Церковный календарь
Новости


2018-07-21 / russportal
2-й Всезаруб. Соборъ 1938 г. Докладъ (4-й) К. Н. Николаева (1939)
2018-07-21 / russportal
Помѣстный Соборъ 1917-1918 гг. Дѣяніе 30-е (25 октября 1917 г.)
2018-07-20 / russportal
2-й Всезаруб. Соборъ 1938 г. Докладъ (3-й) К. Н. Николаева (1939)
2018-07-20 / russportal
Помѣстный Соборъ 1917-1918 гг. Дѣяніе 38-е (11 ноября 1917 г.)
2018-07-18 / russportal
Ген. П. Н. Красновъ. "За чертополохомъ". Часть 2-я. Глава 1-я (1922)
2018-07-18 / russportal
Ген. П. Н. Красновъ. "За чертополохомъ". Часть 1-я. Глава 41-я (1922)
2018-07-18 / russportal
Ген. П. Н. Красновъ. "За чертополохомъ". Часть 1-я. Глава 40-я (1922)
2018-07-18 / russportal
Ген. П. Н. Красновъ. "За чертополохомъ". Часть 1-я. Глава 39-я (1922)
2018-07-18 / russportal
Н. А. Соколовъ. Убійство въ Алапаевскѣ Вел. Кн. Елизаветы Ѳедоровны (1925)
2018-07-17 / russportal
С. Павловъ. Екатеринбургское злодѣяніе 17-го іюля 1918 года (1947)
2018-07-16 / russportal
В. К. Абданкъ-Коссовскій. Страшная годовщина 17 іюля 1918 г. (1942)
2018-07-16 / russportal
Поиски отвѣта на вопросъ о судьбѣ останковъ Царской Семьи (1995)
2018-07-15 / russportal
Ген. П. Н. Красновъ. "За чертополохомъ". Часть 1-я. Глава 38-я (1922)
2018-07-15 / russportal
Ген. П. Н. Красновъ. "За чертополохомъ". Часть 1-я. Глава 37-я (1922)
2018-07-15 / russportal
Ген. П. Н. Красновъ. "За чертополохомъ". Часть 1-я. Глава 36-я (1922)
2018-07-15 / russportal
Ген. П. Н. Красновъ. "За чертополохомъ". Часть 1-я. Глава 35-я (1922)
Новости въ видѣ
RSS-канала: .
Сегодня - воскресенiе, 22 iюля 2018 г. Сейчасъ на порталѣ посѣтителей - 4.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ПЯТОКЪ СЫРНЫЯ СЕДМИЦЫ.

ВЪ ТОЙЖЕ ЧЕТВЕРТОКЪ СЫРНЫЙ, ВЕЧЕРА:
Отъ нача́ла покло́ны начина́емъ, и про́чая вся́ слу́жба, я́коже и вы́ше во вто́рникъ сы́рный указа́ся.

На Го́споди воззва́хъ.., стихи́ры я́ко обы́чно. Сла́ва, и ны́нѣ, богоро́диченъ. Свѣ́те Ти́хій... И проки́менъ дне́.

На стихо́внѣ самогла́сенъ дне́, гла́съ 2:

Госпо́день Кре́стъ, неукло́нно кла́няющимся ему́ вся́кія сла́сти брозда́ е́сть и зако́нъ воздержа́нія, и́бо непреста́нно взира́ющіи на Пригвожде́ннаго на не́мъ распина́ютъ пло́ть со страстьми́ и похотьми́. Отъ ни́хже и мы́ бы́ти потщи́мся, посто́мъ чи́стымъ присво́имся, человѣколю́бно на́мъ Присво́ившемуся Стра́стію и Своего́ безстра́стія естество́ пода́вшему, иму́щему ве́лію ми́лость.

Повторя́емъ се́й, со стихо́мъ: Къ Тебѣ́ возведо́хъ о́чи мо́и, [живу́щему на небеси́. Се́ я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́.]

Сти́хъ: Поми́луй на́съ, Го́споди, [поми́луй на́съ, я́ко по мно́гу испо́лнихомся уничиже́нія, наипа́че напо́лнися душа́ на́ша поноше́нія гобзу́ющихъ и уничиже́нія го́рдыхъ.]

И му́чениченъ: Земна́го наслажде́нія не возжелѣ́вше страстоно́сцы, небе́сныхъ благи́хъ сподо́бишася и а́нгеломъ сожи́тели бы́ша. Го́споди, моли́твами и́хъ поми́луй и спаси́ на́съ.

Сла́ва, и ны́нѣ, крестобогоро́диченъ. Подо́бенъ: Егда́ отъ дре́ва.

Гро́здъ всезрѣ́лый, Чи́стая, Его́же невоздѣ́ланно во утро́бѣ младоноси́ла еси́, на Дре́вѣ я́ко узрѣ́ла еси́ Сего́ ви́сяща, рыда́ющи, восклица́ла еси́ и взыва́ла еси́: Ча́до, сла́дость иска́пай, е́юже пія́нство вся́кое страсте́й отъе́млется, Благодѣ́телю, Мене́ ра́ди Тя́ ро́ждшія, Боже́ственными утѣше́ньми, я́ко благоутро́бенъ.

