Церковный календарь
Новости


2018-05-25 / russportal
Н. И. Ульяновъ. Замолчанный Марксъ (1969)
2018-05-25 / russportal
Дѣянія 2-го Всезарубежн. Собора РПЦЗ 1938 г. Докладъ (2-й) К. Н. Николаева (1939)
2018-05-24 / russportal
Cвт. Іоаннъ, архіеп. Шанхайскій. Святыя Евѳимія и Ольга (1994)
2018-05-24 / russportal
Cвт. Іоаннъ, архіеп. Шанхайскій. Преп. Серафимъ Саровскій (1994)
2018-05-24 / russportal
Прав. Іоаннъ Кронштадтскій. "Новыя грозныя слова". Слово 15 (37) (1908)
2018-05-24 / russportal
Прав. Іоаннъ Кронштадтскій. "Новыя грозныя слова". Слово 14 (36) (1908)
2018-05-23 / russportal
И. А. Родіоновъ. Повѣсть "Жертвы вечернія". Глава 50-я (1922)
2018-05-23 / russportal
И. А. Родіоновъ. Повѣсть "Жертвы вечернія". Глава 49-я (1922)
2018-05-23 / russportal
Н. А. Соколовъ. "Убійство Царской Семьи". Глава 6-я (1925)
2018-05-23 / russportal
Н. А. Соколовъ. "Убійство Царской Семьи". Глава 5-я (1925)
2018-05-23 / russportal
Cвт. Іоаннъ Шанхайскій. Разслабленный, самарянка и слѣпорожденный (1994)
2018-05-23 / russportal
Cвт. Іоаннъ, архіеп. Шанхайскій. Святые Кириллъ и Меѳодій (1994)
2018-05-23 / russportal
Прав. Іоаннъ Кронштадтскій. "Моя жизнь во Христѣ". Часть 1-я (стр. 71-80) (1957)
2018-05-23 / russportal
Прав. Іоаннъ Кронштадтскій. "Моя жизнь во Христѣ". Часть 1-я (стр. 61-70) (1957)
2018-05-21 / russportal
И. А. Родіоновъ. Повѣсть "Жертвы вечернія". Глава 48-я (1922)
2018-05-21 / russportal
И. А. Родіоновъ. Повѣсть "Жертвы вечернія". Глава 47-я (1922)
Новости въ видѣ
RSS-канала: .
Сегодня - суббота, 26 мая 2018 г. Сейчасъ на порталѣ посѣтителей - 7.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ НЕДѢЛЮ ПЕРВУЮ ВЕЛИКАГО ПОСТА.

Недѣ́ля пе́рвая свята́го поста́, въ ню́же Правосла́віе воспомина́ется.
Бдѣ́ніе обы́чное.

ВЪ СУББОТУ ВЕЧЕРА, НА МАЛѢЙ ВЕЧЕРНИ,
Поста́вимъ стихи́ 4 и пое́мъ сти́хи подо́бныя, творе́ніе Никола́я, гла́съ 1. Подо́бенъ: Небе́сныхъ чино́въ.

Ны́нѣ благоче́стія свѣ́тлость всѣ́мъ распростре́ся, разгоня́ющи ле́сть нече́стія, я́ко о́блакъ, просвѣща́ющи же сердца́ благочести́выхъ. Пріиди́те вси́ припаде́мъ, благочестивому́дренно честны́мъ ико́намъ Христо́вымъ покланя́ющеся, правосла́вніи.

Священнообра́зными ико́нами ны́нѣ украша́ется, я́ко невѣ́ста укра́шена, Христо́ва Це́рковь и всѣ́хъ созыва́етъ духо́вно пра́здновати. Сни́демся во единомы́сліи и вѣ́рѣ, ра́достно велича́юще Го́спода.

Мíре ве́сь, весели́ся, се́ бо Госпо́дь низложи́ съ высоты́ нече́стія держа́ву неизрече́ннымъ промышле́ніемъ, и смире́нніи вознесо́хомся дне́сь къ вѣ́рѣ Правосла́вія, благочести́вою цари́цею наставля́еми.

Къ первообра́зному но́сится, глаго́летъ Васи́лій, че́сть ико́ны; сего́ ра́ди въ любви́ почита́емъ ико́ны Спа́са Христа́ и святы́хъ всѣ́хъ, да си́хъ собра́вше, никогда́же ны́нѣ злоче́стіемъ отведе́мся.

Сла́ва, и ны́нѣ, богоро́диченъ. Подо́бенъ:

Безнача́льнымъ и Боже́ственнымъ естество́мъ Неви́димый, Человѣ́къ ви́дѣнъ бы́сть, Отрокови́це, отъ чи́стыхъ Твои́хъ крове́й за кра́йнее благоутро́біе. Его́же пло́ти написа́вше подо́біе, че́стно покланя́емся вси́ вѣ́рніи и благоче́стно велича́емъ.

На стихо́внѣ, гла́съ 2. Подо́бенъ: До́ме Евфра́ѳовъ.

Губи́тельства тлетво́рнаго избѣ́гше злосла́вныхъ, Правосла́вія сія́ніемъ сердца́ми просвѣти́мся, вѣ́рніи, Бо́га сла́вяще.

Сти́хъ: Принеси́те Го́сподеви сла́ву и че́сть.

Аріева нечи́стая упраздни́ся пре́лесть, Македо́нія, Петра́, Севи́ра же и Пи́рра, и свѣ́титъ Свѣ́тъ Трисо́лнечный.

Сти́хъ: Поклони́теся Ему́ во дворѣ́ святѣ́мъ Его́.

Не ктому́ злочести́выхъ похваля́ется мра́чное уче́ніе, Богъ бо правосла́внымъ, изволе́ніемъ Ѳеодо́ры, жезлъ крѣ́пости дае́тъ.

