Церковный календарь
Новости


2018-11-18 / russportal
Прот. Михаилъ Помазанскій. Признаки Христовой Церкви (1976)
2018-11-18 / russportal
Прот. Михаилъ Помазанскій. О важности догмата о Церкви (1976)
2018-11-18 / russportal
Свт. Василій, еп. Кинешемскій. Бесѣда 8-я на Евангеліе отъ Марка (1996)
2018-11-18 / russportal
Свт. Василій, еп. Кинешемскій. Бесѣда 7-я на Евангеліе отъ Марка (1996)
2018-11-18 / russportal
Еп. Григорій (Граббе). Докладъ Архіерейскому Сѵноду РПЦЗ (1996)
2018-11-18 / russportal
Еп. Григорій (Граббе). Психіатрія и исповѣдь (1996)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 49-я (1922)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 48-я (1922)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 47-я (1922)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 46-я (1922)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 45-я (1922)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 44-я (1922)
2018-11-17 / russportal
Еп. Григорій (Граббе). Начало болѣзней (1996)
2018-11-17 / russportal
Еп. Григорій (Граббе). Письмо въ ред. газеты "Новое Русское Слово" (1996)
2018-11-17 / russportal
"Почему правосл. христ. нельзя быть экуменистомъ". 3-е основаніе (1992)
2018-11-17 / russportal
"Почему правосл. христ. нельзя быть экуменистомъ". 2-е основаніе (1992)
Новости въ видѣ
RSS-канала: .
Сегодня - воскресенiе, 18 ноября 2018 г. Сейчасъ на порталѣ посѣтителей - 18.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВО ВТОРНИКЪ ПЕРВЫЯ СЕДМИЦЫ ВЕЛИКАГО ПОСТА.

ВЪ ПОНЕДѢЛЬНИКЪ ПЕРВЫЯ СЕДМИЦЫ, ВЕЧЕРЪ.
На Го́споди воззва́хъ.., стихи́ры, поста́вимъ стихо́въ 6, гла́съ 2. Творе́ніе господи́на Іо́сифа. Подо́бенъ: Вся́ прейду́.

Вся́кій грѣ́хъ содѣ́яхъ, всѣ́хъ преидо́хъ блудо́мъ; а́ще восхощу́ пока́ятися, не и́мамъ сле́зъ то́ки; аще лѣ́ностно и ны́нѣ поживу́, му́цѣ пови́ненъ е́смь! Но да́ждь ми́ исправле́ніе, еди́не благíй Бо́же, и поми́луй мя́.

Подо́бенъ:

Ту́чи ми́ пода́ждь, Христе́, сле́зъ, въ поста́ кра́сный де́нь, я́ко да воспла́чу, и отмы́ю скве́рну, я́же отъ сласте́й, и явлю́ся Тебѣ́ очище́нъ, егда́, Судіе́, съ небеси́ и́маши пріити́, Го́споди, суди́ти человѣ́комъ, я́ко Судія́, и Пра́ведный еди́нъ.

Другíй, гла́съ 5. Господи́на Ѳео́дора Студи́та. Подо́бенъ: Преподо́бне о́тче.

Пріиди́те усе́рдно, тве́рдое ору́жіе поста́ иму́ще я́ко щи́тъ, вся́кую ко́знь пре́лести вра́жія отврати́мъ, вѣ́рніи. Не опали́мся сладостьми́ страсте́й, ни огня́ искуше́ній убои́мся, и́миже Христо́съ Человѣколю́бецъ почестьми́ терпѣ́нія вѣнча́етъ на́съ. Тѣ́мже со дерзнове́ніемъ моля́щеся, припа́даемъ зову́ще, прося́ще ми́ра и душа́мъ на́шимъ ве́лія ми́лости.

И въ мине́и 3. Сла́ва, и ны́нѣ, богоро́диченъ. Свѣ́те Ти́хій...

Та́же проки́менъ, псало́мъ 3-й, гла́съ 6: Госпо́дне е́сть спасе́ніе,* и на лю́дехъ Твои́хъ благослове́ніе Твое́. Сти́хъ: Го́споди, что́ ся умно́жиша стужа́ющіи ми́?

Бытія́ чте́ніе. [Глава́ 1.]

Въ нача́лѣ сотвори́ Бо́гъ не́бо и зе́млю. Земля́ же бѣ́ неви́дима и неустро́ена, и тма́ верху́ бе́здны, и Ду́хъ Бо́жій ноша́шеся верху́ воды́. И рече́ Бо́гъ: да бу́детъ свѣ́тъ. И бы́сть свѣ́тъ. И ви́дѣ Бо́гъ свѣ́тъ, я́ко добро́; и разлучи́ Бо́гъ между́ свѣ́томъ и между́ тмо́ю. И нарече́ Бо́гъ свѣ́тъ де́нь, и тму́ нарече́ но́щь. И бы́сть ве́черъ, и бы́сть у́тро, де́нь еди́нъ. И рече́ Бо́гъ: да бу́детъ тве́рдь посредѣ́ воды́, и да бу́детъ разлуча́ющи посредѣ́ воды́ и воды́. И бы́сть та́ко. И сотвори́ Бо́гъ тве́рдь; и разлучи́ Бо́гъ между́ водо́ю, я́же бѣ́ подъ тве́рдію, и между́ водо́ю, я́же бѣ́ надъ тве́рдію. И нарече́ Бо́гъ тве́рдь не́бо; и ви́дѣ Бо́гъ, я́ко добро́. И бы́сть ве́черъ, и бы́сть у́тро, де́нь вторы́й. И рече́ Бо́гъ: да собере́тся вода́, я́же подъ небесе́мъ, въ собра́ніе еди́но, и да яви́тся су́ша. И бы́сть та́ко. И собра́ся вода́, я́же подъ небесе́мъ, въ собра́нія своя́, и яви́ся су́ша. И нарече́ Бо́гъ су́шу зе́млю, и собра́нія во́дъ нарече́ моря́. И ви́дѣ Бо́гъ, я́ко добро́. И рече́ Бо́гъ: да прорасти́тъ земля́ бы́ліе травно́е, сѣ́ющее сѣ́мя по ро́ду и по подо́бію, и дре́во плодови́тое, творя́щее пло́дъ, ему́же сѣ́мя его́ въ не́мъ, по ро́ду на земли́. И бы́сть та́ко. И изнесе́ земля́ бы́ліе травно́е, сѣ́ющее сѣ́мя по ро́ду и по подо́бію, и дре́во плодови́тое, творя́щее пло́дъ, ему́же сѣ́мя его́ въ не́мъ по ро́ду на земли́. И ви́дѣ Бо́гъ, я́ко добро́. И бы́сть ве́черъ, и бы́сть у́тро, де́нь тре́тій.

Проки́менъ 2-й, псало́мъ 4-й, гла́съ 5: Госпо́дь услы́шитъ мя́,* внегда́ воззва́ти ми́ къ Нему́. Сти́хъ: Внегда́ призва́ти ми́, услы́ша мя́ Бо́гъ пра́вды моея́.

При́тчей чте́ніе. [Глава́ 1.]

При́тчи Соломо́на, сы́на Дави́дова, и́же ца́рствова во Изра́или. Позна́ти прему́дрость и наказа́ніе, и уразумѣ́ти словеса́ му́дрости. Прія́ти же изви́тія слове́съ и разрѣше́нія гада́ній, уразумѣ́ти же пра́вду и́стинную и су́дъ исправля́ти. Да дастъ незло́бивымъ кова́рство, отроча́ти же ю́ну чу́вство же и смы́слъ. Си́хъ бо послу́шавъ, му́дрый прему́дрѣе бу́детъ, а разу́мный строи́тельство стя́жетъ. Уразумѣ́етъ же при́тчу и те́мное сло́во, рече́нія же прему́дрыхъ и гада́нія. Нача́ло прему́дрости — стра́хъ Госпо́день, ра́зумъ же бла́гъ — всѣ́мъ творя́щимъ его́, благоче́стіе же въ Бо́га — нача́ло чу́вства; прему́дрость же и наказа́ніе нечести́віи уничижа́тъ. Слы́ши, сы́не, наказа́ніе отца́ твоего́ и не отри́ни завѣ́товъ ма́тере твоея́. Вѣне́цъ бо благода́тей пріи́меши на твое́мъ версѣ́ и гри́вну зла́ту о твое́й вы́и. Сы́не, да не прельстя́тъ тебе́ му́жи нечести́віи, ниже́ да восхо́щеши, а́ще помо́лятъ тя́, глаго́люще: «иди́ съ на́ми, приобщи́ся кро́ве, скры́емъ же въ зе́млю му́жа пра́ведна непра́ведно, пожре́мъ же его́, я́коже а́дъ, жи́ва и во́змемъ па́мять его́ отъ земли́, стяжа́ніе его́ многоцѣ́нное пріи́мемъ, испо́лнимъ же до́мы на́ша коры́стей, жре́бій же тво́й положи́ съ на́ми, о́бще же влага́лище стя́жемъ вси́ и мѣше́цъ еди́нъ да бу́детъ всѣ́мъ на́мъ». Не иди́ въ пу́ть съ ни́ми, уклони́ же но́гу твою́ отъ сте́зь и́хъ: но́зѣ бо и́хъ на зло́ теку́тъ и ско́ри су́ть излія́ти кро́вь. Не безъ пра́вды бо простира́ются мре́жи перна́тымъ. Тíи бо убíйству приобща́ющеся, сокро́вищствуютъ себѣ́ зла́я: разруше́ніе же муже́й законопресту́пныхъ — зло́. Сíи путіе́ су́ть всѣ́хъ, творя́щихъ беззако́нная: нече́стіемъ бо свою́ ду́шу отъе́млютъ. Прему́дрость во исхо́дѣхъ пое́тся, въ сто́гнахъ же дерзнове́ніе во́дитъ.

