Церковный календарь
Новости


2018-11-16 / russportal
Ген. П. Н. Красновъ. "За чертополохомъ". Часть 2-я. Глава 43-я (1922)
2018-11-16 / russportal
Ген. П. Н. Красновъ. "За чертополохомъ". Часть 2-я. Глава 42-я (1922)
2018-11-16 / russportal
Прот. Михаилъ Помазанскій. Наше церковное правосознаніе (1976)
2018-11-16 / russportal
Прот. Михаилъ Помазанскій. Мысли о Православіи (1976)
2018-11-15 / russportal
Ген. П. Н. Красновъ. "За чертополохомъ". Часть 2-я. Глава 41-я (1922)
2018-11-15 / russportal
Ген. П. Н. Красновъ. "За чертополохомъ". Часть 2-я. Глава 40-я (1922)
2018-11-15 / russportal
Архіеп. Филаретъ (Гумилевскій). Слово (2-е) въ Великій пятокъ (1883)
2018-11-15 / russportal
Архіеп. Филаретъ (Гумилевскій). Слово (1-е) въ Великій пятокъ (1883)
2018-11-15 / russportal
Архіеп. Никонъ (Рклицкій). Православная Русь въ Канадѣ (1975)
2018-11-15 / russportal
Архіеп. Никонъ (Рклицкій). Тайна креста (1975)
2018-11-15 / russportal
Свт. Василій, еп. Кинешемскій. Бесѣда 6-я на Евангеліе отъ Марка (1996)
2018-11-15 / russportal
Свт. Василій, еп. Кинешемскій. Бесѣда 5-я на Евангеліе отъ Марка (1996)
2018-11-15 / russportal
Еп. Григорій (Граббе). Еще объ одной статьѣ (1996)
2018-11-15 / russportal
Еп. Григорій (Граббе). Отвѣтъ (2-й) архіеп. Іоанну Шаховскому (1996)
2018-11-14 / russportal
Ген. П. Н. Красновъ. "За чертополохомъ". Часть 2-я. Глава 39-я (1922)
2018-11-14 / russportal
Ген. П. Н. Красновъ. "За чертополохомъ". Часть 2-я. Глава 38-я (1922)
Новости въ видѣ
RSS-канала: .
Сегодня - пятница, 16 ноября 2018 г. Сейчасъ на порталѣ посѣтителей - 11.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ПОНЕДѢЛЬНИКЪ ТРЕТІЯ СЕДМИЦЫ ВЕЛИКАГО ПОСТА.

ВЪ НЕДѢЛЮ ВЕЧЕРА, ВО СВѢТИЛЬНИЧНОЕ,
Поста́вимъ стихо́въ 10 и пое́мъ умили́тельны осмогла́сника 4 и трипѣ́снца подо́бны господи́на Іо́сифа, гла́съ 8. Подо́бенъ: Неизче́тенъ.

Безчи́сленная Ти́ прегрѣши́въ, безчи́сленныя му́ки ожида́ю: скре́жета зу́бнаго, и пла́ча неутѣ́шимаго, гее́нны о́гненныя, и тмы́, и та́ртара, Судіе́ Пра́веднѣйшій. Сле́зы ми́ у́бо да́руй, и́миже обря́щу оставле́ніе и злы́хъ мои́хъ разрѣше́ніе, постя́ся и зовы́й Ти́: Влады́ко Христе́, уще́дри мя́ за вели́кую и бога́тую ми́лость.

Подо́бенъ:

Мене́, заблу́ждшаго на гора́хъ лю́тыхъ преступле́ній, взыщи́, Сло́ве, и къ Тебѣ́ воззови́, обы́чаи лука́выя ума́ моего́ дале́че отгоня́я, уме́рша па́ки оживи́ и посто́мъ очи́сти, въ пла́чѣ непреста́нномъ вопію́ща и глаго́люща: Влады́ко Христе́, уще́дри мя́ за вели́кую и бога́тую ми́лость.

Ина стихи́ра, господи́на Ѳео́дора, гла́съ то́йже. Подо́бенъ: Пресла́вное.

Поста́ наче́нше седми́цу тре́тію, Тро́ицу Честну́ю восхва́лимъ, вѣ́рніи, про́чее ра́достно преходя́ще, плотскíя же стра́сти увяди́вше отъ ду́шъ на́шихъ, цвѣ́ты боже́ственныя пожне́мъ, вѣнцы́ испле́тше нача́льницѣ дне́й, да вси́ Христа́, я́ко Побѣди́теля, вѣнцы́ нося́ще, воспои́мъ.

