Церковный календарь
Новости


2018-09-24 / russportal
Помѣстный Соборъ 1917-1918 гг. Приложеніе къ дѣянію 92-му (1999)
2018-09-24 / russportal
Помѣстный Соборъ 1917-1918 гг. Протоколъ 92-й (24 февраля 1918 г.)
2018-09-23 / russportal
Еп. Григорій (Граббе). Римъ и Халкидонскій Соборъ (1970)
2018-09-23 / russportal
Помѣстный Соборъ 1917-1918 гг. Дѣяніе 65-е (9 декабря 1917 г.)
2018-09-22 / russportal
Еп. Григорій (Граббе). Святые Отцы на Вселенскихъ Соборахъ (1970)
2018-09-22 / russportal
Помѣстный Соборъ 1917-1918 гг. Дѣяніе 64-е (8 декабря 1917 г.)
2018-09-21 / russportal
Еп. Григорій (Граббе). Русская Зарубежная Церковь въ кривомъ зеркалѣ (1970)
2018-09-21 / russportal
Помѣстный Соборъ 1917-1918 гг. Дѣяніе 63-е (8 декабря 1917 г.)
2018-09-20 / russportal
Еп. Григорій (Граббе). Фантастическая исторія (1970)
2018-09-20 / russportal
Помѣстный Соборъ 1917-1918 гг. Дѣяніе 62-е (7 декабря 1917 г.)
2018-09-19 / russportal
Предсоборное Присутствіе 1906 г. Отдѣла I-го Журналъ №3 (18 марта 1906 г.)
2018-09-19 / russportal
Помѣстный Соборъ 1917-1918 гг. Дѣяніе 61-е (7 декабря 1917 г.)
2018-09-18 / russportal
Еп. Григорій (Граббе). Святая Русь въ исторіи Россіи (1970)
2018-09-18 / russportal
Предсоборное Присутствіе 1906 г. Отдѣла I-го Журналъ №2 (16 марта 1906 г.)
2018-09-17 / russportal
Еп. Григорій (Граббе). Кончина и погребеніе Блаж. Митр. Антонія (1970)
2018-09-17 / russportal
Помѣстный Соборъ 1917-1918 гг. Дѣяніе 60-е (5 декабря 1917 г.)
Новости въ видѣ
RSS-канала: .
Сегодня - понедѣльникъ, 24 сентября 2018 г. Сейчасъ на порталѣ посѣтителей - 9.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ЧЕТВЕРТОКЪ ЧЕТВЕРТЫЯ СЕДМИЦЫ ВЕЛИКАГО ПОСТА.

ВЪ СРЕДУ ВЕЧЕРА СРЕДНІЯ СЕДМИЦЫ,
На Го́споди воззва́хъ... поста́вимъ стихо́въ 10 и пое́мъ настоя́щія самогла́сны, и му́чениченъ, и въ мине́и 4.
Самогла́сенъ, гла́съ 4:

По́стъ, благи́хъ хода́тай, свое́ преполове́ніе ны́нѣ введе́, преше́дшими де́ньми благоугоди́въ и про́чими по́льзованіе предложи́въ, и́бо благи́хъ напряже́ніе мно́жайшее благодѣя́ніе твори́тъ. Тѣ́мже всѣ́хъ благи́хъ Да́телю, Христу́, благоугожда́юще, вопіе́мъ: Пости́выйся на́съ ра́ди и распя́тіе Претерпѣ́вый, неосужде́ны на́съ сподо́би причасти́тися и Боже́ственныя Па́схи Твоея́, въ ми́рѣ пожи́вшія и досто́йно со Отце́мъ Тебе́ и Ду́хомъ сла́вящія.

