Церковный календарь
Новости


2018-11-16 / russportal
Прот. Михаилъ Помазанскій. Наше церковное правосознаніе (1976)
2018-11-16 / russportal
Прот. Михаилъ Помазанскій. Мысли о Православіи (1976)
2018-11-15 / russportal
Ген. П. Н. Красновъ. "За чертополохомъ". Часть 2-я. Глава 41-я (1922)
2018-11-15 / russportal
Ген. П. Н. Красновъ. "За чертополохомъ". Часть 2-я. Глава 40-я (1922)
2018-11-15 / russportal
Архіеп. Филаретъ (Гумилевскій). Слово (2-е) въ Великій пятокъ (1883)
2018-11-15 / russportal
Архіеп. Филаретъ (Гумилевскій). Слово (1-е) въ Великій пятокъ (1883)
2018-11-15 / russportal
Архіеп. Никонъ (Рклицкій). Православная Русь въ Канадѣ (1975)
2018-11-15 / russportal
Архіеп. Никонъ (Рклицкій). Тайна креста (1975)
2018-11-15 / russportal
Свт. Василій, еп. Кинешемскій. Бесѣда 6-я на Евангеліе отъ Марка (1996)
2018-11-15 / russportal
Свт. Василій, еп. Кинешемскій. Бесѣда 5-я на Евангеліе отъ Марка (1996)
2018-11-15 / russportal
Еп. Григорій (Граббе). Еще объ одной статьѣ (1996)
2018-11-15 / russportal
Еп. Григорій (Граббе). Отвѣтъ (2-й) архіеп. Іоанну Шаховскому (1996)
2018-11-14 / russportal
Ген. П. Н. Красновъ. "За чертополохомъ". Часть 2-я. Глава 39-я (1922)
2018-11-14 / russportal
Ген. П. Н. Красновъ. "За чертополохомъ". Часть 2-я. Глава 38-я (1922)
2018-11-14 / russportal
Архіеп. Филаретъ (Гумилевскій). Бесѣда (2-я) въ день Срѣтенія Господня (1883)
2018-11-14 / russportal
Архіеп. Филаретъ (Гумилевскій). Бесѣда (1-я) въ день Срѣтенія Господня (1883)
Новости въ видѣ
RSS-канала: .
Сегодня - пятница, 16 ноября 2018 г. Сейчасъ на порталѣ посѣтителей - 8.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ СРЕДУ ВТОРЫЯ СЕДМИЦЫ ВЕЛИКАГО ПОСТА.

ВО ВТОРНИКЪ ВЕЧЕРА,
Стихи́ры господи́на Іо́сифа, гла́съ 1. Подо́бенъ: Прехва́льніи му́ченицы.

На Крестѣ́ распросте́рлъ еси́, Христе́, пречи́стѣи ру́цѣ Твои́, собира́я концы́. Тѣ́мже зову́ Ти́: расточе́нный у́мъ мо́й собери́, плѣне́нный, влеко́мый страстьми́, и страда́ній Твои́хъ о́бщника мя́ покажи́, воздержа́ніемъ всего́ очище́на.

Дѣ́ти, обостри́въ иногда́ по́стъ, показа́ си́льнѣйшія, я́коже пи́шется, огня́ паля́щаго. Смире́нная душе́ моя́, пости́ся, вжига́ющи въ себѣ́ Влады́чнее возлюбле́ніе, и́мже бу́дущія возмо́жеши избѣжа́ти гее́нны и стра́сти попали́ти всепа́губныя.

Ина стихи́ра, господи́на Ѳео́дора, гла́съ 3. Подо́бенъ: До́бліи му́ченицы.

Вре́мя весе́лое поста́, тѣ́мже чистоты́ свѣтови́дныя и любве́ чи́стыя, моли́твы свѣтоза́рныя и вся́кія ины́я добродѣ́тели насы́тившеся бога́тно, свѣ́тло возопіи́мъ: Кре́сте Христо́въ всесвяты́й, возрасти́вый сла́дость жи́зни, всѣ́хъ чи́стымъ се́рдцемъ тебѣ́ поклони́тися сподо́би на́съ, очище́ніе на́мъ дая́ и ве́лію ми́лость.

