Церковный календарь
Новости


2017-11-20 / russportal
Архіеп. Аверкій (Таушевъ). Будемъ ли мы, наконецъ, каяться? (1975)
2017-11-20 / russportal
Архіеп. Аверкій (Таушевъ). Готовимся ли мы къ Великому посту? (1975)
2017-11-20 / russportal
Генералъ П. Н. Красновъ. Мысли о конницѣ (1933)
2017-11-20 / russportal
Генералъ П. Н. Красновъ. Сибирскіе казаки (1934)
2017-11-20 / russportal
"Пропов. хрестоматія". Поученіе (2-е) на соборъ св. Архистратига Михаила (1965)
2017-11-20 / russportal
"Пропов. хрестоматія". Поученіе (1-е) на соборъ св. Архистратига Михаила (1965)
2017-11-18 / russportal
Ген. П. Н. Красновъ. "Старая Академія". Глава 8-я (1932)
2017-11-18 / russportal
Ген. П. Н. Красновъ. "Старая Академія". Глава 7-я (1932)
2017-11-18 / russportal
Л. Д. Перепелкина. Юліанскій календарь - 1000-лѣтняя икона времени на Руси (1989)
2017-11-18 / russportal
Проф. П. В. Верховской. Патріархъ Тихонъ (1919)
2017-11-17 / russportal
Ген. П. Н. Красновъ. "Старая Академія". Глава 6-я (1932)
2017-11-17 / russportal
Ген. П. Н. Красновъ. "Старая Академія". Глава 5-я (1932)
2017-11-17 / russportal
Ген. П. Н. Красновъ. №100 (Къ юбилею "Часового") (1933)
2017-11-17 / russportal
Генералъ П. Н. Красновъ. Подъ какимъ лозунгомъ? (1933)
2017-11-17 / russportal
Слова преп. Симеона Новаго Богослова. Слово 36-е (1882)
2017-11-17 / russportal
Слова преп. Симеона Новаго Богослова. Слово 35-е (1882)
Новости въ видѣ
RSS-канала: .
Сегодня - вторникъ, 21 ноября 2017 г. Сейчасъ на порталѣ посѣтителей - 37.
Церковно-богослужебныя книги

ПЕНТИКОСТАРІОНЪ, ЕЖЕ ЕСТЬ ПЯТДЕСЯТНИЦА [ТРІОДЬ ЦВѢТНАЯ].
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ НЕДѢЛЮ СВЯТОЙ ПЯТИДЕСЯТНИЦЫ.
(СОШЕСТВІЕ СВЯТАГО ДУХА НА АПОСТОЛОВЪ. ДЕНЬ СВЯТОЙ ТРОИЦЫ.)

Недѣ́ля Святы́я Пентико́стіи.

ВЪ СУББОТУ ВЕЧЕРА, НА МАЛѢЙ ВЕЧЕРНИ,
На Го́споди воззва́хъ... поста́вимъ стихи́ 4 и пое́мъ стихи́ры, гла́съ 1:

Пятдеся́тницу пра́зднуимъ, и Ду́ха прише́ствіе, и предложе́ніе обѣща́нія, и наде́жды исполне́ніе, и та́инство ели́ко, я́ко вели́ко же и че́стно. Тѣ́мже вопіе́мъ Ти́: Содѣ́телю всѣ́хъ Го́споди, сла́ва Тебѣ́! [Два́жды.]

Язы́ками иноро́дныхъ обнови́лъ еси́, Христе́, Твоя́ ученики́, да тѣ́ми Тя́ проповѣ́дятъ безсме́ртнаго Сло́ва и Бо́га, подаю́щаго душа́мъ на́шимъ ве́лію ми́лость.

Вся́ подае́тъ Ду́хъ Святы́й: то́читъ проро́чествія, свяще́нники соверша́етъ, некни́жныя му́дрости научи́, ры́бари богосло́вцы показа́, ве́сь собира́етъ собо́ръ церко́вный. Единосу́щне и Сопресто́льне Отцу́ и Сы́ну, Утѣ́шителю, сла́ва Тебѣ́!

Сла́ва, и ны́нѣ, гла́съ 8:

Егда́ Ду́ха Твоего́ посла́лъ еси́, Го́споди, сѣдя́щимъ апо́столомъ, тогда́ евре́йскія дѣ́ти, зря́ще, ужаса́хуся у́жасомъ: слы́шаху бо я́, вѣща́юща ины́ми стра́нными язы́ки, я́коже Духъ подава́ше и́мъ. Невѣ́жди бо су́ще, умудри́шася, и язы́ки въ вѣ́ру улови́вше, боже́ственная вѣтíйствоваху. Тѣ́мже и мы́ вопіе́мъ Ти́: Иже на земли́ явле́йся и отъ пре́лести спасы́й на́съ, Го́споди, сла́ва Тебѣ́!

На стихо́внѣ самогла́сны, гла́съ 2:

Ви́дѣхомъ Свѣ́тъ Истинный, прія́хомъ Ду́ха Небе́снаго, обрѣто́хомъ вѣ́ру и́стинную, Нераздѣ́льней Тро́ицѣ покланя́емся: Та́ бо на́съ спасла́ е́сть.

Сти́хъ: Се́рдце чи́сто сози́жди во мнѣ́, Бо́же, [и Ду́хъ пра́въ обнови́ во утро́бѣ мое́й].

Во проро́цѣхъ возвѣсти́лъ еси́ на́мъ пу́ть спасе́нія, и во апо́столѣхъ возсія́, Спа́се на́шъ, благода́ть Ду́ха Твоего́: Ты́ еси́ Бо́гъ пе́рвый, Ты́ и по си́хъ, и во вѣ́ки Ты́ еси́ Бо́гъ на́шъ.

Сти́хъ: Не отве́ржи мене́ отъ лица́ Твоего́ [и Ду́ха Твоего́ Свята́го не оты́ми отъ мене́].

Во дво́рѣхъ Твои́хъ воспою́ Тя́, Спа́са мíра, и прекло́нь колѣ́на, поклоню́ся Твое́й непобѣди́мѣй си́лѣ, ве́черъ, и у́тро, и полу́дне, и на вся́кое вре́мя благословлю́ Тя́, Го́споди.

Сла́ва, и ны́нѣ, гла́съ то́йже:

Тро́ицу Единосу́щную пѣсносло́вимъ, Отца́ и Сы́на со Святы́мъ Ду́хомъ: та́ко бо проповѣ́даша вси́ проро́цы и апо́столи съ му́ченики.

Ны́не отпуща́еши... Трисвято́е. Пресвята́я Тро́ице... Отче на́шъ... Яко Твое́ е́сть Ца́рство... Отпусти́тельный тропа́рь, гла́съ 8: Благослове́нъ еси́, Христе́ Бо́же на́шъ... И про́чее обы́чно. И отпу́стъ.



НА ВЕЛИЦѢЙ ВЕЧЕРНИ,
Обы́чное стихосло́віе. На Го́споди воззва́хъ... поста́вимъ стихо́въ 10 и пое́мъ стихи́ры самогла́сны 3 пе́рвыя, повторя́юще пе́рвую. Та́же 5, втора́го гла́са, повторя́юще пе́рвую. Гла́съ 1:

Пятдеся́тницу пра́зднуимъ, и Ду́ха прише́ствіе, и предложе́ніе обѣща́нія, и наде́жды исполне́ніе, и та́инство ели́ко, я́ко вели́ко же и че́стно. Тѣ́мже вопіе́мъ Ти́: Содѣ́телю всѣ́хъ Го́споди, сла́ва Тебѣ́! [Два́жды.]

