Церковный календарь
Новости


2018-05-25 / russportal
Н. И. Ульяновъ. Замолчанный Марксъ (1969)
2018-05-25 / russportal
Дѣянія 2-го Всезарубежн. Собора РПЦЗ 1938 г. Докладъ (2-й) К. Н. Николаева (1939)
2018-05-24 / russportal
Cвт. Іоаннъ, архіеп. Шанхайскій. Святыя Евѳимія и Ольга (1994)
2018-05-24 / russportal
Cвт. Іоаннъ, архіеп. Шанхайскій. Преп. Серафимъ Саровскій (1994)
2018-05-24 / russportal
Прав. Іоаннъ Кронштадтскій. "Новыя грозныя слова". Слово 15 (37) (1908)
2018-05-24 / russportal
Прав. Іоаннъ Кронштадтскій. "Новыя грозныя слова". Слово 14 (36) (1908)
2018-05-23 / russportal
И. А. Родіоновъ. Повѣсть "Жертвы вечернія". Глава 50-я (1922)
2018-05-23 / russportal
И. А. Родіоновъ. Повѣсть "Жертвы вечернія". Глава 49-я (1922)
2018-05-23 / russportal
Н. А. Соколовъ. "Убійство Царской Семьи". Глава 6-я (1925)
2018-05-23 / russportal
Н. А. Соколовъ. "Убійство Царской Семьи". Глава 5-я (1925)
2018-05-23 / russportal
Cвт. Іоаннъ Шанхайскій. Разслабленный, самарянка и слѣпорожденный (1994)
2018-05-23 / russportal
Cвт. Іоаннъ, архіеп. Шанхайскій. Святые Кириллъ и Меѳодій (1994)
2018-05-23 / russportal
Прав. Іоаннъ Кронштадтскій. "Моя жизнь во Христѣ". Часть 1-я (стр. 71-80) (1957)
2018-05-23 / russportal
Прав. Іоаннъ Кронштадтскій. "Моя жизнь во Христѣ". Часть 1-я (стр. 61-70) (1957)
2018-05-21 / russportal
И. А. Родіоновъ. Повѣсть "Жертвы вечернія". Глава 48-я (1922)
2018-05-21 / russportal
И. А. Родіоновъ. Повѣсть "Жертвы вечернія". Глава 47-я (1922)
Новости въ видѣ
RSS-канала: .
Сегодня - суббота, 26 мая 2018 г. Сейчасъ на порталѣ посѣтителей - 9.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВО ВТОРНИКЪ ВТОРЫЯ СЕДМИЦЫ ВЕЛИКАГО ПОСТА.

ВЪ ПОНЕДѢЛЬНИКЪ ВЕЧЕРА,
Во свѣти́льничное, по предначина́тельномъ псалмѣ́ стихосло́вимъ каѳи́сму: Ко Го́споду...
На Го́споди воззва́хъ.., поста́вимъ стихо́въ 6 и пое́мъ стихи́ры подо́бны тріо́ди, творе́ніе господи́на Іо́сифа, гла́съ 8. Подо́бенъ: Что́ ва́съ нарече́мъ.

Кому́ уподо́билася еси́, окая́нная, лѣня́щися, о душе́, и не творя́щи до́брая, но лю́бящи при́сно въ злы́хъ пребыва́ніе? Су́дъ при две́рехъ, пока́йся, посто́мъ и моли́твою очи́стися и Влады́цѣ твоему́ возопíй: согрѣши́хъ Ти́, прости́, я́ко Благоутро́бенъ, и исправле́ніе мнѣ́ да́руй.

Имѣ́яй бла́гости пучи́ну, пучи́ны мои́хъ грѣхо́въ лука́выя изсуши́, Христе́, я́ко безгрѣ́шный Бо́гъ, и да́ждь се́рдцу моему́ умиле́ніе, пото́ки беззако́нія отъе́млющее, да пою́ и сла́влю Твое́ благоутро́біе неизрече́нное, Долготерпѣли́ве Благодѣ́телю ду́шъ на́шихъ.

