Церковный календарь
Новости


2018-07-17 / russportal
С. Павловъ. Екатеринбургское злодѣяніе 17-го іюля 1918 года (1947)
2018-07-16 / russportal
В. К. Абданкъ-Коссовскій. Страшная годовщина 17 іюля 1918 г. (1942)
2018-07-16 / russportal
Поиски отвѣта на вопросъ о судьбѣ останковъ Царской Семьи (1995)
2018-07-15 / russportal
Ген. П. Н. Красновъ. "За чертополохомъ". Часть 1-я. Глава 38-я (1922)
2018-07-15 / russportal
Ген. П. Н. Красновъ. "За чертополохомъ". Часть 1-я. Глава 37-я (1922)
2018-07-15 / russportal
Ген. П. Н. Красновъ. "За чертополохомъ". Часть 1-я. Глава 36-я (1922)
2018-07-15 / russportal
Ген. П. Н. Красновъ. "За чертополохомъ". Часть 1-я. Глава 35-я (1922)
2018-07-15 / russportal
Н. А. Соколовъ. "Убійство Царской Семьи". Глава 16-я (1925)
2018-07-15 / russportal
Н. А. Соколовъ. "Убійство Царской Семьи". Глава 15-я (1925)
2018-07-14 / russportal
И. А. Ильинъ. "Путь духовнаго обновленія". Гл. 4-я. Разд. 4-й (1962)
2018-07-14 / russportal
И. А. Ильинъ. "Путь духовнаго обновленія". Гл. 4-я. Разд. 3-й (1962)
2018-07-14 / russportal
И. А. Ильинъ. "Путь духовнаго обновленія". Гл. 4-я. Разд. 2-й (1962)
2018-07-14 / russportal
И. А. Ильинъ. "Путь духовнаго обновленія". Гл. 4-я. Разд. 1-й (1962)
2018-07-13 / russportal
Преп. Ефремъ Сиринъ. О блаженныхъ мѣстахъ (1897)
2018-07-13 / russportal
Преп. Ефремъ Сиринъ. О блаженныхъ обителяхъ (1897)
2018-07-13 / russportal
Ген. П. Н. Красновъ. "За чертополохомъ". Часть 1-я. Глава 34-я (1922)
Новости въ видѣ
RSS-канала: .
Сегодня - вторникъ, 17 iюля 2018 г. Сейчасъ на порталѣ посѣтителей - 15.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ СРЕДУ ЧЕТВЕРТЫЯ СЕДМИЦЫ ВЕЛИКАГО ПОСТА.

ВО ВТОРНИКЪ СРЕДНІЯ СЕДМИЦЫ ВЕЧЕРА,
На Го́споди воззва́хъ... поста́вимъ стихо́въ 6 и пое́мъ стихи́ры подо́бны тріо́ди, гла́съ 6. Подо́бенъ: Все́ отло́жше.

Посредѣ́ земли́ претерпѣ́лъ еси́ Кре́стъ и Стра́сть, Ще́дре, всѣ́мъ безстра́стіе и избавле́ніе подая́. Преполове́ніемъ дне́сь посто́въ, сего́ ра́ди вси́ въ поклоне́ніе того́ предлага́емъ и ра́достно облобыза́емъ, ви́дѣти Твоя́ Стра́сти и живоно́сное Воскресе́ніе, просвѣще́ни боже́ственными добродѣ́тельми, Сло́ве Бо́жій, да сподо́бимся вси́, еди́не Многоми́лостиве.

Подо́бенъ:

Ме́ртвъ бы́лъ еси́ на Крестѣ́ просте́ртъ, и копіе́мъ прободе́нъ, и же́лчію, Долготерпѣли́ве, напая́емь, Ме́ррскія во́ды, Влады́ко, руко́ю Моисе́овою въ сла́дость преложи́вый. Тѣ́мже молю́ся Тебѣ́ и прошу́: стра́сти горча́йшія отъ мы́сли моея́ отжени́, и покая́нія ме́домъ у́мъ мо́й услади́въ, покло́нника мя́ покажи́ честны́я Стра́сти Твоея́.

Ина, гла́съ 1. Подо́бенъ: Дре́вле Моисе́ю.

Его́же дре́вле Моисе́й прообра́жъ дла́ньма свои́ма, побѣжда́ше Амали́ка, вели́кій Кре́стъ дне́сь, предъ очи́ма на́шима зря́ще, лю́діе, предлежи́мый стра́шно, прикосне́мся чистото́ю, умо́мъ же и устна́ма: на не́мъ бо Христо́съ вознесе́ся, умертви́вый сме́рть. И таковы́я благода́ти вси́ сподо́бившеся, пѣ́сньми богодухнове́нными всѣ́хъ Спа́са пѣсносло́вяще, мо́лимся дости́гнути и са́мое спаси́тельное Воскресе́ніе.

Ины стихи́ры подо́бны, гла́съ 4. Подо́бенъ: Да́лъ еси́ зна́меніе.

Пріиди́те, поклони́мся жи́зни на́шея хода́таю, явле́нному Дре́ву дне́сь, Христа́ Бо́га на́шего Кресту́, и́мже сме́рть уязви́ся и воскресе́ніе на́мъ, па́дшимъ, обнови́ся я́вѣ, Изба́вившему зову́ще: на́съ ра́ди во́лею Пострада́вый, да спасе́ши вся́ческая, Бо́же на́шъ, сла́ва Тебѣ́!

Держа́ва необори́мая христіа́номъ на́мъ даде́ся Кре́стъ Тво́й, Спа́се на́шъ, и́мже иноплеме́нныхъ язы́ковъ побѣжда́ются мно́жества, и ми́ръ Це́ркви Твое́й, Христе́, осѣня́етъ, правосла́вящей до́брѣ. Его́же ны́нѣ цѣлу́юще, Тебѣ́ те́плѣ взыва́емъ: ча́сти сподо́би и на́съ святы́хъ Твои́хъ!

Слеза́ми очи́стивше душе́вная чу́вства и посто́мъ очи́стившеся, пріиди́те, поклони́мся Кре́стному дре́ву, и́мже упраждня́ются душетлѣ́нныя пло́ти воздержа́ніемъ взыгра́нія, Распе́ншемуся зову́ще: Твоего́, Спа́се, сподо́би тридне́внаго Воста́нія поклони́тися сія́нію.

