Церковный календарь
Новости


2018-05-25 / russportal
Н. И. Ульяновъ. Замолчанный Марксъ (1969)
2018-05-25 / russportal
Дѣянія 2-го Всезарубежн. Собора РПЦЗ 1938 г. Докладъ (2-й) К. Н. Николаева (1939)
2018-05-24 / russportal
Cвт. Іоаннъ, архіеп. Шанхайскій. Святыя Евѳимія и Ольга (1994)
2018-05-24 / russportal
Cвт. Іоаннъ, архіеп. Шанхайскій. Преп. Серафимъ Саровскій (1994)
2018-05-24 / russportal
Прав. Іоаннъ Кронштадтскій. "Новыя грозныя слова". Слово 15 (37) (1908)
2018-05-24 / russportal
Прав. Іоаннъ Кронштадтскій. "Новыя грозныя слова". Слово 14 (36) (1908)
2018-05-23 / russportal
И. А. Родіоновъ. Повѣсть "Жертвы вечернія". Глава 50-я (1922)
2018-05-23 / russportal
И. А. Родіоновъ. Повѣсть "Жертвы вечернія". Глава 49-я (1922)
2018-05-23 / russportal
Н. А. Соколовъ. "Убійство Царской Семьи". Глава 6-я (1925)
2018-05-23 / russportal
Н. А. Соколовъ. "Убійство Царской Семьи". Глава 5-я (1925)
2018-05-23 / russportal
Cвт. Іоаннъ Шанхайскій. Разслабленный, самарянка и слѣпорожденный (1994)
2018-05-23 / russportal
Cвт. Іоаннъ, архіеп. Шанхайскій. Святые Кириллъ и Меѳодій (1994)
2018-05-23 / russportal
Прав. Іоаннъ Кронштадтскій. "Моя жизнь во Христѣ". Часть 1-я (стр. 71-80) (1957)
2018-05-23 / russportal
Прав. Іоаннъ Кронштадтскій. "Моя жизнь во Христѣ". Часть 1-я (стр. 61-70) (1957)
2018-05-21 / russportal
И. А. Родіоновъ. Повѣсть "Жертвы вечернія". Глава 48-я (1922)
2018-05-21 / russportal
И. А. Родіоновъ. Повѣсть "Жертвы вечернія". Глава 47-я (1922)
Новости въ видѣ
RSS-канала: .
Сегодня - суббота, 26 мая 2018 г. Сейчасъ на порталѣ посѣтителей - 10.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ СРЕДУ ПЕРВЫЯ СЕДМИЦЫ ВЕЛИКАГО ПОСТА.

ВО ВТОРНИКЪ ВЕЧЕРА,
На Го́споди воззва́хъ... стихи́ры, гла́съ 2. Подо́бенъ, тріо́ди: Яко яви́ся.

Снѣ́дію дре́вле го́рькою изри́нувшеся изъ рая́, воздержа́ніемъ страсте́й потщи́мся вни́ти, взыва́юще Бо́гу на́шему: на Крестѣ́ простры́й дла́ни Твоя́, о́цетъ пи́вый и же́лчь вкуси́вый, и болѣ́зни претерпѣ́вый отъ гвозде́й, горча́йшія сла́сти вся́ отъ ду́шъ на́шихъ изгвозди́вый, ра́ди благоутро́бія щедро́тъ спаси́ рабы́ Твоя́.

Дре́ва снѣ́дію иногда́ изгна́ни бы́вше изъ рая́, Кресто́мъ Твои́мъ въ о́нь всели́хомся, его́же въ моли́тву Тебѣ́ приводя́ще, Многоми́лостиве, и вѣ́рно Ти́ вси́ мо́лимся: исто́чники сле́зъ ны́нѣ на́мъ низпосли́ во вре́мя воздержа́нія, скве́рну всю́ очища́ющія страсте́й и прегрѣше́ній на́шихъ, да вси́ Ти́ вопіе́мъ прилѣ́жно: Го́споди, сла́ва Тебѣ́.

Ина стихи́ра, гла́съ 2. Подо́бенъ: Содѣ́янныхъ ми́.

Воздержа́нія наслажде́ніе и мнѣ́, Сло́ве, да́руй, я́коже Ада́му ра́й иногда́, отъ вся́кія Твоея́ вкуша́ти за́повѣди, Бо́же на́шъ, и оша́ятися при́сно плода́, его́же отре́клъ еси́ грѣха́, да живоно́сную Стра́сть Твою́ Кре́стную въ ра́дости предварю́.

И въ мине́и 3. Сла́ва, и ны́нѣ, крестобогоро́диченъ.

Проки́менъ, псало́мъ 7-й, гла́съ 6: Го́споди Бо́же мо́й,* на Тя́ упова́хъ, спаси́ мя́. Сти́хъ: Отъ всѣ́хъ гоня́щихъ мя́ изба́ви мя́.

Бытія́ чте́ніе. [Глава́ 1.]

Рече́ Бо́гъ: да бу́дутъ свѣти́ла на тве́рди небе́снѣй, освѣща́ти зе́млю и разлуча́ти между́ дне́мъ и между́ но́щію, и да бу́дутъ въ зна́менія и во времена́, и во дни́, и въ лѣ́та. И да бу́дутъ въ просвѣще́ніе на тве́рди небе́снѣй, я́ко свѣти́ти по земли́. И бы́сть та́ко. И сотвори́ Бо́гъ два́ свѣти́ла вели́кая: свѣти́ло вели́кое въ нача́ла дне́, и свѣти́ло ме́ньшее въ нача́ла но́щи, и звѣ́зды. И положи́ я́ Бо́гъ на тве́рди небе́снѣй, я́ко свѣти́ти на зе́млю, и владѣ́ти дне́мъ и но́щію, и разлуча́ти между́ свѣ́томъ и между́ тмо́ю. И ви́дѣ Бо́гъ, я́ко добро́. И бы́сть ве́черъ, и бы́сть у́тро, де́нь четве́ртый. И рече́ Бо́гъ: да изведу́тъ во́ды га́ды ду́шъ живы́хъ и пти́цы, лета́ющія по земли́, по тве́рди небе́снѣй. И бы́сть та́ко. И сотвори́ Бо́гъ ки́ты вели́кія и вся́ку ду́шу живо́тныхъ гадо́въ, я́же изведо́ша во́ды, по родо́мъ и́хъ, и вся́ку пти́цу перна́ту по ро́ду. И ви́дѣ Бо́гъ, я́ко добра́. И благослови́ я́ Бо́гъ, глаго́ля: расти́теся и мно́житеся, и напо́лните во́ды, я́же въ моря́хъ, и пти́цы да умно́жатся на земли́. И бы́сть ве́черъ, и бы́сть у́тро, де́нь пя́тый.

