Церковный календарь
Новости


2018-11-18 / russportal
Свт. Василій, еп. Кинешемскій. Бесѣда 8-я на Евангеліе отъ Марка (1996)
2018-11-18 / russportal
Свт. Василій, еп. Кинешемскій. Бесѣда 7-я на Евангеліе отъ Марка (1996)
2018-11-18 / russportal
Еп. Григорій (Граббе). Докладъ Архіерейскому Сѵноду РПЦЗ (1996)
2018-11-18 / russportal
Еп. Григорій (Граббе). Психіатрія и исповѣдь (1996)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 49-я (1922)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 48-я (1922)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 47-я (1922)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 46-я (1922)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 45-я (1922)
2018-11-17 / russportal
Ген. П. Н. Красновъ. "За чертополохомъ". Часть 2-я. Глава 44-я (1922)
2018-11-17 / russportal
Еп. Григорій (Граббе). Начало болѣзней (1996)
2018-11-17 / russportal
Еп. Григорій (Граббе). Письмо въ ред. газеты "Новое Русское Слово" (1996)
2018-11-17 / russportal
"Почему правосл. христ. нельзя быть экуменистомъ". 3-е основаніе (1992)
2018-11-17 / russportal
"Почему правосл. христ. нельзя быть экуменистомъ". 2-е основаніе (1992)
2018-11-16 / russportal
Ген. П. Н. Красновъ. "За чертополохомъ". Часть 2-я. Глава 43-я (1922)
2018-11-16 / russportal
Ген. П. Н. Красновъ. "За чертополохомъ". Часть 2-я. Глава 42-я (1922)
Новости въ видѣ
RSS-канала: .
Сегодня - воскресенiе, 18 ноября 2018 г. Сейчасъ на порталѣ посѣтителей - 6.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ СУББОТУ ЧЕТВЕРТЫЯ СЕДМИЦЫ ВЕЛИКАГО ПОСТА.

ВЪ ПЯТОКЪ СРЕДНІЯ СЕДМИЦЫ ВЕЧЕРА,
На Го́споди воззва́хъ... поста́вимъ стихо́въ 10 и пое́мъ самогла́сенъ, два́жды, и 4 му́ченичны гла́са, и въ мине́и 4.
Самогла́сенъ, гла́съ 7:

Страсте́мъ порабо́тивъ души́ моея́ досто́инство, ско́тъ бы́хъ и не могу́ воззрѣ́ти къ Тебѣ́, Вы́шнему, но до́лу преклони́вся, Христе́, я́ко мыта́рь молю́ся, зовы́й Тебѣ́: Бо́же, очи́сти и спаси́ мя́!

Сла́ва, поко́инъ, Іоа́нна Дамаскина́. И ны́нѣ, богоро́диченъ 1-й, гла́са.
Вхо́дъ. Свѣ́те Ти́хій...

Проки́менъ, псало́мъ 79-й, гла́съ 4: Пасы́й Изра́иля, вонми́,* наставля́яй, я́ко овча́, Іо́сифа. Сти́хъ: Сѣдя́й на херуви́мѣхъ, яви́ся.

Бытія́ чте́ніе. [Глава́ 12.]

Рече́ Госпо́дь Авра́му: изы́ди отъ земли́ твоея́, и отъ ро́да твоего́, и отъ до́му отца́ твоего́, и иди́ въ зе́млю, ю́же ти́ покажу́. И сотворю́ тя́ въ язы́къ ве́лій, и благословлю́ тя́, и возвели́чу и́мя твое́, и бу́деши благослове́нъ. И благословлю́ благословя́щія тя́, и клену́щія тя́ проклену́, и благословя́тся о тебѣ́ вся́ племена́ земна́я. И и́де Авра́мъ, я́коже глаго́ла ему́ Госпо́дь, и идя́ше съ ни́мъ Ло́тъ. Авра́мъ же бѣ́ лѣ́тъ седми́десяти пяти́, егда́ изы́де отъ (земли́) Харра́нъ. И поя́тъ Авра́мъ Са́ру, жену́ свою́, и Ло́та, сы́на бра́та своего́, и вся́ имѣ́нія своя́, ели́ка стяжа́ша, и вся́кую ду́шу, ю́же стяжа́ша въ Харра́нѣ, и изыдо́ша поити́ въ зе́млю Ханаа́ню. И про́йде Авра́мъ зе́млю въ долготу́ ея́, да́же до мѣ́ста Сихе́мъ, до Ду́ба Высо́каго. Ханане́и же тогда́ живя́ху въ земли́ (то́й). И яви́ся Госпо́дь Авра́му и рече́ ему́: сѣ́мени твоему́ да́мъ зе́млю сію́. И созда́ та́мо Авра́мъ же́ртвенникъ Го́споду, я́вльшемуся ему́.