Сла́ва, и ны́нѣ, гла́съ 8:

Дне́сь Влады́ка тва́ри и Госпо́дь сла́вы на Крестѣ́ пригвожда́ется и въ ре́бра пробода́ется. Же́лчи и о́цта вкуша́етъ сла́дость церко́вная. Вѣнце́мъ отъ те́рнія облага́ется, покрыва́яй не́бо о́блаки. Оде́ждею облачи́тся поруга́нія и зауша́ется бре́нною руко́ю, руко́ю созда́вый человѣ́ка. По плеще́ма біе́нъ быва́етъ, одѣва́яй не́бо о́блаки. Заплева́нія и ра́ны пріе́млетъ, поноше́нія и зауше́нія, и вся́ терпи́тъ мене́ ра́ди осужде́ннаго, Изба́витель мо́й и Бо́гъ, да спасе́тъ мíръ отъ пре́лести, я́ко Благоутро́бенъ.

[Зри́:] Въ мине́и же оставля́емъ и глаго́лемъ кано́нъ свята́го на повече́ріи.

Проки́менъ псало́мъ 67-й, гла́съ 6: Воспо́йте Го́сподеви,* по́йте и́мени Его́. Сти́хъ: Путесотвори́те Возше́дшему на за́пады.

Бытія́ чте́ніе. [Глава́ 9.]

Рече́ Бо́гъ Но́еви и сыно́мъ его́ съ ни́мъ, глаго́ля: се́ Азъ поставля́ю завѣ́тъ Мо́й ва́мъ и сѣ́мени ва́шему по ва́съ, и вся́кой души́, живу́щей съ ва́ми, отъ пти́цъ и отъ ско́тъ, и всѣ́мъ звѣре́мъ земны́мъ, ели́ка съ ва́ми (су́ть) отъ всѣ́хъ изше́дшихъ изъ ковче́га. И поста́влю завѣ́тъ Мо́й съ ва́ми: и не у́мретъ вся́ка пло́ть ктому́ отъ воды́ пото́пныя, и ктому́ не бу́детъ пото́пъ во́дный, е́же истли́ти всю́ зе́млю. И рече́ Госпо́дь Бо́гъ Но́еви: сіе́ зна́меніе завѣ́та, е́же Азъ даю́ между́ Мно́ю и ва́ми и между́ вся́кою душе́ю живо́ю, я́же е́сть съ ва́ми въ ро́ды вѣ́чныя: дугу́ Мою́ полага́ю во о́блацѣ, и бу́детъ въ зна́меніе завѣ́та (вѣ́чнаго) между́ Мно́ю и земле́ю. И бу́детъ егда́ наведу́ о́блаки на зе́млю, яви́тся дуга́ Моя́ во о́блацѣ. И помяну́ завѣ́тъ Мо́й, и́же е́сть между́ Мно́ю и ва́ми и между́ вся́кою душе́ю, живу́щею во вся́кой пло́ти, и не бу́детъ ктому́ вода́ въ пото́пъ, я́ко потреби́ти вся́ку пло́ть. И бу́детъ дуга́ Моя́ во о́блацѣ, и узрю́ ю́, е́же помяну́ти завѣ́тъ вѣ́чный между́ Мно́ю и земле́ю, и между́ вся́кою душе́ю, живу́щею во вся́кой пло́ти, я́же е́сть земли́. И рече́ Бо́гъ Но́еви: сіе́ зна́меніе завѣ́та, его́же положи́хъ между́ Мно́ю и между́ вся́кою пло́тію, я́же е́сть на земли́.

Проки́менъ, псало́мъ 68-й, гла́съ 6: Спасе́ніе Твое́, Бо́же,* да пріи́метъ мя́. Сти́хъ: Да у́зрятъ ни́щіи и возвеселя́тся.

При́тчей чте́ніе. [Глава́ 12.]

Уста́ разу́мнаго хвали́ма быва́ютъ отъ му́жа, слабосе́рдъ же поруга́емь быва́етъ. Лу́чше му́жъ въ безче́стіи, рабо́таяй себѣ́, не́жели че́сть себѣ́ обложи́въ, и лиша́яйся хлѣ́ба. Пра́ведникъ ми́луетъ ду́ши ското́въ свои́хъ, утро́бы же нечести́выхъ неми́лостивны. Дѣ́лаяй свою́ зе́млю испо́лнится хлѣ́бовъ, гоня́щіи же су́етная лише́ни ра́зума. Иже е́сть сла́достенъ въ ви́нномъ пребыва́ніи, въ свои́хъ тверды́няхъ оста́витъ безче́стіе. Жела́нія нечести́выхъ зла́, коре́ніе же благочести́выхъ въ тве́рдостехъ. За грѣ́хъ усте́нъ впа́даетъ въ сѣ́ти грѣ́шникъ, избѣгае́тъ же отъ ни́хъ пра́ведникъ. Сматря́яй кро́тко поми́лованъ бу́детъ, а срѣта́яй во вратѣ́хъ оскорби́тъ ду́ши. Отъ плодо́въ у́стъ душа́ му́жа напо́лнится благи́хъ, воздая́ніе же усте́нъ его́ возда́стся ему́. Путіе́ безу́мныхъ пра́ви предъ ни́ми, послу́шаетъ совѣ́товъ му́дрый. Безу́мный а́біе исповѣ́сть грѣ́хъ сво́й, кры́етъ же свое́ безче́стіе хи́трый. Явле́нную вѣ́ру возвѣща́етъ пра́ведный, свидѣ́тель же непра́ведныхъ льсти́въ. Су́ть, и́же глаго́люще уязвля́ютъ а́ки мечи́, язы́цы же прему́дрыхъ исцѣля́ютъ. Устнѣ́ и́стины исправля́ютъ свидѣ́тельство, свидѣ́тель же ско́ръ язы́къ и́мать непра́веденъ. Ле́сть — въ се́рдцѣ кую́щаго зла́я, хотя́щіи же ми́ра возвеселя́тся. Ничто́же непра́ведное уго́дно е́сть пра́ведному, нечести́віи же испо́лнятся злы́хъ. Ме́рзость Го́сподеви — устнѣ́ лжи́вы, творя́й же вѣ́рно прія́тенъ Ему́.

