Церковный календарь
Новости


2018-07-17 / russportal
С. Павловъ. Екатеринбургское злодѣяніе 17-го іюля 1918 года (1947)
2018-07-16 / russportal
В. К. Абданкъ-Коссовскій. Страшная годовщина 17 іюля 1918 г. (1942)
2018-07-16 / russportal
Поиски отвѣта на вопросъ о судьбѣ останковъ Царской Семьи (1995)
2018-07-15 / russportal
Ген. П. Н. Красновъ. "За чертополохомъ". Часть 1-я. Глава 38-я (1922)
2018-07-15 / russportal
Ген. П. Н. Красновъ. "За чертополохомъ". Часть 1-я. Глава 37-я (1922)
2018-07-15 / russportal
Ген. П. Н. Красновъ. "За чертополохомъ". Часть 1-я. Глава 36-я (1922)
2018-07-15 / russportal
Ген. П. Н. Красновъ. "За чертополохомъ". Часть 1-я. Глава 35-я (1922)
2018-07-15 / russportal
Н. А. Соколовъ. "Убійство Царской Семьи". Глава 16-я (1925)
2018-07-15 / russportal
Н. А. Соколовъ. "Убійство Царской Семьи". Глава 15-я (1925)
2018-07-14 / russportal
И. А. Ильинъ. "Путь духовнаго обновленія". Гл. 4-я. Разд. 4-й (1962)
2018-07-14 / russportal
И. А. Ильинъ. "Путь духовнаго обновленія". Гл. 4-я. Разд. 3-й (1962)
2018-07-14 / russportal
И. А. Ильинъ. "Путь духовнаго обновленія". Гл. 4-я. Разд. 2-й (1962)
2018-07-14 / russportal
И. А. Ильинъ. "Путь духовнаго обновленія". Гл. 4-я. Разд. 1-й (1962)
2018-07-13 / russportal
Преп. Ефремъ Сиринъ. О блаженныхъ мѣстахъ (1897)
2018-07-13 / russportal
Преп. Ефремъ Сиринъ. О блаженныхъ обителяхъ (1897)
2018-07-13 / russportal
Ген. П. Н. Красновъ. "За чертополохомъ". Часть 1-я. Глава 34-я (1922)
Новости въ видѣ
RSS-канала: .
Сегодня - вторникъ, 17 iюля 2018 г. Сейчасъ на порталѣ посѣтителей - 15.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВО ВТОРНИКЪ ТРЕТІЯ СЕДМИЦЫ ВЕЛИКАГО ПОСТА.

ВЪ ПОНЕДѢЛЬНИКЪ ТРЕТІЯ СЕДМИЦЫ ВЕЧЕРА,
На Го́споди воззва́хъ... поста́вимъ стихо́въ 6 и пое́мъ настоя́щія подо́бны трипѣ́снца и мине́и 3.
Стихи́ры подо́бны, господи́на Іо́сифа, гла́съ 1. Подо́бенъ: Всехва́льніи му́ченицы.

По́стъ возлю́бимъ, души́ стра́сти лютѣ́йшія дѣ́йствомъ Ду́ха увяда́ющій, и Боже́ственная дѣя́нія дѣ́яти укрѣпля́ющій, и у́мъ на не́бо возсыла́ющій, и проще́ніе хода́тайствующій, о ни́хже согрѣши́хомъ, да́руемое отъ Бо́га Ще́драго.

Подо́бенъ:

Все́ житіе́ мое́ сту́дно ижди́въ, Го́споди, со блудни́цами окая́нный, я́коже блу́дный умиле́ніемъ зову́: Отче Небе́сный, согрѣши́хъ, очи́сти и спаси́ мя́, и не отри́ни мене́ самого́ отъ Тебе́ удали́вшася и Боже́ственными дѣ́лы ны́нѣ обнища́вшаго.

Ина стихи́ра подо́бна, господи́на Ѳео́дора, гла́съ 3. Подо́бенъ: Пріиди́те вси́.

