Церковный календарь
Новости


2018-11-18 / russportal
Прот. Михаилъ Помазанскій. Признаки Христовой Церкви (1976)
2018-11-18 / russportal
Прот. Михаилъ Помазанскій. О важности догмата о Церкви (1976)
2018-11-18 / russportal
Свт. Василій, еп. Кинешемскій. Бесѣда 8-я на Евангеліе отъ Марка (1996)
2018-11-18 / russportal
Свт. Василій, еп. Кинешемскій. Бесѣда 7-я на Евангеліе отъ Марка (1996)
2018-11-18 / russportal
Еп. Григорій (Граббе). Докладъ Архіерейскому Сѵноду РПЦЗ (1996)
2018-11-18 / russportal
Еп. Григорій (Граббе). Психіатрія и исповѣдь (1996)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 49-я (1922)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 48-я (1922)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 47-я (1922)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 46-я (1922)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 45-я (1922)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 44-я (1922)
2018-11-17 / russportal
Еп. Григорій (Граббе). Начало болѣзней (1996)
2018-11-17 / russportal
Еп. Григорій (Граббе). Письмо въ ред. газеты "Новое Русское Слово" (1996)
2018-11-17 / russportal
"Почему правосл. христ. нельзя быть экуменистомъ". 3-е основаніе (1992)
2018-11-17 / russportal
"Почему правосл. христ. нельзя быть экуменистомъ". 2-е основаніе (1992)
Новости въ видѣ
RSS-канала: .
Сегодня - воскресенiе, 18 ноября 2018 г. Сейчасъ на порталѣ посѣтителей - 16.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ПОНЕДѢЛЬНИКЪ ПЕРВЫЯ СЕДМИЦЫ ВЕЛИКАГО ПОСТА.

ВЪ ТУЮЖДЕ НЕДѢЛЮ СЫРНУЮ ВЕЧЕРА,

По нача́льномъ псалмѣ́, на Го́споди воззва́хъ.., поста́вимъ стихо́въ 10, отъ Изведи́ изъ темни́цы.., и пое́мъ стихи́ры 4 покая́нны окто́иха на ряду́ гла́са, е́же е́сть пи́саны два́ ве́черъ на стихо́внѣ, и два́ у́треннихъ стихо́вныхъ. [Та́кожде и въ про́чія недѣ́ли, отъ сея́ да́же до пя́тыя свята́го поста́. Го́споди воззва́хъ... пое́мъ на гла́съ и́же во осмогла́сникѣ на ряду́.] И въ тріо́ди 3 и въ мине́и 3.

Стихи́ры, гла́съ 2. Подо́бенъ: Егда́ отъ дре́ва. Творе́ніе господи́на Іо́сифа.

Воздержа́ніемъ тѣ́ло смири́ти вси́ потщи́мся, боже́ственное преходя́ще по́прище непоро́чнаго поста́, и моли́твами, и слеза́ми Го́спода, спаса́ющаго на́съ взы́щемъ, и забве́ніе зло́бы всеконе́чное сотвори́мъ, вопію́ще: согрѣши́хомъ Ти́, спаси́, я́коже дре́вле ниневи́тяны, Христе́ Царю́, и о́бщники ны́ сотвори́ небе́снаго Ца́рствія, Благоутро́бне.

Себе́ отчаява́ю, помышля́ю дѣла́ моя́, Го́споди, вся́каго муче́нія досто́йная! Се́ бо, презрѣ́въ честны́я Твоя́, Спа́се, за́повѣди, блу́дно мое́ житіе́ ижди́хъ. Тѣ́мже молю́ся: ту́чами покая́нія мя́ очи́стивъ, посто́мъ и моле́ніемъ я́ко еди́нъ Ми́лостивый просвѣти́ и не гнуша́йся мене́, Благодѣ́телю всѣ́хъ и Преблагíй.

Инъ, господи́на Ѳео́дора, гла́съ то́йже. Подо́бенъ: Па́че ума́ даро́въ.

По́стное вре́мя свѣ́тло начне́мъ, къ подвиго́мъ духо́внымъ себе́ подложи́вше: очи́стимъ ду́шу, очи́стимъ пло́ть, пости́мся я́коже въ снѣ́дехъ отъ вся́кія стра́сти, добродѣ́тельми наслажда́ющеся ду́ха, въ ни́хже соверша́ющеся любо́вію, да сподо́бимся вси́ ви́дѣти всечестну́ю Стра́сть Христа́ Бо́га и святу́ю Па́сху, духо́вно ра́дующеся.

Та́же въ мине́и свято́му, подо́бны 3.

Аще ли и́мать самогла́сенъ: Сла́ва. Аще ли нѣ́сть: Сла́ва, и ны́нѣ, богоро́диченъ, въ то́йже гла́съ мине́и.

Вхо́дъ съ кади́льницею. Свѣ́те ти́хій...

Проки́менъ гла́съ 8: Не отврати́ лица́ Твоего́ отъ о́трока Твоего́, я́ко скорблю́, ско́ро услы́ши мя́, вонми́ души́ мое́й и изба́ви ю́. Сти́хъ: Спасе́ніе Твое́, Бо́же, да пріи́метъ мя́. Сти́хъ: Да у́зрятъ ни́щіи и возвеселя́тся. Сти́хъ: Взыщи́те Бо́га, и жива́ бу́детъ душа́ ва́ша. И па́ки высоча́йшимъ гла́сомъ: Не отврати́ лица́ Твоего́...

[Зри́:] Подоба́етъ вѣ́дати, я́ко во всѣ́хъ недѣ́ляхъ святы́я Четыредеся́тницы во свѣти́льничное быва́етъ вхо́дъ, ра́ди вели́кихъ проки́меновъ.

Сподо́би Го́споди... Покло́ны 3 и ектенія́.

На стихо́внѣ самогла́сенъ, гла́съ 4:

Возсія́ благода́ть Твоя́, Го́споди, возсія́ просвѣще́ніе ду́шъ на́шихъ. Се́ вре́мя благопрія́тное, се́ вре́мя покая́нія: отложи́мъ дѣла́ тмы́ и облече́мся во ору́жія свѣ́та, я́ко да преплы́вше поста́ вели́кую пучи́ну, въ тридне́вное Воскресе́ніе дости́гнемъ Го́спода и Спа́са на́шего Іису́са Христа́, спаса́ющаго ду́ши на́ша.

Сти́хъ: Къ Тебѣ́ возведо́хъ о́чи мои́, [Живу́щему на небеси́. Се́, я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́].

И повторя́емъ то́йже: [Возсія́ благода́ть Твоя́, Го́споди, возсія́ просвѣще́ніе ду́шъ на́шихъ. Се́ вре́мя благопрія́тное, се́ вре́мя покая́нія: отложи́мъ дѣла́ тмы́ и облече́мся во ору́жія свѣ́та, я́ко да преплы́вше поста́ вели́кую пучи́ну, въ тридне́вное Воскресе́ніе дости́гнемъ Го́спода и Спа́са на́шего Іису́са Христа́, спаса́ющаго ду́ши на́ша.]

Та́же сти́хъ: Поми́луй на́съ, Го́споди, поми́луй на́съ, [я́ко помно́гу испо́лнихомся уничиже́нія, наипа́че напо́лнися душа́ на́ша поноше́нiя гобзу́ющихъ и уничиже́нiя го́рдыхъ].

И му́чениченъ: Прославля́емый въ па́мятехъ святы́хъ Твои́хъ, Христе́ Бо́же! Отъ ни́хъ умоля́емь, низпосли́ на́мъ ве́лію ми́лость.

Сла́ва, самогла́сенъ въ мине́и, а́ще и́мать. И ны́нѣ, богоро́диченъ по гла́су мине́и.
Аще ли не и́мать: Сла́ва, и ны́нѣ, богоро́диченъ, гла́съ то́йже. Подо́бенъ: Яко до́бля.