И мине́и три́.

Проки́менъ, псало́мъ 27-й, гла́съ 6: Спаси́, Го́споди, лю́ди Твоя́* и благослови́ достоя́ніе Твое́. Сти́хъ: Къ Тебѣ́, Го́споди, воззову́, Бо́же мо́й, [да не премолчи́ши отъ мене́].

Бытія́ чте́ніе. [Глава́ 4.]

Рече́ Ка́инъ ко Авелю, бра́ту своему́: по́йдемъ на по́ле. И бы́сть внегда́ бы́ти и́мъ на по́ли, воста́ Ка́инъ на Авеля, бра́та своего́, и уби́ его́. И рече́ Госпо́дь Бо́гъ ко Ка́ину: гдѣ́ е́сть Авель, бра́тъ тво́й? И рече́: не вѣ́мъ, еда́ стра́жъ бра́ту моему́ е́смь а́зъ? И рече́ Госпо́дь: что́ сотвори́лъ еси́ сіе́? гла́съ кро́ве бра́та твоего́ вопіе́тъ ко Мнѣ́ отъ земли́. И ны́нѣ про́клятъ ты́ на земли́, я́же разве́рзе уста́ своя́ прія́ти кро́вь бра́та твоего́ отъ руки́ твоея́. Егда́ дѣ́лаеши зе́млю, и не приложи́тъ си́лы своея́ да́ти тебѣ́; стеня́й и трясы́йся бу́деши на земли́. И рече́ Ка́инъ ко Го́споду Бо́гу: вя́щшая вина́ моя́, е́же оста́витися ми́. Аще изго́ниши мя́ дне́сь отъ лица́ земли́ и отъ лица́ Твоего́ скры́юся и бу́ду стеня́ и трясы́йся на земли́, и бу́детъ вся́къ, обрѣта́яй мя́, убіе́тъ мя́. И рече́ ему́ Госпо́дь Бо́гъ: не та́ко, вся́къ уби́вый Ка́ина, седми́жды отмсти́тся. И положи́ Госпо́дь Бо́гъ зна́меніе на Ка́инѣ, е́же не уби́ти его́ вся́кому, обрѣта́ющему его́.

Проки́менъ, псало́мъ 28-й, гла́съ 7: Госпо́дь крѣ́пость лю́демъ Свои́мъ да́стъ,* Госпо́дь благослови́тъ лю́ди Своя́ ми́ромъ. Сти́хъ: Принеси́те Го́сподеви, сы́нове Бо́жіи, [принеси́те Го́сподеви сы́ны о́вни].

При́тчей чте́ніе. [Глава 5.]

Сы́не, мое́й прему́дрости внима́й, къ мои́мъ же словесе́мъ прилага́й у́хо твое́, да сохрани́ши мы́сль благу́ю, чу́вство же мои́хъ усте́нъ заповѣ́даетъ тебѣ́: не внима́й злѣ́й женѣ́, ме́дъ бо ка́плетъ отъ усте́нъ жены́ блудни́цы, я́же на вре́мя наслажда́етъ тво́й горта́нь, послѣди́ же горча́е же́лчи обря́щеши и изощре́ну па́че меча́ обою́ду остра́, безу́мія бо но́зѣ низво́дятъ употребля́ющихъ ю́ со сме́ртію во а́дъ, стопы́ же ея́ не утвержда́ются, на пути́ бо живо́тныя не нахо́дитъ, заблужде́нна же тече́нія ея́ и неблагоразу́мна. Ны́нѣ у́бо, сы́не, послу́шай мене́ и не отринове́нна сотвори́ моя́ словеса́. Дале́че отъ нея́ сотвори́ пу́ть тво́й и не прибли́жися къ две́ремъ домо́въ ея́; да не преда́стъ ины́мъ живота́ твоего́ и твоего́ житія́ неми́лостивнымъ; да не насы́тятся инíи твоея́ крѣ́пости, твои́ же труды́ въ до́мы чужды́я вни́дутъ. И раска́ешися на послѣ́докъ тво́й, егда́ истру́тся пло́ти тѣ́ла твоего́, и рече́ши: ка́ко возненави́дѣхъ наказа́ніе и отъ обличе́ній уклони́ся се́рдце мое́? не послу́шахъ гла́са наказу́ющаго мя́ и ко уча́щему мя́ не прилага́хъ у́ха моего́. Вма́лѣ бѣ́хъ во вся́комъ злѣ́ посредѣ́ це́ркве и со́нмища. Сы́не, пíй во́ды отъ твои́хъ сосу́довъ и отъ твои́хъ кладенце́въ исто́чника.