Сла́ва, и ны́нѣ, богоро́диченъ. Подо́бенъ:

Вознесла́ еси́ смире́нныхъ ро́гъ, Богоро́дице, ро́ждшая Бо́га Сло́ва, тѣ́мже вѣ́рно Тя́ вси́ чту́ще, велича́емъ.

Тропа́рь: Пречисто́му о́бразу Твоему́... И быва́етъ отпу́стъ.


НА ВЕЛИЦѢЙ ВЕЧЕРНИ,
По обы́чномъ стихосло́віи, Го́споди воззва́хъ.., на гла́съ осмогла́сника. Поста́вимъ стихо́въ 10 и пое́мъ стихи́ры воскре́сны 3, и восто́чны [Анато́ліевы3, и тріо́ди подо́бны 4, гла́съ 6: Всю́ отложи́вше.

Тя́ Непостижи́маго, пре́жде денни́цы безнача́льно изъ невеще́ственнаго возсія́вшаго безпло́тнаго же чре́ва Роди́телева, проро́цы, Го́споди, Твои́мъ Ду́хомъ вдохнове́ни, прореко́ша Отроча́ бы́ти, изъ Неискусобра́чныя воплоща́ема, человѣ́комъ совокупля́ема и су́щими на земли́ зри́ма; и́миже, я́ко Ще́дрый, просвѣще́нія сподо́би Твоего́, воспѣва́ющихъ неизрече́нное и честно́е Твое́ Воскресе́ніе.

Подо́бенъ:

Сло́вомъ Тя́ проповѣ́давшіи богоглаго́ливіи проро́цы и дѣ́лы поче́тшіи, безконе́чную жизнь приплоди́ша, тва́ри бо, Влады́ко, па́че Тебе́, Содѣ́теля, служи́ти не претерпѣ́вше, мíра всего́ ева́нгельски отврати́шася и сообра́зни бы́ша Стра́сти Твое́й, ю́же провозвѣсти́ша; и́хже моли́твами сподо́би непоро́чно прейти́ воздержа́нія по́прище, еди́не Многоми́лостиве.

Естество́мъ неопи́санный Боже́ственнымъ Твои́мъ сы́й, на послѣ́дняя, Влады́ко, вопло́щься, изво́лилъ еси́ описова́тися, пло́ти бо прія́тіемъ и сво́йства вся́ сея́ взя́лъ еси́. Тѣ́мже ви́дъ Тво́й образова́нія опису́ющіи любе́зно цѣлу́емъ, къ Твое́й любви́ возвыша́еми, и исцѣле́ній благода́ть почерпа́емъ изъ него́, апо́стольскимъ послѣ́дующе боже́ственнымъ преда́ніемъ.

Пречестно́е украше́ніе Христо́ва Це́рковь честны́хъ прія́тъ и святы́хъ ико́нъ Спа́са Христа́, и Богома́тере, и всѣ́хъ святы́хъ свѣтлѣ́йшее возставле́ніе, и́мже просвѣща́ется, и красу́ется благода́тію, и со́нмище отлага́етъ ерети́ческое изгоня́щи; и ра́дующися сла́витъ Человѣколю́бца Бо́га, ея́ ра́ди претерпѣ́вша Стра́сти во́льныя.

Сла́ва, гла́съ 2:

Благода́ть возсія́ и́стины, прообразу́емая дре́вле сѣно́вно, ны́нѣ явле́нно сконча́ся; се́ бо Це́рковь воплоще́ннымъ о́бразомъ Христо́вымъ, я́ко прекра́сною у́тварію облачи́тся, ски́ніи свидѣ́нія о́бразъ пронапису́ющи, и правосла́вную вѣ́ру содержа́щи, да Его́же почита́емъ, Сего́ и о́бразъ держа́ще, не прельща́емся. Да облеку́тся въ сту́дъ си́це не вѣ́рующіи: на́мъ бо сла́ва — зра́къ Воплоти́вшагося благоче́стно покланя́емый, не боготвори́мый. То́й облобыза́юще, вѣ́рніи, возопіи́мъ: Бо́же, спаси́ лю́ди Твоя́ и благослови́ достоя́ніе Твое́.

И ны́нѣ, богоро́диченъ 1-й гла́са.

На литíи же, я́ко обы́чно, стихи́ра хра́ма. Сла́ва, гла́съ 2:

Ра́дуйтеся, проро́цы честнíи, зако́нъ Госпо́день до́брѣ учини́вшіи, и вѣ́рою я́вльшіися необори́міи столпи́ неукло́нніи, вы́ бо и хода́таи яви́стеся Но́ваго Завѣ́та Христо́ва, и преста́вившеся на небеса́, Того́ моли́те умири́ти мíръ и спасти́ ду́ши на́ша.

И ны́нѣ, богоро́диченъ, гла́съ то́йже:

Все́ упова́ніе мое́ [на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ].

На стихо́внѣ осмогла́сника. Сла́ва, гла́съ 2:

Изъ нече́стія во благоче́стіе преше́дше и свѣ́томъ ра́зума просвѣти́вшеся, псало́мски рука́ми воспле́щимъ, благода́рственно хвалу́ Бо́гу принося́ще, и на стѣна́хъ, и дска́хъ, и на свяще́нныхъ сосу́дѣхъ начерта́ннымъ свяще́ннымъ образо́мъ Христо́вымъ, и Пречи́стыя, и всѣхъ святы́хъ, че́стно поклони́мся, отлага́юще злоче́стную злосла́вныхъ вѣ́ру, (че́сть бо о́браза, я́коже глаго́летъ Васи́лій, на Первообра́зное прехо́дитъ,) прося́ще моли́твами Пречи́стыя Твоея́ Ма́тере, Христе́ Бо́же на́шъ, и всѣ́хъ святы́хъ, дарова́ти на́мъ ве́лію ми́лость.

И ны́нѣ, богоро́диченъ:

О, чудесе́ но́ваго, [всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша].