Инъ, гла́съ 5:

Въ та́йнѣ добродѣ́тели дѣ́лающіи, духо́вная воздая́нія ча́ющіи, не посредѣ́ то́ржищъ и распу́тій явля́ютъ сія́, но вну́трь се́рдца но́сятъ па́че, и всѣ́хъ Ви́дяй, быва́емая въ та́йнѣ, мзду́ воздержа́нія подае́тъ на́мъ. По́стъ соверша́имъ не сѣ́тующе ли́цы, но въ клѣ́техъ ду́шъ на́шихъ моля́щеся, непреста́нно возопіи́мъ: Отче на́шъ, Иже еси́ на Небесѣ́хъ, не введи́ на́съ во искуше́ніе, мо́лимся, но изба́ви на́съ отъ лука́ваго.

Му́чениченъ:

Несы́тною любо́вію души́ Христа́ не отверго́стеся, святíи му́ченицы, и́же разли́чныя ра́ны страсте́й претерпѣ́вше, мучи́телей де́рзость низложи́сте, непрекло́нну и невреди́му вѣ́ру сохра́нше, на небеса́ преста́вистеся. Тѣ́мже и дерзнове́ніе получи́вше къ Нему́, проси́те дарова́ти ми́ръ мíрови и душа́мъ на́шимъ ве́лію ми́лость.

Ины стихи́ры, гла́съ 1. Подо́бенъ: Прехва́льніи му́ченицы.

Поста́ водо́ю ду́ши вси́ омы́имъ, и приступи́вше къ Честно́му и Животворя́щему Кресту́ Госпо́дню, вѣ́рою поклони́мся, Боже́ственное просвѣще́ніе почерпа́юще и вѣ́чное спасе́ніе ны́нѣ пріобрѣта́юще, ми́ръ и ве́лію ми́лость.

Апо́столовъ похвало́, Кре́сте, его́же окружа́ютъ нача́ла, си́лы, арха́нгели, покланя́ющіяся тебѣ́ отъ вся́каго вре́да спаса́й, и боже́ственное по́прище воздержа́нія на́съ сподо́би до́брѣ соверша́ющія, де́нь спаси́тельный дости́гнути, и́мже и спаса́емся.

Инъ подо́бенъ, гла́съ 7. Подо́бенъ: Дне́сь бди́тъ.

Дне́сь Кресту́ Госпо́дню покланя́ющеся, возопіи́мъ: ра́дуйся, Дре́во жи́зни, а́да разори́телю; ра́дуйся, ра́досте мíра и тлѣ́нія потреби́телю; ра́дуйся, бѣ́сы прогоня́яй си́лою твое́ю, вѣ́рныхъ утвержде́ніе, ору́жіе неруши́мое, облобыза́ющія тя́ соблюди́, освяти́, мо́лимся.

И мине́и 4. Сла́ва, и ны́нѣ, самогла́сенъ, гла́съ 8:

Дне́сь неприкоснове́нный существо́мъ, прикоснове́нъ мнѣ́ быва́етъ, и стра́ждетъ стра́сти свобожда́яй мя́ отъ страсте́й; свѣ́тъ подава́яй слѣпы́мъ, отъ беззако́нныхъ усте́нъ оплева́ется, и дае́тъ плещи́ за плѣне́нныя на ра́ны. Сего́ Чи́стая Дѣ́ва и Ма́ти на Крестѣ́ зря́щи, болѣ́зненно вѣща́ше: увы́ Мнѣ́, Ча́до Мое́, что́ сіе́ сотвори́лъ еси́? Кра́сный добро́тою па́че всѣ́хъ человѣ́къ, бездыха́нный, беззра́чный явля́ешися, не имѣ́я ви́да, ниже́ добро́ты. Увы́ Мнѣ́, Мо́й Свѣ́те, не могу́ спя́ща зрѣ́ти Тя́, утро́бою уязвля́юся, и лю́тое ору́жіе се́рдце Мое́ прохо́дитъ. Воспѣва́ю Твоя́ Стра́сти, покланя́юся благоутро́бію Твоему́, Долготерпѣли́ве, Го́споди, сла́ва Тебѣ́!

Вхо́дъ. Свѣ́те Ти́хій...

