Церковный календарь
Новости


2018-11-18 / russportal
Прот. Михаилъ Помазанскій. Признаки Христовой Церкви (1976)
2018-11-18 / russportal
Прот. Михаилъ Помазанскій. О важности догмата о Церкви (1976)
2018-11-18 / russportal
Свт. Василій, еп. Кинешемскій. Бесѣда 8-я на Евангеліе отъ Марка (1996)
2018-11-18 / russportal
Свт. Василій, еп. Кинешемскій. Бесѣда 7-я на Евангеліе отъ Марка (1996)
2018-11-18 / russportal
Еп. Григорій (Граббе). Докладъ Архіерейскому Сѵноду РПЦЗ (1996)
2018-11-18 / russportal
Еп. Григорій (Граббе). Психіатрія и исповѣдь (1996)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 49-я (1922)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 48-я (1922)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 47-я (1922)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 46-я (1922)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 45-я (1922)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 44-я (1922)
2018-11-17 / russportal
Еп. Григорій (Граббе). Начало болѣзней (1996)
2018-11-17 / russportal
Еп. Григорій (Граббе). Письмо въ ред. газеты "Новое Русское Слово" (1996)
2018-11-17 / russportal
"Почему правосл. христ. нельзя быть экуменистомъ". 3-е основаніе (1992)
2018-11-17 / russportal
"Почему правосл. христ. нельзя быть экуменистомъ". 2-е основаніе (1992)
Новости въ видѣ
RSS-канала: .
Сегодня - воскресенiе, 18 ноября 2018 г. Сейчасъ на порталѣ посѣтителей - 16.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ПОНЕДѢЛЬНИКЪ ВТОРЫЯ СЕДМИЦЫ ВЕЛИКАГО ПОСТА.

ВЪ НЕДѢЛЮ ВЕЧЕРА, ВО СВѢТИЛЬНИЧНОЕ,
поста́вимъ стихо́въ 10 и глаго́лемъ стихи́ры умили́тельныя осмогла́сника покая́нны 4 и тріо́ди подо́бны, господи́на Іо́сифа, гла́съ 4. Подо́бенъ: Да́лъ еси́ зна́меніе.

Да́ждь ми́ умиле́ніе, и злы́хъ отчужде́ніе, и соверше́нное исправле́ніе, въ стра́сти тѣле́снѣй ны́нѣ погруже́ному и отдале́ному отъ Тебе́, Бо́же Всецарю́, и ниотку́дуже упова́нія иму́щу, и спаси́ мя́ блу́днаго за мно́гую бла́гость, Іису́се Всеси́льне, Спа́се ду́шъ на́шихъ.

Моисе́й ди́вный, посто́мъ очи́щся, ви́дѣ Жела́емаго. Сему́ у́бо поревнова́вши, смире́нная душе́ моя́, потщи́ся въ де́нь воздержа́нія отъ злы́хъ очи́ститися, я́ко да Го́спода, даю́щаго тебѣ́ оставле́ніе, и очище́ніе, и избавле́ніе, у́зриши су́щаго Блага́го и Человѣколюби́ваго.

Другíй, ки́ръ Ѳео́дора, гла́съ 6. Подо́бенъ: Арха́нгельски.

Посто́въ ны́нѣ двоеседми́чіе свѣ́тло начне́мъ, соверша́юще де́нь отъ дне́, бра́тіе, колесни́цу о́гненну содѣ́лавше на́мъ, я́коже Илія́ Ѳесви́тянинъ, четы́ре вели́кія добродѣ́тели, у́мъ возвы́симъ безстра́стіемъ, пло́ть вооружи́мъ чистото́ю, теку́ще и побѣжда́юще врага́.

И мине́и 3. Сла́ва, и ны́нѣ, богоро́диченъ. Вхо́дъ. Свѣ́те Ти́хій...

Проки́менъ, гла́съ 8: Да́лъ еси́ достоя́ніе* боя́щимся Тебе́, Го́споди. Сти́хъ 1: Отъ коне́цъ земли́ къ Тебѣ́ воззва́хъ. Сти́хъ 2: Покры́юся въ кро́вѣ кри́лъ Твои́хъ. Сти́хъ 3: Та́ко воспою́ и́мени Твоему́ во вѣ́ки. И па́ки: Да́лъ еси́ достоя́ніе боя́щимся...

[Зри́:] Подоба́етъ вѣ́дати, я́ко сія́ два́ вели́кія проки́мены, е́же е́сть: Не отврати́ лица́ Твоего́... и Да́лъ еси́ достоя́ніе.., со стиха́ми и́хъ, еди́нъ по еди́ному пое́тся чрезъ ве́сь святы́й по́стъ; начина́емъ отъ недѣ́ли сы́рныя, до недѣ́ли пя́тыя поста́. И отъ Сподо́би Го́споди... начина́ются покло́ны.