Проки́менъ, псало́мъ 80-й, гла́съ 4: Ра́дуйтеся Бо́гу,* Помо́щнику на́шему. Сти́хъ: Пріими́те псало́мъ и дади́те тимпа́нъ.

При́тчей чте́ніе. [Глава́ 14.]

Незло́бивый вѣ́ру е́млетъ вся́кому словеси́, кова́рный же прихо́дитъ въ раска́яніе. Прему́дръ, убоя́вся, уклони́тся отъ зла́, безу́мный же, на себе́ надѣ́явся, смѣшава́ется со беззако́ннымъ. Остроя́ростный безъ совѣ́та твори́тъ, му́жъ же му́дрый мно́гая терпи́тъ. Раздѣля́ютъ безу́мніи зло́бу, кова́рніи же удержа́тъ чу́вство. Попо́лзнутся злíи предъ благи́ми и нечести́віи послу́жатъ предъ две́рьми пра́ведныхъ. Дру́зи возненави́дятъ друго́въ убо́гихъ, дру́зи же бога́тыхъ мно́зи. Безче́стяй убо́гія согрѣша́етъ, ми́луяй же ни́щія блаже́нъ. Заблужда́ющіи (непра́ведницы) дѣ́лаютъ зла́я, ми́лость же и и́стину дѣ́лаютъ благíи. Не вѣ́дятъ ми́лости и вѣ́ры дѣ́лателіе злы́хъ, ми́лостыни же и вѣ́ры — у дѣ́лателей благи́хъ. Во вся́комъ пеку́щемся е́сть изоби́ліе, любосла́стный же и безпеча́льный въ ску́дости бу́детъ. Вѣне́цъ прему́дрыхъ — бога́тство и́хъ, житіе́ же безу́мныхъ зло́. Изба́витъ отъ злы́хъ ду́шу свидѣ́тель вѣ́ренъ, разжиза́етъ же лжи́выя ле́стный. Въ стра́сѣ Госпо́дни упова́ніе крѣ́пости, ча́домъ же свои́мъ оста́витъ утвержде́ніе (ми́ра).


ВЪ СУББОТУ 4-Я СЕДМИЦЫ, НА УТРЕНИ,
Аллилу́ія... И тропари́, гласъ 2:

Апо́столи, му́ченицы [и проро́цы, святи́теліе, преподо́бніи и пра́ведніи, до́брѣ по́двигъ соверши́вшіи и вѣ́ру соблю́дшіи, дерзнове́ніе иму́щіи ко Спа́су, о на́съ Того́, я́ко Бла́га, моли́те спасти́ся, мо́лимся, душа́мъ на́шимъ]. [Два́жды.]

Сла́ва, [ме́ртвенъ]:

Помяни́, Го́споди, [я́ко Бла́гъ, рабы́ Твоя́, и ели́ка въ житіи́ согрѣши́ша, прости́, никто́же бо безгрѣ́шенъ, то́кмо Ты́, могíй и преста́вленнымъ да́ти поко́й].

И ны́нѣ, [богоро́диченъ]:

Ма́ти Свята́я [Неизрече́ннаго Свѣ́та, а́нгельскими Тя́ пѣ́сньми почита́юще, благоче́стно велича́емъ].

И стихосло́віе. Та́же му́ченичны сѣда́льны гла́са. По непоро́чныхъ же пое́мъ тропари́: Святы́хъ ли́къ... И по ектеніи́ —

Сѣда́ленъ ме́ртвенъ, гла́съ 5:

Поко́й, Спа́се нашъ, съ пра́ведными [рабы́ Твоя́, и сія́ всели́ во дворы́ Твоя́, я́коже е́сть пи́сано, презира́я, я́ко Бла́гъ, прегрѣше́нія и́хъ во́льная и нево́льная, и вся́, я́же въ вѣ́дѣніи и не въ вѣ́дѣніи, Человѣколю́бче].