Сподо́би, Го́споди, въ ве́черъ.., и мета́нія 3. Іере́й: Испо́лнимъ вече́рнюю моли́тву...
По возгла́сѣ пое́мъ о́ба ли́ка вку́пѣ

На стихо́внѣ самогла́сенъ дне́, гла́съ 3:

Пости́мся посто́мъ прія́тнымъ, благоуго́днымъ Го́сподеви! Истинный по́стъ е́сть злы́хъ отчужде́ніе, воздержа́ніе язы́ка, я́рости отложе́ніе, по́хотей отлуче́ніе, оглаго́ланія, лжи́ и клятвопреступле́нія. Си́хъ оскуде́ніе — по́стъ и́стинный е́сть и благопрія́тный.

Сти́хъ: Къ Тебѣ́ возведо́хъ [о́чи мои́, Живу́щему на небеси́. Се́, я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́].

И повторя́емъ то́йже.

Та́же му́чениченъ. Сти́хъ: Поми́луй на́съ, Го́споди, [поми́луй на́съ, я́ко помно́гу испо́лнихомся уничиже́нія, наипа́че напо́лнися душа́ на́ша поноше́нiя гобзу́ющихъ и уничиже́нiя го́рдыхъ].

Ве́лія му́ченикъ Твои́хъ, Христе́, си́ла: во гробѣ́хъ бо лежа́тъ, и ду́хи прогоня́ютъ, и упраздни́ша вра́жію вла́сть, вѣ́рою Тро́ическою подви́гшеся о благоче́стіи.

Сла́ва, и ны́нѣ, богоро́диченъ:

Богоро́дице, Предста́тельство всѣ́хъ моля́щихся, Тобо́ю дерза́емъ, Тобо́ю хва́лимся, въ Тебѣ́ все́ упова́ніе на́ше е́сть. Моли́ Ро́ждшагося изъ Тебе́ о непотре́бныхъ рабѣ́хъ Твои́хъ.

Та́же твори́тъ канона́рхъ обы́чный покло́нъ въ ли́ки, та́кожде и о́ба ли́ка. Ны́нѣ отпуща́еши... Трисвято́е, и мета́нія 3, [и по Отче на́шъ...] Свяще́нникъ: Яко Твое́ е́сть Ца́рство... И по ами́нѣ: Богоро́дице Дѣ́во, ра́дуйся... Покло́нъ еди́нъ. Сла́ва: Крести́телю Христо́въ... Покло́нъ еди́нъ. И ны́нѣ: Моли́те за ны́... Покло́нъ еди́нъ. Та́же: Подъ Твое́ благоутро́біе.., безъ покло́на. Го́споди, поми́луй, 40, кро́ткимъ гла́сомъ. Сла́ва, и ны́нѣ. Честнѣ́йшую херуви́мъ... Именемъ Госпо́днимъ благослови́, о́тче. Свяще́нникъ: Сы́й благослове́нъ Христо́съ Бо́гъ на́шъ... Небе́сный Царю́... И глаго́лемъ моли́тву та́йно преподо́бнаго Ефре́ма: Го́споди и Влады́ко живота́ моего́... И твори́мъ 3 вели́кія покло́ны и ма́лыхъ 12. И па́ки предпи́санную моли́тву, и покло́нъ еди́нъ. Трисвято́е [и по Отче на́шъ...]. Го́споди, поми́луй, 12. И моли́тва: Всесвята́я Тро́ице, Единосу́щная Держа́во... Та́же: Бу́ди и́мя Госпо́дне благослове́нно отъ ны́нѣ и до вѣка, три́жды и мета́нія 3. Сла́ва, и ны́нѣ: Благословлю́ Го́спода на вся́кое вре́мя... Посе́мъ: Досто́йно е́сть... и покло́нъ. Посе́мъ другíй ли́къ: Сла́ва, и ны́нѣ. Го́споди, поми́луй, три́жды. Благослови́. И отпу́стъ, по обы́чаю.

Егда́ же поставля́емъ трапе́зу, глаго́лемъ и псало́мъ 144-й:

Вознесу́ Тя́, Бо́же мо́й... И быва́етъ отпу́стъ. Исходя́ще же въ па́перть, пое́мъ, я́коже обы́чай, стихи́ру хра́ма свята́го. Глаго́лются же и отъ свяще́нника обы́чныя моли́твы и помина́етъ усо́пшія. И быва́етъ соверше́нный отпу́стъ.

Сіе́ послѣ́дованіе быва́етъ свѣти́льничнаго, во все́й святѣ́й Четыредеся́тницѣ, не су́щей Преждеосвяще́ннѣй: не прія́хомъ бо твори́ти Преждеосвяще́нную, да́же до среды́, за е́же пости́тися по преда́нію всему́ бра́тству, могу́щіи же да пребу́дутъ постя́щеся до пятка́.

Святы́я же горы́ уста́въ въ пе́рвый у́бо де́нь отню́дъ не повелѣва́етъ я́сти.

Во вто́рникъ же, въ сре́ду и въ четверто́къ я́сти подоба́етъ по еди́ной ли́трѣ хлѣ́ба и во́ду, и и́но ничто́же, ра́звѣ со́ли тре́буя съ хлѣ́бомъ.

[Зри́:] Подоба́етъ вѣ́дати: Яко въ ла́врѣ преподо́бнаго отца́ на́шего Са́ввы, не пое́мъ повече́рій въ це́ркви, но въ ке́лліяхъ пое́мъ кíйждо: та́ко бо прія́хомъ.

Во общежи́тіяхъ же Палести́ны пою́тся повече́рія си́це:




[НА ВЕЛИЦѢМЪ ПОВЕЧЕРІИ,]

О часѣ́ девя́томъ, вхо́дитъ свѣщевжига́тель и, сотвори́въ покло́нъ предстоя́телю, оты́детъ и біе́тъ въ би́ло двана́десять. И собира́емся вси́ въ це́рковь, и сотвори́вше кíйждо вчине́нныя покло́ны, и ма́ло сѣдше, во е́же всѣ́мъ или́ мно́жайшимъ собра́тися. Воста́въ свяще́нникъ отъ сѣда́лища своего́ и, сотвори́въ обы́чный покло́нъ игу́мену, твори́тъ благослове́ніе. И мы́ начина́емъ: Сла́ва Тебѣ́, Бо́же на́шъ, сла́ва Тебѣ́. Царю́ Небе́сный... Трисвято́е, и мета́нія 3. Подо́бнѣ и на Пріиди́те поклони́мся.., мета́нія 3. И а́біе глаго́лемъ псало́мъ 69-й: Бо́же, въ по́мощь мою́ вонми́...

ТАЖЕ НАЧИНАЕМЪ ВЕЛИКІЙ КАНОНЪ,
творя́ще и́ на ча́сти четы́ре со ирмосо́мъ, я́ко испо́лнитися ему́ въ четверто́къ ве́чера.
Творе́ніе свята́го отца́ на́шего Андре́я Кри́тскаго, Іерусали́мскаго.

Пѣ́снь 1.
Гла́съ 6. Ирмо́съ по два́жды.Твори́мъ же на кíйждо тропа́рь мета́нія 3.

Ирмо́съ: Помо́щникъ и Покрови́тель бы́стъ мнѣ́ во спасе́ніе, Се́й мо́й Бо́гъ, и просла́влю Его́, Бо́гъ отца́ моего́, и вознесу́ Его́: сла́вно бо просла́вися.

Припѣ́въ: Поми́луй мя́, Бо́же, поми́луй мя́.

Отку́да начну́ пла́кати окая́ннаго моего́ житія́ дѣя́ній? Ко́е ли положу́ нача́ло, Христе́, ны́нѣшнему рыда́нію? Но, я́ко благоутро́бенъ, да́ждь ми́ прегрѣше́ній оставле́ніе.

Гряди́, окая́нная душе́, съ пло́тію твое́ю, Зижди́телю всѣ́хъ исповѣ́ждься, и оста́нися про́чее пре́ждняго безслове́сія, и принеси́ Бо́гу въ покая́ніи сле́зы.

Первозда́ннаго Ада́ма преступле́нію поревнова́въ, позна́хъ себе́ обнаже́на отъ Бо́га, и присносу́щнаго Ца́рствія и сла́дости, грѣ́хъ ра́ди мои́хъ.

