Церковный календарь
Новости


2018-07-21 / russportal
2-й Всезаруб. Соборъ 1938 г. Докладъ (4-й) К. Н. Николаева (1939)
2018-07-21 / russportal
Помѣстный Соборъ 1917-1918 гг. Дѣяніе 30-е (25 октября 1917 г.)
2018-07-20 / russportal
2-й Всезаруб. Соборъ 1938 г. Докладъ (3-й) К. Н. Николаева (1939)
2018-07-20 / russportal
Помѣстный Соборъ 1917-1918 гг. Дѣяніе 38-е (11 ноября 1917 г.)
2018-07-18 / russportal
Ген. П. Н. Красновъ. "За чертополохомъ". Часть 2-я. Глава 1-я (1922)
2018-07-18 / russportal
Ген. П. Н. Красновъ. "За чертополохомъ". Часть 1-я. Глава 41-я (1922)
2018-07-18 / russportal
Ген. П. Н. Красновъ. "За чертополохомъ". Часть 1-я. Глава 40-я (1922)
2018-07-18 / russportal
Ген. П. Н. Красновъ. "За чертополохомъ". Часть 1-я. Глава 39-я (1922)
2018-07-18 / russportal
Н. А. Соколовъ. Убійство въ Алапаевскѣ Вел. Кн. Елизаветы Ѳедоровны (1925)
2018-07-17 / russportal
С. Павловъ. Екатеринбургское злодѣяніе 17-го іюля 1918 года (1947)
2018-07-16 / russportal
В. К. Абданкъ-Коссовскій. Страшная годовщина 17 іюля 1918 г. (1942)
2018-07-16 / russportal
Поиски отвѣта на вопросъ о судьбѣ останковъ Царской Семьи (1995)
2018-07-15 / russportal
Ген. П. Н. Красновъ. "За чертополохомъ". Часть 1-я. Глава 38-я (1922)
2018-07-15 / russportal
Ген. П. Н. Красновъ. "За чертополохомъ". Часть 1-я. Глава 37-я (1922)
2018-07-15 / russportal
Ген. П. Н. Красновъ. "За чертополохомъ". Часть 1-я. Глава 36-я (1922)
2018-07-15 / russportal
Ген. П. Н. Красновъ. "За чертополохомъ". Часть 1-я. Глава 35-я (1922)
Новости въ видѣ
RSS-канала: .
Сегодня - суббота, 21 iюля 2018 г. Сейчасъ на порталѣ посѣтителей - 10.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ПОНЕДѢЛЬНИКЪ ЧЕТВЕРТЫЯ СЕДМИЦЫ ВЕЛИКАГО ПОСТА.

ВЪ НЕДѢЛЮ ВЕЧЕРА,
На Го́споди воззва́хъ... поста́вимъ стихо́въ 10 и пое́мъ 4 стихи́ры осмогла́сника умили́тельны, гла́са, и трипѣ́снца 3, подо́бны, господи́на Іо́сифа, гла́съ 8. Подо́бенъ: Го́споди, а́ще и на суди́щи.

Го́споди, на Крестѣ́ во́лею просте́рлъ еси́ дла́ни Твоя́, сему́ умиле́ніемъ се́рдца поклони́тися и на́съ сподо́би, просвѣще́нныхъ до́брѣ посто́мъ и моли́твами, и воздержа́ніемъ и благотворе́ніемъ, я́ко Бла́гъ и Человѣколю́бецъ.

Подо́бенъ:

Го́споди, грѣхо́въ мои́хъ мно́жества по мно́жеству очи́сти щедро́тъ Твои́хъ, Всеще́дре, и Кре́стъ Тво́й сподо́би чи́стою душе́ю ви́дѣти и цѣлова́ти въ настоя́щей седми́цѣ воздержа́нія, я́ко Человѣколю́бецъ.

Ина стихи́ра, господи́на Ѳео́дора, гла́съ 3. Подо́бенъ: Ве́ліе чу́до.