Тропа́рь: Богоро́дице Дѣ́во, ра́дуйся.., два́жды. И пра́здника: Пречи́стому о́бразу Твоему́.., еди́ножды.
И про́чее послѣ́дованіе бдѣ́нія.


НА УТРЕНИ,
На Бо́гъ Госпо́дь.., тропа́рь воскре́сенъ, два́жды.
Сла́ва, настоя́щій, гла́съ 2:

Пречи́стому о́бразу Твоему́ покланя́емся, Благíй, прося́ще проще́нія прегрѣше́ній на́шихъ, Христе́ Бо́же: во́лею бо благоволи́лъ еси́ пло́тію взы́ти на Кре́стъ, да изба́виши, я́же созда́лъ еси́, отъ рабо́ты вра́жія. Тѣ́мъ благода́рственно вопіе́мъ Ти́: ра́дости испо́лнилъ еси́ вся́, Спа́се на́шъ, прише́дый спасти́ мíръ.

И ны́нѣ, [богоро́диченъ]:

Вся́, па́че смы́сла, вся́ пресла́вная Твоя́, Богоро́дице, та́инства, чистотѣ́ запеча́танной и дѣ́вству храни́му, Ма́ти позна́лася еси́ нело́жна, Бо́га ро́ждши Истиннаго. Того́ моли́ спасти́ся душа́мъ на́шимъ.

И обы́чное стихосло́віе: и про́чее послѣ́дованіе.

Кано́ны: воскре́сный, и Богоро́дицы, и тріо́ди на 6.
Творе́ніе господи́на Ѳеофа́на, его́же краестро́чіе: Дне́сь благоче́стія богосвѣ́тлая пріи́де заря́.

Пѣ́снь 1, гла́съ 4.

Ирмо́съ: Мо́ря чермну́ю [пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть].

Пле́щуще съ весе́ліемъ дне́сь, вѣ́рніи, возопіи́мъ: ко́ль чу́дна дѣла́ Твоя́, Христе́, и вели́ка си́ла, на́ше единомы́сліе и согла́сіе содѣ́лавый!

Де́нь ра́достный, богому́дренніи, пріиди́те соверши́мъ, ны́нѣ не́бо и земля́ весели́тся, и а́нгеловъ чи́ни, и человѣ́ковъ собра́нія изря́дно пра́зднующе.

Преве́ліе благодѣя́ніе ви́дяще, рука́ми воспле́щимъ: разстоя́щіяся у́ды Христо́вы, совоку́плены во еди́нство, и Бо́га похва́лимъ, ми́ръ пода́вшаго.

Да́шася Це́ркви дне́сь побѣди́тельная богодви́жнымъ манове́ніемъ и совѣ́томъ Михаи́ла же и Ѳеодо́ры, благоче́стно вѣ́ру содержа́щихъ царе́й на́шихъ.

Богоро́диченъ: Ору́жія злочести́выхъ исчезо́ша я́вѣ ересе́й: хра́мъ бо Тво́й, Пречи́стая Чи́стая, во образѣ́хъ украша́емый всеблаголѣ́пно зря́ще, ны́нѣ всесвяще́нно ра́дуемся.

Катава́сія: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Пѣ́снь 3.

Ирмо́съ: Весели́тся о Тебѣ́ [Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе].

Не ктому́ нечести́выхъ еретико́въ ны́нѣ бро́вь взе́млется, Бо́жія бо си́ла Правосла́віе удержа́ла е́сть.

Облацы проро́честіи животворя́щую съ небесе́ дне́сь ро́су на́мъ да кропя́тъ на воста́ніе вѣ́ры.

Благогла́сно та́йныя апо́столовъ Христо́выхъ трубы́ па́че естества́ да вопію́тъ честны́хъ образо́въ исправле́ніе.

Воспои́мъ Христа́, показа́вшаго на́мъ цари́цу благочести́вую, христолюби́вую, съ боговѣнча́нною о́траслію.

Богоро́диченъ: Селе́ніе Твое́ свяще́нное дости́гше вѣ́рніи, Пречи́стая, свѣтови́дною благода́тію ны́нѣ озари́тися мо́лимся.

Катава́сія: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Сѣда́ленъ, гла́съ 1. Подо́бенъ: Ли́къ а́нгельскій.

Боже́ственный Тво́й зра́къ, во о́бразѣ образу́юще, Христе́, я́сно вопіе́мъ рождество́, чудеса́ неизглаго́ланная, во́льное распя́тіе. Отону́дуже бѣ́сове отго́нятся стра́хомъ и злосла́вніи въ посупле́ніи рыда́ютъ, я́ко си́хъ соприча́стницы.

Сла́ва:

Зра́ками проро́ковъ, апо́столовъ ви́дами, му́чениковъ свяще́нныхъ, и святы́хъ всѣ́хъ ико́нами и изображе́нми свяще́нно красу́ется: Жениха́ же мы́сленнаго и Невѣ́сты украша́ется у́мными красова́нми, ма́ти — вы́шній Сіо́нъ.

И ны́нѣ, богоро́диченъ:

Любо́вію, Чи́стая, Твою́ святу́ю ико́ну почита́ющимъ, и Бо́жію Тя́ и́стинную Ма́терь согла́сно возвѣща́ющимъ, и вѣ́рно покланя́ющимся Ти́, Храни́тельница яви́лася еси́ и держа́вное Предста́тельство, отвраща́ющи вся́кое лю́тое дале́че си́хъ, я́ко вся́ могу́щая.

Пѣ́снь 4.

Ирмо́съ: Вознесе́на Тя́ [ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди].

Наи́тіемъ Боже́ственнымъ Утѣ́шителя Тво́й хра́мъ освяти́, и прише́ствіемъ Сего́ ерети́ческую пре́лесть отжени́, Сло́ве Бо́жій Многоми́лостиве.

