Церковный календарь
Новости


2018-09-19 / russportal
Предсоборное Присутствіе 1906 г. Отдѣла I-го Журналъ №3 (18 марта 1906 г.)
2018-09-19 / russportal
Помѣстный Соборъ 1917-1918 гг. Дѣяніе 61-е (7 декабря 1917 г.)
2018-09-18 / russportal
Еп. Григорій (Граббе). Святая Русь въ исторіи Россіи (1970)
2018-09-18 / russportal
Предсоборное Присутствіе 1906 г. Отдѣла I-го Журналъ №2 (16 марта 1906 г.)
2018-09-17 / russportal
Еп. Григорій (Граббе). Кончина и погребеніе Блаж. Митр. Антонія (1970)
2018-09-17 / russportal
Помѣстный Соборъ 1917-1918 гг. Дѣяніе 60-е (5 декабря 1917 г.)
2018-09-16 / russportal
Еп. Григорій (Граббе). Какъ Митр. Антоній создалъ Зарубежную Церковь (1970)
2018-09-16 / russportal
Еп. Григорій (Граббе). Митрополитъ Антоній какъ учитель пастырства (1970)
2018-09-16 / russportal
Предсоборное Присутствіе 1906 г. Отдѣла I-го Журналъ №1 (14 марта 1906 г.)
2018-09-16 / russportal
Предсоборное Присутствіе 1906 г. Раздѣленіе на секціи (1906)
2018-09-15 / russportal
Еп. Григорій (Граббе). А. С. Хомяковъ и Митрополитъ Антоній (1970)
2018-09-15 / russportal
Помѣстный Соборъ 1917-1918 гг. Дѣяніе 59-е (4 декабря 1917 г.)
2018-09-14 / russportal
Еп. Григорій (Граббе). А. С. Хомяковъ, соборность и современность (1970)
2018-09-14 / russportal
Помѣстный Соборъ 1917-1918 гг. Дѣяніе 58-е (2 декабря 1917 г.)
2018-09-13 / russportal
Еп. Григорій (Граббе). А. С. Хомяковъ и его богословскіе взгляды (1970)
2018-09-13 / russportal
Помѣстный Соборъ 1917-1918 гг. Протоколъ 91-й (23 февраля 1918 г.)
Новости въ видѣ
RSS-канала: .
Сегодня - четвергъ, 20 сентября 2018 г. Сейчасъ на порталѣ посѣтителей - 16.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВО ВТОРНИКЪ ЧЕТВЕРТЫЯ СЕДМИЦЫ ВЕЛИКАГО ПОСТА.

ВЪ ПОНЕДѢЛЬНИКЪ ВЕЧЕРА,
На Го́споди воззва́хъ... стихи́ры подо́бны, гла́съ 8. Подо́бенъ: Что́ ва́съ нарече́мъ?

Въ сре́днихъ дне́хъ воздержа́нія преходя́ще дне́сь си́лою Кре́стною, на се́мъ возне́сшагося посредѣ́ земли́ Спа́са и Бо́га славосло́вимъ, вопію́ще: зри́тели на́съ покажи́ Страсте́мъ Твои́мъ, Влады́ко, и честна́го Воскресе́нія, да́руя на́мъ очище́ніе и ве́лію ми́лость.

Подо́бенъ:

Стра́сти смири́мъ тѣле́сныя бра́шенъ отложе́ніемъ и сласте́й отвраще́ніемъ, и дре́во Креста́ облобыза́имъ вѣ́рно, зри́тся бо я́вѣ покланя́емое и вся́ освяща́етъ Боже́ственною благода́тію, и Го́сподеви возопіи́мъ: благодари́мъ Тя́, Благоутро́бне, спаса́ющаго си́мъ ду́ши на́ша.

Ина, гла́съ то́йже. Подо́бенъ: Богоро́дицу.

Ны́нѣ Кресту́ покланя́ющеся, вси́ воззове́мъ: ра́дуйся, Дре́во жи́зни; ра́дуйся, ски́птре святы́й Христо́въ; ра́дуйся, человѣ́ковъ сла́ва небе́сная; ра́дуйся, царе́й похвало́; ра́дуйся, держа́во вѣ́ры; ра́дуйся, ору́жіе непобѣди́мое; ра́дуйся, враго́въ отгна́ніе; ра́дуйся, сія́ніе свѣ́тлое, спаси́тельное мíру; ра́дуйся, му́чениковъ ве́лія сла́во; ра́дуйся, си́ло пра́ведныхъ; ра́дуйся, а́нгеловъ свѣ́тлосте; ра́дуйся, всече́стне.

