Церковный календарь
Новости


2018-05-21 / russportal
И. А. Родіоновъ. Повѣсть "Жертвы вечернія". Глава 48-я (1922)
2018-05-21 / russportal
И. А. Родіоновъ. Повѣсть "Жертвы вечернія". Глава 47-я (1922)
2018-05-21 / russportal
Н. А. Соколовъ. "Убійство Царской Семьи". Глава 4-я (1925)
2018-05-21 / russportal
Н. А. Соколовъ. "Убійство Царской Семьи". Глава 3-я (1925)
2018-05-21 / russportal
Cвт. Іоаннъ, архіеп. Шанхайскій. Свв. равноап. Кириллъ и Меѳодій (1994)
2018-05-21 / russportal
Cвт. Іоаннъ Шанхайскій. Слово въ недѣлю всѣхъ русскихъ святыхъ (1994)
2018-05-21 / russportal
Прав. Іоаннъ Кронштадтскій. "Моя жизнь во Христѣ". Часть 1-я (стр. 51-60) (1957)
2018-05-21 / russportal
Прав. Іоаннъ Кронштадтскій. "Моя жизнь во Христѣ". Часть 1-я (стр. 41-50) (1957)
2018-05-20 / russportal
Н. А. Соколовъ. "Убійство Царской Семьи". Глава 2-я (1925)
2018-05-20 / russportal
Н. А. Соколовъ. "Убійство Царской Семьи". Глава 1-я (1925)
2018-05-20 / russportal
И. А. Родіоновъ. Повѣсть "Жертвы вечернія". Глава 46-я (1922)
2018-05-20 / russportal
И. А. Родіоновъ. Повѣсть "Жертвы вечернія". Глава 45-я (1922)
2018-05-20 / russportal
Свт. Іоаннъ Златоустъ. Бесѣды на псалмы. На псаломъ 41-й (1899)
2018-05-20 / russportal
Свт. Іоаннъ Златоустъ. Бесѣды на псалмы. На псаломъ 12-й (1899)
2018-05-20 / russportal
Прав. Іоаннъ Кронштадтскій. "Новыя грозныя слова". Слово 13 (35) (1908)
2018-05-20 / russportal
Прав. Іоаннъ Кронштадтскій. "Новыя грозныя слова". Слово 11 (33) (1908)
Новости въ видѣ
RSS-канала: .
Сегодня - вторникъ, 22 мая 2018 г. Сейчасъ на порталѣ посѣтителей - 12.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ СРЕДУ ТРЕТІЯ СЕДМИЦЫ ВЕЛИКАГО ПОСТА.

ВО ВТОРНИКЪ ТРЕТІЯ СЕДМИЦЫ ВЕЧЕРА,
На Го́споди воззва́хъ... поста́вимъ стихо́въ 6 и пое́мъ подо́бны трипѣ́снца 3 и мине́и 3.
Подо́бенъ господи́на Іо́сифа, гла́съ 3: Поста́виша три́десять сре́бреникъ.

Го́споди, Кресто́мъ уби́вый льсти́ваго, отъ пре́лести его́ изба́ви мя́, согрѣша́ющаго и прельща́ема, и посто́мъ очи́стивъ мя́, да́ждь ми́ Твоя́ хотѣ́нія соверши́ти, я́ко да ви́жду, Влады́ко, ра́дуяся, честны́я Стра́сти Твоя́.

Подо́бенъ:

Уязви́хся сла́дости ору́жіемъ, Го́споди, и лю́тѣ ве́сь умертви́хся, исцѣли́ и оживи́ смире́нную мою́ ду́шу, копіе́мъ прободы́йся, Влады́ко, и уя́звена стрѣло́ю врага́, я́ко Ще́дръ, исцѣли́ и честны́хъ Твои́хъ Страсте́й прича́стника мя́ покажи́.

Ина стихи́ра, господи́на Ѳео́дора, гла́съ 2. Подо́бенъ: Да ра́спнется.

