Церковный календарь
Новости


2018-09-24 / russportal
Помѣстный Соборъ 1917-1918 гг. Приложеніе къ дѣянію 92-му (1999)
2018-09-24 / russportal
Помѣстный Соборъ 1917-1918 гг. Протоколъ 92-й (24 февраля 1918 г.)
2018-09-23 / russportal
Еп. Григорій (Граббе). Римъ и Халкидонскій Соборъ (1970)
2018-09-23 / russportal
Помѣстный Соборъ 1917-1918 гг. Дѣяніе 65-е (9 декабря 1917 г.)
2018-09-22 / russportal
Еп. Григорій (Граббе). Святые Отцы на Вселенскихъ Соборахъ (1970)
2018-09-22 / russportal
Помѣстный Соборъ 1917-1918 гг. Дѣяніе 64-е (8 декабря 1917 г.)
2018-09-21 / russportal
Еп. Григорій (Граббе). Русская Зарубежная Церковь въ кривомъ зеркалѣ (1970)
2018-09-21 / russportal
Помѣстный Соборъ 1917-1918 гг. Дѣяніе 63-е (8 декабря 1917 г.)
2018-09-20 / russportal
Еп. Григорій (Граббе). Фантастическая исторія (1970)
2018-09-20 / russportal
Помѣстный Соборъ 1917-1918 гг. Дѣяніе 62-е (7 декабря 1917 г.)
2018-09-19 / russportal
Предсоборное Присутствіе 1906 г. Отдѣла I-го Журналъ №3 (18 марта 1906 г.)
2018-09-19 / russportal
Помѣстный Соборъ 1917-1918 гг. Дѣяніе 61-е (7 декабря 1917 г.)
2018-09-18 / russportal
Еп. Григорій (Граббе). Святая Русь въ исторіи Россіи (1970)
2018-09-18 / russportal
Предсоборное Присутствіе 1906 г. Отдѣла I-го Журналъ №2 (16 марта 1906 г.)
2018-09-17 / russportal
Еп. Григорій (Граббе). Кончина и погребеніе Блаж. Митр. Антонія (1970)
2018-09-17 / russportal
Помѣстный Соборъ 1917-1918 гг. Дѣяніе 60-е (5 декабря 1917 г.)
Новости въ видѣ
RSS-канала: .
Сегодня - понедѣльникъ, 24 сентября 2018 г. Сейчасъ на порталѣ посѣтителей - 6.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ПЯТОКЪ ЧЕТВЕРТЫЯ СЕДМИЦЫ ВЕЛИКАГО ПОСТА.

ВЪ ЧЕТВЕРТОКЪ СРЕДНІЯ СЕДМИЦЫ ВЕЧЕРА,
На Го́споди воззва́хъ... поста́вимъ стихо́въ 6 и пое́мъ настоя́щія подо́бны 3, гла́съ 4. Подо́бенъ: Да́лъ еси́ зна́меніе.

Присноблаже́нный сподо́бившеся цѣлова́ти, вѣ́рніи, Кре́стъ Тво́й, Го́споди, и́мже на́съ спа́слъ еси́, воспѣва́емъ Твое́ благоутро́біе и мо́лимъ Тя́ прилѣ́жно, всѣ́мъ пода́ждь ра́дованіе, Спа́се, спасе́нія Твоего́, въ покая́ніи да́вый на́мъ ви́дѣти Твое́ Воста́ніе и честна́я Страда́нія.

Умерщвле́ніе претерпѣ́лъ еси́ на Крестѣ́ простира́емь, умертви́вый сме́рть и ме́ртвыя воскреси́вый живоно́снымъ сло́вомъ. Тѣ́мже молю́ Тя́, умерщвле́ную мою́ ду́шу грѣхо́мъ, оживи́, Го́споди, подая́ ми́ умиле́ніе и зо́лъ избавле́ніе во дне́хъ святы́хъ Твои́хъ поще́нія, Человѣколю́бче.

Ина стихи́ра, господи́на Ѳео́дора, гла́съ 4. Подо́бенъ: Умнаго адама́нта.

Тво́й Кре́стъ святы́й сподо́бившеся ра́достно ви́дѣти и облобыза́ти, мо́лимъ Тя́, Бо́же Спа́се на́шъ, да и са́мыя Твоя́ пречи́стыя дости́гнемъ Стра́сти, посто́мъ укрѣпля́еми, покланя́ющеся пое́мъ распя́тіе, копіе́, гу́бу и тро́сть, и́миже на́съ обезсме́ртивъ, въ дре́внюю па́ки сла́дости жи́знь возве́лъ еси́, я́ко Человѣколю́бецъ, тѣ́мже Тя́ благода́рно ны́нѣ сла́вимъ.

И въ мине́и 3. Сла́ва, и ны́нѣ, богоро́диченъ.

Проки́менъ, псало́мъ 75-й, гла́съ 8: Помоли́теся и воздади́те* Го́сподеви Бо́гу на́шему. Сти́хъ: Вѣ́домъ во Іуде́и Бо́гъ, во Изра́или ве́ліе и́мя Его́.

Бытія́ чте́ніе. [Глава́ 10.]