Ве́ліе чу́до! Дре́во ви́дится, на не́мже Христо́съ во́лею распя́тся пло́тію. Покланя́ется мíръ и, просвѣща́емь, взыва́етъ: о Креста́ си́ло! И зри́мый, де́моны па́литъ, и вообража́емь, си́хъ паля́, явля́ется. Ублажа́ю тя́, Пречи́стое Дре́во, почита́ю и покланя́юся со стра́хомъ, и Бо́га сла́влю, тобо́ю дарова́вшаго мнѣ́ жи́знь безконе́чную.

И мине́и 3. Сла́ва, и ны́нѣ, богоро́диченъ. Вхо́дъ. Свѣ́те Ти́хій...

Проки́менъ, гла́съ 8: Да́лъ еси́ достоя́ніе* боя́щимся Тебе́, Го́споди. Сти́хъ: Отъ коне́цъ земли́ къ Тебѣ́ воззва́хъ. Сти́хъ: Покры́юся въ кро́вѣ кри́лъ Твои́хъ. Сти́хъ: Та́ко воспою́ и́мени Твоему́ [во вѣ́ки].

На стихо́внѣ самогла́сенъ дне́, два́жды, гла́съ 8:

Воззрѣ́ти очи́ма на не́бо не смѣ́ю окая́нный а́зъ отъ лука́выхъ мои́хъ дѣя́ній, но, я́ко мыта́рь, стеня́, взыва́ю Ти́: Бо́же, очи́сти мя́ грѣ́шнаго и фарисе́йскаго лицемѣ́рія изба́ви мя́, я́ко еди́нъ Благоутро́бенъ.

Сти́хъ 1: Къ Тебѣ́ возведо́хъ о́чи мо́и, [живу́щему на небеси́. Се́ я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́.]

Сти́хъ 2: Поми́луй на́съ, Го́споди, [поми́луй на́съ, я́ко по мно́гу испо́лнихомся уничиже́нія, наипа́че напо́лнися душа́ на́ша поноше́нія гобзу́ющихъ и уничиже́нія го́рдыхъ].

Му́чениченъ: Му́ченицы Госпо́дни, вся́кое мѣ́сто освяща́ете и вся́къ неду́гъ врачу́ете, и ны́нѣ моли́те изба́витися сѣте́й вра́жіихъ душа́мъ на́шимъ, мо́лимся.

Сла́ва, и ны́нѣ, богоро́диченъ, гла́съ то́йже:

Небе́сная пою́тъ Тя́, Обра́дованная, Ма́ти Безневѣ́стная, и мы́ славосло́вимъ неизслѣ́дованное Твое́ Рождество́, Богоро́дице, моли́ спасти́ся душа́мъ на́шимъ.


ВЪ ПОНЕДѢЛЬНИКЪ 4-Я СЕДМИЦЫ, НА УТРЕНИ,
Тро́ичны случи́вшагося гла́са.

По 1-мъ стихосло́віи глаго́лемъ сѣда́льны умили́тельны осмогла́сника.

По 2-мъ же стихосло́віи глаго́лемъ настоя́щій сѣда́ленъ, гла́съ 8, господи́на Іо́сифа. Подо́бенъ: Воскре́слъ еси́.

Всечестно́му, вѣ́рніи, поклони́мся Дре́ву, на не́мже Творе́цъ всѣ́хъ вознесе́ся. Предлежи́тъ, освяща́я приступа́ющія душе́ю и тѣ́ломъ, скве́рну очища́я грѣха́ постя́щихся вѣ́рно и воспѣва́ющихъ всегда́ Христа́, еди́наго Благодѣ́теля.