Проки́менъ, псало́мъ 8-й, гла́съ 5: Го́споди Госпо́дь на́шъ,* я́ко чу́дно и́мя Твое́ по все́й земли́. Сти́хъ: Яко взя́тся великолѣ́піе Твое́ превы́ше небе́съ.

При́тчей чте́ніе. [Глава́ 1.]

Прему́дрость во исхо́дѣхъ пое́тся, въ сто́гнахъ же дерзнове́ніе во́дитъ, на кра́ехъ же стѣнъ проповѣ́дуется, у вра́тъ же си́льныхъ присѣди́тъ, во вратѣ́хъ же гра́да дерза́ющи глаго́летъ: «Ели́ко у́бо вре́мя незло́бивіи держа́тся пра́вды — не постыдя́тся; безу́мніи же, доса́ды су́ще жела́теліе, нечести́віи бы́вше, возненави́дѣша чу́вство и пови́нни бы́ша обличе́ніемъ. Се́ предложу́ ва́мъ моего́ дыха́нія рече́ніе, научу́ же ва́съ моему́ словеси́. Поне́же зва́хъ, и не послу́шасте; и простира́хъ словеса́, и не внима́сте, но отмета́сте моя́ совѣ́ты и мои́мъ обличе́ніемъ не внима́сте. Убо и а́зъ ва́шей поги́бели посмѣю́ся, пора́дуюся же, егда́ пріи́детъ ва́мъ па́губа. И егда́ пріи́детъ на вы́ внеза́пу мяте́жъ, низвраще́ніе же, подо́бно бу́ри, пріи́детъ, или́ егда́ пріи́детъ ва́мъ печа́ль и градоразоре́ніе, или́ егда́ на́йдетъ на вы́ па́губа. Бу́детъ бо, егда́ призове́те мя́, а́зъ же не послу́шаю ва́съ; взы́щутъ мене́ злíи, и не обря́щутъ. Возненави́дѣша бо прему́дрость, словесе́ же Госпо́дня не прія́ша, ниже́ хотѣ́ша внима́ти мои́мъ совѣ́томъ, руга́хуся же мои́мъ обличе́ніемъ. Тѣ́мже снѣдя́тъ свои́хъ путе́й плоды́ и своего́ нече́стія насы́тятся. Ибо, зане́ оби́дѣша младе́нцевъ, убіе́ни бу́дутъ, и истяза́ніе нечести́выя погуби́тъ. Мене́ же слу́шаяй всели́тся на упова́ніи и почíетъ безъ стра́ха отъ вся́каго зла́».

Та́же: Сподо́би, Го́споди...

На стихо́внѣ стихи́ра самогла́сна дне́, гла́съ 8:

По́стъ не оша́яніе бра́шенъ то́чію соверши́мъ, но вся́кія веще́ственныя стра́сти отчужде́ніе, да на на́съ мучи́тельствующую пло́ть порабо́тивше, досто́йни бу́демъ прича́стія Агнца, за мíръ закла́ннаго во́лею, Сы́на Бо́жія, и духо́вно пра́зднуемъ изъ ме́ртвыхъ Спа́сово Воскресе́ніе, на высоту́ взе́мшеся добродѣ́телей во свѣ́тлости и наслажде́ніи изря́дныхъ дѣ́лъ, веселя́ще Человѣколю́бца.

Сти́хъ: Къ Тебѣ́ возведо́хъ о́чи мои́, [Живу́щему на небеси́. Се́, я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́].

Па́ки ту́же стихи́ру.

Сти́хъ 2: Поми́луй на́съ, Го́споди, [поми́луй на́съ, я́ко помно́гу испо́лнихомся уничиже́нія, наипа́че напо́лнися душа́ на́ша поноше́нiя гобзу́ющихъ и уничиже́нiя го́рдыхъ].

Му́чениченъ: Му́ченицы Твои́, Го́споди, забы́вше су́щая въ житіи́, неради́вше и о му́кахъ бу́дущія ра́ди жи́зни, сея́ наслѣ́дницы яви́шася, тѣ́мже и со а́нгелы ра́дуются. Тѣ́хъ моли́твами да́руй лю́демъ Твои́мъ ве́лію ми́лость.

Сла́ва, и ны́нѣ, крестобогоро́диченъ:

О, пресла́внаго чудесе́! О, та́инства но́ваго! О, ужа́снаго начина́нія! — Дѣ́ва глаго́лаше, на Крестѣ́ Тя́ я́ко ви́дѣ посредѣ́ двою́ разбо́йнику обѣ́шена, Его́же неболѣ́зненно ужа́сно породи́, пла́каше глаго́лющи: увы́ мнѣ́, Ча́до любе́знѣйшее, ка́ко Тя́ лю́тый наро́дъ и неблагода́рный ко Кресту́ пригвозди́?

И про́чее послѣ́дованіе, я́коже изъяви́ся.




ВО ВТОРНИКЪ ПЕРВЫЯ СЕДМИЦЫ, НА ПОВЕЧЕРІИ.

По е́же рещи́ псало́мъ: Бо́же, въ по́мощь мою́... Пое́мъ вели́кій кано́нъ, гла́съ 6.

Пѣ́снь 1.

Ирмо́съ: Помо́щникъ и Покрови́тель бы́стъ мнѣ́ во спасе́ніе, Се́й мо́й Бо́гъ, и просла́влю Его́, Бо́гъ отца́ моего́, и вознесу́ Его́: сла́вно бо просла́вися.

Припѣ́въ: Поми́луй мя́, Бо́же, поми́луй мя́.

Ка́иново преше́дъ убíйство, произволе́ніемъ бы́хъ убíйца со́вѣсти душе́внѣй, оживи́въ пло́ть и воева́въ на ню́ лука́выми мои́ми дѣя́ньми.

Авелевѣ, Іису́се, не уподо́бихся пра́вдѣ, да́ра Тебѣ́ прія́тна не принесо́хъ когда́, ни дѣ́янія боже́ственна, ни же́ртвы чи́стыя, ни житія́ непоро́чнаго.

Яко Ка́инъ и мы́, душе́ окая́нная, всѣ́хъ Содѣ́телю дѣя́нія скве́рная, и же́ртву поро́чную, и непотре́бное житіе́ принесо́хомъ вку́пѣ, тѣ́мже и осуди́хомся.

Бре́ніе Зда́тель живосозда́въ, вложи́лъ еси́ мнѣ́ пло́ть, и ко́сти, и дыха́ніе, и жи́знь. Но, о Тво́рче мо́й, Изба́вителю мо́й и Судіе́, ка́ющася пріими́ мя!

Извѣща́ю Ти́, Спа́се, грѣхи́, я́же содѣ́яхъ, и души́ и тѣ́ла моего́ я́звы, я́же вну́трь убíйственніи по́мыслы разбо́йнически на мя́ возложи́ша.