Сія́ племена́ сыно́въ Но́евыхъ, по родо́мъ и́хъ, по язы́комъ и́хъ. Отъ си́хъ разсѣ́яшася о́строви язы́ковъ на земли́ по пото́пѣ. И бѣ́ вся́ земля́ устнѣ́ еди́нѣ и гла́съ еди́нъ всѣ́мъ. И бы́сть, внегда́ поити́ и́мъ отъ восто́къ, обрѣто́ша по́ле въ земли́ Сеннаа́рстѣй и всели́шася та́мо. И рече́ человѣ́къ бли́жнему своему́: пріиди́те, сотвори́мъ пли́нѳы и испече́мъ и́хъ огне́мъ. И бы́сть и́мъ пли́нѳа въ ка́мень и бре́ніе вмѣ́сто мѣ́ла. И реко́ша: пріиди́те, сози́ждемъ себѣ́ гра́дъ и сто́лпъ, его́же ве́рхъ бу́детъ да́же до небесе́, и сотвори́мъ себѣ́ и́мя, пре́жде не́же разсѣ́ятися на́мъ по лицу́ всея́ земли́. И сни́де Госпо́дь ви́дѣти гра́дъ и сто́лпъ, его́же созида́ша сы́нове человѣ́честіи. И рече́ Госпо́дь: се́ ро́дъ еди́нъ и устнѣ́ еди́нѣ всѣ́хъ, и сіе́ нача́ша твори́ти, и ны́нѣ не оскудѣ́ютъ отъ ни́хъ вся́, ели́ка а́ще восхотя́тъ твори́ти. Пріиди́те и соше́дше смѣси́мъ та́мо язы́къ и́хъ, да не услы́шатъ кíйждо гла́са бли́жняго (своего́). И разсѣ́я и́хъ отту́ду Госпо́дь по лицу́ всея́ земли́, и преста́ша зи́ждуще гра́дъ и сто́лпъ. Сего́ ра́ди нарече́ся и́мя его́: Смѣше́ніе, я́ко та́мо смѣси́ Госпо́дь устна́ всея́ земли́ и отту́ду разсѣ́я и́хъ Госпо́дь по лицу́ всея́ земли́.

Проки́менъ, псало́мъ 76-й. Гла́съ 8: Гла́сомъ мои́мъ ко Го́споду воззва́хъ,* гла́сомъ мои́мъ къ Бо́гу, и вня́тъ ми́. Сти́хъ: Въ де́нь ско́рби моея́ Бо́га взыска́хъ.

При́тчей чте́ніе. [Глава́ 13.]

Жела́нія благочести́выхъ наслажда́ютъ ду́шу, дѣла́ же нечести́выхъ дале́че отъ ра́зума. Ходя́й съ прему́дрыми прему́дръ бу́детъ, ходя́й же съ безу́мными позна́нъ бу́детъ. Согрѣша́ющихъ пости́гнутъ зла́я, пра́ведныхъ же пости́гнутъ блага́я. Бла́гъ му́жъ наслѣ́дитъ сы́ны сыно́въ, сокро́виществуется же пра́веднымъ бога́тство нечести́выхъ. Пра́ведніи насладя́тся въ бога́тствѣ лѣ́та мно́га, непра́ведніи же поги́бнутъ вско́рѣ. Иже щади́тъ же́злъ (сво́й), ненави́дитъ сы́на своего́, любя́й же наказу́етъ прилѣ́жно. Пра́ведный, яды́й, насыща́етъ ду́шу свою́, ду́ши же нечести́выхъ ску́дны. Му́дрыя жены́ созда́ша до́мы, безу́мная же раскопа́ рука́ма свои́ма. Ходя́й пра́во бои́тся Го́спода, развраща́яй же пути́ своя́ обезче́стится. Изъ у́стъ безу́мныхъ — же́злъ досажде́нія, устнѣ́ же му́дрыхъ храня́тъ я́. Идѣ́же нѣ́сть воло́въ, я́сли чи́сты, а идѣ́же жи́та мно́га, я́вна волу́ крѣ́пость. Свидѣ́тель вѣ́ренъ не лже́тъ, разжиза́етъ же ло́жная свидѣ́тель непра́веденъ. Взы́щеши прему́дрости у злы́хъ и не обря́щеши, чу́вство же у му́дрыхъ удо́бно.

На стихо́внѣ самогла́сенъ, гла́съ 6:

Отъ Го́спода, смири́вшаго Себе́ да́же до распя́тія и сме́рти тебе́ ра́ди, навы́кши, душе́ моя́, отъ возноше́нія смире́нія и отъ смире́нія возноше́нія, о добродѣ́телехъ не возвыша́йся, ниже́ себе́ пра́ведну мня́щи, бли́жняго осужда́й, я́коже велехва́льный фарисе́й, но въ разумѣ́ніи низложе́нномъ прегрѣше́ній твои́хъ па́мятствующи то́кмо, я́коже мыта́рь возопíй: Бо́же, очи́сти мя́, грѣ́шнаго, и спаси́ мя́. [Два́жды.]

Му́чениченъ: Му́ченицы Твои́, Го́споди, не отверго́шася Тебе́, ни отступи́ша отъ за́повѣдей Твои́хъ, тѣ́хъ моли́твами поми́луй на́съ.

Сла́ва, и ны́нѣ, крестобогоро́диченъ. Подо́бенъ: Тридне́вно.

Всечи́стая, я́ко ви́дѣ Тя́ на Крестѣ́ ви́сима, вопія́ше: что́ стра́нное е́же ви́жду та́инство, Сы́не Мо́й? ка́ко на Дре́вѣ умира́еши, пло́тію повѣ́шеный, живота́ Пода́телю?


ВЪ ПЯТОКЪ СРЕДНІЯ СЕДМИЦЫ, НА УТРЕНИ,
Тро́ичны гла́са.

По 1-мъ стихосло́віи глаго́лемъ сѣда́льны кре́стны осмогла́сника.

По 2-мъ же стихосло́віи глаго́лемъ настоя́щій сѣда́ленъ господи́на Іо́сифа, гла́съ 4. Подо́бенъ: Вознесы́йся на Кре́стъ.

Воздержа́нія вре́мя освяща́яй, Всечестны́й Кре́стъ ви́дится, ему́же кла́няющеся дне́сь, возопіи́мъ: Влады́ко Человѣколю́бче, того́ посо́біемъ пода́ждь прейти́ на́мъ про́чее вре́мя поще́нія во умиле́ніи и живоно́сныя Твоя́ ви́дѣти Стра́сти, и́миже изба́вихомся. [Два́жды.]