И мине́и 3. Сла́ва, и ны́нѣ, богоро́диченъ. Свѣ́те Ти́хій...

По вхо́дѣ, проки́менъ, гла́съ 8: Не отврати́ лица́ Твоего́ отъ о́трока Твоего́... Зри́ ли́стъ 65.

На стихо́внѣ самогла́сенъ дне́, два́жды, гла́съ 8:

Брозды́ исплюва́хъ оте́ческія непостоя́ннымъ умо́мъ, со ско́тскими грѣха́ помышле́ньми пожи́хъ, все́ мое́ житіе́ ижди́въ блу́дно окая́нный а́зъ, пи́щи лише́нъ, утвержда́ющія се́рдце, вре́менно утучня́ющею сла́стію насы́тихся. Но, Отче Благíй, не затвори́ ми́ человѣколю́бныя утро́бы, но отве́рзъ, пріими́ мя́, я́ко блу́днаго сы́на, и спаси́ мя́.

Му́чениченъ: Му́ченцы Госпо́дни, вся́ко мѣ́сто освяща́ете и вся́къ неду́гъ врачу́ете, и ны́нѣ моли́те изба́витися сѣте́й вра́жіихъ душа́мъ на́шимъ, мо́лимся.

Сла́ва, и ны́нѣ, богоро́диченъ, гла́съ то́йже:

Небе́сная пою́тъ Тя́, Обра́дованная, Ма́ти Безневѣ́стная, и мы́ славосло́вимъ неизслѣ́дованное Твое́ Рождество́, Богоро́дице, моли́ спасти́ся душа́мъ на́шимъ.

И про́чее послѣ́дованіе, я́ко предъяви́ся.


ВЪ ПОНЕДѢЛЬНИКЪ 3-Я СЕДМИЦЫ, НА УТРЕНИ,
Тро́ичны гла́са.

По 1-мъ стихосло́віи глаго́лемъ сѣда́льны умили́тельныя осмогла́сника, случи́вшагося гла́са.

По 2-мъ же стихосло́віи сѣда́ленъ господи́на Іо́сифа, гла́съ 8. Подо́бенъ: Повелѣ́нное та́йно.

Воздержа́нія огне́мъ попали́мъ вси́ хвра́стная страсте́й воста́нія, и пла́мень о́ный негаси́мый сле́зными ны́нѣ угаси́мъ то́ки, вопію́ще Суди́ти Хотя́щему все́й земли́: Спа́се, Благоутро́бне Го́споди, неосужде́ны на́съ соблюди́, подая́ на́мъ согрѣше́ній проще́ніе. [Два́жды.]

[Сла́ва, и ны́нѣ,] богоро́диченъ. Подо́бенъ:

Богоблагода́тная, Чи́стая, Благослове́нная, за милосе́рдіе щедро́тъ изъ Тебе́ Рожде́ннаго, съ вы́шними си́лами, и со арха́нгелы, и со всѣ́ми безпло́тными о на́съ моли́те непреста́нно да́ти на́мъ пре́жде конца́ проще́ніе, и очище́ніе грѣхо́въ, и житія́ исправле́ніе, я́ко да обря́щемъ ми́лость.

По 3-мъ же стихосло́віи сѣда́ленъ, господи́на Ѳео́дора, гла́съ 8. Подо́бенъ: Повелѣ́нное та́йно.

Тро́ице Свята́я и Честна́я, по́стъ въ седми́цахъ тріе́хъ соверша́ющія, сохрани́ цѣ́лы и неосужде́ны, сподо́би благотещи́ и къ про́чимъ, и вся́ за́повѣди Твоя́ соверши́ти, я́ко да си́це дости́гнемъ неосужде́нно ви́дѣти пресла́вное Воскресе́ніе, пѣ́ніе хвалу́ принося́ще. [Два́жды.]

[Сла́ва, и ны́нѣ,] богоро́диченъ, гла́съ то́йже:

Предста́тельство вѣ́рныхъ, Богороди́тельнице, оскорбля́емыхъ ра́досте и сѣ́тующихъ преве́ліе утѣше́ніе, отъ чре́ва Твоего́, Дѣ́во, всесвята́го преесте́ственно Ро́ждшагося непреста́нно о на́съ со а́нгелы и нача́лы моли́ изба́витися на́мъ въ ча́съ испыта́нія лю́таго осужде́нія.