На стихо́внѣ самогла́сенъ дне́, два́жды, гла́съ 8:

Пріиди́те, очи́стимъ себе́ ми́лостынями и щедро́тами убо́гихъ, не трубя́ще, ни явля́юще на́ше благотворе́ніе, да не увѣ́сть шу́ица десни́цы дѣ́ло, да не расточи́тъ тщесла́віе пло́дъ ми́лостыни, но въ та́йнѣ та́йная Вѣ́дущему воззове́мъ: Отче, оста́ви прегрѣше́нія на́ша, я́ко Человѣколю́бецъ.

Му́чениченъ: Му́ченицы Госпо́дни, вся́ко мѣ́сто освяща́ете, и вся́къ неду́гъ врачу́ете, и ны́нѣ моли́те изба́витися сѣ́тей вра́жіихъ душа́мъ на́шимъ, мо́лимся.

Сла́ва, и ны́нѣ, богоро́диченъ:

Небе́сная пою́тъ Тя́, Обра́дованная Ма́ти Безневѣ́стная, и мы́ славосло́вимъ неизслѣ́дованное Твое́ Рождество́, Богоро́дице, моли́ спасти́ся душа́мъ на́шимъ.

И про́чее послѣ́дованіе, я́ко обы́чно.


НА ПОВЕЧЕРІИ,
Пое́мъ кано́нъ святы́мъ проро́комъ, его́же краегране́сіе: Ли́къ да пле́щетъ проро́ковъ благото́чно. Ѳеофа́ново, гла́съ 5.

Пѣ́снь 1.

Ирмо́съ: Коня́ и вса́дника въ мо́ре Чермно́е [сокруша́яй бра́ни, мы́шцею высо́кою, Христо́съ истрясе́, Изра́иля же спасе́, побѣ́дную пѣ́снь пою́ща].

Благода́ть мнѣ́ да́ти Боже́ственнаго Ду́ха, честну́ю ва́шу па́мять пою́щу, Всевино́внаго Христа́ умоли́те, и согрѣше́ній оставле́ніе, я́ко проро́цы Боже́ственныя благода́ти.

Сосу́ди Богодухнове́нныхъ слове́съ согла́сныя и зерца́ла Боже́ственнаго блиста́нія, явле́ніе Боже́ственно пріе́млющія, проро́ки вся́ богому́дрыя воспои́мъ.

Глаго́лы зако́нныя на горѣ́ Сина́йстѣй Моисе́й Богови́децъ отъ Бо́га пріе́мь, лице́мъ просвѣти́ся Боговидѣ́нія, благода́тію зна́менуемь чу́дный.

Сла́ва: Ту́чами богоразу́мія мо́ре язы́къ многобо́жія благода́тію [проро́честіи] [1] о́блацы Бо́жіи съ шу́момъ разори́ша, Единонача́льную Си́лу богому́дренно проповѣ́дающе.

[И ны́нѣ,] богоро́диченъ: Трубы́ богогла́сныя, Ма́терь Тя́ Бо́жію, напослѣ́докъ вѣко́въ ро́ждшую, Пречи́стая, проро́цы вѣща́ютъ, научи́вшеся свы́ше, Богоро́дице, Твои́мъ та́йнамъ.

Пѣ́снь 3.

Ирмо́съ: Водрузи́вый на ничесо́мже [зе́млю повелѣ́ніемъ Твои́мъ, и повѣ́сивши неодержи́мо тяготѣ́ющую, на недви́жимѣмъ, Христе́, ка́мени за́повѣдей Твои́хъ, Це́рковь Твою́ утверди́, Еди́не Бла́же и Человѣколю́бче].

Цѣвни́цы духо́вныя, бряца́ломъ ударя́емы, проро́цы вси́, подо́бный гла́съ Твоего́ позна́нія, Христе́, всѣ́мъ богоглася́ще боголюбе́знымъ воспѣва́ютъ, свы́ше богатя́ще сія́ніе.

Ору́жія востаю́щая, повелѣ́ніемъ Твои́мъ, проро́цы вси́ многомяте́жную ле́сть пресѣца́ютъ, Христе́, Боже́ственною Твое́ю си́лою благоче́стно одѣ́явшеся и непостижи́мою держа́вою Твое́ю.

Сла́ва: Боже́ственныя и мы́сленныя ча́ши ра́зума, проро́цы всю́ зе́млю упои́ша, прообража́юще я́вѣ Твоего́ смотре́нія неудо́бное та́инство, и́ный и́нако Тебе́ проповѣ́дающе.

[И ны́нѣ,] богоро́диченъ: Дре́вле повелѣ́нное, Дѣ́во, та́инство и пре́жде вѣко́въ предразумѣва́емое, вся́ вѣ́дущимъ Бо́гомъ, въ послѣ́днее вре́мя во чре́вѣ Твое́мъ, Пренепоро́чная, коне́цъ пріе́мшее яви́ся.

Пѣ́снь 4.