Сла́ва, и ны́нѣ, крестобогоро́диченъ:

Изъ Безнача́льна Отца́ ро́ждшася, напослѣ́докъ Тя́, Христе́, Ро́ждшая, на Крестѣ́ ви́сима ви́дящи, восклица́ше: увы́ Мнѣ́, Превозжелѣ́нный Іису́се, — вопія́ше, — ка́ко прославля́емый, я́ко Бо́гъ, отъ а́нгелъ, отъ беззако́нныхъ ны́нѣ человѣ́къ, Сы́не, хотя́й распина́ешися? Пою́ Тя́ Долготерпѣли́ве!

По 3-мъ стихосло́віи сѣда́ленъ, гла́съ 4. Подо́бенъ: Ско́ро предвари́.

Свѣ́тъ ду́шъ на́шихъ ны́нѣ зря́ще, Христе́, Кре́стъ Тво́й Пречестны́й, и тому́ покланя́ющеся, ра́достію я́сно возопіи́мъ: сла́ва Тебѣ́, на не́мъ вознести́ся Восхотѣ́вый; сла́ва Тебѣ́, Просвѣще́й тѣ́мъ всю́ тва́рь, въ не́мже Тя́ непреста́нно пѣ́сньми сла́вимъ. [Два́жды.]

[Сла́ва, и ны́нѣ,] крестобогоро́диченъ. Подо́бенъ:

На Крестѣ́ Тя́ вознесе́нна я́ко узрѣ́ Безневѣ́стная Ма́ти Твоя́, Сло́ве Бо́жій, ма́терски рыда́ющи, вѣща́ше: что́ но́вое и стра́нное сіе́ чу́до, Сы́не Мо́й? Ка́ко, Жи́знь всѣ́хъ, пріобща́ешися сме́рти, оживи́ти уме́ршія хотя́й, я́ко Благоутро́бенъ?

Псало́мъ 50-й. И кано́нъ Честна́го Креста́. [Въ мине́и же пое́тся на повече́ріи.]

Кано́нъ, его́же краестро́чіе: Покланя́емое вси́ пое́мъ Дре́во.
Пѣ́снь 1, гла́съ 8.

Ирмо́съ: Колесницегони́теля фарао́ня [погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща].

Госпо́дню прише́дше дне́сь Кресту́ умо́мъ чи́стымъ и благочести́вымъ ра́зумомъ, пріиди́те, поклони́мся, предлежи́тъ бо, да́руя ему́ покланя́ющимся освяще́ніе же спаси́тельное, сія́ніе, и сла́ву, и ми́лость.

Живодарова́тельный Кре́стъ предлежа́щь и зри́мый, свѣтови́дное сія́ніе благода́ти испуща́етъ. Присту́пимъ и пріи́мемъ просвѣще́ніе весе́лія, и спасе́ніе, и оставле́ніе, хвалу́ Го́сподеви принося́ще.

Предлежи́тъ стра́нное зря́щимъ видѣ́ніе — Кре́стъ Честны́й, и я́коже исто́чникъ кипи́тъ Боже́ственными дарова́ніи, и утоля́етъ прегрѣше́нія, и болѣ́зни разрѣша́етъ, и мудрова́нія укрѣпля́етъ чи́сто приходя́щимъ къ нему́.

[Сла́ва:] Же́злъ прообража́ше Креста́ побѣ́ду, мо́ре сѣку́щій, и́мже мы́ вѣ́рою непотопле́нно препла́ваемъ житія́ во́ду непостоя́нную, и то́ковъ всѣ́хъ грѣха́ избѣга́емъ, и Боже́ственныя тишины́ исполня́емся.

[И ны́нѣ,] богоро́диченъ: Егда́ Тя́, Ча́до, неизрече́нно роди́хъ, болѣ́зней избѣго́хъ, и ка́ко ны́нѣ вся́ болѣ́зней исполня́юся? Ви́жду бо Тя́ ви́сима, я́ко злодѣ́я, на Дре́вѣ, зе́млю неодержа́нно Повѣ́сившаго, — глаго́лаше Всечи́стая, пла́чущи.

Пѣ́снь 3.

Ирмо́съ: Утверже́й [въ нача́лѣ] небеса́ [ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, еди́не Человѣколю́бче].

Кре́стъ, всѣ́хъ благи́хъ пода́тельный, зри́тся покланя́емый, и вся́ тва́рь пра́зднуетъ въ ра́дости, просвѣща́ема благода́тію, на не́мъ во́лею возне́сшагося Бо́га на́шего.

Осіява́еми свѣ́томъ кре́стныхъ лу́чь, преполове́ніемъ свяще́ннаго воздержа́нія омраче́нія грѣхо́въ убѣжи́мъ и возопіи́мъ: Просвѣще́ніе всѣ́хъ, Благоутро́бне Го́споди, сла́ва Тебѣ́!

[Сла́ва:] Пѣсносло́вимъ тя́, Кре́сте, и облобыза́емъ вѣ́рою, прося́ще: твои́мъ могу́тствомъ изми́ на́съ отъ сѣ́тей вра́жіихъ и упра́ви ны́ вся́ ко приста́нищу спасе́нія, почита́ющія тя́.

[И ны́нѣ,] богоро́диченъ: Умерщвле́ну Жи́знь на Крестѣ́ зря́щи и не терпя́щи болѣ́зни утро́бъ, рыда́ше Чи́стая Дѣ́ва, взыва́ющи: увы́, Сы́не Мо́й! что́ Тебѣ́ наро́дъ беззако́нный воздаде́?

Сѣда́ленъ, гла́съ 6:

То́кмо водрузи́ся дре́во, Христе́, Креста́ Твоего́, основа́нія поколеба́шася сме́рти, Го́споди: его́же бо поглоти́ жела́ніемъ а́дъ, отпусти́ тре́петомъ. Яви́лъ еси́ на́мъ спасе́ніе Твое́, Святы́й, и славосло́вимъ Тя́, Сы́не Бо́жій, поми́луй на́съ.

