Церковный календарь
Новости


2018-11-16 / russportal
Прот. Михаилъ Помазанскій. Наше церковное правосознаніе (1976)
2018-11-16 / russportal
Прот. Михаилъ Помазанскій. Мысли о Православіи (1976)
2018-11-15 / russportal
Ген. П. Н. Красновъ. "За чертополохомъ". Часть 2-я. Глава 41-я (1922)
2018-11-15 / russportal
Ген. П. Н. Красновъ. "За чертополохомъ". Часть 2-я. Глава 40-я (1922)
2018-11-15 / russportal
Архіеп. Филаретъ (Гумилевскій). Слово (2-е) въ Великій пятокъ (1883)
2018-11-15 / russportal
Архіеп. Филаретъ (Гумилевскій). Слово (1-е) въ Великій пятокъ (1883)
2018-11-15 / russportal
Архіеп. Никонъ (Рклицкій). Православная Русь въ Канадѣ (1975)
2018-11-15 / russportal
Архіеп. Никонъ (Рклицкій). Тайна креста (1975)
2018-11-15 / russportal
Свт. Василій, еп. Кинешемскій. Бесѣда 6-я на Евангеліе отъ Марка (1996)
2018-11-15 / russportal
Свт. Василій, еп. Кинешемскій. Бесѣда 5-я на Евангеліе отъ Марка (1996)
2018-11-15 / russportal
Еп. Григорій (Граббе). Еще объ одной статьѣ (1996)
2018-11-15 / russportal
Еп. Григорій (Граббе). Отвѣтъ (2-й) архіеп. Іоанну Шаховскому (1996)
2018-11-14 / russportal
Ген. П. Н. Красновъ. "За чертополохомъ". Часть 2-я. Глава 39-я (1922)
2018-11-14 / russportal
Ген. П. Н. Красновъ. "За чертополохомъ". Часть 2-я. Глава 38-я (1922)
2018-11-14 / russportal
Архіеп. Филаретъ (Гумилевскій). Бесѣда (2-я) въ день Срѣтенія Господня (1883)
2018-11-14 / russportal
Архіеп. Филаретъ (Гумилевскій). Бесѣда (1-я) въ день Срѣтенія Господня (1883)
Новости въ видѣ
RSS-канала: .
Сегодня - пятница, 16 ноября 2018 г. Сейчасъ на порталѣ посѣтителей - 7.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ЧЕТВЕРТОКЪ ВТОРЫЯ СЕДМИЦЫ ВЕЛИКАГО ПОСТА.

ВЪ СРЕДУ ВТОРЫЯ СЕДМИЦЫ ВЕЧЕРА,
На Го́споди воззва́хъ.., поста́вимъ стихо́въ 10 и пое́мъ настоя́щій самогла́сенъ, два́жды, и му́чениченъ, и подо́бны 3.
Самогла́сенъ, гла́съ 1:

Духо́вный, бра́тіе, взе́мше по́стъ, язы́комъ не глаго́лите льсти́вная, ниже́ полага́йте претыка́нія бра́ту въ собла́знъ, но покая́ніемъ просвѣти́вше души́ свѣщу́ слеза́ми, возопіи́мъ Христу́: оста́ви на́мъ грѣхопаде́нія на́ша, я́ко Человѣколю́бецъ.

Му́чениченъ:

Всехва́льніи му́ченицы, ва́съ ни земля́ потаи́ла е́сть, но не́бо прія́тъ: отверзо́шася ва́мъ ра́йская врата́, и вну́трь бы́вше, дре́ва жи́зни наслажда́етеся. Христу́ моли́теся дарова́тися душа́мъ на́шимъ ми́ру и ве́ліей ми́лости.

Ины стихи́ры, господи́на Іо́сифа, гла́съ 3. Подо́бенъ: Ве́лія Креста́.

Боже́ственныхъ апо́столъ, Го́споди, моле́нми, по́стное вре́мя до́брѣ на́мъ соверши́ти, умиле́ніемъ по́мысла сподо́би, я́ко бла́гъ, Благоутро́бне, да спаса́еми, Тя́ прославля́емъ вси́.

Подо́бенъ:

Вели́кое и стра́шное Твое́, Го́споди, прише́ствіе, въ не́мже сѣдя́, су́дъ пра́ведный сотвори́ши, да не у́бо осу́диши мя́ осужде́ннаго, но я́ко Бо́гъ, пощади́ мя́ апо́столъ Твои́хъ благопрія́тными моли́твами.