Язы́ками иноро́дныхъ обнови́лъ еси́, Христе́, Твоя́ ученики́, да тѣ́ми Тя́ проповѣ́дятъ безсме́ртнаго Сло́ва и Бо́га, подаю́щаго душа́мъ на́шимъ ве́лію ми́лость.

Вся́ подае́тъ Ду́хъ Святы́й: то́читъ проро́чествія, свяще́нники соверша́етъ, некни́жныя му́дрости научи́, ры́бари богосло́вцы показа́, ве́сь собира́етъ собо́ръ церко́вный. Единосу́щне и Сопресто́льне Отцу́ и Сы́ну, Утѣ́шителю, сла́ва Тебѣ́!

Гла́съ 2:

Ви́дѣхомъ Свѣ́тъ Истинный, прія́хомъ Ду́ха Небе́снаго, обрѣто́хомъ вѣ́ру и́стинную, Нераздѣ́льней Тро́ицѣ покланя́емся: Та́ бо на́съ спасла́ е́сть. [Два́жды.]

Во проро́цѣхъ возвѣсти́лъ еси́ на́мъ пу́ть спасе́нія, и во апо́столѣхъ возсія́, Спа́се на́шъ, благода́ть Ду́ха Твоего́: Ты́ еси́ Бо́гъ пе́рвый, Ты́ и по си́хъ, и во вѣ́ки Ты́ еси́ Бо́гъ на́шъ.

Во дво́рѣхъ Твои́хъ воспою́ Тя́, Спа́са мíра, и прекло́нь колѣ́на, поклоню́ся Твое́й непобѣди́мѣй си́лѣ, ве́черъ, и у́тро, и полу́дне, и на вся́кое вре́мя благословлю́ Тя́, Го́споди.

Во дво́рѣхъ Твои́хъ, Го́споди, вѣ́рніи, колѣ́на ду́шъ и тѣле́съ прекло́нше, воспѣва́емъ Тя́, Безнача́льнаго Отца́, и Собезнача́льнаго Сы́на, и Соприсносу́щнаго и Пресвята́го Ду́ха, просвѣща́ющаго и освяща́ющаго ду́ши на́ша.

Тро́ицу Единосу́щную пѣсносло́вимъ, Отца́ и Сы́на со Святы́мъ Ду́хомъ: та́ко бо проповѣ́даша вси́ проро́цы и апо́столи съ му́ченики.

Сла́ва, и ны́нѣ, гла́съ 8. Творе́ніе Льва́ влады́ки.

Пріиди́те, лю́діе, Тріѵпоста́сному Божеству́ поклони́мся, Сы́ну во Отцѣ́ со Святы́мъ Ду́хомъ: Оте́цъ бо безлѣ́тно роди́ Сы́на Соприсносу́щна и Сопресто́льна, и Ду́хъ Святы́й бѣ́ во Отцѣ́ съ Сы́номъ прославля́емь — Еди́на Си́ла, Еди́но Существо́, Еди́но Божество́. Ему́же покланя́ющеся, вси́ глаго́лемъ: Святы́й Бо́же, вся́ содѣ́явый Сы́номъ содѣ́йствомъ Свята́го Ду́ха; Святы́й Крѣ́пкій, Имже Отца́ позна́хомъ и Ду́хъ Святы́й пріи́де въ мíръ; Святы́й Безсме́ртный, Утѣ́шительный Ду́ше, отъ Отца́ исходя́й и въ Сы́не почива́яй: Тро́ице Свята́я, сла́ва Тебѣ́!

Вхо́дъ. Свѣ́те Ти́хій... Проки́менъ дне́ и чте́нія:

Чи́слъ чте́ніе. [Глава́ 11.]

Рече́ Госпо́дь Моисе́ю: собери́ Ми́ се́дмьдесятъ муже́й отъ ста́рецъ Изра́илевыхъ, и́хже ты́ са́мъ вѣ́си, я́ко сíи су́ть ста́рцы люде́й и кни́жники и́хъ, и приведе́ши и́хъ въ сѣ́нь свидѣ́нія, и ста́нутъ ту́ съ тобо́ю. И сни́ду, и возглаго́лю та́мо съ тобо́ю, и отыму́ отъ Ду́ха, су́щаго въ тебѣ́, и возложу́ на ни́хъ, и посо́бствуютъ съ тобо́ю стремле́нія люде́й, и не пово́диши и́хъ ты́ еди́нъ. И собра́ Моисе́й се́дмьдесятъ муже́й отъ ста́рецъ люде́й и поста́ви и́хъ о́крестъ сѣ́ни. И сни́де Госпо́дь во о́блацѣ, и глаго́ла Моисе́ю, и взя́тъ отъ Ду́ха, Иже въ не́мъ, и положи́ на седми́десяти муже́й ста́рецъ. А я́коже почи́ Ду́хъ на ни́хъ, и прореко́ша въ стану́, и ктому́ не приложи́ша. И оста́ша два́ му́жа въ стану́, и́мя еди́ному Елда́дъ, и и́мя второ́му Мода́дъ, и почи́ на ни́хъ Ду́хъ; и сíи бѣ́ша отъ напи́санныхъ, и не пріидо́ша въ сѣ́нь, и проро́чествоваста въ стану́. И прите́къ ю́ноша, возвѣсти́ Моисе́ю и рече́ ему́, глаго́ля: Елда́дъ и Мода́дъ проро́чествуета въ стану́. И отвѣща́въ Іису́съ, сы́нъ Нави́нъ, предстоя́й Моисе́ю, избра́нный его́, рече́: го́споди Моисе́е, возбрани́ и́ма! И рече́ ему́ Моисе́й: не ревну́еши ли ты́ мнѣ́? И кто́ да́стъ всѣ́мъ лю́демъ Госпо́днимъ бы́ти проро́ки, егда́ да́стъ Госпо́дь Ду́ха Своего́ на ни́хъ?

Проро́чества Іо́илева чте́ніе. [Глава́ 2.]

Та́ко глаго́летъ Госпо́дь: ча́да Сіо́нова, ра́дуйтеся и весели́теся о Го́сподѣ Бо́зѣ ва́шемъ, я́ко даде́ ва́мъ бра́шна въ пра́вду, и одожди́тъ ва́мъ до́ждь ра́нній и по́здный, я́коже пре́жде. И напо́лнятся гу́мна пшени́цы и излію́тся точи́лія вина́ и еле́я. И вда́мъ ва́мъ вмѣ́сто лѣ́тъ, и́хже поядо́ша пру́зи, и гу́сеницы, и ржа, и хру́стове, си́ла Моя́ вели́кая, ю́же посла́хъ на вы́. И снѣ́сте яду́ще и насытите́ся, и похва́лите и́мя Го́спода Бо́га ва́шего, Иже сотвори́ свы́ше чудеса́, и не постыдя́тся лю́діе Мои́ въ вѣ́къ. И разумѣ́ете, я́ко посредѣ́ Изра́иля Азъ е́смь и Азъ — Госпо́дь Бо́гъ ва́шъ, и нѣ́сть ино́го ра́звѣ Мене́, и не постыдя́тся ктому́ лю́діе Мои́ въ вѣ́къ. И бу́детъ по си́хъ: излію́ отъ Ду́ха Моего́ на вся́кую пло́ть, и прореку́тъ сы́нове ва́ши и дще́ри ва́ша, и ста́рцы ва́ши со́нія ви́дятъ, и ю́ноши ва́ши видѣ́нія у́зрятъ. Ибо на рабы́ Моя́ и на рабы́ни Моя́ во дни́ о́ны излію́ отъ Ду́ха Моего́, и прореку́тъ. И да́мъ чудеса́ на небеси́ горѣ́ и зна́менія на земли́ ни́зу: кро́вь, и о́гнь, и куре́ніе ды́ма. Со́лнце преложи́тся во тму́ и луна́ въ кровь, пре́жде прише́ствія дне́ Госпо́дня вели́каго и стра́шнаго. И бу́детъ: вся́къ, и́же а́ще призове́тъ и́мя Госпо́дне, спасе́тся.