Проки́менъ, псало́мъ 71-й, гла́съ 4: Благослове́нъ Госпо́дь, Бо́гъ Изра́илевъ,* творя́й чудеса́ Еди́нъ. Сти́хъ: Бо́же, су́дъ Тво́й царе́ви да́ждь и пра́вду Твою́ сы́ну царе́ву.

Бытія́ чте́ніе. [Глава́ 9.]

Бы́ша сы́нове Но́евы, изше́дшіи изъ ковче́га: Си́мъ, Ха́мъ, Іа́феѳъ. Ха́мъ же бя́ше оте́цъ Ханаа́нь. Тріе́ сíи су́ть сы́нове Но́евы: отъ си́хъ разсѣ́яшася по все́й земли́. И нача́тъ Но́е человѣ́къ дѣ́латель (бы́ти) земли́, и насади́ виногра́дъ, и испи́ отъ вина́ и упи́ся, и обнажи́ся въ дому́ свое́мъ. И ви́дѣ Ха́мъ, оте́цъ Ханаа́нь, наготу́ отца́ своего́, и изше́дъ во́нъ, повѣ́да обѣ́ма бра́тома свои́ма. И взе́мше Си́мъ и Іа́феѳъ ри́зу, возложи́ша (ю́) на о́бѣ ра́мѣ свои́, и идо́ша вспя́ть зря́ще, и покры́ша наготу́ отца́ своего́, и лице́ и́хъ вспя́ть зря́, и наготы́ отца́ своего́ не ви́дѣша. Истрезви́ся же Но́е отъ вина́, и разумѣ́, ели́ка сотвори́ ему́ сы́нъ его́ юнѣ́йшій. И рече́: про́клятъ (бу́ди) Ханаа́нъ о́трокъ, ра́бъ бу́детъ бра́тіямъ свои́мъ. И рече́: благослове́нъ Госпо́дь Бо́гъ Си́мовъ, и бу́детъ Ханаа́нъ о́трокъ ра́бъ ему́. Да распространи́тъ Бо́гъ Іа́феѳа, и да всели́тся въ селе́ніихъ Си́мовыхъ, и да бу́детъ Ханаа́нъ ра́бъ ему́. Поживе́ же Но́е по пото́пѣ лѣ́тъ три́ста пятьдеся́тъ. И бы́ша вси́ днíе Но́евы лѣ́тъ де́вять со́тъ пятьдеся́тъ, и у́мре. Сія́ же (су́ть) бытія́ сыно́въ Но́евыхъ: Си́ма, Ха́ма, Іа́феѳа. И роди́шася и́мъ сы́нове по пото́пѣ.

Проки́менъ, псало́мъ 72-й, гла́съ 4: Мнѣ́ же прилѣпля́тися Бо́гови* бла́го е́сть. Стихъ: Ко́ль бла́гъ Бо́гъ Изра́илевъ [пра́вымъ се́рдцемъ].

При́тчей чте́ніе. [Глава́ 12.]