На стихо́внѣ самогла́сенъ дне́, два́жды, гла́съ 3:

Пло́тію распны́йся, Го́споди, и съ Собо́ю распны́й ве́тхаго на́шего человѣ́ка, копіе́мъ же прободе́нъ въ ре́бра и человѣкогуби́теля спрободы́й змíя, пригвозди́ къ стра́ху Твоему́ пло́ти моя́ и любо́вію Твое́ю уязви́ мою́ ду́шу, да Твою́ созерца́я Стра́сть, возде́ржно совершу́ поста́ опредѣле́ніе, не то́чію чре́во, но и другíя грѣха́ вхо́ды удержава́я, сокруше́ніе же се́рдца и ду́ха смире́ніе пожру́ Тебѣ́ о преждебы́вшихъ мои́хъ согрѣше́ніихъ, отъ ни́хже мя́ изба́ви, Человѣколю́бче.

Му́чениченъ: Проро́цы, и апо́столи Христо́вы, и му́ченицы научи́ша пѣ́ти Тро́ицу Единосу́щную, и просвѣти́ша язы́ки заблу́ждшія, и о́бщники а́нгеловъ сотвори́ша сы́ны человѣ́ческія.

Сла́ва, и ны́нѣ, крестобогоро́диченъ. Подо́бенъ: Ве́лія му́ченикъ.

Ви́дящи изъ Тебе́ Ро́ждшагося, Всенепоро́чная, ви́сяща на Дре́вѣ, рыда́ла еси́, вопію́щи: превозжелѣ́нное Мое́ Ча́до! гдѣ́ Твоя́ за́йде добро́та свѣтоно́сная, я́же удобри́ человѣ́ческое естество́?


ВЪ СРЕДУ ВТОРЫЯ СЕДМИЦЫ НА УТРЕНИ,
Тро́ичны.

По 1-мъ стихосло́віи сѣда́льны кре́стны осмогла́сника.

По 2-мъ же стихосло́віи сѣда́льны настоя́щія, гла́съ 1:

Христе́, на Крестѣ́ просте́рся, умертви́лся еси́, умертви́вый врага́ и началозло́бнаго змíя, оживи́въ же угрызе́ніемъ о́наго уме́ршія. Тѣ́мже молю́ся: умерщвле́нную ду́шу мою́, Спа́се, оживи́, въ моли́твѣ и постѣ́ къ Тебѣ́ взира́ющую. [Два́жды.]

[Сла́ва, и ны́нѣ,] крестобогоро́диченъ. Подо́бенъ:

Яко ви́дѣ на Крестѣ́ Агница, Тебе́, Агнца, ви́сяща, Христе́, посредѣ́ злодѣ́евъ, вопія́ше слезя́щи и го́рцѣ рыда́ющи: Ча́до любе́знѣйшее, что́ зри́мое чу́до? — Ма́ти Пречи́стая, Живо́тъ Всемíрный, сіе́ предрекла́ еси́, позна́ется.

По 3-мъ стихосло́віи сѣда́ленъ, гла́съ 3. Подо́бенъ: Красотѣ́ дѣ́вства.

Пѣ́сней трубо́ю востру́бимъ, де́нь наро́читый проходя́ще, воздержа́нія вре́мя, и воззове́мъ вопію́ще: сіе́ Жи́знь на́шу въ мíрѣ прорасти́, увяди́вшее невоздержа́нія стра́сть. Си́лою Креста́ Твоего́, Христе́ Сло́ве, въ се́мъ рабы́ Твоя́ сохраня́й. [Два́жды.]