Аще и согрѣши́хъ, Спа́се, но вѣ́мъ, я́ко Человѣколю́бецъ еси́: наказу́еши ми́лостивно и милосе́рдствуеши те́плѣ, слезя́ща зри́ши и притека́еши я́ко оте́цъ, призыва́я блу́днаго.

Сла́ва, тро́иченъ: Пресу́щная Тро́ице, во Еди́ницѣ покланя́емая, возьми́ бре́мя отъ мене́ тя́жкое грѣхо́вное и, я́ко благоутро́бна, да́ждь ми́ сле́зы умиле́нія.

И ны́нѣ, богоро́диченъ: Богоро́дице, наде́жде и предста́телство Тебе́ пою́щихъ, возьми́ бре́мя отъ мене́ тя́жкое грѣхо́вное и, я́ко Влады́чица Чи́стая, ка́ющася пріими́ мя.

Пѣ́снь 2.

Ирмо́съ: Вонми́, не́бо, и возглаго́лю, и воспою́ Христа́, отъ Дѣ́вы пло́тію прише́дшаго.

Сшива́ше ко́жныя ри́зы грѣ́хъ мнѣ́, обнажи́вый мя́ пе́рвыя боготка́нныя оде́жды.

Обложе́нъ е́смь одѣя́ніемъ студа́, я́коже ли́ствіемъ смоко́внымъ, во обличе́ніе мои́хъ самовла́стныхъ страсте́й.

Одѣ́яхся въ сра́мную ри́зу, и окровавле́ную сту́дно, тече́ніемъ стра́стнаго и любосла́стнаго живота́.

Впадо́хъ въ стра́стную па́губу и въ веще́ственную тлю́, и отто́лѣ доны́нѣ вра́гъ мнѣ́ досажда́етъ.

Любове́щное и любоимѣ́нное житіе́ невоздержа́ніемъ, Спа́се, предпоче́тъ, ны́нѣ тя́жкимъ бре́менемъ обложе́нъ е́смь.

Украси́хъ плотскíй о́бразъ скве́рныхъ помышле́ній разли́чнымъ обложе́ніемъ и осужда́юся.

Внѣ́шнимъ прилѣ́жно благоукраше́ніемъ еди́нѣмъ попеко́хся, вну́треннюю презрѣ́въ богообра́зную ски́нію.

Погребо́хъ пе́рваго о́браза добро́ту, Спа́се, страстьми́, ю́же я́ко иногда́ дра́хму, взыска́въ обря́щи.

Согрѣши́хъ, — я́коже блудни́ца вопію́ Ти́, — еди́нъ согрѣши́хъ Тебѣ́, я́ко мѵ́ро пріими́, Спа́се, и моя́ сле́зы!

Очи́сти, — я́коже мыта́рь вопію́ Ти́, Спа́се, — очи́сти мя́! Никто́же бо су́щихъ изъ Ада́ма, я́коже а́зъ, согрѣши́хъ Тебѣ́.

Сла́ва, тро́иченъ: Еди́наго Тя́ въ Тріе́хъ Ли́цѣхъ, Бо́га всѣ́хъ пою́: Отца́ и Сы́на и Ду́ха Свята́го.

И ны́нѣ, богоро́диченъ: Пречи́стая Богоро́дице Дѣ́во, еди́на Всепѣ́тая, моли́ прилѣ́жно, во е́же спасти́ся на́мъ.

Пѣ́снь 3.

Ирмо́съ: Утверди́, Го́споди, на ка́мени за́повѣдей Твои́хъ подви́гшееся се́рдце мое́, я́ко еди́нъ Свя́тъ еси́ и Госпо́дь.

Исто́чникъ живота́ стяжа́хъ — Тебе́, сме́рти Низложи́теля, и вопію́ Ти́ отъ се́рдца моего́ пре́жде конца́: согрѣши́хъ, очи́сти и спаси́ мя́.

Согрѣши́хъ, Го́споди, согрѣ́шихъ Тебѣ́, очи́сти мя́! Нѣ́сть бо, и́же кто́ согрѣши́ въ человѣ́цѣхъ, его́же не превзыдо́хъ прегрѣше́ньми.

При Но́и, Спа́се, блу́дствовавшія подража́хъ, о́нѣхъ наслѣ́дствовавъ осужде́ніе, въ пото́пѣ погруже́нія.

Ха́ма о́наго, душе́, отцеубíйца, подража́вши, сра́ма не покры́ла еси́ и́скренняго, вспя́ть зря́ возврати́вшися.

Запале́нія, я́коже Ло́тъ, бѣ́гай, душе́ моя́, грѣха́, бѣ́гай Содо́мы и Гомо́рры, бѣ́гай пла́мене вся́каго безслове́снаго жела́нія.

Поми́луй, Го́споди, поми́луй мя́, — вопію́ Ти, — егда́ пріи́деши со а́нгелы Твои́ми, возда́ти всѣ́мъ по достоя́нію дѣя́ній.

Сла́ва, тро́иченъ: Тро́ице про́стая, несозда́нная, безнача́льное Естество́, въ Тро́ицѣ пѣва́емая Ѵпоста́сей, спаси́ ны, вѣ́рою покланя́ющіяся держа́вѣ Твое́й.

И ны́нѣ, богоро́диченъ: Отъ Отца́ безлѣ́тна Сы́на въ лѣ́то, Богороди́телнице, неискусому́жно родила́ еси́, — стра́нное чу́до! — пребы́вши Дѣ́ва доя́щи.

Пѣ́снь 4.

Ирмо́съ: Услы́ша проро́къ прише́ствіе Твое́, Го́споди, и убоя́ся, я́ко хо́щеши отъ Дѣ́вы роди́тися и человѣ́комъ яви́тися, и глаго́лаше: услы́шахъ слу́хъ Тво́й и убоя́хся, сла́ва си́лѣ Твое́й, Го́споди.

Бди́, о душе́ моя́, изря́дствуй, я́коже дре́вле вели́кій въ патріа́рсѣхъ, да стя́жеши дѣя́ніе съ ра́зумомъ, да бу́деши у́мъ зря́й Бо́га, и дости́гнеши незаходя́щій мра́къ въ видѣ́ніи, и бу́деши вели́кій купе́цъ.

Двана́десять патріа́рховъ вели́кій въ патріа́рсѣхъ дѣтотвори́въ, та́йно утверди́ тебѣ́ лѣ́ствицу дѣ́ятельнаго, душе́ моя́, восхожде́нія: дѣ́ти я́ко основа́нія, степе́ни я́ко восхожде́нія, прему́дренно подложи́въ.

Иса́ва возненави́дѣнаго подража́ла еси́, душе́, отдала́ еси́ преле́стнику твоему́ пе́рвыя добро́ты пе́рвенство, и оте́ческія моли́твы отпа́ла еси́, и два́жды поползну́лася еси́, окая́нная: дѣя́ніемъ и ра́зумомъ; тѣ́мже ны́нѣ пока́йся.