Сла́ва: коне́цъ. И ны́нѣ:

Дне́сь проро́ческое испо́лнися сло́во: се́ бо покланя́емся на мѣ́сто, идѣ́же стоя́стѣ но́зѣ Твои́, Го́споди. И Дре́ва спасе́нія вкуси́вше, грѣхо́вныхъ страсте́й свобо́ду улучи́хомъ, моли́твами Богоро́дицы, Еди́не Человѣколю́бче.

Пѣ́снь 4.

Ирмо́съ: Ты́ моя́ крѣ́пость, [Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче].

Держа́вный покро́въ же и исправле́ніе человѣ́комъ, непребори́мое ору́жіе вѣ́ры, Кре́стъ Спаси́тельный, се́ зри́тся предлежа́щій, и всѣ́хъ сердца́ вѣ́рно приходя́щихъ освяща́етъ, просвѣща́етъ благода́тію.

Въ преполове́ніе воздержа́нія предлежа́щій, посредѣ́ всѣ́хъ преблагíй Кре́стъ Честны́й среди́ земли́, на не́мже возне́слся еси́ во́лею, Человѣколю́бче, мíръ освяща́етъ свои́мъ поклоне́ніемъ и прогоня́етъ де́монскія полки́.

Не́бо и вся́ земля́ свесели́тся, страстоте́рпцы, му́ченицы, апо́столи, ду́ши пра́ведныхъ ра́достно ны́нѣ ра́дуются, вся́ спаса́ющее ви́дяще предлежа́щее посредѣ́ Богодарова́нное Дре́во и вѣ́рныя освяща́ющее благода́тію.

[Сла́ва:] Зако́ны Твоя́, Го́споди, безсо́вѣстный не сохрани́въ, и́мамъ осуди́тися, егда́ пріи́деши съ небесе́ суди́ти человѣ́ческая дѣла́, отону́дуже зову́ Тебѣ́: си́лою Креста́ Твоего́ обрати́въ мя́, спаси́, покая́нія подая́ ми́ сле́зы.

[И ны́нѣ,] богоро́диченъ: Изъ дѣ́вственныя, Ча́до, утро́бы Тя́ роди́хъ и, зря́щи на Дре́вѣ Тя́ ви́сима, недоумѣва́юся, и не пое́млю высоты́ та́инства и глубины́ вели́кихъ суде́бъ Твои́хъ, — Всечи́стая вопія́ше. Юже гла́сы немо́лчными, я́ко Ма́терь Бо́жію, ублажа́емъ.

Пѣ́снь 5.

Ирмо́съ: Вску́ю мя́ отри́нулъ еси́ [отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся].

Воскли́кните, язы́цы, воспо́йте и по́йте, колѣ́на, взыгра́йте Бо́гу, да́вшему Кре́стъ — непоколеби́мое утвержде́ніе. Того́ ны́нѣ во вре́мя воздержа́нія наслажда́емся, пита́юще ду́шу и помышле́ніе.

Умная во́инства тя́ вся́ почита́ютъ, Кре́сте Всесвяты́й, и человѣ́цы бре́нными каса́ющеся тебе́ устна́ми дне́сь, почерпа́емъ любо́вію освяще́ніе и благослове́ніе, на тебѣ́ Пригво́ждшагося сла́вяще.

Души́ моея́ стра́сти исцѣли́ вре́менныя, Благоутро́бне Го́споди, и покло́нника мя́ святы́хъ Страсте́й Твои́хъ сподо́би, вре́менемъ поста́ лу́чша мя́ покажи́ и злы́хъ удале́ніе да́руй, Преблагíй.

Богоро́диченъ: На Крестѣ́ зря́щи бла́гости ра́ди отъ Тебе́, Всенепоро́чная, па́че ума́ ро́ждшася, уязвля́лася еси́ утро́бами и глаго́лала: увы́ мнѣ́, Боже́ственное Ча́до! ка́ко о всѣ́хъ болѣ́знуеши? Покланя́юся Твоему́ благоутро́бію, Го́споди.

Трипѣ́снецъ, гла́съ 4.
Пѣ́снь 5.

Ирмо́съ: Ужасо́шася вся́ческая [о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая].

Свѣти́ла скры́ша свѣ́тъ сво́й, зря́ще на Дре́вѣ пригвожде́на непра́ведно, Пра́ведный еди́не, Тебе́, Долготерпѣли́ваго, и лука́ваго мра́чныя, Спа́се, облича́юща вла́сти держа́вою Твое́ю.

Поще́нія водо́ю ли́ца омы́имъ и облобыза́имъ Дре́во, еди́ный бо всѣ́хъ на не́мъ вознесе́ся Христо́съ, пло́тію обложи́вся сме́ртною, я́ко да умори́тъ на́съ умори́вшаго.

Кре́сте Всечестны́й, апо́столовъ похвало́, ору́жіе страстоте́рпцевъ, свяще́нниковъ сла́во, преподо́бныхъ огражде́ніе, всѣ́хъ вѣ́рныхъ храни́телю, сохрани́, освяти́ вѣ́рно покланя́ющіяся тебѣ́.

Богоро́диченъ: Гро́здъ, лоза́ Дѣ́ва, Его́же прозябе́, на Дре́вѣ ви́сяща ви́дящи, — Ча́до, — вопія́ше, — сла́дость иска́пи, пія́нство потребля́ющую враго́въ, всу́е распе́ншихъ Тя́, всѣ́хъ Долготерпѣли́ваго.

Иный, гла́съ то́йже.

Ирмо́съ: Изъ но́щи у́тренююще, [просвѣти́ на́съ, Животво́рче Кре́сте Христо́въ, со стра́хомъ покланя́ющіяся тебѣ́, и де́нь спаси́тельный при́сно возсія́й на́мъ].

Дне́сь предлага́ется Кре́стъ Тво́й, Дре́во жи́зни покланя́емое, и мíръ ра́дуется прише́ствіемъ Ду́ха, того́ облобыза́яй.

Предлежа́щій зря́ще Кре́стъ Тво́й, служи́теліе небе́сніи пою́тъ Тя́, Го́споди, и де́мони трепе́щутъ, не терпя́ще держа́вы Твоея́.