На стихо́внѣ самогла́сенъ, гла́съ 3, два́жды:

Побѣжда́я мытаря́ прегрѣше́ньми, не ревну́ю покая́нію; фарисе́ова же не стяжа́въ исправле́нія, подража́ю возноше́ніе. Но Твоего́ смире́нія превосхожде́ніемъ, Христе́ Бо́же, бѣсо́вское высокому́дріе на Крестѣ́ низложи́вый, пе́рваго у́бо лука́вства, послѣ́дняго же безу́мія отчужди́ мя́, обои́хъ благо́е предложе́ніе въ души́ мое́й утверди́въ, и спаси́ мя́.

Му́чениченъ: Проро́цы, и апо́столи Христо́вы, и му́ченицы научи́ша пѣ́ти Тро́ицу Единосу́щную, и просвѣти́ша язы́ки заблу́ждшія, и о́бщники а́нгеловъ сотвори́ша сы́ны человѣ́ческія.

Сла́ва, и ны́нѣ, самогла́сенъ, гла́съ 5:

Зря́щи Тя́ тва́рь вся́ на Крестѣ́ на́га ви́сяща, Содѣ́теля и Зижди́теля всѣ́хъ, измѣня́шеся стра́хомъ и рыда́ше: со́лнце же свѣ́тъ омрачи́ и земля́ колеба́шеся, ка́меніе же разсѣда́шеся и хра́ма свѣ́тлость раздира́шеся, ме́ртвіи воста́ша отъ гробо́въ и а́нгельскія си́лы ужасо́шася, глаго́люще: О, чудесе́! Судія́ су́дится и стра́ждетъ хотя́ за спасе́ніе мíра и обновле́ніе.


ВЪ СРЕДУ СРЕДНІЯ СЕДМИЦЫ, НА УТРЕНИ,
Тро́ичны гла́са.

По 1-мъ стихосло́віи сѣда́льны кре́стны осмогла́сника.

По 2-мъ же стихосло́віи глаго́лемъ настоя́щій сѣда́ленъ господи́на Іо́сифа, гла́съ 6. Подо́бенъ: Упова́ніе мíра.

Воздержа́нія вре́мя, освяща́ющій боже́ственный и всечестны́й Кре́стъ въ поклоне́ніе лежи́тъ, присту́пимъ со́вѣстію чи́стою, почерпе́мъ освяще́ніе и просвѣще́ніе, и со стра́хомъ возопіи́мъ: Человѣколю́бче, Спа́се на́шъ, сла́ва благоутро́бію Твоему́! [Два́жды.]

[Сла́ва, и ны́нѣ,] крестобогоро́диченъ. Подо́бенъ:

Предстоя́щи Кресту́ Неискусобра́чная Ма́ти, отъ Нея́ безсѣ́менно Ро́ждшагося, взыва́ше: ме́чь се́рдце Мое́ про́йде, о Сы́не! не терпя́щи повѣ́шена на Дре́вѣ Тя́ зрѣ́ти, Его́же трепе́щутъ вся́ческая, я́ко Созда́теля и Бо́га, Долготерпѣли́ве, сла́ва Тебѣ́!

По 3-мъ стихосло́віи сѣда́ленъ господи́на Ѳео́дора, гла́съ 1. Подо́бенъ: Отча́янная.

Просвѣти́вшеся добродѣ́тельми, присту́пимъ, воздержа́нія чистоту́ стяжа́вше, и Кресту́ Честно́му вопію́ще, поклони́мся: освяти́ на́ша ду́ши и тѣлеса́, сподо́би на́съ и пречи́стѣй Стра́сти Твое́й поклони́тися, еди́не Бо́же всѣ́хъ, да́руй на́мъ и ми́лости Твоя́! [Два́жды.]

[Сла́ва, и ны́нѣ,] крестобогоро́диченъ, гла́съ то́йже. Подо́бенъ: Гро́бъ Тво́й.

Зря́щи Тя́, Христе́, Всенепоро́чная Ма́ти, ме́ртва на Крестѣ́ просте́рта, вопія́ше: Сы́не Мо́й, Собезнача́льне Отцу́ и Ду́хови, ко́е неизрече́нное смотре́ніе Твое́ сіе́, и́мже спа́слъ еси́ пречи́стыхъ ру́къ Твои́хъ, Ще́дре, созда́ніе?

Кано́нъ Креста́, его́же краестро́чіе: Всечестно́му поклони́мся Дре́ву. Творе́ніе господи́на Ѳео́фана.

Пѣ́снь 1, гла́съ 4.

Ирмо́съ: Отве́рзу уста́ моя́, [и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́].

Дре́ву свято́му, на не́мже Христо́съ простре́ дла́ни, побѣжда́яй сопроти́вная нача́ла, поклони́мся, посто́мъ очи́стившеся, въ хвалу́ и сла́ву Вседержи́теля.

Ви́дится предлежи́мь, освяще́ніе подава́яй, Кре́стъ спаси́тельный, къ сему́ присту́пимъ, очи́стивше и тѣ́ло и се́рдце, и почерпе́мъ благода́ть спаси́тельную.

[Сла́ва:] Огне́мъ мя́ очи́сти за́повѣдей Твои́хъ, Человѣколю́бче, и Твоя́ спаси́тельная пода́ждь ми́ Стра́сти ны́нѣ ви́дѣти, и любо́вію поклони́тися, Кресто́мъ огражда́ему и соблюда́ему.

[И ны́нѣ,] богоро́диченъ: Вознесе́ніе ви́дящи на Крестѣ́ Твое́, Человѣколю́бче, рыда́ше зову́щи Тя́ Ро́ждшая: ка́ко осужде́нъ, хотя́й всѣ́мъ суди́ти, ви́дится ви́сяй сла́вы Госпо́дь?

Пѣ́снь 3.

Ирмо́съ: Твоя́ пѣсносло́вцы, [Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би].

Поста́ водо́ю сердца́ очи́стивше, дре́во Кре́стное вѣ́рно обы́мемъ, на не́мже Христо́съ ви́ся, во́ду на́мъ оставле́нія, я́ко Благодѣ́тель, источи́.

Кре́стнымъ вѣ́триломъ окрили́вшеся, кора́бль спаси́тельный, се́ поста́ преполови́вше, Мессíя, Іису́се Бо́же, и́мже на́съ Стра́сти Твоея́ къ приста́нищу окорми́.