Едо́мъ Иса́въ нарече́ся кра́йняго ра́ди женонеи́стовнаго смѣше́нія: невоздержа́ніемъ бо при́сно разжига́емь, и сластьми́ оскверня́емь, Едо́мъ именова́ся, е́же глаго́лется — разжже́ніе души́ любогрѣхо́вныя.

Іова на гно́ищи слы́шавши, о душе́ моя́, оправда́вшагося, того́ му́жеству не поревнова́ла еси́, тве́рдаго не имѣ́ла еси́ предложе́нія во всѣ́хъ, я́же вѣ́си, и и́миже искуси́лася еси́, но яви́лася еси́ нетерпѣли́ва.

Иже пе́рвѣе на престо́лѣ — на́гъ ны́нѣ на гно́ищи гно́енъ; мно́гій въ ча́дѣхъ и сла́вный — безча́денъ и бездо́мокъ напра́сно; пала́ту у́бо — гно́ище, и би́серіе — стру́пы вмѣня́ше.

Сла́ва, тро́иченъ: Нераздѣ́льное Существо́мъ, несли́тное Ли́цы, богосло́влю Тя́, Тро́ическое Еди́но Божество́, я́ко единоца́рственное и сопресто́льное. Вопію́ Ти пѣ́снь вели́кую, въ вы́шнихъ трегу́бо пѣсносло́вимую.

И ны́нѣ, богоро́диченъ: И ражда́еши, и дѣ́вствуеши, и пребыва́еши обою́ду естество́мъ Дѣ́ва: Рожде́йся обновля́етъ зако́ны естества́, утро́ба же ражда́етъ неражда́ющая. Бо́гъ идѣ́же хо́щетъ, побѣжда́ется естества́ чи́нъ, твори́тъ бо ели́ка хо́щетъ.

Пѣ́снь 5.

Ирмо́съ: Отъ но́щи у́тренююща, Человѣколю́бче, просвѣти́, молю́ся, и наста́ви и мене́ на повелѣ́нія Твоя́, и научи́ мя, Спа́се, твори́ти во́лю Твою́.

Моисе́овъ слы́шала еси́ ковче́жецъ, душе́, вода́ми, волна́ми носи́мь рѣ́чными, я́ко въ черто́зѣ, дре́вле бѣ́гающій дѣ́ла го́рькаго совѣ́та фараони́тска.

Аще ба́бы слы́шала еси́, убива́ющія иногда́ безвозра́стное му́жеское, душе́ окая́нная, цѣлому́дрія дѣя́ніе, ны́нѣ, я́ко вели́кій Моисе́й, сси́ прему́дрость.

Яко Моисе́й вели́кій египтя́нина, у́ма уязви́вши, окая́нная, не уби́ла еси́, душе́. И ка́ко всели́шися, глаго́ли, въ пусты́ню страсте́й покая́ніемъ?

Въ пусты́ню всели́ся вели́кій Моисе́й. Гряди́ у́бо, подража́й того́ житіе́, да и въ купинѣ́ Богоявле́нія, душе́, въ видѣ́ніи бу́деши.

Моисе́овъ же́злъ вообража́й, душе́, ударя́ющій мо́ре и огустѣва́ющій глубину́, во о́бразъ Креста́ боже́ственнаго, и́мже мо́жеши и ты́ вели́кая соверши́ти.

Ааро́нъ приноша́ше о́гнь Бо́гу непоро́чный, неле́стный. Но Офни́ и Финее́съ, я́ко ты́, ду́ше, приноша́ху чужде́е Бо́гу оскверне́нное житіе́.

Сла́ва, тро́иченъ: Тя́, Тро́ице, сла́вимъ Еди́наго Бо́га: свя́тъ, свя́тъ, свя́тъ еси́, Отче, Сы́не и Ду́ше, — про́стое Существо́, Еди́нице при́сно покланя́емая.

И ны́нѣ, богоро́диченъ: Изъ Тебе́ облече́ся въ мое́ смѣше́ніе, нетлѣ́нная, безму́жная Ма́ти Дѣ́во, Бо́гъ созда́вый вѣ́ки, и соедини́ Себѣ́ человѣ́ческое естество́.

Пѣ́снь 6.

Ирмо́съ: Возопи́хъ всѣ́мъ се́рдцемъ мои́мъ къ Ще́дрому Бо́гу, и услы́ша мя́ отъ а́да преиспо́дняго, и возведе́ отъ тли́ живо́тъ мо́й.

Во́лны, Спа́се, прегрѣше́ній мои́хъ, я́ко въ мо́ри Чермнѣ́мъ, возвраща́ющеся, покры́ша мя́ внеза́пу, я́ко еги́птяны иногда́ и триста́ты.

Неразу́мное, душе́, произволе́ніе имѣ́ла еси́, я́ко пре́жде Изра́иль: боже́ственныя бо ма́нны предсуди́ла еси́ безслове́сно, любосла́стное страсте́й объяде́ніе.

Кладенцы́, душе́, предпочла́ еси́ ханане́йскихъ мы́слей па́че жи́лы ка́мене, изъ него́же прему́дрости, я́ко ча́ша, пролива́етъ то́ки богосло́вія.

Свина́я мяса́, и котлы́, и еги́петскую пи́щу па́че небе́сныя предсуди́ла еси́, душе́ моя́, я́коже дре́вле неразу́мніи лю́діе въ пусты́ни.

Яко уда́ри Моисе́й, ра́бъ Тво́й, жезло́мъ ка́мень, обра́зно животвори́вая ре́бра Твоя́ прообразова́ше, изъ ни́хже вси́ питіе́ жи́зни, Спа́се, почерпа́емъ.

Испыта́й, душе́, и смотря́й, я́коже Іису́съ Нави́нъ, обѣтова́нія зе́млю, какова́ е́сть, и всели́ся въ ню́ благозако́ніемъ.

Сла́ва, тро́иченъ: Тро́ица е́смь проста́, нераздѣ́льна, раздѣ́льна Ли́чнѣ, и Еди́ница е́смь Естество́мъ соедине́на, — Оте́цъ глаго́летъ, и Сы́нъ, и Боже́ственный Ду́хъ.

И ны́нѣ, богоро́диченъ: Утро́ба Твоя́ Бо́га на́мъ роди́, воображе́на по на́мъ. Его́же, я́ко Созда́теля всѣ́хъ, моли́, Богоро́дице, да моли́твами Твои́ми оправди́мся.

[Го́споди, поми́луй, три́жды. Сла́ва, и ны́нѣ.]