Поще́ніемъ, Го́споди, ду́ши просвѣти́вше, да сподо́бимся неосужде́нно Кре́стъ Тво́й ви́дѣти въ ра́дости, и поклони́тися стра́хомъ и любо́вію: просвѣща́етъ бо то́й Стра́сти Твоя́ во́льныя, я́же благоволи́ дости́гнути на́мъ, я́ко Человѣколю́бецъ.

И въ мине́и 3. Сла́ва, и ны́нѣ, богоро́диченъ.

Проки́менъ, псало́мъ 47-й, гла́съ 3: Ве́лій Госпо́дь и хва́ленъ зѣло́,* во гра́дѣ Бо́га на́шего, [въ горѣ́ святѣ́й Его́]. Сти́хъ: Во гра́дѣ Го́спода си́лъ, во гра́дѣ Бо́га на́шего.

Бытія́ чте́ніе. [Глава́ 7.]

Рече́ Госпо́дь Бо́гъ къ Но́ю: вни́ди ты́ и ве́сь до́мъ тво́й въ ковче́гъ, я́ко тя́ ви́дѣхъ пра́ведна предо Мно́ю въ ро́дѣ се́мъ. Отъ ското́въ же чи́стыхъ введи́ къ себѣ́ се́дмь се́дмь, му́жескій по́лъ и же́нскій, отъ ското́въ же нечи́стыхъ два́ два́, му́жескій по́лъ и же́нскій. И отъ пти́цъ небе́сныхъ чи́стыхъ се́дмь се́дмь, му́жескій по́лъ и же́нскій, и отъ всѣ́хъ пти́цъ нечи́стыхъ двѣ́ двѣ́, му́жескій по́лъ и же́нскій, препита́ти сѣ́мя по все́й земли́. Еще́ бо дне́й се́дмь, Азъ наведу́ до́ждь на зе́млю четы́редесять дне́й и четы́редесять ноще́й, и потреблю́ вся́кое воста́ніе, е́же сотвори́хъ, отъ лица́ всея́ земли́. И сотвори́ Но́е вся́, ели́ка заповѣ́да ему́ Госпо́дь Бо́гъ.

Проки́менъ, псало́мъ 48-й, гла́съ 2: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, [внуши́те, вси́, живу́щіи по вселе́ннѣй].

При́тчей чте́ніе. [Глава́ 8.]

Сы́не, послу́шай мене́; и блаже́ни, и́же пути́ моя́ сохраня́тъ. Услы́шите прему́дрость и умудри́теся и не отмещи́те. Блаже́нъ му́жъ, и́же послу́шаетъ мене́, и человѣ́къ, и́же пути́ моя́ сохрани́тъ, бдя́й при мои́хъ две́рехъ при́сно, соблюда́яй пра́ги мои́хъ вхо́довъ. Исхо́ди бо мои́ — исхо́ди живота́ и уготовля́ется хотѣ́ніе отъ Го́спода. Согрѣша́ющіи же въ мя́ нече́ствуютъ на своя́ ду́ши, и ненави́дящіи мя́ лю́бятъ сме́рть. Прему́рость созда́ себѣ́ до́мъ и утверди́ столпо́въ се́дмь, закла́ своя́ же́ртвенная и раствори́ въ ча́ши свое́й вино́ и угото́ва свою́ трапе́зу, посла́ своя́ рабы́ созыва́ющи съ высо́кимъ проповѣ́даніемъ на ча́шу, глаго́лющи: «и́же е́сть безу́менъ, да уклони́тся ко мнѣ́», и тре́бующимъ ума́, рече́: «пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе и жи́ви бу́дете, да во вѣ́ки воцарите́ся, и взыщи́те ра́зума, да поживете́ и испра́вите ра́зумъ въ вѣ́дѣніи». Наказу́яй злы́я пріи́метъ себѣ́ безче́стіе, облича́яй же нечести́ваго поро́чна сотвори́тъ себе́, (обличе́нія бо нечести́вому — ра́ны ему́). Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дрѣйшій бу́детъ; сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день и совѣ́тъ святы́хъ — ра́зумъ, разумѣ́ти бо зако́нъ по́мысла е́сть блага́го. Си́мъ бо о́бразомъ мно́гое поживе́ши вре́мя и приложа́тся тебѣ́ лѣ́та живота́ твоего́.