Сла́ва, то́йже. И ны́нѣ, богоро́диченъ. Подо́бенъ:

Сло́во Отчее на зе́млю сни́де, и а́нгелъ свѣ́та Богоро́дицѣ вопія́ше: ра́дуйся, Благослове́нная, черто́гъ еди́на сохра́ншая, зача́тіе пріе́мшая Превѣ́чнаго Бо́га и Го́спода, да отъ пре́лести спасе́тъ, я́ко Бо́гъ, ро́дъ человѣ́ческій.

По 3-мъ стихосло́віи сѣда́ленъ, гла́съ 3. Подо́бенъ: Красотѣ́ дѣ́вства.

Преполови́вше ны́нѣ воздержа́ніе, и на поклоне́ніе, Христе́, предвари́вше Живоно́снаго Твоего́ Креста́, припа́дающе, вопіе́мъ Ти́: ве́лій еси́, Человѣколю́бче, и ве́лія дѣла́ Твоя́, я́ко яви́лъ еси́ Кре́стъ Тво́й Честны́й, ему́же со стра́хомъ покланя́ющеся, взыва́емъ: сла́ва кра́йнему благоутро́бію Твоему́!

Сла́ва, то́йже. И ны́нѣ, богоро́диченъ. Подо́бенъ:

Якоже недѣ́ланная, Дѣ́во, лоза́, прекра́снѣйшій Гро́здъ прозябла́ еси́, источа́ющій на́мъ вино́ спаси́тельное, веселя́щее всѣ́хъ ду́ши и тѣлеса́. Тѣ́мже я́ко вино́вную Тя́ до́брыхъ ублажа́юще, при́сно со а́нгеломъ вопіе́мъ Ти́: ра́дуйся, Благода́тная!

Кано́нъ мине́и и настоя́щій трипѣ́снецъ, и стихосло́вится пѣ́снь.

Пѣ́снь 1, гла́съ 8.

Ирмо́съ: Колесницегони́теля фарао́ня [погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща].

Свѣтоно́сное Креста́ поклоне́ніе всѣ́мъ яви́ся, со́лнечную зарю́ спасе́нія испуща́ющее и всѣ́хъ озаря́ющее страсте́й омраче́ніемъ одержи́мыхъ. Стеце́мся се́й чи́стѣ облобыза́ти.

Поста́ очи́стившеся благода́тію, чи́стымъ умо́мъ, Чи́стому еди́ному, пріиди́те, возопіи́мъ гла́сомъ благодаре́нія: Ты́ Кро́вь Твою́, Сло́ве, за ны́ вся́ да́лъ еси́, Ты́ и Кресто́мъ освяща́еши ны́.

Запе́нся прило́ги зміи́ными, паде́ніемъ ужа́снымъ всегда́ лежу́, Спа́се, паде́ніе первозда́ннаго Стра́стію Твое́ю и Кресто́мъ испра́вивый, испра́ви и наста́ви къ хотѣ́ній Твои́хъ исполне́нію.

Богоро́диченъ: Предстоя́щи Кресту́ Твоему́, Го́споди, Неискусобра́чная и Твоя́ я́звы зря́щи, Влады́ко, уязвля́ема глаго́лаше: увы́ Мнѣ́, Ча́до, болѣ́зни избѣ́гши въ рождествѣ́ Твое́мъ, ны́нѣ болѣ́зненно уязвля́юся.

Иный, господи́на Ѳео́дора, гла́съ 3.

Ирмо́съ: Пои́мъ Го́сподеви, сотво́ршему ди́вная чудеса́ [въ Чермнѣ́мъ мо́ри, по́нтомъ бо покры́ проти́вныя и спасе́ Изра́иля. Тому́ Еди́ному пои́мъ, я́ко просла́вися].

Седми́ца свята́я сія́ и свѣтоно́сная Кре́стъ Всечестны́й предлага́етъ мíрови. Пріиди́те, поклони́мся, стра́хомъ же и любо́вію ду́ши просвѣти́вше, на не́мъ пригвозди́вшагося Христа́ въ пѣ́снехъ сла́вяще.