Увы́ мнѣ́, окая́нная душе́, что́ уподо́билася еси́ пе́рвѣй Евѣ? Ви́дѣла бо еси́ злѣ́, и уязви́лася еси́ го́рцѣ, и косну́лася еси́ дре́ва, и вкуси́ла еси́ де́рзостно безслове́сныя снѣ́ди.

Вмѣ́сто Евы чу́вственныя, мы́сленная ми́ бы́сть Ева, — во пло́ти стра́стный по́мыслъ, — показу́яй сла́дкая, и вкуша́яй при́сно го́рькаго напое́нія.

Досто́йно изъ Еде́ма изгна́нъ бы́сть, я́ко не сохрани́въ еди́ну Твою́, Спа́се, за́повѣдь Ада́мъ. Азъ же что́ постражду́, отмета́я всегда́ живо́тная Твоя́ словеса́?

Сла́ва, тро́иченъ: Пресу́щная Тро́ице, во Еди́ницѣ покланя́емая, возьми́ бре́мя отъ мене́ тя́жкое грѣхо́вное и, я́ко благоутро́бна, да́ждь ми́ сле́зы умиле́нія.

И ны́нѣ, богоро́диченъ: Богоро́дице, наде́жде и предста́телство Тебе́ пою́щихъ, возьми́ бре́мя отъ мене́ тя́жкое грѣхо́вное и, я́ко Влады́чица Чи́стая, ка́ющася пріими́ мя.

Пѣ́снь 2.

Ирмо́съ: Вонми́, не́бо, и возглаго́лю, и воспою́ Христа́, отъ Дѣ́вы пло́тію прише́дшаго.

Вонми́, не́бо, — и возглаго́лю; земле́, внуша́й гла́съ, ка́ющійся къ Бо́гу и воспѣва́ющій Его́.

Вонми́ ми, Бо́же, Спа́се мо́й, ми́лостивнымъ Твои́мъ о́комъ, и пріими́ мое́ те́плое исповѣ́даніе.

Согрѣши́хъ па́че всѣ́хъ человѣ́къ, еди́нъ согрѣши́хъ Тебѣ́, но уще́дри, я́ко Бо́гъ, Спа́се, творе́ніе Твое́.

Вообрази́въ мои́хъ страсте́й безобра́зіе, любосла́стными стремле́ньми погуби́хъ ума́ красоту́.

Бу́ря мя́ злы́хъ обдержи́тъ, благоутро́бне Го́споди, но я́ко Петру́, и мнѣ́ ру́ку простри́.

Оскверни́хъ пло́ти моея́ ри́зу и окаля́хъ е́же по о́бразу, Спа́се, и по подо́бію.

Омрачи́хъ душе́вную красоту́, страсте́й сластьми́ и вся́чески ве́сь у́мъ пе́рсть сотвори́хъ.

Раздра́хъ ны́нѣ оде́жду мою́ пе́рвую, ю́же ми́ изтка́ Зижди́тель изъ нача́ла, и отту́ду лежу́ на́гъ.

Облеко́хся въ раздра́нную ри́зу, ю́же изтка́ ми змíй совѣ́томъ, и стыжду́ся.

Сле́зы блудни́цы, Ще́дре, и а́зъ предлага́ю: очи́сти мя́, Спа́се, благоутро́біемъ Твои́мъ.

Воззрѣ́хъ на садо́вную красоту́ и прельсти́хся умо́мъ, и отту́ду лежу́ на́гъ и срамля́юся.

Дѣ́лаша на хребтѣ́ мое́мъ вси́ нача́льницы страсте́й, продолжа́юще на мя́ беззако́ніе и́хъ.

Сла́ва, тро́иченъ: Еди́наго Тя́ въ Тріе́хъ Ли́цѣхъ, Бо́га всѣ́хъ пою́: Отца́ и Сы́на и Ду́ха Свята́го.

И ны́нѣ, богоро́диченъ: Пречи́стая Богоро́дице Дѣ́во, еди́на Всепѣ́тая, моли́ прилѣ́жно, во е́же спасти́ся на́мъ.

Пѣ́снь 3.

Ирмо́съ: На недви́жимѣмъ, Христе́, ка́мени за́повѣдій Твои́хъ утверди́ мое́ помышле́ніе.

Огнь отъ Го́спода иногда́ Госпо́дь одожди́въ, зе́млю Содо́мскую пре́жде попали́.

На горѣ́ спаса́йся, душе́, я́коже Ло́тъ о́ный, и въ Сиго́ръ угонза́й.

Бѣ́гай запале́нія, о душе́, бѣ́гай содо́мскаго горѣ́нія, бѣ́гай тлѣ́нія Боже́ственнаго пла́мене.

Согрѣши́хъ Тебѣ́ еди́нъ а́зъ, согрѣши́хъ па́че всѣ́хъ, Христе́ Спа́се, да не пре́зриши мене́.

Ты́ еси́ Па́стырь до́брый, взыщи́ мене́, а́гнца, и заблу́ждшаго да не пре́зриши мене́.

Ты́ еси́ сла́дкій, Іису́се, Ты́ еси́ Созда́телю мо́й! Въ Тебѣ́, Спа́се, оправда́юся.

Исповѣ́даюся Тебѣ́, Спа́се: согрѣши́хъ, согрѣши́хъ Ти́, но осла́би, оста́ви ми́, я́ко Благоутро́бенъ.

Сла́ва, тро́иченъ: О, Тро́ице, Еди́нице, Бо́же! Спаси́ на́съ отъ пре́лести, и искуше́ній, и обстоя́ній.

И ны́нѣ, богоро́диченъ: Ра́дуйся, богопрія́тная Утро́бо; ра́дуйся, Престо́ле Госпо́день; ра́дуйся, Ма́ти Жи́зни на́шея.

Пѣ́снь 4.

Ирмо́съ: Услы́ша проро́къ прише́ствіе Твое́, Го́споди, и убоя́ся, я́ко хо́щеши отъ Дѣ́вы роди́тися и человѣ́комъ яви́тися, и глаго́лаше: услы́шахъ слу́хъ Тво́й и убоя́хся, сла́ва си́лѣ Твое́й, Го́споди.

Дѣ́лъ Твои́хъ да не пре́зриши, созда́нія Твоего́ да не оста́виши, Правосу́де. Аще и еди́нъ согрѣши́хъ, я́ко человѣ́къ, па́че вся́каго человѣ́ка, Человѣколю́бче, но и́маши, я́ко Госпо́дь всѣ́хъ, вла́сть оставля́ти грѣхи́.

Приближа́ется, душе́, коне́цъ, приближа́ется, и неради́ши, ни гото́вишися; вре́мя сокраща́ется, воста́ни, бли́зъ при две́рехъ Судія́ е́сть. Яко со́ніе, я́ко цвѣ́тъ, вре́мя житія́ тече́тъ: что́ всу́е мяте́мся?

Воспряни́, о душе́ моя́! Дѣя́нія твоя́, я́же содѣ́лала еси́, помышля́й, и сія́ предъ лице́ твое́ принеси́, и ка́плю изпусти́ сле́зъ твои́хъ, рцы́ со дерзнове́ніемъ дѣя́нія и помышле́нія Христу́, и оправда́йся.

Не бы́сть въ житіи́ грѣха́, ни дѣя́нія, ни зло́бы, ея́же а́зъ, Спа́се, не согрѣши́хъ умо́мъ, и сло́вомъ, и произволе́ніемъ, и предложе́ніемъ, и мы́слію, и дѣя́ніемъ согрѣши́въ, я́ко и́нъ никто́же когда́.

Отсю́ду и осужде́нъ бы́хъ, отсю́ду препрѣ́нъ бы́хъ а́зъ, окая́нный, отъ своея́ со́вѣсти, ея́же ничто́же въ мíрѣ ну́жнѣйше; Судіе́, Изба́вителю мо́й и Вѣ́дче! Пощади́, и изба́ви, и спаси́ мя раба́ Твоего́.

Лѣ́ствица, ю́же ви́дѣ дре́вле вели́кій въ патріа́рсѣхъ, указа́ніе е́сть, душе́ моя́, дѣ́ятелнаго восхожде́нія, разу́мнаго возше́ствія; а́ще хо́щеши у́бо дѣя́ніемъ, и ра́зумомъ, и зрѣ́ніемъ пожи́ти, — обнови́ся.

Зно́й дневны́й претерпѣ́ лише́нія ра́ди патріа́рхъ, и мра́зъ нощны́й понесе́, на вся́къ де́нь снабдѣ́нія творя́, пасы́й, тружда́яйся, рабо́таяй, да двѣ́ женѣ́ сочета́етъ.

Жены́ ми двѣ́ разумѣ́й — дѣя́ніе же и ра́зумъ въ зрѣ́ніи: Лíю у́бо — дѣя́ніе, я́ко многоча́дную; Рахи́ль же — ра́зумъ, я́ко многотру́дную, и́бо кромѣ́ трудо́въ, ни дѣя́ніе, ни зрѣ́ніе, душе́, испра́вится.