Ина стихи́ра, господи́на Ѳео́дора, гла́съ 6. Подо́бенъ: Все́ отло́жше.

Христо́вы апо́столи, земны́мъ свѣти́ла, сокро́вища міробога́тная всему́драго ра́зума Бо́га на́шего, ва́съ пою́щія искуше́ній изба́вите святы́ми ва́шими моли́твами, и вре́мя на́мъ по́стное проводи́ти ю́ношески, подаю́ще въ ми́рѣ жи́знь на́шу, да благоуго́дно предвари́вше Стра́сть Христо́ву, со дерзнове́ніемъ прино́симъ пѣ́нія Бо́гу на́шему.

И въ мине́и 4. Сла́ва, и ны́нѣ, богоро́диченъ.

Проки́менъ, псало́мъ 31-й, гла́съ 6: Весели́теся о Го́сподѣ* и ра́дуйтеся, пра́ведніи. Сти́хъ: Блаже́ни, и́хже оста́вишася беззако́нія [и и́хже прикры́шася грѣси́].

Бытія́ чте́ніе. [Глава́ 4.]

Изы́де Ка́инъ отъ лица́ Бо́жія и всели́ся въ зе́млю Наи́дъ, пря́мо Еде́му. И позна́ Ка́инъ жену́ свою́, и заче́нши, роди́ Ено́ха, и бѣ́ зи́ждяй гра́дъ и именова́ гра́дъ во и́мя сы́на своего́: Ено́хъ. Роди́ся же Ено́ху Гаида́дъ, и Гаида́дъ роди́ Малелеи́ла, и Малелеи́лъ роди́ Маѳуса́ла, Маѳуса́лъ же роди́ Ламе́ха. И взя́ себѣ́ Ламе́хъ двѣ́ жены́: и́мя еди́ной Ада́ и и́мя вторѣ́й Селла́. И роди́ Ада́ Іови́ла, се́й бя́ше оте́цъ живу́щихъ въ селе́ніихъ скотопита́телей. И и́мя бра́ту его́: Іува́лъ, се́й бя́ше показа́вый пѣвни́цу и гу́сли. Селла́ же и та́я роди́ Ѳо́вела, се́й бя́ше млатобíецъ, кова́чь мѣ́ди и желѣ́за; сестра́ же Ѳо́велова — Ноема́. Рече́ же Ламе́хъ свои́мъ жена́мъ: Ада́ и Селла́, услы́шите гла́съ мо́й! жены́ Ламе́ховы, внуши́те моя́ словеса́! Яко му́жа уби́хъ — въ я́зву мнѣ́, и ю́ношу — въ стру́пъ мнѣ́. Яко седми́цею отмсти́ся отъ Ка́ина, отъ Ламе́ха же се́дмьдесять седми́цею. Позна́ же Ада́мъ Еву, жену́ свою́, и заче́нши, роди́ сы́на, и именова́ и́мя ему́: Си́ѳъ, глаго́лющи: воскреси́ бо ми́ Бо́гъ сѣ́мя друго́е, вмѣ́сто Авеля, его́же уби́ Ка́инъ. И Си́ѳу бы́сть сы́нъ, именова́ же и́мя ему́: Ено́съ, се́й упова́ призыва́ти и́мя Го́спода Бо́га.

Проки́менъ, псало́мъ 32-й, гла́съ 1: Бу́ди, Го́споди, ми́лость Твоя́ на на́съ,* я́коже упова́хомъ на Тя́. Сти́хъ: Ра́дуйтеся, пра́ведніи, о Го́сподѣ, [пра́вымъ подоба́етъ похвала́].

При́тчей чте́ніе. [Глава́ 5.]