[Сла́ва, и ны́нѣ,] крестобогоро́диченъ:

Поно́сную, Ще́дре, сме́рть распя́тіемъ во́лею претерпѣ́лъ еси́. Его́же ро́ждшая Тя́, Христе́, зря́щи, уязвля́шеся утро́бою, бію́щибося ма́терски рыда́ше. Ея́же моли́твами, ра́ди благоутро́бія ми́лости Твоея́, уще́дри и спаси́ мíръ, Взе́мляй грѣ́хъ мíра.

Кано́нъ мине́и и настоя́щія трипѣ́снцы, по чи́ну и́хъ, и стихосло́вится пѣ́снь.

Пѣ́снь 3, господи́на Іо́сифа, гла́съ 1.

Ирмо́съ: Да утверди́тся се́рдце мое́ [въ во́ли Твое́й, Христе́ Бо́же, Иже надъ вода́ми не́бо утвержде́й второ́е и основа́вый на вода́хъ зе́млю, Всеси́льне].

На Крестѣ́ дла́ни распросте́рлъ еси́, просте́ртыя дре́вле ру́ки Ада́мовы къ разу́мному са́ду, отъе́мля грѣ́хъ, за милосе́рдіе щедро́тъ, Сло́ве Бо́жій Преблагíй.

Утверди́ мое́ помышле́ніе, коле́блемое за́вистію змíя, страсте́й наведе́нія Твое́ю Стра́стію отжени́, Пострада́вый и безстра́стіе вѣ́рнымъ Дарова́вый.

По́стная благода́ть возсія́, невоздержа́нія тму́ отгоня́щая; се́ благопрія́тное вре́мя и де́нь спаси́тельный, покая́нія пока́жемъ плоды́ и жи́ви бу́демъ.

Богоро́диченъ: Па́дающихъ Исправле́ніе, сласте́й стремни́ною па́дша мя́ и грѣхи́ лю́тыми впа́дша въ про́пасти, воздви́гни, Чи́стая, и къ жи́зни наста́ви.

Иный, господи́на Ѳео́дора, гла́съ 3.

Ирмо́съ: Утверди́, Го́споди, сердца́ на́ша [и просвѣти́ къ Твоему́ пѣснопѣ́нію, е́же сла́вити Тя́, Спа́се, во вѣ́къ вѣ́ка].

Утверди́, Го́споди, сердца́ на́ша Твои́мъ Кресто́мъ, не уклоня́тися отъ Тебе́ въ словеса́ лука́вая и въ дѣя́нія скве́рная.

Стра́сть Твою́, Влады́ко, не́бо и земля́ чу́вствующе, измѣня́хуся я́вѣ, Царя́ всѣ́хъ Тя́ показу́юще вои́стинну.

Сла́ва, тро́иченъ: Равноче́стная, Безнача́льная, Всесвята́я Тро́ице, Животворя́щая и Началосвѣ́тлая Еди́нице: Отче и Сы́не и Ду́ше, спаси́ мя́.

[И ны́нѣ,] богоро́диченъ: Богома́ти Безму́жная, ражда́еши еди́на Бо́га, не истлѣ́вши дѣ́вства чистоту́, но пребыва́еши, Чи́стая, я́коже была́ еси́ пре́жде Рождества́.

Сла́ва Тебѣ́, Бо́же на́шъ, сла́ва Тебѣ́.

Багря́нѣй ри́зѣ Твое́й, гво́здію и Кресту́, гу́бѣ же и копію́, Іису́се, покланя́юся и воспѣва́ю Оживи́вшаго вся́.

Катава́сія: Утверди́, Го́споди, сердца́ на́ша и просвѣти́ къ Твоему́ пѣснопѣ́нію, е́же сла́вити Тя́, Спа́се, во вѣ́къ вѣ́ка.

Пѣ́снь 8.

Ирмо́съ: Пѣсносло́вцы [въ пещи́ спа́сшаго дѣ́ти и громопла́менную прело́жшаго на ро́су, Христа́ Бо́га по́йте и превозноси́те во вся́ вѣ́ки].