Сла́ва, тро́иченъ: Нераздѣ́льное Существо́мъ, несли́тное Ли́цы, богосло́влю Тя́, Тро́ическое Еди́но Божество́, я́ко единоца́рственное и сопресто́льное. Вопію́ Ти пѣ́снь вели́кую, въ вы́шнихъ трегу́бо пѣсносло́вимую.

И ны́нѣ, богоро́диченъ: И ражда́еши, и дѣ́вствуеши, и пребыва́еши обою́ду естество́мъ Дѣ́ва: Рожде́йся обновля́етъ зако́ны естества́, утро́ба же ражда́етъ неражда́ющая. Бо́гъ идѣ́же хо́щетъ, побѣжда́ется естества́ чи́нъ, твори́тъ бо ели́ка хо́щетъ.

Пѣ́снь 5.

Ирмо́съ: Отъ но́щи у́тренююща, Человѣколю́бче, просвѣти́, молю́ся, и наста́ви и мене́ на повелѣ́нія Твоя́, и научи́ мя, Спа́се, твори́ти во́лю Твою́.

Въ нощи́ житіе́ мое́ преидо́хъ при́сно: тма́ бо бы́сть и глубока́ мнѣ́ мгла́ но́щь грѣха́; но я́ко дне́ сы́на, Спа́се, покажи́ мя.

Руви́ма подража́я, окая́нный а́зъ, содѣ́яхъ беззако́нный и законопресту́пный совѣ́тъ на Бо́га Вы́шняго, оскверни́въ ло́же мое́, я́ко о́тчее о́нъ.

Исповѣ́даюся Тебѣ́, Христе́ Царю́: согрѣши́хъ, согрѣши́хъ, я́ко пре́жде Іо́сифа бра́тія прода́вшіи — чистоты́ пло́дъ и цѣлому́дрія.

Отъ сро́дниковъ пра́ведная душа́ связа́ся, прода́ся въ рабо́ту сла́дкій, во о́бразъ Госпо́день; ты́ же вся́, душе́, продала́ся еси́ злы́ми твои́ми.

Іо́сифа пра́веднаго и цѣлому́дреннаго ума́ подража́й, окая́нная и неиску́сная душе́, и не оскверня́йся безслове́сными стремле́ньми, при́сно беззако́ннующи.

Аще и въ ро́вѣ поживе́ иногда́ Іо́сифъ, Влады́ко Го́споди, но во о́бразъ погребе́нія и воста́нія Твоего́. Азъ же что́ Тебѣ́ когда́ сицево́е принесу́?

Сла́ва, тро́иченъ: Тя́, Тро́ице, сла́вимъ Еди́наго Бо́га: свя́тъ, свя́тъ, свя́тъ еси́, Отче, Сы́не и Ду́ше, — про́стое Существо́, Еди́нице при́сно покланя́емая.

И ны́нѣ, богоро́диченъ: Изъ Тебе́ облече́ся въ мое́ смѣше́ніе, нетлѣ́нная, безму́жная Ма́ти Дѣ́во, Бо́гъ созда́вый вѣ́ки, и соедини́ Себѣ́ человѣ́ческое естество́.

Пѣ́снь 6.

Ирмо́съ: Возопи́хъ всѣ́мъ се́рдцемъ мои́мъ къ Ще́дрому Бо́гу, и услы́ша мя́ отъ а́да преиспо́дняго, и возведе́ отъ тли́ живо́тъ мо́й.

Сле́зы, Спа́се, о́чію мое́ю, и изъ глубины́ воздыха́нія чи́стѣ приношу́, вопію́щу се́рдцу: Бо́же, согрѣши́хъ Ти́, очи́сти мя́.

Уклони́лася еси́, душе́, отъ Го́спода твоего́, я́коже Даѳа́нъ и Авиро́нъ, но — пощади́, — воззови́ изъ а́да преиспо́дняго, да не про́пасть земна́я тебе́ покры́етъ.

Яко ю́ница, душе́, разсвирѣ́пѣвшая, уподо́билася еси́ Ефре́му: я́ко се́рна отъ тене́тъ сохрани́ житіе́, впери́вши дѣя́ніемъ у́мъ и зрѣ́ніемъ.

Рука́ на́съ Моисе́ова да увѣ́ритъ, душе́, ка́ко мо́жетъ Бо́гъ прокаже́нное житіе́ убѣли́ти и очи́стити, и не отча́йся сама́ себе́, а́ще и прокаже́нна еси́.

Сла́ва, тро́иченъ: Тро́ица е́смь проста́, нераздѣ́льна, раздѣ́льна Ли́чнѣ, и Еди́ница е́смь Естество́мъ соедине́на, — Оте́цъ глаго́летъ, и Сы́нъ, и Боже́ственный Ду́хъ.

И ны́нѣ, богоро́диченъ: Утро́ба Твоя́ Бо́га на́мъ роди́, воображе́на по на́мъ. Его́же, я́ко Созда́теля всѣ́хъ, моли́, Богоро́дице, да моли́твами Твои́ми оправди́мся.

[Го́споди, поми́луй, три́жды. Сла́ва, и ны́нѣ.]

Конда́къ, гла́съ 6:

Душе́ моя́, душе́ моя́, воста́ни, что́ спи́ши? Коне́цъ приближа́ется, и и́маши смути́тися. Воспряни́ у́бо, да пощади́тъ тя́ Христо́съ Бо́гъ, вездѣ́ сы́й и вся́ исполня́яй.

Пѣ́снь 7.

Ирмо́съ: Согрѣши́хомъ, беззако́нновахомъ, непра́вдовахомъ предъ Тобо́ю, ниже́ соблюдо́хомъ, ниже́ сотвори́хомъ, я́коже заповѣ́далъ еси́ на́мъ, но не преда́ждь на́съ до конца́, отце́въ Бо́же.

Согрѣши́хъ, беззако́нновахъ и отверго́хъ за́повѣдь Твою́, я́ко во грѣсѣ́хъ произведо́хся и приложи́хъ я́звамъ стру́пы себѣ́. Но Са́мъ мя́ поми́луй, я́ко Благоутро́бенъ, отце́въ Бо́же.

Та́йная се́рдца моего́ исповѣ́дахъ Тебѣ́, Судіи́ моему́, ви́ждь мое́ смире́ніе, ви́ждь и ско́рбь мою́, и вонми́ суду́ моему́ ны́нѣ, и Са́мъ мя́ поми́луй, я́ко Благоутро́бенъ, отце́въ Бо́же.

Сау́лъ иногда́ я́ко погуби́ отца́ своего́, душе́, осля́та, внеза́пу ца́рство обрѣ́те къ прослу́тію. Но блюди́, не забыва́й себе́, ско́тскія по́хоти твоя́ произво́ливши па́че Ца́рства Христо́ва.

Дави́дъ иногда́ богооте́цъ, а́ще и согрѣши́ сугу́бо, душе́ моя́, стрѣло́ю у́бо устрѣле́нъ бы́въ прелюбодѣ́йства, копіе́мъ же плѣне́нъ бы́въ убíйства томле́ніемъ, но ты́ сама́ тяжча́йшими дѣ́лы неду́гуеши — самохо́тными стремле́ньми.

Совокупи́ у́бо Дави́дъ иногда́ беззако́нію беззако́ніе: убíйству же любодѣ́йство раствори́въ, покая́ніе сугу́бое показа́ а́біе. Но сама́ ты́ лука́внѣйшая, душе́, содѣ́лала еси́, не пока́явшися Бо́гу.

Дави́дъ иногда́ вообрази́, списа́въ, я́ко на ико́нѣ, пѣ́снь, е́юже дѣя́ніе облича́етъ, е́же содѣ́я, зовы́й: поми́луй мя́, Тебѣ́ бо еди́ному согрѣши́хъ, всѣ́хъ Бо́гу. Са́мъ очи́сти мя́!

Сла́ва, тро́иченъ: Тро́ице Про́стая, Нераздѣ́льная, Единосу́щная и Естество́ Еди́но: Свѣ́тове и Свѣ́тъ, и Свя́та Три́ и Еди́но Свя́то, пое́тся Бо́гъ Тро́ица. Но воспо́й, просла́ви Живо́тъ и Животы́, душе́, — всѣ́хъ Бо́га.

И ны́нѣ, богоро́диченъ: Пое́мъ Тя́, благослови́мъ Тя́, покланя́емся Ти́, Богороди́телнице, я́ко Нераздѣ́льныя Тро́ицы породила́ еси́ Еди́наго — Христа́ Бо́га, и Сама́ отве́рзла еси́ на́мъ, су́щимъ на земли́, небе́сная.

Пѣ́снь 8.

Ирмо́съ: Его́же во́инства небе́сная сла́вятъ, и трепе́щутъ херуви́ми и серафи́ми, вся́ко дыха́ніе и тва́рь, по́йте, благослови́те и превозноси́те во вся́ вѣ́ки.