Сла́ва, конецъ. И ны́нѣ, богоро́диченъ:

Отъ Дѣ́вы возсія́вый [мíру, Христе́ Бо́же, сы́ны свѣ́та То́ю показа́вый, поми́луй на́съ].

Та́же кано́нъ мине́и, и свята́го оби́тели, и настоя́щія четверопѣ́снцы, по чи́ну и́хъ.

Четверопѣ́снецъ, его́же краегране́сіе: Пѣ́снь на му́ченики, господи́на Іо́сифа. И стихосло́вятся пѣ́сни. Гла́съ 4.
Пѣ́снь 6.

Ирмо́съ: Пучи́ною жите́йскою [дѣя́ньми мои́ми снидо́хъ во а́дъ, но, я́ко отъ ки́та Іо́на, та́ко вопію́: изъ глубины́ зо́лъ возведи́, молю́ся, Сы́не Бо́жій и Сло́ве].

Преидо́сте предѣ́лы плотскíя, страда́льцы, мно́гимъ терпѣ́ніемъ, претерпѣ́вше му́ки и болѣ́зни, тѣ́мже вся́кую болѣ́знь и ско́рбь облегча́ете ва́съ воспѣва́ющихъ.

Тма́мъ а́нгелъ во́инство совокупи́ся святы́хъ страстоте́рпецъ и мо́литъ Всеблага́го Бо́га согрѣше́ній тмочи́сленныхъ на́съ изба́вити, я́ко Христу́ угоди́вшіи.

Умертви́вся и во гро́бѣ, Христе́, усну́въ, возста́вилъ еси́ ме́ртвыя, и въ вѣ́рѣ уме́ршимъ дае́ши бла́гости бога́тство, Христе́, поко́й я́ со всѣ́ми святы́ми.

Богоро́диченъ: Бо́жіе Бо́гъ Сло́во, ища́й обожи́ти человѣ́ка, Чи́стая, изъ Тебе́ воплоща́ется и зе́мленъ ви́дится. Его́же непреста́нно моли́ обрѣсти́ на́мъ ми́лость во вре́мя отвѣ́та.

Иный, господи́на Ѳео́дора, гла́съ то́йже.

Ирмо́съ: Бу́рею грѣхо́вною [погружа́емь, я́ко во чре́вѣ ки́товѣ содержи́мь, съ проро́комъ зову́ Ти: возведи́ отъ тли́ живо́тъ мо́й, Го́споди, и спаси́ мя].

Пло́ти и кро́ве, святíи, не пощадѣ́вше, ко вся́кому муче́нію ста́сте небоя́зненни, Христа́ не отмѣта́ющеся, тѣ́мже съ небе́съ низпосла́ Христо́съ ва́мъ вѣнцы́.

Му́ченикъ торжество́ усря́щимъ, просвѣти́вшеся дѣ́тельми, и возопіи́мъ богодухнове́нными пѣ́сньми: вы́ есте́ вои́стинну денни́цы на земли́, Христо́вы му́ченицы.

[Сла́ва,] тро́иченъ: Тро́ице Свята́я, сла́влю Тя́, Естество́ безнача́льное, еди́наго Бо́га, еди́наго Го́спода, Три́ Ли́ца, Отца́, Сы́на и Ду́ха, Нерожде́нна, Рожде́нна, Исхо́дна, Ту́южде и Присносу́щну.

[И ны́нѣ,] богоро́диченъ: О, Блаже́нная Богоневѣ́сто, ка́ко родила́ еси́ безъ му́жа и пребыла́ еси́, я́коже пре́жде? Бо́га бо родила́ еси́, чу́до стра́шное! Но моли́ спасти́ся пою́щимъ Тя́.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Му́чениченъ: Усѣче́нія удо́въ ва́шихъ зря́ще, наслажда́стеся кровми́ ра́дующеся. Но моли́те о на́съ прилѣ́жно Го́спода, му́ченицы присносла́вніи.

Сти́хъ: Ду́ши и́хъ во благи́хъ водворя́тся.