Му́жъ разуми́вый — престо́лъ чу́вствія, се́рдце же безу́мныхъ сря́щетъ кля́твы. Рука́ избра́нныхъ одержи́тъ удо́бь, льсти́віи же бу́дутъ въ плѣне́ніи. Стра́шное сло́во се́рдце му́жа пра́ведна смуща́етъ, вѣ́сть же блага́я весели́тъ его́. Разуми́въ пра́ведникъ себѣ́ дру́гъ бу́детъ, мы́сли же нечести́выхъ — некро́тки, согрѣша́ющихъ пости́гнутъ зла́я, пу́ть же нечести́выхъ прельсти́тъ я́. Не улучи́тъ льсти́вый лови́твы, стяжа́ніе же честно́е — му́жъ чи́стый. Въ путе́хъ пра́вды — живо́тъ, путіе́ же злопо́мнящихъ — въ сме́рть. Сы́нъ благоразу́мный послушли́въ отцу́, сы́нъ же непокорли́вый въ поги́бель. Отъ плодо́въ пра́вды снѣ́сть благíй, ду́ши же беззако́нныхъ погиба́ютъ безвре́менно. Иже храни́тъ своя́ уста́, соблюда́етъ свою́ ду́шу, проде́рзивый же устна́ма устраши́тъ себе́. Въ по́хотехъ е́сть вся́къ пра́здный, ру́ки же му́жественныхъ — въ прилѣжа́ніи. Словесе́ непра́ведна ненави́дитъ пра́ведникъ, нечести́вый же стыди́тся и не возымѣ́етъ дерзнове́нія. Пра́вда храни́тъ незло́бивыя, нечести́выя же злы́ твори́тъ грѣ́хъ. Су́ть богатя́ще себе́, ничесо́же иму́ще, и су́ть смиря́ющеся во мно́зѣ бога́тствѣ. Избавле́ніе му́жа души́ свое́ ему́ бога́тство, ни́щій же не терпи́тъ преще́нія. Свѣ́тъ пра́веднымъ всегда́, свѣ́тъ же нечести́выхъ угаса́етъ. Ду́ши льсти́выя заблужда́ютъ во грѣсѣ́хъ, пра́ведніи же ще́дрятъ и ми́луютъ.

И про́чее послѣ́дованіе Преждеосвяще́нныхъ.

[Зри́:] Отъ сего́ же дне́ начина́етъ свяще́нникъ (или́ діа́конъ, а́ще е́сть,) двосугу́бая ели́ко оглаше́нія просвѣща́емыхъ и моли́тву. Глаго́лются же да́же до среды́ вели́кія, кромѣ́ суббо́тъ и недѣ́ль.


ВЪ ЧЕТВЕРТОКЪ СРЕДНІЯ СЕДМИЦЫ, НА УТРЕНИ,
Тро́ичны случи́вшагося гла́са.

По 1-мъ стихосло́віи глаго́лемъ сѣда́льны апо́стольскія осмогла́сника.

По 2-мъ же стихосло́віи глаго́лемъ настоя́щій сѣда́ленъ господи́на Іо́сифа, гла́съ 1. Подо́бенъ: Ли́къ а́нгельскій.

Си́лою Креста́ утвержда́еми, всю́ ле́сть вра́жію вои́стинну разори́сте, апо́столи сла́вніи, моли́твенницы ду́шъ на́шихъ. Тѣ́мже дне́сь въ поклоне́ніе его́ ра́дуетеся, о на́съ моля́ще еди́наго Человѣколю́бца. [Два́жды.]

[Сла́ва, и ны́нѣ,] богоро́диченъ:

Марíе, честно́е Влады́ки прія́телище, возста́ви ны́, па́дшія въ про́пасть лю́таго отча́янія, и прегрѣше́ній, и скорбе́й, Ты́ бо еси́ грѣ́шныхъ спасе́ніе, и по́мощь, и держа́вное предста́тельство и спаса́еши рабы́ Твоя́.

По 3-мъ стихосло́віи сѣда́ленъ, господи́на Ѳео́дора, гла́съ 7. Подо́бенъ: Го́споди, мы́ есмы́.

Го́споди, Тво́й Кре́стъ зря́ще предлежа́щій дне́сь, приступа́емъ вѣ́рно въ пѣ́ніихъ и пѣ́снехъ, облобыза́юще его́ въ стра́сѣ и ра́дости. Освяти́ рабы́ Твоя́, умири́ мíръ Тво́й сего́ явле́ніемъ, еди́не Многоми́лостиве. [Два́жды.]

[Сла́ва, и ны́нѣ,] богоро́диченъ. Подо́бенъ:

Го́споди, мы́ есмы́ лю́діе Твои́ и о́вцы па́жити Твоея́, заблу́ждшія тлѣ́ніемъ, обрати́ на́съ; расточе́нныя, я́ко Па́стырь, собери́ на́съ, поми́луй ста́до Твое́, Человѣколю́бче, умилосе́рдися моли́твами Богоро́дицы, еди́не Безгрѣ́шне.