И въ мине́и 3. Сла́ва, и ны́нѣ, богоро́диченъ.

Проки́менъ, псало́мъ 63-й, гла́съ 6: Услы́ши, Бо́же, гла́съ мо́й,* внегда́ моли́тимися къ Тебѣ́. Сти́хъ: Отъ стра́ха вра́жія изми́ ду́шу мою́.

Бытія́ чте́ніе. [Глава́ 8.]

Рече́ Госпо́дь Бо́гъ: размы́сливъ, не приложу́ ктому́ прокля́ти зе́млю за дѣла́ человѣ́ческая, зане́ прилежи́тъ помышле́ніе человѣ́ку прилѣ́жно на зла́я отъ ю́ности его́. Не приложу́ у́бо ктому́ порази́ти вся́кую пло́ть живу́щую, я́коже сотвори́хъ. Во вся́ дни́ земли́ сѣ́ятва и жа́тва, зима́ и зно́й, лѣ́то и весна́, де́нь и но́щь не преста́нутъ. И благослови́ Бо́гъ Но́я и сы́ны его́ и рече́ и́мъ: расти́теся и мно́житеся, и напо́лните зе́млю и облада́йте е́ю. И стра́хъ и тре́петъ ва́шъ бу́детъ на всѣ́хъ звѣре́хъ земны́хъ, (и на всѣ́хъ скотѣ́хъ земны́хъ,) на всѣ́хъ пти́цахъ небе́сныхъ, и на всѣ́хъ дви́жущихся по земли́, и на всѣ́хъ ры́бахъ морски́хъ: въ ру́цѣ ва́ши вда́хъ (я́). И вся́кое дви́жущееся, е́же е́сть жи́во, ва́мъ бу́детъ въ снѣ́дь, я́ко зе́ліе травно́е да́хъ ва́мъ все́. То́чію мя́са въ кро́ви души́ да не снѣ́сте. Кро́ви бо ва́шей, ду́шъ ва́шихъ, отъ руки́ вся́каго звѣ́ря изыщу́ (ея́) и отъ руки́ человѣ́ка бра́та изыщу́ ея́. Пролива́яй кро́вь человѣ́чу, въ ея́ мѣ́сто его́ проліе́тся, я́ко во о́бразъ Бо́жій сотвори́хъ человѣ́ка. Вы́ же расти́теся и мно́житеся, и напо́лните зе́млю и умно́житеся на не́й.

Проки́менъ, псало́мъ 64-й, гла́съ 6: Услы́ши ны́, Бо́же,* Спаси́телю на́шъ. Сти́хъ: Тебѣ́ подоба́етъ пѣ́снь, Бо́же, въ Сіо́нѣ.

При́тчей чте́ніе. [Глава́ 11.]

Сы́нъ пра́ведный ражда́ется въ живо́тъ, гоне́ніе же нечести́ваго — въ сме́рть. Ме́рзость Го́сподеви — путіе́ развраще́нни, прія́тни же Ему́ вси́ непоро́чніи въ путе́хъ свои́хъ. Въ ру́ку ру́цѣ вложи́въ непра́ведно, не безъ му́ки бу́детъ злы́хъ, сѣ́яй же пра́вду пріи́метъ мзду́ вѣ́рну. Якоже усеря́зь златы́й въ но́здрехъ свиніи́, та́ко женѣ́ злоу́мнѣй лѣ́пота. Жела́ніе пра́ведныхъ — все́ благо́е, наде́жда же нечести́выхъ поги́бнетъ. Су́ть, и́же своя́ сѣ́юще, мно́жайшая творя́тъ, су́ть же и собира́юще чужда́я, умаля́ются. Душа́ благослове́нна вся́кая проста́я, му́жъ я́рый неблагообра́зенъ. Удержава́яй пшени́цу оста́витъ ю́ язы́комъ, продая́й пшени́цу ску́по отъ наро́да про́клятъ, благослове́ніе же Го́сподне на главѣ́ подава́ющаго. Творя́й блага́я, и́щетъ благода́ти добры́, и́щущаго же зла́я, пости́гнутъ его́. Надѣ́яйся на бога́тство свое́, се́й паде́тъ, заступа́яй же пра́ведныхъ, то́й возсія́етъ. Не сматря́яй своего́ до́му, наслѣ́дитъ вѣ́тры, порабо́таетъ же безу́мный разу́мному. Отъ плода́ пра́вды дре́во жи́зни прозяба́етъ, отъе́млются же безвре́менно ду́ши беззако́нныхъ. Аще пра́ведный едва́ спаса́ется, нечести́вый же и грѣ́шный гдѣ́ яви́тся? Любя́й наказа́ніе, лю́битъ чу́вство, ненави́дяй же обличе́нія безу́менъ. Лу́чше обрѣ́тый благода́ть отъ Го́спода Бо́га, му́жъ же законопресту́пникъ премолча́нъ бу́детъ. Не испра́вится человѣ́къ отъ беззако́ннаго, коре́нія же пра́ведныхъ не оты́мутся. Жена́ му́жественная — вѣне́цъ му́жу своему́, я́коже въ дре́вѣ че́рвь, та́ко му́жа погубля́етъ жена́ злотво́рная. Мы́сли пра́ведныхъ — судьбы́, управля́ютъ же нечести́віи ле́сти. Словеса́ нечести́выхъ льсти́ва въ кро́вь, уста́ же пра́выхъ изба́вятъ и́хъ.