Кресту́ Твоему́ вси́ покланя́емся, Христе́, предпровожде́ніе творя́ще Воскресе́нія Твоего́: пое́мъ гво́здія Твоя́, чти́мъ и копіе́ Твое́, устна́ма и очи́ма, душе́ю же и тѣ́ломъ си́ми очища́еми.

Сла́ва, тро́иченъ: Тро́ице, во Еди́номъ Существѣ́ пѣва́емая, Отче, Сы́не со Ду́хомъ Святы́мъ, безнача́льное, присносу́щное, несозда́нное Божество́, свѣ́та исто́чниче и жи́зни, Тебѣ́ покланя́емся вси́ человѣ́цы, все́ Осуществи́вшему.

[И ны́нѣ,] богоро́диченъ: Пое́мъ Тя́, Дѣ́во Богоро́дице Чи́стая, херуви́мскую колесни́цу, изъ нея́же Бо́гъ роди́ся, Ты́ бо Еди́на была́ еси́ Исто́чникъ Нетлѣ́нія, источа́ющій всѣ́мъ Жи́знь, изъ него́же почерпа́юще, исцѣле́ніе пріе́млемъ.

Сла́ва Тебѣ́, Бо́же на́шъ, сла́ва Тебѣ́.

Четы́редесяте по́стныхъ ста́дій преполовля́юще, пріиди́те любо́вію со Христо́мъ и́демъ къ Боже́ственнѣй Стра́сти, да сраспе́ншеся Ему́, о́бщницы бу́демъ Того́ Воскресéнію.

Ирмо́съ: Пои́мъ Го́сподеви, сотво́ршему ди́вная чудеса́ въ Чермнѣ́мъ мо́ри, по́нтомъ бо покры́ проти́вныя и спасе́ Изра́иля. Тому́ Еди́ному пои́мъ, я́ко просла́вися.

Пѣ́снь 8.

Ирмо́съ: Седмери́цею пе́щь [халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки].

Ядови́тыми страстьми́ и ду́шу и мы́сль уя́звлену стяжа́вшаго, Го́споди, поми́луй, уще́дри Твои́мъ Кресто́мъ. Защити́ и отъ ре́бръ Твои́хъ излія́нными ка́плями, да усе́рдно пою́: свяще́нницы, благослови́те, лю́діе, превозноси́те во вся́ вѣ́ки.

На горѣ́ дре́вле тебе́ Моисе́й прообрази́, ру́цѣ возвы́сивъ и Амали́ка побѣжда́я, Кре́сте Всечестны́й, ему́же кла́няющеся дне́сь, побѣжда́емъ де́моновъ иноплеме́нныя полки́ и вѣ́рою пое́мъ: свяще́нницы, благослови́те, лю́діе, превозноси́те во вся́ вѣ́ки.

Страстьми́ преклоне́нна, враги́ запина́ема, обы́чаемъ лука́вымъ влеко́ма, уще́дри, Благоутро́бне, Твои́мъ Кресто́мъ защити́, я́ко да пою́ неукло́ннымъ се́рдцемъ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Болѣ́зненно стеня́щи, Ма́терски восклица́ющи и отъ вну́треннихъ ско́рби не терпя́щи, на Кре́стъ взира́ла еси́ къ Рожде́нному изъ Твоего́ чре́ва, — Ча́до, — вопію́щи, — что́ видѣ́ніе сіе́? ка́ко стра́ждеши, Естество́мъ Безстра́стный, вся́ко хотя́ ро́дъ человѣ́ческій отъ тли́ свободи́ти?

Иный.

Ирмо́съ: Ангельми немо́лчно [въ вы́шнихъ сла́вимаго Бо́га, небеса́ небе́съ, земля́, и го́ры, и хо́лми, и глубина́, и ве́сь ро́дъ человѣ́ческій, пѣ́сньми Того́, я́ко Созда́теля и Изба́вителя, благослови́те и превозноси́те во вся́ вѣ́ки].