Ангельстіи чи́ни Тя́, Богома́ти, прославля́ютъ: Бо́га бо, Всечи́стая, родила́ еси́, Отцу́ и Ду́ху соприсносу́щна, и а́нгельская во́инства отъ несу́щаго хотѣ́ніемъ поста́вивша. Его́же моли́ отъ тли́ спасти́ и просвѣти́ти ду́ши правосла́вныхъ, Тя́ воспѣва́ющихъ, Всечи́стая.

Ны́нѣ отпуща́еши... Трисвято́е [и] покло́ны три́. Пресвята́я Тро́ице... Отче на́шъ...

И настоя́щія тропари́, гла́съ 4:

Богоро́дице Дѣ́во, ра́дуйся, Благода́тная Марíе, Госпо́дь съ Тобо́ю! Благослове́нна Ты́ въ жена́хъ, и благослове́нъ Пло́дъ чре́ва Твоего́, я́ко Спа́са родила́ еси́ ду́шъ на́шихъ. И твори́мъ покло́нъ еди́нъ.

Сла́ва: Крести́телю Христо́въ, всѣ́хъ на́съ помяни́, да изба́вимся отъ беззако́ній на́шихъ: тебѣ́ бо даде́ся благода́ть моли́тися за ны́. Покло́нъ еди́нъ.

И ны́нѣ: Моли́те за ны́ святíи апо́столи, святíи вси́, да изба́вимся отъ бѣ́дъ и скорбе́й: ва́съ бо те́плыя предста́тели ко Спа́су стяжа́хомъ. Покло́нъ еди́нъ.

Подъ Твое́ благоутро́біе прибѣга́емъ, Богоро́дице, моле́нія на́ша не пре́зри во обстоя́ніи, но отъ бѣ́дъ изба́ви ны́, еди́на Чи́стая, еди́на Благослове́нная. Безъ покло́на.

Го́споди поми́луй, 40, кро́ткимъ и ти́химъ гла́сомъ. Сла́ва, и ны́нѣ... Честнѣ́йшую херуви́мъ... Именемъ Госпо́днимъ благослови́, о́тче. Свяще́нникъ: Сы́й благослове́нъ Христо́съ Бо́гъ на́шъ, всегда́, ны́нѣ и при́сно, и во вѣ́ки вѣко́въ. Мы́ же: Ами́нь. И моли́тву: Небе́сный Царю́...

И твори́мъ три́ покло́ны вели́кія и глаго́лемъ моли́тву преподо́бнаго Ефре́ма Си́рина:

Го́споди и Влады́ко живота́ моего́! Ду́хъ пра́здности, уны́нія, любонача́лія и праздносло́вія не да́ждь ми́.

Ду́хъ же цѣлому́дрія, смиреному́дрія, терпѣ́нія и любве́, да́руй ми́, рабу́ Твоему́.

Ей, Го́споди Царю́, да́руй ми́ зрѣ́ти моя́ прегрѣше́нія и не осужда́ти бра́та моего́, я́ко благослове́нъ еси́ во вѣ́ки вѣко́въ, ами́нь.

И цѣлу́емъ святы́я и честны́я ико́ны. И глаго́летъ предстоя́тель: Сла́ва Тебѣ́, Христе́ Бо́же, упова́ніе на́ше, сла́ва Тебѣ́! И быва́етъ моли́тва отъ свяще́нника и соверше́нный отпу́стъ. По вече́рни же въ трапе́зѣ быва́етъ утѣше́ніе бра́тіи.

[Зри:] По воста́ніи же отъ трапе́зы, повече́ріе пое́мъ ма́лое по обы́чаю, съ мета́ніи и покло́ны по́стными. На Сла́ва въ вы́шнихъ.., мета́нія 3. [Аще бы́ло бдѣ́ніе, кано́нъ Богоро́дицѣ не глаго́лется.] Досто́йно е́сть... Трисвято́е [и] мета́нія 3. И обы́чныя тропари́. Го́споди поми́луй, 40. Иже на вся́кое вре́мя... Іере́й: Бо́же, уще́дри ны́... Покло́ны 3 вели́кія, съ моли́твою свята́го Ефре́ма: Го́споди и Влады́ко... И про́чихъ 12. Та́же: Трисвято́е, [и] по Отче на́шъ... Го́споди поми́луй, 12 и моли́тва: Нескве́рная... И да́ждь на́мъ... И отпу́стъ.

И и́мже о́бразомъ указа́ся слу́жба вече́рни и повече́рія сея́ недѣ́ли, си́це да быва́етъ и въ про́чія, да́же до пя́тыя недѣ́ли святы́я Четыредеся́тницы, измѣня́емымъ нѣ́коимъ, о ни́хже на свои́хъ и́мъ мѣ́стѣхъ бу́детъ.

[Зри́:] Подоба́етъ вѣ́дати, я́ко а́ще бу́детъ бра́ту на́шему отыти́ ко Го́споду во святы́хъ си́хъ дне́хъ посредѣ́ седми́цы, не быва́ютъ трети́ны его́, да́же до пятка́ ве́чера, тогда́ бо соверша́ется паннихи́да его́, подо́бнѣ и въ суббо́ту литургíя его́. Во гряду́щую же суббо́ту быва́ютъ девяти́ны его́, а́ще случи́тся, а́ще ли ни́. Четыредесяти́ны же его́ быва́ютъ, егда́ число́ дне́й его́ испо́лнится. Приноше́нія же и па́мяти его́ начина́ются отъ Но́выя недѣ́ли, да́же до исполне́нія дне́й четы́редесяти.

Нача́ло Свята́го и Вели́каго поста́.

ВЪ ПОНЕДѢЛЬНИКЪ ПЕРВЫЯ СЕДМИЦЫ

Зна́менаетъ параекклисіа́рхъ къ свѣ́ту, ко́снѣе, ра́ди вече́рняго утѣше́нія, и собира́емся вси́ по обы́чаю въ це́рковь. Пое́мъ полу́нощницу безъ покло́новъ, то́кмо въ коне́цъ три́ покло́ны вели́кія, съ моли́твою: Го́споди и Влады́ко... Сіе́ же быва́етъ въ 1-й де́нь то́кмо. Въ про́чія же дни́ свята́го и вели́каго поста́ пое́мъ полу́нощницу всю́ съ покло́ны 16, по обы́чаю. Та́же воста́въ, іере́й твори́тъ обы́чное мета́ніе настоя́телю, и вхо́дитъ во святы́й олта́рь, и пріе́мъ кади́льницу, ста́нетъ предъ свято́ю трапе́зою, и кадя́ крестообра́зно, возгласи́тъ: Благослове́нъ Бо́гъ на́шъ... И на́мъ отвѣща́вшимъ: Ами́нь. Исхо́дитъ іере́й и кади́тъ, а уста́вленный псалмопѣ́вецъ глаго́летъ Трисвято́е, всегда́ кромѣ́ мета́ній, [и] по Отче на́шъ... Возглаша́етъ іере́й: Яко Твое́ е́сть ца́рство... И по ами́нѣ: Го́споди, поми́луй, 12. [Сла́ва, и ны́нѣ.] Пріиди́те поклони́мся.., три́жды, безъ мета́ній. И псало́мъ 19-й и 20-й. По концѣ́ и́хъ, Трисвято́е, безъ мета́ній, [и] по Отче на́шъ.., тропари́ обы́чныя. Си́мъ глаго́лемымъ, кади́тъ іере́й святы́й олта́рь, и всю́ це́рковь. Та́же, ектенія́: Поми́луй на́съ, Бо́же... Та́же: О Благочести́вѣйшемъ... и О Святѣ́йшемъ Прави́тельствующемъ Сѵно́дѣ... Возгла́съ: Яко Ми́лостивъ и Человѣколю́бецъ... Чте́цъ: Ами́нь. И глаго́летъ: Именемъ Госпо́днимъ благослови́, о́тче. И а́біе іере́й: Сла́ва Святѣ́й, и Единосу́щнѣй... И про́чая. Бра́тъ же, его́же е́сть де́нь, ста́въ на урече́нномъ мѣ́стѣ, глаго́летъ шестопса́лміе со вся́кимъ внима́ніемъ, не борзя́ся, но со стра́хомъ Бо́жіимъ, я́ко къ Самому́ Бо́гу бесѣ́дующи неви́димо. И не и́мать кто́ вла́сти шепты́ твори́ти, ни́же плю́нути, или́ хра́кнути, но па́че внима́ти отъ псало́мника глаго́лемымъ, ру́цѣ иму́ще согбе́ны къ пе́рсемъ, главы́ же преклоне́ны и о́чи иму́ще до́лу, серде́чныма очи́ма зря́ще къ восто́комъ, да мо́лимся о грѣсѣ́хъ на́шихъ, помина́юще сме́рть, и бу́дущую му́ку, и жи́знь вѣ́чную. Въ нача́ло же 102-го псалма́ глаго́летъ іере́й у́треннія моли́твы. По сконча́ніи же псалмо́въ: Сла́ва, И ны́нѣ. Аллилу́ія.., три́жды. Та́же: ектенія́ вели́кая и возгла́съ. Пое́тъ же учине́нный мона́хъ: Аллилу́ія.., во гла́съ прилучи́вшагося въ окто́ихѣ гла́са. Сти́хъ 1: Отъ но́щи у́тренюетъ ду́хъ мо́й къ Тебѣ́, Бо́же, зане́ свѣ́тъ повелѣ́нія Твоя́ [на земли́]. Сти́хъ 2: Пра́вдѣ научи́теся, живу́щіи на земли́. Сти́хъ 3: За́висть пріи́метъ лю́ди ненака́занныя. Сти́хъ 4: Приложи́ и́мъ зла́, Го́споди, приложи́ зла́ сла́внымъ земли́. И по ко́емждо стихѣ́: Аллилу́ія.., три́жды. Та́же тро́ичны гла́са. Пое́мъ же со умиле́ніемъ велегла́сно и ко́сно съ пѣ́ніемъ. На 2-мъ стихѣ́: Сла́ва... А на тре́тіемъ: И ны́нѣ... Та́же стихосло́вимъ еди́ну каѳи́сму Псалтира́. По антифо́нѣ же, на Аллилу́ія.., твори́мъ покло́ны три́, вси́ ра́вно, послѣ́дующе игу́мену или́ екклисіа́рху.