Согрѣши́вша, Спа́се, поми́луй, воздви́гни мо́й у́мъ ко обраще́нію, пріими́ мя ка́ющагося, уще́дри вопію́ща: согрѣши́хъ Ти́, спаси́; беззако́нновахъ, поми́луй мя́!

Колесни́чникъ Илія́, колесни́цею добродѣ́телей вше́дъ, я́ко на небеса́, ноша́шеся превы́ше иногда́ отъ земны́хъ: сего́ у́бо, душе́ моя́, восхо́дъ помышля́й.

Елиссе́й иногда́ пріе́мь ми́лоть Иліину́, прія́тъ сугу́бую благода́ть отъ Го́спода. Ты́ же, о душе́ моя́, сея́ не причасти́лася еси́ благода́ти за невоздержа́ніе.

Іорда́нова струя́ пе́рвѣе ми́лотію Иліино́ю Елиссе́емъ ста́ сю́ду и сю́ду. Ты́ же, о душе́ моя́, сея́ не причасти́лася еси́ благода́ти за невоздержа́ніе.

Сомани́тида иногда́ пра́веднаго учреди́, о душе́, нра́вомъ благи́мъ. Ты́ же не ввела́ еси́ въ до́мъ ни стра́нна, ни пу́тника, тѣ́мже черто́га изри́нешися во́нъ, рыда́ющи.

Гіезíевъ подража́ла еси́, окая́нная, ра́зумъ скве́рный всегда́, душе́. Его́же сребролю́біе отложи́ поне́ на ста́рость, бѣ́гай гее́нскаго огня́, отступи́вши злы́хъ твои́хъ.

Сла́ва, тро́иченъ: Безнача́льне Отче, Сы́не собезнача́льне, Утѣ́шителю благíй, Ду́ше пра́вый; Сло́ва Бо́жія Роди́телю, Отца́ безнача́льна Сло́ве, Ду́ше живы́й и зи́ждяй, — Тро́ице Еди́нице, поми́луй мя́.

И ны́нѣ, богоро́диченъ: Яко отъ оброще́нія червлени́цы, Пречи́стая, у́мная багряни́ца Емману́илева, вну́трь во чре́вѣ Твое́мъ пло́ть истка́ся, тѣ́мже Богоро́дицу вои́стинну Тя́ почита́емъ.

Пѣ́снь 9.

Ирмо́съ: Безсѣ́меннаго зача́тія рождество́ несказа́нное, Ма́тере Безму́жныя нетлѣ́ненъ Пло́дъ: Бо́жіе бо рожде́ніе обновля́етъ естества́. Тѣ́мже Тя́ вси́ ро́ди, я́ко Богоневѣ́стную Ма́терь, правосла́вно велича́емъ.

Умъ острупи́ся, тѣ́ло оболѣ́знися, неду́гуетъ ду́хъ, сло́во изнемо́же, житіе́ умертви́ся, коне́цъ при две́рехъ. Тѣ́мже, моя́ окая́нная душе́, что́ сотвори́ши, егда́ пріи́детъ Судія́ испыта́ти твоя́?

Моисе́ово приведо́хъ ти́, душе́, міробы́тіе и отъ того́ — все́ завѣ́тное писа́ніе, повѣ́дающее тебѣ́ пра́ведныя и непра́ведныя. Яже вторы́я, о душе́, подража́ла еси́, а не пе́рвыя, въ Бо́га согрѣши́вши.

Зако́нъ изнемо́же, пра́зднуетъ Ева́нгеліе, писа́ніе же все́ въ тебѣ́ небреже́но бы́сть: проро́цы изнемого́ша и все́ пра́ведное сло́во. Стру́пы твои́, о душе́, умно́жишася, не су́щу врачу́, изцѣля́ющему тя́.

Но́ваго привожду́ ти писа́нія указа́нія, вводя́щая тя́, душе́, ко умиле́нію. Пра́веднымъ у́бо поревну́й, грѣ́шныхъ же отвраща́йся, и уми́лостиви Христа́ моли́твами же, и поще́ньми, и чистото́ю, и говѣ́ніемъ.

Христо́съ вочеловѣ́чися, призва́въ къ покая́нію разбо́йники и блудни́цы. Душе́, пока́йся, две́рь отве́рзеся Ца́рствія уже́, и предвосхища́ютъ е́ фарисе́е, и мытари́, и прелюбодѣ́и ка́ющіися.

Христо́съ вочеловѣ́чися, пло́ти пріобщи́вся ми́, и вся́, ели́ка су́ть естества́, хотѣ́ніемъ испо́лни, грѣха́ кромѣ́, подо́біе тебѣ́, о душе́, и о́бразъ предпоказу́я Своего́ снисхожде́нія.

Христо́съ волхвы́ спасе́, па́стыри созва́, младе́нецъ мно́жества показа́ му́ченики, ста́рцы просла́ви и ста́рыя вдови́цы. Ихже не поревнова́ла еси́, душе́, ни дѣя́ніемъ, ни житію́: но го́ре тебѣ́, внегда́ бу́деши суди́тися!

Пости́вся Госпо́дь днíй четы́редесять въ пусты́ни, послѣди́ взалка́, показу́я человѣ́ческое. Душе́, да не разлѣни́шися: а́ще тебѣ́ приложи́тся вра́гъ, моли́твою же и посто́мъ отъ но́гъ твои́хъ да отрази́тся.

Сла́ва, тро́иченъ: Отца́ просла́вимъ, Сы́на превознесе́мъ, Боже́ственному Ду́ху вѣ́рно поклони́мся — Тро́ицѣ нераздѣ́льнѣй, Еди́ницѣ по существу́, я́ко Свѣ́ту и Свѣ́томъ, и Животу́ и Живото́мъ, животворя́щему и просвѣща́ющему концы́.

И ны́нѣ, богоро́диченъ: Гра́дъ Тво́й сохраня́й, Богороди́тельнице Пречи́стая. Въ Тебѣ́ бо се́й вѣ́рно ца́рствуяй, въ Тебѣ́ и утвержда́ется, и Тобо́ю побѣжда́яй, побѣжда́етъ вся́кое искуше́ніе, и плѣня́етъ ра́тники, и прохо́дитъ послуша́ніе.

[Припѣ́въ: Преподо́бне о́тче Андре́е, моли́ Бо́га о на́съ.]

Андре́ю: Андре́е честны́й и о́тче треблаже́ннѣйшій, па́стырю Кри́тскій! Не преста́й моля́ся о воспѣва́ющихъ тя́, да изба́вимся вси́ гнѣ́ва, и ско́рби, и тлѣ́нія, и прегрѣше́ній безмѣ́рныхъ, чту́щіи твою́ па́мять вѣ́рно.

Та́же пое́мъ о́ба ли́ка ирмо́съ: Безсѣ́меннаго зача́тія [рождество́ несказа́нное, Ма́тере Безму́жныя нетлѣ́ненъ Пло́дъ: Бо́жіе бо рожде́ніе обновля́етъ естества́. Тѣ́мже Тя́ вси́ ро́ди, я́ко Богоневѣ́стную Ма́терь, правосла́вно велича́емъ].