Со беззако́нными вмѣни́тися, за мно́жество ми́лости Изво́ливый, моя́ грѣхи́ загла́ди, я́ко да вѣ́рою Тя́ сла́влю во вся́ вѣ́ки.

Грѣхо́въ мои́хъ рукописа́ніе Твои́мъ раздери́ копіе́мъ и се́рдца моего́ болѣ́зни уврачу́й, Го́споди, уязвле́ннаго стрѣла́ми зло́бы лука́выхъ де́моновъ.

Омраче́нное се́рдце мое́ грѣхо́мъ, избавле́ніемъ Твои́мъ омы́й, исте́кшею изъ ре́бръ Кро́вію, Христе́ мо́й, да Тя́ сла́влю во вся́ вѣ́ки.

Богоро́диченъ: Невоздѣ́ланно прозя́бшая Небе́сный Кла́съ, пита́ющаго Боже́ственною си́лою вся́ческая, Дѣ́во, насы́ти а́лчущую смире́нную ду́шу мою́.

Иный.

Ирмо́съ: Въ пла́мень ко отроко́мъ [евре́йскимъ снизше́дшаго Бо́жіею си́лою и я́вльшагося Го́спода, свяще́нницы, благослови́те и превозноси́те во вся́ вѣ́ки].

Ра́дуйся, Кре́сте, и́мже позна́ся еди́нымъ мгнове́ніемъ разбо́йникъ богосло́вецъ, взыва́яй: помяни́ мя́, Го́споди, во Ца́рствіи Твое́мъ. Его́же ча́сти о́бщники на́съ покажи́.

Ты́ прободе́нъ, пла́менное ору́жіе отвраща́еши, Христе́, и человѣ́комъ отверза́еши па́ки ра́й, въ о́ньже входя́ще, Твоея́ безсме́ртныя жи́зни при́сно наслажда́емся.

Благослови́мъ Отца́, и Сы́на, и Свята́го Ду́ха, Го́спода.

Тро́иченъ: Со Отце́мъ Сы́ну поклони́мся и Ду́ху Свято́му во еди́номъ Существѣ́, немо́лчно зову́ще бре́нными усты́: сла́ва въ вы́шнихъ Бо́гу въ Тро́ицѣ!

[И ны́нѣ,] богоро́диченъ: Отрокоражда́еши, дѣ́вствующи, еди́на Богоблагода́тная: та́инство вели́кое, стра́шное чу́до, Бо́га бо родила́ еси́ воплоще́нна, Спа́са мíра.

Сла́ва Тебѣ́, Бо́же на́шъ, сла́ва Тебѣ́.

Кре́сте Христо́въ, упова́ніе конце́въ, преити́ на́мъ твои́мъ окормле́ніемъ ти́хо пучи́ну до́браго поста́ сподо́би, спаса́я отъ треволне́нія прегрѣше́ній.

Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].

Ирмо́съ: Въ пла́мень ко отроко́мъ евре́йскимъ снизше́дшаго Бо́жіею си́лою и я́вльшагося Го́спода, свяще́нницы, благослови́те и превозноси́те во вся́ вѣ́ки.

Пѣ́снь 9.

Ирмо́съ: Живопріе́мный исто́чникъ [приснотеку́щій, свѣтоно́сный свѣти́льникъ благода́ти, хра́мъ одушевле́нный, сѣ́нь пречи́стую, небесе́ и земли́ простра́ннѣйшую, Богоро́дицу, вѣ́рніи, велича́емъ].

Пости́вся Елиссе́й, воскреси́ уме́рша о́трочища, я́коже е́сть пи́сано; и мы́, постя́щеся, плотска́я мудрова́нія умертви́ти, вѣ́рніи, потщи́мся, да жи́знь та́мо получи́мъ.

Увы́ мнѣ́, душе́, стра́шное суди́лище и Судіино́ стра́шное изрече́ніе! Потщи́ся, пока́йся, Христу́ примири́ся, тебе́ ра́ди на Крестѣ́ повѣ́шенному и изба́вльшему вѣ́рныя осужде́нія.