Проро́чества Іезекíилева чте́ніе. [Глава́ 36.]

Та́ко глаго́летъ Госпо́дь: пріиму́ ва́съ отъ язы́къ, и соберу́ вы́ отъ всѣ́хъ язы́къ стра́нныхъ, и введу́ вы́ въ зе́млю ва́шу. И окроплю́ на вы́ чи́стую во́ду, и очи́ститеся отъ всѣ́хъ нечисто́тъ ва́шихъ, и отъ всѣ́хъ и́долъ ва́шихъ, и очи́щу вы́. И да́мъ ва́мъ се́рдце но́вое, и ду́хъ но́вый да́мъ ва́мъ, и отыму́ се́рдце ка́менное отъ пло́ти ва́шея, и да́мъ ва́мъ се́рдце пло́тяное, и Ду́хъ Мо́й да́мъ въ ва́съ. И сотворю́, да во оправда́ніихъ Мои́хъ хо́дите, и судьбы́ Моя́ сохраните́ и сотворите́. И всели́теся въ зе́млю, ю́же да́хъ отце́мъ ва́шимъ, и бу́дете Ми́ въ лю́ди, и Азъ бу́ду ва́мъ въ Бо́га.

На литíи стихи́ры самогла́сны 3, втора́го гла́са:

Во проро́цѣхъ возвѣсти́лъ еси́ на́мъ пу́ть спасе́нія, и во апо́столѣхъ возсія́, Спа́се на́шъ, благода́ть Ду́ха Твоего́: Ты́ еси́ Бо́гъ пе́рвый, Ты́ и по си́хъ, и во вѣ́ки Ты́ еси́ Бо́гъ на́шъ.

Во дво́рѣхъ Твои́хъ воспою́ Тя́, Спа́са мíра, и прекло́нь колѣ́на, поклоню́ся Твое́й непобѣди́мѣй си́лѣ, ве́черъ, и у́тро, и полу́дне, и на вся́кое вре́мя благословлю́ Тя́, Го́споди.

Во дво́рѣхъ Твои́хъ, Го́споди, вѣ́рніи, колѣ́на ду́шъ и тѣле́съ прекло́нше, воспѣва́емъ Тя́, Безнача́льнаго Отца́, и Собезнача́льнаго Сы́на, и Соприсносу́щнаго и Пресвята́го Ду́ха, просвѣща́ющаго и освяща́ющаго ду́ши на́ша.

Сла́ва, и ны́нѣ, гла́съ 8:

Егда́ Ду́ха Твоего́ посла́лъ еси́, Го́споди, сѣдя́щимъ апо́столомъ, тогда́ евре́йскія дѣ́ти, зря́ще, ужаса́хуся у́жасомъ: слы́шаху бо я́, вѣща́юща ины́ми стра́нными язы́ки, я́коже Духъ подава́ше и́мъ. Невѣ́жди бо су́ще, умудри́шася, и язы́ки въ вѣ́ру улови́вше, боже́ственная вѣтíйствоваху. Тѣ́мже и мы́ вопіе́мъ Ти́: Иже на земли́ явле́йся и отъ пре́лести спасы́й на́съ, Го́споди, сла́ва Тебѣ́!

На стихо́внѣ стихи́ры самогла́сны, гла́съ 6:

Не разумѣ́юще язы́цы, Го́споди, Пресвята́го Ду́ха на апо́столы Твоя́ бы́вшія си́лы, измѣне́ніе язы́къ пія́нство бы́ти мня́ху. Мы́ же, утверди́вшеся отъ ни́хъ, непреста́нно си́це глаго́лемъ: Ду́ха Твоего́ Свята́го не отыми́ отъ на́съ, мо́лимтися, Человѣколю́бче.

Сти́хъ: Се́рдце чи́сто сози́жди во мнѣ́, Бо́же, [и Ду́хъ пра́въ обнови́ во утро́бѣ мое́й].

Го́споди, Свята́го Ду́ха наше́ствіе, апо́столы Твоя́ испо́лнившее, ины́ми язы́ки глаго́лати устро́и. Тѣ́мже пресла́вное, невѣ́рнымъ у́бо пія́нство мня́шеся, вѣ́рнымъ же — хода́тайственно спасе́нія; Его́же сія́нія и на́съ сподо́би, мо́лимтися, Человѣколю́бче.

Сти́хъ: Не отве́ржи мене́ отъ лица́ Твоего́ [и Ду́ха Твоего́ Свята́го не оты́ми отъ мене́].

Царю́ Небе́сный, Утѣ́шителю, Ду́ше и́стины, Иже вездѣ́ Сы́й и вся́ Исполня́яй, Сокро́вище благи́хъ и жи́зни Пода́телю, пріиди́ и всели́ся въ ны́, и очи́сти ны́ отъ вся́кія скве́рны, и спаси́, Бла́же, ду́ши на́ша.

Сла́ва, и ны́нѣ, гла́съ 8:

Язы́цы иногда́ размѣси́шася де́рзости ра́ди столпотворе́нія, язы́цы же ны́нѣ умудри́шася сла́вы ра́ди боговѣ́дѣнія. Та́мо осуди́ нечести́выя погрѣше́ніемъ, здѣ́ просвѣти́лъ е́сть Христо́съ ры́бари Ду́хомъ. Тогда́ упраздни́ся безгла́сіе къ муче́нію, ны́нѣ обновля́ется согла́сіе ко спасе́нію ду́шъ на́шихъ.

Отпусти́тельный тропа́рь, гла́съ 8:

Благослове́нъ еси́, Христе́ Бо́же на́шъ, Иже прему́дры ловцы́ явле́й, низпосла́въ и́мъ Ду́ха Свята́го и тѣ́ми уловле́й вселе́нную, Человѣколю́бче, сла́ва Тебѣ́!

Та́же благослове́ніе хлѣ́бовъ. И чте́ніе Дѣя́ній святы́хъ апо́столъ.

[Зри́:] Аще ли не бу́детъ бдѣ́нія: по Ны́нѣ отпуща́еши... тропа́рь пра́здника, еди́ножды. На повече́ріи, по Досто́йнѣ... и по трисвято́мъ, конда́къ пра́здника. Полу́нощницу пое́мъ по обы́чаю. Кано́нъ глаго́лемъ Тро́иченъ во окто́ихѣ, гла́са.



НА УТРЕНИ,
На Бо́гъ Госпо́дь... Тропа́рь пра́здника, три́жды.

По 1-мъ стихосло́віи сѣда́ленъ, гла́съ 4. Подо́бенъ: Удиви́ся Іо́сифъ.

Попра́зднственный, вѣ́рніи, и коне́чный пра́здникъ пра́зднуимъ свѣ́тло: се́й е́сть Пятдеся́тница, обѣща́нія исполне́ніе и предложе́нія. Въ се́й бо о́гнь Утѣ́шителевъ сни́де на зе́млю, я́ко въ ви́дѣ язы́къ, и ученики́ просвѣти́, и сія́ неботаи́нники показа́. Свѣ́тъ пріи́де Утѣ́шителя и мíръ просвѣти́. [Два́жды.]