Пріиди́те вси́, въ кимва́лѣхъ псало́мскихъ, честно́е воздержа́ніе цѣлу́юще, возгласи́мъ, въ не́мъ бо мы́сленно змíя злонача́льнаго расто́ргнемъ. Тѣ́мже со дерзнове́ніемъ возопіи́мъ Христу́: пода́ждь, Спа́се, неосужде́нно всесвяты́й Тво́й Кре́стъ ви́дѣти и поклони́тися, во псалмѣ́хъ и пѣ́ніихъ пра́здновати свѣ́тло.

И мине́и 3. Сла́ва и ны́нѣ, богоро́диченъ.

Проки́менъ, псало́мъ 43-й, гла́съ 4: О Бо́зѣ похва́лимся ве́сь де́нь,* и о и́мени Твое́мъ исповѣ́мыся во вѣ́къ. Сти́хъ: Бо́же, уши́ма на́шима услы́шахомъ [и отцы́ на́ши возвѣсти́ша на́мъ].

Бытія́ чте́ніе. [Глава́ 6.]

Но́е человѣ́къ пра́веденъ, соверше́нъ сы́й въ ро́дѣ свое́мъ, Бо́гу угоди́ Но́е. Роди́ же Но́е три́ сы́ны: Си́ма, Ха́ма, Іа́феѳа. Растлѣ́ся же земля́ предъ Бо́гомъ и напо́лнися земля́ непра́вды. И ви́дѣ Госпо́дь Бо́гъ зе́млю: и бѣ́ растлѣ́нна, я́ко растли́ вся́ка пло́ть пу́ть сво́й на земли́. И рече́ Госпо́дь Бо́гъ Но́ю: вре́мя вся́каго человѣ́ка пріи́де предъ Мя́, я́ко испо́лнися земля́ непра́вды отъ ни́хъ, и се́ Азъ погублю́ и́хъ и зе́млю. Сотвори́ у́бо себѣ́ ковче́гъ отъ дре́въ (негнію́щихъ) четвероуго́льныхъ, гнѣ́зда сотвори́ши въ ковче́зѣ, и посмоли́ши его́ внутрьу́ду и внѣу́ду смоло́ю. И та́ко сотвори́ши ковче́гъ: тре́хъ со́тъ лакте́й долгота́ ковче́га, и пяти́десяти лакте́й широта́, и три́десяти лакте́й высота́ его́. Собира́я сво́домъ сотвори́ши ковче́гъ, и въ ла́коть сверши́ши его́ свы́ше, две́рь же ковче́га сотвори́ши отъ страны́, обита́лища двокро́вна и трекро́вна сотвори́ши въ не́мъ. Азъ же се́ наведу́ пото́пъ, во́ду на зе́млю, погуби́ти вся́ку пло́ть, въ не́йже е́сть ду́хъ жи́зни подъ небесе́мъ, и ели́ка су́ть на земли́, сконча́ются. И поста́влю завѣ́тъ Мо́й съ тобо́ю: вни́деши же въ ковче́гъ ты́, и сы́нове твои́, и жена́ твоя́ и жены́ сыно́въ твои́хъ съ тобо́ю. И отъ всѣ́хъ ското́въ, и отъ всѣ́хъ га́дъ, и отъ всѣ́хъ звѣре́й, и отъ вся́кія пло́ти, два́ два́ отъ всѣ́хъ введе́ши въ ковче́гъ, да пита́еши съ собо́ю, му́жескій по́лъ и же́нскій бу́дутъ. Отъ всѣ́хъ пти́цъ перна́тыхъ по ро́ду, и отъ всѣ́хъ ското́въ по ро́ду, и отъ всѣ́хъ гадо́въ, по́лзающихъ по земли́, по ро́ду и́хъ, два́ два́ отъ всѣ́хъ вни́дутъ къ тебѣ́ пита́тися съ тобо́ю, му́жескій по́лъ и же́нскій. Ты́ же возми́ себѣ́ отъ всѣ́хъ бра́шенъ, я́же и́мате я́сти, и собере́ши къ себѣ́, и бу́дутъ тебѣ́ и о́нымъ бра́шно. И сотвори́ Но́е вся́, ели́ка заповѣ́да ему́ Госпо́дь Бо́гъ, та́ко сотвори́.