Сы́не, пíй во́ды отъ свои́хъ сосу́довъ и отъ твои́хъ кладенце́въ исто́чника. Да преизлива́ются тебѣ́ во́ды отъ твоего́ исто́чника, во твои́ же пути́ да происхо́дятъ твоя́ во́ды; да бу́дутъ тебѣ́ еди́ному имѣ́нія и да никто́же чу́ждь причасти́тся тебѣ́. Исто́чникъ твоея́ воды́ да бу́детъ тебѣ́ тво́й, и весели́ся съ жено́ю, я́же отъ ю́ности твоея́. Еле́нь любве́ и жребя́ твои́хъ благода́тей да бесѣ́дуетъ тебѣ́, твоя́ же да преды́детъ тебѣ́ и да бу́детъ съ тобо́ю во вся́ко вре́мя: въ дру́жбѣ бо сея́ спребыва́яй, умно́женъ бу́деши. Не мно́гъ бу́ди къ чужде́й, ниже́ объя́тъ бу́ди объя́тіи не твоея́; предъ очи́ма бо су́ть Бо́жіима путіе́ му́жа, вся́ же тече́нія его́ назира́етъ. Законопреступле́нія му́жа уловля́ютъ, плѣни́цами же свои́хъ грѣхо́въ кíйждо затяза́ется. Се́й скончава́ется съ ненака́занными; отъ мно́жества же своего́ житія́ изве́ржется, и погиба́етъ за безу́міе. Сы́не, а́ще поручи́шися за твоего́ дру́га, преда́си твою́ ру́ку врагу́. Сѣ́ть бо крѣпка́ му́жу — свои́ устнѣ́ и плѣня́ется устна́ми свои́хъ у́стъ. Твори́, сы́не, я́же а́зъ заповѣ́даю ти́, и спаса́йся.

И а́біе Преждеосвяще́нная Литургíя.


ВЪ ЧЕТВЕРТОКЪ ВТОРЫЯ СЕДМИЦЫ СВЯТАГО ПОСТА, НА УТРЕНИ,
Тро́ичны гла́са.

По 1-мъ стихосло́віи сѣда́льны апо́стольскія осмогла́сника съ богоро́дичнымъ.

По 2-мъ же стихосло́віи глаго́лемъ настоя́щія сѣда́льны, гла́съ 3. Подо́бенъ: Красотѣ́ дѣ́вства.

Христо́съ, Лоза́ кра́сная, гро́здія ва́съ принесе́, сла́дость спаси́тельную напая́ющія земли́, апо́столи богоно́сніи, тѣ́мже мя́ изба́вите сласте́й пія́нства, молю́ся, струи́ умиле́нія души́ мое́й да́рующе въ боже́ственнѣмъ поще́нія дни́, я́ко да спа́сся, живо́тъ получу́.

Сла́ва, то́йже. И ны́нѣ, богоро́диченъ:

Милосе́рдія Твоего́ бога́тство безмѣ́рное и могу́тства Твоего́ держа́ву непребори́мую пріе́мля во у́мъ, притеко́хъ къ кро́ву Твоему́, ско́рбію содержи́мь, и лю́тѣ недоумѣва́я, зову́ изъ глубины́ моего́ се́рдца со слеза́ми: Дѣ́во Богоро́дице, помога́й ми́, еди́на мíру Предста́тельство.

По 3-мъ стихосло́віи сѣда́ленъ, гла́съ 6. Подо́бенъ: Го́споди, предстоя́ше.

Го́споди, благоувѣ́тливъ бу́ди на́мъ въ сіе́ боже́ственное вре́мя, сле́зы точи́ти Тебѣ́ отъ се́рдца сподо́би всегда́ ко отмове́нію скве́рнъ душе́вныхъ и къ прозябе́нію святы́хъ за́повѣдей, я́ко да си́це постя́щеся, досто́йно благоугоди́мъ Тебѣ́, и всечестну́ю Твою́ Стра́сть всѣ́мъ ви́дѣти благоизво́ли моли́твами Твои́хъ міроспаси́тельныхъ апо́столъ, сла́ва Тебѣ́!

Сла́ва, то́йже. И ны́нѣ, богоро́диченъ:

Милосе́рдія исто́чникъ, Пречи́стая, Честна́я Дѣ́во, Ма́ти Богоро́дице, бога́тно на ны́, Чи́стая, изле́й и да́руй на́мъ согрѣше́ній оставле́ніе, Ты́ бо еси́ Предста́тельство на́ше и боже́ственный Покро́въ.

Кано́нъ мине́и и настоя́щій трипѣ́снецъ господи́на Іо́сифа, гла́съ 3.

Пѣ́снь 4.

Ирмо́съ: Еда́ въ рѣка́хъ прогнѣ́ваешися, [Го́споди, еда́ въ рѣка́хъ я́рость Твоя́ или́ въ мо́ри устремле́ніе Твое́?]