Ина стихи́ра, господи́на Ѳео́дора, гла́съ то́йже. Подо́бенъ: Во Еде́мѣ ра́й.

Приведы́й и ны́нѣ на́съ, Бо́же, вре́мене обше́ствіе всечестна́го поста́ соверши́ти, и дарова́вый на́мъ во свято́е по́прище вторы́я седми́цы вни́ти, Са́мъ сподо́би, Го́споди, и къ бу́дущему благотещи́, тѣ́ло и ду́шу на́шу и благодѣ́тельствуя и укрѣпля́я, я́ко да дости́гнемъ, соверши́вше тече́ніе му́жески, въ Госпо́дскій де́нь Воскресе́нія Твоего́ вси́ въ ра́дости, и да вѣнцы́ нося́ще, непреста́нно Тя́ похва́лимъ.

И мине́и 3. Сла́ва, и ны́нѣ, богоро́диченъ.

Проки́менъ, псало́мъ 23-й, гла́съ 1: Госпо́дь крѣ́покъ и си́ленъ,* Госпо́дь си́ленъ въ бра́ни. Сти́хъ: Госпо́дня земля́ и исполне́ніе ея́.

Бытія́ чте́ніе. [Глава́ 3.]

Сотвори́ Госпо́дь Бо́гъ Ада́му и женѣ́ его́ ри́зы ко́жаны и облече́ и́хъ. И рече́ Бо́гъ: се́ Ада́мъ бы́сть, я́ко еди́нъ отъ На́съ, е́же разумѣ́ти до́брое и лука́вое; и ны́нѣ да не когда́ простре́тъ ру́ку свою́, и во́зметъ отъ дре́ва жи́зни, и снѣ́стъ, и жи́въ бу́детъ во вѣ́къ. И изгна́ его́ Госпо́дь Бо́гъ изъ рая́ сла́дости дѣ́лати зе́млю, отъ нея́же взя́тъ бы́сть. И изри́не Ада́ма, и всели́ его́ пря́мо рая́ сла́дости, и приста́ви херуви́ма и пла́менное ору́жіе обраща́емое храни́ти пу́ть дре́ва жи́зни. Ада́мъ же позна́ Еву, жену́ свою́, и заче́нши, роди́ Ка́ина и рече́: стяжа́хъ человѣ́ка Бо́гомъ. И приложи́ роди́ти бра́та его́, Авеля. И бы́сть Авель па́стырь ове́цъ, Ка́инъ же бѣ́ дѣ́лаяй зе́млю. И бы́сть по дне́хъ: принесе́ Ка́инъ отъ плодо́въ земли́ же́ртву Бо́гу, и Авель принесе́ и то́й отъ перворо́дныхъ ове́цъ свои́хъ и отъ ту́ковъ и́хъ. И призрѣ́ Бо́гъ на Авеля и на да́ры его́, на Ка́ина же и на же́ртвы его́ не вня́тъ. И опеча́лися Ка́инъ зѣло́, и испаде́ лице́ его́. И рече́ Госпо́дь Бо́гъ Ка́ину: вску́ю приско́рбенъ бы́лъ еси́? и вску́ю испаде́ лице́ твое́? Еда́ а́ще пра́во прине́слъ еси́, пра́во же не раздѣли́лъ еси́? не согрѣши́лъ ли еси́? умо́лкни: къ тебѣ́ обраще́ніе его́, и ты́ тѣ́мъ облада́еши.

Проки́менъ, псало́мъ 24-й, гла́съ 6: При́зри на мя́* и поми́луй мя́. Сти́хъ: Къ Тебѣ́, Го́споди, воздвиго́хъ ду́шу мою́.

При́тчей чте́ніе. [Глава́ 3.]