Кано́нъ мине́и и настоя́щій трипѣ́снецъ господи́на Іо́сифа. И стихосло́вится пѣ́снь.

Пѣ́снь 4, гла́съ 1.

Ирмо́съ: На Боже́ственнѣй стра́жи [богоглаго́ливый Авваку́мъ да ста́нетъ съ на́ми, и пока́жетъ свѣтоно́сна а́нгела, я́сно глаго́люща: дне́сь спасе́ніе мíру, я́ко воскре́се Христо́съ, я́ко всеси́ленъ].

Освяще́нія пода́тельную благода́ть да́руя на́мъ, святы́й Кре́сте, апо́столомъ утвержде́ніе и похвало́, предлежи́ши въ поклоне́ніе дне́сь все́й вселе́ннѣй, по́стное вре́мя облегча́я на́мъ.

Сѣннописа́въ Кре́стъ Моисе́й, распросте́ръ ру́цѣ, Амали́ка побѣди́. Его́же вообража́юще, ру́цѣ простира́емъ посто́мъ и мольба́ми, я́ко да полки́ побѣди́мъ бѣсо́вскія, борю́щія на́съ всегда́ зави́стно.

Боже́ственнымъ ра́ломъ Креста́ изора́сте зе́млю, боже́ственніи ученицы́, плодоно́сну сію́ показа́вше, прозяба́ющую благоче́стіе. Тѣ́мже ва́съ гла́сы моли́твенными восхваля́юще, Христа́ при́сно сла́вимъ.

Богоро́диченъ: Ма́ти Бо́га блага́го, ублажи́ мою́ ду́шу, ю́же лука́вый обы́чаемъ злы́мъ озло́би окая́нно, прельсти́въ мя́, да я́ко вину́ спасе́нія, пѣсносло́влю Тя́ при́сно, Многопѣ́тую.

Инъ, гла́съ 7.

Ирмо́съ: Плотско́е прише́ствіе Твое́, Христе́, [увѣря́я, проро́къ Авваку́мъ взыва́ше: сла́ва си́лѣ Твое́й, Го́споди].

Предлага́ется дне́сь Всесвяты́й Кре́стъ, присту́пимъ, цѣлу́имъ его́, и́бо е́сть ро́гъ спасе́нія на́шего.

Благода́ть твоя́ и образова́ніемъ твои́мъ прихо́дитъ, прогоня́ющи бѣсо́вское мно́жество, Кре́сте Христо́въ, ору́жіе необори́мое.

[Сла́ва,] тро́иченъ: Еди́ницу Тя́ по Естеству́ воспѣва́ю, Тро́ицу же Ѵпоста́сьми чту́, Отче, Сы́не и Ду́ше Пресвяты́й.

[И ны́нѣ,] богоро́диченъ: Родила́ еси́, Отрокови́це безму́жная, Бо́га, Всенепоро́чная, Содержа́щаго го́рстію концы́ и всѣ́хъ Дре́внѣйшаго.

Сла́ва Тебѣ́, Бо́же на́шъ, сла́ва Тебѣ́.

Апо́столи, мíра моли́твенницы, моли́те спасти́ся и на́мъ, содержа́щимъ ору́жіе, Кре́стъ Христо́въ.

Ирмо́съ: Плотско́е прише́ствіе Твое́, Христе́, увѣря́я, проро́къ Авваку́мъ взыва́ше: сла́ва си́лѣ Твое́й, Го́споди.

Пѣ́снь 8.

Ирмо́съ: Се́й нарече́нный [и святы́й де́нь — еди́нъ суббо́тъ ца́рь и госпо́дь, пра́здниковъ пра́здникъ и торжество́ е́сть торже́ствъ, въ о́ньже благослови́мъ Христа́ во вѣ́ки].

Ра́дуйся, Кре́сте трича́стный и боже́ственный, на не́мже Еди́нъ отъ Тро́ицы, пло́ть носи́въ, водрузи́ся, водруже́нныя ны́ во глубину́ нече́стія избавле́й, превознося́щія Его́ во вѣ́ки.