Ны́нѣ отпуща́еши... Богоро́дице, Дѣ́во... И про́чее, творя́ще покло́ны вели́кія. Та́же отпу́стъ.

Повече́ріе пое́мъ вели́кое съ покло́ны, я́коже во вто́рникъ указа́ся, ли́стъ 34.



ВЪ ПЯТОКЪ СЫРОЯСТНЫЙ НА УТРЕНИ,
По шестопса́лміи пое́мъ Аллилу́ія.., на гла́съ тро́ична гла́са.

По 1-мъ стихосло́віи сѣда́льны кре́стныя осмогла́сника.

По 2-мъ стихосло́віи сѣда́ленъ тріо́ди, гла́съ 7. Подо́бенъ: Яко иму́ще.

Возвы́си Це́рквей ро́гъ, честны́й Кре́сте, низложи́ ерети́ческую горды́ню си́лою твое́ю и возвесели́ правосла́вныхъ ли́ки, сподо́би предвари́ти всѣ́мъ на́мъ твое́ предвозвѣще́ніе и поклони́тися тебѣ́, подно́жію Христо́ву, въ тебѣ́ бо хва́лимся, Дре́во благослове́нное.

Сла́ва: то́йже. И ны́нѣ, крестобогоро́диченъ:

Яко иму́щи ми́лостивное на смире́ніе на́ше и зря́щи на земны́я удобообстои́мыя лю́ди, умилосе́рдися, благослове́нная Богоро́дице, пребу́ди моля́щися, да не поги́бнемъ лю́тѣ, моли́ я́ко Пречи́стая благопримири́тельнаго Бо́га спасти́ся душа́мъ на́шимъ, Пресвята́я Дѣ́во.

Та́же чте́мъ сло́во вели́каго Васи́лія о постѣ́, его́же нача́ло: Воструби́те въ новомѣ́сячіи трубо́ю... Та́же псало́мъ 50-й.

И кано́ны осмогла́сника, мине́и и тріо́ди. Въ ни́хже пѣ́снехъ пое́мъ трипѣ́снцы, оставля́ются таковы́я пѣ́сни осмогла́сника и мине́и, поне́же двоирмо́сны су́ть трипѣ́снцы.

Кано́нъ тріо́ди. Творе́ніе господи́на Іо́сифа. Гла́съ 8:
Пѣ́снь 1.

Ирмо́съ: Во́ду проше́дъ, [я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ].

Воздержа́нія боже́ственное вре́мя возсія́ всѣ́мъ, покая́нія просвѣще́ніе, тму́ отъе́млющее прегрѣше́ній, сіе́ усе́рднымъ се́рдцемъ пріи́мемъ.

Се́ покая́нія добро́та ду́ши разширя́етъ, поще́нія пригвожде́ніемъ, въ сіе́ тре́звенно вше́дше, и прегрѣше́ній, вѣ́рніи, разрѣше́ніе пріи́мемъ.

Сла́ва: Нача́ла, вла́сти, и херуви́мы, и вся́ си́лы, моли́теся вре́мя на́мъ по́стное соверши́ти въ покая́ніи и вся́кой чистотѣ́.

[И ны́нѣ,] богоро́диченъ: Свята́я Дѣ́во, вѣ́рныхъ заступле́ніе еди́на, моли́тву Твою́ споспѣ́шную во вре́мя поще́нія всѣ́мъ пода́ждь, Богоро́дицу Чи́стую Тя́ вѣ́дущимъ.

Ирмо́съ: Во́ду проше́дъ, [я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ].

Пѣ́снь 3.

Ирмо́съ: Небе́снаго кру́га [Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче].

Всегуби́тельныхъ страсте́й душе́вныхъ убѣжи́мъ подъя́тіемъ поста́ и умиле́нія пока́жемъ плоды́, пе́рвѣе грѣха́ми Бо́га благоутро́бнаго преогорчи́вшіи.

Свѣщи́ еле́емъ благи́хъ дѣя́ній вси́ ны́нѣ вжещи́ тща́тельно возусе́рдствуимъ, я́ко да вни́демъ съ му́дрыми дѣ́вами во свѣ́тлый черто́гъ ра́дующеся.

Сла́ва: Богоглаго́ливіи проро́цы, богови́дніи му́ченицы и боже́ственніи ученицы́ Спа́совы, Того́ моли́те до́брѣ нача́ти и благоуго́дно сконча́ти поще́нія по́прище, вси́ помо́лимся.

[И ны́нѣ,] богоро́диченъ: Яко вину́ Тя́ всѣ́хъ благи́хъ, Влады́чице, вси́ прилѣ́жно мо́лимъ, е́же совни́ти на́мъ Твои́мъ хода́тайствомъ въ по́стный по́двигъ и концу́ дарова́тися сего́ спаси́тельному.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Та́же сѣда́ленъ мине́и и крестобогоро́диченъ.

Пѣ́снь 4.

Ирмо́съ: Услы́шахъ, Го́споди, смотре́нія [Твоего́ та́инство, разумѣ́хъ дѣла́ Твоя́ и просла́вихъ Твое́ Божество́].