По пе́рвой каѳи́смѣ сѣда́льны умили́тельныя осмогла́сника. Та́же чте́ніе во свято́мъ Ефре́мѣ.

[Зри́:] Зане́ отъ того́ дне́ начина́ется святы́й Ефре́мъ и чте́тся до пятка́ Цвѣтоно́сныя недѣ́ли.

По 2-мъ стихосло́віи сѣда́ленъ тріо́ди господи́на Іо́сифа, гла́съ 2. Подо́бенъ: Милосе́рдія су́щи.

Поста́ боже́ственнымъ нача́ткомъ умиле́ніе стя́жимъ, отъ души́ вопію́ще: Влады́ко Христе́, моли́тву на́шу пріими́, я́ко избра́нное кади́ло, и изба́ви на́съ, мо́лимся, злосмра́дныя тли́ и му́ки стра́шныя, я́ко еди́нъ Сы́й Благоувѣ́тливый.

Сла́ва, то́йже. И ны́нѣ, богоро́диченъ. Подо́бенъ:

Милосе́рдія су́щи исто́чникъ, ми́лости сподо́би на́съ, Богоро́дице, при́зри на лю́ди согрѣши́вшія, яви́ я́ко при́сно си́лу Твою́: на Тя́ бо упова́юще, — ра́дуйся, — вопіе́мъ Ти́, я́коже иногда́ Гавріи́лъ, безпло́тныхъ Архистрати́гъ.

И па́ки чте́ніе во святѣ́мъ Ефре́мѣ.

По 3-мъ стихосло́віи сѣда́ленъ господи́на Ѳео́дора, гла́съ 2. Подо́бенъ: Пречи́стому Твоему́ о́бразу.

Всечестно́е воздержа́ніе начне́мъ свѣ́тло, луча́ми сія́юще святы́хъ за́повѣдей Христа́ Бо́га на́шего, любве́ свѣ́тлостію, моли́твы блиста́ніемъ, чистоты́ очище́ніемъ, благому́жества крѣ́постію, я́ко да свѣтоно́сни предвари́мъ во свято́е и тридне́вное Воскресе́ніе, осіява́ющее нетлѣ́ніе мíру.

Сла́ва, то́йже. И ны́нѣ, богоро́диченъ. Подо́бенъ:

Необори́мую моли́тву Твою́ стяжа́въ въ лю́тыхъ, свобожда́юся отъ оскорбля́ющихъ мя́ па́че наде́жди чу́дно. О, Ма́ти Бо́жія, предваря́еши всегда́ прося́щимъ Тя́ вѣ́рно! Отону́дуже благода́рно вопіе́мъ Ти́: пріими́, Влады́чице, кра́ткая благода́рственная, вмѣ́сто си́хъ бу́ди ми́ во всѣ́хъ по́мощь.

Та́же чте́ніе въ Лавсаи́цѣ. Псало́мъ 50-й. И обы́чная моли́тва: Спаси́, Бо́же, лю́ди Твоя́... Та́же возгла́съ. Посе́мъ начина́емъ: Го́сподеви пое́мъ.., на гла́съ кано́на мине́и дне́ свята́го. И глаго́лютъ стихи́ пѣ́сней ско́ро, кíйждо ли́къ сво́й сти́хъ, до́ндеже дости́гнутъ до: Огустѣ́ша... И отъ того́ начина́ютъ сти́хъ держа́ти на 14. И пое́мъ мине́и со ирмосо́мъ на 6; пое́мъ же си́це: Пе́рвый ли́къ глаго́летъ сти́хъ: Огустѣ́ша... и пое́тъ ирмо́съ. Вторы́й же ли́къ глаго́летъ 2 сти́хъ: Рече́ вра́гъ... и по не́мъ тропа́рь кано́на. И поря́ду стихи́ по лико́мъ до: Тогда́ потща́шася... Отъ стиха́ же: Тогда́ потща́шася.., начина́емъ трипѣ́снецъ господи́на Іо́сифа, на 4. На Госпо́дь же ца́рствуяй.., пое́мъ другíй трипѣ́снецъ господи́на Ѳео́дора Студи́та. И пое́тъ 1-й ли́къ тропа́рь. 2-й же ли́къ 2 сти́хъ и тропа́рь. Посе́мъ соедини́вшимся дву́мъ лико́мъ, пою́тъ: Сла́ва, тро́иченъ, вы́шшимъ гла́сомъ. И ны́нѣ, богоро́диченъ. Та́же глаго́лемъ высоча́йшимъ гла́сомъ: Сла́ва Тебѣ́, Бо́же на́шъ, сла́ва Тебѣ́. И пое́мъ и́ный тропа́рь господи́на Ѳео́дора. Поне́же бо по пяти́ тропаре́й и́мать пѣ́снь. Послѣди́ же глаго́лемъ катава́сію, ирмо́съ втора́го кано́на.

Си́це пое́тся 8-я и 9-я пѣ́сни. 3-ю же пѣ́снь пое́мъ си́це:

Глаго́летъ пе́рвый ли́къ сти́хъ: Госпо́дь взы́де на небеса́... и тропа́рь кано́на мине́и. Вторы́й ли́къ сти́хъ: И да́стъ крѣ́пость царю́... и вторы́й тропа́рь кано́на мине́и. Та́же: Сла́ва, И ны́нѣ, съ тропари́ кано́на. И пое́тъ пе́рвый ли́къ ирмо́съ мине́и тре́тія пѣ́сни, послѣди́ кано́на.