И быва́етъ чте́ніе въ толкова́ніи Іоа́нна, сло́во 8: Въ послѣ́дній де́нь.., на́двое.

По 2-й каѳи́смѣ сѣда́ленъ, гла́съ и подо́бенъ то́йже:

Ду́ха исто́чникъ, прише́дъ на зе́млю, во о́гненныя рѣ́ки раздѣля́яся мы́сленно, апо́столы ороша́ше просвѣща́я: и бы́сть и́мъ о́блакъ ороша́яй — о́гнь, просвѣща́яй тѣ́хъ и одождя́яй пла́мень, и́миже мы́ прія́хомъ благода́ть огне́мъ же и водо́ю. Свѣ́тъ пріи́де Утѣ́шителя и мíръ просвѣти́. [Два́жды.]

И чте́ніе.

[Поліеле́й и велича́ніе:

Велича́емъ Тя́, Живода́вче Христе́, и чти́мъ Всесвята́го Ду́ха Твоего́, Его́же отъ Отца́ посла́лъ еси́ боже́ственнымъ ученико́мъ Твои́мъ.

Псало́мъ избра́нный: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь...]

По поліеле́и сѣда́ленъ, гла́съ 8. Подо́бенъ: Повелѣ́нное та́йно.

По воста́ніи, Христе́, е́же изъ гро́ба, и е́же къ высотѣ́ небе́сной Боже́ственномъ Вознесе́ніи, богови́дцемъ сла́ву Твою́ низпосла́лъ еси́, Ще́дре, Ду́ха Пра́ваго обнови́вый ученико́мъ. Тѣ́мже, я́ко гу́сль мусикíйская, всѣ́мъ уясни́ся боже́ственнымъ бряца́ломъ та́йно, Спа́се, глаше́нія, и смотре́ніе Твое́. [Два́жды.]

И чте́ніе въ Богосло́вѣ.

Степе́нна, 1-й антифо́нъ 4-го гла́са. Проки́менъ, гла́съ 4: Ду́хъ Тво́й Благíй наста́витъ мя́ на зе́млю пра́ву. Сти́хъ: Го́споди, услы́ши моли́тву мою́, внуши́ моле́ніе мое́. Вся́кое дыха́ніе... Ева́нгеліе Іоа́нна, зача́ло 65: Су́щу по́здѣ... Воскресе́ніе Христо́во.., не глаго́лемъ, но а́біе псало́мъ 50-й. Та́же, Сла́ва: Моли́твами апо́столъ... И ны́нѣ: Моли́твами Богоро́дицы... Та́же сти́хъ: Поми́луй мя́, Бо́же...

Стихи́ра, гла́съ 6:

Царю́ Небе́сный, [Утѣ́шителю, Ду́ше и́стины, Иже вездѣ́ Сы́й и вся́ Исполня́яй, Сокро́вище благи́хъ и жи́зни Пода́телю, пріиди́ и всели́ся въ ны́, и очи́сти ны́ отъ вся́кія скве́рны, и спаси́, Бла́же, ду́ши на́ша].

Кано́на пра́здника два́: ирмосы́ обою́ кано́новъ по два́жды, а тропари́ на 12. Послѣди́ же: еди́нъ ли́къ 1-й ирмо́съ, и другíй ли́къ другíй ирмо́съ.

Кано́нъ, его́же краестро́чіе: Пятдеся́тницу пра́зднуимъ. Творе́ніе Космы́ мона́ха. Гла́съ 7.
Пѣ́снь 1.

Ирмо́съ: По́нтомъ покры́ фарао́на съ колесни́цами Сокруша́яй бра́ни мы́шцею высо́кою, пои́мъ Ему́, я́ко просла́вися.

Дѣ́ломъ, я́коже дре́вле ученико́мъ обѣща́лъ еси́, Утѣ́шителя Ду́ха посла́вый, Христе́, возсія́лъ еси́ мíру Свѣ́тъ, Человѣколю́бче.

Зако́номъ дре́вле проповѣ́данное и проро́ки испо́лнися: Боже́ственнаго Ду́ха дне́сь всѣ́мъ бо вѣ́рнымъ благода́ть излія́ся.

Иный кано́нъ, іамви́ческій, творе́ніе ки́ръ Іоа́нна Арклíйскаго. Гла́съ 4.
Пѣ́снь 1.

Ирмо́съ: Боже́ственнымъ покрове́нъ медленоязы́чный мра́комъ, извитíйствова богопи́санный Зако́нъ: ти́ну бо отря́съ очесе́ у́мнаго, ви́дитъ Су́щаго и науча́ется Ду́ха ра́зуму, хваля́ боже́ственными пѣ́сньми.

Реко́ша чи́стая и честна́я уста́: разлуче́нія ва́мъ не бу́детъ, о дру́зи! Азъ бо на Отчемъ вы́шнѣмъ престо́лѣ сосѣдя́, излію́ Ду́ха возсія́ти жела́ющимъ благода́ть незави́стную.

Предѣ́лъ преше́дшее Истиннѣйшее Сло́во, тихообра́зно соверша́етъ се́рдце: дѣ́ло бо сконча́въ, возвесели́ дру́ги, дыха́ніемъ ну́жнымъ и о́гненными язы́ки пода́въ Ду́ха Христо́съ, я́коже обѣща́ся.

Катава́сія: По́нтомъ покры́... Боже́ственнымъ покрове́нъ...

Пѣ́снь 3.

Ирмо́съ: Съ высоты́ си́лою, — ученико́мъ, Христе́, — до́ндеже облеце́теся, — ре́клъ еси́, — сѣди́те во Іерусали́мѣ. Азъ же, я́ко Мене́, Утѣ́шителя Ино́го, Ду́ха Моего́ же и Отча послю́, въ Не́мже утвердите́ся.

Боже́ственнаго Ду́ха наше́дшая си́ла, раздѣ́льшійся дре́вле гла́съ, злѣ́ согласи́вшихся, во еди́но прили́чіе Боже́ственнѣ совокупи́, вѣ́дѣніемъ Тро́ицы вразумля́ющи вѣ́рныя, въ Не́йже утверди́хомся.

Инъ.

Ирмо́съ: Разве́рзе утро́бы неча́дствовавшія у́зы, доса́ду же неудоботерпи́му благоча́дствующія, еди́на моли́тва проро́чицы дре́вле Анны, нося́щія ду́хъ сокруше́нъ, къ Си́льному и Бо́гу ра́зумовъ.

Непостижи́ма е́сть Богонача́льнѣйшая: вѣтíя бо изъяви́ безкни́жныя, ры́бари — прему́дрыя зауша́ющія сло́вомъ и отъ глубо́кія но́щи изыма́ющія лю́ди безчи́сленны блиста́ніемъ Ду́ха.

Бя́ше исхо́денъ отъ Нерожде́нна Свѣ́та, Всеси́льный сія́ющій Свѣ́тъ, Его́же Сы́номъ Оте́ческія вла́сти ны́нѣ явля́етъ сра́сленное озаре́ніе, о́гненный гла́съ въ Сіо́нѣ язы́комъ.

Та́же сѣда́ленъ, гла́съ 8. Подо́бенъ: Повелѣ́нное та́йно.