Якоже у́тро прини́кши, ны́нѣ поще́нія благода́ть предлага́етъ покая́нія вре́мя на́мъ, долго́въ тму́ разрѣша́ющее.

Напита́имъ ни́щія, ми́лость ми́лостію воспріе́млюще, и поще́нія боже́ственною водо́ю душе́вныя скве́рны отмы́емъ.

Сла́ва: Небе́сніи а́нгели, Благода́вца умоли́те умиле́нное на́ше покая́ніе щедро́тами безмѣ́рными прія́ти.

[И ны́нѣ,] богоро́диченъ: Чи́стое очисти́лище согрѣша́ющихъ, Свята́я Влады́чице, хода́тайствомъ Твои́мъ раздери́ согрѣше́ній мои́хъ рукописа́ніе.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Настоя́щій де́нь нача́токъ творя́ще житія́ чистоты́, себе́ усе́рдно къ подвиго́мъ, вѣ́рніи, угото́вимъ, плотскíя болѣ́зни и душе́вное благопло́діе Влады́цѣ всѣ́хъ принося́ще.

Моисе́я по́стъ Боже́ственнаго боговидѣ́нія показа́ прича́стника, сего́ у́бо, душе́ моя́, подража́ющи, по́стъ пріими́, боже́ственная восхожде́нія въ себѣ́ расположи́вши, я́ко да ви́диши Бо́жію свѣ́тлость.

Свяще́нныхъ апо́столъ и священноимени́тыхъ му́ченикъ мольба́ми, поще́нія вре́мя прейти́ на́съ сподо́би, Іису́се Ще́дрый, въ покая́ніи и вся́комъ отложе́ніи грѣха́, мо́лимся.

Богоро́диченъ: Въ поще́нія две́рь хотя́щіи вни́ти, мо́лимъ Тя́, Бо́жію Две́рь, совни́ти рабо́мъ Твои́мъ, Влады́чице, и разшири́ти вся́ко помышле́нія и мы́сли, спаси́тельная твори́ти хотѣ́нія.

Та́же трипѣ́снецъ господи́на Іо́сифа, гла́съ 6:
Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, [у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща].

На Крестѣ́ ру́цѣ пригвозди́въ, копіе́мъ въ ре́бра прободе́нъ, писа́ніе, Человѣколю́бче, па́дшаго Ада́ма растерза́лъ еси́, тѣ́мже Тя́, Жизнода́вче, пѣ́сньми сла́вимъ.

Ле́стно змíй лука́вый стра́сти наложи́въ ми́ душе́вныя, отъ рая́ изгна́; Ты́ же дла́ни на Крестѣ́ пригвозди́въ, къ высотѣ́ нетлѣ́нія, Спа́се, привле́клъ еси́.

Поста́ боже́ственное вре́мя, стра́сти очища́ющее душе́вныя и тѣле́сныя омыва́ющее я́звы, пріи́де ны́нѣ, наста́, вѣ́рніи, стеце́мся и сіе́ любому́дренно пріи́мемъ.

Вре́мя яви́ся благо́е, въ боже́ственное души́ весе́ліе, вся́кое лице́ облача́ющее, пріиди́те, ве́село сіе́ пріи́мемъ, посто́мъ и моли́твою предочища́ющеся.

По́стъ, сле́зы, моли́тву, обы́чай смире́нный, на́съ ра́ди смири́вшемуся принесе́мъ, я́ко да въ де́нь воздержа́нія проще́ніе пода́стъ прегрѣше́ній на́шихъ.

Богоро́диченъ: Свѣтолу́чными Твои́ми блиста́ньми, Влады́чице Блага́я мíра, души́ моея́ тму́ отжени́ и но́щь грѣха́ моего́, да усе́рдно пою́ и блажу́ Тя́.

Иный, гла́съ 8:

Ирмо́съ: Вску́ю мя́ отри́нулъ еси́ [отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся].

Кресту́ Твоему́ покланя́юся, Го́споди Человѣколю́бче, и́мже мя́ спа́слъ еси́, и пою́ Стра́сти спаси́тельныя и Боже́ственныя, Влады́ко, и́миже страсте́й мои́хъ болѣ́зненныхъ изба́вихся, Сло́ве, въ жи́знь преходя́ невре́дную.

Кресту́ надѣ́ющеся, ле́сти проти́вныхъ отвраща́емся, въ не́мъ водрузи́вшеся, вѣ́рніи, позна́ни бы́хомъ Бо́гу, я́ко а́гнцы новорожде́нніи избра́нніи, и неле́стное млеко́ испи́хомъ.

Сла́ва, тро́иченъ: Отца́, и Сло́во вси́, и Свята́го Ду́ха, сла́вимъ во еди́номъ Естествѣ́, позна́ніе свѣ́тлое излага́юще, покланя́ющеся обои́мъ и раздѣля́юще Ли́цы, неслія́нно, непрело́жно служа́ще.