На стихо́внѣ самогла́сенъ дне́, два́жды, гла́съ 2:

Отца́ Тя́, Созда́теля, написа́ти дерза́ю, Го́споди, живо́тное сы́й земноро́дное, Твоего́ причаща́яся о́браза, а́ще и сыновства́ погрѣши́хъ, блу́дно пожи́въ и забве́ніемъ Твои́хъ даро́въ ижди́въ бога́тство. Да не у́бо отрече́ши мя́, Твоему́ благоволи́вый Сы́ну Единоро́дному Кре́стъ мене́ ра́ди пло́тію и сме́рть претерпѣ́ти, но ублажи́въ, присво́й къ Себѣ́, Человѣколю́бче.

Му́чениченъ: Ли́цы му́ченикъ проти́вишася мучи́телемъ, глаго́люще: мы́ во́инствуемъ Царю́ си́лъ, а́ще и огню́ и му́камъ преда́сте на́съ, не отмета́емся Тро́ическія си́лы.

Сла́ва, и ны́нѣ, крестобогоро́диченъ, гла́съ то́йже. Подо́бенъ: Егда́ отъ Дре́ва.

Егда́ Тя́ беззако́нніи лю́діе, Спа́се, Живота́ всѣ́хъ, на Дре́вѣ обѣ́сиша, тогда́ и Всечи́стая Агница и Ма́ти Твоя́ предстоя́щи, рыда́ше пла́чущи: Ча́до Мое́ сладча́йшее, Свѣ́те Мое́ю о́чію! увы́ Мнѣ́, ка́ко посредѣ́ злодѣ́евъ къ Дре́ву пригвозди́тися претерпѣ́лъ еси́, зе́млю Повѣ́сивый на вода́хъ?


ВЪ СРЕДУ 3-Я СЕДМИЦЫ, НА УТРЕНИ,
Тро́ичны.

По 1-мъ стихосло́віи сѣда́льны кре́стныя осмогла́сника.

По 2-мъ же стихосло́віи глаго́лемъ настоя́щій сѣда́ленъ господи́на Іо́сифа, гла́съ 3. Подо́бенъ: Красотѣ́ дѣ́вства.

Дре́вомъ увяди́лъ еси́ пла́мень, Влады́ко, преступле́нія, на Кре́стъ возвыша́емь, и умертви́лъ еси́ врага́, умертви́вся во́лею. Тѣ́мже Тя́ молю́: пло́ти моея́ хотѣ́нія умертви́ и оживи́ окая́нное се́рдце мое́, посто́мъ страстоубíйственнымъ очи́стивъ мя́ отъ вся́кія скве́рны, я́ко Благоутро́бенъ.

Сла́ва, то́йже. И ны́нѣ, крестобогоро́диченъ. Подо́бенъ:

Поно́сную, Ще́дре, сме́рть распя́тіемъ во́лею претерпѣ́лъ еси́, Его́же Ро́ждшая Тя́, Христе́, зря́щи, уязвля́шеся, утро́бою терза́шеся, ма́терски рыда́ше. Ея́же моли́твами за милосе́рдіе ми́лости Твоея́ уще́дри и спаси́ мíръ, Взе́мляй сего́ грѣ́хъ. По 3-мъ стихосло́віи сѣда́ленъ, гла́съ 2. Подо́бенъ: Воскре́съ отъ гро́ба.

Свѣ́тлую преходя́ще по́стную трапе́зу, вопіи́мъ: вся́ соблюди́, Го́споди, въ ми́рѣ, вся́каго кова́рства вра́жія избавля́я, и сподо́би на́съ, я́ко Преблагíй, Кре́стъ Тво́й Честны́й любо́вію лобыза́ти, и́мже ми́лости Твоя́ подая́ вселе́ннѣй, еди́не Многоми́лостиве.

Сла́ва, то́йже. И ны́нѣ, крестобогоро́диченъ, гла́съ то́йже. Подо́бенъ: Милосе́рдія.