Пія́нство сласте́й душетлѣ́нныхъ угаси́вше, умиле́нія питіе́мъ, поста́ ра́ди, угобзи́мся.

Пости́ся, душе́, невоздержа́нія снѣ́ди, наслади́ся до́брыхъ видѣ́ньми, да вы́шнюю трапе́зу улучи́ши.

Угліе Огня́ Невеще́ственнаго су́ще, попали́те страсте́й мои́хъ вещество́, боже́ственніи апо́столи Спа́совы.

Богоро́диченъ: Пло́ть Христу́ отъ Твоея́ взаи́мъ да́вшая, умертви́ пло́ти моея́ стра́сти, Жизнороди́тельнице Чи́стая Дѣ́во.

Иный трипѣ́снецъ, господи́на Ѳео́дора, гла́съ 6.

Ирмо́съ: Услы́ша проро́къ прише́ствіе Твое́, Го́споди, [и убоя́ся, я́ко хо́щеши отъ Дѣ́вы роди́тися и человѣ́комъ яви́тися, и глаго́лаше: услы́шахъ слу́хъ Тво́й и убоя́хся, сла́ва си́лѣ Твое́й, Го́споди].

Двоенадеся́тице апо́столовъ: Пе́тре, Па́вле, Іа́кове и Іоа́нне, Андре́е, Варѳоломе́е, Фили́ппе, Ѳомо́, и Матѳе́е, и Іа́кове, съ Си́мономъ и Іу́дою моли́твы сотвори́те Христу́ спасти́ся на́мъ.

Мре́жи уче́ній вве́ргше въ мо́ре житія́ стра́нно, къ тріе́мъ сто́ и пятьдеся́тъ, та́йно язы́ки, я́ко ры́бы, пре́жде улови́сте, сія́ ко Го́споду приве́дше, святíи апо́столи.

Сла́ва, тро́иченъ: Сы́на отъ Отца́, и Ду́ха сла́влю, я́ко отъ Со́лнца Свѣ́тъ и Лучу́. Оваго у́бо рожде́ственнѣ, зане́ и рожде́ніе; Оваго же происхо́днѣ, зане́ и происхожде́ніе: Собезнача́льную Боже́ственную Тро́ицу, покланя́емую отъ вся́кія тва́ри.

[И ны́нѣ,] богоро́диченъ: Дѣ́во, Младе́нца роди́вшая и чистоту́ соблю́дшая, Чи́стая, Ты́ яви́лася еси́, Бо́га ро́ждши и Человѣ́ка, Еди́наго Того́ во обою́ зра́ку. Чу́до Твое́, Дѣ́во Ма́ти, ужаса́етъ вся́кій слу́хъ и по́мыслъ.

Сла́ва Тебѣ́, Бо́же на́шъ, сла́ва Тебѣ́.

Вы́ есте́ свѣ́тъ мíру, я́коже ва́мъ рече́ Христо́съ, сія́ніемъ сло́ва. Но моли́теся, апо́столи, великоду́шно препроводи́ти на́мъ по́прище воздержа́нія и поклони́тися Того́ Воскресе́нію.

Ирмо́съ: Услы́ша проро́къ прише́ствіе Твое́, Го́споди, и убоя́ся, я́ко хо́щеши отъ Дѣ́вы роди́тися и человѣ́комъ яви́тися, и глаго́лаше: услы́шахъ слу́хъ Тво́й и убоя́хся, сла́ва си́лѣ Твое́й, Го́споди.

Пѣ́снь 8.

Ирмо́съ: Въ пла́мень ко отроко́мъ [евре́йскимъ снизше́дшаго Бо́жіею си́лою и я́вльшагося Го́спода, свяще́нницы, благослови́те и превозноси́те во вся́ вѣ́ки].

Умертви́вся мно́гими грѣхи́, ме́ртвую приношу́ ду́шу въ житіи́. Тѣ́мже мя́ уще́дрите живоно́сными моли́твами ва́шими, богови́дцы, ученицы́ Спа́совы.

Объя́тъ бы́въ грѣха́ мгло́ю, а́ду прибли́жихся отча́янія вои́стинну. Тѣ́мже мя́ просвѣти́те, Со́лнца Сла́вы та́йныя лучи́, су́ще богови́дцы.