[Сла́ва,] тро́иченъ: Тро́ицу просла́вимъ правосла́вно, со Отце́мъ и Сы́номъ, и Ду́ха Свята́го, Еди́но Божество́, Еди́ницу Тріѵпоста́сную.

[И ны́нѣ,] богоро́диченъ: Ма́терь Тя́ и Дѣ́ву правосла́вно исповѣ́дуемъ вѣ́рніи, неизрече́нно роди́вшую Христа́ Бо́га на́шего, еди́наго Многоми́лостиваго.

Сла́ва Тебѣ́, Бо́же на́шъ, сла́ва Тебѣ́.

На пе́вкѣ, и ке́дрѣ, и кипари́сѣ распны́йся, Сы́не Бо́жій, освяти́ вся́ ны́ и живоно́сную Твою́ Стра́сть сподо́би ви́дѣти.

Ирмо́съ: Изъ но́щи у́тренююще, просвѣти́ на́съ, Животво́рче Кре́сте Христо́въ, со стра́хомъ покланя́ющіяся тебѣ́, и де́нь спаси́тельный при́сно возсія́й на́мъ.

Пѣ́снь 6.

Ирмо́съ: Очи́сти мя́, Спа́се, [мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́].

Кресту́, водрузи́вшуся на земли́, де́мономъ паде́ніе бы́сть. Его́же ны́нѣ зря́ще мы́ пресла́вно предлежа́ща, и лобыза́юще, отъ паде́ній грѣхо́вныхъ востае́мъ.

Вознося́ще Тя́, Христа́, я́ко Царя́ и Го́спода, его́же дарова́лъ еси́ на́мъ Кре́стъ, стѣ́ну неруши́мую, облобыза́имъ, преполове́ніемъ боже́ственнаго воздержа́нія веселя́щеся.

[Сла́ва:] Ве́лія всѣ́мъ на́мъ дарова́нія подая́, Госпо́день Кре́стъ зри́тся предлежа́щій. Присту́пимъ, человѣ́цы, просвѣще́ніе се́рдца и души́ почерпе́мъ.

[И ны́нѣ,] богоро́диченъ: Пости́тися на́мъ, Чи́стая, отъ зло́бы вся́кія укрѣпи́, и злы́хъ и лука́выхъ воздержа́тися дѣя́ній, при́сно, воспомога́й, Предста́тельство всѣ́хъ человѣ́ковъ су́щая.

Конда́къ, гла́съ 7:

Не ктому́ пла́менное ору́жіе храни́тъ вра́тъ Еде́мскихъ, на ты́я бо на́йде пресла́вный соу́зъ, Дре́во Кре́стное, сме́ртное жа́ло и а́дова побѣ́да прогна́ся. Предста́лъ бо еси́, Спа́се мо́й, вопія́ су́щимъ во а́дѣ: вни́дите па́ки въ ра́й.

Икосъ:

Три́ кресты́ водрузи́ на Голго́ѳѣ Пила́тъ: два́ разбо́йниковъ и еди́нъ Жизнода́вца. Его́же ви́дѣ а́дъ и рече́ су́щимъ до́лѣ: о, слуги́ мои́ и си́лы моя́! Кто́ водрузи́въ гво́здіе въ се́рдце мое́, древяны́мъ мя́ копіе́мъ внеза́пу прободе́? И растерза́юся, вну́тренними мои́ми болю́, утро́бою уязвля́юся, чу́вства моя́ смуща́ютъ ду́хъ мо́й, и понужда́ются изрыга́ти Ада́ма и су́щія отъ Ада́ма, дре́вомъ да́нныя ми́: Дре́во бо сія́ вво́дитъ па́ки въ ра́й.

Пѣ́снь 7.

Ирмо́съ: Бо́жія снисхожде́нія [о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ].

Време́нъ Вы́шшій во вре́мени пло́ть нося́й явля́ется, и вре́менныя стра́сти на́ша исцѣля́етъ бла́гости ра́ди во вре́мя воздержа́нія, въ не́же предлежи́тъ боже́ственный се́й Кре́стъ, освяща́яй на́съ.

Пое́мъ, сла́вимъ, и покланя́емся, и велича́емъ Твою́, Го́споди, держа́ву, я́ко пода́лъ еси́ на́мъ, рабо́мъ Твои́мъ, Кре́стъ боже́ственный, наслажде́ніе неиждива́емое и храни́теля ду́шъ и тѣле́съ на́шихъ.

Не покажи́ мя́, Го́споди, въ де́нь испыта́нія злы́ми уничиже́на, не отри́ни отъ лица́ Твоего́ посра́млена, но уще́дри, спаси́ мя́ Твои́мъ Честны́мъ Кресто́мъ, я́ко Преблагíй.

[Сла́ва:] Прообразова́ше благода́ть твою́, Кре́сте, услажда́яй Моисе́й во́ды горча́йшія дре́вомъ, и́бо го́рести страсте́й изба́вихомся твое́ю си́лою. Тѣ́мже ны́ услади́ цѣлу́ющія тя́ ны́нѣ во умиле́ніи душе́внѣмъ.

[И ны́нѣ,] богоро́диченъ: Ума́ моего́ тѣсноту́ Твое́ю моли́твою разшири́, Влады́чице, стѣсни́вшая вся́ навѣ́ты борца́, и путе́мъ мя́ тѣ́снымъ наста́ви къ простра́нству житія́ ити́, Ма́ти Бо́жія.

Пѣ́снь 8.

Ирмо́съ: Седмери́цею пе́щь [халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки].

Дре́вомъ иногда́ извлече́ отъ рѣки́ сѣки́ру боже́ственный Елиссе́й, преднаписа́въ тя́ издале́ча, Кре́сте Всечестны́й; отъ глубины́ бо пре́лести тобо́ю къ вѣ́рѣ возве́дшеся извѣ́стнѣе, дне́шній де́нь сподобля́емся ви́дѣти и вѣ́рою покланя́тися тебѣ́, объе́млюще спасе́ніе.