Дѣ́ва и Ма́ти Твоя́, Христе́, на Дре́вѣ зря́щи Тя́ ме́ртва просте́рта, пла́чущи го́рько, вопію́щи глаго́лаше: что́ стра́шное сіе́ та́инство! всѣ́мъ да́руяй жи́знь вѣ́чную, во́лею на Крестѣ́ ка́ко умира́еши сме́ртію поно́сною?

Кано́нъ въ мине́и и настоя́щій трипѣ́снецъ господи́на Іо́сифа. И стихосло́вится пѣ́снь.

Пѣ́снь 3, гла́съ 3.

Ирмо́съ: Утвержде́ніе [на Тя́ надѣ́ющихся, утверди́, Го́споди, Це́рковь, Юже стяжа́лъ еси́ честно́ю Твое́ю кро́вію].

Сраспина́еми на́съ ра́ди Распе́ншемуся, умертви́мъ вся́ плотскíя у́ды въ постѣ́хъ, и моли́твахъ, и моле́ніихъ.

Те́рніе грѣха́ искорени́вый Кресто́мъ Твои́мъ, Го́споди, терно́вная помышле́нія ума́ моего́ исто́ргни.

Вооружи́вше мы́сли посто́мъ, побѣжда́имъ чуждíя полки́ бѣсо́вскія, си́лою Креста́ огражда́еми.

Богоро́диченъ: Воплоща́емое изъ Тебе́ про́йде Сло́во, паде́ніе, Пречи́стая, пра́отецъ за милосе́рдіе щедро́тъ исправля́я.

Иный, господи́на Ѳео́дора, гла́съ 2.

Ирмо́съ: Утверди́ на́съ въ Тебѣ́, Го́споди, [дре́вомъ умерщве́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́].

Тво́й Животво́рный Кре́стъ, Го́споди, печа́ть мнѣ́ е́сть во спасе́ніе, тѣ́мъ бо сопротивоборца́ упражня́я, воспѣва́ю Тя́, я́ко Бо́га Си́льнаго.

Дре́во Кре́стное пло́дъ принесе́ мíру оживле́нія присносу́щнаго, его́же мы́ вкуша́юще, отъ сме́рти, Христе́, избавля́емся.

[Сла́ва,] тро́иченъ: Три́ Еди́наго зра́ка Ли́ца сла́влю: Отца́, Сы́на, и Ду́ха еди́ну держа́ву Божества́, ца́рствующи бо и единонача́льствуетъ, я́ко Бо́гъ.

И ны́нѣ, богоро́диченъ: Рождество́ Твое́, Чи́стая, стра́шно е́сть: Бо́гъ бо е́сть вочеловѣ́чивыйся, безлѣ́тно отъ Отца́ рожде́йся и изъ Тебе́ въ послѣ́дняя безъ му́жа роди́вся.

Сла́ва Тебѣ́, Бо́же на́шъ, сла́ва Тебѣ́.

Благода́ть Креста́ предпросія́вши мíру, къ Боже́ственнымъ Твои́мъ Страсте́мъ, Ще́дре, призыва́етъ вся́ ны́, и́мже вѣ́рно поклони́тися сподо́би.

Ирмо́съ: Утверди́ на́съ въ Тебѣ́, Го́споди, Дре́вомъ умерщве́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Пѣ́снь 8.

Ирмо́съ: Нестерпи́мому огню́ [соедини́вшеся, богоче́стія предстоя́ще, ю́ноши, пла́менемъ же неврежде́ни, Боже́ственную пѣ́снь поя́ху: благослови́те, вся́ дѣла́ Госпо́дня Го́спода, и превозноси́те во вся́ вѣ́ки].

Кресто́мъ нача́ла побѣди́вый и вла́сти те́мныя, Свѣтода́вче, егда́ пріи́деши со вла́стію суди́ти мíру всему́, да не моя́, Сло́ве, объяви́ши та́йная, да мно́гое Твое́ прославля́ю благоутро́біе.

Суди́мь Судія́ предъ суди́щемъ ста́лъ еси́, осужда́я вражду́ Кресто́мъ Твои́мъ, Долготерпѣли́ве Правосу́де. Тѣ́мже осужде́нія вѣ́чнаго изба́ви стра́хомъ зову́щія и превознося́щія Твое́ человѣколю́біе.