Проки́менъ, псало́мъ 44-й, гла́съ 6: Помяну́ и́мя Твое́* во вся́комъ ро́дѣ и ро́дѣ. Сти́хъ: Отры́гну се́рдце мое́ сло́во бла́го, [глаго́лю а́зъ дѣла́ моя́ Царе́ви].

При́тчей чте́ніе. [Глава́ 8.]

Сы́не, ты́ Прему́дрость проповѣ́ждь, да ра́зумъ послу́шаетъ тебе́, на высо́кихъ бо крае́хъ е́сть, посредѣ́ же сте́зь стои́тъ; при вратѣ́хъ бо си́льныхъ присѣди́тъ, во вхо́дѣхъ же пое́тся. «Ва́съ, о человѣ́цы, молю́, и вдаю́ мо́й гла́съ сыно́мъ человѣ́ческимъ. Уразумѣ́йте, незло́бивіи, кова́рство, ненака́занніи же приложи́те се́рдце. Послу́шайте мене́, честна́я бо реку́ и изнесу́ отъ усте́нъ пра́вая. Яко и́стинѣ поучи́тся горта́нь мо́й, ме́рзки же предо мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва разумѣва́ющимъ и пра́ва обрѣта́ющимъ ра́зумъ. Пріими́те наказа́ніе, а не сребро́, и ра́зумъ па́че зла́та искуше́на, избира́йте же вѣ́дѣніе па́че зла́та чи́ста. Лу́чше бо прему́дрость ка́меній многоцѣ́нныхъ, вся́кое же честно́е недосто́йно ея́ е́сть. Азъ, Прему́дрость, всели́хъ совѣ́тъ и ра́зумъ, и смы́слъ а́зъ призва́хъ. Стра́хъ Госпо́день ненави́дитъ непра́вды, досажде́нія же и горды́ни, и пути́ лука́выхъ; возненави́дѣхъ же а́зъ развраще́нныя пути́ злы́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Мно́ю ца́ріе ца́рствуютъ и си́льніи пи́шутъ пра́вду. Мно́ю вельмо́жи велича́ются и власти́тели мно́ю де́ржатъ зе́млю. Азъ лю́бящія мя́ люблю́, и́щущіи же мене́ обря́щутъ благода́ть. Бога́тство и сла́ва моя́ е́сть, и стяжа́ніе мно́гихъ и пра́вда. Лу́чше е́сть плоди́ти мене́ па́че зла́та и ка́менія дра́га, мои́ же плоды́ лу́чше сребра́ избра́нна. Въ путе́хъ пра́вды хожду́ и посредѣ́ сте́зь оправда́нія живу́, да раздѣлю́ лю́бящимъ мя́ имѣ́ніе и сокро́вища и́хъ испо́лню благи́хъ».

На стихо́внѣ самогла́сенъ дне́, два́жды, гла́съ 2:

Отче Благíй, отъ всѣ́хъ, я́же да́лъ ми́ еси́, обнажи́ мя́ безу́міе мое́: удали́хся отъ Тебе́ и порабо́тахъ стра́нному граждани́ну, живо́тная ме́рзкая пасо́хъ и ни тѣ́хъ пи́щи насы́тихся. Тѣ́мже притеко́хъ къ Тебѣ́, вѣ́дый Твое́ благоутро́біе: покры́й мою́ наготу́ человѣколю́біемъ Твои́мъ и спаси́ мя́.

Му́чениченъ: Святы́мъ му́ченикомъ, моля́щимся о на́съ и Христа́ пою́щимъ, вся́кая пре́лесть преста́, и человѣ́ческій ро́дъ вѣ́рою спаса́ется.

Сла́ва, и ны́нѣ, богоро́диченъ, гла́съ то́йже:

Отъ ложе́снъ Твои́хъ дѣви́ческихъ Свѣ́тъ мíрови возсія́, сло́вомъ Сло́во. Того́ моли́, Чи́стая Всесвята́я Дѣ́во, изба́витися душа́мъ на́шимъ отъ сѣ́тей вра́жіихъ.


ВО ВТОРНИКЪ 3-Я СЕДМИЦЫ, НА УТРЕНИ,
Тро́ичны гла́са.