Си́лу держа́вную, Кре́стъ, стяжа́вше, лю́тою вла́стію лука́ваго порабо́тившіяся свободи́ша Сло́ва ученицы́, воспѣва́юще: Тя́ превозно́симъ во вѣ́ки.

Увы́ мнѣ́, что́ стра́шный престо́лъ о́ный, на не́мже, Сло́ве, сѣ́дъ, содѣ́янная мно́ю та́йная яви́ши, Христе́, облича́яй нечу́вствіе мое́? Но естество́мъ сы́й Ми́лостивъ, пощади́ мя́ тогда́.

Богоро́диченъ: Нѣ́дръ не отсту́пль Оте́ческихъ, въ нѣ́дрѣхъ возле́гъ еси́ Дѣ́вы на призва́ніе ро́да человѣ́ческаго, его́же подо́біе за милосе́рдіе, Іису́се, носи́лъ еси́. Тѣ́мже Тя́ пое́мъ, человѣ́цы, во вѣ́ки.

Иный.

Ирмо́съ: Еди́наго Безнача́льнаго [Царя́ Сла́вы, Его́же благословя́тъ небе́сныя си́лы и трепе́щутъ чи́ни а́нгельстіи, по́йте, свяще́нницы, лю́діе, превозноси́те Его́ во вѣ́ки].

Крестоно́сную твою́ седми́цу почита́емъ, я́ко поклони́тельную, тебѣ́ бо, Дре́во Честно́е, покланя́ющеся вопіе́мъ: по́йте, свяще́нницы, лю́діе, превозноси́те во вся́ вѣ́ки.

Оле чудесе́! Царю́ вѣко́въ, я́ко Дре́во, на не́мже распя́лся еси́, сподо́билъ ны́ еси́ Твоя́ рабы́ ви́дѣти и поклони́тися, тѣ́мже Тя́ со стра́хомъ пое́мъ во вѣ́ки.

Благослови́мъ Отца́, и Сы́на, и Свята́го Ду́ха, Го́спода.

Тро́иченъ: О Единосу́щная, о Тро́ице Всесвята́я, Отче, Сы́не и Пресвяты́й Ду́ше, Божество́, нераздѣ́льную Твою́ держа́ву сла́влю и пою́ еди́но Ца́рство во вся́ вѣ́ки.

[И ны́нѣ,] богоро́диченъ: Созда́вшаго Ада́ма по о́бразу, и отъ смѣше́нія его́ Произше́дшаго, и Разруши́вшаго дре́внюю кля́тву, по́йте, свяще́нницы, лю́діе, превозноси́те во вся́ вѣ́ки.

Сла́ва Тебѣ́, Бо́же на́шъ, сла́ва Тебѣ́.

Двоенадесятостру́нная цѣвни́це церко́вная, я́ко пою́щая прему́дрости Сло́во, апо́столи, ва́съ воспѣва́ющія, проси́те ви́дѣти Стра́сть Госпо́дню и пѣ́ти во вѣ́ки.

Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки.

Ирмо́съ: Еди́наго Безнача́льнаго Царя́ Сла́вы, Его́же благословя́тъ небе́сныя си́лы и трепе́щутъ чи́ни а́нгельстіи, по́йте, свяще́нницы, лю́діе, превозноси́те Его́ во вѣ́ки.

Пѣ́снь 9.

Ирмо́съ: Свѣти́ся, свѣти́ся, [но́вый Іерусали́ме, сла́ва бо Госпо́дня на тебѣ́ возсія́. Лику́й ны́нѣ и весели́ся, Сіо́не. Ты́ же, Чи́стая, красу́йся, Богоро́дице, о воста́ніи Рождества́ Твоего́].

Уясни́ся, свѣти́ся Це́рковь Бо́жія кре́стными заря́ми, его́же но́сиши предлежа́ща всѣ́мъ вѣ́рнымъ въ поклоне́ніе. Ты́ же, мно́жество все́ де́монское, тмы́ испо́лншееся, избѣ́гни.