Конда́къ, гла́съ 6:

Душе́ моя́, душе́ моя́, воста́ни, что́ спи́ши? Коне́цъ приближа́ется, и и́маши смути́тися. Воспряни́ у́бо, да пощади́тъ тя́ Христо́съ Бо́гъ, вездѣ́ сы́й и вся́ исполня́яй.

Пѣ́снь 7.

Ирмо́съ: Согрѣши́хомъ, беззако́нновахомъ, непра́вдовахомъ предъ Тобо́ю, ниже́ соблюдо́хомъ, ниже́ сотвори́хомъ, я́коже заповѣ́далъ еси́ на́мъ, но не преда́ждь на́съ до конца́, отце́въ Бо́же.

Киво́тъ я́ко ноша́шеся на колесни́цѣ, За́нъ о́ный, егда́ превра́щшуся тельцу́, то́чію косну́ся, Бо́жіимъ искуси́ся гнѣ́вомъ. Но того́ дерзнове́нія убѣжа́вши, душе́, почита́й Боже́ственная че́стнѣ.

Слы́шала еси́ Авессало́ма, ка́ко на естество́ воста́? Позна́ла еси́ того́ скве́рная дѣя́нія, и́миже оскверни́ ло́же Дави́да отца́. Но ты́ подража́ла еси́ того́ стра́стная и любосла́стная стремле́нія.

Покори́ла еси́ нерабо́тное твое́ досто́инство тѣ́лу твоему́: ино́го бо Ахитофе́ла обрѣ́тши — врага́, душе́, снизшла́ еси́ сего́ совѣ́томъ. Но сія́ разсы́па Са́мъ Христо́съ, да ты́ вся́ко спасе́шися.

Соломо́нъ чу́дный и благода́ти прему́дрости испо́лненный, се́й лука́вое иногда́ предъ Бо́гомъ сотвори́въ, отступи́ отъ Него́. Ему́же ты́ прокля́тымъ твои́мъ житіе́мъ, душе́, уподо́билася еси́.

Сластьми́ влеко́мь страсте́й свои́хъ оскверня́шеся, увы́ мнѣ́, рачи́тель прему́дрости, рачи́тель блу́дныхъ же́нъ, и стра́ненъ отъ Бо́га. Его́же ты́ подража́ла еси́ умо́мъ, о душе́, сладостра́стьми скве́рными.

Ровоа́му поревнова́ла еси́, непослу́шавшему совѣ́та о́тча, ку́пно же и злѣ́йшему рабу́ Іеровоа́му, пре́жнему отсту́пнику, душе́. Но бѣ́гай подража́нія и зови́ Бо́гу: согрѣши́хъ, уще́дри мя́!

Сла́ва, тро́иченъ: Тро́ице Про́стая, Нераздѣ́льная, Единосу́щная и Естество́ Еди́но: Свѣ́тове и Свѣ́тъ, и Свя́та Три́ и Еди́но Свя́то, пое́тся Бо́гъ Тро́ица. Но воспо́й, просла́ви Живо́тъ и Животы́, душе́, — всѣ́хъ Бо́га.

И ны́нѣ, богоро́диченъ: Пое́мъ Тя́, благослови́мъ Тя́, покланя́емся Ти́, Богороди́телнице, я́ко Нераздѣ́льныя Тро́ицы породила́ еси́ Еди́наго — Христа́ Бо́га, и Сама́ отве́рзла еси́ на́мъ, су́щимъ на земли́, небе́сная.

Пѣ́снь 8.

Ирмо́съ: Его́же во́инства небе́сная сла́вятъ, и трепе́щутъ херуви́ми и серафи́ми, вся́ко дыха́ніе и тва́рь, по́йте, благослови́те и превозноси́те во вся́ вѣ́ки.

Ты́ Озíи, душе́, поревнова́вши, сего́ прокаже́ніе въ себѣ́ стяжа́ла еси́ сугу́бо: безмѣ́стная бо мы́слиши, беззако́нная же дѣ́еши. Оста́ви, я́же и́маши, и притецы́ къ покая́нію!

Ниневи́тяны, душе́, слы́шала еси́ ка́ющіяся Бо́гу вре́тищемъ и пе́пеломъ. Си́хъ не подража́ла еси́, но яви́лася еси́ злѣ́йшая всѣ́хъ пре́жде зако́на и по зако́нѣ прегрѣши́вшихъ.

Въ ро́вѣ бла́та слы́шала еси́ Іеремíю, душе́, гра́да Сіо́ня рыда́ньми вопію́ща, и сле́зъ и́щуща. Подража́й сего́ плаче́вное житіе́, и спасе́шися.

Іо́на въ Ѳарси́съ побѣже́, проразумѣ́въ обраще́ніе ниневи́тяновъ. Разумѣ́ бо, я́ко проро́къ, Бо́жіе благоутро́біе, тѣ́мже ревнова́ше проро́честву не солга́тися.

Даніи́ла въ ро́вѣ слы́шала еси́, ка́ко загради́ уста́, о душе́, звѣре́й. Увѣ́дала еси́, ка́ко о́троцы и́же о Аза́ріи погаси́ша вѣ́рою пе́щи пла́мень горя́щій.

Ве́тхаго Завѣ́та вся́ приведо́хъ ти́, душе́, къ подо́бію: подража́й пра́ведныхъ боголюби́вая дѣя́нія, избѣ́гни же па́ки лука́выхъ грѣхо́въ.

Сла́ва, тро́иченъ: Безнача́льне Отче, Сы́не собезнача́льне, Утѣ́шителю благíй, Ду́ше пра́вый; Сло́ва Бо́жія Роди́телю, Отца́ безнача́льна Сло́ве, Ду́ше живы́й и зи́ждяй, — Тро́ице Еди́нице, поми́луй мя́.

И ны́нѣ, богоро́диченъ: Яко отъ оброще́нія червлени́цы, Пречи́стая, у́мная багряни́ца Емману́илева, вну́трь во чре́вѣ Твое́мъ пло́ть истка́ся, тѣ́мже Богоро́дицу вои́стинну Тя́ почита́емъ.

Пѣ́снь 9.

Ирмо́съ: Безсѣ́меннаго зача́тія рождество́ несказа́нное, Ма́тере Безму́жныя нетлѣ́ненъ Пло́дъ: Бо́жіе бо рожде́ніе обновля́етъ естества́. Тѣ́мже Тя́ вси́ ро́ди, я́ко Богоневѣ́стную Ма́терь, правосла́вно велича́емъ.

Христо́съ искуша́шеся, діа́волъ искуша́ше, показу́я ка́меніе, да хлѣ́би бу́дутъ; на го́ру возведе́ ви́дѣти вся́ ца́рствія мíра во мгнове́ніи. Убо́йся, о душе́, ловле́нія, трезви́ся, моли́ся на вся́кій ча́съ Бо́гу.