Си́мъ о́бразомъ пое́мъ и 6-ю пѣ́снь. 4-ю же, и 5-ю и 7-ю пѣ́сни си́це пое́мъ:

Глаго́ли пе́рвѣе ирмо́съ кано́на мине́и, та́же коне́чныя два́ стиха́ пѣ́сни пое́мъ къ тропаре́мъ кано́на, и Сла́ва, И ны́нѣ, ирмосо́мъ же не покрыва́емъ пѣ́сни, зане́ ирмо́съ глаго́лется пре́жде пѣ́сни. Пою́тся же ирмосы́ мине́и по кано́нѣ то́кмо по тре́тіей и шесто́й пѣ́снехъ, зане́же у тѣ́хъ пѣ́сней пе́рвѣе ирмо́съ не пое́тся. Въ про́чія же дни́ седми́цы, кромѣ́ понедѣ́льника, та́ко пое́тся и 1-я пѣ́снь, я́коже указа́ся о 4-й и 5-й пѣ́снехъ. А въ ни́хже пѣ́снехъ бу́детъ трипѣ́снецъ, пое́тся послѣди́ кано́на катава́сія, ирмо́съ трипѣ́снца, я́коже вы́шше изъяви́ся. [Вѣ́домо же бу́ди: я́ко осмогла́сникъ не пое́тся во всю́ святу́ю 40-цу, кромѣ́ недѣ́ль. Пое́тся же то́чію мине́я и трипѣ́снецъ.] А въ ни́хже пѣ́снехъ нѣ́сть трипѣ́снца, пое́тся то́кмо мине́я. По 3-й пѣ́сни глаго́летъ іере́й ектенію́ ма́лую. Та́же сѣда́ленъ свята́го еди́ножды. Сла́ва, и ны́нѣ, богоро́диченъ. И чте́ніе въ Лавсаи́цѣ. По 6-й пѣ́сни ектенія́ ма́лая. Та́же сѣда́ленъ му́чениченъ; а́ще же и́мать святы́й конда́къ, глаго́лемъ его́ здѣ́, му́чениченъ же глаго́лемъ по 1-й каѳи́смѣ съ сѣда́льнами, съ припѣ́вомъ: Ди́венъ Бо́гъ во святы́хъ Свои́хъ... И чте́ніе въ Синаксарѣ́.

Кано́нъ и трипѣ́снецъ господи́на Іо́сифа, гла́съ 2.
Пѣ́снь 1.

Ирмо́съ: Гряди́те, лю́діе, [пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися].

Здѣ́ стихосло́вится пе́рвая пѣ́снь.

Ка́ко ны́нѣ моего́ воспла́чу отпаде́нія? Ко́е нача́ло сотворю́ спасе́нія моего́, блу́дно пожи́вый? Ще́дре, и́миже судьба́ми вѣ́си, спаси́ мя́.

Се́ вре́мя покая́нія, се́ де́нь спаси́тельный, поще́нія вхо́дъ, душе́, бо́дрствуй и страсте́й вхо́ды затвори́, ко Го́споду взира́ющи.

Грѣхо́въ треволне́ніе буря́щееся во глубину́ низвлачи́тъ мя́ отча́янія, но къ Твое́й прибѣга́ю пучи́нѣ ми́лости, спаси́ мя́, Го́споди.

Еди́нъ а́зъ грѣху́ порабо́тихся, еди́нъ а́зъ страсте́мъ две́ри отверзо́хъ, благоувѣ́тливе Сло́ве, обрати́ мя́, Спа́се, благоутро́біемъ Твои́мъ.

Богоро́диченъ: Исто́чникъ безстра́стія ро́ждшая, уя́звлена страстьми́, Отрокови́це, исцѣли́ и огня́ вѣ́чнаго исхити́ мя́, еди́на Богоблагода́тная.

Иный трипѣ́снецъ господи́на Ѳео́дора, гла́съ и ирмо́съ то́йже:

Гряди́те, лю́діе, дне́сь воспріи́мемъ поще́ній дарова́ніе, я́ко богодарова́нное вре́мя покая́нія, въ се́мъ Спа́са уми́лостивимъ.

Приспѣ́ ны́нѣ, введе́ся по́двиговъ вре́мя, поста́ по́прище, усе́рдно вси́ начне́мъ се́й, добродѣ́тели Го́сподеви, я́ко да́ры, нося́ще.

Сла́ва, тро́иченъ: Еди́нице про́стая, трисвѣ́тлая, нача́льственнѣйшая Еди́на, всемо́щнѣйшая, всежи́зненная, Бо́же и Го́споди, Отче Вседержи́телю, Сы́не и Ду́ше, спаса́й чту́щія Тя́.

[И ны́нѣ,] богоро́диченъ: Бо́жію святу́ю го́ру воспои́мъ, Марíю нескве́рную, изъ Нея́же возсія́ Пра́вды Со́лнце, су́щимъ во тмѣ́ Христо́съ, всѣ́хъ Жи́знь.

Сла́ва Тебѣ́, Бо́же на́шъ, сла́ва Тебѣ́.

Колесни́ца о́гненная прія́тъ Илію́ чу́днаго, посто́мъ вооруже́ннаго, Моисе́я показа́ зри́теля неизрече́нныхъ, и мы́ се́й пріи́мше, у́зримъ Христа́.

Сла́ва Тебѣ́, Бо́же на́шъ, сла́ва Тебѣ́.

Бра́шно Ада́мъ яде́ и отъ рая́ того́ невоздержа́ніе изри́ну, на́съ же, Го́споди, по́стъ пріи́мый, досто́йны покая́нія покажи́, Человѣколю́бче.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

По 6-й пѣ́сни му́чениченъ гла́са.

Пѣ́снь 8.

Ирмо́съ: Въ пе́щь о́гненную [ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки].

Огнесожже́на сластьми́ и души́ зри́тельнымъ помраче́на, огне́мъ Твоего́ стра́ха обнови́въ, Христе́, свѣ́томъ мя́ спасе́нія озари́, да Тя́ сла́влю во вся́ вѣ́ки.

Сы́тость возненави́дѣвши страсте́й, напита́йся до́брыхъ сла́достною пи́щею и услади́ся па́че отъ поста́ сла́достію, го́рести сласте́й уклоня́ющися, смире́нная душе́ моя́, и поживи́ во вѣ́ки.

Ослѣпле́нъ душе́ю и пія́нствомъ страсте́й отемне́нъ, ника́коже взира́ю къ Тебѣ́, Еди́ному Бо́гу. Тѣ́мже мя́ уще́дри, и просвѣти́, и покая́нія отве́рзи ми́ врата́.

Богоро́диченъ: Онебеси́вшая на́ше земно́е и тлѣ́нное, Чи́стая, существо́, те́плою Твое́ю моли́твою, упра́витися на́шимъ мольба́мъ и моле́ніемъ сотвори́ къ Твоему́ и всѣ́хъ Бо́гу, и Царю́.

Иный.

Ирмо́съ: Дре́вле ороси́вшаго [евре́йскія о́троки въ пла́мени, и опали́вшаго, Го́спода, халде́и пресла́вно въ не́й, воспое́мъ, глаго́люще: благослови́те и превозноси́те Его́ во вѣ́ки].

Свѣ́тло усря́щимъ поста́ вхо́дъ, вѣ́рніи, и да не сѣ́туимъ, но омы́имъ ли́ца на́ша безстра́стія водо́ю, благословя́ще и превознося́ще Христа́ во вѣ́ки.

Еле́емъ пома́завше ми́лости души́ главу́, не многосло́вимъ Отцу́ на́шему, Су́щему на Небесѣ́хъ, моли́твы возсыла́юще, благословя́ще и превознося́ще Его́ во вся́ вѣ́ки.

Благослови́мъ Отца́, и Сы́на, и Свята́го Ду́ха, Го́спода.

[Тро́иченъ:] Присносу́щна, безнача́льна Отца́ воспои́мъ, вѣ́рніи, Сы́на же собезнача́льна, и Ду́ха сопросія́вша изъ Отца́, единосу́щна Ли́ца, Еди́наго су́ща всеси́льнаго нача́ла и вла́сти.

[И ны́нѣ,] богоро́диченъ: Марíе богозва́нная, очисти́лище вои́стинну вѣ́рныхъ, изъ Тебе́ бо оставле́ніе подава́ется всѣ́мъ бога́тно, Сы́на Твоего́ и Го́спода не преста́й моля́щи о пою́щихъ Тя́.