Образова́ше Моисе́й тя́ на горѣ́ враго́въ на убіе́ніе, Кре́сте. Мы́ же вообража́емъ тя́ се́рдцемъ, и зря́ще тя́, и покланя́ющеся, побѣжда́емъ враги́ безпло́тныя си́лою твое́ю.

Богоро́диченъ: Хотѣ́ніемъ Твои́мъ Человѣ́къ бы́лъ еси́, Бо́гъ сы́й и всѣ́хъ Творе́цъ, и ны́нѣ на Крестѣ́ Тя́ ви́сима зрю́, Сы́не Мо́й, Христе́, — Тя́ Ро́ждшая глаго́лаше, — и се́рдцемъ уязвля́юся.

Трипѣ́снецъ, гла́съ 6.
Пѣ́снь 3.

Ирмо́съ: Госпо́дь, Сы́й, всѣ́хъ [и Зижди́тель Бо́гъ, созда́нное, Безстра́стный, обнища́въ, Себѣ́ соедини́, и Па́сха, за я́же хотя́ше умре́ти, Са́мъ Сы́й, Себе́ предпожре́: яди́те, — вопія́, — Тѣ́ло Мое́ и вѣ́рою утверди́теся].

Госпо́дь сы́й всѣ́хъ и Зижди́тель Бо́гъ, посредѣ́ земли́ на Крестѣ́ возне́слся еси́, къ Себѣ́ вознося́ человѣ́ческое существо́, па́дшее злы́мъ врага́ совѣ́томъ. Тѣ́мже Тя́ вѣ́рно сла́вимъ, Стра́стію Твое́ю утвержда́еми.

Очи́стивше чу́вства поще́нія свѣ́томъ, Креста́ мы́сленными луча́ми, бога́тно, вѣ́рніи, озари́мся, и се́й благоговѣ́йно предлежа́щій дне́сь зря́ще, устна́ми чи́стыми, и усты́, и се́рдцемъ цѣлу́емъ.

Мѣ́сту, на не́мже стоя́стѣ но́зѣ Христо́вы, поклони́мся, боже́ственному Кресту́, на ка́мени Бо́жіихъ за́повѣдей утверди́тися нога́мъ прося́ще души́ на́шея, напра́витися сея́ стопа́мъ на пу́ть ми́рный Боже́ственною благода́тію.

Богоро́диченъ: Изъ Отрокови́цы безму́жныя проше́лъ еси́, Христе́, пріи́мъ отъ Сея́ пло́ть мы́сленную и одушевле́нную, и Кресто́мъ Твои́мъ врага́ потреби́въ, истлѣ́вшее человѣ́ческое существо́ па́ки обнови́лъ еси́, тѣ́мже сла́вимъ благоутро́біе Твое́.

Иный. Гла́съ 1.

Ирмо́съ: Утверди́, Го́споди, [Це́рковь Твою́, ю́же стяжа́лъ еси́ си́лою Креста́ Твоего́, и́мже врага́ побѣди́лъ еси́ и просвѣти́лъ еси́ вселе́нную].

Восплещи́те вси́ концы́ пѣ́сньми, зря́ще покланя́емое Дре́во, на не́мже Христо́съ повѣ́шенъ бы́сть и діа́волъ уязви́ся.

Предлага́ется дне́сь живоно́сная ра́дость, пріиди́те вси́, поклони́мся со стра́хомъ Христо́ву Честно́му Кресту́, да пріи́мемъ Ду́ха Свята́го.

[Сла́ва,] тро́иченъ: Трилу́чное Со́лнце, Трисія́нный Свѣ́те, Бо́же Отче, Сы́не и Святы́й Ду́ше, безнача́льное Естество́ и сла́во, пою́щія Тя́ изба́ви отъ бѣ́дъ.

[И ны́нѣ,] богоро́диченъ: Пою́тъ Тя́ чи́ни а́нгельстіи, Благослове́нная Богоро́дице Всепѣ́тая и Дѣ́во, съ ни́миже ны́нѣ Тя́ ро́дъ человѣ́ческій, я́ко Безневѣ́стную, славосло́витъ.

Сла́ва Тебѣ́, Бо́же на́шъ, сла́ва Тебѣ́.

Гряды́й прикосну́тися тебѣ́, Живоно́сный Кре́сте, ужаса́юся язы́комъ и мы́слію, прови́дя, я́ко на тебѣ́ излія́ся Го́спода моего́ Боже́ственная Кро́вь.

Ирмо́съ: Утверди́, Го́споди, Це́рковь Твою́, ю́же стяжа́лъ еси́ си́лою Креста́ Твоего́, и́мже врага́ побѣди́лъ еси́ и просвѣти́лъ еси́ вселе́нную.

Сѣда́льны, гла́съ 6. Самогла́сны:

Дне́сь проро́ческое испо́лнися сло́во: се́ бо покланя́емся на мѣ́сто, идѣ́же стоя́стѣ но́зѣ Твои́, Го́споди. И Дре́ва спасе́нія вкуси́вше, грѣхо́вныхъ страсте́й свобо́ду улучи́хомъ, моли́твами Богоро́дицы, Еди́не Человѣколю́бче.

Сла́ва:

Кре́стъ Тво́й, Го́споди, освяти́ся, въ не́мъ бо быва́ютъ исцѣле́нія боля́щимъ во грѣсѣ́хъ, и́мже Тебѣ́ припа́даемъ, поми́луй на́съ.

И ны́нѣ:

То́кмо водрузи́ся дре́во, Христе́, Креста́ Твоего́, основа́нія поколеба́шася сме́рти, Го́споди: его́же бо поглоти́ жела́ніемъ а́дъ, отпусти́ тре́петомъ. Яви́лъ еси́ на́мъ спасе́ніе Твое́, Святы́й, и славосло́вимъ Тя́, Сы́не Бо́жій, поми́луй на́съ.

Пѣ́снь 4.

Ирмо́съ: Сѣдя́й въ сла́вѣ [на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й].

Вообража́я зна́меніе Креста́, ру́цѣ простира́ше премѣне́ніемъ, вну́чата дре́вле Іа́ковъ сла́вный благословля́я и зна́менуя спаси́тельное благослове́ніе, на всѣ́хъ на́съ приходя́щее.

Соблюда́еми печа́тію Креста́ и предлежа́ща съ ра́достію ду́ха того́ цѣлу́юще, къ спаси́тельнымъ Страсте́мъ и́демъ, губи́тельныя стра́сти плотскíя умертви́вше.