Отъ страсте́й воздержи́ся и спаса́йся, душе́ страстна́я: отложе́ніе бо бра́шенъ, по́стъ непрія́тный, пра́вѣ и́щущимъ, а́ще и прегрѣше́ній исправле́ніе не бу́детъ.

Богоро́диченъ: Купину́, огне́мъ горя́щую, Моисе́й Тя́ предзря́ше, Дѣ́во Богома́ти. Тѣ́мже угаси́ мои́хъ страсте́й пе́щь и огня́ гее́нны исхити́ и спаси́.

Иный.

Ирмо́съ: Его́же во́инства [небе́сная сла́вятъ, и трепе́щутъ херуви́ми и серафи́ми, вся́ко дыха́ніе и тва́рь, по́йте, благослови́те и превозноси́те во вся́ вѣ́ки].

Изъ Іа́кова я́ко дванадесятоколѣ́нное, апо́столъ изъ Тебе́ друга́я двоенадеся́тица яви́ся, Христе́, въ мíрѣ, е́юже отроди́ся вся́кій вѣ́рный въ сло́вѣ, Тебе́ воспѣва́яй во вѣ́ки.

Мы́сленнаго фарао́на колесни́цы потопи́вше та́йнѣ, я́ко въ Чермнѣ́мъ, лю́ди Госпо́дни къ земли́ боговѣ́дѣнія изведо́сте пою́щія, апо́столи, во вѣ́ки.

Благослови́мъ Отца́, и Сы́на, и Свята́го Ду́ха, Го́спода.

[Троиченъ:] Еди́наго Бо́га по Существу́ чту́, Три́ Ѵпоста́си пою́ опредѣли́тельнѣ, и́ныя, но не и́наковыя: поне́же Божество́ еди́но въ Тріе́хъ Ли́цехъ, и́бо Оте́цъ, и Сы́нъ, и Боже́ственный Ду́хъ.

[И ны́нѣ,] богоро́диченъ: Изъ свѣтлѣ́йшаго чре́ва Твоего́ проше́дъ, я́ко Жени́хъ изъ черто́га возсія́ Христо́съ, Свѣ́тъ ве́лій су́щимъ во тмѣ́, и́бо Пра́вды Со́лнце облиста́въ, просвѣти́, Чи́стая, мíръ.

Сла́ва Тебѣ́, Бо́же на́шъ, сла́ва Тебѣ́.

Христо́вы таи́нницы и сопресто́льницы, прилѣ́жно о на́съ, грѣ́шныхъ, всегда́ моля́щіися, и ны́нѣ моли́те поще́ніе все́ чи́стѣ преити́.

Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].

Ирмо́съ: Его́же во́инства небе́сная сла́вятъ, и трепе́щутъ херуви́ми и серафи́ми, вся́ко дыха́ніе и тва́рь, по́йте, благослови́те и превозноси́те во вся́ вѣ́ки.

Пѣ́снь 9.

Ирмо́съ: На Сина́йстѣй горѣ́, [ви́дѣ Тя́ въ купинѣ́ Моисе́й, неопа́льно Огнь Божества́ заче́ншую во чре́вѣ; Даніи́лъ же Тя́ ви́дѣ го́ру несѣко́мую; же́злъ прозя́бшій, Иса́ія взыва́ше, отъ ко́рене Дави́дова].

Рѣ́ки бы́вше, апо́столи, Исто́чника Умнаго, и во́ду живу́ю благоисточи́вше се́рдцемъ чи́стымъ, моего́ грѣха́ струи́ изсуши́те моли́твами ва́шими и ко спасе́нія путе́мъ наста́вите.

Грѣхо́вная обурева́етъ бу́ря окая́нную мою́ ду́шу, десни́цу, я́ко Петру́, мнѣ́ простри́, Окорми́телю Благíй, да мя́ глубина́ не покры́етъ отча́янія, снѣ́дь да не бу́ду ки́ту душетлѣ́нному, Христе́ Многоми́лостиве.

Апо́стольскій ли́къ мо́литъ Тя́, Іису́се Всецарю́, мо́лятъ Тя́ а́нгельстіи чи́ни за мно́жество щедро́тъ: лю́демъ Твои́мъ пода́ждь злы́хъ избавле́ніе, житія́ исправле́ніе и Ца́рствія Твоего́ присвое́ніе.