Ну́жднѣйшаго изба́вивый злоче́стія Твоя́ лю́ди, покажи́ благоче́стія ре́вностію разжже́ны и вѣ́рою взыва́ющія: сла́ва си́лѣ Твое́й, Го́споди.

Священнообра́зными изображе́нми образо́въ Христо́выхъ зря́ще и Богоро́дицы сія́ющая Боже́ственная селе́нія, священнолѣ́пно ра́дуемся.

Цари́ца по обоему́ укра́шена, и́стиннаго возжелѣ́вши Христо́ва Ца́рства, Сего́ написа́ о́бразъ пречи́стый и святы́хъ изображе́нія.

Богоро́диченъ: Воплоще́нна роди́вши Боже́ственнаго Сло́ва, Боголѣ́пное освяще́ніе, Благода́тная, Сего́ показа́ла еси́, тѣ́мже Тво́й хра́мъ свѣтови́дный обновля́емъ.

Катава́сія: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Пѣ́снь 5.

Ирмо́съ: Ты́, Го́споди, мо́й [Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́].

Положи́, Го́споди, Твое́й Це́ркви утвержде́ніе, непрекло́ннѣй пребы́ти въ вѣ́къ вѣ́ка отъ смяте́ній ересе́й.

Во всю́ зе́млю свѣ́тлость возсія́ свы́ше да́ннаго вѣ́рнымъ весе́лія и Боже́ственнаго заступле́нія.

Еди́не Благíй и Исто́чниче бла́гости, Ты́ возвы́си правосла́вныхъ царе́й ро́гъ, чту́щихъ о́бразъ Тво́й.

Свѣ́тъ незаходи́мый на́мъ благоче́стія возсія́ велѣ́ніемъ богодухнове́ннымъ вѣ́рныхъ царе́й и ма́ніемъ богому́дрымъ.

Богоро́диченъ: Обнови́ на́мъ дре́внее благолѣ́піе, Пречи́стая Богома́ти, и до́мъ Твой се́й освяти́ Твое́ю благода́тію.

Катава́сія: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Пѣ́снь 6.

Ирмо́съ: Пожру́ Ти́ [со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію].

Пи́шется и почита́ется вѣ́рно покланя́емый о́бразъ Влады́ки, и пріе́млетъ па́ки Це́рковь дерзнове́ніе, благоче́стно Спа́са прославля́ющи.

Обнажа́ется сѣ́тованія и тмы́ ересе́й Христо́ва Це́рковь, и но́ситъ ри́зу весе́лія, и Боже́ственною и свѣтоно́сною покрыва́ется благода́тію.

Благосла́вія дре́вняго осія́нія получи́ правосла́вныхъ Собо́ръ Ѳеодо́ры манове́ніемъ цари́цы и ея́ сы́на благочести́ваго Михаи́ла самоде́ржца.

Богоро́диченъ: Дре́вле свѣдѣ́нія Повелѣ́вый бы́ти ски́ніи, я́ко въ Ски́ніи слове́снѣй, въ Тебѣ́ живе́тъ Еди́нъ Препросла́вленный, прославля́яй хра́мъ Тво́й, Дѣ́во, чудесы́.

Катава́сія: Пожру́ Ти́ со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Конда́къ, гла́съ 2. Самогла́сенъ:

Неопи́санное Сло́во Отчее, изъ Тебе́, Богоро́дице, описа́ся воплоща́емь, и оскве́рншійся о́бразъ въ дре́внее вообрази́въ, Боже́ственною добро́тою смѣси́. Но исповѣ́дающе спасе́ніе, дѣ́ломъ и сло́вомъ, сіе́ вообража́емъ.

Икосъ:

Сіе́ смотре́нія та́инство, дре́вле проро́цы богови́дно вдохнове́ни бы́вше, на́съ ра́ди въ концы́ вѣко́въ дости́гшихъ предвозвѣсти́ша, получи́вше сего́ сія́нія. Ра́зумъ у́бо Боже́ственный отъ него́ взе́мше, Еди́наго Го́спода Бо́га зна́емъ, въ Тріе́хъ Ѵпоста́сѣхъ Покланя́емаго, и Тому́ еди́ному служа́ще, еди́ну вѣ́ру и еди́но креще́ніе иму́ще, во Христа́ облеко́хомся, но исповѣ́дающе спасе́ніе, дѣ́ломъ и сло́вомъ сіе́ вообража́емъ.

Синакса́рь.

Стихи́: Нелѣ́потно измета́емы ико́ны,
                  Ра́дуюся, лѣ́потно покланя́емы ви́дя.

Въ сíй де́нь, въ недѣ́лю пе́рвую святы́хъ посто́въ Правосла́вія, си́рѣчь возставле́ніе святы́хъ и честны́хъ ико́нъ Це́рковь Христо́ва пра́здновати прія́тъ, бы́вшее отъ Михаи́ла и Ѳеодо́ры, святы́я и блаже́ннѣйшія цари́цы, и свята́го Меѳо́дія, патріа́рха Константино́польскаго. Бы́сть же си́це:

