Церковный календарь
Новости


2018-09-20 / russportal
Еп. Григорій (Граббе). Фантастическая исторія (1970)
2018-09-20 / russportal
Помѣстный Соборъ 1917-1918 гг. Дѣяніе 62-е (7 декабря 1917 г.)
2018-09-19 / russportal
Предсоборное Присутствіе 1906 г. Отдѣла I-го Журналъ №3 (18 марта 1906 г.)
2018-09-19 / russportal
Помѣстный Соборъ 1917-1918 гг. Дѣяніе 61-е (7 декабря 1917 г.)
2018-09-18 / russportal
Еп. Григорій (Граббе). Святая Русь въ исторіи Россіи (1970)
2018-09-18 / russportal
Предсоборное Присутствіе 1906 г. Отдѣла I-го Журналъ №2 (16 марта 1906 г.)
2018-09-17 / russportal
Еп. Григорій (Граббе). Кончина и погребеніе Блаж. Митр. Антонія (1970)
2018-09-17 / russportal
Помѣстный Соборъ 1917-1918 гг. Дѣяніе 60-е (5 декабря 1917 г.)
2018-09-16 / russportal
Еп. Григорій (Граббе). Какъ Митр. Антоній создалъ Зарубежную Церковь (1970)
2018-09-16 / russportal
Еп. Григорій (Граббе). Митрополитъ Антоній какъ учитель пастырства (1970)
2018-09-16 / russportal
Предсоборное Присутствіе 1906 г. Отдѣла I-го Журналъ №1 (14 марта 1906 г.)
2018-09-16 / russportal
Предсоборное Присутствіе 1906 г. Раздѣленіе на секціи (1906)
2018-09-15 / russportal
Еп. Григорій (Граббе). А. С. Хомяковъ и Митрополитъ Антоній (1970)
2018-09-15 / russportal
Помѣстный Соборъ 1917-1918 гг. Дѣяніе 59-е (4 декабря 1917 г.)
2018-09-14 / russportal
Еп. Григорій (Граббе). А. С. Хомяковъ, соборность и современность (1970)
2018-09-14 / russportal
Помѣстный Соборъ 1917-1918 гг. Дѣяніе 58-е (2 декабря 1917 г.)
Новости въ видѣ
RSS-канала: .
Сегодня - четвергъ, 20 сентября 2018 г. Сейчасъ на порталѣ посѣтителей - 13.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ПЯТОКЪ ВТОРЫЯ СЕДМИЦЫ ВЕЛИКАГО ПОСТА.

ВЪ ЧЕТВЕРТОКЪ ВТОРЫЯ СЕДМИЦЫ, ВЕЧЕРА,
На Го́споди воззва́хъ.., поста́вимъ стихо́въ 6 и пое́мъ настоя́щія подо́бны три́ трипѣ́снца, господи́на Іо́сифа, гла́съ 4. Подо́бенъ: Да́лъ еси́ зна́меніе.

Въ ре́бра прободе́нъ и на Дре́вѣ повѣ́шенъ, жи́знь мнѣ́ источи́лъ еси́, зло́бою змíя дре́ва снѣде́ніемъ умерщвле́нному. Тѣ́мже сла́влю Тя́, Христе́, и молю́ благоутро́біе Твое́: Страсте́мъ и Воста́нію покло́нника мя́ покажи́, умиле́ніемъ соверша́юща по́стное по́прище.

Болѣ́знь обра́вша отъ сада́, первосозда́ннаго отъ рая́ изгна́лъ еси́; пригвозди́вся же, я́ко Человѣ́къ, Спа́се, на Дре́вѣ, сего́ вво́диши. Тѣ́мже Ти́ зову́, Изба́вителю: отъ болѣ́зней мои́хъ ны́нѣ мя́ исхити́, посто́мъ очи́стивъ мя́, и покая́ніемъ, и слеза́ми, Іису́се Преблагíй, Спа́се ду́шъ на́шихъ.

Ина стихи́ра, подо́бна, гла́съ 5, господи́на Ѳео́дора: Го́споди, при Моисе́и.