Въ це́ркви предложе́нный Кре́стъ Христо́въ ви́дяще, стра́хомъ и вѣ́рою, бра́тіе, прише́дше поклони́мся, Тому́ вопію́ще: Ты́ Жи́знь процвѣ́лъ еси́ человѣ́комъ, свѣтоно́сне.

Побѣдоно́сна въ бра́нехъ не́бо тя́ показа́, Животво́рный на́мъ Кре́сте, царе́мъ ору́жіе непобѣди́мое, враго́мъ низложе́ніе, це́рквамъ ро́гъ и вѣ́рнымъ спасе́ніе.

Благослови́мъ Отца́, и Сы́на, и Свята́го Ду́ха, Го́спода.

Тро́иченъ: Отца́ Свята́го сла́влю, и Сы́на Свята́го чту́, и Ду́ха Свята́го пою́, Единосу́щную Тро́ицу про́стую, Бо́га коего́ждо Си́хъ, Свѣ́ты и Свѣ́тъ, я́ко отъ Со́лнца Еди́наго происходя́ща.

[И ны́нѣ,] богоро́диченъ: Ра́дуйся, две́ре непроходи́мая; ра́дуйся, купино́ неопали́мая; ра́дуйся, ру́чко злата́я; ра́дуйся, горо́ несѣко́мая; ра́дуйся, Богоро́дице, упова́ніе неруши́мое и стѣно́ на Тя́ надѣ́ющимся.

Сла́ва Тебѣ́, Бо́же на́шъ, сла́ва Тебѣ́.

По́стъ преполови́вше, дерза́имъ ду́хомъ на гряду́щее ю́ношески, благотеку́ще съ Бо́гомъ, бра́тіе, я́ко да и Па́сху ра́достно у́зримъ, Христу́ Воскре́сшу.

Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].

Ирмо́съ: Ангельми немо́лчно въ вы́шнихъ сла́вимаго Бо́га, небеса́ небе́съ, земля́, и го́ры, и хо́лми, и глубина́, и ве́сь ро́дъ человѣ́ческій, пѣ́сньми Того́, я́ко Созда́теля и Изба́вителя, благослови́те и превозноси́те во вся́ вѣ́ки.

Пѣ́снь 9.

Ирмо́съ: Устраши́ся вся́къ [слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ].

Вну́чата дре́вле Іа́ковъ благословля́я, прообража́ше свѣ́тло Кре́стъ Честны́й, и́мже, Ще́дре, на́съ благослови́, освяще́нія пода́тельную благода́ть подая́ покланя́ющимся ему́ и всѣ́хъ Изба́вителя Тя́ прославля́ющимъ.

Поще́нія водо́ю, вѣ́рніи, очи́стившеся, и душе́ю, и мы́слію, животода́тельное и боже́ственное Дре́во облобыза́имъ, предлежи́тъ бо я́вѣ всѣ́мъ, источа́я боже́ственное оставле́ніе, и свѣ́тъ небе́сный, и жи́знь, и и́стинное ра́дованіе.

Судію́ Тя́ вѣ́мъ стра́шна, гряду́ща во сла́вѣ Божества́, всѣ́хъ сокрове́нная обличи́ти тогда́ хотя́ща, Го́споди. Тѣ́мже Тебѣ́ зову́, Бла́же: согрѣши́хъ, прости́, не обличи́ моя́ мно́гая и лю́тая согрѣше́нія.

Богоро́диченъ: Агнца дре́вле Агница зря́щи на Крестѣ́ пригвожде́нна, и омрача́ему со́лнечному сія́нію, пла́чущи глаго́лаше: Со́лнце сла́вы, Іису́се, заше́лъ еси́ умерщвля́емь, но возсія́й Воста́нія свѣ́тъ лю́бящимъ Тя́.

Иный.