Кано́нъ въ мине́и и настоя́щій трипѣ́снецъ господи́на Іо́сифа. И стихосло́вится пѣ́снь. Гла́съ 8.

Пѣ́снь 1.

Ирмо́съ: Пѣ́снь возсле́мъ, лю́діе, [чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, Еди́ному Влады́цѣ].

Имѣ́яй, я́ко Бо́гъ, ми́лостивное, ка́ющася пріими́ мя́, ижди́вшаго житіе́ мое́ блу́дно, — вопію́ Ти́, — согрѣши́хъ, клеветнико́въ не тре́бую, сту́дъ дѣ́лъ мои́хъ принося́.

Снѣ́дь оста́вль а́нгельскую, уподо́бихся ското́мъ, внегда́ пита́тися скве́рною зло́бою, но у́бо обраща́ющася пріими́ мя́, я́ко еди́наго отъ нае́мникъ Твои́хъ, Небе́сный Отче.

Но́щь сласте́й отъ пи́щи прибыва́ющую, вси́ вѣ́рніи, оста́вивше, къ свѣ́ту и́стины тща́тельно присту́пимъ, да свѣтоно́сныя трапе́зы сподо́бимся.

Богоро́диченъ: Ра́дуйся, пресвяты́й Хра́ме, Руно́ богоро́сное, запечатлѣ́нный Исто́чниче безсме́ртныя Струи́! Ста́до Твое́, Влады́чице, сохраня́й отъ вся́кихъ ра́тниковъ невоева́но.

Иный, господи́на Ѳео́дора, гла́съ то́йже.

Ирмо́съ: Пои́мъ Бо́гу, [отъ го́рькія рабо́ты фарао́новы изба́вльшему Изра́иля и о́гненнымъ столпо́мъ и свѣ́тлымъ о́блакомъ наста́вльшему, я́ко просла́вися].

Ны́нѣ въ седми́цахъ тріе́хъ, я́коже дре́вле тридне́внѣ Изра́иль, очи́стившеся, бра́тіе, въ го́ру моли́твъ дости́гнемъ, и отту́ду Боже́ственный гла́съ услы́шавше, Христа́ воспои́мъ.

Якоже Сампсо́нъ посто́мъ укрѣ́пльшеся, пріиди́те, я́коже ина́го звѣ́ря порази́мъ, лю́діе, чре́внаго бѣ́са, и не посмѣе́тся Дали́да страсте́й, прельща́ющая на́съ.

[Сла́ва,] тро́иченъ: Три́ пою́ херуви́мски, Свято́е Тебе́ Божество́: Свѣ́ты и Свѣ́тъ, и Живо́тъ и Животы́, Бо́га ро́ждшаго, Бо́га рожде́ннаго, Бо́га отъ Отца́ исходя́щаго — Ду́ха Жива́го.

[И ны́нѣ,] богоро́диченъ: Ра́дуйся, Евы ра́досте, и́бо о́ныя печа́ль Рождество́мъ Твои́мъ преста́, Чи́стая. Ра́дуйся, Незаходи́маго Свѣ́та свѣ́тлый Облаче, изъ него́же возсія́ Христо́съ Бо́гъ.

Сла́ва Тебѣ́, Бо́же на́шъ, сла́ва Тебѣ́.

Вѣ́рою, я́коже Дави́дъ, и мы́ смиренному́дріемъ вооружи́вшеся, я́ко ина́го Голіа́ѳа, го́рдаго ума́ низложи́вше, посѣце́мъ ку́пно и тмы́ страсте́й.

Ирмо́съ: Пои́мъ Бо́гу, отъ го́рькія рабо́ты фарао́новы изба́вльшему Изра́иля и о́гненнымъ столпо́мъ и свѣ́тлымъ о́блакомъ наста́вльшему, я́ко просла́вися.

Пѣ́снь 8.

Ирмо́съ: Богоглаго́ливіи [о́троцы въ пещи́, со огне́мъ пла́мень попира́юще, поя́ху: благослови́те, дѣла́ Госпо́дня, Го́спода].