Го́споди, Животворя́щій Тво́й Кре́стъ воспѣва́емъ, се́й бо жи́знь въ мíрѣ процвѣте́, сме́рть умертви́въ; его́же Тебѣ́ и ны́нѣ въ моли́тву приво́димъ: во дне́хъ святы́хъ укрѣпи́ ны́ постя́щіяся, и да́руй на стра́сти крѣ́пость, и мíра побѣ́дное, за мно́жество ми́лости, Человѣколю́бче.

И мине́и 3. Сла́ва, и ны́нѣ, богоро́диченъ.

Проки́менъ, псало́мъ 35-й, гла́съ 4: Го́споди, на небеси́ ми́лость Твоя́* и и́стина Твоя́ до о́блакъ. Сти́хъ: Пра́вда Твоя́, я́ко го́ры Бо́жія; судьбы́ Твоя́ — бе́здна мно́га.

Бытія́ чте́ніе. [Глава 5.]

Сія́ кни́га бытія́ человѣ́ча, въ о́ньже де́нь сотвори́ Бо́гъ Ада́ма, по о́бразу Бо́жію сотвори́ его́, му́жа и жену́ сотвори́ и́хъ, — и благослови́ и́хъ и нарече́ и́мя ему́: Ада́мъ, въ о́ньже де́нь сотвори́ и́хъ. Поживе́ же Ада́мъ лѣ́тъ двѣ́стѣ три́десять, и роди́ сы́на, по ви́ду своему́ и по о́бразу своему́, и нарече́ и́мя ему́: Си́ѳъ. Бы́ша же днíе Ада́мовы, я́же поживе́ по е́же роди́ти ему́ Си́ѳа, лѣ́тъ се́дмь со́тъ, и роди́ сы́ны и дще́ри. И бы́ша вси́ днíе Ада́мовы, я́же поживе́, лѣ́тъ де́вять со́тъ и три́десять, и у́мре. Поживе́ же Си́ѳъ лѣ́тъ двѣ́стѣ пя́ть, и роди́ Ено́са. И поживе́ Си́ѳъ, по е́же роди́ти ему́ Ено́са, лѣ́тъ се́дмь со́тъ и се́дмь, и роди́ сы́ны и дще́ри. И бы́ша вси́ днíе Си́ѳовы лѣ́тъ де́вять со́тъ и двана́десять, и у́мре. И поживе́ Ено́съ лѣ́тъ сто́ де́вятьдесять и роди́ Каина́на. И поживе́ Ено́съ, по е́же роди́ти ему́ Каина́на, лѣ́тъ се́дмь со́тъ и пятьна́десять, и роди́ сы́ны и дще́ри. И бы́ша вси́ днíе Ено́совы лѣ́тъ де́вять со́тъ и пя́ть, и у́мре. И поживе́ Каина́нъ лѣ́тъ сто́ се́дмьдесятъ, и роди́ Малеле́ила. И поживе́ Каина́нъ, по е́же роди́ти ему́ Малеле́ила, лѣ́тъ се́дмь со́тъ и четы́редесять, и роди́ сы́ны и дще́ри. И бы́ша вси́ днíе Каина́новы лѣ́тъ де́вять со́тъ и де́сять, и у́мре. И поживе́ Малеле́илъ лѣ́тъ сто́ шестьдеся́тъ пя́ть и роди́ Іа́реда. И поживе́ Малеле́илъ по е́же роди́ти ему́ Іа́реда, лѣ́тъ се́дмь со́тъ и три́десять, и роди́ сы́ны и дще́ри. И бы́ша вси́ днíе Малеле́иловы лѣ́тъ о́смь со́тъ и де́вятьдесятъ пя́ть, и у́мре. И поживе́ Іа́редъ лѣ́тъ сто́ шестьдеся́тъ два́, и роди́ Ено́ха. И поживе́ Іа́редъ, по е́же роди́ти ему́ Ено́ха, лѣ́тъ о́смь со́тъ, и роди́ сы́ны и дще́ри. И бы́ша вси́ днíе Іа́редовы лѣ́тъ де́вять со́тъ и шестьдеся́тъ два́, и у́мре. И поживе́ Ено́хъ лѣ́тъ сто́ шестьдеся́тъ пя́ть, и роди́ Маѳуса́ла. Угоди́ же Ено́хъ Бо́гу. И поживе́ Ено́хъ, по е́же роди́ти ему́ Маѳуса́ла, лѣ́тъ двѣ́стѣ, и роди́ сы́ны и дще́ри. И бы́ша вси́ днíе Ено́ховы лѣ́тъ три́ста шестьдеся́тъ пя́ть. И угоди́ Ено́хъ Бо́гу, и не обрѣта́шеся, зане́ преложи́ его́ Бо́гъ.