Госпо́дь го́рдымъ проти́вится, смире́ннымъ же дае́тъ благода́ть. Сла́ву прему́дріи наслѣ́дятъ, нечести́віи же вознесо́ша безче́стіе. Послу́шайте, дѣ́ти, наказа́нія о́тча и внемли́те разумѣ́ти помышле́ніе, да́ръ бо благíй да́рую ва́мъ, моего́ зако́на не оставля́йте. Сы́нъ бо бы́хъ и а́зъ отцу́ послушли́вый и люби́мый предъ лице́мъ ма́тере, иже глаго́лаша и учи́ша мя́: «да утвержда́ется на́ше сло́во въ твое́мъ се́рдцѣ, храни́ за́повѣди, не забыва́й. Стяжи́ прему́дрость, стяжи́ ра́зумъ, не забу́ди, ниже́ пре́зри рече́нія мои́хъ у́стъ, ниже́ уклони́ся отъ глаго́лъ у́стъ мои́хъ. Не оста́ви ея́, и и́мется тебе́; возжелѣ́й ея́, и соблюде́тъ тя́. Нача́ло прему́дрости — стяжа́ти прему́дрость; и во все́мъ стяжа́ніи твое́мъ стяжи́ ра́зумъ. Огради́ ю́, и вознесе́тъ тя́; почти́ ю́, да тя́ обы́метъ; да да́стъ главѣ́ твое́й вѣне́цъ благода́тей, вѣнце́мъ же сла́дости защити́тъ тя́». Слы́ши, сы́не, и пріими́ моя́ словеса́, и умно́жатся лѣ́та живота́ твоего́, да ти́ бу́дутъ мно́зи пути́ житія́. Путе́мъ бо прему́дрости учу́ тя́, наставля́ю же тебе́ на тече́нія пра́вая. Аще бо хо́диши, не за́пнутся стопы́ твоя́; а́ще ли тече́ши, не утруди́шися. Ими́ся моего́ наказа́нія, не оста́ви, но сохрани́ е́ себѣ́ жи́знь твою́. На пути́ нечести́выхъ не иди́, ниже́ возревну́й путе́мъ законопресту́пныхъ. На не́мже а́ще мѣ́стѣ во́я соберу́тъ, не иди́ та́мо, уклони́ся же отъ ни́хъ и измѣни́: не у́снутъ бо, а́ще зла́ не сотворя́тъ; оты́мется со́нъ отъ ни́хъ, и не спя́тъ. Тíи бо пита́ются пи́щею нече́стія, вино́мъ же законопресту́пнымъ упива́ются. Путіе́ же пра́ведныхъ подо́бнѣ свѣ́ту свѣ́тятся: предхо́дятъ и просвѣща́ютъ, до́ндеже испра́вится де́нь. Путіе́ же нечести́выхъ те́мни, не вѣ́дятъ, ка́ко претыка́ются. Сы́не, мои́мъ глаго́ломъ внима́й, къ мои́мъ же словесе́мъ прилага́й у́хо твое́. Да не оскудѣ́ютъ ти́ исто́чницы твои́, храни́ я́ въ се́рдцѣ твое́мъ: живо́тъ бо су́ть всѣ́мъ обрѣта́ющимъ я́ и все́й пло́ти и́хъ исцѣле́ніе.

На стихо́внѣ самогла́сенъ дне́, гла́съ 3, два́жды:

Духо́внымъ посто́мъ пости́мся, расто́ргнемъ вся́кое развраще́ніе, оста́немся же и собла́зновъ грѣха́, отпу́стимъ и бра́тіи до́лги, да и на́мъ оста́вятся прегрѣше́нія на́ша. Та́ко бо возопи́ти возмо́жемъ: да испра́вится моли́тва на́ша, я́ко кади́ло предъ Тобо́ю, Го́споди.

Му́чениченъ: Проро́цы, и апо́столи Христо́вы, и му́ченицы научи́ша пѣ́ти Тро́ицу Единосу́щную, и просвѣти́ша язы́ки заблу́ждшія, и о́бщники а́нгеловъ сотвори́ша сы́ны человѣ́ческія.