Го́рлица пустыннолю́бная, гла́съ вопію́щаго возгласи́, Христо́въ свѣти́льникъ, проповѣ́дуяй покая́ніе: Иродъ беззако́ннова со Иродіа́дою. Зри́, душе́ моя́, да не увя́знеши въ беззако́нныя сѣ́ти, но облобыза́й покая́ніе.

Въ пусты́ню всели́ся благода́ти Предте́ча, и Іуде́я вся́ и Самарíя слы́шавше, теча́ху и исповѣ́даху грѣхи́ своя́, креща́ющеся усе́рдно. Ихже ты́ не подража́ла еси́, душе́.

Бра́къ у́бо честны́й и ло́же нескве́рно: обоя́ бо Христо́съ пре́жде благослови́, пло́тію яды́й, и въ Ка́нѣ же на бра́цѣ во́ду въ вино́ соверша́я, и показу́я пе́рвое чу́до, да ты́ измѣни́шися, о душе́.

Разсла́бленнаго стя́гну Христо́съ, о́дръ взе́мша; и ю́ношу уме́рша воздви́же — вдови́че рожде́ніе; и со́тнича о́трока; и самаряны́нѣ яви́ся, въ ду́сѣ слу́жбу тебѣ́, душе́, предживописа́.

Кровоточи́вую изцѣли́ прикоснове́ніемъ кра́я ри́зна Госпо́дь, прокаже́нныя очи́сти, слѣпы́я и хромы́я просвѣти́въ, испра́ви, глухíя же, и нѣмы́я, и нича́щія ни́зу исцѣли́ сло́вомъ, да ты́ спасе́шися, окая́нная душе́.

Сла́ва, тро́иченъ: Отца́ просла́вимъ, Сы́на превознесе́мъ, Боже́ственному Ду́ху вѣ́рно поклони́мся — Тро́ицѣ нераздѣ́льнѣй, Еди́ницѣ по существу́, я́ко Свѣ́ту и Свѣ́томъ, и Животу́ и Живото́мъ, животворя́щему и просвѣща́ющему концы́.

И ны́нѣ, богоро́диченъ: Гра́дъ Тво́й сохраня́й, Богороди́тельнице Пречи́стая. Въ Тебѣ́ бо се́й вѣ́рно ца́рствуяй, въ Тебѣ́ и утвержда́ется, и Тобо́ю побѣжда́яй, побѣжда́етъ вся́кое искуше́ніе, и плѣня́етъ ра́тники, и прохо́дитъ послуша́ніе.

[Припѣ́въ: Преподо́бне о́тче Андре́е, моли́ Бо́га о на́съ.]

Андре́ю: Андре́е честны́й и о́тче треблаже́ннѣйшій, па́стырю Кри́тскій! Не преста́й моля́ся о воспѣва́ющихъ тя́, да изба́вимся вси́ гнѣ́ва, и ско́рби, и тлѣ́нія, и прегрѣше́ній безмѣ́рныхъ, чту́щіи твою́ па́мять вѣ́рно.

Та́же пое́мъ о́ба ли́ка ирмо́съ: Безсѣ́меннаго зача́тія [рождество́ несказа́нное, Ма́тере Безму́жныя нетлѣ́ненъ Пло́дъ: Бо́жіе бо рожде́ніе обновля́етъ естества́. Тѣ́мже Тя́ вси́ ро́ди, я́ко Богоневѣ́стную Ма́терь, правосла́вно велича́емъ].

И про́чее послѣ́дованіе повече́рія.




ВЪ СРЕДУ ПЕРВЫЯ СЕДМИЦЫ, НА УТРЕНИ.

По 1-мъ стихосло́віи сѣда́ленъ осмогла́сника.

По 2-мъ же стихосло́віи сѣда́ленъ, гла́съ 2: Подо́бенъ: Благообра́зный Іо́сифъ.

Страстьми́ Твои́ми всѣ́мъ безстра́стіе да́вый, Человѣколю́бче, стра́сти пло́ти моея́ умертви́въ Твои́мъ Кресто́мъ, Боже́ственную сподо́би Стра́сть ви́дѣти, посто́мъ благоугожда́юща сла́вѣ Твое́й, да пріиму́ бога́тно ве́лію ми́лость.

Сла́ва, то́йже. И ны́нѣ, крестобогоро́диченъ, гла́съ то́йже. Подо́бенъ: Милосе́рдія су́щи.

Дѣ́ва и Ма́ти Твоя́, Христе́, на Дре́вѣ зря́щи Тя́ ме́ртва просте́рта, пла́чущи го́рько, — Сы́не Мо́й, — глаго́лаше, — что́ стра́шное сіе́ та́инство! всѣ́мъ да́руяй живо́тъ вѣ́чный, во́лею на Крестѣ́ ка́ко умира́еши сме́ртію поно́сною?

По 3-мъ стихосло́віи сѣда́ленъ, гла́съ 2: Подо́бенъ: Животворя́щій.

Свѣтотво́рное вре́мя, его́же ны́нѣ освяти́лъ еси́ и дарова́лъ еси́ на́мъ воздержа́нія, Го́споди, Ты́ сподо́би на́съ во умиле́ніи всѣ́хъ чи́стѣ прейти́ ми́рствующихъ Креста́ крѣ́постію, еди́не Человѣколю́бче.

Сла́ва, то́йже. И ны́нѣ, крестобогоро́диченъ, гла́съ то́йже. Подо́бенъ: Милосе́рдія две́ри.

Честны́мъ Кресто́мъ Сы́на Твоего́ сохраня́еми, Влады́чице Чи́стая Богоро́дице, вся́кій прило́гъ бори́теля вси́ удо́бно низлага́емъ. Тѣ́мже Тя́ по до́лгу ублажа́емъ, я́ко Ма́терь Свѣ́та, еди́ну Наде́жду ду́шъ на́шихъ.

Та́же чте́ніе въ Лавсаи́цѣ. Псало́мъ 50-й.

Кано́нъ въ мине́и. И трипѣ́снецъ, гла́съ 2.
Пѣ́снь 3.

Ирмо́съ: Процвѣла́ е́сть пусты́ня, [я́ко кри́нъ, Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце].

Распне́мъ у́ды воздержа́ніемъ, трезви́мся въ моли́твахъ, я́коже пи́сано е́сть, и по слѣ́ду жи́тельствуимъ Пострада́вшаго и стра́сти Умертви́вшаго.

Изблева́вше го́рькій грѣ́хъ, потщи́мся во́лею же́лчь вкуси́вшему угоди́ти Христу́, Кресто́мъ низложи́вшу злонача́льника.

Обы́чай взе́мъ грѣ́хъ, влече́тъ мя́ во всеконе́чную па́губу, но Ты́ мя́ отъ сея́ изба́ви Кресто́мъ Твои́мъ, Ще́дре Многоми́лостиве.