Крѣ́пость воздержа́нія боже́ственный е́сть Кре́стъ, содѣ́йственникъ бдя́щихъ, по́стниковъ укрѣпле́ніе, борю́щихся побо́рникъ. Сему́, вѣ́рніи, любо́вію приступи́вше, ра́достно поклони́мся.

Основа́нія боже́ственная Це́ркве Христо́вы, утвержде́ніемъ благоче́стія вся́ соблюди́те и на ка́мени утверди́те тве́рдѣмъ, Избра́вшаго ва́съ, апо́столи, сла́вніи.

Богоро́диченъ: Ра́дость пріе́мшая арха́нгеловымъ гла́сомъ, моего́ ны́нѣ се́рдца печа́ль потреби́ душетлѣ́нную и пода́ждь, Чи́стая, радостотво́рный пла́чь, я́ко да обря́щу та́мо Боже́ственное утѣше́ніе.

Иный.

Ирмо́съ: Тя́, Пречи́стую Ма́терь и Дѣ́ву, [Невмѣсти́мое Сло́во во утро́бу вмѣсти́вшую и Роди́вшую пло́тію, пѣ́сньми велича́емъ].

Ты́, вообража́емый, Ме́ррскія струи́ дре́вле услажда́еши, Всечестно́е Дре́во. Ты́ мое́ услади́ воздержа́ніе, Кре́сте Христо́въ, дне́сь покланя́емый.

Тя́, необори́мое ца́рствія ору́жіе, во́инства крѣ́пость, синкли́та утвержде́ніе, Кре́сте Христо́въ, вси́ пѣ́сньми велича́емъ.

[Сла́ва,] тро́иченъ: Тя́, Безнача́льнаго Отца́ и Влады́ку, и Собезнача́льнаго Сло́ва, и Ду́ха Свята́го, благоче́стно вѣ́рніи вси́ велича́емъ.

[И ны́нѣ,] богоро́диченъ: Тя́, Сла́вную и еди́ну Богоро́дицу, Невмѣсти́мое Сло́во во чре́вѣ вмѣсти́вшую и Роди́вшую пло́тію, пѣ́сньми велича́емъ.

Сла́ва Тебѣ́, Бо́же на́шъ, сла́ва Тебѣ́.

Тебе́, о́гненный зву́къ, апо́столы, я́ко попали́вшія вся́кую ве́щь пре́лести и благоче́стіе насади́вшія въ мíрѣ, пѣ́сньми велича́емъ.

Ирмо́съ: Тя́, Пречи́стую Ма́терь и Дѣ́ву, Невмѣсти́мое Сло́во во утро́бу вмѣсти́вшую и Роди́вшую пло́тію, пѣ́сньми велича́емъ.

Свѣти́ленъ гла́са.

На стихо́внѣ самогла́сенъ, два́жды, гла́съ 7:

Поревну́имъ, вѣ́рніи, мытаре́ву покая́нію, а не фарисе́йски похва́лимся, но изъ глубины́ се́рдца стена́ніе принесе́мъ Благодѣ́телю всѣ́хъ Бо́гу. То́й бо заповѣ́да, глаго́ля: я́ко вся́къ, вознося́й себе́, смири́тся; смиря́яй же себе́, вознесе́тся. Тѣ́мже единому́дренно возопіи́мъ Ему́: Бо́же, очи́сти на́съ, грѣ́шныхъ, и спаси́ на́съ.

Му́чениченъ: Еди́но ды́шуще, на еди́но взира́юще, страстоте́рпцы му́ченицы, еди́нъ пу́ть живота́ обрѣ́тше — за Христа́ сме́рть, ре́вностію вообража́юще кончи́ну дру́гъ дру́гу. О, чудесе́! я́коже сокро́вища му́ки предвосхища́юще, дру́гъ ко дру́гу глаго́лаху: я́ко а́ще и не ны́нѣ у́мремъ, у́мремъ же вся́ко и бытію́ до́лжная послу́жимъ; сотвори́мъ ну́жду любоче́стія, о́бщее свое́ мня́ще, сме́ртію живо́тъ ку́пимъ. Моли́твами и́хъ, Бо́же, поми́луй на́съ.