Сла́ва, и ны́нѣ, богоро́диченъ, гла́съ то́йже:

До конца́ убо́гихъ Твои́хъ не забу́ди, Влады́чице, но Твои́ми моли́твами бу́дущаго на́съ свободи́ преще́нія, и настоя́щаго вре́да, и гнѣ́ва Госпо́дня исхити́, Богоро́дице, Твоя́ рабы́.

[Зри́:] Вѣ́домо же да е́сть, я́ко отъ сего́ понедѣ́льника вторы́я недѣ́ли поста́ выпѣва́ются на повече́ріяхъ кано́ны, и́же въ мине́и, иму́щихъ прилучи́тися святы́хъ отъ суббо́ты Ла́заревы до недѣ́ли Ѳомины́, съ кано́ны Богоро́дичными. Пре́жде пое́тся кано́нъ Богоро́дицы и по не́мъ въ мине́и. По 3-й пѣ́сни конда́къ и сѣда́ленъ въ мине́и, а по 6-й пѣ́сни сѣда́ленъ Богоро́дицы. Послѣди́ же кано́на стихи́ры въ мине́и.


ВО ВТОРНИКЪ 2-Я СЕДМИЦЫ, НА УТРЕНИ,
Тро́ичны.

По 1-мъ стихосло́віи сѣда́льны умили́тельныя осмогла́сника съ богоро́дичны.

По 2-мъ же стихосло́віи глаго́лемъ насто́ящія сѣда́льны, гла́съ 8. Подо́бенъ: Воскре́слъ еси́.

Стра́сти уздо́ю непоро́чнаго поста́ удержава́юще, у́мъ къ честны́мъ Боговидѣ́ніемъ вѣ́рою соверше́ннѣйшею впери́ти вси́ потщи́мся, я́ко да земну́ю житія́ сла́дость пре́зримъ и небе́сную получи́мъ жи́знь и Боже́ственное сія́ніе.

Сла́ва, то́йже. И ны́нѣ, богоро́диченъ:

Въ пучи́ну лю́тую впадо́хъ уны́нія, отъ мно́жества лука́выхъ и беззако́нныхъ мои́хъ дѣ́лъ пріидо́хъ въ недоумѣ́ніе и неча́яніемъ ны́нѣ содержи́мь е́смь. Влады́чице Богоро́дице, Ты́ мя́ спаси́, Ты́ помози́: грѣ́шниковъ бо Ты́ еси́ умилостивле́ніе и очище́ніе спаси́тельное.

По 3-мъ стихосло́віи сѣда́ленъ, гла́съ 8. Подо́бенъ: Па́стырская свирѣ́ль.

Предложи́въ та́йную по́стъ трапе́зу, поуща́етъ на́мъ бога́тно насы́титися: яди́мъ, я́коже бра́шно, присноживо́тныя да́ры Ду́ха; піи́мъ, я́коже питіе́, сле́зъ струи́ богото́чныя; и возвесели́вшеся, хвалу́ Бо́гу непреста́нно принесе́мъ.

Сла́ва, то́йже. И ны́нѣ, богоро́диченъ:

Отъ вся́каго преще́нія и озлобле́нія человѣ́ческаго спаси́ на́съ, Всесвята́я Дѣ́во: Тя́ бо и́мамы покро́въ и предста́тельство, прибѣга́ющіи къ Тебѣ́, Богома́ти, и къ рожде́нному изъ Тебе́ Бо́гу на́шему, Его́же моли́ изба́витися на́мъ отъ бѣ́дъ и скорбе́й.

Кано́нъ въ мине́и и трипѣ́снецъ господи́на Іо́сифа. И стихосло́вится пѣ́снь Псалти́ря.

Пѣ́снь 2, гла́съ 8.