[И ны́нѣ,] богоро́диченъ: Упова́ніе конце́мъ, ра́дость рабо́мъ Твои́мъ Ты́ еси́, Дѣ́во Чи́стая, чту́щія любо́вію о́бразъ Тво́й, сохраня́й, Пречи́стая, и Твои́ми моли́твами всѣ́хъ на́съ чужда́го свободи́, я́ко Премилосе́рднѣйшая.

Сла́ва Тебѣ́, Бо́же на́шъ, сла́ва Тебѣ́.

Пра́вый пу́ть Тво́й, Го́споди, испра́ви всѣ́мъ рабо́мъ Твои́мъ, чту́щимъ любо́вію, поста́ по́прище утверди́, и приведе́нми на лу́чшее свята́го Твоего́ Ца́рствія на́съ сподо́би.

Ирмо́съ: Вску́ю мя́ отри́нулъ еси́ [отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся].

Пѣ́снь 6.

Ирмо́съ: Очи́сти мя́, Спа́се, [мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́].

Пости́вся Изба́витель, настоя́щее вре́мя на́мъ опредѣли́ душе́вныхъ скве́рнъ очисти́тельное, те́плымъ, вѣ́рніи, присту́пимъ се́рдцемъ, я́ко да пріи́мемъ проще́ніе.

Мытаре́во, Христе́, воздыха́ніе пріе́мъ и блудни́цы отъ души́ пла́чь приноси́мый, пріими́, я́ко Человѣколю́бецъ, на́ша мольбы́, очище́ніе на́мъ да́руя.

Сла́ва: Проповѣ́дникъ и проро́къ, му́ченикъ и апо́столъ Твои́хъ, преподо́бныхъ и святи́телей, и всѣ́хъ пра́ведныхъ Твои́хъ, Христе́, умоле́ньми, очище́ніе прегрѣше́ній душа́мъ на́шимъ низпосли́.

[И ны́нѣ,] богоро́диченъ: Еди́ная немощно́е человѣ́ческаго естества́, боже́ственнымъ Твои́мъ Рождество́мъ, Чи́стая, утверди́вшая, поспѣ́шница мнѣ́ яви́ся, къ по́стному входя́щу боже́ственному по́прищу.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Конда́къ свята́го. Аще святы́й не и́мать кондака́, глаго́лемъ му́чениченъ гла́са.

Пѣ́снь 7.

Ирмо́съ: Отроцы евре́йстіи въ пещи́ [попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки].

Дре́вле на колесни́цѣ о́гненной ноша́шеся Илія́, посто́мъ просвѣти́вся, о душе́, сего́ подража́ющи, плотскíя умертви́ по́хоти воздержа́ніемъ.

Се́ вре́мя воздержа́нія, явля́ющее тебѣ́ свѣ́тъ спасе́нія, не небрези́, душе́, Бо́гу долготерпя́щу, но усе́рдно возопíй: Благíй, уще́дри мя́!

Сла́ва: Отроки огради́вшій по́стъ, соблюде́ отъ огня́ неопали́мы; Іису́се, тѣ́хъ моли́твами, огня́ мя́ вѣ́чнаго изба́ви мно́гимъ Твои́мъ милосе́рдіемъ.

[И ны́нѣ,] богоро́диченъ: Еди́ная по́мощь человѣ́ковъ, Помо́щница на́мъ рабо́мъ Твои́мъ бу́ди во вре́мя воздержа́нія, я́ко да покая́ніемъ благоугожда́юще, пріи́мемъ небе́сное Ца́рство.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Пѣ́снь 8.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Покая́нія пе́щь усе́рдно возжже́мъ и сла́сти въ не́й попали́мъ вся́ тѣле́сныя, и огня́ бу́дущаго иску́съ не прія́ти Бога́таго въ ми́лости про́симъ, вопію́ще: свяще́нницы, благослови́те, лю́діе, превозноси́те во вся́ вѣ́ки.

Вхо́дное вре́мя поста́ на́мъ бу́детъ вся́каго грѣха́ отложе́нія вино́вное, да не до́лу преклони́мся, ниже́ уны́ло теце́мъ, я́ко да въ кра́ткихъ и ма́лыхъ дне́хъ мно́гія скве́рны умиле́ніемъ се́рдца измы́емъ, еди́наго Бо́га на́шего пою́ще.

Ангельстіи чи́ни, му́ченикъ собра́ніе, боже́ственныхъ апо́столъ ли́къ святы́й, преподо́бныхъ собо́ръ, святи́телей же и проро́ковъ, Тебе́ мо́лятся, Благíй Человѣколю́бче, покая́ніе и́стинное Твои́мъ рабо́мъ пода́ждь, во вре́мя воздержа́нія ны́нѣ вводи́маго.

Богоро́диченъ: Богороди́тельнице Всечи́стая, къ Тебѣ́ прибѣга́емъ, уще́дри на́съ благо́ю Твое́ю моли́твою и да́ждь благопримири́тельна Твоего́ Сы́на и Го́спода всѣ́мъ на́мъ, во вре́мя поще́нія ны́нѣ вводи́маго, во спасе́ніе вѣ́рныхъ, Тебе́ пѣсносло́вящихъ во вся́ вѣ́ки.