[Сла́ва:] Спаси́тельное тя́ ору́жіе, непобѣди́мую побѣ́ду, ра́дости зна́меніе, и́мже сме́рть умертви́ся, обы́мемъ, сла́вою украша́ющеся на тебѣ́ Пригво́ждшагося, Кре́сте Всечестны́й.

[И ны́нѣ,] богоро́диченъ: Ви́димый Мно́ю, ви́димь бы́лъ еси́ а́нгеломъ Непристу́пный, Іису́се Сы́не Мо́й, пло́ть отъ Мене́ заимова́вый. И ны́нѣ зря́щи Тя́ на Дре́вѣ пригвожде́на, рыда́ю. — Христо́ва Ма́ти глаго́лаше.

Пѣ́снь 5.

Ирмо́съ: Ужасо́шася [вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая].

Ме́ртвъ бы́лъ еси́, на Крестѣ́ пригвожда́емь, всѣ́мъ сы́й Жи́знь и Спасе́ніе. Сего́ у́бо да́руй очище́нною душе́ю, Спа́се, на́мъ объя́ти и Твоя́ Стра́сти спаси́тельныя ви́дѣти ра́дующимся.

Предстоя́тъ чи́нове Тебѣ́ безпло́тныхъ трепе́щуще, Дре́во Животода́тельное: на тебѣ́ бо честну́ю Кро́вь Свою́ Христо́съ излія́, лучу́ испуща́я издале́ча, бѣсо́мъ нося́ па́губу безконе́чную.

[Сла́ва:] Ору́жіемъ уя́звеннаго вра́жіимъ, исцѣли́ мя́ Кро́вію Твое́ю, Сло́ве, и копіе́мъ, грѣхо́въ мои́хъ вско́рѣ раздери́, Спа́се, рукописа́ніе, — вопію́ Ти́, — въ кни́ги напису́я мя́ спасе́нныхъ, я́ко Благоутро́бенъ.

[И ны́нѣ,] богоро́диченъ: Гро́здъ зрѣ́лый, ка́ко на Дре́вѣ обѣ́сился еси́? Со́лнце сла́вы, ка́ко взя́лся еси́, сія́ніе со́лнца омрача́я, Спа́се, Стра́стію Твое́ю? — Ро́ждшая Тя́ Агница дре́вле вопія́ше Ти́, ма́терски восклица́ющи.

Пѣ́снь 6.

Ирмо́съ: Возопи́, прообразу́я [погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ].

Стря́слъ еси́ водруже́нный а́дово жили́ще, вѣ́рнымъ же непоколеби́мое утвержде́ніе бы́лъ еси́, извѣ́стный покро́въ, Госпо́день Кре́сте Всечестны́й.

Плодоно́сни добродѣ́тельми бы́вше, обы́мемъ боже́ственнаго Дре́ва живоно́сныя плоды́, я́же прозябе́, простры́йся на се́мъ Іису́съ, плодови́тая Лоза́.

[Сла́ва:] Пое́мъ Твою́, Іису́се, мно́гую бла́гость, покланя́ющеся Кресту́ Твоему́, копію́, тро́сти, тѣ́ми бо разруши́лъ еси́ вражды́, Ще́дре, средогра́діе.

[И ны́нѣ,] богоро́диченъ: Во́дъ Тя́ рѣку́ Живото́чныхъ роди́, Всечи́стая, я́ко исто́чника на́шего обновле́нія, на Крестѣ́ Просте́ршагося и ка́пли спасе́нія Источи́вшаго.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Конда́къ, гла́съ 7. Самогла́сенъ:

Не ктому́ пла́менное ору́жіе храни́тъ вра́тъ Еде́мскихъ, на ты́я бо на́йде пресла́вный соу́зъ, Дре́во Кре́стное, сме́ртное жа́ло и а́дова побѣ́да прогна́ся. Предста́лъ бо еси́, Спа́се мо́й, вопія́ су́щимъ во а́дѣ: вни́дите па́ки въ ра́й.

Икосъ:

Три́ кресты́ водрузи́ на Голго́ѳѣ Пила́тъ: два́ разбо́йниковъ и еди́нъ Жизнода́вца. Его́же ви́дѣ а́дъ и рече́ су́щимъ до́лѣ: о, слуги́ мои́ и си́лы моя́! Кто́ водрузи́въ Гво́здіе въ се́рдце мое́, древяны́мъ мя́ копіе́мъ внеза́пу прободе́? И растерза́юся, вну́тренними мои́ми болю́, утро́бою уязвля́юся, чу́вства моя́ смуща́ютъ ду́хъ мо́й и понужда́ются изрыга́ти Ада́ма и су́щія отъ Ада́ма, дре́вомъ да́нныя ми́: Дре́во бо сія́ вво́дитъ па́ки въ ра́й.

Пѣ́снь 7.

Ирмо́съ: Не послужи́ша тва́ри [богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́].

Сѣки́ра, ю́же Елиссе́й взя́ отъ Іорда́на, Христе́, Кре́стъ явля́ше, и́мже изъ глубины́ су́етія язы́ки извле́клъ еси́, воспѣва́ющія: отце́въ Госпо́дь и Бо́гъ, благослове́нъ еси́.

Ра́дуются со земны́ми небе́сная поклоне́нію твоему́, Кре́сте, тобо́ю бо а́нгеломъ и человѣ́комъ соедине́ніе бы́сть, всеси́льне, вопію́щимъ: Го́споди Бо́же, благослове́нъ еси́.

[Сла́ва:] Яко кипари́съ — милосе́рдіе, я́ко ке́дръ же — вѣ́ру благово́нную, я́ко пе́вкъ — и́стинную любо́вь принося́ще, Госпо́дню Кресту́ поклони́мся, на не́мъ сла́вяще Изба́вителя пригвозди́вшагося.

[И ны́нѣ,] богоро́диченъ: Не поколеба́въ небе́сная, во утро́бу Твою́ Бо́гъ всели́ся, гра́де Бо́жій избра́нный, на Крестѣ́ же ви́ся, тва́рь поколеба́. Его́же моли́ на недви́жимомъ ка́мени Его́ мнѣ́ соблюсти́ся.

Пѣ́снь 8.

Ирмо́съ: Отроки благочести́выя [въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки].