Проки́менъ, псало́мъ 36-й, гла́съ 6: Потерпи́ Го́спода* и сохрани́ пу́ть Его́. Сти́хъ: Не ревну́й лука́внующимъ, ниже́ зави́ди творя́щимъ беззако́ніе.

При́тчей чте́ніе. [Глава́ 6.]

Твори́, сы́не, я́же а́зъ заповѣ́дую ти́, и спаса́йся: и́деши бо въ ру́цѣ злы́хъ за твоего́ дру́га, бу́ди не ослабѣва́я, поощря́й же и твоего́ дру́га, его́же испоручи́лъ еси́. Не да́ждь сна́ твои́ма очи́ма, ниже́ да воздре́млеши твои́ма вѣ́ждома, да спасе́шися, а́ки се́рна отъ тене́тъ и я́ко пти́ца отъ сѣ́ти. Иди́ ко мра́вію, о лѣни́ве, и поревну́й, ви́дѣвъ пути́ его́ и бу́ди о́наго мудрѣ́йшій; онъ бо, не су́щу ему́ земледѣ́льцу, ниже́ ну́дящаго его́ иму́щій, ниже́ подъ влады́кою сы́й, гото́витъ въ жа́тву пи́щу и мно́гое въ лѣ́то твори́тъ угото́ваніе. Или́ иди́ ко пчелѣ́ и увѣ́ждь, ко́ль дѣ́лательница е́сть, дѣ́ланіе же ко́ль честно́е твори́тъ; ея́же трудо́въ ца́ріе и простíи во здра́віе употребля́ютъ; люби́ма же е́сть всѣ́ми и сла́вна; а́ще си́лою и немощна́ су́щи, (но) прему́дростію почте́на произведе́ся. Доко́лѣ, о лѣни́ве, лежи́ши? Когда́ же отъ сна́ воста́неши? Ма́ло у́бо спи́ши, ма́ло же сѣди́ши, ма́ло же дре́млеши, ма́ло же объе́млеши пе́рси рука́ма; пото́мъ же на́йдетъ тебѣ́, а́ки зо́лъ пу́тникъ, убо́жество, ску́дость же, а́ки благíй тече́цъ. Аще же не лѣни́въ бу́деши, пріи́детъ, я́ко исто́чникъ, жа́тва твоя́, ску́дость же, а́ки злы́й тече́цъ, (отъ тебе́) отбѣжи́тъ. Му́жъ безу́менъ и законопресту́пный хо́дитъ въ пути́ не бла́ги; то́йже намиза́етъ о́комъ и зна́меніе дае́тъ ного́ю, учи́тъ же помава́ніемъ пе́рстовъ. Развраще́нно же се́рдце куе́тъ зла́я, на вся́кое вре́мя таковы́й мяте́жы составля́етъ гра́ду. Сего́ ра́ди внеза́пу прихо́дитъ ему́ поги́бель, разсѣче́ніе и сокруше́ніе неисцѣ́льное. Яко ра́дуется о всѣ́хъ, и́хже ненави́дитъ Бо́гъ, сокруша́ется же за нечистоту́ души́: о́ко досади́теля, язы́къ непра́ведный, ру́цѣ, пролива́ющія кро́вь пра́веднаго, и се́рдце, кую́щее мы́сли злы́, и но́зѣ, тща́щіися зло́ твори́ти, потребя́тся. Разжиза́етъ лжи́ свидѣ́тель непра́веденъ и насыла́етъ суды́ посредѣ́ бра́тій. Сы́не, храни́ зако́ны отца́ твоего́ и не отри́ни наказа́нія ма́тере твоея́.

На стихо́внѣ самогла́сенъ дне́, гла́съ 5.