Покая́нія ми́ две́ри отве́рзи, страсте́й мои́хъ вхо́ды затвори́, разбо́йнику вхо́дъ ра́йскій благовхо́денъ показа́вый, Христе́, Твои́мъ распя́тіемъ, да сла́влю Твою́ бла́гость.

Богоро́диченъ: Яко во глубину́ зло́бы отве́рженъ е́смь и помышле́ньми сопроти́вными обурева́юся, де́мономъ повину́яся, сластьми́ порабоще́нъ сы́й. Помози́ ми́, Чи́стая Дѣ́во Ма́ти, ко спасе́нія пути́ наставля́ющи мя́.

Иный.

Ирмо́съ: На Сина́йстѣй горѣ́, [ви́дѣ Тя́ въ купинѣ́ Моисе́й, неопа́льно Огнь Божества́ заче́ншую во чре́вѣ; Даніи́лъ же Тя́ ви́дѣ го́ру несѣко́мую; же́злъ прозя́бшій, Иса́ія взыва́ше, отъ ко́рене Дави́дова].

Преда́лся еси́ во́лею и приве́лъ еси́ Себе́ убíйцамъ, суди́лищу предста́лъ еси́, біе́мъ отъ ру́къ, я́же созда́лъ еси́, ра́спятъ бы́лъ еси́ и пору́ганъ, прободе́нъ бы́лъ еси́, Го́споди, пострада́лъ еси́ пло́тію, вся́ претерпѣ́въ ми́лостивно, да спасе́ши ны́.

Ангельстіи собо́ри вострепета́ша, ви́дяще Тя́ на Крестѣ́, свѣти́ла свѣ́тъ скры́ша и тряса́шеся земля́, колеба́хуся вся́ досажде́ніемъ Твои́мъ, Го́споди. Боже́ственными Твои́ми Страстьми́ содѣ́лалъ еси́ на́мъ, Бо́же, спасе́ніе.

[Слава,] тро́иченъ: Существо́мъ Еди́ница е́сть несѣко́ма Пребоже́ственная Тро́ице: соединя́ема Естество́мъ, дѣли́тся Ли́цы сво́йственно; несѣко́ма бо сѣче́тся, еди́но су́щи трои́тся. Сія́ Оте́цъ е́сть, Сы́нъ, и Ду́хъ Живы́й, соблюда́ющая все́.

[И ны́нѣ,] богоро́диченъ: Дѣторо́дную дѣ́ву кто́ слы́ша и ма́терь безъ му́жа? Марíе, соверша́еши чу́до, но скажи́ ми́, ка́ко? — Не испыту́й глуби́нъ дѣторо́дія; сіе́ всеи́стинно, па́че человѣ́ческаго ума́ постиже́ніе.

Сла́ва Тебѣ́, Бо́же на́шъ, сла́ва Тебѣ́.

Твое́ю я́звою вси́ исцѣли́хомся отъ страсте́й грѣхо́въ: на Крестѣ́ бо взя́тъ бы́въ, острупи́лъ еси́ началозло́бника врага́. Но неосужде́нны на́съ сподо́би и Воскресе́ніе дости́гнути, соверши́вшія по́стное вре́мя.

Ирмо́съ: На Сина́йстѣй горѣ́, ви́дѣ Тя́ въ купинѣ́ Моисе́й, неопа́льно Огнь Божества́ заче́ншую во чре́вѣ; Даніи́лъ же Тя́ ви́дѣ го́ру несѣко́мую; же́злъ прозя́бшій, Иса́ія взыва́ше, отъ ко́рене Дави́дова.

Свѣти́ленъ гла́са.

На стихо́внѣ самогла́сенъ, гла́съ 7:

Кресто́мъ Твои́мъ, Го́споди, разруши́вый сме́рть, наве́дшуюся въ мíръ дре́ва ра́ди снѣ́ди, ю́же отре́клъ еси́ въ раи́. Са́мъ у́бо посто́мъ настоя́щимъ на́съ изба́ви вся́кія сла́сти душетлѣ́нныя, и сподо́би дѣ́лати пребыва́ющее бра́шно въ живо́тъ вѣ́чный, да получи́мъ вѣнце́въ нетлѣ́нныя сла́дости, я́же угото́валъ еси́ и́стиннымъ по́стникомъ, мо́лимся. [Два́жды.]