На стихо́внѣ стихи́ра самогла́сна, гла́съ 8, два́жды:

Велерѣ́чивый фарисе́й омерзи́ся похвали́вся, и мыта́рь смиренному́дрый молча́ніемъ помоли́вся, оправда́ся. Тѣ́мже обою́ увѣ́дѣвши разли́чіе, душе́ моя́, смиренному́дріе пріими́ и облобыза́й, Христо́съ бо смире́ннымъ обѣща́ дая́ти благода́ть, я́ко Человѣколю́бецъ.

Му́чениченъ: Му́ченицы Госпо́дни, моли́те Бо́га на́шего и испроси́те душа́мъ на́шимъ мно́жество щедро́тъ и очище́ніе мно́гихъ прегрѣше́ній, мо́лимся.

Сла́ва, и ны́нѣ, богоро́диченъ, гла́съ тойже:

Азъ, Дѣ́во Свята́я Богоро́дице, къ покро́ву Твоему́ прибѣга́ю, вѣ́мъ, я́ко обря́щу Тобо́ю спасе́ніе, мо́жеши бо, Чи́стая, помощи́ мнѣ́.


ВО ВТОРНИКЪ 4-Я СЕДМИЦЫ, НА УТРЕНИ,
Тро́ичны.

По 1-мъ стихосло́віи сѣда́льны умили́тельныя осмогла́сника.

По 2-мъ же стихосло́віи глаго́лемъ настоя́щій сѣда́ленъ, гла́съ 8. Подо́бенъ: Непоколеби́мое утвержде́ніе.

Воздержа́ніемъ просвѣти́вше ду́ши на́ша, Кресту́ поклони́мся спаси́тельному, на не́мже Христо́съ пригвозди́ся, и возопіи́мъ ему́: ра́дуйся, постя́щихся сла́досте и извѣ́стная по́моще; ра́дуйся, губи́телю страсте́й, бѣсо́мъ сопротивобо́рче; ра́дуйся, Дре́во блаже́нное.

[Сла́ва, то́йже. И ны́нѣ,] богоро́диченъ. Подо́бенъ:

Непоколеби́мое утверже́ніе вѣ́ры и честно́е дарова́ніе ду́шъ на́шихъ, Богоро́дицу въ пѣ́снехъ велича́емъ, вѣ́рніи: ра́дуйся, Ка́мень Жи́зни во чре́вѣ Твое́мъ вмѣсти́вшая; ра́дуйся, конце́въ Упова́ніе, оскорбля́емыхъ Засту́пница; ра́дуйся, Невѣ́сто неневѣ́стная.

По 3-мъ же стихосло́віи сѣда́ленъ, гла́съ то́йже. Подо́бенъ: Яко нача́тки.

Якоже жи́знь тва́ри, Тво́й Кре́стъ предлежа́щій вселе́нная цѣлу́етъ, Го́споди, и покланя́ющися зове́тъ Ти́: того́ дѣ́йствомъ въ ми́рѣ глубо́цѣ пою́щія и воспѣва́ющія Тя́ воздержа́ніемъ соблюди́, Многоми́лостиве.