Не пости́вшеся по за́повѣди Созда́вшаго, отъ сада́ ра́зума первозда́нніи сме́рть отъ преслуша́нія приплоди́ша, дре́ва же жи́зни и ра́йскія сла́дости устрани́вшеся. Тѣ́мже пости́мся, вѣ́рніи, отъ пи́щей тлѣ́нныхъ и страсте́й всегуби́тельныхъ, да отъ Боже́ственнаго Креста́ жи́знь обы́мемъ и со благоу́мнымъ разбо́йникомъ къ нача́льному оте́честву возрати́мся, пріе́млюще отъ Христа́ Бо́га ве́лію ми́лость. [Два́жды.]

Му́чениченъ: О земны́хъ всѣ́хъ неради́вше и на му́ки му́жески дерзну́вше, блаже́нныхъ наде́ждъ не погрѣши́сте, но небе́сному Ца́рствію наслѣ́дницы бы́сте, всехва́льніи му́ченицы. Иму́ще дерзнове́ніе къ Человѣколю́бцу Бо́гу, мíръ ми́рови испроси́те и душа́мъ на́шимъ ве́лію ми́лость.

Сла́ва, и ны́не, крестобогоро́диченъ. Подо́бенъ: Ра́дуйся, по́стникомъ.

Агнца своего́ Агница иногда́ зря́щи, къ заколе́нію тща́щася, усе́рдно послѣ́доваше, сія́ вопію́щи Ему́: ка́мо и́деши, Ча́до Мое́ сладча́йшее, Христе́? Чесо́ ра́ди ско́рое тече́ніе сіе́, Долготерпѣли́ве, тече́ши нелѣ́ностно? Іису́се Возжелѣ́ннейшій, Безгрѣ́шне, Многоми́лостиве Го́споди, да́ждь Ми́ сло́во, Рабѣ́ Твое́й, Сы́не Мо́й Вселюбе́знѣйшій, не пре́зри Мене́, Ще́дре, молча́, Тя́ стра́нно Ро́ждшую, Бо́же Всеще́дре, да́руяй мíрови ве́лію ми́лость.


ВЪ ПЯТОКЪ 2-Я СЕДМИЦЫ, НА УТРЕНИ,
Тро́ичны гла́са.

По 1-мъ стихосло́віи сѣда́льны кре́стны осмогла́сника съ богоро́дичнымъ.

По 2-мъ же стихосло́віи глаго́лемъ настоя́щія сѣда́льны, гла́съ 4. Подо́бенъ: Ско́ро предвари́.

Поще́ніемъ возвыша́ющеся отъ земноревни́тельныхъ страсте́й, вознесе́мъ Го́спода, возне́сшагося на Кре́стъ и мíръ возвы́сившаго. Піи́мъ во чу́вствѣ умиле́нія питіе́, пріи́мемъ де́нь во умѣ́ и ча́съ, въ о́ньже Вѣ́чному Судіи́ предста́немъ. [Два́жды.]

[Сла́ва, и ны́нѣ,] крестобогоро́диченъ. Подо́бенъ:

Безневѣ́стная Ма́ти Твоя́, я́ко ви́дѣ на Кре́стъ Тя́ возвыша́ема, рыда́ющи и пла́чущи сицева́я глаго́лаше: что́ но́вое и стра́нное сіе́, Сы́не Мо́й, чу́до? ка́ко Тя́ беззако́нный наро́дъ ко Кресту́ пригвожда́етъ, всѣ́хъ Тя́ Жи́знь, Свѣ́та Моего́ Сладча́йшаго?

По 3-мъ стихосло́віи сѣда́ленъ господи́на Ѳео́дора, гла́съ 5. Подо́бенъ: Сія́етъ дне́сь.

Сія́етъ, Го́споди, благода́ть Креста́ Твоего́, всю́ вселе́нную облиста́ющая, крѣ́пость бѣсо́вскую потребля́етъ и поще́нія тече́ніе ны́нѣ благоукраша́етъ, въ нѣ́мже укрѣпля́я, поми́луй на́съ. [Два́жды.]

[Сла́ва, и ны́нѣ,] крестобогоро́диченъ, гла́съ то́йже. Подо́бенъ: Собезнача́льное.