Просте́рлъ еси́ ру́цѣ на Дре́вѣ, руки́ неудержи́мыя разрѣша́я грѣ́хъ; копіе́мъ же пробо́лся еси́, си́мъ борца́ уязвля́я, Го́споди; же́лчи же вкуси́лъ еси́, сла́стную зло́бу изыма́я, о́цтомъ напои́лся еси́, всѣ́хъ Весе́ліе.

Умо́мъ чи́стымъ и со́вѣстію свѣ́тло приступи́вше, поклони́мся: предлежи́тъ честно́е Дре́во и свято́е, и́мже Христо́съ безче́стную подъя́тъ сме́рть, че́сть наложи́въ высоча́йшую преступле́ніемъ лю́тѣ обезче́стившимся.

Дре́вомъ грѣха́ умертви́хся и вкуше́ніемъ сла́стнымъ погребо́хся, оживи́ мя́, Го́споди, воздви́гни мя́ лежа́щаго, покло́нника яви́ Страсте́й Твои́хъ, и прича́стника Воста́нія Боже́ственнаго, и наслѣ́дника возлюби́вшихъ Тя́.

Богоро́диченъ: Вознесе́на Тя́ ви́ящи, ни добро́ты въ Стра́сти, ни ви́да иму́ща, Его́же воплоще́нна разумѣ́хъ, Краснѣ́йша па́че сыно́въ человѣ́ческихъ, Тя́ Единоро́дный Сы́не, — Всечи́стая вопія́ше Дѣ́ва, — покажи́ Твою́ сла́ву, всѣ́хъ Спасе́ніе.

Иный.

Ирмо́съ: За зако́ны оте́ческія [блаже́нніи въ Вавило́нѣ ю́ноши, предбѣ́дствующе, царю́ющаго оплева́ша повелѣ́ніе безу́мное и, совоку́плени, и́мже не свари́шася огне́мъ, Держа́вствующему досто́йную воспѣва́ху пѣ́снь: Го́спода по́йте, дѣла́, и превозноси́те во вся́ вѣ́ки].

Въ полу́дни распе́ншуся Тебѣ́ посредѣ́ земли́ во́лею, мірскíя концы́ изъ среды́ горта́ни змíевы исто́рглъ еси́, Ще́дре. Тѣ́мже въ сре́днюю седми́цу боже́ственныхъ посто́въ покланя́ющеся, сла́вимъ Честны́й Кре́стъ Тво́й, — Го́спода по́йте, — вопію́ще, — и превозноси́те во вѣ́ки.

Ра́дости зна́меніе, ору́жіе неруши́мое, Це́ркве стѣно́, му́чениковъ похвало́, апо́столовъ украше́ніе, архіере́евъ утвержде́ніе, укрѣпи́въ изнемо́гшую мою́ ду́шу, поклони́тися сподо́би и пѣ́ти Тебѣ́, вопію́ща: Го́спода по́йте, дѣла́, и превозноси́те во вся́ вѣ́ки.

Рыда́ю и пла́чу, егда́ во умѣ́ мое́мъ пріиму́ суди́ще неумы́тное, Долготерпѣли́ве, осужде́нъ сы́й. Тѣ́мже пощади́ мя́ и отягче́нное бре́мя души́ моея́ облегчи́, да ра́дуяся, зову́: Го́спода по́йте, дѣла́, и превозноси́те во вся́ вѣ́ки.

Богоро́диченъ: Образова́ше купина́ та́йну, па́че ума́ Твоего́ Рождества́, Дѣ́во Всенепоро́чная: я́коже бо она́, пребыла́ еси́ неопа́льно Огнь ро́ждшая Христа́ Спа́са, возне́сшагося на Кре́стъ. Его́же моли́ изба́вити мя́ огня́ вѣ́чнаго, вопію́ща: Го́спода воспѣва́йте, дѣла́, и превозноси́те во вся́ вѣ́ки.

Иный.

Ирмо́съ: Се́й нарече́нный и святы́й де́нь — [еди́нъ суббо́тъ ца́рь и госпо́дь, пра́здниковъ пра́здникъ и торжество́ е́сть торже́ствъ, въ о́ньже благослови́мъ Христа́ во вѣ́ки].

Пріиди́те, Кре́стъ предлежа́щій Госпо́день, посто́мъ очи́стившеся, облобыза́имъ любо́вію: сокро́вище бо на́мъ свяще́нія е́сть и си́лы. Тѣ́мже пое́мъ Его́ во вѣ́ки.

Се́й Кре́стъ трича́стный и вели́кій, малови́димь сы́й, небе́съ ши́ршій е́сть си́лою свое́ю, человѣ́ки къ Бо́гу возво́дитъ при́сно, и́мже благослови́мъ Христа́ во вѣ́ки.

Благослови́мъ Отца́, и Сы́на, и Свята́го Ду́ха, Го́спода.

[Тро́иченъ:] Еди́но въ Тре́хъ начерта́ніихъ Существо́ сла́вя, не слива́ю единоли́чно Тре́хъ, ниже́ пресѣца́ю зра́ка, Отца́, и Сы́на, со Ду́хомъ, — Еди́нъ бо надъ всѣ́ми Бо́гъ въ Тро́ицѣ.

И ны́нѣ, [богоро́диченъ:] Еди́на въ ма́терехъ яви́лася еси́, Дѣ́во Богоневѣ́сто Марíе, безъ му́жа роди́вшая Спа́са Христа́, чистоты́ печа́ть сохра́нши. Тя́ блажи́мъ, человѣ́цы, во вѣ́ки.

Сла́ва Тебѣ́, Бо́же на́шъ, сла́ва Тебѣ́.

Сіе́ всесвято́е Дре́во да почти́тся, е́же проро́къ дре́вле вложи́ти въ хлѣ́бъ Христо́въ взыва́етъ, отъ изра́ильтянъ, распе́ншихъ Его́. Его́же превозно́симъ во вся́ вѣ́ки.

[Хва́лимъ, благослови́мъ, покланя́емся Го́сподеви, пою́ще и превознося́ще во вся́ вѣ́ки].

Ирмо́съ: Ру́цѣ, въ ро́въ ве́рженный льво́въ, иногда́ вели́кій во проро́цѣхъ крестообра́зно просте́ръ Даніи́лъ, неврежде́нъ отъ си́хъ снѣ́ди спасе́ся, благословя́ Христа́ Бо́га во вѣ́ки.