Сла́ва Тебѣ́, Бо́же на́шъ, сла́ва Тебѣ́.

Пости́вся Госпо́дь четыредеся́тную мѣ́ру дне́й, сія́ ны́нѣ освяти́ и очи́сти дни́, бра́тіе, въ ня́же дости́гше, зове́мъ: благослови́те и превозноси́те Христа́ во вѣ́ки.

Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].

Ирмо́съ: Дре́вле ороси́вшаго евре́йскія о́троки въ пла́мени, и опали́вшаго, Го́спода, халде́и пресла́вно въ не́й, воспое́мъ, глаго́люще: благослови́те и превозноси́те Его́ во вѣ́ки.

И стихосло́вится Честнѣ́йшая...

Пѣ́снь 9.

Ирмо́съ: Отъ Бо́га Бо́га Сло́ва, [неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ].

Поста́ день, отложе́ніе грѣха́ да бу́детъ ти́, душе́, и къ Бо́гу ма́ніе вку́пѣ и присвое́ніе, я́ко да убѣжи́ши зло́бныя про́пасти и са́мыя то́кмо пути́ возлю́биши, веду́щія ко о́ному поко́ю.

И помышле́ньми поползну́вся, и пло́тію прегрѣши́въ, рыда́ю, и стеню́, и вопію́: спаси́ мя́, Го́споди, спаси́ мя́, Незло́биве еди́не, и не осуди́ мене́ во о́гнь гее́нны о́ныя, осужде́нія досто́йнаго.

Во свѣ́тлую поста́ обле́кшеся ри́зу, пія́нства те́мныя и злотя́жкія совлеце́мся оде́жды, и свѣ́тли бы́вше Боже́ственными добродѣ́тельми, свѣтоза́рная Спа́сова вѣ́рою у́зримъ Страда́нія.

Богоро́диченъ: Изнемо́гшую всѣ́ми прило́ги зло́бныхъ бѣсо́въ, стра́стную мою́ ду́шу исцѣли́, Пречи́стая Влады́чице, Цѣли́теля ро́ждшая Христа́, Избавле́ніе на́съ, вѣ́дущихъ Тя́, Отрокови́цу, Дѣ́ву нетлѣ́нну.

Иный.

Ирмо́съ: Преесте́ственно [пло́тію заче́ншую во чре́вѣ, отъ Отца́ безлѣ́тно предвозсія́вшее Сло́во, въ пѣ́снехъ немо́лчныхъ велича́емъ, вѣ́рніи].

Ны́нѣ наста́ вре́мя святы́хъ посто́въ, начне́мъ сего́ въ до́брыхъ пребыва́ніихъ: въ суда́хъ бо и крамола́хъ не пости́теся, глаго́летъ.

Въ горѣ́ Хори́въ посто́мъ очи́щся, ви́дѣ Бо́га Илія́, очи́стимъ и мы́ посто́мъ се́рдце и у́зримъ Христа́.

Сла́ва, тро́иченъ: Еди́ному Естеству́ покланя́юся, Три́ Ли́ца пою́, Еди́наго Бо́га всѣ́хъ, Отца́ и Сы́на и Свята́го Ду́ха, присносу́щное нача́ло.

[И ны́нѣ,] богоро́диченъ: Чи́стая — Отроча́ ражда́еши, Дѣ́ва — мле́комъ дои́ши: ка́ко въ сію́ двою́ дѣ́вствуеши, ро́ждши? — Бо́гъ е́сть содѣ́явый; не взыску́й отъ Мене́, е́же ка́ко?

Сла́ва Тебѣ́, Бо́же на́шъ, сла́ва Тебѣ́.

Де́нь еди́нъ у́бо, рече́, житіе́ вся́ко земны́хъ; тружда́ющимся отъ любве́ четы́редесять су́ть дне́й поста́, я́же соверши́мъ свѣ́тло.

Ирмо́съ: Преесте́ственно пло́тію заче́ншую во чре́вѣ, отъ Отца́ безлѣ́тно предвозсія́вшее Сло́во, въ пѣ́снехъ немо́лчныхъ велича́емъ, вѣ́рніи.

Та́же: Досто́йно е́сть.., покло́нъ еди́нъ. Ектенія́: Па́ки, и па́ки... И свѣти́ленъ тро́иченъ гла́са. На Вся́кое дыха́ніе.., стихо́въ не пое́мъ, но стихологису́емъ: Хвали́те Го́спода съ небе́съ.., обы́чныя псалмы́, 3. И а́ще прилучи́тся въ мине́и на ряду́ два́ святы́хъ: пое́мъ еди́ному ве́черъ стихи́ры, а друго́му на хвали́техъ стихи́ры на 4, а́ще бу́детъ. Аще же ни́, глаго́летъ учине́нный бра́тъ: Тебѣ́ сла́ва подоба́етъ, Го́споди Бо́же на́шъ, и Тебѣ́ сла́ву возсыла́емъ, Отцу́ и Сы́ну и Свято́му Ду́ху, ны́нѣ, и при́сно, и во вѣ́ки вѣко́въ, ами́нь. Сла́ва Тебѣ́, показа́вшему на́мъ свѣ́тъ. Сла́ва въ вы́шнихъ Бо́гу.., и про́чая. И твори́мъ мета́нія 3, ра́вно на мѣ́стѣхъ на́шихъ стоя́ще. Посе́мъ іере́й: Испо́лнимъ у́треннюю... И возгла́съ. И, совоку́пльшеся о́ба ли́ка вку́пѣ, пое́мъ

На стихо́внѣ самогла́сенъ, гла́съ 5:

Пріи́де по́стъ, ма́ти цѣлому́дрія, обличи́тель грѣхо́въ, проповѣ́дникъ покая́нія, жи́тельство а́нгеловъ, и спасе́ніе человѣ́ковъ, вѣ́рніи, возопіи́мъ: Бо́же, поми́луй на́съ.

Сти́хъ: Испо́лнихомся зау́тра [ми́лости Твоея́, Го́споди, и возра́довахомся, и возвесели́хомся. Во вся́ дни́ на́ша возвесели́хомся, за дни́ въ ня́же смири́лъ ны́ еси́, лѣ́та въ ня́же ви́дѣхомъ зла́я. И при́зри на рабы́ Твоя́ и на дѣла́ Твоя́, и наста́ви сы́ны и́хъ].

И повторя́емъ то́йже.

Та́же сти́хъ: И бу́ди свѣ́тлость [Го́спода Бо́га на́шего на на́съ, и дѣла́ ру́къ на́шихъ испра́ви на на́съ и дѣ́ло ру́къ на́шихъ испра́ви].

И му́чениченъ: Благослове́но во́инство Царя́ Небе́снаго! Аще бо и земноро́дніи бы́ша страстоте́рпцы, но а́нгельскій са́нъ потща́шася дости́гнути, о тѣлесѣ́хъ небре́гше и страстьми́ свои́ми безпло́тныхъ че́сти сподо́бишася, моли́твами и́хъ, Го́споди, спаси́ ду́ши на́ша.

Сла́ва, и ны́нѣ, богоро́диченъ:

Тя́ Бо́жію Ма́терь, Дѣ́ву чи́стую и херуви́мъ святѣ́йшую, во гла́сѣхъ пѣ́сней велича́емъ, зане́ душе́ю и тѣ́ломъ Богоро́дицу исповѣ́дуемъ, я́ко вои́стинну ро́ждшую Бо́га воплоще́нна, моли́ся, Пречи́стая, о душа́хъ на́шихъ.