Вознесе́на на Дре́вѣ я́ко ви́дѣ, ро́ждшая Тя́ Ма́ти, кромѣ́ болѣ́зней, и рыда́ше съ пла́чемъ, и взыва́ше: увы́ Мнѣ́, Сладча́йшій Сы́не! уязвля́юся ны́нѣ душе́ю, на Крестѣ́ зря́щи Тя́, посредѣ́ двою́ злодѣ́ю, а́ки злодѣ́я пригвожда́ема.

Кано́нъ мине́и и настоя́щія трипѣ́снцы, по чи́ну и́хъ, господи́на Іо́сифа. И стихосло́вится пѣ́снь. Гла́съ 4.

Пѣ́снь 5.

Ирмо́съ: Нечести́віи не у́зрятъ сла́вы Твоея́, Христе́, [но мы́ Тя́, Единоро́дне, Оте́ческія сла́вы сія́ніе Божества́, отъ но́щи у́тренююще, воспѣва́емъ Тя́, Человѣколю́бче].

Во́лею, Влады́ко, возне́слся еси́ на Кре́стъ и низве́рглъ еси́ врага́, тѣ́мже во́лею низве́ржена мя́ похотьми́ въ про́пасть, благоутро́біемъ Твои́мъ испра́ви.

Омраче́на мя́ страстьми́ безмѣ́стными душе́ю, просвѣти́, Іису́се, омрачи́вый со́лнце на Крестѣ́ просте́рся, и просвѣти́вый вся́ вселе́нныя исполне́нія.

По́стную пучи́ну преплы́ти ти́хо сподо́би мя́, Христе́, утиша́я во́лны мы́сли моея́ и въ приста́нища Воскресе́нія окорми́.

Богоро́диченъ: Чи́стую чисто́тствующимъ почти́мъ умо́мъ, добро́ту Іа́ковлю, Боже́ственными дѣя́ньми украша́ющеся, благоче́стно воспои́мъ, я́ко Ма́терь Бо́га на́шего.

Иный трипѣ́снецъ, господи́на Ѳео́дора, гла́съ 5.

Ирмо́съ: Отъ но́щи покланя́ющіяся [Тебѣ́, Христе́, поми́луй и ми́ръ да́руй: зане́, свѣ́тъ, повелѣ́нія Твоя́ бы́ша исцѣле́нія рабо́мъ Твои́мъ, Человѣколю́бче].

Ты́, распе́нся, тлѣ́нія избавля́еши мя́, и прободе́нъ бы́въ, обезсме́ртствуеши мя́. Сла́влю Твою́ неизрече́нную ми́лость, я́ко прише́лъ еси́, Христе́, да спасе́ши мя́.

На Крестѣ́ просте́ръ дла́ни Твоя́, мы́сленнаго амали́ка уби́лъ еси́, лю́ди Твоя́ спаса́яй, Го́споди; сего́ ра́ди пое́мъ держа́ву Твою́.

[Сла́ва,] тро́иченъ: Въ Тре́хъ Ли́цахъ Божество́, Еди́но Нача́ло Всепресу́щное, воспои́мъ Отца́ Безнача́льнаго, и Сы́на, и Ду́ха Свята́го.

[И ны́нѣ,] богоро́диченъ: Его́же не́бо вмѣсти́ти не можа́ше, Ты́, во чре́вѣ заче́нши, родила́ еси́. О, стра́ннаго и неизрече́ннаго чудесе́! Тѣ́мже Тя́ вси́ пое́мъ, Пречи́стая.

Сла́ва Тебѣ́, Бо́же на́шъ, сла́ва Тебѣ́.

Мене́ ра́ди претерпѣ́вый распя́тіе, о́цетъ пи́вый и рекíй: соверши́шася! Соверши́ мое́ по́стное по́прище, удостоя́я мя́ ви́дѣти Твое́ воста́ніе.

Ирмо́съ: Отъ но́щи покланя́ющіяся Тебѣ́, Христе́, поми́луй и ми́ръ да́руй: зане́, свѣ́тъ, повелѣ́нія Твоя́ бы́ша исцѣле́нія рабо́мъ Твои́мъ, Человѣколю́бче.