Пѣ́снь 9.

Ирмо́съ: Вся́къ земноро́дный [да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во].

Копіе́мъ Твое́ ребро́ отверза́еши, оставле́нія распростира́я ми́ исто́чникъ; на Дре́вѣ же пригвозди́лся еси́, дре́вомъ уставля́я осужде́ніе, посредѣ́ земли́, Человѣколю́бче, е́же мы́ преполове́ніемъ поста́ ны́нѣ облобыза́емъ, воспѣва́юще Твою́ благосты́ню.

Го́ры — сла́дость, хо́лми — ра́дованіе, любо́вію иска́пайте; древа́ же польска́я, Лива́нстіи ке́дри, лику́йте, поклоне́ніемъ дне́сь Живоно́снаго Креста́; проро́цы, му́ченицы, апо́столи и пра́ведныхъ ду́си, взыгра́йте.

При́зри на лю́ди и достоя́ніе Твое́, Го́споди, стра́хомъ пою́щія Тя́, сме́рть во́льную и́хже ра́ди претерпѣ́лъ еси́, да не побѣди́тъ Твоего́ благоутро́бія безмѣ́рное мно́жество зо́лъ на́шихъ, но спаси́ вся́ ны́, Преблагíй, Кресто́мъ Твои́мъ, я́ко Человѣколю́бецъ.

Богоро́диченъ: Манове́ніемъ Твои́мъ коле́блеши ви́димый мíръ, распина́емый, пребыва́еши же ви́симый, — Богоро́дица пла́чущи, глаго́лаше, — страстна́я умышле́нія первозда́ннаго, Христе́, потреби́ти хотя́ и исцѣли́ти того́ сокруше́ніе бла́гостію.

Иный.

Ирмо́съ, [гла́съ 2]: Недоумѣ́етъ вся́къ [язы́къ благохвали́ти по достоя́нію, изумѣва́етъ же у́мъ и премíрный пѣ́ти Тя́, Богоро́дице: оба́че Блага́я су́щи, вѣ́ру пріими́, и́бо любо́вь вѣ́си Боже́ственную на́шу, Ты́ бо христіа́нъ еси́ Предста́тельница, Тя́ велича́емъ].

Елиссе́й дре́вле изъ рѣки́ сѣ́чиво влекíй, дре́вомъ тя́, Кре́сте, животода́тельное дре́во вообража́ше, и́мже извлече́ изъ глубины́ Христо́съ язы́ки и́дольскаго бѣсова́нія, на тебѣ́ пригвозди́вся. Тѣ́мже покланя́ющеся тебѣ́, держа́ву Его́ сла́вимъ.

Со́лнечныя лучи́, Спа́се, преложи́шася во тму́ Твои́мъ распя́тіемъ, осія́ніе же луны́ угасе́ и стихíи тре́петомъ измѣня́хуся вся́. Тѣ́мже вопію́ Ти́: измѣне́на тмо́ю страсте́й помышле́нія моя́, Сло́ве, Твое́ю десни́цею премѣни́въ просвѣти́ и спаси́ мя́.

Язвою Твое́ю исцѣли́ души́ моея́ стра́сти, ре́бръ Твои́хъ прободе́ніемъ уста́ви болѣ́зненная прободе́нія бѣсо́въ, гвоздьми́ Твои́ми, Христе́, изгвозди́ сластна́я и страстна́я похотѣ́нія, подая́ ми́ безстра́стно Страсте́мъ Твои́мъ честны́мъ поклони́тися и Воскресе́нію.

Богоро́диченъ: Кра́снаго добро́тою родила́ Тя́ кра́сная Отрокови́ца, Его́же зря́щи ни добро́ты въ страда́ніи, ниже́ ви́да иму́ща, Спа́се, рыда́ющи, глаго́лаше: дивлю́ся па́че ума́, Сы́не Мо́й, Твоему́ смире́нію, и́мже спаса́еши смири́вшееся естество́ человѣ́ческое.

Иный.

Ирмо́съ: Свѣти́ся, свѣти́ся, [но́вый Іерусали́ме, сла́ва бо Госпо́дня на тебѣ́ возсія́. Лику́й ны́нѣ и весели́ся, Сіо́не. Ты́ же, Чи́стая, красу́йся, Богоро́дице, о воста́ніи Рождества́ Твоего́].

Предгряди́те, уясни́теся, вси́ лю́діе Бо́жіи, и дре́во Кре́стное предви́дяще предлежа́щее, цѣлу́йте со стра́хомъ, и пріими́те ра́дость, на не́мъ Го́спода сла́вы возне́сшагося сла́вяще при́сно.

Ору́жіе Боже́ственное ты́ жи́зни мое́й, Кре́сте, на тебе́ Влады́ка возше́дъ, спасе́ мя́, источи́ кро́вь и во́ду, прободе́нъ въ ре́бра, и́мже причаща́юся, ра́дуяся, сла́вя Его́.

[Сла́ва,] тро́иченъ: Тро́ицѣ Ли́цы, Еди́ницѣ Естество́мъ покланя́юся, Тебѣ́ Божество́ Свято́е, Отцу́, и Сы́ну, со Святы́мъ же Ду́хомъ, еди́ному нача́лу, еди́ному Ца́рству, всѣ́ми влады́чествующему.

[И ны́нѣ,] богоро́диченъ: Гора́ вели́кая, въ ню́же всели́ся Христо́съ, Ты́ яви́лася еси́, Дѣ́во, я́коже боже́ственный Дави́дъ вопіе́тъ, Еюже мы́ вознесо́хомся къ небеси́, всыни́вшеся Ду́хомъ, Всеблаже́нная.

Сла́ва Тебѣ́, Бо́же на́шъ, сла́ва Тебѣ́.

Ски́петре боже́ственный, Ца́рскій Кре́сте, во́инства му́жество, во упова́ніи твое́мъ ра́тники побѣжда́емъ. Побѣ́ды при́сно тебѣ́ кла́няющимся на ва́рвары пода́ждь на́мъ.

Ирмо́съ: О, Ма́ти, Дѣ́во и Богоро́дице нело́жная, ро́ждшая безсѣ́менно Христа́ Бо́га на́шего, на Кре́стъ возне́сшагося пло́тію. Тя́, вѣ́рніи вси́, досто́йно съ Ни́мъ ны́нѣ велича́емъ.