Богоро́диченъ: Влады́чествующая всѣ́ми тва́рьми, Влады́чице, я́ко Влады́ку ро́ждши, рабо́ты мя́ свободи́ льсти́ваго и еди́наго борца́.

Иный, гла́съ то́йже.

Ирмо́съ: Утверди́ на́съ [въ Тебѣ́, Го́споди, дре́вомъ умерщве́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́].

Дре́во Кре́стное воздержа́ніе мíру процвѣте́, е́же любо́вію облобыза́вше, наслади́мся всепло́дія Боже́ственныхъ за́повѣдей Христо́выхъ.

Воздержа́ніе страсте́й и ны́нѣ нося́ще, пло́ть распне́мъ Го́сподеви, и ме́ртвенно тоя́ мудрова́ніе пока́жемъ вси́ боже́ственней жи́зни.

Сла́ва, тро́иченъ: Три́ Ли́ца еди́наго зра́ка сла́влю, Отца́, Сы́на, и Ду́ха, еди́ну держа́ву Божества́, Ца́рство всѣ́хъ и свѣ́тлость.

[И ны́нѣ,] богоро́диченъ: Рождество́ Твое́, Чи́стая, стра́шно бы́сть: Бо́гъ бо е́сть вочеловѣ́чивыйся, безнача́льно изъ Отца́ роди́выйся и изъ Тебе́ напослѣ́докъ кромѣ́ му́жа ро́ждся.

Сла́ва Тебѣ́, Бо́же на́шъ, сла́ва Тебѣ́.

Распя́тіе пою́ и прободе́ніе Боже́ственныхъ ре́бръ Твои́хъ, изъ ни́хже питіе́ безсме́ртное че́рплю всегда́, Христе́, и освяща́юся.

Ирмо́съ: Утверди́ на́съ въ Тебѣ́, Го́споди, дре́вомъ умерщве́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ [дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода].

Пе́щь страсте́й распаля́етъ ду́шу мою́, но росо́ю ми́лости Твоея́ сію́ увяди́, источи́вый безстра́стія то́ки изъ нетлѣ́нныхъ Твои́хъ ре́бръ, распина́емь, Благодѣ́телю, мно́гаго ра́ди снисхожде́нія.

Возне́слъ еси́ ны́ па́дшія въ зло́бу на Крестѣ́ Твои́мъ вознесе́ніемъ, Христе́, тѣ́мже попо́лзшася въ про́пасть грѣха́, возведи́ и утверди́ мя́ на ка́мени спасе́нія, я́ко да сла́влю держа́ву Твою́.

Копіе́мъ Твои́мъ, Христе́, страсте́й гное́ніе очи́стивъ отъ се́рдца моего́, всего́ мя́ исцѣли́, его́же змíй уязви́ зубы́ ядови́тыми, и да́ждь ми́ непоколеби́мо къ Боже́ственнымъ стезя́мъ ходи́ти.

Богоро́диченъ: Тебе́, Свѣ́тлую Свѣщу́ и Свѣ́щникъ, въ Не́йже Огнь Божества́ все́лься, просвѣти́ нощно́ю одержи́мыхъ тле́ю, Нескве́рная, чти́мъ вси́ благословя́ще, Благослове́нная, Рождество́ Твое́.

Иный.

Ирмо́съ: Въ купинѣ́ Моисе́ю [Дѣ́вы чу́до на Сина́йстѣй горѣ́ Прообрази́вшаго иногда́, по́йте, благослови́те и превозноси́те во вся́ вѣ́ки].

Посредѣ́ разбо́йникъ Распя́таго на Дре́вѣ и копіе́мъ Прободе́наго въ живото́чная ре́бра, по́йте, благослови́те и превозноси́те во вся вѣ́ки.

Судя́й все́й земли́, суди́щу предста́лъ еси́, зауше́нъ бы́лъ еси́ и пору́ганъ, на Крестѣ́ повѣ́шенъ бы́лъ еси́, отъ тли́ мя́ премѣня́я дре́вняго грѣха́ во вся́ вѣ́ки.

Благослови́мъ Отца́, и Сы́на, и Свята́го Ду́ха, Го́спода.

Тро́иченъ: Божество́ еди́но Тро́ица, нераздѣ́льное Естество́, раздѣ́льное же Ли́цы, непоколеби́мая держа́во, Отче, Сы́не, и Ду́ше, Тебе́ пѣсносло́вимъ во вся́ вѣ́ки.

[И ны́нѣ,] богоро́диченъ: Богороди́тельнице Чи́стая, Небе́сная Врата́, Спаси́тельная Две́ре, всѣ́хъ христіа́нъ моле́нія пріими́, блажа́щихъ Тя́ во вся́ вѣ́ки.

Сла́ва Тебѣ́, Бо́же на́шъ, сла́ва Тебѣ́.

Кре́сте Христо́въ, разбо́йника наста́вивый къ вѣ́рѣ, и мене́ къ тече́нію благоси́льно посто́мъ сподо́би предвари́ти на поклоне́ніе Твое́ и оживотвори́тися.

Хва́лимъ, благослови́мъ, покланя́емся Го́сподеви, пою́ще и превознося́ще во вся́ вѣ́ки.

Ирмо́съ: Въ купинѣ́ Моисе́ю Дѣ́вы чу́до на Сина́йстѣй горѣ́ Прообрази́вшаго иногда́, по́йте, благослови́те и превозноси́те во вся́ вѣ́ки.

Пѣ́снь 9.

Ирмо́съ: Безнача́льна Роди́теля [Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ].

Со́лнца свѣтлѣ́е по́стъ возсія́вый, многосвѣ́тлая благода́ть благовѣству́етъ всѣ́мъ Кре́стныя лучи́, и зари́ честны́я Стра́сти, и Воскресе́нія де́нь спаси́тельный.

Чистоту́ возлю́бимъ, блуда́ отбѣжи́мъ, чре́сла цѣлому́дріемъ препоя́шимъ, я́ко да чи́сти яви́мся Чи́стому и Еди́ному, отъ всѣ́хъ и́щущему чистоты́, Спа́су ду́шъ на́шихъ.

Христе́, стра́ху Твоему́ пригвозди́ пло́ти моя́, Кресту́ пригвозди́вый грѣ́хъ Ада́мовъ, разрѣши́ зо́лъ мои́хъ соу́зы, лука́ваго сокруши́ стрѣ́лы копіе́мъ Твои́мъ, Влады́ко, и сего́ вре́да изба́ви мя́.

Богоро́диченъ: Судію́ Пра́веднѣйшаго и Еди́наго Благоувѣ́тливаго ро́ждшая, Дѣ́во, Христа́ Го́спода, изба́ви мя́ суда́, Отрокови́це, и огня́, и муче́нія, я́же ми́ исхода́таи грѣха́ наслажде́ніе.

Иный.