Му́чениченъ: Свѣти́ла яви́шася вселе́нныя, всехва́льніи страстоте́рпцы, Христу́ вопію́ще: Го́споди, сла́ва Тебѣ́!

Сла́ва, и ны́нѣ, крестобогоро́диченъ. Подо́бенъ: Не ктому́ возбраня́еми.

На Дре́вѣ пригвожде́на Тя́ во́лею, я́ко ви́дѣ Всенепоро́чная, рыда́ющи, поя́ше держа́ву Твою́, Го́споди.


НА 6-МЪ ЧАСѢ,
Тропа́рь проро́чества, гла́съ 6:

Вы́шній, на небесѣ́хъ Живы́й, Созда́вый вся́кое дыха́ніе, спаси́ ны́, Бо́же, на Тя́ бо упова́хомъ, Спа́се на́шъ.

Проки́менъ, псало́мъ 29-й, гла́съ 5: Къ Тебѣ́, Го́споди, воззову́* и къ Бо́гу моему́ помолю́ся. Сти́хъ: Вознесу́ Тя́, Го́споди, я́ко подъя́лъ мя́ еси́.

Проро́чества Иса́іина чте́ніе. [Глава́ 5.]

Вознесе́тся Госпо́дь Савао́ѳъ въ судѣ́ и Бо́гъ Святы́й просла́вится въ пра́вдѣ. И упасу́тся расхище́нніи, я́ко юнцы́, и пусты́ни плѣне́нныхъ а́гнцы поядя́тъ. Го́ре привлача́ющимъ грѣхи́ я́ко у́жемъ до́лгимъ, и я́ко и́га ю́нична реме́немъ беззако́нія своя́, глаго́лющимъ: ско́ро да прибли́жатся, я́же сотвори́тъ, да ви́димъ, и да пріи́детъ совѣ́тъ Свята́го Изра́илева, да разумѣ́емъ. Го́ре глаго́лющимъ лука́вое до́брое и до́брое лука́вое, полага́ющимъ тму́ свѣ́тъ и свѣ́тъ тму́, полага́ющимъ го́рькое сла́дкое и сла́дкое го́рькое. Го́ре, и́же му́дри въ себѣ́ сами́хъ и предъ собо́ю разу́мни. Го́ре крѣ́пкимъ ва́шимъ, вино́ пію́щимъ, и вельмо́жамъ, растворя́ющимъ сике́ръ, оправда́ющимъ нечести́ва даро́въ ра́ди и е́же е́сть пра́ведное пра́веднаго взе́млющимъ отъ него́. Сего́ ра́ди, я́коже сгори́тъ тро́сть отъ у́глія о́гненнаго и сожже́тся отъ пла́мене разгорѣ́вшагося, ко́рень и́хъ я́ко пе́рсть бу́детъ и цвѣ́тъ и́хъ я́ко пра́хъ взы́детъ; не восхотѣ́ша бо зако́на Го́спода Савао́ѳа, но сло́во Свята́го Изра́илева раздражи́ша. И возъяри́ся гнѣ́вомъ Госпо́дь Савао́ѳъ на лю́ди Своя́ и наложи́ ру́ку Свою́ на ни́хъ и порази́ и́хъ, и раздражи́шася го́ры, и бы́ша тру́пи и́хъ я́ко гно́й посредѣ́ пути́. И во всѣ́хъ си́хъ не отврати́ся я́рость Его́, но еще́ рука́ Его́ высока́.

Проки́менъ, псало́мъ 30-й, гла́съ 6: На Тя́, Го́споди, упова́хъ,* да не постыжу́ся во вѣ́къ. Сти́хъ: Пра́вдою Твое́ю изба́ви мя́ и изми́ мя́.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 139 об. – 143 об.

Служба во вторникъ 2-й недѣли поста // Къ оглавленію Постной Тріоди // Служба въ четвертокъ 2-й недѣли поста


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.