По 1-мъ стихосло́віи сѣда́льны умили́тельны осмогла́сника.

По 2-мъ же стихосло́віи сѣда́ленъ господи́на Іо́сифа, гла́съ 1. Подо́бенъ: Ка́мени запеча́тану.

Посто́мъ и моле́ніемъ себе́ очи́стимъ и о убо́гихъ промышле́ніемъ Бо́гу угоди́мъ. Воздо́хнемъ, воспла́чемся те́плѣ, я́ко и́мамы вре́мя обраще́нія, да пла́ча вѣ́чнаго су́щаго въ пла́мени гее́нны изба́вимся, сла́ву возсыла́юще Христу́, покая́ніе опредѣли́вшему человѣ́комъ всѣ́мъ, обраща́ющимся мы́сли пра́востію. [Два́жды.]

[Сла́ва, и ны́нѣ,] богоро́диченъ.

Ру́цѣ Твои́ боже́ственніи, и́миже Содѣ́теля носи́ла еси́, Дѣ́во Пресвята́я, воплоще́нна Божество́мъ, просте́рши, умоли́ изба́витися на́мъ отъ искуше́ній, и страсте́й, и бѣ́дъ, восхваля́ющимъ Тя́ любо́вію, и вопію́щимъ Тебѣ́: сла́ва Все́льшемуся въ Тя́, сла́ва Проше́дшему изъ Тебе́, сла́ва Свободи́вшему на́съ Рождество́мъ Твои́мъ.

По 3-мъ стихосло́віи сѣда́ленъ господи́на Ѳео́дора, гла́съ 3. Подо́бенъ: Да веселя́тся.

Посто́мъ веселя́щеся, пѣ́сньми ра́дующеся и моли́твами держа́ву на вся́ стра́сти обнося́ще, попере́мъ ловле́нія веліа́рова, возопіи́мъ, Христу́ послѣ́дующе: Кре́стъ Тво́й ви́дѣти сподо́би на́съ, я́ко Ще́дръ, подая́ на́мъ ве́лію ми́лость. [Два́жды.]

[Сла́ва, и ны́нѣ,] богоро́диченъ. Подо́бенъ: Красотѣ́ дѣ́вства.

Богоблаже́нная Ма́ти Безневѣ́стная, болѣ́знующую мою́ ду́шу уврачу́й, я́ко содержи́мь е́смь лю́тѣ прегрѣше́ньми, Богоро́дице. Отону́дуже и взыва́ю Ти́ воздыха́ніемъ се́рдца моего́: пріими́ мя́, Всенепоро́чная, многосогрѣши́вшаго, да дерзнове́ніемъ вопію́ Ти́: ра́дуйся, Бо́жіе жили́ще!

Кано́нъ въ мине́и и настоя́щій трипѣ́снецъ господи́на Іо́сифа. И стихосло́вится пѣ́снь.

Пѣ́снь 2, гла́съ 1.

Ирмо́съ: Ви́дите ви́дите, я́ко Бо́гъ Азъ е́смь, порабоще́ныя лю́ди Изра́илевы Моисе́ю народоводи́ти въ пусты́ни повелѣ́вый и спасы́й, я́ко си́ленъ, вла́стію Мое́ю.

Присво́илъ мя́ еси́ ба́нею креще́нія, Преблагíй Отче, бога́тствомъ вся́кимъ украси́въ до́брыхъ, но порабо́тахъ хотя́ непло́днымъ помысло́мъ, тѣ́мже обнища́хъ.

Ми́лостивъ, ми́лостивъ, ми́лостивъ бу́ди ми́, Го́споди, суди́ су́дъ мо́й мнѣ́, Пра́ведный Судіе́, ма́лое мое́ воздыха́ніе за ми́лость ве́лію пріе́мъ, Христе́, и не пре́зри мене́.

Совле́кшеся скве́рныя оде́жды невоздержа́нія, облече́мся въ свѣ́тлую ри́зу воздержа́нія, и свѣ́тли бы́вше, свѣ́тлое Изба́вителя дости́гнемъ Воста́ніе.