[Сла́ва, то́йже. И ны́нѣ,] богоро́диченъ, гла́съ то́йже:

Ра́дуйся, а́нгеломъ ра́дость мíра пріи́мшая; ра́дуйся, ро́ждшая Творца́ Твоего́ и Го́спода; ра́дуйся, сподо́бльшая бы́ти Ма́ти Бо́жія.

Кано́нъ мине́и и настоя́щій трипѣ́снецъ господи́на Іо́сифа. И стихосло́вится пѣ́снь.

Пѣ́снь 2, гла́съ 8.

Ирмо́съ: Ви́дите, ви́дите, я́ко Азъ е́смь Бо́гъ, дре́вле Изра́иля сквозѣ́ Чермно́е мо́ре проведы́й, и пита́вый, и спасы́й, и отъ го́рькія рабо́ты свободи́вый фарао́новы.

Средѣ́ тва́ри претерпѣ́лъ еси́ Кре́стъ, Мессíя, Сло́ве Бо́жій, ему́же поста́ дне́сь преполове́ніемъ вѣ́рно покланя́емся, прося́ще ви́дѣти и Воскресе́ніе Твое́.

Жезло́мъ си́лы, проображе́ннымъ Моисе́ю, мо́ре страсте́й пресѣка́юще, дости́гнемъ къ земли́ обѣтова́нія и ма́нны мы́сленныя насы́тимся бога́тно.

Кто́ не возрыда́етъ тя́? кто́ не воспла́четъ тя́, душе́, жела́ющую лука́вая и не взыска́ющую любо́вію благи́хъ, Пра́веднаго Судію́ презира́ющую при́сно, долготерпя́щаго на тебѣ́?

Богоро́диченъ: Пло́ть бы́вша непремѣ́нно, Христа́, Дѣ́во, ражда́еши. Его́же прилѣ́жно моли́ плотски́хъ страсте́й измѣни́ти покланя́ющіяся Кресту́, его́же пло́тію претерпѣ́.

Иный, гла́съ то́йже.

Ирмо́съ: Ви́дите, [ви́дите, я́ко Азъ е́смь Бо́гъ ва́шъ, пре́жде вѣ́къ рожде́нный отъ Отца́, и отъ Дѣ́вы въ послѣ́дняя безъ му́жа заче́ншійся, и разруши́вый грѣ́хъ пра́отца Ада́ма, я́ко Человѣколю́бецъ].

Ви́дите, ви́дите, я́ко Азъ е́смь Бо́гъ, вселе́ннѣй Кре́стъ Мо́й подая́й ору́жіе спасе́нія, во е́же ны́нѣ поклони́тися ему́, я́ко да цѣлу́ющіи его́ упражня́ютъ вра́жія кова́рства.

Ве́лій еси́, Го́споди, Многоми́лостивый, я́ко да́лъ еси́ Животворя́щему Твоему́ поклони́тися ны́нѣ Кресту́, идѣ́же ру́цѣ Твои́ и но́зѣ пригвозди́шася, на не́мже Кро́вь излія́ся пречи́стаго Твоего́ ребра́, жи́знь источи́ на́мъ.

[Сла́ва,] тро́иченъ: Пресоверше́нная Еди́нице, Пребоже́ственная, Тріѵпоста́сная: Нерожде́нне Отче, и Сы́не Единоро́дне, Ду́ше, отъ Отца́ исходя́й, Сы́номъ же явля́яйся, — Существо́ еди́но и Естество́, Госпо́дьство, Ца́рство, спаси́ всѣ́хъ на́съ.

[И ны́нѣ,] богоро́диченъ: Неизглаго́ланное чу́до Твоего́ Рождества́, Ма́ти Дѣ́во: ка́ко бо и ражда́еши, и Чиста́ еси́ въ то́мже? Ка́ко Отроча́ ражда́еши, и не вѣ́си иску́са му́жеска отню́дъ? — Якоже вѣ́сть па́че естества́ отъ Мене́ новолѣ́пно Сло́во Бо́жіе ро́ждшееся.

Сла́ва Тебѣ́, Бо́же на́шъ, сла́ва Тебѣ́.

Тя́ Моисе́й вели́кій прообразова́, Кре́сте, на́мъ, ру́цѣ распросте́ръ и побѣди́въ Амали́ка. Тя́ изобража́юще въ сѣ́нехъ и возду́сѣ, отвраща́емъ и побѣжда́емъ началозло́бнаго врага́, пѣсносло́вяще Христа́.