Ирмо́съ: Ви́дите, ви́дите, я́ко Азъ е́смь Бо́гъ ва́шъ, пре́жде вѣ́къ рожде́нный отъ Отца́, и отъ Дѣ́вы въ послѣ́дняя безъ му́жа заче́ншійся, и разруши́вый грѣ́хъ пра́отца Ада́ма, я́ко Человѣколю́бецъ.

Воздохни́, прослези́ся, душе́, обрати́ся, пока́йся: прибли́жися де́нь, при две́рехъ Судія́, ко отвѣ́ту гото́вися и возопíй: согрѣши́хъ Ти́, Ще́дрый, Ми́лостиве Благíй, Ты́ мя́ уще́дри.

Несы́тость грѣха́, душе́ моя́, возненави́ждь всегуби́тельную, наслади́ся сы́тостію поста́ прилѣ́жно, спаси́тельныя за́повѣди снѣ́дь сотвори́, наслажде́ніе исхода́тайствующія вѣ́чныхъ бла́гъ вѣ́рою.

Ангели, си́лы, нача́ла, арха́нгели, госпо́дьства, престо́ли, вла́сти, херуви́ми и серафи́ми, Благода́вца и Бо́га моли́те проще́ніе долго́въ и страсте́й премѣне́ніе дарова́ти на́мъ.

Богоро́диченъ: Еди́на ро́ждшая Безнача́льное Сло́во, Всенепоро́чная, изъ Тебе́ воплоще́ннаго непрело́жнаго, е́же бѣ́, пребы́вшая Дѣ́вою по рождествѣ́, Безневѣ́стная, моли́ о всѣ́хъ изба́витися отъ тли́ жи́зни на́шей.

Иный, господи́на Ѳео́дора, гла́съ то́йже.

Ирмо́съ: Ви́дите, ви́дите, [я́ко Азъ е́смь Бо́гъ ва́шъ, освяти́вый нача́токъ ва́мъ прія́тенъ, отъ дне́й всего́ лѣ́та одеся́тствованіе, и сіе́ да́въ лю́демъ Мои́мъ во избавле́ніе страсте́й, во спасе́нія нача́ло].

Уви́дѣхомъ, позна́хомъ, я́ко бла́го на́мъ въ покая́ніе вре́мя, е́же опредѣли́лъ еси́; но въ се́мъ пріими́, Бо́же, моли́твы на́ша и испра́ви предъ Тобо́ю, Ще́дре, я́ко кади́ло до́брое, я́ко же́ртву прія́тную.

Ужаса́юся и бою́ся, помышля́я, ели́ка согрѣши́хъ: ка́ко Тя́ усря́щу? ка́ко явлю́ся Тебѣ́, Стра́шне? ка́ко же предста́ну неумы́тному Твоему́ суди́щу? Тѣ́мже пощади́ мя́, Ще́дре, въ ча́съ, егда́ и́маши суди́ти все́й земли́.

[Сла́ва,] тро́иченъ: Пресоверше́нная Еди́нице, Пребоже́ственная, Тріѵпоста́сная: Нерожде́нне Отче, и Сы́не Единоро́дне, Ду́ше отъ Отца́ исходя́й, Сы́номъ же явля́яйся, — Существо́ еди́но и Естество́, Госпо́дьство, Ца́рство, спаси́ всѣ́хъ на́съ.

[И ны́нѣ,] богоро́диченъ: Неизглаго́ланное чу́до Твоего́ Рождества́, Ма́ти Дѣ́во: ка́ко бо и ражда́еши, и Чиста́ еси́ въ то́мже? Ка́ко Отроча́ ражда́еши, и не вѣ́си иску́са му́жеска отню́дъ? — Якоже вѣ́сть па́че естества́ отъ Мене́ новолѣ́пно Сло́во Бо́жіе ро́ждшееся.

Сла́ва Тебѣ́, Бо́же на́шъ, сла́ва Тебѣ́.