Богоро́диченъ: Спаси́ мя́, спаси́ мя́, Спа́са Ро́ждшая, ви́ждь ско́рбь мою́, Чи́стая, ю́же мно́жество безмѣ́рныхъ мои́хъ зо́лъ притворя́етъ по вся́ дни́ окая́ннѣй мое́й души́ отъ неча́янія.

Иный, господи́на Ѳео́дора, гла́съ 3.

Ирмо́съ: Ви́дите, ви́дите, [я́ко Азъ е́смь Спа́съ мíра, Свѣ́тъ и́стинный, Исто́чникъ жи́зни, Сы́нъ Бо́жій].

Ви́дите, ви́дите, я́ко Азъ е́смь, спасе́ніе ва́мъ Источи́вый, я́ко Бо́гъ, е́же воздержа́ніемъ вси́ земнíи почерпи́те.

Ви́дите, ви́дите, я́ко Азъ е́смь, вре́мя Опредѣли́вый свяще́нное, свято́е ва́мъ, во учрежде́ніе душе́вное, поста́ по́прище.

Сла́ва, [тро́иченъ]: Тро́ицу просла́вимъ, Еди́ницѣ поклони́мся: Безнача́льному Безнача́льнаго Отца́ Сы́ну Единоро́дному, Ду́ху Сопресто́льному и Отцу́ Соприсносу́щному.

[И ны́нѣ,] богоро́диченъ: Моли́ непреста́нно Спа́са, Всенепоро́чная, Тя́ Бо́гу усты́ и душе́ю исповѣ́дающимъ отъ вся́каго обстоя́нія изба́витися.

Сла́ва Тебѣ́, Бо́же на́шъ, сла́ва Тебѣ́.

Ве́лій еси́, Го́споди, и чу́дна дѣла́ Твоя́, я́ко въ ро́вѣ неснѣде́на показа́лъ еси́ иногда́ Даніи́ла отъ льво́въ, посто́мъ огражда́ема.

Ирмо́съ: Ви́дите, ви́дите, я́ко Азъ е́смь Спа́съ мíра, Свѣ́тъ и́стинный, Исто́чникъ жи́зни, Сы́нъ Бо́жій.

Пѣ́снь 8.

Ирмо́съ: Его́же ужаса́ются [а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки].

Пла́чу и рыда́ю, ча́съ помышля́я, въ о́ньже и́мамъ предста́ти Престо́лу стра́шному, муче́ніемъ пови́ненъ мно́гихъ мои́хъ зо́лъ, я́же въ невѣ́дѣніи сотвори́хъ и ра́зумѣ.

Моисе́й очисти́лище, по́стъ, обрѣ́тъ, Бо́га разумѣ́ еди́наго Чи́стаго. Душе́ моя́, посто́мъ очи́стися, да прибли́жишися Бо́гу Человѣколю́бцу.

По́стъ возлю́бимъ, ма́терь добродѣ́телей, пи́щу возненави́димъ, роди́тельницу страсте́й, и воззове́мъ: Отче, Иже на Небесѣ́хъ, спаси́ на́съ, спаси́ моли́твами святы́хъ Твои́хъ.

Богоро́диченъ: Судію́, Его́же родила́ еси́, Дѣ́во Маріа́мъ, умоли́ въ ча́съ мя́ Суда́ уще́дрити, Чи́стая, и спасти́ осужде́ннаго, еди́на Предста́тельнице ро́ду человѣ́ческому.

Иный.

Ирмо́съ: Въ пла́мень ко отроко́мъ [евре́йскимъ снизше́дшаго Бо́жіею си́лою и я́вльшагося Го́спода, свяще́нницы, благослови́те и превозноси́те во вся́ вѣ́ки].

Посто́въ пресвѣ́тлую благода́ть пріе́мше, добродѣ́тельми облиста́имся, ти́хая ли́ца, ти́хія и обы́чаи показу́юще душе́внаго устрое́нія.

Пости́вся Елиссе́й, о́трока сомани́тидѣ подаде́ жи́ва. О се́мъ разумѣ́имъ, бра́тіе, по́стъ ко́ль до́бръ, ко́ль вели́къ, ко́ль богодарова́нная благода́ть!