Пѣ́снь 8.

Ирмо́съ: Отроки благочести́выя [въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки].

На Крестѣ́ пригво́ждься за благоутро́біе, разбо́йнику ра́й отве́рзлъ еси́; ны́нѣ же разбіе́на мя́ де́монскою лю́тостію и въ души́ всепло́тную я́зву пріи́мша, уврачу́й, отверза́я ми́ две́ри покая́нія Твои́мъ человѣколю́біемъ.

Посто́мъ просвѣти́вше пло́ть, ду́шу добродѣ́тельми утучни́мъ, убо́гія напита́имъ, бога́тство неистощи́мое на небесѣ́хъ купу́юще, и воззове́мъ: Го́спода по́йте, дѣла́, и превозноси́те Его́ во вѣ́ки.

Стра́стію Твое́ю тва́рь поколеба́ся, на Крестѣ́ Тя́ ви́дѣвше пригвожда́ема, Спа́се Преблагíй. Тѣ́мже молю́ Тя́, прило́ги коле́блемый при́сно зміи́ными: утверди́ у́мъ мо́й, Ще́дре, на тве́рдемъ ка́мени Твои́хъ хотѣ́ній.

Богоро́диченъ: Две́ре Бо́жія заключе́нна, е́юже еди́нъ про́йде Госпо́дь, напра́ви мя́ къ стезя́мъ боже́ственнымъ и отве́рзи ми́ спасе́нія две́ри, Богоблагода́тная, къ Тебѣ́ бо прибѣга́ю, Дѣ́во, еди́нѣй Предста́тельницѣ ро́да человѣ́ческаго.

Иный.

Ирмо́съ: Творца́ тва́ри, [Его́же ужаса́ются а́нгели, по́йте, лю́діе, и превозноси́те во вся́ вѣ́ки].

Дре́во всесвято́е, на не́мже Ты́, Христе́ мо́й, распя́лся еси́, поя́, преблагословлю́ Тя́ во вся́ вѣ́ки.

На Голго́ѳѣ беззако́нніи Тя́, Христе́, распе́нше, уби́ша, но живе́ши и спаса́еши на́съ во вѣ́ки.

Благослови́мъ Отца́, и Сы́на, и Свята́го Ду́ха, Го́спода.

Тро́иченъ: Страннолѣ́пно раздѣля́ется Тро́ица и пребыва́етъ нераздѣ́льна, я́ко Бо́гъ, Его́же превозно́симъ во вся́ вѣ́ки.

[И нынѣ,] богоро́диченъ: Моли́тву сотвори́ о пою́щихъ Тя́, Пречи́стая, изба́витися вся́кихъ искуше́ній и бѣ́дъ.

Сла́ва Тебѣ́, Бо́же на́шъ, сла́ва Тебѣ́.

Креста́ Твоего́, Го́споди, си́лою вжили́въ мя́, сподо́би благоду́шно сконча́ти поста́ тече́ніе.

Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].

Ирмо́съ: Творца́ тва́ри, Его́же ужаса́ются а́нгели, по́йте, лю́діе, и превозноси́те во вся́ вѣ́ки.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, [Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ].

Ка́мень Тя́ отсѣче́нный прови́дѣ проро́къ, отъ горы́ — Дѣ́вы, Спа́се, сокруши́вшаго ка́меніе Твои́мъ распя́тіемъ. Тѣ́мже отягче́на мя́ нечу́вствія ка́меніемъ, я́ко Всеще́дрый, свободи́.

Пости́ся отъ зло́бы, душе́ моя́, боже́ственною любо́вію наслажда́ющися, две́ри отве́рзи вся́кимъ благи́мъ ви́домъ, загражда́ющи лука́вства вхо́дъ воздержа́ніемъ и моле́ніемъ.

Мене́, осужде́наго, спаси́, осуди́вый Кресто́мъ Твои́мъ, Влады́ко Спа́се мо́й, вражду́, и да не пока́жеши гее́ннѣ пови́нна, оскверне́наго страстьми́ и грѣхми́ омраче́наго.