Трипѣ́снецъ:

Ирмо́съ: За зако́ны оте́ческія [блаже́нніи въ Вавило́нѣ ю́ноши, предбѣ́дствующе, царю́ющаго оплева́ша повелѣ́ніе безу́мное и, совоку́плени, и́мже не свари́шася огне́мъ, Держа́вствующему досто́йную воспѣва́ху пѣ́снь: Го́спода по́йте, дѣла́, и превозноси́те во вся́ вѣ́ки].

Наслѣ́діе оте́ческое не сохрани́вше, грѣхо́внымъ зако́номъ порабо́тихомся, но просте́ръ дла́ни Твоя́ на Крестѣ́ боже́ственнѣмъ, свобо́ду всѣ́мъ дарова́лъ еси́ и́мъ, его́же Ти́ вѣ́рою приво́димъ во дне́хъ святы́хъ, поми́луй ны́, Ми́лостиве, Тебе́ превознося́щія во вся́ вѣ́ки.

Кресто́мъ Твои́мъ разстоя́ніе, и граде́жа средостѣ́ніе разори́вый, и ми́ръ въ конца́хъ обнови́вый Бога́тый ми́рствующимъ, да́руй на́мъ прейти́, Христе́, постоя́ніемъ бу́дущее поще́ніе, Го́спода пою́щимъ непреста́нно и превознося́щимъ во вся́ вѣ́ки.

Поста́ благода́ть дне́сь со́лнечныя лучи́ всѣ́мъ предлага́етъ, предочища́ющи мра́къ отъ грѣха́, содержи́ми страстьми́ разли́чными, въ ра́дости преше́дше, пріи́мемъ да́ръ любому́дренно, — Го́спода по́йте, — вопію́ще, — и превозноси́те во вся́ вѣ́ки.

Го́рько объе́мъ первозда́нный, въ раи́ дре́вле снѣ́дь безслове́сно, отве́ржеся и осужде́нъ, отъ сла́дости изгна́нъ бы́сть, но на Дре́вѣ гвоздми́ Пригвожде́нъ, лука́вное писа́ніе пригвозди́лъ еси́ грѣха́ его́. Тѣ́мже Твое́ мно́гое благоутро́біе воспѣва́емъ во вся́ вѣ́ки.

Зако́нъ поста́ отри́нувше, въ про́пасти грѣха́ поползо́хомся, и поста́ востре́бовахомъ ны́нѣ вводи́маго, его́же, Ще́дре, провожда́ющимъ на́мъ, благода́ть съ небесе́ низпосли́ и ми́ръ бога́тый, Го́спода по́йте, дѣла́, и превозноси́те во вся́ вѣ́ки.

Богоро́диченъ: Па́дающихъ исправле́ніе, грѣ́шниковъ хода́таице, стра́нныхъ прохлажде́ніе, ско́рбныхъ утѣше́ніе, Пресвята́я Дѣ́во, души́ моея́ печа́ль разори́, Чи́стая, и утѣше́ніе свы́ше отъ Бо́га пода́ти ми́ моли́ся пою́щу усе́рдно, Тя́ превознося́щу во вся́ вѣ́ки.

Иный:

Ирмо́съ: Ангели и небеса́, [на престо́лѣ сла́вы сѣдя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во вѣ́ки].

Пригвожде́ннаго пло́тію на Крестѣ́, Ще́дре, ви́дящи Тя́, тва́рей естество́ премѣня́шеся: свѣ́тъ дне́ во тму́, дви́жашеся земля́ и вся́ колеба́хуся.

На высоту́ Креста́ человѣ́ческое естество́ совозвы́сивъ, и отъ ре́бръ Твои́хъ Боже́ственныхъ бога́тство источи́лъ еси́ спасе́нія, вѣ́рою покланя́ющимся, Спа́се, пречи́стѣй Стра́сти Твое́й.

Благослови́мъ Отца́, и Сы́на, и Свята́го Ду́ха, Го́спода.

Тро́иченъ: Еди́нъ Бо́гъ у́бо Тро́ица, ни Отцу́ изступи́вшу въ сыновство́, ниже́ Сы́ну премѣни́вшуся во исхожде́ніе, но сво́йственная и обое́, Свѣ́тъ, Бо́га, Три́ сла́влю во вѣ́ки.

[И ны́нѣ,] богоро́диченъ: Ка́ко родила́ еси́, рцы́, отъ Отца́ безлѣ́тно предпросія́вша и со Святы́мъ Ду́хомъ воспѣва́ема? Или́ я́коже вѣ́сть еди́нъ, Благоволи́вый роди́тися изъ Тебе́ во вѣ́ки.

Сла́ва Тебѣ́, Бо́же на́шъ, сла́ва Тебѣ́.

Покая́ніе на́ше, я́ко благíй естество́мъ, пріе́мъ, вра́жіихъ сѣте́й изба́ви, Го́споди, да вѣ́рою и любо́вію Твое́ ны́нѣ воспои́мъ свято́е Влады́чество.

Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].

Ирмо́съ: Ангели и небеса́, на престо́лѣ сла́вы сѣдя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во вѣ́ки.