Отъ земли́ созда́вый мя́, и оживи́вый мя́, и въ зе́млю возврати́тися мнѣ́ па́ки рекíй, я́же прія́лъ еси́ рабы́ Твоя́ упоко́й и отъ тли́ сме́ртныя возведи́, Го́споди.

Ирмо́съ: Бу́рею грѣхо́вною погружа́емь, я́ко во чре́вѣ ки́товѣ содержи́мь, съ проро́комъ зову́ Ти: возведи́ отъ тли́ живо́тъ мо́й, Го́споди, и спаси́ мя.

Конда́къ, [гла́съ 8]:

Со святы́ми упоко́й, [Христе́, ду́ши ра́бъ Твои́хъ, идѣ́же нѣ́сть болѣ́знь, ни печа́ль, ни воздыха́ніе, но жи́знь безконе́чная].

Икосъ:

Са́мъ Еди́нъ еси́ Безсме́ртный, [сотвори́вый и созда́вый человѣ́ка: земнíи у́бо отъ земли́ созда́хомся и въ зе́млю ту́южде по́йдемъ, я́коже повелѣ́лъ еси́, созда́вый на́съ, и рекíй на́мъ: я́ко земля́ еси́ и въ зе́млю оты́деши, а́може вси́ человѣ́цы по́йдемъ, надгро́бное рыда́ніе творя́ще пѣ́снь: Аллилу́ія, Аллилу́ія, Аллилу́ія].

Пѣ́снь 7.

Ирмо́съ: Образу злато́му [не поклони́вшеся, о́троцы авра́амстіи искуша́хуся, я́ко зла́то въ горни́лѣ, въ пещи́ о́гненнѣй, я́ко въ черто́зѣ свѣ́тлѣмъ, ликую́ще, поя́ху: благослове́нъ еси́, Бо́же оте́цъ на́шихъ].

Обо́лкшеся, страда́льцы, въ нетлѣ́ніе боже́ственное обнаже́ніемъ тлѣ́нныя пло́ти, на́съ ра́ди пло́ть отъ нетлѣ́нныя Пріе́мшему Жены́, ны́нѣ предстоите́, свѣ́тліи. Сего́ ра́ди мя́ облецы́те во оде́жду свяще́нную, обнаже́ннаго зло́бою.

Воздержа́ніемъ пожи́вый, страда́льческій собо́ръ, воздержа́нія на́съ по́прище укрѣпи́те тещи́ невозбра́нно, я́ко проповѣ́давый Христа́ на по́прищи му́жественно и предстоя́й престо́лу, вѣнцено́сный, въ наслажде́ніи мы́сленно со а́нгелы.

Моли́твами, Бо́же, Твои́хъ святы́хъ му́ченикъ усо́пшія вѣ́рно рабы́ Твоя́ рая́ жи́тели покажи́ и свѣ́та мы́сленнаго сподо́би я́, непреста́нно вопію́щія Тебѣ́: благослове́нъ, Бо́гъ отце́въ на́шихъ.

Богоро́диченъ: Тя́, еди́ну Благу́ю, мо́лимъ, Дѣ́во, озло́бленныя ны́ ублажи́ и прилѣ́жно Христа́ моли́, естество́мъ су́ща Блага́го, воздержа́нія вре́мя, блага́я дѣ́ющимъ, испо́лнити на́мъ пою́щимъ Его́: благослове́нъ, Бо́гъ отце́въ на́шихъ.

Иный.

Ирмо́съ: Глаго́лавый на горѣ́ [съ Моисе́омъ и о́бразъ дѣ́вства явле́й въ купинѣ́, благослове́нъ еси́, Бо́же оте́цъ на́шихъ].

Возвели́чивый святы́я Твоя́ вся́, зна́меньми удиви́въ я́ въ мíрѣ, благослове́нъ еси́ во вѣ́ки, Го́споди Бо́же отце́въ на́шихъ.

Вся́кій ви́дъ ра́нъ проше́дше и колѣ́на Ваа́лу не поко́ршеся преклони́ти, вѣнцы́ сла́вы взя́сте отъ Бо́га, Христо́вы му́ченицы.