Ирмо́съ: Ви́дите, ви́дите, я́ко Азъ е́смь Бо́гъ ва́шъ, пре́жде вѣ́къ рожде́нный отъ Отца́, и отъ Дѣ́вы въ послѣ́дняя безъ му́жа заче́ншійся, и разруши́вый грѣ́хъ пра́отца Ада́ма, я́ко Человѣколю́бецъ.

Пѣ́снь 8.

Ирмо́съ: Покрыва́яй вода́ми [превы́спренняя Своя́, полага́яй мо́рю предѣ́лъ песо́къ, и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки].

Соста́вивый основа́нія всея́ земли́, я́ко Бо́гъ возне́сся на Дре́во, недви́жимое всѣ́мъ дарова́лъ еси́ вѣ́рнымъ утвержде́ніе, Го́споди, спаси́тельное ору́жіе Креста́ Твоего́. Ему́же покланя́ющеся, Тя́ превозно́симъ во вся́ вѣ́ки.

Облиста́емо зря́ще па́че со́лнечныя зари́ Кре́стное дре́во, пріиди́те, посто́мъ облиста́еми, ны́нѣ облобыза́имъ, почерпа́юще благода́ть свѣтоно́сную и тму́ отгоня́ющую отъ превознося́щихъ Христа́ во вѣ́ки.

Вода́ Жива́я, Неизмѣ́нная въ вѣ́чную жи́знь, Ты́ еси́, Сло́ве, кро́вь и во́ду отъ ре́бръ на Крестѣ́ источи́лъ еси́, Влады́ко, грѣхо́вныя пото́ки изсуша́я. Тѣ́мже молю́ Тя́: изсуши́ страсте́й мои́хъ лука́вная истица́нія.

Богоро́диченъ: Умное я́ко освяще́ніе, во святы́хъ Бо́га почива́ющаго ражда́еши, Свята́я Богома́ти Чи́стая, вся́ концы́ освяща́ющаго боже́ственнымъ поклоне́ніемъ дне́сь, Дѣ́во, Дре́ва пресвята́го, на не́мже пло́тію пригвозди́ся.

Иный.

Ирмо́съ: Ангели и небеса́, [на престо́лѣ сла́вы Сѣдя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во вѣ́ки].

Пріиди́те ви́димъ, лю́діе, Живоно́сное Дре́во ны́нѣ предлежа́щее, на не́мже пло́тію Христо́съ водрузи́ся, Бо́гъ на́шъ, и со стра́хомъ пою́ще, сему́ покланя́емся во вся́ вѣ́ки.

Трисло́жный Кре́стъ, я́ко Тро́ичный о́бразъ воспѣва́емъ и, покланя́ющеся со стра́хомъ, возопіи́мъ, благословя́ще, пою́ще и превознося́ще Христа́ во вѣ́ки.

Благослови́мъ Отца́, и Сы́на, и Свята́го Ду́ха, Го́спода.

[Тро́иченъ:] Еди́нъ Бо́гъ у́бо Тро́ица: ни Отцу́ изступи́вшу въ сыновство́, ниже́ Сы́ну премѣни́вшуся во исхожде́ніе, но сво́йственная и обое́ — Свѣ́тъ; Бо́га, Три́ сла́влю во вѣ́ки.

[И ны́нѣ,] богоро́диченъ: Еди́на нетлѣ́нно ражда́еши, еди́на дои́ши Младе́нца безъ бра́ка, еди́на Созда́теля Твоего́ ражда́еши и Влады́ку, а́ще и Ма́ти и Раба́: Тя́, Дѣ́во Ма́ти, пое́мъ во вѣ́ки.

Сла́ва Тебѣ́, Бо́же на́шъ, сла́ва Тебѣ́.

Слѣпа́го отъ рождества́ воочи́лъ еси́ сло́вомъ. Ослѣпле́нныя мои́ серде́чныя о́чи па́ки отве́рзи, да узрю́ свѣ́тъ повелѣ́ній Твои́хъ, Христе́, во вѣ́ки.

Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].

Ирмо́съ: Ангели и небеса́, на престо́лѣ сла́вы Сѣдя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во вѣ́ки.

Пѣ́снь 9.