Ижди́въ бога́тство оте́ческое со блудни́цами, изгна́нъ бы́хъ отъ преддве́рій благода́ти окая́нный, но пріими́ мя́, Отче, за безчи́сленную ми́лость.

Во свѣтлѣ́йшемъ поста́ свѣтозаре́ніи моли́твъ просвѣти́вшеся, свѣтови́дни бу́демъ, я́ко да грѣхо́вныя тмы́ избѣ́гнемъ.

Мо́литъ Тя́ ли́къ безпло́тныхъ, херуви́ми мо́лятъ и святы́хъ чи́нове, ду́ши на́ша спаси́, Христе́, Многоми́лостиве.

Богоро́диченъ: Недѣ́ланный Гро́здъ заче́ншая, омраче́нна мя́ пія́нствомъ грѣха́ уцѣлому́дри, Богоро́дице Дѣ́во, наде́ждо ду́шъ на́шихъ.

Иный.

Ирмо́съ: Покрыва́яй вода́ми [превы́спренняя Своя́, полага́яй мо́рю предѣ́лъ песо́къ, и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки].

Оте́ческаго сокро́вища, имѣ́нія чу́днаго, ма́тере всѣ́хъ послужи́вшихъ Влады́цѣ Христу́, пріиди́те наслади́мся, бра́тіе, поста́, и́бо се́й укрѣпля́етъ тѣ́ло и просвѣща́етъ у́мъ и се́рдце.

Гедео́на чу́днаго подража́ющи, душе́, добродѣ́тели нося́щи, вѣ́ру, наде́жду и любо́вь Христо́ву, изы́ди, убива́ющи иноплеме́нныя стра́сти, я́коже о́ный съ треми́ сты́ мадіа́мскій язы́къ потребля́я.

[Благослови́мъ Отца́, и Сы́на, и Свята́го Ду́ха, Го́спода].

Тро́иченъ: И Тро́ицу сла́влю Тя́, и я́ко Еди́ницу пою́ Тя́, Божество́ еди́но: Отче Вседержи́телю, и Единонача́льне Сы́не, Ду́ше Святы́й; и Всевлады́чняя держа́во, еди́но Естество́, еди́но Ца́рство, въ Тріе́хъ начерта́ніихъ же покланя́емое.

[И ны́нѣ,] богоро́диченъ: Яже въ рождествѣ́ убѣже́ болѣ́зни преесте́ственно, въ Твое́й честнѣ́й Стра́сти позна́ Ро́ждшая Тя́ и болѣ́зноваше, зря́щи на Крестѣ́ Тя́ пригвожде́на во́лею отъ іуде́евъ, на вода́хъ зе́млю Основа́вшаго.

Сла́ва Тебѣ́, Бо́же на́шъ, сла́ва Тебѣ́.

Егда́ пріи́деши во сла́вѣ Твое́й суди́ти все́й земли́, съ ты́сящами и тма́ми си́лъ Твои́хъ, тогда́ мя́, Го́споди, пощади́, осла́би и изба́ви осужде́нія, не посрами́ мене́, ниже́ осуди́ огню́ вѣ́чному.

Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].

Ирмо́съ: Покрыва́яй вода́ми превы́спренняя Своя́, полага́яй мо́рю предѣ́лъ песо́къ, и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.

Пѣ́снь 9.

Ирмо́съ: Проявле́нное [на горѣ́законополо́жнику во огни́ и купинѣ́, Рождество́ Приснодѣ́вы въ на́ше, вѣ́рныхъ, спасе́ніе пѣ́сньми немо́лчными велича́емъ].

Отъ Твоея́ удали́вшася, Отче, любве́ и во́льными стремле́ньми сласте́й порабоще́на, обраща́ющася, я́ко блу́днаго, пріими́, еди́нъ бо еси́ Многоми́лостивъ.

Непло́дная яви́хся смоко́вница, еди́ну то́кмо зло́бу дѣ́лая окая́нный, о́гнь мнѣ́ исходата́ившую. Ты́ у́бо, Го́споди, плодоно́сна мя́ покажи́, дѣя́нія блага́я плодонося́ща Тебѣ́.

Пости́ся, душе́ моя́, зло́бы и лука́вства, удержи́ся гнѣ́ва, и я́рости, и вся́каго грѣха́: Іису́съ бо такова́го хо́щетъ поста́, Человѣколю́бецъ Бо́гъ на́шъ.