Ты́ ниневи́тяны пока́явшіяся и пости́вшіяся отъ запреще́ннаго изве́лъ еси́ гнѣ́ва, содо́мляны же огне́мъ поже́глъ еси́ въ пресыще́ніи блудя́щія, но изба́ви мя́, Христе́, преще́нія и́хъ.

Ирмо́съ: Ви́дите, ви́дите, я́ко Азъ е́смь Бо́гъ ва́шъ, освяти́вый нача́токъ ва́мъ прія́тенъ, отъ дне́й всего́ лѣ́та одеся́тствованіе, и сіе́ да́въ лю́демъ Мои́мъ во избавле́ніе страсте́й, во спасе́нія нача́ло.

Пѣ́снь 8.

Ирмо́съ: Богоглаго́ливіи о́троцы [въ пещи́, со огне́мъ пла́мень попира́юще, поя́ху: благослови́те, дѣла́ Госпо́дня, Го́спода].

Оправда́вый воздохну́вша мытаря́, уще́дривый блудни́цу, отъ се́рдца слези́вшую, спаси́, уще́дри, Спа́се, ду́ши пою́щихъ Тя́.

Плодоно́симъ дѣя́нія добродѣ́тельная посто́мъ Го́сподеви, и вре́дныхъ отдаля́ющеся помышле́ній, да боже́ственную сла́дость получи́мъ.

Ангельстіи ли́цы мо́лятъ Тя́, апо́стольстіи собо́ри и му́чениковъ чи́ни, Іису́се, лю́демъ Твои́мъ проще́ніе да́руй.

Богоро́диченъ: Несѣко́мую Го́ру, Дѣ́ву, свѣтоно́сный Свѣ́щникъ, благопрехо́дную Лѣ́ствицу, Бо́жіе Вмѣсти́лище, вѣ́рніи, ублажи́мъ.

Иный.

Ирмо́съ: На горѣ́ святѣ́й [просла́вльшася, и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки].

Въ наро́читый де́нь воздержа́нія пріиди́те вси́, востру́бимъ въ пѣ́снехъ, и я́ко сла́достію боже́ственною учрежда́ющеся, пѣ́сньми пои́мъ Го́спода и превозно́симъ во вся́ вѣ́ки.

Кто́ снѣда́етъ человѣ́ка Бо́жія дре́вле? — Звѣ́рь ле́въ, отъ ле́сти проро́чи преслуша́нія снѣ́ди пріи́мша. Блюди́ у́бо, душе́ моя́, да тя́ не прельсти́тъ чревобѣ́сія змíй.

Благослови́мъ Отца́, и Сы́на, и Свята́го Ду́ха, Го́спода.

Тро́иченъ: Яко Еди́ницу Существо́мъ пою́ Тя́, я́ко Тро́ицу Ли́цы Тя́ чту́: Отче, и Сы́не, и Ду́ше Пресвяты́й, безнача́льную держа́ву Твоего́ Ца́рствія сла́влю во вѣ́ки.

[И ны́нѣ,] богоро́диченъ: Ты́ гора́ Бо́жія яви́лася еси́, Богоро́дице, въ Ню́же Христо́съ всели́вся, боже́ственныя хра́мы содѣ́ла пою́щія: Го́спода по́йте и превозноси́те во вся́ вѣ́ки.

Сла́ва Тебѣ́, Бо́же на́шъ, сла́ва Тебѣ́.

По́стъ, я́ко храни́теля чистоты́ и ма́терь безстра́стія почита́юще, пріиди́те, лю́діе, отъ любве́ цѣлу́имъ, Го́спода пою́ще и превознося́ще во вся́ вѣ́ки.

Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].

Ирмо́съ: На горѣ́ святѣ́й просла́вльшася, и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Пѣ́снь 9.

Ирмо́съ: Проявле́нное на горѣ́ [законополо́жнику во огни́ и купинѣ́, Рождество́ Приснодѣ́вы въ на́ше, вѣ́рныхъ, спасе́ніе пѣ́сньми немо́лчными велича́емъ].