Ирмо́съ: Боже́ственное Твое́ [разумѣ́въ истоща́ніе прозорли́во, Авваку́мъ, Христе́, со тре́петомъ вопія́ше Тебѣ́: во спасе́ніе люде́й Твои́хъ, спасти́ пома́занныя Твоя́ прише́лъ еси́].

Ду́хомъ, проро́цы, вѣща́юще, и́стины неле́стніи свѣти́льницы яви́стеся, прему́дріи, просвѣща́юще вся́ язы́ки житія́ свѣ́тлостію.

Се́ ны́нѣ сбытія́ зря́ще рече́нныхъ отъ ва́съ, проро́цы боже́ственніи, сла́вимъ ва́ми Проповѣ́даннаго и дѣ́ломъ прорече́нія Испо́лншаго.

Сла́ва: Прему́дростію, боже́ственніи, просвѣща́еми, язы́ковъ приведе́ніе Бо́жіею благода́тію проразумѣ́сте, Изра́илево же паде́ніе и всѣ́хъ благи́хъ запустѣ́ніе.

[И ны́нѣ,] богоро́диченъ: Бо́га воплоще́нна зря́ще, на боже́ственнѣй стра́жи ста́вше, Сего́, всебога́тіи, сподо́бистеся ви́дѣти, отъ горы́ Дѣ́выя приходя́ща.

Пѣ́снь 5.

Ирмо́съ: Одѣя́йся свѣ́томъ, [я́ко ри́зою, къ Тебѣ́ у́тренюю и Тебѣ́ зову́: ду́шу мою́ просвѣти́ омраче́нную, Христе́, я́ко Еди́нъ Благоутро́бенъ].

Утренева ду́хъ тво́й къ Сѣдя́щему на престо́лѣ превознесе́ннѣ, Иса́іе прему́дре, и съ вы́шними ли́ки воспѣ́лъ еси́.

Язы́ки Ду́хомъ дви́жуще, святíи, Сего́ словеса́ вселе́ннѣй благопостоя́нно проповѣ́дующе, богоразу́мія зарю́ уясни́сте.

Сла́ва: Якоже жили́ща Бо́жія бы́вше, вы́ше естества́ соверша́юща, Сего́ въ себѣ́ имѣ́сте, Ему́же ны́нѣ предстоя́ще, о на́съ моли́теся.

[И ны́нѣ,] богоро́диченъ: Умъ Сво́й прему́дрый и дре́вній Совѣ́тъ ва́мъ, проро́цы и́стины, Бо́гъ сказа́лъ е́сть, отъ Дѣ́вы рожде́йся, я́ко еди́нъ Милосе́рдъ.

Пѣ́снь 6.

Ирмо́съ: Неи́стовствующееся бу́рею [душетлѣ́нною, Влады́ко Христе́, страсте́й мо́ре укроти́ и отъ тли́ возведи́ мя, я́ко Благоутро́бенъ].

Житіе́ боже́ственное, благоче́стія сло́во и́стинное стяжа́вше, проповѣ́дницы бы́сте всеи́стинніи Боже́ственнаго воплоще́нія, святíи.

Си́лу боже́ственную иму́ще, царе́й неудержа́нное стремле́ніе и звѣре́й уста́ загради́сте, изъ чре́ва ки́това цѣ́лы спасо́стеся.

Сла́ва: Изъ ложе́снъ, святíи, мíру сія́юще всему́, добродѣ́тели учи́теліе бы́сте и насади́теліе, проро́цы вси́ пребога́тіи.

[И ны́нѣ,] богоро́диченъ: Боголюби́вая иму́ще помышле́нія, Рождество́ Твое́ проро́цы, Влады́чице, провозвѣсти́ша многообра́зными начерта́ньми и о́бразы, Чи́стая.

[Го́споди, поми́луй, три́жды. Сла́ва, и ны́нѣ.]

Сѣда́ленъ, гла́съ 2, самогла́сенъ:

Ли́къ проро́ческій съ Моисе́омъ и Ааро́номъ весе́ліемъ ра́дуется дне́сь, я́ко коне́цъ проро́чества наводя́й: сія́етъ Кре́стъ, и́мже на́съ спа́слъ еси́. Тѣ́хъ моли́твами, Христе́ Бо́же, поми́луй на́съ.

Пѣ́снь 7.

Ирмо́съ: Превозноси́мый отце́въ [Госпо́дь, пла́мень угаси́, о́троки ороси́, согла́сно пою́щія: Бо́же, благослове́нъ еси́].

Неизче́тная си́ла Госпо́дня велѣ́нія въ ро́вѣ львы́ обузда́, вопію́щу проро́ку: Бо́же, благослове́нъ еси́.

Тро́ицы равночи́сленніи честны́я су́ще, пла́мень угаси́ша всему́дріи о́троцы Твои́, согла́сно пою́ще: Бо́же, благослове́нъ еси́.

Сла́ва: Яко свѣти́ла сія́юще, добродѣ́тельными цвѣ́ты зе́млю онебеси́вше, Авраа́мстіи о́трасли, проро́цы, пою́ще: Бо́же, благослове́нъ еси́.