Богоро́диченъ: Пощади́ мя́, Христе́, егда́ пріи́деши суди́ти мíру со сла́вою, разрѣши́ мглу́ зло́бъ мои́хъ мольба́ми Ро́ждшія Тя́, и наслѣ́дника сотвори́ небе́снаго Ца́рствія Твоего́.

Иный.

Ирмо́съ: Иса́іе, лику́й, [Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ].

Па́ки ра́й отверза́еши еди́ною распе́нся, въ не́мже причаща́яся жи́зни, ра́дуюся, сме́рти избавля́яся вѣ́чныя преслуша́нія; тѣ́мже, Человѣколю́бче, я́ко Бо́га моего́ велича́ю Тя́.

Кля́твы орга́нъ, благослове́нія показа́ся печа́ть, Тво́й Животво́рный, Го́споди, Кре́стъ, на не́мже Тя́ взира́юще, оживля́емся уме́ршіи пре́жде, и воспѣва́юще Тя́, я́ко Влады́ку, велича́емъ.

[Сла́ва,] тро́иченъ: Еди́ну Существо́мъ воспѣва́ю Тя́, Безнача́льная Тро́ице, Честна́я, Живонача́льная, Несѣко́мая Еди́нице: Отче нерожде́нный, и рожде́нный Сло́ве и Сы́не, Ду́ше Святы́й, спаси́ ны́, пою́щія Тя́.

[И ны́нѣ,] богоро́диченъ: Па́че ума́ Рождество́ Твое́, Богома́ти: безъ му́жа бо зача́тіе въ Тебѣ́ и дѣ́вственно рожде́ніе бы́сть, и́бо Бо́гъ е́сть рожде́йся, Его́же велича́юще, Тя́, Дѣ́во, ублажа́емъ.

Сла́ва Тебѣ́, Бо́же на́шъ, сла́ва Тебѣ́.

Кре́сте Честны́й, крѣ́посте моя́ и прибѣ́жище, бу́ди ми́ просвѣще́ніе ны́нѣ воздержа́тельно, веселя́ и очища́я мя́, избавля́я отъ искуше́ній, да прославля́я тебе́, Влады́ку велича́ю Христа́.

Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

Свѣти́ленъ гла́са.

На стихо́внѣ самогла́сенъ, два́жды, гла́съ 8:

Страстоубíйца по́стъ настоя́щій, озло́бленныя отъ грѣха́ уврачева́ти обѣщава́ется, его́же я́ко богода́ннаго помо́щника почти́мъ, богопи́санныя скрижа́ли Моисе́омъ пріи́мше. Не предизбере́мъ сокруши́вшаго и́хъ невоздержа́ніемъ; не бу́демъ о́бщницы, и́хже тѣлеса́ падо́ша въ пусты́ни; не возсѣ́туимъ іуде́йски, но церко́вно просвѣти́мся; не фарисе́йски лицемѣ́руимъ, но ева́нгельски удобри́мся, хва́лящеся о Крестѣ́ Христа́, Изба́вителя ду́шъ на́шихъ.

Му́чениченъ: Что́ вы́ нарече́мъ, святíи? Херуви́мы ли? Яко на ва́съ почи́лъ е́сть Христо́съ. Серафи́мы ли? Яко непреста́нно просла́висте Его́. Ангелы ли? Тѣ́ла бо отврати́стеся. Си́лы ли? Дѣ́йствуете бо чудесы́. Мно́гая ва́ша имена́ и бо́льшая дарова́нія, моли́те спасти́ся душа́мъ на́шимъ.

Сла́ва и ны́нѣ, крестобогро́диченъ, гла́съ то́йже:

Что́ чу́дное и изя́щное! — Дѣ́ва Го́сподеви вопія́ше ма́терски. — Болѣ́зни, и́хже не имѣ́хъ, внегда́ роди́ти Тя́, Сы́не, о́стріи каса́ются се́рдца Моего́. Не терплю́ на Крестѣ́ пригвожде́на Тя́ зря́щи, Свѣ́те о́чію Мое́ю; потщи́ся у́бо, воста́ни, я́ко да просла́влю съ мíромъ ужа́сное смотре́ніе Твое́.