И стихосло́вится Честнѣ́йшая...

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Се́ свѣтоно́сное пріи́де вре́мя, святы́й де́нь просія́, мра́чныхъ страсте́й твои́хъ отбѣ́гни, о душе́, и зари́ воспріими́ наставля́ющія тя́ къ свѣ́ту, умиле́ніе, я́ко вино́, пію́щи весе́лися, и сласте́й пія́нство возненави́ждь.

Яко вои́стинну блажа́йшее вре́мя поще́нія, Христе́, е́же да́лъ еси́ всѣ́мъ вѣ́рнымъ на побѣжде́ніе грѣхо́въ, и очище́ніе спаси́тельное, и дарова́ній прія́телище, въ не́мже Тя́ мо́лимъ: прича́стники, Спа́се, вся́ ны́ благи́хъ Твои́хъ сотвори́.

Обы́чно ми́лости Твоя́ на на́съ излива́я, Ще́дре, бога́тыя, да́ждь на́мъ сле́зы, очища́ющія скве́рны и помышле́нія лю́бящихъ Тя́, вѣ́ру и любо́вь чи́стую, бога́тное покая́ніе, присвое́ніе соверше́нное къ Тебѣ́, еди́ному Многоми́лостивому.

Всѣ́хъ а́нгеловъ боже́ственное мно́жество и святы́хъ ли́цы достохва́льніи, Блага́го ны́нѣ моли́те прилѣ́жно, я́ко да боже́ственное по́прище сіе́, поще́нія настоя́щее, тещи́ непреткнове́нно ны́ укрѣпи́тъ и побѣдоно́сцы содѣ́лаетъ.

Богоро́диченъ: Благолюби́вая Дѣ́во, блага́го ро́ждшая Спа́са, ублажи́ вся́ ны́, страстьми́ безмѣ́рными и помышле́ньми озло́бленныя, Влады́чице, и отягче́нныя грѣхо́въ бре́меньми неудобоно́сными, я́ко да Тя́ по до́лгу, я́ко Богоро́дицу, велича́емъ.

Иный:

Ирмо́съ, [гла́съ 2]: Недоумѣ́етъ вся́къ [язы́къ благохвали́ти по достоя́нію, изумѣва́етъ же у́мъ и премíрный пѣ́ти Тя́, Богоро́дице: оба́че Блага́я су́щи, вѣ́ру пріими́, и́бо любо́вь вѣ́си Боже́ственную на́шу, Ты́ бо христіа́нъ еси́ Предста́тельница, Тя́ велича́емъ].

Недоумѣ́етъ вся́кое естество́ а́нгеловъ и человѣ́ковъ Твое́ благоутро́біе благодари́ти, Благодѣ́телю, я́ко пло́тію хотя́ на́съ ра́ди обнища́лъ еси́ и на Дре́вѣ о на́съ распросте́рлся еси́, кля́тва бы́въ, да пе́рвую оты́меши кля́тву человѣ́чества.

Свѣ́тлый де́нь воздержа́нія наста́, свѣ́тлымъ лице́мъ пріиди́те, усря́щимъ, душе́ моя́, Влады́ку, благода́ти низпосла́тися свы́ше на́мъ прося́ще и мно́гихъ прегрѣше́ній исправле́ніе обрѣсти́, я́ко да стра́шнѣйшею гее́нною не искуси́мся та́мо.

Во тмѣ́ грѣхо́въ содержи́мымъ покая́нія ны́нѣ свяще́нніи вхо́ды наста́ша, всѣ́хъ ду́ши просвѣща́ющія. Тѣ́мже, душе́ моя́, омраче́нія уклони́ся сы́тости страсте́й, потщи́ся, да сла́дости вѣ́чныя наслади́шися та́мо.

На Дре́вѣ ру́цѣ во́лею распросте́ръ, разстоя́щаяся вся́ собра́лъ еси́, Жизнода́вче, копіе́мъ же Твоя́ отве́рзлъ, Долготерпѣли́ве, ре́бра, побѣжде́ніе отъ ре́бръ прозя́бшее испра́вилъ еси́ на́мъ. Тѣ́мже благодаря́ще пое́мъ благоутро́біе Твое́.

Богоро́диченъ: Предста́тельство всѣ́хъ на Тя́ надѣ́ющихся, въ бѣда́хъ бо́драя су́щи Предста́тельнице, Богоро́дице, вѣ́чнующія изба́ви на́съ гее́нны и належа́щихъ му́къ го́рькихъ, я́ко да до́лжно пое́мъ вели́чія Твоя́.

Иный.

Ирмо́съ: Чу́жде ма́теремъ дѣ́вство, [и стра́нно дѣ́вамъ дѣторожде́ніе; на Тебѣ́, Богоро́дице, обоя́ устро́ишася. Тѣ́мъ Тя́, вся́ племена́ земна́я, непреста́нно велича́емъ].

Язвамъ покланя́емся Твои́мъ, Жизнода́вче, и́миже грѣха́ страсте́й изба́вльшеся, честны́мъ Кресто́мъ Твои́мъ позна́хомся запеча́тствовани, во спасе́ніе и заступле́ніе отъ вся́каго прило́га вра́жія.