Благослови́мъ Отца́, и Сы́на, и Свята́го Ду́ха, Го́спода.

Тро́иченъ: Со Отце́мъ Сы́ну поклони́мся и Ду́ху Свято́му въ Тро́ицѣ Еди́ней, со а́нгелы зову́ще бре́нными усты́: сла́ва въ вы́шнихъ Бо́гу, Иже въ Тро́ицѣ.

[И ны́нѣ,] богоро́диченъ: Отроча ражда́еши, дѣ́вствующи, еди́на Богора́дованная, та́йна вели́кая, ужа́сное чу́до, Бо́га бо родила́ еси́ воплоще́нна, Спа́са мíру.

Сла́ва Тебѣ́, Бо́же на́шъ, сла́ва Тебѣ́.

Да никто́же на́съ уны́ніемъ и лѣ́ностію обложи́тся, о бра́тіе, вре́мя дѣ́ланія, ча́съ торжества́: кто́ прему́дръ у́бо во еди́нъ де́нь пріобрѣсти́ вся́ вѣ́ки?

Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].

Ирмо́съ: Въ пла́мень ко отроко́мъ евре́йскимъ снизше́дшаго Бо́жіею си́лою и я́вльшагося Го́спода, свяще́нницы, благослови́те и превозноси́те во вся́ вѣ́ки.

Пѣ́снь 9.

Ирмо́съ: Свѣтоно́сный о́блакъ, [въ о́ньже всѣ́хъ Влады́ка, я́ко до́ждь съ небесе́ на руно́, сни́де и воплоти́ся на́съ ра́ди, бы́въ Человѣ́къ, Безнача́льный, велича́емъ вси́ я́ко Ма́терь Бо́га на́шего Чи́стую].

Въ грѣхо́вной пучи́нѣ, во отча́янія глубинѣ́, въ треволне́ніи помышле́ній и страсте́й бу́ри впа́дъ, вопію́: Ми́лости Бе́здно, помози́ ми́ и Твои́мъ благоутро́біемъ одожди́ ми́ очище́ніе грѣхо́въ.

Поще́ніемъ тѣ́ло, воздержа́ніемъ ду́хъ, слеза́ми ду́шу очи́стимъ, вѣ́рніи, и чи́сти Чи́стаго свѣ́тло усря́щемъ, зря́ще спаси́тельныя Стра́сти, я́же претерпѣ́ на́съ ра́ди Изба́витель.

Яко мыта́рь стеню́, я́коже блудни́ца слезю́, я́ко разбо́йникъ вопію́: помяни́ мя́, Ще́дре! Яко слѣпы́й зову́ Ти́: Сы́не Бо́жій, отве́рзи о́чи души́ моея́, ослѣпле́нніи зло́бою льсти́ваго запина́теля!

Богоро́диченъ: Несѣко́мую го́ру, непроходи́мую две́рь, вы́шшую небесе́ и тва́ри всея́, добро́ту Іа́ковлю, ру́чку всезлату́ю, и мо́стъ, и Ма́терь Зижди́теля, Дѣ́ву ублажи́мъ, вѣ́рніи.

Иный.

Ирмо́съ: На Сина́йстѣй горѣ́, [ви́дѣ Тя́ въ купинѣ́ Моисе́й, неопа́льно Огнь Божества́ заче́ншую во чре́вѣ; Даніи́лъ же Тя́ ви́дѣ го́ру несѣко́мую; же́злъ прозя́бшій, Иса́ія взыва́ше, отъ ко́рене Дави́дова].

Настоя́щія дни́ поразумѣ́вше, па́че всѣ́хъ свяще́нныхъ, моли́твы Бо́гу возсле́мъ, со́вѣстію чи́стою, ча́сто прекланя́юще колѣ́на и глаго́люще: Го́споди, пріими́ моле́нія и моли́твы рабо́въ Твои́хъ при́сно.

Лю́діе сѣдо́ша, я́коже пи́шется, я́сти же и пи́ти, и воста́ша игра́ти, служа́ще истука́нному Веельфего́ру — ви́ждь объяде́нія лю́тыя во́лны! Мы́ же пости́мся и просла́вимся, я́ко вели́кій Моисе́й.