По сконча́ніи же кано́на глаго́лемъ псало́мъ 4-й: Внегда́ призва́ти ми́, услы́ша мя́... Та́кожде и про́чія псалмы́ повече́рія. На Аллилу́ія... мета́нія три́. И а́біе начина́емъ втору́ю статію́: Къ Тебѣ́, Го́споди, воздвиго́хъ ду́шу мою́... И про́чія два́ псалма́, глаго́люще въ коне́цъ си́хъ: Аллилу́ія.., и твори́мъ мета́нія 3. Та́же начина́етъ ли́къ, пріе́мый отъ вече́рни нача́ло: Съ на́ми Бо́гъ... И глаго́лемъ сицевы́я стихи́ велегла́сно и со сладкопѣ́ніемъ, глаго́лющу еди́ному ли́ку, и отвѣща́ющу друго́му. Подо́бнѣ и: Безпло́тное естество́... Вѣ́рую же во Еди́наго Бо́га.., ни́зкимъ гла́сомъ. Та́же наче́ншій ли́къ: Пресвята́я Влады́чице Богоро́дице, моли́ о на́съ... И твори́тъ другíй ли́къ покло́нъ. И востаю́щу друго́му ли́ку и отвѣщава́ющу, твори́тъ пе́рвый ли́къ покло́нъ. Та́кожде и на про́чія моли́тельныя стихи́ вся́. Егда́ же рече́мъ: Бо́же, очи́сти на́съ, грѣ́шныхъ... Пое́мъ о́ба ли́ка ра́вно, и покло́ны три́. Та́же: Трисвято́е.., безъ покло́новъ, [и по Отче на́шъ...]. И глаго́лемъ настоя́щія тропари́, на гла́съ 2, я́же и пое́мъ велегла́сно и со сладкопѣ́ніемъ: Просвѣти́ о́чи мои́, Христе́ Бо́же... Сла́ва: Засту́пникъ души́ моея́... И ны́нѣ: Яко не и́мамы дерзнове́нія... Су́ть же и и́ны тропари́, и́же и пою́тся чрезъ де́нь, на гла́съ 8, си́рѣчь во вто́рникъ и четверто́къ ве́чера. Су́ть же сíи: Неви́димыхъ вра́гъ мои́хъ неусыпа́ніе... Сти́хъ: При́зри и услы́ши мя́, Го́споди Бо́же мо́й. Яко стра́шенъ су́дъ Тво́й, Го́споди... Сла́ва, Сле́зы ми́ да́ждь, Бо́же... И ны́нѣ, Непосты́дную, Богоро́дице, наде́жду Твою́... Го́споди, поми́луй, 40. Сти́хъ отъ свяще́нника. И моли́тва: Го́споди, Го́споди, избавле́й на́съ... Та́же: Пріиди́те поклони́мся.., три́жды. И глаго́лемъ 50-й: [Поми́луй мя́, Бо́же...] и 101-й псало́мъ: Го́споди, услы́ши моли́тву мо́ю... И: Го́споди, Вседержи́телю, Бо́же оте́цъ на́шихъ... Трисвято́е.., и мета́нія три́, [и по Отче на́шъ...]. Свяще́нникъ: Яко Твое́ е́сть Ца́рство... И по ами́нѣ, глаго́лемъ сія́ тропари́ ско́ро, на гла́съ 6: Поми́луй на́съ, Го́споди... Сла́ва, Го́споди, поми́луй на́съ... И ны́нѣ, Милосе́рдія две́ри отве́рзи на́мъ... Го́споди, поми́луй, 40. Сла́ва, и ны́нѣ. Честнѣ́йшую херуви́мъ... Именемъ Госпо́днимъ благослови́, о́тче. Свяще́нникъ: Моли́твами святы́хъ оте́цъ на́шихъ... И моли́тва: Влады́ко, Бо́же, Отче Вседержи́телю... Пріиди́те поклони́мся.., три́жды. И мета́нія три́. Бо́же, въ по́мощь мою́ вонми́.., и: Го́споди, услы́ши моли́тву мою́... и: Сла́ва въ вы́шнихъ Бо́гу... Го́споди, прибѣ́жище бы́лъ еси́ на́мъ... Сподо́би, Го́споди, въ но́щь сію́... Та́же: Трисвято́е. Пресвята́я Тро́ице, поми́луй на́съ... [и по] Отче на́шъ... Свяще́нникъ: Яко Твое́ е́сть Ца́рство... Та́же пое́мъ велегла́сно и ко́сно, на гла́съ 6: Го́споди си́лъ, съ на́ми бу́ди... И отвѣща́етъ то́жде другíй ли́къ. И глаго́летъ наче́ншій ли́къ сти́хъ: Хвали́те Бо́га во святы́хъ Его́, хвали́те Его́ во утверже́ніи си́лы Его́. И па́ки тропа́рь. Та́же то́йжде тропа́рь другíй ли́къ на ко́емждо стихѣ́. По исполне́ніи же пяти́ стихо́въ, глаго́лютъ о́ба ли́ка вку́пѣ пе́рвый сти́хъ и тропа́рь. Та́же начина́етъ наче́ншій ли́къ: Сла́ва, Го́споди, а́ще не бы́хомъ... И ны́нѣ, Мно́гая мно́жества мои́хъ, Богоро́дице, прегрѣше́ній... Всесвята́я Богоро́дице... Все́ упова́ніе мое́... Господи, помилуй, 40. И молитва: Иже на всякое время... Го́споди, поми́луй, три́жды. Сла́ва, и ны́нѣ. Честнѣ́йшую херуви́мъ... Именемъ Госпо́днимъ благослови́, о́тче. Свяще́нникъ: Бо́же уще́дри ны́... И твори́мъ 16 покло́новъ, я́ко обы́чно, съ моли́твою свята́го Ефре́ма; и твори́мъ ко́сныя за е́же уравня́тися всѣ́мъ. Та́же начина́етъ предстоя́тель: Трисвято́е, и мета́нія 3, [и] по Отче на́шъ... Го́споди, поми́луй, 12. И глаго́лемъ моли́тву: Нескве́рная, Небла́зная... и: И да́ждь на́мъ, Влады́ко...

[Зри́:] Подоба́етъ вѣ́дати, я́ко вя́щшіи уста́вы и обы́чаи повелѣва́ютъ по́слѣ: И да́ждь на́мъ Влады́ко.., па́сти всѣ́мъ на зе́млю, и глаго́лати свяще́ннику велегла́сно моли́тву, я́же въ вели́цѣй вече́рни: Влады́ко Многоми́лостиве, Го́споди Іису́се Христе́, Бо́же на́шъ... И та́ко сотвори́въ покло́нъ предстоя́тель на зе́млю, глаго́летъ бра́тіямъ: Благослови́те, отцы́ святíи, прости́те ми́, грѣ́шному, ели́ка согрѣши́хъ сло́вомъ, дѣ́ломъ, помышле́ніемъ, и всѣ́ми мои́ми чу́вствы. И мы́ отвѣща́емъ: Бо́гъ да прости́тъ ти́, о́тче святы́й! И начина́етъ отъ лѣ́ваго ли́ка по чи́ну еди́нъ и еди́нъ, твори́ти подо́бнѣ и проси́ти, и прія́ти проще́ніе, до́ндеже сконча́ются вси́. И та́ко начина́етъ свяще́нникъ глаго́лати: Помо́лимся о Благочести́вѣйшемъ, Самодержа́внѣйшемъ, Вели́комъ Госуда́рѣ на́шемъ, ИМПЕРАТОРѢ [и́мярекъ] всея́ Россíи... и про́чая, я́ко въ ве́тхомъ учине́ніи уста́вися. И по си́хъ я́ко обы́чно, сти́хъ отъ предстоя́теля, и къ нему́ отъ всѣ́хъ подо́бнѣ покло́нъ, и та́ко отхо́димъ во своя́ ке́лліи. Се́й чи́нъ быва́етъ во всю́ святу́ю Четыредеся́тницу въ повече́ріяхъ. Вѣ́домо бу́ди: предстоя́телю сти́хъ глаго́лющу, мы́: Благослови́, отвѣщава́емъ, пріе́мше проще́ніе. Подоба́етъ же екклисіа́рху и сіе́ смотри́ти прилѣ́жно, да егда́ повече́рія отпуща́ютъ, бы́ти зна́менію дне́, си́рѣчь пре́жде сомра́ка. Се́ у́бо я́ко предписа́ся, еди́нъ де́нь святы́хъ посто́въ прилѣ́жно испыта́вше, предложи́хомъ любви́ ва́шей, коли́чество пѣ́нія, и въ не́мъ воображе́нныя отъ святы́хъ отце́въ покло́ны, я́же нѣ́сть лѣ́по презира́ти, ниже́ вели́кому законоположи́телю. Коли́чество же днено́щныхъ быва́емыхъ въ це́ркви покло́новъ, су́ть 300, кромѣ́ полу́нощницы. Прія́хомъ же въ Палести́нѣ и въ свои́хъ ке́лліяхъ коему́ждо пѣ́ти псалти́рь. И могу́щіи у́бо соверша́ютъ ю́ днено́щно: о́ви же три́жды въ седми́цѣ, о́ви же два́жды. Покло́ны же твори́ти, ели́ки коему́ждо по свое́й си́лѣ предстоя́тель вообрази́тъ.



ВО ВТОРНИКЪ ПЕРВЫЯ СЕДМИЦЫ, НА УТРЕНИ,
По 2-мъ стихосло́віи сѣда́льны, гла́съ 2. Подо́бенъ: Преблагослове́нна.

Преблагослове́нна благода́ть всечестна́го поста́: Моисе́й бо тѣ́мъ просла́вися и зако́нъ въ пи́смени на скрижа́лехъ прія́тъ; огня́ си́льнѣйшіи о́троцы ю́ніи яви́шася. Въ то́мъ у́бо погаси́мъ плотскíя стра́сти пламенѣ́ющія, Христу́ Спа́су вопію́ще: обраще́ніе на́мъ всѣ́мъ да́руй и изба́ви гее́нны.

Сла́ва и́ный, гла́съ то́йже. Подо́бенъ: Милосе́рдія су́щи.

Покая́нія наста́ вре́мя, воздержа́нія покажи́ плоды́, о душе́ моя́, воззри́ къ преждепока́явшимся, воззови́ Христу́: согрѣши́хъ, спаси́ мя́, я́коже спа́слъ еси́, Влады́ко, мытаря́, воздохну́вша отъ се́рдца, Благíй, еди́нъ сы́й Многоми́лостивый.

И ны́нѣ, богоро́диченъ:

Предста́тельство те́плое христіа́нъ, Сы́на Твоего́ моли́ при́сно, Богоро́дице, вся́каго злодѣ́йства и лю́тости изба́вити на́съ бори́теля, и да́ти на́мъ проще́ніе, и́хже согрѣши́хомъ, благоутро́бія ра́ди щедро́тъ, Твои́ми моли́твами, Ма́ти Дѣ́во.