Подзна́менова издале́ча тебе́, Кре́сте Всечестны́й, въ благослове́ніихъ Іа́ковъ явле́ннѣе. Мы́ же въ благода́ти удосто́ившеся ви́дѣти тя́, вѣ́рою несумнѣ́нною приступа́емъ вси́ и, каса́ющеся, бога́тное благослове́ніе объе́млемъ, и свѣ́тъ, и спасе́ніе, и прегрѣше́ній разрѣше́ніе.

Убѣли́вшеся дѣя́нми добродѣ́тельными, присту́пимъ воздержа́нія преполове́ніемъ веселя́щеся и облобыза́имъ вѣ́рою Госпо́день Кре́стъ, я́ко да того́ управля́еми си́лою, соверши́мъ тече́ніе въ до́бромъ произволе́ніи и дости́гнемъ Боже́ственную осіява́еми Стра́сть.

Тро́иченъ: Единоесте́ственна, Собезнача́льна, Соприсносу́щна, Сопресто́льна, Естество́ у́бо про́стое, раздѣли́тельное же Ли́цы, Отца́ нерожде́нна, Сы́на и Ду́ха Свята́го, несозда́нное Существо́ и Божество́ вси́ воспѣва́юще пое́мъ: свяще́нницы, благослови́те, лю́діе, превозноси́те во вся́ вѣ́ки.

Богоро́диченъ: Ны́нѣ, я́ко Агнца незло́биваго, зрю́ Тя́ ви́сяща и отъ беззако́нныхъ Кресту́ пригвожда́ема, Сы́не Мо́й Пребезнача́льный, рыда́ньми терза́юся и ма́терскими одержи́ма е́смь болѣ́зньми, — Всечи́стая вопія́ше. Юже гла́сы немо́лчными пои́мъ по до́лгу во вся́ вѣ́ки.

Иный.

Ирмо́съ: Отроки благочести́выя [въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки].

Стра́сть Тебе́, Безстра́стнаго, зря́щи тва́рь, сострада́ше Ти́, Долготерпѣли́ве: со́лнце угаса́ше, ка́меніе же распада́шеся, вся́ земля́ тряса́шеся, стра́хомъ зову́щи: Го́спода по́йте, дѣла́, и превозноси́те во вся́ вѣ́ки.

Звѣре́мъ лю́тымъ тро́стнымъ, Бо́же мо́й Ще́дрый, запрети́, вну́трь мя́ оскорбля́ющимъ, Спа́се, безче́стное досажде́ніе претерпѣ́вый, біе́мь тро́стію, Христе́, почести́ хотя́ вся́ безче́ствованныя преступле́ніемъ дре́внимъ.

Во у́мъ егда́ пріе́млю стра́шное Твое́ суди́ще, Судіе́ Пра́веднѣйшій, трепе́щу и ужаса́юся, страшу́ся и рыда́ю, помышля́я дѣла́ моя́, осужде́нію досто́йная. Тѣ́мже мно́гое Твое́ благоутро́біе, Спа́се, молю́: да не побѣди́тъ Тя́ мно́жество зо́лъ мои́хъ.

Богоро́диченъ: Роди́вшая Тя́ безъ болѣ́зни, болѣ́знемъ въ Твое́мъ распя́тіи подлежу́, опаля́ется утро́ба Моя́: гвоздьми́ бо пригвозди́лся еси́, копіе́мъ въ ре́бра Твоя́ пробода́емь, Долготерпѣли́ве, — Пречи́стая вопія́ше Дѣ́ва. Юже, я́ко Богоро́дицу, согла́сно воспѣва́емъ.

Иный.

Ирмо́съ: Вся́ дѣла́ Бо́жія [и вся́ тва́рь, благослови́те Го́спода, я́ко человѣ́комъ отъ земли́ возсія́ Свѣ́тъ, и вселе́нную всю́ просвѣти́, и жи́знь вѣ́чную мíру дарова́, по́йте, лю́діе, и превозноси́те Его́ во вѣ́ки].

Да то́чатъ го́ры разу́мно пра́вду и хо́лми да веселя́тся, Дре́во Кре́стное покланя́емо ви́дяще, его́же превозно́симъ, Христе́, во вѣ́ки.

Благода́ть Креста́ Твоего́ стра́шная, и́бо де́моновъ изгоня́етъ полки́, человѣ́комъ подаю́щи исцѣле́ній во́ды. Тѣ́мже Тя́ пое́мъ, Христе́, во вѣ́ки.

Благослови́мъ Отца́, и Сы́на, и Свята́го Ду́ха, Го́спода.

[Тро́иченъ:] Безнача́льнаго Отца́, и Сы́на со Святы́мъ воспои́мъ Ду́хомъ, Тро́ицу Единосу́щную, Еди́но Нача́ло и Бо́га хва́ляще, пою́ще Его́ благоче́стно во вѣ́ки.

[И ны́нѣ,] богоро́диченъ: Вся́къ язы́къ земноро́дный пое́тъ Тя́, Дѣ́во, я́ко Свѣ́тъ Непристу́пный возсія́ла еси́, просвѣща́ющій мíръ, Христа́ Бо́га. Его́же превозно́симъ при́сно во вѣ́ки.

Сла́ва Тебѣ́, Бо́же на́шъ, сла́ва Тебѣ́.

Ра́дуются концы́ земнíи поклоне́нію Креста́ Твоего́, Человѣколю́бче, а́нгели на небесѣ́хъ ликовству́ютъ дне́сь съ на́ми, пою́ще Тя́, Христе́, во вѣ́ки.

[Хва́лимъ, благослови́мъ, покланя́емся Го́сподеви, пою́ще и превознося́ще во вся́ вѣ́ки].