Ирмо́съ: На Сина́йстѣй горѣ́, [ви́дѣ Тя́ въ купинѣ́ Моисе́й, неопа́льно Огнь Божества́ заче́ншую во чре́вѣ; Даніи́лъ же Тя́ ви́дѣ го́ру несѣко́мую; же́злъ прозя́бшій, Иса́ія взыва́ше, отъ ко́рене Дави́дова].

На мѣ́стѣ, идѣ́же но́зѣ стоя́стѣ (Тебе́,) Влады́ки и Бо́га, поклони́мся вси́ дне́сь Кресту́ Всечестно́му, я́коже Дави́дъ взыва́етъ богогла́снѣйшій, и́бо вся́ Содержа́й го́рстію, на се́мъ вознесе́ся.

На земли́ живу́щіи, приступи́те, посто́мъ чи́стіи, и предлежа́щій ви́дяще дне́сь Всечестны́й Кре́стъ, поклони́теся стра́хомъ и вѣ́рою, весели́теся и сра́дуйтеся, освяще́ніе душа́мъ почерпа́юще.

[Сла́ва,] тро́иченъ: Существо́мъ Еди́ница е́сть Несѣко́ма, Пребоже́ственная Тро́ица, соединя́ема Естество́мъ, дѣ́лится Ли́цы сво́йственно; несѣко́ма бо сѣче́тся, Еди́но су́щи Трои́тся. Сія́ Оте́цъ е́сть, Сы́нъ, и Ду́хъ Живы́й, соблюда́ющая все́.

[И ны́нѣ,] богоро́диченъ: Дѣторо́дную дѣ́ву кто́ слы́ша и ма́терь безъ му́жа? Марíе, соверша́еши чу́до, но скажи́ ми́, ка́ко? — Не испыту́й глубины́ Богорожде́нія Моего́: сіе́ всеи́стинное, па́че человѣ́ческаго ума́, постиже́ніе.

Сла́ва Тебѣ́, Бо́же на́шъ, сла́ва Тебѣ́.

Благода́рную хвалу́ принесе́мъ Бо́гу, вси́ лю́діе, я́ко ви́дяще ны́нѣ, облобыза́емь Всесвяты́й Кре́стъ: разумѣ́йте у́бо и покаря́йтеся въ се́мъ, де́мони; язы́цы ва́рварстіи, разумѣ́йте и покаря́йтеся, и́мже съ на́ми Бо́гъ.

Ирмо́съ: На Сина́йстѣй горѣ́, ви́дѣ Тя́ въ купинѣ́ Моисе́й, неопа́льно Огнь Божества́ заче́ншую во чре́вѣ; Даніи́лъ же Тя́ ви́дѣ го́ру несѣко́мую; же́злъ прозя́бшій, Иса́ія взыва́ше, отъ ко́рене Дави́дова.

Свѣти́ленъ гла́са.

На стихо́внѣ самогла́сенъ, два́жды, гла́съ 6:

Изря́дный пу́ть возноше́нія, Христе́, смире́ніе показа́лъ еси́, Са́мъ Себе́ истощи́въ и зра́къ раба́ пріи́мъ; фарисе́я велехва́льныя моли́твы не послу́шавъ, мытаря́ же сокруше́нное стена́ніе, я́ко же́ртву непоро́чную, въ вы́шнихъ пріе́мъ. Тѣ́мже и а́зъ вопію́ Ти́: очи́сти, Бо́же, очи́сти, Спа́се мо́й, и спаси́ мя́.

Му́чениченъ: Го́споди, въ па́мять святы́хъ Твои́хъ вся́ тва́рь пра́зднуетъ, небеса́ ра́дуются со а́нгелы, и земля́ весели́тся съ человѣ́ки. Тѣ́хъ моли́твами поми́луй на́съ.

Сла́ва, и ны́нѣ, гла́съ то́йже:

Арха́нгельское сло́во прія́ла еси́, и херуви́мскій престо́лъ показа́лася еси́, и на объя́тіихъ Твои́хъ носи́ла еси́, Богоро́дице, Наде́жду ду́шъ на́шихъ.