По 3-мъ стихосло́віи сѣда́ленъ, гла́съ 5. Подо́бенъ: Го́споди, ча́шу му́ки.

Го́споди, спаси́тельное воздержа́ніе двоеде́нствующе, вопіе́мъ Ти́: умили́ сердца́ на́съ, рабо́въ Твои́хъ, и пріими́ су́щія со стра́хомъ моли́твы на́ша, подая́ на́мъ благотече́нное поста́ по́прище, очище́ніе и ве́лію ми́лость.

Сла́ва, то́йже. И ны́нѣ, богоро́диченъ. Подо́бенъ: Собезнача́льное Сло́во.

Цвѣ́тъ боже́ственный, ко́реню прозя́бшій, киво́те, и свѣ́щниче, и ста́мно всезлата́я, свята́я трапе́зо, Хлѣбъ Живота́ нося́щая, я́ко Сы́на Твоего́ и Бо́га, умоли́ Его́, со святы́мъ Предте́чею, е́же уще́дрити и спасти́, Богоро́дицу исповѣ́дающія Тя́.

Кано́нъ мине́и и тріо́ди.
Пѣ́снь 2, гла́съ 2.
И стихосло́вится втора́я пѣ́снь Псалтиря́.

Ирмо́съ: Ви́дите, ви́дите, я́ко Азъ е́смь въ мо́ри спасы́й, и въ пусты́ни насы́тивый изра́ильтескія лю́ди, и во́ду изъ ка́мене источи́вый человѣ́комъ, да дре́вле во тлю́ па́дшаго, поне́съ, привлеку́ ко Мнѣ́ за неизрече́нную ми́лость.

Трезви́ся, бо́дрствуй, воздохни́, прослези́ся, посто́мъ все́ бре́мя грѣха́, душе́, отве́ргни, те́плымъ покая́ніемъ отбѣ́гни огня́, и пла́чемъ страсте́й плаче́вную ри́зу раздери́, оде́жду боже́ственную пріе́млющи.

Къ горѣ́ присту́пимъ, изря́дныхъ дѣя́ній поще́ніемъ вси́, долуре́вностныя оста́вльше сласте́й прило́ги, и въ сомра́къ вше́дше честны́хъ видѣ́ній, еди́ну у́зримъ Христо́ву рачи́тельную добро́ту, обожа́еми та́йно боже́ственными восхожде́ніи.

Увы́ мнѣ́, кто́ бу́ду? что́ содѣ́ю, грѣ́хъ содѣ́ловая и Влады́ки не устраша́яся, безсо́вѣстный? Сего́ ра́ди пре́жде суда́ осужде́нъ е́смь. Правосу́де Благíй, обрати́въ мя́ спаси́, па́че всѣ́хъ человѣ́къ Тебе́ преогорчи́вшаго.

Богоро́диченъ: Неора́нная земле́, прорасти́вшая всѣ́хъ Пита́теля, отверза́ющаго ру́ку и благоволе́ніемъ Свои́мъ насыща́юща вся́кое живо́тное крѣ́постію Боже́ственною, утверди́ Хлѣ́бомъ Жи́зненнымъ ослабѣ́вшая сердца́ сы́тостію лю́тыхъ на́шихъ прегрѣше́ній.

Иный, гла́съ 5:

Ирмо́съ: Ви́дите, ви́дите, [я́ко Азъ е́смь Бо́гъ, въ пло́ть облекíйся во́лею Свое́ю, да спасу́ Ада́ма, отъ ле́сти па́дшаго въ преступле́ніе змíемъ].

Пріиди́те, сни́демъ въ клѣ́ть душе́вную, Го́сподеви моли́твы воздаю́ще и вопію́ще: Отче на́шъ, Иже на Небесѣ́хъ, до́лги на́ша осла́би и оста́ви, я́ко еди́нъ Благоутро́бенъ.

Души́ на́шея въ постѣ́ ти́хое показу́юще, не сѣ́туимъ вожделѣ́нныхъ дне́й измѣне́нія, я́ко просія́ша на́мъ благоче́стія исправле́нія.

Сла́ва, тро́иченъ: Безнача́льная, Несозда́нная Тріѵпоста́сная Еди́нице, Госпоже́, Ца́рство вѣко́въ, Тебе́ сла́витъ, Отца́ и Сы́на и Свята́го Ду́ха, мно́жество а́нгелъ и все́ естество́ человѣ́ческое.

[И ны́нѣ,] богоро́диченъ: Тебе́, вседобродѣ́тельную сла́ву ро́да на́шего пое́мъ, Тобо́ю бо обожи́хомся, Дѣ́во, и́бо родила́ еси́ на́мъ Спа́са и Бо́га Христа́, разрѣши́вшаго насъ отъ кля́твы.

Сла́ва Тебѣ́, Бо́же на́шъ, сла́ва Тебѣ́.

Кто́ о́гнь угаси́? кто́ затче́ уста́ звѣре́й? — По́стъ, о́троки изъ пе́щи избавле́й и проро́ка Даніи́ла отъ льво́въ снѣ́ди. Его́же лобыза́имъ и мы́, бра́тіе.

Ирмо́съ: Ви́дите, ви́дите, я́ко Азъ е́смь Бо́гъ, въ пло́ть облекíйся во́лею Свое́ю, да спасу́ Ада́ма, отъ ле́сти па́дшаго въ преступле́ніе змíемъ.

Пѣ́снь 8.

Ирмо́съ: Въ купинѣ́ Моисе́ю [Дѣ́вы чу́до на Сина́йстѣй горѣ́ Прообрази́вшаго иногда́, по́йте, благослови́те и превозноси́те во вся́ вѣ́ки].

Со́нъ отложи́, душе́, лю́тыя лѣ́ности и усе́рдно бо́дрствуй къ Боже́ственнымъ за́повѣдемъ: приближа́ется Жени́хъ Свѣщено́сецъ, потщи́ся Того́ предусрѣ́сти.

Уя́звлена лю́тѣ сласте́й ору́жіемъ, лѣчбо́ю щедро́тъ благоутро́бнаго Твоего́ манове́нія исцѣли́ мя́, Сло́ве, я́ко да Тя́ благода́рно сла́влю во вѣ́ки.

Отъ страсте́й вре́дныхъ, отъ за́висти и не́нависти, отъ вся́кія зло́бы воздержи́ся, душе́, пи́щами пита́ющися, пи́щу го́рнюю невеще́ственно хода́тайствующими.

Богоро́диченъ: Богороди́тельнице Чи́стая, ду́ши моея́ гное́нія, и се́рдца стра́сти, и ума́ премѣне́ніе исцѣли́, я́ко еди́на грѣ́шныхъ Помо́щница и разоря́емыхъ Стѣна́.

Иный.

Ирмо́съ: Творца́ тва́ри, [Его́же ужаса́ются а́нгели, по́йте, лю́діе, и превозноси́те во вся́ вѣ́ки].

Воздержа́ніемъ вси́ ду́ши впери́вше, на небеса́ моли́твы благопрія́тныя принесе́мъ Го́сподеви.

Ду́хъ умиле́нія пріе́мше, прослези́мъ ко избавле́нію ду́шъ, пѣсносло́вяще Христа́ во вѣ́ки.

Благослови́мъ Отца́, и Сы́на, и Свята́го Ду́ха, Го́спода.

Тро́иченъ: Тро́ице единосу́щная, и Еди́нице несозда́нная, и всѣ́хъ Бо́же, Тебе́ превозно́симъ во вся вѣ́ки.

[И ны́нѣ,] богоро́диченъ: Моли́тву сотвори́ о пою́щихъ Тя́, Пречи́стая, изба́витися вся́ческихъ искуше́ній и бѣ́дъ.

Сла́ва Тебѣ́, Бо́же на́шъ, сла́ва Тебѣ́.

Пи́щу бога́таго оплева́вше, пріиди́те съ Ла́заремъ пости́мся, да и на́съ огрѣ́етъ Авраа́мово нѣ́дро.

Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].

Ирмо́съ: Творца́ тва́ри, Его́же ужаса́ются а́нгели, по́йте, лю́діе, и превозноси́те во вся́ вѣ́ки.

Пѣ́снь 9.

Ирмосъ: Отъ земноро́дныхъ кто́ слы́ша [таково́е? Или́ кто ви́дѣ когда́, я́ко Дѣ́ва обрѣ́теся, во чре́вѣ иму́щая и безболѣ́зненно Младе́нца поро́ждшая? Таково́е Твое́ чу́до, и Тя́, Чи́стая Богоро́дице, велича́емъ].

Земноро́дныхъ кто́ та́ко поползну́вся, Бо́га прогнѣ́ва когда́? Кто́ стремле́ньми зло́бы послѣ́дова и пребыва́лище яви́ся грѣха́, я́коже а́зъ окая́нный? Но, Бо́же, Воли́телю ми́лости, Ты́ мя́ уще́дри.

Богови́дныхъ а́нгелъ си́лы, благоувѣ́тливаго Бо́га умоли́те, спасти́ ду́шу, въ пучи́нѣ жите́йскихъ сласте́й и треволне́ніихъ страсте́й обурева́емую, и въ прило́зѣхъ сопроти́вныхъ духо́въ бѣ́дствующую.