Свѣти́ленъ гла́са.
И настоя́щій ексапостила́рій, подо́бенъ: Ду́хомъ.

Преполове́ніемъ посто́въ Всечестно́е Дре́во всѣ́хъ въ поклоне́ніе призыва́етъ, ели́цы страстьми́ свои́ми, Христо́вымъ Страсте́мъ досто́йно спослѣ́дуютъ. Пріиди́те, вси́ вѣ́рніи, поклони́мся Дре́ву стра́шнаго та́инства.

[Сла́ва, и ны́нѣ,] крестобогоро́диченъ:

Безневѣ́стная и Всечи́стая Бо́га Сло́ва Ма́ти, вопія́ше крича́щи, пла́чемъ рыда́ющи: сицевы́я ли Ми́ Гавріи́лъ ра́дости принося́ше Благовѣ́щенія, Ча́до? Отыди́ испо́лнити неизрече́нный Совѣ́тъ и Боже́ственное смотре́ніе.

На стихо́внѣ самогла́сенъ дне́, два́жды, гла́съ 8:

Поще́нія пу́ть преполови́вше, веду́щій ко Кресту́ Твоему́ Честно́му, Тво́й де́нь ви́дѣти, его́же ви́дѣ Авраа́мъ и возра́довася, я́ко изъ гро́ба хо́лма жи́ва Исаа́ка пріе́мъ. Благоволи́ и на́съ, вѣ́рою изба́вившихся отъ врага́, и Ве́чери причасти́тися Та́йнѣй, въ ми́рѣ зову́щихъ: Просвѣще́ніе и Спаси́телю на́шъ, сла́ва Тебѣ́!

Му́чениченъ: Му́ченицы Христо́вы непобѣди́міи, побѣди́вше пре́лесть си́лою Кре́стною, воспрія́сте благода́ть вѣ́чныя жи́зни, мучи́телей преще́нія не убоя́стеся, му́ками ураня́еми веселите́ся, и ны́нѣ кро́ви ва́ша бы́ша исцѣле́нія ду́шъ на́шихъ. Моли́те спасти́ся душа́мъ на́шимъ.

Сла́ва, гла́съ то́йже:

Преполови́вше пучи́ну воздержа́нія, приста́нище пріи́мемъ спасе́нія, вре́мя Стра́сти Твоея́ во́льныя, Го́споди, но, я́ко Благоутро́бенъ и Ще́дръ, и де́нь сла́внаго Воскресе́нія Твоего́ въ ми́рѣ сподо́би на́съ ви́дѣти, Человѣколю́бче.

И ны́нѣ, па́ки то́йже.

[Зри́:] Крестопоклоне́ніе же быва́етъ въ 1-й ча́съ, въ о́ньже пое́мъ преднапи́санныя стихи́ры недѣ́льныя, самогла́сны, гла́съ 2: Пріиди́те, вѣ́рніи... и про́чая. И отпу́стъ.


НА 6-МЪ ЧАСѢ,
Тропа́рь проро́чества, гла́съ 6:

Кресту́ Твоему́ покланя́емся, Влады́ко, и свято́е Воскресе́ніе Твое́ сла́вимъ.

Проки́менъ, псало́мъ 69-й. Гла́съ 6: Да возра́дуются и возвеселя́тся о Тебѣ́* вси́ и́щущіи Тебе́, Бо́же. Сти́хъ: Да возвратя́тся вспя́ть и постыдя́тся [хотя́щіи ми́ зла́я].

Проро́чества Иса́іина чте́ніе. [Глава́ 26.]

Се́ Госпо́дь отъ свята́го (мѣ́ста) наво́дитъ гнѣ́въ на живу́щія на земли́, и откры́етъ земля́ кро́вь свою́ и не покры́етъ избіе́нныхъ. Въ то́й де́нь наведе́тъ Госпо́дь ме́чь святы́й, и вели́кій, и крѣ́пкій на дра́конта, змíя бѣжа́ща, на дра́конта — змíя лука́ваго, и убіе́тъ дра́конта, су́щаго въ мо́ри. Въ то́й де́нь виногра́дъ до́брый, жела́ше пѣ́ти надъ ни́мъ. Азъ — гра́дъ крѣ́пкій, гра́дъ вою́емый, всу́е напою́ его́, плѣне́нъ бо бу́детъ но́щію, въ де́нь же паде́тся стѣна́ его́, нѣ́сть того́, и́же не во́зметъ его́. Кто́ мя́ приста́витъ стрещи́ сте́блія на ни́вѣ? Ра́ди вражды́ сея́ отри́нухъ и́. Убо, сего́ ра́ди сотвори́ Госпо́дь Бо́гъ вся́, ели́ка совѣща́. И сгорѣ́хъ, возопію́тъ живу́щіи въ не́мъ, сотвори́мъ ми́ръ ему́, сотвори́мъ ми́ръ! Приходя́щая ча́да Іа́ковля! Прозя́бнетъ и процвѣте́тъ Изра́иль и напо́лнится вселе́нная плода́ его́. Еда́ я́коже то́й порази́, и са́мъ си́це уязви́тся? И я́коже са́мъ уби́, та́кожде убіе́нъ бу́детъ? Сваря́ся и укоря́я отпу́ститъ я́. Не ты́ ли бы́лъ еси́ помышля́я ду́хомъ жесто́кимъ уби́ти я́ ду́хомъ я́рости? Сего́ ра́ди оты́мется беззако́ніе Іа́ковле и сіе́ е́сть благослове́ніе его́, егда́ отыму́ грѣ́хъ его́, егда́ положа́тъ все́ ка́меніе тре́бищъ сокруше́но, а́ки пра́хъ дро́бный, и не пребу́дутъ древеса́ и́хъ, и куми́ры и́хъ бу́дутъ посѣ́чени, а́ки дубра́ва дале́че.

Проки́менъ, псало́мъ 70-й. Гла́съ 6: На Тя́, Го́споди, упова́хъ,* да не постыжу́ся въ вѣ́къ. Сти́хъ: Пра́вдою Твое́ю изба́ви мя́ [и изми́ мя́].

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 208 об. – 216.

Служба во вторникъ 4-й недѣли поста // Къ оглавленію Постной Тріоди // Служба въ четвертокъ 4-й недѣли поста


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.