[И ны́нѣ,] богоро́диченъ: Зако́ны естества́ превозшла́ еси́, Влады́чице, ро́ждши Го́спода, зако́номъ облада́юща, Ему́же вси́ пое́мъ: Бо́же, благослове́нъ еси́.

Пѣ́снь 8.

Ирмо́съ: Тебѣ́, Вседѣ́телю, [въ пещи́ о́троцы, всемíрный ли́къ спле́тше, поя́ху: дѣла́ вся́кая, Го́спода по́йте и превозноси́те во вся́ вѣ́ки].

Вну́трь сла́дости ра́йскія су́ще, проро́цы богопрія́тніи, ли́къ соста́вльше, всѣ́мъ вѣ́рою ва́съ восхваля́ющимъ, изба́витися отъ бѣ́дъ Христа́ умоли́те.

Пѣ́ніе, вѣ́рніи, богогла́снымъ всѣ́мъ проро́комъ принесе́мъ, ли́къ испле́тше вси́, си́хъ словесы́ утверди́вшеся, да моли́твами и́хъ оправди́мся.

Сла́ва: Сосу́ди мы́сленніи благоуха́нія вси́, проро́цы, я́вѣ Ду́ху бы́сте, вся́ язы́ки къ ра́зуму наставля́юще и превознося́ще Христа́ во вѣ́ки.

[И ны́нѣ,] богоро́диченъ: Отъ Отца́ Безнача́льную Зарю́, Дѣ́во, родила́ еси́ пло́ти прія́тіемъ, тѣ́мже, — ра́дуйся! — непреста́нно Тебѣ́ зове́мъ и превозно́симъ, Чи́стая, во вѣ́ки.

Пѣ́снь 9.

Ирмо́съ: Иса́іе, лику́й, [Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ].

Единому́дренно пріиди́те ны́нѣ, проро́ки вся́ Бо́жія всечестны́я, чуде́съ соверши́тели преесте́ственныхъ, вѣ́твь честну́ю, избра́ніе Іа́ковле, я́ко проповѣ́давшія Христа́, восхва́лимъ.

Ра́дости всемíрныя провозвѣ́стницы, проповѣ́дницы я́вѣ и ра́зума сокро́вища, свѣ́тліи Боже́ственніи прему́дрости бы́сте всеи́стинныя, уста́ чи́стая, язы́цы Ду́ха Свята́го, всечестнíи.

Сла́ва: Яко проро́цы прему́дріи, всѣ́хъ Созда́теля и Бо́га я́ко си́льна зря́ще, и отъ Него́ свѣ́томъ освѣща́еми, ва́шу па́мять благоче́стно вѣ́рою чту́щихъ отъ бѣ́дъ спаса́йте.

[И ны́нѣ,] богоро́диченъ: Спасе́нія Хода́таица человѣ́комъ была́ еси́, Чи́стая, ро́ждши пло́тски Содѣ́теля и Го́спода, Тебе́ ра́ди всѣ́мъ очище́ніе, велича́ющимъ Тя́, Дѣ́во, подаю́щаго.

Та́же стихи́ры проро́комъ, гла́съ 1. Подо́бенъ: Прехва́льніи.

Проро́цы пресла́вніи, вы́ царя́ обличи́сте, лю́демъ же де́рзостнымъ сопроти́вистеся, въ Тро́ицѣ Еди́наго Бо́га проповѣ́дающе, и те́плѣ отгоня́юще отъ земли́ ле́сть многобо́жную; и ны́нѣ моли́теся дарова́ти душа́мъ на́шимъ ми́ръ и ве́лію ми́лость.

Проро́цы пресла́вніи, вы́ благоче́стно заблужда́юще въ пусты́няхъ и гора́хъ, и озлобля́еми въ гла́дѣ и жа́ждѣ, я́ко Бо́жіи уго́дницы, со Христо́мъ на небесѣ́хъ водворя́етеся; и ны́нѣ моли́теся дарова́ти душа́мъ на́шимъ ми́ръ и ве́лію ми́лость.

Проро́цы прехва́льніи, вы́ терпѣли́вно претре́ни, ка́меніемъ же побива́еми и умерщвля́еми ме́чнымъ усѣче́ніемъ, благоче́стія ра́ди свѣ́тли страда́нми бы́сте; и ны́нѣ моли́теся дарова́ти душа́мъ на́шимъ ми́ръ и ве́лію ми́лость.

Сла́ва, и ны́нѣ, богоро́диченъ:

Вои́стинну па́че ума́, Чу́дная Богоневѣ́сто, вели́чія Рождества́ Твоего́, я́же проповѣ́даша проро́цы вси́, всепресла́вное Зача́тіе и Рождество́, Всепѣ́тая, недомы́сленное и несказа́нное, и́мже мíръ спасе́ся.