Гряди́, душе́, кри́лы облегча́ема, посто́мъ добродѣ́телей отъ долувлеку́щія зло́бы воста́ни и видѣ́ньми наслади́ся свѣтлѣ́йшими, пи́щу хода́тайствующими добродѣ́телей, богови́дна быва́ющи вѣ́рою.

Богоро́диченъ: Кто́ слы́шаны сотвори́тъ хвалы́ Тебѣ́, ро́ждшія па́че ума́ хвали́маго Влады́ку, Чи́стая, и Го́спода, Его́же хва́лятъ а́нгельская чинонача́лія? Того́ у́бо моли́ о лю́дехъ согрѣши́вшихъ, Дѣ́во Неискусобра́чная.

Иный.

Ирмо́съ: Иса́іе, лику́й, [Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ].

Вре́мя благопрія́тное, де́нь спасе́нія, принесе́мъ Бо́гу да́ры добродѣ́телей, въ не́мже отложи́вше дѣла́ тмы, бра́тіе, облеце́мся во ору́жіе свѣ́та, я́коже Па́велъ вопіе́тъ.

Пріиди́те, я́коже Госпо́дь посто́мъ уби́ врага́, си́мъ и мы́ сокруши́мъ его́ стрѣ́лы и ловле́нія, — за мя́ иди́ сатано́! — кíйждо глаго́люще, внегда́ хо́щетъ искуша́ти на́съ.

Сла́ва, тро́иченъ: Единосу́щіемъ воспѣва́ю Тя́, Безнача́льная Тро́ице Честна́я, Живонача́льная, Несѣко́мая Еди́нице, Отче нерожде́нне, и рожде́нне Сло́ве и Сы́не, и Ду́ше Святы́й, спаси́ ны́, пою́щія Тя́.

[И ны́нѣ,] богоро́диченъ: Па́че ума́ рождество́ Твое́, Богома́ти: безъ му́жа бо зача́тіе въ Тебѣ́ и дѣви́чески рожде́ніе бы́сть, и́бо Бо́гъ е́сть роди́выйся, Его́же велича́юще, Тя́, Дѣ́во, ублажа́емъ.

Сла́ва Тебѣ́, Бо́же на́шъ, сла́ва Тебѣ́.

Посто́мъ приложи́вшеся къ моли́твъ горѣ́, и мы́ се́рдцемъ чи́стымъ ви́димъ Бо́га, скрижа́ли пріе́млюще за́повѣдей вну́трь, я́коже Моисе́й, сла́вою облиста́ющеся, лице́мъ любве́ Его́.

Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

Свѣти́ленъ.

На стихо́внѣ самогла́сенъ дне́, гла́съ 3:

Начне́мъ, лю́діе, непоро́чный по́стъ, и́же е́сть душа́мъ спасе́ніе, порабо́таимъ Го́сподеви со стра́хомъ, еле́емъ благотворе́нія главы́ пома́жемъ и водо́ю чистоты́ ли́ца умы́емъ, не многоглаго́лемъ въ моли́твахъ, но я́ко научи́хомся, та́ко возопіи́мъ: Отче на́шъ, Иже на Небесѣ́хъ, оста́ви на́мъ прегрѣше́нія на́ша, я́ко Человѣколю́бецъ.

Сти́хъ: Испо́лнихомся зау́тра [ми́лости Твоея́, Го́споди, и возра́довахомся, и возвесели́хомся. Во вся́ дни́ на́ша возвесели́хомся, за дни́ въ ня́же смири́лъ ны́ еси́, лѣ́та въ ня́же ви́дѣхомъ зла́я. И при́зри на рабы́ Твоя́ и на дѣла́ Твоя́, и наста́ви сы́ны и́хъ].

Па́ки то́йже самогла́сенъ.

Сти́хъ 2: И бу́ди свѣ́тлость [Го́спода Бо́га на́шего на на́съ, и дѣла́ ру́къ на́шихъ испра́ви на на́съ и дѣ́ло ру́къ на́шихъ испра́ви].

Та́же му́чениченъ: Царе́й и мучи́телей стра́хъ отри́нуша Христо́вы во́ини и благодерзнове́нно и му́жественно Того́ исповѣ́даша, всѣ́хъ Го́спода Бо́га и Царя́ на́шего, и мо́лятся о душа́хъ на́шихъ.

Сла́ва, и ны́нѣ, богоро́диченъ:

Богоро́дице, Предста́тельство всѣ́хъ моля́щихся Тебѣ́, Тобо́ю дерза́емъ, и Тобо́ю хва́лимся, и къ Тебѣ́ все́ упова́ніе на́ше е́сть, моли́ Ро́ждшагося изъ Тебе́ за непотре́бныя рабы́ Твоя́.



На 6-мъ часѣ́, тропа́рь проро́чества, гла́съ 1:

Яко прише́льцы есмы́ на земли́, я́коже вси́ отцы́ на́ши, кра́ткое живота́ на́шего безгрѣ́шно сохрани́, Спа́се на́шъ, и поми́луй на́съ, я́ко Человѣколю́бецъ.

Проки́менъ, псало́мъ 5-й, гла́съ 4: Вонми́ гла́су моле́нія моего́,* Царю́ мо́й и Бо́же мо́й. Сти́хъ: Глаго́лы моя́ внуши́, Го́споди, разумѣ́й зва́ніе мое́.

Проро́чества Иса́іина чте́ніе. [Глава́ 1.]

Та́ко глаго́летъ Госпо́дь: а́ще хо́щете и послу́шаете Мене́, блага́я земли́ снѣ́сте. Аще же не хо́щете, ниже́ послу́шаете Мене́, ме́чь вы́ поя́стъ, — уста́ бо Госпо́дня глаго́лаша сія́. Ка́ко бы́сть блудни́ца гра́дъ вѣ́рный, Сіо́нъ, по́лнъ суда́? Въ не́мже пра́вда почива́ше, ны́нѣ же (въ не́мъ) убíйцы. Сребро́ ва́ше неискуше́но, корче́мницы твои́ мѣша́ютъ вино́ съ водо́ю. Кня́зи твои́ не покаря́ются, о́бщницы тате́мъ, лю́бяще да́ры, гоня́ще воздая́ніе; си́рымъ не судя́щіи и суду́ вдови́цъ не внима́ющіи. Сего́ ра́ди та́ко глаго́летъ Влады́ка Госпо́дь Савао́ѳъ: го́ре крѣ́пкимъ во Изра́или! Не преста́нѣтъ бо я́рость Моя́ на проти́вныя и су́дъ враго́мъ Мои́мъ сотворю́. И наведу́ ру́ку Мою́ на тя́, и разжегу́ въ чистоту́, непокаря́ющихся же погублю́, и отыму́ всѣ́хъ беззако́нныхъ отъ тебе́ и всѣ́хъ го́рдыхъ смирю́. И приста́влю судіи́ твои́, я́коже пре́жде, и совѣ́тники твоя́, я́ко отъ нача́ла; и по си́хъ нарече́шися гра́дъ пра́вды, ма́ти градово́мъ, вѣ́рный Сіо́нъ. Съ судо́мъ бо спасе́тся плѣне́ніе его́ и съ ми́лостынею. И сокруша́тся беззако́нніи и грѣ́шницы вку́пѣ, и оста́вившіи Го́спода сконча́ются. Зане́же постыдя́тся о и́долѣхъ свои́хъ, и́хже са́ми восхотѣ́ша, и посра́мятся о садѣ́хъ свои́хъ, и́хже возжелѣ́ша: бу́дутъ бо, я́ко тереви́нѳъ, отме́тнувшій ли́ствія (своя́), и я́ко вертогра́дъ, не имы́й воды́. И бу́детъ крѣ́пость и́хъ я́ко сте́бль изгре́бія, и дѣ́ланія и́хъ, я́ко и́скры о́гненныя, и сожгу́тся беззако́нницы и грѣ́шницы вку́пѣ, и не бу́детъ угаша́яй. Сло́во, бы́вшее отъ Го́спода ко Иса́іи, сы́ну Амо́сову, о Іуде́и и о Іерусали́мѣ: Яко бу́детъ въ послѣ́дняя дни́ явле́на гора́ Госпо́дня и до́мъ Бо́жій на версѣ́ го́ръ, и возвы́сится превы́ше холмо́въ, и пріи́дутъ къ не́й вси́ язы́цы. И по́йдутъ язы́цы мно́зи и реку́тъ: пріиди́те, и взы́демъ на го́ру Госпо́дню и въ до́мъ Бо́га Іа́ковля, и возвѣсти́тъ на́мъ пу́ть Сво́й, и по́йдемъ по нему́.

Проки́менъ, псало́мъ 6-й, гла́съ 4: Го́споди, да не я́ростію Твое́ю* обличи́ши мене́. Сти́хъ: Поми́луй мя́, Го́споди, я́ко не́мощенъ е́смь.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 72 об. – 83.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.