Спа́совы рачи́тиліе ра́дости испо́лнишася, и дерзнове́ніе прія́ша пре́жде боя́щіися: я́ко Ду́хъ Святы́й дне́сь свы́ше сни́де на до́мъ учени́ческій, и и́нъ ина́я глаго́лаше къ лю́демъ. Язы́цы бо разсѣ́яшася, ви́дими я́ко о́гнь, и си́хъ не опали́, но па́че ороси́.

Сла́ва, и ны́нѣ, то́йже.

Пѣ́снь 4.

Ирмо́съ: Смотря́яй проро́къ въ послѣ́дняя Твое́, Христе́, прише́ствіе, вопія́ше: Твою́ услы́шахъ, Го́споди, си́лу, я́ко вся́ спасти́ пома́занныя Твоя́ прише́лъ еси́.

Во проро́цѣхъ глаго́лавый и зако́номъ проповѣ́данный пе́рвѣе несоверше́ннымъ, Бо́гъ Истинный Утѣ́шитель Сло́ва служи́телемъ и свидѣ́телемъ познава́ется дне́сь.

Зна́меніе Божества́ нося́й, апо́столомъ во огни́ Ду́хъ раздѣли́ся, и стра́нными язы́ки явля́шеся, я́ко Оте́ческая Боже́ственная си́ла гряду́щая е́сть самоповели́тельная.

Инъ.

Ирмо́съ: Царю́ царе́й, Яковы́й отъ Якова́го, еди́нъ, Сло́ве, произше́дый отъ Отца́ безвино́внаго, равномо́щнаго Твоего́ Ду́ха апо́столомъ и́стинно посла́лъ еси́, я́ко Благодѣ́теля, пою́щимъ: сла́ва держа́вѣ Твое́й, Го́споди.

Ба́ню Боже́ственную пакибытія́ сло́вомъ раствори́въ, ссложе́нное естество́, дождоточи́ши ми́ струю́ отъ нетлѣннопрободе́ннаго Твоего́ ребра́, о Бо́жій Сло́ве, запечатлѣ́я теплото́ю Ду́ха.

Преклоня́ютъ вся́ Утѣ́шителю колѣ́на, Сы́ну же Отчу, Отцу́ сра́сленному: въ Ли́цѣхъ бо ви́дѣша трегу́быхъ Существо́ и́стинное, неприкоснове́нное, безлѣ́тное, еди́ное: возсія́ бо свѣ́тъ — благода́ть Ду́ха.

Да испо́лнятся вси́ Богонача́льнѣйшимъ, ели́цы служи́теліе Трисвѣ́тлаго Существа́: па́че естества́ бо соверша́етъ, я́ко Благодѣ́тель, и огнесвѣ́титъ Христо́съ во спасе́ніе, всю́ дая́ благода́ть Ду́ха.

Пѣ́снь 5.

Ирмо́съ: Стра́ха ра́ди Твоего́ зача́тый, Го́споди, во чре́вѣ проро́ковъ и рожде́нный на земли́ Ду́хъ спасе́нія апо́стольская сердца́ созида́етъ чи́ста и въ вѣ́рныхъ пра́вый обновля́ется: свѣ́тъ бо и ми́ръ зане́ Твоя́ повелѣ́нія.

Наше́дшая си́ла дне́сь сія́ — Ду́хъ Благíй, Ду́хъ прему́дрости Бо́жія, Ду́хъ отъ Отца́ исходя́й и Сы́номъ вѣ́рнымъ на́мъ явле́йся подава́теленъ, въ ни́хже вселя́ется естество́мъ святы́ни, въ не́йже зри́тся.

Иный.

Ирмо́съ: Рѣши́тельное очище́ніе грѣхо́въ, огнедухнове́нную пріими́те Ду́ха ро́су, о ча́да свѣтообра́зная церко́вная! Ны́нѣ отъ Сіо́на бо изы́де зако́нъ — языкоогнеобра́зная Ду́ха благода́ть.

Якоже благоволи́ самовла́стно, необлада́нный исхо́дитъ Ду́хъ отъ Отца́, умудря́я въ язы́цѣхъ апо́столы, печатлѣ́я живоно́сное сло́во, Отчеси́льное, Сообра́зное, Его́же Спа́съ рече́.

Да исцѣли́тъ у́бо смы́слы отъ грѣха́, и се́ устроя́ше апо́столовъ Бо́гъ Сло́во всенача́льное пречи́стый до́мъ, въ не́мже Единомо́щнаго же и Ссу́щественнаго ны́нѣ вселя́ется Ду́ха свѣ́тъ.

Пѣ́снь 6.

Ирмо́съ: Пла́вающаго въ молвѣ́ жите́йскихъ попече́ній, съ корабле́мъ потопля́ема грѣхи́ и душетлѣ́нному звѣ́рю примета́ема, я́ко Іо́на, Христе́, вопію́ Ти́: изъ смертоно́сныя глубины́ возведи́ мя́.

Отъ Ду́ха Твоего́ на пло́ть вся́кую, я́коже ре́клъ еси́, бога́тно излія́лъ еси́, и испо́лнишася вся́ческая Твоего́ вѣ́дѣнія, Го́споди: я́ко изъ Отца́ Сы́нъ нетлѣ́нно роди́лся еси́ и Ду́хъ Нераздѣ́льный изы́де.

Иный.

Ирмо́съ: Очище́ніе на́мъ, Христе́ и спасе́ніе, Влады́ко, возсія́лъ еси́ отъ Дѣ́вы, да, я́ко проро́ка отъ звѣ́ря морска́го пе́рсей Іо́ну, отъ тли́ исхити́ши всего́ Ада́ма всеро́дна па́дшаго.

Истинный на́мъ пра́вый во утро́бахъ вѣ́чно пріи́мшимъ Ду́хъ, да обнови́ши Отчеисхо́дный, и всесовокупле́нно, вещества́ ненави́стнаго пали́тельный скве́рнъ, ка́ла же смы́словъ чисти́тельный, Вседержи́телю.

Жела́тельное достоя́ніе апо́столомъ, сіо́няномъ ча́ющимъ Твоего́ прише́ствія, позна́нія Ду́хъ Отчерожде́нна Сло́ва, рѣ́чь жесто́кую язы́ческихъ ласка́тельствъ ско́ро показа́въ, огнедохнове́нно утвержда́еши.

Конда́къ, гла́съ 8:

Егда́ снизше́дъ, язы́ки слія́, раздѣля́ше язы́ки Вы́шній; егда́ же о́гненныя язы́ки раздая́ше, въ соедине́ніе вся́ призва́, и согла́сно сла́вимъ Всесвята́го Ду́ха.

Икосъ:

Ско́рое и извѣ́стное да́ждь утѣше́ніе рабо́мъ Твои́мъ, Іису́се, внегда́ уныва́ти духо́мъ на́шимъ: не разлуча́йся отъ ду́шъ на́шихъ въ ско́рбехъ, не удаля́йся отъ мы́слей на́шихъ во обстоя́ніихъ, но при́сно на́съ предвари́. Прибли́жися на́мъ, прибли́жися, вездѣ́ Сы́й, я́коже со апо́столы Твои́ми всегда́ еси́, си́це и Тебе́ жела́ющимъ соедини́ Себе́, Ще́дре, да совоку́плени Тебе́ пое́мъ и славосло́вимъ Всесвята́го Ду́ха Твоего́.

Синакса́рій въ недѣ́лю Святы́я Пентико́стіи.

Стихи́: Дыха́ніемъ ну́жнымъ, языкоо́гненно подае́тъ Христо́съ Боже́ственнаго Ду́ха апо́столомъ.
                  Излія́ся въ вели́комъ дни́ Ду́хъ рыбаре́мъ.