Поста́ огне́мъ обостри́вшеся дѣ́ти благочести́віи, возвыше́нный дре́вле пла́мень Боже́ственною росо́ю угаси́ша вои́стинну. И мы́, постя́щеся, пе́щи всѣ́хъ страсте́й угаси́мъ, я́ко да гее́нскаго избѣ́гнемъ пла́мене.

Богоро́диченъ: Изъ Тебе́ Бо́жія Му́дрость хра́мъ Себѣ́ созда́вши, воплоти́ся неизрече́ннымъ снизхожде́ніемъ, Отрокови́це Неискусобра́чная, Ты́ бо еди́на отъ всѣ́хъ родо́въ избра́нна еси́, Нѣтле́нная, Нетлѣ́ннаго въ жили́ще Сло́ва.

Иный.

Ирмо́съ: Въ купинѣ́ Моисе́ю [Дѣ́вы чу́до на Сина́йстѣй горѣ́ Прообрази́вшаго иногда́, по́йте, благослови́те и превозноси́те во вся́ вѣ́ки].

Нося́й вся́ сло́вомъ, мене́ ра́ди вся́ терпи́ши, зауше́нія, и оплева́нія, и распя́тіе, Христе́. Хвалю́ вели́чія Твоего́ человѣколю́бія во вся́ вѣ́ки.

Закала́ешися, Христе́, я́ко Агнецъ, прободе́нъ въ ре́бра Твоя́, да мя́, овча́ заблу́ждшее, спасе́ши отъ сѣ́ти діа́воли и до́брѣй Твое́й огра́дѣ причте́ши во вѣ́ки.

Благослови́мъ Отца́, и Сы́на, и Свята́го Ду́ха, Го́спода.

Тро́иченъ: Божество́ Еди́но, Тро́ице, нераздѣ́льное Естество́, раздѣ́льно же Ли́цы, присносу́щная держа́во, Отче, Сы́не, и Ду́ше Святы́й, Тя́ пѣсносло́вимъ во вся́ вѣ́ки.

[И ны́нѣ,] богоро́диченъ: Богороди́тельнице Чи́стая, Небе́сная Две́ре, Спаси́тельная Врата́, всѣ́хъ христіа́нъ мольбу́ пріими́, Тебе́ блажа́щихъ во вся́ вѣ́ки.

Сла́ва Тебѣ́, Бо́же на́шъ, сла́ва Тебѣ́.

О Крестѣ́ Твое́мъ, Христе́, свяще́нницы хва́лятся, ца́ріе укрѣпля́ются, вся́кій просвѣща́ется вѣ́рный. Сподо́би мя́ сего́ ви́дѣти, и поклони́тися, и пѣ́ти во вѣ́ки.

Хва́лимъ, благослови́мъ, покланя́емся Го́сподеви, пою́ще и превознося́ще во вся́ вѣ́ки.

Ирмо́съ: Въ купинѣ́ Моисе́ю Дѣ́вы чу́до на Сина́йстѣй горѣ́ Прообрази́вшаго иногда́, по́йте, благослови́те и превозноси́те во вся́ вѣ́ки.

Пѣ́снь 9.

Ирмо́съ: Въ зако́нѣ сѣ́ни [и писа́ній о́бразъ ви́димъ, вѣ́рніи: вся́къ му́жескій по́лъ, ложесна́ разверза́я, свя́тъ Бо́гу. Тѣ́мъ перворожде́нное Сло́во Отца́ Безнача́льна, Сы́на, первородя́щася Ма́терію неискусому́жно, велича́емъ].

Змíя Моисе́й на дре́во возне́съ, образова́ше Тя́, Іису́се, на Крестѣ́ во́лею вознесе́на, и лука́ваго ядови́тую зло́бу изгна́вшаго, къ Себѣ́ же человѣ́ки привле́кша, Человѣколю́бче.