Богоро́диченъ: Ты́ еси́, Богоро́дице, ору́жіе на́ше и стѣна́, Ты́ еси́ заступле́ніе къ Тебѣ́ прибѣга́ющихъ. Тя́ и ны́нѣ на моли́тву дви́жемъ, да изба́вимся отъ враго́въ на́шихъ.

Иный.

Ирмо́съ: Велича́емъ Тя́, [Всенепоро́чную Ма́терь Христа́ Бо́га на́шего, Юже осѣни́ Ду́хъ Святы́й].

Чи́стый по́стъ, злы́хъ отложе́ніе принесе́мъ, я́ко да́ры благопрія́тны Христу́ Бо́гу на́шему.

Елиссе́й дре́вле ка́ко пита́ше проро́ки, увѣ́дѣвши, душе́, любе́зно пита́йся, благодаря́щи Христа́.

[Сла́ва,] тро́иченъ: Тріѵпоста́сное еди́но Тя́ Божество́ воспѣва́ю, Ли́цы зра́къ: Отца́ Безнача́льнаго, и Сы́на, и Ду́ха Жива́го.

[И ны́нѣ,] богоро́диченъ: Богома́ти Отрокови́це, Черто́же небе́снаго Царя́ Христа́, спаси́ моли́твами Твои́ми любо́вію пою́щія Тя́.

Сла́ва Тебѣ́, Бо́же на́шъ, сла́ва Тебѣ́.

Даніи́лъ въ ро́вѣ звѣ́ри укроти́ воздержа́нія броздо́ю, и мы́, постя́щеся, стра́сти удручи́мъ.

Ирмо́съ: Велича́емъ Тя́, Всенепоро́чную Ма́терь Христа́ Бо́га на́шего, Юже осѣни́ Ду́хъ Святы́й.

Свѣти́ленъ гла́са.

На стихо́внѣ самогла́сенъ дне́, два́жды, гла́съ 4:

Въ лю́тую прегрѣше́ній мои́хъ скве́рну облеко́хся и ра́дости черто́га изгна́нъ бы́хъ, уще́дри мя́ неизглаго́ланнымъ Твои́мъ благоутро́біемъ, я́ко блу́днаго сы́на, Бо́же, и поми́луй мя́.

Му́чениченъ: Кто́ не диви́тся зря́, святíи му́ченицы, по́двигъ до́брый, и́мже подвиза́стеся? Ка́ко бо въ тѣлеси́ су́ще, безпло́тнаго врага́ побѣди́сте, Христа́ исповѣ́давше и Кресто́мъ вооружи́вшеся? Тѣ́мже досто́йно яви́стеся де́моновъ прогони́тели и ва́рваровъ бори́тели, непреста́нно моли́те спасти́ся душа́мъ на́шимъ.

Сла́ва, и ны́нѣ, богоро́диченъ, гла́съ то́йже:

Свѣще́ неугаси́мая, Престо́ле пра́ведный, Пречи́стая Влады́чице, моли́ спасти́ся душа́мъ на́шимъ.


НА 6-МЪ ЧАСѢ,
Тропа́рь проро́чества, гла́съ 4:

Яко не́мощни есмы́ и разсла́блени грѣхми́, исцѣли́ сокруше́нія на́ша, Врачу́ ду́шъ на́шихъ, свѣ́дый у́мъ человѣ́чь, Человѣколю́бче.

Проки́менъ, псало́мъ 41-й, гла́съ 4: Моли́тва Бо́гу живота́ моего́,* реку́ Бо́гу: Засту́пникъ мо́й еси́. Сти́хъ: Имже о́бразомъ жела́етъ еле́нь на исто́чники водны́я, [си́це жела́етъ душа́ моя́ къ Тебѣ́, Бо́же].

Проро́чества Иса́іина чте́ніе. [Глава́ 8.]