Въ сíй де́нь, въ недѣ́лю осму́ю по Па́сцѣ, Святу́ю Пятдеся́тницу пра́зднуимъ, и сію́ же прія́хомъ отъ евре́йскихъ кни́гъ. Якоже бо они́, я́же у ни́хъ Пятдеся́тницу пра́зднуютъ, почита́юще седмо́е число́, и зане́ по Па́сцѣ пятдеся́тъ днíй преше́дше, Зако́нъ прія́ша: та́ко и мы́ по Па́сцѣ, пятдеся́тъ днíй пра́зднующе, Всесвята́го Ду́ха пріе́млемъ, законополага́ющаго и наставля́ющаго на вся́кую и́стину и уго́дная Бо́гу повелѣва́ющаго.

Вѣ́домо же да е́сть, я́ко у евре́й три́ бѣ́ша пра́здницы: Па́сха, Пятдеся́тница и Скинопи́гія, сíесть, сѣ́ницъ потче́ніе.

Па́сху у́бо въ воспомина́ніе творя́ху преведе́нія Чермна́го мо́ря: «Па́сха» бо «преведе́ніе» толку́ется. Явля́ше же таковы́й пра́здникъ, на́ше е́же отъ те́мнаго грѣха́ къ ра́ю па́ки преведе́ніе и возвраще́ніе.

Пятдеся́тницу же пра́здноваху, въ воспомина́ніе е́же въ пусты́ни злострада́нія и́хъ, и ка́ко мно́гими скорбьми́ въ зе́млю обѣтова́нія введе́ни бы́ша: тогда́ бо и плода́ пшени́цы и вина́ наслади́шася. И явля́ше пра́здникъ се́й на́ше озлобле́ніе отъ невѣ́рія, и въ це́рковь вни́тіе: тогда́ бо и мы́ Влады́чняго причаща́емся Тѣ́ла и Кро́ве. Ови у́бо тоя́ ра́ди вины́ глаго́лютъ, я́же у евре́й Пятдеся́тницѣ пра́здноватися; о́ви же въ че́сть, я́коже глаго́лютъ, пяти́десяти дне́мъ, въ ня́же пости́вся Моисе́й, богопи́санный Зако́нъ прія́тъ, вку́пѣ помина́ющимъ и тельца́ жре́нія, и ины́хъ, я́же егда́ Моисе́й восходя́ на го́ру и низходя́, содѣ́я. Други́мъ же непщева́ся Пятдеся́тницѣ у евре́й умы́слитися, че́сти ра́ди седми́чнаго числа́, я́коже рече́ся: то́ бо о себѣ́ слага́емо, твори́тъ пятдеся́тное, еди́ному оскудева́ющу дне́ви. Че́сть же седмочи́слія у евре́й, не то́чію во дне́хъ е́сть, но и въ лѣ́та достиза́ющая, отъ ни́хже лѣ́тъ и е́же у ни́хъ творя́тъ «іовиле́онъ», сказу́емо «оставле́ніе». Уседморича́емымъ бо лѣ́томъ, сіе́ быва́етъ, егда́ и зе́млю несѣ́янную оставля́ютъ, и живо́тнымъ подаю́тъ осла́бу, и ку́пленымъ рабо́мъ отходи́ти повелѣва́ютъ.

Тре́тій же пра́здникъ — Скинопи́гія, сíесть, сѣ́ницъ потче́ніе, пра́зднуемый по собра́ніи плодо́въ, е́же е́сть по пяти́хъ мѣ́сяцѣхъ пра́здника Па́схи. Соверша́шежеся се́й въ па́мять дне́, въ о́ньже Моисе́й пре́жде потче́ сѣ́ницу на горѣ́ Сина́йстѣй, ви́дѣнную о́блакомъ и угото́ванную отъ перводреводѣ́ля Веселе́ила. Сѣ́ни бо и сíи творя́ще, се́й пра́здникъ пра́здноваху и на се́лѣхъ пребыва́юще, и благодаря́ще Бо́га, плоды́ свои́хъ трудо́въ собира́ху. Въ сíй мни́тся и Дави́дъ я́же о точи́лѣхъ надписова́ти псалмы́. Образъ же бѣ́ то́й изъ ме́ртвыхъ на́шего воскресе́нія, егда́ разруши́вшимся тѣле́снымъ сѣ́немъ на́шимъ и па́ки слѣпле́ннымъ, свои́хъ трудо́въ плоды́ воспріи́мемъ, торжеству́юще въ вѣ́чныхъ сѣ́нѣхъ.

Подоба́етъ же вѣ́дати, я́ко въ сíй де́нь Пятдеся́тницы соверша́емыя, Ду́хъ Святы́й на ученики́ пріи́де. Елма́ же святíи отцы́ изво́лиша раздѣля́ти пра́здники, ра́ди вели́чія Пресвятаго и Животворящаго Духа, яко Единъ есть Святы́я и Живонача́льныя Тро́ицы. Се́ и мы́ рече́мъ воу́тріе, ка́ко Ду́хъ Святы́й пріи́де.

Святы́хъ апо́столъ моли́твами, Христе́, поми́луй на́съ. Ами́нь.

Пѣ́снь 7.

Ирмо́съ: Въ пе́щь о́гненную вве́ржени, преподо́бніи о́троцы о́гнь въ ро́су преложи́ша, воспѣва́ніемъ си́це вопію́ще: благослове́нъ еси́, Го́споди Бо́же оте́цъ на́шихъ.

Вѣту́ющимъ Боже́ственная вели́чія апо́столомъ, Ду́ха дѣ́йство непщева́шеся пія́нство невѣ́рствующимъ, и́мже Тро́ица познава́ется — Еди́нъ Бо́гъ оте́цъ на́шихъ.

Нераздѣ́льное естество́ правосла́вно богосло́вимъ, Бо́га Отца́ Безнача́льнаго, тоя́жде вла́сти Сло́ва и Ду́ха, — благослове́нъ еси́, — зову́ще, — Бо́же оте́цъ на́шихъ!

Инъ.

Ирмо́съ: Согла́сная возшумѣ́ орга́нская пѣ́снь почита́ти златосотворе́нный безду́шный истука́нъ; Утѣ́шителева же свѣтоно́сная благода́ть почеству́етъ, е́же вопи́ти: Тро́ице Еди́ная, Равноси́льная, Безнача́льная, благослове́на еси́.

Гла́са пророковѣща́тельнаго не разумѣ́вше, глаго́лаху безу́мніи виносотворе́нное пія́нство, рѣ́чи я́ко стра́нны слы́шаша апо́столовъ; благочести́віи же Тебѣ́ вопіе́мъ боже́ственно: Богодѣ́телю всѣ́хъ, благослове́нъ еси́!

Боже́ственное уче́ніе возгремѣ́ ви́дяй видѣ́нія боже́ственный Іо́иль, Богонача́льнѣйшаго, и́мже излію́, ре́къ, я́коже Сло́ва, Ду́ха Моего́ свозопію́щимъ: Естество́ Тривѣща́нное Свѣ́тлое, благослове́нъ еси́!

Тро́ичную у́бо раздѣли́ зря́ благода́ть, я́ко да яви́тъ три́ Ѵпоста́си почита́ти въ простотѣ́ вла́сти, но во еди́номъ ны́нѣ дни́ Госпо́дскомъ, Сы́нъ, Оте́цъ и Ду́хъ благослове́нъ.