ВЪ ПОНЕДѢЛЬНИКЪ 2-Я СЕДМИЦЫ, [НА УТРЕНИ],

По 1-мъ стихосло́віи сѣда́льны умили́тельныя осмогла́сника и богоро́диченъ.

По 2-мъ же стихосло́віи сѣда́ленъ, гла́съ 4. Подо́бенъ: Удиви́ся Іо́сифъ.

Преступле́нія плодо́мъ, умерщвле́на душе́ю, оживотвори́, Христе́, посто́мъ и́стиннымъ и покая́ніемъ, молю́ся, я́ко Ще́дръ, и да́ждь ми́ въ путе́хъ при́сно ходи́ти пра́выхъ и до́брыхъ, честны́хъ Твои́хъ за́повѣдей, я́ко да Боже́ственныя сла́вы Твоея́ улучи́въ, со всѣ́ми лю́бящими Тя́, славосло́влю Твою́ о всѣ́хъ, Іису́се, бла́гость.

Сла́ва, то́йже. И ны́нѣ, богоро́диченъ. Подо́бенъ:

Треволне́ньми страсте́й безсо́вѣстный а́зъ обурева́емь, Чи́стая, призыва́ю Тя́ те́плѣ, не пре́зри мя́ окая́ннаго поги́бнути, бе́здну ми́лости ро́ждшая, ра́звѣ бо Тебе́ наде́жды не стяжа́хъ. Да не у́бо враго́мъ пора́дованіе и смѣ́хъ упова́яй на Тя́ явлю́ся, и́бо мо́жеши, ели́ка и хо́щеши, я́ко Ма́ти су́щи всѣ́хъ Бо́га.

По 3-мъ стихосло́віи сѣда́ленъ, гла́съ 6. Подо́бенъ: Го́споди, поми́луй на́съ.

Го́споди, напра́ви ны́ по́стъ повторя́ющія, освяще́ніе на́мъ осія́й и просвѣще́ніе оправда́ній Твои́хъ, и сподо́би на́съ приноси́ти Тебѣ́ благопрія́тну моли́тву, колѣ́на приклоня́ющихъ. Ты́ бо еси́ Оте́цъ на́шъ и мы́ сы́нове Твои́, и Тя́ со стра́хомъ пое́мъ и и́мя Твое́ призыва́емъ.

Сла́ва, то́йже. И ны́нѣ, богоро́диченъ:

Нача́ло спасе́нія Гавріи́лово провѣща́ніе къ Дѣ́вѣ бы́сть. Слы́ша бо, е́же — ра́дуйся! — не отбѣже́ цѣлова́нія, не усумнѣ́ся, я́ко Са́рра въ сѣ́ни, но си́це глаго́лаше: се́ раба́ Госпо́дня, бу́ди Мнѣ́ по глаго́лу твоему́.

Кано́нъ мине́и и трипѣ́снецъ господи́на Іо́сифа. И стихосло́вятся пѣ́сни.

Пѣ́снь 1, гла́съ 4.

Ирмо́съ: Триста́ты крѣ́пкія, [Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе].

Еди́не Благíй, Исто́чниче ми́лости, Агнче Бо́жій, взе́мляй, я́ко Бо́гъ, мíра согрѣше́нія, спаси́ мя́ грѣхо́въ треволне́ніемъ погружа́ема, къ приста́нищу покая́нія наставля́я мя́.

По́стъ чи́стый, удале́ніе грѣха́, отчужде́ніе страсте́й, любо́вь къ Бо́гу, моли́твы прилѣжа́ніе, сле́зы со умиле́ніемъ и о убо́гихъ попече́ніе Христо́съ въ писа́ніихъ завѣща́.

Уя́звлена душе́ю грѣхо́внымъ ору́жіемъ и ура́нена су́ща мно́гими злы́ми, Врачу́ ду́шъ на́шихъ, исцѣли́, я́ко Благодѣ́тель, наложи́въ мнѣ́ лека́рства му́дрыхъ за́повѣдей Твои́хъ, Человѣколю́бче.

Богоро́диченъ: Нескве́рная Ски́ніе, Пресвята́я Дѣ́во, оскверне́ннаго мя́ лю́тыхъ страсте́й наведе́ньми исто́чникомъ ми́лости Твоея́ очи́сти и да́ждь ми́ умиле́нія ту́чи, Влады́чице, грѣха́ глубину́ потребля́ющи.

Иный, господи́на Ѳео́дора, гла́съ 6.

Ирмо́съ: Помо́щникъ и Покрови́тель бы́стъ мнѣ́ [во спасе́ніе, Се́й мо́й Бо́гъ, и просла́влю Его́, Бо́гъ отца́ моего́, и вознесу́ Его́: сла́вно бо просла́вися].

Яко попра́здничную ра́дость и втору́ю седми́цу свѣтотво́рныхъ посто́въ, бра́тіе, пріи́мше, любо́вію воспои́мъ Христа́, боже́ственно веселя́щеся.