Озари́ Креста́ Твоего́ сія́нми, Укрествова́выйся во́лею за всѣ́хъ спасе́ніе, ду́ши пою́щихъ Стра́сти Твоя́, Всеми́лостиве, и на стезю́ жи́знь на́шу упра́ви и наста́ви.

Согрѣши́хомъ, преступи́вше за́повѣди Твоя́, и пути́ Боже́ственныхъ зачине́ній Твои́хъ, Спа́се, уклони́хомся дале́че, Человѣколю́бче, нерадѣ́ніемъ, но, Ще́дрый, воззови́ отъ ле́сти ду́ши на́ша.

Сла́ва, тро́иченъ: Хвала́, че́сть Тро́ицѣ лѣ́потствуетъ, и сла́ва, я́ко еди́ному Госпо́дьству и еди́ному Ца́рству, несли́тно, несѣ́чно, Еди́ницѣ Божество́мъ покланя́емой, несѣ́чной бо Естество́мъ, непреста́нно велича́емѣй.

[И ны́нѣ,] богоро́диченъ: Уми́лостивися моли́твами Всечи́стыя Ма́тере Твоея́, Всеще́дре Всецарю́ сла́вы, егда́ пріи́деши суди́ти рабы́ Твоя́, я́ко Ми́лостивъ, въ Тя́ бо вси́ вѣ́ровахомъ и Тя́ Бо́га зна́емъ.

Сла́ва Тебѣ́, Бо́же на́шъ, сла́ва Тебѣ́.

Свѣтоно́сный ны́нѣ надходя́щій по́стъ пріе́млетъ трапе́зу подвиго́въ предложе́нную, сего́ ра́ди сея́ тре́звенно вси́ честну́ю ча́шу чисти́тельныхъ сле́зъ воспріи́мемъ, вѣ́рніи, да неисцѣ́льными слеза́ми не искуси́мся та́мо.

Катава́сія: Чу́жде ма́теремъ дѣ́вство, и стра́нно дѣ́вамъ дѣторожде́ніе; на Тебѣ́, Богоро́дице, обоя́ устро́ишася. Тѣ́мъ Тя́, вся́ племена́ земна́я, непреста́нно велича́емъ.

Свѣти́ленъ тро́ичный гла́са, три́жды. И про́чее.

На стихо́внѣ пое́мъ самогла́сенъ дне́, гла́съ 6:

Пре́жде спаси́тельнаго Креста́ грѣху́ ца́рствующу, нече́стію держа́вствующу, человѣ́ковъ ублажа́шеся пи́ща тѣле́сная, и о плотски́хъ жела́ніихъ ма́ли небрежа́ху; а отне́лѣже Кре́стное та́инство содѣ́яся и де́монское угасе́ мучи́тельство богоразу́міемъ, небе́сная на земли́ добродѣ́тель жи́тельствуетъ. Тѣ́мже по́стъ почита́ется, воздержа́ніе сія́етъ, моли́тва исправля́ется, и свидѣ́тель — вре́мя настоя́щее, да́нное на́мъ отъ распе́ншагося Христа́ Бо́га, во спасе́ніе ду́шъ на́шихъ.

И глаго́лемъ стихи́.

Сти́хъ: Испо́лнихомся зау́тра ми́лости Твоея́, Го́споди, [и возра́довахомся, и возвесели́хомся. Во вся́ дни́ на́ша возвесели́хомся, за дни́ въ ня́же смири́лъ ны́ еси́, лѣ́та въ ня́же ви́дѣхомъ зла́я. И при́зри на рабы́ Твоя́ и на дѣла́ Твоя́, и наста́ви сы́ны и́хъ].

И повторя́емъ самогла́сенъ. Та́же и му́чениченъ.

Та́же сти́хъ: И бу́ди свѣ́тлость Го́спода Бо́га на́шего [на на́съ, и дѣла́ ру́къ на́шихъ испра́ви на на́съ и дѣ́ло ру́къ на́шихъ испра́ви].

Го́споди, въ па́мять святы́хъ Твои́хъ вся́ тва́рь пра́зднуетъ, небеса́ ра́дуются со а́нгелы, и земля́ весели́тся съ человѣ́ки. Тѣ́хъ моли́твами поми́луй на́съ.

Сла́ва, и ны́нѣ, крестобогоро́диченъ:

Всечи́стая я́ко ви́дѣ Тебе́ на Крестѣ́ повѣ́шена, пла́чущи, вопія́ше ма́терски: Сы́не Мо́й и Бо́же Мо́й, сладча́йшее Мое́ Ча́до, ка́ко терпи́ши Стра́сть поно́сную?

Та́же: Бла́го е́сть... И трисвято́е, [по Отче на́шъ...]. Тропа́рь: Въ хра́мѣ стоя́ще... Го́споди, поми́луй, 40. И глаго́лется сти́хъ отъ свяще́нника: Сы́й благослове́нъ Христо́съ Бо́гъ на́шъ, всегда́, ны́нѣ и при́сно, и во вѣ́ки вѣко́въ, ами́нь. Небе́сный Царю́... И твори́мъ три́ покло́ны вели́кія, и глаго́лемъ моли́тву та́йно преподо́бнаго отца́ на́шего Ефре́ма Си́рина: Го́споди и Влады́ко живота́ моего́.., и про́чее. И твори́мъ и про́чія покло́ны.