Сла́ва, [тро́иченъ]: Существо́мъ Еди́ница е́сть Несѣко́ма, Пребоже́ственная Тро́ица, соединя́ема Естество́мъ, дѣ́лится Ли́цы сво́йственно; несѣко́ма бо сѣче́тся, Еди́но су́щи Трои́тся. Сія́ Оте́цъ е́сть, Сы́нъ, и Ду́хъ Живы́й, соблюда́ющая все́.

И ны́нѣ: Отрокороди́тельницу дѣ́ву кто́ слы́ша и ма́терь безъ му́жа? Марíе, соверша́еши чу́до, но скажи́ ми́, ка́ко? — Не испыту́й глубины́ Богорожде́нія Моего́: сіе́ всеи́стинное, па́че человѣ́ческаго ума́, постиже́ніе.

Сла́ва Тебѣ́, Бо́же на́шъ, сла́ва Тебѣ́.

Яко Тво́й гнѣ́въ нестерпи́мый на грѣ́шники кто́ про́чее стерпи́тъ, Го́споди, отъ сего́ преще́нія? Безмѣ́рную имѣ́яй ми́лость, спаси́ мя́ благоутро́біемъ Твои́мъ, не по дѣло́мъ мои́мъ мно́гимъ и лю́тымъ.

Ирмо́съ: На Сина́йстѣй горѣ́, ви́дѣ Тя́ въ купинѣ́ Моисе́й, неопа́льно Огнь Божества́ заче́ншую во чре́вѣ; Даніи́лъ же Тя́ ви́дѣ го́ру несѣко́мую; же́злъ прозя́бшій, Иса́ія взыва́ше, отъ ко́рене Дави́дова.

Свѣти́ленъ гла́са.

На стихо́внѣ самогла́сенъ дне́, два́жды, гла́съ 7:

Согрѣши́хъ, исповѣ́даюся Тебѣ́, Го́споди, блу́дный а́зъ, не смѣ́ю на не́бо воззрѣ́ти очи́ма, отту́ду бо отпа́дъ, бы́хъ окая́ненъ: согрѣши́хъ на не́бо и предъ Тобо́ю, и нѣ́смь досто́инъ нарещи́ся сы́нъ Тво́й, самого́ себе́ отрица́ю, не тре́бую оглаго́льниковъ, ниже́ па́ки свидѣ́телей, и́мамъ облича́ющій мя́ блу́дъ, и́мамъ облича́ющее зло́е житіе́, и́мамъ посрамля́ющую одержа́щую мою́ наготу́, къ срамотѣ́ же ру́бы, и́миже одѣ́янъ е́смь. Благоутро́бне Отче, Сы́не Единоро́дный, Ду́ше Святы́й, ка́ющася мя́ пріими́ и поми́луй мя́.

Му́чениченъ: Посредѣ́ суди́ща законопресту́пникъ, ра́дующеся, вопія́ху страстоте́рпцы Твои́: Го́споди, сла́ва Тебѣ́!

Сла́ва, и ны́нѣ, богоро́диченъ. Подо́бенъ:

Роди́лся еси́ отъ Дѣ́вы несказа́нно, Христе́, и просвѣти́лъ еси́ су́щія во тмѣ́, вопію́щія: Го́споди, сла́ва Тебѣ́!


НА 6-МЪ ЧАСѢ,
Тропа́рь проро́чества, гла́съ 7:

Спасе́ніе на́ше еси́, Го́споди, и Защи́титель въ де́нь печа́ли, поми́луй на́съ по вели́цѣй ми́лости Твое́й, Человѣколю́бче.

Проки́менъ, псало́мъ 45-й, гла́съ 4: Госпо́дь си́лъ съ на́ми,* Засту́пникъ на́шъ Бо́гъ Іа́ковль. Сти́хъ: Бо́гъ на́мъ прибѣ́жище и си́ла, [Помо́щникъ въ ско́рбехъ, обрѣ́тшихъ ны́ зѣло́].

Проро́чества Иса́іина чте́ніе. [Глава́ 9.]