Умиле́нія вре́мя по́стное ны́нѣ обрѣ́тше, воспла́чимъ зѣ́льно и воздо́хнемъ, и воздѣжи́мъ ру́цѣ ко еди́ному Изба́вителю, е́же спасти́ ду́ши на́ша.

[Сла́ва,] тро́иченъ: Тріѵпоста́сная Еди́нице, Нача́льнѣйшая Госпоже́ всѣ́хъ, Совершеннонача́льная, Пренача́льная, Сама́ на́съ спаси́, Отче и Сы́не и Ду́ше Пресвяты́й.

[И ны́нѣ,] богоро́диченъ: Кто́ роди́ Сы́на, невсѣ́яна о́тчимъ зако́номъ? Сего́ у́бо ражда́етъ Оте́цъ безъ ма́тере. Пресла́вное чу́до! Ты́ бо родила́ еси́, Чи́стая, Бо́га вку́пѣ и Человѣ́ка.

Сла́ва Тебѣ́, Бо́же на́шъ, сла́ва Тебѣ́.

Ка́ко понесу́ гнѣ́въ Тво́й, Христе́ мо́й, егда́ на су́дъ пріи́деши? Ко́е же обрѣ́тъ сло́во да́мъ та́мо, не содѣ́явъ, ни сотвори́въ Твою́ во́лю, Христе́? Тѣ́мже пре́жде конца́ осла́би ми́.

Ирмо́съ: Помо́щникъ и Покрови́тель бы́стъ мнѣ́ во спасе́ніе, Се́й мо́й Бо́гъ, и просла́влю Его́, Бо́гъ отца́ моего́, и вознесу́ Его́: сла́вно бо просла́вися.

Пѣ́снь 8.

Ирмо́съ: Изба́вителю всѣ́хъ [Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода].

Мимоходя́ житія́ непостоя́нное, въ разбо́йническія по́мыслы впадо́хъ и, уя́звленъ, возсмердѣ́хся; Врачу́ неду́гующихъ, да́ждь ми́ ру́ку, святы́хъ Твои́хъ всѣ́хъ мольба́ми.

Лю́таго грѣха́ бу́ря мое́ помышле́ніе смуща́етъ; я́коже Петра́ спаси́ мя́, Іису́се, пою́ща: вся́ дѣла́, благослови́те, по́йте Го́спода.

Воздержа́ніемъ стра́сти умертви́мъ, поще́ніемъ ду́хъ впери́мъ къ небеси́ и воззове́мъ умиле́ніемъ се́рдца: согрѣши́хомъ Ти́, Бо́же, я́ко Ще́дрый, прости́.

Богоро́диченъ: Во чре́во Твое́ всели́вся Вы́шній, небе́съ ши́ршую Тя́ показа́ и предста́тельство необори́мое вопію́щихъ, Дѣ́во: вся́ дѣла́, благослови́те, по́йте Го́спода.

Иный.

Ирмо́съ: Его́же во́инства [небе́сная сла́вятъ, и трепе́щутъ херуви́ми и серафи́ми, вся́ко дыха́ніе и тва́рь, по́йте, благослови́те и превозноси́те во вся́ вѣ́ки].

Страсте́й мучи́тельствомъ, Го́споди, не порабоще́ну ду́шу мою́ покажи́, да свобо́дно творя́ во́лю Твою́, ра́дуюся и сла́влю держа́ву Твою́ во вѣ́ки.

Иса́вово невоздержа́ніе возненави́ждь, душе́ моя́, и Іа́ковлимъ ревну́й до́брымъ дѣло́мъ, обольсти́ веліа́ра воздержа́ніемъ, обогати́ся боже́ственными и воспо́й во вѣ́ки.

Благослови́мъ Отца́, и Сы́на, и Свята́го Ду́ха, Го́спода.

Тро́иченъ: Еди́наго Бо́га по Существу́ почита́ю, Три́ Ѵпоста́си пою́ опредѣли́тельно, и́ныя, но не и́накія. Поне́же Божество́ Еди́но и Еди́на въ Тріе́хъ держа́ва: и́бо Оте́цъ, Сы́нъ и Ду́хъ.

[И ны́нѣ,] богоро́диченъ: Изъ свѣ́тлыя проше́дъ утро́бы Твоея́, я́ко Жени́хъ отъ черто́га, возсія́ Христо́съ, Свѣ́тъ су́щимъ во тмѣ́ вели́кій, и́бо Пра́вды Со́лнце облиста́въ, просвѣти́, Чи́стая, мíръ.

Сла́ва Тебѣ́, Бо́же на́шъ, сла́ва Тебѣ́.

Во́ду пія́й, никто́же обезу́мися, яви́ся же Но́е на́гъ, вино́мъ иску́шся; сѣ́мена же зло́бы Ло́тъ отсю́ду ражда́етъ. Бѣ́гай, о душе́ моя́, си́хъ подража́нія, Христа́ пою́щи.