Богоро́диченъ: Дѣ́вство и рождество́ стеко́стася па́че естества́ на Тебѣ́, Ковче́же честна́го освяще́нія, Ма́ти Дѣ́во Чи́стая. Тѣ́мже вѣ́рою вопію́ Ти́: всего́ мя́ освяти́, всего́ изба́ви вся́каго дѣ́йства страсте́й, оскорбля́ющихъ мя́.

Иный.

Ирмо́съ: Безсѣ́меннаго зача́тія [рождество́ несказа́нное, Ма́тере Безму́жныя нетлѣ́ненъ Пло́дъ: Бо́жіе бо рожде́ніе обновля́етъ естества́. Тѣ́мже Тя́ вси́ ро́ди, я́ко Богоневѣ́стную Ма́терь, правосла́вно велича́емъ].

Въ мíрѣ, я́ко безпло́тніи, и во пло́ти, я́ко а́нгели, сло́во еди́но въ се́рдцѣ нося́ще, привлеко́сте язы́ки Христо́ву еди́ну вѣ́ру, прему́дрыя, и вѣтíи, я́ко юро́ди, обличи́вше ра́зумомъ, всеблаже́нніи апо́столи.

Пе́тре, вѣ́ры ка́меню и основа́ніе, Па́вле, проповѣ́дниче и учи́телю язы́ковъ, сы́на Зеведе́ова съ про́чею осмери́цею Христу́ моли́теся прилѣ́жно благомо́щно прейти́ на́мъ поще́нія по́прище.

Сла́ва, [тро́иченъ:] Еди́наго Единороди́телю, Единоро́днаго Сы́на, Отче; и Еди́не Еди́наго, Свѣ́те, Свѣ́та сія́ніе; и Еди́ный, Еди́не, Еди́наго Бо́га, Святы́й Ду́ше, Го́спода Госпо́дь, вои́стинну Сы́й. О, Тро́ице, Еди́нице Свята́я, спаси́ мя́ богосло́вяща Тя́.

[И ны́нѣ,] богоро́диченъ: Чу́до Рождества́ Твоего́ удивля́етъ мя́, Всенепоро́чная, ка́ко зачина́еши безсѣ́менно Необыме́ннаго? Рцы́, ка́ко дѣ́вствуеши, ро́ждши, я́ко Ма́ти? — Еже па́че естества́ вѣ́рою пріе́мъ, Рожде́нному поклони́ся, ели́ка хо́щетъ бо и мо́жетъ.

Сла́ва Тебѣ́, Бо́же на́шъ, сла́ва Тебѣ́.

Си́лою Ду́ха къ царе́мъ и князе́мъ изше́дше, ника́коже убоя́вшеся, ни огня́, ни меча́, побѣди́сте вся́кую пре́лесть и спаса́ете человѣ́ки, воево́ды Госпо́дни су́ще, всеблаже́нніи апо́столи.

Ирмо́съ: Безсѣ́меннаго зача́тія рождество́ несказа́нное, Ма́тере Безму́жныя нетлѣ́ненъ Пло́дъ: Бо́жіе бо рожде́ніе обновля́етъ естества́. Тѣ́мже Тя́ вси́ ро́ди, я́ко Богоневѣ́стную Ма́терь, правосла́вно велича́емъ.

Свѣти́ленъ гла́са.

На стихо́внѣ самогла́сенъ, два́жды, гла́съ 8:

Покая́нія вре́мя и жи́зни вѣ́чныя хода́тай на́мъ е́сть по́стный по́двигъ, а́ще простре́мъ ру́ки во благотворе́ніе: ничесо́же бо та́ко спаса́етъ ду́шу, я́коже подая́ніе тре́бующимъ. Ми́лостыня, растворе́нная посто́мъ, отъ сме́рти избавля́етъ человѣ́ка; сію́ цѣлу́имъ, е́йже ничто́же ра́вно, дово́льна бо е́сть спасти́ ду́ши на́ша.

Му́чениченъ: Въ броня́ вѣ́ры обо́лкшеся до́брѣ и о́бразомъ кре́стнымъ вооружи́вше себе́, во́ини благомо́щніи показа́стеся, мучи́телемъ му́жески проти́вистеся и діа́волю пре́лесть потреби́сте, побѣди́теле бы́вше, вѣнце́въ сподо́бистеся. Моли́теся Христу́ о на́съ, во е́же спасти́ся душа́мъ на́шимъ.