Ирмо́съ: Вся́ дѣла́ Бо́жія и вся́ тва́рь, благослови́те Го́спода, я́ко человѣ́комъ отъ земли́ возсія́ Свѣ́тъ, и вселе́нную всю́ просвѣти́, и жи́знь вѣ́чную мíру дарова́, по́йте, лю́діе, и превозноси́те Его́ во вѣ́ки.

Пѣ́снь 9.

Ирмо́съ: Ужасе́ся [о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ].

Исцѣли́лъ еси́, Преблагíй, мое́ сокруше́ніе, на Крестѣ́ пригвожда́емь гвоздьми́ иногда́, рука́ма Твои́ма и нога́ма, Всецарю́, и въ ре́бра пробода́емь, о́цтомъ напая́емь и же́лчію, всѣ́хъ Весе́ліе, сла́дости Сла́во, вѣ́чное Избавле́ніе.

Красе́нъ па́че сапфи́ра и зла́та, свѣтоза́ренъ я́ко со́лнце еси́, боже́ственный Кре́сте, лежа́ у́бо мѣ́стомъ опи́санъ и у́мными си́лами всю́ду окружа́емь стра́шно, луча́ми же Боже́ственными твоея́ си́лы просвѣща́яй вселе́нныя исполне́нія.

Кре́стъ обурева́емыхъ е́сть приста́нище, наста́вникъ блудя́щихъ [заблу́ждшихъ] и утвержде́ніе, сла́ва Христо́ва, си́ла апо́столовъ и проро́ковъ, по́стниковъ — держа́ва, всѣ́хъ человѣ́ковъ — прибѣ́жище. Того́ посредѣ́ предлежа́ща вси́ зря́ще, воздержа́ніемъ лобыза́имъ.

Егда́ и́маши пріити́ на зе́млю суди́ти мíру, его́же созда́лъ еси́, Го́споди, а́нгельскимъ предыду́щимъ Твои́мъ во́инствомъ и Кресту́ просіява́ющу па́че заре́й со́лнечныхъ. Того́ могу́тствомъ уще́дри мя́ и спаси́, па́че всѣ́хъ человѣ́ковъ прегрѣши́вшаго.

Богоро́диченъ: Тлѣ́нія Тя́ кромѣ́ роди́хъ изъ чре́ва, пре́жде вѣ́къ Его́же Оте́цъ роди́, и ка́ко тлѣ́еши? Человѣ́цы терза́ютъ Тя́, Сы́не, и ре́бра ископова́ютъ копіе́мъ, и ру́цѣ съ нога́ма пригвожда́ютъ безчеловѣ́чно, — Всечи́стая вопія́ше. Юже досто́йно велича́емъ.

Иный.

Ирмо́съ: Вся́къ земноро́дный [да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во].

Дре́вомъ Кре́стнымъ пла́мень увяди́лъ еси́ грѣха́, Христе́, ру́цѣ же распросте́ръ, руки́ изба́вилъ еси́ борца́, неудержа́нно просте́ршаго ру́цѣ къ снѣ́ди плода́, его́же еди́наго бѣжа́ти вкуше́нія уста́вилъ еси́, Христе́ Многоми́лостиве.

Стра́сть Твою́, Христе́, всѣ́мъ человѣ́комъ безстра́стіе источа́ющую, чи́сто ви́дѣти сподо́би, въ безстра́стіи покланя́ющіяся Твоему́ Кресту́ Честно́му, грѣхи́ на́ша презира́я и Воскресе́нія и́стиннаго сы́ны содѣ́ловая.

Вознесы́й на́съ па́дшія въ сме́рть, Воскресе́ніемъ Твои́мъ разрѣши́лъ еси́ бра́нь, и Отцу́ Твоему́ на́съ примири́лъ еси́, о на́съ кро́вь Твою́ излія́вый, Благодѣ́телю. Тѣ́мже Тя́ сла́вимъ, я́ко Бо́га, Изба́вителя Всеси́льна.

Богоро́диченъ: Еди́на Бо́жію Му́дрость роди́вшая Ѵпоста́сную, умудри́ мя́, молю́ся, зло́бы мудреца́ убѣжа́ти совѣ́товъ, и ловле́ній, и кова́рствъ, Богоро́дице Дѣ́во Неискусобра́чная, тве́рдое вѣ́рныхъ Прибѣ́жище.

Иный.

Ирмо́съ: Безсѣ́менное Рождество́ [Твое́, Богоро́дице Чи́стая, Христа́ Бо́га на́шего, пѣ́сньми немо́лчными велича́емъ].

Кре́стъ Честны́й, его́же объе́млютъ а́нгельская во́инства, и мы́, кла́няющеся, велича́емъ.

Дре́во пречи́стое, и́мже причасти́хомся жи́зни, пре́жде уме́ршіи, Кре́стъ Спа́совъ велича́емъ.

[Сла́ва,] тро́иченъ: Отца́ Безнача́льна, Сы́на Собезнача́льна и Ду́ха Сопресто́льна, Тро́ицу Святу́ю велича́емъ.

[И ны́нѣ,] богоро́диченъ: Ма́терь безневѣ́стную и Дѣ́ву вси́, Чи́стая, воспѣва́емъ Тя́, безъ сѣ́мене бо Созда́теля родила́ еси́.

Сла́ва Тебѣ́, Бо́же на́шъ, сла́ва Тебѣ́.

Сподо́бившіяся ви́дѣти тя́ и поклони́тися, благопоспѣ́шствуй, предвари́ти пресвяту́ю Стра́сть, Кре́сте Христо́въ.

Ирмо́съ: Безсѣ́менное Рождество́ Твое́, Богоро́дице Чи́стая, Христа́ Бо́га на́шего, пѣ́сньми немо́лчными велича́емъ.

Свѣти́ленъ гла́са.