До́брый по́стъ, утучня́ющій се́рдце, кла́съ зрѣ́лый добродѣ́телей боже́ственно прозяба́етъ, его́же возлю́бимъ, во святы́хъ дне́хъ освяще́ніе пріе́млюще.

Во грѣсѣ́хъ мно́гихъ оскверне́на, уя́звена зря́ и осужде́на, Ми́лостиве, Твое́ю ми́лостію уще́дривъ, спаси́ мя́ моли́твами святы́хъ Твои́хъ.

Увы́, всеокая́нная душе́, ка́ко отвѣща́еши? кíй стра́хъ тя́ пріи́метъ, Судіи́ сѣдя́щу, тма́мъ предстоя́щимъ а́нгеловъ? Потщи́ся у́бо, пре́жде конца́ пока́йся.

Богоро́диченъ: Ца́рскую колесни́цу, свѣ́тлый о́блакъ, го́ру ту́чную, го́ру усыре́нную, Браконеиску́сная, мо́лимъ Тя́, Дѣ́во, исцѣли́ стра́сти ду́шъ на́шихъ.

[Иный.] Ирмо́съ то́йже.

Истиннымъ посто́мъ пости́мся Го́сподеви, я́ко бра́шенъ воздержа́щеся, язы́ка, я́рости, и лжи́, и вся́кія ины́я стра́сти очужди́мся, да чи́стѣ Па́сху у́зримъ.

Ты́ Самуи́ла процвѣти́лъ еси́ пло́дъ, по́сте; ты́ воспита́лъ еси́ Сампсо́на вели́каго хра́бра; ты́ соверша́еши свяще́нники и проро́ки: ты́ на́съ освяти́, по́сте честны́й.

Сла́ва, тро́иченъ: Трисвѣ́тлое, Го́споди, Твоего́ Единонача́лія свѣ́тлыми сія́нми во у́мъ на́шъ облиста́й, отъ пре́лести многообра́зныя обраща́тися на́мъ къ соедини́тельному обоже́нію.

[И ны́нѣ,] богоро́диченъ: Ты́ еси́, Богоро́дице, ору́жіе на́ше и стѣна́, Ты́ еси́ Заступле́ніе къ Тебѣ́ притека́ющихъ. Тя́ и ны́нѣ въ моли́тву дви́жемъ, да изба́вимся враго́въ на́шихъ.

Сла́ва Тебѣ́, Бо́же на́шъ, сла́ва Тебѣ́.

Иму́ще Ду́ха Свята́го, поста́ Гости́теля бога́тна, Того́ дарова́ній насы́тимся и бога́тно наслади́мся, Того́ воспѣва́юще, я́ко Бо́га на́шего.

Ирмо́съ: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы въ на́ше, вѣ́рныхъ, спасе́ніе пѣ́сньми немо́лчными велича́емъ.

Свѣти́ленъ гла́са.

На стихо́внѣ самогла́сенъ, гла́съ 5:

Вску́ю уныва́ющи, душе́ моя́, грѣху́ рабо́таеши? и вску́ю, немощна́ су́щи, ко Врачу́ не притека́еши? Се́ вре́мя благопрія́тное, се́ спасе́нія ны́нѣ де́нь и́стинный: воста́ни, омы́й твое́ лице́ покая́нія слеза́ми, и еле́емъ благотворе́нія свѣщу́ просвѣти́, я́ко да обря́щеши очище́ніе отъ Христа́ Бо́га и ве́лію ми́лость. [Два́жды.]

Му́чениченъ: Страстоте́рпцы Твои́, Го́споди, чи́ны а́нгельскія подража́вше, я́ко безпло́тни му́ки претерпѣ́ша, единомы́сленное упова́ніе иму́ще обѣща́нныхъ благи́хъ наслажде́ніе. Тѣ́хъ моли́твами, Христе́ Бо́же на́шъ, ми́ръ да́руй мíрови Твоему́ и душа́мъ на́шимъ ве́лію ми́лость.