[Сла́ва,] тро́иченъ: Во Еди́ницѣ, Тро́ице, покланя́емое Существо́, Отче, Сы́не и Ду́ше, воспѣва́ющія Тя́ сохраня́й, Бо́же отце́въ на́шихъ.

[И ны́нѣ,] богоро́диченъ: Дѣ́во Ма́ти, Отрокови́це Всесвѣ́тлая, еди́но къ Бо́гу Хода́тайство, не преста́й, Влады́чице, моли́ти спасти́ся на́мъ.

Сти́хъ: Святы́мъ, и́же су́ть на земли́ Его́, удиви́ Госпо́дь [вся́ хотѣ́нія Своя́ въ ни́хъ].

Безсме́ртному Царю́ во́инствовавше и вѣ́ру къ Нему́ показа́вше соверше́нную, кро́вь свою́, му́ченицы, за Него́ излія́сте.

Сти́хъ: Блаже́ни, я́же избра́лъ и прія́лъ еси́, Го́споди, [и па́мять и́хъ въ ро́дъ и ро́дъ].

Идѣ́же свѣ́тъ Тво́й жи́зни истека́етъ, преложи́, я́же преста́вилъ еси́ отъ вре́менныхъ вѣ́рныя Твоя́ рабы́, Го́споди Бо́же оте́цъ на́шихъ.

Ирмо́съ: Глаго́лавый на горѣ́ съ Моисе́омъ и о́бразъ дѣ́вства явле́й въ купинѣ́, благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Во огни́ пла́меннѣмъ [предстоя́тъ Тебѣ́ херуви́ми, серафи́ми, Го́споди, и вся́ тва́рь пѣ́снь Тебѣ́ пое́тъ кра́сную: по́йте, благослови́те, лю́діе, превозноси́те Христа́, еди́наго Содѣ́теля, во вся́ вѣ́ки].

Великоимени́тіи Христо́вы страда́льцы и честнíи въ Бо́зѣ, вся́ воспѣва́ющія па́мяти ва́ша вели́кихъ согрѣше́ній и та́мошнихъ му́къ изба́вите ны́ къ Нему́ ва́шими вели́кими моли́твами.

Святоизбра́нное Христа́ Бо́га и тве́рдое вои́стинну во́инство, му́ченикъ собо́ры, освяти́те на́шъ у́мъ и се́рдце въ сія́ святы́я дни́ по́стныя ва́шими святы́ми моли́твами.

Изба́ви че́рвія му́чащаго и скре́жета зу́бнаго, Го́споди, и внѣ́шнія тмы́ несвѣти́мыя вся́, я́же вѣ́рою прія́лъ еси́, и учини́ сія́, идѣ́же свѣ́тъ лица́ Твоего́, Христе́, сія́етъ во вѣ́ки.

Богоро́диченъ: Кре́стъ Христо́въ честны́й, Богоро́дице Чи́стая, ви́дѣвшія и отъ се́рдца поклони́вшіяся ны́, Твои́ми ко Влады́цѣ сподо́би моли́твами ви́дѣти и Стра́сти честны́я, страсте́й очище́нныхъ.

Иный.

Ирмо́съ: Земля́ и вся́, я́же на не́й, [мо́ре и вси́ исто́чницы, небеса́ небе́съ, свѣ́тъ и тма́, мра́зъ и зно́й, сы́нове человѣ́честіи, свяще́нницы, благослови́те Го́спода и превозноси́те Его́ во вѣ́ки].

О, до́браго измѣне́нія! Имже обрѣто́сте сме́ртію живо́тъ, священному́ченицы Христо́вы, огня́ и меча́, мра́за и звѣре́й ника́коже убоя́вшеся, и вопію́ще: по́йте Го́спода и превозноси́те во вся́ вѣ́ки.

Горѣ́ ли́къ а́нгельскій, до́лѣ же мы́, земнíи, хва́лимъ, му́ченицы Христо́вы, стра́нная страда́нія и по́двиги ва́шего му́жества, благословя́ще, пою́ще Го́спода и превознося́ще во вся́ вѣ́ки.

Благослови́мъ Отца́, и Сы́на, и Свята́го Ду́ха, Го́спода.

