ, Христе́, я́ко Ми́лостивый.

Уме́ршимъ напра́сно отъ слу́чаевъ, отъ кли́ча же зѣ́льнаго и ско́раго тече́нія, зауше́нія, удавле́нія же, и ляга́нія, Го́споди сла́вы, вѣ́рою усо́пшимъ осла́би во вѣ́ки.

Благослови́мъ Отца́ и Сы́на и Свята́го Ду́ха, Го́спода.

[Ω] Яко Еди́ницу Существо́мъ пою́ Тя, я́ко Тро́ицу Ли́цы Тя́ чту́: Отче, и Сы́не, и Ду́ше Пресвяты́й, безнача́льную держа́ву Твоего́ Ца́рствія сла́влю во вѣ́ки.

[Ρ] И ны́нѣ, богоро́диченъ: Струи́ живы́я Исто́чникъ запеча́танный показа́лася еси́, Богоро́дице Дѣ́во: безъ му́жа бо Го́спода ро́ждши, безсме́ртія вѣ́рныя напая́еши водо́ю во вѣ́ки.

Хва́лимъ, благослови́мъ, [покланя́емся Го́сподеви, пою́ще и превознося́ще во вся́ вѣ́ки].
Ирмо́съ: На горѣ́ святѣ́й просла́вльшася.

Пѣ́снь 9.

Ирмо́съ: Проявле́нное на горѣ́ законополо́жнику во огни́ и купинѣ́ Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ.

Идѣ́же е́сть веселя́щихся жили́ще святы́хъ Твои́хъ, Го́споди, вся́ отъ вѣ́ка усо́пшія, въ вѣ́рѣ же и наде́жди ра́доватися сподо́би.

Уме́ршія Бо́жіимъ преще́ніемъ, сме́ртныхъ громо́въ вся́кихъ съ небесе́ изнесе́нныхъ, земли́ разсѣ́дшейся, мо́рю возшумѣ́вшуся, вся́ вѣ́рныя, Христе́, упоко́й.

Вся́кій во́зрастъ, ста́рцы и ю́ныя, младе́нцы и дѣ́ти, и ссу́щія млеко́, му́жеское естество́ и же́нское, упоко́й, Бо́же, я́же прія́лъ еси́ вѣ́рныя.

Отъ ядови́тыхъ угрызе́ній уме́ршія, отъ поглоще́нія зміе́въ, отъ попра́нія ко́ней, и отъ удавле́нія, и обѣ́шенія отъ и́скренняго, вѣ́рою Ти́ послужи́вшія упоко́й.

Коего́ждо по и́мени въ вѣ́рѣ уме́ршія, отъ вѣ́ка и отъ ро́да родо́въ, неосужде́нно предста́ти Тебѣ́, Христѣ́, тогда́ въ прише́ствіи Твое́мъ сподо́би.

[Ο] Сла́ва, тро́иченъ: Еди́ный въ Тро́ицѣ, Бо́же, сла́ва Тебѣ́ непреста́нно: а́ще бо и Бо́гъ кíйждо, но Еди́нъ естество́мъ е́сть, Оте́цъ и Сы́нъ и Ду́хъ, трисвѣ́тлыми сво́йствы.

[Υ] И ны́нѣ, богоро́диченъ: Па́че ума́ Рождество́ Твое́: ражда́еши бо пре́жде Су́щаго, и млеко́мъ пита́еши несказа́нно Пищеда́вца мíру, держи́ши же Содержа́щаго вся́, Христа́ Еди́наго Изба́вителя на́шего, Всенепоро́чная.

[Катава́сія: Проявле́нное на горѣ́...] Досто́йно е́сть...

Ексапостила́рій. Подо́бенъ: Не́бо звѣзда́ми.

Па́мять соверша́юще всѣ́хъ усо́пшихъ во Христѣ́, и коне́чный де́нь воспомя́немъ, вѣ́рніи, о на́съ же и о о́ныхъ Христа́ при́сно моля́ще.

Сла́ва, и ны́нѣ, богоро́диченъ:

Сла́досте а́нгеловъ, скорбя́щихъ Ра́досте, христіа́нъ Предста́тельнице, Дѣ́во Ма́ти Госпо́дня, заступи́ на́съ и изба́ви вѣ́чныхъ му́къ.