Льву́ Иса́вру, изъ ослятогоне́нія и свинопа́ственнаго житія́ ски́птры ца́рствія удержа́вшу, по Бо́жію попуще́нію. Во святы́хъ Ге́рманъ тогда́ корми́ла церко́вная объе́мъ, а́біе призыва́ется отъ о́наго и слы́шитъ: «я́ко мнѣ́ мни́тся, влады́ко, святы́мъ ико́намъ ничто́же ра́знствовати отъ и́доловъ. Повѣли́ у́бо ели́ко ско́ро извести́ сія́ отъ среды́. Аще и́стинніи су́ть святы́хъ зра́цы, но вы́шше да повѣ́сятся, да не со грѣхи́ валя́ющеся, сія́ всегда́ оскверня́емъ, цѣлу́юще». Патріа́рхъ же толи́кія ме́рзости царя́ отвраща́ше: «не ты́ ли, — глаго́ля, — о царю́, бѣснова́ти у́бо нѣ́коему нѣ́когда на святы́я ико́ны слы́шимъ, Ко́нону же бы́ти его́ проименова́нію?» Онъ же: «но а́зъ, — глаго́летъ, — еще́ младе́нецъ сы́й нарица́хся». Не повину́ющуся же у́бо послу́шати его́ патріа́рху, изгна́ его́ и единому́дренна себѣ́ возпоставля́етъ Анаста́сія, и та́ко тогда́ со святы́ми ико́нами бра́нь нача́ явля́ти. Глаго́лется же, евре́емъ пре́жде такову́ю не́нависть ему́ подложи́ти, отъ нѣ́коего волше́бства предре́кшимъ на ца́рство возведе́ніе, внегда́ убо́гъ сы́й, съ ни́ми ослятогоне́ніемъ жи́ти веществова́ше. Оному же злѣ́ житіе́ отто́ргшу, изъ о́наго суровѣ́йшій ски́менъ, Копрони́мъ Константи́нъ, нача́льства, наипа́че же на святы́я ико́ны бѣснова́нія прее́мникъ быва́етъ. И что́ подоба́етъ глаго́лати, ели́ка и якова́ и се́й беззако́нный содѣ́ла, но оба́че и о́ному сту́днѣйше сконча́вшуся. Отъ хаза́ры сы́нъ о́наго на ца́рство поставля́ется, поне́же и то́й е́же жи́ти злѣ́ измѣ́ри.

Ири́на и Константи́нъ нача́льства наслѣ́дницы быва́ютъ. Сíи отъ Тара́сія, святѣ́йшаго патріа́рха, наставля́еми, седьмы́й Собо́ръ собира́ютъ и святы́я ико́ны па́ки Христо́ва Це́рковь пріе́млетъ. Си́мъ же ца́рство отло́жшимъ, отъ Ге́ника Ники́форъ возво́дится. Та́же Ставри́кій, по се́мъ Михаи́лъ Рагкаве́й, боже́ственныя ико́ны чту́ще. Михаи́ла звѣрови́дный Ле́въ Армени́нъ прее́млетъ, и́же отъ мона́ха нѣ́коего затво́рника и злочести́ваго, ле́стію растлѣ́вся, второ́е иконобо́рство воздвиза́етъ, и па́ки безлѣ́потна Бо́жія Це́рковь показу́ется. Сего́ аморре́й прее́млетъ Михаи́лъ, того́же па́ки сы́нъ Ѳео́филъ, на ико́ны неи́стовство про́чія во вторы́хъ полага́юще. Се́й у́бо Ѳео́филъ, мно́гія отъ святы́хъ оте́цъ томле́ніемъ и му́камъ разли́чнымъ преда́въ о ико́нахъ честны́хъ, пра́вду тогда́ наипа́че усвоя́ше, я́ко взыска́ше: а́ще кто́ е́сть во гра́дѣ, крамоло́ю друго́му быва́емь; ни еди́наго на мно́ги дни́, я́ко глаго́лютъ, обрѣсти́. И двана́десяте лѣ́тъ самодово́льствовавъ, и чре́внымъ неду́гомъ объя́тъ бы́въ, расто́ргнутися хотя́ше отъ живота́: уста́ его́ презѣ́льно отверзо́шася, я́коже и самѣ́мъ утро́бамъ вну́треннимъ яви́тися. Цари́ца же Ѳеодо́ра болѣ́зненна о приключи́вшемся бы́вши, едва́ ко сну́ обраща́ется, и во снѣ́ ви́дѣ Пречи́стую Богоро́дицу, Младе́нца объе́мшу Превѣ́чнаго, обстои́му пресвѣ́тлыми а́нгелы, Ѳео́фила же, сея́ му́жа, отъ тѣ́хъ біе́ма и уничижа́ема. Яко у́бо оты́де отъ нея́ со́нъ, и Ѳео́филъ ма́ло въ себе́ прише́дъ, возопи́: «увы́ мнѣ́ окая́нному, святы́хъ ра́ди ико́нъ біе́нъ е́смь!» Абіе полага́етъ верху́ его́ цари́ца Богоро́дичный о́бразъ, моля́щися Се́й со слеза́ми. Ѳео́филъ у́бо си́це имы́й, ви́дѣвъ нѣ́коего отъ предстоя́щихъ нося́ща енко́лпій [нанѣ́дренникъ], похи́тивъ отъ него́, облобыза́ше. И а́біе на ико́ны шата́вшаяся уста́ и безсту́дно зи́нувый горта́нь, въ пе́рвый чи́нъ устроя́шеся, и отъ содержа́щія бѣды́ и ну́жды преста́ и усну́, бы́ти исповѣ́давъ добро́ святы́я ико́ны почита́ти. Изне́сши у́бо цари́ца отъ свои́хъ ковче́жцовъ святы́я и честны́я о́бразы лобыза́ти и все́ю душе́ю почита́ти Ѳео́фила устроя́ше. По ма́лѣ у́бо исчеза́етъ отъ житія́ сего́ Ѳео́филъ.

Ѳеодо́ра же, су́щихъ во изгна́ніихъ и въ темни́цахъ всѣ́хъ воззва́вши, свобо́днѣ пребыва́ти повелѣ́. И низверга́ется у́бо отъ патріа́ршескаго престо́ла Іоа́ннъ, и́же и Анни́съ, волхвонача́льникъ и бѣсонача́льникъ наипа́че, не́жели патріа́рхъ. Христо́въ же исповѣ́дникъ Меѳо́дій восхо́дитъ на престо́лъ, мно́га пострада́въ пре́жде и во гро́бѣ жи́въ затворе́нъ бы́сть.