Сла́ва, и ны́нѣ, богоро́диченъ:

Блажи́мъ Тя́, Богоро́дице Дѣ́во, и сла́вимъ Тя́ вѣ́рніи по до́лгу, гра́дъ непоколеби́мый, стѣ́ну необори́мую, тве́рдую предста́тельницу и прибѣ́жище ду́шъ на́шихъ.


НА 6-МЪ ЧАСѢ,
Тропа́рь проро́чества, гла́съ 6:

Досто́йно воспѣ́ти Тя́ не мо́жемъ, но про́симъ моля́щеся: не погуби́ на́съ со беззако́нми на́шими, благопремѣни́телю Го́споди.

Проки́менъ, псало́мъ 25-й, гла́съ 4: Го́споди, возлюби́хъ благолѣ́піе до́му Твоего́* и мѣ́сто селе́нія сла́вы Твоея́. Сти́хъ: Суди́ ми́, Го́споди, я́ко а́зъ незло́бою мое́ю ходи́хъ.

Проро́чества Иса́іина чте́ніе. [Глава́ 5.]

Та́ко глаго́летъ Госпо́дь: виногра́дъ Го́спода Савао́ѳа до́мъ Изра́илевъ е́сть и человѣ́къ Іу́динъ — но́вый са́дъ возлю́бленный. Жда́хъ, да сотвори́тъ су́дъ, сотвори́ же беззако́ніе, и не пра́вду, но во́пль. Го́ре совокупля́ющимъ до́мъ къ до́му и село́ къ селу́ приближа́ющимъ, да бли́жнему оты́мутъ что́. Еда́ вселите́ся еди́ни на земли́? Услы́шашася бо во ушеса́хъ Го́спода Савао́ѳа сія́: а́ще бо бу́дутъ до́мове мно́зи, въ запустѣ́ніе бу́дутъ вели́ціи и до́бріи и не бу́дутъ живу́щіи въ ни́хъ. Идѣ́же бо возорю́тъ де́сять супру́гъ воло́въ, сотвори́тъ корча́гъ еди́нъ, и сѣ́яй артава́съ ше́сть, сотвори́тъ мѣ́ры три́. Го́ре востаю́щимъ зау́тра и сике́ръ гоня́щимъ, жду́щимъ ве́чера: вино́ бо сожже́тъ я́. Съ гу́сльми бо и пѣвни́цами, и тимпа́ны и свирѣ́льми вино́ пію́тъ, на дѣла́ же Госпо́дня не взира́ютъ и дѣ́лъ руку́ Его́ не помышля́ютъ. Убо плѣне́ни бы́ша лю́діе Мои́, за е́же не вѣ́дѣти и́мъ Го́спода, и мно́жество бы́сть ме́ртвыхъ гла́да ра́ди и жа́жды водны́я. И разшири́ а́дъ ду́шу свою́ и разве́рзе уста́ своя́, е́же не преста́ти, и сни́дутъ сла́вніи, и вели́цыи, и бога́тіи, и губи́тели и́хъ, и веселя́йся въ не́мъ. И смири́тся человѣ́къ, и обезче́стится му́жъ, и о́чи высокогля́дающіи смиря́тся. И вознесе́тся Госпо́дь Савао́ѳъ въ судѣ́, и Бо́гъ Святы́й просла́вится въ пра́вдѣ.

Проки́менъ, псало́мъ 26-й, гла́съ 3: Госпо́дь просвѣще́ніе мое́* и Спаси́тель мо́й, кого́ убою́ся? Сти́хъ: Госпо́дь защи́титель живота́ моего́, отъ кого́ устрашу́ся?

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 135 – 139 об.

Служба въ понедѣльникъ 2-й недѣли поста // Къ оглавленію Постной Тріоди // Служба въ среду 2-й недѣли поста


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.