На хвали́техъ: Вся́кое дыха́ніе... поста́вимъ стихи́ 4 и пое́мъ настоя́щіе стихи́ры во гла́съ 6. Подо́бенъ: Отча́янная.

Стра́шный коне́цъ сме́рти и гро́зный су́дъ Влады́ки: о́гнь бо неугаси́мый угото́вися та́мо, че́рвь неусыпа́емый му́чай и скре́жетъ зубо́въ, тма́ кромѣ́шная е́сть и вѣ́чное осужде́ніе. Тѣ́мже зове́мъ ко Спа́су: я́же избра́лъ еси́ отъ привре́менныхъ, упоко́й за ве́лію Твою́ ми́лость.

Вси́ въ житіи́ оста́вльшіися, пріиди́те, во гробѣ́хъ ужаса́ющеся, прини́кните и ви́дите мíра пре́лесть: гдѣ́ ны́нѣ тѣ́ла добро́та и сла́ва бога́тства? гдѣ́ же го́рдость житія́? Вои́стинну — су́етная вся́! Тѣ́мже зове́мъ ко Спа́су: я́же избра́лъ еси́ отъ привре́менныхъ, упоко́й за ве́лію Твою́ ми́лость.

Ны́нѣ во гро́бъ и́же на престо́лѣ, ны́нѣ и́же въ порфи́рѣ во тлю́ облече́ся: не ктому́ бо на престо́лѣ, но во гро́бѣ лежи́тъ. Се́ исчезе́ ца́рская держа́ва, се́, я́ко со́ніе, человѣ́ческое прехо́дитъ житіе́. Тѣ́мже зове́мъ ко Спа́су: я́же избра́лъ еси́, упоко́й за ве́лію Твою́ ми́лость.

Вся́ отсе́лѣ преложи́вшіяся въ наде́жду жи́зни вѣ́чныя и житіе́ измѣни́вшія вся́кимъ, Спа́се, о́бразомъ, вся́кій чи́нъ, и ро́дъ, и вся́кій во́зрастъ, му́жи вку́пѣ и жены́, и новорожде́нные младе́нцы, я́ко Человѣколю́бецъ въ нѣ́дрѣхъ учини́ Авраа́млихъ и въ мѣ́стѣхъ осла́бы за ве́лію Твою́ ми́лость.

Сла́ва, гла́съ 2:

Яко цвѣ́тъ, увяда́етъ и, я́ко сѣ́нь, ми́мо гряде́тъ, разруша́ется вся́къ человѣ́къ. Па́ки же глася́щей трубѣ́, ме́ртвіи, я́ко въ тру́сѣ, вси́ воста́нутъ ко Твоему́ срѣ́тенію, Христе́ Бо́же. Тогда́, Влады́ко, и́хже преста́вилъ еси́ отъ на́съ, во святы́хъ Твои́хъ учини́ кро́вѣхъ, согрѣше́нія и́хъ, Благосе́рде, презира́я.

И ны́нѣ, гла́съ 6, богоро́диченъ:

Ты́ еси́ Бо́гъ на́шъ, Иже прему́дростію содѣ́лавый вся́, Иже и проро́ки посла́вый на́мъ проро́чествовати Твое́ прише́ствіе, и апо́столы проповѣ́дати Твоя́ вели́чія. И о́ви у́бо проро́чествоваху прише́ствіе Твое́, о́ви же креще́ніемъ просвѣти́ша язы́ки. Му́ченицы же, пострада́вше, получи́ша сла́ву отъ си́хъ, и мо́лятся прилѣ́жно Тебѣ́, Влады́це, съ ро́ждшею Тя́ Ма́терію: упоко́й, Бо́же, ду́ши, я́же прія́лъ еси́, и на́съ сподо́би Ца́рствія Твоего́, Кре́стъ претерпѣ́вый мене́ ра́ди осужде́ннаго, Изба́вителю мо́й и Бо́же.

На стихо́внѣ стихи́ры, гла́съ 6. Подо́бенъ: Все́ отло́жше.

Имѣ́яй непости́жное къ на́мъ благоутро́біе и исто́чникъ неистоща́емый Боже́ственныя бла́гости, Многоми́лостиве, къ Тебѣ́, Влады́ко, преше́дшія въ земли́ живы́хъ всели́, въ селе́ніихъ возлю́бленныхъ и вожделѣ́нныхъ одержа́ніе да́руяй, вы́ну пребыва́ющее: Ты́ бо за всѣ́хъ пролія́лъ еси́ кро́вь Твою́, Христе́, и живоно́сною цѣно́ю мíръ искупи́лъ еси́.