Си́мъ же та́ко иму́щимъ, посѣще́ніе нѣ́кое быва́етъ Боже́ственное Іоанни́кію Вели́кому, во Оли́мбовѣхъ гора́хъ обучева́ющемуся. Вели́кій у́бо по́стникъ Арсаа́кій, прише́дъ къ нему́, глаго́ла: «Бо́гъ мя́ къ тебѣ́ посла́, я́ко да къ преподо́бному му́жу Иса́іи затво́рнику въ Никомидíю прише́дше, отъ него́ научи́мся, ели́ка су́ть любо́вна Бо́гу и прикла́дна его́ Це́ркви». И у́бо къ преподо́бному Иса́іи прише́дше, слы́шатъ отъ него́: «та́ко глаго́летъ Госпо́дь: се́ прибли́жися коне́цъ враго́мъ Моего́ изображе́нія. Вы́ у́бо къ цари́цѣ Ѳеодо́рѣ, но и къ патріа́рху Меѳо́дію ше́дше, рцы́те си́це: оста́ви вся́ не свяще́нныя, и та́ко со а́нгелы же́ртву Мнѣ́ принесе́ши, зра́ка Моего́ о́бразъ и Креста́ почита́й». Сія́ услы́шавше, въ Константи́нь гра́дъ а́біе достига́ютъ, и рече́нная Меѳо́дію патріа́рху и избра́ннымъ всѣ́мъ Бо́жіимъ возвѣща́ютъ. Собра́вшеся же, къ цари́цѣ прихо́дятъ и поко́рну сію́ во всѣ́хъ обрѣта́ютъ, отъ оте́цъ бо бя́ше благочести́ва и боголюби́ва. Абіе у́бо цари́ца Богоро́дичный о́бразъ на вы́и обвѣ́шаемый изне́сши, всѣ́мъ зря́щимъ, лобза́ше, глаго́лющи: «а́ще кто́ си́мъ не покланя́ется и не цѣлу́етъ любе́знѣ, не служе́бнѣ, не я́ко бо́ги, но я́ко о́бразы, Первообра́зныхъ ра́ди любве́: бу́ди про́клятъ». Они́ же ве́ліею ра́достію возра́довашася. Проти́ву же про́ситъ и сія́ отъ ни́хъ, я́ко дабы́ моле́ніе о му́жѣ ея́ Ѳео́филѣ сотвори́ли. Они́ же, вѣ́ру ея́ ви́дѣвше, а́ще и отрица́ющеся, оба́че же повину́ются. Ибо во святы́хъ Меѳо́дій патріа́рхъ лю́ди вся́ собра́въ, и приче́тъ ве́сь, и архіере́и въ вели́кую Бо́жію це́рковь, та́мо прихо́дятъ. Въ ни́хже бя́ху избра́нніи сíи: изъ Оли́мба вели́кій Іоанни́кій, и Арсаа́кій, Навкра́тій же, и ученицы́ Ѳео́дора Студи́та, и вели́каго села́ Ѳеофа́нъ, и Ѳео́доръ пи́санніи, и исповѣ́дницы Михаи́лъ Святогра́децъ и Синге́лъ, и инíи мно́жайшіи. Моле́ніе всено́щное къ Бо́гу сотворя́ютъ о Ѳео́филѣ, всѣ́мъ моля́щимся со слеза́ми и протяже́ннымъ моле́ніемъ. И сіе́ во всю́ пе́рвую седми́цу посто́въ соверша́шеся, и само́й цари́цѣ Ѳеодо́рѣ, подо́бнѣ съ жена́ми и про́чими людьми́ содѣва́ющи. Си́мъ же, си́це иму́щимъ, Ѳеодо́ра цари́ца о у́трѣ озаря́ющимъ пятка́ на со́нъ обра́щшися, возмнѣ́ обрѣсти́ся у столпа́ кре́стнаго, и нѣ́которыя съ шу́момъ проходи́ти пу́ть, разли́чная мучи́тельная ору́дія нося́щія ви́дѣ, посредѣ́ же си́хъ ведо́ма свя́зана и царя́ Ѳео́фила, созади́ свя́заныма рука́ма. Сего́ же позна́вши, послѣ́доваше и та́ съ веду́щими. Егда́ же до Мѣ́дяныхъ вра́тъ достиго́ша, ви́дѣ преесте́ственнымъ видѣ́ніемъ Му́жа нѣ́коего, сѣдя́ща предъ о́бразомъ Христо́вымъ, его́же проти́ву Ѳео́фила поста́виша. Сего́ же нога́мъ прикосну́вшися цари́ца, о царѣ́ моля́шеся. Онъ же едва́ отве́рзлъ уста́: «ве́лія твоя́ вѣ́ра, же́но! — глаго́летъ, — разумѣ́й у́бо, я́ко сле́зъ ра́ди твои́хъ и вѣ́ры, еще́ же и ра́ди проше́нія и моле́нія рабо́въ Мои́хъ и свяще́нниковъ Мои́хъ, проще́ніе даю́ му́жу твоему́ Ѳео́филу». Та́же глаго́летъ веду́щимъ: «разрѣши́те его́ и предади́те женѣ́ его́». Она́ же, взе́мши сего́, отступи́, веселя́щися и ра́дующися, и а́біе ю́ со́нъ оста́ви. Сія́ у́бо Ѳеодо́ра цари́ца ви́дѣ.

Патріа́рхъ же Меѳо́дій, моли́твамъ и моле́ніемъ быва́емымъ о не́мъ, хартію́ но́ву взе́мъ, написа́ въ не́й всѣ́хъ еретико́въ царе́й имена́, вчини́въ и того́ Ѳео́фила, и подъ свято́ю трапе́зою, взе́мъ вся́, положи́. О пятцѣ́ же ви́дитъ и то́й нѣ́коего а́нгела стра́шна вели́каго, входя́ща во хра́мъ, и къ нему́ прише́дша рещи́, глаго́лется: «услы́шася моле́ніе твое́, епи́скопе, и проще́ніе получи́ ца́рь Ѳео́филъ; не ктому́ у́бо про́чее о се́мъ стужа́й Божеству́». Онъ же, искуша́я, а́ще и́стинно е́сть ви́димое, отъ мѣ́ста своего́ сше́дъ, и ха́ртію взе́мъ, и разви́въ, обрѣ́те, — о Бо́жіихъ суде́бъ! — загла́жено отъ Бо́га вся́чески Ѳео́филово и́мя.