[Тро́иченъ:] Свѣ́тъ, Живо́тъ же и Животы́, почита́ю Тя́, Отца́ и Сы́на и Ду́ха исхо́дна, Естество́ Еди́но, Три́ Ѵпоста́си, Бо́га Еди́наго поя́, благословлю́ Тя́, пою́ Тя́, Го́спода, и превозношу́ Тя́ во вся́ вѣ́ки.

[И ны́нѣ,] богоро́диченъ: Кто́ не воспое́тъ Тя́ отъ земноро́дныхъ, Нескве́рная Чи́стая Голуби́це? Ты́ бо родила́ еси́ на́мъ Свѣ́тъ вели́кій, жи́зни Бога́тство, Іису́са Спа́са, Его́же пое́мъ хва́ляще, я́ко Го́спода, и превозно́симъ во вся́ вѣ́ки.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

По́двиги чу́дныя, му́ченицы, сла́вяще ва́ша, Благодѣ́теля и Бо́га благослови́мъ и покланя́емся, на по́прище по́двиговъ ва́съ укрѣпи́вшаго, Его́же превозно́симъ во вся́ вѣ́ки.

Сти́хъ: Ду́ши и́хъ во благи́хъ водворя́тся.

Ты́, сме́рти и живота́ Госпо́дь сы́й и Бо́гъ, преста́вльшихся благоче́стно воздвиза́яй, та́мо преложи́ въ селе́ніихъ пра́ведныхъ, благословя́щія, пою́щія Тя́, Го́споди, и превознося́щія во вся́ вѣ́ки.

[Хва́лимъ, благослови́мъ, покланя́емся Го́сподеви, пою́ще и превознося́ще во вся́ вѣ́ки].

Ирмо́съ: Земля́ и вся́, я́же на не́й, мо́ре и вси́ исто́чницы, небеса́ небе́съ, свѣ́тъ и тма́, мра́зъ и зно́й, сы́нове человѣ́честіи, свяще́нницы, благослови́те Го́спода и превозноси́те Его́ во вѣ́ки.

Пѣ́снь 9.

Ирмо́съ: Яко сотвори́ Мнѣ́ [вели́чія Си́льный и свя́то и́мя Его́, и ми́лость Его́ въ ро́дъ и ро́дъ боя́щимся Его́].

Свѣти́льницы су́ще неле́стніи, Христо́вы страда́льцы, просвѣти́те на́ша по́мыслы, утверди́те твори́ти свѣтоза́рная и чи́стая Бо́жія хотѣ́нія.

Ору́жія зрите́ся закала́ющая враги́, до́бліи Христо́вы страда́льцы, но изба́вите на́съ отъ стрѣ́лъ лука́ваго предста́тельствы ва́шими.

Поко́й, Ще́дре, въ нѣ́дрѣхъ Авраа́мовыхъ рабы́ Твоя́, вѣ́рою отъ на́съ отше́дшія къ Тебѣ́, вся́ческихъ Зижди́телю и Преблаго́му.

Богоро́диченъ: Пло́ти моея́ умертви́ движе́нія, Бо́га пло́тію Ро́ждшая па́че ума́, и пода́ждь просвѣще́ніе мы́сли мое́й, чи́стый Облакъ су́щи Свѣ́та.

Иный.

Ирмо́съ: Велича́емъ вси́ [человѣко́любіе Твое́, Христе́, Спа́се на́шъ, Сла́во ра́бъ Твои́хъ и Вѣ́нче вѣ́рныхъ, возвели́чивый па́мять Ро́ждшія Тя́].

Воспѣва́емъ вси́ па́мяти ва́ша, му́ченицы прехва́льніи, по́двиги ви́дяще свяще́нныхъ ва́шихъ страда́ній и, удиви́вшеся, Христа́ велича́емъ.

Дру́гъ ко дру́гу, стра́ждуще, глаго́лаху страстоте́рпцы: пло́ти не пощади́мъ, пріиди́те у́мремъ о Христѣ́, да во вся́ вѣ́ки поживе́мъ, лику́юще непреста́нно.

[Сла́ва,] тро́иченъ: О, Тро́ице во еди́номъ Естествѣ́! Тя́ воспѣва́ющія, Отче нерожде́нный, и рожде́нный Сы́не, и Ду́ше исхо́дный, Твое́ю ми́лостію невреди́мы соблюди́.