Та́же: Бла́го е́сть.., два́жды. Трисвято́е, и мета́нія 3. Пресвята́я Тро́ице... [и по] Отче на́шъ... По внегда́ же рещи́ іере́ю: Яко Твое́ е́сть Ца́рство.., глаго́лемъ тропа́рь: Въ хра́мѣ стоя́ще сла́вы Твоея́... И глаго́лемъ: Го́споди, поми́луй, 40. Та́же отхо́дитъ свяще́нникъ и глаго́летъ: Сы́й благослове́нъ Христо́съ Бо́гъ на́шъ... Небе́сный Царю́... Посе́мъ же стои́мъ и мо́лимся въ себѣ́, во свое́мъ помышле́ніи глаго́люще моли́тву преподо́бнаго отца́ на́шего Ефре́ма: Го́споди и Влады́ко живота́ моего́... И покло́ны вели́кія 3 и ма́лыхъ 12, глаго́люще въ себѣ́ на еди́номъ ко́емждо: Бо́же, очи́сти мя́ грѣ́шнаго. Та́же па́ки и́нъ покло́нъ вели́кій еди́нъ, глаго́люще и въ не́мъ предпи́санную моли́тву всю́ свята́го Ефре́ма.

И по е́же воста́ти на́мъ, начина́етъ предстоя́тель: Пріиди́те поклони́мся.., три́жды, и мета́нія три́. И совокупля́емъ пе́рвый ча́съ. И сконча́ну тре́тіему псалму́, глаго́лемъ Аллилу́ія.., и мета́нія три́. [Подоба́етъ вѣ́дати, я́ко во вся́ понедѣ́льники святы́я Четыредеся́тницы на 1-мъ часѣ́ каѳи́смы не стихосло́вимъ. Въ про́чія же дни́, стихосло́вимъ каѳи́сму, и твори́мъ на ко́емждо антифо́нѣ мета́нія три́. Та́кожде и въ пято́къ, пе́рвый ча́съ и девя́тый, безъ каѳи́смы.] Пое́тъ же учине́нный чте́цъ или́ іере́й среди́ це́ркве тропа́рь, на гла́съ 6: Зау́тра услы́ши гла́съ мо́й... И мы́ пое́мъ велегла́сно то́жде и твори́мъ колѣнопреклоне́ніе на зе́млю. Та́кожде и на про́чія два́ стиха́. Сти́хъ 1: Глаго́лы моя́ внуши́, Го́споди, разумѣ́й зва́ніе мое́. Сти́хъ 2: Яко къ Тебѣ́ помолю́ся, Го́споди. И па́ки: Зау́тра услы́ши гла́съ мо́й... Сла́ва, и ны́нѣ. Что́ Тя́ нарече́мъ, о Благода́тная.., и метанія 3. Та́же: Стопы́ моя́ напра́ви по словеси́ Твоему́, и да не облада́етъ мно́ю вся́кое беззако́ніе. И повторя́емъ то́йжде. Та́же: Изба́ви мя́ отъ клеветы́ человѣ́ческія и сохраню́ за́повѣди Твоя́. Па́ки то́йжде. Лице́ Твое́ просвѣти́ на раба́ Твоего́ и научи́ мя оправда́ніемъ Твои́мъ. Па́ки то́йжде. Сіе́ же глаго́лемъ три́жды, велегла́сно и ко́сно. Да испо́лнятся уста́ моя́ хвале́нія Твоего́, Го́споди... Трисвято́е, и мета́нія три́. Пресвята́я Тро́ице... [и по] Отче на́шъ... Возглаша́етъ свяще́нникъ: Яко Твое́ е́сть Ца́рство... И по ами́нѣ глаго́лемъ тропа́рь. [Въ понедѣ́льникъ у́бо, и во вто́рникъ, и четверто́къ, глаго́ли богоро́диченъ: Пресла́вную Бо́жію Ма́терь... Въ сре́ду же и пято́къ глаго́ли: Ско́ро предвари́, пре́жде да́же не порабо́тимся...] Го́споди, поми́луй, 40. И глаго́лемъ моли́тву: Иже на вся́кое вре́мя... Го́споди, поми́луй, три́жды. Сла́ва, и ны́нѣ. Честнѣ́йшую херуви́мъ... И покло́нъ еди́нъ. Именемъ Госпо́днимъ благослови́, о́тче. Свяще́нникъ: Бо́же, уще́дри ны́ и благослови́ ны́, просвѣти́ лице́ Твое́ на ны́ и поми́луй ны́. И твори́мъ покло́ны, я́коже предписа́ся. И пото́мъ глаго́летъ предстоя́тель, или́ чте́цъ: Трисвято́е, и мета́нія три́, [и по] Отче на́шъ... Го́споди, поми́луй, 12. И моли́тва: Христе́, Свѣ́те Истинный... Іере́й: Сла́ва Тебѣ́, Христе́ Бо́же, Упова́ніе на́ше, сла́ва Тебѣ́. Мы́ же: Сла́ва, и ны́нѣ. Го́споди, поми́луй, три́жды. Благослови́. И отпу́стъ. Та́же: Многолѣ́тное. И цѣлу́емъ святы́я ико́ны. Та́же исхо́димъ, литíю творя́ще въ притво́рѣ. И та́мо глаго́лются обы́чныя моли́твы и чту́тся оглаше́нія преподо́бнаго отца́ на́шего Ѳео́дора Студи́та отъ предстоя́теля или́ отъ екклисіа́рха, я́ко преписа́ся, си́рѣчь, въ сре́ду и пято́къ.

И быва́етъ коне́цъ, и отпу́стъ.

Се́й о́бразъ быва́етъ во святу́ю Четыредеся́тницу на у́трени и на пе́рвомъ часѣ́. По отпуще́ніи же, исходя́ще изъ це́ркве, и́демъ со вся́кимъ безмо́лвіемъ въ ке́лліи своя́ или́ на слу́жбу. И не подоба́етъ на́мъ бесѣ́ды твори́ти дру́гъ со дру́гомъ на монастырѣ́ въ пути́, удержа́но бо бы́сть сіе́ отъ святы́хъ оте́цъ.



Объ тре́тіемъ же часѣ́ ударя́етъ кандиловжига́тель въ би́ло дово́льно. И собира́емся въ це́рковь, творя́ще пре́жде нача́ла пѣ́нія кíйждо на́съ предъ святы́ми две́рми покло́ны 3 и цѣлу́емъ святы́я ико́ны. И на о́ба ли́ка по еди́ному ма́лу покло́ну. Благослови́вшу же свяще́ннику, и начина́ющимъ на́мъ: Царю́ Небе́сный... Трисвято́е, и мета́нія 3, [и] по Отче на́шъ... Іере́й: Яко Твое́ е́сть Ца́рство... И по ами́нѣ: Го́споди, поми́луй, 12. [Сла́ва, и ны́нѣ.] Пріиди́те поклони́мся.., три́жды, и мета́нія 3. И стихосло́вится тре́тій ча́съ, я́коже обы́чай. Въ концѣ́ же тре́тіяго псалма́, на Аллилу́ія.., мета́нія три́. И стихосло́вимъ каѳи́сму рядову́ю; на ко́емждо же антифо́нѣ твори́мъ мета́нія три́. И по каѳи́смѣ чте́цъ или́ іере́й, ста́въ среди́ це́ркве, глаго́летъ тропа́рь, гла́съ 6: Го́споди, Иже Пресвята́го Твоего́ Ду́ха... И на́мъ противоглаша́ющимъ, твори́мъ колѣнопреклоне́ніе до земли́. Та́кожде и на про́чія два́ стиха́. Сти́хъ: Се́рдце чи́сто сози́жди во мнѣ́, Бо́же, и ду́хъ пра́въ обнови́ во утро́бѣ мое́й. Сти́хъ: Не отве́ржи мене́ отъ ли́ца Твоего́ и Ду́ха Твоего́ Свята́го не отыми́ отъ мене́. Сла́ва, и ны́нѣ, богоро́диченъ, и мета́нія три́. Богоро́дице, Ты́ еси́ лоза́ и́стинная... И а́біе чте́мъ въ Лѣ́ствичникѣ. [Начина́етъ же отъ ны́нѣ учине́нный мона́хъ возбужда́ти бра́тію во всю́ святу́ю 40-цу, обхо́дитъ же ти́хо, и призира́етъ на спя́щія, и возставля́етъ къ слы́шанію, по послѣ́довавшему о́бразу.] По чте́ніи же: Госпо́дь Бо́гъ благослове́нъ... Трисвято́е, и мета́нія три́, и по Отче на́шъ... Возглаша́етъ свяще́нникъ: Яко Твое́ е́сть Ца́рство... И по ами́нѣ пое́мъ тропари́ на гла́съ 8: Благослове́нъ еси́, Христе́ Бо́же на́шъ... Сла́ва: Ско́рое и извѣ́стное да́ждь утѣше́ніе: И ны́нѣ: Наде́жда и предста́тельство... Го́споди, поми́луй, 40. И моли́тва: Иже на вся́кое вре́мя... Го́споди, поми́луй, три́жды. Сла́ва, и ны́нѣ. Честнѣ́йшую херуви́мъ... Именемъ Госпо́днимъ благослови́, о́тче. И свяще́нникъ: Бо́же, уще́дри ны́... Твори́мъ покло́ны, я́коже предписа́ся. Глаго́летъ предстоя́тель моли́тву: Влады́ко Бо́же Отче Вседержи́телю...