Ирмо́съ: Благослове́нъ Госпо́дь Бо́гъ [Изра́илевъ, воздви́гнувый ро́гъ спасе́нія на́мъ въ дому́ Дави́довѣ, Отрока Своего́, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра].

Благослове́нъ Госпо́дь Бо́гъ Изра́илевъ, Кресто́мъ Свои́мъ разруши́вый дре́внюю кля́тву и сего́ на́мъ дарова́вый держа́ву, и прибѣ́жище, и тве́рдое основа́ніе, и́мже враги́ на́ша ны́нѣ рога́ми избоде́мъ.

Яко плени́цами стя́гнутъ е́смь, безмѣ́рными зло́бами, и стези́ Твоя́ спаси́тельныя, Христе́, во́лею разумѣ́ти не хощу́. Твои́мъ мя́ обрати́ Кресто́мъ, омраче́ніе мое́ разрѣша́я за неизрече́нную ми́лость благоутро́бія Твоего́.

Фарисе́ево возноше́ніе подража́въ злѣ́, низведо́хся паде́ніемъ лю́тымъ и болѣ́зненнымъ, и лежу́ враго́мъ въ попра́ніе, но уще́дри и спаси́ мя́, Христе́, щедро́тъ ра́ди смири́вый Себе́, Вы́шній Царю́ Сла́вы.

Богоро́диченъ: Ро́дове Тя́ вси́ блажа́тъ, Чи́стая, Іису́съ бо еди́нъ рожде́йся отъ Твоея́ утро́бы, То́й я́ко вѣ́сть, сотвори́, Отрокови́це Дѣ́во, съ Тобо́ю вели́чія. Его́же моли́ спасти́ся ста́ду и лю́демъ Твои́мъ.

Иный. Ирмо́съ то́йже.

Благослове́нъ Госпо́дь Бо́гъ Изра́илевъ, Кресто́мъ Свои́мъ разруши́вый дре́внюю кля́тву и сего́ предложи́вый на́мъ въ поклоне́ніе. Того́ цѣлу́юще вѣ́рно, того́ и воспѣва́юще, Твою́ вели́кую ми́лость пое́мъ непреста́нно.

Це́ркви похвала́ ты́ еси́, Честны́й Кре́сте, царе́й ору́жіе и мíру всему́ ми́ра по́честь богодѣ́ланная, Кре́сте, правосла́вныхъ ра́досте, вселе́нныя храни́телю, сохрани́, освяти́ тебѣ́ покланя́ющіяся.

Сла́ва, [тро́иченъ]: Тро́ице Свята́я, сла́ва Тебѣ́, Единоче́стная Еди́нице, Боже́ственное Естество́, Еди́но Ца́рство стра́шное, Отче, Сы́не, со Ду́хомъ, Свѣ́те Непристу́пный всѣ́мъ, Безнача́льное Божество́, спаси́ служа́щія Тебѣ́, всѣ́хъ Созда́телю.

Богоро́диченъ: У Креста́ я́ко стоя́ше Агница Твоя́, Іису́се, Па́стыря и Влады́ку Своего́ зря́щи, го́рько рыда́ше, и утро́бу дви́жущи, о Тебѣ́, Христе́, взыва́ше: что́ стра́нное видѣ́ніе? Жи́зне, ка́ко умира́еши?

Сла́ва Тебѣ́, Бо́же на́шъ, сла́ва Тебѣ́.

Манассíю я́ко спа́слъ еси́ пока́явшася, Бо́же, спаси́ и мене́, слеза́ми ка́ющася го́рцѣ, и не отврати́ раба́ Твоего́, уклони́хъ бо мою́ ду́шу, я́ко дре́вле Изра́иль о́ный, вся́ дни́ моя́ жи́вый въ блудѣ́.

Ирмо́съ: Благослове́нъ Госпо́дь Бо́гъ Изра́илевъ, воздви́гнувый ро́гъ спасе́нія на́мъ въ дому́ Дави́довѣ, Отрока Своего́, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Свѣти́ленъ гла́са.

На стихо́внѣ самогла́сенъ дне́, два́жды, гла́съ 8:

Велехва́льнаго фарисе́я отъ возноше́нія помышля́ющи, душе́ моя́, осужде́ніе, и смиренному́драго мытаря́ исповѣ́даніемъ прегрѣше́ній позна́вши оправда́ніе, о́ваго у́бо отложи́ти потщи́ся о добродѣ́тели дерзнове́ніе, о́ваго же прія́ти, я́же согрѣши́ла еси́, исповѣ́даніе. Воздви́гнися, не смири́тельную себѣ́ припложа́ющи мѣростра́стіемъ высоту́ отъ Христа́, иму́щаго ве́лію ми́лость.