Пѣ́снь 8.

Ирмо́съ: Неопа́льная огню́ въ Сина́и прича́щшаяся купина́ Бо́га яви́ медленноязы́чному и гугни́вому Моисе́ови, и о́троки ре́вность Бо́жія три́ непреобори́мыя во огни́ пѣвцы́ показа́: вся́ дѣла́ Госпо́дня, Го́спода по́йте и превозноси́те Его́ во вся́ вѣ́ки.

Живо́тну свы́ше бу́рну носи́му гласо́внѣ, Ду́ха Всесвята́го дыха́нію рыбаре́мъ, о́гненныхъ ви́домъ язы́къ, вели́чія Бо́жія вѣтíйствоваху: вся́ дѣла́, Го́спода по́йте и превозноси́те во вся́ вѣ́ки.

Яко на некаса́емую превосходя́ще го́ру, не боя́щеся огня́ страша́ща, пріиди́те и ста́немъ на горѣ́ Сіо́нской, во гра́дѣ Жива́го Бо́га, духоно́снымъ ученико́мъ ны́нѣ слику́юще: вся́ дѣла́, Го́спода по́йте и превозноси́те во вся́ вѣ́ки.

Инъ.

Ирмо́съ: Разрѣша́етъ у́зы и ороша́етъ пла́мень Трисвѣ́тлый Богонача́лія о́бразъ, пою́тъ о́троцы, благослови́тъ же Еди́наго Спа́са и Вседѣ́теля, я́ко Благодѣ́теля, сотворе́нная вся́ческая тва́рь.

Па́мять Христо́съ человѣкоспаси́тельныхъ слове́съ, я́же отъ Отца́ слы́шавъ, апо́столомъ рече́, Ду́хъ устроя́етъ языкоо́гненнымъ видѣ́ніемъ, посажда́я благослове́нно усвое́нную, учуже́нная же пое́тъ Тя́ тва́рь.

Спаси́тельно самовлады́чній Еди́нъ, Свѣ́тъ самосія́тельный и пода́тельный свѣ́та сы́й, прише́лъ еси́ исполня́я апо́столы, честны́й я́ко ве́рхъ Твои́мъ рабо́мъ, насыти́тельный же Ду́хъ подава́еши.

Поя́ху проро́къ духонасыще́нная уста́, Твое́ тѣле́сное, о Царю́, прише́ствіе, и Ду́хъ, отъ нѣ́дръ Отчихъ произше́дшій, несозда́нный, зданнодѣ́теленъ, сопресто́ленъ Тебѣ́, еди́наго вочеловѣ́ченія вѣ́рнымъ че́сть.

Честнѣ́йшую... не пое́мъ.

Пѣ́снь 9.

Ирмо́съ: Нетлѣ́нія искуше́ніемъ ро́ждшая и Всехитрецу́ Сло́ву пло́ть взаимода́вшая, Ма́ти Неискусому́жная, Дѣ́во Богоро́дице, прія́телище Нестерпи́маго, село́ Невмѣсти́маго Зижди́теля Твоего́, Тя́ велича́емъ.

На паля́щей дре́вле о́гненной колесни́цѣ ревни́тель и огнедохнове́нный ра́дуяся носи́мь, е́же ны́нѣ возсія́вшее дохнове́ніе свы́ше апо́столомъ явля́ше: отъ него́же освяти́вшеся, Тро́ицу всѣ́мъ сказа́ша.

Зако́на есте́ствъ кромѣ́ стра́нное слы́шашеся ученико́въ: еди́ному бо гла́су глася́щу Ду́ха благода́тію, разли́чнѣ оглаша́хуся лю́діе, племена́ и язы́ки Боже́ственная вели́чія, Тро́ицы вѣ́дѣнію науча́юще.

Инъ.

Ирмо́съ: Ра́дуйся, Цари́це, матеродѣ́вственная Сла́во, вся́ка бо удобообраща́тельная благоглаго́ливая уста́ витíйствовати не мо́гутъ, Тебе́ пѣ́ти досто́йно, изумѣва́етъ же у́мъ вся́къ Твое́ Рождество́ разумѣ́ти. Тѣ́мже Тя́ согла́сно сла́вимъ.

Пѣ́ти подоба́ше естественножи́зненную Отрокови́цу: еди́на бо во чре́вѣ скры́ Сло́во, тая́щееся неду́гующаго человѣ́ческаго естества́, Иже въ десны́хъ страна́хъ ны́нѣ сѣдя́й Отчихъ, посла́ благода́ть Ду́ха.

Ели́цѣмъ дхну́ богото́чная благода́ть, свѣтя́щеся, блиста́юще, измѣня́еми стра́ннымъ измѣне́ніемъ благолѣ́пнѣйшимъ, равноси́льствующую несѣко́мую увѣ́дѣвше прему́дрость, Трисвѣ́тлое Существо́ сла́вимъ.

Та́же катава́сія, о́ба ирмоса́ вку́пѣ.

Ексапостила́рій. Подо́бенъ: Не́бо звѣзда́ми.

Всесвяты́й Ду́ше, исходя́й изъ Отца́ и Сы́номъ прише́дый къ безкни́жнымъ ученико́мъ, Тебе́ Бо́га позна́вшихъ спаси́ и поми́луй всѣ́хъ. [Два́жды.]

Сла́ва, и ны́нѣ, другíй подо́бенъ:

Свѣ́тъ Оте́цъ, Свѣ́тъ Сло́во, Свѣ́тъ и Святы́й Ду́хъ, Иже во язы́цѣхъ о́гненныхъ апо́столомъ посла́ся, и Тѣ́мъ ве́сь мíръ просвѣща́ется Тро́ицу почита́ти Святу́ю.

На хвали́техъ: Вся́кое дыха́ніе... поста́вимъ стихо́въ 6 и пое́мъ настоя́щія самогла́сны, гла́съ 4, повторя́юще я́:

Пресла́вная дне́сь ви́дѣша вси́ язы́цы во гра́дѣ Дави́довѣ, егда́ Ду́хъ сни́де Святы́й во о́гненныхъ язы́цѣхъ, я́коже богоглаго́ливый Лука́ повѣству́етъ, глаго́летъ бо: собра́ннымъ ученико́мъ Христо́вымъ, бы́сть шу́мъ, я́коже носи́му дыха́нію бу́рну, и испо́лни до́мъ, идѣ́же бя́ху сѣдя́ще; и вси́ нача́ша глаго́лати стра́нными глаго́лы, стра́нными уче́ніи, стра́нными повелѣ́ніи Святы́я Тро́ицы. [Два́жды.]

Ду́хъ Святы́й бѣ́ у́бо при́сно, и е́сть, и бу́детъ, ниже́ начина́емь, ниже́ престая́й, но при́сно Отцу́ и Сы́ну счине́нъ и счисля́емь: Живо́тъ и Животворя́й; Свѣ́тъ и свѣ́та Пода́тель; Самоблагíй и Исто́чникъ благосты́ни; Имже Оте́цъ познава́ется и Сы́нъ прославля́ется, и отъ всѣ́хъ познава́ется еди́на си́ла, еди́но счета́ніе, еди́но поклоне́ніе Святы́я Тро́ицы. [Два́жды.]