Кандиловжига́тель же, сотвори́въ обы́чный покло́нъ предстоя́телю, отхо́дитъ и ударя́етъ въ би́ло 6 кра́тъ. И по исполне́ніи моли́твы: Пріиди́те поклони́мся.., три́жды, и мета́нія 3. И стихосло́вимъ 6 ча́съ. И по концѣ́: Сла́ва, и ны́нѣ. Аллилу́ія.., три́жды, и мета́нія три́. И стихосло́вимъ каѳи́сму, и по ко́емждо антифо́нѣ: Аллилу́ія.., три́жды, и мета́нія 3. По стихосло́віи же: тропа́рь, гла́съ 2: Иже въ шесты́й де́нь же и ча́съ... Сти́хъ 1: Внуши́, Бо́же, моли́тву мою́ и не пре́зри моле́нія моего́. Сти́хъ 2: Азъ къ Бо́гу воззва́хъ и Госпо́дь услы́ша мя́. Творя́ще и покло́ны 3, я́ко предписа́ся. Сла́ва, и ны́нѣ. Яко не и́мамы дерзнове́нія.., и мета́нія три́.

Та́же пое́мъ тропа́рь проро́чества, гла́съ 5:

Го́споди, Го́споди, Его́же вся́ ужаса́ются и трепе́щутъ отъ ли́ца си́лы Твоея́, Тебѣ́ припа́даемъ, Безсме́ртне, Тебѣ́ мо́лимся, Святы́й: спаси́ ду́ши на́ша моли́твами святы́хъ Твои́хъ.

Сла́ва, и ны́нѣ, и повторя́емъ то́йжде.

Проки́менъ, гла́съ 4, псало́мъ 1-й: Вѣ́сть Госпо́дь пу́ть пра́ведныхъ,* и пу́ть нечести́выхъ поги́бнетъ. Сти́хъ: Блаже́нъ му́жъ, и́же не и́де на совѣ́тъ нечести́выхъ и на пути́ грѣ́шныхъ не ста́.

Проро́чества Иса́іина чте́ніе. [Глава́ 1.]

Видѣ́ніе, е́же ви́дѣ Иса́ія, сы́нъ Амо́совъ, е́же ви́дѣ на Іуде́ю и на Іерусали́мъ, въ ца́рство Озíи, и Іоѳа́ма, и Аха́за, и Езекíи, и́же ца́рствоваша во Іуде́и. Слы́ши не́бо и внуши́ земле́, я́ко Госпо́дь возглаго́ла: сы́ны роди́хъ и возвы́сихъ, тíи же отверго́шася Мене́. Позна́ во́лъ стяжа́вшаго и́, и осе́лъ я́сли господи́на своего́; Изра́иль же Мене́ не позна́, и лю́діе Мои́ не разумѣ́ша. Увы́, язы́къ грѣ́шный, лю́діе испо́лнени грѣхо́въ, сѣ́мя лука́вое, сы́нове беззако́нніи! Оста́висте Го́спода и разгнѣ́васте Свята́го Изра́илева, отврати́стеся вспя́ть. Что́ еще́ уязвля́етеся, прилага́юще беззако́ніе? Вся́кая глава́ — въ болѣ́знь и вся́кое се́рдце — въ печа́ль. Отъ но́гъ да́же до главы́ нѣ́сть въ не́мъ цѣ́лости: ни стру́пъ, ни я́зва, ни ра́на паля́щаяся, нѣсть пла́стыря приложи́ти, ниже́ еле́я, ниже́ обяза́нія. Земля́ ва́ша пуста́, гра́ди ва́ши огне́мъ пожже́ни, страну́ ва́шу предъ ва́ми чуждíи пояда́ютъ, и опустѣ́ низвраще́нна отъ люде́й чужди́хъ. Оста́вится дще́рь Сіо́ня, я́ко ку́ща въ виногра́дѣ и я́ко ово́щное храни́лище въ вертогра́дѣ, я́ко гра́дъ вою́емый. Аще не бы́ Госпо́дь Савао́ѳъ оста́вилъ на́мъ сѣ́мене, я́ко Содо́ма у́бо бы́ли бы́хомъ и я́ко Гомо́рру уподо́билися бы́хомъ. Услы́шите сло́во Госпо́дне, кня́зи Содо́мстіи; внемли́те зако́ну Бо́жію, лю́діе Гомо́ррстіи! Что́ ми́ мно́жество же́ртвъ ва́шихъ? — глаго́летъ Госпо́дь. — Испо́лненъ е́смь всесожже́ній о́внихъ; и ту́ка а́гнцовъ и кро́ве юнцо́въ и козло́въ не хощу́. Ниже́ приходи́те яви́тися Ми́, кто́ бо изыска́ сія́ изъ ру́къ ва́шихъ? Ходи́ти по двору́ Моему́ не приложите́. И а́ще принесе́те Ми́ семида́лъ, всу́е; кади́ло — ме́рзость Ми́ е́сть. Новомѣ́сячій ва́шихъ, и суббо́тъ, и дне́ вели́каго не потерплю́. Поста́, и пра́здности, и новомѣ́сячій ва́шихъ, и пра́здниковъ ва́шихъ ненави́дитъ душа́ Моя́. Бы́сте Ми́ въ сы́тость, ктому́ не стерплю́ грѣхо́въ ва́шихъ. Егда́ простре́те ру́ки (ва́ша) ко Мнѣ́, отвращу́ о́чи Мои́ отъ ва́съ; и а́ще умно́жите моле́ніе, не услы́шу ва́съ: ру́ки бо ва́ша испо́лнены кро́ве. Измы́йтеся (и) чи́сти бу́дите, отыми́те лука́вства отъ душъ ва́шихъ предъ очи́ма Мои́ма, преста́ните отъ лука́вствъ ва́шихъ. Научи́теся добро́ твори́ти, взыщи́те суда́, изба́вите оби́димаго, суди́те си́ру и оправди́те вдови́цу. И пріиди́те и истя́жимся, — глаго́летъ Госпо́дь, — и а́ще бу́дутъ грѣси́ ва́ши, я́ко багря́ное, я́ко снѣ́гъ убѣлю́; а́ще же бу́дутъ, я́ко червле́ное, я́ко во́лну, убѣлю́. И а́ще хо́щете и послу́шаете Мене́, блага́я земли́ снѣ́сте. Аще же не хо́щете, ниже́ послу́шаете Мене́, ме́чь вы́ поя́стъ, — уста́ бо Госпо́дня глаго́лаша сія́.

Проки́менъ, гла́съ 7, псало́мъ 2-й: Рабо́тайте Го́сподеви со стра́хомъ,* и ра́дуйтеся Ему́ съ тре́петомъ. Сти́хъ: Вску́ю шата́шася, язы́цы, и, лю́діе, поучи́шася тще́тнымъ?