Та́ко глаго́летъ Госпо́дь: уразумѣ́ютъ вси́ лю́діе Ефре́мовы и живу́щіи въ Самарíи, въ досажде́ніи и высо́комъ се́рдцѣ глаго́люще: пли́нѳы падо́ша, но пріиди́те, изсѣче́мъ ка́меніе, и посѣче́мъ черни́чіе и ке́дры, и сози́ждемъ себѣ́ сто́лпъ. И разруши́тъ Бо́гъ востаю́щія на го́ру Сіо́ню и враги́ Его́ разсы́плетъ: Сирíю отъ восто́къ со́лнца и е́ллины отъ за́пада со́лнца, пояда́ющія Изра́иля всѣ́ми усты́. Во всѣ́хъ си́хъ не отврати́ся я́рость Его́, но еще́ рука́ Его́ высока́. И лю́діе не обрати́шася, до́ндеже я́звени бы́ша, и Го́спода не взыска́ша. И отъя́тъ Госпо́дь отъ Изра́иля главу́ и о́шибъ, вели́ка и ма́ла, во еди́нъ де́нь: ста́рца и чудя́щихся ли́цамъ — сіе́ нача́ло; и проро́ка, уча́ща беззако́нная — се́й о́шибъ. И бу́дутъ блажа́щіи люде́й си́хъ льстя́ще и льстя́тъ, я́ко да поглотя́тъ я́. Сего́ ра́ди о ю́ношахъ и́хъ не возвесели́тся Госпо́дь, и сиро́тъ и́хъ и вдови́цъ и́хъ не поми́луетъ, я́ко вси́ беззако́нніи и лука́віи, и вся́кая уста́ глаго́лютъ непра́вду. Во всѣ́хъ си́хъ не отврати́ся я́рость Его́, но еще́ рука́ Его́ высока́. И разгори́тся, я́ко о́гнь, беззако́ніе и я́ко тро́скотъ сухíй пояде́нъ бу́детъ огне́мъ, и разгори́тся въ ча́щахъ дубра́вныхъ, и поя́стъ, я́же о́крестъ холмо́въ вся́. За я́рость гнѣ́ва Госпо́дня сгорѣ́ вся́ земля́ и бу́дутъ лю́діе я́ко огне́мъ пожже́ни; человѣ́къ бра́та своего́ не поми́луетъ: но уклони́тся на де́сно, я́ко вза́лчетъ, и снѣ́сть отъ шу́іихъ, и не насы́тится человѣ́къ, яды́й пло́ти мы́шцы своея́; снѣ́сть бо Манассíй Ефре́мово, и Ефре́мъ — Манассíино, я́ко вку́пѣ повою́ютъ Іу́ду. Во всѣ́хъ си́хъ не отврати́ся я́рость (Его́), но еще́ рука́ Его́ высока́. Го́ре пи́шущимъ лука́вство, пи́шущіи бо, лука́вство пи́шутъ, уклоня́юще су́дъ убо́гихъ, восхища́юще су́дъ ни́щихъ люде́й Мои́хъ, я́ко бы́ти и́мъ вдови́цѣ въ расхище́ніе и сиротѣ́ въ разграбле́ніе. И что́ сотворя́тъ въ де́нь посѣще́нія? Ско́рбь бо ва́мъ отдале́че пріи́детъ и къ кому́ прибѣ́гнете, да помо́жетъ ва́мъ, и гдѣ́ оста́вите сла́ву ва́шу, е́же не впа́сти въ плѣне́ніе? И подъ убіе́нными паду́тъ. И во всѣ́хъ си́хъ не отврати́ся гнѣ́въ Его́, но еще́ рука́ Его́ высока́.

Проки́менъ, псало́мъ 46-й, гла́съ 3: По́йте Бо́гу на́шему, по́йте,* по́йте Царе́ви на́шему, по́йте. Сти́хъ: Вси́ язы́цы, восплещи́те рука́ми, [воскли́кните Бо́гу гла́сомъ ра́дованія].

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 169 об. – 174.

Служба въ понедѣльникъ 3-й недѣли поста // Къ оглавленію Постной Тріоди // Служба въ среду 3-й недѣли поста


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.