НА 6-МЪ ЧАСѢ,
Тропа́рь проро́чества, гла́съ 1:

Въ нощи́ и во дни́ припа́даемъ Тебѣ́, Го́споди, пода́ти оставле́ніе грѣхо́въ душа́мъ на́шимъ, да въ ми́рѣ поклони́мся Тебѣ́ и славосло́вимъ, Человѣколю́бче.

Проки́менъ, псало́мъ 37-й, гла́съ 4: Го́споди, да не я́ростію Твое́ю обличи́ши мене́,* ниже́ гнѣ́вомъ Твои́мъ нака́жеши мене́. Сти́хъ: Яко стрѣ́лы Твоя́ унзо́ша во мнѣ́ [и утверди́лъ еси́ на мнѣ́ ру́ку Твою́].

Проро́чества Иса́іина чте́ніе. [Глава́ 7.]

Бы́сть во дни́ Аха́за, сы́на Іоаѳа́мля, сы́на Озíи, царя́ Іу́дина: взы́де Раси́нъ, ца́рь Ара́мль, и Факе́й, сы́нъ Ромелíевъ, ца́рь Изра́илевъ, на Іерусали́мъ, воева́ти на него́, и не возмого́ша разори́ти его́. И возвѣсти́ся въ дому́ Дави́довѣ, глаго́ля: совѣща́ся Ара́мъ со Ефре́момъ, и ужасе́ся душа́ его́ и душа́ люде́й его́, я́коже въ дубра́вѣ дре́во вѣ́тромъ восколе́блется. И рече́ Госпо́дь ко Иса́іи: изы́ди во срѣ́теніе Аха́зу ты́ и оста́вшійся Іасу́въ, сы́нъ тво́й, къ купѣ́ли го́рняго пути́ села́ бѣли́льнича. И рече́ши ему́: блюди́ е́же молча́ти, и не бо́йся, ниже́ душа́ твоя́ да изнемо́жетъ о двою́ дре́ву главе́нь дымя́щихся си́хъ, егда́ бо гнѣ́въ я́рости Моея́ бу́детъ, па́ки исцѣлю́. Сы́нъ же Ара́мль и сы́нъ Ромелíевъ, я́ко совѣща́ста совѣ́тъ лука́вый на тя́, глаго́люще: взы́демъ во Іуде́ю и, собесѣ́довавше съ ни́ми, отврати́мъ я́ къ на́мъ и воцари́мъ въ не́й сы́на Тавеи́лева. Сія́ же глаго́летъ Госпо́дь Савао́ѳъ: не пребу́детъ совѣ́тъ се́й, ниже́ сбу́дется. Но глава́ Ара́му — Дама́скъ, и глава́ Дама́ску — Раси́нъ, но еще́ шестьдеся́тъ и пя́ть лѣ́тъ, оскудѣ́етъ ца́рство Ефре́мово отъ люде́й. Глава́ же Ефре́мови — Соморо́нъ, и глава́ Соморо́ну — сы́нъ Ромелíевъ. И а́ще не увѣ́рите, ниже́ и́мате разумѣ́ти. И приложи́ Госпо́дь глаго́лати ко Аха́зу, рекíй: проси́ себѣ́ зна́менія отъ Го́спода Бо́га твоего́ во глубину́, или́ въ высоту́. И рече́ Аха́зъ: не и́мамъ проси́ти, ниже́ искушу́ Го́спода. И рече́ (Иса́ія): слы́шите у́бо, до́ме Дави́довъ: еда́ ма́ло ва́мъ е́сть тру́дъ дая́ти человѣ́комъ, и ка́ко даете́ Го́сподеви тру́дъ? Сего́ ра́ди да́стъ Госпо́дь Са́мъ ва́мъ зна́меніе.

Проки́менъ, псало́мъ 38-й, гла́съ 6: Услы́ши моли́тву мою́, Го́споди,* и моле́ніе мое́ внуши́. Сти́хъ: Рѣ́хъ: сохраню́ пути́ моя́, е́же не согрѣша́ти ми́ язы́комъ мои́мъ.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 148 об. – 153.

Служба въ четвертокъ 2-й недѣли поста // Къ оглавленію Постной Тріоди // Служба въ субботу 2-й недѣли поста


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.