[Хва́лимъ, благослови́мъ, покланя́емся Го́сподеви, пою́ще и превознося́ще во вся́ вѣ́ки].

Ирмо́съ: Его́же во́инства небе́сная сла́вятъ, и трепе́щутъ херуви́ми и серафи́ми, вся́ко дыха́ніе и тва́рь, по́йте, благослови́те и превозноси́те во вся́ вѣ́ки.

Пѣ́снь 9.

Ирмо́съ: Ева у́бо неду́гомъ [преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ].

Пости́мся отъ страсте́й гнѣ́ва, наслади́мся любве́ нело́жныя, напита́имъ убо́гія хлѣ́бомъ, Боже́ственною пита́еми благода́тію, и слеза́ми сле́зы угаси́мъ бу́дущаго изрече́нія.

Окая́нная душе́, воздохни́, сѣ́туй, покая́нія о́бразы покажи́, ны́нѣ при две́рехъ де́нь, Судя́й нелицемѣ́рно сѣди́тъ, кому́ждо отдава́я досто́йная содѣ́янныхъ, я́коже пи́сано е́сть.

Не стяжа́хъ дѣя́ній благи́хъ, оскверни́хъ ри́зу, ю́же прія́хъ, боже́ственнаго креще́нія одѣя́ніе, во тмѣ́ невѣ́дѣнія хожду́: свѣ́томъ мя́ лица́ Твоего́, Го́споди, отча́яна ны́нѣ испра́ви.

Богоро́диченъ: Марíе, Госпоже́ вся́ческихъ, вся́кимъ мя́ грѣхо́мъ порабоще́на Ты́ свободи́, Дѣ́во, Свободи́теля ду́шъ на́шихъ поро́ждшая: Ты́ бо па́че сло́ва родила́ еси́ существи́тельную Бла́гость.

Иный.

Ирмо́съ: Безсѣ́меннаго зача́тія [рождество́ несказа́нное, Ма́тере Безму́жныя нетлѣ́ненъ Пло́дъ: Бо́жіе бо рожде́ніе обновля́етъ естества́. Тѣ́мже Тя́ вси́ ро́ди, я́ко Богоневѣ́стную Ма́терь, правосла́вно велича́емъ].

Ны́нѣ злопостра́ждимъ, я́ко во́ини Христо́вы: ели́ко бо ели́ко вре́мя мимохо́дитъ, вѣнцы́ плету́тся подвиза́ющимся, я́же возда́стъ Христо́съ, егда́ пріи́детъ со сла́вою а́нгельскою суди́ти все́й земли́.

Ве́сь уязви́хся, ве́сь, Христе́ мо́й, острупи́хся, исцѣли́ моя́ гно́йныя я́звы, страстна́я угрызе́нія су́щая отъ грѣха́, да услы́шу, я́ко прокаже́нный, гла́съ Тво́й святы́й: я́ко хощу́, очи́стися!

[Сла́ва,] тро́иченъ: Еди́наго Единороди́телю, Единоро́днаго Сы́на, Отче; и Еди́не Еди́наго, Свѣ́те, Свѣ́та сія́ніе; и Еди́ный, Еди́не, Еди́наго Бо́га, Святы́й Ду́ше, Го́спода Госпо́дь, вои́стинну Сы́й. О, Тро́ице Еди́нице Свята́я, спаси́ мя́ богосло́вяща Тя́.

[И ны́нѣ,] богоро́диченъ: Чу́до Рождества́ Твоего́ ужаса́етъ мя́, Всенепоро́чная, ка́ко зачина́еши безсѣ́менно Непостижи́маго? Рцы́, ка́ко дѣ́вствуеши, ро́ждши, я́ко Ма́ти? — Еже па́че естества́ вѣ́рою пріе́мь, Рожде́нному поклони́ся, ели́ка хо́щетъ бо и мо́жетъ.

Сла́ва Тебѣ́, Бо́же на́шъ, сла́ва Тебѣ́.

По́стъ Моисе́я Богови́дца содѣ́ла, Илію́ дре́вле пла́меннаго воза́тая, Па́вла же, душе́ моя́, стра́шнаго неботе́чника. Тѣ́мже пости́мся отъ зло́бъ и на высоту́ безстра́стія и мы́ восхи́тимся.

Ирмо́съ: Безсѣ́меннаго зача́тія рождество́ несказа́нное, Ма́тере Безму́жныя нетлѣ́ненъ Пло́дъ: Бо́жіе бо рожде́ніе обновля́етъ естества́. Тѣ́мже Тя́ вси́ ро́ди, я́ко Богоневѣ́стную Ма́терь, правосла́вно велича́емъ.

Свѣти́ленъ гла́са.

На стихо́внѣ стихи́ра самогла́сна, гла́съ 5:

Ди́вное ору́жіе — моли́тва и по́стъ: се́й Моисе́я законописа́теля показа́ и Илію́ въ же́ртвахъ ревни́теля. Въ то́мъ пребыва́юще, вѣ́рніи, Спа́су возопіи́мъ: Тебѣ́ еди́ному согрѣши́хомъ, поми́луй на́съ. [Два́жды.]