Го́спода си́лъ — Того́ освяти́те, и То́й бу́детъ тебѣ́ въ стра́хъ. И а́ще бу́деши упова́я на Него́, бу́детъ тебѣ́ во освяще́ніе, а не я́коже о ка́мень претыка́нія преткне́шися, ниже́ я́ко о ка́мень паде́нія; до́мове же Іа́ковли — въ пру́глѣ, и въ раздо́ліи — сѣдя́щіи во Іерусали́мѣ. Сего́ ра́ди изнемо́гутъ въ ни́хъ мно́зи, и паду́тъ, и сокруша́тся, и прибли́жатся, и я́ти бу́дутъ человѣ́цы въ тверды́ни су́ще. Тогда́ явле́ни бу́дутъ печатлѣ́ющіи зако́нъ, е́же не учи́тися. И рече́тъ: пожду́ Бо́га, отвра́щшаго лице́ Свое́ отъ до́му Іа́ковля, и упова́я бу́ду На́нь. Се́ а́зъ и дѣ́ти, я́же ми́ даде́ Бо́гъ. И бу́дутъ зна́менія и чудеса́ въ дому́ Изра́илевѣ отъ Го́спода Савао́ѳа, Иже обита́етъ на горѣ́ Сіо́нъ. И а́ще реку́тъ къ ва́мъ: изыщи́те чревоволше́бниковъ и отъ земли́ возглаша́ющихъ, тщесло́вующихъ, и́же отъ чре́ва глаша́ютъ, — не язы́къ ли къ Бо́гу своему́ взы́щетъ? Что́ испыту́ютъ ме́ртвыя о живы́хъ? Зако́нъ бо въ по́мощь даде́, да реку́тъ не я́коже сло́во сіе́, за́нь же не лѣ́ть да́ры дая́ти. И пріи́детъ на вы́ жесто́къ гла́дъ, и бу́детъ, егда́ вза́лчете, ско́рбни бу́дете и зло́ рече́те кня́зю и оте́честву. И воззря́тъ на не́бо горѣ́, и на зе́млю ни́зу при́зрятъ, и се́ ску́дость тѣ́сна и тма́, ско́рбь и тѣснота́, и тма́, я́коже не ви́дѣти; и не оскудѣ́етъ въ тѣснотѣ́ сы́й да́же до вре́мене. Сіе́ пре́жде испíй, ско́ро твори́, страно́ Завуло́ня, и земле́ Нефѳали́мля, и про́чіи при мо́ри живу́щіи и объ ону́ страну́ Іорда́на. Галиле́я язы́ковъ, лю́діе, ходя́щіи во тмѣ́, ви́дѣша Свѣ́тъ ве́лій; живу́щіи во странѣ́ и сѣ́ни сме́ртнѣй, — Свѣ́тъ возсія́етъ на вы́! Мно́жайшія лю́ди, я́же изве́лъ еси́ въ весе́ліи Твое́мъ, и возвеселя́тся предъ Тобо́ю, я́коже веселя́щіися въ жа́тву и я́коже веселя́тся дѣля́щіи коры́сти; зане́ отъя́тся яре́мъ, лежа́й на ни́хъ, и же́злъ, и́же на вы́и и́хъ, же́злъ бо истязу́ющихъ разсы́па Госпо́дь, я́коже въ де́нь, и́же на Мадіа́ма. Яко вся́кую оде́жду, собра́нну ле́стію, и ри́зу съ примире́ніемъ отдаду́тъ, и восхотя́тъ, да бы́ша огне́мъ сожже́ни бы́ли. Яко Отроча́ роди́ся на́мъ, Сы́нъ, и даде́ся на́мъ, Его́же нача́льство бы́сть на ра́мѣ Его́, и нарица́ется и́мя Его́: вели́ка совѣ́та Ангелъ, Чу́денъ, Совѣ́тникъ, Бо́гъ Крѣ́пкій, Властели́нъ, Кня́зь ми́ра, Оте́цъ бу́дущаго вѣ́ка; приведу́ бо ми́ръ на кня́зи, ми́ръ и здра́віе Ему́. И ве́ліе нача́льство Его́ и ми́ра Его́ нѣ́сть предѣ́ла на престо́лѣ Дави́довѣ и на Ца́рствѣ Его́, испра́вити е́ и заступи́ти его́ въ судѣ́ и пра́вдѣ отъ ны́нѣ и до вѣ́ка. Ре́вность Го́спода Савао́ѳа сотвори́тъ сія́.

Проки́менъ, псало́мъ 42-й, гла́съ 6: Спасе́ніе лица́ моего́* и Бо́гъ мо́й. Сти́хъ: Суди́ ми́, Бо́же, и разсуди́ прю́ мою́.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 166 – 169 об.

Служба въ недѣлю 2-ю Великаго поста // Къ оглавленію Постной Тріоди // Служба во вторникъ 3-й недѣли поста


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.