И быва́етъ чте́ніе въ Лѣ́ствичникѣ. Та́же тропа́рь: Ско́ро да предваря́тъ ны́... Трисвято́е, и мета́нія 3, [и] по Отче на́шъ... Іере́й, возгла́съ: Яко Твое́ есть ца́рство... И тропари́ на гла́съ 2: Спасе́ніе содѣ́лалъ еси́... Сла́ва: Пречи́стому о́бразу Твоему́... И ны́нѣ: Милосе́рдія су́щи... Въ сре́ду же и пято́къ глаго́лемъ крестобогоро́диченъ: Препросла́влена еси́, Богоро́дице Дѣ́во... Го́споди, поми́луй, 40. Иже на вся́кое вре́мя... Го́споди, поми́луй, три́жды. Сла́ва, и ны́нѣ. Честнѣ́йшую херуви́мъ... Именемъ Госпо́днимъ благослови́, о́тче. Іере́й: Бо́же, уще́дри ны́ и благослови́ ны́... И твори́мъ покло́ны, я́коже обы́чай. И по исполне́ніи покло́новъ начина́етъ предстоя́тель коне́чное Трисвято́е, и мета́нія три́, [и] по Отче на́шъ... Го́споди, поми́луй, 12. Та́же іере́й: Сла́ва Тебѣ́, Христе́ Бо́же, Упова́ніе на́ше, сла́ва Тебѣ́. И быва́етъ отпу́стъ. Се́й о́бразъ и чи́нъ до́лженъ бы́ти во всю́ святу́ю Четыредеся́тницу, на 3-мъ и на 6-мъ часѣ́.

[Зри́:] А идѣ́же расхо́да не быва́етъ, по моли́твѣ: Бо́же и Го́споди си́лъ.., а́біе глаго́лемъ: Пріиди́те поклони́мся.., три́жды, и 9-й ча́съ. А идѣ́же быва́етъ росхо́дъ, о часѣ́ 9-мъ біе́тъ кандиловжига́тель девяти́щи, и собира́емся въ це́рковь. И благослови́вшу іере́ю, начина́емъ Трисвято́е, и мета́нія три́, [и] по Отче на́шъ... Возглаша́етъ свяще́нникъ: Яко Твое́ е́сть Ца́рство... И по ами́нѣ: Го́споди поми́луй, 12. [Сла́ва, и ны́нѣ.] Пріиди́те поклони́мся.., три́жды, и мета́нія три́. И пое́мъ ча́съ девя́тый трипса́лмный. Въ коне́цъ же тре́тіяго псалма́, на Аллилу́ія.., мета́нія три́. И начина́емъ стихосло́віе каѳи́смы. На вся́кій же антифо́нъ мета́нія три́. По исполне́ніи же стихосло́вія, тропа́рь, гла́съ 8: Иже въ девя́тый ча́съ... Сти́хъ 1: Да прибли́жится моли́тва моя́ предъ Тя́, Го́споди... Сти́хъ 2: Да вни́детъ проше́ніе мое́... И творя́ще покло́ны въ си́хъ. Сла́ва, и ны́не. Иже насъ ра́ди рожде́йся отъ Дѣ́вы.., [и] мета́нія три́. И быва́етъ чте́ніе па́ки въ Лѣ́ствичникѣ. И по чте́ніи глаго́лемъ сти́хъ: Не преда́ждь на́съ до конца́... Трисвято́е, и мета́нія три́. Пресвята́я Тро́ице... [и по] Отче на́шъ... И возглаша́етъ свяще́нникъ: Яко Твое́ е́сть Ца́рство... И по ами́нѣ глаго́лемъ тропари́, гла́съ 8: Ви́дя разбо́йникъ Нача́льника жи́зни... Сла́ва: Посредѣ́ двою́ разбо́йнику... И ны́нѣ: Агнца, и Па́стыря, и Спа́са мíра... Го́споди, поми́луй, 40. Иже на вся́кое вре́мя... Го́споди, поми́луй, три́жды. Сла́ва, и ны́нѣ. Честнѣ́йшую херуви́мъ... Именемъ Госпо́днимъ благослови́, о́тче. Свяще́нникъ: Бо́же, уще́дри ны́... И твори́мъ покло́ны вели́кія три́, глаго́люще въ себѣ́ и предъявле́нную моли́тву преподо́бнаго Ефре́ма, про́чихъ же 12 не твори́мъ. И глаго́лемъ моли́тву: Влады́ко Го́споди Іису́се Христе́, Бо́же на́шъ...

И а́біе начина́етъ ли́къ, ему́же прилучи́тся начина́ти, на гла́съ 8: Во Ца́рствіи Твое́мъ помяни́ насъ, Го́споди... И пое́мъ блаже́нны со сладкопѣ́ніемъ, и велегла́сно, и ко́сно, въ то́йже гла́съ: Блаже́ни ни́щіи ду́хомъ, я́ко тѣ́хъ е́сть Ца́рство небе́сное. Помяни́ на́съ, Го́споди, егда́ пріи́деши во Ца́рствіи Твое́мъ. И про́чія стихи́. Сла́ва Отцу́, и Сы́ну, и Свято́му Ду́ху. Помяни́ на́съ, Го́споди... И ны́нѣ, и при́сно, и во вѣ́ки вѣко́въ, ами́нь. Помяни́ на́съ, Го́споди... Та́же соше́дшеся о́ба ли́ка, и пое́мъ вы́шшимъ гла́сомъ открове́нными глава́ми: Помяни́ на́съ, Го́споди, егда́ пріи́деши во Ца́рствіи Твое́мъ. Покло́нъ еди́нъ. Помяни́ на́съ, Влады́ко, егда́ пріи́деши во Ца́рствіи Твое́мъ. Покло́нъ еди́нъ. Помяни́ на́съ, Святы́й, егда́ пріи́деши во Ца́рствіи Твое́мъ. Покло́нъ еди́нъ. И глаго́лемъ: Ли́къ небе́сный пое́тъ Тя́ и глаго́летъ... Сти́хъ: Приступи́те къ Нему́ и просвѣти́теся... И па́ки: Ли́къ небе́сный... Сла́ва: Ли́къ святы́хъ а́нгелъ и арха́нгелъ... И ны́нѣ: Вѣ́рую во Еди́наго Бо́га... Осла́би, оста́ви... Отче на́шъ... Та́же конда́къ дне́ и храма́. Аще ли хра́мъ Христо́въ, глаго́лемъ пре́жде хра́ма, та́же дне́ и свята́го рядова́го, его́же е́сть де́нь, и́же и́мать. Сла́ва: Со святы́ми упоко́й, Христе́... И ны́нѣ: хра́ма Богоро́дицы, или́: Предста́тельство христіа́нъ непосты́дное... Го́споди, поми́луй, 40. Сла́ва, и ны́нѣ. Честнѣ́йшую херуви́мъ... Именемъ Госпо́днимъ благослови́, о́тче. И глаго́летъ свяще́нникъ: Бо́же, уще́дри ны... И твори́мъ изображе́нныя покло́ны 16 съ моли́твою свята́го Ефре́ма, я́коже предписа́ся.

Параекклисіа́рхъ же покло́нъ сотвори́въ настоя́телю, и благослове́ніе взе́мъ, и́детъ и звони́тъ. Та́же начина́етъ предстоя́тель: Пріиди́те поклони́мся.., три́жды, и мета́нія три́. И чте́цъ глаго́летъ псало́мъ: Благослови́, душе́ моя́, Го́спода.., ти́химъ и кро́ткимъ гла́сомъ. Іере́й же глаго́летъ обы́чныя моли́твы вече́рнія предъ святы́ми враты́. По псалмѣ́: Сла́ва, и ны́нѣ. Аллилу́ія.., три́жды, и покло́ны 3. И ектенія́ вели́кая. И стихосло́вимъ каѳи́сму: Ко Го́споду, внегда́ скорбѣ́ти ми́... И по ко́емждо антифо́нѣ: Сла́ва, и ны́нѣ. Аллилу́ія.., три́жды, и мета́нія три́.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 64 об. – 72 об.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.