[Зри́:] На пе́рвомъ часѣ́ твори́мъ поклоне́ніе Честно́му Кресту́, я́коже и въ недѣ́лю, по напи́санному о́бразу, пою́ще вмѣ́сто: Стопы́ моя́... — Кресту́ Твоему́ покланя́емся, Влады́ко... На часѣ́хъ же, по Отче на́шъ.., конда́къ: Не ктому́ пла́менное ору́жіе... Та́кожде и въ сре́ду и пято́къ, четы́ре сія́ дни́. Въ пято́къ же сохраня́емъ Кре́стъ, я́коже та́мо положи́ся.


НА 6-МЪ ЧАСѢ,
Тропа́рь проро́чества, гла́съ 7:

Го́споди, да не я́ростію Твое́ю обличи́ши лю́ди согрѣши́вшія, ниже́ гнѣ́вомъ Твои́мъ нака́жеши на́съ, Бла́гъ сы́й, Тебе́ бо сла́витъ вся́ земля́, и мо́лимся, пощади́ на́съ, Святы́й.

Проки́менъ, псало́мъ 61-й, гла́съ 6: О Бо́зѣ спасе́ніе мое́* и сла́ва моя́. Сти́хъ: Не Бо́гу ли повине́тся душа́ моя́?

Проро́чества Иса́іина чте́ніе. [Глава́ 14.]

Та́ко глаго́летъ Госпо́дь Савао́ѳъ: я́коже глаго́лахъ, та́ко бу́детъ, и я́коже совѣща́хъ, та́ко пребу́детъ, е́же погуби́ти ассирíанъ на земли́ Мое́й и на гора́хъ Мои́хъ; и бу́дутъ въ попра́ніе; и оты́мется отъ ни́хъ яре́мъ и́хъ и сла́ва и́хъ отъ ра́менъ и́хъ оты́мется. Се́й совѣ́тъ, его́же совѣща́ Госпо́дь на всю́ вселе́нную, и сія́ рука́ на вся́ язы́ки вселе́нныя. Яже бо Бо́гъ Святы́й совѣща́, кто́ разори́тъ? и ру́ку Его́ высо́кую кто́ отврати́тъ? Въ лѣ́то, въ не́же у́мре Аха́зъ ца́рь, бы́сть глаго́лъ се́й: не ра́дуйтеся, вси́ иноплеме́нницы, сокруши́ся бо яре́мъ бію́щаго вы́; отъ сѣ́мене бо зміи́на изы́дутъ исча́дія а́спидовъ, и исча́дія и́хъ изы́дутъ зміи́ паря́щіи. И упасу́тся убо́зіи и́мъ, ни́щіи же человѣ́цы въ ми́рѣ почíютъ; и потреби́тъ гла́домъ сѣ́мя твое́ и оста́нокъ тво́й избіе́тъ. Воспла́читеся, врата́ градо́въ, да возопію́тъ гра́ды смяте́нніи, иноплеме́нницы вси́, зане́ ды́мъ отъ сѣ́вера и́детъ, и нѣ́сть, и́же пребу́детъ. И что́ отвѣща́ютъ ца́ріе язы́ковъ? Яко Госпо́дь основа́ Сіо́на и тѣ́мъ спасу́тся смире́нніи люде́й Его́.

Проки́менъ, псало́мъ 62-й, гла́съ 4: Та́ко благословлю́ Тя́* въ животѣ́ мое́мъ. Сти́хъ: Бо́же Бо́же мо́й, къ Тебѣ́ у́тренюю, возжада́ Тебе́ душа́ моя́.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 200 – 203 об.

Служба въ недѣлю 3-ю Великаго поста // Къ оглавленію Постной Тріоди // Служба во вторникъ 4-й недѣли поста


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.