Огне́мъ мя́ Твоего́ стра́ха очи́сти, возжига́я въ мое́й души́ Боже́ственную Твою́ любо́вь, и Кресто́мъ Твои́мъ огради́ мя́, е́же прельсти́ ве́тхій запина́тель, сластьми́ омрачи́въ мое́, Христе́, помышле́ніе.

Скве́рныхъ помышле́ній и дѣя́ній злы́хъ, пости́мся, бра́тіе, очи́стимъ сердца́, впери́мся боже́ственными добродѣ́тельми и долѣре́вностныя зло́бы стремле́ній уклони́мся, да Па́сху вели́кую, свѣтоно́сніи, у́зримъ.

Богоро́диченъ: Изъ Тебе́ въ на́шу нищету́, Дѣ́во, хотя́ облече́ся, Бога́тый естество́мъ, ви́димь же на́мъ бы́сть Неви́димый, вы́шними ли́ки Пѣва́емый, сокруше́нный о́бразъ обновля́я благосты́нею.

Иный.

Ирмо́съ: Тебе́, мы́сленную [и одушевле́нную лѣ́вствицу, на не́йже Бо́гъ на́шъ утверди́ся, е́юже къ небеси́ обрѣто́хомъ восхожде́ніе, пѣ́сньми, Богоро́дице, велича́емъ].

Тебе́, на Крестѣ́ ру́цѣ распросте́рша и четвероконе́чная присво́ивша, Имже ко Отцу́ обрѣто́хомъ вхо́дъ, Сы́не Бо́жій, вси́ велича́емъ.

Тебе́ те́рніемъ, Христе́, вѣнча́вше, беззако́нніи бія́ху и распя́ша, Его́же ра́ди поднебе́сная колеба́шася вся́. Мы́ же, спа́сшеся, Тя́ велича́емъ.

[Сла́ва,] тро́иченъ: Тя́, Трисвѣ́тлое Свято́е Божество́, все́ содержа́щее и храня́щее при́сно, Отца́, Сы́на же, и Ду́ха Жива́го, пѣ́сньми немо́лчными велича́емъ.

[И ны́нѣ,] богоро́диченъ: Тя́, свѣ́тлый Облакъ Ду́ха, изъ него́же на́мъ возсія́ Свѣ́тъ Непристу́пный, Христо́съ, Пра́вды вели́кое Со́лнце, пѣ́сньми, Богоро́дице, велича́емъ.

Сла́ва Тебѣ́, Бо́же на́шъ, сла́ва Тебѣ́.

Ты́ на́мъ свѣ́тъ, свято́е сложе́ніе, одолѣ́ніе побѣ́ды, Христо́въ Кре́сте, ты́ на́мъ воздержа́ніе услади́ и тебѣ́ поклони́тися сподо́би.

Ирмо́съ: Тебе́, мы́сленную и одушевле́нную лѣ́вствицу, на не́йже Бо́гъ на́шъ утверди́ся, е́юже къ небеси́ обрѣто́хомъ восхожде́ніе, пѣ́сньми, Богоро́дице, велича́емъ.

Свѣти́ленъ гла́са.

На стихо́внѣ самогла́сенъ дне́, два́жды, гла́съ 2:

Въ че́сти сы́й сыновства́, Отца́ блага́го несмы́сленный а́зъ не разумѣ́хъ, но себе́ сла́вы лиши́хъ, бога́тство злѣ́ ижди́въ благода́ти. Недоста́точествуемь же Боже́ственныя пи́щи, ласка́тель бы́хъ скве́рному граждани́ну, отъ него́же по́сланъ бы́хъ въ душетлѣ́нное его́ село́, живы́й блу́дно, пасо́мь бы́хъ со скоты́, и сласте́мъ рабо́тая не насыща́хся, но обра́щся, вопію́ Благоутро́бному и Ще́дрому Отцу́: на не́бо и предъ Тобо́ю согрѣши́хъ, поми́луй мя́!

Му́чениченъ: Святы́хъ Твои́хъ мно́жества мо́лятъ Тя́, Христе́, поми́луй ны́, я́ко Человѣколю́бецъ.

Сла́ва, и ны́нѣ, крестобогоро́диченъ. Подо́бенъ: Егда́ отъ Дре́ва.