Сла́ва, и ны́нѣ, богоро́диченъ:

Умири́ моли́твами Богоро́дицы живо́тъ на́съ, вопію́щихъ Ти́, Ми́лостиве: Го́споди, сла́ва Тебѣ́!


НА 6-МЪ ЧАСѢ,
Тропа́рь проро́чества, гла́съ 6:

Кресту́ Твоему́ покланя́емся, Влады́ко, и свято́е Воскресе́ніе Твое́ сла́вимъ.

Проки́менъ, псало́мъ 73-й, гла́съ 4: Бо́гъ же, Ца́рь на́шъ, пре́жде вѣ́ка* содѣ́ла спасе́ніе посредѣ́ земли́. Сти́хъ: Вску́ю, Бо́же, отри́нулъ еси́ до конца́?

Проро́чества Иса́іина чте́ніе. [Глава́ 28.]

Та́ко глаго́летъ Госпо́дь: услы́шите сло́во Госпо́дне, му́жіе озло́бленіи и кня́зи люде́й, су́щихъ во Іерусали́мѣ. Яко реко́сте: сотвори́хомъ завѣ́тъ со а́домъ и съ сме́ртію сложе́ніе. Бу́ря носи́ма а́ще мимои́детъ, не пріи́детъ на на́съ, положи́хомъ лжу́ наде́жду на́шу и лже́ю покры́емся. Сего́ ра́ди та́ко глаго́летъ Госпо́дь: се́ Азъ полага́ю во основа́ніе Сіо́ну ка́мень многоцѣ́ненъ, избра́нъ, краеуго́ленъ, че́стенъ, во основа́ніе ему́, и вѣ́руяй въ о́нь не постыди́тся. И положу́ су́дъ въ наде́жду, ми́лость же Моя́ на мѣ́рилѣхъ, и упова́вшіи вотще́ на лжу́, я́ко не мине́тъ ва́съ бу́ря и не оты́метъ отъ ва́съ завѣ́та сме́ртнаго, и наде́жда ва́ша, я́же ко а́ду, не пребу́детъ. Бу́ря иду́щая а́ще на́йдетъ, бу́дете е́й въ попра́ніе. Егда́ мимои́детъ, во́зметъ ва́съ: я́ко по вся́ко у́тро преходи́ти бу́детъ въ де́нь, въ нощи́ бу́детъ наде́жда зла́. Научи́теся слы́шати, утѣсня́еміи: «не мо́жемъ ра́товати, са́ми же изнемога́емъ е́же собра́тися на́мъ». Якоже гора́ на нечести́выхъ воста́нетъ Госпо́дь, и бу́детъ (я́коже) въ де́бри Гавао́нстѣй: съ я́ростію сотвори́тъ дѣла́ Своя́, го́рести дѣ́ло; я́рость же Его́ чу́ждо употреби́тся, и погубле́ніе Его́ стра́нно. И вы́ не ра́дуйтеся, ниже́ да возмо́гутъ ва́ши у́зы, зане́ сконча́ны и сокраще́ны ве́щи слы́шахъ отъ Го́спода Савао́ѳа, я́же сотвори́тъ надъ все́ю земле́ю.

Проки́менъ, псало́мъ 74-й, гла́съ 4: Азъ же возра́дуюся въ вѣ́къ,* воспою́ Бо́гу Іа́ковлю. Сти́хъ: Исповѣ́мыся Тебѣ́, Бо́же, исповѣ́мыся Тебѣ́.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 216 – 220 об.

Служба въ среду 4-й недѣли поста // Къ оглавленію Постной Тріоди // Служба въ пятокъ 4-й недѣли поста


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.