Сти́хъ: Ду́ши и́хъ во благи́хъ водворя́тся.

Умерщвле́ніе претерпѣ́лъ еси́ животво́рное во́лею, и жи́знь источи́лъ еси́, и сла́дость присносу́щную вѣ́рнымъ да́лъ еси́ Боже́ственнымъ, Влады́ко, благоутро́біемъ, еди́не Всеще́дре, Безгрѣ́шне: въ ню́же, мо́лимся, счини́ усо́пшія въ наде́жди воскресе́нія, разрѣше́ніе прегрѣше́ній да́руяй, да всѣ́ми пое́тся и́мя Твое́, Христе́, и спасе́ни сла́вимъ человѣколю́біе Твое́.

Сти́хъ: Блаже́ни, я́же избра́лъ и прія́лъ еси́, Го́споди.

Живы́ми госпо́дьствующа богонача́льною вла́стію и ме́ртвыми влады́чествующа, Тебе́, Христе́, вѣ́дуще мо́лимъ: вѣ́рныя рабы́ Твоя́, къ Тебѣ́, еди́ному Благодѣ́телю, отше́дшія, Са́мъ упоко́й со избра́нными Твои́ми, Человѣколю́бче, въ мѣ́стѣхъ прохлажде́нія, во святы́хъ свѣ́тлостехъ: Воли́тель бо ми́лости еси́, и спаса́еши, я́ко Бо́гъ, я́же по о́бразу Твоему́ созда́лъ еси́, еди́не Многоми́лостиве.

Сла́ва, гла́съ то́йже:

Болѣ́знь Ада́му бы́сть дре́ва вкуше́ніемъ дре́вле во Еде́мѣ, егда́ змíй я́дъ изблева́: того́ бо ра́ди вни́де сме́рть всеро́дная, снѣда́ющая человѣ́ка. Но прише́дъ, Влады́ка низложи́ змíя и воскресе́ніе на́мъ дарова́. Къ Нему́же у́бо возопіи́мъ: пощади́, Спа́се, и́хже прія́лъ еси́, и со святы́ми поко́й, я́ко Человѣколю́бецъ.

И ны́нѣ, богоро́диченъ:

Яви́лася еси́ пребыва́ніе боголѣ́пное, Пресвята́я, и Бо́га вмѣсти́ла еси́, и Бо́га родила́ еси́, Неискусобра́чная, во двою́ существу́, во еди́ной же ѵпоста́си, Чи́стая. Того́ моли́ Единоро́днаго и Перворожде́ннаго, Тя́, Дѣ́во, непоро́чну и по рождествѣ́ сохра́ньшаго, ду́ши упоко́ити вѣ́рою усо́пшія во свѣ́тѣ нетлѣ́нныя свѣ́тлости и блаже́нствѣ.

Тропа́рь: Глубино́ю му́дрости... Сла́ва, и ны́нѣ: Тебе́ и стѣ́ну и приста́нище... И обы́чный отпу́стъ.




НА ЛИТУРГІИ,

Изобрази́тельная [и отъ кано́на тріо́ди, пѣ́снь 3-я и 6-я, на 8.]. Проки́менъ Апо́стола, гла́съ 6: Ду́ши и́хъ* во благи́хъ водворя́тся. [Сти́хъ: Къ Тебѣ́, Го́споди, воздвиго́хъ ду́шу мою́, Бо́же мо́й]. Апо́столъ въ Дѣя́ніихъ, зача́ло 51. И ме́ртвенный апо́столъ, [къ Кори́нѳяномъ], зача́ло 163: Бра́тіе, пе́рвый человѣ́къ... Аллилу́ія, гла́съ 4. Сти́хъ: Блаже́ни, я́же избра́лъ [и прія́лъ еси́, Го́споди. Сти́хъ: И па́мять и́хъ въ ро́дъ и ро́дъ]. Ева́нгеліе отъ Іоа́нна, зача́ло 67. И друго́е, за упоко́й, [отъ Іоа́нна], зача́ло 21. Прича́стный: Блаже́ни, я́же избра́лъ, и прія́лъ еси́, Го́споди, и па́мять и́хъ въ ро́дъ и ро́дъ. Аллилу́ія, три́жды.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 176 об. – 187.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.