Сла́ва, и ны́нѣ, богоро́диченъ, гла́съ то́йже:

Азъ, Дѣ́во Свята́я Богоро́дице, къ покро́ву Твоему́ прибѣга́ю, вѣ́мъ, я́ко обря́щу Тобо́ю спасе́ніе, мо́жеши бо, Чи́стая, помощи́ ми́.


НА 6-МЪ ЧАСѢ,
Тропа́рь проро́чества, гла́съ 1:

Па́дшія, возста́ви ны́, отвра́щшіяся, обрати́ къ Тебѣ́, Бо́же, я́ко Человѣколю́бецъ, земны́я содержа́й концы́.

Проки́менъ, псало́мъ 33-й, гла́съ 6: Взыска́хъ Го́спода и услы́ша мя́,* и отъ всѣ́хъ скорбе́й мои́хъ изба́ви мя́. Сти́хъ: Благословлю́ Го́спода на вся́кое вре́мя, [вы́ну хвала́ Его́ во устѣ́хъ мои́хъ].

Проро́чества Иса́іина чте́ніе. [Глава́ 6.]

Бы́сть въ лѣ́то, въ не́же у́мре Озíя ца́рь: ви́дѣхъ Го́спода, сѣдя́ща на престо́лѣ высо́цѣ и превознесе́ннѣ, и испо́лнь до́мъ сла́вы Его́. И серафи́ми стоя́ху о́крестъ Его́; ше́сть кри́лъ еди́ному и ше́сть кри́лъ друго́му: и двѣма́ у́бо покрыва́ху ли́ца своя́, двѣма́ же покрыва́ху но́ги своя́ и двѣма́ лета́ху. И взыва́ху дру́гъ ко дру́гу и глаго́лаху: Свя́тъ, Свя́тъ, Свя́тъ Госпо́дь Савао́ѳъ! испо́лнь вся́ земля́ сла́вы Его́! И взя́ся наддве́ріе отъ гла́са, и́мже вопія́ху, и до́мъ напо́лнися ды́ма. И реко́хъ: о, окая́нный а́зъ, я́ко умили́хся, я́ко человѣ́къ сы́й, и нечи́сты устнѣ́ имы́й, посредѣ́ люде́й нечи́стыя устнѣ́ иму́щихъ а́зъ живу́, и Царя́ Го́спода Савао́ѳа ви́дѣхъ очи́ма мои́ма! И по́сланъ бы́сть ко мнѣ́ еди́нъ отъ серафи́мовъ, и въ руцѣ́ свое́й имя́ше у́гль горя́щъ, его́же клеща́ми взя́тъ отъ олтаря́. И прикосну́ся устна́мъ мои́мъ и рече́: се́ прикосну́ся сіе́ устна́мъ твои́мъ, и оты́метъ беззако́нія твоя́ и грѣхи́ твоя́ очи́ститъ. И слы́шахъ гла́съ Го́спода, глаго́люща: кого́ послю́ и кто́ по́йдетъ къ лю́демъ си́мъ? И реко́хъ: се́ а́зъ е́смь, посли́ мя́. И рече́: иди́ и рцы́ лю́демъ си́мъ: слу́хомъ услы́шите и не уразумѣ́ете, и ви́дяще, у́зрите и не уви́дите. Одебелѣ́ бо се́рдце люде́й си́хъ, и уши́ма свои́ма тя́жко слы́шаша, и о́чи свои́ смѣжи́ша, да не когда́ у́зрятъ очи́ма, и уши́ма услы́шатъ, и се́рдцемъ уразумѣ́ютъ, и обратя́тся, и исцѣлю́ я́. И реко́хъ: доко́лѣ, Го́споди? И рече́: до́ндеже опустѣ́ютъ гра́ди, отъ е́же ненаселе́нымъ бы́ти, и до́мы, отъ е́же не бы́ти человѣ́комъ, и земля́ оста́нется пуста́. И по се́мъ продолжи́тъ Бо́гъ человѣ́ки и умно́жатся оста́вльшіися на земли́.

Проки́менъ, псало́мъ 34-й, гла́съ 6: Воста́ни, Го́споди,* и вонми́ суду́ моему́. Сти́хъ: Суди́, Го́споди, оби́дящія мя́, [побори́ борю́щія мя́].

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 144 – 148.

Служба въ среду 2-й недѣли поста // Къ оглавленію Постной Тріоди // Служба въ пятокъ 2-й недѣли поста


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.