Сіе́ увѣ́дѣвши цари́ца, преобра́довася зѣло́, и къ патріа́рху посыла́етъ, вся́ лю́ди собра́ти съ честны́ми кресты́ и со святы́ми о́бразы въ вели́кую це́рковь, я́ко да у́тварь святы́хъ образо́въ се́й отда́стся и но́вое Бо́жіе чу́до всѣ́мъ позна́но бу́детъ. И у́бо всѣ́мъ вско́рѣ въ це́рковь собра́вшимся со свѣща́ми, и цари́ца съ сы́номъ пріи́де. И литíи та́мо бы́вшей, со святы́ми ико́нами, и боже́ственными и честны́ми древесы́ Кре́стными, и свяще́ннымъ и боже́ственнымъ Ева́нгеліемъ, да́же и до глаго́лемаго по́прища изыдо́ша, «Го́споди поми́луй» взыва́юще. И та́ко па́ки въ це́рковь возврати́вшеся, Боже́ственную Литургíю соверши́ша. Возста́вленнымъ святы́мъ и честны́мъ ико́намъ отъ предрече́нныхъ святы́хъ муже́й, проповѣ́даннымъ у́бо благочести́вымъ и правосла́вящимъ; проти́внымъ же и нече́ствующимъ, и святы́хъ ико́нъ че́сти не пріе́млющимъ, отреченнымъ и преда́ннымъ прокля́тію. И отто́лѣ опредѣли́ша сíи святíи исповѣ́дницы, лѣ́тному си́це сему́ свяще́нному торжеству́ быва́ти, да не когда́ и па́ки въ то́жде злоче́стіе впаде́мъ.

Неизмѣ́нный Образе Отчій, моли́твами святы́хъ Твои́хъ исповѣ́дниковъ, поми́луй на́съ. Ами́нь.

Пѣ́снь 7.

Ирмо́съ: Въ пещи́ авраа́мстіи [о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди].

Да сликовству́етъ церко́вной свѣ́тлости любо́вію боже́ственною а́нгельское во́инство, богому́дренно воспѣва́ющее: благослове́нъ еси́ въ хра́мѣ сла́вы Твоея́, Го́споди.

Це́рковь перворожде́нныхъ и торжество́ ра́дуется, зря́ще ны́нѣ боже́ственныя лю́ди, единому́дренно воспѣва́ющія: благослове́нъ еси́ въ хра́мѣ сла́вы Твоея́, Го́споди.

Изба́влени пре́жде мра́чныя е́реси ма́ніемъ Ѳеодо́ры достолѣ́пныя цари́цы, воспѣва́емъ: благослове́нъ еси́ въ хра́мѣ сла́вы Твоея́, Го́споди.

Богоро́диченъ: Па́че вы́шнихъ ликостоя́ній вознесла́ся еси́, Всечи́стая, еди́на бы́вши Ма́ти Вседѣ́теля. Ра́дующеся у́бо, взыва́емъ: благослове́нна Ты́ еси́ въ жена́хъ, Всенепоро́чная Влады́чице.

Катава́сія: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Пѣ́снь 8.

Ирмо́съ: Ру́цѣ распросте́ръ, [Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода].

Зако́ны Це́ркве оте́ческія сохраня́юще, о́бразы пи́шемъ и лобза́имъ усты́ и се́рдцемъ и хотѣ́ніемъ Христо́вы и Его́ святы́хъ, зову́ще: благослови́те, вся́ дѣла́ Госпо́дня, Го́спода.

На Первообра́зное я́вѣ о́браза по́честь и поклоне́ніе вознося́ще, чти́мъ, богоглаго́ливыхъ уче́ніемъ послѣ́дующе, и Христу́ вѣ́рою зове́мъ: благослови́те, вся́ дѣла́ Госпо́дня, Го́спода.

Умъ озари́вши просвѣще́ніемъ Боже́ственнаго Ду́ха честна́я цари́ца, плоды́ богому́дренныя иму́щи, благолѣ́піе возлюби́ Це́ркве Христо́вы и красоту́, благословя́щи ку́пно съ вѣ́рными Іису́са Богочеловѣ́ка.

Богоро́диченъ: Луча́ми Свѣ́та у́мнаго освѣща́емый Боже́ственный до́мъ Тво́й, осѣня́етъ ны́нѣ всѣ́хъ о́блакомъ Ду́ха и освяща́етъ вѣ́рныя, согла́сно пою́щія: благослови́те, вся́ дѣла́ Госпо́дня, Го́спода.

Катава́сія: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ка́мень нерукосѣ́чный [отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ].

Священнописа́ньми образо́въ укра́шеную зря́ще па́ки честну́ю Це́рковь, со благоговѣ́ніемъ вси́ притеце́мъ и Бо́гу возопіи́мъ: Тебе́ велича́емъ, Трисвяты́й.

Че́сть и сла́ву стяжа́вши Це́рковь — Крестъ Твой, и честны́я ико́ны, и святы́хъ изображе́нія, съ весе́ліемъ, Влады́ко, и ра́достію велича́етъ Тя́.

Освѣти́ Боже́ственною Твое́ю сла́вою цари́ на́ши, Ще́дрый, и ополче́нми а́нгельскими и всеору́жествы сія́ огради́, язы́ковъ свирѣ́пство покаря́я и́мъ, Влады́ко.