Ирмо́съ: Чи́стую и Пречи́стую [Ма́терь и Дѣ́ву пѣ́сньми пѣ́сней, вси́ вѣ́рніи, благоче́стно я́ко Богоро́дицу велича́емъ].

О, благоутро́бія Твоего́! Яко Кре́стъ претерпѣ́лъ еси́, гво́здіе и копіе́, Го́споди, мене́ ра́ди осужде́ннаго тлѣ́ю, тѣ́мже пою́ Тя́, Христе́.

Кресту́, тро́сти, гво́здіемъ и копію́ — жи́зненнымъ Твои́мъ Страсте́мъ вси́ лю́діе покланя́ющеся, пѣ́сньми, Христе́, пое́мъ Тя́.

Сла́ва, тро́иченъ: Еди́нице Тріѵпоста́сная, Тро́ице Еди́нственная, Господонача́льная, Естество́ Равносла́вное, Отче, Сы́не, и Боже́ственный Ду́ше, спаси́ всѣ́хъ на́съ.

[И ны́нѣ,] богоро́диченъ: Ра́дуйся, очисти́лище мíру, Богоро́дице, въ не́же прибѣ́гше вси́ грѣ́шніи, къ Бо́гу примире́нія при́сно обрѣта́емъ.

Сла́ва Тебѣ́, Бо́же на́шъ, сла́ва Тебѣ́.

Кресто́мъ Твои́мъ, Го́споди, и мене́ укрѣпи́въ, посто́въ мнѣ́ да́руй, Благíй, благомо́щно сконча́ти обхожде́ніе.

Ирмо́съ: Чи́стую и Пречи́стую Ма́терь и Дѣ́ву пѣ́сньми пѣ́сней, вси́ вѣ́рніи, благоче́стно я́ко Богоро́дицу велича́емъ.

Свѣти́ленъ.

На стихо́внѣ самогла́сенъ, два́жды, гла́съ 8:

Посто́мъ помышле́ній стра́сти пріиди́те порабо́тимъ, духо́вными себе́ кри́лы покры́вше, да вра́жію дви́жимую бу́рю ле́гцѣ преше́дше, досто́йни бу́демъ кре́стнаго поклоне́нія, о мíрѣ закла́ннаго во́лею Сы́на Бо́жія, и духо́вно пра́зднуимъ изъ ме́ртвыхъ Спа́сово Воскресе́ніе, на го́ру взе́мшеся, со ученики́ просла́вимъ вла́сть пріи́мшаго всю́, Сы́на отъ Отца́, Человѣколю́бца.

Му́чениченъ: Му́ченицы Христо́вы непобѣди́міи, побѣди́вше пре́лесть си́лою Кре́стною, воспрія́сте благода́ть вѣ́чныя жи́зни, мучи́телей преще́нія не убоя́стеся, му́ками ураня́еми веселите́ся, и ны́нѣ кро́ви ва́ша бы́ша исцѣле́нія ду́шъ на́шихъ. Моли́те спасти́ся душа́мъ на́шимъ.

Сла́ва, и ны́нѣ, крестобогоро́диченъ, гла́съ то́йже:

Что́ зри́мое видѣ́ніе, е́же мои́ми очесы́ зри́тся, о Влады́ко? Содержа́й всю́ тва́рь, на Дре́во вознесе́нъ еси́, и умерщвле́нъ, всѣ́мъ да́руяй живо́тъ! — Богоро́дица пла́чущи глаго́лаше, егда́ зря́ше на Крестѣ́ Всечи́стая изъ Нея́ неизрече́нно возсія́вшаго Бо́га и Человѣ́ка.

И ча́съ 1-й, со стихосло́віемъ и обы́чными покло́ны, и отпу́стъ.




НА 6-МЪ ЧАСѢ.

Тропа́рь проро́чества, гла́съ 4:

Вѣ́си созда́ніе на́ше, вѣ́си не́мощь на́шу, Человѣколю́бче, согрѣши́хомъ, но не отступи́хомъ отъ Тебе́, Бо́же, ниже́ воздѣ́хомъ ру́ки на́ша къ бо́гу чужде́му, пощади́ на́съ Твое́ю бла́гостію, Благоутро́бне.

И повторя́емъ то́йжде.

Та́же проки́менъ, псало́мъ 9-й, гла́съ 4: Исповѣ́мся Тебѣ́, Го́споди,* всѣ́мъ се́рдцемъ мои́мъ. Сти́хъ: Возвеселю́ся и возра́дуюся о Тебѣ́.

Проро́чества Иса́іина чте́ніе. [Глава́ 2.]

Та́ко глаго́летъ Госпо́дь: отъ Сіо́на изы́детъ зако́нъ и сло́во Госпо́дне изъ Іерусали́ма. И суди́ти бу́детъ посредѣ́ язы́къ, и изобличи́тъ лю́ди мно́ги; и раскую́тъ мечи́ своя́ на ора́ла и ко́пія своя́ на серпы́, и не во́зметъ язы́къ на язы́къ меча́ и не навы́кнутъ ктому́ ра́товатися. И ны́нѣ, до́ме Іа́ковль, пріиди́те, по́йдемъ свѣ́томъ Госпо́днимъ! Оста́ви бо лю́ди Своя́, до́мъ Іа́ковль, зане́, я́коже изъ нача́ла, напо́лнися страна́ и́хъ волхвова́ній, я́коже иноплеме́нниковъ, и ча́да мно́га иноплеме́ннича роди́шася и́мъ. Напо́лнися бо страна́ и́хъ сребра́ и зла́та, и не бя́ше числа́ сокро́вищъ и́хъ; и напо́лнися земля́ и́хъ ко́ней, и не бя́ше числа́ колесни́цъ и́хъ. И напо́лнися земля́ ме́рзостей дѣ́лъ ру́къ и́хъ, и поклони́шася тѣ́мъ, я́же сотвори́ша пе́рсты и́хъ. И преклони́ся человѣ́къ, и смири́ся му́жъ, и не претерплю́ и́мъ. И ны́нѣ вни́дите въ ка́менія и скры́йтеся въ зе́млю отъ лица́ стра́ха Госпо́дня и отъ сла́вы крѣ́пости Его́, егда́ воста́нетъ сокруши́ти зе́млю. Очи бо Госпо́дни высо́цы, человѣ́къ же смире́нъ, и смири́тся высота́ человѣ́ческая, и вознесе́тся Госпо́дь еди́нъ въ де́нь о́ный.

Проки́менъ, псало́мъ 10-й, гла́съ 6: Пра́веденъ Госпо́дь и пра́вды возлюби́,* правоты́ ви́дѣ лице́ Его́. Сти́хъ: На Го́спода упова́хъ, ка́ко рече́те души́ мое́й?

И про́чее послѣ́дованіе часо́въ, я́ко предучини́ся, и отпу́стъ.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 83 – 91 об.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.