Му́чениченъ: Вельми́ подвиза́стеся, святíи, му́ки отъ беззако́нныхъ претерпѣ́вше до́блественно, Христа́ исповѣ́дающе предъ царьми́. И па́ки преста́вившеся отъ житія́, си́лы дѣ́йствуете въ мíрѣ и неду́жныя отъ страсте́й и́хъ исцѣля́ете, святíи, моли́те спасти́ся душа́мъ на́шимъ.

Сла́ва, и ны́нѣ, богоро́диченъ, гла́съ то́йже:

Кро́въ Тво́й, Богоро́дице Дѣ́во, врачевство́ е́сть духо́вное: въ о́нь бо прибѣга́юще, душе́вныхъ болѣ́зней избавля́емся.


НА 6-МЪ ЧАСѢ,
Тропа́рь проро́чества, гла́съ 6:

Кресту́ Твоему́ покланя́емся, Влады́ко, и свято́е Воскресе́ніе Твое́ сла́вимъ.

Проки́менъ, псало́мъ 65-й, гла́съ 6: Благослове́нъ Бо́гъ, Иже не отста́ви моли́тву мою́* и ми́лость Свою́ отъ мене́. Сти́хъ: Благослови́те, язы́цы, Бо́га на́шего [и услы́шанъ сотвори́те гла́съ хвалы́ Его́].

Проро́чества Иса́іина чте́ніе. [Глава́ 25.]

Го́споди Бо́же мо́й, просла́влю Тя́, воспою́ и́мя Твое́, я́ко сотвори́лъ еси́ чу́дная дѣла́, совѣ́тъ дре́вній, и́стинный! Да бу́детъ, Го́споди! Яко положи́лъ еси́ гра́ды въ пе́рсть, гра́ды тве́рдыя, е́же па́сти основа́ніямъ и́хъ. Нечести́выхъ гра́дъ да не сози́ждется въ вѣ́къ! Сего́ ра́ди благословя́тъ Тя́ лю́діе ни́щіи и гра́ди человѣ́ковъ оби́димыхъ возблагословя́тъ Тя́. Бы́лъ бо еси́ вся́кому гра́ду смире́нному помо́щникъ и изнемога́ющимъ за оскудѣ́ніе покро́въ. Отъ человѣ́къ злы́хъ изба́виши и́хъ, [Ты́ бо еси́] покро́въ жа́ждущихъ и ду́хъ человѣ́ковъ оби́димыхъ. Аки человѣ́цы малоду́шніи жа́ждущіи въ Сіо́нѣ, я́ко изба́виши и́хъ отъ человѣ́къ нечести́выхъ, и́мже на́съ пре́далъ еси́. И сотвори́тъ Госпо́дь Савао́ѳъ всѣ́мъ язы́комъ: на горѣ́ се́й испію́тъ ра́дость, испію́тъ вино́, пома́жутся мѵ́ромъ на горѣ́ се́й. Преда́ждь сія́ вся́ язы́комъ, то́й бо совѣ́тъ на вся́ язы́ки. Пожре́ сме́рть возмо́гши, и па́ки отъя́тъ Госпо́дь Бо́гъ вся́кую сле́зу отъ вся́каго лица́, поноше́ніе люде́й отъя́тъ отъ всея́ земли́, уста́ бо Госпо́дня глаго́лаша (сія́). И реку́тъ въ де́нь о́ный: се́ Бо́гъ на́шъ! На́нь же упова́хомъ, и спасе́тъ на́съ; Се́й Госпо́дь; потерпѣ́хомъ Его́; и возра́довахомся и возвесели́хомся о спасе́ніи на́шемъ.

Проки́менъ, псало́мъ 66-й, гла́съ 6: Благослови́ ны́, Бо́же, Бо́же на́шъ,* благослови́ ны́ Бо́же. Сти́хъ: Бо́же, уще́дри ны́ и благослови́ ны́, [просвѣти́ лице́ Твое́ на ны́ и поми́луй ны́].

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 204 – 208 об.

Служба въ понедѣльникъ 4-й недѣли поста // Къ оглавленію Постной Тріоди // Служба въ среду 4-й недѣли поста


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.