Богоро́диченъ: Взя́тся прама́тере Евы осужде́ніе, Богоро́дице, я́ко Ты́ всѣ́хъ Влады́ку несказа́нно, Чи́стая, родила́ еси́, Его́же и ны́нѣ подо́біе на ико́нахъ цѣлу́емъ.

Катава́сія: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Ексапостила́рій у́тренній воскре́сный, еди́ножды. И настоя́щій. Подо́бенъ: Со ученики́ взы́демъ.

[Сла́ва:] Взыгра́йте, восплещи́те, съ весе́ліемъ воспо́йте: ко́ль чу́дная и стра́нная Твоя́, Христе́, вопію́ще, дѣла́! И кто́ возмо́жетъ изрещи́, Спа́се, могу́тства, Тебе́, на́ше единомы́сліе и согла́сіе во еди́ну соедини́вшаго Це́рковь?

[И ны́нѣ,] богоро́диченъ: Ору́жія ны́нѣ оскудѣ́ша вражде́бныя е́реси и па́мять ея́ исчезе́ съ шу́момъ: хра́мъ бо Тво́й, Всечи́стая, всеблаголѣ́пно зря́ще укра́шенный благода́тьми честны́хъ ико́нъ, ра́дости исполня́емся вси́.

На хвали́техъ стихи́ры воскре́сны 4, и восто́ченъ [Анато́ліевъ1, и тріо́ди подо́бны три́, гла́съ 4. Подо́бенъ: Да́лъ еси́ зна́меніе.

Въ Тебѣ́ ны́нѣ ра́дуется Це́рковь, Человѣколю́бче, Женисѣ́ и Созда́телѣ свое́мъ, сію́ во́лею боголѣ́пною отъ и́дольскія ле́сти изба́вльшемъ и Себѣ́ обручи́вшемъ честно́ю кро́вію, свѣ́тло пріе́млющи свяще́нное возставле́ніе ико́нъ, и, ра́дующися, Тя́ пое́тъ и сла́витъ вѣ́рно.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, [повѣ́мъ вся́ чудеса́ Твоя́].

Пло́ти изображе́ніе Твое́ возставля́юще, Го́споди, любе́зно лобыза́емъ, вели́кое та́инство смотре́нія Твоего́ изъясня́юще: не мнѣ́ніемъ бо, я́коже глаго́лютъ богобо́рніи дѣ́ти Ма́нентовы, на́мъ яви́лся еси́, Человѣколю́бче, но и́стиною и естество́мъ пло́ти, Тобо́ю возводи́ми къ Твое́й любви́ и жела́нію.

Сти́хъ: Возвеселю́ся и возра́дуюся о Тебѣ́, [пою́ и́мени Твоему́, Вы́шній].

Де́нь ра́достный и весе́лія испо́лненный яви́ся дне́сь: свѣ́тлость бо догма́тъ и́стиннѣйшихъ блиста́етъ, и сія́етъ Це́рковь Христо́ва, укра́шена возставле́нми ико́нъ святы́хъ ны́нѣ и изображе́ній сія́нми, и единомы́сліе быва́етъ вѣ́рныхъ богопочте́нное.

Та́же глаго́лемъ сти́хъ, гла́съ 6: Воскресни́, Го́споди, Бо́же мо́й, да вознесе́тся рука́ Твоя́, не забу́ди убо́гихъ Твои́хъ до конца́.

И пое́мъ самогла́сенъ дне́, гла́съ 6:

Моисе́й во вре́мя воздержа́нія зако́нъ прія́тъ и лю́ди привлече́; Илія́ пости́вся, небеса́ заключи́; тріе́ же о́троцы авраа́мстіи мучи́теля беззако́ннующа поще́ніемъ побѣди́ша. Имже и на́съ, Спа́се, сподо́би Воскресе́ніе улучи́ти, си́це вопію́щихъ: Святы́й Бо́же, Святы́й Крѣ́пкій, Святы́й Безсме́ртный, поми́луй на́съ.

Сла́ва: па́ки то́йже. И ны́нѣ: Преблагослове́нна еси́, Богоро́дице...
Славосло́віе вели́кое. [Ектеніи́] и отпу́стъ. Сла́ва, и ны́нѣ. Сти́хира ева́нгельская и ча́съ 1-й.


НА ЛИТУРГІИ,

Блаже́нны гла́са на 6 и отъ кано́на дне́, пѣ́снь 6-я, на 4. Проки́менъ, гла́съ 4, пѣ́снь отце́въ: Благослове́нъ еси́, Го́споди Бо́же оте́цъ на́шихъ,* и хва́льно и просла́влено и́мя Твое́ во вѣ́ки. Сти́хъ: Яко пра́веденъ еси́ о всѣ́хъ, я́же сотвори́лъ еси́ на́мъ. Апо́столъ къ Евре́емъ, зача́ло 329, отъ полу́. Аллилу́ія, гла́съ 4: Моисе́й и Ааро́нъ во іере́ехъ Его́, и Саму́илъ въ призыва́ющихъ и́мя Его́. Сти́хъ: Призыва́ху Го́спода, и То́й послу́шаше и́хъ. Ева́нгеліе отъ Іоа́нна, зача́ло 5. Прича́стенъ: Хвали́те Го́спода съ небе́съ, [хвали́те Его́ въ вы́шнихъ]. Другíй: Ра́дуйтеся, пра́ведніи, о Го́сподѣ, [пра́вымъ подоба́етъ похвала́].

На трапе́зѣ же яди́мъ варе́ніе со еле́емъ, а не ры́бы. Аще же прилучи́тся, піе́мъ вино́, уста́вленное въ сла́ву Бо́жію, по двѣ́ ча́ши; та́кожде и въ ве́черъ по двѣ́.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 122 – 129.

Служба въ субботу 1-й недѣли поста // Къ оглавленію Постной Тріоди // Служба въ понедѣльникъ 2-й недѣли поста


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.