Совокупля́емъ же и пе́рвый ча́съ, я́ко обы́чно. По обы́чныхъ же покло́нѣхъ чте́мъ оглаше́нія преподо́бнаго отца́ на́шего Ѳео́дора Студи́та. Та́же отпу́стъ.



ВЪ ТОЙЖЕ ПЯТОКЪ СЫРНЫЙ,
Пое́мъ часы́ съ покло́ны, я́коже и въ сре́ду явле́но е́сть.

На 6-мъ часѣ́ пое́мъ тропа́рь проро́чества, гла́съ 8:

Да́ждь на́мъ по́мощь отъ печа́ли, Го́споди, и спаси́ ны́, рожде́йся отъ Дѣ́вы, Человѣколю́бче. Повторя́юще то́йже.

Проки́менъ гла́съ 1: Бу́ди, Го́споди, ми́лость Твоя́ на на́съ,* я́коже упова́хомъ на Тя́. Сти́хъ: Ра́дуйтеся, пра́ведніи, о Го́сподѣ, пра́вымъ подоба́етъ похвала́.

Проро́чества Заха́ріина чте́ніе. [Глава́ 8.]

Си́це глаго́летъ Госпо́дь Вседержи́тель: се́ Азъ спасу́ лю́ди Моя́ отъ земли́ восто́чныя и отъ земли́ за́падныя, и введу́ и́хъ (въ зе́млю и́хъ,) и вселю́ся посредѣ́ Іерусали́ма, и бу́дутъ Ми́ въ лю́ди, и Азъ бу́ду и́мъ въ Бо́га, во и́стинѣ и въ пра́вдѣ. Си́це глаго́летъ Госпо́дь Вседержи́тель: да укрѣпя́тся ру́цѣ ва́съ, слы́шащихъ во дне́хъ си́хъ словеса́ сія́ отъ у́стъ проро́ческихъ, отъ него́же дне́ основа́ся хра́мъ Го́спода Вседержи́теля и це́рковь отне́лѣже созда́ся. Зане́ пре́жде дне́й о́нѣхъ мзда́ человѣ́комъ не бѣ́ во успѣ́хъ и мзда́ ското́мъ не бя́ше, и исходя́щему и входя́щему не бѣ́ ми́ра отъ печа́ли, и послю́ вся́ человѣ́ки, коего́ждо на и́скренняго своего́. И ны́нѣ не по дне́мъ о́нѣмъ пре́жнимъ Азъ сотворю́ оста́нку люде́й си́хъ, глаго́летъ Госпо́дь Вседержи́тель. Но покажу́ ми́ръ: виногра́дъ да́стъ пло́дъ сво́й, и земля́ да́стъ жи́та своя́, и не́бо да́стъ ро́су свою́, и наслѣ́дити сотворю́ оста́нкамъ люде́й Мои́хъ си́хъ вся́ сія́. И бу́детъ: я́ко бѣ́сте въ кля́твѣ во язы́цѣхъ, до́ме Іу́довъ и до́ме Изра́илевъ, та́ко спасу́ вы́ и бу́дете въ благослове́ніи; дерза́йте и укрѣпля́йтеся рука́ми ва́шими! Зане́ си́це глаго́летъ Госпо́дь Вседержи́тель: я́коже помы́слихъ озло́бити вы́, внегда́ прогнѣ́ваша Мя́ отцы́ ва́ши, глаго́летъ Госпо́дь Вседержи́тель, и не раска́яхся, та́ко уста́вихъ и умы́слихъ во дни́ сія́ добро́ сотвори́ти Іерусали́му и до́му Іу́дову. Дерза́йте! Сія́ словеса́, я́же сотворите́: глаго́лите и́стину кíйждо и́скреннему своему́, и́стину и су́дъ ми́ренъ суди́те во вратѣ́хъ ва́шихъ, и кíйждо зло́бы и́скренняго своего́ не помышля́йте въ сердца́хъ ва́шихъ, и кля́твы лжи́выя не люби́те, зане́ вся́ сія́ возненави́дѣхъ, глаго́летъ Госпо́дь Вседержи́тель.

Проки́менъ, гла́съ 3: По́йте Бо́гу на́шему, по́йте,* по́йте Царе́вы на́шему, по́йте. Сти́хъ: Вси́ язы́цы, восплещи́те рука́ми, [воскли́кните Бо́гу гла́сомъ ра́дованія].

И про́чее все́, я́коже въ сре́ду сы́рную указа́ся.

[Зри́:] Подоба́етъ вѣ́дати, я́ко въ суббо́ту и недѣ́лю сы́рную мине́я не пое́тся, но послѣ́дованіе случа́ющихся святы́хъ пое́тся на повече́ріяхъ или́ егда́ церквонача́льникъ хо́щетъ.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 43 – 49.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.