Болѣ́зни претерпѣ́вшая мно́гія въ распя́тіи Сы́на и Бо́га Твоего́, Пречи́стая, воздыха́ла еси́, слезя́щи, и вопія́ла еси́ го́рько: увы́ Мнѣ́, Ча́до сладча́йшее! Непра́ведно ка́ко стра́ждеши, хотя́й изба́вити су́щія отъ Ада́ма земноро́дныя? Тѣ́мъ, Всесвята́я Дѣ́во, Тя́ мо́лимъ вѣ́рою, ми́лостива на́мъ Сего́ сотвори́.


НА 6-МЪ ЧАСѢ,
Тропа́рь проро́чества, гла́съ 8:

Соста́ва дѣ́лъ въ на́съ нѣ́сть, Го́споди, ми́лостивъ еси́, Человѣколю́бче, дѣ́лъ ру́къ Твои́хъ не пре́зри, Безгрѣ́шне.

Проки́менъ, псало́мъ 49-й, гла́съ 4: Пожри́ Бо́гови же́ртву хвалы́* и возда́ждь Вы́шнему моли́твы твоя́. Сти́хъ: Бо́гъ бого́въ, Госпо́дь глаго́ла, и призва́ зе́млю [отъ восто́къ со́лнца до за́падъ].

Проро́чества Иса́іина чте́ніе. [Глава́ 10.]

Бу́детъ, егда́ сконча́етъ Госпо́дь вся́ творя́ въ горѣ́ Сіо́ни и во Іерусали́мѣ, наведе́тъ на у́мъ вели́кій, на кня́зя Ассирíйска, и на высоту́ сла́вы о́чію его́. Рече́ бо: крѣ́постію руки́ моея́ сотворю́ и прему́дростію ра́зума (моего́) отыму́ предѣ́лы язы́ковъ и си́лу и́хъ плѣню́. И сотрясу́ гра́ды населе́ныя и вселе́нную всю́ обыму́ руко́ю мое́ю, я́ко гнѣздо́, и я́ко оста́вленая я́ица — возму́, и нѣ́сть, и́же убѣжи́тъ мене́ или́ проти́ву мнѣ́ рече́тъ и отве́рзетъ уста́ и глуми́тъ. Еда́ просла́вится сѣки́ра безъ сѣку́щаго е́ю? или́ вознесе́тся пила́ безъ влеку́щаго ю́? Та́кожде, а́ще кто́ во́зметъ же́злъ или́ дре́во, и не та́ко? Но по́слетъ Госпо́дь Савао́ѳъ на твою́ че́сть безче́стіе и на твою́ сла́ву о́гнь горя́ возгори́тся. И бу́детъ свѣ́тъ Изра́илевъ во о́гнь, и освяти́тъ его́ огне́мъ горя́щимъ и поя́стъ, я́ко сѣ́но вещество́. Въ то́й де́нь уга́снутъ го́ры, и хо́лми, и дубра́вы, и поя́стъ отъ души́ да́же до пло́тей; и бу́детъ бѣжа́й, я́ко бѣжа́й отъ пла́мене горя́ща. И оста́вльшіися отъ ни́хъ бу́дутъ въ число́, и отроча́ ма́лое напи́шетъ я́. И бу́детъ въ то́й де́нь: не приложи́тся ктому́ оста́нокъ Изра́илевъ, и спасе́нніи Іа́ковли не бу́дутъ ктому́ упова́юще на оби́дѣвшія и́хъ, но бу́дутъ упова́юще на Бо́га, Свята́го Изра́илева, и́стиною.

Проки́менъ, псало́мъ 50-й, гла́съ 6: Поми́луй мя́, Бо́же,* по вели́цѣй ми́лости Твое́й. Сти́хъ: Се́рдце чи́сто сози́жди во мнѣ́, Бо́же, и [ду́хъ пра́въ обнови́ во утро́бѣ мое́й].

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 174 об. – 178 об.

Служба во вторникъ 3-й недѣли поста // Къ оглавленію Постной Тріоди // Служба въ четвертокъ 3-й недѣли поста


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.