Ду́хъ Святы́й — Свѣ́тъ, и Живо́тъ, и Живы́й Исто́чникъ у́мный; Ду́хъ прему́дрости, Ду́хъ ра́зума, Благíй, Пра́вый, Умный, облада́яй, очища́яй прегрѣше́нія; Бо́гъ и Боготворя́й; Огнь и отъ Огня́ происходя́й, глаго́ляй, дѣ́яй, раздѣля́яй дарова́нія, Имже проро́цы вси́ и боже́ственніи апо́столи съ му́ченики вѣнча́шася. Стра́нное слы́шаніе, стра́нное видѣ́ніе: Огнь раздѣля́яйся въ подая́ніе дарова́ній. [Два́жды.]

Сла́ва, и ны́нѣ, гла́съ 6:

Царю́ Небе́сный, Утѣ́шителю, Ду́ше и́стины, Иже вездѣ́ Сы́й и вся́ Исполня́яй, Сокро́вище благи́хъ и жи́зни Пода́телю, пріиди́ и всели́ся въ ны́, и очи́сти ны́ отъ вся́кія скве́рны, и спаси́, Бла́же, ду́ши на́ша.

Славосло́віе вели́кое. Отпусти́тельный тропа́рь пра́здника. Та́же ектеніи́.

И твори́тъ свяще́нникъ отпу́стъ си́це:

Иже въ ви́дѣ о́гненныхъ язы́къ съ небесе́ низпосла́вый Пресвята́го Ду́ха на святы́я Своя́ ученики́ и апо́столы Христо́съ, и́стинный Бо́гъ на́шъ, моли́твами Пречи́стыя Своея́ Ма́тере, святы́хъ сла́вныхъ и всехва́льныхъ апо́столъ и всѣ́хъ святы́хъ, поми́луетъ и спасе́тъ на́съ, я́ко Благíй и Человѣколю́бецъ.

И ча́съ 1-й. На 1-мъ часѣ́ тропа́рь пра́здника. По трисвято́мъ конда́къ пра́здника. И коне́чный отпу́стъ.




НА ЛИТУРГІИ,

Глаго́лемъ антифо́ны сія́:

Антифо́нъ 1, псало́мъ 18, гла́съ 2:

Сти́хъ 1: Небеса́ повѣ́даютъ сла́ву Бо́жію. [Припѣ́въ:] Моли́твами Богоро́дицы, Спа́се, спаси́ на́съ.

И другíй ли́къ, то́йже сти́хъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь. [Припѣ́въ:] Моли́твами Богоро́дицы, Спа́се, спаси́ на́съ.

Сти́хъ 2: Де́нь дни́ отрыга́етъ глаго́лъ, и но́щь но́щи возвѣща́етъ ра́зумъ. [Припѣ́въ:] Моли́твами Богоро́дицы, Спа́се, спаси́ на́съ.

Сти́хъ 3: Во всю́ зе́млю изы́де вѣща́ніе и́хъ, и въ концы́ вселе́нныя глаго́лы и́хъ. [Припѣ́въ:] Моли́твами Богоро́дицы, Спа́се, спаси́ на́съ.

Сла́ва, и ны́нѣ: Моли́твами Богоро́дицы, Спа́се, спаси́ на́съ.

Антифо́нъ 2, псало́мъ 19, гла́съ то́йже:

Сти́хъ 1: Услы́шитъ тя́ Госпо́дь въ де́нь печа́ли. [Припѣ́въ:] Спаси́ ны́, Утѣ́шителю Благíй, пою́щія Ти́: Аллилу́ія.

Друга́я страна́ то́йже сти́хъ: Услы́шитъ тя́ Госпо́дь въ де́нь печа́ли, защи́титъ тя́ и́мя Бо́га Іа́ковля. [Припѣ́въ:] Спаси́ ны́, Утѣ́шителю Благíй, [пою́щія Ти́: Аллилу́ія].

Сти́хъ 2: По́слетъ ти́ по́мощь отъ Свята́го, и отъ Сіо́на засту́питъ тя́. [Припѣ́въ:] Спаси́ ны́, Утѣ́шителю Благíй, [пою́щія Ти́: Аллилу́ія].

Сти́хъ 3: Да́стъ ти́ Госпо́дь по се́рдцу твоему́, и ве́сь совѣ́тъ тво́й испо́лнитъ. [Припѣ́въ:] Спаси́ ны́, Утѣ́шителю Благíй, [пою́щія Ти́: Аллилу́ія].

Сла́ва, и ны́нѣ: Единоро́дный Сы́не...

Антифо́нъ 3, псало́мъ 20, гла́съ 8:

Сти́хъ 1: Го́споди, си́лою Твое́ю возвесели́тся ца́рь. Тропа́рь, гла́съ то́йже: Благослове́нъ еси́, Христе́ Бо́же на́шъ, Иже прему́дры ловцы́ явле́й, низпосла́въ и́мъ Ду́ха Свята́го и тѣ́ми уловле́й вселе́нную, Человѣколю́бче, сла́ва Тебѣ́!

Другíй ли́къ, то́йже сти́хъ: Го́споди, си́лою Твое́ю возвесели́тся ца́рь и о спасе́ніи Твое́мъ возра́дуется зѣло́. Тропа́рь: Благослове́нъ еси́, Христе́ Бо́же на́шъ...

Сти́хъ 2: Жела́ніе се́рдца его́ да́лъ еси́ ему́ и хотѣ́нія устну́ его́ нѣ́си лиши́лъ его́. Тропа́рь: Благослове́нъ еси́, Христе́ Бо́же на́шъ...

Сти́хъ 3: Яко предвари́лъ еси́ его́ благослове́ніемъ благосты́ннымъ, положи́лъ еси́ на главѣ́ его́ вѣне́цъ отъ ка́мене че́стна. Тропа́рь: Благослове́нъ еси́, Христе́ Бо́же на́шъ...

Входно́е: Вознеси́ся, Го́споди, си́лою Твое́ю, воспое́мъ и пое́мъ си́лы Твоя́. Та́же тропа́рь: Благослове́нъ еси́, Христе́ Бо́же на́шъ...

Сла́ва, и ны́нѣ, конда́къ, гла́съ 8:

Егда́ снизше́дъ, язы́ки слія́, раздѣля́ше язы́ки Вы́шній; егда́ же о́гненныя язы́ки раздая́ше, въ соедине́ніе вся́ призва́, и согла́сно сла́вимъ Всесвята́го Ду́ха.

Вмѣ́сто же трисвята́го: Ели́цы во Христа́ крести́стеся, во Христа́ облеко́стеся. Аллилу́ія. Проки́менъ, гла́съ 8: Во всю́ зе́млю изы́де вѣща́ніе и́хъ,* и въ концы́ вселе́нныя глаго́лы и́хъ. [И до отда́нія.] Сти́хъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь. Апо́столъ въ Дѣя́ніихъ, зача́ло 3: Егда́ скончава́шася днíе Пятдеся́тницы... Аллилу́ія, гла́съ 1: Сло́вомъ Госпо́днимъ небеса́ утверди́шася, и Ду́хомъ у́стъ Его́ вся́ си́ла и́хъ. Сти́хъ: Съ небесе́ призрѣ́ Госпо́дь, ви́дѣ вся́ сы́ны человѣ́ческія. Ева́нгеліе отъ Іоа́нна, зача́ло 27: Въ послѣ́дній де́нь вели́кій пра́здника... За Досто́йно... пое́мъ [и до отда́нія] ирмо́съ: Ра́дуйся, Цари́це... Прича́стный: Ду́хъ Тво́й Благíй наста́витъ мя́ на зе́млю пра́ву. Аллилу́ія.., три́жды. И по отпу́стѣ на Литургíи глаго́лется 9-й ча́съ по обы́чаю.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 187 – 196 об.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.