[И ны́нѣ,] богоро́диченъ: Ра́дуйся, Всечестна́я Чи́стая, дѣ́вства похвало́, ма́терей утвержде́ніе, человѣ́ковъ по́моще и мíра ра́досте, Марíе Ма́ти и Рабо́ Бо́га на́шего.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Ли́че святы́хъ, пріими́ мольбу́ мою́, и я́ко сподо́билъ мя́ еси́ Кре́стъ цѣлова́ти, и спаси́тельнѣй Стра́сти поклони́тися мнѣ́, Христа́ моли́те.

Сти́хъ: Блаже́ни, я́же избра́лъ и прія́лъ еси́, Го́споди, [и па́мять и́хъ въ ро́дъ и ро́дъ].

Осла́би, оста́ви, Ще́дре, къ Тебѣ́, Человѣколю́бцу, преста́вленнымъ, и си́хъ поко́й въ селе́ніихъ избра́нныхъ, Ты́ бо еси́ Жи́знь и Воскресе́ніе.

Ирмо́съ: Велича́емъ вси́ человѣко́любіе Твое́, Христе́, Спа́се на́шъ, Сла́во ра́бъ Твои́хъ и Вѣ́нче вѣ́рныхъ, возвели́чивый па́мять Ро́ждшія Тя́.

Ексапостила́ріи пи́саны въ суббо́ту 2-ю поста́ (ли́стъ 157 на оборо́тѣ):

[Не́бо звѣзда́ми украси́вый, я́ко Бо́гъ, и Твои́ми святы́ми всю́ зе́млю просвѣти́вый, Содѣ́телю всѣ́хъ, пою́щія Тя́ спаса́й.

Сла́ва:

Живы́ми и ме́ртвыми облада́яй, я́ко Богъ, упоко́й Твоя́ рабы́ въ селе́ніихъ избра́нныхъ, а́ще бо и согрѣши́ша, Спа́се, но не отступи́ша отъ Тебе́.

И ны́нѣ, богоро́диченъ:

Сла́дость а́нгеловъ, скорбя́щихъ ра́дость, христіа́нъ предста́тельнице, Дѣ́во, Ма́ти Госпо́дня, заступи́ на́съ и изба́ви вѣ́чныхъ му́къ].

На хвали́техъ му́ченичны гла́са.

На стихо́внѣ же подо́бны господи́на Ѳео́фана.


НА ЛИТУРГІИ,

Изобрази́тельная и блаже́нны гла́са. Проки́менъ Апо́стола, ме́ртвенъ: [Проки́менъ, гла́съ 8: Весели́теся о Го́сподѣ и ра́дуйтеся, пра́ведніи. Сти́хъ: Блаже́ни, и́хже оста́вишася беззако́нія и и́хже прикры́шася грѣси́. Другíй, гла́съ 6: Ду́ши и́хъ во благи́хъ водворя́тся.]. Апо́столъ, зача́ло 313. И за упоко́й, къ Кори́нѳяномъ, зача́ло 163. Аллилу́ія, ме́ртвенъ: [Аллилу́ія, гла́съ 4: Воззва́ша пра́ведніи и Госпо́дь услы́ша и́хъ, и отъ всѣ́хъ скорбе́й и́хъ изба́ви и́хъ. Сти́хъ: Мно́ги ско́рби пра́веднымъ и отъ всѣ́хъ и́хъ изба́витъ я́ Госпо́дь. Сти́хъ: Блаже́ни, я́же избра́лъ и прія́лъ еси́, Го́споди, и па́мять и́хъ въ ро́дъ и ро́дъ.] Ева́нгеліе Ма́рка, зача́ло 31. И за упоко́й, отъ Іоа́нна, зача́ло 16. Прича́стенъ: Ра́дуйтеся пра́ведніи о Го́сподѣ, [пра́вымъ подоба́етъ похвала́]. Другíй, за упоко́й: Блаже́ни, я́же избра́лъ [и прія́лъ еси́, Го́споди, и па́мять и́хъ въ ро́дъ и ро́дъ].

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 228 – 131 об.

Служба въ пятокъ 4-й недѣли поста // Къ оглавленію Постной Тріоди // Служба въ недѣлю 4-ю Великаго поста


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.