Му́чениченъ: Благослове́нное во́инство Царя́ Небе́снаго, а́ще бо и земноро́дніи бя́ху страстоте́рпцы, но а́нгельскій са́нъ потща́шася дости́гнути, о тѣлесѣ́хъ небре́гше и страстьми́ безпло́тныхъ удосто́ившеся че́сти, моли́твами и́хъ, Го́споди, спаси́ ду́ши на́ша.

Сла́ва, и ны́нѣ, богоро́диченъ.

Тебѣ́ мо́лимся, я́ко Бо́жіи Ма́тери, Благослове́нная, моли́ о спасе́ніи ду́шъ на́шихъ.


НА 6-МЪ ЧАСѢ,
Тропа́рь проро́чества, гла́съ 5:

Созда́вый на еди́нѣ сердца́ на́ша, помяни́, я́ко пе́рсть есмы́, не осуди́ на́съ въ преиспо́днихъ земли́, Безгрѣ́шне.

Проки́менъ, псало́мъ 21-й, гла́съ 6: Боя́щіися Го́спода,* восхвали́те Его́. Сти́хъ: Бо́же, Бо́же мо́й, вонми́ ми́, вску́ю оста́вилъ мя́ еси́?

Проро́чества Иса́іина чте́ніе. [Глава́ 4.]

Та́ко глаго́летъ Госпо́дь: Въ де́нь о́ный возсія́етъ Бо́гъ въ совѣ́тѣ со сла́вою на земли́, е́же вознести́ и просла́вити оста́нокъ Изра́иля. И бу́детъ оста́нокъ въ Сіо́нѣ и оста́нокъ во Іерусали́мѣ: свя́ти нареку́тся вси́ напи́санніи въ жи́знь во Іерусали́мѣ, я́ко отмы́етъ Госпо́дь скве́рну сыно́въ и дще́рей Сіо́нскихъ и кро́вь Іерусали́мску очи́ститъ отъ среды́ и́хъ ду́хомъ суда́ и ду́хомъ зно́я. И пріи́детъ Госпо́дь, и бу́детъ все́ мѣ́сто горы́ Сіо́ни, и вся́, я́же о́крестъ ея́, осѣни́тъ о́блакъ во дни́, и я́ко ды́ма и свѣ́та о́гненна горя́ща въ нощи́, все́ю сла́вою покры́ется. И бу́детъ въ сѣ́нь отъ зно́я, и въ покро́въ и въ сокрове́ніе отъ же́стости и дождя́. Воспою́ ны́нѣ Возлю́бленному пѣ́снь Возлю́бленнаго Моего́ виногра́ду Моему́. Виногра́дъ бы́сть Возлю́бленному въ ро́зѣ, на мѣ́стѣ ту́чнѣ. И огражде́ніемъ огради́хъ, и окопа́хъ, и насади́хъ ло́зу избра́нну; и созда́хъ сто́лпъ посредѣ́ его́, и предточи́ліе ископа́хъ въ не́мъ, и жда́хъ, да сотвори́тъ гро́здіе, и сотвори́ те́рніе. И ны́нѣ, живу́щіи во Іерусали́мѣ и человѣ́че Іу́динъ, суди́те между́ Мно́ю и виногра́домъ Мои́мъ. Что́ сотворю́ еще́ виногра́ду Моему́ и не сотвори́хъ ему́? Зане́же жда́хъ, да сотвори́тъ гро́здіе, сотвори́ же те́рніе. Ны́нѣ у́бо возвѣщу́ ва́мъ, что́ Азъ сотворю́ виногра́ду Моему́: отыму́ огражде́ніе его́, и бу́детъ въ разграбле́ніе; и разорю́ стѣ́ну его́, и бу́детъ въ попра́ніе. И оста́влю виногра́дъ Мо́й, и ктому́ не обрѣ́жется, ниже́ покопа́ется, и взы́детъ на не́мъ, я́коже на ляди́нѣ, те́рніе, и облако́мъ заповѣ́мъ е́же не одожди́ти на него́ дождя́. Виногра́дъ бо Го́спода Савао́ѳа до́мъ Изра́илевъ е́сть, и человѣ́къ Іу́динъ — но́вый са́дъ возлю́бленный.

Проки́менъ, псало́мъ 22-й, гла́съ 6: Же́злъ Тво́й и па́лица Твоя́,* та́ мя́ утѣ́шиста. Сти́хъ: Госпо́дь пасе́тъ мя́ и ничто́же мя́ лиши́тъ.

Примѣчаніе:
[1] См., напр., «Постная Тріодь». М., 1650., л. 236.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 129 – 135.

Служба въ недѣлю 1-ю Великаго поста // Къ оглавленію Постной Тріоди // Служба во вторникъ 2-й недѣли поста


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.