На стихо́внѣ самогла́сенъ, гла́съ 4:

Истины Истяза́телю и сокрове́нныхъ Ви́дче, Го́споди, фарисе́я, тщесла́віемъ побѣжда́ема и отъ дѣ́лъ добродѣ́тельми оправда́ющася, осуди́лъ еси́; мытаря́ же, со умиле́ніемъ моля́щася и отъ о́наго осужда́ема, оправда́лъ еси́. Его́же покая́нія и на́съ ревни́тели, Распны́йся, покажи́ и оставле́нія сподо́би, я́ко Человѣколю́бецъ. [Два́жды.]

Му́чениченъ: Кто́ не ужаса́ется зря́, святíи му́ченицы, по́двигъ до́брый, и́мже подвиза́стеся! Ка́ко во пло́ти су́ще, безпло́тнаго врага́ побѣди́сте, Христа́ исповѣ́давше, Кресто́мъ вооружи́вшеся! Тѣ́мже досто́йно яви́стеся де́моновъ прогони́теліе и ва́рваровъ борцы́, непреста́нно моли́те спасти́ся душа́мъ на́шимъ.

Сла́ва, и ны́нѣ, самогла́сенъ, гла́съ 8:

Дне́сь Влады́ка тва́ри и Госпо́дь сла́вы на Крестѣ́ пригвожда́ется и въ ре́бра пробода́ется. Же́лчи и о́цта вкуша́етъ сла́дость церко́вная. Вѣнце́мъ отъ те́рнія облага́ется, покрыва́яй не́бо о́блаки. Оде́ждею облачи́тся поруга́нія, и зауша́ется бре́нною руко́ю, руко́ю созда́вый человѣ́ка. По плеще́ма біе́нъ быва́етъ, одѣва́яй не́бо о́блаки. Заплева́нія и ра́ны пріе́млетъ, поноше́нія и зауше́нія, и вся́ терпи́тъ мене́ ра́ди осужде́ннаго, Изба́витель мо́й и Бо́гъ, да спасе́тъ мíръ отъ пре́лести, я́ко Благоутро́бенъ.

Ча́съ 1-й. И отпу́стъ.


НА 6-МЪ ЧАСѢ,
Тропа́рь проро́чества, гла́съ 6:

Кресту́ Твоему́ покланя́емся, Влады́ко, и свято́е Воскресе́ніе Твое́ сла́вимъ.

Проки́менъ, псало́мъ 77-й, гла́съ 6: То́йже е́сть Ще́дръ* и очи́ститъ грѣхи́ и́хъ. Сти́хъ: Внемли́те, лю́діе Мои́, зако́ну Моему́.

Проро́чества Иса́іина чте́ніе. [Глава́ 29.]

Та́ко глаго́летъ Госпо́дь: приближа́ются Мнѣ́ лю́діе сíи усты́ свои́ми и устна́ми свои́ми почита́ютъ Мя́, се́рдце же и́хъ дале́че отстои́тъ отъ Мене́, всу́е же почита́ютъ Мя́, уча́ще за́повѣдемъ человѣ́ческимъ и уче́ніямъ. Сего́ ра́ди се́ Азъ приложу́, е́же пресели́ти лю́ди сія́, и преста́влю я́, и погублю́ прему́дрость прему́дрыхъ и ра́зумъ разу́мныхъ сокры́ю. Го́ре творя́щимъ глубо́ко совѣ́тъ, а не Го́сподемъ, го́ре въ та́йнѣ совѣ́тъ творя́щимъ; и бу́дутъ во тмѣ́ дѣла́ и́хъ, и реку́тъ: кто́ ны́ ви́дѣ и кто́ ны́ уразумѣ́етъ, я́же мы́ твори́мъ? Не я́коже ли бре́ніе скуде́льника вмѣните́ся? Еда́ рече́тъ зда́ніе созда́вшему е́: не ты́ мя́ созда́лъ еси́? или́ творе́ніе сотво́ршему: не разу́мно мя́ сотвори́лъ еси́? Не еще́ ли ма́ло и приложи́тся Лива́нъ, а́ки гора́ Херме́ль, и Херме́ль въ дубра́ву вмѣни́тся? И услы́шатъ въ де́нь о́ный глусíи словеса́ кни́ги (сея́), и и́же во тмѣ́ и и́же во мглѣ́ о́чи слѣпы́хъ у́зрятъ. И возра́дуются ни́щіи ра́ди Го́спода въ весе́ліи, и отча́явшіися человѣ́цы испо́лнятся весе́лія. Исчезе́ беззако́нникъ и поги́бе го́рдый, и потреби́шася вси́ беззако́ннующіи въ зло́бѣ и творя́щіи согрѣша́ти человѣ́ки въ сло́вѣ; всѣ́мъ же, облича́ющимъ во вратѣ́хъ, претыка́ніе положа́тъ, поне́же соврати́ша въ непра́вдахъ пра́веднаго. Сего́ ра́ди та́ко глаго́летъ Госпо́дь на до́мъ Іа́ковль, его́же опредѣли́ отъ Авраа́ма: не ны́нѣ постыди́тся Іа́ковъ, ниже́ ны́нѣ лице́ свое́ измѣни́тъ Изра́иль. Но егда́ уви́дятъ ча́да и́хъ дѣла́ Моя́, Мене́ ра́ди освятя́тъ и́мя Мое́ и освятя́тъ свята́го Іа́ковля, и Бо́га Изра́илева убоя́тся.

Проки́менъ, псало́мъ 78-й, гла́съ 5: Помози́ на́мъ, Бо́же,* Спаси́телю на́шъ. Сти́хъ: Бо́же, пріидо́ша язы́цы въ достоя́ніе Твое́.

[Зри́:] И быва́етъ крестопоклоне́ніе по отпѣ́тіи часо́въ, по послѣ́днемъ Трисвято́мъ. Пое́мъ же стихи́ры, гла́съ 2: Пріиди́те, вѣ́рніи... (листъ 199). И взе́млется Честны́й Кре́стъ, и вно́сятъ его́ въ сосудохрани́тельницу.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 221 – 228.

Служба въ четвертокъ 4-й недѣли поста // Къ оглавленію Постной Тріоди // Служба въ субботу 4-й недѣли поста


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.